སྦྲུལ་ཞགས། གོ་འཇོ།
སྣ་ཚོགས་འཁྲུལ་གྱིས་སྦྲིད་པའི་འཁོར་བའི་པང་ནས།།
འདོད་པའི་མེ་ཆེན་འབར་བའི་ཕལ་བའི་རང་གཤིས།།
ཡིན་སྣང་ཚོན་གྱིས་གཡོགས་པའི་ཟླུམ་གཟུཊ་འོག་ཏུ།།
ལྐོག་གྱུར་ལམ་འབྲས་མེ་ཏོག་བཞད་པར་བདེ་འམ།།
དྲིལ་ཆུང་རླུང་གིས་བདས་པའི་སློབ་རའི་ཚལ་ནས།།
གླེགས་བམ་འཕྲེད་ཀྱིས་ཁུར་བའི་དམར་སེར་ཁྱེ་འུ།།
གཞུང་ལུཊ་གཏིང་ཟབ་ཉིན་སྲིབ་ཅེར་ཅེར་དེ་གས།།
ཡི་ལོག་འཁྲིས་པའི་ནད་གཞིའི་ལྗིད་ཚད་ཁྱོག་གམ།།
སྐྱ་རེངས་སྟོང་དབྱིངས་བུ་མོའི་ཕྱི་ཤམ་ངོོགས་སུ།།
འཁྱ་འཁྱོར་མལ་ལས་ལྡང་སྟེ་བྲེལ་འཚུབ་ཀློང་དུ།།
དཔེ་ཆའི་གསེབ་ཏུ་ཉུག་བའི་ཡིག་རྫི་གཞོན་ནུ།།
རྒྱུན་ལྟར་བྱ་གཞག་འདི་ཡིས་མགོ་བོ་འཐོམ་མམ།།
ཚག་སྒྲས་བརྡར་ཤ་གཅོད་པའི་རྩོད་གྲྭའི་དཀྱིལ་དུ།།
ལུང་འདྲེན་ཐག་པའི་མེ་ཏོག་ཤུགས་ཀྱིས་འཐེན་ཚེ།།
ཀྲོང་ཀྲོང་ཉན་བྱེད་གསེར་ཁུང་ངལ་དུབ་རྩིང་པོས།།
ཁུ་སིམ་དབེན་པའི་རྫ་ཡུལ་འཕུར་སྙིང་འདོད་དམ།།
རང་སེམས་རྟ་རྒོད་ངར་མའི་ཁ་སྐྱོག་སྲབ་མདའ།།
རིང་ནས་ཟིན་པའི་ཐབས་སུ་བརྩོན་བརྩོན་གནང་ཡང་།།
གཟུང་འཛིན་ལྕགས་ཀྱིས་གཟེབ་ནས་ཐར་བའི་ལམ་ཞིག །
འཚོལ་འདོད་འཇའ་སྣེར་འཁྱུད་པའི་ངང་ཚུལ་སུན་ནམ།།
ཆོག་ཤེས་རྡུལ་བྲལ་གླིང་བུ་འབུད་པའི་ཆེད་དུ།།
ལུས་སེམས་ཞི་བའི་ནགས་སུ་རྒྱུ་འདོད་ཆེ་ཡང་།།
མ་འདྲིས་ངེས་འབྱུང་རྒྱལ་མོའི་བཀའ་ཆད་ལྕི་བས།།
བརྟུལ་ཞུགས་རྒྱ་མཚོའི་ཕ་རོལ་བསྐྱོད་པ་དཀའ་འམ།།
ཚིག་ནག་རྒྱུ་འདེད་བྱང་བའི་འཁོར་བའི་ཕག་ནས།།
སྐར་གྲངས་སྲན་མ་རྒུམ་པའི་འདུར་འགྲོས་ཙམ་གྱིས།།
ངེས་ཤེས་དངུལ་དཀར་དྲྭ་ཕྱེད་འཕྱང་ཐབས་མེད་ན།།
ཕྱི་མཛེས་འཇའ་ཚོན་རི་མོ་གསོན་རིན་འདུག་གམ།།
ངེས་མེད་ཁྲོན་པའི་གསེར་གཤོག་སྐྱིད་སྐྱིད་སྙམ་ཡང་།།
སོས་ཐན་ཚ་གདུང་འགོགས་པའི་ཁྲབ་བྱང་མེད་པས།།
ཚེ་མཇུག་རྨིག་པའི་རྫིང་བུར་འགྱུར་བ་མཐོང་སྐབས།།
བརྟེན་མེད་སྲིད་པའི་རྨི་ལམ་རྨིས་ཚུལ་གཟེན་ནམ།།
Leave a Reply