༼ཉ༽
༄༅། །སྒྲུབ་ཐབས་སོ་སོའི་ཡིག་སྣ་བཞུགས།།
༄༅། །མགོན་པོ་འཇམ་པའི་དབྱངས་ལ་ཕྱག་འཚལ་ལོ། །བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་ལ་ཆོས་ཀྱི་སྐུའི་རྟེན་ནི་དཔལ་ལྡན་འབྲས་སྤུང་གི་མཆོད་རྟེན་གྱི་རྟེན་ནོ། །ལོངས་སྤྱོད་རྫོགས་པའི་སྐུའི་རྟེན་ནི་ས་པ་ཏ་ཀོངྐའོ། །སྤྲུལ་བའི་སྐུའི་རྟེན་ནི་རྡོ་རྗེའི་གདན་འདི་ཡིན་ཏེ། དེ་བཞིན་གཤེགས་པ་མྱ་ངན་ལས་འདས་པའི་རྗེས་ལ་ཀུ་ས་ལི་བྱང་ཆུབ་སེམས་དཔའི་སྐུ་ཚད་བཞེངས་པར་འདོད་པ་ལ། རང་གི་རྨི་ལམ་དུ་རྒྱུ་ནི་ཙནྡན་གོ་ཤིརྵ་ལས་གྱིས་ཤིག་པར་བསྟན་ནོ། །ཕྱིས་དེ་གང་ལས་རྙེད་སྙམ་པ་དང༌། ཆུ་བོ་ནཻ་རཱ་ཉྫའི་འགྲམ་ན་མ་ཧེ་ཐམས་ཅད་ཉལ་བའི་ས། འོ་མ་འཛག་པའི་ཤིང་གི་ནང་ན་ཡོད་དོ་ཞེས་བསྟན་པ་ལས་དེ་ནས་བླངས་ཏེ། ལྡེ་གུ་བྱས་ནས་འདིའི་བཟོ་སུས་བྱེད་སྙམ་པ་དང༌། གཙང་ཁང་དུ་ཆུག་ལ་ཟླ་ཕྱེད་དུ་སྒོ་མ་འབྱེད་ཅིག་ཅེས་པ་རྨི་ལམ་དུ་བྱུང་སྟེ། དེ་ལྟར་བྱས་པ་དང་ཞག་བཅུ་གཉིས་ལོན་ནས། དེའི་མས་སྔོན་སྟོན་པ་དངོས་སུ་མཐོང་བ་ཅིག་ཡོད་པ་དེ་ཞག་གཅིག་ན་འཆི་བའི་དུས་བྱེད་པས། དོ་ནུབ་ང་འཆི་བས་ཁྱོད་ཀྱིས་བཞེངས་པའི་སྐུ་དེ་སངས་རྒྱས་དངོས་དང་འདྲ་མི་འདྲ་སྟོན་བྱས་པས། བུས་སྔ་རོལ་དུ་ཕྱིན་ནས་བལྟས་པས་ཕྱག་གཡས་པའི་མཐེ་ཆུང་མ་རྫོགས་པ་བུས་བཟོ་བྱས་ནས་བཏགས་སོ། །དེ་ནས་མ་ལ་བསྟན་པས་གཡས་བའི་མཐེ་ཆུང་མི་འདྲ་ཟེར་རོ། །དེ་འདྲ་བའི་བཅོམ་ལྡན་འདས་ཀྱི་སྒྲུབ་ཐབས་འདིའི་ཀླད་ཀྱི་དོན་མཆོད་པར་བརྗོད་ཅིང་བཤད་པར་དམ་བཅའ་བ་ལ། མཆོད་བརྗོད་ཀྱི་དགོས་པ་ནི་བདག་ཡ་རབས་ཀྱི་ཚུལ་ཅན་དང་བར་ཆད་ཞི་བ་སྟེ། རྩོམ་པ་མཐར་ཕྱིན་པའོ། །བསྡུས་པའི་དོན་ནི། ཡུལ་གང་ལ། གང་ཟག་གང་གིས། ཚུལ་ཇི་ལྟར་མཆོད་པར་བརྗོད་པའོ། །ཡན་ལག་གི་དོན་ནི། སྟོབས་དང་མི་འཇིགས་པ་ལ་སོགས་པ་དང་མཚན་དང་དཔེ་བྱད་ཀྱིས་བརྒྱན་པའི་དེ་བཞིན་གཤེགས་པ་ཐམས་ཅད་དང༌། གཙོ་བོ་རིགས་ལྔ་དང༌། ཡུམ་བཞི་ལ་ཕྱག་འཚལ་བའོ། །བཤད་པར་དམ་བཅའ་བ་ནི་ཚོགས་གཉིས་བསགས་པས་དཔལ་ལྡན་ནོ། །ནང་དུ་ནི་ཆོས་ཐམས་ཅད་ཀྱི་སྟོང་པ་རྡོ་རྗེ་ཉིད་ཀ་ལ་གང་གིས་ཇི་ལྟར་མཆོད་པའོ། །ཕྱི་རོལ་དུ་རྡོ་རྗེ་གདན་ནོ། །ཉོན་མོངས་པ་དང་ཤེས་སྒྲིབ་འཇོམས་པས་འཁོར་བར་ཕྱིན་ཅི་ལོག་གི་སྐྱོན་གྱིས་མ་གོས་པ་དཀའ་ཐུབ་ཀྱི་ཆ་ལུགས་སུ་བཞུགས་པ། ཉོན་མོངས་པ་ཐམས་ཅད་ཞི་བ། སངས་རྒྱས་སྒྲུབ་པའི་ཐབས་འདི་གཞན་ལ་ཕན་པའི་དོན་དུའོ། །དེ་ཉིད་ཇི་ལྟ་བུ་སྙམ་པ་ལ། རིགས་ལྔ་དང་ལྷ་མོ་བཞིའོ། །གཟུགས་རྡོ་རྗེ་མ་ལ་སོགས་པ་དྲུག་གི་ཁ་དོག་ཅན། དེ་དག་རིན་པོ་ཆེའི་རྒྱན་ལ་སོགས་ཀྱིས་བརྒྱན་པ་བདག་གིས་བྲིའོ། །ཞེས་བསྟན་ནོ། །གཞུང་གི་དོན་ལ་དང་པོ་མཎྜལ་ལ་བརྟེན་ཏེ་ཚོགས་བསགས་པ་སྟོན་ཏེ། དེ་ལ་དང་པོ་སེམས་བསྐྱེད་དེ། ལྷའི་རྣལ་འབྱོར་དང་ལྡན་པས་མཎྜལ་ལ་བའི་རྣམ་ལྔས་བྱུགས་ཏེ། དེའི་སྟེང་དུ་ཧཱུྃ་སེར་པོ། ཨོཾ་དཀར་པོ། ཏྲཱྃ་སེར་པོ། ཧྲཱིཿདམར་པོ་ལས་དབུས་དང་གཡས་སྐོར་དུ་མི་བསྐྱོད་པའི་རང་བཞིན་ཅན། བཅོམ་ལྡན་འདས་དང་རྣམ་པར་སྣང་མཛད་ལ་སོགས་པ་བཞིས་བསྐོར་བའོ། །ལྃ་དཀར་པོ། མྃ་སྔོན་མོ། པྃ་དཀར་མོ། ཧྲཱིཿལྗང་གུ་ལས་སངས་རྒྱས་སྤྱན་མ་ལ་སོགས་པ་ཡུམ་བཞི་ཤར་ལྷོ་ནས་མཚམས་བཞིར་བསྐྱེད་དེ། གཡས་པ་མཆོག་སྦྱིན། གཡོན་པས་རང་རང་གི་རིགས་དང་མཐུན་པའི་ཨུཏྤ་ལའོ། །ཡང་ན། དེ་རྣམས་ས་བོན་གྱི་འོད་ཀྱིས་སྤྱན་དྲངས་ལ་བཞུགས་སུ་གསོལ་བའོ། །ཡང་ན་སྐད་གཅིག་གིས་སོ། །དེ་ནས་རང་གི་སྙིང་གར་པད་ཟླའི་སྟེང་དུ་ཧཱུྃ་སེར་པོ་ལས་འོད་འཕྲོས་པས་ཡེ་ཤེས་སེམས་དཔའ་སྤྱན་དྲངས་ལ་བསྟིམ་མོ། དེ་ནས་བཅོམ་ལྡན་འདས་ལ་བཛྲ་པུཥྤེ་ཞེས་པས་མེ་ཏོག་ལན་གསུམ་དབུལ། དེ་བཞིན་དུ་སྤོས་ལ་སོགས་པ་རྣམས་སྔགས་དང་གོ་རིམ་བཞིན་དུ་དབུལ་ལོ། །འཁོར་ལ་ཡང་དེ་ཀས་དབུལ་ལོ། །དེ་ནས་ཚད་མེད་བཞི་བསྒོམ། འདོད་པའི་དོན་བསླང་བ་ལ་སོགས་པ་བྱས་ཏེ་བཛྲ་མུཿས་གཤེགས་སུ་གསོལ་ལོ། །དེ་ནས་ལྷའི་རྣལ་འབྱོར་བསྒོམ་པ་ནི་སེམས་ཅན་གྱི་དོན་དུ་སེམས་བསྐྱེད་ལ། ཚོགས་བསག་པ་ནི། སྙིང་གའི་ཧཱུྃ་གི་འོད་ཀྱིས་སྤྱན་དྲངས་པ་འམ། ཡང་ན་རང་བཞིན་གྱིས་གནས་པའི་འོད་ཟེར་གྱིས་གསལ་བར་དམིགས་ལ་ཏིང་ངེ་འཛིན་གྱིས་མེ་ཏོག་ལ་སོགས་པཱུ་ཛ་ལྔ་དབུལ། ཕྱག་བཙལ་ལ་སྡིག་པ་བཤགས་པ་ལ་སོགས་པས་བསོད་ནམས་ཀྱི་ཚོགས་བསགས་ལ། རྒྱལ་བའི་ལམ་བསྟེན་པ་ནི་བཅོམ་ལྡན་འདས་ཀྱི་བསོད་ནམས་དང་ཡེ་ཤེས་ཀྱི་ཚོགས་གཉིས་ལ་བདག་གིས་གནས་པར་བྱའོ། །ཞེས་མོས་པའོ། །དེ་ནས་ཡེ་ཤེས་ཀྱི་ཚོགས་ནི་སྙིང་གར་པད་ཟླའི་སྟེང་དུ་ཧཱུྃ་བསམས་ཏེ། དེའི་འོད་ཀྱི་སྣང་སྲིད་ཐམས་ཅད་ལུས་ལ་སྡུད་པ་ཐ་མའོ། །ལུས་ཀྱང་སྙིང་གའི་ཧཱུྃ་ལ་སྡུད་པ་འབྲིང་ངོ༌། །ཧཱུྃ་ཡང་རིམ་གྱིས་ནཱ་དའི་བར་དུ་སྡུད་པ་བློ་རབ་བོ། །དེ་བརྟན་པར་བྱེད་པའི་སྔགས་ནི། ཨོཾ་སྭ་བྷཱ་ཝ་ཞེས་པ་ལ་སོགས་པའོ། །དེ་ནས་ལྷའི་སྐུ་བསྒོམ་པ་ནི། དབང་པོ་རབ་འབྲིང་གིས་ཧཱུྃ་དང་ནཱ་ད་ལ་སོགས་པའི་འོད་དུ་གནས་པ་དེ་ཡོངས་སུ་གྱུར་པ་ལས་པྃ་ལས་པདྨ་ཨ་ལས་ཟླ་བའི་སྟེང་དུ་ཧཱུྃ་སེར་པོ། དེ་ལ་ཨཱ་ལི་གཡོན་སྐོར་ཀཱ་ལི་གཡས་སྐོར་ལ། ཁ་དོག་དཀར་པོ་དེ་དག་མེ་ལོང་ལྟ་བུའི་ཡེ་ཤེས་སོ། །དེ་དག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་བསྒོམ་པ་ནི་མཉམ་པ་ཉིད་ཀྱི་ཡེ་ཤེས་སོ། །དེའི་སྟེང་དུ་ཧཱུྃ་ལས་རྡོ་རྗེ་སེར་པོ་ཧཱུྃ་གིས་མཚན་པ་སོ་སོར་རྟོག་པའི་ཡེ་ཤེས་སོ། །དེ་ཐམས་ཅད་ཡོངས་སུ་གྱུར་པ་ལས་བྱང་ཆུབ་ཆེན་པོའི་སྐུར་བསྐྱེད་པ་བྱ་བ་ནན་ཏན་གྱི་ཡེ་ཤེས་སོ། །དེ་ཡང་རིམ་གྱིས་བསྒོམས་ཏེ་འོག་ཏུ་བདུད་བཞི་ནི། ཁྱབ་འཇུག་སྔོན་པོ། ཚངས་པ་དཀར་པོ། བརྒྱ་བྱིན་ལྗང་གུ། མ་ཧཱ་དེ་ཝ་དམར་པོ་སྟེ་ཉོན་མོངས་པ་དང་ཕུང་པོའི་དང་ལྷའི་བུའི་དང་འཆི་བདག་གི་བདུད་དེ་གོ་རིམ་བཞིན་ནོ། །དེའི་སྟེང་དུ་སེང་གེའི་ཁྲི་སྟེ། དེ་ནི་ཡན་ལག་བྱ་བ་ནན་ཏན་གྱི་ཡེ་ཤེས་སོ། །འདི་མན་ཆད་སྐུ་ཡོངས་སུ་རྫོགས་པའི་བར་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །ཞི་བའི་ཆ་བྱད་ཅན་ནི་དཀའ་ཐུབ་ཀྱི་ཆ་བྱད་ཅན་ནོ། །དེ་ནས་ཨོཾ་དྷརྨ་དྷཱ་ཏུའི་སྔགས་ཀྱིས་ང་རྒྱལ་བསྐྱེད་པའི་དོན་ནི་བདག་ཉིད་དམ་རང་བཞིན་ཡིན་པར་མོས་པའོ། །དེ་ནས་གཡས་ཕྱོགས་སུ་བྱམས་པ། གཡོན་ཕྱོགས་སུ་སྤྱན་རས་གཟིགས་ཏེ་གཞུང་ལྟར་རོ། །དེ་ནས་གཙོ་བོ་ལ་སྐྱེ་མཆེད་བྱིན་གྱིས་བརླབས་ཏེ། དེའི་དགོས་པ་ནི་མངོན་པར་ཤེས་པ་འཐོབ་པའོ། །དེ་ནས་སྙིང་གར་ཡེ་ཤེས་སེམས་དཔའ་བསྒོམ་སྟེ་པྃ་ལས་པདྨ་ཨ་ལས་ཟླ་བའི་སྟེང་དུ། ཧཱུྃ་སེར་པོ་དེ་ཡོངས་སུ་གྱུར་པ་ལས་རྡོ་རྗེའི་ལྟེ་བ་ལ་ཧཱུྃ་གིས་མཚན་པའོ། །དེ་ནས་སྐུ་གསུང་ཐུགས་བྱིན་གྱིས་བརླབ་པ་ནི། སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་སྔོན་པོ་བསམ་པའོ། །དེ་དག་སྐུ་རྡོ་རྗེ་དང༌། གསུང་རྡོ་རྗེ་དང༌། ཐུགས་རྡོ་རྗེར་བྱས་པའོ། །དེ་ནས་ཡེ་ཤེས་པ་དགུག་གཞུག་བྱ་བ་ནི། ས་བོན་གྱི་འོད་ཀྱིས་བཀུག་ལ་མདུན་དུ་བཞུགས་པ་ལ་པཱུ་ཛ་ལྔ་དབུལ་ལོ། །པད་ཟླའི་གདན་ཡང་དབུལ། ཆུ་གཙང་མ་ཀུ་ཤུས་གཏོར་ཞིང༌། ཨོཾ་སྭ་བྷཱ་ཝའི་སྔགས་བརྗོད་པ་ནི་བསང་གཏོར་རོ། །འོ་མའི་ནང་དུ་འབྲས་བཙོས་ལ་བློས་ཕུལ་བ་ནི་བདུད་རྩི་མྱང་བའོ། །རབ་གནས་བྱེད་ན་དངོས་སུའོ། །དེ་ནས་གང་ཡང་རུང་བའི་བསྟོད་པ་བྱས་ལ་ཡི་གེ་བཞིས་ཡེ་ཤེས་པ་བསྟིམ་སྟེ། ཡེ་ཤེས་སེམས་དཔའ་དམ་ཚིག་ལ་གནོས་ལ་བྱིན་གྱིས་རློབས་ཤིག་ཅེས་ཟེར་བ་ནི་ས་མ་ཡ་སྟྭཾ། ཞེས་ལན་གསུམ་དུའོ། །སུ་ལ་སྙམ་ན་ཨ་ཧཾ་ཞེས་དམ་ཚིག་སེམས་དཔའ་ལའོ། །ཡི་གེ་གསུམ་གྱིས་སྐུ་གསུང་ཐུགས་བྱིན་གྱིས་རློབས་ཤིག་པའོ། །དེ་ནས་འདིར་བླ་མ་དྷའི་ཞལ་ནས། སྙིང་གའི་ཧཱུྃ་གིས་རིགས་ལྔ་ཡབ་ཡུམ་སྤྱན་དྲངས་ཏེ་གསོལ་བ་བཏབ་པས་བདུད་རྩིའི་རྒྱུན་གྱིས་དབང་བསྐུར་ཏེ། ཆུ་ཡར་འཁྱིལ་པ་ལས་བཅོམ་ལྡན་འདས་ལ་མི་བསྐྱོད་པ། བྱམས་པ་ལ་རྣམ་སྣང༌། སྤྱན་རས་གཟིགས་ལ་སྣང་བ་མཐའ་ཡས་ཀྱིས་དབུར་བརྒྱན་པར་བྱའོ་གསུང༌། བླ་མ་བཻའི་ཞལ་ནས་འདི་བསྡུས་པ་ལ་དགའ་བའི་དོན་དུ་ཡིན་པས་གཞུང་ལས་ལྷག་པ་མི་བྱ་གསུང་སྐད། དེ་ནས་བཟླས་པ་ནི། སྙིང་གར་པད་ཟླའི་སྟེང་གི་ཧཱུྃ་སེར་པོ་ལ་སྔགས་ཀྱིས་བསྐོར་བ་ལ་དམིགས་པ་བྱའོ། །མཇུག་གི་དོན་ནི། བསོད་ནམས་བསྔོ། ཡེ་ཤེས་པ་གཤེགས་སུ་གསོལ་ཏེ་མི་དམིགས་པའི་ཤེས་རབ་ཀྱི་བཟུང་ནས་དམ་ཚིག་པའི་ང་རྒྱལ་གྱིས་གནས་པར་བྱའོ། །འདིའི་རབ་གནས་ནི། སྔོན་དུ་བསྙེན་པ་བསྐྱལ་ལ་ལུགས་སྐུ་ལ་སོགས་པ་དྲི་ཞིམ་པོའི་ཆུས་ཁྲུས་བྱས་ཏེ། སྣམ་བུ་ལ་སོགས་པ་གཙང་མའི་གདན་ལ་བཞག་ལ་སྟོང་པར་བསྒོམ། སྟོང་བའི་ངང་ལས་པྃ་ལས་པདྨ་ཨ་ལས་ཟླ་བའི་སྟེང་དུ་ཧཱུྃ་སེར་པོའི་འོད་ཀྱི་ལྷ་གསུམ་སྤྱན་དྲངས་ལ་བསྟིམ་ལ་ལྷ་གསུམ་རྫོགས་པར་བསྐྱེད། དེ་ནས་ཡེ་ཤེས་པ་སྤྱན་དྲངས་ཏེ་བསྟིམ་པ་གཉིས་སམ་གསུམ་དུ་བྱས་ཏེ། མཆོད་པ་དང་བསྟོད་པ་ལ་སོགས་པ་བྱས་ལ་ནུས་ཚད་ཀྱི་བཟླས་པ་བྱའོ། །མཐར་ནི་མི་དམིགས་པར་བྱའོ། །ཨི་ཐི།། །།སྒྲུབ་ཐབས་འདིའི་སློབ་དཔོན་རྒན་ཞུགས་བྷ་སྐནྡྷ་ཞེས་པ་སྒྲ་གསལ་བྱེད་སློབ་པ་ན། རྒྱལ་པོ་དྷརྨ་ཨ་ཤོ་ཀས་མཐོང་སྟེ། རྒས་པ་དེ་ལ་ཆོས་མི་ལོབས་སྙམ་ནས་རྒས་པ་དེ་ལ་གཏུན་ཤིང་གི་མགོ་ལ་མེ་ཏོག་སྐྱེས་སོ་ཞེས་བརྗོད་པས་གོ་སྟེ། རྒྱལ་པོས་བརྙས་པར་ཤེས་ནས་མཁན་པོ་ལ་ཤེས་རབ་བསྐྱེད་པའི་སྒྲུབ་ཐབས་ཞུས་ནས་ལྟོ་བཅག་སྟེ་བསྒྲུབ་པས་གྲུབ་པ་ཐོབ་པར་གྱུར་ཏེ། དེར་གཡོག་ལ་གཏུན་ཤིང་གི་མགོ་ལ་མེ་ཏོག་བཏགས་པ་བསྐུར་ནས་རང་གི་སྙན་ངག་གི་ཚིགས་བཅད་བཏོན་ཏེ་སྨ་ཕབ་པས་རྒྱལ་པོས་ཡུལ་བོར་ནས་བྲོས་སོ། །དེ་ནས་མཁས་པར་བསྟན་པའི་ཆེད་དུ་སྒྲུབ་ཐབས་སྙན་ངག་གི་ཚིག་བཤད་སྒྱེག་བཏོན་ཏེ་འདི་ལྟར་བསྡེབས་སོ། །འདི་ལ་ཀླད་ཀྱི་དོན་ནི། ཚིག་རྐང་གསུམ་དང༌། གཅིག་གིས་མཆོད་པར་བརྗོད་པ་དང་བཤད་པར་དམ་བཅའ་བ་བསྟན་ཏོ། །དེ་ལ་ཡན་ལག་གི་དོན་ནི། ཚོགས་གཉིས་རྫོགས་པའི་དཔལ་ལྡན་གསུང་དབྱངས་དྲུག་ཅུ་ལ་སོགས་པ་ངག་བསྒྲུབ་པའི་དབྱངས་ཅན། སྒྲིབ་པ་གཉིས་སྤངས་པ་ཡོན་ཏན་དང་སྐུ་རྒྱས་ཤིང་འོད་འབར་བ་འོད་ཟེར་དཀར་པོ་ལ་སོགས་པ་སྣ་ཚོགས་ཀྱིས་འགྲོ་བའི་དོན་བྱེད་པ། སྒྲིབ་པའི་དྲི་མེད་སངས་རྒྱས་རྣམས་ནི་རྒན་པོ་ཡིན་ཡང་ལོ་བརྒྱད་ལོན་པའི་ཆ་ལུགས་ཅན་ནོ། །མ་རིག་པ་རྩ་བ་ནས་གཅོད་པའི་རལ་གྲི་དང༌། ཤེས་ཕྱིན་གྱི་པུ་སྟི་འཆང་བ། དེ་ཡི་དམ་ལྷ་ཡང་ཡིན་ཞིང་བརྗོད་བྱ་ཡང་ཡིན་པས་ཕྱག་འཚལ་བའོ། །གཞུང་གི་དོན་ལ་རྟེན་གྱི་གང་ཟག་ཆོས་ལྔ་ལྡན་ནོ། །གནས་ནི་གང་མོས་པའོ། །ཐབས་ནི་དང་པོར་སེམས་བསྐྱེད་ལ་སྙིང་གར་པདྨ་ཟླ་བའི་སྟེང་དུ་མུཿབསམས་ལ། དེའི་འོད་ཀྱིས་ཕྱོགས་བཅུ་ནས་བླ་མ་དང་ཡི་དམ་ལ་སོགས་པ་མདུན་གྱི་ནམ་མཁའ་ལ་ཕྱོགས་མཐའ་མེད་པར་བསམས་ལ། སེམས་ཅན་ཐམས་ཅད་བསྐྱབ་པར་འདོད་པའི་བསམས་པས། ཡིད་བཞིན་གྱི་ནོར་བུ་ལྟ་བུའི་སེམས་ལས་བྱུང་བའི་སྟེ་མུཿའི་འོད་ཟེར་ལས་སྤྲོས་པའི་མེ་ཏོག་ལ་སོགས་པས་མཆོད་ཅིང་སྐྱབས་སུ་འགྲོ་བ་ལ་སོགས་པ་བདུན་རྣམ་དག་བྱ་སྟེ་གཞུང་ལས་བྱེད་དོ། །ཡེ་ཤེས་ཀྱི་ཚོགས་བསག་པ་ནི། ཆོས་ཐམས་ཅད་སེམས་ཙམ་དུ་བསྡུས་ཏེ་སྭ་བྷཱ་ཝའི་སྔགས་ཀྱིས་བརྟན་པར་བྱའོ། །ཡང་ན་སྔགས་མི་དགོས་སོ། །སྔོན་གྱི་སེམས་བསྐྱེད་པའི་མཐུས། སྟོང་པའི་ངང་ལས་པྃ་ལས་པདྨ་ཨ་ལས་ཟླ་བའི་སྟེང་དུ་མུཿདམར་སེར་དེ་ལས་བྱུང་བའི་ཟླ་བའི་དཀྱིལ་འཁོར་ནང་དཀར་པོ་ཕྱི་རོལ་གུར་གུམ་གྱིས་བྱུགས་པ་ལྟ་བུ་དམར་པོའི་སྟེང་དུ་དབྱངས་ཡིག་གིས་དཀྲིགས་པའོ། །དེའི་སྟེང་དུ་མུཿའོད་ཟེར་དང་ལྡན་པ་ལས་བྱུང་བའི་ཟླ་དཀྱིལ་དམར་སེར། དེའི་སྟེང་དུ་ཀཱ་ལིའོ། །དེ་སྟེང་དུ་མུཿསྒྲོན་མེ་ལྟར་འབར་བ་ལས་བྱུང་བའི་ཨུཏྤ་ལ་འོད་ཀྱི་དྲྭ་བ་ཅན་དེ་ཡང་མུཿས་མཚན་པའོ། །དེའི་འོད་ཀྱིས་ཕྱོགས་བཅུ་ནས་འཇམ་དཔལ་སྤྱན་དྲངས་ཏེ་མུཿལ་ཐིམ་སྟེ། དེ་ཡོངས་སུ་གྱུར་པ་ལས། ཟླ་དཀྱིལ་དམར་པོའི་སྟེང་དུ་ཨུཏྤ་ལ་མུཿས་མཚན་པ་ལས་སྤྲོ་བསྡུ་བྱས་ནས་བསྐྱེད་པ་རྡོ་རྗེ་གདན་པ་བཞེད་དོ། །དེ་ནས་པད་ཟླ་ལ་བཞུགས་པ་དབུ་སྐྲ་བུང་བ་ལྟ་བུ་འགྱིང་བག་དང་སྒེག་པའི་ཉམས་དང་ལྡན་པའོ། །གཡང་ལས་ཕུན་སུམ་ཚོགས་པ་ཐམས་ཅད་འབྱུང་བ་ལྟར་ཞལ་ལས་ཆོས་ཐམས་ཅད་འབྱུང་བས་སོ། །རིན་པོ་ཆེ་དུ་མའི་རྒྱན་ཅན་ནོ། །དེ་ནས་ཡེ་ཤེས་སེམས་དཔའ་བསྒོམ་པ་ནི། སྙིང་གར་མུཿལས་འོད་དམར་པོ་བྱུང་བ་དེ་གྱུར་པ་ལས་འཁོར་ལོ་རྩིབས་བརྒྱད་པ་འོད་ཟེར་སྣ་ཚོགས་ཅན་བསམ་མོ། །དེ་ལ་མེ་ཏོག་དམར་པོ་མཎྜལ་ལ་བཀྲམ་པ་ལྟར་དབུས་དང་ཕྱོགས་བཞིར་ཨ་ར་པ་ཙ་ན་དགོད། ཤར་ལྷོ་མེ་ནས་གཡས་སྐོར་དུ་པྲ་པཉྩ་ན་རྣམས་དགོད། དཱི་པཾ་ཀ་རའི་གདམས་ངག་གིས་མཚམས་བཞིར་ཡ་ཏེ་ན་མ་བཞི་དགོད་གསུང༌། འཁོར་ལོའི་བར་དུ་ཨཱ་ལི་གཉིས་གཉིས། མུ་ཁྱུད་ལ་ཀཱ་ལི་རྣམས་སོ། །དམར་པོ་མགོ་གྱེན་ལ་བལྟ་བའོ། །འཁོར་ལོ་དང་ཡེ་ཤེས་སེམས་དཔའ་གཉིས་ཀ་མི་གཡོ་བར་བསྒོམ། དེ་ནས་ཏིང་ངེ་འཛིན་སེམས་དཔའ་བསྒོམ་པའི་ནི་འཁོར་ལོའི་ཡི་གེ་ལས་འོད་སྤྲོས་བསྡུ་བྱེད་པའོ། །དེ་ནས་བསྒོམས་པས་སྐྱོ་ན་བཟླས་པ་ནི། ལྷ་དང་འཁོར་ལོ་ལ་དམིགས་ནས་ཨ་ར་པ་ཙ་ན་མུཿཞེས་བཟླས་སོ། །འཇམ་དཔལ་བརྟན་འཁོར་འདི་བསྒོམས་པའི་ཕན་ཡོན་ནི། འཇམ་དཔལ་དང་ནི་ཞེས་པ་ལ་སོགས་པའོ། །ཚེག་བར་ཉི་ཤུ་རྩ་གཅིག་པ་བྷ་སྐནྡྷའི་ཚིག་བཤད་བཞི་དང༌། ཡང་འཁོར་ལོ་བསྒོམས་པས་སངས་རྒྱས་ཀྱི་རྟོགས་པ་ཉིད་རྟོགས་པར་འགྱུར་པ་རྐང་པ་གཉིས་ཀྱིས་བསྟན་ཏོ། །གང་ཞིག་ཅེས་པ་མཇུག་དགེ་བ་བསྔོ་བའོ། །སློབ་དཔོན་བྷ་སྐནྡྷས་དྲུག་ཅུ་གཅིག་གིས་བརྩམས་པ་སྟེ་ཚེག་བར་བཅུ་དགུ་པ་ནི་སེང་གེ་རྣམ་པར་བསྒྱིངས་པའི་ཚིགས་བཅད་དོ། །བཅུ་གཅིག་པ་དབང་པོ་རྡོ་རྗེའི་འོ། །བདུན་པ་ཨ་ན་དུའི་ཉི་ཤུ་རྩ་གཅིག་པ་བྷ་སྐནྡྷའི་དེ་ལྷག་པས་ཀྱང་སྟེ། བརྟན་འཁོར། ཨི་ཐི།། །།འཇམ་དཔལ་བརྟན་འཁོར་ལ་གསུམ་སྟེ། ཀླད་དོན། མཆོད་བརྗོད། བཤད་པར་དམ་བཅའ་བ་ནི་རྐང་པ་བཞི་དང་གསུམ་གྱིས་སོ། །སྙིང་རྗེ་དང་སྟོང་པར་ལྡན་པའི་འཇམ་དཔལ་དུས་གསུམ་གྱི་སངས་རྒྱས་ཐམས་ཅད་དང་དབྱེར་མེད་པའི་སངས་རྒྱས་ཐོབ་པའི་ལམ་སྟོན་པར་བྱེད་པའི་བྱིས་པ་ལོ་བརྒྱད་པ་ལྟ་བུའི་སྐུ་ལུས་འཆང་བ། སྐུ་གསུང་ཐུགས་འཇམ་པས་སེམས་ཅན་གྱི་དོན་བྱེད་པའི་འཇམ་དབྱངས་དེ་ལ་ཕྱག་འཚལ་ལོ། །ཞེས་པའི་དོན་ཏོ། །གཞུང་ལ་གཉིས་ལས། སྒྲུབ་པའི་ཐབས་དངོས་ལ། ཚད་མེད་པ་བཞི་བསྒོམ་པ་དང་པོར་བསྟན་ཏོ། །སྙིང་རྗེ་བསྒོམ་པ་ལ། སྡུག་བསྔལ་མདོར་བསྟན་པ་དང༌། རྒྱས་པར་བཤད་པའོ། །དེ་ནས་བསོད་ནམས་ཀྱི་ཚོགས་བསགས་པ་ལ་སེམས་བསྐྱེད་ལ་རང་གི་སྙིང་གར་པད་ཟླའི་སྟེང་དུ་མུཿདམར་སེར། དེ་ལས་འོད་ཕྱིར་འཕྲོས་པ་ལས་ཚོགས་རྟེན་སྤྱན་དྲངས་ལ་ཕྱག་བྱ་སྟེ། དེ་ནས་པུས་མོའི་ལྷ་ང་ས་ལ་བཙུགས་ལ་བདུན་རྣམ་དག་གཞུང་ལྟར་བྱ། དེ་ནས་ལྷ་རྣམས་གཤེགས་སུ་གསོལ། ཡེ་ཤེས་ཀྱི་ཚོགས་ནི་སྣང་བའི་ཆོས་ཐམས་ཅད་སྒྱུ་མ་ལྟ་བུར་མོས་ཏེ། སྭ་བྷཱ་ཝའི་སྔགས་ཀྱིས་བརྟན་པར་བྱའོ། །དེ་ནས་ཤཱུ་ནྱ་ཏཱ་ཛྙཱ་ནའི་སྔགས་ཀྱིས་སེམས་ཉིད་ཀྱང་སྟོང་པའོ། །ལྷའི་རྣལ་འབྱོར་དངོས་ནི་སྔོན་སེམས་བསྐྱེད་པའི་སྨོན་ལམ་གྱི་དབང་གིས་སྟོང་པའི་ངང་ལས་ལངས་སྟེ། བྱང་ཆུབ་ཀྱི་སེམས་བཟུང་ལ། སེམས་ཉིད་སྙིང་གར་པད་ཟླའི་སྟེང་དུ་མུཿདམར་སེར་ལས་ཟླ་བའི་དཀྱིལ་འཁོར་རྒྱ་སྐྱེགས་ཀྱི་མེ་ཏོག་ལྟ་བུའི་སྟེང་དུ། ཨཱ་ལི་ཉིས་འགྱུར་མགོ་གྱེན་ལ་བལྟ་བ་དམར་པོ་བསམ་སྟེ། དེ་ནི་མཚན་བཟང་པོ་སུམ་ཅུ་རྩ་གཉིས་དག་པ་མཚོན་པའོ། །སྟེང་དུ་མུཿགཉིས་པ་ལས་ཟླ་དཀྱིལ་དམར་པོའི་སྟེང་དུ་ཀཱ་ལི་སོ་བཞིའི་སྟེང་དུ་དྷ་ཌ་དྷ་ཡ་ལ་བསྣན་པ་བཞི་བཅུ་ཉིས་འགྱུར་དཔེ་བྱད་བཟང་པོ་བརྒྱད་ཅུ་དག་པའོ། །དེའི་སྟེང་དུ་མུཿགསུམ་པ་ལས་ཨུཏྤ་ལ་སྔོན་པོ་དེའི་ལྟེ་བ་ལ་མུཿབཞི་པ་དམར་པོ་དེ་གཉིས་ལས་འོད་འཕྲོས་དེ་བཞིན་གཤེགས་པ་ཐམས་ཅད་ཀྱི་ཚོགས་གཉིས་རོ་གཅིག་ཏུ་གྱུར་པ་ཚུར་ལོག་སྟེ་འཇམ་དཔལ་ཡང་སྤྱན་དྲངས་ནས་མུཿལ་ཐིམ་པས་མུཿབཞི་པོ་ཀུན་ཡོངས་སུ་གྱུར་ནས་འཇམ་དཔལ་གྱི་སྐུར་བསྒོམ་པའོ། །དེ་ཡང་རིམ་གྱིས་བསྒོམ་སྟེ་སྐུ་མདོག་དམར་སེར། གཡོན་སྟོང་ཕྲག་བརྒྱ་པའི་པུ་སྟི་འཛིན་པ། མུར་གོང་གཉིས། ལྟག་ཟུར་གཉིས་དང་དབུས་སུ་ཟུར་ཕུད་ཡེ་ཤེས་ལྔའི་རྟགས་སོ། །དབང་བསྐུར་བའི་ཚུལ་ལས་སམ། ཡན་ན་རང་ཆས་སུ་རིགས་ཀྱི་བདག་པོ་དབུར་བརྒྱན་པའོ། །དེ་ཡང་རིམ་གྱིས་སྒེག་པའི་ཉམས་ནི་འགྱིང་པའོ། །དེ་ནས་ཡེ་ཤེས་སེམས་དཔའ་བསྒོམས་སྟེ། སྙིང་གར་པད་ཟླའི་སྟེང་དུ་མུཿདམར་པོ་ལས་འཁོར་ལོ་རྩིབས་བརྒྱད་པའོ། །དེའི་དབུས་དང་ཕྱོགས་བཞི་ཨ་ར་པ་ཙ་ན། ཤར་ལྷོ་ལ་སོགས་པའི་མཚམས་བཞིར། པྲ་པཉྩ་ན་བསམ་མོ། །རྩིབས་བར་དུ་དབྱངས་ཡིག་བཅུ་དྲུག་གོ །མུ་ཁྱུད་ལ་ཀཱ་ལི་གཡས་སྐོར་དུ་ཡི་གེ་ཐམས་ཅད་ཁ་དོག་དམར་པོ་མགོ་ཕྱིར་བལྟ་བའོ། །དེ་ནས་ཡེ་ཤེས་སེམས་དཔའ་དགུག་པ་ནི། འཁོར་ལོའི་ཡིག་འབྲུའི་འོད་ཀྱིས་སྤྱན་དྲངས་ཏེ་མདུན་དུ་བཞུགས་པ་ལ་མཆོད་ལ་ཡི་གེ་བཞིས་བསྟིམ་པའོ། །དེ་ནས་འཁོར་ལོའི་འོད་ཟེར་གྱིས་འཇམ་དཔལ་གྱི་སྐུ་ནམ་མཁའ་ལ་ཁྱབ་པ་སྤྲོ་བསྡུ་མི་སྐྱོ་བའི་བར་དུ་བསྒོམ་པ་ཏིང་ངེ་འཛིན་སེམས་དཔའོ། །སྐྱོ་ན་བཟླས་པ་བྱ་བ་ནི། ལྷ་དང་འཁོར་ལོ་ལ་དམིགས་པའམ། སྙིང་གའི་ས་བོན་ལ་བསྐོར་བ་ལ་དམིགས་ལ་བྱའོ། །ད་ནི་འཁོར་ལོ་བསྒོམས་པས་དུས་གསུམ་གྱི་བསྟན་བཅོས་ཐམས་ཅད་ཤེས། སྲོག་ཆགས་རྣམས་ཀྱི་སྐད་ཤེས། གྲངས་སུ་བྱ་བ་ལས་བཟོའི་གནས་ཐམས་ཅད་དང༌། འཕོང་ལ་སོགས་པ་སྒྱུ་རྩལ་ཐམས་ཅད་དང༌། ཕྱི་རོལ་པའི་ཚོགས་ཚར་གཅད་པ་དང༌། རང་གིས་བསྒྲུབ་པ་ལ་སོགས་པ་ཚེགས་མེད་པར་འགྲུབ་པའོ། །གཟའ་ཕུར་བུ་ལ་སོགས་པ་དང་ལྷ་ཆེན་པོ་མ་ཧཱ་དེ་བ་ལ་སོགས་པ་ཐམས་ཅད་ཚར་གཅོད་པའོ། །བདག་གི་དགེ་བ་འདིས་ཞེས་མཇུག་དོན་ནོ། །རྫོགས་སོ།། །།བློ་ངན་པས་བདེ་བླག་ཏུ་རྟོགས་པར་བྱ་བའི་ཕྱིར་ཚིག་ལྷུག་པའི་བརྟན་འཁོར་ལ། ཀླད་ལ་སོགས་པ་གསུམ་གོང་མ་དང་འདྲའོ། །མི་འདྲ་བའི་བྱེ་བྲག་ནི་འཁོར་ལོའི་ལྟེ་བ་ལ་ཨ་བསམས་ཏེ་དེ་ཉེད་ཙམ་མོ། །འཁོར་ལོ་འཁོར་བ་ལ་དགོས་པ་ཅི་ཡོད་སྙམ་ན། སྙིང་ག་ཆོས་ཀྱི་འཁོར་ལོ་ནི། སྙིང་ལ་བུ་ག་དགུ་ཡོད་པ་ལས་དགུ་པོ་དེ་དག་ཁ་ཟུམ་ནས་ཡོད་པས་ཤེས་རབ་མེད་ཅིང་རྨོངས་པ་ཡིན་པ་ལ་ད་ལྟ་འཇིག་རྟེན་ན་ཤེས་རབ་ཆེ་བར་གྲགས་པ་ཀུན་ལ་ཡང་བུ་ག་གསུམ་ལས་བྱེ་བ་མེད། དྷརྨཱ་ཀཱིརྟི་ལ་ཡང་ལྔ་ལས་བྱེ་བ་མེད་པར་གྲགས་སོ། །དེས་ན་འཁོར་ལོ་རྩིབས་བརྒྱད་ལྟེ་བ་དང་དགུ་ནས་ཡི་གེ་རྣམས་ལས་འོད་ཟེར་སྤྲོ་བསྡུ་བྱས་པས་སྙིང་གི་བུ་ག་དགུ་བྱེ་ནས་ཤེས་རབ་ཆེན་པོར་འགྱུར་རོ། །རྫོགས་སོ།། །།འཇམ་དཔལ་ཨ་ར་པ་ཙ་ན་འདི། སློབ་དཔོན་པད་འབྱུང་གིས་མཛད་པ་སྟེ། དེའི་ལོ་རྒྱུས་ནི། ཡུལ་དབུས་ན་གསང་བ་འདུས་པའི་རྒྱུད་འཆད་ཅིང་ཡོད་པ་ལ། རྣལ་འབྱོར་མ་ཆང་འཚོང་མ་སྤྱོད་པ་བྱེད་པ་ཆུ་ཆུ་བས་མཐོང་སྟེ། ངུ་བ་དང་དགོད་པ་བྱུང་བས། དྲིས་པས་ཆོས་ནོར་བ་འཆད་པས་ངུ༌། འགའ་ཙམ་མ་ནོར་བས་ཀྱང་མི་གོ་བ་དང༌། ལམ་སྐྱེ་བའི་ཡོན་ཏན་ཉན་པ་པོ་ལ་མི་འབྱུང་བས་ངུའོ། །བསྟན་པའི་ལྷག་མ་ཉན་བཤད་ཡོད་པས་དགོད་ཅེས་སོ། །དེར་གདམས་ངག་ཞུ་བྱས་པས་ང་དང་འབྲེལ་མེད་ཀྱིས། ཨཽ་ཌྱན་ན་ངའི་མིང་པོ་ཛི་ན་སྲིལ་ཞེས་བྱ་བ་ཡོད་ཀྱི། དེ་ཡང་ཤིང་ཐུན་གྱི་ཆ་བྱད་དུ་ཤིང་ཡོད་པ་དེ་དང་ལས་འབྲེལ་ཡོད་ཀྱི། དེ་རྒྱལ་པོ་ཨིནྡྲ་བྷཱུ་ཏིའི་སྒོ་ལ་ཡི་གེ་བྲིས་ལ་རྒྱལ་པོ་སློབ་མར་རྩད་ཆོད་ལ་ཚོལ་ཅིག ངས་ཐམས་ཅད་ལ་རྩོད་པ་ལས་རྒྱལ་བར་བྱིན་གྱིས་བརླབ་བོ་ཞེས་སོ། །དེར་ཕྱིན་ནས་ལོ་གཅིག་གི་བར་དུ་བཙལ་བས་རྙེད་ནས་ཟླ་བ་དྲུག་གི་བར་དུ་བསྙེན་བཀུར་བྱས་པས། ཅི་འདོད་ཟེར། ལྕམ་མོས་ལུང་བསྟན་པས་ཏེ། གསང་འདུས་ཀྱི་གདམས་ངག་འདོད་བྱས་པས་དབང་བསྐུར་ནས་རིགས་ངན་གྱི་བུ་མོ་རིག་མར་བྱིན་ནོ། །དེ་ནས་ཨིནྡྲ་བྷཱུ་ཏིའི་ཁང་པ་དགུ་ཐོག་གི་སྟེང་དུ་གཉིས་ཀྱིས་སྒྲུབ་པ་བྱས་པས་གྲུབ་པ་ཐོབ་བོ། །དེ་ཡུལ་ཁམས་སུ་སློབ་དཔོན་གྱིས་རྒྱལ་པོ་རིགས་ངན་དུ་སོང་བར་གྲགས་ཏེ། ཆད་པས་བཅད་དོ་ཞེས་ཟེར། རྒྱལ་པོས་རིགས་ངན་མིན་བྱས་སོ། །དེ་ཤིང་ཁུར་སྟོང་གི་ནང་དུ་བསྲེགས་ལ་མེའི་དག་བྱེད་བྱའོ་ཞེས་ཟེར་བས། རྒྱལ་པོས་འདི་ལྟར་མ་མཛད་ཞུས་པས་བྱེད་གསུང་ངོ༌། །དེར་ཤིང་བཅེར་ནས་མེ་བཏང་བས་བསྲེགས་པས། ད་རྡུལ་ཕྲ་རབ་ཙམ་ཡང་མེད་སྙམ་པ་ན་ཞག་གསུམ་ནས་མཚོའི་ནང་དུ་སྣ་ཚོགས་པདྨའི་སྟེང་ན་སློབ་དཔོན་དང་རིག་མ་ཟིལ་པ་ཕྲོམ་མེར་འདུག་པ་མཐོང་ནས་ཐམས་ཅད་དད་པ་སྐྱེས་སོ། །དེ་ནས་པདྨ་འབྱུང་གནས་ཞེས་གྲགས་སོ། །འདི་ལ་མཆོད་པར་བརྗོད་པ་ནི། མི་དེའི་ཡུལ་མ་མཐོང་བས་སོ། །འདི་ལ་རྟེན་གྱི་གང་ཟག་དང་གནས་འདྲའོ། །ཐབས་དངོས་ལ་དང་པོ་སེམས་ཅན་གྱི་དོན་དུ་སེམས་བསྐྱེད་དེ། སྙིང་གར་པད་ཟླའི་སྟེང་དུ་ཨཱ་ལི་དང་ཀའི་དང༌། ཙའི་དང༌། ཊའི་དང༌། ཏའི་སྡེ་ཚན་ལྔ་པའི་བཞི་པ་དྷའོ། །ཨིའི་མཐའ་ནི་ཨཱི་རིང་པོ་སྟེ་ཨ་སྲོག་གོ །དྷ་ལ་གུ་གུ་བྱིན་པས་དྷཱིར་འགྲོ་བའོ། །དེ་ལ་གཞོན་ནུའི་ནུ་མ་ལྟ་བུ་ཚེག་དྲག་གིས་བརྒྱན་པའི་དྷཱིཿདཀར་པོ་བསམས་ལ། དྷཱིཿའི་འོད་ཀྱིས་རང་གི་ལུས་ལ་ཕོག་པ་དང་སྙིང་ལ་གནས་པའི་ཉོན་མོངས་པའི་སྒྲིབ་པ་བསལ་བ་བལྟའོ། །སློབ་དཔོན་ལ་ལྟོས་དགོས་པ་མཚོན་པས་ཡི་གེ་བཏུ་བའོ། །དེ་ནས་ཚད་མེད་པ་བཞི་བསྒོམས་ལ། དེ་ནས་བསོད་ནམས་ཀྱི་ཚོགས་བསག་པ་ནི། སྙིང་གའི་དྷཱིཿལས་འོད་འཕྲོས་པས་ནམ་མཁའ་ན་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་སྤྲོས་པ་འོད་ཚུར་བསྡུའོ། །གཞུང་ལས་འོད་ཟེར་དེ་ཉིད་ལས་བྱུང་ཞེས་པ་མན་ཆད་རྒྱས་པར་བཤད་པའོ། །དེ་ནས་ཕྱག་དང་པཱུ་ཛ་ལ་སོགས་བྱ། དེ་ནས་ཚངས་པ་ལ་སོགས་པ་མཐུ་དང་ལྡན་པས་ཀྱང་རྙེད་པར་དཀའ་བའི་བྱང་ཆུབ་ཏུ་སེམས་བསྐྱེད་པ་དང༌། དགེ་རྩ་བསྔོ་བ་ལ་སོགས་པ་གཞུང་ལས་བྱེད་དོ། །དེ་ནས་ཡེ་ཤེས་ཀྱི་ཚོགས་བསག་པ་བྱའོ། །ཚོགས་བསགས་པའི་འབྲས་བུ་ལྷ་སྐུ་བསྒོམ་པ་ནི། སྟོང་པའི་ངང་ལས་རང་གི་སེམས་ཀྱི་སྣང་བ་ཙམ་ལས་པདྨ་དང་ཟླ་བའི་སྟེང་དུ་དྷཱིཿདཀར་པོ། དྷཱིཿགྱུར་པ་ལས་རལ་གྲིའི་འཆང་ཟུང་ལ་ཟླ་བའི་སྟེང་དུ་དྷཱིཿས་མཚན་པ་དེ་ལས་འོད་འཕྲོས་པས། ཕྱོགས་བཅུ་ནས་འཇམ་དཔལ་སྤྱན་དྲངས་ཏེ། དྷཱིཿལ་ཐིམ་ནས་དེ་དག་ཡོངས་སུ་གྱུར་པ་ལས་སྐུ་རྫོགས་པར་བསྒོམ་སྟེ། པད་ཟླའི་གདན་ལ་སྐུ་མདོག་དཀར་པོ། གཡོན་ན་དུས་གསུམ་གྱི་གསུང་རབ་ལ་མ་རྨོངས་པའི་ཐབས་ཀྱི་བརྒྱད་སྟོང་པའི་པུསྟི་འཛིན་པ། ཨིནྡྲ་ནཱི་ལ་ལྟ་བུའི་དབུ་སྐྲ་ཅན། དུས་གསུམ་གྱི་སངས་རྒྱས་ཐམས་ཅད་ཀྱི་ཡེ་ཤེས་ཀྱི་ངོ་བོ་འཇམ་དཔལ་བསྒོམས་པ་ནི་དམ་ཚིག་སེམས་དཔའོ། །དེའི་སྙིང་གི་ནང་སྟོང་པ་ལ་ཨ་ལས་འཁོར་ལོ་དཀར་པོ་རྩིབས་བརྒྱད་པ་མི་ཤེས་པ་འཇོམས་པའི་འོད་ཟེར་ཅན་གཡས་སུ་དྲག་ཏུ་འཁོར་བར་བསྒོམས་ཏེ། དེའི་དུས་སུ་སྙིང་གི་ནང་ཡང་སྟོང་པར་བསྒོམ། ཨེ་ར་བི་ཤ་སྒྲའི་སློབ་མ་འཁོར་ལོས་སྲོག་པ་རྩ་བཅད་ནས་ཤི་བ་ཡོད་པས་དེ་མན་ངག་གོ །འཁོར་ལོ་དེའི་སྟེང་དུ་སོར་གཅིག་གིས་མ་རེག་པར་ཨ་ལས་ཟླ་དཀྱིལ་བསྒོམ་སྟེ། དེའི་རྒྱུ་མཚན་ནི་རེག་ན་འཁོར་ལོ་འཁོར་བས་སྟེང་གི་ལྷ་དང་རྣལ་འབྱོར་པ་ཡང་འཁོར་བས་སྙིང་རླུང་ལ་སོགས་པའི་སྐྱོན་དུ་འགྲོ་བས་སོ། །ཟླ་སྟེང་དུ་ཨ་ར་པ་ན་དྷཱིཿཞེས་པ་ཡི་གེ་ལྔ་མར་མེའི་འོད་ལྟ་བུ་རགས་པར་བསྒོམ་པ་ནི་བླ་མའི་མན་ངག་གིས་ཞེས་པའི་དོན་ཏོ། །ཡང་ན་ས་བོན་ལྷ་རྫོགས་པར་བསམས་ལ་སྤྲོ་བསྡུ་དང་བཟླས་པ་བྱའོ། །དེ་གཉིས་རྒྱས་པར་སྟོན་པ་ནི་ཡང་ན་ཞེས་པ་མན་ཆད་དོ། །དེ་ནས་ཟླ་བའི་དབུས་ཀྱི་ཨ་གྱུར་པ་ལས། ཨ་ར་པ་ཙ་ནའི་སྐུར་བསམ་མོ། །དེའི་ཐུགས་ཀར་ཡང་ཟླ་བའི་སྟེང་དུ་ཨ་བསམ་མོ། །དེའི་མདུན་དུ་ཟླ་བའི་སྟེང་དུ་ར་དཀར་པོ་ལས་རལ་གྲི་རས་མཚན་པ་དེ་གྱུར་པ་ལས་བྱང་སེམས་དྲྭ་བ་ཅན་གྱི་འོད། དེའི་ཐུགས་ཀར་ཟླ་བ་ལ་རའོ། །རྒྱབ་ཏུ་པ་དཀར་པོ་ལས་རལ་གྲི་པས་མཚན་པ་དེ་གྱུར་པ་ལས་ཟླ་བ་ཅན་གྱི་འོད། དེའི་ཐུགས་ཀར་ཟླ་བ་ལ་པའོ། །གཡས་སུ་སྐྲ་ཅན་མ་དང༌། གཡོན་དུ་ཉེ་བའི་སྐྲ་ཅན་མའང་དེས་འགྲེ། ལྷ་ཐམས་ཅད་སྐུ་མདོག་དཀར་པོ་སྟེ། དེ་ནི་ཡེ་ཤེས་སེམས་དཔའོ། །དེ་ནས་ཏིང་ངེ་འཛིན་སེམས་དཔའ་ནི། ལྷ་དེ་དག་གི་ཐུགས་ཀའི་ས་བོན་གྱི་འོད་ཟེར་སྤྲོས་བསྡུས་སེམས་ཅན་གྱི་དོན་བྱེད་པའོ། །མི་སྐྱོའི་བར་དུའོ། །དེ་ནས་བཟླས་པ་ནི། ལྷ་དང་འཁོར་ལོ་ལ་དམིགས་པས། ཨོཾ་ཨ་ར་པ་ཙ་ན་དྷཱིཿཞེས་སོ། །དེ་ནས་ལྡང་བ་ན། ལྷག་ཆད་ཁ་བསྐང་བའི་དོན་དུ། ཡི་གེ་བརྒྱ་པ་བརྗོད་དོ། །ཚེག་བར་བརྒྱ་ཞེས་བྱ་སྟེ་བཛྲ་བཞི་སོ་སོར་བསྡོས་ནས་སོ། །དེ་ནས་དུས་ཐམས་ཅད་དུ་དམ་ཚིག་སེམས་དཔའི་ང་རྒྱལ་དང་ལྡན་པར་བྱའོ།། །།ཨི་ཐི།། འདིའི་བརྒྱུད་པ་ནི། སངས་རྒྱས་དངོས་ཀྱི་སློབ་མ་པདྨ་བཛྲ། དེས་བྲམ་ཟེ་ཆེན་པོ་ས་ར་ཧ། དེས་ཀླུ་སྒྲུབ། དེས་རྡོ་རྗེ་དྲིལ་བུ་པ། དེའི་སློབ་མ་གྲུབ་པ་ཐོབ་པ་ཅིག དེས་ཤར་ཕྱོགས་ཀྱི་པཎྜི་ཏ་དགའ་རབ་རྡོ་རྗེ་ལ། དེས་མི་ཕམ་བཤེས་གཉེན་ལ། དེས་བླ་མ་རྡོ་རྗེ་གདན་པ་ལའོ། །མི་ཕམ་བཤེས་གཉེན་གྱིས་རང་གི་བླ་མ་ལས་ཐོས་པ་བཞིན་ཉམས་སུ་བླངས་པས་རང་མཁས་པར་གྱུར་ཏེ། གཞན་ལ་ཕན་པའི་ཕྱིར་འདི་བྲིས་སོ། །འདི་ལ་ཚིགས་བཅད་གཉིས་ཀྱིས་ཀླད་དོན་བསྟན་པ་ལས། ཚིག་དོན་ནི། སྒྲིབ་པ་གཉིས་དག་པ་མཚོན་པས་སྐུ་ཤིན་ཏུ་དཀར་བ། གླེགས་བམ་དང་རལ་གྲི་ཕྱག་ན་བསྣམས་པ། མཚན་དང་དཔེ་བྱད་ཀྱིས་ཤིན་ཏུ་མཛེས་པའི་མཆོག་ཏུ་གྱུར་པ། གཞོན་ནུ་ཟུར་ཕུད་ལྔ་དང་ལྡན་པ། རྒྱལ་པོ་ལ་སོགས་པ་དབང་དུ་གྱུར་པ་ནི་དགའ་བ། སྙན་ངག་ལ་སོགས་པ་སྨྲ་མཁས་པ་རྣམས་ཀྱི་མཆོག་གོ །མི་གནས་པའི་མྱ་ངན་ལས་འདས་པའི་མཐར་སྐུ་རྒྱས་ཤིང་པདྨའི་འདབ་མ་འདྲ་བའི་སྤྱན། ཕྱིན་ཅི་ལོག་དང་མི་ཤེས་པའི་བློ་ངན་ཤེས་རབ་ཆེན་པོའི་མེས་སྲེག་པ་དེ་ལ་ཕྱག་འཚལ་ལོ། །ལོ་ཕྱེད་ཅེས་པ་དེ་ཡང་སྒྲུབ་པ་པོའི་སྐྱེ་བོས་སམ། ཡང་ན་རྒྱུའི་མིང་འབྲས་བུ་ལ་བཏགས་པས་སྐྱེ་བོ་ཉིད་ཨ་ར་པ་ཙ་ནའོ། །དགོས་པ་ནི། སྣོད་བཅུད་ཀྱི་དངོས་པོ་ཐམས་ཅད་རྟོག་བྲལ་དུ་རྟོགས་པ་ལས་བྱང་ཆུབ་ཐོབ་པར་བྱེད་པའོ། །དེ་ལ་སོགས་པ་ཡོན་ཏན་ཐམས་ཅད་འབྱུང་བས་ན་རིན་པོ་ཆེའི་འཁོར་ལོ་དེ་སྒོམ་ཐབས་བྲིའོ། །འདི་ལ་བསོད་ནམས་ཀྱི་ཚོགས་བསགས་པ་ནི་མི་དགོས་སོ། །སྒྲུབ་པ་པོས་དང་པོར་སེམས་བསྐྱེད་དེ་གཟུང་འཛིན་དང་བདག་ཉིད་ཐམས་ཅད་སྟོང་པར་བསྒོམས་ལ་སྔགས་ཀྱིས་བརྟན་པར་བྱའོ། །སྟོང་པའི་ངང་ལས་རང་གི་སྙིང་གར་པད་ཟླའི་སྟེང་དུ་དྷཱིཿདཀར་པོ་དེ་ལས་རལ་གྲི་འཆང་ཟུང་ལ་དྷཱིཿས་མཚན་པ། དེ་ལས་འོད་ཀྱི་སྐུ་སྤྲོས་བསྡུས་པ་ལས་རལ་གྲི་དང་བཅས་པ་གྱུར་པ་ལས་བཅོམ་ལྡན་འདས་སུ་བསྒོམ་སྟེ། སྐུ་མདོག་དཀར་པོ་སེམས་ཅན་ལ་སྙིང་རྗེས་ཆགས་པ་དང་བཅས་པའི་བརྡའོ། །དེ་ནས་ཡེ་ཤེས་སེམས་དཔའ་བསྒོམ་པ་ནི། རང་གི་སྙིང་གར་ཨ་ལས་འཁོར་ལོ་རྩིབས་བརྒྱད་པ་དཀར་པོ་དྲག་ཏུ་འཁོར་བ་འོད་ཟེར་འཕྲོ་བ་བསྒོམ། དེ་ལ་སོར་གཅིག་ཙམ་གྱིས་མ་རེག་པར་ཨ་ལས་ཟླ་བ། དེའི་སྟེང་གི་དབུས་སུ་ཨ་དཀར་པོ་ལས། རལ་གྲི་ཨས་མཚན་པ་དེ་གྱུར་པ་ལས་ཨ་ར་པ་ཙ་ན་དམ་ཚིག་པ་ཅི་ལྟ་བའོ། །ཕྱོགས་བཞིར་ལྷ་བཞི་ཡང་པད་ཟླ་ལ་རང་རང་གི་ས་བོན་ལས་རལ་གྲི་རང་རང་གི་ས་བོན་གྱིས་མཚན་པ། དེ་གྱུར་པ་ལས་རང་རང་གི་སྐུ་རྫོགས་པ་སྐུ་མདོག་ལ་སོགས་པ་གཙོ་བོ་འདྲ་བ་དེ་དག་གཙོ་བོ་ལ་ཟུར་གྱིས་བལྟ་བའོ། །ཡང་ན་ཡེ་ཤེས་སེམས་དཔའ་ནི་ཟླ་བའི་སྟེང་དུ་ཡི་གེ་ལྔ་པོ་མར་མེ་ལྟར་འབར་བ་རགས་པ་བསྒོམ་མོ། །ཡང་ན་ཡི་གེ་ལས་རལ་གྲི་ས་བོན་གྱིས་མཚན་པ་འོད་འཕྲོ་བ་བསྒོམ་སྟེ་གཞུང་ན་མེད་དོ། །དེས་ནི་ཞེས་པ་རྐང་པ་བཞིས་ཡེ་ཤེས་པ་བསྒོམས་པའི་ཕན་ཡོན་བསྟན་ནོ། །ཏིང་ངེ་འཛིན་སེམས་དཔའི་ལྷ་ལས་འོད་ཟེར་འཕྲོས་པས་ཕྱོགས་བཅུའི་སེམས་ཅན་ལ་ཕོག སྒྲིབ་པ་བསལ་ནས་ཐམས་ཅད་འཇམ་དཔལ་དུ་བྱས་ཏེ་ཚུར་འདུས་སོ་སོ་ལ་ཐིམ་པས་སྤྲོ་བསྡུ་མི་སྐྱོའི་བར་དུ་བྱའོ། །དེ་ནས་བཟླས་པ་ནི་ལྷ་དང་ཙཀྲ་ལ་དམིགས་ལ། ཨོཾ་ཨ་ར་པ་ཙ་ན་དྷཱིཿ ཞེས་པའོ། །བློ་གྲོས་བརྟན་པ་ཞེས་པ་རྐང་པ་བཞིས་ཕན་ཡོན་ནོ། །ཚིག་རྐང་དགུས་མོས་པ་བསྐྱེད་པའི་ཕྱིར་བརྒྱུད་པ་བསྟན་ནོ། །རྐང་པ་བཞིས་མཇུག་དགེ་བའི་རྩ་བ་བསྔོ་བའོ། །འདི་ལ་བླ་མ་དྷ་ན་རེ་ཡེ་ཤེས་དགུག་གཞུག་དབང་བསྐུར་རྒྱས་གདབ་བྱ་གསུང༌། རྡོ་རྗེ་གདན་པ་མི་དགོས་གསུང་ངོ༌། །ཨི་ཐི།། ༄༅། །འཇམ་དཔལ་གྱི་སྒྲུབ་ཐབས་འདི་ལ། ཀླད་དོན་མཆོད་བརྗོད་བསྟན་ཏོ། །ཚིག་དོན་ནི་སྒྲིབ་པ་ཐམས་ཅད་རྣམ་པར་དག་པའི་འཇམ་དཔལ་གྱི་སྒྲུབ་ཐབས་ཤིན་ཏུ་གསལ་བ་དང་བསྡུས་པ་སྟོན་ཏེ། དགོས་པ་ནི་མ་རིག་པ་འཇོམས་པར་བྱེད་པའོ། །གང་ཟག་ནི་དད་པ་དང་ལྡན་པ་རྣམས་ཀྱི་ཆེད་དུ་བརྩམ་པའོ། །ཞེས་བསྟན་ཏོ། །དེ་ཡིད་དང་མཐུན་པའི་གནས་སུ་ཐོག་མར་སེམས་བསྐྱེད་པ་བསོད་ནམས་ཀྱི་ཚོགས་བསོགས་བྱས་ཀྱང་འགལ་བ་མེད་དོ། །ཡང་ན་ཆོས་ཐམས་ཅད་སྟོང་པར་བསྒོམས་ལ་སེམས་སྭ་བྷཱ་ཝའི་སྔགས་ཀྱིས་བརྟན་པར་བྱས་ཀྱང་ཡེ་ཤེས་ཀྱི་ཚོགས་བསགས་པའོ། །དེའི་རྗེས་སུ་སྙིང་གར་པད་ཟླའི་སྟེང་དུ་མུཿསེར་པོ་དེ་ལས་འོད་འཕྲོས་ཏེ། འཇམ་དཔལ་དཔག་ཏུ་མེད་པ་བསྟིམ། གྱུར་པ་ལས་འཇམ་དཔལ་བསྒོམ་མོ། །སྐུ་གསུང་ཐུགས་དག་པའི་རྟགས་མུར་གོང་གཉིས་དང་ལྟག་པ་ན་ལྕང་ལོ་གསུམ་ཡོད་པའོ། །དེ་བཞིན་གཤེགས་པ་མང་པོ་སྤྱན་དྲངས་ཏེ་བསྟིམ་ལ་རྫོགས་པ་ལས་དེ་བཞིན་གཤེགས་པའི་རྡུལ་ཕྲ་རབ་ལས་ཤེས་པར་བྱའོ། །འདི་ལ་བླ་མ་དྷ་ཡེ་ཤེས་པ་གཞུག་པ་ལ་སོགས་པ་བྱ་གསུང༌། བཻ་ན་རེ་མདོར་བསྡུས་པ་དོན་མེད་པར་འགྱུར་པས་མི་བྱ་གསུང༌། བཟླས་པ་ནི་སྙིང་གར་པད་ཟླའི་སྟེང་དུ་མུཿབསམས་ལ་བཟླས་སོ། །དེ་ལས་ལངས་ལ་སྤྱོད་ལམ་ཐམས་ཅད་སྒྱུ་མ་ཙམ་གྱི་བློས་ལྷའི་ང་རྒྱལ་དང་ལྡན་པར་བྱའོ། །ཨི་ཐི།། །།འཇམ་པའི་རྡོ་རྗེའི་སྒྲུབ་ཐབས་འདི་ལ་ཀླད་ཀྱི་དོན། ཚིག་རྐང་གསུམ་དང་གཅིག་གིས་མཆོད་པར་བརྗོད་པ་དང་བཤད་པར་དམ་བཅའ་བ་སྟོན་ཏོ། །ཚིག་གི་དོན་ནི། རིན་ཆེན་པདྨ་རཱ་ག་ལྟ་བུའི་སྐུ་མདོག་དམར་པོ་ཤེས་རབ་ཆེན་པོ་དང་ལྡན་ཞིང་མདངས་དང་ལྡན་པའི་འཇམ་པའི་རྡོ་རྗེ་ལ་ཕྱག་འཚལ་ལོ། །དེ་ལ་དང་པོ་སྒྲུབ་པ་པོས་ཕྱིའི་ཁྲུས་བྱས་ཏེ། བདེ་བའི་སྟན་ལ་འདུག་སྟེ། སེམས་བསྐྱེད་ལ་ས་བོན་ལས་མ་ཡིན་གྱིས། སྐད་ཅིག་གིས་སྙིང་གར་པད་ཟླ་བསྒོམས་ལ། དེའི་འོད་ཟེར་དང་ཨ་མྲྀ་ཏའི་སྔགས་ཀྱིས་བགེགས་ཐམས་ཅད་བསྐྲད་དེ་བསྲུང་བར་བྱའོ། །དེ་ནས་སྙིང་གའི་ཟླ་བའི་འོད་ཟེར་གྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མདུན་དུ་སྤྱན་དྲངས་ཏེ། གསལ་བར་དམིགས་ལ། ཟླ་བའི་འོད་ལས་བྱུང་བའི་མཆོད་པ་ལྔས་མཆོད་དེ། ཡན་ལག་བདུན་པ་བྱས་ཀྱང་འགལ་བ་མེད་དོ། །དེ་ནས་བདག་གམ་དམ་ཚིག་སེམས་དཔའ་དེའི་སྙིང་གར་པྃ་ལས་པདྨ་འདབ་མ་བཞི་པའི་སྟེང་དུ་ཟླ་བ་ལ་ཡེ་ཤེས་སེམས་དཔའ་སྤྱན་དྲངས་ཏེ། དེ་ཡང་ལྟེ་བ་ལ་འཇམ་པའི་རྡོ་རྗེ་སྤྱན་འདྲེན། ཨོཾ་ཨེ་ཧྱེ་ཧིས་སོ། །ལྟེ་བ་ལ་རྨ་བྱའི་གདན་ལ་སྐུ་མདོག་དམར་པོ་རཏྣའི་རྒྱན་ཅན། གཡས་རྡོ་རྗེ། གཡོན་དྲིལ་བུ་འཆང་བ་བསྒོམ་མོ། །གཏི་མུག་གཞོན་ནུ་མ་དང༌། འདོད་ཆགས་གཞོན་ནུ་མ་དང༌། ཕྲག་དོག་དང༌། རིགས་ཀྱི་གཞོན་ནུ་མ་བཞི་བསྒོམ་སྟེ། དེ་དག་ཀྱང་གཙོ་བོ་ཇི་ལྟ་བའོ། །འདི་ནི་ཀྲི་ཡའི་རྗེས་སུ་འབྲང་བ་ཡིན་པས་རང་ཐ་མལ་པའི་སྙིང་གར་ལྷ་བསྒོམས་པའི་དམ་ཚིག་སེམས་དཔའ་ལ་བྱིན་གྱིས་རློབ་པར་འདོད་པའོ། །དེ་ནས་བཟླས་པ་ནི། ལྷ་ལ་དམིགས་ལ་གཙོ་འཁོར་ལྔ་ཀའི་སྔགས་བཟླས་གསུང་ངོ༌། །ཡང་ན་གཙོ་བོ་གྲུབ་ན་འཁོར་ཡང་གྲུབ་པས་གཙོ་བོ་གཅིག་པུས་བྱས་ཀྱང་ཆོག་གོ །དེ་ནས་ཕྱི་རོལ་དུ་མཎྜལ་བྱེད་ན། མཎྜལ་གྱི་སྟེང་དུ་པདྨ་འདབ་མ་བཞི་ལ་ལྷ་ལྔ་བསྒོམས་ཏེ་རང་རང་གི་སྔགས་ཀྱིས་དབུ་ལ་མེ་ཏོག་དབུལ་ལོ། །དེ་ནས་འབྱུང་པོའི་གཏོར་མ་ནི་སྣོད་གཙང་མར་བཤམས་ཏེ། རང་ཐ་མལ་པར་བྱས་ལ་མཆོག་སྦྱིན་བྱས་ནས། ཡི་གེ་གསུམ་གྱི་བྱིན་གྱིས་བརླབས་ཏེ་སྔགས་དེ་ལན་གསུམ་བརྗོད་དེ་སེ་གོལ་གཏོགས་ཏེ་དབུལ་ལོ། །ཨི་ཐི།། །།ངག་གི་རྒྱལ་པོའི་སྒྲུབ་ཐབས་ལ། ཚིག་རྐང་གསུམ་དང་གཅིག་གིས་མཆོད་པར་བརྗོད་ཅིང་བཤད་པར་དམ་བཅའ་བ་ཀླད་ཀྱི་དོན་བསྟན་ཏོ། །ཚིག་དོན་ནི་གཉིས་སུ་མེད་པའི་ཡེ་ཤེས་དང་ལྡན་པའི་སེམས་ཅན་ཐམས་ཅད་ཀྱི་མགོན་དུ་གྱུར་པ་དེ་ལ་ཕྱག་འཚལ་ལོ། །ཡང་ན་ཐུགས་ཀྱི་རིགས་ཡིན་པས་ཡེ་ཤེས་སོ། །གཞུང་གི་དོན་ལ་རྟེན་གྱི་གང་ཟག་མཚན་ཉིད་དང་ལྡན་པ་ཅིག་གིས། གནས་ཡིད་དང་མཐུན་པར་འདུག་སྟེ་སེམས་བསྐྱེད་བྱས་ཏེ། རང་གི་སྙིང་གར་པད་ཟླའི་སྟེང་དུ་མུཿདམར་སེར་བསམས་ལ་དེའི་འོད་ཀྱིས་འཇམ་དཔལ་ལ་སོགས་པ་སྤྱན་དྲངས་ཏེ། དེ་ལ་མེ་ཏོག་ལ་སོགས་པས་མཆོད་ལ། ལམ་བསྟན་པའི་བར་དུ་བསོད་ནམས་ཀྱི་ཚོགས་རྫོགས་པར་བྱའོ། །བཅོམ་ལྡན་འདས་ཁྱེད་ཀྱི་བསོད་ནམས་དང་ཡེ་ཤེས་ཀྱི་ཚོགས་ལ་བདག་གིས་གནས་པར་བྱའོ་སྙམ་པས་བསྟེན་པའོ། །དེ་ནས་ཡེ་ཤེས་ཀྱི་ཚོགས་བསགས་ལ། ཚོགས་གཉིས་ཀྱི་འབྲས་བུ་ལྷའི་སྐུ་བསྒོམས་པ་ནི། སྟོང་པའི་ངང་ལས་ལུས་སྒྱུ་མ་ཙམ་གྱི་སྙིང་གར་པད་ཟླའི་སྟེང་དུ་མུཿསེར་པོ་དེ་ལས་འོད་འཕྲོས་པས་འདུལ་བའི་སྐལ་བ་ཡོད་པའི་སེམས་ཅན་རྣམས་ཀྱི་དོན་བྱས་ཏེ་རྒྱུད་དག་པར་བྱས་ལ། ཡང་འོད་དེས་ཕྱོགས་བཅུ་ནས་འཇམ་དཔལ་མང་པོ་སྤྱན་དྲངས་ལ་འོད་ཀྱི་རང་བཞིན་དུ་བྱས་ལ་མུཿལ་བསྟིམ། དེ་ཡོངས་སུ་གྱུར་པ་ལས་བདག་ཉིད་འཇམ་དཔལ་དུ་བསྐྱེད་དེ། སེང་གེ་དང་པད་ཟླའི་གདན་ལ་ཕྱེད་ཀྲུང་བྱས་ཤིང༌། སྐུ་མདོག་དམར་སེར་ཟླ་བའི་འོད་ཀོར་ལ་རྒྱབ་བརྟེན་པ། ཕྱག་གཉིས་ཀྱིས་གཡས་པ་ཁ་བུབ་ལ་གཡོན་པ་གན་རྒྱལ་དུ་བྱས་པའི་མཐེ་བོང་དང་མཛུབ་མོ་རྩེ་སྤྲད་པའོ། །གཡོན་པའི་གྲུ་མོ་ན་ཨུཏྤ་ལའི་སྟེང་ན་པུ་སྟེ་བཞུགས་པའོ། །འཁོར་ནི་གཡོན་ན་གཤིན་རྗེ་མཐར་བྱེད་གཅིག་པུ་སྟེ། སྔོན་པོ་ཁྲོས་པའི་རང་བཞིན་ཅན་ཐོད་པ་ལྔས་དབུར་བརྒྱན་པ་ལ་གཡས་ཀྱི་གྲུ་མོས་བཅོམ་ལྡན་འདས་ཀྱི་པུས་མོ་ལ་བརྟེན་པ། གཡོན་ན་དབྱུགས་པས་ཨང་ཚུགས་བྱས་པ་བསམ་མོ། །དེ་ནས་གཙོ་བོ་ལ་སྐུ་གསུང་ཐུགས་བྱིན་གྱིས་བརླབས་ཏེ་གནས་གསུམ་དུ་པད་ཟླ་ལ་ཡི་གེ་གསུམ་དགོད་པའོ། །དེ་ནས་ནུ་མའི་བར་སྙིང་གར་མུཿབསམས་ལ། དེ་ལས་མེ་ཏོག་མ་ལ་སོགས་པ་སྤྲོས་ལ་བདག་ཉིད་ལ་མཆོད་དོ། །མཆོད་བྱ་མཆོད་བྱེད་དབྱེར་མེད་པར་བསམ་ཞིང་བསྟོད་པར་ཡང་བསམ་མོ། །ཡང་དེ་དག་ས་བོན་ལ་བསྡུའོ། །དེ་ལྟར་སྤྲོ་བསྡུ་མི་སྐྱོའི་བར་དུ་བྱའོ། །ཡང་ན་སྤྲོ་བསྡུ་ནི་འཇམ་དཔལ་གྱི་སྐུ་དཔག་ཏུ་མེད་པ་སྤྲོ་བ་དང་བསྡུ་བས་སེམས་ཅན་གྱི་དོན་བྱེད་པའོ། །དེ་ལྟར་ཞེས་པ་ལ་སོགས་པས་ཕན་ཡོན་བསྟན་ཏོ། །དེ་ནས་བཟླས་པ་ནི་རང་གི་སྙིང་གར་པད་ཟླའི་སྟེང་དུ་མུཿལ་སྔགས་ཀྱིས་བསྐོར་བ་ལ་དམིགས་ལ་བཟླས་སོ། །དེ་ནས་ཡང་སྐྱོ་བ་མེད་ན་སྔར་བཞིན་དུ་བསྒོམ་མོ། །དེ་ནས་ལྡང་བ་ན། ས་བོན་ལས་ལྷ་མོ་སྤྲོས་ཏེ་མཆོད་པ་དང༌། བསྟོད་པ་ལ་སོགས་པ་བྱས་ཏེ་ཚུར་བསྡུས་ནས་བཟོད་པར་གསོལ་བ་དང་སྨོན་ལམ་གདབ་པར་བྱའོ་རྫོགས་སོ།། །།རྒྱལ་པོ་ཆེན་པོ་རོལ་པའི་སྒྲུབ་ཐབས་ལ་སྒྲུབ་པ་པོས་བྱང་ཆུབ་ཏུ་སེམས་བསྐྱེད་ལ་སྙིང་གར་པྃ་པད་ཨ་ཟླའི་སྟེང་དུ། མྃ་ལས་འོད་འཕྲོས་པས་བླ་མ་ལ་སོགས་པ་སྤྱན་དྲངས་ཏེ་མཆོད་པ་ལ་སོགས་པ་ཡན་ལག་བདུན་པ་བྱའོ། །དེའི་རྗེས་སུ་སྟོང་པར་མོས་ཤིང་སྔགས་ཀྱིས་བརྟན་པར་བྱས་པ་ཡེ་ཤེས་ཀྱི་ཚོགས་བསགས་པའོ། །དེ་ནས་སྟོང་པའི་ངང་ལས་ལུས་སྒྱུ་མ་ཙམ་གྱི་སྙིང་གར་པད་ཟླའི་སྟེང་དུ་རྃ་ལས་འོད་འཕྲོས་ཏེ། འཇམ་དཔལ་སྤྱན་དྲངས་ལ་མྃ་ལ་བསྟིམ། དེ་གྱུར་པ་ལས་འཇམ་དཔལ་གཞུང་བཞིན་བསྐྱེད་དོ། །ཕྱག་གཡས་ཨུཏྤ་ལ་པུ་སྟིས་མཚན་པ། གཡོན་པ་བསྒྱིངས་པའི་ཚུལ་དུ་བརྐྱང་ནས་ཁ་བུབ་པའོ། །དེ་ནས་ཨུཏྤ་ལ་ཁ་བྱེ་བའི་ཕྱག་རྒྱས་སྤྱི་བོ་དང་མགྲིན་པ་དང་སྙིང་གར་གཏུག་པར་བྱའོ། །འདི་ལ་བླ་མ་དྷ་ཐུགས་ཀའི་ས་བོན་ལས་འོད་འཕྲོས་ནས་ཡེ་ཤེས་པ་དགུག་གཞུག་བཅིང་དང་དགྱེས་པ་བསྐྱེད་པ་དང༌། ཡང་འོད་ཟེར་འཕྲོས་པས་མཆོད་པའི་ལྷ་མོ་ལ་སོགས་པས་དབང་བསྐུར་ཞིང་བྱིན་གྱིས་བརླབས་ནས་ཆུའི་ཐ་མ་ལས་མི་བསྐྱོད་པས་དབུར་བརྒྱན་པ་ཡང་བྱ་གསུང༌། བླ་མའི་བཻ་ནི་མི་དགོས་ཉུང་ངུ་བསྡུས་པ་དོན་མེད་པས་གསུང༌། ལོ་ཙཱ་བ་བཻའི་བདེ་གསུང༌། སྒྲུབ་ཐབས་འོག་མ་རྣམས་ལ་ཡང་དེ་བཞིན་ནོ་གསུང༌། དེ་ནས་བཟླས་པ་ནི་སྙིང་གར་པད་ཟླ་ལ་མྃ་ལ་སྔགས་ཀྱིས་བསྐོར་བ་ལ་དམིགས་ནས་བཟླས་པ་བྱའོ། །ལངས་པ་ན་ཡང་མཆོད་བསྟོད་སོགས་ཐམས་ཅད་བྱའོ། །ཨི་ཐི།། །།རིག་པ་འཛིན་པའི་སྡེ་སྣོད་དུ་གསུངས་པའི་འཇམ་དཔལ་གྱི་སྒྲུབ་ཐབས་ནི། སྒྲུབ་པ་པོས་སེམས་ཅན་གྱི་དོན་དུ་སེམས་བསྐྱེད་ལ། སྙིང་གར་པྃ་དང་ཨ་ལས་པད་ཟླའི་སྟེང་དུ་དྷཱིཿདཀར་པོའི་འོད་ཀྱིས་བླ་མ་ལ་སོགས་པ་སྤྱན་དྲངས་པ་ལ་མཆོད་པ་ལ་སོགས་པས་བསོད་ནམས་ཀྱི་ཚོགས་བསགས་ལ། ཡེ་ཤེས་ཀྱི་ཚོགས་བསགས་ཀྱང་བྱས་ཏེ། སྟོང་པའི་ངང་ལས་ལུས་སྒྱུ་མ་ཙམ་ལས་པད་ཟླའི་སྟེང་དུ་ཐིག་ལེ་དཀར་པོ་ཡུངས་ཀར་ཙམ་དེ་ལས་འོད་འཕྲོས། སེམས་ཅན་གྱི་དོན་བྱས་ཚུར་འདུས་ཐིག་ལེ་ལ་ཐིམ། དེ་གྱུར་པ་ལས་དྷཱིཿདཀར་པོ་དེའི་འོད་ཀྱིས་འཇམ་དཔལ་གྱི་སྐུ་མང་པོ་བཀུག་སྟེ་དྷཱིཿལ་ཐིམ། དེ་ཡོངས་སུ་གྱུར་པ་ལས་བདག་ཉིད་འཇམ་དཔལ་སྐུ་མདོག་དཀར་པོ། གཡས་ན་རལ་གྲི་གཡོན་པུསྟི་བསྣམས་པ། རིན་པོ་ཆེའི་རྒྱན་གྱིས་བརྒྱན་པར་བསྒོམ་མོ། །སྤྲོ་བསྡུ་མི་སྐྱོའི་བར་དུ་བྱའོ། །དེ་ནས་བཟླས་པ་ནི་སྙིང་གར་པད་ཟླའི་སྟེང་དུ་དྷཱིཿསྭཱ་ཧཱ་བཀོད་པ་དེ་ལ་སེམས་གཏད་ལ་བཟླས་པ་བྱའོ། །ལངས་ན་ལྷའི་ང་རྒྱལ་དང་ལྡན་པར་བྱའོ། །རྫོགས་སོ།། །།དེ་ཉིད་དུ་གསུངས་པའི་སྒྲུབ་ཐབས་གཉིས་པ་ནི། སྙིང་གར་པད་ཟླའི་སྟེང་དུ་དྷཱིཿའི་འོད་ཀྱིས་བླ་མ་ལ་སོགས་པ་སྤྱན་དྲངས་ལ། ཚད་མེད་པ་བཞི་ཡན་ཆད་བསོད་ནམས་ཀྱི་ཚོགས་རྫོགས་པ་དང་ཡེ་ཤེས་ཀྱི་ཚོགས་བསགས་བྱས་ལ། སྟོང་པའི་ངང་ལས་ལུས་སྒྱུ་མ་ཙམ་གྱི་སྙིང་གར་པད་ཟླའི་སྟེང་དུ་ཐིག་ལེ་ཡུངས་འབྲུ་ཙམ་མར་མེའི་འོད་ལྟ་བུ་དང་ལྡན་པར་བསམས་ལ། དེའི་འོད་བ་སྤུའི་བུ་ག་ནས་ཕྱིར་འཕྲོས་པས་མཐོ་གང་ལ་སོགས་པར་ཇེ་ཆེར་འཕེལ་ཏེ་སེམས་ཅན་ཐམས་ཅད་ལ་ཕོག་པས། རྒྱུད་དག་པར་བྱས་ནས་ཚུར་འདུས་ཏེ་དེ་ཉིད་ལ་ཐིམ་པས་དྷཱིཿདཀར་པོ་ཐིག་ལེ་དང་བཅས་པ། དེ་གྱུར་པ་ལས་འོད་འཕྲོས་འཇམ་དཔལ་མང་པོ་བཀུག་སྟེ་དྷཱིཿལ་ཐིམ། དེ་གྱུར་པ་ལས་འཇམ་དཔལ་སྐུ་མདོག་དཀར་པོ། གཡས་རལ་གྲི། གཡོན་པུསྟི་བསྣམས་པའོ། །དེའི་ཐུགས་དཀར་ཡང་པད་ཟླའི་སྟེང་དུ་དྷཱིཿབསམས་ལ་དེའི་འོད་ཟེར་རླུང་འབྱུང་བ་དང་ཆས་ཏེ། སྣ་ནས་ཕྱིར་འཕྲོས་པས་སེམས་ཅན་ཐམས་ཅད་ཀྱི་རྒྱུད་སྦྱངས་ནས་འཇམ་དཔལ་དུ་བྱས་ནས་འཇུག་པའི་རླུང་དང་ཆས་ཏེ་ཚུར་འདུས་ནས་དྷཱིཿལ་བསྟིམ་མོ། །དེ་ལྟར་སྤྲོ་བསྡུ་མི་སྐྱོའི་བར་དུ་བྱའོ། །དེ་ནས་བཟླས་པ་བྱེད་ན་སྙིང་གར་པད་ཟླའི་སྟེང་དུ་ཨོཾ་དྷཱིཿསྭཱ་ཧཱ། ཞེས་བཀོད་ལ་དེ་ལ་སེམས་གཏད་ལ་བཟླས་པ་བྱའོ། །དེ་ནས་ལྡང་ན་ཐམས་ཅད་དུ་ལྷའི་ང་རྒྱལ་བྱའོ། །རྫོགས་སོ།། །།འདིའི་སེམས་གཟུང་བའི་ཐབས་སྟོན་ཏེ། འཇམ་དཔལ་གྱིས་ཤེས་རབ་བསྐྱེད་པའོ། །དེ་ལ་དང་པོ་སེམས་བསྐྱེད་ལ་སྐད་ཅིག་གིས་བདག་ཉིད་ཨ་ར་པ་ཙ་ནར་བསྒོམས་ལ། ལྟེ་བར་ཟླ་བའི་འོད་རྣོ་བ་ཕྲ་བ་ཟང་ཟང་པ་བསམ་སྟེ། སྤྱི་གཙུག་ན་ཧྃ་དཀར་པོ་མགོ་ཐུར་ལ་འཕྱང་བ་རྩའི་མདུད་པ་རང་བཞིན་གཞོམ་དུ་མེད་པ་ལས། ཉེ་བའི་ཐིག་ལེ་འོད་ཕོག་པས་ཞུ་སྟེ་བྱང་སེམས་ཐུར་ལ་ན་ར་ར་བབས་པས་ཐིག་ལེ་ཆེར་འབར་ཞིང་ལུས་ཐམས་ཅད་བྱང་སེམས་ཀྱིས་གང་བར་བསམ་མོ། །དེ་ལྟར་བསྒོམས་པས་ཤེས་པ་བརྟན་པར་གྱུར་ན། དང་པོར་དྲོད། དེ་ནས་བདེ་བ། དེ་ནས་ཤེས་རབ་སྐྱེ་སྟེ་གཉིས་མེད་རྟོགས་པར་འགྱུར་རོ། །མན་ངག་ཁོག་པ་སྟོང་པར་བསྒོམ་པའོ། །ཟབ་པ་རྫོགས་སོ།། །།རྡོ་རྗེ་གུར་ལས་གསུངས་པའི་ཡན་ལག་མེད་པའི་རྡོ་རྗེའི་སྒྲུབ་ཐབས་འདོད་ཆགས་ཆེན་པོའི་སྒྲུབ་ཐབས་འདི་ལ་གཉིས་ཏེ། སྒོམ་པའི་ཐབས་དངོས་དང༌། དབང་དུ་བྱ་བའི་ཐབས་སྟོན་པའོ། །དང་པོ་ནི་སྒྲུབ་པ་པོས་སྙིང་གར་པད་ཟླའི་སྟེང་དུ་དྷཱིཿ དེའི་འོད་ཀྱི་བླ་མ་ལ་སོགས་པ་སྤྱན་དྲངས་ལ་མཆོད་པ་ལ་སོགས་པས་བསོད་ནམས་ཀྱི་ཚོགས་རྫོགས་པ་དང་སྟོང་པར་བསྒོམས་ཏེ། སྔགས་ཀྱིས་བརྟན་པར་བྱས་ལ། སྟོང་པའི་ངང་ལས་པད་ཟླའི་སྟེང་དུ་ཧྃ་བསམས་ཏེ། དེ་གྱུར་པ་ལས་མེ་ཏོག་གི་གཞུ་དང་ཨུཏྤ་ལ་དམར་པོའི་མདེའུ་ཅན་གྱི་མདའ་དང་གཞུའི་འཆང་ཟུང་ཧྃ་གིས་མཚན་པ་བསམ། དེའི་འོད་ཀྱིས་འཇམ་དཔལ་དཔག་ཏུ་མེད་པ་སྤྱན་དྲངས་ལ། ཧྃ་ལ་ཐིམ་པས་ཐམས་ཅད་གྱུར་པ་ལས། བཅོམ་ལྡན་འདས་ཡན་ལག་མེད་པའི་རྡོ་རྗེའི་སྐུར་བསྒོམ་མོ། །བླ་མ་དྷ་དབང་བསྐུར་ནས་མི་བསྐྱོད་པས་དབུར་བརྒྱན་པར་བྱ་གསུང༌། བཻ་མི་བསྐྱོད་པ་རང་ཆས་སུ་བྱ་གསུང༌། དེ་ནས་སྙིང་གའི་ས་བོན་གྱིས་ཡེ་ཤེས་པ་སྤྱན་དྲངས་ཏེ་མཆོད་ནས་ཡི་གེ་བཞིས་གཅིག་ཏུ་བྱའོ། །དེ་ནས་བཟླས་པ་ནི་སྙིང་གར་པད་ཟླའི་སྟེང་དུ་ཧྃ་ལ་སྔགས་ཀྱི་བསྐོར་བ་ལ་དམིགས་ལ་བཟླས་པ་བྱའོ། །ཚད་ནི་འབུམ་ཕྲག་གཅིག་གིས་འགྲུབ་པ་ཡིན་ཡང་རྩོད་པའི་དུས་སུ་བརྒྱད་འགྱུར་རོ། །སྒྲོལ་མའི་རྟོག་པ་ལས་བཞི་འགྱུར་རོ། །གཉིས་པ་དབང་དུ་བྱ་བའི་ཐབས་ནི། དང་པོར་ལྷའི་ང་རྒྱལ་དུ་བྱས་ལ་ལྟེ་བར་ཧྲཱིཿལས་བསྐྱེད་པའི་ཨུཏྤ་ལའི་སྡོང་པོ་འདབ་མ་བཅུ་དྲུག་པ་ནི་སྙིང་ག་ན་ཡོད་པའོ། །དེའི་སྡོང་པོ་ན་ཡར་ཧཱུྃ་དགུ་བརྩེགས་མར་གནས་པ། འདབ་ན་ཡི་གེ་ཤིན་ཏུ་དྲག་པ། ཆེ་བ་རགས་པ་བསམ་མོ། །ལྟེ་བ་ན་ནུ་མོ་ཟླ་བ། ཉིན་མོ་ཉི་མ། དེ་ལ་ཧྲཱིཿགཉིས་དང་སྔགས་དགོད་དོ། །དེ་ནས་པདྨའི་ལྟེ་བའི་ཡི་གེ་ལས་འོད་ཟེར་བསྒྲུབ་བྱའི་བུད་མེད་གང་ན་ཡོད་པར་སོང་སྟེ། ཡཾ་ལས་རླུང༌། རྃ་ལས་མེའི་སྟེང་དུ་དེ་བཀུག་ནས་འོད་ཟེར་ཞགས་པ་ལྟ་བུས་སྐེ་ནས་བཅིང༌། ལྕགས་ཀྱུ་ལྟ་བུས་མཚན་མ་ནས་ཕུག་སྟེ་མདུན་དུ་བཀུག་པར་བསམ་མོ། །དེ་ནས་དེ་འཕྲོས་ཀྱང་རང་དབང་མེད་པར་མེའི་རྭ་བར་བཅུག་ནས་མིག་ལ་སོགས་པ་ཐམས་ཅད་དུ་ཧཱུྃ་དམར་པོ་རེ་བསམས་ལ། དེའི་སྦུབས་ན་ཡར་ཧཱུྃ་དམར་པོ་དགུ་བརྩིགས་ཡོད་པ། འདབ་མ་ལ་དབྱངས་ཡིག་བཅུ་དྲུག་མཐིང་མདོག་ཏུ་ཡོད་པའོ། །པད་ལྟེ་ལ་བསྒྲུབ་བྱའི་མིང་ལ་སོགས་པ་ཧྲཱིཿགཉིས་ཀྱི་བར་དུ་བཅུག་པར་བསམ་མོ། །དེ་ནས་རང་གི་སྙིང་གའི་མིང་གི་ཡི་གེ་ལས་འོད་འཕྲོས་པ་དང་ཧཱུྃ་རྣམས་ཀྱི་འོད་དང༌། དེའི་རྗེས་སུ་དབྱངས་ཡིག་བཅུ་དྲུག་བུང་བ་བཅུ་དྲུག་ཏུ་གྱུར་པའམ། ཡང་ན་དེའི་འོད་ལས་བུང་བ་སྤྲོའོ། །དེ་རྣམས་སྣ་བུག་གཡོན་ནས་ཕྱུང་ནས་བསྒྲུབ་བྱའི་སྣ་བུག་གཡས་པ་ནས་སྙིང་གར་ཞུགས་ནས། མིང་གི་ཡི་གེའི་འོད་ཀྱིས་བསྒྲུབ་བྱའི་མིང་གི་ཡི་གེ་བཀུག་པ་དང༌། ཧཱུྃ་གི་འོད་ཟེར་གྱིས་ཧཱུྃ་རྣམས་འཇིབས་པ་དང༌། འོད་ཀྱི་རྗེས་སུ་ཞུགས་པའི་སྦྲང་བུས་བསྒྲུབ་བྱའི་དབྱངས་ཡིག་རྣམས་འཇིབས་པ་དང༌། པདྨ་ཡང་རྩ་བ་ནས་ཕྱུང་སྟེ་བཅག་དཀྲུམ་བྱས་པར་བསམ་པ་དང༌། དེ་བཞིན་དུ་རང་གི་དབུགས་ཀྱིས་བསྐུལ་བའི་འོད་ཟེར་གྱིས་ཀྱང་བསྒྲུབ་བྱའི་ཡི་གེ་དག་བླངས་ཏེ། སྦྲང་བུ་ལ་སོགས་པ་ཐམས་ཅད་བསྒྲུབ་བྱའི་སྣ་བུག་གཡོན་པ་ནས་བྱུང་སྟེ། རང་གི་གཡས་པ་ནས་རླུང་དང་བསྡོང་ཏེ་ཞུགས་ནས་དེའི་མིང་གི་ཡི་གེ་རང་གི་སྙིང་གའི་སྔགས་ལ་ཞུགས་ཏེ། པདྨའི་སྟེང་ན་མིང་གི་སྔགས་རང་གི་མིང་གི་སྔགས་ཀྱིས་མནན་ནས་ཡོད་པར་བསམ་ཞིང་རང་གི་ཤེས་པ་དང་བསྒྲུབ་བྱའི་ཤེས་པ་གཅིག་ཏུ་འདྲེས་པར་བསམ་མོ། །དེ་ནས་དེའི་ནུབ་མོར་ཕྱག་དང་པོ་གཉིས་ན་ཡོད་པའི་མདའ་བརྒྱབ་པས་འདོད་ཆགས་ཀྱིས་མྱོས་པར་བསམ་མོ། །མེ་ཏོག་གི་གཞུས་དེའི་རྐང་པ་གཉིས་བཅིངས་པར་བསམ་མོ། །གཡོན་གྱི་གཉིས་པ་ན་ཡོད་པའི་ཨུཏྤ་ལའི་ཞགས་པས་སྐེ་ནས་བཏགས་ནས་རང་གི་རྐང་པའི་རྩར་ལྷུང་བར་བསམ་སྟེ། གཡོན་གྱི་ཐ་མ་ན་ཡོད་པའི་ཨུཏྤ་ལའི་སྡོང་པོས་བཏགས་པས་ཤེས་མེད་ཅིང་དབང་དུ་འགྱུར་རོ། །གཡས་ཀྱི་གཉིས་པའི་རལ་གྲིས་བསྡིགས་པས་ཆགས་པ་དང་ལྡན་པའི་མཚན་མ་གོས་མེད་པ་ལ་སོགས་པར་བསམས་ལ། གཡས་ཐ་མའི་མེ་ལོང་བསྟན་པས་ཀྱང་ཆགས་པར་བསམས་ཏེ། སེམས་ཀྱི་སྣང་བ་ཙམ་དུ་ལོངས་སྤྱད་པར་བྱའོ། །ཡང་ན་ཡོད་པར་མོས་པ་ཉིད་དེ། དེ་ལ་དངོས་སུ་མེད་པས་རང་རིག་པ་རྗེས་སུ་ཆགས་པར་བྱའོ། །གཞན་ནི་སླའོ། །ཡི་དམ་ལྷས་ལུང་བསྟན་པའི་བུད་མེད་ལ་དེ་ལྟར་བྱའོ། །གཞན་དབང་དུ་བྱ་བར་འདོད་ན་འགྲུབ་བོ། །རྫོགས་སོ།། །།ཆོས་ཀྱི་དབྱིངས་ཀྱི་ངག་གི་དབང་ཕྱུག་གི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་དེ། རང་གི་སྙིང་གར་པད་ཟླའི་སྟེང་དུ་ཨ་དཀར་པོ་བསམས་ལ། དེའི་འོད་ཀྱིས་འཇམ་དཔལ་དཔག་མེད་སྤྱན་དྲངས་ལ། བསོད་ནམས་ཀྱི་ཚོགས་རྫོགས་པ་དང་སྟོང་པར་བསྒོམས་ཏེ་སྔགས་ཀྱིས་བརྟན་པར་བྱའོ། །སྟོང་པའི་ངང་ལས་པད་ཟླའི་སྟེང་དུ་ཨ་དཀར་པོ། དེའི་འོད་ཀྱིས་འཇམ་དཔལ་དཔག་ཏུ་མེད་པ་སྤྱན་དྲངས་ཏེ་ཨ་ལ་ཐིམ། དེ་གྱུར་པ་ལས་བཅོམ་ལྡན་འདས་བསྐྱེད་དོ། །ཕྱག་དང་པོ་གཉིས་མཐེབ་མཛུབ་རྩེ་སྤྲད་ནས་བརྩེགས་པའོ། །དེ་ནས་ཧཱུྃ་ཏྲཱྃ་ཧྲཱིཿཨཱཿལས་བྱུང་བའི་ཕྱག་རྒྱ་བཞི་བསྒོམ་པ་ནི་སྙིང་གར་པད་ཟླའི་སྟེང་དུ་ཧཱུྃ་སྔོན་པོ་གྱུར་པ་ལས་རྡོ་རྗེ་ལྟེ་བ་ལ་ཧཱུྃ་གིས་མཚན་པའོ། །དེས་འགྲེའོ། །དེ་ནས་སྔགས་འདིས་ནི་རང་ཉིད་འཇམ་དཔལ་དུ་ཡིན་པར་བྱིན་གྱིས་བརླབ་བོ། །དེ་ནས་སྲིན་ལག་དང་མཐེའུ་ཆུང་སྦྲེལ་ཏེ་གུང་མོ་གཉིས་ཚིགས་གསུམ་པར་བཅག་པ་ལ་སོགས་པས་རྡོ་རྗེའི་ཕྱག་རྒྱ་བཅིང་ངོ༌། །ལྕེ་ལ་ཟླ་བའི་སྟེང་དུ་དྷཱིཿ«་་་་་གཞུང་ན་ཧྲཱིཿདམར་པོ་སྣང་»དཀར་པོ་བཀོད་པས་བྱིན་གྱིས་བརླབ་བོ། །དེ་ནས་རྡོ་རྗེའི་ཕྱག་རྒྱ་དང་ལྡན་པས་གཞུང་བཞིན་དུ་བཟླས་པ་དམ་ཚིག་དང་ལྡན་པས་ཐོས་པ་དྲག་པོར་བྱའོ། །དེ་ཡང་སྙིང་གར་པད་ཟླའི་སྟེང་དུ་སྔགས་བཀོད་ལ་དེ་ལ་དམིགས་ལ་བྱའོ། །མཚན་ལ་བསྟོད་པ་གཉིས་ཀྱང་བྱའོ། །དེ་ཡང་དུས་གསུམ་དུ་བྱའོ། །རྫོགས་སོ།། །།མཚན་ཡང་དག་པར་བརྗོད་པའི་སྒྲུབ་ཐབས་སྟོན་པའི་རྒྱུད་ལས། ཤེས་རབ་རལ་གྲི་མདའ་གཞུ་ཐོགས། །ཞེས་གསུངས་པའི་སྒྲུབ་ཐབས་སོ། །འདི་ལ་ཡང་སྒྲུབ་པ་པོས་སེམས་བསྐྱེད། སྙིང་གར་པད་ཟླའི་སྟེང་དུ་མུཿདམར་ཞིང་དཀར་བ་བསྒོམས་ལ་དེའི་འོད་ཀྱིས་ཅི་འདྲ་བའི་སྐུ་དང་བླ་མ་ལ་སོགས་པ་སྤྱན་དྲངས་ལ་ཚོགས་བསག་གོ །དེ་ནས་ཆོས་ཐམས་ཅད་སྟོང་པར་བསྒོམ་ཞིང་སྔགས་ཀྱིས་བརྟན་པར་བྱའོ། །སྟོང་པའི་ངང་ལས་ནམ་མཁར་པད་ཟླའི་སྟེང་དུ་ཧཱུྃ་གྱུར་པ་ལས་རྡོ་རྗེ་རྩེ་ལྔ་ཧཱུྃ་གིས་མཚན་པ། རྡོ་རྗེ་ལས་འོད་འཕྲོས་པས་རྡོ་རྗེའི་རྭ་བ་དང་རྡོ་རྗེ་འོད་དུ་ཞུ་བ་ལས་འདམ་བག་གི་ཞལ་ཞལ་ལྟར་བྱས་ཏེ་སྲུང་བའི་འཁོར་ལོ་བྱའོ། །དེའི་ནང་དུ་ཧྲཱིཿདམར་པོ་ལས་པདྨ་ཨ་ལས་ཟླ་བའི་སྟེང་དུ་དམར་ཞིང་དཀར་བའི་མུཿལས་སྤྲོས་བསྡུས་བསྐུལ་སྦྱང་བྱས་ཏེ། དེ་གྱུར་པ་ལས་འཇམ་དཔལ་དུ་བསམ། དེ་དང་དུས་མཉམ་དུ་ལྷ་མོ་གཞན་བཞི་རྫོགས་པའམ། ཡང་ན་ཡིག་འབྲུ་ལས་བསྐྱེད་དེ། སྙིང་གར་པད་ཟླའི་སྟེང་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་དེ་གྱུར་པ་ལས་རྡོ་རྗེ་སེམས་མའོ། །གཡོན་པས་དྲིལ་བུ་དཀུར་བརྟེན་ཅིང་གཡས་པས་རྡོ་རྗེ་སྙིང་གར་སྟོད་པའི་ཚུལ་དུའོ། །སྨིན་མཚམས་སུ་པད་ཟླ་ལ་ཏྲཱྃ་ལས་རཏྣ་ཏྲཱྃ་གིས་མཚན་པ་ལས་རཏྣ་སེམས་མའོ། །གཡོན་པས་སྐྲ་བཟུང་ནས་གཡས་པས་མགོ་ལ་མེ་ཏོག་འཆིང་བའོ། །མགྲིན་པར་པད་ཟླའི་སྟེང་དུ་ཧྲཱིཿལས་པདྨ་ཧྲཱིཿས་མཚན་པ་ལས་པདྨ་རྡོ་རྗེའོ། །གཡས་པའི་མཐེབ་མཛུབ་རྩེ་སྤྲད་ནས་གཡོན་པས་པདྨ་ཁ་འབྱེད་པའི་ཚུལ་དུའོ། །སྤྱི་བོར་པད་ཟླ་ལ་ཧ་ལས་སྣ་ཚོགས་རྡོ་རྗེ་ཧས་མཚན་པ་ལས་ལས་ཀྱི་རྡོ་རྗེ་མའོ། །ཕྱག་ནི་མཐེ་བོང་གཉིས་རྩེ་སྤྲད་དེ་སྤྱི་བོར་བཞག་ནས་མཛུབ་མོ་གཉིས་རྩེ་སྤྲད་དེ་བསླངས་ནས་སོར་མོ་རྣམས་དཀྲི་བའོ། །དེ་ནས་སྙིང་གར་པད་ཟླའི་སྟེང་དུ་མུཿདེའི་འོད་ཀྱིས་ཡེ་ཤེས་སེམས་དཔའ་སྤྱན་དྲངས་ཏེ་མཆོད་ལ། ཡི་གེ་བཞིས་དགུག་པ་ལ་སོགས་པ་བྱའོ། །དེའི་དུས་སུ་རྡོ་རྗེ་འཁོར་ལོ་ཕྱག་རྒྱ་སྙིང་གར་གཞག་པར་བྱའོ། །དེ་ནས་སྙིང་གའི་མུཿའི་འོད་ཀྱིས་རིགས་ལྔ་དང་ལྷ་མོ་སྤྱན་དྲངས་ཏེ་མཆོད་ལ། དེ་དག་ལ་གསོལ་བ་བཏབ་སྟེ་དབང་བསྐུར་ཆུ་ཞབས་ལ་མི་བསྐྱོད་པའོ། །འདིས་དང་པོ་སྟན་ལ་བསྡད་མ་ཐག་ཏུ་ལན་ཅིག དེ་ནས་དམ་ཚིག་སེམས་དཔའ་བསྒོམས་པའི་རྗེས་ལ་ལན་ཅིག་བརྗོད་པ་དང༌། ཡེ་ཤེས་པ་གཞུག་པ་དང༌། དབང་བསྐུར་རྫོགས་ནས་མདོ་ཀློག་ཁར་བརྗོད་དེ། བྱིན་གྱིས་བརླབས་པའོ། །ཐུན་གསུམ་ལ་སོགས་པ་གྲུབ་པའི་མཚན་མ་བྱུང་གི་བར་དུ་མདོ་སྡེ་ཀློག་ཅིང་བྱའོ། །མཚན་མ་ནི་ཉིད་བྱོན་ནས་ཁྱོད་ཀྱིས་སྒྲུབས་ཤིག་དངོས་གྲུབ་གང་འདོད་པ་འགྲུབ་བོ་ཞེས་རྨི་ལམ་དུ་བྱུང་ནས། འཇམ་དཔལ་གྱི་རྒྱུད་ཆེན་པོ་ནས་དངོས་གྲུབ་སྒྲུབ་པའི་ཐབས་ཇི་ལྟ་བ་བཞིན་འགྲུབ་པའོ། །ཡང་ན་མཚན་མ་ནི་དང་པོ་སྨིག་རྒྱུ་ལྟ་བུ་དང༌། དུ་བ་དང༌། སྲིན་བུ་མེ་ཁྱེར་དང༌། མར་མེ་འབར་བ་དང༌། སྤྲིན་མེད་ནམ་མཁའ་ལྟ་བུ་སྟེ་ལྔ་ལ་བྱའོ། རྫོགས་སོ།། །།འཇམ་དཔལ་དཔའ་བོ་གཅིག་པ་འདི། ཚིག་རྐང་གཉིས་དང་གཉིས་ཀྱིས་མཆོད་པར་བརྗོད་ཅིང་བཤད་པར་དམ་བཅའ་བ་བསྟན་ནོ། །གཞུང་དོན་ལ་དང་པོ་སྒྲུབ་པ་པོས་ཡིད་དང་མཐུན་པའི་གནས་སུ་བདེ་བའི་སྟན་ལ་འདུག་སྟེ། སེམས་བསྐྱེད་ནས་རང་གི་སྙིང་གར་པྃ་པད་ཨ་ཟླའི་སྟེང་དུ་མྃ་དཀར་པོ་དེའི་འོད་ཀྱིས་ཚོགས་རྟེན་སྤྱན་དྲངས་ཏེ་ཚོགས་བསགས་ལ་རང་གི་སྙིང་གར་བསྟིམ་མོ། །དེ་ནས་ཡེ་ཤེས་ཀྱི་ཚོགས་བསག་གོ །དེ་གཉིས་ཀྱི་འབྲས་བུ་ལྷ་བསྒོམ་པ་ནི། སྟོང་པའི་ངང་ལས་པྃ་པད་ཨ་ཟླའི་སྟེང་དུ་མྃ་དཀར་པོ་དེ་ལས་འོད་སྤྲོས་བསྡུ་པ་ལས་འཇམ་དཔལ་དུ་བསྐྱེད་དོ། །དེའི་ཐུགས་ཀའི་པད་ཟླའི་སྟེང་དུ་མྃ་དཀར་པོ་ཤེལ་ལམ། ཟླ་བ་ལྟ་བུ་དེའི་འོད་ཀྱིས་བསྐུལ་སྦྱང་བྱས་ནས། ཚུར་འདུས་རང་གི་རྒྱུད་དག་པར་བྱས་པའི་སྤྲོ་བསྡུས་མྃ་ལ་ཐིམ་པ་མི་སྐྱོའི་བར་དུ་བྱའོ། །བཟླས་པ་གཞན་དང་འདྲའོ། །ལས་ཐམས་ཅད་ལ་འབུམ་ཕྲག་བདུན་བཟླས་སོ། །ལྡང་བ་ནི་ལྷའི་ང་རྒྱལ་གྱིས་བྱའོ། །རལ་གྲི་ནི་མཐོ་གང་བའོ། །དེའི་རིག་པ་འཛིན་པ་ལ་རྟགས་གསུམ་སྟེ། ལག་ན་ཡོད་པ་ལ་དྲོད་འབྱུང་བས་ནི་གཞན་དབང་དུ་བྱ་བ་འགྲུབ་བོ། །དུ་བ་བྱུང་བས་ནི་མི་སྣང་བ་འགྲུབ་བོ། །མེ་འབར་བ་བྱུང་བས་ནི་ཕྱག་རྒྱ་ཆེན་པོ་འགྲུབ་བོ། །རྡོ་རྗེ་ནས་ལྕགས་ཀྱུའི་བར་དུ་ཡང་དེ་བཞིན་ནོ། །མིག་སྨན་དང་རྐང་མགྱོགས་ནི་དཔའ་བོ་གྲིར་ཤི་བའི་རྐང་མཐིལ་གྱི་ཚིལ་བུ་ལ་བསྒྲུབས་པས་འགྲུབ་བོ། །ཐིག་ལེ་དབང་དུ་བྱ་བ་ནི་གི་ཝང་ལ་སོགས་པའི་ཐིག་ལེའི་རྫས་ལ་བསྔགས་ནས་ཐིག་ལེ་བྱས་ན་མི་སྣང་བ་དང་དབང་དུ་བྱ་བ་འགྲུབ་བོ། །རིག་འཛིན་གྱི་བཅུད་ལེན་ནི་དངུལ་ཆུའི་སྦྱོར་བས་ཏེ་ཐ་མས་ནི་ཟངས་དང་ལྕགས་གསེར་དུ་འགྱུར་ལ། འབྲིང་གིས་རྒས་པ་མེད་པའི་བཅུད་ལེན་དུ་འགྱུར་ལ། རབས་ཀྱིས་མཁའ་སྤྱོད་དུའོ། །འོ་ཐུག་གི་བཟའ་བ་ལ་སོགས་པ་ནི་ལག་པ་གཡོན་པའི་མཐིལ་དུ་བཞག་སྟེ་གཡས་པས་ཁ་བཅད་དེ་བཟླས་པ་བྱའོ། །རས་དཀར་པོའི་ནང་དུ་མོན་སྲན་བརྒྱ་རྩ་བརྒྱད་གཏུམས་ཏེ་ཁར་བཅུག་ནས་བཟླས་པས་མྱུ་གུ་སྐྱེས་ཀྱི་བར་དུ་བྱའོ། །མྱུ་གུ་སྐྱེས་པ་དེ་སོས་མ་བཏབ་པར་ཁྱུར་མིད་བྱས་ན་གཞུང་གི་་ཕན་ཡོན་འབྱུང་ངོ༌། །རེ་ག་ཁྲུ་གང་ཡན་ཆད་དཀར་པོས་ཟླུམ་པོར་བྲིས་ཏེ་ཕྱག་མཚན་དཀྱིལ་དུ་བྲིས་ནས་ཤུག་པ་ལ་སོགས་པའི་བུད་ཤིང་བསྲེགས་ན་དབང་དུ་འདུའོ། །ལྷའི་ང་རྒྱལ་དང་ལྡན་པས་སྔགས་འདི་ཉིད་ཀྱིས་བསྲེག་རྫས་གཞན་མི་དགོས། བྲ་མའི་ཕྱེ་མ་ཞེས་པ་ལྡུམ་བུ་ཡིན་ན་སོར་བཞིའི་ཚད་དུའོ། །སྔོ་སྨད་ཀྱི་བྱེ་བྲག་ཡིན་ན་སོར་མོ་བཞི་བླངས་པའོ། །ཀཉྫི་དང་ནི་ཞེས་པ་ཕྱེ་དང་ཡུངས་མ་བརྔོས་པ་དང་ཆུ་ལ་ལྷུ་བླངས་ཏེ་ཐབ་ཀྱི་འོག་ཏུ་གཞག་གོ །དེ་བས་ཉུང་བ་ཟླ་བ་ཕྱེད་ལ་ཡང་ངོ༌། །དེ་མཎྜལ་མཆོད་པ་བྱས་ཤིང་བཏུང་ངོ༌། །བཏུངས་པའི་ཕན་ཡོན་ནི་སྡིགས་པ་ལ་སོགས་པ་འཇོམས་པར་བྱེད་དོ། །རྫོགས་སོ།། །།འཇམ་དཔལ་ཤེས་རབ་འཁོར་ལོའི་སྒྲུབ་ཐབས་ལ། ཚིག་རྐང་པ་གསུམ་དང་གཅིག་གིས་ཀླད་ཀྱི་དོན་ཏེ་བླ་མ་ནི་རང་གིའོ། །རྡོ་རྗེ་སློབ་དཔོན་ཞེས་བྱ་བ་ནི་རང་གི་མ་ཡིན་ཡང་འཇིག་རྟེན་ན་གཞན་རྣམས་ཀྱི་ཆེན་པོར་གྱུར་པའོ། །འདིའི་ཉམས་སུ་བླང་བ་ནི་སྒྲུབ་པ་པོས་སེམས་བསྐྱེད་ལ། སྙིང་གར་པད་ཟླའི་སྟེང་དུ་རང་གི་ས་བོན་གྱི་འོད་ཀྱིས་ཚོགས་རྟེན་སྤྱན་དྲངས་ལ། བསོད་ནམས་ཀྱི་ཚོགས་རྫོགས་པར་བྱའོ། །དེ་ནས་སྟོང་པ་སྔགས་ཀྱིས་བརྟན་པར་བྱས་པ་ཡེ་ཤེས་ཀྱི་ཚོགས་སོ། །དེ་གཉིས་ཀྱི་འབྲས་བུ་ལྷ་བསྐྱེད་པ་ནི། སྟོང་པའི་ངང་ལས་པད་ཟླ་ལ་དྷཱིཿའམ་ཨ་དཀར་པོ་ལས་རལ་གྲི་འཆང་ཟུང་ལ་ཨ་ཡོད་པའོ། །དེའི་འོད་ཀྱིས་སྤྱན་དྲངས་དྷཱིཿའམ་ཨ་ལ་ཐིམ་པ་དེ་གྱུར་པ་ལས་བྷ་ག་ཝཱན་ནོ། །དེ་ནས་སྔགས་དང་གནས་བཞིར་ཕྱག་རྒྱ་འཇུག་པས་བཅིང་ངོ༌། །དེ་ནས་ལྟེ་བའི་འོག་ཏུ་བྷྲཱུྃ་དཀར་པོ་ལས་བྱུང་བའི་ཟླ་བའི་སྟེང་དུ་ཧྲཱིཿབསྒོམ། བརྒྱད་པའི་བཞི་པ་ཧ། དང་པོའི་བཅུ་དྲུག་པ་ཨཱཿ བདུན་པའི་གཉིས་པ་ར། དང་པོའི་བཞི་པ་ཨཱི་སྟེ་ཧྲཱིཿབཏུས་པའོ། །དེ་གྱུར་པ་ལས་པདྨ་ཁ་ཟླུམ་པའི་པདྨའི་ལྟེ་བ་ལ་ཡི་གེ་ཧཱུྃ་བསམ་སྟེ་ཁ་བྱེ་བར་བལྟའོ། །དེའི་སྟེང་དུ་ཟླ་བ། དེའི་སྟེང་དུ་སོར་གཅིག་གིས་མ་རེག་པར་འཁོར་ལོ་དཀར་པོ་རྩིབས་དྲུག་པ། དེའི་རྩིབས་ལ་མ་ནིང་གི་ཡི་གེ་བཞི་བོར་བའི་ཨཱ་ལི་བཅུ་གཉིས་གཡས་སྐོར་དུ་ཟུང་རེ་རེ། རྩིབས་བར་ལ་དབྱངས་ཡིག་གཉིས་ཀྱི་བར་དུ་རྩ་བའི་སྔགས་ཀྱི་ཡི་གེ་རེ་རེ་དགོད་དོ། །ལྟེ་བ་ལ་དྷཱིཿམུ་ཁྱུད་ལ་ང་ཉ་ན་མ་བཞི་མ་གཏོགས་པའི་ཀཱ་ལི་གཡས་སྐོར་དུའོ། །དེ་གཡས་སུ་དྲག་ཏུ་འཁོར་བའོ། །དེའི་སྟེང་དུ་སོར་གཅིག་གིས་མ་རེག་པར་ཨ་ལས་ཟླ་བའི་སྟེང་དུ་ཨ་ར་པ་ཙ་ན་ལས་གོང་བཞིན་ལྷ་ལྔའམ། ཡང་ན་ཡི་གེ་རང་འོད་དང་ལྡན་པར་བསྒོམ་མོ། །མཐར་ཡི་གེ་བརྒྱ་པ་བརྗོད་པ་དང༌། སྒྱུ་མ་ལྟ་བུས་གནས་པར་བྱའོ། །ཚིགས་བཅད་གཅིག་གིས་མཇུག་གི་དོན་བསྟན་ཏོ། །རིག་པ་འཛིན་མ་ནི་རྣལ་འབྱོར་མའམ། ཡང་ན་མཁའ་སྤྱོད་དུ་ཡོད་པའི་རྡོ་རྗེ་རྣལ་འབྱོར་མའོ། །རྫོགས་སོ།། །།འཕྲལ་དུ་ཉམས་སུ་མྱོང་བའི་འཇམ་དཔལ་གྱི་སྒྲུབ་ཐབས་ལ། ཚིགས་བཅད་གཅིག་གིས་ཀླད་དོན་བསྟན་ཏོ། །སྒྲུབ་པ་པོས་སེམས་བསྐྱེད་ལ་སྙིང་གའི་པད་ཟླའི་སྟེང་དུ་ས་བོན་དྷཱིཿབསམས་ལ། དེའི་འོད་ཀྱིས་ཚོགས་རྟེན་སྤྱན་དྲངས་ལ་ཚོགས་བསགས་པར་བྱའོ། །སྟོང་པའི་ངང་ལས་སེམས་ཉིད་པྃ་པད་ཨ་ཟླའི་སྟེང་དུ་དྷཱིཿགྱུར་པ་ལས་རལ་གྲི་རྣོན་པོ། །དེའི་རྩེ་མོ་དང་འཆང་ཟུང་དུ་ཨ་ལས་ཟླ་བའི་སྟེང་དུ་དྷཱིཿལས་རལ་གྲི་དྷཱིཿས་མཚན་པ། དེའི་འོད་ཀྱིས་འཇམ་དཔལ་སྤྱན་དྲངས་ལ་དྷཱིཿཡིག་ལ་ཐིམ་པར་གྱུར་པ་ལས་བྷ་ག་ཝཱན་ནོ། །དེའི་སྙིང་གི་ནང་སྟོང་པ་གང་ལ་ཡང་མ་རེག་པར་ཨ་ལས་འཁོར་ལོ་རྩིབས་བརྒྱད་པ། དེའི་སྟེང་དུ་ཡང་ཅུང་ཟད་ཀྱིས་མ་རེག་པར་ཨ་ལས་ཟླ་བ། དེའི་སྟེང་གི་དབུས་སུ་པད་ཟླ་ལ་དྷཱིཿལས་རལ་གྲིའི་རྩེ་མོར་ཟླ་བ་ལ་ཨས་མཚན་པ་གྱུར་པ་ལས་དྲྭ་བ་ཅན་གྱི་དམ་ཚིག་སེམས་དཔའ་ཅི་འདྲ་བའི་འཇམ་དཔལ་དུ་བལྟའོ། །དེའི་མདུན་ལ་སོགས་པ་བཞིར་ར་ལ་སོགས་པའི་ས་བོན་བཞི་ལས་རལ་གྲི་རྩེ་མོ་རང་རང་གི་ས་བོན་གྱི་མཚན་པ་གྱུར་པ་ལས་དྲྭ་བ་ཅན་གྱི་འོད་དང་ཟླ་འོད་ཅན་དང་སྐྲ་ཅན་དང༌། ཉེ་བའི་སྐྲ་ཅན་མ་རྣམས་བསམ་མོ། །ལྷ་ལྔ་པོའི་སྙིང་གར་རང་རང་གི་ས་བོན་དཀར་པོའོ། །དེ་ནས་གཙོ་བོ་དམ་ཚིག་སེམས་དཔའི་ཐུགས་ཀ་ནས་དྷཱིཿའི་འོད་ཀྱིས་ཡེ་ཤེས་པ་སྤྱན་དྲངས་ལ་ཡི་གེ་བཞིས་དགུག་གཞུག་བྱའོ། །དེ་ལྟར་གནས་པ་ལ་འཁོར་ལོ་གཡས་སུ་དྲག་པར་འཁོར་ཞིང་ལྷ་ལྔ་ལས་ཀྱང་འཇམ་དཔལ་མང་པོ་སྤྲོ་ཞིང་སེམས་ཅན་གྱི་དོན་བྱེད་པ་མི་སྐྱོའི་བར་དུ་བསྒོམ་མོ། །སྐྱོ་བར་གྱུར་ན་ཡང་མ་ཡེངས་པར་སེམས་ཀྱིས་བཟླས་པ་བྱའོ། །དེ་ནས་ལྡང་བ་ནི་ཡི་གེ་བརྒྱ་པ་བརྗོད་ཅིང་སྒྱུ་མ་ཙམ་གྱིས་ལྷའི་ང་རྒྱལ་དུ་བྱའོ། །རྫོགས་སོ།། །།འཇམ་དཔལ་ཁྲོ་བོ་ལས་གཤིན་རྗེ་མཐར་བྱེད་ཀྱི་སྒྲུབ་ཐབས་སྟོན་ཏེ། དེ་ཡང་འདི་ན་ཡིན་པས་སྒྲུབ་པ་པོ་ཆོས་ལྔ་དང་ལྡན་པས་དུར་ཁྲོད་ལ་སོགས་པའི་གནས་སུ་བདེ་བའི་སྟན་ལ་འདུག་ལ། རི་ལུ་ཁར་བཅུག་ལ་སེམས་བསྐྱེད་དོ། སྙིང་གར་པད་ཉིའི་སྟེང་དུ་ཧཱུྃ་གི་འོད་ཀྱིས་ཚོགས་རྟེན་སྤྱན་དྲངས་ཏེ་ཚོགས་བསགས་པ་དང༌། ཚད་མེད་པ་བསྒོམས་ཀྱང་འགལ་བ་མེད་དོ། །སྟོང་པའི་ངང་ལས་པད་ཉིའི་སྟེང་དུ་ཧཱུྃ། དེ་ལས་འོད་འཕྲོས་པས་བསྡུས་བསྐུལ་སྦྱང་བྱས་ཐིམ། གྱུར་པ་ལས་གཤིན་རྗེ་མཐར་བྱེད་ཞལ་དྲུག་པ་སྔོན་པོ་མགོ་བོ་ལྔ་བཅུའི་དོ་ཤལ་ཅན་ནོ། །བླ་མ་དྷ་ནི་ཡི་གེ་བཞིས་དགུག་གཞུག་བྱ། དབང་བསྐུར་དང་མི་བསྐྱོད་པས་དབུར་བརྒྱན་པ་ཡང་བྱ་གསུང༌། དེ་ལ་སེམས་སྐྱོ་ན་དམ་ཚིག་གི་ཕྱག་རྒྱ་བཅིངས་ཏེ། སྙིང་གར་པད་ཉི་ལ་ཧཱུྃ་སྔགས་ཀྱིས་བསྐོར་བ་ལ་དམིགས་ལ་བཟླས་པ་བྱའོ། །རྫོགས་སོ།། །།གཤིན་རྗེ་ནག་པོའི་སྒྲུབ་ཐབས་ནི་མདོ་ལས། མིག་དྲུག་ལག་དྲུག་སྟོབས་དང་ལྡན། །ཞེས་པ་ལ་བརྟེན་པའོ། །སྒྲུབ་པ་པོས་སེམས་བསྐྱེད་ལ་སྙིང་གར་པད་ཉིའི་སྟེང་དུ་ཧཱུྃ་ལས་འོད་འཕྲོས་ཚོགས་རྟེན་སྤྱན་དྲངས་ལ་ཚོགས་གཉིས་བསག་གོ །དེ་ནས་ལུས་སྒྱུ་མ་ཙམ་གྱི་སྙིང་གར་པད་ཉིའི་སྟེང་དུ་ཧཱུྃ་སྔོན་པོ་དེའི་འོད་ཀྱིས་བགེགས་བསྐྲད་པ་དང་སྤྲོས་བསྡུས་པ་ལས། བཅོམ་ལྡན་འདས་ཞལ་གསུམ་ཕྱག་དྲུག་པ། ཕྱག་མཚན་གཞུང་ནས་བསྟན་པའོ། །བེ་ཏཱ་ལཱི་ནི་རོའི་རྐང་པ་ནས་བཟུང་བའོ། །ཡང་རྃ་ལས་ཉི་མ་ལ་གནས་པའི་ཧཱུྃ་ལས་འོད་ཀྱིས་བགེགས་བསྐྲད་པ་དང་སྤྲོས་བསྡུས་པ་ལས་སྐྱེས་པའི་བཅོམ་ལྡན་འདས་ཞལ་དྲུག་པ་སྟེ་ཕྱག་མཚན་གཞུང་ནས་བསྟན་པ་རྣམས་སོ། །དེས་ན་འདི་སྒྲུབ་ཐབས་གཉིས་སུ་ཡང་འགྲོ་གསུང༌། མི་བསྐྱོད་པ་རང་ཆས་སུ། ཡེ་ཤེས་པ་དགུག་པ་མི་དགོས། ནུ་མའི་བར་དུ་ཧཱུྃ་བསྒོམ་པ་ཉིད་ཡེ་ཤེས་སེམས་དཔའོ། །དེ་ནས་སྐུ་གསུང་ཐུགས་བྱིན་གྱིས་བརླབ་པ་དང༌། བསྟོད་པ་ལ་སོགས་པ་མཆོད་པ་བྱེད་པ་དང༌། བཟླས་པ་ཡང་བྱའོ། །རྫོགས་སོ།། །།རྡོ་རྗེ་ཆོས་ཀྱི་སྒྲུབ་ཐབས་ལ། ཚིགས་སུ་བཅད་པ་གཅིག་གིས་ཀླད་ཀྱི་དོན་བསྟན་ཏོ། །དེའི་ཚིག་དོན་ནི། སྒྲིབ་པ་གཉིས་ཀྱི་ཉེས་པའི་དྲྭ་བ་བཅོམ་པ་ནི་སྤྲུལ་པའི་སྐུའོ། །ཚོགས་གཉིས་དང་ལྡན་པ་ནི་ལོངས་སྐུའོ། །རྡོ་རྗེ་ནི་ཆོས་ཐམས་ཅད་སྟོང་པ་ཆོས་སྐུ་སྟེ་སྐུ་གསུམ་མོ། །ཡང་ཕྱེད་གོང་མས་སྤངས་པ་ཕུན་སུམ་ཚོགས་པ་བསྟན་ལ། འོག་མས་ཡེ་ཤེས་སོ། །གསུང་དབྱངས་དྲུག་ཅུ་དང་ལྡན་པ་ནི་གསུང་གི་དཀྱིལ་འཁོར་རོ། །དེ་ཡང་དུས་གསུམ་གྱི་སངས་རྒྱས་མ་ལུས་པའི་བདག་ཉིད་དམ། ངོ་བོ་ནི་ངག་གི་རང་བཞིན་གྱི་བཅོམ་ལྡན་འདས་སོ། །དེ་ལ་ཕྱག་བཙལ་ནས་སྟོན་པའོ། །སྒྲུབ་པ་པོས་སེམས་བསྐྱེད་ནས། སྙིང་གར་པད་ཟླའི་སྟེང་དུ་ཧྲཱིཿལས་འོད་འཕྲོས་པས་རྡོ་རྗེ་ཆོས་སྤྱན་དྲངས་ལ་ཚོགས་གཉིས་བསགས། རང་ལུས་སྒྱུ་མ་ཙམ་གྱི་སྙིང་གར་པད་ཟླའི་སྟེང་དུ་ཧྲཱིཿདམར་པོ་ལས་སྤྲོས་བསྡུས་ཐིམ། ཡོངས་སུ་གྱུར་པ་ལས་བདག་ཉིད་རྡོ་རྗེ་ཆོས་སུ་བསྒོམ་མོ། །དེའི་སྙིང་གར་པད་ཟླ་ལ་ཧཱུྃ་ལས་རྡོ་རྗེ་རྩེ་ལྔ་པ་ལྟེ་བ་ལ་ཧཱུྃ། རྩེ་མོ་ལ་ཨོཾ་གྱིས་མཚན་པའོ། །དེ་ལས་འོད་སྤྲོས་བསྡུས། སེམས་ཅན་གྱི་དོན་བྱས་པར་བསམ། ཡང་དེ་ལས་འོད་འཕྲོས་པས་མགྲིན་པ་ནས་ལྕེ་ཐོག་ཏུ་བྱུང་བར་བསམ། ལྕེའི་རྩེ་མོ་ཧྲཱིཿས་མཚན་པའོ། །ཡང་ན་ལྕེ་རྡོ་རྗེར་བསམ་མོ། །འདིར་ཡང་ན་བསོད་ནམས་ཀྱི་ཚོགས་བསགས་མི་དགོས། སྟོང་པའི་ངང་ལས་བསྐྱེད་པའོ། །བཟླས་པ་ནི་སྙིང་གའི་ཧྲཱིཿལ་སེམས་གཏད་ལ་དེ་ཉིད་བཟླས་པའོ། །རྒྱས་པར་བྱེད་ན་ཨོཾ་ཧྲཱིཿསྭཱ་ཧཱ་ཞེས་སོ། །ཨི་ཐི།། ༄༅། །སེང་གེ་སྒྲའི་སྒྲུབ་ཐབས་འདི། དང་པོ་རང་གི་ཆེད་དུ་གྲོགས་པོ་ཞིག་ཤི་བའི་སྒྲིབ་པ་སྦྱོང་བའི་སྒྲུབ་པ་བྱེད་པ་ན་མྱ་ངན་གྱི་སྐྲ་རལ་པར་བྱས། རྒྱན་མེད་པར་གྲོགས་པོའི་རུས་པའི་ཐལ་བས་ལུས་དཀར་པོར་«་་་་་འདིའི་སྐུ་མདོག་དཀར་པོར་འོང་བ་ནི། སྔོན་དུས་ན་ཚོང་དཔོན་སྙིང་སྟོབས་ཆེན་པོ་ཞེས་བྱ་བ་དང༌། སྙིང་རྗེ་ཆེན་པོ་ཞེས་བྱ་བའི་ཁྱེའུ་གཉིས་ཡོད་པས། གཉིས་ཀ་གྲོགས་པོ་ཡིད་གཅུགས་པ་ཡིན་ཏེ། གཉིས་པོས་རྒྱ་མཚོ་ལ་ནོར་བུ་ལེན་དུ་ཕྱིན་པས་གཟིངས་ཞིག གཅིག་གིས་གཅིག་གཏང་མ་ཕོད་པར་འཇུས་པ་ལ། སྙིང་སྟོབས་ཆེན་པོའི་རྟོག་པ་ལ། རྒྱ་མཚོ་རོ་དང་ཞག་ཏུ་མི་འགྲོགས་པས་རོ་ལ་ཁོས་འཇུས་ན་ཕན་སྙམ་ནས་རང་གི་རྐེད་པ་ལ་གྲི་གཅིག་ཡོད་པ་དེ་བཏོན་ཏེ། ཨོལ་པ་བཅད་ནས་དེ་ལ་འཇུས་པས་ཐོན་ནོ། །དེ་ནས་དེའི་བསམ་པ་ལ་ཁོའི་དོན་དུ་ཤི་བས་ད་ཁོ་གང་དུ་སྐྱེས་པ་དེར་ང་ཡང་སྐྱེ་བར་གྱུར་ཅིག ངའི་ཁ་དོག་དཀར་པོར་ཤོག་ཤིག་ཅེས་སྙིང་བརྩེ་བའི་སྒོ་ནས་སྨོན་ལམ་བཏབ་སྟེ། སྔར་གྱི་རོ་དེའི་རུས་པ་ལུས་ལ་བྱུགས་ནས་དཀར་པོ་བྱས་སོ། །སྙིང་སྟོབས་ཆེན་པོ་ནི་འཇམ་དཔལ་ཡིན་ལ། སྙིང་རྗེ་ཆེན་པོ་ནི་སྤྱན་རས་གཟིགས་ཡིན་པས་དཀར་པོར་ཡོད་ཟེར་རོ།།» བྱས་ཏེ། བསྒྲུབས་པས་གྲུབ་པ་ཐོབ་སྟེ། སེང་གེ་སྒྲར་གྱུར་པའོ། །སྒྲུབ་པ་པོས་སེམས་བསྐྱེད་དེ། སྙིང་གར་པད་ཟླའི་ཧྲཱིཿའི་འོད་ཀྱིས་ཚོགས་རྟེན་སྤྱན་དྲངས་ཏེ། ཚོགས་གཉིས་བསག་གོ །སྟོང་པའི་ངང་ལས་ལུས་སྒྱུ་མ་ལྟ་བུའི་སྙིང་གར་པྃ་ལས་པདྨའི་སྟེང་དུ་སིཾ་ལས་སེང་གེའོ། །ཨ་ལས་ཟླ་བའི་སྟེང་དུ་ཧྲཱིཿལས་འོད་འཕྲོས་པས་བསྐུལ་སྦྱང་བྱས་ཐིམ། གྱུར་པ་ལས་བདག་ཉིད་སེང་གེ་སྒྲར་བསྐྱེད་དོ། །དཀའ་ཐུབ་ཀྱི་ཆ་བྱད་ནི་མུ་སྟེགས་རལ་པ་ཅན་གྱི་ཆ་བྱད་དོ། །རྒྱལ་པོའི་རོལ་པ་ནི་ཕྱག་གཡས་པ་ཁ་སྦུབས་ནས་བརྐྱང་བ་འགྱིངས་བག་ཏུ་བཞུགས་པའོ། །ཕྱག་མཚན་འདི་གཉིས་ནི་གཡས་གཡོན་གྱི་རྩ་བ་ནས་སྐྱེས་པའོ། །གཡོན་ཐོད་པ་དྲི་ཞིམ་པོ་བཟང་པོ་ནི་མྱང་འདས་ཀྱི་མཚོན་པའོ། །སྦྲུལ་ནི་འཁོར་བའི་བརྡ་སྟེ་ཡང་ན་ཐོད་པ་མྱང་འདས་དྲི་ཞིམ་པོའི་བརྡའོ། །སྐུ་ལ་གཡས་ནས་རྣམ་སྣང་དང་རིན་འབྱུང༌། གཡོན་ནས་མི་བསྐྱོད་པ་དང་དོན་གྲུབ། རྒྱབ་ནས་སྣང་མཐའ་སྟེ་དེ་བཞིན་གཤེགས་པ་ལྔ་འཕྲོ་བའོ། །སྤྲོ་བསྡུ་མི་སྐྱོའི་བར་དུ་བྱ་གསུང༌། བཟླས་པ་འདྲ། དྷ་དང་བཻའི་བཞེད་པ་གསུང༌། དེ་ནས་བསྙེན་པ་བརྒྱད་འགྱུར་རྫོགས་ནས་སྒྲུབ་པ་ལ་ཞུགས་པ་ན། ཐང་སྐུའམ་ལུགས་སྐུའི་མདུན་དུ་བའི་ལྕི་བ་ས་ལ་མ་ལྷུང་བ་བླངས་པས་མཎྜལ་རེ་རེ་ལ་སྔགས་ལན་བཅུ་གསུམ་བཅུ་གསུམ་བརྗོད་དོ། །ལྷ་མི་དགོད་པར་མེ་ཏོག་གི་ཚོམ་བུ་ལྔ་དགོད་དེ་དབུལ་བའོ། །དེ་ནས་ལག་པ་ལ་སོགས་པ་དང་ལྕི་བ་ལྷག་མ་ལ་སྔགས་འདིས་ལན་བཅུ་གསུམ་བཅུ་གསུམ་དུ་བཟླས་ལ་བསྐུས་པས་ནད་ཐམས་ཅད་ཞི་བར་འགྱུར་རོ། །དེ་ལྟར་བྱས་པས་མ་གྲུབ་ན་མཚམས་མེད་པ་ལྔ་བྱས་པ་ཡིན་ནོ། །ཞེས་ལ་དོར་བའི་ཚིགས་གསུངས་པ་ཡིན་ནོ། །འདི་བསྒྲུབ་པའི་དམ་ཚིག་ནི་བརྫུན། ངག་འཁྱལ། ངག་རྩུབ་ཤ་ཆང༌། སྒོག་བཙོང་རྣམས་སྤང་བ་ཡིན་ནོ། །གཉེན་ན་རེ། རིགས་ལྔ་ཡང་སྤྱི་བོ་དང་དཔུང་པ་གཉིས་དང་པུས་མོ་གཉིས་ནས་སྤྲོ་གསུང༌། ལྕི་བ་ནི་བ་དཀར་མོའམ་དམར་སེར་གྱིའོ། །ལྕི་བ་ལྷག་མ་ལས་མཎྜལ་བྱ་ཞིང་ལག་པ་ལ་གོས་པ་གུད་དུ་བྱས་ལ་བྱ་གསུང༌། འདི་སློབ་དཔོན་ཙནྡྲ་གོ་མིས་མཛད་པའོ། །ཁོང་ལ་ལུང་བསྟན་པ་ཡིན་ནོ། །ཨི་ཐི།། །།འཕགས་པ་སྤྱན་རས་གཟིགས་དབང་ཕྱུག་ཧ་ལ་ཧ་ལའི་སྒྲུབ་ཐབས་ལ། ཚིགས་སུ་བཅད་པ་གཅིག་གིས་ཀླད་དོན་བསྟན་ལ། གཞུང་དོན་ལ་སྒྲུབ་པ་པོས་ཐང་ཀ་ལ་སོགས་པ་དང་ཚོགས་རྟེན་སྤྱན་དྲངས་ལ་མཆོད་པ་ལྔ་འབུལ། སྔགས་རིང་པོས་མཆོད་པ་དང་གཞན་ཡང་དབུལ། ཚད་མེད་པ་བཞི་བསྒོམ། དེ་ནས་རང་གི་སྙིང་གར་ཟླ་བའི་སྟེང་དུ་ཧྲཱིཿབསམ། མདུན་གྱི་ནམ་མཁར་བླ་མ་ལ་སོགས་པ་སྐད་ཅིག་གིས་བསམས་ཏེ་སྤྱན་དྲངས་པ་མ་ཡིན་ནོ། །དེ་ནས་ཧྲཱིཿའི་འོད་ཀྱིས་མཆོད་ལ། ཡེ་ཤེས་ཀྱི་ཚོགས་ཡན་ཆད་རྫོགས་པར་བྱས་ལ། དེ་ནས་ལུས་སྒྱུ་མ་ལྟ་བུའི་སྙིང་གར་ཟླ་བའི་སྟེང་གི་ཧྲཱིཿདེ་གྱུར་པ་ལས་པདྨ་དཀར་པོ་འདབ་བརྒྱད། དེ་ལས་སྤྲོས་བསྡུས་བསྐུལ་སྦྱང་བྱས་པ་ལས་བཅོམ་ལྡན་འདས་སོ། །ཞལ་གསུམ་ཕྱག་དྲུག་པ་གཞལ་ཡས་ཁང་རིན་པོ་ཆེ་ན། པདྨ་དང་ཟླ་བའི་གདན་ལ་བཞུགས་པ། རོལ་པའི་འགྱིང་བག་དང་བཅས་པའོ། །ཕྱག་གཡོན་པའི་དང་པོས་ནི་པུས་མོ་གཡོན་པའི་སྟེང་དུ་ལྷ་མོ་འདོད་པའི་ནུ་མ། སྐུ་མདོག་སྔོན་མོ་དེའི་མཆན་ཁུང་ན་ཕྱག་གཡོན་པས་འཁྱུད་ནས་གྲུ་མོ་ནས་བཟུང་བའོ། །ཕྱག་མཚན་ཐོད་པའོ། །གཡོན་དང་གཡས་ཀྱི་རྩ་ནས་སྐྱེས་པའོ། །འོད་དཔག་མེད་རང་ཆས་སུ་སྣང་བ་དང་འདྲ་བར་ཡོད་པའོ། །དབུ་ལ་ཐོད་པ་ལྔས་བརྒྱན་པའོ། །དབུའི་གཡོན་ན་བྱང་སེམས་ཀྱི་ཟླ་བ་ཕྱེད་པས་བརྒྱན་པའོ། །སྐུ་དེ་ལས་དེ་དང་འདྲ་བ་འཕྲོས་པའམ་རིགས་ལྔའོ། །དེ་ནས་སྐུ་གསུང་ཐུགས་བྱིན་གྱིས་བརླབ་པ། ཡེ་ཤེས་པ་ནུ་མའི་བར་དུ་ཨ་ལས་ཟླ་བའི་སྟེང་དུ་ཧྲཱིཿབལྟས་ཏེ་དེ་སྣོད་བཅུད་ཀྱི་རང་བཞིན་ནམ་དངོས་པོ་ཐམས་ཅད་ཀྱ་རང་བཞིན་དུ་བལྟའོ། །བཟླས་པ་གཞན་དང་འདྲ། དེ་ནས་ལྡང་བ་ན་ཕྱག་གཉིས་པར་བྱས་ལ་དམ་ཚིག་པའི་ང་རྒྱལ་གྱིས་གནས་པར་བྱའོ། །རང་ལས་མཆོད་པ་ལྔ་སྤྲོས་ཏེ་མཆོད་པ་དང་བསྟོད་པ་བྱའོ། །ཡི་གེ་བརྒྱ་པ་བརྗོད་དེ་བཟོད་པར་གསོལ་ལ། སྔགས་ཀྱིས་བསྐུལ་ལ་གཤེགས་སུ་གསོལ་ལོ། །གཏོར་མ་ལ་སོགས་པ་བཏང༌། འདི་ནི་གཟུགས་ལ་སོགས་པ་འདོད་པའི་ཡོན་ཏན་ལྔ་ལ་ཐབས་ཤེས་རབ་ཏུ་ལོངས་སྤྱད་པས་ནི་འགྲུབ་པར་འགྱུར་བའོ། །རྫོགས་སོ།། །།ཁརྶ་པཱ་ཎིའི་སྒྲུབ་ཐབས་ལ། སྒྲུབ་པ་པོ་སེམས་བསྐྱེད་ལ། ཚོགས་གཉིས་སྤྱི་དང་མཐུན་པར་བསགས་ཏེ། སྟོང་པའི་ངང་ལས་པྃ་ལས་པདྨ་དང༌། ཨ་ལས་ཟླ་བའི་སྟེང་དུ་ཧྲཱིཿལས་སྤྲོས་བསྡུས་བསྐུལ་སྦྱང་བྱས་པ་ལས་བྷ་ག་ཝཱན་དུ་བསྐྱེད་དེ། འོད་དཔག་མེད་རང་ཆས་ཀྱིས་དབུར་བརྒྱན་ནོ། །གཡས་ན་སྒྲོལ་མ་ལྗང་གུ་སྐྱབས་སྦྱིན་དང་ཨུཏྤ་ལ་ལྗང་གུ་འཛིན་པའོ། །དེའི་ཕར་ངོས་སུ་ནོར་བཟངས་སེར་པོ་ཐལ་མོ་སྦྱར་བ། གཡོན་ན་ཁྲོ་གཉེར་ཅན་སེར་མོ་ཞལ་གཅིག་ཕྱག་གཉིས་མ། དེའི་ཕར་ངོས་ན་རྟ་མགྲིན་དམར་པོ་བཅོམ་ལྡན་འདས་ཀྱི་པུས་མོ་གཡོན་པར་གྲུ་མོ་གཡོན་པས་བརྟེན་ཅིང་གཡས་པས་དབྱུག་པ་ཨང་ཚུགས་སུ་བྱས་པའོ། །དེ་རྣམས་གྲལ་རིམ་བཞིན་དུའོ། །སྐུ་གསུང་ཐུགས་བྱིན་གྱིས་བརླབ། བཟླས་པ་ནི་སྙིང་གར་ཟླ་བའི་སྟེང་ན་ཧྲཱིཿལ་སྔགས་ཀྱིས་བསྐོར་བ་ལ་དམིགས་པ་བྱའོ། །ཨི་ཐི།། །།ཡི་གེ་དྲུག་པའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ནས་སྙིང་གའི་པད་ཟླའི་སྟེང་གི་ཧྲཱིཿའི་འོད་ཀྱིས་ཚོགས་རྟེན་སྤྱན་དྲངས་ཏེ། ཚོགས་གཉིས་རྫོགས་པར་བྱའོ། །དེ་ནས་འགྲོ་དྲུག་གི་སེམས་ཅན་ཐམས་ཅད་ལྷག་མེད་ཀྱི་དབྱིངས་སུ་གཞག་པར་བྱའོ་སྙམ་དུ་སེམས་བསྐྱེད་དེ། གཞུང་ནས་འདུ་ཤེས་ཅན་ཞེས་པས་བཞིའོ། །དབེན་པ་གྲོང་ལས་དགོན་པའམ་དུར་ཁྲོད་དོ། །དེ་ནས་ལུས་སྒྱུ་མ་ཙམ་གྱི་སྙིང་གར་པདྨ་དང་ཟླ་བའི་སྟེང་དུ་ཧྲཱིཿལས་བཅོམ་ལྡན་འདས་གཞུང་བཞིན་དུ་བསྐྱེད་དོ། །འོད་དཔག་མེད་རང་ཆས་སུའམ་དབང་བསྐུར་ཡང་རུང་ངོ༌། །གཡས་སུ་ནོར་བུ་འཛིན་པ་གཙོ་བོ་ཅི་འདྲ་བའོ། །གཉིས་པའི་ཕྱག་གིས་གཙོ་བོ་ལ་འདུད་ཅིང་ཕྱོགས་པའོ། །གཡོན་དུ་འབྲུ་དྲུག་མ་ཡང་དེ་བཞིན་ནོ། །དེ་ནས་སྔགས་ནི་ཡི་གེ་དྲུག་པ་ཡིན་ནོ། །དེ་ནས་ཨོཾ་མ་ཧཱ་ནས་ཨཱཿའི་བར་གྱི་བྱིན་གྱིས་བརླབ། བཟླས་པ་ཞལ་ནས་ལྟེ་བར་ཞུགས་ཤིང་འཁོར་ལོ་ལ་དམིགས་ནས་བཟླས་སོ། །དེ་ནས་ལངས་ལ་ཡི་གེ་བརྒྱ་པ་བརྗོད་ཅིང་དགེ་བ་བསྔོ་བ་དང་མི་དམིགས་པས་གཟུང་བ་དང་ལྷའི་ང་རྒྱལ་དུ་བྱའོ། །ཨི་ཐི།། །།ཧ་རི་ཧ་རི་ཧ་རི་ལ་ཞོན་པ་ནི། དང་པོ་སེང་གེ གཉིས་པ་བྱ་ཁྱུང༌། གསུམ་པ་ཁྱབ་འཇུག་གོ །སྒྲུབ་པ་པོས་སེམས་བསྐྱེད་ལ། སྙིང་གའི་པད་ཟླའི་སྟེང་གི་ཧྲཱིཿའི་འོད་ཀྱིས་ཚོགས་རྟེན་སྤྱན་དྲངས། ཚོགས་གཉིས་བསག་གོ །དེ་ནས་རང་གི་འོག་ཏུ་འབྱུང་བ་རིམ་བརྩེགས་རི་རབ་དང་བཅས་པ་བསྒོམ། དེའི་སྟེང་དུ་པད་ཟླའི་སྟེང་དུ་བདག་ཉིད་བཅོམ་ལྡན་འདས་སུ་སྐད་ཅིག་གིས་བསམ། ཧྲཱིཿལས་སོ་སོའི་གཙོ་བོ་ལ་ཡི་གེ་གསུམ་དགོད། གསེར་གྱི་མདོག་ལྟ་བུ་ནི་གསེར་གཡའ་དང་བྲལ་བ་བཞིན་ནོ། །ཉོན་མོངས་པའི་དྲི་མའི་སྐྱོན་མེད་པར་མཚོན་པས་མདོག་དཀར་པོ། དེ་ནས་སྙིང་གར་ཚོགས་གཉིས་དག་པའི་ཨ་ལས་ཟླ་བ་དང་རྃ་ལས་ཉི་མ་ཁ་སྦྱར་བའི་དབུས་སུ་ཧྲཱིཿབསམས་ལ་དེའི་འོད་ཀྱིས་ཡེ་ཤེས་པ་སྤྱན་དྲངས་ཏེ་དགུག་གཞུག་བྱའོ། །དེའི་དཔང་པོ་བྱེད་པའི་ཕྱག་གཡས་པ་མགོའི་ཐད་ཀར་བརྐྱང་བའོ། །ཕྱག་གསུམ་པ་དགེ་བ་ཉེ་བར་སྟོན་པ་ནི་སྐྱོབ་བཞིན་དུ་བརྐྱང་བའོ། །རི་དྭགས་ནག་པོ་ནི་ཁྲི་སྙན་ནོ། །དེ་ལ་རྣམ་པར་དག་པ་ཞེས་བྱ་བ་ལ་སོགས་པ་ནི་གདན་གྱི་རྣམ་དག་གོ །བཟླས་པ་ནི་སྙིང་གར་ཉི་ཟླའི་སྟེང་དུ་ཧྲཱིཿལ་སེམས་གཏད་པ་དེ་ཉིད་དོ། །དེ་ཡང་གང་ཞེ་ན། ཨོཾ་ཧྲཱིཿསྭཱ་ཧཱ། ཞེས་པའོ། །ཨི་ཐི།། །།ཧ་ལ་ཧ་ལའི་སྒྲུབ་ཐབས་ནི། སྒྲུབ་པ་པོས་སེམས་བསྐྱེད་ལ། ཚོགས་གཉིས་རྫོགས་པར་བྱའོ། །སྟོང་པའི་ངང་ལས་པད་ཟླའི་སྟེང་དུ་ཧྲཱིཿལས་སྤྲོས་བསྡུས། དེ་གྱུར་པ་ལས་གཞུང་བཞིན་བསྐྱེད་དོ། །འོད་དཔག་མེད་དབུ་རྒྱན་རང་ཆས་སོ། །སྒེག་པ་ཞེས་པ་ལྷ་མོ་འདོད་མ། མདོག་དམར་མོ། གཙོ་བོའི་མཆན་གཡོན་ན་པུས་མོའི་སྟེང་ནས་འཁྱུད་པའོ། །ཕྱག་མཚན་གཉིས་གཡས་གཡོན་གྱི་རྩ་བ་ནས་ཡར་ཡོད་པའོ། །སྦྲུལ་ནི་ཀླུའི་རྒྱལ་པོ་ལྷག་མ་ཅན་ནོ། །འཁོར་བ་དང་མྱང་འདས་ཀྱི་བརྡར་གོ་བར་བྱའོ། །རོལ་པས་ནི་འགྱིང་བག་དང་བཅས་པའོ། །ཡེ་ཤེས་དགུག་སོགས་དྷ་དང་བཻའི་བཞེད་པའོ། །བཟླས་པ་སྔར་དང་འདྲའོ། །ཡི་གེ་བརྒྱ་པ་བརྗོད་པ་ལ་སོགས་པ་བྱའོ། །ཨི་ཐི།། །།སྤྱན་རས་གཟིགས་པདྨ་གར་གྱི་དབང་ཕྱུག་གི་སྒྲུབ་ཐབས་ནི། སྒྲུབ་པ་པོས་སེམས་བསྐྱེད། ཚོགས་གཉིས་བསག་གོ །སྟོང་པའི་ངང་ལས་པད་ཟླའི་སྟེང་དུ་ཧྲཱིཿལས་སྤྲོས་བསྡུས་གྱུར་པ་ལས་ལྷ་མོ་བརྒྱད་ཀྱི་འཁོར་དང་བཅས་པ་བསྐྱེད་དོ། །སེམས་དཔའི་སྐྱིལ་ཀྲུང་ནི་གཡོན་པའི་པུས་མོ་གཡས་པའི་འོག་ཏུ་བཅུག་པའོ། །དབུ་རྒྱན་རང་ཆས་སུའོ། །གཡོན་ན་ལྷ་མོ་གོས་དཀར་མོ་དམར་མོ་ཕྱག་གཡས་པ་འགྱིངས་བག་དང་བཅས་པས་ཁབ་མིག་འཛུད་པ་ལྟར་བྱས་པ་སྟེ་པདྨ་ཁ་འབྱེད་པའི་ཚུལ་དུ་ཡོད་པའོ། །འོག་གི་ལྷ་མོ་ལ་ཡང་དེ་བཞིན་ནོ། །ཨོཾ་ཀཱ་ཡ་ཞེས་པས་བདག་ཉིད་བྱིན་གྱིས་བརླབ་པའོ། །པདྨ་འདབ་མ་བརྒྱད་ལ་ལྷ་མོ་བརྒྱད་ཀྱིའོ། །གཞན་གཞུང་ལས་སོ། །ཡེ་ཤེས་པ་དང་དབང་བསྐུར་སྔར་བཞིན་འདོད་པ་གཉིས་སོ། །བཟླས་པ་གཞན་དང་འདྲའོ། །ཡི་གེ་བརྒྱ་པ་བརྗོད་པ་ལ་སོགས་པ་ལྡང་བའི་དུས་སུ་བྱའོ། །རྫོགས་སོ།། །།སྒྱུ་འཕྲུལ་དྲྭ་བའི་སྤྱན་རས་གཟིགས་འདི་ནང་པ་ཡིན་ཏེ་གནས་ལ་སོགས་པ་གོ་བར་«་་་་་རྒྱལ་པོ་ཅིག་ལ་བཙུན་མོ་བརྒྱ་རྩ་ཡོད་པ་དེ་ལ། སློབ་དཔོན་ཅིག་ཡོད་པ་ལ་གུས་པས་བཙུན་མོའི་མཆོག་ཁྲུས་བྱེད་པའི་ཚེ་ཡང༌། གསེར་གྱི་རུས་སྦལ་གྱི་སྟེང་དུ་བཞག་ནས་བཀྲུ་བ་ཅིག་ཡོད་པ་ཕུལ་བས། སློབ་དཔོན་དེའི་སྲས་ཅིག་བྱུང་ནས། དེ་ཆེར་སྐྱེས་པ་དང་སྒྲ་སློབ་ཏུ་བཏང་བས། གྲོགས་པོ་རྣམས་ན་རེ་ཁྱོད་ཀྱི་ཕ་དུར་ཁྲོད་དུ་འགྲོ་ཞིང་ཤ་ཟ་བ་རིགས་ངན་ཡིན་པས་ངེད་ཀྱི་ཟླ་ལ་མ་འདུག་ཟེར་ན་བཏོན་ནོ། །དེ་ཕ་མ་ཅན་དུ་ཕྱིན་ནས་སྔར་བཞིན་བྱས་པས་ཁོ་ན་རེ། འདི་སྒྲུབས་ཤིག་ཟེར་ནས་སྒྱུ་འཕྲུལ་དྲྭ་བ་བསླབ་ཏེ་སྤྱིལ་བུ་ཅིག་ཏུ་བསྒྲུབ། མ་དེ་ཕྱི་རོལ་ན་གཅན་གཟན་ལ་སོགས་པའི་བར་ཆད་བསྲུང་ཞིང་ཡོད་ཙམ་ན། ཟླ་བ་ལྔ་ལོན་པའི་ཚེ། སྤྱིལ་པོར་མེ་འབར། མས་བུ་ཚིག་སྙམ་སྟེ། ཆོས་གོས་ཆུར་བཅུག་པས་བསད་པས་མེ་སོད་ཀྱང༌། བུ་ཏིང་ངེ་འཛིན་ལས་མི་འདའ་བར་འདུག་གོ །དེ་ལ་བསྙད་པས་བར་ཆད་ཡིན། མེ་མ་བསད་ན་ཚེ་འདི་ལ་སངས་རྒྱས་འོང་སྟེ། ད་འདི་ལ་མི་འོང་བས་སྒྲུབ་པ་མ་བྱས་ཀྱང་པཎྜི་ཏར་འགྱུར་ཟེར་ནས། པཎྜི་ཏ་ཆེན་པོར་གྱུར་ཏེ། ཇེ་ཏཱ་རེ་ཡིན་གསུང༌།» བྱའོ། །སྒྲུབ་པ་པོས་སེམས་བསྐྱེད་དེ། ཚོགས་གཉིས་བསགས་ལ་སྔགས་ཀྱིས་བརྟན་པར་བྱའོ། །དེ་ནས་ནམ་མཁའ་པད་ཉིའི་སྟེང་དུ་ཧཱུྃ་དེ་གྱུར་པ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ་དེ་གྱུར་པ་ལས་རྡོ་རྗེའི་རྭ་བ་དང་གུར། དེའི་ནང་དུ་གཞལ་«་་་་་གཞུང་ན་གཞལ་ཡས་ཁང་མེད་»ཡས་ཁང་དུར་ཁྲོད་བརྒྱད་དང་ལྡན་པ། དེའི་དབུས་སུ་པད་ཉི་ལ་ཧྲཱིཿལས་འོད་སྤྲོས་བསྡུས། གྱུར་པ་ལས་བཅོམ་ལྡན་འདས་གཞུང་བཞིན་དུ་བསྐྱེད་དོ། །རུས་པའི་འཁོར་ལོ་ལ་སོགས་པ་ཕྱག་རྒྱ་དྲུག་དང་ལྡན་པའོ། །མགོ་བོ་ལྔ་བཅུའི་དོ་ཤལ་ཅན་སྙིང་གར་པད་ཉིའི་སྟེང་དུ་ཧྲཱིཿདེ་ཡེ་ཤེས་སེམས་དཔའོ། །ཡང་ན་དེའི་འོད་ཀྱིས་དགུག་གཞུག་དབང་བསྐུར་ཞིང་དབུར་བརྒྱན་པར་བྱའོ། །བཟླས་པ་ནི་ཁ་ནས་ལྟེ་བར་འཁོར་བས་སྙིང་གའི་ས་བོན་ལ་ཐིམ་པའོ། །གྲངས་ནི་བཤད་པ་ལས་བརྒྱད་འགྱུར་རོ། །ཨི་ཐི།། །།སྒྲོལ་མ་འདི་ཡན་ལག་དྲུག་པར་ཤེས་པར་བྱའོ།། །།སྒྲོལ་མ་དཀར་མོའི་སྒྲུབ་ཐབས་སྟོན་པ་ལ། དཀར་པོའི་ལས་ནི་དགེ་བཅུ་སྟེ། དེས་ནི་སྒྲུབ་པ་པོས་ལས་འགྲུབ། འདི་སྔོན་དུ་རྣལ་འབྱོར་པ་ཅིག་གིས་བསྒོམས་པས་རང་གི་བློ་ལ་ཤར། དེ་ནས་འདི་མཛད་པས་ཏིང་ངེ་འཛིན་ལས་བྱུང་བའི་གདམས་ངག་ཅེས་བྱའོ། །སྒྲུབ་པ་པོས་སེམས་བསྐྱེད། ཐང་ཀ་དགེ་བཅུ་སྟོན་པའི་སྒྲོལ་མ་ལ། །མཆོད་པ་ལྔ་ཡིས་མཆོད་བྱས་ཏེ། །སྙིང་གར་པད་ཟླའི་སྟེང་དུ་ཧཱུྃ། །དེ་ཡི་འོད་ཀྱིས་བདེ་གཤེགས་ཀུན། །ཐུགས་བསྐུལ་སྤྱན་དྲངས་མདུན་དུ་བཞུགས། །འདི་ནི་ཚུར་འདུས་ཧཱུྃ་ལ་ཐིམ། །དེ་ནས་ཚོགས་གཉིས་བསག་པར་བྱ། །སྟོང་པའི་ངང་ལས་སྲུང་འཁོར་བྱ། །དེ་དབུས་པད་ཟླའི་སྟེང་དུ་ཧཱུྃ། །དེ་གྱུར་ཨུཏྤ་ལ་ཧཱུྃ་གིས་མཚན། །འོད་ཀྱིས་སྤྱན་དྲངས་ཐིམ་འགྱུར་བསྐྱེད། །སྔགས་ཀྱི་རྣམ་དག་བསྟན་པ་ལ། །ལོག་པའི་རྣམ་པར་རྟོག་པ་ལས། །མི་གཡོ་བ་ཡི་དེ་ཉིད་དོ། །རྒྱུ་དང་འབྲས་ཞེས་ཐ་དད་ལས། །རྣམ་པ་གཉིས་སུ་དབྱེར་མེད་པས། །དེ་ཉིད་དོན་རྟོགས་ཤེས་རབ་དང༌། །གནོད་བྱེད་ཚར་གཅོད་སྟོབས་ཡིན་ནོ། །ཕྱི་མའི་མཐའ་རུ་སྨོན་པ་དང༌། །དེ་ཉིད་ལས་འབྲས་རྨོངས་པ་ཡིན། །དུག་གསུམ་ལ་སོགས་ཀུན་ཞི་བ། །དམ་ཚིག་སྙིང་གར་ཟླ་བ་ལ། །ཧཱུྃ་བལྟས་འོད་ཟེར་སྤྲོ་བསྡུ་བསྒོམ། །དྷ་དང་བཻ་ཡི་བཞེད་པ་ལྟར། །དོན་ཡོད་གྲུབ་པའི་དབུ་རྒྱན་ནོ། །སྐྱོ་ན་བསྐོར་བའི་བཟླས་པ་བྱ། །འོག་ཏུ་ཨོཾ་དང་ཧཱུྃ་ཕཊ་གཉིས། །གོང་དུ་མེད་ཀྱང་གདམས་ངག་གི །ཆར་པ་འབེབས་པའི་ཆོ་ག་ལ། །གསོལ་སྦྱོང་ལྡན་ཞེས་བྱ་བ་ནི། །སྡོམ་ལྡན་ཕྱི་དྲོའི་ཟས་སྤངས་ནས། །དཀར་གསུམ་ཟ་བར་བྱེད་པ་ཡིན། །ས་ལ་སོགས་པ་ཡང་གྲུབ་ན། །ས་བཅུ་རིམ་གྱིས་བགྲོད་པ་ཡིན། །ཉིད་ཀྱིས་གསུངས་པ་ཞེས་བྱའོ། །བྱིན་གྱིས་བརླབས་པ་ལས་བྱུང་གསུངས། །རྫོགས་སོ།། །།སིང་ལྡིང་ནགས་ཀྱི་སྒྲོལ་མའི་སྒྲུབ་ཐབས་ནི། སྒྲུབ་པ་པོས་སེམས་བསྐྱེད་ལ། སྙིང་གར་པད་ཟླའི་སྟེང་དུ་ཏཱྃ་དེའི་འོད་ཀྱིས་ཚོགས་རྟེན་སྤྱན་དྲངས་ལ་ཚོགས་གཉིས་བསགས། སྟོང་པའི་ངང་ལས་ལུས་སྒྱུ་མ་ཙམ་གྱི་སྙིང་གར། པད་ཟླ་ལ་ཏཱྃ་དེ་ལས་ཨུཏྤ་ལ་ཏཱྃ་གིས་མཚན་པ་དེ་ལས་འོད་སྤྲོས་བསྡུས་ཐིམ། གྱུར་པ་ལས་སྒྲོལ་མ་བསྐྱེད་དོ། །རང་ཆས་སུའོ། །གཡས་ན་འོད་ཟེར་ཅན་སེར་མོ། །གཡས་མྱ་ངན་མེད་པའི་ཤིང་གི་ཡལ་ག་ནས་བཟུང་བ། གཡོན་རྔ་ཡབ་དཀར་པོ་གཙོ་མོ་ལ་གཡོབ་པའོ། །གཡོན་ན་རལ་གཅིག་མ་སྔོན་མོ་གཡོན་ཐོད་པ། གཡས་རྔ་ཡབ་དཀར་པོ་གཡོབ་པའོ། །དེ་དག་དུས་གཅིག་ཏུའོ། །དེ་དག་གཞོན་ནུ་མ་ལ་བཅུ་དྲུག་ལོན་པ་ལྟ་བུ་སྟེ་ལངས་ནས་བཞུགས་པའོ། །ས་བོན་གྱི་འོད་ཀྱིས་ཡེ་ཤེས་པ་དགུག་གཞུག་བྱའོ། །བཟླས་པ་གཞན་དང་འདྲའོ། །ལྡང་བ་ན་ཡི་གེ་བརྒྱ་པ་བརྗོད་པ་ལ་སོགས་པ་བྱའོ། །འདི་ལ་གཅིག་ནཱ་གཱ་རྫུ་ནས་མཛད་ཅེས་ཀྱང་གྲགས་སོ། །ཨི་ཐི།། །།སྒྲོལ་མ་དཀར་མོའི་སྒྲུབ་ཐབས་འདི་སློབ་དཔོན་ངག་གི་དབང་ཕྱུག་གྲགས་པས་ཨཽ་ཌྱན་ནས་གསེར་བཙལ་ནས་ཡུལ་དབུས་སུ་བྱིས་པའི་སྟོན་མོ་ཆེན་པོ་མཛད་པ་ལས། དེའི་ཚེ་འཇམ་དཔལ་གྱི་སྤྲུལ་བ་བྱིས་པ་མཐོང་བས། འཇམ་དཔལ་ལ་བསྐོར་བ་བྱས་ནས་དེ་ནས་ཞལ་དངོས་སུ་མཐོང་བའི་སྐལ་བ་མེད་པས་དེའི་རྒྱུད་བྱིན་གྱིས་བརླབས་པའི་མཁས་པ་ཆེན་པོ་དེས་འཆི་བ་བསླུ་བའི་ཆེད་དུ་བསྟན་པ། སློབ་མ་མཐུ་བོ་ཆེ་ཞིག་གིས་ལོགས་སུ་བསྡེབས་པའོ། །དེ་ལ་ཚིགས་བཅད་གཅིག་གིས་ཕན་ཡོན་བསྟན་ཏོ། །སྒྲུབ་པ་པོས་སེམས་བསྐྱེད། ཚོགས་གཉིས་གཞན་དང་མཐུན་པར་བསག བཞི་པའི་དང་པོ་ཏའོ། །ཨཱ་རིང་པོ་ཏའི་སྲོག་ཏུའོ། །བཅས་པ་ནི་ཟླ་ཚེས་ཐིག་ལེ་སྟེ་ཏཱྃ་ངོ༌། །སྟོང་པའི་ངང་ལས་དེའི་འོད་ཀྱིས་སྤྲོས་བསྡུས་པ་ལས་སྒྲོལ་མ་སྐུ་མདོག་དཀར་མོ་ཨུཏྤ་ལ་རྣ་ལྟག་ཏུ་སླེབས་པ་བསྣམས་པ། སངས་རྒྱས་བྱང་སེམས་ཐམས་ཅད་ནི་གདུལ་བྱ་གང་འདོད་པའི་གཟུགས་སུ་སྟོན་པའོ། །དེའི་ཐུགས་ཀར་པད་ཟླ་ལ་ཏཱྃ། དེ་ལས་འཁོར་ལོ་རེ་མིག་བརྒྱད་ཡོད་པ་འོད་ཟེར་དཀར་པོ་ཅན་ལྟེ་བ་ལ་ཨོཾ་དང་ཧཱའི་བར་དུ་བསྲུང་བྱའི་མིང་ངོ༌། །རེ་མིག་བརྒྱད་ལ་ཡི་གེ་རེ་རེ་དགོད་པར་བལྟའོ། །ཡི་གེ་དེ་དག་ལ་དམིགས་ལ་བཟླས་པ་བྱའོ། །ཕན་ཡོན་ནི། ཚངས་དབང་ཞེས་སོགས་ཀྱིས་སོ། །དྲག་པོ་མ་ཧཱ་དེ་བ། ཚངས་དབང་ཕྱོགས་སྐྱོང་བཅུ། འདོད་ལྷ་ནི་བདུད་དགའ་རབ་དབང་ཕྱུག གྲོལ་བ་ནི་སངས་རྒྱས། སྐལ་ངན་ཀུན་གྱི་སྙིང་དུ་མི་སྡུག་པའོ། །སེང་གེ་སོགས་ན་འཇིགས་པ་ཆེན་པོ་བརྒྱད་དོ། །སྟག་དང་སེང་གེ་རྒྱལ་པོ་དང༌། །བློན་པོ་མེ་ཆུ་མི་དང་མི་མ་ཡིན་པའོ། །རྐང་པ་ནི་རྐང་མགྱོགས་ལ་སོགས་པ་གྲུབ་པ་ཆེན་པོ་བརྒྱད་དོ། །ཨི་ཐི།། །།ཨཽ་ཌྱན་ནས་བྱུང་བའི་འོད་ཟེར་ཅན་གྱི་སྒྲུབ་ཐབས་ནི། སྒྲུབ་པ་པོས་སེམས་བསྐྱེད་ལ། རང་གི་སྙིང་གར་པད་ཟླའི་སྟེང་དུ་དང་པོའི་བཅུ་གསུམ་པ་ཨོ་ཐུང་དུ། དེ་ལ་ཟླ་ཚེས་ཐིག་ལེས་བརྒྱན་པས་ཨོཾ་དེའི་འོད་ཀྱིས་རྟེན་སྤྱན་དྲངས་ལ་ཚོགས་གཉིས་བསགས་ནས། སྟོང་པའི་ངང་ལས་པད་ཉིའི་སྟེང་དུ་ཨོཾ། དེ་ལས་སྤྲོས་བསྡུས་ཐིམ་གྱུར་པ་ལས་བསྐྱེད་དེ། ཞལ་གྱི་མདོག་གཡས་སྐོར་གྱི་གོ་རིམ་གྱིས་སོ། །གཞལ་ཡས་ཁང་ནི་མཆོད་རྟེན་གྱི་བུམ་པ་ལ་མྱ་ངན་མེད་ཀྱི་ཤིང་གིས་བསྐོར་བའོ། །ཐོད་པ་ལྔས་དབུར་བརྒྱན་པ་ཀླུ་བརྒྱད་ཀྱིས་བརྒྱན་པའོ། །ལྷ་མོ་གཞན་ཕྱག་གཉིས་པ་ཞེས་པ་ནི་ཕྱག་བཅུ་གཉིས་པ་བསྒོམས་པར་མི་ནུས་ན་སྟེ་གཞུང་བཞིན་ནོ། །དེ་ལས་མུ་དྲཱ་བཅིང་བ་ནི། མཐེ་བོང་གཉིས་བསྣོལ། གུང་མོ་གཉིས་རྩེ་སྤྲད་དེ་བཀུག་པ་གཞན་ཁ་ཕྱེ་ནས་ཅུང་ཟད་བཀུག་པའོ། །བཟླས་པ་གཞན་དང་འདྲའོ། །ཨི་ཐི།། །།རྟོག་པ་ལས་གསུངས་པའི་འོད་ཟེར་ཅན་གྱི་སྒྲུབ་ཐབས་ནི། ཀླད་ཀྱི་དོན་ནི་བདེ་བ་ཆེན་པོའི་ཡེ་ཤེས་དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ཞིང༌། ཡེ་ཤེས་དེ་དང་ལྡན་པའི་འོད་ཟེར་ཅན་བླ་མ་དེ་ལ་ཕྱག་འཚལ་ལོ་ཞེས་པའོ། །དེ་ནས་སྒྲུབ་པ་པོ་འགྲེ། ཨོཾ་ཕཊ་ཀྱི་སྔགས་བརྗོད་ཅིང་མཐེ་བོང་ནང་དུ་བཀུག་པའི་ཁུ་ཚུར་གྱིས་གནས་གསུམ་དུ་གཏུག་ཅིང་དེ་ནས་སྔགས་འདི་ལན་གསུམ་བརྗོད་ཅིང༌། བདག་དང་གནས་བསྲུང་བ་དང༌། དེ་ནས་སྙིང་གར་པད་ཉིའི་སྟེང་དུ་མཱྃ་དེའི་འོད་ཀྱིས་རྟེན་སྤྱན་དྲངས་ལ་ཚོགས་བསག་པ་ནི། བདག་ཉིད་བསྐྱེད་པ་ནི། སྟོང་པའི་ངང་ལས་པད་ཉིའི་སྟེང་དུ་མཱྃ་དེའི་འོད་ཀྱིས་ཕྱོགས་བཅུ་ནས་སྤྱན་དྲངས། ཐིམ་པ་ལས་བཅོམ་ལྡན་འདས་མ་གཞུང་བཞིན་ཕག་ཞལ་སྔོན་པོ་རྣམ་པ་སྣང་མཛད་ཀྱིས་རང་ཆས་སུ་དབུར་བརྒྱན་པའོ། །སྣ་ཚོགས་རཏྣས་དབུར་བརྒྱན་པ། གདན་ཡྃ་ལས་རླུང་གི་དཀྱིལ་འཁོར་དེའི་སྟེང་ན་ཧྃ་ལས་གཟའ་རཱ་ཧུ་ལ་སྟོད་ཁོག་ལས་མེད་པ་ཉི་མ་དང་ཟླ་བ་ཟུང་བ། དེའི་སྟེང་ན་ཕག་པ་བདུན་གྱིས་དྲངས་པའི་ཤིང་རྟའི་སྟེང་ན་ལྷ་མོ་བཞིས་བསྐོར་ནས་བཞུགས་པའོ། །དེ་ལྟར་གཙོ་འཁོར་ལྔའོ། །དེ་ལྟར་བསམས་ནས་མཆོད་པ་ཞེས་པས་བདུན་རྣམ་དག་གོ །ཚོགས་བསགས་ནས་བདག་ཉིད་བསྐྱེད་པ་ནི། སྟོང་པའི་ངང་ལས་པད་ཉིའི་སྟེང་དུ་ཨོཾ་དེའི་འོད་ཀྱི་ཕྱོགས་བཅུ་ནས་སྤྱན་དྲངས་ལ། དེ་ལ་ཐིམ་པ་ལས་རྣམ་སྣང་དུ་བསྐྱེད་དོ། །དེའི་ཐུགས་ཀར་ཟླ་སྟེང་དུ་མཱྃ་ལས་ཡི་གེ་ཉི་ཤུ་རྩ་ལྔས་བསྐོར་བའོ། །དེ་གྱུར་པ་ལས་མྱ་ངན་མེད་ཀྱི་ཤིང་གི་ཡལ་ག་ལ་ཟླ་བ་ལ་མཱྃ་གྱིས་མཚན་པ། དེ་གྱུར་པ་ལས་བདག་ཉིད་འོད་ཟེར་ཅན་དུ་སྐད་ཅིག་གིས་བསམ་མོ། །དེ་ནས་གཞུང་ནས་འབྱུང་བའི་སྔགས་ཀྱིས་དེའི་ཤར་དུ་ལྷ་མོ་བེ་ཏཱ་ལཱི། འོག་མ་གསུམ་ཡང་རང་རང་གི་སྔགས་ཀྱིས་གོང་ལྟར་བསྐྱེད་དོ། །དེ་དག་བསྒོམས་པས་སྐྱོ་ན། ལྷ་ལ་དམིགས་ལ་བཟླས་པ་བྱའོ། །ལྡང་བ་ན་ཡི་གེ་བརྒྱ་པ་ལ་སོགས་པ་བྱའོ། །ཨི་ཐི།། །།རྟོགས་པ་ལས་གསུངས་པའི་ཆོ་གའི་འོད་ཟེར་ཅན་གྱི་སྒྲུབ་ཐབས་ལ། སྒྲུབ་པ་པོ་འགྲེ། སྙིང་གར་པད་ཟླ་ལ་མཱྃ་དཀར་པོ་དེའི་འོད་ཀྱིས་རྟེན་སྤྱན་དྲངས་ལ་ཚོགས་གཉིས་བསག་པར་བྱའོ། །དེ་ནས་སྟོང་པའི་ངང་ལས་པད་ཟླའི་སྟེང་དུ་མཱྃ། དེ་ལས་འོད་སྤྲོས་བསྡུས་པ་ལས་བསྐྱེད་དེ། ཞལ་དབུས་མ་དཀར་མོ་དབུ་ལ་རཏྣའི་དབུ་རྒྱན་རྩེ་གསུམ་ཡོད་པ། གཞལ་ཡས་ཁང་མཆོད་རྟེན་གྱི་བུམ་པ་གདན་ཕག་གིས་འདྲེན་པའི་ཤིང་རྟའི་སྟེང་ན་བདུད་བཞིའི་ཁ་དོག་དང་རྟགས་ཀྱི་བདུད་ཤེས་པར་བྱའོ། །འཁོར་གསུམ་ཡང་གཙོ་བོ་དང་དུས་མཉམ་དུ་རྫོགས་པའོ། །དབུས་ན་གནས་པ་ནི་མདུན་ན་ཡོད་པར་རོ། །རཏྣའི་རྒྱན་ཅན་གཡས་གཡོན་གྱི་ཕྱག་བཞི་ན་གཡས་དང་པོ་མདའ། གཞན་གཞུའོ། །འོག་མ་གཉིས་གཡས་རྡོ་རྗེ། གཡོན་མྱ་ངན་མེད་པའི་ཤིང་གི་ཡལ་གའོ། །གདན་གྱི་འོག་ན་གཟའ་དགུ་དང་ཆུ་སྲིན་དང་ནད་བཞི་བརྒྱ་རྩ་བཞི་ཡང་མིའི་གཟུགས་སུ་འོག་ཏུ་བཏིང་བའོ། །དབང་བསྐུར་དང་ཙཀྲ་ལྟ་བུ་བཟླས་གཞན་དང་འདྲ་བར་བྱའོ། །དེ་དག་མཐའ་གསུམ་གྱི་ཞེས་པ་འཁོར་གསུམ་དག་པས་ཟིན་པའོ། །རྣལ་འབྱོར་པས་ཟས་ཀྱི་སྟེང་དུ་མཱྃ་བསམ། ཡི་གེ་གསུམ་གྱི་བྱིན་གྱིས་བརླབས་ལ་ལོངས་སྤྱད་དོ།། །།མྱ་ངན་མེད་པའི་ཤིང་གི་འོད་ཟེར་ཅན་ནི། སྒྲུབ་པ་པོ་ལ་སོགས་པ་འགྲེ། སྙིང་གའི་ས་བོན་གྱི་འོད་ཀྱིས་རྟེན་སྤྱན་དྲངས་ལ་ཚོགས་གཉིས་བསག་གོ །སྟོང་པའི་ངང་ལས་པད་ཟླའི་སྟེང་དུ་མཱྃ་སེར་པོ་གྱུར་པ་ལས་མྱ་ངན་མེད་ཀྱི་ཡལ་ག་མཱྃ་གྱིས་མཚན་པའོ། །དེ་ལས་འོད་སྤྲོས་བསྡུས་པ་ལས་བཅོམ་ལྡན་འདས་མ་བསྐྱེད་དོ། །རིགས་བདག་རང་ཆས་སུའོ། །ཕག་སྟེང་ན་བཞེངས་ནས་འགྱིང་བག་ཏུ་བཞུགས་པའོ། །དེ་ནས་ཐུགས་ཀའི་མཱྃ་ལས་ཕག་པའི་རྣམ་པ་ཅན་གྱི་འོད་འཕྲོས་ཏེ་གདུག་པ་ཅན་གྱི་སེམས་ཅན་བརླག་པར་བྱས་ནས། དེ་ལས་གཞན་པའི་སེམས་ཅན་གྱི་དོན་བྱས་ཏེ་ཚུར་འདུས་ནས་ཕག་པའི་གཟུགས་གཉིས་པས་བསྐོར་ནས་ཡོད་པས་སོ། །བཟླས་པ་གཞན་དང་འདྲའོ། །ལྡང་བ་ན་ཡི་གེ་བརྒྱ་པ་བརྗོད་པ་ལ་སོགས་པ་བྱའོ། །ཨི་ཐི།། །།ཨཽ་ཌྱན་གྱི་འོད་ཟེར་ཅན་གྱི་སྒྲུབ་པ་པོ་འགྲེ། སྙིང་གར་པད་ཉིའི་སྟེང་དུ་མཱྃ་དེའི་འོད་ཀྱི་རྟེན་སྤྱན་དྲངས་ཏེ་ཚོགས་གཉིས་བསག་གོ །དེ་ནས་སྟོང་པའི་ངང་ལས་པད་ཉིའི་སྟེང་དུ་མཱྃ། དེའི་འོད་ཀྱིས་སངས་རྒྱས་སྤྱན་དྲངས་ཐིམ། གྱུར་པ་ལས་བཅོམ་ལྡན་འདས་མ་སྟེ། ཕྱག་མཚན་ཁ་ཊྭཱཾ་ག གྲུ་མོ་ན་ཐོད་པ་དང་ཌཱ་མ་རུ། མགོ་ལྔ་བཅུས་སྐུ་ལ་དོ་ཤལ་ཅན། གདན་རཏྣས་སྤྲས་བཞི་ཤིང་རྟའི་འོག་ན་ཕག་པ་བདུན་མནན་པ་སྟེ། འགྲོ་བ་ཕག་པས་འགྲོ་ལ་དེས་བཏེགས་པས་ཤིང་རྟ་འགྲོ་བའོ། །ཤིང་རྟའི་སྟེང་གི་རྩེ་མོ་མདུན་ན་ཡོད་པར་བལྟའོ། །གཙོ་མོ་དེའི་སྐུ་ལས་སངས་རྒྱས་ལྔ་འཕྲོ་བ་ནི་སྤྱི་བོ་ནས་རྣམ་སྣང༌། གཡས་ནས་མི་བསྐྱོད་པ་དང་རིན་འབྱུང༌། གཡོན་ནས་སྣང་མཐའ་དང་དོན་གྲུབ་བོ། །མཱྃ་གྱི་འོད་ཀྱིས་ཡེ་ཤེས་པ་སྤྱན་དྲངས་ལ་ཡི་གེ་བཞིས་བསྟིམ་མོ། །དབང་བསྐུར་རྒྱས་གདབ་བོ། །བསྒོམས་པས་སྐྱོ་ན་བཟླས་པ་ཙཀྲ་ལྟ་བུ་བྱའོ། །ཨི་ཐི།། །།ཡང་ཨཽ་ཌྱན་གྱི་རིམ་པའི་འོད་ཟེར་ཅན་ཏེ་སྒྲུབ་པ་པོ་འགྲེ། སྙིང་གར་པད་ཉིའི་སྟེང་དུ་ཧཱུྃ། དེའི་འོད་ཀྱིས་རྟེན་སྤྱན་དྲངས་ཏེ་ཚོགས་གཉིས་བསག་གོ །དེ་ནས་སྟོང་པའི་ངང་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ། དེ་གྱུར་པ་ལས་རྡོ་རྗེའི་རྭ་གུར་གྱི་བསྲུང་བ་བྱའོ། །དེའི་ནང་དུ་ཆོས་འབྱུང་ཕྱི་དཀར་ལ་ནང་དམར་བ། དེའི་དབུས་སུ་པད་ཉི་ལ་གནས་པའི་རྡོ་རྗེ་རྩེ་ལྔ་པ་ལྟེ་བར་ཧཱུྃ་གིས་མཚན་པ། དེ་ལས་སྤྲོས་བསྡུས་བསྐུལ་སྦྱང་བྱས་པ་ལས་བཅོམ་ལྡན་འདས་མ་བསྐྱེད་དོ། །གདན་དུ་ཁྱབ་འཇུག་པ་ལ་སོགས་པ་རྟགས་ཀྱི་བདུད་བཞི་བཏིངས་པའོ། །ཞལ་དྲུག་པོ་རེ་རེ་ལ་སྤྱན་གསུམ་གསུམ་པ་མི་མགོ་ལྔ་བཅུའི་དོ་ཤལ་ཏེ་སྐམ་རློན་གྱི་ངེས་པ་མི་གསུང༌། རྣམ་སྣང་གི་དབུ་རྒྱན་རང་ཆས་སུ་བསམ། དབང་བསྐུར་བས་སོ་སྙམ་པའི་རྣམ་རྟོག་གི་དམ་ཚིག་སེམས་དཔའི་རྣམ་གཞག་མ་རྫོགས་པར་གཞུང་དུ་འདི་འབྱུང་བས་རང་ཆས་སུ་རྟོགས་སོ། །དེ་ལྟ་མིན་ན་དམ་ཚིག་པའི་རྣམ་གཞག་རྫོགས་པའི་རྗེས་སུ་སྟོན་པར་རིགས་སོ། །འཁོར་ནི་ཌཱ་ཀི་མ་ལ་སོགས་པ་ཕཻཾ་གྱི་སྒྲ་སྒྲོགས་པའི་དུར་ཁྲོད་བརྒྱད་དོ། །དེ་ནས་གནས་གསུམ་དུ་པད་ཟླ་ལ་ཨོཾ་ཨཱཿཧཱུྃ་བསམ། མིག་དང་རྐང་ལག་ལ་སོགས་པ་ཐམས་ཅད་ལ་ཕཊ་བསམ། ལྟེ་བར་སྣ་ཚོགས་པདྨའི་སྟེང་དུ། རྃ་ལས་ཉི་མ་ཁ་སྦྱོར་གྱི་ནང་དུ་ཧཱུྃ་གི་རྣམ་པ་ནཱ་དའི་རང་བཞིན་འོད་ཁ་དོག་སྣ་ཚོགས་འཕྲོ་བར་བསམ་མོ། །ཡང་ན་ཡེ་ཤེས་སེམས་དཔའོ། །སྐྱོ་ན་བཟླས་པ་གཞན་དང་འདྲ། ཐུན་མཚམས་ཀྱི་གཏོར་མ་ནི་ནང་པར་བཤམས་ལ། དེའི་ནང་དུ་ཧྲཱིཿབསམས་ལ་ཨོཾ་ཨཱཿཧཱུྃ་གིས་ཅི་ནུས་སུ་བྱིན་གྱིས་བརླབས་ལ། ཧྲཱིཿཡང་ཞུ་བས་བདུད་རྩིར་བསམས་ཏེ་སྔགས་ལན་གསུམ་གྱིས་དབུལ་ལོ། །ཟས་ཟ་བའི་དུས་སུ་ཟས་ཀྱི་སྟེང་དུ་ཧྲཱིཿའམ་ཧཱུྃ་བསམ། ངག་ཏུ་བསམས་པའི་སྔགས་ལན་བདུན་བརྗོད་པས་ཡི་གེ་བདུད་རྩིར་གྱུར་པ་ལྷ་མཆོད་པའི་བསམ་པས་བཟའོ་རྫོགས་སོ།། །།ཙུནྡའི་སྒྲུབ་ཐབས་ལ། ཀླད་ཀྱི་དོན་ལ་ལྷ་མོ་ཙུནྡ་དེ་ཕྱོགས་སྐྱོང་ཐམས་ཅད་ཀྱི་བདག་པོར་གྱུར་པའམ། ཡང་ན་དུས་གསུམ་གྱི་སངས་རྒྱས་ཐམས་ཅད་ཀྱི་རང་བཞིན་ནོ། །སྒྲུབ་པ་པོ་འགྲེ། སྙིང་གར་པད་ཉིའི་སྟེང་དུ་ཙུྃ། དེའི་འོད་ཀྱིས་རྟེན་སྤྱན་དྲངས་ཏེ་ཚོགས་གཉིས་བསག སྟོང་པའི་ས་བོན་སྒྱུ་མ་ལྟ་བུ་ཞེས་པས་ཙུྃ་ཡང་རང་བཞིན་མེད་པར་རོ། །དེ་ནས་སྟོང་པའི་ངང་ལས་པད་ཟླའི་སྟེང་དུ་སྡེ་ཚན་གསུམ་པའི་དང་པོ་ཙ། སྡེ་ཚན་དང་པོའི་ལྔ་པ་ཨུ། ཨ་སྲོག་ཏུ་ཞབས་ཀྱུ་བྱིན་པས་ཙུ། ཟླ་ཚེས་ཐིག་ལས་བརྒྱན་པས་ཙུྃ། དེ་ལས་སྤྲོས་བསྡུས་ཐིམ་གྱུར་པ་ལས་སྒྲོལ་མ་བསྐྱེད་དོ། །ཕྱག་འོག་མ་གཉིས་ཀྱིས་ལྷུང་བཟེད་བསྣམས་པའོ། །དེ་ནས་མུ་དྲཱ་བཅིངས་ཏེ་སྙིང་པོའི་སྔགས་བཟླས་ཤིང་གནས་བཞིར་གཏུག་གོ །བསྒོམས་པས་སྐྱོ་ན་བཟླས་པ་ཕྱག་རྒྱ་བཅིང་བ་འདྲ་བར་བྱའོ། །ཡིད་ཆེས་པས་ནི་དངོས་གྲུབ་མྱུར་བ་ཡིན་ཏེ། རྒན་མོའི་སྔགས་ནོར་ཏེ། བྷ་ལེ་བྷུ་ལེ་བཟླས་ནས་རྡོ་ཁར་བཅུག་པས་འོ་མར་སོང་བའི་ལོ་རྒྱུས་གསུང༌། འདིའི་རིགས་བདག་མི་གཟུང༌། ཨི་ཐི།། །།དཔལ་གནོད་གནས་ཀྱི་སྒྲུབ་ཐབས་ལ། འདི་གནོད་གནས་ཀྱི་རིགས་སུ་སྐྱེས་པས་གནོད་གནས་ཞེས་བྱའོ། །དེ་ས་བཅུའི་བྱང་སེམས། བཅོམ་ལྡན་འདས་བྱ་རྒོད་ཕུང་པོའི་རི་ལ་བཞུགས་པ་ལ་བདུད་ཀྱིས་རི་བསྙིལ་བས། གང་བ་བཟང་པོ་དང་གནོད་གནས་གཉིས་ཀྱིས་སྐུ་གཡོག་པས། གང་བ་བཟང་པོ་ལ་རྡོ་ལེབ་ཕོག་པས་ཤི་སྟེ། གནོད་གནས་ཀྱི་དབུ་ལ་ཡང་རྡོ་ཡར་གཅིག་ཕོག་པས་སྣད་དེ། བཅོམ་ལྡན་འདས་ཀྱིས་ངའི་བསྟན་པ་ལ་ཞུགས་པ་རྣམས་ཁྱོད་ལ་རྨ་འཁྲུད་པར་བྱེད་པའི་ཆུ་སྦྱིན་དུ་གཞུག་གི ཁྱོད་ཀྱིས་ཀྱང་དེ་དག་ལ་ནོར་གྱིས་ཕན་ཐོགས་པར་གྱིས་ཤིག ཅེས་གསུངས་པས་བཀའ་དང་ལུང་བསྲུང་བ་དང་ནོར་འདོད་པ་རྣམས་མི་བྱར་མི་རུང་ངོ༌། །སྒྲུབ་པ་པོས་སེམས་བསྐྱེད་ལ། སྙིང་གར་པད་ཟླ་ལ་ཇྃ་དེའི་འོད་ཀྱིས་རྟེན་སྤྱན་དྲངས་ལ་ཚོགས་གཉིས་བསག་གོ །དེ་ནས་ལུས་སྒྱུ་མ་ཙམ་གྱི་སྙིང་གར་པད་ཟླའི་སྟེང་དུ་གསུམ་པའི་གཉིས་པ་ཛ། དེ་ལ་ཐིག་ལེ་ཡོད་པ་ནི་སྟོང་པའི་ལྷས་མནན་པའི་ཟླ་ཕྱེད་དང་བཅས་པ་སྟེ་ཛྃ་ངོ༌། །དེའི་འོད་ཀྱིས་དཔལ་གནོད་གནས་སྤྱན་དྲངས་ཏེ་དེ་ཉིད་ལ་ཐིམ་པ་དེ་གྱུར་པ་ལས་དཔལ་གནོད་གནས་སེར་པོ་ཕྱག་གཡས་ཁྲུ་གང་པའི་ཤིང་ཐོག་སེར་པོ་བསྣམས་པ། བཱི་ཛ་པཱུ་ར་ཀཾ་ངོ༌། །ཆུ་སྟེར་བ་ན་ཤིང་ཐོག་དེའི་ནང་ནས་བདུད་རྩི་འབབ་པར་བསམ་མོ། །རིན་ཆེན་འབྱུང་གནས་ཀྱིས་གཙོ་བྱས་པའི་རིགས་ལྔས་དབུར་བརྒྱན་ནོ། །བུམ་པ་གཉིས་ན་དུང་གཡས་སུ་འཁྱིལ་པ་དང་རཏྣ་པདྨ་རཱ་ག་བཅུག་པའི་གཏེར་ཆེན་པོ་ཞབས་ཀྱིས་མནན་པ། ཨུཏྤ་ལ་སྔོན་པོའི་དོ་ཤལ་ཅན། རཏྣ་དུ་མས་བརྒྱན་པ། བག་ཙམ་གཡས་བསྐུམ་གཡོན་བརྐྱང་ངོ༌། །རང་གི་སྐྱེས་པའི་ཁྱིམ་མམ་རང་འདུག་པའི་ཁྱིམ་དུ་རཏྣའི་ཆར་བབ་པར་བསམ་མོ། །མན་ངག་ཉིད་ཡིན་ཏེ་འདུག་ས་བཙན་པར་བྱས་ན་བདེ་གསུང༌། བསྒོམས་པས་སྐྱོ་ན། ཕྱག་རྒྱ་བཅིངས་ལ་སྔགས་བཟླས་ཏེ་གཞན་དང་མཐུན་ནོ། །ལྡང་བ་ན་ཡི་གེ་བརྒྱ་པ་བརྗོད་པ་ལ་སོགས་པ་བྱའོ། །འདི་ལ་ཆུ་སྦྱིན་པའི་ཐབས་ནི་སེམས་བསྐྱེད་ལ། སྐད་ཅིག་གིས་བསམ་པའམ། སྤྲོ་བསྡུ་སྔར་བཞིན་ཛཾ་ལྷར་བསྐྱེད་ལ། མདུན་གྱི་རྫིང་བུའི་ནང་དུ་སྐད་ཅིག་གིས་ཛྃ་ལྷར་བསྐྱེད་ལ། རང་གི་ས་བོན་གྱི་འོད་ཀྱིས་ཡེ་ཤེས་པ་སྤྱན་དྲངས་བསྟིམ་ལ། གཡོན་པས་ཕྲེང་བ་བགྲང་ཞིང་གཡས་པས་ཤིང་གཅིག་ནས་བདུད་རྩི་འབབ་པར་བསམ་ཞིང༌། ཆུ་ཁྱོར་བ་བརྒྱ་རྩ་བརྒྱད་དབུལ་ལོ། །དེ་ནས་ཕྱག་རྒྱ་ཆེན་པོའི་དངོས་གྲུབ་སྩོལ་ཅིག་དང༌། དབུལ་བའི་སྡུག་བསྔལ་ཞི་བར་མཛོད་ཅིག་ཅེས་པའི་གསོལ་བ་གདབ། བསྟོད་པ་བྱ། ཡེ་ཤེས་བཛྲ་མུཿས་གཤེགས། དམ་ཚིག་པ་རང་ལ་བསྡུའོ། །ལུགས་སྐུ་ཡོད་ན་དམ་ཚིག་པ་མི་དགོས། དེ་རང་ལ་ཡེ་ཤེས་པ་བསྟིམ། མ་བསྟིམ་ཀྱང་ཆོག་གསུང༌། ཨི་ཐི།། །།ནོར་རྒྱུན་མའི་སྒྲུབ་ཐབས། སྒྲུབ་པ་པོས་སེམས་བསྐྱེད་ལ། སྙིང་གར་པད་ཟླའི་སྟེང་དུ་བྃ། དེའི་འོད་ཀྱིས་རྟེན་སྤྱན་དྲངས་ཏེ་ཚོགས་གཉིས་བསག་གོ །སྟོང་པའི་ངང་ལས་པད་ཟླའི་སྟེང་དུ་སྡེ་ཚན་གསུམ་པའི་དྲུག་པ་ལ་ཟླ་ཕྱེད་ཐིག་ལེས་བརྒྱན་པ་བྃ། དེ་ལས་འོད་སྤྲོས་བསྡུས་བྃ་ལ་ཐིམ་པར་གྱུར་པ་ལས་ལྷ་མོར་བསྐྱེད་དོ། །ངྷ་དང་བཻའི་བཞེད་པ་ཡང་ཤེས་པར་བྱའོ། །བཟླས་པ་ཡང་གཞན་དང་མཐུན་ནོ། །ཨི་ཐི།། །།ཨུ་ཙུཥྨ་ཛམྦྷ་ལའི་སྒྲུབ་ཐབས་ལ།«་་་་་ཛམྦྷ་ལ་ལ་ཆུ་སྟེར་བ་ནི། དབུལ་པོའི་དོན་དུ་འཕགས་པ་བྱུང་བས་དབུལ་པོ་ལ་ཆུ་མིན་པ་མེད་པས་དེས་འཕགས་པ་ཆུས་མཉེས་སོ། གཞན་དབུའི་རྨ་ལ་ལྡུགས་ཟེར་བ་དང་ནོར་བུ་མེད་ཡོད་ཟེར་བ་ལ་སོགས་པ་ནི་གྱི་ནའོ་གསུང༌།» ཚོགས་གཉིས་གཞན་དང་མཐུན་པར་བསགས་ལ། དེ་ནས་ལུས་སྒྱུ་མ་ཙམ་གྱི་སྙིང་གར་པད་ཉི་ལ་ཧཱུྃ། དེ་ལས་རྡོ་རྗེ་རྩེ་དགུ་པའི་རིམ་པ་ལས་བསྐྱེད་དོ། །ཡང་ན་ཚོགས་བསག་མི་དགོས་སོ། །སྒྲུབ་པ་པོས་སེམས་བསྐྱེད་དེ། ངག་ཏུ་ཨོཾ་ཨཱཿཧཱུྃ། ཞེས་པས་ནམ་མཁའ་ལ་གནས་པ་སྐད་ཅིག་གིས་བཀུག་ལ་རང་ལ་གཞུག་གོ །དེ་ནས་སྙིང་གར་པད་ཟླའི་སྟེང་དུ་ཧཱུྃ་དམར་པོ་ལས་རྡོ་རྗེ་རྩེ་དགུ་པ་ལྟེ་བ་ལ་དབང་པོ་ལྟ་བུའི་ཧཱུྃ་བལྟས་ཏེ་དེ་ནི་ཤིང་ཐོག་གི་མིང་ངོ༌། །ཧཱུྃ་དེ་ལས་འོད་ཀྱི་ཚུལ་དུ་ཛམྦྷ་ལ་ནམ་མཁའ་ལ་སྤྲོས་ལ་ངག་ཏུ་ཨོཾ་ཨཱཿ ཞེས་པས་ནམ་མཁའ་ལ་ཕབ་སྟེ། ལུས་ཀུན་གྱུར་པ་ལས་ཨུ་ཙུཥྨ་མིའུ་ཐུང་འདྲ་བ་བསྐྱེད་དོ། །རིན་འབྱུང་གིས་རང་ཆས་སུ་དབུར་བརྒྱན་པ། ཀླུ་ཆེན་པོ་བརྒྱད་ནི། ཀླུ་རིགས་བཞི་ལས་གཉིས་གཉིས་སོ། །ལྷག་མ་ཅན་གྱིས་ནི་སེ་རལ་ཁར་རོ། །འོག་ཏུ་ནོར་སྦྱིན་སེར་པོ་འགྱེལ་བ་མགོ་གཡས་སུ་བསྟན་པ། ཁ་ནས་རཏྣའི་སྙེ་མ་སྐྱུགས་པ་ཞབས་ཀྱིས་མནན་པའོ། །སྒྲུབ་ཅིང་བསྒོམ་པ་དེ་ལྟར་རོ། །དེ་ནས་ཆུ་སྦྱིན་པ་ནི་ཐོད་པ་མི་དམིགས་པར་བྱས་ལ་ཨུ་ཙུཥྨ་ཕྱག་གཡས་པར་ཨོཾ་ལས་གྲུ་གསུམ་པ་ཅིག་བསམ་སྟེ། དེ་ལ་ས་ག་ཏ་ཞེས་བྱ་བའི་གྲུ་གསུམ་ནང་དུ་བྷཱུྃ་ལས་བུམ་པ་བཟང་པོ་བདུད་རྩི་འབོ་བཞིན་པ་ཅིག་བསམ་མོ། །ཡི་གེ་དགོད་པ་ནི་ལག་པའི་དབུས་སུ་བུམ་པའི་རྩར་ཛྃ། སྭཱ་དང་ཧཱ་གཉིས་ལག་པའི་ཟུར་གཉིས་ལ། དེ་ནས་ཨིནྡྲ་ནིའི་སྔགས་རེ་བརྗོད་པས་ཁ་བསྔགས་ཏེ། ཁར་ཆུ་ཁྱོར་གང་བླུགས་ཏེ། དེ་ནས་ཡང་ཁ་ནས་ཁྱོར་བར་བླུགས་ཏེ། ཨོཾ་ཛལཱུྃ་སྭཱ་ཧཱ། ཞེས་བརྗོད་པས་ཛམྦྷ་ལའི་ཞལ་དུ་བརྒྱ་རྩ་བརྒྱད་དབུལ་ལོ། །དེ་ཡང་ཛམྦྷ་ལའི་ལུགས་སྐུ་ནག་པོ་མདུན་དུ་བཞུགས་པ་ལ་ཡེ་ཤེས་པ་བསྟིམ་པ་ལ་བྱའོ། །སྐུ་མེད་ན་གོང་ལྟར་རོ། །ཁ་ཅིག་ན་རེ། གཡས་ཨོཾ་ལས་གྲུ་གསུམ་པ་ནི་ནོར་སྦྱིན་གྱི་ལག་པ་ཡིན་ཟེར་ཏེ། ཨུ་ཙུཥྨ་བདེའོ། །སེམས་ཅན་གྱི་དབུལ་བའི་སྡུག་བསྔལ་ཞི་བར་བྱ་བའི་དོན་དུ་དེ་བསྒོམས་ན་མྱུར་དུ་དེ་འདྲ་བའི་ནོར་འོང་བར་འགྱུར་རོ། །བཟླས་པ་བྱ་ལུགས་མི་གསུང༌། ཨི་ཐི།། །།ཁྲོ་གཉེར་ཅན་གྱི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ། སྙིང་གར་པད་ཟླའི་སྟེང་དུ་བྷྲཱྀཾ། དེའི་འོད་ཀྱིས་རྟེན་སྤྱན་དྲངས་ཏེ་ཚོགས་གཉིས་བསགས་པར་བྱའོ། །དེ་ནས་ལུས་སྒྱུ་མ་ཙམ་གྱི་སྙིང་གར་པད་ཟླའི་སྟེང་དུ་དྲུག་པའི་བཞི་པ་བྷ། སྡེ་ཚན་དང་པོའི་བརྒྱད་པ་རཱྀ་རིང་པོ་སྟེ་དེ་ལ་སྟོང་པའི་ལྷ་དང་ཟླ་ཕྱེད་ཀྱིས་བརྒྱན་པ། བྷྲཱྀཾ་བལྟས་ལ། འོད་ཀྱིས་སངས་རྒྱས་སྤྱན་དྲངས་ཐིམ། གྱུར་པ་ལས་བཅོམ་ལྡན་འདས་མ་བསྐྱེད་དོ། །ངྷ་དང་བཻའི་བཞེད་པ་ཡང་ཤེས་པར་བྱའོ། །དེ་ནས་ཕྱག་རྒྱ་བཅིངས་ལ་བཟླས་པ་ནི་གཞན་དང་འདྲའོ། །ཨི་ཐི།། །།བྱམས་པའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ། སྙིང་གར་པད་ཟླའི་སྟེང་དུ་མཻཾ། དེའི་འོད་ཀྱིས་ཚོགས་གཉིས་བསགས། སྟོང་པའི་ངང་ལས་པད་ཉིའི་སྟེང་དུ་མཻཾ་སྤྲོས་བསྡུས་པ་ལས་བསྐྱེད་དེ། ཞལ་གསུམ་ཆར་སེར་པོ། ཕྱག་དང་པོ་གཉིས་མཐེབ་མཛུབ་སྤྲད་ནས་བརྩེགས་པ། ཀླུ་ཤིང་རྩ་བ་སྔོན་པོ། མེ་ཏོག་སེར་པོ། དེ་ནས་སྐུ་ལས་སངས་རྒྱས་མང་པོ་སྤྲོས་ཤིང་སེམས་ཅན་གྱི་དོན་མཛད་ནས་ཚུར་སྡུད་པའོ། །བྱང་སེམས་བྱམས་པ་དེ་ཡང་འོད་ཟེར་འབར་བ་ཟླ་བའི་དཀྱིལ་འཁོར་ཞེས་པ་རྒྱབ་ཡོལ་ཅན། དེ་ནས་བསྒོམས་པས་སྐྱོ་ན། བཟླས་པ་བྱ་སྟེ། ཕྱག་རྒྱ་ལག་པ་གཉིས་ཁུ་ཚུར་སོ་སོར་བཅིངས་ཏེ་སྡིགས་མཛུབ་རྩེ་མོ་མཐེབ་སྙིང་བཞག་སྟེ་མེ་ཏོག་འབྱེད་པའི་ཚུལ་དུ་བྱས་ཏེ་སྡིགས་མཛུབ་ཀྱིས་མཐེ་བོང་དཀྱིལ་ནས་འཐོར་བའི་ཚུལ་དུ་བྱེད་པའོ། །བཟླས་པ་འདྲ། ཨི་ཐི།། །།ཤེར་ཕྱིན་མའི་སྒྲུབ་ཐབས་ལ། མཆོད་བརྗོད་ནི་སླའོ། །སྒྲུབ་པ་པོས་སེམས་བསྐྱེད་ལ། སྐད་ཅིག་གིས་སྐུ་བསྐྱེད་རྫོགས་གཉིས་མི་དགོས་སོ། །སྙིང་གར་པད་ཟླའི་སྟེང་དུ་ཨོཾ་དེའི་འོད་ཀྱིས་སྤྱན་དྲངས་ཐིམ། གྱུར་པ་ལས་བཅོམ་ལྡན་འདས་མ་བསྐྱེད་དོ། །དབུ་སྐྲ་ཐབས་གཉིས་ལི་བས་ཕྱེད་ཕྱེད་འཁྱིལ་པའོ། །དེའི་ལྟེ་བར་པད་ཟླའི་སྟེང་དུ་ཨོཾ་དེ་ལ་དམ་ཚིག་པ་ཅི་འདྲ་བའི་ཡེ་ཤེས་པའོ། །ཡང་ན་ཡེ་ཤེས་པ་བསྒོམ་པར་བྱ་ཞེས་པ་ནི་ལྟེ་བར་བསྒོམས་ལ་དེའི་ཐུགས་ཀར་པད་ཟླ་ལ་དེ་འདྲ་བ་ཅིག་བསྒོམ་པར་འདོད་པའོ། །ཕན་ཡོན་བསྟན་པ་ནི་སླའོ། །དྷ་བཻའི་བཞེད་པ་ཡང་ཤེས་པར་བྱའོ། །སྐྱོ་ན་བཟླས་པ་ནི་སྙིང་གའི་ཨོཾ་ལས་ཁ་ནས་ལྟེ་བར་འཁོར་བའོ། །སྔགས་པས་དུམ་བུ་དང་པོ་བཟླས་པས་ཆོས་ཀྱི་དོན་ཤེས་པར་འགྱུར་རོ། །གཉིས་པས་ཚིག་འཛིན་པར་རོ། །གསུམ་པས་འཕྲལ་གྱི་བྱ་བ་ཤེས་པར་རོ། །རང་སྐྱུར་ལ་སྒྲུབ་ན་གཡོག་པོ་ལ་ནང་པར་བྱ་སྐད་མི་གྲག་པ་ཙམ་ན་བོད་མི་དགོས་པར་སྐྱུར་ང་ལ་བྱིན་ཅིག་ཅེས་བྱས་ཏེ་དེ་འོངས་པ་དང་སྔགས་ལན་བཞི་བཏབ་ལ་བཏུང་ངོ༌། །ཁྱེར་ཤོག་བྱས་པ་དང་རང་གིས་བླངས་པ་ནི་ཆོ་ག་མ་རྫོགས་པའོ། །རྡོ་རྗེ་གུར་ལས་བཏུས་པའོ། །ཨི་ཐི།། །།གཉིས་པ་ནི་སྒྲུབ་པ་པོས་སེམས་བསྐྱེད་ལ། པྲྃ་གྱི་འོད་ཀྱིས་རྟེན་སྤྱན་དྲངས་ཏེ་ཚོགས་གཉིས་བསག་གོ །སྟོང་པའི་ངང་ལས་པད་ཟླ་ལ་པྲྃ། དེ་ལས་པདྨ་དེས་མཚན་པ་སྤྲོས་བསྡུས་པས་བཅོམ་ལྡན་འདས་མའོ། །སྐུ་མང་པོའི་སྤྲོས་བསྡུས་སེམས་ཅན་གྱི་དོན་བྱེད་པའོ། །དེ་ནས་སེམས་རྒོད་ན་ལོག་ནོན་ནི། སྣའི་རྩེ་མོར་པདྨ་དཀར་པོ་སྲན་མའི་ཚད་ཙམ་བྲིས་པ་ལྟ་བུ་གསལ་བར་བྱས་ལ་དེ་ལ་སྐུ་སྔར་དང་འདྲ་བ་ཡང་ཡང་དུ་ནན་ཏན་གྱིས་བལྟའོ། །སེམས་བཟུང་བའི་མན་ངག་ཀྱང་ཤིན་ཏུ་གལ་ཆེའོ། །སྐྱོ་ན་བཟླས་པ་ནི་ཆུང་དུ་ལ་དམིགས་པའམ། ཡང་ན་པད་ཟླ་ལ་བཀོད་པ་ལའོ། །ཨོཾ་པྲྃ་སྭཱ་ཧཱའོ། །རྫོགས་རིམ་ནི་སྙིང་གའི་པྲྃ་ལས་འོད་འཕྲོས་པས་ལུས་འོད་ཕུང་དུའོ། །དེའི་འོད་ཀྱིས་ཁམས་གསུམ་འོད་དུ་གསལ་བར་བྱས་ཏེ་ཁམས་གསུམ་གྱི་དངོས་པོ་ཚུར་འདུས་ཏེ་ལུས་ལ་ཐིམ། ལུས་པྲྃ་དང་པད་ཟླ་དང་ནཱ་དའི་བར་དུ་བསྡུས་ལ་མི་དམིགས་པར་སྟོང་པར་བསྒོམ་མོ། །ཨི་ཐི།། །།བླ་མ་རྣམས་ལ་ཕྱག་འཚལ་ལོ། །འདི་ནི་བཅོམ་ལྡན་འདས་ཀྱི་ཐུགས་ཀྱི་སྤྲུལ་པ་སྟེ་སངས་རྒྱས་བཞུགས་པའི་དུས་དགེ་སློང་བྱང་སེམས་ཤིག་རི་ཕུག་ན་སྒོམ་བྱེད་ཀྱིན་ཡོད་པས། བགེགས་རྣམས་བར་ཆད་ལ་འོངས་པས། སངས་རྒྱས་ཀྱི་ཐུགས་ཀ་ནས་ཁྲོ་བོ་འདི་སྤྲུལ་ནས་བཏང་བས། བགེགས་རྣམས་བྲེད་ནས་སངས་རྒྱས་ལ་སྐྱབས་སུ་སོང་ངོ༌། དེར་དེ་ཉིད་མེས་མ་ཚིག་གོ །དེ་ནས་ཕྱི་རབས་ཀྱི་རྣལ་འབྱོར་པ་རྣམས་ཀྱི་བར་ཆད་སྲུངས་ཤིག་ཅེས་བཀའ་བསྒོས་པའོ། །སྃ་བུ་ཊ་ལས་རྣམ་འཕྲུལ་ལོ། །དེ་ལ་ཚིགས་བཅད་གཅིག་གིས་བསྟོད་པའི་སྒོ་ནས་མཆོད་པར་བརྗོད་ལ། ཚིག་དོན་ནི་པུས་མོ་གཡོན་པའི་ལྷ་ང་ས་ལ་བཙུགས་པ་དང་རལ་གྲི་ལ་སོགས་པ་གོ་སླའོ། །སྒྲུབ་པ་པོས་སེམས་བསྐྱེད་ལ། སྙིང་གར་པད་ཉིའི་སྟེང་དུ་ཧཱུྃ་སྔོན་པོ་དེའི་འོད་ཀྱིས་བླ་མ་ལ་སོགས་པ་སྤྱན་དྲངས་ལ་བདུན་རྣམ་དག་དང་ཚངས་པའི་གནས་བཞི་རྒྱས་པས་བསོད་ནམས་ཀྱི་ཚོགས་བསག་གོ །ཡེ་ཤེས་ཀྱི་ཚོགས་ནི་རྣམ་ཐར་སྒོ་གསུམ་སྟེ། ཆོས་ཐམས་ཅད་རང་བཞིན་གྱིས་མཚན་ཉིད་དང་བྲལ་བ་དང༌། སྐྱེ་བའི་རྒྱུ་དང་བྲལ་བ་དང༌། འབྲས་བུ་ལ་རེ་བའི་སྨོན་པ་དང་བྲལ་བའོ། །རྣམ་རྟོག་གི་རྐང་པ་ཐ་མའི་དོན་ལ་ཆོས་ཐམས་ཅད་སྟོང་པ་སྟེ། དེ་ཡང་རང་གི་ངོ་བོ་མེད་ཅིང་རྒྱུ་མེད་པ་འབྲས་བུ་ལ་དམིགས་པས་སྟོང་པར་བསྒོམས་ལ་སྭ་བྷཱ་ཝས་བརྟན་པར་བྱའོ། །དེ་ནས་སྟོང་པའི་ངང་ལས་པད་ཉིའི་སྟེང་དུ་ཧཱུྃ། དེའི་འོད་ཀྱིས་སྤྱན་དྲངས་ནས་ཧཱུྃ་ལ་ཐིམ། དེ་གྱུར་པ་ལས་བཅོམ་ལྡན་འདས་བསྐྱེད་དོ། །ཞལ་གཅིག་ཕྱག་གཉིས་པ་རཏྣ་རྩེ་གསུམ་པ་ལ་སོགས་པའི་ཅོད་པཎ་ཅན། ཞི་རྒྱས་ལ་སོགས་པའི་དངོས་གྲུབ་ཐམས་ཅད་སྟེར་བས་འདོད་པ་སྒྲུབ་པའོ། །ཟར་མའི་མེ་ཏོག་སྟེ་སྔོ་ལ་སྐྱ་པའི་སྐུ་མདོག་གོ །སངས་རྒྱས་དྲི་མེད་འོད་ཟེར་ནི་སྤྲོ་བསྡུ་བྱེད་པར་རིགས་པར་བྱའོ། །རིན་པོ་ཆེའི་རྒྱན་ཅན་དབུ་ལ་ཐོད་པ་ལྔ་ནི་ཀྲི་ཡ་ལྟར་བསྒྲུབ་མི་ནུས་ན་ཁ་བསྐང་ངོ༌། །འགྲོ་བ་རྣམས་ཀྱི་དོན་བྱེད་པའི་རྟགས་སུ་སྟག་གི་ཤམ་ཐབས་ཅན་ནོ། །ལྷག་མ་ཅན་མཆོད་ཕྱིར་ཐོགས་པ་དཀར་པོ་གསུམ་ཁ་བསྐང་ངོ༌། །གཡས་རལ་གྲི་འབྲེལ་པ་འཇིག་རྟེན་པའི་ལྷ་ལ་སོགས་པ་ཚར་གཅོད་པ་སྟེ་དམ་ཚིག་སེམས་དཔའ་བལྟའོ། །དེའི་ཐུགས་ཀར་པད་ཉིའི་སྟེང་དུ་ཧཱུྃ་གྱུར་པ་ལས་ཡེ་ཤེས་དམ་ཚིག་པ་དང་འདྲ་བར་བལྟའོ། །དེའི་ཐུགས་ཀར་ཡང་པད་ཉིའི་སྟེང་དུ་ཧཱུྃ་ལས་རལ་གྲི་འཆང་ཟུང་ལ་པད་ཉིའི་སྟེང་དུ་ཧཱུྃ་བསམས་ཏེ་དེ་ཏིང་ངེ་འཛིན་སེམས་དཔའོ། །དེ་ལས་སྤྲོས་བསྡུས་སེམས་ཅན་གྱི་དོན་མི་སྐྱོའི་བར་དུ་བྱའོ། །སྐྱོ་ན་ལྷའི་རྣལ་འབྱོར་གྱིས་བསྐོར་བ་ལྟ་བུའི་བཟླས་པ་བྱའོ། །ལྡང་བ་ན་ཡི་གེ་བརྒྱ་པ་བརྗོད་པ་ལ་སོགས་པ་བྱའོ། །དབུ་རྒྱན་དབང་བསྐུར་བ་ཡང་རང་ཆས་སོ། །ལས་ཁ་ཚར་ནི་གདོན་གྱིས་ཟིན་པའམ། ནད་ཀྱིས་ཐེབས་པ་ལ་རང་གཏུམ་པོར་བསྒོམས་ཏེ། གཏོར་མ་ཕུལ་ལ་ཡུངས་ཀར་ཧཱུྃ་དུ་བལྟས་ལ་དེ་གྱུར་པ་ལས། རྡོ་རྗེ་བསམས་ཏེ་སྔགས་བཟླས་ལ་བརྡེག་གོ །སྲིའུ་གསོ་ན་ཁམ་ཕོར་སོ་མའམ་ལོངས་མ་སྤྱད་པའི་ལྟེ་བ་ལ་མིང་དང༌། བསྲུང་ཡིག་བྲིས་ལ་མཐར་སྔགས་རྣམས་རྡོ་ཐལ་གྱིས་བྲིས་ལ་མེ་ལོང་ལ་ཁྲུས་བྱས་ཏེ་སྣམ་བུ་གསར་པ་ལ་བཞག་ལ་སྐད་ཅིག་གིས་སྟོང་པར་བྱས་ལ། སྟོང་པའི་ངང་ལས་དེའི་ནང་དུ་པྃ་པད་རྃ་ཉིའི་སྟེང་དུ་ཧཱུྃ་བསྐྱེད་དེ། ཡེ་ཤེས་པ་བཅུག་ལ་དེ་དག་ཀྱང་ཁམ་ཕོར་གྱི་ཡི་གེ་ལ་ཐིམ་པར་བསམས་ལ། མཆོད་པ་དང་བསྟོད་པ་དང་གཏོར་མ་བཏང་སྟེ་གསོལ་བ་བཏབ་པ་སྒོ་ལྟག་ལ་བཏགས་པས་སྲུང་བར་བྱེད་དོ། །རང་ལྷའི་རྣལ་འབྱོར་དུ་བྱའོ། །ཚེར་མ་ལ་ནི་ཆུ་དང་རྒྱུས་པས་སོ། །གཡུལ་དུ་ཞུགས་པར་གྱུར་པ་ན་རལ་གྲི་ལ་རྒྱལ་བར་གྱུར་ཅིག་པ་དང༌། བཅས་པས་སྔགས་བཟླས་ཏེ་རལ་གྲི་གཡས་སུ་ཐོགས་ནས། གཡོན་དུ་སྡིགས་མཛུབ་བྱས་ཏེ་གཡུལ་དུ་ཞུགས་ན་རྒྱལ་བར་འགྱུར་རོ། །བྷཾ་ག་ལའི་སློབ་དཔོན་པྲ་བྷཱ་ཀ་ར་ཀཱིརྟིའི་ལུགས་ཀྱི་བཀོད་པ་ཐོབ་པས་མཛད་པ། ཨི་ཐི།། །།གཏུམ་པོའི་སྒྲུབ་ཐབས་ནི། སེམས་བསྐྱེད་ལ་ཚོགས་གཉིས་སྔར་བཞིན་ནོ། །སྟོང་པའི་ངང་ལས་པད་ཉིའི་སྟེང༌། །ཧཱུྃ་དེའི་འོད་ཀྱིས་སྤྱན་དྲངས་བསྟིམ། །དེ་གྱུར་སྡིག་འཇིགས་གཏུམ་པོའོ། །མིང་གཞན་གྱིས་ནི་མི་གཡོབས། །སྟེང་འོག་གཟིགས་པས་མི་མཉམ་སྤྱན། །རྩེ་གསུམ་རཏྣའི་དབུ་རྒྱན་ཅན། །ཀྲི་ཡར་མི་གནས་ཐོད་པ་ལྔ། །གཡོན་བྲང་གཡས་པའི་པུས་མོ་ཡིས། །ཉི་མའི་གདན་བཙུགས་རྒྱབ་བརྟེན་བཅས། །སྙིང་གར་ཡེ་ཤེས་སེམས་དཔའ་བལྟ། །ཏིང་འཛིན་སེམས་དཔའ་ཡང་བལྟའོ། །དབང་བསྐུར་ཆུ་ལས་མི་བསྐྱོད་རྒྱན། །སྐྱོ་ན་བསྐོར་བའི་བཟླས་པ་བྱ། །གཏུམ་ཆེན་སྒྲུབ་པའི་ཐབས་རྫོགས་སོ།། །།རྡོ་རྗེ་དབྱངས་ཅན་མའི་སྒྲུབ་ཐབས་ལ། ཀླད་གཞུང་མཇུག་གསུམ་ཡིན་ནོ། །རྐང་པ་གཅིག་དང་གསུམ་གྱིས་ཀླད་ཀྱི་དོན་མཆོད་པར་བརྗོད་ཅིང་བཤད་པར་དམ་བཅའ་བ་བསྟན་ཏོ། །སངས་རྒྱས་ཀྱིས་གསུངས་སྡེ་སྣོད་ཆོས། །ཤེས་རབ་སྟེར་བྱེད་ལྷ་མོ་ནི། །སྟོབས་དང་ཡེ་ཤེས་ཡོན་ཏན་ཅན། །ཡན་ལག་དྲུག་ཅུའི་དབྱངས་ཅན་འདུད། །ཡང་ན་སྒྲུབ་པ་པོ་ལ་ནི། །ལོ་ཀ་དང་འདས་ཡོན་ཏན་སྟེར། །དེས་ན་ཡོན་ཏན་རང་བཞིན་ནོ། །ལྷ་མོ་བསྒོམས་པས་མཉེས་བྱེད་ལ། །མཆོག་གི་དངོས་གྲུབ་ཅན་མཛད་མ། །དྲུག་ཅུས་མཛེས་པའི་ང་རོར་ལྡན། །གསུང་སྤྲོས་རྩོད་པས་མི་ཐུབ་སྟེ། །ལྷ་མོ་མཉེས་བྱེད་བསྒོམ་པ་ནི། །ཕྱི་མའི་སྐྱེ་བོ་ལ་ཕན་ཕྱིར། །བསྒོམས་པས་འཁོར་འཇོམས་ཕྲིན་ལས་བྱེད། །མི་བཟད་གཏི་མུག་མུན་སེལ་མ། །རྒྱུད་ལས་གསུངས་པའི་ཆོ་ག་བརྗོད། །མཚན་ཉིད་དང་ལྡན་སྒྲུབ་པོ་ཡིས། །སྔར་ལངས་ཁ་སོགས་ཕྱིའི་ཁྲུས་བྱ། །སྙིང་རྗེ་ཚད་མེད་དང་ལྡན་ཞིང༌། །བཟོད་ལྡན་བཏང་སྙོམས་ཚད་མེད་དེ། །སྨན་པ་མེད་སོགས་དངོས་པོ་ཀུན། །སྟོང་པས་དབེན་ཞིང་སྤྲོས་པས་དག །བསྒོམ་བྱ་སྔགས་ཀྱིས་བརྟན་པར་བྱ། །སྟོང་ངང་པདྨ་ཟླ་བ་ལ། །དོཿཡིག་དམར་པོ་འོད་ཟེར་ཅན། །དེ་གྱུར་སྣ་ཚོགས་འདབ་བརྒྱད་ལ། །ལྟེ་བར་དོཿཡིས་མཚན་པའོ། །དེ་ལས་བྱུང་བའི་འོད་ཟེར་གྱིས། །སྤྱན་དྲངས་དེ་ཉིད་ལ་ཐིམ་སྟེ། །གྱུར་པས་རྡོ་རྗེ་དབྱངས་ཅན་བསྐྱེད། །མདོག་དམར་འོད་ཟེར་ཆེར་ལྡན་པར། །རཏྣ་བཟང་པོའི་རྒྱན་གྱིས་བརྒྱན། །པདྨ་རལ་གྲི་གྲི་གུག་ནི། །གཡས་ཀྱི་ཕྱག་ན་བསྣམས་པའོ། །ལྷུང་བཟེད་རཏྣ་ཙཀྲ་ནི། །གཡོན་པའི་ཕྱག་ན་བསྣམས་པ་སྟེ། །ལྷུང་བཟེད་ཅེས་བྱ་ཐོད་པར་འདོད། །ཐུགས་ཀར་ཡེ་ཤེས་སེམས་དཔའ་ནི། །པདྨ་ཟླ་བ་ལ་གནས་དོཿ །འོད་ཟེར་མ་ལུས་ཁྱབ་པ་ཡིས། །ཕྱིན་ཅི་ལོག་དང་སྒྲིབ་པ་བསལ། །ཕྱིར་འཕྲོས་འགྲོ་བ་ལ་ཁྱབ་པས། །དོན་བྱས་མི་ཤེས་མུན་པ་འཇོམས། །སླར་འདུས་སྙིང་གའི་དོཿལ་ཐིམ། །སྐྱོ་ན་ས་བོན་མཉམ་རྗེས་འོད། །བསྡུས་ལ་སྔགས་རིངས་བཟླས་པ་ནི། །སྙིང་གི་ས་བོན་ལས་བྱུང་ནས། །དོ་ཤལ་ཚུལ་དུ་ལྟེ་བར་བྱུང༌། །ཙཀྲ་ལྟ་བུའི་བཟླས་པ་བྱ། །སྔགས་གསུམ་རིམ་བཞིན་དོན་ཤེས་དང༌། །ཚིག་འཛིན་འཕྲལ་གྱི་བྱ་བ་ཤེས། །ཐུན་མཚམས་སུ་ཡང་ང་རྒྱལ་བྱ། །བསོད་ནམས་སེམས་ཅན་དོན་དུ་བསྔོ། །སཾ་སྐྲྀ་ཏ་སྐད་སྒྲུབ་ལ་སོགས། །དགོས་པ་བྱེད་ན་རྩེ་གཅིག་གིས། །ལྷ་བསྒོམ་བསྙེན་པ་འབུམ་ཕྲག་བྱ། །རྩོད་པའི་དུས་སུ་བརྒྱད་འགྱུར་ཏེ། །འདི་ལ་མི་མཐུན་ཕྱོགས་གྱུར་པ། །སྡུག་བསྔལ་སྣ་ཚོགས་བྱུང་གྱུར་ཀྱང༌། །བསམ་གཏན་ཉམས་པར་མི་བྱའོ། །ལེགས་སྦྱར་སྒྲུབ་པ་ལ་སྦྱོར་ན། །དཀར་པོའི་ཚེས་གཅིག་ནས་བཟུང་སྟེ། །ལྷ་ཡི་ང་རྒྱལ་ལྡན་པ་ཡིས། །ཟླ་བ་ལ་དམིགས་མ་གཡེལ་བར། །ངག་ཏུ་སྣ་ཚོགས་རྗོད་བྱེད་ཅིང༌། །སཾ་སྐྲྀ་ཏ་ཡི་སྐད་དུ་མོས། །ཟླ་བ་ཇི་སྲིད་བརྒལ་བར་དུ། །ཉ་ཡི་བར་དུ་དེ་ལྟར་བྱ། །ཐ་མ་དེ་ཡི་ནུབ་མོ་ལ། །ཚིགས་བཅད་མཁན་ནི་ཆེན་པོར་འགྱུར། །མཇུག་གི་དོན་ནི་སླ་མོད་ཀྱང༌། །མུ་སྟེགས་ཅན་ལས་ཁྱད་པར་འཕགས། །མཁས་པ་དྷརྨ་ཀཱིརྟི་ཡི། །སློབ་དཔོན་དཔལ་ལྡན་འཛིན་དེས་མཛད། །ཨི་ཐི།། །།བགེགས་དགྲའི་སྒྲུབ་ཐབས་འདི་ལ། བར་ཆད་བསྲུང་བ་གལ་ཆེ། སྒྲུབ་པ་པོ་འགྲེ། སྙིང་གར་པད་ཉིའི་སྟེང་གི་ཧཱུྃ་གི་འོད་ཀྱིས་ཚོགས་གཉིས་བསག་གོ །སྟོང་པའི་ངང་ལས་པྃ་པད་ཨྃ་ཉིའི་སྟེང་དུ་ཧཱུྃ་གྱུར་པ་ལས་བགེགས་དགྲ་བསྒོམ། ཐུགས་ཀར་པད་ཉིའི་སྟེང་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ཡེ་ཤེས་སེམས་དཔའ་སྟེ། དེ་ལས་འོད་འཕྲོས་བགེགས་དགྲའི་སྐུར་བསྒོམ། གནོད་བྱེད་ཐམས་ཅད་བརླག་པར་བྱས། སེམས་ཅན་གྱི་དོན་བྱས་ཧཱུྃ་ལ་བསྡུའོ། །མི་སྐྱོའི་བར་དུ་བྱ། སྐྱོ་ན་ཙཀྲ་ལྟ་བུའི་བཟླས་པ་བྱའོ། །སྔོན་དུ་འགྲོ་བ་དམ་ཚིག་གི་རི་ལུ་བསྟེན་པའོ། །ཞི་བའི་ཐབ་ཁུང་ཟླུམ་པོ་རུ། །ཏིལ་དང་བྱང་དུ་ཁ་བལྟས་པའི། །དཱུརྦ་མེ་ཏོག་དཀར་པོ་རྣམས། །ང་རྒྱལ་ལྡན་པས་བསྲེག་བྱ་ཞིང༌། །ཞི་བར་གྱིས་ཤིག་ཅེས་བརྗོད་ན། །གནོད་བྱེད་ཞི་བར་འགྱུར་བ་ཡིན། །ཨི་ཐི།། །།རལ་གཅིག་མའི་སྒྲུབ་ཐབས་ལ། སྒྲུབ་པ་པོ་འགྲེ། སྙིང་གར་པད་ཉིའི་སྟེང་དུ་ཧཱུྃ་དེའི་འོད་ཀྱིས་ཚོགས་གཉིས་བསག་པར་བྱའོ། །སྟོང་པའི་ངང་ལས་ཧྲཱིཿལས་པདྨ། རྃ་ལས་ཉི་མའི་སྟེང་དུ་རྃ་ལས་ཐོད་པ་དབུས་སུ་ཧཱུྃ་སྔོན་པོ་བསམ། དེ་ལས་སྤྲོས་བསྡུས་པ་ལས་བསྐྱེད་དོ། །གཡས་བརྐྱང་གཡོན་བསྐུམ་པ་ཐོད་པ་ལྔས་བརྒྱན་པ་ཀླུ་རིགས་བཞིའི་སྦྲུལ་གྱིས་བརྒྱན་པའོ། །དྷ་བཻའི་བཞེད་པ་ཤེས་པར་བྱའོ། །མི་བསྐྱོད་པའི་རིགས་སོ། །སྐྱོ་ན་བཟླས་པ་གཞན་དང་འདྲ་བར་བྱའོ། །དགེ་བ་བསྔོ་བ་དང་མི་དམིགས་པའི་ང་རྒྱལ་དང་ལྡན་པར་བྱའོ། །རྫོགས་སོ།། །།འཕགས་མ་དུག་སེལ་མའི་སྒྲུབ་ཐབས་ལ། སྒྲུབ་པ་པོའི་སྙིང་གར་པད་ཉིའི་སྟེང་དུ་ཛྃ་ལས་འོད་སྤྲོས་ཚོགས་གཉིས་བསགས་ལ། རང་གི་ལུས་སྒྱུ་མ་ལྟ་བུའི་སྙིང་གར་པད་ཉི་ལ་ཛྃ་སྤྲོས་བསྡུས་པ་ལས་དུག་སེལ་མ་བསྐྱེད་དོ། །སེར་མོ་ལྷའི་དབུ་སྦྲུལ་མགོ་བདུན་གྱི་གདེངས་ཀ་ཅན། དེའི་སྤྱི་བོར་མི་མགོའི་གཟུགས་གཡས་གསུམ། གཡོན་གསུམ། སྦྲུལ་མགོ་དྲུག་རེ་རེ་ལ་ཡང་རཏྣ་འཁོར་ལོའི་འོད་ཅན་གྱི་སྤྱི་བོར་བརྒྱན་པ། སྤྱན་གསུམ་གསུམ་དགུ། ཁྲོས་པ་ཞེས་བྱ་བ་སྤྱི་གཙུག་གི་ཞལ། དགོད་པ་འཛུམ་པའི་མདངས་ཅན་མ། །རོལ་པས་མནན་པ་འགྱིང་བག་གོ །བཻ་དྷའི་བཞེད་པས་མི་བསྐྱོད་པའོ། །སྐྱོ་ན་བཟླས་པ་གདེངས་ཀའི་ཕྱག་རྒྱ་བཅས་ལ་གཞན་དང་འདྲ་བར་བྱའོ། །དུག་གིས་བརྒྱལ་ཞིང་མྱོས་པའི་མི། །བཟླས་བུམ་ཆུ་ཡི་བདུད་རྩིས་འཁྲུད། །དེ་ནས་དུག་ནི་མེད་གྱུར་ཀྱང༌། །ནད་པས་ལྷ་མོ་དུག་སེལ་གྱི། །སྐུ་གསུམ་བདག་ཉིད་བསྒོམ་པར་བྱ། །ཕན་ཡོན་དུག་ནི་ཞི་འགྱུར་དང༌། །བྱང་ཆུབ་རིང་པོར་མི་ཐོགས་འཐོབ། ཨི་ཐི།། །།རིག་བྱེད་མའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ། །སྐད་ཅིག་གིས་ལྷའི་ང་རྒྱལ་དུ་བྱས་ལ་སེམས་ཅན་ཐམས་ཅད་དབང་དུ་བྱ་བའི་བསམ་པས། སྙིང་གར་པད་ཉིའི་སྟེང་དུ་ཧྲཱིཿདམར་པོ། དེའི་འོད་ཀྱིས་སྤྱན་དྲངས་ཐིམ། གྱུར་པ་ལས་བསྐྱེད་དེ། གཡས་མི་འཇིགས་པ་བརྒྱད་ནས་ཁ་སྦུབ་པའོ། །འོག་ཏུ་དགའ་རབ་དབང་ཕྱུག་མནན་པ་དོན་གྲུབ་ཀྱི་དབུ་རྒྱན་ཅན་ནོ། །སྐྱོ་ན་བསྐོར་བའི་བཟླས་པ་བྱ་སྟེ་འབུམ་ཕྲག་གཅིག་གིས་འགྲུབ་པར་འགྱུར་རོ། །ཨི་ཐི།། །།རྟོག་པ་ལས་གསུངས་པའི་རིག་བྱེད་མའི་སྒྲུབ་ཐབས་ལ། འདི་ཡི་དམ་ཚིག་བསྲུང་བ་ནི། །བུད་མེད་བརྫུན་དང་ཕྲ་མ་དང༌། །ངག་རྩུབ་འཁྱལ་པ་ཤ་ཆང་སྒོག །དེ་རྣམས་སྤངས་ནས་ཉིན་རེ་ཞིང༌། །གོས་གསར་པ་ལན་གསུམ་བརྗེ་བར་བྱའོ། །བུད་མེད་ཀྱིས་དབེན་པར་སེམས་བསྐྱེད་ལ། སྙིང་གའི་འོད་ཀྱིས་ཚོགས་གཉིས་བསག་པར་བྱའོ། །དེ་ནས་སྙིང་རྗེ་བྱང་སེམས་ཀྱིས་སྟོང་པའི་ངང་ལས་པད་ཉི་ལ་ཧྲཱིཿལས་ཨུཏྤ་ལ་དམར་པ། པད་ཟླའི་སྟེང་དུ་ཧྲཱིཿས་མཚན་པ་དེའི་འོད་ཀྱིས་སྤྱན་དྲངས་ཐིམ། གྱུར་པ་ལས་ལྷ་མོ་བསྐྱེད་དོ། །འོག་ཏུ་གཟའ་སྒྲ་གཅན་འཛིན་ལ་དགའ་རབ་དབང་ཕྱུག་མགོ་ལ་རྡོ་རྗེའི་སྐྱིལ་ཀྲུང་གིས་བཞུགས་པའོ། །ཡེ་ཤེས་པ་འོད་ཀྱིས་བཀུག་ལ་ཨུཏྤ་ལའི་ཕྱག་རྒྱ་དང་ཡི་གེ་བཞི་སྤྱན་དྲངས་ནས་བསྟིམ་མོ། །དྷ་བཻའི་བཞེད་པའོ། །སྐྱོ་ན་བཟླས་པ་བྱ་བ་ནི་ཕྱི་མོ་ཞེས་བྱ་ཨོཾ་ཡིན་ནོ། །ཐུན་མཚམས་ཀྱི་གཏོར་མ་ཀྲི་ཡ་དང་མཐུན་པར་བཤམ། སེམས་བསྐྱེད་ལྷ་ཡི་ང་རྒྱལ་བྱ། །མདུན་དུ་དམ་སེམས་ཡེ་ཤེས་བསྟིམ། །ཡི་གེ་གསུམ་གྱི་བྱིན་གྱིས་བརླབས། །སྙིང་པོའི་སྔགས་བདུན་ལ་སོགས་ཀྱིས། །ཅི་ནུས་བཟླས་པ་དབུལ་བར་བྱ། །འདོད་དོན་གསོལ་དང་གཤེགས་སོགས་བྱ། །དེ་ལྟར་ཟླ་དྲུག་བསྒོམ་བྱས་ན། །འགྲུབ་འགྱུར་པ་ཡི་རྟགས་དྲུག་འབྱུང༌། །ནད་མེད་པ་དང་སྟོན་མོ་གོས་རྙེད་དང༌། །ཏམ་པོ་ལ་དང་བུད་མེད་སོགས། །རྙེད་འགྱུར་དྲི་ཟའི་བུད་མེད་རྙེད། །བསྟེན་ན་བདུད་ཀྱི་བར་ཆད་འབྱུང༌། །སྤངས་ན་བར་ཆད་ཞི་བར་འགྱུར། །ཨི་ཐི།། །།རིག་བྱེད་མའི་སྒྲུབ་ཐབས་ལ། བསོད་ནམས་ཀྱི་ཚོགས་བསགས་པ་གཞུང་ན་མེད་ལ་བྱས་ཀྱང་འགལ་བ་མེད་དོ། །ཡེ་ཤེས་ཀྱི་ཚོགས་བསགས་ལ། སྟོང་པའི་ངང་ལས་པད་ཟླའི་ཧྲཱིཿལས་ཨུཏྤ་ལ་ཧྲཱིཿས་མཚན་པ་ལས་སྤྲོས་བསྡུས་པ་ལས་བསྐྱེད་དེ། འོད་དཔག་ཏུ་མེད་པས་རང་ཆས་སུ་དབུར་བརྒྱན་པ། དགྱེས་པ་དང༌། རྔམ་པ་དང༌། འགྱིངས་པའི་རོ་དང་ལྡན་པའི་ལྷ་མོ་བསམས་ལ། དེའི་ཐུགས་ཀའི་འོད་ཀྱིས་ཡེ་ཤེས་པ་དགུག་གཞུག་བྱ། དེ་ནས་སྙིང་གའི་འོད་ཟེར་གྱིས་ལྷ་མོ་བཀུག་ལ། ཕྱོགས་བཅུ་ནས་འདུད་པར་གྱུར་པས་བསྐོར་བར་བསམ་མོ། །དེ་ནས་ལྷས་ལུང་བསྟན་པའི་བུད་མེད་ལ་སོགས་པ་དབང་དུ་བྱེད་ན། ཡན་ལག་མེད་པའི་རྡོ་རྗེ་ནས་གསུངས་པ་དང་མཐུན་པར་ཤེས་པ་དང༌། ཆེ་གེ་མོ་གཉིས་བྱུང་བ་ནི་སྐྱེས་པ་དང་བུད་མེད་དོ། །ཨཱ་ཀརྵ་དབང་གི་ཡིན། །དེ་ཡི་ནུབ་མོ་ཁུག་འགྱུར་ཏེ། །རྟག་ཏུ་གནས་པར་བྱ་དོན་དུ། །ཝ་ཤ་མ་ན་ཞེས་པ་ནི། །ཨཱ་ཀརྵ་ཡི་གོང་བཅུག་ལ། །སྤེལ་བའི་ཚུལ་དུ་བཟླས་པ་བྱ། །སྔགས་དེ་བརྒྱ་དང་ཁྲི་དང་ནི། །འབུམ་ཕྲག་དང་ནི་འབུམ་ཕྲག་བདུན། །བྱེ་བ་དག་ནི་བཟླས་བྱས་ན། །རྒྱལ་ཕྲན་རྗེའུ་རིགས་རྒྱལ་ཆེན་པོ། །ས་གསུམ་ཞེས་ནི་ཁམས་གསུམ་ཡིན། །ཨི་ཐི།། །།ཨཽ་ཌྱན་ནས་བྱུང་བའི་རིག་བྱེད་མའི་སྒྲུབ་ཐབས་ལ། འདི་རྡོ་རྗེ་གུར་ལས་གསུངས་པ་སྟེ། སྒྲུབ་པ་པོས་ཡིད་དང་མཐུན་པའི་གནས་སུ། དྲི་ཞིམ་པོ་དང་བདུད་རྩི་ལྔས་ཁྲུས་བྱས་ལ། སེམས་བསྐྱེད་པ་སྙིང་གར་པད་ཉིའི་སྟེང་དུ། ཧྲཱིཿའོད་འབར་བ་དེའི་འོད་ཀྱིས་སེམས་ཅན་ཐམས་ཅད་རིག་བྱེད་མར་བསམས་ལ། འོད་ཧྲཱིཿལ་བསྡུའོ། །ཡང་ཧྲཱིཿའི་འོད་ཀྱིས་རྟེན་སྤྱན་དྲངས་ཏེ་ཚོགས་གཉིས་བསག་གོ །སྟོང་པའི་ངང་ལས་པད་ཉིའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ལས་སྲུང་བའི་འཁོར་ལོ་བྱའོ། །དེའི་དབུས་སུ་ཨེ་ལས་སྐྱེས་པའི་ཆོས་འབྱུང༌། དེའི་སྟེང་དུ་ཧྲཱིཿལས་པདྨ་འདབ་བརྒྱད་ཟེ་འབྲུར་རྃ་ལས་ཉི་མ། དེའི་སྟེང་དུ་མི་རོ། དེའི་སྟེང་དུ་ཧྲཱིཿལས་ཨུཏྤ་ལ་དམར་པོའི་མདེའུ་ཅན་གྱི་མདའ་ལ་ཧྲཱིཿས་མཚན་པ་ལས་མངོན་བྱང་ལྔ་ལས་གཞན་དང་མཐུན་པར་བསྐྱེད་ལ། དྷ་བཻའི་བཞེད་པའོ། །གསང་བ་ཞེས་པ་བདུད་རྩི། ཅིག་ཤོས་ཞེས་པ་མེ་ཏོག་གོ །སྐྱོ་ན་བསྐོར་བའི་བཟླས་པ་བྱ། ཙནྡན་དམར་པོའི་ཕྲེང་བ་ལ་ཡི་གེ་གསུམ་བཟླས་ཏེ་ཁ་བྱིན་གྱིས་བརླབ་པར་བྱའོ། །དེ་ནས་དབང་དུ་བྱེད་ན་སྔོན་དུ་བསྙེན་པ་བྱས་ཏེ། དཀར་པོའི་ཚེས་གཅིག་ནས་ཉའི་བར་དུ་ཐུན་གསུམ་དུ་ཁྲི་ཚོ་རེ་བཟླས་སོ། །དེ་ནས་ནུབ་མོ་རང་གི་སྙིང་གར་པད་ཉི་ལ་ཧྲཱིཿལས་པདྨ་འདབ་མ་བརྒྱད་པ། ཟེའུ་འབྲུ་ལ་བསྒྲུབ་བྱའི་མིང་དབང་དུ་བྱ་བའི་སྔགས་དང་བཅས་པ། འདབ་མ་བརྒྱད་ལ་དབྱངས་ཡིག་རིང་པོ་བརྒྱད། ལུས་རྒྱས་ཁྲོས་ཤིང་བསྒྲུབ་བྱའི་མིང་གཞོམ་པའི་སེམས་ཀྱིས་ཆགས་པ་དང་བཅས་པར་བསམ། གོ་རིམ་བཞིན་ཞེས་པ་ནི་བུང་བར་དབྱངས་ཡིག་དང་སྦྱར་གསུངས། རྣམ་རྟོག་བུང་བ་གཉིས་གཉིས་དང་དགའ་སོགས་གཉིས་གཉིས་སྦྱོར་རོ། །རང་གི་གཡོན་བསྒྲུབ་བྱའི་གཡས་ནས་ཞུགས། བསྒྲུབ་བྱའི་ཨཱ་ལི་ཐུང་དུ་བརྒྱད་བསམས་པའི་བུང་བ་དེ་དག་གིས་པད་སྡོང་བཅག་བཀྲུགས་ཨཱ་ལི་གཞོམ། དབུགས་དང་བུང་བས་ཤེས་པ་འདྲེན་པ་གཞུང་རང་དུ་གསལ། སྔགས་ནི་ཆགས་པའི་སེམས་ཀྱིས་བཟླ། ཨ་མུ་ཀ་ནི་ཆེ་གེ་མོ། །ཝ་ཤ་མ་ན་ཁུག་ཅིག་ཡིན། །དེ་ནས་ཉའི་ཐོ་རངས་འོང་ངོ༌། །འོངས་ནས་དེ་ཉིད་གསུམ་ཤེས་པས་སྤྱན་ཕྱག་རྒྱ་ཆེན་པོ་གཞོམ་དུ་མེད་པར་ཐོབ་པར་འགྱུར། །ཨི་ཐི།། །།ཁམས་གསུམ་དབང་དུ་བྱེད་པའི་སྤྱན་རས་གཟིགས་ཀྱི་སྒྲུབ་ཐབས་ནི། སྒྲུབ་པ་པོས་ཐང་སྐུ་དགྲམ་པ་ཡིད་ཀྱིས་བསམས་ལ། མདུན་དུ་སའི་དབུས་སུ་བའི་ལྕི་བས་ཁྲུ་གང་གྲུ་བཞི་པ་བྱ། གུར་གུམ་གྱི་ཆུས་ཐིག་ལེ་ཟླ་བ་ལྟ་བུ་མཐོ་གང་བ་བྱའོ། །བྱུགས་སྔགས་གོང་མའོ། །འོག་མས་མཎྜལ་སྟེང་དུ་ཕབ་ལ་བཛྲ་པུཥྤེ་ལ་སོགས་པས་མཆོད་ལ་མུཿས་གཤེགས་སོ། །དེ་ནས་སྙིང་གར་པད་ཉི་ལ་ལྷ་བསྐྱེད་ནུས་པའི་ས་བོན་ཧྲཱིཿཉི་མ་འདྲ་བའི་འོད་ཀྱིས་འོད་དཔག་ཏུ་མེད་པ་སྤྱན་དྲངས། ཚོགས་བསགས། ཡེ་ཤེས་ཀྱི་མི་གསུང༌། ཡང་ཧྲཱིཿའི་འོད་ཀྱིས་རང་གི་ལུས་ཧྲཱིཿལ་ཞུགས་པ། དེ་གྱུར་པ་ལས་བྷ་ག་ཝཱན་བསྐྱེད་དོ། །ཁམས་གསུམ་རོ་གཅིག་པའི་རྟགས་སུ་ལུག་གཉིས་གདན་དུ་བྱས་པ། འཁོར་གྱི་རྡོ་རྗེ་རྣལ་འབྱོར་མ་རེ་རེས་ཀྱང་སྤྲུལ་པའི་ཚོགས་དཔག་ཏུ་མེད་པ་འགྱེད་ནུས་པས་བསྐོར་ཞིང་མཆོད་པ་དང་དབང་བསྐུར་སྦྱིན་པ། བྱང་སེམས་ཀྱི་འཁོར་དང་རིག་པ་འཛིན་པ་ལ་སོགས་པས་གར་བྱེད་པ། འབྱུང་པོའི་ཚོགས་སོགས་ཀེང་རུས་ཀྱིས་བརྒྱན་པའི་འཁོར་བལྟ། རྡོ་རྗེ་རྣལ་འབྱོར་མའི་ཚོགས་ནི་དབང་བསྐུར་ནས་འོད་དཔག་མེད་པས་དབུར་བརྒྱན་ནོ། །དེ་ལྟ་བུའི་ལྷར་བསྐྱེད་ལ་ལྟེ་བར་པད་ཉིའི་སྟེང་དུ་གཡོན་ཕྱོགས་སུ་ཧྲཱིཿབསམ། སྙིང་གར་ཁྲོ་བོའི་ས་བོན་ཧཱུྃ། གཡས་སུ་ཨཾ་ངོ༌། །སྟོང་པའི་རྡོ་རྗེ་ཡིན་པས། སྔགས་ཀྱང་སྟོང་པའོ། །དེ་ལྟར་གོམས་པར་གྱུར་ན་ལུས་ལ་ཡེ་ཤེས་བབས་ན་འདར་བ་ལ་སོགས་པ་འོང༌། སེམས་ལ་བབས་ན་གཉིས་སུ་མེད་པའི་ཡེ་ཤེས་སྐྱེ། ངག་ལ་སཾ་སྐྲྀ་ཏའི་སྐད་སྨྲའོ། །འདི་རྣམས་བསྒོམས་པའི་རྣལ་འབྱོར་པས། །གླང་ཆེན་སྨྱོན་བ་ཆུ་འཐུངས་ལྟར། །བྱ་བའི་ཆེད་དང་བྱ་མིན་པས། །མི་ལྟ་འདོད་ཡོན་ལྔ་ལ་སྤྱོད། །བུད་མེད་རིགས་ལྔ་ཡང་དེ་བཞིན་ནོ། །དེ་ལྟ་མིན་ན་གཉིས་མེད་སོགས། །སྐྱེ་བར་འགྱུར་བ་མ་ཡིན་ནོ། །གྲུབ་ན་ནད་ལྡང་གཞན་ལ་ཡང༌། །སྔོན་དུ་བཟླས་པ་མང་བྱས་ཏེ། །ཡི་གེ་གསུམ་པོ་བསྒོམ་སོགས་ཀྱིས། །རིང་ན་གནས་པ་ལ་ཡང་འབེབས། །རང་གི་ཆགས་ལ་སོགས་མི་སྤངས། །ཉོན་མོངས་ལས་གྲོལ་མ་ཡིན་ཏེ། །སྔོན་ནས་གྲོལ་བར་འགྱུར་ཞེ་ན། །མ་ཡིན་དངུལ་ཆུས་ཟངས་ཕུག་ལྟར། །གཉིས་མེད་ཀྱིས་ཕུག་འདོད་ཆགས་ནི། །ལམ་དུ་འགྲོ་བ་དག་ཏུ་འདོད། །བཟླས་པ་སྔར་བསྟན་བཞིན་དུ་བལྟ། །འཕྲོག་མར་ཆང་བུ་སྦྱིན་སྔགས་སོ། །དེ་ནས་འདི་ཡི་གཏོར་མ་ནི། །ནང་པའི་གཏོར་མ་མདུན་བཤམས་ཏེ། །རང་ཉིད་ལྷར་བསྒོམ་མདུན་དུ་ཡང༌། །དམ་ཚིག་སེམས་དཔའ་འཁོར་སོགས་ཀྱིས། །བསྐོར་བལྟས་ཡེ་ཤེས་སེམས་དཔའ་བསྟིམ། །ཡི་གེ་གསུམ་གྱིས་བྱིན་གྱིས་བརླབས། །སྔགས་འདི་བདུན་བཟླས་དབུལ་བར་བྱ། །གསོལ་བས་ཁམས་གསུམ་དབང་བྱེད་ཀྱི། །དེ་ནས་འབྱུང་པོ་ཀུན་གསོལ་གདབ། །ས་ར་ཧ་ཆུང་བས་མཛད་པའོ། །ཨི་ཐི།། །།ཤྲཱི་གནོད་གནས་ནི་སྒྲུབ་ཐབས་འདི་གང་བ་བཟང་པོའི་རྒྱུད་ལས་གསུངས། ནོར་རྒྱུན་མ་དང་གནོད་གནས་གཉིས་ལོ་ཀ་ལས་འདས། འཁོར་རྣམས་ལོ་ཀ་པའོ། །ཚོགས་བསག་མི་དགོས། སྒྲུབ་པ་པོས་སེམས་བསྐྱེད་སྟོང་པར་བསྒོམས་ལ། དེ་ནས་ཟླ་དཀྱིལ་དཀར་བ་ཐབས། རྩ་དམར་བ་ཤེས་རབ་དབྱིབས་གྲུ་གསུམ་པ། དེའི་སྟེང་དུ་པདྨ་འདབ་བརྒྱད་དེའི་དབུས་སུ་བྃ་སེར་པོའི་འོད་ཀྱིས་སྤྱན་དྲངས་ལ་བསྟིམ། དེ་གྱུར་པ་ལས་རང་ཉིད་གནོད་སྤྱིན་མོ་སེར་མོ་རུས་པའི་རྒྱན་ཅན། འཁོར་ཡང་དུས་གཅིག་ཏུ་སྟེ་མདོག་སོགས་གཙོ་མོ་དང་འདྲའོ། །གཙོ་མོའི་བྷ་གའི་དབུས་སུ་ཛྃ་གྱི་འོད་ཟེར་གྱིས་སྤྱན་དྲངས་གྱུར་པར་བལྟའོ། །གཞུང་བཞིན་བསྐྱེད་དོ། །རིགས་ལྔའི་དབུ་རྒྱན་རང་ཆས་སུའོ། །དེ་ནས་ཡབ་ཡུམ་སྙོམས་པར་ཞུགས་པས་བྱང་སེམས་ཕྱིར་འཕྲོས་པས་ཕྱེད་ལས་ནམ་མཁའ་ལས་རཏྣའི་ཆར་འབེབས། ཕྱེད་ལས་འོག་ཏུ་འཁོར་གནོད་སྦྱིན་བཅུ་དྲུག་པོ་འཕྲོ་བར་བལྟའོ། །ས་བོན་འབབ་པའི་དུས་སུ་གནོད་སྦྱིན་རྣམས་བལྟ་སྟེ། སྐུ་མདོག་ཕྱག་མཚན་གཙོ་མོ་འདྲ། །དེ་དག་ཁྲག་གི་སྣོད་ནང་དུ། །རཏྣའི་ཆར་ནི་འབེབས་བྱེད་པའི། །དེ་ནས་མགོན་པོ་གནོད་གནས་ཀྱི། །གནས་བདུན་སྙིང་པོའི་ཡི་གེ་དགོད། །སྐད་ཅིག་གིས་ནི་བསམ་པ་ཡིན། །སྤྱི་བོ་ལ་སོགས་གནས་བརྒྱད་དུ། །གནོད་སྦྱིན་དང་པོ་བརྒྱད་བལྟའོ། །སྤྱི་བོ་ལ་སོགས་གནས་བཞི་རུ། །ཉེ་བའི་སྙིང་པོ་དགོད་པར་བྱ། །མགོ་རྒྱབ་ཅེས་བྱ་ལྟག་པའོ། །སྔགས་དེ་ལག་པའི་གནས་བཞིར་དགོད། །དེ་དག་གཙོ་བོ་ལ་བཀོད་ནས། །སྙིང་པོའི་སྔགས་དེ་གཅིག་བརྗོད་པས། །རབ་གནས་ཞེས་བྱ་བྱིན་བརླབ་བོ། །དེ་ནས་ལག་པའི་གནས་བརྒྱད་དུ། །གནོད་སྦྱིན་བརྒྱད་ནི་བསམ་པར་བྱ། །མཐེབ་མཛུབ་བར་ནི་སྐྱོར་གང་ངོ༌། །དབུས་སུ་སྙིང་པོའི་ཡི་གེའོ། །དེ་ནས་མདུན་དུ་སྣོད་བཞག་སྟེ། །དེར་ཡང་སྔར་བཞིན་ལྷ་སོགས་བསྒོམ། །དེ་ནས་སྙིང་པོའི་སྔགས་བརྗོད་དེ། །སྐྱོར་བས་ཆུ་ནི་ཁ་རུ་བཏུང༌། །དེ་ནས་ཁ་ནས་ཁྱོར་བར་བླུག །ཉེ་སྙིང་བརྗོད་དེ་ཞལ་དུ་དབུལ། །མདུན་དུ་ཡེ་ཤེས་བསྟིམ་པ་དང༌། །གཤེགས་གསོལ་ལ་སོགས་མི་གསུང་ངོ༌། །དེ་ནས་སྦྱིན་པར་མི་བྱེད་ན། །རྡོ་རྗེ་ཧཱུྃ་མཛད་ང་རྒྱལ་གྱིས། །ལུགས་སྐུ་དུག་སོགས་བསྲེས་པས་བྱུག །ད་དུ་ར་ནི་ཟ་འབྲས་ཟེར། །དེ་རྣམས་བསྐམས་པར་གྱུར་པ་དང༌། །དུར་ཁྲོད་མེ་ལ་ཁྲོས་པས་བསྲེག །དེ་ཡིས་ངེས་པར་འགྲུབ་པར་འགྱུར། །གནད་ལ་དབབ་པ་དེ་ཉིད་ཡིན་གསུང༌། །རྫོགས་སོ།། །།རྒྱ་ནག་པོའི་རིམ་པའི་སྒྲོལ་མའི་སྒྲུབ་ཐབས་ནི། སྐུ་ནི་རལ་གཅིག་མ་རུ་བྱུང༌། །ནཻ་པ་ལ་ཡི་ཡུལ་ན་ནི། །བྱིན་རླབས་ཅན་གྱི་སྐུ་བཞུགས་གསུངས། །ཀླད་དོན་ཕྱག་དང་དམ་བཅའ་ནི། །གཡོན་བརྐྱང་སོགས་ཡིན་མཆོག་ནི་ཀླུ། །ཝ་རུ་ཎ་སྦྲུལ་དཀར་པོས་སྐྲ་གྱེན་དུ་བཅིངས་པའོ། །གནས་ཀྱི་ཚོགས་ནི་རྟགས་གཅིག་ཅེས་པས་མུ་སྟེགས་ཀྱི་ལྷ་རྟེན་བཙུགས་པའི་གནས་སོ། །སྒྲུབ་པ་པོས་སྤྱི་བོར་ཧྲཱིཿ མགྲིན་པར་ཏྲཱྃ། སྙིང་གར་ཧཱུྃ་དཀར་པོ་དམར་པོ་ནག་པོ་རིམ་པ་བཞིན་ནོ། །དེའི་འོད་ཀྱིས་སྲིད་གསུམ་རྣམས་ཧཱུྃ་གི་ནཱ་དའི་རིམ་གྱིས་ཐིམ་པས་སྟོང་པར་བསྒོམས་པས་སྔགས་ཀྱིས་བརྟན་པར་བྱའོ། །དེ་ནས་བར་སྣང་ལ་པད་ཟླའི་སྟེང་དུ་པྃ་ལས་ཐོད་པ། དེ་ནས་རྃ་ལས་ཉི་མའི་སྟེང་དུ་ཧཱུྃ་ལས་གྲི་གུག་ཧཱུྃ་གིས་མཚན་པ། དེའི་སྤྲོས་བསྡུས་ཏཱ་རཱར་བསྒོམ་མོ། །མི་མགོ་ལྔ་བཅུ་དང་སྤྱི་གཙུག་གི་རྩ་ལ་སོགས་པ་ཕྱག་རྒྱ་ལྔས་བརྒྱན་པ། མི་བསྐྱོད་པ་རང་ཆས་སུའོ། །དེའི་སྙིང་གར་པད་ཟླ་ལ་ཡི་གེ་གསུམ་དང་ཕཊ་བལྟས་ལ་དེ་ལས་འོད་འཕྲོས་པས་རང་གཞིན་གྱི་མི་ཤེས་པའི་མུན་པ་བསྲེགས་པར་བསམ་མོ། །བཟླས་པ་བྱེད་ན་ཕྱག་མཚན་རལ་གྲིའི་གནས་སུ་མི་རུས་ཀྱི་ཕྲེང་བ་བལྟས་ལ། སྙིང་གར་པད་ཟླ་ལ་ཨོཾ་ཧྲཱིཿཏྲཱྃ་ཧཱུྃ་ཕཊ་ཅེས་པ་བཀོད་ལ་སྤྲོ་བསྡུ་བྱ་ཞིང་བཟླས་སོ། །སྒྲོལ་མའི་རྟོག་པའི་རྗེས་སུ་འབྲངས་ཏེ་སྔགས་བཏུ་བ་ནི། སའི་ཕར་ཕྱོགས་ཏེ་ཧའོ། །དབྱངས་ཡིག་བཞི་ལ་ཨཱི། ཨ་སྲོག་ལ་བྱིན། གུ་གུ་ལ་བྱིན་ཞོན་པར་ཧྲཱི། དེ་ལ་ཟླ་ཚེས་ཐིག་ལེ་དང་ལྡན་པའོ། །ཏཱྃ་བཞི་པས་བརྒྱན་པ་ནི་ཏཱྃ་རིང་པོའོ། །གྲངས་འབུམ་ཕྲག་བརྒྱད་འགྱུར་དུའོ། །རྐང་པ་ལྔས་ཕན་ཡོན་བསྟན་ཏོ། །ནཻ་པ་ལའི་ཡུལ་དུ་ཀུ་ས་ལིས་ལོ་གཅིག་བསྒོམས་པས་གྲུབ་པའོ། །ཨི་ཐི།། །།རྡོ་རྗེ་སྒྲོལ་མའི་སྒྲུབ་ཐབས་ནི། བཤད་པར་དམ་བཅའ་བ་ལ། ཐུན་མོང་དང་ཐུན་མོང་མ་ཡིན་པའི་དངོས་གྲུབ་སྟེར་བས་འདོད་པའི་དོན་ཀུན་འགྲུབ་ཅེས་སོ། །དེ་ནས་ཞེས་པ་རྡོ་རྗེ་གུར་ལས་གོང་དུ་རྟོག་པ་བཞི་བསྟན་ནས། དེ་ནས་སྒྲོལ་མའི་རྟོག་པ་སྟོན་ཞེས་བྱ་བའི་ཚིག་གོ །འོག་ནས་འབྱུང་བའི་ལས་ཚོགས་ལ་བརྗོད་པའི་གཞུང་དང་པོར་སྟོན། སྒྲུབ་པ་པོས་སེམས་བསྐྱེད་ལ་སྙིང་གར་པད་ཟླའི་སྟེང་གི་ཏཱྃ་གི་འོད་ཀྱིས་ཚོགས་གཉིས་བསག མཆོད་པ་སྣ་ཚོགས་ཞེས་པས་ཕྱི་ནང་གསང་བའོ། །སྟོང་པའི་ངང་ལས་གཞལ་ཡས་ཁང་བསྒོམས་པའི་ལུགས་ལ། པྃ་ལས་པདྨ། ཧཱུྃ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ། དེའི་འོད་ཀྱིས་སྲུང་བའི་འཁོར་ལོ་དང༌། དེའི་དབུས་སུ་ཆོས་འབྱུང་གྲུ་གསུམ་མོ། །དེའི་དབུས་སུ་པྃ་ལས་འདབ་མ་བརྒྱད་པ། དེའི་སྟེང་དུ་ཧཱུྃ་ལས་སྐྱེས་པའི་སྣ་ཚོགས་རྡོ་རྗེ། དེའི་སྟེང་དུ་བྷྲཱུྃ་ལས་གཞལ་ཡས་ཁང་བསྐྱེད་དོ། །ཡང་ན་ཆོས་འབྱུང་དབུས་སུ་འབྱུང་བ་རིམ་བརྩེགས། དེའི་སྟེང་དུ་པད་ཉིའི་སྟེང་དུ་ཧཱུྃ། དེའི་འོད་ཀྱིས་རྣམ་སྣང་སྤྱན་དྲངས། དེ་ལ་ཐིམ། གྱུར་པ་ལས་རྣམ་སྣང་ཞལ་གསུམ་ཕྱག་དྲུག་པ། དབུས་དཀར། གཡས་དམར། གཡོན་སྔོ་བའོ། །གཡས་འཁོར་ལོ་དང་རལ་གྲི། གཡོན་རཏྣ་དང་པདྨ། འོག་མ་གཉིས་ཀྱིས་ཡུམ་དེ་དང་འདྲ་བ་ལ་འཁྱུད་པའོ། །ཡབ་ཡུམ་སྙོམས་འཇུག་བྱས་པ་ཞུ་བ་དང་འབྱུང་བ་རིམ་བརྩེགས་ཀུན་གྱུར་པ་ལས་གཞལ་ཡས་ཁང་བསྐྱེད་དོ། །གཞལ་ཡས་ཁང་མི་བསྒོམ་པ་ནི་གཞུང་དུ་ཤེས་པར་བྱའོ། །དེའི་དབུས་སུ་པད་ཟླ་ལ་ཏཱྃ། དེའི་འོད་ཀྱི་སྒྲོལ་མ་སྤྱན་དྲངས་ཐིམ་གྱུར་པ་ལས་བསྐྱེད་དོ། །རིགས་ལྔས་དབུར་བརྒྱན་པ་སྤྱི་བོར་མི་བསྐྱོད་པའོ། །ཤར་ཕྱོགས་མདུན་གྱི་འདབ་མར་ཨོཾ་ལས་འོད་འཕྲོས་ཏེ་མེ་ཏོག་མ་སྤྱན་དྲངས་ཐིམ་པ་དེ་གྱུར་པ་ལས་མེ་ཏོག་མ་བསྐྱེད་དོ། །གཡས་མེ་ཏོག་ཕྲེང་བ་གཡོན་པ་ཐུགས་ཀར་སྡིགས་མཛུབ་མཛད་པ། ལྷ་མོ་གཞན་གྱི་གཡས་གཡོན་ཡང་དེ་བཞིན་དུའོ། །ལྷོའི་ལ་ཏཱྃ་ལས་བདུག་སྤོས་མ། ནུབ་ཀྱི་ལ་རེ་ལས་མར་མེ་སྒྲོལ་མ། བྱང་དུ་ཏུཏ་ལས་དྲིའི་སྒྲོལ་མ། མཚམས་ཀྱི་འདབ་མ་ལ་ཤར་ལྷོར་འཁོར་ལོ། ལྷོ་ནུབ་ཏུ་རཏྣ། ནུབ་བྱང་དུ་པདྨ། བྱང་ཤར་དུ་རལ་གྲིའོ། །ཕྱིའི་འཕར་མའི་ཤར་གྱི་སྒོར་ཏཱྃ་ལས་རྡོ་རྗེ་ལྕགས་ཀྱུ་མ་གཡས་ལྕགས་ཀྱུའི་ཡུ་བ་རྡོ་རྗེས་བྱས་པ་འཛིན་པ། ལྷོ་སྒོར་རེ་ལས་རྡོ་རྗེ་ཞགས་པ་མ། ནུབ་སྒོར་ཏུཏ་ལས་རྡོ་རྗེ་ལྕགས་སྒྲོག་མ། བྱང་སྒོར་རེ་ལས་རྡོ་རྗེ་དྲིལ་བུ་མའོ། །ཕྱིའི་འཕར་མའི་མཚམས་སུ་གཡས་སྐོར་དུ་དུང་དང་རི་རབ་དང་མེ་ཐབ་དང་རྒྱལ་མཚན་ནོ། །སྟེང་དུ་ལྷ་མོ་མཁའ་སྤྱོད་མ་ནུབ་སྒོའི་ཕྱི་རོལ་དུའོ། །པྲ་ལས་གཙུག་ཏོར་རྣམ་རྒྱལ་མ་རྒྱལ་མཚན་འཁོར་ལོ་སྔགས་པས་བསྒོམ། འོག་གི་ལྷ་མོ་ས་སྤྱོད་ཏཱ་ལས་ཤར་སྒོའི་ཕྱི་རོལ་འོག་ཏུའོ། །ཕར་ཕྱིན་བཅུ་དག་པས་ལྷ་མོ་བཅུའོ། །དེ་ནས་གཙོ་བོའི་མིག་ལ་སོགས་པའི་གནས་དྲུག་ཏུ་ལྷ་མོ་ནག་མོ་གཡས་གྲི་གུག གཡོན་ཐོད་པ། གྲུ་མོ་ན་ཁ་ཊྭཱཾ་ག་བཟུང་བ་སྐད་ཅིག་གིས་བསམས་ལ་སྐྱེ་མཆེད་བྱིན་གྱིས་བརླབས་པའོ། །དེ་ནས་སྤྱི་བོར་དཀར་མོ། །མགྲིན་པར་དམར་མོ། །སྙིང་གར་སྔོན་མོ་ཕྱག་མཚན་སྔར་དང་འདྲ་བས་སྐུ་སོགས་བྱིན་གྱིས་བརླབས་པའོ། །དེ་ནས་ཏཱྃ་གི་འོད་ཀྱིས་ཡེ་ཤེས་འཁོར་ལོ་གཞུག རིགས་བདག་སྤྱན་དྲངས་ལ། གསོལ་བ་གདབ་པས་དབང་བསྐུར་ལ། རིགས་ལྔས་གཙོ་མོའི་དབུར་བརྒྱན་ནོ། །མར་མེ་མ་ལ་སོགས་པ་བཞི་ལ་གཡས་སྐོར་དུ་རྣམ་སྣང་དང་རིན་འབྱུང་དང་འོད་དཔག་མེད་དང་དོན་ཡོད་གྲུབ་པའོ། །སྒོ་མ་བཞི་ཡང་དེ་བཞིན་ནོ། །སྟེང་གི་ལ་སྣང་མཐའ། འོག་གི་ལ་རྣམ་སྣང་ངོ༌། །ཐིག་ལེ་ཞེས་བྱ་བ་སྣ་རྩེ་རུ། །ཐིག་ལེ་ཡུངས་ཀར་འབྲུ་ཙམ་གྱི། །གཞལ་ཡས་ཁང་དུ་ལྷ་ཚོགས་བསྒོམ། །སེམས་བཟུང་བ་ཡིན་མན་ངག་ཡིན། །ཕྲ་མོ་ཞེས་པ་གཙོ་མོ་ནི། །པདྨའི་ཟེ་འབྲུའི་གཙོ་མོ་ལ། །སྔ་མ་བཞིན་དུ་བལྟ་བར་བྱ། །དེ་ནས་ལྷ་རྣམས་རང་རང་གི །ཐུགས་ཀར་ས་བོན་ཡི་གེ་བལྟ། །དེ་ལ་དམིགས་ཏེ་བཟླས་པ་བྱ། །མཐའ་རུ་མི་དམིགས་བསྒོམ་པ་སོགས། །སོགས་ཀྱི་ཁོངས་སུ་བསྡུ་བར་བྱ། །ཚིགས་སུ་བཅད་པ་གཅིག་གིས་ནི། །ཆེ་བའི་ཡོན་ཏན་འཁྲུངས་བཅས་བསྟན། །ལས་ཁ་ཚར་ལ་ལྷ་ཚོགས་ཐམས་ཅད་དམ། གཙོ་བོའི་རྣལ་འབྱོར་དུ་བྱ་སྟེ། ཐུབ་ལ་ཏཱྃ་བསམས་ལ། དེའི་འོད་ཀྱིས་གནོད་བྱེད་བཀུག་ལ། དབུགས་གཅིག་ལ་སྙིང་པོའི་སྔགས་བདུན་བཟླས་ལ་མདུད་པ་གསུམ་དོར། དབུགས་མ་ཤོར་བར་བྱ། གནོད་བྱེད་བཅིང་བའི་ཐབས་སོ། །འགའ་ཞིག་དབང་དུ་བྱེད་པར་འདོད་ན་སེམས་བསྐྱེད་ལ་མཎྜལ་དཀར་པོར་བྲིས་ལ་བུད་ཤིང་བརྩིགས། མེ་སྦར་ལ་འོག་གི་སྔགས་བཟླས་ལ་ཨུཏྤ་ལ་བསྲེག་གོ །མཎྜལ་ལ་སོགས་མི་དགོས་ཏེ་འོག་མ་རྣམས་ལ་ཡང་ཤེས་པར་བྱའོ། །ཨ་མུ་ཀཾ་ཆེ་གེ་མོའི་ཁང་རྩར་སྦས་ན་ཞེས་པ་སྒོ་ལྟག་ལ་གདགས་སོ། །དེའི་སྔགས་འོག་མའོ། །ད་ནི་བསྐྲད་པའི་ལས་ལ། གཞན་དག་དབང་དུ་བྱེད་པ་ནི། མྱོས་བྱེད་ཅེས་པ་ཤིང་འབྲས་དམར་པོ་ཅན་ཡོད་པ། གཏུམ་པོའི་ས་བོན་ཟ་འབྲས་སྐེ་ཚེའོ། །སྨྱོ་བྱེད་ད་དུ་ར་ཞག་བདུན་དུ་སྟོང་ཕྲག་ལྔ་ལྔ་བསྲེག་གོ །གང་འདོད་པའི་བུ་མོ་འཐོབ་བོ། །དེ་འོག་གིས་ལས་དེ་སླ། གཞན་ཡང་དབང་གི་ལས་ནི་རས་གཙང་མ་རང་བྱུང་གིས་བྱུགས་ཏེ་ལྷ་བཟོ་དམ་ཚིག་དང་ལྡན་པས་སྒྲོལ་མའི་སྐུ་བྲིས་ཏེ་ཁྲུས་བྱས། སྟོང་པར་བསྒོམས་ལ་པད་ཟླ་ལ་ཏཱྃ་ལས་བྱུང་བའི་ལྷ་མོ་བསྐྱེད་དེ། ཡེ་ཤེས་བཀུག་དབང་བསྐུར་རྒྱས་བཏབ་ལ། དེ་ནས་མཆོད་བསྟོད་ལ་སོགས་བྱས་ལ་དེ་བཀྲམ་ལ་བསྒོམ་བཟླས་བྱ། ལས་སྦྱོར་ལ་སྔགས་བཟླས་ཤིང་ཞགས་པས་སྐེ་ནས་བཟུང༌། ཆོས་འབྱུང་ནང་དུ་བཀུག་ལ་གོང་མའི་གཟུངས་རིང་བདུན་བཟླས་ནས། སྲིན་ལག་གཉིས་ལ་མཆིལ་མས་བསྐུས་ལ་རང་གི་མིག་ལ་བྱུག ཡང་ན་སོ་སོར་བཀུག་སྟེ་གང་གི་མིག་ལ་བྱུགས་པ་དེ་གྲོལ་བར་འབྱུང་ངོ༌། །སྔ་མ་ལ་ཡང་མགོ་ཡོད་པའི་སྦྲུལ་གྱི་རྒྱལ་པོའི་མགོ་གཉིས་པ་ཁམ་ཕོར་སྲབ་པའི་ནང་དུ་བཅུག་སྟེ་བསྲེགས་པའི་ཐལ་བ་དང་བ་དམར་མོའི་མར་དང་བསྲེས་ནས་ཨརྒ་ཞེས་པ་རྒྱབ་སྐྱའི་ཤིང༌། རྡོ་རྗེ་ཉི་མ་རང་བྱུང༌། རྡོ་རྗེ་ཆོས་རང་གི་བྱང་སེམས། རྟ་མཆོག་ཤ་ཆེན། པདྨ་གར་དབང་ས་བོན། ལྟོ་བའི་སྲིན་བུ་ཆུང་ངུ་ལ་གཟུངས་རིང་ལན་བདུན་བཟླས་ནས་བྱང་སེམས་དང་པོ་རྩི་དང་གོ་ལ་ལ་སོགས་པ་སྦྱར་ནས་བྱིན་ན་དབང་དུ་འགྱུར་རོ། །ཞག་ཆེན་མིའི་ཡིན་ལ་གཟུངས་རིང་ཁྲི་ཚོ་རེ་བཟླས་ནས་དྲིལ་ཕྱིས་བསྡུས་ཏེ་ཁུར་བ་བྱས་ཏེ་བྱིན་ན་དབང་དུ་འགྱུར་རོ། །སྔོན་དུ་བསྙེན་པ་བྱས་ལ་ཟླ་བ་གཟས་པའི་དུས་སུ་གཟུངས་རིང་བཟླས་ཤིང་སྙོམས་འཇུག་བྱ། དེ་ལས་བྱུང་བའི་སྤྱན་རས་གཟིགས་བྱང་སེམས་ཡིན་ཏེ་གཞན་གོ་སླའོ། །ཨི་ཐི།། །།གཤིན་རྗེ་དམར་པོའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ་སྙིང་གར་པད་ཉིའི་སྟེང་དུ་ཧཱུྃ་གི་འོད་ཀྱི་ཚོགས་གཉིས་བསག་པར་བྱའོ། །སྟོང་པའི་ངང་ལས་པད་ཉིའི་སྟེང་དུ་ཧཱུྃ་ལས་དབྱུག་པ་ཧཱུྃ་གིས་མཚན་པ་དེའི་འོད་ཀྱིས་སྤྱན་དྲངས་ཐིམ། གྱུར་པ་ལས་བཅོམ་ལྡན་འདས་སུ་བསྐྱེད་དོ། །སྐུ་ལ་སྦྲུལ་བརྒྱད་ཀྱིས་བརྒྱན་པ། མི་བསྐྱོད་པ་རང་ཆས་སུའོ། །ཡུམ་ཡང་བཅོམ་ལྡན་འདས་དང་འདྲ་བ་བདེ་བས་མྱོས་ཤིང་ས་བོན་འཛག་པ་སྙིང་གར་པད་ཉི་ལ་དབྱུག་པ་བསྒོམས་པའི་ཡེ་ཤེས་སེམས་དཔའོ། །དྷ་བཻའི་བཞེད་པ་ཡང་ངོ༌། །རྡོ་རྗེ་དང་པདྨ་བྱིན་གྱིས་བརླབས་ཏེ་སྔགས་དེས་སྙོམས་པར་འཇུག་པར་བྱའོ། །ལྟེ་བའི་འོག་ཏུ་པད་སྟེང་དུ་ཧྲཱིཿདམར་པོ་བསམ་མོ། །སྐྱོ་ན་བསྐོར་བའི་བཟླས་པ་བྱ། གོང་མ་སྙིང་པོ། །འོག་མ་ཉེ་སྙིང་ངོ༌། །དེ་གང་རུང་བཟླས་སོ།། །།གཙུག་ཏོར་རྣམ་པར་རྒྱལ་མའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ། སྙིང་གར་པད་ཟླའི་སྟེང་དུ་ཧཱུྃ་གི་འོད་ཀྱིས་ཚོགས་གཉིས་བསག་པར་བྱའོ། །སྟོང་པའི་ངང་ལས་པད་ཟླ་ལ་བྷྲཱུཾ་དེའི་སྤྲོ་བསྡུ་ལས་བསྐྱེད་དོ། །པདྨ་ལ་སངས་རྒྱས་ནི་གཡས་ཀྱི་གཉིས་པ་ནའོ། །མཆོད་རྟེན་གཞལ་ཡས་ཁང་རང་ཆས་སུའོ། །བཻ་དྷའི་བཞེད་པ་ཡང་ངོ༌། །སྐྱོ་ན་སྙིང་གར་པད་ཟླ་ལ། །ཡི་གེ་བཞི་བཟླས་བཟླས་པ་བྱ། །ལྡང་ན་སྒྱུ་མ་ལ་སོགས་བསྒོམ། །ཨི་ཐི།། །།སོ་སོར་འབྲང་མའི་སྒྱུར་ཐབས་ལ། སྒྲུབ་པ་པོས་སེམས་བསྐྱེད་ལ། སྙིང་གར་པད་ཟླ་ལ་པྲྃ་དེའི་འོད་ཀྱིས་ཚོགས་གཉིས་བསག་གོ །སྟོང་པའི་ངང་ལས་པད་ཟླ་ལ་པྲྃ་སེར་པོ་དེའི་འོད་ཀྱི་སྤྲོ་བསྡུས་ལས་བཅོམ་ལྡན་འདས་མ་བསྐྱེད་དོ། །གཡས་བསྐུམ་གཡོན་བརྐྱང་དུ་བཞུགས་པའི་སྤྱི་བོ་ལ་སོགས་པའི་གནས་གསུམ་དུ་པད་ཟླ་ལ་ཡི་གེ་གསུམ་བཀོད་ལ་བྱིན་གྱིས་བརླབ་པར་བྱའོ། །ནུ་མར་པད་ཟླ་ལ་པྲྃ་བསམ་ཡེ་ཤེས་སེམས་དཔའོ། །དེ་ལས་སྤྲོས་པའི་ལྷ་མོས་མཆོད་པ་དང༌། སྤྲོ་བསྡུ་མི་སྐྱོའི་བར་དུ་བྱའོ། །དྷ་བཻའི་སྐྱོ་ན་བསྐོར་བའི་བཟླས་པ་བྱ། །ཨི་ཐི།། །།རྨ་བྱ་ཆེན་མོའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ། སྙིང་གར་པད་ཟླའི་སྟེང་དུ་མཱྃ་དེའི་འོད་ཀྱིས་རྟེན་སྤྱན་དྲངས་ལ་མཆོད་དོ། །བསོད་ནམས་ཀྱི་རྗེས་ལ་ཚད་མེད་བཞི་བསྒོམས་ལ་སྤྲོ་བསྡུ་བྱའོ། །སྟོང་པའི་ངང་ལས་པད་ཟླ་ལ་མཱྃ། དེའི་འོད་ཀྱི་སྤྲོ་བསྡུ་ལས་རྨ་བྱ་ཆེན་མོ་བསྐྱེད་དོ། །འགྱོང་པར་བཀན་ཞེས་པ་མཉམ་པར་བཞག་པས་བུམ་པའོ། །དོན་གྲུབ་རང་ཆས་སུའོ། །ཡང་ན་དྷ་བཻའི་བཞེད་པ་ཡང་ངོ༌། །གནས་བཞིར་པད་ཟླ་ལ་ཡི་གེ་བཞི་བསྒོམས་ལ་སྤྲོ་བསྡུ་བྱའོ། །སྐྱོ་ན་བསྐོར་བའི་བཟླས་པ་བྱའོ། །ཨི་ཐི།། །།སྟོང་ཆེན་མོའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད། སྙིང་གར་པད་ཟླ་ལ་བྷྲཱུྃ་གྱི་འོད་ཀྱིས་ཚོགས་གཉིས་བསག སྟོང་པའི་ངང་ལས་ཆུ་ལས་ཉ་འཕར་བའི་ཚུལ་དུ་བསྐྱེད་ལ། རིགས་བདག་རྣམ་སྣང་རང་ཆས་སུའོ། །ཡང་ན་སྟོང་པའི་ངང་ལས་པད་ཟླ་ལ་བྷྲཱུྃ་གྱི་སྤྲོ་བསྡུ་ལས་བསྐྱེད་དོ། །བཟླས་པ་ནི་སྙིང་གར་པད་ཟླ་ལ་ཨོཾ་བྷྲཱུྃ་སྭཱ་ཧཱ་ཞེས་བཀོད་ལ་བཟླས་སོ། །མི་དམིགས་པར་བྱ་བ་ལ་སོགས་པ་ཐམས་ཅད་ལ་མཚུངས་སོ། །ཨི་ཐི།། །།གསང་སྔགས་རྗེས་སུ་འཛིན་མའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ། ཚོགས་གཉིས་བསག་གོ །ཡང་ན་གཞུང་ལྟར་བྱ་མི་དགོས་སོ། །སྟོང་པའི་ངང་ལས་སྐད་ཅིག་གིས་བསྐྱེད་དོ། །མི་བསྐྱོད་པ་རང་ཆས་སུའོ། །དྷ་དང་བཻའི་བཞེད་པ་ཡང་བལྟའོ། །སྐྱོ་ན་སྙིང་གར་པད་ཉི་ལ་ཨོཾ་ཧཱུྃ་སྭཱ་ཧཱ་ཞེས་བཀོད་ལ་བཟླས་སོ། །ཨི་ཐི།། །།བསིལ་བའི་ཚལ་ཆེན་མོའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ་སྙིང་གར་པད་ཉིའི་སྟེང་དུ་ཛཱིཾ་ལས་དེའི་འོད་ཀྱིས་ཚོགས་གཉིས་བསག སྟོང་པའི་ངང་ལས་སྐད་ཅིག་ལས་བསྐྱེད་དོ། །ཡང་ན་སྟོང་པའི་ངང་ལས་པད་ཉིའི་སྟེང་དུ་ཛཱིཾ་གི་སྤྲོ་བསྡུ་ལས་བསྐྱེད་དོ། །སྣང་བ་མཐའ་ཡས་རང་ཆས་སུའོ། །དྷ་དང་བཻའི་བཞེད་པའོ། །སྐྱོ་ན་སྙིང་གར་པད་ཉི་ལ་ཨོཾ་ཛཱིཾ་བ་སྭཱ་ཧཱ་ཞེས་བརྗོད་ལ་བཟླའོ། །ཨི་ཐི།། །།ཕྱིར་བཟློག་མའི་སྒྲུབ་ཐབས་ནི། སྒྲུབ་པ་པོས་སེམས་བསྐྱེད་ལ། སྙིང་གར་ས་བོན་གྱི་འོད་ཀྱིས་ཚོགས་གཉིས་བསག་གོ །སྐད་ཅིག་གིས་སམ་ས་བོན་ལས་སྔར་བཞིན་ནོ། །གདན་པད་ཉིའོ། །མི་བསྐྱོད་པ་རང་ཆས་སུའོ། །སྐྱོ་ན་སྙིང་གར་པད་ཉི་ལ་ཨོཾ་ཧཱུྃ་སྭཱ་ཧཱ། ཞེས་བཀོད་ལ་བཟླས་སོ། །ཨི་ཐི།། །།རྒྱལ་མཚན་རྩེ་མོའི་དཔུང་རྒྱན་གྱི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ་ཚོགས་གཉིས་བསག་གོ །སྟོང་པའི་ངང་ལས་སྐད་ཅིག་གམ། ཡང་ན་ས་བོན་གྱི་སྤྲོ་བསྡུ་ལས་བསྐྱེད་དོ། །མི་བསྐྱོད་པ་རང་ཆས་སུའོ། །སྐྱོ་ན་སྙིང་གར་པད་ཉི་ལ་ཨོཾ་ཧཱུྃ་སྭཱ་ཧཱ། བཀོད་ལ་བཟླའོ། །ངྷ་བཻའི་བཞེད་པའོ། །ཨི་ཐི།། །།རྣམ་པར་རྒྱལ་མའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ་སྔར་བཞིན་ཚོགས་གཉིས་བསགས་ལ། ཨྃ་ལས་སྤྲོ་བསྡུ་བྱས་པའམ། ཡང་ན་སྐད་ཅིག་གིས་བསྐྱེད་དོ། །གདན་པད་ཉི་ལ་ཚོགས་བདག་གླང་སྣ་མཉམ་པར་མནན་པའོ། །རྣམ་སྣང་དབུ་ལ་རང་ཆས་སུ། སྐྱོ་ན་སྙིང་གར་པད་ཉི་ལ་ཨོཾ་ཨྃ་སྭཱ་ཧཱ། ཞེས་པ་བཀོད་ལ་བཟླས་སོ། །ཨི་ཐི།། །།རྡོ་རྗེ་གནྡྷཱ་རིའི་སྒྲུབ་ཐབས་ལ། སྒྲུབ་པ་པོས་སྔར་བཞིན་ཚོགས་གཉིས་བསགས་ལ། སྟོང་པའི་ངང་ལས་སྐད་ཅིག་གིས་སམ། ཡང་ན་ཙྃ་ལས་སྤྲོ་བསྡུ་བྱས་པ་ལས་བསྐྱེད་དོ། །མི་བསྐྱོད་དབུ་ལ་རང་ཆས་སུ་བལྟ། དྷ་དང་བཻའི་བཞེད་པ་ཡང་ངོ༌། །སྐྱོ་ན་སྙིང་གར་ཨོཾ་ཙ་སྭཱ་ཧཱ། བཀོད་ལ་བཟླས་སོ། །འདིའི་གཟུངས་ཆོག་བྱས་ན་མི་ནད་ཕྱུགས་ནད་ཞི་བར་འགྱུར་རོ། །ཨི་ཐི།། །།ཁྲོ་བོ་སྟོབས་པོ་ཆེའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ་ཚོགས་གཉིས་བསག་གོ །སྟོང་པའི་ངང་ལས་པད་ཉི་ལ་ཧཱུྃ་གི་སྤྲོ་བསྡུ་ལས་བསྐྱེད་དོ། །སྐྲ་གྱེན་དུ་འགྲེང་བ་ལ་སྦྲུལ་གྱིས་བཅིངས་པའོ། །འོད་དཔག་མེད་རང་ཆས་སམ། དྷ་དང་བཻའི་བཞེད་པའོ། །སྐྱོ་ན་སྔགས་ཀྱི་བཟླས་པ་བྱའོ། །ཨི་ཐི།། །།གདུགས་དཀར་མོའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ་ཚོགས་གཉིས་བསགས། ལུས་སྒྱུ་མ་ཙམ་གྱི་སྙིང་གར་པད་ཟླ་ལ་ཨོཾ་ལས་འོད་སྤྲོ་བསྡུ་བྱས་པ་ལས་བསྐྱེད་དོ། །ཡེ་ཤེས་འཁོར་ལོ་དགུག་གཞུག་དང་དབང་བསྐུར་ལ་རིགས་ཀྱི་བདག་པོ་རྣམ་སྣང་གིས་དབུར་བརྒྱན་པའོ། །ཡང་ན་རང་ཆས་སོ། །དེ་ནས་ཕྱག་རྒྱ་བཅིངས་ལ་སྙིང་གར་བསྐོར་བའི་བཟླས་པ་བྱ། །ཨི་ཐི།། །།རྟ་མགྲིན་གྱི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ། ཚོགས་གཉིས་བསགས་ཏེ། སྟོང་པའི་ངང་ལས་པད་ཉི་ལ་ཧཱུྃ་དམར་པོ་དེའི་འོད་ཀྱི་སྤྲོ་བསྡུ་ལས་བསྐྱེད་པའམ། ཡེ་ཤེས་ལས་ཡོངས་སུ་རྫོགས་ཞེས་པ་སྤྲོ་བསྡུ་ལས་བསྐྱེད་པ། ཡང་ན་སེམས་ཀྱི་སྣང་བ་ཙམ་བྱེད་པའི་ཕྱག་རྒྱ་བཞི་པ་འདི་གྱིས་བྱ་བའི་བརྡའོ། །མི་བསྐྱོད་པ་རང་ཆས་སུའོ། །དྷ་དང་བཻའི་བཞེད་པ་བལྟ། དེ་བསྐྱེད་པ་ལ་ཏིང་འཛིན་ཞེས་མིང་བསྟན། སྐྱོ་ན་བསྐོར་ལ་བཟླས་པ་བྱའོ། །ཨི་ཐི།། །།ཧེ་རུ་ཀ་ཞལ་གཅིག་ཕྱག་གཉིས་པའི་སྒྲུབ་ཐབས་ལ། དུར་ཁྲོད་ལ་སོགས་པའི་གནས་སུ། སྒྲུབ་པ་པོས་དམ་ཚིག་གི་རི་ལུ་བསྟེན་ལ། སེམས་བསྐྱེད་དེ། སྙིང་གར་པད་ཉིའི་སྟེང་དུ་ཧཱུྃ་གི་འོད་ཀྱིས་ཚོགས་གཉིས་བསག་གོ །སྟོང་པའི་ངང་ལས་ཧཱུྃ་དང་དུར་ཁྲོད་ཀྱིས་བརྒྱན་པར་སྐད་ཅིག་གིས་རྫོགས་པར་བསམ། ཡང་ན་ཨཱ་ལི་ལས་ཟླ་བ་དང༌། ཀཱ་ལི་ཉིས་འགྱུར་ལས་ཉི་མ་ཐབས་ཤེས་རབ་ཀྱི་རང་བཞིན། བར་དུ་ཧཱུྃ་ལས་རྡོ་རྗེ་རྩེ་ལྔ་པ་ཧཱུྃ་གིས་མཚན་པ་དེའི་སྤྲོ་བསྡུ་ལས་བསྐྱེད་དོ། །ཕྱག་རྒྱ་དྲུག་གིས་བརྒྱན་པ་གཡོན་པ་ཁ་ཊྭཱྃ་ག་གྲུ་མོ་ལའོ། །ཡེ་ཤེས་དགུག་གཞུག་དབང་བསྐུར། དྷ་དང་བཻའི་བཞེད་པའོ། །ཡང་ན་མི་བསྐྱོད་པར་རང་ཆས་སུའོ། །སྐྱོ་ན་བསྐོར་བའི་བཟླས་པ་བྱ། །དགྱེས་པ་རྡོ་རྗེའི་གདམས་ངག་ཡིན། །ཨི་ཐི།། །།བདག་མེད་མའི་སྒྲུབ་ཐབས་ནི། ནང་གི་སྒྲུབ་ཐབས་ཡིན་པས། སྒྲུབ་པ་པོའི་གནས་ལ་སོགས་པ་དོན་བསྟན་ཏོ། །སྒྲུབ་པ་པོས་སེམས་བསྐྱེད་ལ་ཚོགས་གཉིས་བསག་གོ །སྟོང་པའི་ངང་ལས་པད་ཟླའི་སྟེང་དུ་ཨྃ་གྱུར་པ་ལས་གྲི་གུག་ཨྃ་གིས་མཚན་པ་དེའི་སྤྲོ་བསྡུ་ལས་བསྐྱེད་དོ། །མི་བསྐྱོད་པ་དབུ་ལ་རང་ཆས་སོ། །གནས་གསུམ་པད་ཟླ་ལ་ཡི་གེ་གསུམ་དགོད་དོ། །བཻ་དྷའི་བཞེད་པའོ། །སྐྱོ་ན་བསྐོར་བའི་བཟླས་པ་བྱ། །ཨི་ཐི།། །།བདག་མེད་མའི་སྒྲུབ་ཐབས་ལ། བསོད་ནམས་ཀྱི་ཚོགས་བསག་མི་དགོས། སེམས་བསྐྱེད་ལ་བྱམས་པ་དང་སྙིང་རྗེ་བསྒོམ། དེ་ནས་སྟོང་པའི་ངང་ལས་ནམ་མཁར་པདྨའི་སྟེང་དུ་ཨ་ཟླའི་དཀྱིལ་འཁོར་ལ། ཨྃ་ལས་གྲི་གུག་འཆང་ཟུང་ལ་ཨྃ། དེའི་འོད་ཀྱིས་གཽ་རཱི་ལ་སོགས་པའི་ལྷ་མོ་བརྒྱད་སྤྲོས་ལ་སེམས་ཅན་ཐམས་ཅད་ཀྱི་དོན་བྱས། ཚུར་འདུས་སྤྱན་དྲངས་ཨྃ་ལ་ཐིམ་པ་དེ་གྱུར་པ་ལས་བཅོམ་ལྡན་འདས་མ་བསྐྱེད་དོ། །གནས་གསུམ་དུ་པད་ཟླ་ལ་འབྲུ་གསུམ་བཀོད་ལ་བྱིན་གྱིས་བརླབ་བོ། །མི་བསྐྱོད་པ་དབུ་ལ་རང་ཆས་སོ། །དྷ་དང་བཻའི་བཞེད་པ་བལྟ། སྐྱོ་ན་སྙིང་གར་པད་ཟླ་ལ་གནས་པའི་གྲི་གུག་ས་བོན་ལ་སྔར་གྱི་ལྟར་དམིགས་ལ་བཟླས་པ་བྱ། ཨི་ཐི།། །།གསེར་མདོག་ཅན་གྱི་ཤེར་ཕྱིན་མའི་སྒྲུབ་ཐབས་ལ། སྒྲུབ་པ་པོས་སེམས་བསྐྱེད་ལ་སྙིང་གར་པད་ཉི་ལ་དྷཱིཿའི་འོད་ཀྱིས་སྤྱན་དྲངས། ཚོགས་གཉིས་བསགས། སྟོང་པའི་ངང་ལས་པྃ་ལས་པདྨ་ཨ་ལས་ཟླ་བ་ལ་དྷཱིཿལ། ཨཱ་ལི་གཡོན་སྐོར། ཀཱ་ལི་གཡས་སྐོར། གཉིས་བོར་པ་གཉིས་པོ་འདི་ཡིན་མི་གསུང༌། དེ་གྱུར་པ་ལས་པུསྟི་དྷཱིཿཡིག་གིས་མཚན་པ་སྤྲོས་བསྡུས་པ་ལས་བསྐྱེད་དོ། །པད་ཟླ་ཡི་གེ་བཞི་ཡི་བདག །དྷ་དང་བཻ་ཡི་བཞེད་པ་བལྟ། །སྐྱོ་ན་སྔགས་ཀྱི་བཟླས་པ་བྱ། ཨི་ཐི།། །།རྡོ་རྗེ་ཕག་མོའི་སྒྲུབ་ཐབས་ལ། གཅེར་བུ་ལ་སོགས་པར་མོས་པ་བྱས་ལ་སེམས་བསྐྱེད་དེ། ལྟེ་བར་བྃ་དང་ཆོས་འབྱུང་དམར་པོའི་དབུས་སུ། པདྨ་འདབ་མ་བརྒྱད་པ། དེའི་དབུས་སུ་ཡི་གེ་གཉིས་བཀོད་ལ་དེ་ལས་འོད་འཕྲོས་པས་འོད་ཕུང་དུ་གྱུར་པར་བསམ་མོ། །ཡང་འོད་ཀྱིས་སྤྱན་དྲངས། དེ་ཐིམ་པར་གྱུར་པ་ལས་བཅོམ་ལྡན་འདས་མ་བསྐྱེད་དེ། ཐོད་པ་ལྔས་དབུ་ལ་བརྒྱན་པ། སྐམ་པོ་ལྔ་བཅུས་དོ་ཤལ་བྱས་པ། དྷ་དང་བཻའི་བཞེད་པ་བལྟ། མི་བསྐྱོད་པས་དབུར་བརྒྱན་པའོ། །སྐྱོ་ན་ལྟེ་བ་ནས་ཡིག་འབྲུ་བྱུང་ཞིང༌། ཁར་ཞུགས་ལྟེ་བར་འཁོར་བ་ལྟ་བུའི་བཟླས་པ་བྱའོ། །ཡང་ན་ཧཱུྃ་ཧཱུྃ་ལ་བསྐོར་བའོ། །གོང་མ་སྙིང་པོ། འོག་མ་ཉེ་སྙིང་ངོ༌། །ཨི་ཐི།། །།རིག་བྱེད་མའི་སྒྲུབ་ཐབས་ལ། ཚོགས་གཉིས་མི་དགོས། སྒྲུབ་པ་པོས་སེམས་བསྐྱེད་ལ་ལྟེ་བར་གྲུ་གསུམ་ཆོས་འབྱུང༌། དེའི་དབུས་སུ་པདྨ་འདབ་མ་བཞི་པའི་སྟེང་དུ་ཧྲཱིཿབསམ། དེའི་འོད་ཀྱིས་སྤྱན་དྲངས། ཧྲཱིཿལ་ཐིམ་གྱུར་པ་ལས་བསྐྱེད་དེ། རོའི་སྟེང་ན་སྐྱིལ་ཀྲུང་ཕྱེད་པས་བཞུགས་པ། མི་མགོ་རློན་པ་ཉི་ཤུས་དོ་ཤལ་བྱས་པ། རུས་པའི་འཁོར་ལོ་སོགས་ཀྱིས་བརྒྱན་པའོ། །དྷ་དང་བཻའི་བཞེད་པ་བལྟ། དོན་ཡོད་གྲུབ་པའི་དབུ་རྒྱན་ཅན་ནོ། །སྐྱོ་ན་ལྟེ་བར་གྲུ་གསུམ་དང་པདྨའི་སྟེང་དུ་ཧྲཱིཿལ་བསྐོར་བ་ལ་དམིགས་ལ་བཟླས་པ་བྱའོ། །གཞན་ཡང་ཏིང་ངེ་འཛིན་འབེབས་ན། སྣ་རྩེར་སེམས་མ་ཡེངས་པར་མདུན་དུ་བཞག་ལ། སྔགས་འདིས་བཟླས་པ་འཕེལ་བར་འགྱུར་བ་ཡིན་ནོ། །རབ་གནས་ཀྱི་ཡང་སྔགས་འདི་ཡིན་ནོ། །རྫོགས་སོ།། །།བླ་མ་དམ་པ་རྣམས་ལ་ཕྱག་འཚལ་ལོ། །རྡོ་རྗེ་གདན་གྱི་སྒྲུབ་ཐབས་འདི་ལ་དོན་གསུམ་སྟེ། ཀླད་དང༌། གཞུང་དང༌། མཇུག་གོ །དང་པོ་ལ་གཉིས། མཆོད་པར་བརྗོད་པ་དང༌། བཤད་པར་དམ་བཅའ་བའོ། །གཞུང་ལ་གཉིས་ཏེ། མཎྜལ་ལ་བརྟེན་ཏེ་ཚོགས་བསགས་པ་དང༌། ནང་གི་རྣལ་འབྱོར་རོ། །འདི་ལ་གཉིས། ཚོགས་བསགས་པ་དང༌། འབྲས་བུ་ལྷའི་རྣལ་འབྱོར་རོ། །དང་པོ་ལ་གཉིས་ཏེ། བསོད་ནམས་དང༌། ཡེ་ཤེས་ཀྱི་ཚོགས་སོ། །ཀུན་རྫོབ་ཀྱི་བདེན་པ་ལ་བརྟེན་ནས་བསོད་ནམས། དོན་དམ་གྱི་བདེན་པ་ལ་བརྟེན་ནས་ཡེ་ཤེས་ཀྱིའོ། །འབྲས་བུ་ལྷའི་རྣལ་འབྱོར་ལ་དྲུག་ཏེ། དམ་ཚིག་སེམས་དཔའ་བསྐྱེད་པ་དང༌། སྐྱེ་མཆེད་བྱིན་གྱིས་བརླབ་པ་དང༌། ཡེ་ཤེས་པ་བསྒོམ་པ་དང༌། སྐུ་གསུང་ཐུགས་བྱིན་གྱིས་བརླབ་པ་དང༌། ཡེ་ཤེས་སེམས་དཔའ་བསྟིམ་པ་དང་བཟླས་པའོ།། །།བརྟན་པའི་འཁོར་ལོ་ལ་གསུམ་ཏེ། ཀླད་དང༌། གཞུང་དང༌། མཇུག་གོ །གཞུང་ལ་གཉིས་ཏེ། རྒྱུ་ཚོགས་བསགས་པ་དང༌། འབྲས་བུ་ལྷ་བསྐྱེད་པའོ། །འདི་ལ་བཞི་སྟེ། དམ་ཚིག་སེམས་དཔའ་བསྐྱེད་པ་དང༌། ཡེ་ཤེས་སེམས་དཔའ་བསྒོམ་པ་དང༌། ཏིང་ངེ་འཛིན་སེམས་དཔའ་བསྒོམ་པ་དང༌། བསྒོམས་པའི་ཕན་ཡོན་ནོ།། །།ཡང་བརྟན་འཁོར་ལ་གསུམ་སྟེ། ཀླད་དང༌། གཞུང་དང༌། མཇུག་གོ །གཞུང་ལ་གཉིས། གསང་སྔགས་རང་གིས་ལེན་པ་ཉེས་པ་ཆེ་བས་བླ་མ་བསྟེན་པར་བསྟན་པ་དང༌། སྒྲུབ་ཐབས་དངོས་སོ། །འདི་ལ་གཉིས་ཏེ། རྒྱུ་ཚོགས་བསགས་པ་དང༌། འབྲས་བུ་ལྷའི་རྣལ་འབྱོར་རོ། །དང་པོ་ལ་གསུམ་སྟེ། ཚད་མེད་པ་བསྒོམ་པ་དང༌། ཀུན་རྫོབ་ཀྱི་བདེན་པ་ལ་བརྟེན་ཏེ། བསོད་ནམས་ཀྱི་ཚོགས་བསགས་པ་དང༌། ཡེ་ཤེས་ཀྱི་ཚོགས་བསགས་པའོ། །ལྷའི་རྣལ་འབྱོར་ལ་ལྔ་སྟེ། དམ་ཚིག་པ་བསྐྱེད་པ་དང༌། ཡེ་ཤེས་པ་བསྒོམ་པ་དང༌། ཏིང་ངེ་འཛིན་སེམས་དཔའ་བསྒོམ་པ་དང༌། བཟླས་པ་དང༌། བསྒོམས་པའི་ཕན་ཡོན་ནོ།། །།ཚིག་ལྷུག་པའི་བརྟན་འཁོར་ལ་ཕན་ཡོན་གྱི་དོང་དུ་བཟླས་པ་བཅུག་པ་ཉིད་དོ།། །།ཚིག་ལྷུག་པའི་ཨ་ར་པ་ཙ་ན་ལ་གཉིས་ཏེ། གཞུང་དང༌། མཇུག་གོ །གཞུང་ལ་གཉིས། ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །དང་པོ་ལ་གཉིས་ཏེ། ཚད་མེད་བཞི་བསྒོམ་པ་དང༌། བདུན་རྣམ་དག་གོ །ལྷའི་རྣལ་འབྱོར་ལ་བཞི་སྟེ། དམ་ཚིག་པ་བསྐྱེད་པ་དང༌། ཡེ་ཤེས་པ་བསྒོམ་པ་དང༌། ཏིང་ངེ་འཛིན་སེམས་དཔའ་བསྒོམ་པ་དང༌། བཟླས་པའོ།། །།ཨ་ར་པ་ཙ་ན་ལ་གསུམ་སྟེ། ཀླད་དང༌། གཞུང་དང༌། མཇུག་གོ །གཞུང་ལ་གཉིས་ཏེ། སེམས་བསྐྱེད་སྔོན་དུ་སོང་བའི་ཡེ་ཤེས་ཀྱི་ཚོགས་བསགས་པ་དང༌། ལྷའི་རྣལ་འབྱོར་རོ། །འདི་ལ་བཞི་སྟེ། དམ་ཚིག་པ་བསྐྱེད་པ་དང༌། སེམས་དཔའ་སུམ་བརྩེགས་བསྒོམ་པ་དང༌། བཟླས་པའོ། །མཇུག་དོན་ལ་གསུམ། ཕན་ཡོན་དང༌། ཡིད་ཆེས་བསྐྱེད་པའི་ཕྱིར་བརྒྱུད་པ་བསྟན་པ་དང༌། དགེ་བའི་རྩ་བ་བསྔོ་བའོ།། །།འཇམ་དཔལ་གྱིས་བསྡུས་པའི་སྒྲུབ་ཐབས་ལ་གཉིས་ཏེ། ཀླད་དང༌། གཞུང་ངོ༌། །གཞུང་ལ་གཉིས་ཏེ། དོན་དམ་ལ་བརྟེན་ཏེ་ཡེ་ཤེས་ཀྱི་ཚོགས་བསགས་པ་དང༌། འབྲས་བུ་ལྷའི་རྣལ་འབྱོར་རོ། །དེ་ལ་གཉིས་ཏེ། དམ་ཚིག་པ་བསྐྱེད་པ་དང༌། བཟླས་པའོ།། །།འཇམ་པའི་རྡོ་རྗེ་ལ་གཉིས་ཏེ། ཀླད་དང༌། གཞུང་ངོ༌། །འདི་ལ་གཉིས་ཏེ། ནང་གི་དང༌། ཕྱིའི་རྣལ་འབྱོར་རོ། །ནང་གི་ལ་གཉིས་ཏེ། སྔོན་དུ་བགེགས་བསྐྲད་པ་དང༌། ནང་གི་རྣལ་འབྱོར་དངོས་སོ། །འདི་ལ་གསུམ་སྟེ། བསོད་ནམས་ཀྱི་ཚོགས་བསགས་པ་དང༌། སྤྱན་དྲངས་ཞིང་བསྒོམ་པ་དང༌། བཟླས་པའོ། །ཕྱིའི་ལ་གཉིས་ཏེ། མཎྜལ་དང་གཏོར་མའོ།། །།ངག་གི་རྒྱལ་པོ་ལ་གསུམ་སྟེ། ཀླད་དང༌། གཞུང་དང༌། མཇུག་གོ །གཞུང་ལ་བཞི་སྟེ། ཚོགས་གཉིས་བསག་པ་ད་ང༌། འབྲས་བུ་ལྷའི་རྣལ་འབྱོར་དང༌། མཆོད་བསྟོད་སྔོན་དུ་སོང་བས་ལྡང་བ་དང༌། སྒྱུ་མའི་བློས་རྗེས་ཀྱི་སྤྱོད་པ་བྱ་བའོ། །ལྷའི་རྣལ་འབྱོར་ལ་བཞི་སྟེ། ལྷ་བསྐྱེད་པ་དང༌། སྐུ་གསུང་ཐུགས་བྱིན་གྱིས་བརླབ་པ་དང༌། མཆོད་བསྟོད་སྔོན་དུ་སོང་བས་ཏིང་ངེ་འཛིན་སེམས་དཔའ་བསྒོམ་པ་དང༌། སྔགས་བཟླས་པའོ།། །།རྒྱལ་པོ་ཆེན་པོ་རོལ་པ་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུའོ། །འདི་ལ་གཉིས། ལྷ་བསྐྱེད་པ་དང༌། བཟླས་པའོ།། །།རིག་པ་འཛིན་པའི་སྡེ་སྣོད་དུ་གསུངས་པའི་འཇམ་དབྱངས་ཀྱི་སྒྲུབ་ཐབས་ལ་གཉིས་ཏེ། རྒྱུ་ཚོགས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས། ལྷ་བསྐྱེད་ནས་སྤྲོ་བསྡུའི་ཏིང་ངེ་འཛིན་བསྒོམ་པ་དང༌། བཟླས་པའོ།། །།ཡང་དེ་ཉིད་ཀྱི་སྒྲུབ་ཐབས་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས་ཏེ། ལྷ་བསྐྱེད་ནས་སྤྲོ་བསྡུའི་ཏིང་ངེ་འཛིན། བཟླས་པའོ།། །།ཡན་ལག་མེད་པའི་འཇམ་པའི་རྡོ་རྗེ་ལ་གཉིས་ཏེ། སྒྲུབ་པའི་ཐབས་གཉིས་དང༌། དབང་བྱ་བའི་ཕྲིན་ལས་སོ། །དང་པོ་ལ་གཉིས་ཏེ། རྒྱུད་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གསུམ། ལྷ་བསྐྱེད་པ་དང༌། ཡེ་ཤེས་པ་བསྟིམ་པ་དང༌། བཟླས་པ་བྱ་བའོ།། །།ཆོས་ཀྱི་དབྱིངས་ཀྱི་ངག་གི་དབང་ཕྱུག་གི་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས། ལྷ་བསྐྱེད་པ་དང༌། བཟླས་པའོ།། །།མཚན་ཡང་དག་པར་བརྗོད་པའི་སྒྲུབ་ཐབས་ལ་གཉིས་ཏེ། རྒྱུ་དང་འབྲས་བུའོ། །དང་པོ་ལ་གཉིས་ཏེ། བསོད་ནམས་དང་ཡེ་ཤེས་ཀྱི་ཚོགས་སོ། །གཉིས་པ་ལ་བཞི་སྟེ། ལྷ་བསྐྱེད་པ་དང༌། ཡེ་ཤེས་པ་བསྟིམ་པ་དང༌། དབང་བསྐུར་བ་དང༌། རྒྱུད་བཀླག་པའོ།། །།འཇམ་དཔལ་དཔའ་བོ་གཅིག་པའི་སྒྲུབ་ཐབས་ལ་གཉིས་ཏེ། ཀླད་དང༌། གཞུང་ངོ༌། །གཞུང་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །དང་པོ་ལ་གཉིས་ཏེ། བསོད་ནམས་དང༌། ཡེ་ཤེས་སོ། །འབྲས་བུ་ལ་གསུམ་སྟེ། ལྷ་བསྐྱེད་པ་དང༌། བཟླས་པ་དང༌། ཞར་ལ་ཕན་ཡོན་བསྟན་པའོ། །འཇམ་དཔལ་ཤེས་རབ་འཁོར་ལོ་ལ་གསུམ་སྟེ། ཀླད་དང༌། གཞུང་དང༌། མཇུག་གོ །གཞུང་ལ་གཉིས། ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་བཞི་སྟེ། ལྷ་བསྐྱེད་པ་དང༌། འཁོར་ལོ་བསྒོམ་པ་དང༌། བཟླས་པ་དང༌། ཞར་ལ་ཕན་ཡོན་བསྟན་པའོ།། །།འཕྲལ་དུ་ཉམས་སུ་མྱོང་བ་བསྐྱེད་པའི་འཇམ་དཔལ་གྱི་ལ་གསུམ་སྟེ། ཀླད་དང༌། གཞུང་དང༌། མཇུག་གོ །གཞུང་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷ་བསྐྱེད་པའོ། །འདི་ལ་བཞི་སྟེ། ལྷ་བསྐྱེད་པ་དང༌། ཡེ་ཤེས་བསྒོམ་པ་དང༌། ཡེ་ཤེས་པ་བསྟིམ་པ་དང༌། བཟླས་པའོ།། །།འཇམ་དཔལ་གཤིན་རྗེ་ནག་པོ་ལ་གཉིས་ཏེ། རྒྱུ་ཚོགས་གཉིས་བསགས་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས་ཏེ། ལྷ་བསྐྱེད་པ་དང༌། བཟླས་པའོ།། །།ཡང་དེ་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གསུམ་སྟེ། ལྷ་བསྐྱེད་པ་དང༌། སྐུ་གསུང་ཐུགས་བྱིན་གྱིས་བརླབ་པ་དང༌། བཟླས་པའོ།། །།རྡོ་རྗེ་ཆོས་ཀྱི་སྒྲུབ་ཐབས་ལ་གསུམ་སྟེ། ཀླད་དང༌། གཞུང་དང༌། མཇུག་གོ །གཞུང་ལ་བཞི་སྟེ། དམ་ཚིག་པ་བསྐྱེད་པ་དང༌། སྤྲོ་བསྡུ་ལ་སེམས་གཏད་པ་དང༌། ངག་བསྒྲུབ་པར་བྱ་བའི་ཕྱིར་ལྕེ་བྱིན་གྱིས་བརླབ་པ་དང༌། ཕན་ཡོན་ནོ།། །།སེང་གེ་སྒྲ་ལ་གཉིས་ཏེ། ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གསུམ་སྟེ། ལྷ་བསྐྱེད་པ་དང༌། བཟླས་པ་དང༌། ཕྲིན་ལས་བསྒྲུབ་པའོ།། །།ཁརྶ་པཱ་ཎི་ལ་གཉིས་ཏེ། རྒྱུ་དང་འབྲས་བུའོ། །འདི་ལ་བཞི་སྟེ། དམ་ཚིག་པ་བསྐྱེད་པ་དང༌། སྐུ་གསུང་ཐུགས་བྱིན་གྱིས་བརླབ་པ་དང༌། བཟླས་པའོ།། །།ཧ་ལ་ཧ་ལ་ལ་གསུམ་སྟེ། ཀླད་དང༌། གཞུང་དང༌། མཇུག་གོ །གཞུང་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་ལྔ་སྟེ། དམ་ཚིག་པ་བསྐྱེད་པ་དང༌། སྐུ་གསུང་ཐུགས་བྱིན་གྱིས་བརླབ་པ་དང༌། ཡེ་ཤེས་པ་བསྒོམ་པ་དང༌། སྔགས་བཟླས་པ་དང༌། ལྡང་བའི་རྣལ་འབྱོར་རོ།། །།ཡི་གེ་དྲུག་པ་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གསུམ་སྟེ། ལྷ་བསྒོམ་པ་དང༌། སྙིང་པོ་བཟླས་པ་དང༌། ལྡང་བའི་རྣལ་འབྱོར་རོ།། །།ཧ་རི་ལ་ཞོན་པར་གྱུར་པ་ལ་གཉིས་ཏེ། རྒྱུ་ཚོགས་གཉིས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས་ཏེ། རྟེན་འབྱུང་བ་རིམ་བརྩེགས་བསྒོམ་པ་དང༌། བརྟེན་པ་ལྷ་བསྒོམ་པའོ། །དེ་ལ་བཞི་སྟེ། དམ་ཚིག་སེམས་དཔའ་བསྐྱེད་པ་དང༌། ཡེ་ཤེས་པ་བསྟིམ་པ་དང༌། ཞར་ལ་ཕན་ཡོན་བསྟན་པ་དང༌། བཟླས་པའོ།། །།ཧ་ལ་ཧ་ལ་ལ་གཉིས་ཏེ། རྒྱུ་ཚོགས་གཉིས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས་ཏེ། ལྷ་བསྒོམ་པ་དང༌། སྙིང་པོ་བཟླས་པའོ།། །།པདྨ་གར་གྱི་དབང་ཕྱུག་ལ་གཉིས་ཏེ། རྒྱུ་དང་འབྲས་བུའོ། །འདི་ལ་གཉིས་ཏེ། བསྒོམ་པ་དང༌། བཟླས་པའོ།། །།སྒྱུ་འཕྲུལ་དྲྭ་བ་ལ་གཉིས་ཏེ། ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས་ཏེ། ལྷ་བསྒོམ་པ་དང༌། སྔགས་བཟླས་པའོ།། །།སྒྲོལ་མ་ལ་གསུམ་སྟེ། དམ་ཚིག་སེམས་དཔའ་བསྐྱེད་པ་དང༌། ཡེ་ཤེས་སེམས་དཔའ་བསྟིམ་པ་དང༌། བཟླས་པ་བྱ་བའོ།། །།སྒྲོལ་མ་དཀར་མོ་ལ་གཉིས་ཏེ། རྒྱུ་དང༌། འབྲས་བུའོ། །འདི་ལ་གཉིས། བསྒོམ་པ་དང་བཟླས་པའོ།། །།སེང་ལྡེང་ནགས་ཀྱི་སྒྲོལ་མ་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གསུམ། དམ་ཚིག་པ་བསྐྱེད་པ་དང༌། ཡེ་ཤེས་པ་བསྟིམ་པ་དང༌། བཟླས་པ་བྱ་བའོ།། །།སྒྲོལ་མ་དཀར་མོ་ལ་གསུམ་སྟེ། ཀླད་དུ་རྒྱུ་བསྟན་པ་དང༌། གཞུང་དང༌། མཇུག་གོ །གཞུང་ལ་གཉིས་ཏེ། ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གསུམ་སྟེ། ལྷ་བསྒོམ་པ་དང༌། བཟླས་པ་དང༌། དེ་དག་གི་ཕན་ཡོན་ནོ།། །།ཨཽ་ཌྱན་གྱི་འོད་ཟེར་ཅན་མ་ལ་གཉིས་ཏེ། རྒྱུ་དང་འབྲས་བུའོ། །འདི་ལ་གཉིས་ཏེ། ལྷ་བསྒོམ་པ་དང༌། སྔགས་བཟླས་པའོ། །རྟོག་པ་ལས་གསུངས་པའི་འོད་ཟེར་ཅན་ལ་གཉིས་ཏེ། ཀླད་དང༌། གཞུང་ངོ༌། །འདི་ལ་གསུམ་སྟེ། བགེགས་བསྐྲད་པ་དང༌། རྒྱུ་ཚོགས་གཉིས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས། ལྷ་བསྒོམ་པ་དང༌། སྔགས་བཟླས་པའོ།། །།ཡང་དེ་ཉིད་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གསུམ་སྟེ། དམ་ཚིག་སེམས་དཔའ་བསྐྱེད་པ་དང༌། དབང་ནོད་ཅིང་བདག་པོས་རྒྱས་གདབ་པ་དང༌། བཟླས་པའོ།། །།མྱ་ངན་མེད་པ་ཡང་ངོ༌།། །།ཨཽ་ཌྱན་གྱི་འོད་ཟེར་ཅན་ལ་གཉིས་ཏེ། རྒྱུ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་ལྔ་སྟེ། དམ་ཚིག་སེམས་དཔའ་བསྐྱེད་པ་དང༌། ཡེ་ཤེས་པ་བསྒོམ་པ་དང༌། སྔགས་བཟླས་པ་དང༌། ཞར་ལ་ཐུན་མཚམས་ཀྱི་བྱ་བའོ།། །།ལྷ་མོ་ཙུནྡ་ལ་གཉིས་ཏེ། ཀླད་དང༌། གཞུང་ངོ༌། །འདི་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས། ལྷ་བསྒོམ་པ་དང༌། སྙིང་པོ་བཟླས་པའོ།། །།གནོད་གནས་ལ་གཉིས་ཏེ། རྒྱུ་དང༌། འབྲས་བུའོ། །འདི་ལ་གཉིས། ལྷ་བསྐྱེད་པ་དང༌། སྔགས་བཟླས་ཤིང་ཆུ་སྦྱིན་པའོ།། །།ཨུ་ཙུཥྨ་ལ་གཉིས་ཏེ། ལྷ་བསྐྱེད་པ་དང༌། ཆུ་སྤྱིན་པའོ།། །།ནོར་རྒྱུན་མ་ལ་གཉིས་ཏེ། རྒྱུ་ཚོགས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས་ཏེ། ལྷ་བསྐྱེད་པ་དང༌། བཟླས་པའོ།། །།ཁྲོ་གཉེར་ཅན་ལ་གཉིས་ཏེ། ཚོགས་གཉིས་དང༌། ལྷའི་རྣལ་འབྱོར་རོ། །འདི་ལ་གཉིས། ལྷ་བསྒོམ་པ་དང༌། སྔགས་བཟླས་པའོ།། །།བྱམས་པ་ལ་གཉིས་ཏེ། ལྷ་བསྒོམ་པ་དང༌། སྔགས་བཟླས་པའོ།། །།ཤེས་རབ་ཕ་རོལ་ཕྱིན་མ་ལ་གཉིས་ཏེ། ཀླད་དང༌། གཞུང་ངོ༌། །འདི་ལ་གསུམ་སྟེ། དམ་ཚིག་པ་བསྐྱེད་པ་དང༌། ཡེ་ཤེས་པ་བསྒོམ་པ་དང༌། བཟླས་པའོ།། །།ཡང་དེའི་ལ་གཉིས་ཏེ། གཞུང་དང༌། མཇུག་གོ །གཞུང་ལ་གཉིས་ཏེ། རྒྱུ་ཚོགས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་བཞི་སྟེ། ལྷ་བསྐྱེད་པ་དང༌། རྒོད་ན་སེམས་བཟུང་བའི་ཐབས་དང༌། བཟླས་པ་དང༌། རྫོགས་རིམ་མོ།། །།ཡང་དེ་ལ་གཉིས་ཏེ། གཞུང་དང༌། མཇུག་གོ །གཞུང་ལ་རྒྱུ་ཚོགས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་ལྔ་སྟེ། དམ་ཚིག་སེམས་དཔའ་བསྐྱེད་པ་དང༌། སྐུ་གསུང་ཐུགས་བྱིན་གྱིས་བརླབ་པ་དང༌། ཡེ་ཤེས་པ་བསྒོམ་པ་དང༌། རྫོགས་རིམ་དང༌། བཟླས་པའོ། །མི་གཡོ་བའི་སྒྲུབ་ཐབས་ལ་གཉིས་ཏེ། ཀླད་ཀྱི་དོན་མཆོད་པར་བརྗོད་པ་དང༌། གཞུང་དང༌། མཇུག་གོ །གཞུང་ལ་གཉིས་ཏེ། རྒྱུ་ཚོགས་གཉིས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་བཞི་སྟེ། དམ་ཚིག་པ་བསྐྱེད་པ་དང༌། ཡེ་ཤེས་པ་བསྒོམ་པ་དང༌། ཏིང་ངེ་འཛིན་སེམས་དཔའ་བསྒོམ་པ་དང༌། བཟླས་པའོ།། །།གཏུམ་པོའི་སྒྲུབ་ཐབས་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་བཞི་སྟེ། དམ་ཚིག་པ་བསྐྱེད་པ་དང༌། ཡེ་ཤེས་པ་བསྒོམ་པ་དང༌། དབང་བསྐུར་ཞིང་དབུར་བརྒྱན་པ་དང༌། བཟླས་པའོ།། །།འདིར་འོད་ཟེར་ཅན་ནོ།། །།རྡོ་རྗེ་དབྱངས་ཅན་མ་ལ་གསུམ་སྟེ། ཀླད་དང༌། གཞུང་དང༌། མཇུག་གོ །གཞུང་ལ་གཉིས་ཏེ། རྒྱུ་ཚོགས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གསུམ་སྟེ། ལྷ་བསྒོམ་པ་དང༌། བཟླས་པ་དང༌། ཞར་ལས་སྒྲུབ་པའི་ཐབས་བསྟན་པའོ། །མཇུག་ལ་གཉིས་ཏེ། བསྔོ་བ་དང༌། མཛད་པའི་མཚན་ནོ།། །།ཁྲོ་བོ་བགེགས་དགྲ་ལ་གཉིས་ཏེ། རྒྱུ་ཚོགས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས་ཏེ། ལྷ་བསྒོམ་པ་དང༌། སྔགས་བཟླས་པའོ།། །།རལ་གཅིག་མ་ལ་གཉིས་ཏེ། ལྷ་བསྒོམ་པ་དང༌། སྔགས་བཟླས་པའོ།། །།འཕགས་མ་དུག་སེལ་མ་ལ་གཉིས་ཏེ། རྒྱུ་ཚོགས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས་ཏེ། ལྷ་བསྒོམ་པ་དང༌། སྔགས་བཟླས་པའོ།། །།རིག་བྱེད་མ་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས་ཏེ། བསྒོམ་པ་དང༌། བཟླས་པའོ།། །།རྟོག་པ་ལས་གསུངས་པའི་རིག་བྱེད་མ་ལ་གཉིས་ཏེ། ཀླད་དང༌། གཞུང་ངོ༌། །འདི་ལ་གཉིས་ཏེ། རྒྱུ་ཚོགས་བསག་པ་དང༌། འབྲས་བུ་ལྷར་བསྐྱེད་པའོ། །འདི་ལ་དྲུག་སྟེ། དམ་ཚིག་པ་བསྐྱེད་པ་དང༌། ཡེ་ཤེས་པ་བསྟིམ་པ་དང༌། དབང་བསྐུར་ཏེ་རིགས་ཀྱི་བདག་པོས་དབུར་བརྒྱན་པའོ། །བཟླས་པ་དང༌། ཞར་ལས་གཏོར་མ་དང༌། ཕན་ཡོན་བསྟན་པའོ།། །།ཡང་རིག་བྱེད་མ་ལ་གསུམ་སྟེ། ལྷ་བསྐྱེད་པ་དང༌། སྔགས་བཟླས་པ་དང༌། ཞར་ལས་དབང་བསྐུར་བའི་ཕྲིན་ལས་བསྟན་པའོ།། །།ཁམས་གསུམ་དབང་དུ་བྱེད་པའི་སྤྱན་རས་གཟིགས་ལ་གསུམ་སྟེ། རྒྱུ་ཚོགས་གཉིས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་བཞི་སྟེ། དམ་ཚིག་པ་བསྐྱེད་པ་དང༌། སྙིང་པོའི་ཡི་གེ་བཞི་བསྒོམ་ཞིང་ལུས་རྡོ་རྗེར་བྱིན་གྱིས་བརླབ་པ་དང༌། རྣལ་འབྱོར་པ་དེའི་སྤྱོད་པ་བསྟན་པ་དང༌། སྙིང་པོའི་སྔགས་ལ་སོགས་པ་བསྟན་པའོ།། །།དཔལ་གནོད་གནས་ལ་བཞི་སྟེ། ལྷ་བསྐྱེད་པ་དང༌། བྱིན་གྱིས་བརླབ་པའི་ཡི་གེ་དང༌། ལྷ་གཙོ་བོ་ལ་དགོད་པ་དང༌། ཆུ་སྦྱིན་པ་དང་ལྷ་གནད་ལ་དབབ་པའོ།། །།རྒྱ་ནག་རིམ་པའི་སྒྲོལ་མ་ལ་གསུམ་སྟེ། ཀླད་དང༌། གཞུང་དང༌། མཇུག་གོ །གཞུང་ལ་གཉིས་ཏེ། གནས་དང་གང་ཟག་གི་མཚན་ཉིད་བསྟན་ནས་ཡེ་ཤེས་ཀྱི་ཚོགས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གསུམ་སྟེ། ལྷ་བསྒོམ་པ་དང༌། བཟླས་པ་དང༌། ཕན་ཡོན་ནོ།། །།རྡོ་རྗེ་སྒྲོལ་མ་ལ་གཉིས་ཏེ། ཀླད་དང༌། གཞུང་ངོ༌། །འདི་ལ་གསུམ་སྟེ། རྒྱུ་ཚོགས་གཉིས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གསུམ་སྟེ། དམ་ཚིག་གི་དཀྱིལ་འཁོར་བསྒོམ་པ་དང༌། རྣལ་འབྱོར་པས་བདུན་རྣམ་དག་བྱ་བ་དང༌། ཞར་ལས་ཆེ་བའི་ཡོན་ཏན་གྱི་ཁུངས་བསྟན་པའོ།། །།གཤིན་རྗེ་དམར་པོ་ལ་གཉིས་ཏེ། རྒྱུ་ཚོགས་གཉིས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་དྲུག་སྟེ། དམ་ཚིག་སེམས་དཔའ་བསྒོམ་པ་དང༌། ཡེ་ཤེས་སེམས་དཔའ་བསྒོམ་པ་དང༌། སྙོམས་འཇུག་གི་མཆོད་པ་དང༌། རྫོགས་པའི་རིམ་པ་དང༌། སྔོན་དུ་དམ་ཚིག་གི་རྫས་བསྟེན་པའི་ཐབས་དང༌། སྙིང་པོ་བཟླས་པའོ།། །།གཙུག་ཏོར་རྣམ་པར་རྒྱལ་མ་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་བཞི་སྟེ། དམ་ཚིག་པ་བསྐྱེད་པ་དང༌། སྐུ་གསུང་ཐུགས་བྱིན་གྱིས་བརླབ་པ་དང༌། ཡེ་ཤེས་པ་བསྒོམ་པ་དང༌། བཟླས་པའོ།། །།སོ་སོར་འབྲང་མ་ལ་གཉིས་ཏེ། ཚོགས་གཉིས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་བཞི་སྟེ། དམ་ཚིག་པ་བསྐྱེད་པ་དང༌། སྐུ་གསུང་ཐུགས་བྱིན་གྱིས་བརླབ་པ་དང༌། ཡེ་ཤེས་པ་བསྒོམ་པ་དང༌། བཟླས་པའོ།། །།རྨ་བྱ་ཆེན་མོ་ལ་གཉིས་ཏེ། རྒྱུ་ཚོགས་གཉིས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་བཞི་སྟེ། དམ་ཚིག་པ་བསྐྱེད་པ་དང༌། སྐུ་གསུང་ཐུགས་བྱིན་གྱིས་བརླབ་པ་དང༌། སྤྲོ་བསྡུ་ལ་སེམས་གཏད་པ་དང༌། བཟླས་པའོ།། །།སྟོང་ཆེན་མོ་རབ་ཏུ་འཇོམས་མ་ལ་གཉིས་ཏེ། རྒྱུ་ཚོགས་བསག་པ་དང༌། འབྲས་བུ་ལྷའི་རྣལ་འབྱོར་རོ། །དེ་ལ་གཉིས། ལྷ་བསྒོམ་པ་དང༌། བཟླས་པའོ།། །།གསང་སྔགས་རྗེས་སུ་འཛིན་མ་ལ་གཉིས། ལྷ་བསྐྱེད་པ་དང༌། བཟླས་པའོ།། །།བསིལ་བའི་ཚལ་ཆེན་མོ་ལ་གཉིས་ཏེ། ལྷ་བསྐྱེད་པ་དང༌། བཟླས་པ་བྱ་བའོ།། །།ཕྱིར་བཟློག་མ་ཆེན་མོ་འདི་ལ་གཉིས་ཏེ། ལྷ་བསྐྱེད་པ་དང༌། བཟླས་པའོ།། །།རྒྱལ་མཚན་རྩེ་མོའི་དཔུང་རྒྱན་ལ་ཡང་གཉིས་ཏེ། ལྷ་བསྐྱེད་པ་དང༌། བཟླས་པ་བྱའོ།། །།རྣམ་པར་རྒྱལ་མ་ལ་གསུམ། རྒྱུ་ཚོགས་གཉིས་བསག་པ་དང༌། འབྲས་བུ་ལྷའི་རྣལ་འབྱོར་དང༌། སྐྱོ་ན་བཟླས་པ་བྱ་བའོ།། །།རྡོ་རྗེ་གནྡྷ་རི་ལ་གཉིས་ཏེ། ལྷ་བསྐྱེད་པ་དང༌། བཟླས་པ་བྱ་བའོ།། །།རྡོ་རྗེ་ལྕགས་སྒྲོག་མ་ལ་གཉིས་ཏེ། ལྷ་བསྒོམ་པ་དང༌། བཟླས་པ་བྱ་བའོ།། །།སྟོབས་པོ་ཆེ་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་བཞི་སྟེ། དམ་ཚིག་པ་བསྐྱེད་པ་དང༌། ཡེ་ཤེས་པ་བསྟིམ་པ་དང༌། རིགས་ཀྱི་བདག་པོས་དབུར་བརྒྱན་པ་དང༌། བཟླས་པའོ།། །།གདུགས་ཀར་མོ་ཅན་ལ་གཉིས་ཏེ། རྒྱུ་དང༌། འབྲས་བུའོ། །རྒྱུ་ལ་གཉིས་ཏེ། ལྷ་བསྒོམ་པ་དང༌། བཟླས་པའོ།། །།རྟ་མགྲིན་ལ་གཉིས་ཏེ། རྒྱུ་ཚོགས་གཉིས་བསག་པ་དང༌། འབྲས་བུའོ། །འདི་ལ་གཉིས་ཏེ། ལྷ་བསྒོམ་པ་དང༌། བཟླས་པའོ།། །།ཧེ་རུ་ཀ་ལ་གཉིས་ཏེ། ལྷ་བསྒོམ་པ་དང༌། བཟླས་པའོ།། །།བདག་མེད་མ་ལ་གཉིས་སོ། །འདི་ལ་གསུམ་ཏེ། ལྷ་བསྐྱེད་པ་དང༌། སྐུ་གསུང་ཐུགས་བྱིན་གྱིས་བརླབ་པ་དང༌། བཟླས་པའོ།། །།ཡང་བདག་མེད་མ་ལ་གཉིས་ཏེ། རྒྱུ་ཡེ་ཤེས་ཀྱི་ཚོགས་དང༌། འབྲས་བུའོ། །འདི་ལ་གསུམ་ཏེ། ལྷ་བསྐྱེད་པ་དངོས་དང༌། སྐུ་སོགས་གསུམ་བྱིན་གྱིས་བརླབ་པ་དང༌། བཟླས་པའོ།། །།གསེར་མདོག་ཅན་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའོ། །འདི་ལ་གཉིས། ལྷ་བསྐྱེད་པ། ཡི་གེ་བཀོད་དེ་བཟླས་པ་བྱ་བའོ།། །།རྡོ་རྗེ་ཕག་མོ་ལ་གཉིས། ལྷ་བསྐྱེད་པ་དང༌། བཟླས་པའོ།། །།རིག་བྱེད་མ་ལ་གཉིས་ཏེ། རྒྱུ་ཚོགས་གཉིས་བསག་པ་དང༌། འབྲས་བུ་ལྷའི་རྣལ་འབྱོར་རོ། །འདི་ལ་གཉིས་ཏེ། ལྷ་བསྐྱེད་པ་དང༌། བཟླས་པ་བྱ་བའོ།། །།སྒྲོལ་མ་དཀར་མོ་ལ་གཉིས་ཏེ། ཀླད་དང༌། གཞུང་ངོ༌། །འདི་ལ་གཉིས་ཏེ། རྒྱུ་ཚོགས་གཉིས་དང༌། འབྲས་བུ་ལྷའི་རྣལ་འབྱོར་རོ། །འདི་ལ་དྲུག་སྟེ། དམ་ཚིག་པ་བསྐྱེད་པ་དང༌། སྙིང་པོའི་རྣམ་དག་དང༌། སྤྲོ་བསྡུ་ལ་སེམས་གཏད་པ་དང༌། བཟླས་པ་དང༌། ལས་ཁ་ཚར་བ་དང༌། སྒྲོ་ཆུན་ལ་ལྷ་དང༌། སྔགས་བཟླས་པའོ།། །།སྒྲུབ་ཐབས་བསྡུས་པའི་ས་གཅོད་དོ། །ས་སྐྱ་པས་སོ། །རྫོགས་སོ།། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
Leave a Reply