སྒྲུབ་ཐབས།

༼བ༽

༄༅། །སྒྲུབ་ཐབས་བཞུགས།།

༄༅། །བསྲུང་བ་ལྔའི་དཀྱིལ་འཁོར་གྱི་སྒྲུབ་པའི་ཐབས་ཞེས་བྱ་བ། རྗེ་བཙུན་མ་སོ་སོར་འབྲང་མ་ཆེན་མོ་ལ་ཕྱག་འཚལ་ལོ། །གང་ཞིག་རྒྱལ་བ་ཉིད་ཀྱི་གཉིས་མེད་ཐུགས་ལས་རྣམ་སྤྲུལ་བ། །སྣ་ཚོགས་ཚུལ་འཆང་དཀར་སེར་དམར་སྔོ་མརྒད་མདོག་མཚུངས་པ། །སོ་སོར་འབྲང་མ་སྟོང་ཆེན་རབ་འཇོམས་རྨ་བྱ་ཆེན་མོ་དང༌། །གསང་སྔགས་རྗེས་འཛིན་བསིལ་བའི་ཚལ་ལ་རྟག་ཏུ་ཕྱག་འཚལ་ལོ། །ཚེ་དང་ལོངས་སྤྱོད་འཁོར་དང་དཔལ་དང་སྙན་པ་དང༌། །གཟུངས་དང་ཏིང་འཛིན་བླ་ན་མེད་པའི་ཡེ་ཤེས་སོགས། །སྒྲུབ་པོ་རྣམས་ཀྱིས་བདེ་བླག་ཉིད་དུ་ཐོབ་བྱེད་པའི། །སྒྲུབ་ཐབས་རིམ་པ་བླ་མའི་གསུང་བཞིན་བདག་གིས་བཤད། །དེ་ལ་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། དཀྱིལ་འཁོར་འདིའམ་གཞན་དུ་དབང་བསྐུར་བ་ཐོབ་ཅིང་དམ་ཚིག་དང་ལྡན་པ། བླ་མ་ལས་ལུང་ཡང་དག་པར་ནོས་པ། བསྲུང་བ་ལྔ་བསྒྲུབ་པར་འདོད་པའི་གང་ཟག་གིས་ཁྲུས་དང་གཙང་སྦྲ་ཚུལ་བཞིན་དུ་བྱས་ལ། སྟན་བདེ་བ་ལ་འདུག་ནས། བླ་མ་དང་དཀོན་མཆོག་གསུམ་ལ་སྙིང་ཐག་པ་ནས་སྐྱབས་སུ་སོང་ལ། སེམས་ཅན་ཐམས་ཅད་སྡུག་བསྔལ་གྱི་རྒྱ་མཚོ་ལས་བསྒྲལ་ནས། སངས་རྒྱས་ཀྱི་ས་ལ་དགོད་པའི་ཕྱིར། རིག་པའི་རྒྱལ་མོ་རྣམ་པ་ལྔ་བསྒོམ་སྙམ་དུ་བྱང་ཆུབ་ཀྱི་སེམས་བསྐྱེད་ལ། རང་གི་སྤྱི་བོ། མགྲིན་པ། སྙིང་ག་གསུམ་དུ་ཨོཾ་ཨཱཿཧཱུྃ་གི་ཡི་གེ་དཀར་པོ་དང༌། དམར་པོ་དང༌། སྔོན་པོ་གསུམ་རིམ་པ་བཞིན་དུ་བསམས་ནས། ཨོཾ་ཨཱཿཧཱུྃ་རཀྵཿརཀྵ་ཧཱུྃ་ཕཊ་སྭཱ་ཧཱ། ཞེས་བྱ་བ་ལན་གསུམ་གྱིས་བདག་དང༌། གསུམ་གྱིས་གནས་དང༌། གསུམ་གྱིས་རྣལ་འབྱོར་བསྲུང་བར་བྱའོ། །དེ་ནས་རང་གི་སྙིང་གའི་དབུས་སུ་པྃ་གི་ཡི་གེ་ཡོངས་སུ་གྱུར་པ་ལས། པདྨ་འདབ་མ་བརྒྱད་པའི་སྟེང་དུ་ཨ་ལས་ཟླ་བའི་དཀྱིལ་འཁོར་གྱི་དབུས་སུ་དྲི་མ་མེད་པའི་ཤེལ་ལྟར་དཀར་ཞིང་གསལ་བའི་པྲྃ་གི་ཡི་གེ་བསམས་ལ། དེ་ལས་སྣ་ཚོགས་པའི་འོད་ཟེར་འཕྲོས་པས་ཐོག་མ་མེད་པ་ནས་བསགས་པའི་སྒྲིབ་པ་ཐམས་ཅད་བསལ་ནས། བ་སྤུའི་བུ་ག་ཐམས་ཅད་ཕྱི་རོལ་དུ་སྤྲོས་པས། ནམ་མཁའི་མཐའ་ཀླས་པའི་སེམས་ཅན་ཐམས་ཅད་ཀྱི་དོན་བྱས་ནས། འོད་ཀྱི་སྣང་བ་དེ་ཉིད་ཀྱིས་རང་བཞིན་གྱི་གནས་ནས། རྗེ་བཙུན་མ་སོ་སོར་འབྲང་མ་ཆེན་མོ་ལ་སོགས་པའི་ལྷ་མོ་ལྔ་དང༌། བླ་མ་དང༌། སངས་རྒྱས་དང༌། བྱང་ཆུབ་སེམས་དཔའི་ཚོགས་སྤྱན་དྲངས་ལ། ཕྱག་དང་མཆོད་པ་སྔོན་དུ་འགྲོ་བས་ཇི་སྐད་བཤད་པའི་ཡན་ལག་བདུན་པ་བྱས་ལ། སྒྱུ་མ་ལྟ་བུའི་སེམས་ཅན་ཐམས་ཅད་ལ་དམིགས་ཏེ། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཚད་མེད་པ་བསྒོམ་པར་བྱའོ། །དེ་ལྟར་བསོད་ནམས་ཀྱི་ཚོགས་བསགས་པའི་རྗེས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧྃ། ཞེས་བརྗོད་པས་ཆོས་ཐམས་ཅད་སྟོང་པ་ཉིད་དུ་བསམ་པ་ནི། ཡེ་ཤེས་ཀྱི་ཚོགས་བསགས་པའོ། །ནམ་མཁའི་ཁམས་དེ་ཉིད་དུ་པྃ་ལས་པདྨ་འདབ་མ་བརྒྱད་པ་སྣ་ཚོགས་པའི་ཁ་དོག་ཅན་གྱི་སྟེང་དུ་རྃ་ལས་ཉི་མའི་དཀྱིལ་འཁོར་དེའི་དབུས་སུ་ཧཱུྃ་གི་ཡི་གེ་གྱུར་པ་ལས་སྣ་ཚོགས་རྡོ་རྗེ་ལྟེ་བར་ཧཱུྃ་གིས་མཚན་པ་དམིགས་ཏེ། དེ་ལས་སྣ་ཚོགས་པའི་འོད་ཟེར་ཕྱོགས་ཀུན་དུ་སྤྲོས་པས་རབ་ཏུ་བརྟན་ཞིང་མི་ཕྱེད་པ། གོ་མཚམས་མེད་པའི་རྡོ་རྗེའི་ས་གཞི་དང༌། རྭ་བ་དང༌། དྲྭ་བ་དང༌། གུར་དང༌། བླ་རེ་དང༌། མདའི་དྲྭ་བ་དང༌། དུས་མཐའི་མེ་ལྟ་བུའི་ཡེ་ཤེས་ཀྱི་མེ་རབ་ཏུ་འབར་བས་ཡོངས་སུ་བསྐོར་བའི་སྲུང་བའི་འཁོར་ལོ་བརྟན་པར་བསྒོམ་པར་བྱའོ། །དེའི་དབུས་སུ་སུྃ་གྱི་ཡི་གེ་ཡོངས་སུ་གྱུར་པ་ལས་རིའི་རྒྱལ་པོ་རི་རབ། ཤར་ཤེལ། ལྷོ་བཻ་ཌཱུརྻ། ནུབ་པདྨ་རཱ་ག བྱང་གསེར་ལས་གྲུབ་པ། བང་རིམ་བཞི་དང་ལྡན་པ། སྟེང་ན་རིན་པོ་ཆེའི་ལྕོག་བརྒྱད་ཀྱིས་མཛེས་པར་བྱས་པ། དེའི་དབུས་སུ་སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེའི་ལྟེ་བར་བྷྲཱུྃ་གྱི་ཡི་གེ་ཡོངས་སུ་གྱུར་པ་ལས་ཡེ་ཤེས་རིན་པོ་ཆེའི་རང་བཞིན་ལས་གྲུབ་པའི་གཞལ་ཡས་ཁང་གྲུ་བཞི་པ། སྒོ་བཞི་པ་རྩིག་པ་ལྔ་དང་ལྡན་པ་དེའི་སྟེང་དུ་རིན་པོ་ཆེའི་ཕ་གུ་སེར་པོ་ལས་དྲྭ་བ་དང་དྲྭ་བ་ཕྱེད་པ་འཕྱང་བ། དེའི་སྟེང་དུ་མདའ་ཡབ་དང༌། པུ་ཤུས་མཛེས་པར་བྱས་པ། ཕྱི་འདོད་ཡོན་གྱི་སྣམ་བུ་ལ་ལྷ་མོ་རྣམས་ཀྱིས་མཆོད་རྫས་དུ་མ་ཐོགས་ནས་མཆོད་པ། ནང་ཀ་བ་བརྒྱད་དང་ལྡན་པ། སྟེང་དུ་རིན་པོ་ཆེའི་གདུང་བཞིས་ཕྱུར་བུར་ཕུབས་པའི་སྟེང་ན་རྡོ་རྗེ་རིན་པོ་ཆེའི་ཏོག་གིས་བརྒྱན་པ། སྒོ་བཞིའི་ཐད་སོར་རྟ་བབས་ཀ་བ་བཞིས་བཏེག་པའི་བང་རིམ་བཞི་པའི་སྟེང་དུ་ཆོས་ཀྱི་འཁོར་ལོ་དང༌། རི་དྭགས་དང༌། གདུགས་དང་བཅས་པ། གཞན་ཡང་འཕན་དང༌། རྒྱལ་མཚན་དང༌། ལྡ་ལྡི་དང༌། མེ་ཏོག་གི་ཕྲེང་བ་དང༌། རྔ་ཡབ་ནོར་བུའི་ཡུ་བ་ཅན་ལ་སོགས་པ་དུ་མས་མཛེས་པར་བརྒྱན་པར་བསམ་མོ། །དེའི་ནང་དུ་པྃ་ལས་ཆུ་སྐྱེས་འདབ་མ་བརྒྱད་པ་ལྟེ་བ་དང་གེ་སར་དུ་བཅས་པ་བསྐྱེད་ལ་དེའི་དབུས་དང༌། ཕྱོགས་ཀྱི་འདབ་མ་བཞི་དང་ལྔར་པདྨ་འདབ་མ་བརྒྱད་པ་ལྔ་བསྒོམས་ནས། ཤར་ཕྱོགས་ཀྱི་པདྨའི་སྟེང་དུ་ཉི་མའི་གདན་དང༌། གཞན་རྣམས་སུ་ཟླ་བའི་གདན་རེ་རེ་བསམ་མོ། །དེ་དག་ནི་རྟེན་བསྐྱེད་པའོ། །དེ་ནས་བརྟེན་པ་ལྷ་བསྐྱེད་པ་ནི། གདན་དབུས་མའི་སྟེང་དུ་པྲྃ་དཀར་པོ། ཤར་དང༌། ལྷོ་དང༌། ནུབ་དང༌། བྱང་རྣམས་སུ་ཧཱུྃ་དང༌། མྃ་དང༌། ཤྃ་དང༌། གྃ་གི་ཡི་གེ་སྔོན་པོ་དང༌། སེར་པོ་དང༌། དམར་པོ་དང༌། ལྗང་གུ་རྣམས་བསམས་ལ། དེ་རྣམས་ལས་འོད་ཟེར་སྣ་ཚོགས་པ་འཕྲོས་པས། ནམ་མཁའི་མཐས་གཏུགས་པའི་སངས་རྒྱས་ཀྱི་ཞིང་ཡོངས་སུ་དག་པ་དང༌། སེམས་ཅན་ཡོངས་སུ་སྨིན་པར་བྱས་ནས་སླར་འདུས་ཏེ། ས་བོན་སོ་སོ་ལ་ཐིམ་པས་རྐྱེན་བྱས་ནས། ཆོས་ཀྱི་ཡི་གེ་དེ་དག་ཡོངས་སུ་གྱུར་པ་ལས་འཆད་པར་འགྱུར་བའི་ལྷ་མོ་ལྔ་པོ་ཅིག་ཆར་བསྐྱེད་ལ། རིམ་གྱིས་གསལ་གདབ་པར་བྱའོ། །དེ་ཡང་དབུས་སུ་རྗེ་བཙུན་མ་སོ་སོར་འབྲང་མ་ཆེན་མོ་གངས་རིའི་ཕུང་པོ་ལྟར་རབ་ཏུ་དཀར་བ་ལོ་བཅུ་དྲུག་ལོན་པའི་རྣམ་པ་ཅན། ཞལ་བཞི་ཕྱག་བརྒྱད་མ། རྡོ་རྗེའི་སྐྱིལ་མོ་ཀྲུང་གིས་བཞུགས་པ། རྩ་བའི་ཞལ་དཀར་བ། གཡས་གནག་པ། རྒྱབ་སེར་བ། གཡོན་དམར་བ་ཞལ་རེ་རེ་ཞིང་སྤྱན་གསུམ་གསུམ་དང་ལྡན་པ། གཡས་ཀྱི་ཕྱག་བཞི་ན། འཁོར་ལོ་དང༌། རྡོ་རྗེ་དང༌། མདའ་དང༌། རལ་གྲི། གཡོན་གྱི་ཕྱག་བཞི་ན། རྡོ་རྗེ་ཞགས་པ་དང༌། རྩེ་གསུམ་པ་དང༌། གཞུ་དང་དགྲ་སྟ་འཛིན་པ། སྤྱི་བོར་མཆོད་རྟེན་གྱིས་བརྒྱན་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ཅིང༌། དར་སྣ་ཚོགས་པའི་ན་བཟས་ཀླུབས་པ་ཉི་མའི་དཀྱིལ་འཁོར་གྱི་རྒྱབ་ཡོལ་ཅན། ལོ་མ་དང༌། མེ་ཏོག་དང༌། འབྲས་བུ་དུ་མས་སྤུད་པའི་བྱང་ཆུབ་ཀྱི་ཤིང་དྲུང་ན་བཞུགས་པར་བསམ་པར་བྱའོ། །ཤར་དུ་སྟོང་ཆེན་མོ་རབ་ཏུ་འཇོམས་མ་ཨིནྡྲ་ནཱི་ལ་ལྟར་སྔོ་བ། ཉི་མའི་གདན་ལ་ཞབས་གཡས་ཅུང་ཟད་བརྐྱང་བའི་རོལ་པའི་འདུག་སྟངས་ཀྱིས་བཞུགས་པ། ཞལ་བཞི་ཕྱག་བརྒྱད་མ་རྩ་བའི་ཞལ་སྔོ་བ། གཡས་དཀར་བ། རྒྱབ་སེར་བ། གཡོན་དམར་བ། ཞལ་རེ་རེ་ཞིང་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། ཞལ་ལ་ལ་ནི་མཆེ་བ་གཙིགས་ཤིང༌། ལ་ལ་ནི་རབ་ཏུ་གདངས་ནས་ལྗགས་འདྲིལ་བ། སྨིན་མའི་དབུས་ན་ཁྲོ་གཉེར་བསྡུས་པ། གཡས་ཀྱི་ཕྱག་བཞིས་རྡོ་རྗེ་དང་བཅས་པའི་མཆོག་སྦྱིན་པ་དང༌། ལྕགས་ཀྱུ་དང༌། མདའ་དང༌། རལ་གྲི། གཡོན་གྱི་ཕྱག་བཞི་ན་ཞགས་པ་དང་བཅས་པའི་སྡིགས་མཛུབ་དང༌། དགྲ་སྟ་དང༌། གཞུ་དང༌། པདྨའི་སྟེང་ན་རིན་པོ་ཆེ་ཟུར་དྲུག་པ་འཛིན་པ། མི་མགོ་སྐམ་པོ་ལྔ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་ཅན། རུས་པ་དང༌། རིན་པོ་ཆེ་དང༌། སྤྲུལ་གདུག་པའི་རྒྱན་གྱིས་བརྒྱན་པ། སྟག་གི་པགས་པའི་ཤམ་ཐབས་ཅན། དབུ་སྐྲ་སེར་པོ་གྱེན་དུ་འབར་བ། རབ་ཏུ་ཁྲོས་པ། དྲག་མོའི་ཚུལ་ཅན། ཏཱ་ལའི་སྡོང་པོ་རབ་ཏུ་རྒྱས་པའི་ཤིང་དྲུང་ན། ཡེ་ཤེས་ཀྱི་མེ་རབ་ཏུ་འབར་བའི་དབུས་སུ་བཞུགས་པར་བསམ་མོ། །ལྷོར་རྨ་བྱ་ཆེན་མོ་གསེར་གྱི་མདོག་ཅན། སེམས་དཔའི་སྐྱིལ་མོ་ཀྲུང་གིས་བཞུགས་པ། ཞལ་གསུམ་ཕྱག་བརྒྱད་མ། རྩ་བའི་ཞལ་སེར་བ། གཡས་གནག་པ། གཡོན་དམར་བ། ཞལ་རེ་རེ་ལ་སྤྱན་གསུམ་གསུམ་དང་ལྡན་པ། གཡས་ཀྱི་ཕྱག་བཞི་ན་མཆོག་སྦྱིན་དང༌། རིན་པོ་ཆེའི་རྒྱུན་འབབ་པའི་བུམ་པ་དང༌། འཁོར་ལོ་དང་རལ་གྲི། གཡོན་གྱི་ཕྱག་བཞི་ན། ལྷུང་བཟེད་ཀྱི་སྟེང་ན་དགེ་སློང་གནས་པ་དང༌། རྨ་བྱའི་མཇུག་སྒྲོ་དང༌། བུམ་པའི་སྟེང་ན་སྣ་ཚོགས་རྡོ་རྗེ་གནས་པ་དང༌། རིན་པོ་ཆེའི་རྒྱལ་མཚན་འཛིན་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ཅིང༌། དར་སྣ་ཚོགས་པའི་ན་བཟས་ཀླུབས་པ། ཉི་མའི་རྒྱབ་ཡོལ་ཅན། མྱ་ངན་མེད་པའི་ཤིང་དྲུང་ན་བཞུགས་པར་བསམ་མོ། །ནུབ་ཏུ་གསང་སྔགས་རྗེས་སུ་འཛིན་མ། པདྨ་རཱ་ག་ལྟར་དམར་བ། སྐྱིལ་མོ་ཀྲུང་གིས་བཞུགས་པ། གཞོན་ནུ་དར་ལ་བབ་པ། ཞལ་གསུམ་ཕྱག་བཅུ་གཉིས་མ། རྩ་བའི་ཞལ་དམར་བ། གཡས་གནག་པ། གཡོན་དཀར་བ། ཞལ་རེ་རེ་ལ་སྤྱན་གསུམ་གསུམ་དང་ལྡན་པ། ཕྱག་དང་པོ་གཉིས་ཀྱིས་ཆོས་འཆད་ཀྱི་ཕྱག་རྒྱ། དེའི་འོག་མ་གཉིས་ཀྱིས་ཏིང་ངེ་འཛིན་གྱི་ཕྱག་རྒྱ། གཡས་ཀྱི་ཕྱག་ལྷག་མ་བཞི་ན་མཆོག་སྦྱིན་དང༌། མི་འཇིགས་པ་སྦྱིན་པ་དང༌། རྡོ་རྗེ་དང༌། མདའ། གཡོན་གྱི་ཕྱག་ལྷག་མ་བཞི་ན་སྡིགས་མཛུབ་ཞགས་པ་དང་བཅས་པ་དང༌། པདྨས་བརྒྱན་པའི་བུམ་པ་དང༌། རིན་པོ་ཆེའི་སྙེ་མ་དང༌། གཞུ་འཛིན་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། དར་སྣ་ཚོགས་ཀྱི་ན་བཟའ་ཅན། ཉི་མའི་རྒྱབ་ཡོལ་ལ་བརྟེན་པ། ཤི་རི་ཤའི་ཤིང་དྲུང་ན་བཞུགས་པར་བསམ་མོ། །བྱང་དུ་བསིལ་བའི་ཚལ་ཆེན་མོ། མ་ར་ཀ་ཏ་ལྟར་ལྗང་བ། སེམས་དཔའི་སྐྱིལ་མོ་ཀྲུང་གིས་བཞུགས་པ། ཞལ་གསུམ་ཕྱག་དྲུག་མ། རྩ་བའི་ཞལ་ལྗང་བ། གཡས་དཀར་བ། གཡོན་དམར་བ། གཡས་ཀྱི་ཕྱག་གསུམ་ན་མི་འཇིགས་པ་སྦྱིན་པའི་ཕྱག་རྒྱ་དང༌། རྡོ་རྗེ་དང༌། མདའ། གཡོན་གྱི་ཕྱག་གསུམ་ན་ཞགས་པ་དང་བཅས་པའི་སྡིགས་མཛུབ་དང༌། རིན་པོ་ཆེའི་རྒྱལ་མཚན་དང༌། གཞུ་འཛིན་པ། རིན་པོ་ཆེའི་རྒྱན་སྣ་ཚོགས་པས་བརྒྱན་ཅིང༌། དར་སྣ་ཚོགས་པའི་ན་བཟས་ཀླུབས་པ། ཉི་མའི་རྒྱབ་ཡོལ་ཅན། ཙམ་པ་ཀའི་ཤིང་དྲུང་ན་བཞུགས་པར་བསམ་མོ། །འོག་གཞི་པདྨ་འདབ་མ་བརྒྱད་པའི་མཚམས་ཀྱི་འདབ་མ་བཞིར་ཡེ་ཤེས་ཀྱི་བདུད་རྩིས་ཡོངས་སུ་གང་བའི་བུམ་པ་བཞི་བསམ་པར་བྱའོ། །དེ་ལྟར་ཡེ་ཤེས་ལྔའི་བདག་ཉིད་ཅན་གྱི་ལྷ་མོ་ལྔའི་སྐུ་རྟེན་དང་བརྟེན་པར་བཅས་པ་གསལ་བར་དམིགས་ནས། དེ་དག་གི་དཔྲལ་བ་དང༌། མགྲིན་པ་དང༌། སྙིང་གའི་གནས་སུ་ཡི་གེ་གསུམ་དང༌། སྙིང་གི་ནང་དུ་པདྨ་དང་ཟླ་བ་ལ་གནས་པ་སོ་སོའི་ཁ་དོག་དང་མཚུངས་པའི་ས་བོན་གྱི་ཡི་གེ་བསམས་ནས། དེ་དག་ལས་རྣམ་པ་སྣ་ཚོགས་པའི་འོད་ཟེར་ནམ་མཁའི་ཁམས་ཁྱབ་པར་སྤྲོས་པས་རང་བཞིན་གྱི་གནས་ནས། རང་གིས་བསྒོམས་པ་ལྟ་བུའི་དཀྱིལ་འཁོར་ལ་ཕྱོགས་བཅུའི་ཞིང་ཁམས་ཐམས་ཅད་ན་བཞུགས་པའི་སྲས་དང་འཁོར་དུ་བཅས་པའི་དེ་བཞིན་གཤེགས་པ་མ་ལུས་པས་ཡོངས་སུ་བསྐོར་བའི་ཡེ་ཤེས་ཀྱི་འཁོར་ལོ་སྤྱན་དྲངས་ལ། མེ་ཏོག་ལ་སོགས་པས་ཡང་དག་པར་མཆོད་ནས། རྡོ་རྗེ་བསྡུ་བའི་ཕྱག་རྒྱ་དང༌། ཨོཾ་སརྦ་ཏ་ཐཱ་ག་ཏ་བཛྲ་ས་མཱ་ཛཿཛཿཧཱུྃ་བྃ་ཧོཿཞེས་བརྗོད་པས་དམ་ཚིག་པ་དང༌། ཡེ་ཤེས་པ་གཉིས་སུ་མེད་པར་གྱུར་པར་བསམ་མོ། །དེ་ནས་ཡང་ཡི་གེ་དེ་དག་ལས་སྔར་བསྟན་པའི་ཚུལ་གྱིས་འོད་ཟེར་དུ་མ་སྤྲོས་པས་དབང་བསྐུར་གྱི་ལྷ་དེ་བཞིན་གཤེགས་པ་རིགས་ལྔ་འཁོར་དང་བཅས་པ་སྤྱན་དྲངས་ཏེ། ཡིད་ལས་བྱུང་བའི་མཆོད་པས་མངོན་པར་མཆོད་ནས། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱ་ཞེས་གསོལ་བ་བཏབ་པས། སངས་རྒྱས་དེ་རྣམས་ཀྱིས་ཡེ་ཤེས་ཀྱི་ཆུས་དབང་བསྐུར་བས་ལྷ་ཐམས་ཅད་ཀྱི་ལུས་ངག་ཡིད་གསུམ་གྱི་དྲི་མ་སྦྱངས། སྔགས་དང༌། ཕྱག་རྒྱ་དང་ཏིང་ངེ་འཛིན་གྱི་ཚོགས་ལ་དབང་བར་བྱས་ནས། ཆུ་ལྷག་མ་ཡར་ལུད་པ་ལས་རིགས་ཀྱི་བདག་པོ་རྡོ་རྗེ་སེམས་དཔའ་ལྔས་དབུར་བརྒྱན་པར་བསམ་མོ། །དེ་ལྟར་ལྷའི་སྐུ་སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་ནམ། དབང་པོའི་གཞུ་ལྟ་བུ་དེ་ཉིད་ལ་ཡིད་རྩེ་གཅིག་ཏུ་མཉམ་པར་གཞག་པར་བྱའོ། །དེའི་རྗེས་སུ་ཤེས་པ་འཕྲོ་བར་གྱུར་ན་སྔགས་ཀྱི་བཟླས་པ་ལ་འཇུག་པར་བྱ་སྟེ། དེ་ཡང་སོ་སོའི་ཐུགས་ཀའི་ས་བོན་གྱི་མཐའ་མར་སོ་སོའི་སྔགས་ཀྱི་ཕྲེང་བས་བསྐོར་ཞིང༌། ཕྲེང་བ་དེ་དག་ལས་འོད་ཟེར་དཔག་ཏུ་མེད་པ་འཕྲོས་པས་སེམས་ཅན་གྱི་དོན་བྱས། ལས་སོ་སོ་བསྒྲུབ་པ་ལ་དམིགས་ནས་ལས་དང་རྗེས་སུ་འབྲེལ་བའི་ཕྲེང་བ་འཛིན་པས། གསང་སྔགས་འདི་དག་བཟླ་བར་བྱའོ། །དེའང་ཨོཾ་མ་ཎི་དཱ་རི་བཛྲཱི་ནི་མ་ཧཱ་པྲ་ཏི་སཱི་རེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། རྗེ་བཙུན་སོ་སོར་འབྲང་མ་ཆེན་མོའི་འོ། །ཨོཾ་ཨ་མྲྀ་ཏ་བ་རེ་ཝ་ར་ཝ་ར་པྲ་ཝ་ར་བི་ཤུདྡྷེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྟོང་ཆེན་མོ་རབ་ཏུ་འཇོམས་མའི་འོ། །ཨོཾ་ཨ་མྲྀ་ཏ་བི་ལོ་ཀཱི་ནི་གརྦྷ་སྃ་རཀྵ་ནི་ཨཱ་ཀརྵ་ནི་ཧཱུྃ་ཧཱུྃ་ཕཊ་སྭཱ་ཧཱ། རྨ་བྱ་ཆེན་མོའི་འོ། །ཨོཾ་བི་མ་ལེ་བི་པཱུ་ལེ་ཛ་ཡ་ཝ་རེ་ཨ་མྲྀ་ཏེ་བི་ར་ཛེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། གསང་སྔགས་རྗེས་སུ་འཛིན་མའི་འོ། །ཨོཾ་བྷ་ར་བྷ་ར་སཾ་བྷ་ར་སཾ་བྷ་ར་ཨིནྡྲཱ་ཡ་བ་ལ་བི་ཤོ་དྷ་ནི་ཧཱུྃ་ཧཱུྃ་ཕཊ་ཕཊ་རུ་རུ་ཙ་ལེ་སྭཱ་ཧཱ། བསིལ་བའི་ཚལ་ཆེན་མོའི་འོ། །ཇི་སྲིད་མི་སྐྱོའི་བར་དུ་བཟླ་བར་བྱའོ། །དེའི་རྗེས་སུ་ཏིང་ངེ་འཛིན་གྱི་དཀྱིལ་འཁོར་དེ་དག་ལ་དངོས་སུ་འབྱོར་པའམ། མ་འབྱོར་ན་ཡིད་ཀྱིས་སྤྲུལ་པའི་མཆོད་པས་མཆོད་ནས་མངོན་པར་བསྟོད་དེ། ཨོཾ་བཛྲ་སཏྭ་ས་མ་ཡ་མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོ་ཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨྨ་སུ་ཙ་མེ། ཙིཏྟཾ་ཤྲི་ཡཿཀུ་རུ་ཧཱུྃ་ཧ་ཧ་ཧ་ཧ་ཧོཿབྷ་ག་ཝཱན། སརྦ་ཏ་ཐཱ་ག་ཏ་བཛྲ་མ་མེ་མུཉྩ་བཛྲཱི་བྷ་ཝ། མ་ཧཱ་ས་མ་ཡ་སཏྭ་ཨ། ཞེས་གསུམ་མམ་བདུན་བརྗོད་པས་ཆོ་ག་ལྷག་ཆད་ཁ་བསྐངས་ནས། ཡེ་ཤེས་པ་རང་ལས་ཕྱེ་ནས་མདུན་ན་གནས་པ་ལ་མཆོད་ཅིང་བསྟོད་ནས་གསོལ་བ་གདབ་པ་ཚུལ་བཞིན་དུ་བྱས་ལ་བཟོད་པར་གསོལ་ཏེ་སྨོན་ལམ་རྒྱ་ཆེན་པོ་བཏབ་ནས། ཨོཾ་བཛྲ་མུཿཞེས་བརྗོད་པས་གཤེགས་སུ་གསོལ་ལོ། །རང་གི་གནས་གསུམ་ཡི་གེ་གསུམ་གྱིས་བསྲུངས་ནས། ཅི་བདེ་བར་གནས་པར་བྱའོ། །དེ་དག་གིས་ནི་མངོན་པར་རྟོགས་པའི་རིམ་པ་བསྟན་ཟིན་ཏོ། །རང་དང་གཞན་གྱི་དོན་བསྒྲུབ་པའི་ཕྱིར་ཆོ་གའི་རིམ་པ་ལས་ཀྱི་ཡན་ལག་དུ་མ་དང་བཅས་པ་ནི་ཁོ་བོས་གཞན་དུ་སྟོན་པར་འགྱུར་བས་དེར་ཤེས་པར་བྱའོ། །འདི་ཡི་གཟུངས་རྣམས་བྱ་བའི་རྒྱུད་ཀྱི་ཁོངས་སུ་འདུ་ཞིང་དེ་དག་གི །སྣ་ཚོགས་ཆོ་གའི་ལས་ཀྱི་རིམ་པ་སོ་སོར་གནས་མོད་དེ་ལྟ་ནའང༌། །བླ་མ་བརྒྱུད་པའི་མན་ངག་རིམ་པས་རྣལ་འབྱོར་རྒྱུད་ཀྱི་རྗེས་འབྲངས་ནས། །ལྷ་མོ་རྣམ་ལྔ་བསྡུས་པའི་སྒྲུབ་ཐབས་ཁོ་བོས་དེང་འདིར་བསྟན་ཟིན་ཏོ། །དགེ་བ་གང་ཞིག་ནམ་མཁའི་ངོས་ལྟར་རྒྱ་ཆེར་ཡངས་པ་གང་བསྐྲུན་པས། །སྡུག་བསྔལ་རྦ་ཀློང་རྣམ་པར་འཁྲུགས་པའི་སྲིད་པའི་མཚོ་ལས་འགྲོ་བ་ཀུན། །རབ་ཏུ་བསྒྲལ་ནས་ཡོན་ཏན་ནོར་བུས་རྣམ་པར་བཀྲ་བ་ཐར་པ་ཡི། །གླིང་མཆོག་དམ་པར་སྟོབས་བཅུའི་སྟོབས་ལྡན་བསྙེངས་བྲལ་མཆོག་ལ་འགོད་པར་ཤོག །བསྲུང་བ་ལྔ་ཡི་སྒྲུབ་པའི་ཐབས་འདི་ནི། ཆོས་ཀྱི་རྗེ་ས་སྐྱ་པཎྜི་ཏ་ཆེན་པོའི་ཞབས་རྡུལ་སྤྱི་བོས་ལེན་པའི་བཙུན་པ་འཕགས་པ་ཞེས་བྱ་བས། ཤིང་མོ་ཡོས་བུའི་ལོ། གདུ་བུའི་ཟླ་བ་ལ་སྦྱར་བ་རྫོགས་སོ། །མངོན་པར་རྟོགས་པ་སྟེ་གཉིས་པའོ།།  །། ༈ གུ་རུས་དཔར་རྩ་སྤེལ་བའོ།།

རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com