རེ་སྨྱུག
ཡིད་མཁའི་བར་ཐག་མུ་མཐའ་མེད་ན་ཡང་།།
ལས་དབང་འཛུམ་པའི་རྣམ་འགྱུར་ཟུར་མིག་གཡོ།།
ཟེགས་མའི་མཐའ་ན་ལུས་པའི་བྱེའུ་ཆུང་དེ།།
ལྷོད་ཡངས་རྒྱུ་བའི་བདེ་བ་ཁྱེད་ཀྱིས་སྩོལ།།
རྩྭ་ཐང་ཡངས་པོའི་ས་སྲོད་གྱེས་ཕྱག་ལ།།
ཡིད་ཀྱི་འཁྲི་ཤིང་བརྩེགས་པའི་ཟླ་བ་འཛུམ།།
ལོ་ཟླའི་བ་གམ་སེམས་ཀྱིས་དོང་ཙེ་བརྩིགས།།
གཞོན་ནུ་མ་དེས་ཟླ་བར་སྤྲུལ་ནས་བྱུང་།།
སེམས་ཀྱི་བར་ཐག་ངང་སྒུག་ཡུལ་བྱས་ནས།།
ཕྱི་མིག་མཐའ་ན་ཁྱོད་ཉིད་འཁོར་བ་ནས།།
དྲན་པའི་ཀློང་ན་ཁོལ་བའི་ན་ཟུག་དེ།།
དུས་སྟོན་ཟླ་བའི་ཞལ་རས་ཁོ་ནར་འཛུམ།།
རྟོག་བཏགས་མྱོས་པའི་གར་གྱི་སྒྱུ་འཕྲུལ་ལ།།
དུང་ཞེན་འབར་བའི་མགྲིན་པ་སྟོང་བར་གྱུར།།
ཡིད་མཁའི་མཐའ་ནས་ཟིམ་པའི་གཞོན་ནུ་དེའི།།
རྨི་ལམ་རབ་རིབ་མག་མོག་སྟོད་རླུང་འཚང་།།
བརྩེ་བས་མྱོས་པའི་ཁེར་རྐྱང་ལམ་ཕྲན་དུ།།
རླུང་བུའི་དྲིལ་ཆུང་རྣ་བའི་རྒྱན་དུ་འཁྲོལ།།
ཁྱོད་ཀྱི་སྒྱུ་མའི་གཟུགས་སུ་བྱས་བྱེད་ཀྱི།།
ཁྱོད་ཀྱི་ལང་ཚོ་བདག་གི་སེམས་ལ་ལྷུང་།།
མ་བཅོས་ཚོར་བའི་ཁམས་ལ་ཉམས་ཕབ་པའི།།
སེམས་ཀྱི་མེ་ལོང་ཟླ་བའི་དབྱིབས་ལ་བཅོས།།
ཁྱེད་ཀྱི་རྒྱབ་གཟུགས་མཐོང་བའི་མེ་ལོང་འདི།།
ནམ་ཞིག་རྒྱན་དུ་འོས་པའི་མུ་ཏིག་ལགས།།
ཁྱེད་ལ་སྨོན་པའི་ཉི་ཟླའི་གཟི་བྱིན་དེ།།
བསྐལ་བའི་བར་གྱི་རྨིམ་ལམ་གྱུར་ནས་སུ།།
སྙེག་པའི་ལམ་ཐག་ཟླ་བའི་ཞལ་རས་དེ།།
མི་འབྲལ་མངོན་པའི་རྒྱན་དུ་འགྱུར་བར་ཤོག།
Leave a Reply