བདེ་ཆེན་རང་གྲོལ། དཀར་མཛེས།
མེ་ཏོག་ཚལ་དུ་ཁོ་བོ་ནི།།
སྦྲང་མ་བཞིན་དུ་ལྡིང་སྐོར་རྒྱག།
མཁའ་ན་གློག་ཞགས་འཁྱུག་པའི་དུས།།
ཁོ་བོ་ག་ཤེད་གཞའ་བ་ཡིན།།
འོན་ཏེ་སུས་ཀྱང་མི་མཐོང་སྙམ།།
ཡིན་ཡང་ཆར་ཐིགས་ཕྲ་མོ་ཡི།།
མིག་འོག་གཞའ་བ་ཤིན་ཏུ་དཀའ།།
རྒྱུ་རྐྱེན་མེད་པར་ཁོ་བོ་ཡི།།
ལུས་ལ་རྡེག་པ་ཤིན་ཏུ་མང་།།
ཆར་ཐིགས་དག་ལ་སེམས་གཏིང་ནས།།
ཤིན་ཏུ་སུན་ཡང་གནམ་རྒན་མས།།
མིག་ནི་ཞར་ལྟར་ཉམ་ཐག་པའི།།
ཁོ་བོ་མཐོང་གིན་མེད་པ་འདྲ།།
དེ་མིན་ཁོ་བོ་སུས་མཐོང་ཡང་།།
སྙིང་རྗེ་ཨེན་ཙམ་སྐྱེ་ངེས་ཡིན།།
ཀྱེ་ཀྱེ་སེམས་ཀྱི་ནམ་མཁའ་ལགས།།
ཁྱོད་ནི་དེ་འདྲའི་ཆེ་བ་ན།།
མིག་ཀྱང་ཧ་ཅང་ཆེ་བར་རློམ།།
ཡིན་ཡང་ཉམ་ངའི་ཁོ་བོ་ལ།།
སྙིང་རྗེ་བརྩེ་བའི་མ་གཟིགས་ཚེ།།
ཁོ་བོའི་སེམས་སུ་འདི་ལྟར་དྲན།།
གནམ་གྱི་མིག་ནི་ཉག་ཕྲ་འ་མ།།
ཡང་ན་ཞར་བ་ཨེ་ཡིན་སྙམ།།
ང་ཡི་ནམ་མཁའ་ཆེན་མོ་ལགས།།
ཁྱོད་ཀྱིས་བརྩེ་བའི་གཟིགས་རོགས་མཛོད།།
༢༠༢༢/༢/༡
Leave a Reply