ཞར་བཀོད་གཉིས།
དགུན་རླུང་གིས་གང་སར་སྤུར་བའི་རྩྭ་ལུད་དེ་མ་ཡིན་པར། །
བར་སྣང་དུ་ལྡིང་སྐོར་རྒྱག་ཤེས་པའི་བྲག་ཐེམ་གྱི་གླག་དེ་ཡིན། །
ཉི་ནུབ་ཀྱིས་རབ་ཏུ་རྨུགས་པའི་གྲུ་པ་དེ་མ་ཡིན་པར། །
ཐང་ཡངས་སུ་མེ་ཏོག་བྱིལ་བའི་འཇམ་མཉེན་གྱི་རླུང་བུ་ཞིག་ཡིན། །
རྡུལ་ཚོན་གྱིས་རྨས་བཏབ་པའི་སྦྲང་བུ་དེ་མ་ཡིན་པར། །
ཕུན་ཚོགས་ཀྱི་གེ་སར་ལྡག་པའི་ཕྱེ་མ་ལེབ་ཁྲ་བོ་ཞིག་ཡིན། །
རི་ཞོལ་དུ་ཁངས་ཀྱིས་ཕྱིད་པའི་རྟ་ཁྱུ་དེ་མ་ཡིན་པར། །
ནགས་ཟོམ་དུ་ཐོལ་གྱིས་རྩེན་པའི་སྤྲེའུ་རྒོད་ཀྱི་ཁྱུ་ཚོགས་དེ་ཡིན། །
མེ་ལོང་ནང་རང་ལ་རྨོངས་པའི་མི་གཏའ་དེ་མ་ཡིན་པར། །
ནང་སེམས་ཀྱི་དབྱར་ཁ་ཁྲིགས་སེ་ཤེས་པའི་རྫོགས་ལྡན་པ་ཞིག་ཡིན། །
འཁྲུལ་སྣང་གི་རྩེ་མོར་འགོས་པའི་བྱེའུ་ཚོམ་དེ་མ་ཡིན་པར། །
གཞན་སེམས་སུ་དབྱར་ལྗོངས་འབྲི་ཤེས་པའི་ལྷ་ཆེན་པོ་ཞིག་ཀྱང་ཡིན། །
མི་སེམས།
ནམ་མཁར་མི་སྡུག་འབྲི་བའི་སྤྲིན་གྱི་སྒྱུ་འཕྲུལ།།
མཚན་མོ་རང་ཤི་རྒྱག་པའི་སྐར་མདའ་ཁྲ་མོ།།
རྫ་རི་ངོས་སུ་འཁྱུད་པའི་སྨུག་པ་དུམ་དུམ།།
མ་ཎི་འབྲུ་དྲུག་བརྡལ་བའི་ཉག་གའི་དར་ལྕོག།
རླུང་གིས་གྱེས་བརྡ་གཏོང་བའི་ལྗོན་པའི་སྒུལ་སྟངས།།
བར་སྣང་མག་མོག་འབྲི་བའི་བྱེ་མའི་དཀྱིལ་འཁོར།།
གཉུག་མའི་དབུ་སྐྲ་བྲན་པའི་སྤྲིན་གྱི་གཅིན་པ།།
ཡིད་གར་སྤྲོ་སྣང་བྱིན་པའི་རྒྱ་མཚོའི་ཟེགས་མ།།
ཆར་འབྲུ་ཟིལ་བ་ཆགས་པའི་རྩྭི་ཤིང་སྣ་ཚོགས།།
གཅོང་སྐད་སྣ་མང་འབྱིན་པའི་ནགས་ཀྱི་བྱ་ཚོགས།།
གཙང་བོའི་འགྲམ་ནས་ཟོལ་བའི་གྲིབ་མ་རབ་རིབ།།
འཁྱགས་པའི་མིག་ལ་མགུ་བའི་འཇའ་ཚོན་རི་མོ།།
སྲང་ལམ་རྡོག་ཁྲེས་རྒྱག་པའི་དུས་ཀྱི་མི་ཚོགས།།
འཇིག་རྟེན་ཁྲིགས་སེ་སྐྱོམ་པའི་དུས་ཚོད་ནག་པོ།།
འཁོར་བའི་སྣང་བརྙན་འཆར་བའི་སྡིག་པའི་མེ་ལོང་།།
ཡུལ་ཤུལ། རོལ་དཀྲོལ་བས་བརྩམས།
Leave a Reply