འབུམ་ལྷ་སྲས།
སྣ་ཚོགས་འཚོ་བའི་འཇའ་ཚོན་དག །
ཚིག་གི་ཏིང་ཤགས་ལ་བརྒྱུས་ཤིང་། །
ཆད་མེད་གདངས་ཀྱིས་ཁམས་འདི་བཀང་། །
དགའ་སྡུག་འགལ་འདུས་དཔྱད་པ་གནང་། །
དབེན་རིའི་མཆོག་དང་གྲོང་རྡལ་འགྲམ། །
བདག་གི་མི་ཚེ་ཡང་ཡང་བཞད། །
དེ་ཉིད་དབྱངས་གསལ་འགྲོས་ལས་མངོན། །
ཡུན་རིང་བསྙལ་བའི་དགུན་ཆང་ཙམ། །
ངེས་འབྱུང་སྨུག་པ་འདུས་པའི་རྐྱེན། །
སུན་སྣང་གླིང་བུ་བུས་པ་མོད། །
དགའ་བརྩེའི་སྲིད་པར་ཞུགས་དང་ལྷན། །
འཕྲིན་ལ་འདང་གི་རི་མོ་ཕབ། །
ངེས་མེད་ངེས་པའི་སྙན་ངག་ཚོགས། །
གཙང་པོའི་ཚུལ་བཞིན་གང་སར་སྤུར། །
དེ་རུ་ཁོ་བོའི་རྣམ་པ་དོད། །
དགའ་སྡུག་སྐར་ཚོགས་གྲངས་བཞིན་ཤར། །
རྣམ་རྟོག་ཆུ་ཡི་གཉེར་རིས་འདི། །
ཟད་མེད་མཁའ་ཡི་མཐའ་དང་མཉམ། །
རང་མྱོང་འཆར་ཡན་རིགས་སྣ་ཚོགས། །
ཚིག་ལ་བཅོལ་ཞིང་ཚིག་ལ་བྲིས། །
མགུར་ལས་བླངས་ཤིང་མགུར་ལ་བཏགས། །
མཐར་དུ་སྟོང་བའི་གནས་ལུགས་རྟོགས། །
དེ་ཉིད་རང་གི་རྣམ་ཐར་ཙམ། །
“ཡང་དག་ངང་ལས་ཡང་དག་གསལ། །”
མུན་པའི་གནས་ཀྱི་རང་སེམས་འདི། །
སྐྱོ་བའི་རྒྱལ་ཁམས་ཡངས་པོ་ཞིག །
མདུན་ལམ་འོད་སྟོང་འབར་བ་ཡང་། །
འཆར་བཀོད་བསམ་བློ་མཛེས་པོ་ཙམ། །
མཐའ་མེད་ཐང་ཆེན་ཉུལ་བ་ལྟར། །
དམིགས་གཏད་བྲལ་བའི་ཚེ་སྲོག་འདི། །
མག་མོག་གསེབ་ནས་འདའ་བ་ལགས། །
སུན་སྣང་ཁྲོད་དུ་ལུས་པར་གྱུར། །
འཆི་བརྡའི་དུང་ཆེན་འབུད་པའི་དུས། །
དོན་དམ་འབྲས་བུ་གང་ཞིག་ཡོད། །
ཚེ་ཡི་བུད་ཤིང་སྤྱད་པ་ཡི། །
སྙན་ངག་མེ་ལྕེའི་འབྲུ་མ་དག །
གསེར་གྱི་དོད་དུ་འོས་སམ་ཅི། །
ཡང་ན་མིག་ཆུའི་སྐྱེལ་མ་ཞིག །
འདི་ཡིས་བསྐྲུན་ནམ་མེ་ལོང་གསེབ། །
གཟུགས་ཀྱི་སྟངས་སྟབས་ཨེ་ཡིན་ནམ། །
21/7/10
Leave a Reply