རང་དཔལ་སྙིང་བྱམས། མགོ་ལོག
ཁྱོད་ལུས་པདྨོའི་ལྡེམ་འཕྲུལ། །
ཡིད་ཀྱི་སྤང་ལ་སྐྱེས་སོང་། །
ངག་གི་རིག་བྱེད་སྣ་ཚོགས། །
ཁུ་བྱུག་སྔོན་མོ་ཇི་བཞིན། །
ཡིད་ཀྱི་ཁྲུས་ལ་ཞུགས་པའི། །
ཁྱོད་ཀྱི་ཞལ་གྱི་ཨུཏྤལ། །
སྤྲིན་པ་སིལ་བུར་གྱེས་ནས། །
སྟོན་ཟླའི་དཀྱིལ་འཁོར་ཇི་བཞིན། །
སྤྱན་གྱི་གསལ་ཆ་དེ་ཡང་། །
ཉམས་ལྡན་རི་དྭགས་མིག་བཞིན། །
སྒྱུ་འཕྲུལ་ཡོན་ཏན་བྱེ་བར། །
ཐུགས་ཡིད་ཀུན་ནས་འདུས་པ། །
དྲི་ལྡན་མེ་ཏོག་ཞིང་ལ། །
བུང་བ་སྤྲིན་གྱི་ཚོགས་བཞིན། །
གཟུགས་མེད་ཡིད་ཀྱི་བརྩེ་བ། །
ཆུ་ལ་ཆུ་བཞིན་འཐིམ་སོང་། །
ཤ་རུས་མེ་ཏོག་འདབ་མ། །
རླུང་གིས་ཤུག་ཤུག་སྒུལ་བྱུང་། །
བྲག་ལ་ཐང་དཀར་ཇི་བཞིན། །
ཡིད་ལ་འཁོར་འཁོར་བྱས་བྱུང་། །
ཚེ་གཅིག་ལས་ཀྱི་སྐྱིད་སྡུག །
བར་སྣང་སྤྲིན་པ་ཇི་བཞིན། །
ཚེ་རབས་ལས་ཀྱི་ལྷ་ཁྱོད། །
ཁྱོད་ཀྱི་གྲོགས་སུ་ཕེབས་ཤིག །
༢༠༢༡ • ༠༨ • ༡༢
Leave a Reply