ཉི་ཟླ་ལྕགས་རིའི་འགྲམ་གྱི་སྙན་ཚིག་བདམས་བཀོད།

དྲན་པའི་ནང་གི་དེ་དག

                                       ཝེར་མ།

སྟོན་ཁ་བཞུད་རྗེས
ཁེར་རྐྱང་གི་རང་ཉིད་ལ་ཅི་ཞིག་ལྷག་ཡོད་དམ
འཚིག་དྲི་དྲོ་བའི་དྲན་པ་སྐོར་གཅིག
ཡང་ན་ལྷགས་རླུང་གིས་བསྒུལ་བའི་ཐ་སྙད་སྐོར་ཞིག
ད་དུང་མ་འོང་པ་ཟེར་བའི་ཐ་གུ་ནག་པོ་ཞིག

ཐ་སྙད་ཀྱི་ཚོགས་འདི་དག་རླུང་ལ་བསྐུར་རྗེས
རང་ཉིད་གཅིག་པུ་སྟོང་བསམ་གྱིས་ལུས
མཚན་མོའི་མེ་འོད་དང་ཉིན་མོའི་ཉི་འོད་ཀྱང་ཧ་ཅང་གྲང
མུན་པ་གཅིག་པུས་རྒྱང་བཞུད་ལ་སེམས་པ་འཁོར

དྲན་པ་ཡོད་ཚད་མེ་རུ་སྦར་རྗེས
རང་ཉིད་གཅིག་པུ་ཁེར་རྐྱང་གིས་འཚོ
རྨི་ལམ་ནང་དུ་སྐྱེས་པ་དེ་དག་རེ་རེ་བཞིན་ཟད
ལོ་ཟླར་བཅོལ་བ་དེ་དག་ཀྱང་རེ་རེ་བཞིན་ཡལ
                                2021 ལོར་བྲིས།

སྨྲེང་བའི་རི་དྭགས།       འབར་མིག་ཡངས།

དེ་ནི་ཇི་ལྟར་བཙལ་ཀྱང་རུང་།།
དེ་ནི་ཇི་ལྟར་རྙེད་གྱུར་ཀྱང་།།
ཇི་ལྟར་བལྟས་ཀྱང་ཁྱེད་མ་མཐོང་།།
ཇི་ལྟར་བཙལ་ཀྱང་ཁྱེད་མ་རྙེད།།
དུས་ཚོད་ལྷུག་ལྷུག་དགོད་པར་གྱུར།།
དུས་ཚོད་ཕྱི་མིག་མེད་པར་ཕྱིན།།
རྒྱང་ཐག་རིང་ཐུང་གང་ཡིན་ནམ།།
རྒྱང་ཐག་རིང་ན་མཛེས་པ་ཡིན།།
སྟོང་ངེའི་སེམས་འདི་ལུང་སྟོང་བཞིན།།
སྟོང་ངེའི་སེམས་འདི་ཁང་སྟོང་བཞིན།།

2021.3.6

སེམས་པ།     དུར་བྱ།

མི་ཚང་མར་གཞན་དང་མི་གཅིག་པའི་འཚོ་བ་རོལ་སྟངས་ཤིག་ཡོད
དེ་ལ་ཚོར་བ་ཟེར

ཚོར་བ་དེ
རང་དང་ཆེས་ཐག་ཉེ་ས་ན
ཡང་ན རང་དང་ཆེས་ཐག་རིང་ས་ཞིག་ནས
བག་ཉལ་ནས་མངོན་གྱུར
མངོན་གྱུར་ལས་བག་ཉལ་དུ་འགྲོ་བཞིན་འདུག

ཁྱེད་ལ་ངལ་དུབ་དང་གདུང་བ་ཡོད་ངེས་ཏེ
མཐའ་མི་མངོན་པའི་ནམ་མཁའ་སྟོང་བ་དེར
མིག་ཟུང་ཅེར་ནས་ལག་པས་སྟོང་གཡུག་བྱེད

ནམ་མཁའ་དང་མིག་ཟུང་གི་བར་མཚམས་ནས
ཅི་ཞིག་བོར་སོང་བའི་ཚུལ་ཏུ
གང་ཞིག་ལྷག་སོང་བའི་ཉམས་ཀྱིས
ཡང་ཡང་འདུར་རྒྱུག་བྱེད
དེ་ལ་སེམས་པ་ཟེར

༢༠༢༡་༡༠་༢༦

སྙན་ལ་སིང་བའི་དབྱངས་རྟ།    རྦ་རླབས།

ཕྱི་མིག་རིང་དུ་བརྐྱངས་པའི་ལག་ཟུང་དེ།།
ལམ་ལམ་འཚེར་བའི་སྐར་མའི་འོད་ཀྱིས་བསུས།
སྦྲང་རྩིའི་མྱོས་པའི་གསེར་གྱི་བུང་བ་ཡིས།།
གནས་འདིར་བགྲོད་པའི་མགྲོན་རྣམས་དབྱངས་ཀྱིས་གསོས།།

ཞལ་གྱི་འཛུམ་ཟེར་འཁྱིལ་བའི་སྲང་ལམ་དུ།།
སྒྱུ་མའི་འཕྲུལ་འཁོར་རྩེན་པའི་གཞོན་ནུ་མའི།།
འོག་འགྱུ་གཡོ་བའི་གར་གྱི་སྟངས་སྟབས་འདིས།།
རྨི་ལམ་བཞིན་དུ་འདོད་པའི་ཡུལ་དུ་འཁྲིད།།

མདུན་དུ་རྒྱུ་བའི་གཙང་པོའི་བཞུར་རྒྱུན་ཡང་།།
བསིལ་ཞིང་འཁྱག་པའི་ལམ་ལ་ཆས་ཐེངས་རེར།།
མགྲོན་རྣམས་བསུ་བའི་སྟ་གོན་བྲེལ་ན་ཡང་།།
སེམས་ཀྱི་ཀོ་གྲུ་དེ་ཡང་བསྐྱོད་མཚམས་བཞག།

གློ་བུར་མཆི་མས་བརླན་པའི་སེམས་པ་དེ།།
ཁང་མིག་གྲུ་བཞིའི་ནང་དུ་གཅིག་པུར་ལུས།།
གདུང་བའི་སེམས་པ་གཡའ་ཤིང་ལོ་མ་བཞིན།།
མཛེས་པའི་སྐར་ཚོགས་མཉམ་དུ་གཡོ་ཞིང་འདར།།

སྟོན་རླུང་འཇམ་པོ་ལྷོད་ཀྱིས་ལྡང་བའི་དུས།།
སྟོན་མཇུག་སྡོང་ལོ་སྒེའུ་ཁུང་འགྲམ་དུ་འཐོར།།
སྟོན་གྱི་རྣམ་པ་གློ་བུར་སླེབས་དུས་སུ།།
སྟོན་ཟླའི་ངོགས་ནས་ཕ་ཡུལ་ཕྱོགས་སུ་བལྟས།།

རྨི་ལམ་ཟླུམ་པོ་ཞིག་གི་གཤོག་རྩེའི་ཁྲོད།།
ཆུ་ཤེལ་འོད་ཀྱིས་བསྒོས་པའི་ལང་ཚོ་འདི།།
ཐབས་འཕྲུལ་གསེར་གྱི་ཉག་ཕྲན་བགྲོད་པ་བཞིན།།
དྭངས་གཙང་མུ་ཏིག་འཛུམ་པའི་འགྲམ་དུ་འཕྱོ།།

སྙན་ཚིག་ཟིལ་མངར་འཇོ་བའི་ལོ་ཟླའི་ཁྲོད།།
དགུན་གྱི་རྒྱལ་མོས་ཁྲོ་ཞལ་དལ་གྱིས་ངོམ།།
ནར་མ་སོན་པའི་ཚེ་སྲོག་ཆུང་ཆུང་དེ།།
དགུ་ཆུ་སྔོན་མོ་འཁྱུག་པའི་འགྲམ་དུ་ལུས།།

གསེར་མདོག་སྡོང་ལོ་སེར་པོའི་བར་གསེང་ནས།།
བརྗོད་ལས་འདས་པའི་གཏམ་རྒྱུད་ཇི་སྙེད་ཅིག།
ལྕི་ཞིང་འཁྱོར་བའི་བྱ་སྒྲོ་རྨས་མ་བཞིན།།
སྟོན་ཟླ་བརྒྱད་པའི་རྨི་ལམ་ཡུལ་དུ་ཉུལ།།

མཚར་སྡུག་མེ་ཏོག་སྒེག་མོའི་ཁ་ཆུ་ཡིས།།
སྣང་བའི་ས་འཛིན་གསེར་གྱི་ཐང་མ་ལ།།
ངག་འཇམ་གདངས་ལ་དབྱངས་ཀྱི་ཟིལ་ཆགས་ཏེ།།
ཡིད་འཕྲོག་ལང་ཚོའི་མེ་ཏོག་མངོན་དུ་བཞད།།

ཉི་འོད་འཁྱུད་པའི་ཆུ་ཐིགས་རེ་རེའི་ཁྲོད།།
ལྗང་ལོའི་ཟུར་ན་ཡང་ཡང་འདར་བ་མཐོང་།།
ཤེལ་ལྟར་འཚེར་བའི་ཁྱོད་ཀྱི་ཆུ་མིག་འདིས།།
དབྱར་ལྗོངས་མཛེས་པའི་རྨི་ལམ་མཐོང་ཐབས་བྲལ།།

2021.9.28

རབ་ཏུ་བྱུང་བ།     ཤར་ཆར་ཕྲན།

འདུལ་ལུང་སྡེ་བཞིའི་ནང་གི་འཁྲབ་ཚིག་རེ་རེ།།
དམར་རྗེན་ལག་ཏུ་བསྟར་ལ་སྟ་གོན་བགྱིས་ཏེ།།
མི་མཐུན་ཚོགས་དྲུག་བགེགས་ཀྱི་གཡོ་རྫུན་སྤོང་དང་།།
མགོ་རེག་བུ་ལོ་ཁོ་བོས་རྨི་ལམ་བཙལ་འདོད།།

ལན་བུ་སྐྲ་ཡི་རྩེ་མོ་རླུང་ལ་བསྐུར་ཞིང་།།
དཀར་པོ་གོས་ཀྱི་ཕུ་ཐུང་གྲི་ཡིས་བཅད་དེ།།
ཐོག་མའི་རྐང་རྗེས་ཕྲ་མོ་ཆོས་ལ་ཕྱོགས་དུས།།
ཆུང་དུས་རྫི་གྲོགས་བུ་མོས་བཀའ་བཀྱོན་མ་གནང་།།

སྣ་ཚོགས་འདུ་འཛིའི་གྲོང་ལ་རྫོགས་ཚིག་བཞག་ནས།།
ལྷིང་འཇགས་དབེན་པའི་རི་ལ་རྐང་རྗེས་བཞག་ཡོད།།
ངུར་སྨྲིག་ཚེམ་བུའི་དྲོད་ཐིག་ཡལ་བ་མེད་ན།།
སྟོན་པའི་སྤྱིལ་བུ་འདི་ཡང་བདག་ལ་ལོས་དབང་།།

ཕ་ཡུལ་དྲན་ཚུལ།   ལྡོང་འཇིགས་སྲས།

ངས་ཕ་ཡུལ་དྲན་ཚེ་སེམས་རྩ་འདི་རྒྱས་ཡོང་།།
རི་སྨུག་སྤྲིན་གཉིས་ཀྱི་ཉེ་གམ་ན་འཁོར་བའི།།
དྲིན་ཕ་མའི་གསེར་ཞལ་འོད་མདངས་རང་འཕྲོ་བའི།།
ཞེ་བརྩེ་བའི་ཡིད་ཀྱི་གུར་ཁྱིམ་འདི་མཛེས་པ།།

ངས་ཕ་ཡུལ་དྲན་ཚེ་ལོ་ཟླ་དག་དྲན་ཡོང་།།
ཆུ་ཆར་ནག་གཉིས་ཀྱི་སྡུག་ཡུས་ཀྱིས་གཙེས་པའི།།
མ་སྐྱེ་འགྲོ་གཅིག་གི་ལས་དབང་འདི་དཀའ་བ།།
སྡུག་འཁོར་བར་འདྲེས་པའི་ཕོ་མོ་དག་སྐྱོ་བ།།

ངས་ཕ་ཡུལ་དྲན་ཚེ་འཇིགས་རུང་ཞིག་ཡིན་འདུག།
སེམས་ཁྲག་རྩར་འཁྱིལ་བའི་མྱ་ངམ་གྱི་ཐང་དུ།།
མེ་དམར་པོ་ཞིག་གི་སྡུག་རྩུབ་དང་འདྲ་བའི།།
གླིང་ཁོར་ཡུག་མི་ཁའི་གཏམ་ཡན་གྱིས་བསེད་འགྲོ།།

ངས་ཕ་ཡུལ་དྲན་ཚེ་ལོ་རྒྱུས་ཀྱི་སྒྲུང་རིང་།།
ཆུ་གཙང་བོ་ཞིག་གི་བཞུར་རྒྱུན་ལས་རིང་འདུག།
དྲིན་ཕ་མ་གཉིས་ཀྱི་སྡུག་བསྔལ་ལས་བརྒལ་འདུག།
གཏམ་བདེན་པ་ཞིག་གི་བཤད་ཚད་ལས་བརྒལ་འདུག།

ངས་ཕ་ཡུལ་དྲན་ཚེ་ཡིད་བརྙན་གྱི་རི་མོ།།
ཚོན་མ་བཅོས་སྲིད་པའི་བྲིས་རིས་སུ་ཆགས་པས།།
རི་ཉི་ཟླ་བརྗིད་པའི་ཞལ་ཁྱིམ་འདི་མཛེས་པ།།
ཆུ་གཡུ་མཚོ་ཕྱུག་མོའི་བཞུར་རྒྱུན་འདི་དྭངས་བ།།

ངས་ཕ་ཡུལ་དྲན་ཚེ་ཆང་བཅུད་འདིའི་རོ་བྲོ།།
ཡིད་དགའ་བདེ་རྫོགས་པའི་ཐབས་ཚུལ་དང་བྲལ་བ།།
སེམས་དྲན་ངོར་ཁྲག་གི་ཐིགས་པ་ཡིས་བྲིས་པའི།།
ཡིད་འདོད་དོན་ཚིག་གི་སྙིང་བོ་ནི་དབེན་སོང་།།

༢༠༢༡་༩་༡༢

མཚན་མོའི་བཞུར་སྒྲ།

མིག་ཡོར། ས་སྲོད་དེར།
ངས་མཚན་མོའི་བཞུར་སྒྲ་ལ་མཉན་ནས།
བློས་མི་ཐོང་བའི་མི་ཞིག་ལ་བསམ་བློ་བཏང་ནས་བསྡད།

གཡེལ་དྲིལ་གྱི་སྒྲ་དབྱངས་ལྟ་བུའི།
ཁུ་སིམ་མེར་གྲག་འགུལ་ཅི་ཡང་མེད་པའི།
མཚན་མོ་དེར།
རྨིས་མ་ཚར་བའི་རྨི་ལམ་མང་པོ་ཞིག་དང་སླར་ཡང་འཕྲད།

ངས་ནང་སེམས་མཚོན་བྱེད་དུ་ཕ་ཡུལ་གྱི་རི་ཆུ་ཐང་གསུམ་རྨིས།
རྟ་ནོར་ལུག་གསུམ་རྨིས།
སྐབས་དེར།
རང་ཉིད་དང་བསྡེབ་ནས་བཞུར་སོང་བའི་མཚན་མོ་གྲངས་མེད་པ་ཞིག
ལོ་ཟླ་ཞིག་གི་ཕྱིར་དྲན་ཙམ་དུ་གྱུར་འདུག་པ་རྟོགས།

2021.8.17

ངག་དབང་དབྱངས་ཅན་ལྷ་མོ།       ཐང་གསེར་སྨྱུག

ཡེ་ཤེས་སྒྱུ་མའི་རོལ་གར་མཚོ་བྱུང་མ།།
སྒྱུ་རྩལ་འབུམ་འགྱུར་སྒྲ་དབྱངས་དཀྲོལ་བཞིན་དུ།།
བདག་གི་སྙིང་དབུས་པདྨའི་གེ་སར་ལ།།
འབྲལ་བ་མེད་པར་རྟག་པར་བཞུགས་སུ་གསོལ།།

ཡིད་འོང་ཟླ་བ་དཀར་པོའི་ཞལ་རས་མཛེས།།
འཇོ་སྒེག་ཉམས་འགྱུར་སྟོང་གི་གར་རྩེད་འཁྲབ།།
མཚན་དཔེ་རྫོགས་པའི་སྐུ་ཡི་གཟི་བྱིན་དག།
དད་པའི་གུར་ཀུམ་དབུས་སུ་མངོན་པར་མཛོད།།

བརྗོད་མེད་དབྱིངས་ལས་གཡོ་མེད་ཚངས་པའི་གསུང་།།
སྒྲ་དབྱངས་རྒྱ་མཚོའི་ཆར་རྒྱུན་འགྲོ་ཀུན་གྱི།།
ཐོས་འཛིན་པདྨ་ཡངས་པོའི་དགའ་ཚལ་ལ།།
ངག་རིག་སྙན་ཚིག་འབུམ་གྱི་དངོས་གྲུབ་སྩོལ།།

ཇི་སྙེད་ཤེས་བྱའི་དཀྱིལ་འཁོར་མ་ལུས་པ།།
ཇི་བཞིན་གཟིགས་པའི་མཁྱེན་རབ་མཆོག་མངའ་བའི།།
ཤེས་རབ་ཕྱིན་པའི་བདག་མོ་དབྱངས་ཅན་མས།།
བདག་བློར་སྤོབས་པའི་སྣང་བ་བསྩལ་ཏུ་གསོལ།།

2021:10:30

བག་ཆགས།      བྱང་རྡོར།

གྱང་ངོས་ཀྱི་འདྲ་པར་རྙིང་ཤོས་དེ
མཚན་མོའི་དུས་ཚོད་ཅིག་ལ
སྲང་ལམ་ནས་ཨེན་ཙམ་འཕྲད་མྱོང་བའི་མི་དེ་དང་འབྲེལ་བ་མི་འདུག

གྱང་ངོས་ཀྱི་འདྲ་པར་རྙིང་ཤོས་དེ
ལོ་ཟླའི་སྨུག་པས་ཟིན་པའི་གྲོང་ཁྱེར་གྱི
དྲན་གདུང་ཟབ་པའི་ཡུལ་གྱར་པ་ཞིག་གི་ལས་དབང་དང་འབྲེལ་བ་མི་འདུག

གྱང་ངོས་ཀྱི་འདྲ་པར་རྙིང་ཤོས་དེ
སྒྲོག་ཙེའི་སྟེང་གི་ཤོག་དཀར་ངོས་ལ
འཇིག་རྟེན་ཧྲིལ་བོ་སྨྱུ་གུས་བཞེང་མཁན་དེ་དང་འབྲེལ་བ་མི་འདུག
21.10.4