ལུ་ལུམ་སྨན་ལྷ།
གསེར་མདོག་རྡུལ་གྱི་སྲིད་གསུམ་ཁབ་ཏུ་བཞེས་པའི།།
དཔྱིད་དཔལ་དུས་ཀྱི་འགྱུར་བག་སྙིང་དུ་སྡུག་དུས།།
ཁྱུང་ཆེན་གཤོགས་ལ་བརྒྱུས་ཏེ་བས་མཐར་འཕུར་བའི།།
གྲོགས་ཁྱེད་བདེ་བའི་འཕྲིན་བཟང་རྣ་བར་འཇེབ་ཨང་།།
ཁ་ཐག་རི་ཆུའི་བཅད་དེ་ལོ་ངོ་གསུམ་ལགས།།
བར་ཐག་གཏམ་གྱི་ཆོད་དེ་ཉིན་ཞག་སྟོང་ཕྲག།
དྲན་གདུངས་སྙིང་ཁར་གཙེག་དེ་ཟླ་བ་སུམ་ཅུ།།
བདག་སེམས་མུན་པའི་རི་མོ་འདི་ལྟར་འཚུབས་སོང་།། ་
སྐྱོ་གདུངས་ལས་ཀྱི་མིག་ཆུ་སེམས་སུ་མུད་དེ།།
ངལ་བ་དགུའི་བརྒྱའི་གྲུབ་པའི་ལོ་དང་ཟླ་བར།།
ཁྱོད་ཀྱི་བདག་ལ་བཞག་འདི་གདུངས་བ་འདི་གས།།
བདག་གིས་ངན་སོང་འཁོར་བའི་རང་གཤིས་མཇལ་བཞག། ་
གྲོགས་ཁྱེད་སླར་ཡང་མུན་པའི་དོང་ནས་བྲོས་ཏེ།།
བདེ་ཆེན་རིག་པའི་ལམ་ཁར་གཡང་ལ་རྩེན་པ།།
ཐོས་པས་བདག་རྒྱུད་གྲོལ་ལོ་སྲིད་པའི་རུམས་ནས།།
དགའ་འདུན་གསེར་ཀྱི་རི་བོ་ཐད་ནས་སྙེག་བྱུང་།།
རྟེན་འབྲེལ་བྱིན་རླབས་གཡང་འཁྱིལ་བདུད་རྩི་བཅུད་ཆེན།།
བཀྲ་ཤིས་དུང་གི་ཟླ་བར་ལས་ཀྱི་འཕོས་ཏེ།།
ཕུན་ཚོགས་དགེ་ལེགས་བཞད་པའི་ཉིན་མཚན་འདི་ཉིད།།
ཁྱེད་དང་བདག་ལ་ཚེས་པའི་དབྱར་ཁ་རེད་བཞག།
རང་དབང་སེམས་ཀྱི་མེ་ཏོག་དགོད་པ་མཚར་ཀྱང་།།
བསམ་དོན་ཡིད་ཀྱི་རི་མོ་ལུས་པ་མ་ལེགས།།
ཐབས་ཤེས་ཟུང་དུ་འཇུག་པའི་མན་ངག་མེད་ཚེ།།
རང་སེམས་སྒྲོད་དུ་ཚུད་པར་ཉེན་ཁ་ཆེ་ཨང་།།
ཁུ་ཚུར་རྡོ་ལ་མ་གཞུ་ན་ཚའི་རྐྱེན་ལགས།།
རེ་འདོད་མཁའ་ལ་མ་རྐྱོངས་རྨིས་པའི་ངང་ཚུལ།།
རྣོ་ངར་ཤེས་རབ་མཚོན་ཆས་འཇིག་རྟེན་གཤོགས་དང་།།
མི་ཆོད་ལས་ཀྱི་རྡུལ་གཅིག་སྲིད་དུ་དཀོན་ནོ།།
གང་ལྟར་ཁྱེད་གསུངས་རྣ་ནས་ཡིད་དུ་ལྷུང་བྱུང་།།
ལྷུང་ནས་དགའ་བདེའི་འོད་ཀྱི་གཟི་མདངས་འཕེལ་བྱུང་།།
འཕེལ་ཏེ་མ་བཅོས་སེམས་བབས་པའི་ཡིག་འབྲི།།
འདི་ལྟར་བྲིས་ཏེ་སྤྲིངས་སོ་གྲོགས་ཀྱི་དངས་མ།།
Leave a Reply