སྟོན་པ་མཉམ་མེད་ཤཱཀྱ་ཐུབ་པར་ཕུལ་བའི་མུ་ཏིག་དོ་ཤལ་བཞུགས་སོ།།
རེ་སྨྱུག
སྲིད་གསུམ་གཡོ་བའི་འདམ་རྫབ་ལས།།
སྐུ་ནི་གཟི་དཔལ་པད་མའི་མདངས།།
འཛུམ་པའི་བྱིན་རླབས་འཕྲོས་པ་ཡིས།།
འཇིག་རྟེན་མ་ལུས་ཞི་བསིལ་མཛད།།
བཅོམ་ལྡན་ལྷ་ཡི་མེ་ཏོག་བསྔགས།།
ཚོགས་གཉིས་བསྲུབས་པའི་རྒྱ་མཚོའི་སྟེང་།།
བྱང་ཆུབ་སེམས་ཀྱི་གོ་ཆ་མནབས།།
དགྲ་རྣམས་མ་ལུས་གཡུལ་ལས་རྒྱལ།།
སྐུ་ནི་གཡོ་མེད་བརྟན་པོར་བཞུགས།།
རྟག་ཏུ་འབད་མེད་ལྷུན་གྲུབ་ཀྱིས།།
འགྲོ་བའི་ཞིང་ལ་ལམ་སྟོན་མཛད།།
མཆོག་གསུམ་སྤྲུལ་པའི་སྐུ་ལ་འདུད།།
མཉམ་མེད་སེམས་ཀྱི་ནོར་བུའི་ཏོག།
འགྲན་མེད་ཟླ་བའི་གཟི་བྱིན་འཕྲོ།།
ས་གཞི་ཆེན་པོའི་འགྲོ་བ་རྣམས།།
ཕན་བདེའི་འོད་སྣང་རྟག་ཏུ་འབར།།
འདྲེན་མཆོག་ཤཱཀྱ་གཙུག་ན་མཆོད།།
སྟོན་མཆོག་ཐུབ་པའི་དབང་པོ་ཡིས།།
བདེན་གཉིས་མཚོན་ཆ་བཟུང་བ་ནས།།
ཤེས་བྱའི་ཆོས་རྣམས་ཚུལ་བཞིན་རྟོགས།།
སྣང་སྟོང་སྒྱུ་མའི་གཟི་བྱིན་ངང་།།
འཛུམ་པའི་འོད་སྣང་མཛད་ལ་བསྟོད།།
མཚོན་བྱེད་མེད་པའི་སྟོན་པ་ལ།།
ངུར་སྨྲིག་རྟགས་ཙམ་འཆང་བ་ཡིས།།
དགེ་སྡིག་བླང་དོར་བྱེད་པ་དང་།།
ཕྱོགས་བཅུའི་མཆོད་པ་གང་འགྲོ་བ།།
མཆོད་ཡོན་ཇི་སྙེད་རྟག་ཏུ་མཆོད།།
བདག་ནི་སྐྱེ་བའི་ཚེ་རབས་ཀུན།།
སྟོན་པའི་མཚན་ཙམ་ཐོས་ན་ཡང་།།
དགའ་དད་སྤྲོ་བའི་བདེ་སྐྱིད་ཀྱིས།།
རྟག་ཏུ་སེམས་ཅན་ཐམས་ཅད་ལ།།
འཛུམ་པའི་མེ་ཏོག་འཐོར་བར་ཤོག།
ཆུ་སྟག་ལོའི་ས་ག་ཟླ་བའི་ཚེས་བཅོ་ང་ལ་བྲིས།
དཔྱད་གཏམ་སྤེལ་མཁན་ལ་གསལ་བརྡ།