འོད་ཀྱི་མེ་ཕུང་།
གསེར་འཛིན་བཀོད་ལེགས་པདྨའི་ཡང་སྟེང་དུ།།
ཁྲ་ཚོམ་ཆུ་སྐྱེས་སྐར་ཚོགས་ཐང་མལ་བརྡལ།།
རྩལ་ལྡན་གཤོག་ཐོགས་གཞོན་ནུའི་མགྲིན་པའི་རྔ།།
དབེན་པའི་རི་ངོགས་འདི་རུ་ཡང་ཡང་ཟགས།།
ཕྱོགས་བཞིའི་ལྗོན་པ་དཔལ་གྱི་དུམ་བུ་ལ།།
སྣ་ཚོགས་འདབ་མའི་ཕྲེང་བ་བསྟར་ལ་བརྒྱུས།།
ཡིད་ཀྱི་དབང་པོ་འཕྲོག་པའི་དྲི་བསུང་གིས།།
བདག་ཡིད་ཁྱེའུ་ཆུང་སུམ་རྩེན་ཡུལ་ལ་དྲངས།།
ཁོ་ར་ཁོར་ཡུག་གཡུ་ཡི་མཎྜལ་ལ།།
མཉེན་ལྕུག་རྐང་འཐུང་གཞོན་ནུས་གར་བྱེད་ཅིང་།།
མཚར་སྡུག་འདབ་ཡངས་ཆུ་སྐྱེས་ལྡེམ་ལྡེམ་གཡོ།།
ཨེ་མ་དབེན་པའི་རི་ངོགས་ཡིད་ཀར་འོང་།།
ཤྭ་བ་དགོ་བ་བག་ཕེབས་ལྷོད་ཀྱིས་རྒྱུ།།
འདབ་མའི་ཐེག་པས་དྲི་ཟའི་སྙན་དབྱངས་བཅོམ།།
གྲེ་འགྱུར་མགྲིན་པའི་གླིང་བུ་རྫ་རྔ་པ།།
སིལ་སིལ་གྲགས་པའི་དབེན་གནས་ཡིད་ཀར་འོང།།
སྣ་བརྒྱའི་རྩི་ཤིང་འདབ་མའི་འཕྱང་ཕྲུལ་བཏེགས།།
སྣ་མང་འཕྱང་ཕྲུལ་བཀོད་པས་འདྲེན་བྱེད་བཀུག།
བལྟ་བས་མི་ངོམས་ཚངས་པའི་འཇིག་རྟེན་འདིར།།
ལན་ཅིག་སྐྱེས་པ་ལས་ཀྱི་བསོད་ནམས་ལགས།།
རྩྭ་ལྗང་ལོ་མ་གཡུ་ཡི་ཕྱག་སོར་ལ།།
ཟིལ་བ་ཤེལ་གྱི་མཆོད་རྟེན་སྡུག་གུ་མ།།
གཡོ་ལྡན་རླུང་གིས་བསྐུལ་བའི་ཐིག་ཕྲེང་གིས།།
བསིལ་བའི་དཔལ་གྱི་དྭངས་མ་ཡང་ཡང་བཀུག།
ཕྱོགས་བཞིའི་ས་འཛིན་མདུན་དུ་འདུད་པ་དང་།།
གཡས་སུ་དྭངས་གཙང་བསིལ་བའི་ཡོན་ཆབ་འཁྲུངས།།
མ་རྨོས་རང་བྱུང་སྐྱེ་ཤིང་འཁོར་གྱིས་བསྐོར།།
ཨེ་མ་བཀོད་ལེགས་ཚལ་འདི་ཡ་རེ་མཚན།།
ཆར་ལྡན་དུས་སུ་བསིལ་བའི་དཔའ་ཐོགས་ཤིང།།
དགུན་དུས་གྲང་ངར་མེད་ཅིང་དྲོད་ཁོལ་ལྡན།།
དབེན་པའི་གནས་ཀྱི་ཡོན་ཏན་ལྷུན་རྫོགས་པའི།།
བེ་ལོའི་ཁྲོད་འདིར་བསྡད་ཀྱང་སྐྱོ་ངལ་མེད།།
སྔོན་བྱོན་དམ་པའི་བྱིན་རླབས་འཕོས་པའི་ཞིང་།།
དེང་དུས་བཙུན་པའི་ཉམས་རྩལ་སྦྱོང་བའི་ས།།
རྣམ་དག་ས་གཙང་འདུ་འཛི་བྲལ་བའི་གནས།།
སྙིགས་མའི་དུས་འདིར་ཧ་ཅང་མང་པོ་མིན།།
ས་འཛིན་སེར་པོ་སྤྲིན་གྱི་དབུ་ཞྭ་ཅན།།
ངོས་སུ་མ་བྲིས་རང་བྱུང་རབ་ཏུ་བཀྲ།།
ཨོ་རྒྱན་པདྨའི་འཕྲིན་ལས་གནས་ཞེས་པའི།།
གོ་བོ་ལྷ་རྩེ་ཞེས་གྲགས་སྙན་པ་མཐོ།།
བོད་རྒྱལ་ལོ། ༢༡༤༨ བོད་ཟླ ༥ ཚེས ༣༠ཉིན་བྲིས།
Leave a Reply