བཞག་ཚ། མི་ཉག
ཁྱོད་ནི་འཇིག་རྟེན་དབྱངས་མ་སྟེ།།
དབྱངས་མ་ནང་གི་དབྱངས་ལྷ་ཡིན།།
མཛེས་པར་གཞན་གྱིས་འགྲན་པ་མེད༎
ཡག་པར་གཞན་དང་མཚུངས་པ་མེད༎
འཛུམ་མདངས་གཞན་དང་འདྲ་ས་མེད༎
བཅོས་བཅོས་མིན་པའི་མཛེས་མ་སྟེ༎
ཤེས་རབ་མ་བཅོས་བདེན་གྲུབ་ཡིན།།
བྱམས་བརྩེ་མ་བཅོས་རང་བྱུང་ཡིན།།
སྐད་ངག་མ་བཅོས་རང་བཞིན་ཡིན།།
དབྱངས་ཀྱི་ལྷ་མོ་དངོས་གྲུབ་སྩོལ།།
ཚངས་པའི་སྲས་ཀྱི་དབྱངས་མ་མོ།།
བདག་གི་གཙུག་ཏུ་རྒྱན་དུ་མཆོད།།
སྙན་ངག་མཆོད་ཆང་ཁྱོད་ལ་དྲངས༎
སྙན་པའི་རོལ་དབྱངས་ཁྱོད་ལ་བླངས།།
མཛེས་པའི་མེ་ཏོག་ཁྱོད་ལ་འབུལ།།
རིང་ནས་གོམས་པའི་ལྷ་མོ་ཡིན།།
ཕྲན་གྱི་སེམས་ཀྱི་མེ་ཏོག་ཡིན།།
བདག་གི་དད་པའི་ལྷ་མོ་ཡིན།།
མཐོང་བས་མི་མངོན་རང་སེམས་སུ།།
རྟག་པར་བཞུགས་པའི་ལྷ་མོ་ཡིན།།
སྲིད་གསུམ་འཁོར་བའི་ནག་ཀློང་དུ།།
གཤིས་རྒྱུད་འཇམ་པའི་ལྷ་ཆེན་པོ༎
ཉ་གང་ཟླ་བའི་དཀྱིལ་འཁོར་ཞལ།།
འོད་ཆེན་སྟོང་གི་ཆར་ཆུ་འཐོར༎
སྙན་པའི་ཚིག་རྒྱན་མགྲིན་དུ་རོལ།།
འཇིག་རྟེན་མུན་པའི་སྒེའུ་ཁུང་དུ༎
སྙན་པའི་པི་ཝང་རྒྱུད་དཀྲོལ་མ།།
བདག་གི་མགྲིན་གྱི་བྱིན་རླབས་མ།།
འཇིག་རྟེན་དབྱངས་ཀྱི་སྨོན་ལམ་མ།།
བདག་ལ་ཐུགས་རྗེས་ཞལ་སྟོན་མ།།
བརྩེ་བའི་མདུན་དུ་བཞུགས་སུ་གསོལ།།
2021/9/1 རྫོང་སར་ནས།
དཔྱད་གཏམ་སྤེལ་མཁན་ལ་གསལ་བརྡ།