གྱང་ཆག
ནམ་ཟླ་དགུན་ཁ་གན་ནས། །
སྙིང་སྡུག་མཛའ་མོ་དྲན་དུས། །
ཁ་བ་སེམས་སུ་བབས་བྱུང་། །
གྲང་ངར་རུས་ལ་ཟུག་བྱུང་། །
མཛའ་མོ་དྲན་པའི་གླུ་ཆུང་། །
ཁེར་རྐྱང་སེམས་ནས་བླངས་ཡོད། །
དྲན་གདུང་མཆི་མ་ཐ་ཐོར། །
གཙང་བོའི་འགྲམ་དུ་ཤོར་བྱུང་། །
ཁ་བ་མར་མར་འབབ་བྱུང་། །
རླུང་ཆེན་ཤུར་ཤུར་ལྡང་བྱུང་། །
སྐྲ་འདབས་ཁ་བ་མ་ཞུ། །
ཁྱོད་ལ་ཕྱི་མིག་བལྟས་ཡོད། །
ང་ཡི་སྙིང་སྡུག་མཛའ་མོ། །
བརྩེ་བའི་འོ་དང་འདྲ་བུའི། །
གླུ་ཆུང་སྙིང་གཏམ་དམར་པོ། །
ཁྱོད་ཀྱི་ཕྱོགས་ལ་ཕུལ་ཡོད། །
སྟོན་གྱི་སྐྱོ་བ།
སྟོན་རླུང་སེམས་ཀྱི་གསེང་དུ་ལྡང་།།
རི་སུལ་སྨུག་ཞགས་ལང་ལོང་རྒྱུ།།
ཇོ་ཇོ་མེད་པའི་གདུང་བས་མནར།།
བདག་སེམས་ན་བུན་རབ་ཏུ་འཁྲིགས།།
ཁོ་བོ་གོམ་འགྲོས་ཁྱར་ཁྱོར་ངང་།།
གཙང་བོ་འགྲམ་ནས་ཆིག་ལབ་བརྒྱབ།།
ཉི་འོད་མེད་པའི་ན་ཟུག་ལྗི།།
སྨྲེང་ཞིང་སྐྱོ་བའི་མིག་ཆུ་གྲུལ།།
གསེར་མདོག་ལོ་མ་སེར་པོ་ཞིག།
བདག་གི་སྔོན་དུ་ག་ལེར་ལྷུང་།།
གློ་བར་འཚུབ་མ་ཁེར་རྐྱང་གིས།།
བདག་གི་མདུན་ནས་རྒྱང་ལ་ཁུར།།
2020ལོའི་སྟོན་ཁར།
Leave a Reply