༄༅། །སྤྱི་ལོ་༢༠༡༧ སྤྱི་ཟླ་༤ ཚེས་༢ རེས་གཟའ་ཉི་མ་ཉིན་དཔལ་ས་སྐྱའི་༸སྐྱབས་མགོན་༸གོང་མ་ཁྲི་ཆེན་རིན་པོ་ཆེ་མཆོག་བཞུགས་སྒར་དེ་རཱ་ལྡུན་ནས་རྒྱ་གར་གྱི་ལྷོ་ཕྱོགས་སུ་ཆིབས་བསྒྱུར་བསྐྱངས་ཡོད་པ་དང་།
དེ་རིང་སྟེ། སྤྱི་ཚེས་༤ ཉིན་གྱི་སྔ་དྲོ་ཆུ་ཚོད་༡༠ ཙམ་ལ་༸གོང་མ་ཁྲི་ཆེན་རིན་པོ་ཆེ་མཆོག་འཕགས་ཡུལ་གྱི་ལྷོ་ཕྱོགས་སུ་ཡོད་པའི་དཔལ་ས་སྐྱ་བརྩེ་ཆེན་དམ་ཆོས་གླིང་དུ་དགའ་ལྡན་ཤར་བྱང་གི་མཁན་པོ་རྣམ་གཉིས་དང་། 
སྐྱབས་རྗེ་ཀུན་བདེ་གླིང་རིན་པོ་ཆེ། དགའ་ལྡན་ཁྲི་ཐོག་ཁང་གི་དྲུང་ཆེ། དགའ་ལྡན་བླ་སྤྱིའི་ཕྱག་མཛོད། གྲྭ་ཚང་ཁག་གི་ཕྱག་མཛོད། གཞུང་དང་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་གཞོན་དང་ས་གནས་མི་མང་བཅས་ནས་ཕེབས་བསུ་ཟབ་རྒྱས་ཞུས་ཡོད་འདུག །
ལྷོ་ཕྱོགས་ཀྱི་མཛད་རིམ་གཙོ་བོ་ཁག་ནི། དཔལ་ས་སྐྱ་བརྩེ་ཆེན་དམ་ཆོས་གླིང་རྟེན་དང་བརྟེན་པ་བཅས་པ་ལེགས་པ་གྲུབ་པའི་མཛད་སྒོ་དང་བཀའ་དབང་དང་བཀའ་ཆོས་བསྩལ་གནང་མཛད་རྒྱུ་དང་།
སྤྱི་ཟླ་༤ ཚེས་༡༧ ཉིན་ཀུན་བདེ་གླིང་༸སྐྱབས་རྗེ་རྟ་ཚག་རྗེ་དྲུང་སྐུ་ཕྲེང་༡༣ པ་ཆེན་པོ་བསྟན་འཛིན་ཆོས་ཀྱི་རྒྱལ་མཚན་རིན་པོ་ཆེ་མཆོག་གིས་གསོལ་འདེབས་ཞུས་དོན་ལྟར། དཔལ་ལྡན་འབྲས་སྤུངས་བཀྲ་ཤིས་སྒོ་མང་གྲྭ་ཚང་གི་གཙུག་ལག་ཁང་ཆེན་མོར་ཆོས་རྗེ་ས་པཎ་གྱི་ཚད་མ་རིགས་གཏེར་གྱི་ལྗགས་ལུང་དང་། དྲག་པོ་སུམ་སྒྲིལ་ལམ་རྟ་ཕྱག་ཁྱུང་གསུམ་གྱི་རྗེས་གནང་རྒྱུ་ཡིན་འདུག་པ་བཅས་ཀྱི་གནས་ཚུལ་མདོར་བསྡུས་སོ།།
ཕར་ནང་དཀོན་རྒྱས་ནས།
Leave a Reply