རྫོང་རྒྱབ་ཀླུ་ཁང་།

                                                  མ་སྐྱེས་སམ། རྟ་མགྲིན་རྡོ་རྗེ།

ལྷ་མོའི་མེ་ལོང་བཞིན་དྭངས་པའི་མཚོ་ངོགས་སུ
མཐིང་མདོག་གི་ནམ་མཁའ་དང་སྤྲིན་དཀར
ཕོ་བྲང་གི་གསེར་ཏོག་དང་ཁང་མིག་རེ་རེ
བསིལ་འཇམ་གྱི་རླུང་བུ་དང་འགྲོགས་ནས་འགུལ་གྱིན་འདུག

མི་ཚོགས་ཀྱི་ཁ་རླངས་འཐུལ་བའི་བར་སྐོར
སྐད་གདངས་མི་གཅིག་པའི་འགྲུལ་བ་དེ་དག
པར་ཆས་ཀྱི་སྣེ་མོ་རུ་མཛེས་སྡུག་འཚོལ་གྱིན་འདུག
ཚ་གདུགས་ཀྱིས་གདུང་བའི་བར་སྐོར་དུ
བོད་ལྭ་གྱོན་མཁན་ནི་བོད་པ་མིན་ལ
མ་ཎི་འཛིན་མཁན་ཡང་དད་པས་མིན
ཇོ་བོའི་འཛུམ་མདངས་དང་བཞུགས་ཁྲིར་མཇལ་དུས
མིག་ཆུ་ཤམ་ཤམ་དུ་བཞུར་བ་ནི་དད་པ་ཡིན་ལ་བོད་པ་ཡང་ཡིན

འུར་ཟིང་གི་འཁྲུག་ཆ་དེ་དག་རེ་ཞིག་འཇགས་ཤིང
གནས་འདི་ནས་ཕོ་བྲང་གི་བརྗིད་རྔམ་མཐོང་ཐུབ་ལ
ཚངས་དབྱངས་པའི་གསང་ལམ་དོག་མོ
རྫོང་རྒྱབ་ཀླུ་ཁང་ཡང་སེམས་ཀྱིས་གཉོར་ཐུབ
སྔོ་ཐིང་ཐིང་གི་གཡུ་ཡི་མཚོ་མོ
མཚོ་མོའི་མེ་ལོང་གི་ངོས་སུ
ཉ་མོའི་འཁྱུག་རྩལ་ངོམ་གྱིན་འདུག
ཨ་ཅག་ཚོས་སྙན་གཞས་ལེན་གྱིན་འདུག
སྟག་ཤར་ཚོས་རྡོག་སྒྲ་འཐེན་གྱིན་འདུག
སྤྲིན་པའི་གསེབ་ཀྱི་དམར་པོ་རི
གསེར་ཏོག་གི་འོད་ཟེར་ལམ་ལམ
བརྗིད་ཉམས་ཀྱིས་འགྱིང་བའི་གསེར་ཁྲི་མཐོན་པོ
དྲན་པས་རྙེད་པའི་ཨུ་དུམ་ཝ་ར
དུས་ཚོད་ཀྱི་ཐག་སྒྲས་ང་རང་མ་དཀྲོགས་ཨང

མ་ཎི་འཁོར་ལོ་དང་ཆོས་སྒྲ་སྙན་མོ
སྤོ་བོ་དང་རྨོ་བོ་ལགས་ཀྱི་ཞལ་བརྡ་དྲོན་མོ
ལྗང་ནེམ་ནེམ་གྱི་ལོ་འདབ་འོག་ཏུ
བསིལ་རླུང་གིས་དཀྲོལ་གྱིན་འདུག
ལན་རེར་ཐོས་འོང་བའི་རྒྱུད་དྲུག་དབྱངས་རྟ
ལོ་ཟླས་རེ་དོགས་ཡོད་ཚད་གཡུགས་ནས
རྫོང་རྒྱབ་ཀླུ་ཁང་གི་མཛེས་སྡུག་འཐུང་བར་བྱ
ལེ་དབར་སྟོང་ཕྲག་གི་བར་ཐག་དང་མྱ་ངན
རྫོང་རྒྱབ་ཀླུ་ཁང་གི་མཚོ་ངོགས་ནས
ཞེན་ཆགས་མེད་པར་འཕོ་བར་བྱས
གཡའ་དག་པའི་མཚོ་མོ་ཡ
བདག་གི་དྲན་པའི་བརྩེ་བ་འདི་མ་བརྗེད་ཨང
2021ལོའི་ཟླ་6པའི་ཚེས་3ཉིན་གྱི་མཚན་མོར་ལྷ་སར་བྲིས།

སྟོན་ཁ། མཐའ་བྲལ་གྱི་དྲན་པ།
                                                 མ་སྐྱེས།

ལོ་མར་སེར་ཐིག་ལྷུང་ཚུལ་ནི་སེམས་པ་རྒས་ཚུལ་ཞིག་རེད
བརྩེ་དུང་དང་གྱེས་པའི་ནམ་མཁའ་ངོས་སུ
སྐར་ཚོགས་ཀྱི་མིག་ཆུ་འཐོར་གྱིན་འདུག
རྒྱང་རིང་རྒྱང་རིང་གི་མཁའ་མཐའ་རུ
ཟླ་བས་མིག་ཟུང་ད་དུང་ཡང་ཁེར་ཧྲེང་གིས་བཟུང

སྟོན་ཁ་སེར་ལམ་ལམ་གྱིས་སླེབས་བྱུང
རི་རབ་དང་མཚོ་མོའི་སྨྲེང་སེམས
ཁྲུང་ཁྲུང་གི་གཤོག་རྩེ་རུ་བཏེགས
སྟོན་ཟླ་རེ་རེ་ནི་གྱེས་གདུང་གི་དུས་ཚིགས་ཤིག
ཡང་ན་ནང་སེམས་ལ་བཙོ་སྦྱོང་བྱེད་སའི་བཟོ་གྲྭ་ཞིག

མ་གཞི་སེམས་པ་ནི་སྟོན་ཁ་ཞིག་རེད
སྐྱེས་པ་ནས་འབྱུང་བཞིའི་བསྐྱངས་ཤིང
མཐའ་མཇུག་གི་རུས་པ་ཡང་འབྱུང་བཞིར་འཐིམས་དགོས་པས
ཡོད་ཚད་སྨིན་ཏེ་གྱེས་བྲལ་ལ་རེམ་པའི་སྟོན་ཁ་ཞིག་དང་འདྲ་ཨང
དེ་དུས་མིག་ཆུ་མང་པོ་ཞིག་བཞུར་གྱིན་པ་མི་མཐོང་མོད
སེམས་པ་བརླན་ཤིང་མགྲིན་པ་བརྣངས་པའི་དུས་ཚིགས་དེར
ཅི་ཞིག་ཤོར་འགྲོ་བའི་འཇིགས་དངངས་ལ་སུ་ཡིས་བཟོད་ནུས
༢༠༢༡ལོའི་ཟླ༨པའི་ཚེས་༣ལ་རེབ་གོང་དུ་བྲིས།

སྣང་ས། དོ་ནུབ་ཆར་བ་འབབ་ཀྱིན་འདུག

སྣང་ས རྒྱང་རིང་ནས་མཆེད་ཡོང་བའི་དབྱངས་རྟ་ཞིག
དབྱངས་ཀྱི་འགྱུར་ཁུགས་རེ་རེས་སྐྱིད་སྡུག་གི་འདས་སོང་དཀྲོལ
ང་ལ་སེམས་པ་ཉེ་བར་བྱེད་རོགས བདག་གི་བརྩེ་བ་ལགས
ཁུ་སིམ་མེར ཡོད་ཚད་འཇགས་ཤུལ་དུ
ཁྱོད་ཀྱི་གཏམ་རྒྱུད་ཀྱིས་སྐར་ཚོགས་བསུ་བཞིན
བདག་གི་ལོ་ཟླའི་རྨི་ལམ་ག་ཚོད་ཅིག་དཀྲོགས་མྱོང

ང་རང་སྐྱོ་གདུང་གི་དུས་སུ་ཆར་བ་བབས་བྱུང
ཆར་བ་ཟམ་ཟིམ་འབབ་པའི་དོ་ནུབ ངས་ཀྱང
ང་དང་རྒྱང་རིང་གིས་ཆོད་པའི་སྣང་ས་དྲན་འོང
སེམས་པའི་འཕར་རྩ་རེ་རེ་ཆར་པས་བརླན་བྱུང
སྒེའུ་ཁུང་ལས་མཐོང་བའི་གཞུང་ལམ དཀར་ཆིལ་ལེར
གློད་འོད་ཀྱི་ཀློང་ན་ཁེར་རྐྱང་དུ་ལུས
བདག་གི་སྙིང་ཉེ་བའི་སྣང་ས དོ་ནུབ་ཁྱོད་ཀྱི་ཕ་ཡུལ་དུ
འདི་ལྟར་དྲན་པ་སྒུལ་བའི་ཆར་བ་འབབ་ཀྱིན་འདུག་གམ

མ་གཞི་ཆར་བ་འབབ་དུས མི་སེམས་ཀྱང་བརླན་ནས
ཤིང་ལོ་བཞིན་སྙི་མོ་སྙི་མོ་ཞིག་ཏུ་གྱུར དྲན་པ་ཡོད་ཚད
ཆར་བའི་ཟོལ་གྱིས་ནང་སེམས་སུ་ཟམ་ཟིམ་གྱིས་བབས
འཕྲད་པ་ནས་གྱེས་སོང་བ་དེ་དག
རང་སེམས་རང་ལ་མི་དབང་བའི་དུས་ཚོད་དེ་དག
ཐ་སྙད་ཀྱིས་སྟོང་བའི་སྐད་ཆ་ལྷག་མ་དེ་དག
ཐ་ན ཚངས་དབྱངས་པའི་བརྩེ་མགུར་གྱེར་ལུགས་དང
འཕྱོར་སྒེག་གིས་ཟིལ་གྱིས་གནོན་པའི་སྣང་སའི་ཞལ་རས
ང་དང་འབྲེལ་བ་མེད་པའི་རྒྱང་རིང་གི་རྒྱང་རིང་དེ་དག
མཚན་གུང་གི་རྨི་ལམ་ལ་བརྗེས་ནས་སང་ཉིན་ལ་ཕུལ
བདག་གི་དྲན་པ མཐའ་མེད་པའི་ནམ་མཁའ་ཞིག་རེད་ཨང

སྤྱི་ལོ་ཉེར་གཅིག་ལོའི་ཟླ་དགུ་བར་ལན་གྲུ་རུ་བྲིས།