གུ་དཔལ་ཤིས། ཡུལ་ཤུལ།
སྟོན་ཀ
ཁྱོད་སླེབས་ལ་ཉེ
མཛེས་སྡུག་གི་དབྱར་གཞུང་གང་དུ་ཡིབས་སོང
ནང་སེམས་ཀྱི་གྲིབ་མ
སྙེ་རླབས་ཀྱིས་དེད་ནས་གང་དུ་ཕྱིན
རྨི་ལམ་ལྟ་བུ མངོན་སུམ་ལྟ་བུ
ཤིན་ཏུ་སྐྱེན་པའི་འཚོ་བ
སྔོན་ཆད་བཞིན་གཡའ་དག་པའི་ནམ་མཁའ་ཡིན་ནམ
ངས་འཚོ་དབུགས་ཇི་ལྟར་རྔུབ་རུང
ལོ་དེའི་སྟོན་ཟླ་རེག་ཐབས་མི་འདུག
གསེར་རླབས་ཀྱི་སྙེ་མ་ལྡེམ་པའི་སྟོན་གཞུང
དྲི་བཞོན་གྱིས་ཁུར་བའི་བག་ཕེབས་ཀྱི་འཚོ་གནས
གང་ནས་ཀྱང་རྙེད་ཐབས་མི་འདུག
ལོ་ཟླ་བཞུད་སོང
ལང་ཚོ་ཟད་སོང
རྨི་ལམ་གྱི་ཁྲུང་ཁྲུང
སྔ་བཞིན་གཤོག་ཡངས་ཀྱིས་རྒྱུ་འམ
ལན་ཆགས་ཀྱིས་ཐེད་པའི་ལམ་གཞུང
ནམ་ཞིག་ཚུར་ལ་ལོག་ཡོང་སྲིད་དམ
བཅུད་ཀྱིས་བལྟམས་པའི་དབྱངས་གསལ་གྱི་ནས་འབྲུ
འཚོ་བའི་མུག་ནད་གསོས་པའི་དཀར་པོ་གཅིག་ཐུབ
དྲན་པ་འདི་ཁྱོད་ཀྱི་ཉེ་འདབས་ནས་ཡོལ་ཚོད་མ་རེད
ནང་སེམས་ཀྱི་སྟོན་ཀ
ལྕགས་གླང་ལོའི་ཟླ ༦ པའི་ཚེས ༢༠ ཉིན།
Leave a Reply