དྷཱིཿཟེར།
དེ་དུས།
སུ་ཡིས་ཀྱང་མ་སྐུལ་བར་ཁྱེད་ཀྱིས་ང་ལ་འཕྲིན་ཡིག་བྲིས་པ་བདེན་ན།
དེ་དུས།
གང་གིས་ཀྱང་མ་གདམས་པར་ཁྱེད་ཀྱིས་ང་ལ་སྙིང་གཏམ་གླེང་བ་བདེན་ན།
དེ་དུས།
ལྷ་ཡིས་མ་བཀོད་པར་འུ་གཉིས་འགྲིག་སོང་བ་བདེན་ན།
དེ་དུས།
འདྲེ་ཡིས་མ་གཏོར་བར་འུ་གཉིས་མཐུན་སོང་བ་བདེན་ན།
ད་སྐབས།
རྒྱུ་གང་ཞིག་གིས་སྔོན་འགྲོ་བྱས་ཏེ།
རྐྱེན་ཅི་ཞིག་གིས་རྫོགས་ཚིག་བྲིས་སོང་།
ངས་ད་དུང་།
རྒྱུ་མཚན་འཚོལ་ནས་ཁུངས་སྣེ་བརྟག་དགོས་པ་ཡིན་ནམ།
རྒྱུ་མ་གཟེར་བཞིན་སྙིང་ནད་མྱོངས་པ་དགོས་པ་ཡིན།
ཀྱེ་མ།
འཇིག་རྟེན་འདི་འགྱུར་རྒྱུ་མང་བས་ན།།
མེ་ཏོག་ཀྱང་འཇའ་བཞིན་ཡལ་ནས་ཐལ།།
ལས་དབང་འདི་བཟང་རྒྱུ་མེད་པས་ན།།
འུ་གཉིས་ཀྱང་རིམ་གྱིས་གྱེས་ནས་ཐལ།།
དགའ་བ་འདི་རྟག་པ་མེད་པས་ན།།
དམ་བཅའ་འང་ཡུན་གྱིས་འཆོར་ནས་ཐལ།།
སྡུག་པ་འདི་བརྟན་པ་མིན་པས་ནས།།
འགྲིག་རྒྱུའི་ཡང་རེ་ཞིག་བཅས་ནས་ཡོད།།
Leave a Reply