རྩོམ་པ་པོ། ཨ་འདུས།
མཚན་དཔེའི་ཆུ་གཏེར་འདུལ་བྱའི་དོན་དུ་བཞད། །
དམ་པའི་ཚུལ་དགུའི་ནོར་གྱིས་ཐུབ་བསྟན་བསྐྱངས། །
མན་ངག་ནོར་བུ་བྱེ་བའི་གདེང་ཀ་ཅན། །
ཨ་ཡི་མཚན་ཅན་ཀླུ་སྒྲུབ་གཉིས་པ་དྲན། །
བཅུ་ཕྲག་རིག་པའི་རྦ་རླབས་མ་ཞུམ་ཞིང་། །
འཆད་རྩོད་རྩོམ་པའི་ནོར་བུས་མ་ཕོང་བར། །
དཔྱོད་ལྡན་དེད་དཔོན་འདུ་བའི་ཆུ་གཏེར་དེར། །
མཁས་པའི་འབྱུང་གནས་ཞེས་པའི་སྙན་པ་འཕུར། །
བཀོད་ལེགས་ཁང་བཟང་ལྷ་ཡི་ཕོ་བྲང་འདྲ། །
ལྗང་མདོག་ནེའུ་གསེང་གཡུ་ཡི་མནྜལ་དངོས། །
གསེར་གྱི་རྒྱ་ཕིབས་ཉི་མ་བྱེ་བའི་མདངས། །
མིག་ལ་མངོན་པས་དད་ལྡན་དགའ་བར་བྱེད། །
གཡས་སུ་གངྒའི་ལྷ་མོའི་ཞབས་བསིལ་མཛེས། །
གཡོན་དུ་ནེ་ར་ཛ་ཉའི་དྲི་ཆབ་འཁྱིལ། །
གམ་ན་མྱ་མེད་ཀྱི་རྡོ་རིང་བརྗིད། །
གནས་འདི་ལྷ་ཡི་བཟོ་བོས་བཀོད་པ་བཞིན། །
རྒྱབ་རི་བཀྲ་ཤིས་སྐྱེ་བ་ལྔ་བའི་དུང་། །
མདུན་རི་བློན་པོ་འདུད་པའི་རྣམ་པ་ཅན། །
ངོ་མཚར་མཚན་དཔེས་འཁྱུད་པའི་གསང་བ་ཀུན། །
མིག་སྟོང་ལྡན་པས་བརྩིས་ཀྱང་རྙེད་མ་ཡིན། །
རྣམ་དག་ཁྲིམས་ཀྱི་རྩ་བ་ཤིན་ཏུ་བརྟན། །
ཐོས་བསམ་སྒོམ་པའི་ལོ་འདབ་ཕྱོགས་སུ་རྒྱས། །
གཞན་ཕན་ཁུར་གྱི་མེ་ཏོག་རྒྱས་པ་ཡི། །
མ་ཡུམ་སློབ་གྲྭའི་དགའ་ཚལ་ལྟ་ན་སྡུག །
མང་ཐོས་ཤེས་བྱའི་ནགས་ཀླུང་ཡངས་པོ་དེར། །
སྣ་མང་རིག་པའི་ཁུ་བྱུག་བརྒྱ་ཕྲག་གིས། །
འཕགས་བོད་གཞུང་བརྒྱའི་དཔྱིད་དཔལ་བསུས་པའི་གཏམ། །
སྙན་ངག་མཁན་པོའི་ཚིག་གིས་ཕྲིས་མ་ཡིན། །
ཅེས་པའང་ཕྱི་ལོ་ ༢༠། ༦། ༡༡། གུང་སེང་ཉིན་མོར་སྙན་ངག་འཛིན་གྲྭའི་སློབ་གྲོགས་ཚོའི་ཆེད་དུ་ཨ་འདུས་པས་ཞོགས་པའི་ཇ་ཐུན་ཙམ་ལ་ཤར་མར་བྲིས་པའོ། །
Leave a Reply