ཤར་ཆར་ཕྲན།
ཀ༵་ལ་པིང་ཀའི་འགྲིན་གྱིས་མི་འགྲན་ཁྱེད་གསུང་བརྗོད་མེད་ཡི་གེ་ཡིན།།
ཁ་ཟས་གོས་ཀྱི་དྲོད་ལ་མི་རེ་ཁྱེད་སྐུ་ཟག་མེད་འོད་ཕུང་ཡིན།།
ག་ཆད་མཚན་མའི་རླུང་བུས་མི་སྤུར་ཁྱེད་ཐུགས་སྐྱེ་མེད་ཆོས་སྐུ་ཡིན།།
ང་ཡི་སེམས་དང་རོ་གཅིག་བཞུགས་པའི་ངེས་དོན་བླ་མ་རྒྱལ་གྱུར་ཅིག།
ཅ་དག་ཡེ་གྲོལ་ནམ་མཁའི་གཤིས་འཛིན་ཀུན་ཁྱབ་ཐིག་ལེ་ཟླུམ་པོ་རུ།།
ཆ་བཞག་མི་མངའ་བཅིངས་པ་ལས་གྲོལ་རེ་དོགས་སྤང་བླང་གདོད་ནས་དག།
ཇ་ཐུག་ཟས་སོགས་ཡུལ་ལ་སྤྱོད་ཀྱང་འདོད་ཡོན་རྒྱན་དུ་རོལ་བ་ནི།།
ཉ་གང་ཟླ་བ་མཚན་མོར་རྒྱུ་ཡང་སྨག་གིས་སྒྲིབ་པ་མེད་པའི་སྤུན།།
ཏཱ་ཐ་ག་ཏའི་གསུང་གི་རྒྱལ་མཚན་ཨ་ཏི་ཡོ་གའི་ཏོག་བུ་ཅན།།
ཐ་གྲུ་ཡོངས་ལ་རྣམ་པར་སྒྲོག་པའི་མགྲིན་བཟང་དུང་གི་འཁོར་ལོ་ནི།།
ད་དུང་སྙིགས་མའི་གླིང་འདིར་གྲགས་པས་རྫོགས་ལྡན་དུས་ཀྱང་འཕྱ་བར་བྱེད།།
ན་རའི་གཟུགས་ལ་བུདྡྷའི་ངོ་བོ་ལུས་ཅན་འདྲེན་པའི་བྱེད་ལས་ཅན།།
པ་ཊུ་དམ་པ་ཁྱེད་ཀྱི་ལྗགས་ལས་པདྨའི་གསུང་གི་སྦྲང་རྩིའི་བཅུད།།
ཕ་ཕོག་ཚུལ་གྱིས་བུ་ལ་འཇོ་བའི་དུས་མཐའི་ཀུན་ཏུ་བཟང་པོ་སྟེ།།
བ་གམ་མཐོ་བའི་རང་སྣང་སྒྱུ་འཕྲུལ་བསྐྱེད་རྫོགས་དག་པ་བདག་གིར་བཞེས།།
མ་ལུས་འདྲེན་པའི་བླ་མ་ཁྱེད་ཀྱི་དགོངས་རྒྱུད་རྟོགས་པ་བདག་ལ་སྩོལ།།
ཙ་རིའི་འདབས་སུ་རྟོགས་པའི་མལ་དུ་ཉམས་ཀྱི་རྨི་ལམ་འགྱུ་བ་དང་།།
ཚ་དྲག་འགྱུས་པའི་དྲག་རླུང་རྒོད་ཀྱང་ཏིང་འཛིན་ལྷུན་པོ་མི་བསྒུལ་བའི།།
ཛ་གྲོགས་རྣལ་འབྱོར་ཞིག་དང་ལྷུན་དུ་སེམས་ཀྱི་གསང་བ་སྔོག་ཐུབ་ན།།
ཝ་ལེར་ཡེ་གྲོལ་ཆོས་སྐུའི་ས་མཆོག་རང་གི་མལ་ནས་རྙེད་པར་སྐད།།
ཞྭ་གོས་འཚོ་ཚིས་ཙམ་གྱི་ཆེད་ལ་རྣམ་རྟོག་དགུ་འགྱུར་མི་མངའ་ཞིང་།།
ཟ་འོག་ཐོབ་དང་གོ་སའི་སླད་དུ་སྟོན་དང་བསྟན་པ་མི་དོར་བ།།
འ་ཅག་ཡུལ་གྱི་བླ་སྤྲུལ་འགའ་ལས་ཁྱད་པར་སྟོང་གིས་ཆོད་འདུག་པས།།
ཡ་མཚན་མཆོག་གི་མཛད་རྣམ་མཇལ་ཚེ་དད་པའི་བ་སྤུ་གཡོ་བར་བྱེད།།
ར་རིའི་དྲི་མའི་གོས་ཀྱིས་བཏུམས་པའི་སྐལ་དམན་སློབ་བུ་འཆལ་པོ་བདག།
ལ་ལུང་རི་ཆུ་འཕྲལ་གྱིས་བཅད་དེ་ཁྱེད་སྐུའི་གསེར་ཞལ་མཇལ་ལྷགས་ཚེ།།
ཤ་ཚའི་བུ་ཆུང་མ་ལ་འཕྲད་བཞིན་ལྷག་པའི་བརྩེ་བས་གཟིགས་པ་འདི།།
ས་མཐའི་བུ་རུལ་སྐལ་བཟང་ཁོ་བོས་བསྐལ་མང་བསགས་པའི་རྣམ་དཀར་ཡིན།།
ཧ་ཅང་ཟབ་པ་ཀུན་བཟང་དགོངས་ཀློང་སྐུ་གསུམ་རྫོགས་པའི་འོག་མིན་དུ།།
ཨ་དོན་བརྗོད་མེད་ཀློང་དུ་བཞུགས་པའི་སངས་རྒྱས་མི་ཡི་ཤ་ཚུགས་ཅན།།
གསང་བའི་ལམ་གྱིས་གསང་མཆོག་སྦྱིན་པའི་ཟླ་དང་བྲལ་བའི་ས་མཁན་དེ།།
བྱང་ཆུབ་ཐོབ་ཀྱང་རིགས་ཀྱི་བདག་པོ་ཁྱེད་ལས་ལྷག་པ་བདག་ལ་མེད།།
རིགས་བདག་མཆོད་པའི་མེ་ཏོག
རྨོག་ཐང་དཀར།
བརྒྱུད་གསུམ་ཐུགས་རྗེའི་མངའ་བདག་ཆོས་ཀྱི་རྗེ།།
མཚུངས་མེད་དྲིན་གྱི་བདག་པོ་ཡིད་བཞིན་ནོར།།
གང་གི་རྒྱལ་ཚབ་རྒྱལ་སྲས་སེམས་དཔའ་མཆོག།
ཞིང་འདིར་བལྟམས་མཛད་ཕུན་ཚོགས་དུས་འདིར་བསྔགས།།
ཆོས་རྗེ་བླ་མའི་དགོངས་པའི་གཏེར་མཛོད་ལས།།
ཉམས་རྟོགས་ཀློང་བརྡོལ་བྱང་ཆུབ་སེམས་དཔའི་ཚུལ།།
རིག་འཛིན་རྣམ་བཞིའི་བགྲོད་པ་མྱུར་ལམ་ལས།།
གསང་བ་སྔགས་ཀྱི་བསྟན་པ་ཡོངས་སུ་བཟུང་།།
སྒྲུབ་རྒྱུད་སྡེ་ཟུང་ལྷན་ཅིག་བསྣོལ་བའི་ཉམས།།
ཐབས་གྲོལ་བདེ་ཆེན་ཡེ་ཤེས་རྫོགས་པའི་རྟོགས།།
ཀུན་ཀྱང་ཉམས་སུ་བསྟར་བའི་སློབ་དཔོན་གྱིས།།
རབ་འབྱམས་རྡོ་རྗེ་རྒྱལ་པོའི་མཆོག་དབང་བསྐུར།།
ཟབ་ཆོས་སྙིང་གི་ཐིག་ལེ་བདེ་དྲོད་ཅན།།
བླ་མའི་ཞབས་སེན་སྤྱི་བོར་བླངས་པ་ལས།།
བུམ་པ་གང་བྱོའི་ཚུལ་དུ་འཕོས་པ་ཡི།།
མན་ངག་དྲོད་དང་ལྡན་པའི་མངའ་བདག་མཁྱེན།།
མདོ་སྔགས་ཆོས་ཚུལ་ཚང་ལ་མ་ནོར་བའི།།
ལུང༵་རིགས་རྡོ་རྗེའི་གར་སྟབས་སྔོན་དུ་བཏང་།།
རྟོག༵ས་པའི་དབང་ཕྱུག་རིག་འཛིན་འདུས་པའི་མགོན།།
བསྟན༵་པ་ཀུན་འཛི༵ན་བཤེས་གཉེན་བཟ༵ང་པོ༵ར་འདུད།
ངེས་དོན་མཁྱེན་རབ་གཅིག་བསྡུས་ཆོས་ཀྱི་སྐུ།།
དག་པའི་གཟུགས་ངོར་ལོངས་སྤྱོད་རྫོགས་པའི་སྐུ།།
གཞན་སྣང་སྣ་ཚོགས་སྤྲུལ་བའི་སྐུར་གསལ་བའི།།
འཕྲིན་ལས་ཀུན་ཁྱབ་བླ་མའི་ཞབས་པད་བརྟན།།
Leave a Reply