ཤིང་ལོ་གྱོན་པའི་སེམས་པ།

མི་ཚེའི་གཙང་བོའི་གཞུང་གི་གྲུ་ཤན་དེ།།

སྣང་ཚོར་ལོ་མའི་ཕོན་ལྕོག་སྤུང་ས་ཉིད།།

རིགས་ཀྱི་མེ་ཏོག་གློ་ཁའི་ཟིལ་བ་དང་།།

ན་ཚོད་རི་མོའི་ཁ་མདོག་སོ་སོར་གསལ།།

ལོ་ཟླས་ཕྱིར་ལ་བསྐྱལ་བའི་དྲན་སྣང་དག།

དེ་རིང་དཔྲལ་བའི་རི་མོའི་གསེབ་ཏུ་སྦས།།

ག་ལེར་སྙིང་ཆུང་བུམ་པའི་ནང་དུ་ཟགས།།

ཚོར་བའི་ཁ་རླངས་ནང་ནས་སྟོན་པར་བྱ།།

རྨི་ལམ་མེད་པའི་མཚན་མོ་གྲངས་མེད་ལ།།

ལས་ཀྱི་སྒྲོག་གུ་བརྟོལ་ནས་འཕུར་འདོད་མོད།།

ཉི་ཟླས་སྐེད་ཐག་བརྒྱབ་པའི་མི་ཡུལ་འདི།།

ད་རེས་ལན་གཅིག་འགྲིམ་པར་གློ་མ་ཕུད།།

སྐྱིད་མདོག་མིག་གི་འཁོར་བ་ཕྱི་ནང་བརྗེས།།

གཏམ་རྒྱུད་སྐྱུར་མོའི་རྗེས་ལ་སྨྲེང་བ་དྲུད།།

མི་ཚེ་ཚོད་བགམ་བྱེད་ལ་ཡིད་ཐང་ཆད།།

འཚོ་གཞེས་སྣ་ཐག་གཟད་ནས་བྲོས་བྱོལ་རན།།

ལས་ཀྱི་ཤག་ཆུང་ནང་དུ་གཙང་བོ་བྲུགས།།

སེམས་ཚོར་ལོ་མའི་ཚོགས་དེ་ཤག་ཤག་འཁུར།།

མི་རྣམས་ལས་ཀྱི་རྟོད་ཐག་གཅིག་ལ་བསྟར།།

སྐྱིད་སྡུག་འཚོ་བའི་ཚོན་མདངས་ཁ་ཁ་རེད།།

སྟོང་བསམ་བྲག་ཆའི་ནང་དུ་རེ་སྨོན་སྐྱེས།།

ཆོ་མེད་དྲན་པའི་གཞུང་ལ་ལྷ་སྐུ་བསྒོམས།།

སྟོང་བསམ་འཁོར་བའི་བྱེ་ཐང་མ་རྫོགས་བར།།

འཆར་སྣང་སྐར་མདའི་རྗེས་ལ་བྲེལ་བ་ལངས།།

གོམ་ཆུང་བར་ལ་སྐྱི་སེར་རླུང་བུ་གཡུག།

རང་སྣང་ཤོག་བྱ་ཤར་ནུབ་སྤྲིན་ལ་འདྲེས།།

སྣ་ཚོགས་འཚོ་བའི་ངོ་གདོང་མངར་མ་སྐྱུར།།

དྲན་ཤེས་ཁབ་སྐུད་སྦྲེལ་ནས་དྲུབས་པར་བྱས།།

རྐང་རྗེས་གཅིག་ལ་ས་ཚིགས་ཁྲི་མ་འབུམ།།

རྣམ་ཤེས་སྦྲང་མ་འཕུར་ནས་རྙེད་ཚོད་དམ།།

གཏམ་རྒྱུད་རྩིས་ལ་ཐེབ་པའི་དཔེ་མེད་ན།།

རིག་པ་གློད་དེ་སྟོང་གཟུགས་མེ་ལོང་གཡོར།།

བསམ་གཞིག་ནང་དུ་འཁོར་བ་ལྗིད་ཀྱིས་ལྷུང་།།

འཆི་ཐབས་དཀའ་བའི་བྲེལ་རྡོ་མང་བ་ལ།།

མི་ཡུལ་དབུགས་ཀྱི་ཁུག་པ་མ་བཏང་བར།།

རྟོག་ཚོགས་འཕར་མ་བརྩེགས་ཏེ་སྨྱོ་བར་བྱ།།

མི་རྟག་མཚོ་ལ་སྐད་ཅིག་ལོ་མ་བབས།།

གདེང་ཚོད་མེད་པའི་རྨི་ལམ་རི་ལ་བཏང་།།

འཆར་ཡན་རེ་རེས་སྲིད་པའི་སྒྲུང་རིང་བསླས།།

སྒྱུ་མའི་ཆོས་ཕུང་མགུར་མའི་གསེབ་ཏུ་བཀབ།།

2021/8/26

   ཚིག་གི་ཟམ་པ། 

ཚིག་འདི་གླིང་བུ་བཞིན་དུ་ནགས་སུ་རྒྱུ་ཡང་།།

རྣམ་ཤེས་སྦྲང་མའི་གཤོག་སྒྲོའི་ཁུད་དུ་སྦས་པའི།།

ལས་ཀྱི་འབྲས་བུ་དཀར་པོ་ཡུག་གཅིག་དེ་ལ།།

ཚེ་རབས་ཕྲེང་ལ་བརྒྱུས་པའི་སྨོན་པ་ཕྲིས་ཤོག།

ལོ་ཟླའི་ཁྲེལ་རྒོད་ནང་དུ་སུན་སྣང་མོད་ཀྱང་།།

རྒྱང་རིང་རྨི་ལམ་གཙང་བོའི་ཁ་རུ་མ་ལྷག།

ན་ཚོད་བཞིན་དུ་ཚོར་བའི་མེ་སྒོང་རྒྱོབས་དང་།།

མ་མཐའ་ཕྱིར་དྲན་ནང་དུ་དཔའ་ཞིག་སྲིད།།

སེམས་ངོགས་འདི་ལ་གཙང་བོ་སྣ་ཚོགས་བཞུར་མོད།།

ཅེས་ཀྱང་བརྒལ་དགོས་མིན་ན་ཕར་ལ་གཡུག་ཏེ།།

རང་དབང་ནམ་མཁའ་ཐེད་པོ་དེ་རུ་ཙོག་དང་།།

འཁོར་བའི་ནང་དུ་གསེར་རྡོག་ཁར་ཁེར་རྙེད་སྲིད།།

མི་རྟག་སྒྱུ་མའི་གྲོང་ཚོ་ལྷག་པར་གཡོ་ཡང་།།

ལས་འབྲས་གཙུག་གི་ལྷ་ཚོགས་ཡལ་ཚོད་མེད་ན།།

རང་སྣང་ཚོར་བའི་ཁམས་བཞག་ཙམ་བྱོས་དང་།།

གང་ལྟར་རྒྱུ་འབྲས་ཡོད་པའི་ཟན་ཞིག་སྟེར་ཡོང་།།

རྣམ་གཞན་རྫུན་པ་མང་པོས་གཟེབ་ལ་བཅུག་ཀྱང་།།

ཅེས་ཀྱང་མེད་ཐག་ཆོད་པའི་ཕུགས་དེ་རིག་ན།།

རྫུན་པའི་ཁྲམ་རྟགས་ཙམ་ལ་འོ་བརྒྱལ་མ་མཛད།།

སྣང་ཚོད་མེ་ཏོག་བཞིན་དུ་བཏུས་ནས་སླེབས་ཤོག།

སྡུག་བསྔལ་ལོ་མ་ཁ་ཡིས་ཟིན་ཐབས་མེད་ཀྱང་།།

འཁོར་བའི་གཙང་བོ་བྲུགས་པར་རབ་རྟགས་ཞོག་ན།།

སྐྱིད་སྡུག་ཉིན་སྲིབ་རེ་ལ་གཏམ་རྒྱུད་མ་འཇོག།

ཧ་ཅང་ནན་ཏན་མིན་པའི་ཁམས་ཤིག་བསྐྲུན་ཤོག།

2021/5/11

 སྒྱུ་མའི་རོལ་མོ་དགུ་འགྱུར།

འཆར་སྣང་མེ་ལོང་སྒོར་མོའི་ཐང་མཐའ་དེད་ན།།

མ་ངེས་རྨི་ལམ་རབ་རིབ་མཚོ་ལ་ལྷུང་བའི།།

ཁེར་རྐྱང་རླུང་བུའི་ནང་དུ་གཏམ་རྒྱུད་བསྐུང་སྟེ།།

སྒྱུ་མའི་ཚོན་མདངས་བསྲེ་སའི་འཁོར་བ་རྙེད་དམ།།

སྣང་ཚོར་སེམས་འགྱུའི་རོལ་མོ་དཀྲོལ་ཐེངས་རེ་ལ།།

སྒྱུ་མའི་འཇའ་ཚོན་གཡོ་བའི་གར་ལ་འཁྱུད་པའི།།

སྐྱོ་གཞས་མཚོ་མཐའ་སྐོར་བའི་ངང་ཆུང་སེར་ལོས།།

དྲན་པའི་སྒེའུ་ཁུང་ནང་གི་ཟླ་འོད་ཟིན་ནམ།།

འདི་སྣང་རྗེན་པར་བརྡལ་བའི་སྤང་ཐང་ལེབ་མོ།།

སྣ་ཚོགས་རྟོག་འགྱུའི་རི་མོ་ཚོམ་ཚོམ་བཞད་པ།།

ཡོད་ཚད་སྣང་བ་ཙམ་གྱི་རྗེས་ལ་བསླས་ནས།།

ཚོར་བ་ངོ་མའི་གཏམ་རྒྱུད་ག་ཚོད་བྲིས་སམ།།

དྲན་རྟོག་སྤྲིན་པའི་འགྱེལ་ལོག་འཕེན་ཐེངས་རེ་ལ།།

འཁོར་འདས་སྒེའུ་ཁུང་ངོས་ལ་ནག་ཚུབ་བརྒྱབ་ཡོང་།།

སྒྱུ་མའི་ཚོན་མདངས་བཞིན་དུ་ཚོར་བ་སྒྲིག་ན།།

ཐུན་མོང་ལས་ཀྱི་མེ་ཏོག་ཁྱོར་བར་ཤོང་ངམ།།

ཚིག་གི་ལོ་མ་ཆུ་ལ་སྦང་ནས་ཡོང་དུས།།

རྣམ་རྟོག་བུ་མོའི་ལན་བུ་ས་ཁར་དཔྱངས་བའི།།

སྣང་བ་ལྷ་འདྲེ་འཐབ་པའི་གཡུལ་ཐང་གཤག་ན།།

ཡིད་ལ་གདེང་ཚོད་ཡོད་པའི་དཔའ་ཞིག་རྙེད་དམ།།

ཚོར་སྣང་ཡི་གེའི་ལྟེབ་མ་བསྲེས་ཏེ་སྦྱར་ན།།

ནང་སེམས་དཀར་དམར་ཚོན་ཁ་ཇི་ལྟར་འདྲེས་པ།།

འཆར་ཡན་མེ་ལོང་ནང་དུ་ཁྲིགས་ཁྲིགས་འཆར་བའི།།

ཡིད་བརྙན་འཕར་མའི་རིག་བྱེད་ག་ཚོད་བཤམ་མམ།།

ན་ཚོད་རྨི་ལམ་ནང་དུ་འཁྲུལ་ནས་ཡོང་དུས།།

སྟོང་གཟུགས་སྒྱུ་མའི་འཇའ་ཚོན་ཅི་ཙམ་བསླས་མོད།།

རེ་བ་སྒོར་སྒོར་དེད་པའི་བས་མཐའི་སེམས་པ།།

མ་ངེས་སྐྱིད་སྡུག་ཆུ་བོའི་གཞུང་ནས་གྲང་ངམ།།

རབ་རིབ་འཁོར་བར་ཚོད་བགམ་བྱེད་ཐེངས་རེ་ལ།།

ཡིད་འགྱུ་གཡོ་མའི་གར་ལ་ཞེ་བཅད་འཆོར་ན།།

ལས་ཀྱི་རལ་གྲི་གཡུག་སའི་ལོ་ཟླའི་ཡལ་གར།།

གཏམ་རྒྱུད་མེ་ཏོག་ཆུན་པོའི་གསང་བ་འཆོར་རམ།།

2021/8/21

གླུ་སིལ་མ།

རྟ་ཕོའི་རྔོག་མའི་ནང་གི་གསང་བ་དེ།།

གཏམ་རྒྱུད་ལྕགས་གོར་ནང་དུ་བཙུད་པ་ན།།

མེས་པོ་ཡིད་ལ་ཆེ་བའི་ང་རྒྱལ་གྱིས།།

གཞོན་སེམས་སྙི་མོའི་ཁོག་པ་སྲ་མོ་བྱས།།

མིག་མདངས་ནང་དུ་སྐར་མདའ་འཚོ་མཁན་དེ།།

ཞེ་ཚིག་འཁྱག་པ་གཙང་བོར་སྦྱིན་པའི་རྗེས།།

འགལ་འདུ་མང་པོ་དུས་ཀྱིས་བསྐྱུར་བ་ཡང་།།

ན་ཚོད་རེ་རེའི་གདོང་ན་མེ་ཕུང་འཕྱུར།།

རྨི་ལམ་གྲམ་ཐང་སྐམ་པོའི་ཕ་མཐའ་དེ།།

སྙིང་ལ་སུམ་སྒྲོག་བརྒྱབ་པས་མ་ཟིན་ཡང་།།

གསེར་ཞལ་སྒོར་སེ་བརྗིད་པའི་ལོ་རྒྱུས་ཁྲོད།།

ཉི་ཟླའི་བཞུད་ཤུལ་བསྐལ་བ་སྟོང་གི་དཔའ།།

ཡུལ་ལུང་རྙིང་བའི་གདོང་གི་སེར་ཁ་ན།།

ངག་རྒྱུན་ཐན་ཐུན་ཚིག་གི་དྲུབས་མཚམས་རྡོལ།།

གངས་རི་ཡིད་ལ་ཐོགས་པའི་མི་རབས་ཤིག།

གཙང་བོའི་དྭངས་གཙང་མེ་ལོང་བྱས་ནས་རྒས།།

དར་རྒུད་རལ་བ་ས་ཁར་བཏང་ཚུལ་སོགས།།

སྨུག་པ་རི་ལ་འཐིབ་ཀྱང་སེམས་རྩ་བརླན།།

ཚོར་བ་མེ་རུ་འབར་ཡང་དྲན་པ་འཁྱག།

བསམ་པས་ཕྱིར་ལ་བསྙབས་ན་སྨྲེང་བ་ཆུ།།

2021/2/5

࿑གླུ་རྐང་ཆག་མ།     

ཉམས་སྣང་རྗེན་པར་ཤར་བའི་མགུར་གླུ་མིན་ལ།།

རྟོག་ཚོགས་རི་མོའི་སྟེང་གི་འཚང་ག་ཡིན་པའི།།

དལ་ཅིག་རང་གར་བཞག་ན་མེད་མེད་འདྲ་ཡང་།།

ལྷོད་དེ་ཡུན་གྱིས་བཞུར་བའི་གཙང་བོ་བཞིན་དུ།།

རྣམ་རྟོག་སྐར་མའི་ཁྱུ་ཚོགས་ཁྲ་ཆིལ་བརྒྱབ་པས།།

སྣང་ཚོར་ལྷག་པར་བཙུར་བའི་དབྱངས་རྟ་གྲོལ་སོང་།།

བྲག་ཕུག་གདན་ལ་བཏིང་བའི་འདར་གླུ་མིན་ལ།།

མ་རིག་ཤིང་ལོའི་འདབ་ཀྱི་གྲིབ་རིས་ཡིན་པའི།།

སྣང་བ་བྱིའུ་ཆུང་ཁྲ་རིལ་ཆར་སྒོང་རྒྱག་སའི།།

སྟོང་གཟུགས་བར་སྣང་ཡངས་པོ་དོགས་པས་བཙེམ་ན།།

རིག་གདངས་འཇའ་ཟེར་འོད་ཀྱི་གུར་ཁང་བཞག་ནས།།

འཆིང་བ་ཧྲིག་གེར་བསུ་བའི་མཛའ་གླུ་ཐལ་སོང་།།

ཤིང་ལོ་གོས་སུ་བཀླུབས་པའི་དབེན་གླུ་མིན་ལ།།

དྲན་པ་སྟོང་སང་སང་གི་ཞེད་གླུ་ཡིན་འདྲའི།།

རྟོག་བཏགས་མེ་ཏོག་འཛུམ་པའི་ཞལ་རས་སྒོར་མོ།།

ཐ་སྙད་བུམ་ཆུང་ནང་དུ་འུབ་ཀྱིས་བཅུས་ན།།

འཁོར་འདས་རུ་ཤན་བྱེད་པའི་ཉམས་རྩལ་ནང་དུ།།

སྒྱུ་མའི་འཇིག་རྟེན་རྡིབ་པའི་འཁྲུལ་གླུ་ཐལ་སོང་།།

ནང་སེམས་འཁྲུལ་བ་ཞིག་པའི་ཐོལ་གླུ་མིན་ལ།།

ངག་རིག་གླིང་བུ་འབུད་པའི་འགྱུར་ཁུག་ཡིན་འདྲའི།།

འཆར་ཡན་ཀློང་དུ་སྐྱོམ་པའི་འགའ་སྐྱོའི་མཚོ་མོ།།

མ་བཀག་སྲིད་པའི་རྒྱལ་མོའི་ཞེ་ལ་འཁྱིལ་བའི།།

སྣང་སྲིད་མེ་ལོང་གས་པའི་སྲིབ་ལས་བཞུར་ཏེ།།

ཉི་ཟླའི་མཆི་མ་བརྐུས་པའི་ཇག་གླུ་ཐལ་སོང་།།

འཁོར་འདས་མཉམ་པར་བརྡལ་བའི་གྲོལ་གླུ་མིན་ལ།།

ཡལ་འདབ་ཤིང་ལོ་འཁྲུག་པའི་ཤག་སྒྲ་ཡིན་འདྲའི།།

རེ་དོགས་སྒྲོག་ལ་བཙུད་པའི་སྣང་ཞིང་སྲིད་པ།།

སྙན་ཚིག་མེ་ལོང་ངོས་སུ་གསལ་ལེར་བཀྲ་བའི།།

བྱར་མེད་བློ་འདས་དོན་གྱི་གལ་མདོ་མིན་ཡང་།།

རྩོལ་མེད་ཚིག་ལ་འཁྱུ་བའི་ཤུགས་གླུ་ཐལ་སོང་།།

རིག་པའི་བཙན་ས་ཟིན་པའི་དཔའ་གླུ་མིན་ལ།།

ངེས་འབྱུད་སད་སིད་རྗེས་ཀྱི་སྨྲེང་གཞས་ཡིན་འདྲའི།།

མི་རྟག་ལྗོན་པ་འདར་བའི་ལོ་འདབ་འཕུར་ནས།།

སྙིང་ཆུང་རང་ལ་འཚེར་བའི་སྐྱོ་ཉམས་དོད་ན།།

རྟོགས་གྲོལ་རྗེན་ཞལ་རྙེད་པའི་གསང་ཚིག་མིན་ལ།།

སྣང་སྟོང་འཇའ་རིས་འདེད་པའི་རྒྱང་གླུ་ཐལ་སོང་།།

མཉམ་ཉིད་བདེ་བ་ཆེན་པོའི་དོན་གླུ་མིན་ལ།།

རྫ་ལུང་སྐམ་པོའི་འདབས་ཀྱི་སྨྱོ་གླུ་ཡིན་འདྲའི།།

ཡར་སྟོད་བྲག་རི་རྟོལ་བའི་གཤོག་སྒྲོ་བརྐྱངས་ཏེ།།

ཉི་ཟལའི་སྐ་རགས་བཅིངས་བའི་གོ་ལ་རིལ་མོ།།

སྐད་ཅིག་རྨི་ལམ་ཞིང་གི་དཔེ་ཟླར་འབོད་པའི།།

སྟོང་ཉིད་ཨ་མའི་ཞལ་གྱི་འབོད་གླུ་ཐལ་སོང་།།

2021/4/26