༧ རྗེ་བཙུན་གྲགས་པ་རྒྱལ་མཚན་མཆོག་ལ་སྐུ་བསྟོད།
འཇམ་མགོན་ས་པཎ་ནས།
ཇི་བཞིན་གཟིགས་པའི་ཐུགས་དག་པ།།
བློ་མཆོག་ཁྱོད་ལ་ཕྱག་འཚལ་ལོ།།
འགྲོ་རྣམས་ཐུགས་རྗེས་མི་གཏོང་བའི།།
བརྩེ་ཆེན་ཁྱོད་ལ་སྐྱབས་སུ་མཆི།།
ཇི་ལྟར་འབད་ཀྱང་ཁྱོད་ཀྱི་དྲིན།།
ལོན་པར་གྱུར་སྙམ་མི་བགྱིད་དེ།།
གང་གིས་ཁྱོད་དྲིན་འདི་འདྲ་ཞེས།།
རྣམ་ཐར་བསམས་ན་མཆི་མ་དཀུ།།
བརྒལ་བར་འོས་མིན་ནོངས་མི་མངའ།།
དྲི་མ་མེད་ལ་འཐད་པ་ཅན།།
རྣམ་པར་དག་ལ་མཚན་བཟང་བ།།
ཁྱོད་ལ་གང་གིས་ལན་ལོན་འགྱུར།།
འབྲེལ་བའི་སྒོ་ནས་མི་བསྟོད་དེ།།
བཀའ་དྲིན་སྒོ་ནས་ཅིས་མི་བསྟོད།།
གལ་ཏེ་ཕྱོགས་སུ་ལྷུང་ཉིད་ན།།
བསྟོད་པར་གྱུར་ཀྱང་སྨད་པའི་གནས།།
དུ་བས་མེ་བཞིན་རྣམ་ཐར་ལས།།
ནང་གི་ཡོན་ཏན་ལེགས་བརྟགས་ཏེ།།
གྲགས་པ་རྒྱལ་མཚན་ལ་བསྟོད་པ།།
འདི་འདྲ་ཁོ་ནས་བསྟོད་ལགས་གྲང་།།
དད་པའི་སྒོ་ནས་རྟབ་ཚུལ་གྱིས།།
ཚིག་གི་སྡེབ་སྦྱོར་བཏང་སྙོམས་གྱུར།།
ཚིག་ལ་དགྱེས་པའི་མཁས་རྣམས་དང་།།
ཚིག་གི་མངའ་བདག་བཟོད་པར་གསོལ།།
བདག་ཉིད་ཆེན་པོ་བློ་གྲོས་རྒྱ་མཚོ་ཡི།།
ཡོན་ཏན་མེ་ཏོག་གུས་པས་སྤེལ་བ་ལས།།
བསོད་ནམས་གྲུབ་པ་གང་ཡོད་དེ་ཡིས་བདག།
སྲིད་གསུམ་བླ་མའི་གོ་འཕང་ཐོབ་པར་ཤོག།
དེ་ལྟར་བསྟོད་འདི་དཔལ་ལྡན་ཀུན་དགའ་ཡི།།
རྒྱལ་མཚན་གྱིས་སྤེལ་འདི་ལ་གང་དགྱེས་པ།།
བློ་གསལ་དེ་ལ་བླ་མའི་ཐུགས་རྗེ་ཡི།།
ཡེ་ཤེས་གཟིགས་པའི་བྱིན་རླབས་འཇུག་པར་འགྱུར།།
འཕགས་པ་འཇམ་པའི་དབྱངས་ཀྱི་ཞབས་ཀྱི་ཟེའུ་འབྲུ་ལ་སྤྱི་བོས་རེག་པས་ཤེས་བྱའི་དཀྱིལ་འཁོར་ལ་མངའ་བརྙེས་ཤིང་། གདུང་རྒྱུད་རྣམ་པར་དག་པའི་དགེ་བསྙེན་གྲགས་པ་རྒྱལ་མཚན་ལ་བསྟོད་པ་བརྡ་སྤྲོད་པ་ཀུན་དགའ་རྒྱལ་མཚན་གྱིས་སྦྱར་བ་འདི་རེ་ཞིག་རྫོགས་སོ།།
དཔྱད་གཏམ་སྤེལ་མཁན་ལ་གསལ་བརྡ།