དབྱུག་སྲས། གཞིས་ཀ་རྩེ།
ས་འདི་ནས་བལྟས་པའི་ཤར་ངོས་སུ། །
རྟ་དཀར་པོར་ཆིབས་པས་ནེ་སེར་ཇོའོ། །
གཙང་མྱང་སྨད་ཡུལ་གྱི་གདོང་ཅན་ན། །
མ་སྒྲོལ་མའི་པང་དུ་བཀྲས་ལྷུན་ཆགས། །
ཆོས་དབྱངས་སྙན་འདུ་ཁང་ཕུག་ནས་ལྡིར། །
དབུའི་ཉག་ལོ་དཀར་བའི་རྗེ་བཙུན་མཆོག །
ཁྲི་འཕང་བའི་མཐོན་པོར་འཁོད་དེ་བཞུགས། །
མ་འགྲོ་བ་འདྲེན་པའི་དམིགས་རིམ་གསལ། །
ཆོས་ཡུལ་གྱི་ཞིང་ས་དབུས་གཙང་སོགས། །
རྗེ་རྡོ༵་རྗེ༵་རྒྱ༵ལ་མཚ༵ན་ཆོས་བསྐོར་མཛད། །
བུ་མངས་པོ་དམ་ཆོས་མངར་མོས་བསྐྱངས། །
མགོན་ཁྱེད་ཀྱི་བཀའ་དྲིན་བསམ་མི་ཁྱབ། །
ཐུགས་སྟོབས་བཅུ་མངའ་བས་དཔའ་བོ་ཁྱེད། །
བུ་ཐ་ཤལ་བདག་གིས་དྲན་ཐེངས་རེར། །
ས་དོག་མོ་གཡོ་འགུལ་མ་བྱས་ཀྱང་། །
ལུས་ཡན་ལག་མཐའ་དག་ཡོམ་ཡོམ་འགུལ། །
སྙིང་བརྩེ་བ་མཐར་སོན་བདག་ཉིད་ཁྱེད། །
ཡུལ་གངས་ཅན་བསྟན་འཛིན་སྐྱེས་བུའི་ཁྱུ། །
མིག་མཐའ་ལ་ཆུ་ཁུར་མེད་ན་ཡང་། །
སེམས་དགའ་དད་མིག་གི་མཚོ་ཁ་ཁྱོམ། །
དགོན་གདན་ས་ཁག་དང་གཞིས་དགོན་ཁག །
ཆོས་ཟབ་མོའི་གདམས་པ་མངས་སུ་སྩལ། །
བློ་ཡངས་བའི་མཁས་མཆོག་ཁྱེད་ཀྱིས་ནི། །
བུ་མངས་པོར་ཐར་པའི་ས་བོན་བསྐྲུན། །
བློ་མངས་པོ་ཆོས་སུ་ཕྱོགས་པ་འདི། །
མཁན་རིན་པོ་ཆེ་ཡིས་བཀའ་དྲིན་ཉག །
དུས་མ་སྟོང་བར་དུ་བཞུགས་མཛད་དེ། །
ལས་ཟག་བཅས་བད་བའི་འགྲོ་བ་འདྲེན། །
ལས་མ་རིག་དམ་པོའི་འཆིང་བྱེད་དེས། །
ལམ་བསྐྱེད་རྫོགས་གཉིས་དེ་མ་རྟོགས་ཏེ། །
སྐྱབས་རེ་ས་ཁྱེད་ཉིད་མ་གཏོགས་པར། །
ཐུགས་བརྩེ་བས་མ་ལུས་དྲང་དུ་གསོལ། །
བདག་བསོད་ནམས་རྟུལ་བས་ལས་སྐལ་གྱི། །
དུས་རྟག་པར་སྐུ་གམ་བཅར་བསྡད་དེ། །
གསུང་བདུད་རྩིའི་བཞུར་སྒྲ་མྱོང་སྐལ་དབེན། །
གནས་འདི་ནས་གསོལ་བ་ཕུར་ཚུགས་འདེབས། །
གདོན་སྲེད་པའི་འཁོར་འདས་མ་མཐོང་སྟེ། །
ལམ་གོལ་སར་ཉུལ་ཡང་མཆོག་ཏུ་བཟུང་། །
ཆོས་དབྱིངས་ཀྱི་གཤིས་ལུགས་མ་རྟོགས་བར། །
མཁན་སྐྱེས་མཆོག་ཁྱེད་ཀྱིས་འཛིན་དུ་གསོལ། །
ཐུབ་བསྟན་ཡོངས་སུ་རྫོགས་པའི་མངའ་བདག་ཆེན་པོ་མཁན་རིན་པོ་ཆེ་རྗེ་བཙུན་༸རྡོ་རྗེ་རྒྱལ་མཚན་མཆོག་ཞབས་ཟུང་མི་འགྱུར་རྡོ་རྗེའི་རང་བཞིན་དུ་བརྟན་ཅིང་ཐེག་གསུམ་ཆོས་ཀྱི་འཁོར་ལོ་རྒྱ་ཆེར་བསྐོར་བས་རིགས་ཅན་གསུམ་གྱི་གདུལ་བྱ་མཐའ་དག་སྨིན་ཅིང་གྲོལ་བར་མཛད་པའི་བཀའ་དྲིན་ཆེན་པོས་རྟག་ཏུ་སྐྱོང་བ་དང་མཁན་རིན་པོ་ཆེ་རྗེ་བཙུན་༸རྡོ་རྗེ་རྒྱལ་མཚན་མཆོག་ཞབས་པད་གཅིག་པུར་བརྟེན་པའི་བུང་བ་བདག་ཀྱང་འདི་ཕྱིའི་གནས་སྐབས་ཐམས་ཅད་དུ་བརྩེ་ཆེན་ཡེ་ཤེས་ཀྱི་གཟིགས་པ་ཆེན་པོའི་སྐྱབས་རོལ་ནས་མ་བོར་བ་མཁན་རིན་པོ་ཆེ་རྗེ་བཙུན་༸རྡོ་རྗེ་རྒྱལ་མཚན་མཆོག་གི་བཀའི་གསང་བ་སྦྲང་རྩིའི་ཐིག་ལེ་རྒྱ་མཚོའི་རླབས་ལྟར་དུས་ལས་མི་འདའ་བ་ཞིག་ཅིས་ཀྱང་སྩོལ་བ་མཁྱེན་མཁྱེན། །
Leave a Reply