རྟའུ། སྨན་ཕོར།
ཡིད་ལ་མ་དྲན་པར་འདི་ནས་ཡར་བརྩིས་པའི་ལོ་བཅུ།
སྐད་ཅིག་ཙམ་གྱིས་འདས་སོང་བྱུང་།
འབྲེལ་སྒྲའི་ཕྲད་ཙམ་གྱིས་མཚོན་པར་བྱེད་མི་ཐུབ་པའི་རྒྱང་རིང་གི་མི་ལགས།
གྱེས་བྲལ་དེས་སྙིང་ཁོང་ནད་ཀྱིས་བཟུང་ལ།
ཁོར་ཡུག་ངུ་ངག་གི་སྒྲ་དང་མིག་ཆུས་བཀང་།
དྲོལ་ཁུལ་གྱི་ཁྱིམ་གཞིས་འཁྱགས་རླུང་གིས་བཟུང་།
སྤོབས་སེམས་ཀྱི་མདུན་ལམ་ལ་གས་ཆག་ཤོར།
ཡོད་ཚད་ཕྱེ་ཐང་སྐྱ་བོ་ཞིག་དང་འདྲ་བར་གྱུར།
མཚན་མོའི་ཟླ་འོད་ཀྱིས་ཡོད་ཚད་གསལ་བར་བྱེད་དུས།
སྙན་ངག་པས་ཚོར་བ་མཚོན་ཐབས་བྱེད་པའི་ཐ་སྙད་བཙལ་དུས།
དྲོལ་ཁུལ་ལྡན་པའི་ཁྱིམ་ཆེན་གྱི་མི་རྒན་ཚོས་སྒྲུང་རིང་བའི་གཏམ་རྒྱུད་གླེང་དུས།
ངས་དཔེ་དེབ་ཁ་ཤས་དང་རང་ལུས་ཙམ་ཤོང་བའི་ཁང་ཆུང་ཞིག་ནས།
བདག་སེམས་མུན་པས་སྒྲིབ་པ་བཞིན།
ཁེར་རྐྱང་གི་མཚན་མོ་རེ་རེར་མིག་ཆུ་གཙང་བོ་ལྟར་བཞུར།
རི་མོ་ལྟར་ཁ་དོག་མང་བའི་འདས་སོང་དག་ལ་ཕྱིར་དྲན་བྱས་དུས།
ང་ལ་གྱེས་བྲལ་བྱུང་བའི་ཕ་དྲིན་ཆེན་གྱི་སྐུ་བརྙན་ཙམ་ལས་ཅི་ཡང་དྲན་རྒྱུ་མེད།
རྒྱང་རིང་གི་མི་ལགས།
ལྷིང་འཇགས་ཀྱི་ངང་ནས་མཚན་ཐུན་རེ་རེར་བློ་སེམས་རྩེ་གཅིག་ཏུ་གནས་ཐབས་བྱེད་དུས།
གསལ་ལ་མི་གསལ་བའི་ཞལ་རས་ཅིག་ནམ་རྒྱུན་ཤར་ཡོང་དེ་ནི་དྲན་དྲག་པའི་ཡབ་ཆེན་ལགས།
སེམས་སྡུག་རི་མོ་འདི་དག་ནམ་ཞིག་ལ་ཡལ་སྲིད།
དྲན་གདུང་གི་འབྲེལ་ཐག་འདི་དག་ནམ་ཞིག་ལ་ཆད་སྲིད།
Leave a Reply