༼ན༽
༄༅། །ཤོ་དགོན་གྱི་དགེ་འདུན་རྣམས་ལ་སྤྲིང་པ་བཞུགས།།
༄༅། །ཨོཾ་སྭ་སྟི་སིདྡྷཾ། བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །བསོད་ནམས་ཆུ་གཏེར་ཡོན་ཏན་པདྨོའི་ཚལ། །ཕན་བདེའི་དྲི་བཟངས་དགེ་འདུན་བུང་བས་བསྟེན། །ཏིང་འཛིན་སྦྲང་རྩིས་སྐྱེ་དགུའི་གདུངས་སེལ་བ། །འགྲོ་བའི་བླ་མ་རྟག་ཏུ་རྒྱལ་གྱུར་ཅིག །དམ་པ་དམ་པའི་སྐྱེ་བོ་འདུ་བའི་གནས། །བདེ་གཤེགས་བདེ་བར་གཤེགས་པའི་བསྟན་འཛིན་པ། །དབེན་གནས་དབེན་ལ་དགའ་བ་འདུ་བའི་གཞི། །དགོན་པའི་དམ་པ་ཤོ་དགོན་ཞེས་སུ་གྲགས། །དེར་གནས་དགེ་འདུན་རྣམས་ལ་དོན་འདི་སྤྲིང༌། །སྡོམ་བརྩོན་དམ་པ་ཏིང་འཛིན་མཆོག་བརྙེས་པ། །ཡང་དག་ལམ་སྟོན་འགྲོ་ལ་བུ་བཞིན་བརྩེ། །བསྟན་པའི་མཛོད་འཛིན་བླ་མ་དམ་པ་དེ། །ཞི་བར་གཤེགས་ཞེས་བདག་གི་རིང་ནས་ཁུམས། །དེ་ལ་གཤེགས་དང་བཞུགས་པ་ཡོངས་མི་མངའ། །གཤེགས་དང་བཞུགས་པ་འཇིག་རྟེན་བླུན་པོས་བཏགས། །དམ་པའི་དོན་དུ་ཆོས་རྣམས་ཉེ་བར་ཞི། །བརྩོན་ལྡན་ཁྱེད་ཀྱིས་དོན་འདི་ལེགས་མཁྱེན་མོད། །འོན་ཀྱང་སྙིགས་དུས་བསོད་ནམས་ཞན་པ་དང༌། །རྩོད་པའི་དུས་ཀྱིས་འགྲོ་བ་བླུན་པས་ན། །དམ་པའི་དོན་ལ་དཔྱོད་པ་ཞན་པའི་ཕྱིར། །འདས་པ་ཡིན་ཞེས་གདུང་བ་མི་བཟད་སྐྱེ། །འཁྲུལ་པའི་སྣང་དོར་བདེ་གཤེགས་བསྟན་པ་ཡང༌། །སྟོན་ཀའི་ཆར་བཞིན་ཀུན་ནས་འབྲི་བ་མཐོང༌། །སྐྱེ་བོ་དམ་པའི་འབྲས་བུ་ཕལ་ཆེར་ཡང༌། །དུས་ཀྱི་ཤུགས་ཀྱིས་རྣམ་པར་ལྟུང་བར་སྣང༌། །དེ་ཡི་སླད་དུ་དགེ་འདུན་རྣམས། །དངོས་པོའི་ཆོས་ཉིད་མཁྱེན་པས་ན། །རྣམ་པ་ཀུན་དུ་ཐུགས་གཏོད་ཅེས། །རིང་ནས་གནས་པ་བདག་གསོལ་འདེབས། །དཔལ་ལྡན་ས་སྐྱ་པཎྜི་ཏས། །ཤར་ཕྱོགས་ཀྱི་སའི་ཆ་གནམ་འཕང་མཐོ་ཞིང་རྒྱར་ཡངས་ལ་ཡིད་དུ་འོང་བ། རི་བོ་ཆེན་པོ་རིན་པོ་ཆེ་འབར་བ་ལྟ་བུའི་ངོགས། རྩི་ཤིང་དང་ནགས་ཚལ་ཕུན་སུམ་ཚོགས་པ། མཛེས་པའི་མེ་ཏོག་སྣ་ཚོགས་དང༌། སྒྲ་སྙན་པའི་བྱ་དུ་མས་གང་བ། གྲུབ་པ་ཐོབ་པའི་སྐྱེས་བུ་རྣམས་ཀྱིས་བསྟེན་པའི་གནས། དཔལ་གྱི་ཤོ་དགོན་ན་བཞུགས་པའི་རིན་ཆེན་གདན་ས་པས་དབུ་མཛད་དགེ་འདུན་རྣམས་ཀྱི་ཕྱག་ཏུ་སྤྲིང་བ། བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་གཅིག་ཏུ་གཞོལ་བ། འགྲོ་བ་ཐམས་ཅད་ལ་བུ་གཅིག་པ་ལྟར་བརྩེ་བའི་ངང་ཚུལ་ཅན་བླ་མ་དམ་པ་དེ་ལ་འདས་གྲོངས་མི་མངའ་ཡང༌། སྐྱེ་བོ་རྟག་འཛིན་ཅན་རྣམས་དྲང་བའི་ཕྱིར། བདེ་བ་ནས་བདེ་བར་གཤེགས་པ་དེ། སངས་རྒྱས་ཀྱི་བསྟན་པ་ཉམས་དམས་ཤིང༌། སེམས་ཅན་རྣམས་མགོན་དང་བྲལ་བ་ཡིན་མོད་ཀྱི། འོན་ཀྱང་ཡང་དག་པའི་དོན་ལ་དགོངས་ལ་ཐུགས་ཁྲལ་མི་མཛད་པར་ཞུ།། །།རྫས་དང་བཀུར་སྟི་ལ་སོགས་པའང༌། །མཆོད་པའི་ཁྱད་པར་ཡིན་མོད་ཀྱི། །ཡང་དག་བླ་མ་དམ་པ་ལ། །བསྒྲུབ་པའི་མཆོད་པ་དེ་བས་ལྷག །དེ་སླད་ཚུལ་ཁྲིམས་ཏིང་འཛིན་དང༌། །རྣམ་གྲོལ་ཡེ་ཤེས་འཕེལ་བའི་ཕྱིར། །སྡོམ་བརྩོན་དགེ་འདུན་ཁྱེད་རྣམས་ཀྱིས། །སངས་རྒྱས་བསྟན་པ་རྒྱས་པ་དང༌། །བླ་མ་དམ་པ་མཉེས་བྱའི་ཕྱིར། །ཡང་དག་བརྟུལ་ཞུགས་བརྟན་པ་ཡིས། །རྣམ་པ་ཀུན་དུ་བརྩོན་མཛད་ན། །བླ་མ་ཐུབ་པ་མཉེས་པར་འགྱུར། །སྤྲིང་ཡིག་ཚ་ཟེར་བྱེད་བའི་དཀྱིལ་འཁོར་གྱིས། །འགྲོ་བའི་སྡུག་བསྔལ་མུན་པའི་ཚོགས་བསལ་ཏེ། །དགེ་འདུན་པདྨོའི་ཚོགས་རྣམས་རྒྱས་བྱེད་ཅིང༌། །བདེ་གཤེགས་བསྟན་པ་ཡུན་རིང་གསལ་གྱུར་ཅིག །བྱང་ཆུབ་སྙིང་པོ་དམ་པར་བྱང་ཆུབ་པ། །མཉམ་མེད་དེ་ནི་ཆོས་ཀྱི་དགའ་སྟོན་འགྱེད། །ལོག་ལྟུང་མགོན་མེད་ཕོངས་པའི་སྐྱབས་གྱུར་པ། །ཀུན་མཁྱེན་འགྲོ་མགོན་དེ་ཡི་ཞབས་ལ་འདུད། །ཡོན་ཏན་དཔག་མེད་ཆབ་ཀྱིས་ལེགས་གང་ཞིང༌། །ལུང་རིགས་མན་ངག་རིན་ཆེན་གཏེར་གྱིས་ཕྱུག །ཡིད་བཞིན་མཚོ་འདྲ་དཔལ་ལྡན་ས་སྐྱ་ནས། །མཁས་པ་རྣམས་ལས་སྡེ་སྣོད་མང་ཐོས་ཤིང༌། །བླང་དོར་ལེགས་པར་ཕྱེད་པའི་ཤེས་རབ་ལྡན། །ཚུལ་ཁྲིམས་ལེགས་བསྲུངས་ལྟ་བ་དག་པ་ཅན། །སྡེ་སྣོད་འཛིན་པ་དེ་ཡི་སྤྲིང་ཡིག་འདི། །བྱམས་པའི་ཐུགས་དགོངས་ཕན་བདེའི་འཕྲིན་ལས་ཅན། །ཤར་ཕྱོགས་སྨར་ཁམས་ཞིང་ན་ལེགས་བཞུགས་པ། །སྡེ་དགོན་ཡོན་མཆོད་རྣམས་ཀྱི་ཕྱག་ཏུ་ཕུལ།། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
Leave a Reply