ཤར་ཆེན་ཀླུ་ལྡིང་མཁན་ཆེན་རྡོ་རྗེ་འཆང་གི་གསོལ་འདེབས་དྲང་སོང་བདེན་སྨོན་རྡོ་རྗེའི་གླུ་དབྱངས་ཞེས་བྱ་བ་བཞུགས་སོ།།
འཇམ་དཔལ་དཔའ་བོའི་སྤོབས་པའི་གཏེར་ཆེན་ཚོགས།།
དབྱངས་ཅན་དགའ་མས་ཅིག་ཏུ་སྤུངས་པའི་དཔྱིད།།
བསྟན་པའི་སྤྱི་ནོར་སྲིད་མུན་དྲུང་འབྱིན་པའི།།
ཐེག་ཆེན་ཆོས་ཀྱི་ཉི་མ་འཚོ་གཞེས་གསོལ།།
བྱམས་པའི་དཔལ་གོས་བརྩེ་བའི་གེ་སར་ཅན།།
དམིགས་མེད་སྙིང་རྗེ་ཡལ་འདབ་འབོལ་བའི་ཁྲོད།།
ཟབ་དགུའི་མཁྱེན་རྟོགས་འདབ་སྙིང་དགོད་པའི་ཕུལ།།
རྣམ་འདྲེན་བྱེ་བའི་གཙུག་རྒྱན་འཚོ་གཞེས་གསོལ།།
ཆོས་ཅན་ཀུན་བརྟག་སྣང་ཆ་ཇི་སྙེད་ཚོགས།།
གཞན་དབང་གདན་གསུམ་དཀྱིལ་འཁོར་རོལ་མོར་འཆར།།
ཆོས་ཉིད་ཡོངས་གྲུབ་བདེ་ཆེན་ཡེ་ཤེས་ཀྱི།།
དོན་སྟོན་གསུང་གསང་འཛིན་པ་འཚོ་གཞེས་གསོལ།།
ཚོགས་གཉིས་ནོར་འཛིན་མ་མས་བསྐྱེད་བསྲིངས་པའི།།
རྣམ་གསུམ་ཁྲིམས་ཀྱི་ནོར་བུའི་རྐང་འཐུང་མཆོག།
དོན་གཉིས་འབྲས་བུའི་གཡུར་ཟ་ཁུར་ལྡན་སྐུ།།
མི་ཤིགས་རྡོ་རྗེའི་ཆོས་བདུན་གྲུབ་པར་སྨོན།།
རྩེ་གཅིག་གསོལ་བའི་མ་ལ་ཡ་རླུང་གིས།།
རྗེས་བརྩེའི་སྤྲིན་སྔོན་ཕུང་པོ་གཡོ་བ་ལས།།
གྲུབ་གཉིས་བདུད་རྩིའི་ཐིག་ཕྲེང་ཕེབས་པ་དང་།།
སྐུ་བཞིའི་འབྲས་བཟང་མཆོག་གི་སྨོན་པ་སྩོལ།།
ཞེས་པའང་བསྟོད་ཡུལ་ཉིད་ལ་དད་པའི་སློབ་བུ་རྣམས་ཀྱི་རེ་སྐོང་ཕྱིར།ཤར་པ་མཁན་མཉྫུའི་མིང་ཅན་གྱི་སྨྲས་པ་དོན་ཅན་དུ་གྱུར་ཅིག།སརྦ་མངྒ་ལཾ།།དགེའོ།།པར་འདི་འབྲས་ལྗོངས་ས་ངོར་ཆོས་ཚོགས་སུ་བཞུགས་སོ།།
Leave a Reply