གཟི་ནག་པོ། དཀར་མཛེས།
ཉི་འོད་འཁྱུག་པ་ཙམ་གྱིས་ན། །
རི་བོ་བསྐྱུར་ཏེ་མཚོ་ལ་འགྲུམ། །
གནའ་ཡི་ལོ་རྒྱུས་ལ་ཆགས་ཏེ། །
མིག་གི་ཕྱེད་ཀ་རྒྱང་ལ་གཟིམ། །
སེམས་ཀྱི་རྙིད་པ་ནག་པོ་ཡང་། །
དག་ནི་སེམས་ཀྱི་སྦུབ་ཏུ་ལྕེབ། །
འུ་ཅག་ལུས་ཀྱི་སྟོན་ཁའི་ནང་། །
མེ་ཏོག་སྣ་ཚོགས་ཁ་གཏད་དུ། །
སྒྱུ་མའི་མལ་དུ་ཅིས་ཅང་ལྷུང་། །
ཉིན་མོའི་ཉི་འོད་ལ་སྐྲག་ཅིང་། །
མཚན་མོའི་ཟླ་འོད་དེ་ལས་ནི། །
དེ་བས་ཁུ་སིམ་ལ་ཞེན་བཞག །
གསལ་བའི་རི་ཟོམ་དག་ཏུ་ན། །
འབྲ་བའི་སྤྲིན་པ་དོག་པོ་དག །
གྱ་གྱུ་འཕྱོ་བའི་འཚུག་ག་ལས། །
སྐྲ་ཟོམ་དུས་ཀྱིས་ཟོས་པ་དང་། །
ལྷག་ཏུ་ལྡང་བའི་རྒྱུ་སྐར་གྱིས། །
སྣང་བའི་ལྟ་མཆོག་མུར་དུ་བྱེ། །
སྣང་བའི་མཚོ་མོའི་མུ་ཁྱུད་དུ། །
མཆུ་སྒྲོ་ལྡེམ་ལྡེམ་གཡོ་བ་དང་། །
ཞེན་པ་ལྕུག་མའི་ཡིད་གར་དུ། །
རིན་ཆེན་བྱི་རུའི་སྣ་དྲང་བའི། །
ཅ་དངོས་སྣ་ཚོཊ་དབེན་པ་ན། །
རྒ་བའི་གཉེར་ནི་སྣ་ཚོཊ་འདུ། །
ཉི་མ་མཁར་དུ་ཟུག་པའི་ལར། །
གཞོན་པའི་རྒྱ་ཡན་མཚོ་མོ་ནི། །
དར་ཅིག་ཉིད་དུ་འཐག་པ་ན། །
ལང་ཚོས་བསག་པའི་རེ་ཁ་དག །
དགོད་ནི་བྲོ་བའི་ལོ་རྒྱུས་མོག །
འོན་ཏང་འགའ་རེ་སྨྲ་མི་སྤོབ། །
2021/11/8
སྟོང་འདང་སྐར་མ་འཚེར་འཚེར།
གཟི་ནག་པོ། དཀར་མཛེས།
ཡུལ་དེའི་མེ་ཏོག་ཚོགས་ནི་འོབས་སུ་ལྷུང་། །
ཁངས་ནི་རི་རྩེར་བབ་པ་ལན་གཅིག་མིན། །
སྐྱེ་བ་བརྒྱ་ཕྲག་ཅིག་ལ་བཤག་བཞག་པའི། །
སེམས་ཀྱི་སྐར་ཚོགས་དེ་ནི་རབ་ཏུ་འཚེར། །
དེ་ཡི་ཕུགས་ཀྱི་ནམ་མཁར་གཡུ་དྲི་ཆག །
དེ་དུས་བདག་ནི་སྒེའུ་ཁུང་རྩའི་དཀྱིལ་དུ། །
ལྕུག་ཕྲན་རེ་རེ་བཞིན་དུ་ལག་པས་བསྙབ། །
འོད་དེས་བདག་ལ་ཅི་ཡང་རིག་ཏུ་བཅུག །
དར་ཅིག་ཉིད་ལ་མིག་ཡང་ཀྲོག་ཀྲོག་བྱས། །
ལར་ནས་ཤེས་ཀྱིན་མེད་པའི་ཁྱོད་ཀྱི་ངག །
ངག་སྒྲོས་སྣ་ཚོགས་ཞིག་ལ་འཕྱང་མོ་ཉུག །
ཡིན་ཡང་དེ་རིང་བདག་གིས་ཚོར་བ་འདྲ། །
མ་བཅོས་གྲེ་འགྱུར་སྟོང་ནི་ཐག་རིང་ནས། །
རི་ཆུར་བརྒྱུས་ཏེ་རླུང་ཡན་འཇམ་པོ་ཡིས། །
བདག་གི་རྣ་བའི་བུ་གར་ཡང་ཡང་འདྲེན། །
བདག་གི་གཤིས་ཀ་བསྙིལ་བ་དེ་དག་ཀྱང་། །
གཞན་ཞིག་ཁ་བ་ནག་པོས་རིང་དུ་སྤྱུགས། །
ལོ་ནི་བདུན་ཙམ་ཞིག་གིའི་ཡར་སྔོན་ཞིག །
གྲོང་ཚོ་དཀྱུས་མར་ཁྱོད་ནི་སྐྱེས་པར་གྱུར། །
དེ་དུས་ཁྱོད་ཉིད་ཁེར་རྐྱང་སྡོད་མྱོང་སའི། །
རྫ་ཤོད་མཐའ་དག་རང་གི་མཚེར་ས་གྱུར། །
ཡིན་ཡང་ད་ལྟ་ཁྱོད་ཉིད་ཁྱོད་རང་བཞིན། །
བདག་དང་ཁ་ཐག་ལེ་བར་སྟོང་གྱིས་པའི། །
ལུང་བ་སྨུག་ནག་ཞིག་ཏུ་འཚོ་ཞིང་བཞེས། །
དཔྱད་གཏམ་སྤེལ་མཁན་ལ་གསལ་བརྡ།