རྩོམ་པ་པོ་བདེན་མྱིག
དྲང་མོའི་མདའ་ལ་གཞུ་ཡི་གཤིས་ལུགས་ཐོགས། །
དྭངས་བའི་ཆུ་ལ་སྙོག་མའི་གོམ་ཁ་ཤོར། །
བསིལ་བའི་ལྗོན་པ་མེ་ཡི་ཟས་སུ་གྱུར། །
མཛེས་པའི་མེ་ཏོག་དུས་ཀྱིས་ཞིག་རུལ་སོང་། །
ཡངས་བའི་ལྷ་ལམ་སྲིན་བྱའི་གྲོང་དུ་བསྐྲུན། །
སྲིད་པའི་ས་ཆེན་འབྱུང་བཞིའི་འཇིགས་པས་སློང་། །
མཛེས་པའི་དབྱར་གཞུང་མྱ་ངན་ཐང་དུ་འཁུ། །
ད་ནི་བདེན་པའི་ཡུས་ཀྱི་ཚིག་མདུད་བོར། །
དཔྱོད་ལྡན་སྙེ་མ་ཁྱི་ཡི་ཟས་སུ་གྱུར། །
བདེན་པའི་ཤིང་རྟ་བཀོལ་མེད་རྡུལ་ལ་འདྲེས། །
ལེགས་བཤད་བདུད་རྩི་དུག་གི་གཞུང་ལ་བབས། །
རེ་བའི་དན་རྟགས་ཡིད་ཀྱི་ཀློང་ནས་སྙིལ། །
གནས་ལུགས་རྒན་པོ་ཆ་མེད་ཡུལ་ལ་འགྲིམས། །
ཤུལ་ལུས་བློ་ཆུང་ངན་གྲོགས་རྗེས་སུ་འདེད། །
ལེགས་པའི་ལམ་ལ་མི་འདོད་གཟེར་མས་ཁེངས། །
བློ་ལྡན་པདྨའི་འདབ་ལོ་རླུང་གིས་གཏོར། །
བསོད་ནམས་དུལ་གྱི་སྣུམ་བུ་ས་ལ་འཐིམ། །
མི་རྣམས་ཡི་དྭགས་སྤྲུལ་སའི་གནས་ལ་འཁྱམ། །
རྫུན་གྱི་ཆང་འགག་ས་འཛིན་ལྟེ་བར་འཁྱིལ། །
ཡིད་མི་བདེ་བ་སྨྱོན་པའི་བརྟུལ་ཞུགས་བསྐྱེད། །
བྲིས་པའི་གཟུགས་ལ་གསལ་དག་མེད། །
བརྗོད་པའི་དོན་ལ་ལེགས་ཆ་མེད། །
བློ་ལྡན་ཐོས་སྦྱང་ལྡན་མ་ཡིན། །
དེ་ལྟ་ན་ཡང་འདི་ག་བྲིས། །
༢༠༢༡ ༧ ༢༩
Leave a Reply