ལས་ཀྱི་ང་གཉིས་འཁོར་བའི་ཐང་ནས་སྦྲེལ།།
སྐྱིད་སྡུག་སྣ་ཚོགས་མྱོང་བཞིན་མུ་ནས་འགྲོ།།
ང་གཉིས་གོམ་ཁ་སྔོན་དུ་གཏད་ནས་འགྲོ།།
གཟུགས་མེད་སེམས་པ་རྗེས་ན་ལུས་ས་མེད།།
ཁྱོད་ཉིད་བཞད་ཚེ་ང་ཡི་འཇིག་རྟེན་བཞད།།
ཁྱོད་ཉིད་སྨྲེང་ན་ང་ཡི་འཁོར་བ་སྐྱོ།།
ཁྱོད་ནི་ང་དང་འབྲེལ་བ་ཆེས་ཟབ་པས།།
ཁྱོད་ཀྱི་དགའ་སྐྱོ་ང་ཡི་དགའ་སྐྱོ་ཡིན།།
ཁྱོད་ཀྱི་ལང་ཚོའི་མེ་ཏོག་གད་པ་འདི།།
འཇིག་རྟེན་འདི་ཡི་སོ་མའི་དངོས་པོ་ཡིན།།
དེ་ཉིད་ང་ལ་དབང་བའི་ནོམ་པ་ཡིན།།
བསོད་ནམས་ཆེན་པོས་བསགས་པའི་འབྲས་བུ་ཡིན།།
དཔྱིད་ཀྱི་ཆར་ཆུ་མོད་པའི་ཞོ་ཞག་འདིར།།
ང་ཡི་རྨི་ལམ་ནང་དུ་ཆར་ཟིམ་འབབ།།
འཇའ་སྣ་སྣ་ཚོགས་བསྡབས་ཏེ་གུར་ཞིག་ཕུབ།།
གུར་གྱི་ནང་གི་ནོར་བུ་ཁྱོད་ཉིད་ཡིན།།
དོ་ཞག་མེ་ཏོག་སྣ་ཚོགས་འགྲན་པའི་ཟོལ།།
ཕན་ཚུན་མཛེས་པའི་ལང་ཚོ་ངོམ་པར་བྱེད།།
ང་ཡི་སེམས་ཀྱི་མེ་ཏོག་ལྗང་གུ་ཁྱོད།།
དྲན་དུ་མཐིལ་དུ་ཡང་ཡང་ལྷུང་བར་གྱུར།།
རི་ལ་སྨིག་པ་འཁྲིལ་པའི་ནམ་ཟླ་འདིར།།
ང་ཡི་དྲན་པ་གདུང་བས་ཚ་རླབས་འཕྱུར།།
སེམས་ལ་སྟོང་བསམ་འཁོར་བ་མ་ལགས་ཏེ།།
རི་ཆུ་སྟོང་གི་ཕག་གི་འབྲོག་སྡེ་དྲན།།
རི་དང་སྤྲིན་པ་འཁྱུད་དུས་ཁྱོད་ཉིད་དྲན།།
རྩྭ་ལ་ཟིལ་བ་ཆགས་ནའང་ཁྱོད་ཉིད་དྲན།།
མདོར་ན་འཇིག་རྟེན་འདི་ན་སྣང་བ་ཡི།།
ལས་ཀྱི་འབྲེལ་བ་དག་གིས་དྲན་གདུང་སྦྱིན།།
འཇིག་རྟེན་འཇིག་པ་དམ་པའི་ཆོས་ཉིད་ཡིན།།
ངེད་གཉིས་སྣང་བ་མཐུན་པ་ལས་ཀྱིས་ཡིན།།
ཁྱོད་ཉིད་ས་ཐག་རིང་པོར་བཞུགས་པ་ཡིས།།
དྲན་གདུང་ཤེས་རབ་བསྩལ་བ་དངོས་གྲུབ་ཡིན།།
སྐྱེན་པོ། (གཡུ་ཁོག)
༢༠༢༡ ༦ ༢༠
Leave a Reply