༼ཉ༽
༄༅། །ངེས་བརྗོད་བླ་མའི་འཁྲུལ་འཁོར་བྲི་ཐབས་བཞུགས།།
༄༅། །ཨོཾ་སྭ་སྟི་སིདྡྷཾ། རྗེ་བཙུན་བླ་མའི་ཞབས་ལ་གུས་པས་ཕྱག་འཚལ་ལོ། །རྡོ་རྗེ་འཆང་མཚུངས་རྗེ་བཙུན་བླ་ཆེན་དང༌། །བདེ་མཆོག་སྒྱུ་མའི་སྐུ་ལ་ཕྱག་བྱས་ཏེ། །ངེས་བརྗོད་རྒྱུད་ཀྱི་བྲི་དང་བསྒོམ་པའི་དོན། །རབ་ཟབ་ཉི་ཤུ་གཅིག་དང་གཉིས་པ་བཏུ། །འདིར་རྣམ་པ་ཐམས་ཅད་མེ་མཁྱེན་པའི་སངས་རྒྱས་རྡོ་རྗེ་འཆང་ཉིད་སྒྲུབ་པར་འདོད་པའི་གང་ཟག་གིས། བདུད་བཞི་ཚར་གཅད་པར་བྱ་བའི་ཕྱིར་དང༌། འཆི་བ་ངེས་པར་སློང་བར་བྱེད་པའི་རྡོ་རྗེ་ལྷ་མོ་སྒོམ་པ་དང༌། འཁྲུལ་འཁོར་བྲི་བར་འདོད་པའི་སྒྲུབ་པ་པོས། དུར་ཁྲོད་དམ་ཤིང་དྲུང་ངམ། མཚན་གཅིག་པ་ལ་སོགས་པའི་དྲུང་རབ་ཏུ་དབེན་པའི་བསམ་གཏན་གྱི་ཁང་པར་སྟན་བདེ་བ་ལ་འདུག་སྟེ། རང་གི་སྙིང་གར་པྃ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧཱུྃ་རབ་ཏུ་དཀར་བ་བསྒོམས་ལ། དེ་ལས་འོད་ཟེར་འཕྲོས་པས་མདུན་གྱི་ནམ་མཁའི་གནས་སུ། བླ་མ་དང་རྡོ་རྗེ་ལྷ་མོ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས་ལ། དེ་དག་གི་ཞབས་ལ་ཕྱག་བྱ་བ་དང༌། མེ་ཏོག་ལ་སོགས་པ་ཇི་ལྟར་འབྱོར་པས་མཆོད་པར་བྱ་བ་དང༌། སྔར་བྱས་པའི་སྡིག་པ་ཐམས་ཅད་བཤགས་ཤིང་ཕྱིས་མི་བྱེད་པར་བསྡམས་པ་དང༌། སོ་སོ་སྐྱེ་བོ་ནས་བརྩམས་ཏེ་སངས་རྒྱས་ཀྱི་བར་གྱི་དགེ་བའི་རྩ་བ་ལ་རྗེས་སུ་ཡི་རང་བ་དང༌། དཀོན་མཆོག་གསུམ་ལ་སྐྱབས་སུ་འགྲོ་བ་དང༌། སྨོན་པ་དང་འཇུག་པའི་བདག་ཉིད་ཅན་གྱི་བྱང་ཆུབ་ཀྱི་སེམས་བསྒོམ་པ་དང༌། དགེ་བའི་རྩ་བ་སེམས་ཅན་ཐམས་ཅད་དང་ཐུན་མོང་དུ་བྱ་སྟེ། རྣམ་པ་ཐམས་ཅད་མཁྱེན་པའི་སངས་རྒྱས་ཐོབ་པའི་དོན་དུ་བསྔོ་བ་དང༌། ཚངས་པའི་གནས་བཞི་བསྒོམ་པ་སྟེ་བསོད་ནམས་ཀྱི་ཚོགས་བསགས་པའོ། །དེ་ནས་རང་གི་སེམས་སྒྱུ་མ་ལྟ་བུ་དང༌། སྒྱུ་མའང་རང་བཞིན་མེད་པ་དང༌། དེ་འང་སྣང་བས་དབེན་པར་བྱ་བའི་དོན་དུ་ཤཱུ་ནྱ་ཏཱའི་སྔགས་བརྗོད་ལ་མི་དམིགས་པར་བྱའོ། །དེ་ཉིད་ཀྱི་ངང་ལས་སའི་ཕྱོགས་དེར་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ་བསམས་ལ། ཧཱུྃ་དེ་ལས་འོད་འཕྲོས་པས། རྡོ་རྗེའི་རྭ་བ་དང༌། དྲྭ་བ་དང༌། གུར་དང༌། བླ་རེ། མདའི་དྲྭ་བ་དང་བསྐལ་པའི་མེ་ལྟ་བུའི་མེ་རི་རབ་ཏུ་འབར་བ་དང༌། རྡོ་རྗེ་ས་གཞིའི་བར་བསྒོམ་པར་བྱའོ། །འདི་ལ་ཤིན་ཏུ་སྤྲོས་པ་ལ་དགའ་བ་རྣམས་ཀྱི་ངེས་བརྗོད་ཀྱི་རྒྱུད་འདི་ཉིད་ཀྱི་ལེའུ་བཞི་པ་ལས་འབྱུང་བ་བཞིན་དུ། ཕུང་པོ་ཁམས་དང་སྐྱེ་མཆེད་གཞི་སྦྱང་བསྒྱུར་དང༌། ཐུན་མོང་གི་སྲུང་བའི་འཁོར་ལོ་བཅུ་གཅིག་བསྒོམ་པ་དང༌། ཞལ་བཞི་པའི་སྔགས་དང༌། སེ་གོལ་གྱི་སྒྲས་བགེགས་བསྐྲད་པ་དང༌། ཕུར་བུའི་སྔགས་དང་བཅས་པས་བགེགས་རྣམས་ཕུར་བུས་གདབ་པར་བྱ་བའི་བར་དུ་རྒྱས་པ་བྱའོ། །གང་ལྟར་ཡང་རུང་སྟེ། སྲུང་བའི་འཁོར་ལོའི་དབུས་སུ་སྐད་ཅིག་ཙམ་གྱིས། པདྨ་དང་ཉི་མའི་སྟེང་དུ་ཧཱུྃ་ཁ་དོག་དཀར་པོ་བསམ་པར་བྱའོ། །ཧཱུྃ་དེའི་འོད་ཀྱིས་འཇིག་རྟེན་གྱིས་ཁམས་ཐམས་ཅད་གང་སྟེ་འཕགས་པ་ཐམས་ཅད་མཆོད། སེམས་ཅན་ཐམས་ཅད་ཀྱི་དོན་བྱས་ཏེ་ཚུར་འདུས་པ་ལས་སྐད་ཅིག་ཙམ་གྱིས་ཕྱིར་ཟློག་མ་ཞེས་བྱ་བ། རྡོ་རྗེའི་ལྷ་མོ་ངེས་པར་འཆི་བའང་འཚོ་བར་མཛད་མ། སྐུ་མདོག་དཀར་ཞིང་ན་བཟའ་དཀར་བས་བརྒྱན་པ། བདུད་སྡིག་ཅན་དང་དབང་ཕྱུག་ལ་སོགས་པའི་བགེགས་ཐམས་ཅད་ཀྱི་སྟེང་ན་པདྨ་དང་ཟླ་བའི་གདན་ལ་ཞབས་གཡས་བརྐྱང་བས་བཞུགས་པ། ཞལ་བརྒྱད་མ། ཕྱག་བཅུ་དྲུག་མ། རྩ་བའི་ཞལ་ནི་དཀར་ཞིང་རབ་ཏུ་ཞི་བའི་སྤྱན་གསུམ་དང་ལྡན་པ། ཞི་བ་ཡིན་མོད་ཀྱི་འོན་ཀྱང་མཆེ་བ་ཅུང་ཟད་དང་ལྡན་པའོ། །གཡས་པ་ནི་སྔོ་བ་དང་དམར་བ་དང་སེར་བའི་ཞལ་གསུམ་སྟེ། དྲག་ཏུ་བཞད་ཅིང་ཁྲོ་བའི་སྤྱན་གསུམ་དང་ལྡན་པ་ཡིན་ནོ། །གཡོན་པ་ནི་དམར་བ་དང་ལྗང་བ་དང་དུད་ཁ་སྟེ། རབ་ཏུ་ཁྲོས་པ་ཤིན་ཏུ་དམར་བའི་སྤྱན་གསུམ་དང་ལྡན་པ་ཡིན་ནོ། །སྟེང་གི་ཞལ་ནི་ཤིན་ཏུ་སྒེག་ཅིང་མཛེས་མ་ཞི་བ་རབ་ཏུ་དཀར་ཞིང་སྤྱན་གསུམ་དང་ལྡན་པ་ཡིན་ནོ། །ཡང་ན་འདི་ནི་ཞལ་བཞི་པ་སྟེ། གཡས་སྔོ་ཞིང་གཡོན་དམར་བ། གཉིས་ནི་རབ་ཏུ་ཁྲོས་པ་ཡིན་ལ། སྟེང་གི་ཞལ་བཞི་པ་ནི་ཤིན་ཏུ་སེར་བ་ཡིན་ནོ། །ཕྱག་བཅུ་དྲུག་གི་གཡས་པ་བརྒྱད་ནི། དང་པོ་ན་རྡོ་རྗེ། གཉིས་པ་ན་ཞགས་པ། གསུམ་པ་ན་རལ་གྲི། བཞི་པ་ན་དགྲ་སྟྭ། ལྔ་པ་ན་ལྕགས་ཀྱུ། དྲུག་པ་ན་མདའ། བདུན་པ་ན་ཐོ་བ། བརྒྱད་པ་ན་འཁོར་ལོ། གཡོན་གྱི་དང་པོ་ན་དྲིལ་བུ། གཉིས་པ་ན་སྡིགས་མཛུབ། གསུམ་པ་ན་བུམ་པ། བཞི་པ་ན་མདུང༌། ལྔ་པ་ན་ཐོད་པ། དྲུག་པ་ན་གཞུ། བདུན་པ་ན་ཁ་ཊྭཱཾ་ག བརྒྱད་པ་སྐྱབས་སྦྱིན་གྱི་ཕྱག་རྒྱའོ། །རིན་པོ་ཆེ་དང་མི་རུས་ཀྱི་ཕྲེང་བའི་རྒྱན་གྱིས་བརྒྱན་པའོ། །སྟག་གི་པགས་པའི་ཤམ་ཐབས་ཅན་བསྐལ་པའི་མེ་རི་རབ་ཏུ་འབར་བའི་དབུས་ན་བཞུགས་པའོ། །དེའི་ཐུགས་ཀར་འོག་ནས་འཆད་པར་འགྱུར་བའི་བྲི་བའི་སྐབས་དང་མཐུན་པའི་འཁོར་ལོ་རབ་ཏུ་རྒྱས་པ། ཤིན་ཏུ་གསལ་བ། ཟླ་བའི་སྟེང་དུ་བསྒོམ་སྟེ། དེའི་དབུས་སུ་ཡི་གེ་ཧཱུྃ་ལས་འོད་ཟེར་སྤྲོས་ནས་བདག་དང་འདྲ་བའི་ཡེ་ཤེས་སེམས་དཔའ་སྤྱན་དྲངས་ཏེ། ཇི་ལྟར་འབྱོར་པའི་ཡིད་ཀྱིས་ནམ་མཁའ་ལ་བཞུགས་པ་ལ་མཆོད་ནས། ཛཿཧཱུྃ་བྃ་ཧོཿཞེས་པས་བདག་གི་ལུས་ལ་བསྟིམ་པར་བྱའོ། །ཡང་འོད་ཟེར་གྱི་རྣམ་པས་དེ་བཞིན་གཤེགས་པའི་དཀྱིལ་འཁོར་སྤྱན་དྲངས་ཏེ། དབང་བསྐུར་བར་གསོལ་བ་གདབ་ལ། དེ་བཞིན་གཤེགས་པའི་ཚོགས་ཀྱིས་དབང་བསྐུར་ནས་ཆུའི་ལྷག་མ་ཡར་ལུད་པ་ལས། སྤྱི་བོར་མི་བསྐྱོད་པ་དབུས་སུ་བཞུགས་པའི་དེ་བཞིན་གཤེགས་པ་ལྔས་དབུར་བརྒྱན་པར་བྱའོ། །དེ་ནས་ཡིད་ཀྱིས་མེ་ཏོག་ལ་སོགས་པའི་མཆོད་པ་ལྔས་བདག་ཉིད་ལ་མཆོད་ཅིང་བསྟོད་ལ། བདུད་རྩི་མྱངས་པས་མཉེས་པར་བྱ་སྟེ། ལྷའི་སྐུ་མདོག་དང་ཕྱག་མཚན་ལ་དམིགས་ཤིང༌། གཙོ་བོར་འཁོར་ལོ་གསལ་གདབ་པའི་ཚུལ་གྱིས་ཡུན་རིང་དུ་བསམ་གཏན་བྱའོ། །གལ་ཏེ་སྐྱོ་བར་གྱུར་ན་གསང་སྔགས་བཟླ་བར་བྱ་སྟེ། ཨོཾ་ཨ་མྲྀ་ཏ་སཉྫཱི་བཱ་ནི་མ་ཧཱ་ཨ་མྲྀ་ཏ་སུ་མུ་ཁེ་ཛཱི་བཾ། པྲ་བེ་ཤ་ཡ། པྲ་བེ་ཤ་ཡ། སརྦ་བཛྲ་པདྨ་ས་མ་ཡོ་གེ་མ་ཧཱ་བོ་དྷི་ཙིཏྟ། བིསྠཱ་པི་ཏ་མཱུཏྟ་ཧུྃ་ཧཱུྃ་ཨ་ཨཱཿཨཾ་ཨཱཿཧ་སྭཱ་ཧཱ། འདི་ནི་ཁྲི་ཙམ་བཟླས་བྱས་པས། །འཆི་བ་ཐམས་ཅད་འཚོ་བར་བྱེད། །དུས་མིན་འཆི་བ་ཞི་འགྱུར་ཞིང༌། །འཆི་བ་ལས་ནི་ངེས་པ་སློང༌། །དེ་ལྟ་བུའི་ཚུལ་གྱིས་སྔོན་དུ་བསྙེན་པ་འབུམ་ལ་སོགས་པ་སོང་བའི་སྒྲུབ་པ་པོས། གསང་སྔགས་ཀྱི་ལས་ཀྱི་ཤམ་བུ་གདགས་པའི་སྒོ་ནས་དངོས་གྲུབ་ཕྲ་མོ་རྣམས་སྒྲུབ་པར་འདོད་ན། གསངས་སྔགས་གོང་མ་རྣམས་ཀྱི་གཤམ་དུ་ཧི་ཧི་ཞེས་བརྗོད་ན། གསང་སྔགས་ཐམས་ཅད་བཟླས་པར་འགྱུར་རོ། །ཧཱུྃ་ཧཱུྃ་གིས་སྔགས་ཐམས་ཅད་ཀྱི་བསྙེན་པ་རྫོགས་པར་འགྱུར་རོ། །ཧ་ཧ་ཞེས་པས་བདག་ལ་སངས་རྒྱས་རྣམས་མགུ་བར་འགྱུར་རོ། །ཧེ་ཧེ་ཞེས་པས་དེ་བཞིན་གཤེགས་པ་རྣམས་དགྱེས་པར་འགྱུར་རོ། །ས་ས་ཞེས་པས་སངས་རྒྱས་རྣམས་བསྙེན་བཀུར་བྱས་པར་འགྱུར་ཏེ། ལེགས་སོ་ཞེས་བདག་ལ་དགྱེས་པར་འགྱུར་རོ། ཏྲྱཾ་ཏྲྱཾ་གིས་དེ་བཞིན་གཤེགས་པ་རྣམས་མཆོད་པར་འགྱུར་རོ། །ལྃ་ལྃ་གིས་ནི་ཤིས་པར་འགྱུར་རོ། །ཧྲིྃ་ཧྲིྃ་གིས་ནི་དངོས་གྲུབ་ཐམས་ཅད་འཛིན་པར་འགྱུར་རོ། །ཧྃ་ཧྃ་གིས་ནི་བདག་གཞན་སྲུང་བར་འགྱུར་རོ། །ཧོ་ཧོ་ཞེས་བརྗོད་པས་རྗེས་སུ་ཆགས་པར་འགྱུར་རོ། ཌྃ་ཌྃ་གིས་དངོས་གྲུབ་ཐམས་ཅད་འགུགས་པར་འགྱུར་རོ། །ཡང་ཚར་གཅད་པར་བྱ་བའི་ཕྱིར། ཧཱུྃ་ཧཱུྃ་གིས་མདུན་དུ་བསྒྲུབ་བྱ་དམིགས་ལ། ཛཿཛཿཞེས་པས་བཀུག་སྟེ། ཧཱུྃ་ཧཱུྃ་གིས་ཕུར་བུས་གདབ། ཕཊ་ཕཊ་ཀྱིས་གསད་པར་བྱ། ཡང་ཏྲཱྃ་ཏྲཱྃ་གིས་བགེགས་རྣམས་བཀུག་ལ། ཧཱུྃ་བྷྲཱུྃ་གྱིས་གསད་དེ། ཧཱུྃ་ཧཱུྃ་ཧཱུྃ་ཧཱུྃ་ཧཱུུྃཧཱུུྃ་ཧཱུྃ་ཧཱུྃ་གིས་ཐལ་བར་བརླག་པར་བྱའོ། །ཧ་ཧ་ཞེས་པས་དགྲ་བགེགས་རྣམས་བསྲེག་པར་བྱའོ། །བྱ་བྱ་ཞེས་པའམ། བྷུྃ་བྷུྃ་ཞེས་པས་བདག་གཟི་བརྗིད་བསྐྱེད་པར་བྱའོ། །གྷུ་གྷུ་ཞེས་པས་མེ་ཏོག་ལ་བཟླའོ། །གྃ་གྃ་ཞེས་པས་དྲི་ལ་བཟླ་བར་བྱའོ། །རྃ་རྃ་ཞེས་པས་མར་མེ་ལ་བཟླ་བར་བྱའོ། །ལས་ཐམས་ཅད་འགྲུབ་པར་བྱེད་པ་ལྷའི་རྣལ་འབྱོར་དང་བཟླས་བརྗོད་བསྟན་ཟིན་ཏོ།། །།ད་ནི་ལས་ཐམས་ཅད་འགྲུབ་པའི་འཁོར་ལོ་བྲི་བ་བརྗོད་པར་བྱ་སྟེ། དེ་ལ་བྲི་བའི་གཞི་ནི་ལས་འཇམ་པོ་རྣམས་ལ་གྲོ་གའམ་རས་ལ་བྲི་བར་བྱའོ། །དྲག་པོ་རྣམས་ལ་མིའི་པགས་པའམ། དུར་ཁྲོད་ཀྱི་རས་ལ་བྲི་བར་བྱའོ། །གང་ལྟར་ཡང་ཤོག་བུ་ལ་བྲིས་པ་ལ་ཉེས་པ་མེད་དོ། །ཞེས་བླ་མ་རྣམས་གསུང་ངོ༌། །བྲི་བའི་སྣག་ཚ་ནི་སྐྱེས་པའི་ཐོད་པར་པདྨའི་རྩ་བའི་སྡོང་བུ་ལས་ཚིལ་ཆེན་གྱི་མར་མེ་སྦར་ལ། བུད་མེད་ཀྱི་ཐོད་པས་ཁ་བཀབ་པ་ལས་དུ་བ་བླང་པར་བྱའོ། །དེ་ན་ཌོྃ་བི་ནཱི་བྲམ་ཟེའམ་རྒྱལ་པོའི་བུ་མོའི་དང་པོའི་རང་བྱུང་དང༌། བྱང་ཆུབ་ཀྱི་སེམས་དང་གསུམ་སྦྱར་ཏེ་སྦྱིན་དང་ལྡན་པར་བྱའོ། །དེ་ལ་ཞི་བའམ། རྒྱས་པའམ། དབང་ངམ། བསྲུང་བའམ། ཕྱིར་བཟློག་པ་དེའི་ཚེ་ག་བུར་གི་ཧཾ་དང་གུར་གུམ་རྣམས་དང་བསྲེ་བར་བྱའོ། །དྲག་པོའི་ལས་ལ་ནི་དེའི་སྟེང་དུ་ཁྲག་དང་དུག་ཀྱང་བསྲེ་བར་བྱའོ། །བྲི་བའི་སྣག་ཚའོ། །དེ་ནས་བྲིས་ཐབས་ཀྱི་ཆོ་ག་ནི། བདག་སྔར་གྱི་རྣལ་འབྱོར་དང་གསང་སྔགས་དང་ལྡན་པའམ། ཡང་ན་འདིའི་སྐབས་སུ་ཧེ་རུ་ཀའི་རྣལ་འབྱོར་དང་གསང་སྔགས་ཀྱིས་ཀྱང་འགལ་བ་མེད་པར་རྒྱུད་ནས་གསུངས་ཏེ། དེའང་འཁོར་ལོ་བདེ་མཆོག་གི་ང་རྒྱལ་དང་ལྡན་པས། ཨོཾ་ཧྲཱི་ཧ་ཧ་ཆེ་གོ་མོ་ཤཱནྟིཾ་ཀུ་རུ་ཧཱུྃ་ཧཱུྃ་པཱ་པཾ་ཕཊ། ཅེས་ལན་མང་དུ་ཟློས་ཤིང་བྲི་བར་བྱའོ། །དེ་ལ་དབྱིབས་ཀྱི་ཁྱད་པར་ནི་བྲི་བའི་གཞི་ལ་ལེགས་པར་ཤོང་ཞིང་མཛེས་ན་ནི་ཆུང་བ་དང༌། སྤེལ་ཚིག་གི་ཡི་གེ་མང་པོ་དགོས་ན་བྲི་གཞི་ཆེ་བར་བྱ་བ་གང་ཡང་རུང་བ་ལ་ཉེས་པ་མེད་དོ། །དེའང་ལྟེ་བའི་ཕྱོགས་སུ་སྣ་ཚོགས་རྡོ་རྗེ་ཕྱོགས་རེ་རེར་རྭ་གསུམ་གསུམ་དང་ལྡན་པ་སྟེ། དེ་ལྟར་ན་རྩེ་མོ་བཅུ་གཉིས་པར་འགྱུར་རོ། །དེའི་ལྟེ་བ་ལ་ཡི་གེ་ཧཱུྃ་ཆེན་པོ་གཅིག་གི་ལྟོ་བར་བྃ་བྲིས་ལ། དེའི་ལྟེ་བ་ལ་ཨོཾ་ཨཱཿཧཱུྃ་ཆེ་གེ་མོ་རཀྵ་རཀྵཿཞེས་བྱ་བ་ལ་སོགས་པའི་ལས་ཀྱི་ཤམ་བུ་སྤང་བར་བྱའོ། །སྤེལ་ཚིག་རྣམས་ནི་འོག་ནས་འབྱུང་བ་ཐམས་ཅད་ལ་སྦྱར་བར་བྱའོ། །སྣ་ཚོགས་རྡོ་རྗེའི་རྭ་དབུས་མ་བཞི་ལ་སྙིང་པོའི་རྣལ་འབྱོར་མ་བཞིའི་ས་བོན་མ་ནིང་བཞི་དང་སྤེལ་བ་བྲི་སྟེ། ཤར་དུ་ཌཱྃ་རྀ་ཆེ་གེ་མོ་ཞེས་བྱ་བའི་སྤེལ་ཚིག་བྲི་བར་བྱའོ། །དེ་བཞིན་དུ་སྤེལ་ཚིག་དང་བཅས་པ་སྟེ། བྱང་དུ་ལྃ་རཱྀ། ནུབ་ཏུ་ཁྃ་ལྀ། ལྷོ་རུ་རཱུྃ་ལཱྀ། ཞེས་བྱ་བའོ། །དེའི་ཕྱི་རོལ་དུ་མུ་ཁྱུད་ཕྲ་བ་ཅིག་ལ་དབྱངས་ཡིག་མ་ནིང་དང་བྲལ་བ་བཅུ་གཉིས་ཤར་ནས་བརྩམས་ཏེ། གཡོན་སྐོར་དུ་བྲི་བར་བྱའོ། །དེའི་ཕྱི་རོལ་དུ་པདྨ་འདབ་མ་བརྒྱད་པ་ཅིག་ཐུགས་ཀྱི་འཁོར་ལོའི་ས་བོན་རྣམས་ཧཱུྃ་དང་སྤེལ་བ་བྲི་བར་བྱ་སྟེ། དེ་ལ་ཧཱུྃ་དང་ས་བོན་གྱི་བར་དུ་མིང་གཞུག་པའམ། གཉིས་ཀའི་གཤམ་དུ་མིང་གཞུག་པར་བྱ་སྟེ། དེ་ལའང་འདི་ལྟར་ཤར་དུ་ཁྃ་བྲྃ་ཆེ་གེ་མོ་རཀྵ་རཀྵ་ཧཱུྃ་ཞེས་བྱ་བའམ། ཁྃ་བྲྃ་ཧཱུྃ་ཆེ་གེ་མོ་རཀྵ་རཀྵ། ཞེས་བྱ་བ་སྟེ་ཇི་ལྟར་བདེ་བར་བྲི་བར་བྱའོ། །དེ་བཞིན་དུ་རྒྱས་པ་ཀུན་ལ་སྦྱར་ཏེ་ཤེས་པར་བྱའོ། །བྱང་དུ་ཀྃ་ཙྃ་ཧཱུྃ། ནུབ་ཏུ་ཀྃ་པྃ་ཧཱུྃ། ལྷོར་བྃ་མྃ་ཧཱུྃ། མེར་སུྃ་བྃ་ཧཱུྃ། སྲིན་པོར་ཨ་ཁྃ་ཧཱུྃ། དབང་ལྡན་དུ་བྃ་ལྃ་ཧྲྃ་ཧཱུྃ། ཞེས་བྱ་བའོ། །དེའི་ཕྱི་རོལ་དུ་མུ་ཁྱུད་ཕྲ་བ་ཅིག་ལ་འདབ་མ་རེ་རེའི་ཐད་སོར་གསལ་བྱེད་བརྒྱད་དེ། འདི་ལྟར་ཤར་ནས་གཡོན་སྐོར་གྱིས། ཀྃ་ཁྃ་གྃ་གྷྃ། མེ་ནས་བཟུང་སྟེ་གཡས་སྐོར་གྱིས། ངྃ་ཙྃ་ཚྃ་ཛྃ། ཞེས་བྱ་བའོ། །དེའི་ཕྱི་རོལ་དུ་སྣ་ཚོགས་རྡོ་རྗེ། ཕྱོགས་རེ་རེར་རྭ་གསུམ་གསུམ་པའི་དབུས་མ་རྣམས་ལ་ཞལ་བཞི་པའི་སྔགས་ཤར་ནས་བརྩམས་ཏེ་གཡོན་སྐོར་དུ་བྲི་བར་བྱའོ། །ཤར་ཕྱོགས་སུ། ཨོཾ་སུམྦྷ་ནི་སུམྦྷ་ཆེ་གེ་མོ་རཀྵ་རཀྵ་ཀུ་རུ་ཧཱུྃ་ཧཱུྃ་ཕཊ། དེ་བཞིན་དུ་ཐམས་ཅད་ལ་སྤེལ་ཚིག་དང་བཅས་པ་སྟེ། བྱང་ཕྱོགས་སུ་གྲིཧྣ་གྲིཧྣ་ཧཱུྃ་ཧཱུྃ་ཕཊ། ནུབ་ཕྱོགས་སུ་ཨོཾ་གྲིཧྣཱ་པ་ཡ་གྲིཧྣཱ་པ་ཡ་ཧཱུྃ་ཧཱུྃ་ཕཊ། ལྷོར་ཨཱ་ན་ཡ་ཧོ། བྷ་ག་ཝཱཾ་བཛྲ་རཱ་ཛཱ་ཧཱུྃ་ཧཱུྃ་ཕཊ། ཅེས་བྱ་བའོ། །དེའི་ཕྱི་རོལ་དུ་འདབ་མ་བཅུ་དྲུག་པ། འདབ་མ་རྣམས་ཀྱི་དབྱངས་ཐུང་བ་སྟེ། བྲི་བའི་གཞི་ཕྲ་བ་གཅིག་ལ་ཤར་ནས་བརྩམས་ཏེ་ཨཱ་ལི་བཅུ་དྲུག་གཡོན་སྐོར་གྱིས་བྲི་བར་བྱའོ། །འདབ་མ་བཅུ་དྲུག་པའི་ཕྱི་རོལ་དུ་འཁོར་ལོ་རྩིབས་བཅུ་དྲུག་པ་སྟེ། གསུང་གི་འཁོར་ལོ་དང༌། སྐུའི་འཁོར་ལོ་ཕྱོགས་མཚམས་བརྒྱད་དུ་འཁོར་ལོ་རྩིབས་གཉིས་གཉིས་པ་བརྟན་པར་བྲིའོ། །དེའང་གཙོ་བོ་ལ་ཞལ་བལྟས་པའི་གཡས་ངོས་རྣམས་སུ་ནི་སྐུའི་འཁོར་ལོ་རྣམས་འོང་ལ། སྐུའི་འཁོར་ལོ་ཞལ་ནང་དུ་བལྟས་པའི་གཡོན་ངོས་རྣམས་སུ་ནི་གསུང་གི་འཁོར་ལོ་རྣམས་ཧྲཱིཿདང་སྤེལ་བ། སྐུའི་འཁོར་ལོ་རྣམས་ནི་ཨྃ་དང་སྤེལ་ཞིང༌། སོ་སོ་ལ་བསྒྲུབ་བྱའི་མིང་དང་སྤེལ་བར་བྱ་སྟེ། སྤེལ་ལུགས་གཉིས་པོ་ནི་ཐུགས་ཀྱི་འཁོར་ལོའི་སྐབས་སུ་བཤད་པར་ལྟར་ཡིན་ནོ། །དེ་ལ་གསུང་གི་འཁོར་ལོའི་ཤར་ཕྱོགས་སུ། ཨཱྃ་ཨཱཾ་ཧྲཱིཿ བྱང་དུ་བྃ་མྃ་ཧྲཱིཿ ནུབ་ཏུ་བྃ་མྃ་ཧྲཱིཿ ལྷོར་པྃ་སུྃ་ཧྲཱིཿ མེར་སུྃ་ཤྃ་ཧྲཱིཿསྲིན་པོར་བྃ་སུྃ་ཧྲཱིཿ རླུང་དུ་མུྃ་ཧྃ་ཧྲཱིཿ དབང་ལྡན་དུ་བིཾ་ཁཾ་ཧྲཱིཿ ཞེས་བྱ་བ་བྲིའོ། །སྐུའི་འཁོར་ལོའི་ཤར་ཕྱོགས་སུ་མྃ་ཙྃ་ཨོཾ། བྱང་དུ་རྃ་ཁྃ་ཨོཾ། ནུབ་ཏུ་ཧྃ་སྃ་ཨོྃ། ལྷོར་ཨྃ་ཙྃ་ཨོཾ། མེར་ཧྃ་སུྃ་ཨོཾ། སྲིན་པོར་བྃ་མྃ་ཨོཾ། རླུང་དུ་བཻྃ་ཙྃ་ཨོཾ། དབང་ལྡན་དུ་བྃ་མྃ་ཨོཾ། ཐམས་ཅད་དུ་ཡང་བསྒྲུབ་བྱའི་མིང་སྤེལ་པར་བྱ་སྟེ། དེའང་ས་བོན་གཉིས་ཀྱི་མགོ་ཨོཾ་ལ་སོགས་པའི་གོང་དུ་བྲི་བར་གཞུང་ལས་མངོན་ནོ། །དེའི་ཕྱི་རོལ་དུ་མུ་ཁྱུད་ཕྲ་བ་གཅིག་ལ། ས་བོན་རྣམས་བྲི་བ་ནི། གསུང་གི་འཁོར་ལོའི་ཤར་ཕྱོགས་ནས་གཡོན་སྐོར་གྱིས། ཛྷྃ་ཉྃ་ཊྃ་ཋྃ། མེ་མཚམས་ནས་གཡས་སྐོར་གྱིས་རིམ་པས། ཌྃ་ཌྷྃ་ཎྃ་ཏྃ། སྐུའི་འཁོར་ལོའི་ཤར་ནས་གཡོན་སྐོར་གྱི་རིམ་པས། ཐྃ་དྃ་དྷྃ་ནྃ་ངོ༌། །མེ་མཚམས་ནས་གཡས་སྐོར་གྱི་རིམ་པས། པྃ་ཕྃ་བ་ྃབྷྃ། ཞེས་བྱ་བ་རྣམས་བྲི་བར་བྱའོ། །དེ་དག་ཐམས་ཅད་ཀྱི་ཕྱི་རོལ་དུ་གྲུ་བཞི་པ་ལ་སྒོ་བཞི་པ་བྲིས་ལ། སྒོ་བཞིར་སྒོ་མ་བཞིའི་ས་བོན་དང༌། ཡ་ར་ལ་ཝ་དང༌། ཧཱུྃ་སྤེལ་བ་བྲི་བར་བྱ་སྟེ། དེའང་ཤར་དུ་ཀྃ་ཡྃ་ཆེ་གེ་མོ་ལ་རཀྵ་རཀྵ་ཧཱུྃ། དེ་བཞིན་དུ་བྱང་དུ་ཨྃ་རྃ་ཧཱུྃ། ནུབ་ཏུ་སྭཱྃ་ལྃ་ཧཱུྃ། ལྷོར་སཱུྃ་ཝྃ་ཧཱུྃ། ཡང་མཚམས་བཞིར་མཚམས་མའི་ས་བོན་དང༌། ཤ་ཥ་ས་ཧ་དང༌། ཕཊ་སྤེལ་བར་བྱ་སྟེ། དེའང་མེར་ཡྃ་ཤྃ་ཆེ་གོ་མོ་ལ་རཀྵ་རཀྵ་ཕཊ། ཅེས་བྱའོ། །དེ་བཞིན་དུ་སྲིན་པོར་ཡྃ་ཥྃ་ཕཊ། རླུང་དུ་ཡྃ་སྃ་ཕཊ། དབང་ལྡན་དུ་ཡྃ་ཧྃ་ཕཊ། ཅེས་པ་བྲིའོ། །སྒོ་མཚམས་ཀྱི་སྟེང་དུ་རྡོ་རྗེ་རྩེ་མོ་བཞི་པའི་ཁོངས་སུ་རྭ་དབུས་མའི་ཚུལ་དུ་ཁྲོ་བོའི་ཞལ་བྲི། མཚམས་རྣམས་སུ་ཉི་མ་དང་ཟླ་བའི་སྟེང་དུ་རྡོ་རྗེ་རྩེ་བཞི་པའི་ཁོངས་སུ་སྔ་མ་བཞིན་ཁྲོ་བོའི་ཞལ་བྲི། ཁྲོ་བོ་རྣམས་ཀྱི་ཞལ་གྱི་ནང་དུ་རྐང་པ་བརྒྱད་པའི་སྔགས་ཕྱོགས་རྣམས་ནི་ཤར་ནས་གཡོན་སྐོར། མཚམས་རྣམས་ནི་མེ་ནས་གཡས་སྐོར་དུ་བྲི་བར་བྱའོ། །དེ་ལ་ཤར་དུ། ཨོཾ་ན་མོ་བྷ་ག་ཝ་ཏེ་ཝཱི་རེ་ཤཱ་ཡ། ཆེ་གོ་མོ་ལ་རཀྵ་རཀྵ་ཀུ་རུ་ཧཱུྃ་ཧཱུྃ་ཕཊ། དེ་བཞིན་དུ་ཐམས་ཅད་ལ་སྤེལ་ཚིག་དང་བཅས་པ་སྟེ། བྱང་དུ། ཨོཾ་མ་ཧཱ་ཀལྤཱགྣི་སཾ་ནི་བྷཱ་ཡ་ཧཱུྃ་ཧཱུྃ་ཕཊ། ནུབ་ཏུ་ཨོཾ་ཛ་ཊཱ་མ་ཀུ་ཊོཏྐ་ཊཱ་ཡ་ཧཱུྃ་ཧཱུྃ་ཕཊ། ལྷོར་ཨོཾ་དྃཥྚྲཱ་ཀ་ར་ལོ་གྲ་བྷཱི་ཥ་ན་མུ་ཁཱ་ཡ་ཧཱུྃ་ཧཱུྃ་ཕཊ། མེར་ཨོཾ་ས་ཧ་སྲ་བྷུ་ཛ་བྷཱ་པུ་རཱ་ཡ་ཧཱུྃ་ཧཱུྃ་ཕཊ། སྲིན་པོར་ཨོཾ་པ་ར་ཤུ་པཱ་ཤོ་དྱ་ཏ་ཤཱུ་ལ་ཁ་ཊྭཱཾ་ག་དྷཱ་རི་ཎེ་ཧཱུྃ་ཧཱུྃ་ཕཊ། རླུང་དུ་ཨོཾ་བྱཱ་གྷཱ་ཛི་ནཱམྦ་ར་དྷ་རཱ་ཡ་ཧཱུྃ་ཧཱུྃ་ཕཊ། དབང་ལྡན་དུ་ཨོཾ་མ་ཧཱ་ངྷཱུམྦཱནྡྷཀཱ་ར་ཝ་པུ་ཥཱ་ཡ་ཧཱུྃ་ཧཱུྃ་ཕཊ། ཅེས་བྲིའོ། །ཁྲོ་བོའི་ཞལ་རྣམས་ཀྱི་བར་བརྒྱད་དུ་ཉི་མ་དང་ཟླ་བའི་སྟེང་དུ་རྡོ་རྗེ་ཕྱེད་པ་རེ་བྲི་བར་བྱའོ། །ཞེས་གསུང་ངོ༌། །དེའི་ཕྱི་རོལ་དུ་མུ་ཁྱུད་ལ་ཕྱིར་བཟློག་པ་སྲུང་བ་ཆེན་མོའི་སྔགས་བྲི་བར་བྱ་སྟེ། ན་མཿས་མནྟ་ཀཱ་ཡ་ཝཱཀྩིཏྟ་བཛྲ་ཧེ་རུ་ཀཱ་ནཱཾ། ཨོཾ་ཧཱུྃ་བཛྲ་ཧེ་རུ་ཀ ཙཀྲ་ཝརྟི་སརྦ་ལོ་ཀི་ལོ་ཀཏྟོ་ར་ནི། ཡནྟྲ། མནྟྲ། ཏནྟྲ། ཙཱུརྞ་པྲ་ཡོ་ག་དེ་ནི་ཡེ་ན་ཀེ་ན། ཙི་ཏ་ཀྲི་ཏཱ་ནི་སརྦཱཾ་ཨཱ་ཀཌྜཡ་ཨཱ་ཀཌྜཡ། ཏརྫཛ་ཡ་ཏརྫཛ་ཡ། གྲྀཧྞ་གྲྀཧྞ། བྷཀྵ་ཡ་བྷཀྵ་ཡ། ཏྲཱ་ས་ཡ་ཏྲཱ་ས་ཡ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཀྵྨཱཾ་ཀྵྨཱཾ། ཛཽཾཎ་ཛཽཾཎ། མ་ཐ་མ་ཐ། བི་དྷྭཱནྶ་ཡ་བི་དྷྭཱནྶ་ཡ། ཤ་ཏ་ས་ཧ་སྲ་དྷ་ཙཱུརྞ་ཡ། ཨོཾ་ཕཊ་བཛྲ་ཧེ་རུ་ཀ་ཨུཥྞཱི་ཥ། ཙཀྲ་ཝརྟི་ཏ་སྱཻ་བྃ་མུ་ཁྃ་ཙཀྵུཿབནྡྷ་བནྡྷ་ཧཱུྃ་ཧཱུྃ། ཆེ་གེ་མོ་ཤཱནྟིཾ་ཀུ་རུ་ཧཱུྃ་ཧཱུྃ་ཕཊ་ཨོཾ་སྭཱ་ཧཱ། དེའི་ཕྱི་རོལ་དུ་མུ་ཁྱུད་ཕྲ་མོ་ཞིག་ལ་ཀྵའི་ཕྲེང་བ་བྲི་བར་བྱའོ། །དེའི་ཕྱི་རོལ་དུ་མུ་ཁྱུད་ཕྲ་མོ་ཞིག་ལ་དབྱངས་ཡིག་ཚར་གཉིས་གཡོན་སྐོར་དུ་བྲི་བར་བྱའོ། །དེའི་ཕྱི་རོལ་དུ་ཐ་ལོག་གི་ཕྲེང་བ་བྲི་བར་བྱའོ། །དེའི་ཕྱི་རོལ་དུ་རྡོ་རྗེའི་ཕྲེང་བས་ཀུན་ནས་བསྐོར་བའོ། །སྔགས་ཐམས་ཅད་ལ་མིང་དང་སྤེལ་བའི་དུས་སུ་ལས་དང་རྗེས་སུ་མཐུན་པའི་ཤམ་བུ་གདགས་པར་བྱ་སྟེ། དེའང་སྲུང་བ་ལ་རཀྵ་ཀུ་རུ་ཞེས་བྱ་བ་དང༌། ནད་དང་སྡུག་བསྔལ་ཞི་བར་འདོད་ན་ཤཱནྟིཾ་ཀུ་རུ་ཞེས་བྱ་བ་དང༌། རྒྱས་པར་འདོད་ན་ཚེ་དང་བསོད་ནམས་པུཥྚིཾ་ཀུ་རུ་ཞེས་བྱ་བ་དང༌། དབང་དུ་བྱ་བར་འདོད་ན་ཆེ་གེ་མོ་བ་ཤཾ་ཀུ་རུ་ཞེས་བྱའོ། །དྲག་པོའི་ལས་རྣམས་བསྒྲུབ་བྱའི་མིང་དང་ཆེ་གེ་མོ་མཱ་ར་ཡ་ཕཊ། ཅེས་བྱ་བ་ལ་སོགས་པ་གང་འདོད་པ་དང་སྤེལ་བར་བྱའོ། །ཕྱིར་བཟློག་པ་དང་དྲག་པོའི་ལས་རྣམས་ལ་ཡིག་མགོ་ཕྱིར་བསྟན་པ་བྲི་བར་བྱའོ། །སྲུང་བ་ལ་སོགས་པ་ལས་འཇམ་པོ་རྣམས་ལ་ཡི་གེའི་མགོ་ནང་དུ་བསྟན་ལ་བྲི་བར་བྱའོ། །ཚོན་རྩིའི་ཁ་དོག་ནི་སྤྱིར་མི་དགོས་མོད་ཀྱི་ཚོན་གྱིས་བྲི་བར་འདོད་ན། སྣ་ཚོགས་རྡོ་རྗེའི་ལྟེ་བ་དང་ཐུགས་ཀྱི་འཁོར་ལོ་སྔོན་པོར་བྱ། སྐུའི་དཀར། གསུང་གི་དམར། སྣ་ཚོགས་རྡོ་རྗེ་ཆ་གཉིས་དང༌། དཀྱིལ་འཁོར་གྱི་ཕྱོགས་དང་སྒོ་བཞི་དང༌། ཞལ་རྡོ་རྗེ་དང་བཅས་པ་དང༌། གཞི་རྣམས་ནི་ཕྱོགས་མདོག་སྟེ། ཤར་སྔོ། ལྷོ་སེར། ནུབ་དམར། བྱང་ལྗང༌། ཟླ་བ་གཅིག་དཀར། ཉི་མ་གཅིག་གཉིས་དམར། གཞན་རྣམས་ནི་ཇི་ལྟར་མཛེས་པས་བྲི་བར་བྱའོ། །ཇི་ལྟར་བྲི་བའི་དབྱིབས་བསྟན་ཟིན་ཏོ།། །།བྲིས་ནས་ཇི་ལྟར་བསྒྲུབ་པར་བྱ་བ་ནི། རབ་ཏུ་གནས་པ་གཞུང་གང་ཡང་རུང་བ་བཞིན་བྱས་ལ། དེ་ནས་ལས་འཇམ་པོ་རྣམས་ལ་རང་གི་ལུས་ཀྱི་མགོ་དང་དཔུང་པ་ལ་བཅང་བའམ། གསེར་རམ་དངུལ་གྱི་བུམ་པའི་ནང་དུ་བདུད་རྩི་དང་དཀར་གསུམ་གྱིས་སྤངས་པའི་འབྲུ་སྣ་ཚོགས་ཀྱི་དབུས་སུ་ཙནྡན་དང་ལྡན་པའི་སྲད་བུ་དཀར་པོས་དཀྲིས་ཏེ། འབུའི་དབུས་སུ་བཞག་ལ། རྐང་པ་བརྒྱད་པ་ཟློས་ཤིང་མཆོད་པ་བྱས་པས་བཅང་བ་ཡིན་ནོ། །དྲག་པོ་རྣམས་ལ་རྫའམ་རྡོ་རྗེའི་བུམ་པར། གསད་པར་འདོད་ན་ཁྲག་དང་དུག་གི་ནང་དུ་བཞག་ལ། སྨྱོ་བར་འདོད་ན་ཆང་གི་ནང་དུ་བཅུག་སྟེ་སའི་འོག་ཏུ་སྦ་བ་ཡིན་ནོ། །དེ་ལྟར་འཁོར་ལོ་བསྒོམ་པ་དང་བཅང་བ་ལ་བརྟེན་ནས་རྩ་བ་དང་ཡན་ལག་གི་ལས་ཐམས་ཅད་འགྲུབ་པ་ཡིན་ནོ། །ཞེས་རྒྱུད་ལས་འབྱུང་བ་ཡིན་ནོ། །བསྒོམ་དང་བྲི་བའི་མན་ངག་རབ་ཟབ་པ། །ངེས་བརྗོད་རྒྱུད་ལས་མན་ངག་ཇི་བཞིན་བཏུས། །ལས་འདིས་འགྲོ་ཀུན་བདུད་ཀྱི་ཚོགས་བཅོམ་སྟེ། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ངེས་པར་བརྗོད་པ་རྒྱུད་བླ་མའི་ལེའུ་ཉི་ཤུ་རྩ་གཅིག་དང༌། རྩ་གཉིས་པ་ལས་འབྱུང་བའི་འཁྲུལ་འཁོར་བསྒོམ་པ་དང་བྲིས་ཏེ་བཅངས་པས་ལས་དུ་མ་འགྲུབ་པའི་སྒྲུབ་ཐབས་འདི། དད་པས་ལན་མང་དུ་གསོལ་བ་འདེབས་པའི་སློབ་མ་རྩཱ་མིའི་ངོར་ཤཱཀྱའི་དགེ་བསྙེན་གྲགས་པ་རྒྱལ་མཚན་གྱིས་ཉེ་བར་སྦྱར་བ་རྫོགས་སོ། །འདིས་བསྟན་པ་དང་སེམས་ཅན་ལ་ཕན་ཐོགས་པར་གྱུར་ཅིག། མངྒ་ལཾ་བྷ་ཝ་ཏུ།། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
Leave a Reply