དཔལ་ཀྱཻ་རྡོ་རྗེའི་རབ་ཏུ་གནས་པ་བཟང་པོ་དྲུག

༼ཅ༽

༄༅། །དཔལ་ཀྱེའི་རྡོ་རྗེའི་རབ་ཏུ་གནས་པ་བཟང་པོ་དྲུག་ཅེས་བྱ་བ་བཞུགས་སོ།།

༄༅། །དཔལ་ཀྱེའི་རྡོ་རྗེ་ལ་ཕྱག་འཚལ་ལོ། །དཔལ་ཀྱེའི་རྡོ་རྗེའི་རབ་ཏུ་གནས་པ་བྱེད་ན་བཟང་པོ་དྲུག་ཏུ་ཤེས་པར་བྱ་སྟེ། རྟེན་བཟང་པོ་དང་སློབ་དཔོན་བཟང༌། །གནས་བཟང་པོ་དང་དུས་བཟང་དང༌། །ཡོ་བྱད་ཆོ་ག་བཟང་པོའོ། །དེ་ལ་རྟེན་བཟང་པོ་ནི་རྟེན་གྱི་བྱ་བ་མ་ལུས་པར་ཡོངས་སུ་རྫོགས་པ་སྟེ། རྟེན་གང་ཡིན་ཡང་བཟོའི་བྱ་བ་རྫོགས་ནས་རྟེན་གྱི་དངོས་གཞི་ལ་ཕྱིས་བཟོ་བོས་བཟོ་བྱ་མི་དགོས་པའོ། །མཆོད་རྟེན་ལ་སོགས་པར་གཟུངས་བཞུགས་པ་ལ་སོགས་ནི་རྣལ་འབྱོར་དབང་ཕྱུག་ཉིད་དང༌། སློབ་དཔོན་ཀུན་དགའ་སྙིང་པོའི་དགོངས་པ་ཕྱོགས་གཅིག་ཏུ་བྱས་པ་རྣལ་འབྱོར་གྱི་རྒྱུད་དང་མཐུན་པ་ཁོ་བོས་ལོགས་ཤིག་ཏུ་བྱས་པ་དེར་བལྟ་བར་བྱའོ། །སློབ་དཔོན་བཟང་པོ་ནི་རྡོ་རྗེ་སློབ་དཔོན་དུ་དབང་ཐོབ་པ་དང༌། །དེ་ཁོ་ན་ཉིད་བཅུ་ཤེས་པ་དང༌། སྔོན་ཆད་ལས་ཀྱི་ཆོ་ག་མཐོང་བ་དང༌། ལྷའི་རྣལ་འབྱོར་ལ་གནས་ཤིང་བསྙེན་པ་ཡོངས་སུ་རྫོགས་པའོ། །གནས་བཟང་པོ་ནི་བཀྲ་ཤིས་ཤིང་ཉམས་དགའ་བའི་ས་ཕྱོགས་ཡིན་ལ། རྒྱས་པར་དཀྱིལ་འཁོར་གྱི་ཆོ་ག་ལྟར་ཡིན་ནོ། །དུས་བཟང་པོ་ནི་གཟའ་དང་སྐར་མ་བཀྲ་ཤིས་པའི་དུས་ཏེ། ཟླ་བ་དྲུག་དང་གཟའ་བཞི་དང༌། རྒྱུ་སྐར་བཅུ་བཞི་ཞེས་བྱ་བ་ལ་སོགས་པ་བཟང་པོ་ཡོངས་སུ་བཟུང་བ་ལས་བཤད་པ་བཞིན་ཡིན་ལ། སྤྱིར་ཡར་གྱི་ངོ་དང་ཁྱད་པར་དུ་སྔ་དྲོའི་དུས་སུ་རབ་གནས་ཀྱི་དངོས་གཞི་རྫོགས་པར་བྱའོ། །ཡོ་བྱད་བཟང་པོ་ནི་དཀྱིལ་འཁོར་དང་སྦྱིན་སྲེག་ལ་མ་ལྟོས་པའི་རབ་ཏུ་གནས་པ་ནི་ཆོ་ག་ཡོངས་སུ་རྫོགས་པ་མ་ཡིན་པས། སྦྱིན་སྲེག་གི་ཡོ་བྱད་དང༌། དཀྱིལ་འཁོར་གྱི་ཡོ་བྱད་དང༌། རབ་གནས་ཀྱི་ཁྱད་པར་གྱི་ཡོ་བྱད་དོ། །དང་པོ་གཉིས་ནི་སྔར་བསྟན་ཟིན་ཏོ། །རབ་གནས་ཀྱི་ཁྱད་པར་གྱི་ཡོ་བྱད་ནི། བའི་རྣམ་ལྔ་དང་དྲི་ལྔ་ལ་སོགས་པ་ཁྲུས་ཀྱི་ཡོ་བྱད་དང༌། ཡུངས་ཀར་དང་བདུག་པ་ལ་སོགས་པ་ཤིས་པའི་ཡོ་བྱད་དང༌། མེ་ཏོག་དང་སྤོས་ལ་སོགས་པ་ཐུན་མོང་གི་མཆོད་པའི་ཡོ་བྱད་དང༌། གླེགས་ཐག་དང་རྡོ་རིངས་ལ་སོགས་པ་ཁྱད་པར་གྱི་མཆོད་པ་མངའ་དབུལ་བའི་ཡོ་བྱད་དང༌། ཡོན་བདག་བཀྲ་ཤིས་པར་བྱ་བའི་ཡོ་བྱད་དོ། །ཆོ་ག་ཡོངས་སུ་དག་པ་ནི་སྤྱིར་སློབ་དཔོན་བསྙེན་པ་ཡོངས་སུ་རྫོགས་པས་ལས་སུ་བྱ་བ་ནི་གསུམ་སྟེ། སྟ་གོན་དང༌། དངོས་གཞི་དང༌། མཇུག་གོ །དེ་ལ་ཡང་སྤྱིར་ཆོ་གའི་དབྱེ་བ་རྒྱས་པ་དང་བསྡུས་པ་རང་གི་བློས་ཕྱེ་ལ་ཤེས་པར་བྱ་སྟེ། དེའང་དཀྱིལ་འཁོར་དང་སྦྱིན་སྲེག་དང་མ་འབྲེལ་བའི་རབ་གནས་ནི་ཡོངས་སུ་རྫོགས་པ་མ་ཡིན་ལ། གལ་ཏེ་ཆོ་ག་བྱེད་ནའང་བསྡུས་ཏེ་བསྟན་པའི་ཆོ་ག་དེ་ཉིད་ཀྱིས་ཅི་རིགས་པར་སྦྱར་ཏེ་ཤེས་པར་བྱའོ། །འདིར་དཀྱིལ་འཁོར་དང་སྦྱིན་སྲེག་དང་འབྲེལ་པའི་ཆོ་ག་རྒྱས་པར་བརྗོད་དེ། དང་པོར་སློབ་དཔོན་ལ་གསོལ་བ་གདབ་པ་དང༌། བསྙེན་པ་དང༌། ས་ཆོག་དང༌། སྟ་གོན་དང༌། དཀྱིལ་འཁོར་བྲི་བ་དང༌། དཀྱིལ་འཁོར་སྒྲུབ་མཆོད་ཡན་ཆད་ཀྱི་ཆོ་ག་སྔར་དབང་གི་སྐབས་སུ་བསྟན་པ་ལྟར་ཁྱད་པར་མེད་པར་བྱའོ། །འོན་ཀྱང་སློབ་མ་དབང་བསྐུར་མི་བྱེད་པར་རབ་གནས་ཁོ་ན་བྱེད་ན་སློབ་མ་སྟ་གོན་མི་དགོས་སོ། །གཞན་ཁྱད་པར་མེད་དོ། །དེ་ལ་དབང་བསྐུར་བ་དང་རབ་གནས་ཐུན་མོང་དུ་བྱེད་ཅིང་ཞག་གསུམ་དུ་བྱེད་ན། སྒྲུབ་མཆོད་རྫོགས་པ་དང་རབ་གནས་ཀྱི་སྟ་གོན་བྱ་སྟེ། ཕྱིད་ཉིན་རབ་གནས་ཀྱི་དངོས་གཞི་བྱེད་ལ། དེའི་ནུབ་མོ་སློབ་དཔོན་དང་སློབ་མ་འཇུག་ཅིང་དབང་བསྐུར་བར་བྱའོ། །ནུབ་གཉིས་པའི་དབང་དུ་བྱས་ན་སྒྲུབ་མཆོད་ཟིན་པ་དང་རབ་གནས་ཀྱི་སྟ་གོན་བྱས་ནས། དེ་ནས་སློབ་དཔོན་དང་སློབ་མ་འཇུག་ཅིང་དབང་བསྐུར་བ་བྱས་ལ་དེའི་ཐོ་རངས་རབ་གནས་ཀྱི་དངོས་གཞི་བྱ་སྟེ། དེ་རྫོགས་ནས་དཀྱིལ་འཁོར་གཤེགས་སུ་གསོལ་བར་བྱའོ། །ཡང་ན་ནུབ་གཉིས་པ་འདི་ཆོ་ག་བསྡུས་པ་ཡིན་པས་རབ་གནས་ཀྱི་སྟ་གོན་མ་བྱས་ཀྱང་ཉེས་པ་མེད་དེ། སྒྲུབ་མཆོད་ཀྱི་རྗེས་ལ་འཇུག་ཅིང་དབང་བསྐུར་བ་བྱས་ནས་ཐོ་རངས་རབ་གནས་ཀྱི་དངོས་གཞི་བྱས་ལ། དཀྱིལ་འཁོར་གཤེགས་སུ་གསོལ་བ་ལ་སོགས་པ་མཇུག་གི་ཆོ་ག་རྣམས་བྱའོ། །དེ་ལ་རབ་གནས་ཀྱི་སྟ་གོན་བྱེད་ན་དོན་བདུན་ཏེ། ཁྲུས་བྱས་པས་སྦྱང་ཞིང་ཤིས་པའི་ཆོ་ག་དང༌། སྟོང་པར་སྦྱང་བ་དང༌། ཡན་ལག་བཞིས་བསྐྱེད་པ་དང༌། མཆོད་བསྟོད་བྱ་བ་དང༌། སྙན་གསན་དབབ་པ་དང༌། གཤེགས་སུ་གསོལ་བ་དང༌། རྟེན་དགབ་ཅིང་བསྲུང་བ་བྱ་བའོ། །དེ་ལ་དང་པོ་གཏོར་མ་ཆོ་ག་གང་ཡང་རུང་བ་ཅིག་གིས་བཏང་སྟེ་བར་ཆད་ཞི་བར་བྱས་ལ། དེ་ལ་ཁྲུས་བྱ་བ་ནི་འདི་ཡིན་ཏེ། རྟེན་བཀྲུར་རུང་བ་རྣམས་ལ་དངོས་སུ་བྱ། མི་རུང་བ་རྣམས་ལ་མེ་ལོང་ལ་བྱ་སྟེ། དང་པོར་བའི་རྣམ་ལྔས་བྱུག་ཅིང༌། ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱ། ཞེས་བརྗོད་ཅིང་དཱུར་བའི་ཆུན་པོའི་པིར་རམ་ཕག་ཟེས་མཉེས་ལ། སྔགས་དེ་ཉིད་བཟླ་ཞིང་ཆུ་གཙང་མས་བཤལ་བར་བྱའོ། །དེ་ནས་མར་ནག་གམ་དྲི་ཞིམ་པོས་བྱུག་ཅིང༌། ཨོཾ་ཧཱུྃ་ཏྲཱྃ་ཧྲཱིཿཨཿཞེས་བརྗོད་པ་དང༌། ལུགས་སྐུ་དྲི་མས་ཞེན་ན་ཉི་མ་ལ་ཡང་གདུང་བར་བྱའོ། །མར་ཁུ་བསལ་བའི་དོན་དུ་ཨུ་དུམྦཱ་ར་དང༌། ཤི་རི་ཤ་དང༌། ཨཿཤྭཏྠ་དང༌། པརྐ་ཏི་དང༌། ནྱཱ་གྲོ་དྷ་སྟེ། ཤུན་ལྤགས་ལྔ་ལེགས་པར་བཏགས་ལ་སྔགས་དེ་ཉིད་ཀྱིས་བྱུག ཤུན་ལྤགས་མེད་ན་སྲན་མའི་ཕྱེ་མས་བྱུག་པར་བྱའོ། །དེའི་དྲི་མ་བཀྲུ་བའི་ཕྱིར་སུག་པའི་ཆུ་དང༌། ཆུ་གཙང་མས་ཀྱང་སྔགས་དེ་ཉིད་ཀྱིས་བཀྲུ་ཞིང༌། སྔགས་དེ་བཟླས་ལ་སྔར་བསྟན་པའི་དྲི་ལྔས་ཀྱང་བྱུག་པར་བྱའོ། །དེ་ནས་སྔར་སྟ་གོན་གྱི་དུས་སུ་ལྷག་པར་གནས་པ་བྱས་པའི་བུམ་པ་རྣམས་ཀྱིས་ཁྲུས་གསོལ་ཏེ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བྱའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། སྤྲོས་པ་ལ་དགའ་ན། ཁྱོད་ནི་སྦྱིན་པའི་རང་བཞིན་ཆུས། །སེར་སྣའི་དྲི་མ་སྦྱོང་མཛད་ཅིང༌། །གཏོང་བ་དྲི་ཡིས་ལེགས་བསྒོས་པ། །ཁྲུས་ལེགས་མཛད་ལ་ཕྱག་འཚལ་འདུད། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཁྱོད་ནི་ཚུལ་ཁྲིམས་རང་བཞིན་ཆུས། །ཁྲིམས་འཆལ་དྲི་མ་སྦྱོང་མཛད་ཅིང༌། །ཚུལ་ཁྲིམས་དྲི་ཡིས་ལེགས་བསྒོས་པ། །ཁྲུས་ལེགས་མཛད་ལ་ཕྱག་འཚལ་འདུད། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཁྱོད་ནི་བཟོད་པའི་རང་བཞིན་ཆུས། །ཁོང་ཁྲོའི་དྲི་མ་སྦྱོང་མཛད་ཅིང༌། །བཟོད་པའི་དྲི་ཡིས་ལེགས་བསྒོས་པ། །ཁྲུས་ལེགས་མཛད་ལ་ཕྱག་འཚལ་འདུད། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཁྱོད་ནི་བརྩོན་འགྲུས་རང་བཞིན་ཆུས། །ལེ་ལོའི་དྲི་མ་སྦྱོང་མཛད་ཅིང༌། །བརྩོན་འགྲུས་དྲི་ཡིས་ལེགས་བསྒོས་པ། །ཁྲུས་ལེགས་མཛད་ལ་ཕྱག་འཚལ་འདུད། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཁྱོད་ནི་བསམ་གཏན་རང་བཞིན་ཆུས། །རྣམ་གཡེངས་དྲི་མ་སྦྱོང་མཛད་ཅིང༌། །ཏིང་འཛིན་དྲི་ཡིས་ལེགས་བསྒོས་པ། །ཁྲུས་ལེགས་མཛད་ལ་ཕྱག་འཚལ་འདུད། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཁྱོད་ནི་ཤེས་རབ་རང་བཞིན་ཆུས། །ཤེས་འཆལ་དྲི་མ་སྦྱོང་མཛད་ཅིང༌། །ཤེས་རབ་དྲི་ཡིས་ལེགས་བསྒོས་པ། །ཁྲུས་ལེགས་མཛད་ལ་ཕྱག་འཚལ་འདུད། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཆུ་བོ་དྲུག་གིས་ཁྲུས་མཛད་ཅིང༌། །དྲི་མ་རྣམ་དྲུག་སྦྱོང་མཛད་པ། །རྒྱ་ཆེན་ཡོན་ཏན་དྲུག་དང་ལྡན། །ཁྲུས་ལེགས་མཛད་ལ་ཕྱག་འཚལ་འདུད། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། གང་ལ་ཉེས་པ་མི་མངའ་ཞིང༌། །ཡོན་ཏན་ཐམས་ཅད་དང་ལྡན་པའི། །སངས་རྒྱས་ཐམས་ཅད་མཆོད་དོན་དུ། །དད་པས་བདག་ནི་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། དེ་བཞིན་དུ་བཀྲ་ཤིས་ཀྱི་ཚིགས་སུ་བཅད་པ་དུ་མ་བརྗོད་ཅིང་ཁྲུས་བྱའོ། །ཁྲུས་ཀྱི་བདག་ཆལ་ལ་སོགས་པ་མ་གྲུབ་ན་དྲི་ཞིམ་པོ་འབའ་ཞིག་གིས་ཁྲུས་བྱའོ། །དེ་ནས་སྦྱང་ཞིང་ཤིས་པའི་ཆོ་ག་ནི། སྔར་སློབ་མ་དབང་བསྐུར་བའི་དོན་དུ་སློབ་མ་ཤེས་པའི་སྐབས་སུ་བཤད་པ་དང་འདྲ་བར་ཤེས་པར་བྱའོ། །དེ་ནས་གཉིས་པ་སྟོང་པར་སྦྱང་བ་ནི། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅་ཧཾ། ཞེས་བྱ་བའི་སྔགས་ཀྱིས་རབ་ཏུ་གནས་པ་བྱ་བའི་རྟེན་ཐམས་ཅད་མི་དམིགས་པར་བྱའོ། །དེ་ནས་གསུམ་པ་ཡན་ལག་བཞིས་བསྐྱེད་པ་ལ་བཞི། དམ་ཚིག་པ་བསྐྱེད་པ། ཡེ་ཤེས་པ་དགུག་པ། བྱིན་གྱིས་བརླབ་པ། དབང་བསྐུར་བའོ། །དང་པོ་དམ་ཚིག་པ་བསྐྱེད་པ་ནི་མངོན་པར་བྱང་ཆུབ་པ་རྣམ་པ་ལྔའམ་རྡོ་རྗེ་ཆོ་ག་ཡན་ལག་གསུམ་ལས་བསྐྱེད་དེ། དེ་ཡང་མཆོད་རྟེན་དང་ལྷ་ཁང་ནི་རྣམ་སྣང་དུ་བསྐྱེད། གླེགས་བམ་ནི་འོད་དཔག་ཏུ་མེད་པ། ཕྱག་མཚན་རྣམས་ནི་མི་བསྐྱོད་པ། སྐུ་གཟུགས་ངོ་ཤེས་པ་རྣམས་ནི་ལྷ་གང་ཡིན་པ། ངོ་མི་ཤེས་པ་རྣམས་ནི་རྡོ་རྗེ་འཆང་ཆེན་པོར་བསྐྱེད་དོ། །དེ་ནས་གཉིས་པ་ཡེ་ཤེས་པ་སྤྱན་དྲང་བ་ནི། རྡོ་རྗེ་བཟུང་ལ་དྲིལ་བུ་དཀྲོལ་ཞིང༌། ཇི་ལྟར་རྫོགས་པའི་སངས་རྒྱས་རྣམས། །དགའ་ལྡན་དུ་ན་གནས་ནས་ཀྱང༌། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་འདིར་ནི་གཤེགས་སུ་གསོལ། །ཞེས་བརྗོད་ལ། རང་གི་སྙིང་གའི་ས་བོན་གྱི་འོད་ཀྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲང་བར་བྱའོ། །སྤྱན་དྲངས་ལ་སྔར་བཤད་པ་བཞིན་ཞབས་བཀྲུ་བ་དང༌། ཞལ་བཀྲུ་བ་དང༌། བསང་གཏོར་དང༌། མཆོད་ཡོན་བྱས་ལ། ཨོཾ་བཛྲ་པདྨ་ཀ་མ་ལཱ་ཡ་སྟྭཾ། ཞེས་བྱ་བས་མེ་ཏོག་གི་གདན་ཕུལ་ལ། ཅི་འབྱོར་པའི་མཆོད་པ་དང་བསྟོད་པ་བྱའོ། །དེ་ནས་སྐུ་གཟུགས་དམ་ཚིག་པའི་གནས་གསུམ་དུ་ཡི་གེ་འབྲུ་གསུམ་བཀོད་ལ་སྔགས་བཟླས་ཏེ། ཡེ་ཤེས་པའི་ཕྱི་ནས་འབྲངས་པའི་བགེགས་བསྲུངས་ལ། ཡེ་ཤེས་པ་སྤྱན་དྲང་བའི་ཕྱིར། ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿཞེས་བྱ་བ་ལ་སོགས་པའི་སྔགས་དང་ལྕགས་ཀྱུ་ལ་སོགས་པའི་ཕྱག་རྒྱ་དང༌། ལྷ་མོ་བཞིའི་ཏིང་ངེ་འཛིན་གྱིས་དགུག གཞུག བཅིངས། དབང་དུ་བྱ་བའོ། །དེ་ནས་གསུམ་པ་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པའང་སྒྲུབ་ཐབས་བཞིན་བྱའོ། །དེ་ནས་བཞི་པ་དབང་བསྐུར་ཏེ་དབུ་རྒྱན་གྱི་བར་དུ་ཡན་ལག་བཞི་ཡོངས་སུ་རྫོགས་པར་བྱའོ། །དེ་ནས་སྤྱི་དོན་བཞི་པ་མཆོད་བསྟོད་ནི། ཕྱི་མེ་ཏོག་ལ་སོགས་པའི་མཆོད་པ་དང༌། སྔགས་དང༌། ཕྱག་རྒྱ་དང༌། ཏིང་ངེ་འཛིན་གྱི་མཆོད་པ་རྣམས་པ་ཉི་ཤུ་ལ་སོགས་པ་དང༌། བདུད་རྩིའི་མཆོད་པ་དང༌། ལྷ་མོ་བརྒྱད་ཀྱི་མཆོད་པ་དང༌། བསྟོད་པའི་མཆོད་པའི་བར་དུ་ཇི་ལྟར་ནུས་པས་མཆོད་པར་བྱའོ། །དེ་ནས་ལྔ་པ་སྙན་གསན་ཕབ་ལ། ཆོ་ག་ལྷག་ཆད་ཁ་བསྐང་ཞིང་ཡི་གེ་བརྒྱ་པ་བརྗོད་པས་བཟོད་པར་གསོལ་ཏེ། རྡོ་རྗེ་དྲིལ་བུ་འཛིན་པས་འདི་སྐད་དུ། ཧེ་ཞེས་བྱ་བའི་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་བསྟོད། །ཅེས་བྱ་བ་ལ་སོགས་པ་སྔར་སྟ་གོན་གྱི་སྐབས་སུ་བཤད་པ་དང་འདྲ་བ་ལས། ནང་པར་དཀྱིལ་འཁོར་བྲི། ཞེས་བྱ་བའི་སྐབས་སུ། ནང་པར་རབ་གནས་བགྱིད། ཅེས་བྱ་བ་གཞུག་སྟེ་གཞན་ནི་འདྲ། །དེ་ལན་གསུམ་བརྗོད་ལ་སླར་ཡང་འདི་སྐད་དུ། བདག་རྡོ་རྗེ་སློབ་དཔོན་ཆེ་གེ་མོ་ཞེས་བྱ་བ་ལ། སློབ་མ་ཆེ་གེ་མོ་ཞེས་བྱ་བས་གསོལ་བ་བཏབ་སྟེ། ཁམས་གསུམ་གྱི་སེམས་ཅན་ཐམས་ཅད་ཀྱི་དོན་གྱི་ཕྱིར་སང་ནང་པར་རྟེན་ཆེ་གེ་མོ་ཞེས་བྱ་བ་ལ་རབ་གནས་བགྱིད་པས་བཅོམ་ལྡན་འདས་ཐུགས་རྗེ་ཆེན་པོ་ཉིད་ཀྱི་བྱིན་གྱིས་བརླབ་པར་མཛད་དུ་གསོལ། ཞེས་བྱ་བས་གསོལ་བ་གདབ་བོ། །དེ་ནས་དྲུག་པ་གཤེགས་སུ་གསོལ་བ་ནི། ཡི་གེ་བརྒྱ་པའི་མཐར་ཨོཾ་བཛྲ་མུཿ ཞེས་པས་གཤེགས་སུ་གསོལ་ལོ། །བདུན་པ་དགབ་པ་ནི་དམ་ཚིག་པ་བདག་ལ་བསྡུས་ཏེ། ད་དུང་མཆོད་པ་ལ་མི་དབང་བ་མཚོན་པའི་ཕྱིར་རྟེན་ཞལ་བསྒྱུར་བའམ་ན་བཟའ་སེར་པོས་གཡོགས་ལ་གཞག་གོ །དེའང་རྟེན་ལ་གནས་གསུམ་བསྲུང་བ་བྱས་ཏེ་བར་ཆད་མི་འཇུག་པར་བྱའོ། །རབ་ཏུ་གནས་པའི་སྟ་གོན་གྱི་ཆོ་གའོ། །དེ་ནས་ཕྱི་དེ་ཉིན་པར་རབ་གནས་ཀྱི་དངོས་གཞིའི་ཆོ་ག་ནི། འབྱོར་པ་ཡོད་ན་མཆོད་པའི་ཡོ་བྱད་རྒྱ་ཆེར་གསར་བ་བཤམ། རྒྱ་ཆེར་མ་འབྱོར་ནའང་ཇི་ལྟར་འབྱོར་པ་བཤམས་ལ་བསང་བ་ལ་སོགས་པ་སྔར་བཞིན་བྱས་པས་ཆོ་ག་གསུང༌། གཏོར་མ་རྒྱ་ཆེར་བྱའོ། །དེ་ནས་དངོས་གཞི་ལའང་བདུན་ཏེ། རང་ལྷའི་རྣལ་འབྱོར་གསལ་བཏབ་ལ་གཏོར་མ་བཏང་སྟེ་ཁྲུས་བྱས་ལ་རྟེན་སྦྱང་ཞིང་ཤིས་པར་བྱ་བ་དང༌། སྟོང་པར་སྦྱང་བ་དང༌། ཡན་ལག་བཞིས་བསྐྱེད་པ་དང༌། མཆོད་པའི་ཆོ་ག་དང༌། སྤྱན་དབྱེ་བ་དང༌། སྙིང་པོ་བཟླས་ཏེ་བརྟན་པར་བཞུགས་པ་དང༌། མངའ་དབུལ་བའོ། །དེ་ལ་དང་པོ་གཏོར་མ་བཏང་བ་དང་ཁྲུས་བྱས་ནས་དམ་ཚིག་པ་བསྐྱེད་པའི་བར་ནི་སྟ་གོན་དང་འདྲ་བར་བྱས་ལ། དེ་ནས་ཡེ་ཤེས་པ་སྤྱན་དྲངས་པའི་སྐབས་སུ། འདི་ཞེས་བྱ་བའི་བཅོམ་ལྡན་འདས། །ཞེས་བྱ་བ་ལ་སོགས་པས་སྙན་གསན་དབབ་སྟེ། ནང་པར་རབ་གནས་བགྱིད་པར་འཚལ་ཞེས་བའི་སྐབས་སུ། ད་ནི་རབ་གནས་བགྱིད་པར་འཚལ་ཞེས་པ་གཞུག་གོ །གཞན་ཡང་སྤྱན་དྲང་བའི་ཚིགས་བཅད་འདིའང་སྤྲོས་པ་ལ་དགའ་ན་བརྗོད་དེ། ཆོས་རྣམས་ཀུན་གྱི་དབང་ཕྱུག་གཙོ། །བཙོ་མ་གསེར་གྱི་མདོག་འདྲ་ཞིང༌། །ཉི་མ་ལས་ལྷག་གཟི་བརྗིད་ཆེ། །དད་པས་སྤྱན་ནི་དྲང་བར་བགྱི། །ཞི་ཞིང་ཐུགས་རྗེ་ཆེར་ལྡན་པ། །དུལ་ཞིང་བསམ་གཏན་ས་ལ་བཞུགས། །ཆོས་དང་ཡེ་ཤེས་ཆགས་བྲལ་བ། །ཀུན་ཏུ་མི་ཟད་ནུས་པ་ལྡན། །ཚུར་སྤྱོན་ཚུར་སྤྱོན་ཞི་བདག་ལྷ། །ཐུབ་པའི་སྐྱེས་མཆོག་ཐམས་ཅད་མཁྱེན། །ཤིན་ཏུ་ལེགས་བྱས་གཟུགས་བརྙན་ནི། །མཆོད་པའི་གནས་འདིར་གཤེགས་སུ་གསོལ། །འདིར་ནི་གཟུགས་དང་ལྷན་ཅིག་ཏུ། །འཁོར་བ་སྲིད་དུ་བཞུགས་ནས་ཀྱང༌། །ནད་མེད་ཚེ་དང་དབང་ཕྱུག་རྣམས། །སྦྱིན་པ་ལེགས་པར་མཛད་དུ་གསོལ། །ཞེས་པ་དང༌། ཡང༌། དམིགས་མེད་མཁའ་ལྟར་དག་པས་ཁྱབ་པའི་སྐུ། །ཆོས་སྐུ་ནམ་མཁའ་ལྟ་བུར་དབྱེར་མེད་ཀྱང༌། །ཐབས་དང་ཤེས་རབ་གཟུགས་བརྙན་སྐུར་སྟོན་པ། །བཅོམ་ལྡན་འཁོར་བཅས་འདིར་ནི་གཤེགས་སུ་གསོལ། །མ་ལུས་སེམས་ཅན་ཀུན་གྱི་དོན་སླད་དུ། །བདུད་སྡེ་དཔུང་བཅས་མ་ལུས་འཇོམས་མཛད་ཅིང༌། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་འདིར་ནི་གཤེགས་སུ་གསོལ། །ཨོཾ་ཨེ་ཧྱེ་ཧི་བྷ་ག་ཝ་ཏེ། བྷ་ག་བཱཾ་ས་མ་ཡ། ཨརྩ་མན་ཨརྒྷཾ་པཱ་དྱཾ་པྲ་ཏཱིཙྪེ་དཾ་པཱུ་ཛཱ་ན་ཙརྻ་པྲ་སིདྡྷི་མེ། ཞེས་བྱ་བས་སྤྱན་དྲངས་ལ། མཆོད་ཡོན་ཕུལ་ཏེ་ཅི་འབྱོར་གྱིས་མཆོད་དོ། །དེ་ནས་བསྲུང་བ་ནི་སྐུ་གཟུགས་དམ་ཚིག་པའི་གནས་གསུམ་དུ་ཡི་གེ་བཀོད་ལ། རྩ་བའི་སྔགས་ལ་སོགས་པ་ཁྲོ་བོའི་སྔགས་བཟླ་ཞིང་ཡེ་ཤེས་པའི་ཕྱི་ནས་འབྲངས་པའི་བགེགས་བསལ་བར་བྱའོ། །དེ་ནས་དགུག་གཞུག་བྱ་བ་ནི། ཇི་ལྟར་སངས་རྒྱས་ཐམས་ཅད་དག །དགའ་ལྡན་དུ་ནི་གནས་གྱུར་ཀྱང༌། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་འདིར་ནི་གཤེགས་སུ་གསོལ། །ཞེས་བྱ་བ་དང༌། ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿ ཞེས་བྱ་བ་ལ་སོགས་པ་སྔགས་དང་ཕྱག་རྒྱ་དང་ཏིང་ངེ་འཛིན་གྱིས་དགུག་གཞུག་བརྟན་པར་བྱའོ། །འདིར་ནི་རྟག་ཏུ་བཞུགས་ནས་ཀྱང༌། །བརྩེ་བས་རྗེས་སུ་གཟུང་བ་དང༌། །བྱང་ཆུབ་སེམས་ནི་རབ་འཕེལ་གྱིས། །བརྟན་པར་འདིར་ནི་བཞུགས་སུ་གསོལ། །ཨོཾ་བཛྲ་དྷ་ར་དྷ་ར་དྷཱ་ར་ཡ་དྷཱ་ར་ཡ། མརྡྷ་མརྡྷ་བཛྲ་དྷྲྀཀ་ཨ་དྷི་ཏིཥྛ། ཨོཾ་ཤ་ཤྭ་ཏ་པ་ར་མ། ཤ་ཤྭ་ཏ། ཨེ་ཧྱེ་ཧི་ཛི་ན་ཛིཀ་ཨ་དྷི་ཏིཥྛ། ཨོཾ་བཛྲ་སུརྻ་ཏ་མོ་བྷི་དྷ་མ་ན་ས་མ་ཡ་སྟྭཾ་ཧཾ་རཏྣ་དྷྲྀཀ་ཨ་དྷི་ཏིཥྛ། ཨོཾ་བཛྲ་དྷརྨ་ས་མ་ཡ་སྟྭཾ་ཧུ་ལུ་ཧུ་ལུ་ཨ་རོ་ལིཀ་ཨ་དྷི་ཏིཥྛ། ཨོཾ་ཕུཿཕུཿཕུཿཧི་ཧི་ཧི་པྲཛྙཱ་དྷྲྀཀ་ཨ་དྷི་ཏིཥྛ། ཨོཾ་མོ་ཧ་ར་ཏི་ཨ་དྷི་ཏིཥྛ། ཨོཾ་དྭེ་ཥ་ར་ཏི་ཨ་བྷི་ཏིཥྛ། ཨོཾ་རཱ་ག་ར་ཏེ་ཨ་དྷི་ཏིཥྛ། ཨོཾ་བཛྲ་ར་ཏི་ཨ་དྷི་ཏིཥྛ། ཞེས་བྱ་བས་སྤྱན་དྲངས་པ་བརྟན་པར་བཞུགས་སུ་གསོལ། དེ་ནས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་སྒྲུབ་ཐབས་བཞིན་བྱ། དབང་བསྐུར་ཞིང་རིགས་ཀྱི་བདག་པོའི་རྒྱས་གདབ་པའང་སྒྲུབ་ཐབས་བཞིན་བྱ། དེ་ནས་ཅི་འབྱོར་གྱིས་མཆོད་ཅིང་བསྟོད་དོ། །དེ་ནས་ལྔ་པ་སྤྱན་དབྱེ་བ་ནི། གསེར་གྱི་ཐུར་མའམ་མེད་ན་རྡོ་རྗེས་ཀྱང་རུང་སྟེ། དཀྱིལ་འཁོར་གྱི་རྡུལ་ཚོན་ལས་ཅུང་ཟད་བླངས་ལ་རྟེན་གྱི་སྤྱན་གྱི་ཐད་ཀར་བྱུག་ཅིང༌། ཀུན་མཁྱེན་ཡེ་ཤེས་སྤྱན་ལྡན་སྐྱོན་བྲལ་ཡང༌། །གུས་པས་འཕགས་པའི་སྤྱན་ནི་དབྱེ་བགྱི་བས། །ནམ་མཁའི་མཐས་གཏུགས་གྱུར་པའི་སེམས་ཅན་གྱིས། །སངས་རྒྱས་ཡེ་ཤེས་སྤྱན་ནི་ཐོབ་པར་ཤོག །ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་དྷ་ནི་སྭཱ་ཧཱ། ཞེས་བྱ་བས་སེམས་ཅན་གྱི་དོན་ལ་ནུས་པ་མཐུ་དང་ལྡན་པར་བྱའོ། །དེ་ནས་དྲུག་པ་བརྟན་པར་བཞུགས་པ་ནི་མེ་ཏོག་ལ་གོང་གི་རིགས་ལྔ་ཡུམ་དང་བཅས་པའི་སྔགས་དང༌། ཡི་དམ་ལྷའི་སྔགས་མང་དུ་བཟླས་ལ་མེ་ཏོག་གཏོར་ཞིང་རྡོ་རྗེས་རེག་ལ་བརྟན་པར་བཞུགས་པར་བྱ་བའི་ཕྱིར། ཨོཾ་ཏིཥྛ་བཛྲ་ཞེས་བརྗོད་དེ། ཇི་སྲིད་དུ་འབྱུང་བས་མ་ཉེན་གྱི་བར་དུ་སེམས་ཅན་གྱི་དོན་ལ་བརྟན་པར་བཞུགས་སུ་གསོལ་བར་བྱའོ། །དེ་ནས་བདུན་པ་མངའ་དབུལ་བ་རྒྱས་པ་ནི། རྟེན་དེ་དག་ཞུ་བ་ལས་བྱུང་བའི་ལྷ་ཁང་དང༌། མཆོད་རྟེན་ལ་སོགས་པ་སྔར་གྱི་དེར་གྱུར་པར་བསམས་ལ། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཨོཾ་ཧཱུྃ་ཧྲཱིཿབྷུ་ཁཾ་བཛྲཱི་བྷ་ཝ་དྲྀ་ཌྷོ་ཏིཥྛ་བྷུ་ཁྃ། ཞེས་ཚོགས་པ་ཐམས་ཅད་ཀྱིས་བརྗོད་ཅིང་མེ་ཏོག་གཏོར་ཞིང་མངའ་དབུལ། ཡང་མཆོད་པ་རྒྱས་པས་ཀྱང་མངའ་དབུལ་ཏེ། མེ་ཏོག་ལ་སོགས་པ་དང་བདུད་རྩི་དང་ཡིད་ལས་བྱུང་བ་དང་རས་ཟུང་དང་བསྟོད་པ་དང༌། གཞན་ཡང་མངའ་དབུལ་བ་ཐམས་ཅད་བྱ་སྟེ། སྐུ་གཟུགས་རྣམས་ལ་དབུ་རྒྱན་ལ་སོགས་པ་དང༌། མཆོད་རྟེན་ལ་དྲིལ་བུ་ལ་སོགས་པ་དང༌། པུ་སྟི་རྣམས་ལ་གླེགས་ཤིང་སྐ་རགས་ལ་སོགས་པ་དང༌། ཐུན་མོང་དུ་གྱུར་པ་ན་བཟའ་དང་གདུགས་ལ་སོགས་པ། ཅི་འབྱོར་པའི་ཡོ་བྱད་རྣམས་ཀྱིས་མངའ་དབུལ་ཞིང་མཆོད་པར་བྱའོ། །མཇུག་ལའང་བདུན། རྟེན་བཞུགས་པར་སྤྱན་དྲང་དུ་བཏུབ་པ་རྣམས་སྤྱན་དྲངས་པ་དང༌། ཆོས་སྐྱོང་བསྒོ་བ་དང༌། ཡོན་བདག་ལ་གཏད་དེ་མཆོད་པར་བསྒོ་བ་དང༌། བཀྲ་ཤིས་པའི་ཆོ་གས་ཐམས་ཅད་བཀྲ་ཤིས་པར་བྱ་ཞིང༌། ཆོ་ག་ལྷག་ཆད་བསྐང་བ་དང༌། སྨོན་ལམ་རྒྱས་པར་བྱ་བ་དང༌། ཡོན་བླང་བ་དང༌། རྗེས་བསྡུ་ཞིང་དགའ་སྟོན་བྱ་བའོ། །དང་པོ་ནི་རྟོགས་སླའོ། །གཉིས་པ་ནི་གཏོར་མ་རྒྱ་ཆེན་པོ་བཤམས་ལ་ཆོས་སྐྱོང་རྣམས་ལ་བྱིན་ཏེ། དཔལ་མགོན་པོ་ལ་སོགས་པ་ལ་སྲུང་མར་བསྒོ་ལ་བཞག་སྟེ། ཁྱོད་ཀྱིས་རྟེན་འདི་ལ་མི་དང་མི་མ་ཡིན་པའི་གནོད་པ་སྲུངས་ལ། མཆོད་པ་དང༌། བཀྲ་ཤིས་པ་ལ་སོགས་པ་རྒྱས་པར་བྱ་བའི་ཕྱིར། རྟེན་འདིའི་ཆོས་སྐྱོང་བའི་སྲུང་མ་གྱིས་ཤིག ཅེས་བྱ་བ་ལ་སོགས་པས་ཆོས་སྐྱོང་བར་བསྒོ་བར་བྱའོ། །གསུམ་པ་ནི་བླ་མས་ཡོན་བདག་ལ། ངས་བྱ་བ་གང་ཡིན་པའི་རབ་ཏུ་གནས་པ་རྫོགས་ཀྱིས། ཁྱོད་ཀྱིས་འཇིག་རྟེན་དང་འཇིག་རྟེན་ལས་འདས་པའི་འདོད་པ་ཐམས་ཅད་བསྒྲུབས་ཟིན་གྱིས། ཁྱོད་ཀྱིས་རྟེན་འདི་ལ་ཞག་བདུན་ལ་སོགས་པར་ཇི་ལྟར་འབྱོར་པའི་མཆོད་པ་རྒྱ་ཆེན་པོ་གྱིས་ཤིག དེ་ནས་ཀྱང་ཅི་འབྱོར་པའི་མཆོད་པ་བར་མ་ཆད་པར་གྱིས་ཤིག ཅེས་བསྒོ་བར་བྱའོ། །བཞི་པ་ནི་ཅི་འབྱོར་པ་རྣམས་ཀྱིས་བཀྲ་ཤིས་པར་བྱ་བའི་ཕྱིར། བཀྲ་ཤིས་སྣ་ཚོགས་དབྱངས་དང་བཅས་པས་བྱའོ། །ཡང་རྒྱས་པའི་སྦྱིན་སྲེག་དང༌། བདག་དང་ཡོན་བདག་གི་སྡིག་པ་ཞི་བར་བྱ་བའི་ཕྱིར། ཞི་བའི་སྦྱིན་སྲེག་བྱའོ། །ལྔ་པ་ནི་བླ་མ་དང་ཡོན་བདག་འཁོར་དང་བཅས་པས་སྨོན་ལམ་རྒྱས་པར་གདབ་པར་བྱའོ། །དྲུག་པ་བར་ཆད་བསྲུངས་ལ་ཡོན་བླང་བར་བྱ་སྟེ། བླ་མ་ཡོངས་སུ་མཉེས་པ་ཡིས། །ལས་ཀྱི་དངོས་གྲུབ་འགྲུབ་པར་འགྱུར། །ཐ་ན་བསྙེན་བཀུར་ཙམ་གྱིས་ཀྱང༌། །བླ་མ་ཡོངས་སུ་མཉེས་པར་བྱ། །ཞེས་པས་ཡོན་བླང་ངོ༌། །དེ་ནས་བདུན་པ་ནི། ཡང་དཀྱིལ་འཁོར་ལ་མཆོད་ཅིང་དངོས་གྲུབ་བླངས་ལ། ཆོ་ག་ལྷག་ཆད་ཐམས་ཅད་བཟོད་པར་གསོལ་ལ། བདག་ཉིད་བསྲུངས་ལ་དཀྱིལ་འཁོར་གྱི་རྗེས་ཀྱི་བྱ་བ་རྣམས་ནི་དབང་གི་ཆུ་བོ་བཞིན་རྒྱས་པར་བྱའོ། །སྦྱིན་བདག་གིས་ཀྱང་དགའ་སྟོན་ཆེན་པོ་བྱ་བ་ལ་སོགས་པ་མཇུག་རྒྱས་པར་བྱའོ། །དེ་ལྟར་རྒྱས་པར་མི་ནུས་པ་རྣམས་ཀྱིས་ཀྱང་སྟ་གོན་དང་སྦྱིན་སྲེག་སྤངས་པ་ཙམ་ཉམས་སུ་བླང་བར་བྱའོ། །རབ་ཏུ་གནས་པའི་ལག་ཏུ་བླང་བའི་རིམ་པ། བླ་མ་བརྒྱུད་པའི་ཕྱག་ལེན་ཇི་ལྟར་མཛད་པ་བཞིན་དུ་དགེ་བསྙེན་བསོད་ནམས་རྩེ་མོས་སྦྱར་བ་ལས། དུས་ཕྱིས་རྣལ་འབྱོར་པ་གྲགས་པ་རྒྱལ་མཚན་གྱིས་ཞུས་དག་བགྱིས་ཏེ་ལེགས་པར་བསྡེབས་པའོ། །རབ་ཏུ་གནས་པའི་ཆོ་ག་རྫོགས་སོ།།  །།༄༅། །ཞི་བའི་སྦྱིན་སྲེག་བཞུགས།། ༄༅། །ཨོཾ་སྭ་སྟི་སིདྡྷཾ། བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །དཔལ་ཀྱེའི་རྡོ་རྗེའི་རྣལ་འབྱོར་པས་བསྙེན་པ་རྫོགས་ནས་སྔགས་ཀྱི་ནུས་པ་དབྱུང་བའི་ཕྱིར་རམ་ཡང་སྐབས་འགའ་ཞིག་ཏུ་རང་གི་སྡིག་པ་དང་བར་དུ་གཅོད་པ་ཞི་བར་བྱ་བའི་ཕྱིར། ཞི་བའི་སྦྱིན་སྲེག་བྱེད་པར་འདོད་པས། དུས་ཀྱི་ཁྱད་པར་ཕྱེ་མ་རེད་ཀྱི་དུས་སུ་སྦྱོར་བ་ལ། ཆོས་དྲུག་གི་དང་པོ་ཐབ་ཀྱི་དབང་དུ་བྱས་ན་ཕྱོགས་ཉམས་དགའ་བར་ཐབ་ཁུང་བྱ་སྟེ། དེ་ཡང་ཁུང་བུར་བརྐོ་ན་རྒྱར་ཁྲུ་གང༌། ཟབས་སུ་ཁྲུ་ཕྱེད་བརྐོ། དེ་ནས་སོར་བཞི་བསྐྱེད་ལ། ཡང་རྒྱ་དང་དཔངས་སུ་སོར་བཞི་ཡོད་པའི་ཁ་ཁྱེར་གྱིས་བསྐོར་ཏེ་ལེགས་པར་བྱས་པ་དཀར་ཞལ་གྱིས་བྱུག ཐབ་ཀྱི་ནང་དུ་པདྨ་འདབ་མ་བརྒྱད་པ་བྱ། དེ་ལ་ལྷ་དགུའི་མཚན་མ་དགོད། ཁ་ཁྱེར་ལ་རྡོ་རྗེའི་ཕྲེང་བས་བསྐོར་བར་བྱའོ། །དེའི་ཕྱི་རོལ་དུ་སྟེགས་བུ་གྲུ་བཞི་པ་བྱ་སྟེ། དེའི་གྲྭ་བཞིར་ཟླ་ཕྱེད་རྡོ་རྗེ་བྱའོ། །ཡང་ན་ཐབ་ཁུང་བུར་མི་བརྐོ་ན་ཚད་སྔ་མ་དང་འདྲ་སྟེ། རི་མོ་ཟླུམ་པོར་བསྐོར། སོར་བཞི་བསྐྱེད་པའི་ཟླུམ་པོ་དང༌། སོར་བཞི་དཔངས་སུ་བྱས་པའི་དོད་ཀྱི་ཟླུམ་པོ་སྟེ་གསུམ་གྱིས་བསྐོར། ནང་དུ་པདྨ་འདབ་མ་བརྒྱད་པ་དང༌། རྡོ་རྗེའི་ཕྲེང་བ་ལ་སོགས་པ་སྔ་མ་དང་འདྲའོ། །ཐབ་ཁུང་ངོ༌། །གཉིས་པ་བུད་ཤིང་ནི་གདུག་པ་ཅན་མ་ཡིན་པའི་ཤིང་མ་རུལ་བའམ། དེ་མེད་ན་བ་ལང་གི་ལྕི་བ་ལ་སོགས་པ་སྲོག་ཆགས་མེད་པ་ཐབ་ཁུང་བས་ཅུང་ཟད་དམའ་བར་བརྩིག་པའོ། །བུད་ཤིང་ངོ༌། །གསུམ་པ་སྦར་བའི་མེ་ནི་རྒྱུན་ཞག་གམ་འོ་མ་ཅན་གཙུབས་པ་ལས་བྱུང་བའོ། །བཞི་པ་མཆོད་རྫས་དང༌། ལྔ་པ་བཤམ་ཐབས་ནི། ཕྱོགས་དེ་ལེགས་པར་ཕྱག་དར་བྱས་ལ། བའི་རྣམ་ལྔས་ལེགས་པར་བྱུགས་ཏེ། རང་ཁ་ཤར་དུ་བལྟས་པའི་གཡོན་ཕྱོགས་སུ་མཆོད་ཡོན་གྱི་སྣོད་བཞི་བཀོད་ལ། ཞབས་བསིལ། ཞལ་བསིལ། བསང་ཆུ། མཆོད་ཡོན། དེ་བཞིན་དུ་མེ་ཏོག སྤོས། མར་མེ། དྲི་ཆབ། ལྷ་བཤོས། གཏོར་མ་རྣམས་བཤམ་མོ། །རང་གི་གཡས་ཕྱོགས་སུ་བསྲེག་རྫས་བཞག་སྟེ། དང་པོ་ཡམ་ཤིང་ཞེས་བྱ་བ་ཁྲུ་ཕྱེད་པའི་ཤིང་སྦོམ་ཕྲ་མཐེ་བོང་ཙམ་མམ། མཐེའུ་ཆུང་ཙམ་རྩེ་མོ་གཉིས་མར་དང་སྦྲང་རྩི་ལ་སྦགས་ལ། སྦྲང་མེད་ན་མར་ལ་སྦགས་པ་བརྒྱ་རྩ་བརྒྱད་ཡན་ཆད་ཅི་འབྱོར་པ་གཞག དེའི་རྗེས་ལ་མར། དེ་བཞིན་དུ་འབྲུ་མར་དང༌། ཏིལ་ནག་པོའམ། ཡུངས་ཀར། འབྲས། ཞོ་དང་ཕྱེ་མར་སྦྱར་བ་སྟེ། ཟས་མཆོག སོ་བ། ནས། སྲན་མ། གྲོ། དཱུར་བའི་མྱུ་གུ་དང༌། ཀུ་ཤ་ལ་སོགས་པ་ཅི་འབྱོར་པ་གཞག རང་གི་མདུན་དུ་རྡོ་རྗེ་དང་དྲིལ་བུའི་བར་དུ་དགང་གཟར་དང༌། བླུགས་གཟར་ཁ་སྦྱར་ལ་གཞག ཡང་གནས་ཇི་ལྟར་འཚམ་པར་ཀུ་ཤ་ཡང་གཞག ནང་གི་མཆོད་པ་ཡང་བཤམས་ལ་གཞག་གོ །རྫས་དེ་དག་ཐམས་ཅད་ལ་བདུད་རྩི་ལྔ་བསྲེས་ཏེ་གཞག་པར་བྱའོ། །དྲུག་པ་སྒྲུབ་པ་པོ་ནི་རང་ཉིད་ཁྲུས་བྱས་ཏེ། གོས་དང་རྒྱན་ལ་སོགས་པ་དཀར་པོས་མཛེས་པར་བྱས་ལ། ཞི་བའི་སེམས་དང་ལྡན་པས་སྟན་ནང་ཚངས་ཅན་ལ་སོགས་པ་ལ་ཁ་ཤར་དུ་བལྟས་ཏེ། སྐྱིལ་ཀྲུང་གིས་འདུག་གོ །དེ་དག་ནི་སྦྱོར་བའི་ཆོ་གའོ། །དེ་ནས་དངོས་གཞི་ལ་དྲུག་གི་དང་པོ་བདག་གི་རྣལ་འབྱོར་ནི། རང་ཉིད་ལྷའི་རྣལ་འབྱོར་རྫོགས་པར་བྱ། བཟླས་པ་ཡང་ཅུང་ཟད་བྱ། མཆོད་པ་ཡང་ཅུང་ཟད་བྱས་ལ་རང་གི་དཀྱིལ་འཁོར་བསྡུའོ། །གཉིས་པ་མེ་སྦར་བ་ནི་ཡམ་ཤིང་རྩེ་མོ་མར་ལ་སྤགས་པ་དེ་མར་མེ་ལ་བསྲེགས་ཏེ། རྩྭ་སྐམ་པོ་གཞན་དང་ཡང་བཅས་ཏེ་ཐབ་ལ་ཟླུམ་པོར་གཡས་ནས་བསྐོར་ཞིང༌། ཨོཾ་དེ་ཝ་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་བརྗོད་ཅིང་བསྐོར་རོ། །ཨོཾ་བཛྲ་ཛྭཱ་ལ་ཛྭཱ་ལ་རཾ། ཞེས་བརྗོད་དེ། ཐབ་ཁུང་གི་ཤིང་གསེབ་ཏུ་བཅུག་སྟེ་རླུང་ཡབ་ཀྱིས་ཅུང་ཟད་སྦར་ལ། ཨོཾ་བཛྲ་ཛྭཱ་ལ་ཛྭཱ་ལའི་སྔགས་ཟློས་ཤིང༌། བླུགས་གཟར་གྱིས་ཀྱང་ལན་གསུམ་གྱི་བར་དུ་བླུགས་ལ་མེ་གསོའོ། །དེ་ནས་ཨོཾ་བཛྲ་སཏྭ་ཨ། ཞེས་བརྗོད་ལ་ཐབ་ཀྱི་ཉེ་འཁོར་ཀུན་ཏུ་ཀུ་ཤ་རློན་པའམ་མེད་ན་སྐམ་པོས་ཀྱང་རུང་སྟེ་རྩེ་མོ་ཤར་རམ་གཡས་སྐོར་དུ་བསྟན་པས་གཡོགས་ལ་བསང་ཆུས་ཐམས་ཅད་དུ་བསང་ངོ༌། །ཀུ་ཤ་འབུལ་བ་འདི་ནི་མེ་ལྷ་ལ་བྱོན་ཟན་མ་ཕུལ་བའི་གོང་དུ་འབུལ་བར་བཤད་པ་དེ་ལྟར་བྱའོ། །གསུམ་པ་ཐབ་དང་ཡོ་བྱད་བསང་བ་ནི་ཕྱག་གཉིས་པའི་ང་རྒྱལ་གྱིས་ལངས་ལ། ཀུ་ཤའི་ཆུན་པོ་དང་རྡོ་རྗེས་བསང་ཆུ་ནས་བླངས་ལ་བདུད་རྩི་འཁྱིལ་པའི་སྔགས་བརྗོད་པའམ། ཡང་ན་ཧཱུྃ་རིང་པོ་འབའ་ཞིག་བརྗོད་ཅིང་ཐབ་དང་ཡོ་བྱད་ཐམས་ཅད་བསང་ཞིང་བགེགས་བསལ་བར་བྱའོ། །གཞན་ཡང་ཨོཾ་ཤྲཱིཾ་སྭཱ་ཧཱ། མར་གྱིའོ། །ཨོཾ་ཛྲཱིཾ་སྭཱ་ཧཱ། འབྲུའི་འོ། །ཨོཾ་སྭ་སྭཱ་ཧཱ། རྫས་བཀྲུ་བའོ། །ཨོཾ་ཀུ་རུ་ཀུ་རུ་སྭཱ་ཧཱ། ཐམས་ཅད་སྦྱང་བའོ། །བཞི་པ་ཐབ་ཁུང་མངོན་པར་འདུ་བྱ་བ་ནི། སྭ་བྷཱ་ཝའམ་ཧཱུྃ་ཞེས་བརྗོད་པས་ཐབ་ཁུང་མི་དམིགས་པར་བསམས་ལ། སྟོང་པའི་ངང་ལས་པྃ་ལས་པདྨ། རྃ་ལས་ཉི་མའི་སྟེང་དུ་ཧཱུྃ་ལས་ཐབ་ཁུང་དཀར་པོ་ཟླུམ་པོ་དྭངས་ཤིང་ཐོགས་པ་མེད་པ། ཤིན་ཏུ་ཡངས་པ་བྲིས་པ་དང་གཉིས་སུ་མེད་པར་བསྐྱེད་པར་བྱའོ། །དེ་བཞིན་དུ་མཆོད་པ་རྣམས་ཀྱང་བསང་ཞིང་སྦྱངས་ལ་བྱིན་གྱིས་བརླབ་བོ། །ལྔ་པ་འཇིག་རྟེན་པའི་མེ་ལྷ་མཆོད་པ་ནི་མེའི་གསེབ་ཏུ། པྃ་ལས་པདྨ་རྃ་ལས་ཉི་མའི་སྟེང་དུ། རྃ་ལས་བགྲང་ཕྲེང་རྃ་གྱིས་མཚན་པ། དེ་ལས་འོད་འཕྲོས་འདུས་གཅིག་ཏུ་གྱུར་པ་ལས། མེ་ལྷ་ར་སྐྱེས་ལ་ཞོན་པ་ཞལ་གཅིག་ཕྱག་གཉིས། གཡས་ཕྲེང་བ་དང༌། གཡོན་སྤྱི་བླུགས་འཛིན་པའམ། ཡང་ན་ཕྱག་བཞི་པ་གཡས་པས་མཆོག་སྦྱིན་དང་ཕྲེང་བ། གཡོན་དབྱུག་པ་དང་རིལ་བ་སྤྱི་བླུགས་འཛིན་པའོ། །ལུས་པོ་མེའི་རང་བཞིན་དམར་པོ། ཞལ་གྱི་ཁ་དོག་ལས་སོ་སོར་དང་མཐུན་པར་བསྐྱེད། ཁ་དོག་དཀར་པོའམ་དམར་པོ་གསུས་ཁྱིམ་ཆེ་བ། རལ་པའི་ཐོར་ཚུགས་ཅན། ཨག་ཚོམ་འཕྲེང་བ་དྲང་སོང་གི་ཚོགས་ཀྱིས་བསྐོར་བ་བསྐྱེད་ལ། རང་གི་སྙིང་གའི་ཧཱུྃ་གི་འོད་ཀྱིས་ཤར་ལྷོ་ནས་ཡེ་ཤེས་པ་ཅིག་སྤྱན་དྲངས་ཏེ། གཡས་པའི་མཐེ་བོང་གུང་མོའི་རྩར་སྦྱར། མཛུབ་མོས་གུང་མོའི་རྒྱབ་ནས་བཀབ་ལ། གཡོན་པའང་ཚུལ་དེ་བཞིན་དུ་བྱ་བ་ནི་དབྱུག་གུའི་ཕྱག་རྒྱ་སྟེ། དེས་རྣ་བའི་དྲུང་ནས་གཡབ་ཅིང༌། ཚུར་སྤྱོན་ཚུར་སྤྱོན་འབྱུང་པོ་ཆེ། །མེ་ལྷ་དྲང་སྲོང་འབྱུང་པོ་ཆེ། །བསྲེག་བླུགས་ཞལ་ཟས་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་སྒྲུབ་པ་པོ། །ཐུགས་རྗེས་སེམས་ཅན་དོན་མཛད་པ། །འདི་ཉིད་དུ་ནི་བཞུགས་སུ་གསོལ། །ཨོཾ་ཨགྷ་ཡེ། མ་ཧཱ་ཏེ་ཛ། སརྦ་ཀརྨ། པྲ་སཱ་ད་ཀ མ་ཧཱ་བྷཱུ་ཏ་དེ་བ་རྀ་ཥི། དྭི་ཛ་ས་ཏ་མ། གྲྀ་ཧཱི་ཏྭཱ་ཨཱ་ཧུ་ཏིཾ་ཨ་ཧཱ་ར། ཨསྨིན་སནྣི། ཧི་ཏོ་བྷ་ཝ། ཞེས་བརྗོད་པས་སྤྱན་དྲངས་ལ་ཐབ་ཀྱི་ཤར་སྒོར་བཞུགས་པར་བསམ། དེ་ལ་པདྨ་ཀ་མ་ལཱ་ཡ་སྟྭཾ། ཞེས་བརྗོད་ལ་མེ་ཏོག་དབུལ། དེ་པདྨའི་གདན་ལ་བཞུགས་པར་བསམ། དེ་ལ་ཨོཾ་ནི་རི་ཧཱུྃ་ཁཾ། ཞེས་ཞབས་བསིལ་དབུལ། ཨོཾ་སརྦ་སཾ་ཤོ་དྷ་ནི་ཧཱུྃ་གིས་ཞབས་བསིལ་དང་སྐུ་ཐམས་ཅད་ལ་བསང་གཏོར་བྱ། ཛཿཧཱུྃ་བྃ་ཧོཿཁཾ་རཾ་ཞེས་པས་མཆོད་ཡོན་ཕྱག་ཏུ་དབུལ། དམ་ཚིག་བརྟན་པར་བྱ་སྟེ། ལག་པ་རྡོ་རྗེ་རྩེ་གསུམ་པའི་ཕྱག་རྒྱའམ། ཡང་ན་རྡོ་རྗེ་དང་བཅས་པས་སྤོས་བཟུང་སྟེ། ཨོཾ་བཛྲ་ཨཱ་ན་ལ་མ་ཧཱ་བྷུ་ཏ་ཛྭཱ་ལ་བྷསྨ་ཀུ་རུ། སརྦ་དུཥྚཱ་ན་ཧཱུྃ་ཕཊ། དྲྀ་ཤྱ་ཛཿཧཱུྃ་བྃ་ཧོཿ ས་མ་ཡ་སྟྭཾ་ཞེས་བརྗོད་ལ། གཽ་རཱི་ལ་སོགས་པའི་རྣལ་འབྱོར་མ་བཞིས་ཀྱང་དགུག་གཞུག་བཅིང་དབང་དུ་བྱ་བའོ། །ཡང་ན་བཞི་པོ་དེའི་ཕྱག་རྒྱ་དང་སྔགས་སོ་སོར་བྱས་ཀྱང་འགལ་བ་མེད་དོ། །དེ་ནས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་སྒྲུབ་ཐབས་བཞིན་བྱ། རང་གི་ས་བོན་གྱི་འོད་ཀྱིས་དབང་བསྐུར་གྱི་ལྷ་སྤྱན་དྲངས་ཏེ། དབང་བསྐུར་བར་གསོལ་བ་གདབ། དབང་བསྐུར་ནས་ཆུའི་ལྷག་མ་ཡར་ལུད་པ་ལས། རྣམ་སྣང་གིས་དབུར་བརྒྱན་པར་བསམ། ཡང་དེ་ལ་མཆོད་ཅིང་བསྟོད་དེ་བསྲེག་རྫས་དབུལ་བར་བྱའོ། །ཞལ་ལས་འོངས་པ་ཅུང་ཟད་བརྗོད་ན། བློ་ཁོབས་ཆུང་བས་སྔར་མེ་སྦར་བའི་སྐབས་སུ་ཏིང་ངེ་འཛིན་གྱིས་སྦར་ལ། མཆོད་བསྟོད་ཡན་ཆད་ཚར་ནས་དངོས་སུ་མེ་སྦར་ལ་བྱོན་ཟན་དབུལ་བ་ནས་བརྩམས་ཏེ་ཆོ་གས་ཐམས་ཅད་དབུལ་བར་བྱའོ། །དེ་ནས་མེ་ལྷའི་ཞལ་ཅུང་ཟད་གདངས་པར་བསམས་ལ། དེའི་ལྕེ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་རྃ། དགང་བླུགས་ཀྱི་གཟར་བུའི་ཁ་ལ་ཡང་རྃ་བསམ་སྟེ། གཟར་བུ་དང་གཉིས་སླར་བླངས་ལ། རིག་བྱེད་འདོན་པ་ལྟར་ཙོག་པུར་འདུག་སྟེ། པུས་མོ་གཉིས་ཀྱི་བར་དུ་གྲུ་མོ་ཚུད་པར་བྱས་ལ། ཨོཾ་ཨགྣ་ཡེ་སྭཱ་ཧཱ། ཞེས་བརྗོད་ཅིང་བླུགས་གཟར་ལྔའམ་བདུན་གྱིས་དགང་གཟར་བཀང་ལ། ཨོཾ་ཨགྣ་ཡེ་ཨཱ་དི་པྱཱ་དེ་པྱ་མ་ཧཱ་ཤྲི་ཡེ་ཧ་བྱ་ཀ་བྱ་བཱ་ཧ་ནཱ་ཡ་སྭཱ་ཧཱ། ཞེས་བརྗོད་དེ་དགང་བླུགས་གཉིས་ཁ་སྦྱར་ལ་མེ་ལྷའི་ཞལ་དུ་ཕུལ་བར་བསམ། དེ་ལྟ་བུའི་དགང་བླུགས་ལན་གསུམ་དབུལ་ལོ། །དེ་ནས་བར་དེར་མེ་ལྟས་བརྟག་སྟེ། རྒྱས་པར་ནི་སཾ་པུ་ཊ་ལས་འབྱུང་བ་བཞིན། རྟོགས་སླ་བའི་ཕྱིར་ཚིགས་སུ་བཅད་དེ་བརྗོད་ན། གདུགས་དང་རྒྱལ་མཚན་རྡོ་རྗེ་དང༌། །བུམ་པ་པདྨ་ལྕགས་ཀྱུ་དང༌། །སྐུ་གསུམ་པ་དང་གཡས་སུ་འཁྱིལ། །རྩེ་གསུམ་པ་སྟེ་དབྱིབས་མཆོག་ཡིན། །རྩེ་གཉིས་རྩེ་གཅིག་འབྲིང་དང་ཐ། །སྣུམ་དང་གཙང་དང་དབང་པོའི་གཞུ། །སྔོན་དམར་དང་ནི་སེར་དང་དཀར། །བཻ་ཌཱུརྻ་རྣམས་མདོག་བཟང་ཡིན། །ངང་པའི་སྒྲ་དང་བུང་བའི་སྒྲ། །ཟབ་ཅིང་སྙན་པའི་སྒྲ་ནི་བཟང༌། །མདོར་ན་ཡིད་དུ་འོང་བའི་སྒྲ། །དབྱིབས་མདོག་དྲི་དང་སྒྲ་རྣམས་བཟང༌། །མེ་སྟག་འཕྲོ་དང་དུ་བ་ཆེ། །རིམ་གྱིས་འབར་ཞིང་མེ་ལྕེ་ཆད། །མྱུར་དུ་འབར་ཞིང་གཟི་བརྗེད་ཆུང༌། །ཚ་ཞིང་དམར་ནག་དྲག་ཏུ་འབར། །རྩེ་གསུམ་ཞིབ་མ་འདྲ་བ་དང༌། །བ་ལང་མདོག་འདྲ་དྲི་མི་ཞིམ། །མདོར་ན་ཡིད་དུ་མི་འོང་བ། །མཚན་ངན་རྣམས་ཀྱང་བརྟག་པར་བྱ། །ཞི་ལ་དཀར་དང་རྒྱས་ལ་སེར། །དབང་ལ་དམར་པོ་དྲག་ལ་ནག འདི་དག་རང་རང་རྟགས་སུ་བཟུང༌། །འཇམ་པོ་གསུམ་ལ་འཇམ་པའོ། །རྟགས་རྣམས་ཤིས་པར་བཤད་པ་སྟེ། །ཐ་མའི་ལས་ལ་ངན་པར་བསྔགས། །རང་རང་རྟགས་དང་མི་མཐུན་ན། །བགེགས་དང་བཅས་པར་ཤེས་བྱ་སྟེ། །བདུད་རྩི་འཁྱིལ་པ་ལ་སོགས་པའི། །ཁྲོ་བོས་བགེགས་རྣམས་ཞི་བར་བྱ། །དེ་དག་མདོར་བསྡུ་ན། ཁ་དོག་དཀར་ཞིང་སྣུམ་པ་དང༌། སྒྲ་ཅུང་ཟད་དང་བཅས་པ། དུ་བ་ཆུང་བ་ན་ཞི་བའི་ལས་ལ་དགེའོ། །དུ་བ་ཆ་བ་དང་མེ་སྟག་རབ་ཏུ་འཕྲོ་བ་ནི་བགེགས་དང་བཅས་པ་ཡིན་པས་ཧཱུྃ་ཞེས་བརྗོད་དེ། བསང་ཆུས་ཕྱོགས་ཀུན་ཏུ་གཏོར་ཏེ་བགེགས་ཞི་བར་བྱའོ། །དེ་ནས་མེ་ཏོག་ལ་སོགས་པས་མཆོད་པ་བྱས་ལ་བསྲེག་རྫས་རྣམས་དབུལ་བར་བྱ་སྟེ། དང་པོ་ཡམ་ཤིང༌། དེ་ནས་མར། ཏིལ། འབྲས། ཟས་མཆོག སོ་བ། སྲན་མ། གྲོ། དཱུར་བ། ཀུ་ཤ གཞན་ཡང་ཡམ་ཤིང༌། ཨུ་དུམྦཱ་ར་ལ་སོགས་པ་དང༌། གཞུང་གཞན་ནས་བཤད་པའི་སེམས་ཅན་མེད་པ། ཤུག་པའམ། ལྕང་མའི་རྩ་བ་ལ་སོགས་པ་བྱང་ཆུབ་ཀྱི་ཤིང་དུ་མོས་པ་བྱ་སྟེ། ཨོཾ་བོ་དྷི་བྲྀཀྵ་ཡ་སྭཱ་ཧཱ། ཞེས་བརྗོད་ཅིང་དབུལ་ལོ། །མར་གྱི་སྔགས་ནི་སྔར་བསྟན་པ་ཉིད་དོ། །ཏིལ་གྱི་སྔགས་རྡོ་རྗེ་མཁའ་འགྲོ་ལས་འབྱུང་བ་ནི། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། རྡོ་རྗེ་གུར་ལས། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་བཛྲ་སཏྭ་སྱ་སརྦ་པཱ་པཾ་ད་ཧ་ན་བཛྲ་སྭཱ་ཧཱ། ཞེས་པས་ཏིལ་གྱིའོ། །ཨོཾ་བཛྲ་པུཥྚཱ་ཡ་སྭཱ་ཧཱ། ཞེས་པ་འབྲས་མ་ཆག་པའི་འོ། །ཨོཾ་སརྦ་སཾ་པ་དེ་སྭཱ་ཧཱ། ཞོ་དང་ཟས་མཆོག་གིའོ། །ཨོཾ་བཛྲ་བི་ཛཱ་ཡ་སྭཱ་ཧཱ། འབྲས་སོ་བའི་འོ། །ཨོཾ་མ་ཧཱ་བེ་གཱ་ཡ་སྭཱ་ཧཱ། ནས་ཀྱིའོ། །ཨོཾ་མ་ཧཱ་བ་ལཱ་ཡ་སྭཱ་ཧཱ། མོན་སྲན་གྲེའུའི་འོ། །ཨོཾ་བཛྲ་གྷསྨ་རཱ་ཡ་སྭཱ་ཧཱ། གྲོའི་འོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་བའི་འོ། །ཨོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཀུ་ཤའི་འོ། །དེ་ལྟར་ཞུ་བའི་རྫས་རྣམས་ནི་གཟར་བུས་བླངས་ཏེ་ཞལ་དུ་ཕུལ་བར་བསམ་མོ། །ཁྱད་པར་དུ་ཞོ་འབུལ་ན་གཟར་བུས་བླངས་ཏེ་དགང་གཟར་གྱི་སྟེང་དུ་བཞག་ལ་འབུལ། གོང་བུའི་རྫས་རྣམས་ནི་ལག་པ་གཡོན་པས་བཟུང་ལ་གཡས་པས་བླངས་ཏེ་ཕྱག་ཏུ་ཕུལ་བར་བསམ། བསྲེག་རྫས་དེ་རེ་རེ་ལ་བདུན་ནམ་ཉི་ཤུ་རྩ་གཅིག་གིས་འབུལ་བ་ཡིན་ཏེ། དེ་རེ་རེ་ལ་རྫོགས་པ་དང༌། ཆེ་གེ་མོའམ། གང་གི་དོན་དུ་བྱ་བའི་སྡིག་པ་དང་སྒྲིབ་པ་ལ་སོགས་པའི་མིང་ནས་ཕྱུང་སྟེ། ཤཱནྟིཾ་ཀུ་རུ་སྭཱ་ཧཱ། ཞེས་བྱ་བ་བཏགས་ཏེ། དཔེར་ན་ནས་འབུལ་བའི་དུས་སུ་ཨོཾ་མ་ཧཱ་བེ་གཱ་ཡ་སྭཱ་ཧཱ། ཞེས་བདུན་གྱིས་ཕུལ་ལ། ཨོཾ་མ་ཧཱ་བེ་གཱ་ཡ་ཆེ་གེ་མོའི་ལས་ཀྱི་སྒྲིབ་པ་ཐམས་ཅད་ཤཱནྟིཾ་ཀུ་རུ་སྭཱ་ཧཱ། དེས་འགྲེའོ། །དེ་ལྟར་མེ་ལྷ་ལ་བསྲེག་རྫས་བདུན་ནམ། ཉི་ཤུ་རྩ་རེས་ཕུལ་ལ། ཨོཾ་ཨགྣ་ཡེ་བཛྲ་པུཥྤེ་ཨཱཿཧཱུྃ། ཞེས་པས་མེ་ཏོག་དབུལ་ལོ། །དེ་བཞིན་དུ་རོལ་མོའི་བར་དུ་ཕུལ་ལ། ནང་བདུད་རྩི་དང་ལྷ་མོ་བརྒྱད་ཀྱིས་མཆོད་ལ། བསྟོད་པ་བྱ་སྟེ། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཌཱ་ཀིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་སྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཅེས་པས་བསྟོད་ལ་བསང་གཏོར་དང་ཞབས་བསིལ་ཕུལ་ཏེ། ཨོཾ་བཛྲ་ཛྭཱ་ལ་རཾ། ཞེས་པས་མེ་ལྷ་འབར་བའི་རྣམ་པར་གྱུར་པར་བསམ། ཡང་ན་མེ་ལྷའི་ལྟོ་བ་ཤིན་ཏུ་ཡངས་པ་དངས་ཤིང་ཐོགས་པ་མེད་པར་བསམས་ཏེ། འཇིག་རྟེན་པའི་མེ་ལྷ་མཆོད་པའི་ཆོ་གའོ། །དྲུག་པ་འདས་པའི་མེ་ལྷ་མཆོད་པ་ནི་ཐབ་ཀྱི་དབུས་སམ། མེ་ལྷའི་ཐུགས་ཀར་པྃ་ལས་པདྨ་རྃ་ལས་ཉི་མའི་སྟེང་དུ་ཧཱུྃ་ལས་སྲུང་བའི་འཁོར་ལོ་ཇི་ལྟ་བ་བཞིན་བསྐྱེད། གཞལ་ཡས་ཁང་བསྐྱེད་པའམ། ཡང་ན་གཞལ་ཡས་ཁང་མ་བསྐྱེད་ཀྱང་ཆོག་གསུང༌། དེའི་ནང་དུ་ལྷ་རྣམས་མངོན་པར་བྱང་ཆུབ་པ་ལྔ་ལས་བསྐྱེད་པའམ། རྡོ་རྗེ་ཆོ་ག་ཡན་ལག་གསུམ་མམ། ཡང་ན་སྒྲུབ་པའི་མཎྜལ་གྱི་སྐབས་བཞིན་སྙིང་པོ་ཚིག་ཙམ་གྱིས་ལྷ་དགུ་བསྐྱེད་དེ། དེ་ལ་ཡེ་ཤེས་པ་དགུག་པ་ནི། དམིགས་མེད་མཁའ་ལྟར་དག་ཅིང་ཁྱབ་པའི་སྐུ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང༌། །ཐབས་དང་ཤེས་རབ་གཟུགས་བརྙན་སྐུར་སྟོན་པ། །བཅོམ་ལྡན་འཁོར་བཅས་འདིར་ནི་གཤེགས་སུ་གསོལ། །མ་ལུས་སེམས་ཅན་ཀུན་གྱི་དོན་སླད་དུ། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པ། །བཅོམ་ལྡན་འཁོར་བཅས་འདིར་ནི་གཤེགས་སུ་གསོལ། །ཨོཾ་ཨེ་ཧྱེ་ཧི་བྷ་ག་ཝཱན་ས་མ་ཡ་ཨཱརྩ་མ་ན། ཨརྒྷཾ་པཱ་དྱཾ་པྲ་ཏཱིཙྪ་པཱུ་ཛ་ནོ་ཏ་པ་ཙརྻ་པྲ་སིདྡྷི་མེ། ཞེས་བྱ་བས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་དང༌། དབང་བསྐུར་ཏེ་རྒྱས་གདབ་པའི་བར་དུ། སྔར་སྒྲུབ་ཐབས་ཀྱི་སྐབས་ལྟར་བྱའོ། །དབང་བསྐུར་གྱི་དཀྱིལ་འཁོར་ཡོད་པའམ། རབ་གནས་ཀྱི་དཀྱིལ་འཁོར་ལྟ་བུ་ལ་སྦྱིན་སྲེག་འབུལ་ན་སྐྱེད་པའི་ཆོ་ག་མི་དགོས་ཏེ། ཐབ་ཀྱི་དབུས་སུ་མེ་ཏོག་དགུ་ཕུལ་ཏེ་ལྷར་བསམ་པས་ཆོག་གོ །དེ་ནས་ཐབ་དང་ཡོ་བྱད་ལ་ཧཱུྃ་བཟླས་ཤིང་དྲི་ཞིམ་པོའི་ཆུས་གཏོར་ཏེ་བསངས་ལ། མི་གཙང་བ་དང་ཉེས་པ་ཐམས་ཅད་དག་པར་བསམ་ཞིང་བགེགས་ཐམས་ཅད་བྲལ་བར་བསམ་མོ། །དེ་ནས་ལྷ་རྣམས་ཀྱི་ཞལ་ཅུང་ཟད་གདངས་པར་བསམས་ཏེ། ཨོཾ་དེ་ཝ་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་པ་མར་ལ་བསྔགས་ཏེ། ཨོཾ་ཨགྣ་ཡེ་སྭཱ་ཧཱ། ཞེས་པ་ལན་བདུན་གྱིས་བླུགས་གཟར་གྱིས་མར་བཅུས་ནས། དགང་གཟར་བཀང་ལ། ཨོཾ་ཨགྣ་ཡེ་ཨཱ་དི་པྱཱ་ཨཱ་དི་པྱ་བི་ཤུདྡྷེ་མ་ཧཱ་ཤྲཱི་ཡེ་ཧ་བྱ་ཀ་བྱ་བཱ་ཧ་ནཱ་ཡ། ཆེ་གེ་མོ་ཞེས་བྱ་བའི་སྡིག་པ་སརྦ་པཱ་པཾ་ད་ཧ་ན་ཤཱནྟིཾ་ཀུ་རུ་སྭཱ་ཧཱ། ཞེས་བརྗོད་དེ། གཟར་བུ་ཁ་སྦྱར་ལ་དབུས་སུ་འབུལ་ཏེ། ལྷ་ཐམས་ཅད་ཀྱི་ཞལ་དུ་ཕུལ་བར་བསམས་ཏེ། དེ་ལྟ་བུའི་དགང་བླུགས་གསུམ་མམ་བདུན་ཕུལ་ལ་ཕྱི་ནང་གི་མཆོད་པ་དང༌། བསྟོད་པའི་མཆོད་པའི་བར་དུ་ཐུན་མཚམས་ཀྱི་བྱ་བ་ལྟར་དབུལ་ལོ། །དེ་ནས་ཡམ་ཤིང་ནས་བརྩམས་ཏེ་བསྲེག་རྫས་རྣམས་བརྒྱ་རྩ་བརྒྱད་དམ། སྟོང་རྩ་བརྒྱད་ལ་སོགས་པ་དབུལ་སྒྲུབ་གཡོག་པ་གཅིག་གིས་གྲངས་གཅིག་ཅེས་པ་ལ་སོགས་པས་འཛིན་དུ་བཅུག་ལ། སྔར་བཤད་པའི་སྔགས་ཀྱིས་དབུལ་ཏེ། དེ་ཡང་གྲངས་བདུན་བདུན་གྱི་མཇུག་ཏུ་ཨོཾ་སརྦ་པཱ་པཾ་ད་ཧ་ན་ཤཱནྟིཾ་ཀུ་རུ་སྭཱ་ཧཱ། ཞེས་མཐའ་རྟེན་སྤེལ་ཞིང་དབུལ། དེ་ལ་ཡམ་ཤིང་ནི་འོད་འབར་བ་ལ་དབུལ། ཞུ་བའི་རྫས་རྣམས་ནི་ལྷ་རྣམས་ཀྱི་ཞལ་དུ་སིབ་སིབ་གསོལ་བར་བསམ་ཞིང་དབུལ། གོང་བུའི་རྫས་རྣམས་ནི་ཕྱག་ཏུའོ། །ཞུ་བའི་རྫས་རྣམས་གཟར་བུས་དབུལ། གོང་བུའི་རྫས་རྣམས་རང་གི་ལག་པ་གཡོན་པས་བཟུང་སྟེ། གཡས་པའི་མཐེ་བོང་དང་སྲིན་ལག་གིས་བླངས་ཏེ་འོག་ནས་བསྐོར་ཞིང་དབུལ། ཡང་སྐབས་སུ་མར་གྱི་དགང་བླུགས་གསུམ་གསུམ་ཙམ་དབུལ། དགང་བླུགས་ཀྱིས་མི་དབུལ་བའི་དུས་སུ་དགང་བླུགས་རྡོ་རྗེ་དང་དྲིལ་བུའི་བར་དུ་ཁ་སྦྱར་ལ་གཞག་གོ །སོ་སོར་བཞག་ན་བར་ཆད་ཀྱི་རྒྱུ་ཡིན་གསུང་ངོ༌། །བསྲེག་རྫས་རྫོགས་པ་དང༌། ཡང་མར་གྱི་དགང་བླུགས་གསུམ་དབུལ། ཕྱི་ནང་གི་མཆོད་པ་རྒྱས་པས་མཆོད་ལ་བསྟོད་པ་བྱ། གཏོར་མ་བཏང་ལ་འདོད་པའི་དོན་ལ་གསོལ་བ་གདབ། མ་འབྱོར་པ་དང་ཉམས་པ་དང༌། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་གང༌། །དེ་དག་མགོན་པོས་བཟོད་པར་མཛོད། །བདག་ཅག་ལས་དང་པོ་པའི་རྟེན་གྱི་གང་ཟག་ཏུ་གྱུར་པས་སེམས་ཀྱི་སྒྲིབ་པ་དང་ལྡན་པའི་དབང་གིས། ཏིང་ངེ་འཛིན་མི་གསལ་བ་དང༌། བྱིང་བ་དང་རྒོད་པའི་དབང་དུ་གྱུར་པ་ཐམས་ཅད་བཟོད་པར་མཛད་དུ་གསོལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཞེས་པའི་རྗེས་སུ་ཡི་གེ་བརྒྱ་པ་ཅི་ནུས་བཟླས་ལ། ཨོཾ་ཨཱཿཧཱུྃ་བཛྲ་མུཿ ཞེས་པས་གཤེགས་སུ་གསོལ། དམ་ཚིག་པ་བདག་ལ་བསྡུའོ། །དེ་དག་ནི་དངོས་གཞིའི་ཆོ་གའོ། །དེ་ནས་མཇུག་གི་ཆོ་ག་ནི། བྱ་བ་དྲུག་གི་དང་པོ་འཇིག་རྟེན་པའི་མེ་ལྷ་མཆོད་པ་ནི། ཐབ་ཁུང་དུ་མེ་ལྷ་གསལ་བཏབ་ལ། བསྲེག་རྫས་ཀྱི་ལྷག་མ་བདུན་ནམ་ཉེར་གཅིག་ལ་སོགས་པ་ཅི་ཙམ་འབྱོར་པ་གོང་གི་མེ་ལྷ་མཆོད་པ་ལྟར་འབུལ་ལོ། །མཐར་མར་གྱི་དགང་བླུགས་ལན་གསུམ་དུ་བཀང་བའི་སྦྱིན་སྲེག་ཏུ་དབུལ། དེ་ཡང་ཡོན་བདག་ལ་སོགས་པ་གཞན་གྱི་དོན་དུ་བྱེད་ན། དེའི་ལག་པ་གཡས་པའི་མཐེ་བོང༌། བདག་གི་གཡོན་པས་དགང་བླུགས་དང་བཅས་པས་བཟུང་ལ། ཡོན་བདག་ཆེ་གེ་མོ་ཞེས་བྱ་བའི་ནད་དང༌། གདོན་དང༌། བཀྲ་མི་ཤིས་པ་དང༌། བྱུར་དང་སྐལ་བ་ངན་པ་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་བརྗོད་དེ་གང་བའི་སྦྱིན་སྲེག་གསུམ་དབུལ་ལོ། །རང་གི་དོན་དུ་བྱེད་ནའང་སྤེལ་ཚིག་དེ་བཞིན་དུ་བརྗོད་དེ་དབུལ་བར་བྱའོ། །གཉིས་པ་མེ་ལྷ་འཁོར་དང་བཅས་པ་ལ། དཀར་གཏོར་གཅིག་ཨ་ཀཱ་རོས་བྱིན་ཏེ། མེ་ལྷ་ཇི་ལྟར་འབྱོར་པས་མཆོད་ལ་བསྟོད་པ་བྱ་སྟེ། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཌཱ་ཀིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་སྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཚངས་དབང་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་བསྐྱབ་པའི་ཕྱིར། །ཐུགས་རྗེའི་དབང་གིས་སྐུར་སྤྲུལ་པ། །རིག་སྔགས་གྲུབ་པའི་དྲང་སྲོང་ཚུལ། །ཉོན་མོངས་སྲེག་པའི་ཤེས་རབ་ཅན། །བསྐལ་པའི་མེ་ལྟར་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱི་སྤྲུལ་པའི་ཐེག་པ་བཅིབས། །རིག་སྔགས་གསུང་གི་བགྲང་ཕྲེང་འཛིན། །བདུད་རྩིའི་བཅུད་ལྡན་གུནྡྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཞེས་པས་བསྟོད་དེ། གསུམ་པ་ཇི་ལྟར་འདོད་པའི་དོན་ལ་གསོལ་བ་གདབ། བཞི་པ་གཤེགས་སུ་གསོལ་བ་ནི། དེ་ལ་བསང་གཏོར་དང་འཐོར་འཐུང་ཕུལ་ལ། བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབ་ཀྱིས་གཤེགས། །དེ་བཞིན་དུས་སུ་སླར་གཤེགས་ཏེ། །བདག་གི་དངོས་གྲུབ་ཐམས་ཅད་སྒྲུབས། །ཞེས་པ་དང༌། ཨོཾ་ཨགྣ་ཡེ་གཙྪ། ཞེས་བརྗོད་དེ། སྤྱན་དྲངས་པའི་ཕྱག་རྒྱ་ལས་མཛུབ་མོ་དང་ལག་པ་ཕྱིར་བསྐྱེད་དེ། མེ་ལྷ་སྤྱན་དྲངས་པ་གཤེགས་སུ་གསོལ་ལོ། །དམ་ཚིག་པ་བདག་ལ་བསྡུའོ། །ལྔ་པ་ཆོ་ག་ལྷག་ཆད་ཁ་བསྐང་བའི་ཕྱིར་ཡི་གེ་བརྒྱ་པ་ཅི་ནུས་པ་བཟླའོ། །དྲུག་པ་ལས་ཀྱི་རྗེས་ནི་དངོས་གྲུབ་འདོད་པ་ཡིན་ན་ཐལ་བ་དེ་མེ་མ་ཤིའི་བར་དུ་མི་བསྒུལ། མེ་ཤི་ཡང་གཞན་ལ་རེག་ཏུ་མི་གཞུག་པར་རང་གིས་ཕྱགས་ཏེ་དབེན་པར་བསྐྱལ་ལོ། །དངོས་གྲུབ་མི་བསྒྲུབ་ན་འཕྲལ་ལ་ཕྱགས་ལ་གནས་དབེན་པར་གཞག ཐབ་དང་ཉེ་འཁོར་ཐམས་ཅད་བའི་ལྕི་བ་དང་དྲི་བཟང་པོའི་ཆུས་བྱུག་པར་བྱའོ། །རྗེས་ཀྱི་བྱ་བའོ། །ཆོ་ག་འདི་ནི་དཔལ་ཀྱེའི་རྡོ་རྗེའི་བརྟག་པ་ཕྱི་མའི་རབ་གནས་ཀྱི་རྗེས་ལ་སྦྱིན་སྲེག་གསུངས་པའི་དོན། ཞི་བའི་སྦྱིན་སྲེག་གི་ལག་ལེན་ཙམ་བྲིས་པ་ཡིན་གྱི། རྒྱས་པ་ལ་སོགས་པ་གཞན་ནི་འོག་ཏུ་མདོར་བསྡུས་ཏེ་རྒྱས་པར་བཤད་པ་ལས་ཤེས་པར་བྱའོ། །ཆོ་ག་འདི་ནི་སྔགས་ཀྱི་ལྷག་ཆད་ཁ་བསྐང་བ་དང༌། སྔར་མ་གྲུབ་པ་འགྲུབ་པར་བྱེད་པ་དང༌། གྲུབ་པའི་འབྲས་བུ་མྱུར་དུ་འབྱིན་པར་བྱེད་པ་ཡིན་པས་རྣལ་འབྱོར་པས་དུས་དང་གནས་སྐབས་ཐམས་ཅད་དུ་ཡང་བརྩོན་པར་བྱའོ། །ཞི་བའི་སྦྱིན་སྲེག་གི་ཁ་ལྟ་ཕྱོགས་ཀྱིས་ལས་ཐམས་ཅད་འགྲུབ་སྟེ། རང་འདོད་ལྷ་ཡི་རྣལ་འབྱོར་གྱིས། །ལས་བསྒྲུབ་པ་ཡི་སྦྱིན་སྲེག་སྟེ། །ཚད་དང་དབྱིབས་དང་ཁ་དོག་དང༌། །ཞི་བ་དང་མཐུན་ཤར་དུ་བལྟ། །ཞེས་གསུངས་སོ། །སྦྱིན་སྲེག་གིས་ནི་ལྷ་རྣམས་ཚིམ། །ཚིམ་པར་གྱུར་ནས་དངོས་གྲུབ་སྟེར། །གསང་སྔགས་ལྷག་ཆད་གང་ཡོད་པ། །ཐམས་ཅད་སྦྱིན་སྲེག་དག་གིས་བསྐང༌། །དེ་ཕྱིར་རྡོ་རྗེ་མཁའ་འགྲོ་ཡིས། །སྦྱིན་སྲེག་རབ་ཏུ་བསྔགས་པར་མཛད། །ཅེས་གསུངས་སོ། །ཞི་བ་འབའ་ཞིག་གི་ཆོ་ག་ཞིབ་ཏུ་བསྟན་ཅིང་རྣམ་གཞག་མདོར་བསྡུས་པ། རྡོ་རྗེ་འཛིན་པ་བསོད་ནམས་རྩེ་མོས་སྦྱར་བ་འདི་ཡོངས་སུ་རྫོགས་སོ། །འདིས་བསྟན་པ་དང་སེམས་ཅན་ལ་ཕན་ཐོགས་པར་གྱུར་ཅིག།  ༄༅། །ལས་བཞིའི་སྦྱིན་སྲེག་བཞུགས།།  ༄༅། །དཔལ་ཀྱེའི་རྡོ་རྗེ་ལ་ཕྱག་འཚལ་ལོ། །དཔལ་ཀྱེའི་རྡོ་རྗེའི་བསྙེན་པ་ཡོངས་སུ་རྫོགས་པའི་རྣལ་འབྱོར་པས། གསང་སྔགས་ཀྱི་འབྲས་བུ་དབྱུང་བར་བྱ་བའི་ཕྱིར་རམ། དཀྱིལ་འཁོར་དང་རབ་གནས་ལ་སོགས་པའི་དོན་གྱི་ཕྱིར་རམ། ཕྲིན་ལས་བསྒྲུབ་པར་བྱ་བའི་ཕྱིར་སྦྱིན་སྲེག་གི་ཆོ་ག་བརྗོད་པར་བྱའོ། །དེ་ལ་རབ་གནས་ལ་སོགས་རྗེས་ལ་ནི་ཞེས་བྱ་བ་ལ་སོགས་པ་ཚིགས་སུ་བཅད་པ་གཉིས་ཀྱིས་གཞུང་སྔ་མ་དང་མཚམས་སྦྱར་བ་སྟེ། དགོས་པ་དང༌། སྦྱིན་སྲེག་དབྱེ་བ་དང་བཅས་ཏེ་བཤད་པར་དམ་བཅའ་བའོ། །སྔགས་དང་ཞེས་བྱ་བ་ལ་སོགས་པས་ཆོ་ག་སྟོན་ཏོ། །དེའང་ཆོ་གའི་དབྱེ་བ་བསམ་གྱིས་མི་ཁྱབ་པ་ཅིག་གནས་ཀྱང༌། མདོར་བསྡུ་ན་སྦྱོར་བ་དང༌། དངོས་གཞི་དང༌། མཇུག་ཏུ་བྱ་བའི་ཆོ་གར་འདུས་པ་ཡིན་ནོ། །དང་པོ་ལ་བདུན་ཏེ། ཐབ་དང༌། ཕྱོགས་དང༌། དུས་དང༌། བུད་ཤིང་དང༌། མེ་དང༌། བསྲེག་རྫས་དང༌། མཆོད་རྫས་ཀྱི་བཤམ་ཐབས་དང༌། སྒྲུབ་པ་པོའོ། །ཐབ་ལའང་དྲུག་སྟེ། སའི་ཆོ་ག་དང༌། དབྱིབས་དང༌། ཚད་དང༌། མཚན་མ་དང༌། མུ་རན་དང༌། ཁ་དོག་གོ །དེ་ལ་སའི་ཆོ་ག་ནི། སྔར་དཀྱིལ་འཁོར་དང་རྗེས་སུ་འབྲེལ་པར་སའི་ཆོ་ག་བྱས་པ་ཡིན་ན་འདིར་ལོགས་སུ་བྱ་མི་དགོས་ལ། སྔར་མ་བྱས་པ་ཡིན་ན་འདིར་མདོར་བསྡུས་པ་ཙམ་གྱི་ཆོ་ག་ནི། སྔགས་དང་ཕྱག་རྒྱར་ཞེས་བྱ་བ་ལ་སོགས་པ་སྟེ། རང་ལྷའི་ང་རྒྱལ་དང་ལྡན་པས་ལག་པ་གཡས་པ་རྡོ་རྗེ་རྩེ་གསུམ་པར་བསྒོམས་ལ་ས་ལ་བཞག་ལ་སའི་སྐྱོན་ཐམས་ཅད་དག་པར་བསྒོམས་ལ། གཞུང་ནས་བྱུང་བའི་སྔགས་བརྗོད་དོ། །དེ་ལྟར་སྦྱངས་པའི་སར་ཐབ་ཀྱི་དབྱིབས་དང་ཚད་ལ་སོགས་པ་དང་ལྡན་པས་ཐབ་བྱ་སྟེ། དེ་ལ་གཉིས་ཏེ། ལས་ཐམས་ཅད་པའི་ཐབ་དང༌། ལས་སོ་སོ་བའི་ཐབ་བོ། །དང་པོ་ནི། ཐབ་ཁུང་རྒྱ་རུ་ཞེས་བྱ་བ་ལ་སོགས་པ་སྟེ། ཞི་བའི་ཐབ་ཁུང་གི་དབྱིབས་དང་ཚད་དང་མཐུན་པར་བྱ་བ་སྟེ། དེའི་ཁ་དོག་དང་མཚན་མ་ལ་སོགས་པ་ལ་ཁྱད་པར་ཡོད་དེ། ཐབ་ཁུང་ཁྲུ་ཕྱེད་བརྐོས་པའི་ནང་དཀར་པོར་བྱས་ལ། དེའི་ཕྱིར་སོར་བཞི་བསྐྱེད་པ་ནི་གཞི་ཞེས་བྱ་སྟེ། དེ་ལ་པདྨའི་གེ་སར་སེར་པོར་བྱའོ། །དེ་ནས་དཔངས་སུ་སོར་བཞི་བསྟོད་པ་ནི་ཁ་ཁྱེར་ཏེ། དེ་ལ་པདྨ་དམར་པོ་བྱའོ། །དེའི་སྟེང་ཡང་སོར་བཞི་པ་སྟེ་དེ་ལ་རྡོ་རྗེའི་ཕྲེང་བ་སྔོན་པོ་བྱ་སྟེ། ཕྱི་རོལ་དུ་རྡོ་རྗེ་ཕྲེང་བ་ཞེས་བྱ་བའོ། །དེའི་ནང་དུ་པདྨ་འདབ་མ་བརྒྱད་པ་ལ་དབུས་སུ་རྡོ་རྗེ་ཞིང་དུ་སོར་གཅིག་པ་ཆུར་སོར་བརྒྱད་པ་ཁ་དོག་སྔོན་པོ་བྱ། དེའི་ཕྱོགས་བཞིར་འཁོར་ལོ་ལ་སོགས་པ་བཞི་པོ་སོ་སོའི་ཁ་དོག་དང་མཐུན་པ་བྱ། རྡོ་རྗེ་ཕྲེང་བའི་ཕྱི་རོལ་གྲུ་བཞི་དཀར་པོར་བྱས་ལ་དེའི་གྲ་བཞིར་རྡོ་རྗེ་ཕྱེད་པ་བྱ་བ་ནི་མན་ངག་གོ །ཐབ་འདིར་ལས་ཐམས་ཅད་བསྒྲུབ་ཏུ་རུང་བས་ན་ལས་ཐམས་ཅད་པའི་ཐབ་ཅེས་བྱའོ། །ལས་སོ་སོ་བའི་ཐབ་ལ་ནི། ཞི་བ་རྡུལ་ཚོན་དཀར་པོ་སྟེ། །ཞེས་བྱ་བ་ལ་སོགས་པ་སྟེ་འདི་ནི་སྤྱི་དང་མཐུན་པས་ན་རྒྱས་པར་མ་སྤྲོས་སོ། ཕྱོགས་ནི་སྔགས་པས་བྱང་དུ་མངོན་པར་བལྟས་ལ་ཞེས་བྱ་བ་ལ་སོགས་པ་སྟེ། དཀྱིལ་འཁོར་ཆེན་པོ་དང་འབྲེལ་བའི་དབང་དུ་བྱས་ན། ཞི་བ་ལ་ཤར། རྒྱས་པ་ལ་ལྷོ། དབང་ལ་ནུབ། དྲག་པོ་ལ་བྱང་དུ་ཐབ་བྱ་སྟེ། དཀྱིལ་འཁོར་ལ་མངོན་པར་ཕྱོགས་པར་བྱས་པ་ན་དེ་དང་དེའི་ཕྱོགས་སུ་ཁ་བལྟ་བ་སྟེ། དྲག་པོ་ལ་ལྷོར་བལྟ་བ་ཞེས་བྱ་བ་ནི་དཀྱིལ་འཁོར་ལ་རྒྱབ་ཀྱིས་མི་ཕྱོགས་པར་བྱ་བའི་ཕྱིར་རོ། །སྤྱིར་ནི་ལས་འཇམ་པོ་གསུམ་ལ་བལྟ་ཕྱོགས་ལ་ངེས་པ་མེད་ལ། དྲག་པོ་ལ་ལྷོར་བལྟ་བ་ཞེས་བྱ་བ་ནི་ངེས་པའོ། །དཀྱིལ་འཁོར་དང་མ་འབྲེལ་བ་རྣམས་ལ་ནི་ཁ་ལྟ་ཕྱོགས་ཉིད་ཕྱོགས་ཡིན་ནོ། །ཞི་བ་ལ་དགོངས་མོ་ཞེས་བྱ་བ་ལ་སོགས་པ་ནི་དུས་ཡིན་ཏེ་གོ་སླའོ། །བུད་ཤིང་ནི་ཞི་བ་ལ་འོ་མ་ཅན་གྱི་ཤིང་དང་ནགས་ཀྱི་བ་ལང་གི་ལྕི་བ་ཞེས་བྱ་བ་ལ་སོགས་པ་དཔལ་སཾ་པུ་ཊ་དང་རྡོ་རྗེ་མཁའ་འགྲོ་ལ་སོགས་པ་དང་མཐུན་པར་ཤེས་པར་བྱའོ། །མེའི་ཁྱད་པར་ཡང་དེ་བཞིན་དུ་གོ་སླ་བར་བྱའོ། །བསྲེག་རྫས་དང་མཆོད་རྫས་ཀྱི་བཤམ་ཐབས་ནི། དེ་ལྟར་ཐབ་ཡོངས་སུ་རྫོགས་པ་དང༌། འོག་ཏུ་སྦྱར་ལ། སྦྱིན་སྲེག་ཡན་ལག་ལས་བྱུང་ཞིང༌། །ཐབ་བས་དམའ་བ་བརྩིགས། ཞེས་འབྱུང་བས་བུད་ཤིང་ལེགས་པར་བརྩིགས་ལ། སའི་ཕྱོགས་ཐམས་ཅད་སྐྱང་ནུལ་བྱ། དྲི་ཞིམ་པོའི་ཆུས་གཏོར། མེ་ཏོག་སིལ་མ་དགྲམ་མོ། །དེ་ནས་མཆོད་སྦྱིན་ཤིང་གི་ལྕུག་མ་ནི། རྩེ་མོ་ཞེས་བྱ་བ་ལ་སོགས་པ་ཇི་སྐད་བཤད་པའི་ཡམ་ཤིང་རྩེ་མོ་མར་དང་སྦྲང་རྩི་ལ་སྦགས་པའང་འཚོག་ཆས་བྱ། དེ་ལས་གཞན་པའི་བསྲེག་རྫས་རྣམས་ཀྱང་བསག་པར་བྱའོ། །དེ་ནས་འབྲུ་དང་ཡམ་ཤིང་ཉིད། །ཅེས་བྱ་བ་ལ་སོགས་པར་སྦྱར་ཏེ། བསྲེག་རྫས་རྣམས་ལ་དྲི་ཞིམ་པོའི་ཆུ། ཀུ་ཤའི་ཆུན་པོས་གཏོར་ཞིང༌། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཧཱུྃ་ཧཱུྃ་ཕཊ། ཅེས་བྱ་བས་བགེགས་ཐམས་ཅད་བསལ། དེ་ནས་གཡས་ཕྱོགས་ནས་ཡམ་ཤིང་དང༌། མར་དང༌། ཏིལ་དང༌། འབྲས་མ་ཆག་པ་དང༌། ཞོ་ལ་སོགས་པ་འོག་ནས་འབྱུང་བའི་སྔགས་ཀྱིས་གོ་རིམ་ལྟར་བཞག་ལ་མཐར་ཡང་མར་བཞག་ལ། དེ་ནས་རྡོ་རྗེ་ཁུ་ཚུར་གཉིས་བཅིངས་ལ་གུང་མོ་གཉིས་གཤིབས་པ་བརྐྱང་སྟེ། ཕྱག་རྒྱའི་ནང་དུ་ཨ་ལས་ཟླ་བའི་སྟེང་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་བསམ། དེའི་འོད་བྱུང་བས་རྫས་ཐམས་ཅད་ཀྱི་བགེགས་བསལ། སྐྱོན་སྦྱང་དྭངས་ཤིང་ཐོགས་པ་མེད་པ་ནམ་མཁའི་མཐས་ཀླས་པར་བསྒོམ་ཞིང༌། གཞུང་ནས་འབྱུང་བའི་སྔགས་རྣམས་བཟླས་སོ། །དེ་བཞིན་དུ་གཡོན་དུ་མཆོད་ཡོན་བཞི་དང༌། སྦྱར་བ་དང་ཉེ་རེག་གི་ཡོ་བྱད་ཐམས་ཅད་ཀྱང་སྔགས་ཀྱི་བྱིན་གྱིས་བརླབས་ཏེ་གཞག མེ་ཏོག་ལ་སོགས་པའང་བྱིན་གྱིས་བརླབས་ཏེ་གཡས་སུ་གཞག མདུན་དུ་བཟེད་ཞལ་གཉིས་ཀྱང་གཞག རྡོ་རྗེ་དྲིལ་བུ་གཉིས་ཀྱི་བར་དུ་གཟར་བུ་གཉིས་ཀྱང་གཞག་པར་བྱའོ། །ཇི་ལྟར་འབྱོར་པའི་གཏོར་མའང་བཤམས་ཏེ་གཡོན་གྱི་ཟུར་ཕྱོགས་སུ་བྱའོ། །མཆོད་ཡོན་ལ་སོགས་པའི་ཆོ་ག་ནི་འཇིག་རྟེན་དང་རྗེས་སུ་མཐུན་པར་ཁྱད་པར་དུའང་སྦྱིན་སྲེག་ལ་བསྔགས་པ་ཡིན་ནོ། །དེ་ནས་སྒྲུབ་པ་པོ་ནི། བསམ་པ་དང༌། རྒྱན་ཆ་དང་ཁ་ལྟ་ཕྱོགས་དང༌། འདུག་སྟངས་ཞེས་བྱ་བ་སྟེ། འདི་དག་ཀྱང་དཔལ་སཾ་པུ་ཊ་ལས་ཇི་ལྟར་འབྱུང་བ་བཞིན་དུ་ཤེས་པར་བྱའོ། །སྦྱོར་བའི་ཆོ་གའོ། །དེ་ནས་དངོས་གཞི་ལ་བཅུ་གཉིས་ཏེ། བདག་གི་རྣལ་འབྱོར་བྱ་བ་དང༌། ཐབ་དང་ཡོ་བྱད་བསང་ཞིང་སྦྱང་བ་དང༌། ཐབ་ཁུང་མངོན་པར་འདུ་བྱ་བ་དང༌། མེ་ལྷ་དམ་ཚིག་པ་བསྐྱེད་པ་དང༌། ཀུ་ཤ་དགྲམ་པ་དང༌། མེ་བཙལ་ཞིང་བསྒྲུབ་པ་དང༌། ཡེ་ཤེས་ཀྱི་མེ་ལྷ་དགུག་གཞུག་བྱ་བ་དང༌། ཡན་ལག་དྲུག་རྫོགས་པར་བྱ་བ་དང༌། འཇིག་རྟེན་པའི་མེ་ལྷ་མཆོད་པའི་ཆོ་ག་དང༌། འདས་པའི་མེ་ལྷ་མཆོད་པའི་ཆོ་ག་དང༌། སླར་ཡང་འཇིག་རྟེན་པ་འཁོར་དང་བཅས་པ་མཆོད་པའི་ཆོ་ག་དང༌། གཤེགས་སུ་གསོལ་བའི་བྱ་བའོ། །དང་པོ་ནི་ཏིང་ངེ་འཛིན་ཞེས་བྱ་བ་སྟེ། བདག་རང་ཁྲུས་བྱས་ལ་སྟན་བདེ་བ་ལ་ཇི་ལྟར་འདུག་པས་འདུག་ལ། ཡན་ལག་དྲུག་ཡོངས་སུ་རྫོགས་པར་བྱ། བཟླས་པ་ཅུང་ཟད་ཀྱང་བྱ། དཀྱིལ་འཁོར་བསྡུས་ལ་རང་ཕྱག་གཉིས་པའི་ང་རྒྱལ་གྱིས་འདུག་པའོ། །དེ་ནས་གཉིས་པ་ནི་བསང་ཆུ་ལས་ཀུ་ཤའི་ཆུན་པོས་བླངས་ལ་བདུད་རྩི་འཁྱིལ་བའི་སྔགས་བཟླས་ཤིང་ཐབ་དང་ཡོ་བྱད་ཐམས་ཅད་བསངས་ལ་བགེགས་བསལ་བར་བྱའོ། །དེ་ནས་རང་གི་མདུན་དུ་མེ་བཞག་ལ། ཡུངས་ཀར་ཁུ་ཚུར་གྱིས་བཟུང་ལ་སྡིག་པ་དང་བགེགས་ཐམས་ཅད་སྦྱང་བར་བསྒོམ་ཞིང༌། ཨོཾ་སརྦ་པཱ་པཾ་གྱི་སྔགས་བཟླ་ཞིང་ཡུངས་ཀར་མེ་ལ་བསྲེག་པ་ཅི་ནུས་བྱ། དེ་ནས་ཡང་མཐེ་བོང་གཉིས་ནང་དུ་བཀུག་པའི་སྙིམ་པའི་ཆུས་བསྐོར་ཞིང༌། ཨོཾ་ཧཱུྃ་ཌ་ཌི་ཏ་ཕཊ་ཀྱི་བཟླས་པ་བྱ་ཞིང་མེར་བླུགས་ལ་ལག་པ་གཉིས་མཉས་ཏེ་དྲི་ཞིམ་པོས་བྱུག་པར་བྱ་སྟེ་ཉེ་རེག་གི་ཆོ་གའོ། །དེ་ནས་ཡོ་བྱད་ཐམས་ཅད་དྭངས་ཤིང་ཐོགས་པ་མེད་པ་ཙམ་དུ་མོས་པ་བྱ། བྱིན་རླབས་རྒྱས་པ་ནི་སྔར་བྱས་ཟིན་ཏོ། །གསུམ་པ་ཐབ་ཁུང་མངོན་པར་འདུ་བྱ་བ་ནི། ཧཱུྃ་ལས་ཐབ་ཁུང་དྭངས་ཤིང་ཐོགས་པ་མེད་པ་ནམ་མཁའ་དང་མཉམ་པར་བསྐྱེད་དེ། དེའི་ནང་དུ་མེ་འབར་ཞིང་རབ་ཏུ་འབར་བའི་རྣམ་པ་ཅན་བསྐྱེད་པ་ནི། མེ་སྦར་ལ་ཞེས་བྱ་བའོ། །བཞི་པ་ནི་མེའི་དབུས་སུ་རྃ་ལས་བགྲང་ཕྲེང་རྃ་གྱིས་མཚན་པ་དེ་ལས་འོད་འཕྲོས་བསྡུས་གཅིག་ཏུ་གྱུར་པ་ལས། སྤྱན་གསུམ་ཞལ་བཞི་ཕྱག་བཞི་ལྷ། །ཞེས་བྱ་བ་ལ་སོགས་པའི་མཚན་ཉིད་ཅན་ལས་དང་རྗེས་སུ་མཐུན་པའི་ཁ་དོག་ཅན་བསྐྱེད་ལ། དེ་ལ་ཡིད་ཀྱིས་མར་གྱི་བསྲེག་བླུགས་གསུམ་དབུལ་བར་བྱའོ། །དེ་ནས་ཞབས་བསིལ་ལ་སོགས་པ་རྣམས་ཀྱང་ཆོ་ག་ཇི་ལྟ་བ་བཞིན་དུ་རྫོགས་པར་དབུལ་བར་བྱ་སྟེ། འདི་ནི་མུ་སྟེགས་བྱེད་རྣམས་ཀྱི་དག་བྱེད་དུ་བརྟགས་པའི་ཕྱིར་ངེས་པར་སྤྱད་པར་བྱའོ། །ལྔ་པ་ནི་ཧ་ཅང་རིང་མིན་ཞེས་བྱ་བ་ལ་སོགས་པས་རྩེ་མོ་རྣམས་ཤར་དུ་བསྟན་ལ་ཀུ་ཤ་དགྲམ་པར་བྱའོ། །དྲུག་པ་ནི་ཙནྡན་ཨ་ཀ་རུ་ཤིང་ཞེས་བྱ་བ་ལ་སོགས་པས་མེ་སྦོར་བ་སྟེ། ལས་དང་རྗེས་སུ་མཐུན་པའི་མེའམ། མེད་ན་མར་མེ་ལས་ཀྱང་རུང་སྟེ། ཡམ་ཤིང་ལས་མེ་སྦར་ཏེ་དེ་ཐབ་ལ་ལན་གསུམ་བསྐོར་ལ་ཨོཾ་ཨགྣ་ཡེ་ཛྭཱ་ལ་ཛྭཱ་ལ་རྃ་ཞེས་བརྗོད་དེ་ཐབ་ཏུ་བཅུག་ལ་རླུང་ཡབ་ཀྱིས་ཀྱང་ཅུང་ཟད་བུས་ཏེ། གཟར་བུ་ཆུང་བས་མར་བླུགས་ལ་མེ་གསོ་བར་བྱའོ། །སློབ་དཔོན་ཁ་ཅིག་སྐབས་འདིར་མེ་པྲ་བརྟག་པར་ཡང་བཞེད་དོ། །དེ་ནས་ཡང་ཧཱུྃ་ཞེས་བྱ་བ་དང་བསང་ཆུས་སླར་ཡང་བསང་བར་བྱའོ། །བདུན་པ་ནི་དེ་ནས་མེའི་དབུས་སུ་ཞེས་བྱ་བ་ལ་སོགས་པས་དམ་ཚིག་པའི་མེ་ལྷ་གསལ་པོར་བལྟས་ཏེ། རྡོ་རྗེ་དང་དྲིལ་བུ་བླངས་ལ། ཚུར་སྤྱོན་ཚུར་སྤྱོན་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །བསྲེག་བླུགས་ཞལ་ཟས་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་སྒྲུབ་པ་པོ། །ཐུགས་རྗེས་སེམས་ཅན་དོན་མཛད་པ། །འདི་ཉིད་དུ་ནི་བཞུགས་སུ་གསོལ། །ཞེས་བྱ་བ་དང་ལག་པ་གཡོན་པས་སྤོས་བཟུང༌། གཡས་པས་སྐྱབས་སྦྱིན་ལས་མཐེ་བོང་སྲིན་ལག་གི་རྩར་བཞག་ལ། གཡབ་པའི་ཚུལ་བྱ་ཞིང༌། ཨོཾ་ཨེ་ཧྱེ་ཧི་ཞེས་བྱ་བ་ལ་སོགས་པའི་སྔགས་དང༌། སྙིང་གའི་ཧཱུྃ་གི་འོད་ཟེར་གྱིས་མེ་ལྷ་སྤྱན་དྲང་བར་བྱའོ། །དེ་ནས་ཡེ་ཤེས་སེམས་དཔའ་དེ་ལ་མཆོད་ཡོན་ལ་སོགས་པ་ཇི་ལྟ་བ་བཞིན་དུ་ཕུལ་བས་ཡོངས་སུ་དག་པར་བྱའོ། །དེ་ནས་རྡོ་རྗེ་བསྡམས་པ་ལས་གུང་མོ་གཉིས་རྩེ་སྦྱར་བ་བརྐྱང་སྟེ། མཐེ་བོང་དང་མཐེ་ཆུང་སོ་སོར་བརྐྱང་བ་འདི་ནི་རྡོ་རྗེའི་ཕྱག་རྒྱ་སྟེ། ཨོཾ་བཛྲ་ཨཱ་ན་ལ་ཞེས་བྱ་བ་ལ་སོགས་པ་བརྗོད་དེ། དེ་ཡང་ཨོཾ་ནས་ཧཱུྃ་ཕཊ་ཀྱི་མཐར་ནི་ཕྲིན་ལས་བཅོལ་བའོ། །དྲྀ་ཤྱ་ཞེས་བྱ་བས་ཡེ་ཤེས་པ་དེ་ལ་བལྟ་བར་བྱའོ། །ཛཿཧཱུྃ་བྃ་ཧོཿཞེས་བྱ་བས་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་བྱས་ལ། ས་མ་ཡ་སྟྭཾ་ས་མ་ཡ་ཧོ། ཞེས་བྱ་བས་ཁྱོད་དམ་ཚིག་ལས་མ་འདའ་བར་གྱིས་ཤིག་ཅེས་དམ་ཚིག་སྦྱིན་ནོ། །དེ་ནས་བརྒྱད་པ་ཡན་ལག་རྫོགས་པར་བྱ་བ་ནི། འོག་ཏུ་སྦྱར་ལ་སྐུ་གསུམ་བྱིན་གྱིས་བརླབ་པ་བྱས་ལ། རང་རིགས་ལྷའི་ཅོད་པཎ་ཅན་ཞེས་འབྱུང་བས། དེ་ལྟར་དམ་ཚིག་བསྐྱེད་པ་ནི་བསྙེན་པ། ཡེ་ཤེས་པ་དགུག་གཞུག་བྱ་བ་ནི་ཉེར་སྒྲུབ་བྱ་བ་དང༌། མེ་ལྷའི་སྙིང་གར་པདྨ་དང་ཉི་མ་ལ་རྡོ་རྗེ་ལ་ཧཱུྃ་སྔོན་པོ་དཔྲལ་བར་པད་ཟླ་ལ་འཁོར་ལོ་ལ་ཨོཾ་དཀར་པོ་བསམ། མགྲིན་པར་པད་ཟླ་ལ་པད་མ་ལ། ཨཱཿདམར་པོ་བསྒོམ་པ་ནི་སྒྲུབ་པའོ། །དེ་ནས་དབང་བསྐུར་བའི་ལྷ་སྤྱན་དྲངས་ཏེ་མཆོད་པ་དང་གསོལ་བ་བཏབ་ལ་ཚུལ་བཞིན་དུ་དབང་བསྐུར་ཏེ་མཐར་དབུ་རྒྱན་བསྒོམ་པར་བྱའོ། །དེ་ལ་ཞི་བ་ལ་རྣམ་སྣང་གི་དབུ་རྒྱན། རྒྱས་པ་ལ་རིན་འབྱུང༌། དབང་ལ་སྣང་བ་མཐའ་ཡས། དྲག་པོ་ལ་དོན་ཡོད་གྲུབ་པའམ། མི་བསྐྱོད་པས་དབུར་བརྒྱན་པ་སྟེ། སྒྲུབ་པ་ཆེན་པོའོ། །དེ་ནས་དགུ་པ་མཆོད་པ་ནི་དྲུག་སྟེ། དང་པོ་དགང་བླུགས་དབུལ་བ་དང༌། མི་པྲ་བརྟག་པ་དང༌། བསྲེག་རྫས་རྒྱས་པར་དབུལ་བ་དང༌། མཆོད་པ་དང༌། བསྟོད་པ་དང༌། འབར་བའི་རྣམ་པར་བསྟིམ་པའོ། །དང་པོ་ནི་དེ་ནས་མེ་ལྷའི་ལྕེ་ལ་ཧཱུྃ་ལས་རྡོ་རྗེ་རྩེ་གསུམ་པ་ཧཱུྃ་གིས་མཚན་པ་བསམ། དགང་གཟར་བླུགས་གཟར་ལའང་དེ་བཞིན་དུ་བསྒོམས་ལ། ལག་པ་གཡས་པས་བླུགས་གཟར་གཡོན་པས་དགང་གཟར་བཟུང་ལ། པུས་མོའི་བར་དུ་བཅུག་སྟེ་ཆེ་བ་ཁེངས་པར་དགང་ཞིང་སྔགས་ཨོཾ་ཨགྣ་ཡེ་སྭཱ་ཧཱ། ཞེས་བརྗོད། ཁེངས་པ་དང༌། ཨོཾ་ཨགྣ་ཡེ་ཨཱ་དི་པྱཱ་དི་པྱ་མ་ཧཱ་ཤྲི་ཡེ་ཧ་བྱ་ཀ་བྱ་བཱ་ཧ་ནཱ་ཡ་སྭཱ་ཧཱ། ཞེས་བརྗོད་ལ་ཁ་སྦྱར་ཏེ་མེར་དབུལ་ལོ། །དེ་དག་ནི་དགང་གཟར་དང་བླུགས་གཟར་བཟང་པོའི་ཞེས་བྱ་བ་དང༌། འོག་ནས་བླུགས་གཟར་མགོ་ནས་ཞེས་བྱ་བ་ལ་སོགས་པས་བསྟན་ཏོ། །དེ་ལྟར་ལན་གསུམ་གྱི་བར་དུ་དབུལ་བར་བྱའོ། །དེ་ནས་གཉིས་པ་མེའི་པྲ་བརྟགས་ཏེ་འོག་ཏུ་སྦྱར་ལ་ཁ་དོག་དྲི་དང་ཞེས་བྱ་བ་ལ་སོགས་པ་སྟེ། དཔལ་སཾ་པུ་ཊ་ལས་འབྱུང་བ་ལྟར་རྒྱས་པར་ཤེས་པར་བྱས་ལ། གལ་ཏེ་མི་དགེ་བའི་ལྟས་མཐོང་ན་བགེགས་མཐར་བྱེད་ཀྱི་སྔགས་བཟླ་ཞིང་དྲིའི་ཆུས་གཏོར་བས་ཞི་བར་བྱའོ། །གསུམ་པ་བསྲེག་རྫས་རྒྱས་པར་དབུལ་བ་ནི། འབར་བའི་མེ་ལ་ཡམ་ཤིང་སྟེ། །དེ་ནས་མར་དང་དེ་འོག་ཏིལ། །འབྲས་རྒྱལ་ཟས་མཆོག་ས་བོན་ནས། །སྲན་མ་གྲོ་དང་དཱུར་བ་སོགས། །ཞེས་བྱ་བའི་རིམ་པས་དབུལ་ཏེ། ཡམ་ཤིང་ནི་འདིར་འབར་བའི་དཀྱིལ་འཁོར་དུའོ། །མར་དང་ཏིལ་དང་ཞོ་ཟན་ནི་ཞལ་དུའོ། །གྲོ་དང་ནས་ལ་སོགས་པ་ནི་ཕྱག་ཏུ་དབུལ་ལོ། །དཱུར་བ་དང་ཀུ་ཤ་ནི་གཙུག་ཏོར་ལ་དབུལ་ལོ། །མེ་ཏོག་ནི་དབུ་ལའོ། །སྤོས་ནི་ཤངས་ལའོ། །མར་མེ་ནི་སྤྱན་ལམ་དུའོ། །དྲི་ནི་ཐུགས་ཀར་རོ། །ཞལ་ཟས་ནི་ཞལ་དུའོ། །རོལ་མོ་ནི་སྙན་དང་སྤྱན་ལམ་དུ་དབུལ་ལོ། །མཆོད་ཡོན་རྣམས་ལ། ཞབས་བསིལ་ནི་ཞབས་ལའོ། །འཐོར་འཐུང་ཕྱག་དང་ཞལ་དུའོ། །བསང་གཏོར་སྐུ་ཐམས་ཅད་ལའོ། །མཆོད་ཡོན་དངོས་ནི་ཕྱག་ཏུ་དབུལ་བར་བྱའོ། །དེ་ལ་ཞུ་བའི་རྫས་རྣམས་ནི་དགང་གཟར་དང་བླུགས་གཟར་གྱིས་དབུལ། གཞན་རྣམས་ནི་ལག་པ་གཡོན་པས་སྙིང་གར་བཟུང་སྟེ། གཡས་པས་བླངས་ལ་འོག་ནས་བསྐོར་ཏེ། སྟེང་ནས་འབུལ་བའི་ཚུལ་གྱིས་སྔགས་བརྗོད་ཅིང་དབུལ་བར་བྱའོ། །ཞི་བ་ལ་ཐུན་མོང་སྟེ་ཞེས་བྱ་བ་ལ་སོགས་པ་ལས་སོ་སོ་སྒྲུབ་པའི་བསྲེག་རྫས་རྣམས་ནི་གཞུང་ཉིད་དུ་གསལ་བར་སྟོན་ཏོ། །དེ་ནས་མཆོད་པ་ཅི་འབྱོར་པས་མཆོད་ལ། རྡོ་རྗེ་དྲིལ་བུ་གསིལ་ཞིང༌། འཇིག་རྟེན་དབང་ཕྱུག་ཚངས་དབང་མཆོག་གི་སྲས། །མེ་ལྷའི་རྒྱལ་པོ་ཌཱ་ཀིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་སྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཅེས་བྱ་བས་བསྡུས་པའམ། གཞན་ཡང༌། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་བསྐྱབ་པའི་ཕྱིར། །ཐུགས་རྗེའི་དབང་གིས་སྐུ་སྤྲུལ་པ། །རིག་སྔགས་གྲུབ་པའི་དྲང་སྲོང་ཚུལ། །ཉོན་མོངས་སྲེག་པའི་ཤེས་རབ་མཆོག །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱིས་སྤྲུལ་པའི་ཐེག་པ་བཅིབས། །རིག་སྔགས་གསུང་གི་བགྲང་ཕྲེང་འཛིན། །བདུད་རྩིའི་བཅུད་ལྡན་གུནྡྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཞེས་བསྟོད་པར་བྱའོ། །དེ་ནས་བསང་གཏོར་དང་འཐོར་འཐུང་ཕུལ་ལ་འབར་བའི་རྣམ་པས་ཐིམ་པར་བསམ་པར་བྱ་སྟེ། དཔལ་རྡོ་རྗེ་མཁའ་འགྲོ་ལས། མེ་ལྷ་ཀུན་ཏུ་མཆོད་ནས་ནི། །འབར་བའི་གཟུགས་སུ་ཡོངས་སུ་གྱུར། །ཞེས་གསུངས་པའི་ཕྱིར་རོ། །དེ་ནས་བཅུ་པ་འདས་པའི་མེ་ལྷ་མཆོད་པར་བྱ་སྟེ། མེའི་དབུས་སུ་མངོན་པར་བྱང་ཆུབ་པ་ལྔ་ལས། དཀྱིལ་འཁོར་གྱི་འཁོར་ལོ་རྫོགས་པར་བསྐྱེད། དེ་ནས་ལག་པ་གཡས་པ་རྡོ་རྗེ་དང་བཅས་པས་སྤོས་བཟུང༌། གཡོན་པས་དྲིལ་བུ་གསིལ་ཞིང་སྤྱན་དྲང་བར་བྱ་སྟེ། མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མ་ལུས་འཇོམས་མཛད་པའི། །དངོས་རྣམས་མ་ལུས་ཇི་བཞིན་མཁྱེན་གྱུར་པ། །བཅོམ་ལྡན་འཁོར་བཅས་འདིར་ནི་གཤེགས་སུ་གསོལ། །ཞེས་བྱ་བ་དང༌། སྤྲོས་པ་ལ་དགའ་ན། དམིགས་མེད་མཁའ་ལྟར་དག་པ་ཁྱབ་པའི་སྐུ། །ཞེས་བྱ་བ་ལ་སོགས་པས་ཀྱང་སྤྱན་དྲང་བར་བྱའོ། །སྤྱིར་ནི་གསང་སྔགས་ཀྱི་ནུས་པ་འབྱིན་པ་ཞེས་བྱ་བའི་སྦྱིན་སྲེག་བསྡུས་པ་ནི་མདོར་བསྡུས་པ་ཞེས་བྱའི། གཞན་རྒྱས་པར་དབྱེ་ན་སྦྱིན་སྲེག་གི་ཆོ་ག་འདི་ནི་སྤྲོས་པ་དང་བཅས་པའི་ལུགས་ཡིན་པས་ཇི་སྲིད་སྤྲོས་པའི་ཆོ་ག་རྣམས་ཀྱང་དཀྱིལ་འཁོར་ན་བྱ་བ་ལ་འགལ་བ་མེད་དོ་ཞེས་གསུང་ངོ༌། །དེ་ལྟར་སྤྱན་དྲངས་པ་དང་མཆོད་ཡོན་རྣམས་དབུལ། ཕྱིའི་མཆོད་པ་དང༌། ནང་དང་ལྷ་མོ་བརྒྱད་ཀྱི་མཆོད་པའང་ཕུལ་ལ། ཨོཾ་ཨེ་ཧྱེ་ཧི་བྷ་ག་ཝཱ་ན་མ་ཧཱ་ཀཱ་རུ་ཎི་ཀ་ཧེ་བཛྲ་ས་པ་རི་ཝཱ་ར་ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿཞེས་བྱ་བ་ལ་སོགས་པ་ལྷ་མོ་བཞིས་དགུག་པ་དང་བཅིང་བ་དང་དབང་དུ་བྱ་བའང་བྱ། སྐྱེ་མཆེད་དྲུག་དང་སྐུ་གསུང་ཐུགས་བྱིན་གྱིས་བརླབ་པ་བྱ། དབང་བསྐུར་ཞིང་རྒྱས་གདབ་སྟེ། ཡན་ལག་བཞི་ཡོངས་སུ་རྫོགས་པར་བྱའོ། །དེ་ནས་མཆོད་པ་བྱ་སྟེ། མཆོད་ཡོན་གྱི་ཆོ་ག་རྣམས་ཡོངས་སུ་རྫོགས་པར་བྱ། དེ་ནས། མེ་ཏོག་ལ་སོགས་པ་ཕྱིའི་མཆོད་པ་དང༌། སྒེག་མོ་ལ་སོགས་པའི་མཆོད་པ་བརྒྱད་དང༌། བདུད་རྩི་དང་ལྷ་མོ་བརྒྱད་དང་བསྟོད་པས་ཀྱང་མཆོད་ལ། དེ་ནས་གདང་བླུགས་གསུམ་དབུལ། དེ་ནས་ཡམ་ཤིང་ལ་སོགས་པའི་བསྲེག་རྫས་རྣམས་སྔར་བསྟན་པ་ལྟར་ལན་ཉི་ཤུ་རྩ་གཅིག་གམ་བརྒྱ་རྩ་བརྒྱད་ལ་སོགས་པ་དབུལ་ཏེ། ཞི་བ་ལ་ཤཱནྟིཾ་ཀུ་རུ་དང༌། རྒྱས་པ་ལ་པུཥྚིཾ་ཀུ་རུ། དབང་ལ་བ་ཤཾ་ཀུ་རུ། དྲག་པོ་ལ་མཱ་ར་ཡ་ཕཊ། ཅེས་བྱ་བའི་སྔགས་ཀྱི་མཐའ་རྟེན་ནི་བསྲེག་རྫས་རེ་རྫོགས་པ་དང་སྦྱར་བར་བྱའི། རེ་རེ་ལ་རེ་རེ་སྦྱར་མི་དགོས་སོ། །བསྲེག་རྫས་སོ་སོ་ལ་འབྱོར་པའི་བྱེ་བྲག་གིས་མང་ཉུང་དུ་སོང་ཡང་འགལ་བ་མེད་གསུང་ངོ༌། །དེ་ལྟར་བསྲེག་རྫས་རྫོགས་པ་དང་སླར་ཡང༌། མེ་ཏོག་འདི་རྣམས་བཟང་ཞིང་ལེགས། །ཞེས་བྱ་བ་ལ་སོགས་པ་དངོས་ཀྱི་མཆོད་པ་ལྔ་དང༌། གུར་ལས་འབྱུང་བ། མེ་ཏོག་བསྐྱུར་བའི་ཚུལ་གྱིས་དང༌། །དྲི་ནི་འཐོར་བའི་ཚུལ་གྱིས་དང༌། །སྡོང་བུས་མར་མེའི་མཆོད་པ་དང༌། །བྱུག་པའི་ལུས་ཀྱི་རྗེས་སུ་དྲིས། །ལཱ་སྱེའི་ལག་པས་ལཱ་སྱེ་དང༌། །ཕྲེང་བས་ཕྲེང་བའི་མཁའ་འགྲོ་མ། །གླུ་ནི་ཧཱུྃ་གི་དམ་ཚིག་གླུས། །བརླ་བསྐུམ་པས་ནི་གར་ཉིད་དོ། །ཞེས་བྱ་བ་སྟེ། སྔགས་དང་ཕྱག་རྒྱ་དང་ཏིང་ངེ་འཛིན་གྱིས་མཆོད་པར་བྱའོ། །ཡང་གླུ་དང༌། གར་དང༌། རོལ་མོ་དང༌། རིན་པོ་ཆེ་བདུན་ལ་སོགས་པའི་མཆོད་པའི་ཁྱད་པར་རྣམས་ཀྱིས་མཆོད་པར་བྱའོ། །དེ་ནས་བསྟོད་པ་རྒྱས་པ་དང་བསྡུས་པ་གང་ཡང་རུང་བས་བསྟོད་པར་བྱའོ། །དེ་ནས་གཏོར་མའང་ཕུལ་ལ། བཅོམ་ལྡན་འདས་ཐུགས་རྗེ་ཆེན་པོ་ཅན། བདག་ལ་དངོས་གྲུབ་ཐམས་ཅད་སྩལ་དུ་གསོལ། ཁྱད་པར་དུ་ལས་འདི་ཞེས་བྱ་བའི་དངོས་གྲུབ་སྩལ་དུ་གསོལ་ཞེས་བྱ་བས་དངོས་གྲུབ་བླང༌། རྡོ་རྗེའི་གླུ་བླང༌། རིགས་སུ་སྐྱེ་དང་ཞེས་བྱ་བ་ལ་སོགས་པས་ཇི་ལྟར་འདོད་པའི་སྨོན་ལམ་རྒྱ་ཆེན་པོ་བཏབ་ལ། ཡི་གེ་བརྒྱ་པའང་བྱ་སྟེ། མ་འབྱོར་པ་དང་ཉམས་པ་དང༌། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་གང༌། །དེ་ཀུན་མགོན་པོས་བཟོད་པར་མཛོད། །བདག་ལས་དང་པོ་པའི་གང་ཟག་ཏུ་གྱུར་པས་ཏིང་ངེ་འཛིན་མི་གསལ་བས་བྱིང་བ་དང༌། རྒོད་པའི་དབང་དུ་གྱུར་པ་དང༌། མཆོད་པའི་ཡོ་བྱད་མ་འབྱོར་པ་དང་ཉམས་པ་དང༌། ཆོ་ག་ལྷག་པ་དང༌། མ་ཚང་བར་གྱུར་པ་དེ་དག་ཐམས་ཅད་ཐུགས་རྗེ་ཆེན་པོ་དང་ལྡན་པའི་མགོན་པོ་ཁྱེད་ཀྱིས་བཟོད་པར་མཛད་དུ་གསོལ་ལོ། །དེ་ནས། ཨོཾ་ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་ལས་ཀྱི་དངོས་གྲུབ་སྩོལ། །ཨོཾ་བཛྲ་མུཿཞེས་བརྗོད་དེ། ཡེ་ཤེས་ལྷའི་འཁོར་ལོ་གཤེགས་སུ་གསོལ་ལ། དམ་ཚིག་པ་ཨོཾ་ཨཱཿཧཱུྃ་ཞེས་བྱ་བས་བདག་ལ་བསྡུའོ། །དེ་དག་ནི་ལྷག་པའི་ལྷ་ལ་མཆོད་པའོ། །དེ་དག་ནི། །འདིས་ནི་ཡེ་ཤེས་མེ་དགྱེས་ཏེ། །རྡོ་རྗེ་འཆང་བ་རབ་ཏུ་དགྱེས། །ཞེས་བྱ་བ་ལ་སོགས་པས་སྟོན་ཏོ། །རྡོ་རྗེ་གུར་ལས་ཀྱང༌། ཤ་ལྔ་བདུད་རྩི་ལྔ་ཉིད་དང༌། །དཀྱིལ་འཁོར་ལྔ་ཡི་བསྒོམ་པས་ནི། །ཞེས་གསུངས་པ་འདིས་བསྡུས་པའི་དཀྱིལ་འཁོར་མཆོད་པའང་ཤེས་པར་ནུས་སོ། །བཅུ་གཅིག་པ་སླར་ཡང་འཇིག་རྟེན་པའི་མེ་ལྷ་མཆོད་པ་ནི། དེ་ནས་འཇིག་རྟེན་པའི་མེ་ལྷ་འཁོར་དང་བཅས་པ་སྐད་ཅིག་གིས་བསྐྱེད་ལ། དེ་ལ་བསང་གཏོར་དང་འཐོར་འཐུང་གཉིས་ཕུལ་ལ་འཁོར་དང་བཅས་པར་ལེགས་པར་མཆོད་དེ། བསྲེག་རྫས་ལྷག་མ་ཇི་ལྟར་འབྱོར་པ་ཕུལ་ཏེ། མཐར་དགང་བླུགས་གསུམ་ཕུལ་ནས་མཆོད་པ་དང་བསྟོད་པ་བྱས་ལ། གཏོར་མ་གཅིག་ཀྱང་འཁོར་དང་བཅས་པ་ལ་ཕུལ་ལ། ཡང་བསང་གཏོར་དང་འཐོར་འཐུང་བྱས་ཏེ། ཆོ་ག་མ་ཚང་བ་ལ་སོགས་པ་བཟོད་པར་གསོལ་ཏེ། བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབས་ཀྱིས་གཤེགས། །ཇི་བཞིན་དུས་སུ་སླར་གཤེགས་ཏེ། །བདག་གི་དངོས་གྲུབ་ཐམས་ཅད་སྒྲུབས། །ཞེས་བྱ་བ་དང༌། ཨོཾ་ཨགྣ་ཡེ་ཡ་ཧི་བྱ་བའི་སྔགས་དང་སྤྱན་དྲང་བའི་ཕྱག་རྒྱ་ལས་མཛུབ་མོ་ཕྱིར་བསྐྱེད་པ་ནི་གཤེགས་སུ་གསོལ་བའི་ཕྱག་རྒྱ་སྟེ། ཡེ་ཤེས་པ་གཤེགས། དམ་ཚིག་པ་དེ་རང་ལ་བསྡུའོ། །དེ་དག་ནི། ཚངས་པ་བརྒྱ་བྱིན་དབང་ཕྱུག་ཆེ། །ཞེས་བྱ་བ་ལ་སོགས་པ་དང༌། བྱིན་སྲེག་མཐའ་རུ་བསྡུ་བ་ལ། །ཞེས་བྱ་བ་ལ་སོགས་པས་བསྟན་པ་ཡིན་ནོ། །དངོས་གཞིའི་ཆོ་གའོ།།  །།མཇུག་ཏུ་བྱ་བ་ལ་གསུམ་སྟེ། མེ་ཞི་བར་བྱ་བ་དང༌། ལས་ཀྱི་རྗེས་མི་མངོན་པར་བྱ་བ་དང༌། མི་དམིགས་པའི་རྒྱས་གདབ་པའོ། །དང་པོ་ལ་ནི། ཞི་བ་ལ་ནི་འོ་མས་གསད། །ཅེས་བྱ་བ་ལ་སོགས་པ་སྟེ་གོ་སླའོ། །གཉིས་པ་ནི་མཆོད་པ་དམན་མ་གཏོར་མ་ལ་སོགས་པ་ཐམས་ཅད་ཆུ་བོ་ལ་སོགས་པར་གཤེགས། ཐལ་བ་ཆུར་དོར་བའམ་དབེན་པར་བཞག ཐབ་དང་ས་ཕྱོགས་ལ་སོགས་པ་ཐམས་ཅད་བའི་ལྕི་བ་ལ་སོགས་པས་ཐམས་ཅད་བྱུག་པར་བྱའོ། །དེ་ནས་རང་གི་ལྷའི་བཟླས་བསྒོམ་ལ་སོགས་པ་ལ་གནས་པ་ཆོས་ཐམས་ཅད་བདག་མེད་པར་མོས་པར་བྱའོ། །མཇུག་གི་ཆོ་གའོ།།  །།འདིར་སྦྱིན་སྲེག་གི་སྐབས་སུ་ཉེ་བར་དགོས་པའི་དབང་དུ་བྱས་ན་གོང་དུ་སའི་ཆོ་གའི་སྐབས་སུ་དགང་གཟར་དང་བླུགས་གཟར་བཤད་པ་དེ་ནི། ཐབ་ལ་སོགས་པ་ཤིན་ཏུ་རྒྱས་པའི་དབང་དུ་བྱས་པ་ཡིན་གྱི། མདོར་བསྡུ་ན་སྔར་བཤད་པ་རྣམས་ཀྱི་ཕྱེད་ཕྱེད་དབྲི་བ་ཞེས་བྱ་བ་འདིར་ཤེས་པར་བྱའོ།།  །།འདི་ན་སྦྱིན་སྲེག་གི་ཆོ་ག་ནི་ཇི་ལྟར་མུ་སྟེགས་བྱེད་རྣམས་དང་རྗེས་སུ་མཐུན་པ་ཡིན་པ་དེའི་ཕྱིར་ཀུན་ཏུ་སྤྱོད་པ་གཙང་བ་དང་སྤྲོས་པ་རབ་ཏུ་རྒྱས་པ་ཞེས་བྱ་བར་ཤེས་པར་བྱའོ། །སྤྱིར་ན་གསང་སྔགས་པ་རྣམས་ཀྱི་ལུགས་ཀྱིས་ནི། འདོད་པའི་ཡོན་ཏན་ལྔ་ལ་ལོངས་སྤྱོད་པ་དེའི་ཕྱིར་ཀུན་ཏུ་སྤྱོད་པ་གཙང་ཞིང་མཛེས་པའང་ཡིན་ལ། རྣལ་འབྱོར་བླ་ན་མེད་པའི་ལུགས་ཀྱིས་རྣམ་པར་རྟོག་པ་སྤོང་བས་ཤ་ལྔ་བདུད་རྩི་ལྔ་ལ་སོགས་པ་བསྟེན་པའི་ཕྱིར་མི་གཙང་བར་རྐྱང་འདུག་པས་ན་འགལ་བ་ལྟར་སྣང་ཡང་འགལ་བ་མེད་པར་ཤེས་པར་བྱའོ།།  །།རྟོག་པ་སྤོང་ཕྱིར་སྤྲོས་བྲལ་ཕྱིར། །བདེ་བར་གཤེགས་ཀུན་དགྱེས་བྱེད་ཡིན། །འཇིག་རྟེན་མཐུན་ཕྱིར་འཇིག་རྟེན་དགྱེས། །དེ་ཕྱིར་མཆོད་སྦྱིན་གཙོ་བོ་ཡིན། །གསང་སྔགས་བསྙེན་པ་ཡོངས་རྫོགས་ལ། །འབྲས་བུ་འབྱིན་བྱེད་འདི་ཡིན་ལ། །སྡིག་པ་སྤོང་ཕྱིར་ཚོགས་འཕེལ་ཕྱིར། །དེ་བས་འདི་ཉིད་བསྟེན་པའི་ཕྱིར། །སྡིག་པ་སྤོང་འདོད་ཤིས་འདོད་ཚོགས་འཕེལ་འདོད། །དངོས་གྲུབ་ཐོབ་འདོད་རྣམས་ཀྱི་དོན་གྱི་ཕྱིར། །སྦྱིན་སྲེག་ཆོ་ག་སྤྲོས་བསྡུས་ཕྱོགས་གཅིག་བྲིས། །ཉེས་གྱུར་ཡོད་ན་བཟོད་པ་མཛད་པར་རིགས། །ནང་དང་གསང་བ་བླ་མའི་གསུང་བཞིན་གྱི། །འདིར་ནི་ཕྱི་ཡི་སྦྱིན་སྲེག་ཙམ་ཞིག་བྲིས། །དེ་ལས་དགེ་ཐོབ་གང་ཡིན་དེས་འགྲོ་ཀུན། །མི་གཉིས་རྡོ་རྗེ་འཆང་གི་སར་བགྲོད་ཤོག །གང་ཞིག་དཔག་མེད་ཚོགས་གཉིས་ལས་བསྒྲུབས་ཐུགས་ནི་རྡོ་རྗེ་འཆང༌། །ཐུགས་རྗེས་གཟུང་ཕྱིར་དགེ་བ་ཆེན་པོ་མི་ཡི་ལུས། །ཚུལ་གཉིས་མི་འགལ་གདུལ་བྱའི་ཀུ་མུ་ཏ་ཁ་འབྱེད་པའི་གསུང༌། །དཔལ་ལྡན་སྙིང་པོའི་མཐའ་ཅན་དེ་ལ་བདག་ནི་ཕྱག་འཚལ་ལོ། །དཔལ་དགྱེས་པའི་རྡོ་རྗེའི་ལུགས་ཀྱི་སྦྱིན་སྲེག་གི་ཆོ་གའོ། །རྣལ་འབྱོར་པ་བསོད་ནམས་རྩེ་མོས་བླ་མའི་ཕྱག་ལེན་མཛད་པ་དང་གཞུང་གི་ཆ་མི་འགལ་བར་བྲིས་པའོ། །འདིས་བསྟན་པ་དང་སེམས་ཅན་ལ་ཕན་ཐོགས་པར་གྱུར་ཅིག།  ༄༅། །བདག་མེད་མའི་དབང་གི་ཐོ་ཡིག་བཞུགས།།  ༄༅། །བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །རྗེ་བཙུན་ལྷ་མོ་བཅོ་ལྔའི་རིམ་གཉིས་བསྒོམ། །དེ་ལས་བྱུང་བའི་ཡེ་ཤེས་ཅུང་ཟད་བསྐྱང༌། །དེ་ནས་དག་པ་རྗེས་དྲན་བྱ། །དེར་དཀྱིལ་འཁོར་གྱི་འཁོར་ལོ་བསྡུས། །དེའི་རྗེས་ལ་སྐད་ཅིག་གིས་ཧཱུྃ་ཧཱུྃ་བརྗོད་ལ། རྗེ་བཙུན་མའི་ང་རྒྱལ་དེ་ཧེ་རུ་ཀ་ཕྱག་གཉིས་པར་བསྒྱུར། ཧི་ཧི་ཞེས་བརྗོད་པས་བགེགས་བསྐྲད་ལ། དེ་ནས་ཧེ་རུ་ཀ་ཕྱག་གཉིས་པའི་ང་རྒྱལ་དུ་གནས་པས། སའི་ལྷ་མོ་སྟ་གོན་དུ་བྱ་བ་མཐུན། ལྷ་སྟ་གོན་གྱི་མེ་ཏོག་ཚོམ་བུ་ལྷ་མོ་བཅོ་ལྔར་བྱ། སྟེང་གི་ཚོམ་བུ་བེ་ཏཱ་ལཱིའི་གཡོན་དུ་བྱ། འོག་གི་ཚོལ་བུ་གཽ་རཱིའི་གཡས་སུ་གཞག གཞན་མཆོད་པ་ལ་སོགས་པ་འདྲ། སྙན་གསན་འབེབས་པའི་དུས་སུ། ཧེ་རུ་ཀ་དཔལ་དཔའ་བོ་ཆེ། །རིག་པའི་རྒྱལ་པོར་ཕྱག་འཚལ་བསྟོད། །ཅེས་པའི་དོད་དུ། བཅོམ་ལྡན་རྡོ་རྗེ་བདག་མེད་མ། །རིག་སྔགས་རྒྱལ་ལ་ཕྱག་འཚལ་བསྟོད། །ཅེས་བྱ། གཞན་ཐམས་ཅད་འདྲ། བུམ་པ་སྟ་གོན་ཡང་ལྷ་དགུའི་དོད་དུ་ལྷ་མོ་བཅོ་ལྔ་བསྒོམས་ལ་ཨཱ་ལིའི་ཕྲེང་སྔགས་བཟླས། ནང་པར་དཀྱིལ་འཁོར་གྱི་བྱ་བའང་ཡུམ་གྱི་ང་རྒྱལ་གྱིས་མི་བྱེད་པར་ཧེ་རུ་ཀ་ཕྱག་གཉིས་པའི་ང་རྒྱལ་གྱིས་བྱ། དཀྱིལ་འཁོར་བསྒྲུབ་པའི་དུས་སུ་ཡུམ་གྱི་ང་རྒྱལ་བསྡུས་ནས་ཧེ་རུ་ཀ་ཕྱག་གཉིས་པའི་ང་རྒྱལ་གྱིས་ལས་ལ་འཇུག དེའང་བརྟག་པའི་ཡུམ་གྱི་སྐབས་ལེའུ་བཅུ་པ་ལས། རྡོ་རྗེ་སེམས་དཔའི་བསྙེམས་བྱས་ནས། །རྐང་པ་གཡས་པ་བརྐྱང་བྱ་སྟེ། །ཕྱག་གཉིས་ཀྱེ་རྡོ་རྗེ་སྦྱོར་བས། །སློན་དཔོན་དཀྱིལ་འཁོར་འཇུག་པ་ཉིད། །ཅེས་གསུངས། བླ་མའི་མན་ངག་ཀྱང་དེའི་རྗེས་སུ་འབྲངས་ནས། ཡུམ་གྱི་དཀྱིལ་འཁོར་ཡིན་ཡང་དཀྱིལ་འཁོར་གྱི་བྱ་བ་དེ་ཡབ་ཀྱི་ང་རྒྱལ་གྱིས་མཛད། སྒྲུབ་མཆོད་གྱི་འབྱིན་པའི་དཀྱིལ་འཁོར་ཡང་ཧེ་རུ་ཀ་ཕྱག་གཉིས་པའི་ཐུགས་ཀ་ནས་འོད་ཟེར་སྤྲོས་ནས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཐུགས་ཀར་བཀུག་ནས། ཐུགས་ཀ་ནས་དཀྱིལ་འཁོར་གྱི་འཁོར་ལོ་རྫོགས་པར་སྤྲུལ་ཏེ། དེ་རྐང་ཐོན་ནམ་བྱུང་རྫོགས་སུ་སྤྲོ། འདི་བཤད་པའི་རྒྱུད་ལས་ཀྱང་འདི་ལྟར་བཤད། བླ་མའི་མན་ང་གི་ཕྱག་ལེན་ཡང་འདི་ལྟར་ལགས། དབང་གི་དངོས་གཞི་ལ་མི་བསྐྱོད་པ་དགྱེས་པ་རྡོ་རྗེ་ལ་སོགས་པ་རིག་པའི་དབང་ལྔ་པོ་ཐམས་ཅད། ཡབ་ཀྱི་ལ་ཞལ་བརྒྱད་ཕྱག་བཅུ་དྲུག་པར་བསྒོམ། ཡུམ་གྱི་ལ་ཞལ་གཅིག་ཕྱག་གཉིས་པར་བསྒོམ། གཞན་ཐམས་ཅད་འདྲ། མཆོག་དབང་གསུམ་ལ་ཁྱད་པར་མེད། སྤྱིར་ཁྱེད་ལྟ་བུའི་གང་ཟག་དམ་པས་དབང་བསྐུར་མཛད་དགོས། རྡོ་རྗེ་ཐེག་པའི་བསྟན་པ་ལ་ཡང་དེས་ཕན། ཉན་ཐོས་ལ་སྡོམ་པ་མ་ཐོབ་པར་དགེ་སློང་ཡིན་ནམ་དགེ་ཚུལ་ཡིན་བྱ་བ་ཁས་ལེན་མི་ནུས་པར་འདུག ཁས་བླངས་ཀྱང་གཞན་ཐམས་ཅད་ཀྱིས་སྲད་མ་ཅན་དུ་བྱེད། དེས་ན་ཉན་ཐོས་ཀྱི་ཐེག་པ་འདི་ལ་བསྟན་པའི་གཟུགས་བརྙན་བག་ཙམ་གདའ། རྡོ་རྗེ་ཐེག་པ་འདི་ལ་གཟུགས་བརྙན་རང་ཡང་མེད་པར་སོང་གདའ། དབང་བསྐུར་ཡང་མ་ཐོབ། དབང་བསྐུར་གྱི་དུས་ཀྱི་སྡོམ་པ་ཐོབ་མ་ཐོབ་ཀྱང་སུ་ལ་ཆ་མེད། འོན་ཀྱང་རང་སྔགས་པ་ཡིན་པར་བསྒོམ། གཞན་ཐམས་ཅད་ཀྱིས་ཀྱང་སྔགས་པར་བྱེད་པའི་དུས་སུ་སོང་གདའ། ད་ཁྱེད་ཀྱིས་ཅི་ནས་ཀྱང་ཆོས་རྗེ་རིན་པོ་ཆེའི་ཡང་བཀར་འདུག བསྟན་པ་ལའང་འདིས་ཕན་པར་འདུག་པས། སློབ་མ་ཐམས་ཅད་གསང་སྔགས་ཀྱི་སྡོམ་པ་རེ་དང་ལྡན་པར་མཛད་པར་ཞུ། དེ་ལ་དབང་བསྐུར་དགོས་པར་གདའ། ཅིས་ཀྱང་དབང་བསྐུར་མཛད་པར་ཞུ། སླད་མ་ལྟ་བའི་ཆོས་དེ་ལ་བླ་མ་དང་དཀོན་མཆོག་ལ་གསོལ་བ་ཐོབ་ལ། ཅི་ལྟར་དགོངས་པ་བཞིན་མཛད་པར་ཞུ། ཡི་གེའི་རྟེན་རས་ཡུག་ཟུང་དུ་སྦྱར་བ་ཅིག་འབུལ་བས་ཆོས་གོས་ཤིག་མཛད་པར་ཞུ། སློབ་དཔོན་རིན་པོ་ཆེས་ནེ་ཙོ་སྦལ་སྟོན་ལ་སྤྲིང་བའི་ཡི་གེ་བདག་མེད་མའི་དབང་གི་ཐོ་ཡིག་དགེའོ།།  །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག  www.gyalyongsachen.com