དྲན་པ།

                                     ལྷ་ལྕམ། (ཛམ་ཐང་།)

ནང་སེམས་ཀྱི་ཉེ་སར་གཅར་བའི་མི
མཚན་གུང་འདིའི་དྲན་པ་ཁྱོད་ལ་དབང

དྲན་པ་དེའི་སྣེ་རུ་བཅང་བའི་ཞེན་ཆགས་དེ
ལས་དབང་གིས་ང་ལ་གནང་བའི་ཁུར་བོ་ཞིག་ཡིན་ནམ
ཡང་ན མི་ཚེའི་འོད་སྣང་དེ་ཡིན

ཡོད་ཚད་ནས་ཡོད་ཚད་དྲན་པ་དེ་ཡིན་པས
སྙིང་ཉེ ངའི་ཕྱོགས་སུ་འཁོར་དང
དྲན་པའི་རི་མོ་ཁྱོད་སར་འཁྱིལ་ཡོད

2021.9.7 མཚན་མོར།

རྟོག་བཏགས།

མི་ཚོགས་དང་གཏན་དུ་གྱེས་རྗེས
ཁུ་སིམ་པའི་ཕྱི་དྲོ་དེར
སྒེའུ་ཁུང་གམ་གྱི་མེ་ཏོག་དེ་ལ་ཚེ་སྲོག་གསར་བ་ཞིག་ཐོབ

རྒྱང་རིང་བའི་མི་ཚོགས
ང་ལ་ཁ་ཆུ་མ་གཏོར་རོགས
ཡོད་ཚད་ལ
དཀར་པོ་དཀར་རྐྱང་གི་སེམས་པ་ཞིག་བཟུང་ཆོག

2021.9.11 ཉིན།

རྒྱང་རིང་གི་མི།

_____ནུ་བོ་ལ་ཕུལ་བ།

ནང་མི
ཡོད་ཚད་ལས་ཀྱིས་བསྐོས་པ་ཡིན་སྐད
ཡང་ན སེམས་ཀྱི་འཁོར་ཕྱོགས་ཤིག

ལོ་ཟླ་དེའི་རྗེས་སུ
ཁྱོད་ལ་རྨི་ལམ་ཞིག་འཁོར་ཡོད
མཛེས་སྡུག་གི་རྨི་ལམ་ཞིག་འཁོར་ཡོད

རྒྱང་རིང་གི་མི
ནང་སེམས་ཀྱི་ཉེ་སར་གཅར་ཡོད

2021:9:11 མཚན་མོར།