ཁངས་མ། ཡུལ་ཤུལ།
འདི་ནས་འཆར་ཡན་བུ་མོས་སྣ་ཚོགས་ཀྱི་གར་སྟབས། །
ཡང་ཡང་བསྒྱུར་ཏེ་འཇིག་རྟེན་ཆེན་པོ་འདིའི་ས་སྲོད། །
སེམས་ཀྱི་མེ་ལོང་ངོས་སུ་འཆར་བ་དང་མཚུངས་པར། །
འཁྱུག་ལྡེམ་འཕྲུལ་གྱི་སོར་མོའི་རྩེད་ཆས་སུ་བསུ་འགྲོ། །
ཟླ་བའི་དཀྱིལ་འཁོར་རྒྱས་པའི་ས་སྲོད་ཀྱི་འཇིག་རྟེན། །
གཙེ་བའི་ཟིང་ལོང་མེད་པར་ལྷིང་འཇགས་ཀྱི་ཁྲོད་དུ། །
འཚོ་བའི་ལྗོན་མདོག་རྒྱས་པའི་ཏོག་ཙམ་གྱི་མཛེས་སྡུག །
སྐྱ་རེངས་སད་ཀྱིས་འཁྱེར་བའི་སྣང་གླུ་འདི་རིང་བ། །
ལས་ཀྱིས་ཡོངས་སུ་བྲེལ་བའི་མི་ཚོགས་དང་འུར་ཆོམ། །
སྟོང་ཁམས་ཆེན་པོ་འདི་རུ་ཤོང་ཐབས་རང་དཀའ་བའི། །
གཙེས་པའི་ཧབ་ཆ་མང་པོས་ཕྱོགས་ཀུན་ནས་གཡོ་དུས། །
མཁའ་དབྱིངས་སྐར་མ་དག་ཀྱང་སུན་སྣང་གིས་འདར་འདུག །
ཉི་ནུབ་མཚམས་སྤྲིན་འོག་གི་རི་བོ་ཡང་རིམ་བཞིན། །
མུན་ནག་སྟུག་པོའི་གསེབ་ཏུ་ནག་རོག་གེར་གྱུར་ཚེ། །
སེམས་སུ་བཅུ་ཕྲག་མང་པོའི་སྔ་རོལ་གྱི་ཆག་འཇིག །
སླར་ཡང་ཡིད་ཀྱི་མཐོངས་སུ་ལན་གཅིག་ཏུ་ཡོང་འདུག །
སྣང་བའི་ནམ་མཁའ་འདི་ལ་འགྱུར་བག་རང་ཆེ་འདུག །
དགའ་དང་སྐྱོ་བའི་སྤྲིན་པ་འཁོར་ཕྱོགས་ལ་ངེས་མེད། །
ཆ་མེད་རྟོག་ཚོགས་རླུང་བུ་གང་ཞིག་ནས་ལྡང་ཡོང་། །
བདག་སེམས་འདི་ལ་ཉིན་སྲིབ་དྲོ་གྲང་ཞིག་མང་འདུག །
Leave a Reply