ཚ་བའི་མདའ་སྨྱུག

༼ཚ་བའི་མདའ་སྨྱུག༽

རྩོམ་པ་པོ།–ས་དཀར་མདའ་སྨྱུག་གམ་གདོང་མཁན་པས།
ཐུབ་བསྟན་སྙིང་བོའི་བཤད་སྒྲུབ་རྗེས་འཛིན་པ།།
བྱང་ཕྱོགས་ཐུབ་པའི་རྒྱལ་ཚབ་ས་སྐྱ་པ།།
མཐའ་བྲལ་ལྟ་གྲུབ་གནད་ལ་དད་གཉེར་ཅན།།
དེང་འདིར་དཔའ་གདེང་བློ་གྲོས་དཔལ་ལྡན་རྒྱལ།།
ཐུབ་བསྟན་དམ་ཆོས་རིན་ཆེན་སྐྱེད་ཚལ་དུ།།
ཆེས་ཆེར་འགྲན་བྲལ་བྱམས་ཀླུ་གཞུང་བཟང་ལས།།
ཀུན་མཁྱེན་བླ་མས་སེངྒེའི་གད་རྒྱངས་ཀྱིས།།
ཡངས་པའི་ས་འཛིན་ཁྱོན་ལ་གདོད་ནས་སྒྲོགས།།
གང་དེའི་ལྟ་གྲུབ་མངལ་དུ་སྦྲུམ་པའི་བསྒྱུར།།
རིགས་བཟང་འོ་མའི་ཆུ་གཏེར་འཕྱུར་བ་ལས།།
ལྟ་ངན་མུན་སེལ་འཇིན་རྟེན་སྒྲོན་མེ་ཤར།།
རིག་མཆོག་ཚ་བའི་མདའ་སྨྱུག་དཔའ་བོ་དེ།།
སྔོན་བསགས་ལྷན་སྐྱེས་ཡོན་ཏན་ལང་ཚོ་རྒྱས།།
ངོམ་བཞིན་བསིལ་ལྗོངས་ཁྱོན་གྱི་མཛེས་རྒྱན་གྱུར།།
ཐར་འདོད་འཇུག་སྒོར་ལྟ་བའི་མཐའ་བྲལ་གནད།།
ས་དགེ་ནང་བསྟན་མཐའ་དཔྱོད་གར་སྟབས་སྟེང་།།
ལྟ་ངན་ལོ་མང་རྒྱུད་པའི་དྲུངས་འབྱིན་པ།།
རིགས་པའི་ཆིག་ཐུབ་སྨན་གྱི་མྱུ་གུ་རྒྱས།།
དེང་འདིར་རིག་པའི་མཚོན་ཆའི་འོད་དཀར་གྱིས།།
སྙིགས་དུས་རྟོག་གེའི་རྒོལ་བར་ཐལ་བཞིན་གཏོར།།
ངོ་མཚར་རིག་པའི་དྲི་བསུང་རིང་དུ་འཐུལ།།
རིག་པའི་རྟ་མཆོག་དྲན་པའི་སྲབ་ཤོར་ཏེ།།
ཟབ་དོན་ལྟ་གྲུབ་མཐའ་དཔྱོད་ཁྱོན་དུ་ཆས།།
རྟ་བརྒྱའི་འགྲོས་ཀྱི་བང་རྩལ་མདུན་དུ་རྟོལ།།
ཡིན་ཡང་ཕྱོགས་ཞེན་འཁྱོངས་པའི་ཟློས་གར་འོག།
སྒེག་འགྲོས་ལུས་ཀྱི་གར་སྟབས་གབ་ཕྱུང་འཛུམ།།
འོད་གསལ་རྣམ་ཤེས་འབྱུང་བཞིར་འཐིམ་པར་བསྙད།།
བདག་སེམས་ཁྱེད་ཕྱོགས་དུངས་གཏམས་ཤོར་ན་ཡང།།
ཉམ་ཆུང་སྡུག་ལ་འཇུར་བའི་གཡུལ་སར་འཁྲུག།
ལྟ་གྲུབ་མཚང་བ་སུན་འབྱིན་རྟོག་གེ་ལུགས།།
ཡ་རབས་བཟང་སྤྱོད་གཏམ་འདི་གླིང་འདིར་ལྡིང་།།
ཡིན་ཡང་ཆད་ལྟ་ཕྱོགས་ལྷུང་ལོག་ཚིག་དང་།།
ཉོན་མོངས་བསམ་སྦྱོར་ནག་པོ་དུས་འདིར་མང་།།
དྲེགས་རློམ་མཁས་པའི་མིང་བྱང་རྡུལ་དང་མཉམ། །
ད་ནི་ཚ་བའི་མདའ་སྨྱུག་དཔའ་རྒོད་ཁྱེད།།
ཁེར་རྐྱང་འཕྱུར་འཁྱོག་མུན་པའི་འཇིག་རྟེན་དུ།།
མ་བཅོས་སེམས་ཀྱི་ཉམས་འགྱུར་འགོག་མེད་བཞུགས།།
དཀའ་ཚེགས་བརྒྱ་ཕྲག་ལོ་ཟླའི་རིང་མོ་ནང་།།
ཟླ་འོད་གཞོན་ནུའི་འཁྲི་ཤིང་གླིང་འདིར་ལྡིང་།།
བགྲང་བྱའི་དུས་ཀྱི་གོམས་འགྲོས་དལ་བཞིན་འདས།།
རིགས་ཞེན་རིག་པའི་ཆོམ་རྐུན་ཐ་སྤྱོད་ཀྱིས།།
ལྟར་སྣང་རིག་མདས་ཤག་ཤག་སྙིལ་ན་ཡང་།།
མདའ་སྨྱུག་རིག་པའི་ལང་ཚོ་སྔར་ལས་རྒྱས།།
དེ་མཚམས་རྒོལ་ངན་འཇོམས་པའི་ལུང་རིགས་དང་།།
དཀར་ནག་ཤན་འབྱེད་རིགས་པའི་གཤོག་ཡངས་ནས།།
ཀཿབྲག་དབུ་མའི་ལྟ་བའི་གད་རྒྱངས་ཞེས།།
གར་སྟབས་ལང་ལོང་སྒྱུར་བའི་རྟོག་གེའི་ཚོགས།།
སྣང་སྲིད་ཟིལ་གྱིས་གནོན་པའི་དྲི་བསུང་འཐུལ།།
ཁོ་བོའི་རེ་སྨོན་དབྱངས་རྟ་ལྷུམས་ཡངས་སུ།།
དྲང་བདེན་དུངས་སེམས་དཀར་པོའི་རིག་པའི་མདའ།།
ལྷམ་མེར་བཀྲ་བའི་ལུང་རིགས་བདག་གིས་གུས།།
ཡིན་ཡང་ཧོལ་རྒྱུགས་འཕྲུལ་རྩལ་ཁ་ལ་བསྙད།།
ཕྱོགས་ཞེན་སྡིགས་རའི་ཐ་ཚིག་བསྙད་པ་ན།།
རེ་ཞིག་ཁོ་བོའི་མགྲིན་ལག་སྙིང་ལ་འཐུམས།།
རྟོག་གེའི་བྲང་གཞུང་རིག་པའི་བསྲུབ་ནས་ཕེབས།།