མེ་ཚང་།
བདག་མ་ཐུབ་པ་དེ་དག
སེམས་ཀྱི་སྟོང་ས་ཞིག་ཏུ་བསགསཏེ
གད་སྙིགས་བཞིན་སུངས་དྲི་ཁྱབ་པ་ཞིག་ཏུ་གྱུརད།
ཁ་བྱང་གི་འགྲེལ།
སེམས་གཅོང་ནང་གི་རྒྱང་རིང
ཡེ་གེའི་ནགས་ཚལ་ཁྲོད་དུ་བོར་སོང
ཤ་ཁྲག་གི་གསེང་དུ་བསྙལ་བའི་དབྱངས་གསལ
བོར་སྟོར་གྱི་སྲང་ལམ་ཞིག་གི་སྐྱོ་སྣང་རུམ་དེ
དུས་ཚོད་ཀྱི་སྐུད་སྣེ་རུ་ས་རྡུལ་བཞིན་ཟེགས་དུས
ང་ཡི་འཇམ་མཉེན་གྱི་ལག་པའི་ནང་དུ
རྩི་བཅུད་མེད་བའི་མེ་ཏོག་རྙིད་པོ་ཞིག་དང
དབྱངས་གསལ་བོར་བའི་སེམས་པ་སྟོང་བ་ཞིག
ད་དུང་འགྱོད་གདུང་ནང་ལ་སྨུག་པ་འཐིབས་པ
ཡོད་ཚད་ལ་ཟིང་འཁྲུག་སློང་བར་རྩོམ་བཞིན་ཡོད
ང་ཡི་ཐོར་ཞིག་ཏུ་སོང་བའི་ནང་སེམས་དེ་ཡང
ནམ་ཞིག་གི་རྗེས་ནས་སྡོང་བོ་བཞིན་དུ
རྨི་ལམ་དང་ཁ་ཕྱོགས་མེད་པར་གྱུར་འགྲོ
2021-8-16 གྲུབ།
མ་བཀུག་ངང་གིས་གྲགས་པའི་གཞས་ཆུང་ཞིག་གིས།།
འཁོར་བའི་སྣང་བརྙན་གསོན་པོ་དབྱངས་སུ་འཐེན་བཞིན།།
སྐྱིད་སྡུག་སྤྲིན་གྱི་རི་མོའི་ལ་ཤན་འབྱེད་པས།།
དཔྱིད་དཔལ་སེམས་ཀྱི་དྲན་པ་རི་ལ་བསྐྱལ་སོང་།།
ལྗང་མདོག་གོས་ཀྱིས་མཛེས་པའི་དབྱར་གྱི་སྤང་ལྗོངས།།
དཀར་དམར་མེ་ཏོག་གཞོན་ནུའི་སྐྱེད་ཚལ་མིན་ཡང་།།
སྣང་མཐོ་གཡུ་སྦྲང་བུ་མོའི་སེམས་ཀྱི་གཞིས་ཀ།
སྔོན་བསགས་ལས་ཀྱི་འཕེན་པས་གཤིས་སུ་གྲུབ་ཡོད།།
རྣམ་འགྱུར་བཅོས་མས་འཚོ་བའི་མི་ཚོགས་དབུས་སུ།།
སྙིང་གཏམ་སྙིང་དང་འདྲ་བ་སྐྱེས་སུ་ཕུལ་ཡང་།།
ང་ཁྱོད་སོ་སོར་དབྱེ་བའི་རང་གཤིས་དེ་ཡིས།།
དོན་གྱི་གནས་ལུགས་མཐོང་བ་དཀོན་མོ་ལོས་ཡིན།།
ཆར་བའི་བཞུར་རྒྱུན་འདི་ཉིད་གཞན་དང་མི་འདྲ།།
རི་ཆུའི་བཀོད་པ་འདིའང་གཞན་དང་མི་མཚུངས།།
ལྷ་ཡུལ་ས་ལ་བབས་འདྲའི་གནས་མཆོག་འདི་ལ།།
ཤི་ཡང་སེམས་པ་ཐོགས་པའི་བྱིན་རླབས་འདུག་གོ།
ནམ་རྒྱུན་སེམས་ཀྱི་མེ་ལོང་བྱི་དོར་བྱས་ཀྱང་།།
སེམས་སོང་བྱམས་པའི་ཞལ་ཆུང་བསུབ་ཐབས་མི་འདུག།
སྐད་གདངས་གཉོམ་པོ་ཞིག་གི་སྡིག་སྒྲིབ་ཀློང་ནས།།
མི་འགྱུར་ལས་དབང་རྒྱལ་མོར་ཨུ་ཚུགས་བྱས་སོང་།།
ཆར་བ་ཟམ་ཟིམ་འབབ་བཞིན་གནམ་གྱི་ངོགས་སུ།།
སྨུག་ནག་སྤྲིན་གྱི་ཡོ་ལང་མིག་ལ་གཟན་ཀྱང་།།
འཇིག་རྟེན་མོག་པོར་བྱེད་པའི་རི་ཆུའི་མཛེས་པ།།
ཁྱོད་ཀྱི་འབད་སྩོལ་ཁོ་ནས་བསྐྲུན་པ་མཚར་བ།།
སྣང་སེམས་ཐ་དད་མེད་པའི་གནས་ལུགས་ཤིག་ལ།།
སུས་ཀྱང་བཟང་ངན་དབྱེ་བ་འབྱེད་པར་དཀའ་ཡང་།།
གཉིས་འཛིན་རྡོ་ལྟར་སྲ་བའི་སོ་སྐྱེས་བློ་འདིར།།
དགྲ་གཉེན་དགའ་སྐྱོའི་གཞི་དེར་ཕྱོགས་རེས་ལོས་ཡོད།།
ཞེན་ཆགས་སྲིད་པའི་རྡོ་རིང་རྙིང་པར་གྱུར་ཞིང་།།
བརྩེ་བ་སེམས་ཀྱི་དམུ་ཐག་སྐྱ་བོར་གྱུར་པའི།།
ཁྱོད་ལ་ཡང་ཡང་ཕྱོགས་པའི་བདག་གི་ཁ་སེམས།།
སྟོད་ཀྱི་རྡོ་རྗེ་གདན་དེར་ཅིས་ཀྱང་མཚུངས་ཨང་།།
འཁོར་བ་བྱ་ཚང་འདྲ་ཞིག་དོན་དུ་གཉེར་ནས།།
སྒྱུ་ལུས་རྒུད་པར་གྱུར་ཡང་འགྱོད་པ་མེད་པའི།།
བདག་གི་གཉེན་ཉེ་འདི་ཚོའི་ལས་དབང་འདི་ཉིད།།
བྱེད་པོ་སེམས་ནག་ཅིག་གི་བཀོད་སྒྲིགས་ཡིན་ནམ།།
ཡོད་ན་ལས་འཕྲོ་བཟང་པོའི་མཐུན་རྐྱེན་ལོས་ཡིན།།
མེད་ཀྱང་སྔོན་བསགས་འབྲས་བུ་ཞན་པས་ཡིན་སྲིད།།
ཕྱི་མའི་ལམ་ཆེན་དེ་ཉིད་སུས་ཀྱང་མཐོང་བས།།
ཤི་ཡང་སེམས་ཁ་བདེ་བའི་ལམ་རྒྱགས་ཡོད་དམ།།
2021 7 5