ཞེ་འདང་གི་དྲ་བ།(སྨད་ཆ)

                                          རྩོམ་པ་པོ་གྲོག་མ།[ཆབ་མདོ་རི་བོ་ཆེ]

༥༡
ང་ནི་ཁྱེད་ཉིད་ལ་དགའ་ཡང
ཁྱེད་ནི་གཞོན་ནུ་མས་བཏང་བའི་ཤོག་བྱ་ལ་དགའ
ཤོག་བྱ་ནི་སྐུད་པ་རིང་པོ་དང་མེ་ཏོག་སྣ་མང་ལ་དགའ་སོང

༥༢
ཁྱེད་རང་བོང་བུ་ལ་དགའ་དུས
མེ་ཏོག་གི་སྐྱེད་ཚལ་འབྲི་ཤེས་པའི་རི་མོ་པ་ཞིག་ཡིན
ཁྱེད་རང་རྟ་མཆོག་ལ་དགའ་དུས
མྱ་ངམ་གྱི་ཐང་སྟོང་ན་ལུས་པའི་གླུ་པ་ཞིག་ཡིན

༥༣
མེ་ཏོག་གིས་དབེན་པའི་རི་ཁྲོད་ནས་ཆུ་ཡི་ཟིལ་པ་འཐུང་བཞིན
ཁུ་སིམ་གྱི་མཚན་མོར་རང་སེམས་བྲན་དུ་བཀོལ་ཤེས
འུར་ཟིང་གི་ཉིན་མོར་རྣམ་ཤེས་རྒྱ་ཡན་དུ་གཏོང་ཤེས

༥༤
བྱིའུ་ཆུང་འཇོལ་མོས་སྨུག་པ་ལངས་བྱུང་ཟེར་བའི་སྐད་ཅོར་བརྒྱབ
རྒྱ་མེན་དམར་པོས་ཕྱི་རྟིང་མཐོན་པོར་བཀྱགས་ཏེ་ལྟ་དུས
འཁོར་བའི་ནགས་ཚལ་ཆེན་མོ་ལ་མེ་ཤོར་འདུག་པ་དང
འཚོ་གནས་ཀྱི་ཚི་དྲེག་ལས་དུ་བ་འཕྱུར་བཞིན་འདུག

༥༥
ང་ཡི་ཨུག་ཆོས་དམར་པོ་ཡ
ཁྱེད་རང་བཞད་མོ་ཡང་ཡང་བཞད་ཅིང
སྤྱན་ཆབ་ཡང་ཡང་བསིལ་དོན་ཅི་ཡིན
སྐྱེ་བ་སྔོན་མ་དེ་གོ་བ་ལོག་སྒྲུབ་ཏུ་སོང་ཞིང
སྐྱེ་བ་རྗེས་མ་དེ་ཞུས་དག་གཏོང་ཐབས་མེད་པར་གྱུར་སོང་ངམ

༥༦
ང་རང་ཁྲག་གིས་འགྲངས་ཏེ་རི་མགོར་སོང་བ་ན
ཏག་ཏག་མེ་ཏོག་བརྒྱ་དང་རྩ་བརྒྱད་མཐོང
ང་རང་འོ་མས་བརྒྱགས་ཏེ་ཐང་ལ་བབས་པ་ན
ཏག་ཏག་མེ་ཏོག་བརྒྱ་དང་རྩ་བརྒྱད་མཐོང

༥༧
འབུ་གྲོག་མས་མེ་ཏོག་གི་ངོ་གདོང་ལ་ཐད་ཀར་ལྟ་མི་ཕོད
དེ་ནི་མེ་ཏོག་གི་བསམ་བློ་བདེ་ཐང་དང་ལྡན་ཞིག
མིག་འོད་རྣོ་ངར་ཆེ་བས་ཡིན་ནམ

༥༨
ང་རང་སྒོར་མོ་ཁྱེར་ཏེ་མེ་ཏོག་ལུང་པར་འགྲོ་དགོས
དཀར་དམར་གྱི་མེ་ཏོག་དག་རང་ཁྱིམ་དུ་གླ་ཡོང་དགོས
ངས་རང་གི་དབང་ཆས་མེ་ཏོག་རྣམས་གཡོག་དུ་བཀོལ་རྒྱུ་དེ་མིན
ང་ལ་དད་གུས་ཚད་མེད་ཞུ་ཤེས་པའི་འདྲ་སྐུ་ཞིག་བླུགས་དགོས་ཡོད

༥༩
མེ་ཏོག་གིས་སྤང་ཐང་ལ་ཕར་མཛེས་ཆོས་ཁྲ་ལམ་ལམ་ཞིག་སྤྲོ་ན་འདོད་མོད
མཛེས་ཆོས་ཀྱི་ཕྱྭ་གཡང་ཡོད་ཚད་མེ་ཏོག་གི་སྟེང་དུ་ཚུར་འོད་མེར་མེར་སྤུངས་བྱུང

༦༠
སྐུ་ལུས་ཀྱི་བཀོད་པ་སྟོང་དང་ལྡན་པའི་སྤང་ཐང་གི་སྒྲོན་མེ་ཟིལ་པ་ཅན
རྩྭ་ལྗང་གི་ཁྲི་ལ་བཞུཊ་པའི་དཔྱིད་དུས་ཀྱི་སྤྲུལ་སྐུ་ཉི་མ་བསྟན་འཛིན
ཡིག་འབྲུ་གཅིག་ཀྱང་ཀློག་མི་དགོས་པའི་སྨུག་པའི་ནང་གི་སློབ་གྲྭ་ཆུང་ཆུང
ངོ་བསྟོད་ལ་ཉན་མི་ཤེས་ཤིང་བག་ཡངས་ཀྱིས་ངུ་ཤེས་པའི་བུ་མོ་སྒྲོལ་མ

༦༡
ཁྱེད་ནི་བར་སྣང་གི་མེ་ཏོག་ཕོ་བྲང་དེ་ཡིན་པས
ངས་རྣོ་ལྕགས་ཀྱི་སྐས་རིང་ཞིག་འཛུགས་ག་ལ་ཕོད
ཁྱེད་ནི་ལྗང་མྱུག་གསར་པའི་སྟེང་གི་ཆུ་ཡི་ཐིགས་པ་དེ་ཡིན་པས
ངས་ཞོགས་པ་རེ་རེ་བཞིན་དུ་འབྲུག་སྒྲ་ལྷང་ལྷང་སྒྲོག་དགོས

༦༢
ཀྱེ་མེ་ཏོག་ལགས
དབུ་ལྕོག་ལྡེམ་ལྡེམ་མ་གནང་རོགས
སྤྱན་ཆབ་ཉིལ་ཉིལ་ཡང་མ་གནང་རོགས
ཁྱེད་ཀྱི་སེམས་ནང་གི་སྡུག་ཡུས་དེ་ང་ལ་མི་གསུང་རོགས་གནང
ཁྱེད་ཉིད་ངག་སྒོ་བསྡམས་ཏེ་ཁ་རོག་གེར་ཤམྦྷ་ལ་རུ་ཕྱིར་ཕེབས་རོགས

༦༣
བྱིའུས་མངོན་ཤེས་བཤད་དུས་སུ
མེ་ཏོག་རྣམས་ཀྱི་ཁོང་འཛུམ་གྲོལ

༦༤
ཆར་ཆུ་ནི་ཇ་ལོ་བཞིན་དུ་མར་མར་ཤེལ་ཕོར་གྱི་ཞབས་སུ་ནུབ
སྨུག་སྤྲིན་ནི་དབུགས་ལྒང་བཞིན་དུ་ཡར་ཡར་ཇ་ཕོར་གྱི་སྟེང་དུ་གཡེང
མེ་ཏོག་གིས་ཁྱེའུས་ནུ་ཞོ་རོལ་བ་བཞིན་དུ
ཤེལ་ཕོར་གྱི་ཕྱི་རོལ་ནས་བསམ་བློ་འཐུང

༦༥
ལྷ་མོ་རྐང་རྗེན་མ
ཁྱེད་ཀྱིས་ཞབས་བྲོ་ལྡིང་དུས་ང་ལ་སྣང་ཆུང་མ་གནང
ཐང་ཆད་པའི་ཉི་དགའ་མེ་ཏོག་ཆུ་རུ་གྱུར་སོང
ངི་ཡི་སེམས་པ་ཡང་ཆུ་རུ་གྱུར་སོང་ཨང

༦༦
བལྟས་པས་མི་ངོམས་པའི་ལྷ་མོ
མེ་ཏོག་ལྟ་བུའི་བརླན་ཤ་ཅན་གྱི་ལྷ་མོ
ཞལ་རས་འཛུམ་ཙམ་མཛད་པའི་ལྷ་མོ
ཕྱག་ན་མིག་ཆུ་ཕོར་པ་གང་བཟུང་བའི་ལྷ་མོ
ལྷ་མོ་ཁྱེད་ངེད་ཚང་ལ་མ་བོས་མགྲོན་དུ་ཕེབས་བྱུང

༦༧

ང་ལ་བློ་ཐབས་བརྒྱ་དང་བརྒྱད་ཡོད་པས
ཉིན་གུང་ཕྱེ་མ་ལེབ་ཁྲ་བོར་གྱུར་ཏེ་མེ་ཏོག་གི་གྲལ་དུ་བསྲེས
མཚན་མོར་འབུ་མེ་ལྕེབ་སྐྱ་བོར་བརྫུས་ཏེ་མར་མེའི་ནང་དུ་བསྲེས
ངས་རང་ཉིད་ཀྱི་ཞན་ཆ་དང་ངོ་ཚ་དེ་ལྟར་སྦས་ཐུབ་སོང་སྙམ

༦༨
སྨུག་པ་དང་མེ་ཏོག་མ་སྨད་གཉིས་ཕན་ཚུན་བསྟུན་ཅི་ཐུབ་བྱས་པས
སྤྲིན་དང་ཁ་བ་གཉིས་ཀྱི་བརྩེ་དུང་དེ
མི་མངོན་པའི་དབྱིགས་ཤིག་ན་སྣང་མེད་དུ་ལུས

༦༩
ཁ་བའི་ནང་དུ་ཁུ་སིམ་མེར་བཞད་པའི་ལྕང་མའི་ལུ་གུ
ཁྱོད་རང་དུས་ནམ་ཡང་མེ་ཏོག་གི་གྲལ་དུ་འཚང་ཁ་མ་བྱེད
རང་ཉིད་ཁོ་ནར་གཏོགས་པའི་གླུ་གཞས་དེ་སིང་སིང་ལོངས
དེ་ནས་རྣམ་པར་དག་པའི་བྱིའུ་དཀར་པོ་ཞིག་དང་འདྲ་བར
གཤོག་སྒྲོ་བརྐྱངས་ཏེ་རྒྱང་རིང་དུ་འཕུར་ཅིག

༧༠

ང་ཡི་ཞོ་སྐྱེས་མེ་ཏོག
ཁྱོད་རང་གཤོག་པ་བརྐྱངས་ནས
ཐག་རིང་ཕྱོགས་སུ་འཕུར་སོང
ཁྱོད་རང་སྔར་བཞིན་འཛུམ་བཞིན
ལོག་ཡོང་བསམ་པ་མ་བྱུང

༧༡
ངས་ལུ་གུ་མེ་ཏོག་འདི་དག་རི་དྭགས་བཞིན་དུ
ཆེས་བག་ཡངས་ཀྱི་ངང་ནས་འཚོས་ན་བསམ་བྱུང
ཤིང་སྡོང་རྒས་ཚུལ་དང་ཁ་བ་འབབ་ལུགས་སོགས
རི་དྭགས་ཀྱི་རྫི་བོ་ཞིག་གིས་མི་ཤེས་ཀྱང
དེ་ལ་ཞེ་འགྱོད་མི་དགོས་བསམ་བྱུང

༧༢
ང་རང་སློབ་གྲྭར་འགྲོ་དགོས
ཁུར་མོང་མེ་ཏོག་རླུང་གིས་གཏོར་ཚུལ་དང
ཁམ་བུ་མེ་ཏོག་ས་རུ་ཟགས་ཚུལ་སློབ་དགོས
དེ་དག་སྙན་ཚིག་གི་བུ་རམ་མངར་མོའི་སྟེང་དུ་སྦྱར་ཏེ
ནགས་ཁྲོད་ཀྱི་ཤེའུ་ཁེར་རྐྱང་དེ་ལ་འཕྲིན་དུ་སྐུར་དགོས

༧༣
ང་ཡི་སྤང་རྒྱན་མེ་ཏོག་ཡ
ཁྱེད་ཉིད་བར་སྣང་དུ་ལྡིང་བར་མི་སྤྲོ་བ་བདེན་ན་ཡང
རྐང་པས་འཇིག་རྟེན་ལ་དམ་པོར་འཐམ་དགོས་དོན་ཅི་ཡང་མེད
འཇིག་རྟེན་འདིའི་ཕྱི་ངོས་ནི་སྦྲང་རྩི་ལྟ་བུའི་འབྱར་བག་ཅན་ཞིག་ཡིན

༧༤
ཁྱེད་ཀྱིས་མེ་ལོང་དང་མེ་ཏོག་གཉིས་འདེམ་ཚོད་མ་ཟིན་ན་ང་ལ་དྲིས་དང་ཆོག
མེ་ཏོག་ནི་དབྱིབས་དང་ཁ་དོག་གསར་བཟོ་བྱེད་ཤེས་པའི་མགར་བ་ཞིག
མེ་ལོང་ནི་རི་མོ་དེ་དག་ཇི་མ་ཇི་བཞིན་བཤུ་འབྲི་བྱེད་ཤེས་པའི་ལྷ་བཟོ་ཞིག

༧༥
ཕྱེ་མ་ལེབ་ཀྱིས་དག་ཞིང་གི་ཆ་འཕྲིན་མི་ཡུལ་དུ་བསྐྱལ
མི་རྣམས་འདོད་པས་དྲག་ཏུ་སྨྱོས་ཏེ་ཁྲག་དང་ཁུ་བ་ཚད་མེད་ཤོར
ལྷ་ཡི་གཤིས་ཀ་དང་ལྡན་པའི་མེ་ཏོག་དག་ངོ་ཚས་མ་བཟོད་པར
ལོང་བ་དང་ལྐུགས་པ་ཁྱུ་གཅིག་ཏུ་སྤྲུལ

༧༦
ཀྱེ་མ་སངས་རྒྱས་ལགས
སྙན་ངག་གིས་མིག་ཆུ་བཏོན་ནས་མི་སེམས་ལ་ཁ་ལོ་བསྒྱུར་སོང
མེ་ཏོག་གིས་བཞད་མོ་བཞད་དེ་སྤང་ལྗོངས་ལ་ཁ་ལོ་བསྒྱུར་སོང
ཁྱེད་ཀྱིས་བཏང་བའི་འཕྲིན་ཡིག་དེ་ད་དུང་འབྱོར་མ་བྱུང་ལགས

༧༧
མཁས་མཛངས་ལྡན་པའི་ཁུ་བྱུག་མོན་ཡུལ་དུ་ཕྱིར་གཤེགས
མེ་ཏོག་རྣམས་ལང་ཚོ་ཡི་མེ་འབར་བའི་ཡུག་ས་མར་གྱུར
ང་ཚོ་ཚང་མ་འགག་འཕྲང་ལས་ཐར་སོང
བཙོན་ར་ལས་གྲོལ་སོང

༧༨
ཐག་པ་སྦོམ་པོ་ཨུ་ཚུགས་ཀྱིས་གཡས་སུ་སྒྲིམ་མཁན་དེ་སུ་ཡིན
སྐུད་པ་ཕྲ་མོ་སྒྱིད་ལུག་གིས་གཡོན་དུ་བཤིག་མཁན་དེ་སུ་ཡིན
མེ་ཏོག་ནང་བཞིན་འཛུམ་ཞལ་གཙང་མ་སྟོན་ཞོར་དུ
གྲིམ་ལྷོད་རན་པར་སྡོད་མཁན་དེ་སུ་ཡིན

༧༩
སྤྱང་ཀི་སྨྱོས་ཏེ་ཀུ་ཅོས་རིང་ལུང་བསྐངས་ན་ཡང
རྒྱ་མེན་དམར་པོས་ཀུ་ཅོ་སྒྲོག་ཚུལ་མ་ཤེས་ཐལ
སྤྱང་ཀི་ལྟོགས་ཏེ་ལུག་ཁྲག་དྲོན་མོ་བཞིབས་ན་ཡང
གུར་ཀུམ་སེར་པོར་ཁྲག་གི་བྲོ་བ་མ་ལོབས་ཐལ

༨༠
མེ་ཏོག་མང་ཆེ་བས་འཇིག་རྟེན་ནས་ཆུ་གཙང་མ་ཞིག་བླངས་ཏེ་ལོག་སོང
མེ་ཏོག་ཁ་ཤས་ཤིག་ནི་མི་ཡུལ་གྱི་གྲང་ངར་ལ་འཕྲད་དེ་ལོག་སོང
མེ་ཏོག་པདྨ་གཅིག་པུ་སངས་རྒྱས་ཀྱི་ཞལ་མཇལ་དུ་ཡོང་བས
ཕྱིར་ལོག་བྱེད་མི་སྲིད

༨༡
ལྭ་བ་རྙིང་ཧྲུལ་གྱོན་པའི་བུ་མོ་ཁྱོད་རང་ཉི་འོད་དང་ལྷན་དུ་ཡལ
ཉི་མའི་གདོང་ལ་དམར་མདངས་ཤིག་རྒྱས་ཏེ་ང་ལ་ཕྱིར་མིག་འཕངས
ངའི་ལག་པ་གཡས་སུ་རྒྱ་སེ་མེ་ཏོག་ཅིག་བསྐུངས་ཡོད་ཅིང
ལག་པ་གཡོན་པས་བུ་མོ་ཁྱོད་ལ་གྱེས་བརྡ་ཕུལ་ཡོད

༨༢

ང་ནི་མེ་ལྕེ་དང་ཉེ་བར་གཅར་མི་ཐུབ་པའི་མི་དེ་ཡིན
དེ་ལ་ཡུམ་ཆེན་ཁྱེད་ཀྱིས་དགོངས་ཡངས་གནང་དགོས
ཞི་བསིལ་གྱི་ཤང་དྲིལ་སེར་པོས་ང་རང་བསླུ་བྲིད་ཐེབས་སོང
མ་ཡུམ་ཁྱེད་ཀྱིས་ཁོ་བོར་བཀའ་བཀྱོན་ཚ་ཐག་པ་གནང་རོགས

༨༣
དཔྱིད་ཆར་པ་བབས་དུས་བྱིའུས་མཛའ་གཞས་གཏོང
སྟོན་འབྲས་བུ་སྨིན་དུས་མེ་ཏོག་གིས་བརྩེ་འཕྲིན་འབྲི

༨༤
ཁོས་མི་ཡུལ་ལ་ཐེ་གཏོགས་མ་བྱས
ཁོ་ལ་ལྟ་དགོངས་ཀྱི་ཚད་བཀག་མ་ཐེབས
ཁོས་ཅི་ཞིག་མཚོན་འདོད་ཀྱི་ཨུ་ཚུགས་མི་གནང
ཁོ་ནི་དེ་ལྟར་རྩེ་མོ་མི་མངོན་པའི་སྒྱུ་རྩལ་གྱི་པོ་ཏ་ལ་ཞིག་ཏུ་གྱུར

༨༥
ཁྱོད་ཀྱིས་མེ་ཏོག་ལྷ་མོའི་མིང་ནས་བཟུང་སྟེ་ངན་སྨྲས་ལན་གསུམ་བྱས་པ་ན
མེ་ཏོག་ལྷ་མོས་གུས་པའི་ཞེ་ས་དང་བཅས
ཁྱོད་ལ་མཛེས་བཟོ་བརྒྱ་དང་བརྒྱད་བྱས་སོང

༨༦
མོའི་ངོ་གདོང་ལས་ཁྲག་གི་ཐིགས་པ་གཉིས་ས་རུ་ཟགས
ས་ཆ་དེ་ནས་འཇམ་མཉེན་གྱི་མེ་ཏོག་དམར་པོ་གཉིས་འཛུམ་པར་གྱུར་མོད
ལྟོགས་སྐོམ་གྱིས་མནར་བའི་མི་སེམས་ནི་སྔར་བཞིན་བྱེ་ཐང་དུ་ལུས
སྣ་གླུ་ཟ་ཟི་རེ་ལེན་བཞིན་མུ་མེད་པའི་བྱེ་ཐང་དུ་ལུས

༨༧
འཕྱོར་ཉམས་ལྡན་པའི་མེ་ཏོག་གི་གདོང་པ་མངོན་སུམ་དུ་མཐོང་དུས
བྱིའུས་སྦྲང་རྩི་ལེན་མི་ཕོད་པར
སྙིང་ཆུང་དྲག་ཏུ་ལྡིང་བཞིན་བར་སྣང་སྟོང་པ་རུ་འཕུར
བར་སྣང་སྟོང་པ་རུ་རྗེས་དྲན་གྱི་མཆན་བུ་མང་པོ་བཏབ

༨༨
བྱིའུས་མེ་ཏོག་ལ་བཤད་རྒྱུར
ཁྱེད་ནི་བྱིས་པའི་སེམས་ཁམས་གཡར་ཏེ
འདབ་ཆགས་ཀྱི་གླུ་དབྱངས་ཉན་རྒྱུར་དགའ་བའི་སྙན་ངག་པ་ཞིག་རེད
མེ་ཏོག་གིས་དེའི་ལན་དུ
ང་ནི་སྙན་ངག་པའི་སེམས་ཁམས་གཡར་ཏེ
འདབ་ཆགས་ཀྱི་གླུ་དབྱངས་ལ་ཉན་རྒྱུར་དགའ་བའི་བྱིས་པ་ཞིག་ཡིན

༨༩
ཁྱོད་ཀྱི་འཇོན་ཐང་ནི་ངོ་སྙི་བའི་ཁམ་བུ་མེ་ཏོག་ཅིག་རེད
ཁྱོད་ཀྱི་སེམས་པ་ནི་འཆི་སླ་བའི་ཕྱེ་ལེབ་ཆུང་ཆུང་ཞིག་རེད
འབུ་གྲོག་མའི་གོམ་ཞེང་གིས་ཁྱེད་ལ་གྱེས་ཕྱག་འབུལ་ལོ

༩༠
བསམ་པའི་གཞིས་ཁྱིམ་བོར་བའི་སྙན་ངག་པ་ལགས
ཁྱོད་ཀྱིས་མེ་ཏོག་ལྡུམ་ར་རུ་གཟིགས་དང
ལྡུམ་རའི་ནང་གི་གུར་ཀུམ་དམར་པོ་དེས
སྒེའུ་ཁུང་བརྒྱུད་དེ་མི་ཁྱིམ་ལ་ཡར་བལྟས་པས
སེམས་ཀྱི་རྟེན་ས་ཞིག་རྙེད་དེ་གཉིད་དུ་ཡུར་སོང

༩༡
མེ་ཏོག་འདི་དག་རེ་རེ་བཞིན་ལྷ་དང་ལྷ་མོ་ཡིན་པས
ཁོང་ཚོའི་ཕག་ན་མི་རོ་དང་རྟ་རོ་ཡོད་མི་སྲིད
ཁོང་ཚོའི་གྲིབ་མའི་ནང་དུ་སྦྲུལ་དང་སྦལ་པ་ཡང་ཡོད་མི་སྲིད
ང་ཚོས་དེ་ལྟར་ཡིད་ཆེས་བྱེད་དགོས

༩༢
ང་ནི་རྨི་ལམ་འཁྲུག་བྱེད་ཀྱི་ཁྭ་ཏ་ནག་ཆུང
ལུས་ལ་ཚེར་མ་རྣོན་པོ་ཟུག་པའི་བྱིའུ་གཡུང་པོ
ཁྱོད་ནི་ཁ་དོག་ཡལ་ཟིན་པའི་པདྨ་སྐྱ་བོ
གངས་རི་དང་གངས་རི་ལས་བྱུང་བའི་སྐྱོ་གདུང་ནག་པོ

༩༣
མཛེས་མ་ཁྱོད་ཀྱིས་མེ་ཏོག་ལྟ་བུའི་ན་བཟའ་བཞེས
དྲན་པའི་གཏིང་རུམ་སྒུལ་བའི་རོལ་མོ་ཁྲོལ
ང་ནི་རླུང་གིས་སྐྱོམ་པའི་སྤྲིན་པ་བཞིན
གཏན་དུ་ཕྱིར་ལྡོག་མེད་པའི་གནས་སུ་འགྲོ

༩༤
ཁྱེད་དང་སེར་ཆེན་མེ་ཏོག་གཉིས
ལམ་སྣེ་ཞིག་ནས་འཛོམས་ན་ཡང
ལམ་མདོ་ཞིག་ནས་ཁ་གྱེས་ཏེ
འབྲལ་གདུང་མྱོང་དགོས་བྱུང་སོང་ཨང

༩༥
ང་ཚོ་གྱེས་བྲལ་བྱུང་ནས་ལོ་དང་ཟླ་བ་སོང་ཡང
རང་སེམས་ཀྱི་ལྡུམ་རའི་ནང་དུ
རྙིང་རྒྱུ་དང་རྒས་རྒྱུ་མེད་པའི་མེ་ཏོག་དེ
ཁྱོད་རང་གཅིག་པུ་རེད་ཤག

༩༦
སྒྲོན་མེས་ཟླ་འོད་ལ་འགྲན་སློང་བྱེད་ཅིང
སྲིན་འབུ་མེ་ཁྱེར་གྱིས་སྐར་ཚོགས་ལ་འཇིགས་སྐུལ་གནང
ཁ་བའི་མེ་ཏོག་གིས་འཇམ་ཅ་གེར་ས་གཞི་ཆེན་མོར་ལྭ་རིང་བཟོ

༩༧
ཇོ་མོ་གླང་མ་ཇེ་མཐོ་རུ་བུད་སོང
ཡར་ཀླུང་གཙང་པོ་ཇེ་རིང་དུ་གྱུར་སོང
འོན་ཀྱང་གོ་རིམ་དེའི་ཁྲོད་ནས་ང་ཡི་དར་རྒུད་མ་གླེང་རོགས
སྤུན་ཟླ་ང་ཡི་ལས་དབང་ནི་རྩྭ་ལྗང་གི་ཟིལ་པ་ཡིན
མེ་ཏོག་གི་འདབ་མ་ཡིན

༩༨
ང་ཡི་སྨྱུག་གི་གླིང་བུ་སེར་པོ་དེ
རེས་འགའ་པིར་གྱི་ཡུ་བ་བྱས་ཤིང་མེ་ཏོག་བྲིས
སྐབས་རེ་ཕྱག་མའི་ཡུ་བར་གྱུར་ཏེ་གད་སྙིགས་སྡུད
ཁྱེད་ནི་ལྷམ་ཆུང་ཡ་གཅིག་བོར་ཡང་རྩེད་མོ་རྩེ
མདུན་གྱི་སོ་གཅིག་ལྷུང་ཡང་གད་མོ་བགད

༩༩

བློ་རིག་གི་རལ་གྲི་ནི་ངའི་གཤོག་པ་ཡིན
གཏི་མུག་གི་གྲི་ཤུབ་ནི་ངའི་སྒོ་ང་ཡིན
ཨ་མ་ཁྱེད་ནི་ང་ཡི་ལྷ་ས་དང་ལྷ་ཡུལ་ཡིན
འོ་ན་ངའི་མེ་ཏོག་ལྡུམ་ར་དང་པོ་ཏ་ལ་གང་ན་ཡོད་དམ
བྱེ་མའི་ནང་གི་མཆོད་རྟེན་དེ་པོ་ཏ་ལ་ཡིན་ནམ
རླུང་གིས་ཁུར་བའི་ཤོག་བྱ་དེ་མེ་ཏོག་ལྡུམ་ར་ཡིན་ནམ

༡༠༠
གཡུ་ཆུང་དྲུག་དཀར་ཞིག་རྙེད་ཅིང་བོར་བརླག་ཏུ་སོང
མེ་ཏོག་དཀར་པོ་ཞིག་བཞད་ཅིང་ཆུ་རུ་གྱུར
ཡོད་ཚད་རྩེད་ཆས་སུ་མཐོང་བའི་བྱིས་པ་དེ་རྒས་སོང
ཡོད་ཚད་ཚོང་རྫས་སུ་མཐོང་བའི་ཕྱུག་པོ་དེའང་ཤི་སོང

༡༠༡
གླང་རྫི་ཆོས་པ་རུ་གྱུར་ཅིང་ཆོས་པ་གླང་རྫི་རུ་གྱུར་འདུག
དེ་ནི་ཆོས་པས་གླང་རྫི་ལ་ཆོས་བཤད་བྱས་ཤིང
གླང་རྫིས་ཆོས་པ་ལ་གླང་བཤད་བྱས་པའི་རྐྱེན་གྱིས་མིན
ས་ཡི་མེ་ཏོག་དག་གནམ་ལ་འཕུར་བ་དང
གནམ་གྱི་མེ་ཏོག་དག་ས་རུ་བབས་པའི་གོ་རིམ་དེ་ཡིན

༡༠༢
སྤྲིན་པས་ང་ལ་འཕྲིན་ཡིག་བྲིས་ཏེ
ཁ་བའི་མེ་ཏོག་རེ་རེ་ནི་ཁྱོད་ཀྱི་འགྱུར་སྐྱེན་པའི་འཇིག་རྟེན་དེ་ཡིན་ལ
དུས་ཚོད་སྐར་ཆ་རེ་རེ་ནི་ཁྱོད་ཀྱིས་འཚོལ་བཞིན་པའི་དག་ཞིང་དེ་རེད་ཟེར
ངས་དེ་ལ་ཡིག་ལན་དུ
ཁ་བའི་མེ་ཏོག་ཟེར་བ་འདི་ནི
གཉེན་སློང་མ་བྱས་གོང་ནས་མནའ་མར་ཡོང་མཁན་གྱི་བུ་མོ་ཞིག་རེད་ལ
དུས་ཚོས་སྐར་ཆ་རེ་རེ་ནི་ངས་མོ་ལ་བྱིན་པའི་བཟོད་སྒོམ་དང་ངང་རྒྱུན་དེ་ཡིན
ཞེས་བྲིས་ཡོད

༡༠༣
ཁྱོད་ཀྱི་དད་མོས་ནི་སྟོན་ཁའི་ཁུར་མོང་དང་འདྲ་བར
རླུང་བུ་ཅུང་ཟད་ཅིག་ལྡང་དུས་གནམ་ལ་འཕུར་དགོས
ང་ཡི་དད་མོས་ནི་ཞོགས་པའི་འཇོལ་མོ་དང་འདྲ་བར
འོད་སྣང་ཅུང་ཟད་ཅིག་ཚོར་དུས་ཀྱུར་སྒྲ་སྒྲོག་དགོས

༡༠༤
ཤེལ་དམ་སྟོང་པ་ལྟ་བུའི་གླུ་པ་ལགས
ཁྱོད་ཀྱིས་ང་ལ་གནས་ལུགས་མང་པོ་ཞིག་མ་བཤད་རོགས
མེ་ཏོག་ལ་ཤི་གསོན་ཟེར་བ་ཞིག་མེད་ན་ཡང
རྐང་ལག་རྐྱང་སྐུམ་ཙམ་གྱིས་ཀྱང
འཇིག་རྟེན་ལ་བྲི་གང་བྱེད་ཐུབ

༡༠༥
ཁྱེད་ཀྱིས་མྱ་ངན་བྱེད་དུས
ངས་ད་གཟོད་མིག་ཆུ་འདོན་དགོས་པ་དྲན་བྱུང
ཁྱེད་ཀྱིས་ང་ལ་སྐམ་རྙིད་དུ་སོང་བའི་མེ་ཏོག་ཅིག་གནང་དུས
ངས་གཞི་ནས་ཁྱེད་ལ་ཤོག་བུ་སྟོང་པ་ཞིག་འབུལ་དགོས་པ་ཤེས་བྱུང

༡༠༦
དད་པ་དང་འདོད་ཆགས་གཉིས་མི་འདྲ་བར་ཞིབ་ཆ་ཕྱེས
ཁྲོ་གཏུམ་ཅན་དང་དཔའ་བོ་གཉིས་མི་འདྲ་བར་ཞིབ་ཆ་ཕྱེས
ཁ་བའི་མེ་ཏོག་ཅིག་དང་འདྲ་བར་ཞིབ་ཆ་ཡང་ཡང་ཕྱེས་ཀྱང
ཚངས་དབྱངས་རྒྱ་མཚོས་མ་རྙེད་པ་དེ་ངས་ཀྱང་རྙེད་མ་བྱུང

༡༠༧
ཁྱོད་རང་མེ་ཏོག་ལྡུམ་རར་བཞག་ན་ཕྱེ་མ་ལེབ་དང་ལྷན་ཅིག་རྩེ
ཁྱོད་རང་མཆོད་པའི་སྟེགས་སུ་བཤམ་ན་ལྷ་མོ་དག་དང་གར་ལ་རོལ
འགྱུར་བ་སྐྱེན་ཞིང་ནོགས་པར་སླ་བའི་ཁྱོད་ཀྱི་རང་གཤིས་དམར་རྗེན་མ
བྱིས་པ་དག་དང་སྤྱོད་པ་མཐུན་ཞིང་སངས་རྒྱས་རྣམས་དང་དགོངས་པ་མཉམ

༡༠༨
ང་རང་བྱིས་པ་ཡིན་དུས་ཤོག་བུའི་གྲུ་ཆུང་ཡང་ཡང་བཟོས་མྱོང
དེ་དག་གཙང་ཆུ་བརྒྱུད་དེ་མཐའ་ཡི་རྒྱ་མཚོར་སྤྲིངས་མྱོང
རྒྱ་མཚོ་ཆེན་མོས་བྱིས་པ་ཞིག་གི་སེམས་འདུན་མ་བརྗེད་པར
སྤྲིན་དཀར་དང་ཆར་ཆུ་བརྒྱུད་དེ
ང་ལ་མེ་ཏོག་འདི་དག་སྐྱེས་སུ་གནང་བྱུང་།

2020.10.28