རྫ་སྐྱེས་གངས་དུང་།
བརྩེ་བའི་ཆེད་དུ་མིག་ཆུ་གཏོར་ཏེ་ཉིན་མོར་ཟས་ཀྱང་མི་ཟ་ལ།།
དང་བའི་དོན་དུ་ངལ་ཞིང་དུབ་སྟེ་མཚན་མོ་གཉིད་ཀྱང་མི་ཁུག་པར།།
བརྩེ་བའི་དྲ་རྒྱའི་འོག་ཏུ་ཚུད་དེ་སྡུག་གི་འཚོ་བར་མི་རོལ་པར།།
སེམས་སྐྱེས་གསང་ཚིག་སྟེངས་ལ་གཏིམ་པ་སྙན་ངག་པ་ཡི་བརྩེ་བ་ཡིན།།
ཁྱོད་ཀྱི་མིང་དང་པར་ཉོག་ལ་སོགས་བསྡུས་ཏེ་དྲ་ལམ་བཀྲམ་པ་དང་།།
ནང་ནུབ་གཉིས་ཀར་ཁྱོད་ལ་དུང་སོགས་ཕལ་བའི་སྐད་ཆ་མི་ལབ་པར།།
བརྩེ་བའི་རི་མོ་སེམས་ནས་བྲིས་ཏེ་དགོད་པའི་རང་སྒྲ་སྒྲོག་པ་ཡིས།།
དགའ་བའི་དན་རྟགས་སེམས་ནས་སྤྲད་པ་སྙན་ངག་པ་ཡི་བརྩེ་བ་ཡིན།།
མི་ཚེ་ཡོད་ཚད་གཞན་ལ་བཅོལ་ཏེ་བྲན་གྱི་འཚོ་བ་མི་རོལ་ཞིང་།།
དུས་ཚོད་ཡོད་ཚད་མྱི་ལ་གཡར་བའི་བཙོན་པའི་རང་གཤིས་འདོར་བྱེད་པའི།།
རང་རློམ་ཡིན་པའི་ཉམས་ཞིག་དོད་རུང་རང་ཚུགས་ཅན་གྱི་འགྲོ་སྟངས་འདི།།
ཤེས་ཡོན་ཅན་གྱི་རང་གཤིས་ཤིག་གམ་སྙན་ངག་པ་ཡི་བརྩེ་བ་ཡིན།།
དཔྱད་གཏམ་སྤེལ་མཁན་ལ་གསལ་བརྡ།