རེབ་གོང་། གློག་སྨྱུག
ལོ་ནས་ཟླ་ལ་རིང་དུ་མ་འཕྲད་ཅིང་།།
སུ་ཡིན་གང་ལ་མ་ལས་རྒྱུས་ལོན་ཡོད།།
གྱོད་གཞི་གཏམ་གྱི་སྒོ་མོ་དབྱེན་པ་བ།།
ཁ་ཐག་རིང་བར་གྱེས་ན་སེམས་ཁམས་དྭངས།།
གནས་ལྔ་རིག་པའི་ཐེམ་སྐས་བགྲོད་པ་ལ།།
བློ་དང་ཐབས་ཀྱི་རྐྱེན་གྱིས་མ་བསྒྱུར་ཅིང་།།
མིག་ཟུང་བསླུ་བར་བྱེད་པའི་ཆོ་འཕྲུལ་དེས།།
དབང་པོ་ལྔ་ལ་ལྕགས་ཀྱི་ཟྭ་ཞིག་བརྒྱབས།།
ལོ་རྒྱུས་ཁུངས་མེད་འགའ་ཡི་རྩ་བ་ཞིག།
ཡིད་ལ་བཟུང་ནས་མཁས་པར་རྟགས་གསལ་གཏོང་།།
རིགས་ལམ་ཡ་མ་བརླ་ཡི་གཞུང་ཚིག་དེས། །
རྩ་བའི་དམ་བཅའ་ཤོར་བ་དགོད་རེ་བྲོ། །
ཡོད་ཚད་སྟབས་བདེ་གཏོང་བའི་སྤྱི་ཚོགས་འདིས།།
ཕན་བདེ་བསྐྲུན་པའི་གཏམ་དེ་བདེན་ན་ནི།།
ཨ་མྱེ་དང་ནི་ཨ་ནེ་ལ་སོགས་པས།།
སྡུག་གི་མགོ་བོ་སྒུར་བ་འདིའང་ཅི།།
ངལ་རྩོལ་ལས་ལ་དགའ་བའི་མི་རིགས་འདི།།
རྣམ་གཡེང་རྫུན་ལ་དགའ་བའི་རིགས་སུ་བསྒྱུར།།
ཡོད་ཚད་ཕྱི་བཤོལ་བྱེད་པའི་བྱ་ལས་ནི།།
ཉལ་ལ་དགའ་བའི་ཕག་གི་རྗེས་སུ་འཇོག།
ཅི་མཁོ་ང་ཡིས་བསྒྲུབ་ཅེས་བརྩེ་བའི་གཏམ།།
ཤོད་ལ་དགའ་བའི་དེབ་རབས་ཆ་འཕྲིན་པའི།།
རྫས་སླད་ཞུགས་པའི་དངོས་དང་ཅ་ལག་རྣམས།།
ཉིན་འགའ་འགོར་ཚེ་དུག་གི་རླངས་པ་འཐུལ།།
ལྷ་བྱ་ཁུ་བྱུག་ལྷོ་རུ་བཞུད་དོན་དང་།།
འབྱུང་བ་ལྔ་ཡིས་མཚོན་ཆས་བསྣུན་དོན་སོགས།།
དུག་རླངས་སྨུག་སྤྲིན་བཞིན་དུ་འཐིབས་པ་དང་།།
སྙིང་ཁ་ལྕགས་འཛེར་བརྡབས་པའི་དོན་གྱིས་ཡིན།།
ཉེ་བའི་ཉེ་མི་ཁྱོད་དང་འབྲལ་འདོད་དང་།།
རིང་བའི་མི་ཡིས་འཕྱ་ཚིག་སྨྲ་དོན་སོགས།།
དབྱེ་གཞི་གཅིག་ལས་གྱེས་པའི་དོན་དག་ཡིན།།
མི་གཙང་ཐལ་བ་གང་གིས་ཁྱོའི་ཁ་ཆོད།།
ཁྱིམ་མཚེ་ཡར་མར་འཁོན་ཁ་གཏུགས་པར་དང་། །
ན་ཆུང་བྱིས་པའི་མིག་ཟུང་དམར་པོར་བཏང་། །
རལ་གྲི་མེ་མདའ་སློབ་པའི་སྦྱོང་བརྡར་དེས། །
ཕ་མའི་མགོ་བོ་གཏུབས་པའི་ཀུན་སློང་སྦྱིན། །
ཀྱེ་ཧོ་གཤིན་རྗེའི་གཤིན་གྲི་ངར་མ་འདི། །
སུ་ཡིས་འཇིག་རྟེན་ཁམས་སུ་ཁྱབ་བརྡལ་བྱས། །
ཆོས་སྐྱོང་ཟེར་བའི་ལྷ་ཀླུ་གཞི་བདག་གིས། །
སྤྱན་གྱིས་གཟིགས་ཏེ་མཐར་སྐྲོད་ཅིས་མ་བཏང་། །
Leave a Reply