བཙན་པོའི་སྐབས་ཀྱི་ཉེས་སྤྱད། 

                                                   གྱིན་འདའ་བ།      ཁྲི་འདུ། 

སྐལ་བ་བགྲང་བྱ་དུ་མའི་སྔ་རོལ་གྱི།།

གནམ་གྱི་ཁྲི་བདུན་རྟིང་མའི་རྗེ་བོ་སྟེ།།

ཁ་ཆེ་ཞང་ཞུང་རུ་བཞིར་མངའ་མཛད་པའི།།

རང་བཤིས་གཏུམ་དྲག་ཅན་གྱི་དཔའ་རྒོད་དེ།།

གྲི་གུམ་བཙན་པོ་ལོ་ངམ་རྟ་རྫིས་བཀྲོངས།།

རྒྱལ་སྲིད་བགྲང་བྱ་གཉིས་ལས་མ་མཛད་ཀྱང་།།

ཡབ་ཀྱི་ཆེད་དུ་མཆོད་པའི་སྡེ་བཞི་བཙུགས།།

མངའ་རིས་བདེ་སྡུག་ཐུགས་ཀྱི་ཁུར་སྟེགས་ཤིང་།།

དབུལ་ཕྱུག་ལན་གསུམ་བསྙམས་པའི་མངའ་བདག་སྟེ།།

མུ་ནེ་བཙན་པོ་ཡུམ་གྱིས་དུག་གིས་བཀུམས།།

ཕྱོགས་བཞིར་བྲག་རྐོས་ལོ་རྒྱུས་མེ་ལོང་ལས།།

ཞི་དྲག་ཐབས་ཀྱིས་འཁོར་འབངས་སྐྱོང་བ་གསལ།།

བཀས་བཅད་སྒྲ་སྦྱོར་བག་གཉིས་མཛད་པ་དང་།།

ཆོས་སྲིད་གཉི་ཟླའི་འཁོར་ལོ་བསྒྱུར་བ་པོ།།

སད་ན་ལེགས་མཇེང་སྲག་གིས་མདའ་རྩེར་བསྐྱལ།།

ཆེན་པོ་བོད་ཀྱི་རྒྱལ་ལོར་སྐྱིད་རྟགས་ཞེས།།

བཙན་བརྗིད་དྲག་པོའི་བཀའ་ཡིས་དབང་སྒྱུར་ནས།།

བོད་ཐང་འཇམ་དུམ་གནམ་གྱི་རྡོ་རིང་བཞེངས།།

ཆོས་སྲོལ་རྒྱ་ཆེར་མཛད་པའི་མེས་པོ་སྟེ།།

ཁྲི་གཙུག་ལྡེ་བཙན་ནང་བློན་ངན་པས་བཀྲོངས།།

ཐོག་མར་རྒྱལ་སྲིད་ལུགས་བཞིན་མཛད་ན་ཡང་།།

བར་དུ་སྡིག་བློན་ཚོགས་དང་ངན་བསྡོངས་ནས།།

ཆོས་སྲིད་གཉི་ཟླ་གསེར་གྱི་དཀྱིལ་འཁོར་ལས།།

ཐུབ་བསྟན་རིན་ཆེན་ཡོངས་སུ་སྙི་བ་པོ།། 

འུ་དུམ་བཙན་པོ་ལྷ་ལུང་དཔལ་གྱིས་བཀུམས།།

ཐུ་བྷོད་བཙན་པོའི་དཔུང་གི་རུ་འདྲེན་པ།།

མཐའ་བཞིའི་སོ་ཁ་སྲུང་བའི་ལྕགས་རི་སྟེ།།

སྙིང་སྟོབས་ཡལ་མེད་ཅན་གྱི་བློན་པོ་མཆོག།

ཐང་རྒྱལ་བཙན་མོ་ཝོས་ཀྱིས་དབྱེན་སྦྱོར་གྱིས།། 

མགར་སྲས་ཁྲི་འབྲིང་གཅེས་སྲོག་བཙན་པོས་བརླགས།།

འབལ་ལང་གཡོ་ལས་བཙན་པོའི་སྐུ་སྐྱོབ་ཅིང་།།

ཐུ་བྷོད་དཔུང་གིས་ཁྲང་ཨེན་ཟིལ་གནོན་པས།།

སྟོབས་ཆེན་ཐང་གི་རྗེ་ཡང་སྙིང་འདར་ནས།།

གསེར་འབྲུག་སྡེར་ལྔའི་ཁྲི་ལས་ཕབ་པ་པོ།།

བློན་ཆེན་སྟག་དགྲ་ཀླུ་གོང་ནང་ནས་བཀུམས།།

ཤཱི་སེང་ལ་སོགས་མཁས་པ་ཉེར་ལྔ་ལས།།

རྫོགས་ཆེན་ཨ་ཏིའི་མན་ངག་ཐུགས་ཆུད་ནས།།

རྗེ་འབངས་བྱིངས་ལ་བསྒྱུར་བཤད་འོར་ཆེ་རུང་།།

ཞང་བློན་བཙན་མོ་དག་གིས་སྙད་བཏགས་ནས།།

པ་གོར་བཻ་རོ་ཉེས་མེད་ཁམས་སུ་སྤྱུགས།།

དེ་བཞིན་འོད་སྲུངས་དང་ནི་དཔལ་འཁོར་བཙན།།

ཆོས་འཕགས་ལ་སོགས་མདོ་སྨད་དགེ་ཆོས་ཏེ།།

ཕྲག་དོག་དྲག་ཏུ་འབར་བའི་ནང་འཁོར་ནས།། 

དམར་ནག་མཚལ་གྱིས་ཉེས་མེད་འཕུང་བ་སོགས།།

ཡོད་ཚད་བསུབ་ཏུ་མེད་པའི་ལོ་རྒྱུས་ལགས།།

                         2021.8.18