སྒྲོལ་མའི་གསོལ་འདེབས་མཎྜལ་བཞི་པ།

༼ཉ༽

༄༅། །སྒྲོལ་མའི་གསོལ་འདེབས་མཎྜལ་བཞི་པ་བཞུགས།།

༄༅། །ན་མོ་གུ་རུ་ཝེ། སྲོད་དང་ཐོ་རངས་ལངས་པར་བྱས་ནས། །གཉིས་གསུམ་བདུན་དུ་མངོན་པར་བརྗོད་ན། །བུ་འདོད་པས་ནི་བུ་ཐོབ་འགྱུར་ཞིང༌། །ནོར་འདོད་པས་ནི་ནོར་རྣམས་ཉིད་ཐོབ། །འདོད་པ་ཐམས་ཅད་ཐོབ་པར་འགྱུར་ཏེ། །བགེགས་རྣམས་མེད་ཅིང་སོ་སོར་འཇོམས་འགྱུར། །ཞེས་པ་ལ་བརྟེན་ནས་མཎྜལ་བཞི་པའི་གསོལ་བ་འདེབས་པ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ལ་གསུམ། དུས་དང༌། གནས་དང༌། རྟེན་དང་མཆོད་པ་བཤམ་པའོ། །དུས་ནི་བསོད་ནམས་བསག་པ་ཡིན་ན་ཚེས་བརྒྱད་དམ་ཉ་སྟོང་ལྟ་བུ་ལ་བྱ། བར་ཆད་སེལ་ན། ནད་རིམས་དང༌། འདྲེ་དང༌། ཆོམ་རྐུན་ལ་སོགས་པ་དང༌། ཕ་རོལ་གྱི་དམག་ཚོགས་དང༌། རྨི་ལམ་ངན་པ་ལ་སོགས་པ་བྱུང་བའི་དུས་སུའོ། །འདོད་པའི་དོན་བསྒྲུབ་ན། ནང་པར་ལྟ་བུ་དོན་སྒྲུབ་པའི་དོ་ནུབ་བྱ་སྟེ་དུས་སུའོ། །གནས་ནི་གཙུག་ལག་ཁང་ངམ། མཆོད་ཁང་ལ་སོགས་པ་ཉམས་དགའ་བར་བྱའོ། །རྟེན་ནི་བླ་མ་ཡི་དམ་སྤྱི་དང༌། དཀོན་མཆོག་གསུམ་གྱི་རྟེན་ལུགས་མ་དང༌། རས་བྲིས་ལ་སོགས་པ་ཅི་རིགས་པ་དགྲམ། རྗེ་བཙུན་མའི་སྐུ་ལུགས་མའམ། བྲིས་སྐུ་གང་རུང་ཞིག་བཞུགས་སུ་གཞུག་གོ །མཆོད་པ་ནི་སྟེང་དུ་བླ་རེ། རྔ་ཡབ་ལ་སོགས་པ་ཅི་རིགས་པས་བརྒྱན། མཎྜལ་ནི་རེ་ཁའི་མཎྜལ་ཟླུམ་པོ་ཁོར་ཡུག་གཉིས་པ་བཞི་བྲིའོ། །ཡང་ཤིང་ངམ་འཁར་བའི་མཎྜལ་བཞི། གཅིག་ལས་མེད་ན་ཡང་བསྐྱར་ལ་དབུལ། མར་མེ་བཞི། ལྷ་བཤོས་བཞི། གྲུབ་ན་རེང་བུ་བཞི། ཡོན་ཆབ་དང༌། དྲི་མཆོག་རྣམས་གྲུབ་ན་བཞི་བཞི། མེད་ན་ཅི་རིགས་པ་བཤམ་མོ། །མེ་ཏོག་ནི་ཟངས་གཞོང་ལ་སོགས་པར་བསགས་ལ་གསོལ་བ་འདེབས་ཙ་ན་འཐོར་ཞིང་བྱའོ། །དངོས་གཞི་ལ་གསུམ་སྟེ། སྐྱབས་འགྲོ་སེམས་བསྐྱེད་བྱ་བ་དང༌། དཀོན་མཆོག་སྤྱི་ལ་གསོལ་བ་གདབ་པ་དང༌། རྗེ་བཙུན་མ་ལ་གསོལ་བ་གདབ་པའོ། །དང་པོ་ནི། སངས་རྒྱས་ཆོས་དང་ཚོགས་ཀྱི་མཆོག་བཅས་ལ། །བྱང་ཆུབ་མ་ཐོབ་བར་དུ་བདག་སྐྱབས་མཆི། །བདག་གིས་བསྙེན་སྒྲུབ་བགྱིས་པ་འདི་དག་གིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་བརྗོད་ལ་དོན་ཡིད་ལ་བྱའོ། །གཉིས་པ་དཀོན་མཆོག་སྤྱི་ལ་མཆོད་པ་བྱ་བ་ནི། དང་པོ་བླ་མ་ལ་ཕྱག་བྱ། དེ་ནས་ཡི་དམ་ལ། དེ་ནས་བུདྡྷ་ལ། དེ་ནས་བྱང་སེམས་ལ་ཕྱག་བྱ། དེ་ནས་མཆོད་པ་དང༌། མཎྜལ་དང་པོ་དབུལ། ཡན་ལག་བདུན་པ་རྒྱས་པའམ་བསྡུས་པ་གང་རུང་བ་ཅིག་བྱས་ལ། འདོད་པའི་དོན་གང་སྒྲུབ་པ་དེ་ལ་གསོལ་བ་དྲག་ཏུ་གདབ་བོ། །གསུམ་པ་རྗེ་བཙུན་མ་ལ་གསོལ་བ་གདབ་པ་ལ་གསུམ་སྟེ། དང་པོ་རྗེ་བཙུན་མའི་རྟེན་མདུན་དུ་བཤམས་ལ། དེའི་ཐུགས་ཀ་ནས་འོད་འཕྲོས་པས་པོ་ཏ་ལ་ནས་ཡེ་ཤེས་པ་སྤྱན་དྲངས་ལ་གཉིས་སུ་མེད་པར་བསྟིམ་མོ། །ཡང་ཐུགས་ཀ་ནས་འོད་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྗེ་བཙུན་མའི་རྣམ་པར་སྤྱན་དྲངས་ལ་བསྟིམ་མོ། །དེ་ནས་དུས་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོར་མོས་པར་བྱས་ཏེ། ངག་ཏུ། གློག་དང་འདྲ་བའི་སྤྱན་མངའ་མ། །དཔའ་མོ་ཏཱ་རེ་ཏུཏྟཱ་རེ། །སངས་རྒྱས་ཞལ་གྱི་པདྨ་ཡི། །གེ་སར་ལས་བྱུང་ཁྱོད་ལ་འདུད། །སྟོན་ཀའི་ཟླ་བ་རྒྱས་པ་ཡི། །དཀྱིལ་འཁོར་དང་མཚུངས་ཞལ་མངའ་མ། །མཆོག་སྦྱིན་ཕྱག་རྒྱ་ཨུཏྤ་ལ། །བསྣམས་མ་ཁྱོད་ལ་ཕྱག་འཚལ་ལོ། །འཁོར་བའི་གཟེབ་ལས་ཏུ་རེ་ཡི། །སྭཱ་ཧཱས་ཉོན་མོངས་ཞི་བར་མཛོད། །ཨོཾ་གྱི་ངོ་བོ་ཉིད་ཀྱིས་ནི། །ཚངས་པའི་སྒོ་འབྱེད་ཁྱོད་ལ་འདུད། །འཇིགས་པ་ཆེན་པོ་བརྒྱད་ལས་ནི། །འཇིག་རྟེན་ཐམས་ཅད་སྐྱོབ་པར་མཛད། །ཀུན་གྱི་མ་རུ་གྱུར་པ་ཡི། །སྒྲོལ་མ་ཡུམ་ལ་ཕྱག་འཚལ་ལོ། །ཞེས་པས་ཕྱག་བྱ། དེ་ནས་མཆོད་པ་དབུལ་བ་ནི་ངག་ཏུ། དྲི་མེད་གཙང་ཞིང་ཡན་ལག་བརྒྱད་ལྡན་ཆུ། །ཐང་སྐྱེས་ཆུ་སྐྱེས་ཆུ་ཆེན་མེ་ཏོག་བཅས། །དྲི་ཞིམ་ཡིད་འོང་མཆོད་ཡོན་དམ་པ་འདི། །རྒྱལ་བ་སྐྱེད་པའི་ཡུམ་ལ་མཆོད་པར་བགྱི། །གུ་རུ་ཏཱ་རཱ་བཛྲ་ཨརྒྷཾ་པཱུ་ཛ་ཨཱཿཧཱུྃ། དུས་གསུམ་རྒྱལ་བའི་དབུ་ལ་མཆོད་འབུལ་མ། །པུཥྤེ་དཀར་མོ་ཞལ་གཅིག་ཕྱག་གཉིས་མ། །ཐང་སྐྱེས་ཆུ་སྐྱེས་མེ་ཏོག་བཀོད་མང་བསྣམས། །རྒྱལ་བ་སྐྱེད་པའི་ཡུམ་ལ་མཆོད་པར་བགྱི། །གུ་རུ་ཏཱ་རཱ་བཛྲ་པུཥྤེ་པཱུ་ཛ་ཨཱཿཧཱུྃ། དུས་གསུམ་རྒྱལ་བའི་ཤངས་ལ་མཆོད་འབུལ་མ། །སྤོས་མ་དུད་ཁ་ཞལ་གཅིག་ཕྱག་གཉིས་མ། །ལྷན་སྐྱེས་སྦྱར་དང་སྤོས་གྱུར་སྤོས་ཁང་བསྣམས། །རྒྱལ་བ་སྐྱེད་པའི་ཡུམ་ལ་མཆོད་པར་བགྱི། །གུ་རུ་ཏཱ་རཱ་བཛྲ་དྷཱུ་པེ་པཱུ་ཛ་ཨཱཿཧཱུྃ། དུས་གསུམ་རྒྱལ་བའི་སྤྱན་ལ་མཆོད་འབུལ་མ། །དཱི་པཾ་དམར་སྐྱ་ཞལ་གཅིག་ཕྱག་གཉིས་མ། །ཉི་ཟླ་རིན་ཆེན་སྣང་གསལ་སྣ་ཚོགས་བསྣམས། །རྒྱལ་བ་སྐྱེད་པའི་ཡུམ་ལ་མཆོད་པར་བགྱི། །གུ་རུ་ཏཱ་རཱ་བཛྲ་ཨཱ་ལོ་ཀེ་པཱུ་ཛ་སཱཿཧཱུྃ། དུས་གསུམ་རྒྱལ་བའི་ཐུགས་ལ་མཆོད་འབུལ་མ། །དྲི་མ་ལྗང་གུ་ཞལ་གཅིག་ཕྱག་གཉིས་མ། །ཨ་ཀར་ཙནྡན་ག་པུར་དུང་ཆོས་བསྣམས། །རྒྱལ་བ་སྐྱེད་པའི་ཡུམ་ལ་མཆོད་པར་བགྱི། །གུ་རུ་ཏཱ་རཱ་བཛྲ་གནྡྷེ་པཱུ་ཛ་ཨཱཿཧཱུྃ། དུས་གསུམ་རྒྱལ་བའི་ལྗགས་ལ་མཆོད་འབུལ་མ། །རོ་མ་དམར་མོ་ཞལ་གཅིག་ཕྱག་གཉིས་མ། །རོ་དང་བཅུད་ལྡན་ལྷ་རྫས་ཞལ་ཟས་བསྣམས། །རྒྱལ་བ་སྐྱེད་པའི་ཡུམ་ལ་མཆོད་པར་བགྱི། །གུ་རུ་ཏཱ་རཱ་བཛྲ་ནཻ་ཝི་དྱེ་པཱུ་ཛ་ཨཱཿཧཱུྃ། དུས་གསུམ་རྒྱལ་བའི་སྙན་ལ་མཆོད་འབུལ་མ། །སྒྲ་མ་སྔོན་མོ་ཞལ་གཅིག་ཕྱག་གཉིས་མ། །པི་ཝང་གླིང་བུ་སིལ་སྙན་སྣ་ཚོགས་བསྣམས། །རྒྱལ་བ་སྐྱེད་པའི་ཡུམ་ལ་མཆོད་པར་བགྱི། །གུ་རུ་ཏཱ་རཱ་བཛྲ་ཤཔྟ་པཱུ་ཛ་ཨཱཿཧཱུྃ། ས་གཞི་སྤོས་ཀྱིས་བྱུགས་ཤིང་ཆག་ཆག་བཏབ། །རི་རབ་གླིང་བཞིས་ལེགས་པར་བརྒྱན་པ་འདི། །སངས་རྒྱས་ཞིང་དུ་དམིགས་ནས་ཕུལ་བ་ཡིས། །འགྲོ་ཀུན་རྣམ་དག་ཞིང་དུ་སྐྱེ་བར་ཤོག །གུ་རུ་ཏཱ་རཱ་བཛྲ་མཎྜལ་པཱུ་ཛ་ཨཱཿཧཱུྃ། དེ་ནས་རྗེ་བཙུན་མ་ལ་བློ་བཀལ་བའི་དད་གུས་ཀྱི་བསམ་པ་རྩེ་གཅིག་པས་བསྟོད་པ་ཚར་གཉིས་གདོན། དེ་ནས་དགེ་སློང་མ་དཔའ་མོས་མཛད་པའི་ཡན་ལག་བདུན་པ་ཚར་གཅིག་བྱ་སྟེ། རྗེ་བཙུན་འཕགས་མ་སྒྲོལ་མ་དང༌། །ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་བཅས་ཐམས་ཅད་ལ། །ཀུན་ནས་དང་བས་ཕྱག་འཚལ་ལོ། །མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་ལ་སོགས་པ། །དངོས་འབྱོར་ཡིད་ཀྱིས་སྤྲུལ་ནས་འབུལ། །འཕགས་མའི་ཚོགས་ཀྱིས་བཞེས་སུ་གསོལ། །ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པའི། །སྡིག་པ་ཐམས་ཅད་བཤགས་པར་བགྱི། །ཉན་ཐོས་རང་རྒྱལ་བྱང་ཆུབ་སེམས། །སོ་སོ་སྐྱེ་བོ་ལ་སོགས་པའི། །རྒྱུ་དང་འབྲས་བུས་བསྡུས་པ་ཡི། །བསོད་ནམས་ལ་ནི་བདག་ཡི་རང༌། །སེམས་ཅན་རྣམས་ཀྱི་བསམ་པ་དང༌། །བློ་ཡི་བྱེ་བྲག་ཇི་ལྟ་བར། །ཆེ་ཆུང་ཐུན་མོང་ཐེག་པ་ཡི། །ཆོས་ཀྱི་འཁོར་ལོ་བསྐོར་དུ་གསོལ། །འཁོར་བ་ཇི་སྲིད་མ་སྟོངས་བར། །མྱ་ངན་མི་འདའ་ཐུགས་རྗེ་ཡིས། །སྡུག་བསྔལ་རྒྱ་མཚོར་བྱིང་བ་ཡི། །སེམས་ཅན་རྣམས་ལ་གཟིགས་སུ་གསོལ། །བདག་གིས་བསོད་ནམས་ཅི་བསགས་པ། །ཐམས་ཅད་བྱང་ཆུབ་རྒྱུར་གྱུར་ནས། །རིང་པོར་མི་ཐོགས་འགྲོ་བ་ཡི། །འདྲེན་པའི་དཔལ་དུ་བདག་གྱུར་ཅིག །ཅེས་པའི་ཡན་ལག་བདུན་པ་བྱའོ། །དེ་ནས་རང་དང་མདུན་གྱི་རྗེ་བཙུན་མ་དམིགས་པ་གསལ་བར་བྱས་ལ། རྩ་སྔགས་ཡི་གེ་བཅུ་པ་སུམ་བརྒྱ་བགྲང་ངོ༌། །དེ་ཡང་ནད་ཞི་བར་འདོད་ན་ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་གྲ་ཧེ་བྷྱཿཤཱནྟིཾ་ཀུ་རུ་སྭཱ་ཧཱ། ཞེས་བརྗོད། དེ་བཞིན་དུ་གདོན་ཞི་བར་འདོད་ན། སརྦ་དུཥྚཱན་བྷྱཿཤཱནྟིཾ་ཀུ་རུ་སྭཱ་ཧཱ། ཞེས་བརྗོད། བགེགས་ཞི་བར་འདོད་ན་སརྦ་བིགྷྣཱ་ན་བྷྱཿཤཱནྟིཾ་ཀུ་རུ་སྭཱ་ཧཱ། ཞེས་བརྗོད། རིམས་ནད་ཞི་བར་འདོད་ན་སརྦ་ཛྭ་རེ་བྷྱཿཤཱནྟིཾ་ཀུ་རུ་སྭཱ་ཧཱ། དུས་མིན་འཆི་བ་ལ། ཨ་ཀཱ་ལ་མྲྀ་ཏྱཱུ། ལྟས་ངན་པ་ལ། དུརྨཱི་ཏ། རྨི་ལམ་ངན་པ་ལ། དུརྶོ་པྣི། རྣམ་གཡེང་ལ། ཙིཏྟ་ཀུ་ལེ་བྷྱཿ ཞེས་བརྗོད། དགྲ་དང་ཆོམ་རྐུན་ཉེར་འཚེ་ཞི་བར་འདོད་ན། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་ཨུ་པ་དྲ་བེ་བྷྱཿཤཱནྟིཾ་ཀུ་རུ་སྭཱ་ཧཱ། ཞེས་བརྗོད། དེ་ནས་རྗེ་བཙུན་མ་ལ་རྩེ་གཅིག་ཏུ་དམིགས་ལ་ཡི་གེ་གཉིས་ཀྱི་སྦྱོར་བ་བླ་མ་ཁ་ཆེ་བའི་གདམས་ངག་ཏཱ་རེ་ཞེས་པ་སུམ་བརྒྱ་བརྗོད། དེ་ནས་མཎྜལ་ཕུལ་ལ་གསོལ་བ་གདབ་སྟེ། རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །བདག་དང་མཐའ་ཡས་སེམས་ཅན་ཐམས་ཅད་ཀྱི། །སྒྲིབ་གཉིས་བྱང་ནས་ཚོགས་གཉིས་ཡོངས་རྫོགས་ཏེ། །རྫོགས་པའི་སངས་རྒྱས་འཐོབ་པར་མཛད་དུ་གསོལ། །དེ་མ་ཐོབ་ཀྱི་ཚེ་རབས་ཀུན་ཏུ་ཡང༌། །ལྷ་དང་མི་ཡི་བདེ་བ་མཆོག་ཐོབ་ནས། །ཐམས་ཅད་མཁྱེན་པ་སྒྲུབ་པར་བྱེད་པ་ཡི། །བར་ཆད་གདོན་བགེགས་རིམས་དང་ནད་ལ་སོགས། །དུས་མིན་འཆི་བར་གྱུར་བ་སྣ་ཚོགས་དང༌། །རྨི་ལམ་ངན་དང་མཚན་མ་ངན་པ་དང༌། །འཇིགས་པ་བརྒྱད་སོགས་ཉེ་བར་འཚེ་བ་རྣམས། །མྱུར་དུ་ཞི་ཞིང་མེད་པར་མཛད་དུ་གསོལ། །འཇིག་རྟེན་འཇིག་རྟེན་ལས་ནི་འདས་པ་ཡི། །བཀྲ་ཤིས་བདེ་ལེགས་ཕུན་སུམ་ཚོགས་པ་རྣམས། །འཕེལ་ཞིང་རྒྱས་ནས་བསམ་པའི་དོན་རྣམས་ཀུན། །འབད་མེད་ལྷུན་གྱིས་གྲུབ་པར་མཛད་དུ་གསོལ། །སྒྲུབ་ལ་བརྩོན་ཞིང་དམ་ཆོས་འཕེལ་བ་དང༌། །རྟག་ཏུ་ཁྱེད་སྒྲུབ་ཞལ་མཆོག་མཐོང་བ་དང༌། །སྟོང་ཉིད་དོན་རྟོགས་བྱང་སེམས་རིན་པོ་ཆེ། །ཡར་ངོའི་ཟླ་བཞིན་འཕེལ་རྒྱས་མཛད་དུ་གསོལ། །ཞེས་གསོལ་བ་གདབ། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །བཀྲ་ཤིས་ནི། བདག་གིས་ཚེས་རབས་ཀུན་ནས་བསྒྲུབས་པའི་ལྷ། །དུས་གསུམ་སངས་རྒྱས་ཀུན་གྱི་ཕྲིན་ལས་མ། །སྔོ་ལྗང་ཞལ་གཅིག་ཕྱག་གཉིས་མྱུར་ཞིང་དཔའ། །ཡུམ་གྱུར་ཨུཏྤ་ལ་བསྣམས་མའི་བཀྲ་ཤིས་ཤོག །རྗེ་བཙུན་མ་ལ་གསོལ་འདེབས་མཎྜལ་དང་མཆོད་པ་ཚར་གསུམ་དུ་དབུལ་བ་ལས་དང་པོའོ། །གཉིས་པ་ཕྱག་འཚལ་བ་ནི། འཇིག་རྟེན་གསུམ་མགོན་ཡུམ་གྱུར་སྤྱན་ཡངས་མ། །དུས་གསུམ་སངས་རྒྱས་ཐམས་ཅད་སྐྱེད་པའི་ཡུམ། །གཉིས་མེད་ཡེ་ཤེས་ངང་ལས་མ་གཡོས་ཀྱང༌། །ཐུགས་རྗེའི་དབང་གིས་འགྲོ་དོན་སྣ་ཚོགས་མཛད། །བྱམས་པའི་ཡུམ་གྱུར་ཁྱོད་ལ་ཕྱག་འཚལ་ལོ། །སྐུ་མདོག་ལྗང་གུས་ཕྲིན་ལས་སྣ་ཚོགས་མཛོད། །ཡོན་ཏན་རབ་རྒྱས་བཅུ་དྲུག་ལོན་པའི་ཚུལ། །འགྲོ་ལ་རབ་དགེས་ཞལ་ནི་འཛུམ་པ་དང༌། །ཞི་བའི་སྤྱན་གྱིས་འཇིག་རྟེན་གསུམ་ལ་གཟིགས། །ཐུགས་རྗེ་ཆེ་མངའ་ཁྱོད་ལ་ཕྱག་འཚལ་ལོ། །བྱང་སེམས་རང་བཞིན་ཟླ་བ་གདན་དུ་བཏིང༌། །ཉོན་མོངས་མི་བསྐྱོད་རྡོ་རྗེའི་སྐྱིལ་ཀྲུང་བཞུགས། །སྒྲིབ་པ་ཀུན་སྤངས་པདྨའི་གདན་ལ་བཞུགས། །ཟག་མེད་བདེ་རྒྱས་ཟླ་བའི་རྒྱབ་ཡོལ་ཅན། །ཟག་མེད་བདེ་བ་ཆེ་ལ་ཕྱག་འཚལ་ལོ། །ན་བཟའ་མཆོག་དང་རིན་ཆེན་དུ་མས་སྤྲས། །ཕྱག་གཡས་མཆོག་སྦྱིན་སྒྲུབ་ལ་དངོས་གྲུབ་སྟེར། །གཡོན་པ་ཨུཏྤལ་སྐྱོན་བྲལ་དག་པའི་རྟགས། །ཕྱག་གཉིས་ཐབས་དང་ཤེས་རབ་ཟུང་དུ་འབྲེལ། །མཐའ་བྲལ་ཟུང་འཇུག་སྐུ་ལ་ཕྱག་འཚལ་ལོ། །དེ་ནས་གོང་མ་བཞིན་མཆོད་འབུལ་བྱས་ལ། བསྟོད་པ་ཚར་གསུམ་བཏོན་ལ། ཡན་ལག་བདུན་པ་ནས་བཀྲ་ཤིས་ཀྱི་བར་སྔར་དང་འདྲ། རྗེ་བཙུན་མའི་མཎྜལ་དང་མཆོད་པ་གཉིས་པའོ། །གསུམ་པ་ཕྱག་འཚལ་བ་ནི། ཐུགས་རྗེ་ཆེན་པོ་སྒྲོལ་མ་ཡུམ་ལ་ཕྱག་འཚལ་ལོ། །ཕྱག་སྟོང་སྤྱན་སྟོང་སྒྲོལ་མ་ཡུམ་ལ་ཕྱག་འཚལ་ལོ། །སྨན་པའི་རྒྱལ་པོ་སྒྲོལ་མ་ཡུམ་ལ་ཕྱག་འཚལ་ལོ། །ཐུགས་རྗེ་ཐབས་མཁས་སྒྲོལ་མ་ཡུམ་ལ་ཕྱག་འཚལ་ལོ། །ས་ལྟར་བརྟག་གྱུར་སྒྲོལ་མ་ཡུམ་ལ་ཕྱག་འཚལ་ལོ། །ཆུ་ལྟར་བསིལ་གྱུར་སྒྲོལ་མ་ཡུམ་ལ་ཕྱག་འཚལ་ལོ། །མེ་ལྟར་སྨིན་མཛད་སྒྲོལ་མ་ཡུམ་ལ་ཕྱག་འཚལ་ལོ། །རླུང་ལྟར་རྒྱས་མཛད་སྒྲོལ་མ་ཡུམ་ལ་ཕྱག་འཚལ་ལོ། །ཞེས་པས་ཕྱག་འཚལ་ལོ། །མཆོད་དབུལ་གོང་དང་འདྲ། དེ་ནས་བསྟོད་པ་ཚར་བདུན་གདོན། ཡན་ལག་བདུན་པ་སྔར་དང་འདྲ། དེ་ནས་རྩ་སྔགས་ལ་གང་ཞི་བར་འདོད་པའི་སྤེལ་ཚིག་བཏགས་ལ་སྟོང་དུ་ཁ་ཚང་བར་བྱ་བའི་ཕྱིར་བཞི་བརྒྱ་བགྲང་ངོ༌། །གོང་མ་བཞིན་ཡི་གེ་གཉིས་ཀྱི་སྦྱོར་བ་ཏཱ་རེ་ཞེས་པ་བཞི་བརྒྱ་བགྲང་ངོ༌། །དེ་ནས་མཎྜལ་ཐ་མ་དབུལ། རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །ཞེས་པ་ནས། བཀྲ་ཤིས་ཀྱི་བར་སྔར་དང་འདྲ་སྟེ་མཎྜལ་བཞི་པའོ། །མཐར་མཆོད་དབུལ་བྱ་བ་དང༌། འདོད་པའི་དོན་ལ་གསོལ་བ་གདབ་པ་དང༌། བཀྲ་ཤིས་ཀྱི་བར་ལ་ལོང་ཡོད་ཅིང་སྤྲོས་པ་ལ་དགའ་ན་དབྱངས་སུ་གྲུབ་ནའང་དགའོ། །མ་གྲུབ་ན་ཚིགས་བཅད་ཀྱིས་ཀྱང་བཏུབ་བོ། །མཇུག་དགེ་བ་བསྔོ་བ་ནི། བདག་གི་དགེ་བའི་རྩ་བ་འདི་ལ་བརྟེན་ནས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་སྐུ་གསུམ་ཡོན་ཏན་ཕྲིན་ལས་དང་བཅས་པ་མྱུར་དུ་ཐོབ་ནས། མ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་སྡུག་བསྔལ་གྱི་རྒྱ་མཚོ་ཆེན་པོ་མྱུར་དུ་སྐེམས་པར་གྱུར་ཅིག སེམས་ཅན་མ་བསྒྲལ་བ་རྣམས་སྒྲོལ་བའི་མཐུ་ཐོགས་པ་མེད་པ་དང་ལྡན་པར་གྱུར་ཅིག སེམས་ཅན་མ་གྲོལ་བ་རྣམས་དགྲོལ་བའི་མཐུ་ཐོགས་པ་མེད་པ་དང་ལྡན་པར་གྱུར་ཅིག སེམས་ཅན་མྱ་ངན་ལས་མ་འདས་པ་རྣམས་མྱ་ངན་ལས་ཟློ་བར་བྱེད་པའི་མཐུ་ཐོགས་པ་མེད་པ་དང་ལྡན་པར་གྱུར་ཅིག དུས་གསུམ་གྱི་སངས་རྒྱས་ཐམས་ཅད་ཀྱི་བསླབ་པའི་གཞི་མཐའ་དག་ལ་རྗེས་སུ་སློབ་ཅིང༌། བྱང་ཆུབ་སེམས་དཔའི་སྤྱོད་པ་རླབས་པོ་ཆེ་སྤྱད་པ་ལ་མཐུ་ཐོགས་པ་མེད་པ་དང་ལྡན་པར་གྱུར་ཅིག སྒྲོལ་མའི་མཎྜལ་བཞི་པའི་གསོལ་འདེབས་རྗེ་བཙུན་གྲགས་པ་རྒྱལ་མཚན་གྱིས་མཛད་པའོ།།  །།ཨིཐི།། གཏོར་མ་བཞི་བཤམས་པའི་དང་པོ་བཅོམ་ལྡན་འདས་སྒྲོལ་མ་ལ་སངས་རྒྱས་དང་བྱང་ཆུབ་སེམས་དཔས་བསྐོར་བ་ལ་དབུལ། གཉིས་པ་ཆོས་སྐྱོང་ལ་ཕུལ་ལ་ཕྲིན་ལས་གཞོལ། གསུམ་པ་རིགས་དྲུག་ཀུན་ལ་སྦྱིན། བཞི་པ་གཞི་བདག་ལ་ཚིམ་པར་སྦྱིན་ནོ། །འདི་བྲིས་དགེ་བས་རྗེ་བཙུན་མ། །མཉེས་ནས་བདག་གི་སྡིག་སྒྲིབ་རྣམས། །བསལ་ནས་འགྲོ་བའི་དོན་དུ་ནི། །རྫོགས་པའི་སངས་རྒྱས་མྱུར་ཐོབ་ཤོག །མངྒ་ལཾ།།  །། ༈ གུ་རུས་དཔར་རྩ་སྤེལ་བའོ།།

རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག  www.gyalyongsachen.com