།སྔ་རབས་པ་དག་འདི་ཚུར་མཐོང་གི་མངོན་སུམ་ཚད་མ་སྣང་བ་ལ་ཆད་མཐའ་བཀག་པའི་ཆ་ནས་དོན་དམ་སྒྲུབ་བྱེད་ཀྱི་ཚད་མར་འདོད་པ་ནི། གལ་ཏེ་འཇིག་རྟེན་ཚད་མ་ཡིན་ན་ནི། །ཞེས་སོགས་ཀྱི་གནོད་པ་འབབ་ཉེན་ཡོད་དོ། །རྗེས་སུ་དཔག་པའི་ཚད་མ་ནི་ལྐོག་ཏུ་གྱུར་པའི་ཡུལ་ཅན་རྟགས་བསྒྲུབ་པར་བྱ་བ་ལ་མི་འཁྲུལ་པ་ལས་སྐྱེས་པའི་ཤེས་པ་ཞེས་གསུངས་པས་སྟོང་ཉིད་བསྒྲུབ་པའི་སྐབས་སུའང་སྦྱར་བ་ཚིག་གསལ་ལས་གསུངས་པ་ལྟར་ཏེ། རྟགས་དང་རིགས་པ་དང་། འཐད་པ་རྣམས་རྣམ་གྲངས་ཡིན་པས་འདི་ལ་བཞི་སྟེ། གཞན་ལ་གྲགས་ཀྱི་རྗེས་དཔག འགལ་བ་བརྗོད་པའི་ཐལ་འགྱུར། རྒྱུ་མཚན་མཚུངས་པའི་མགོ་སྙོམས། སྒྲུབ་བྱེད་བསྒྲུབ་བྱ་དང་མཚུངས་པའི་མ་གྲུབ་པའོ། །དང་པོ་གཉིས་ལ་སྔ་རབས་པ་དག ཕྱོགས་ཆོས་ཁྱབ་པ་ཕ་རོལ་ལ་གྲུབ་པའི་རྟགས་ཀྱིས་ཕ་རོལ་གྱི་ངོར། མཐའ་གཅིག་ཏུ་ངེས་པའི་དམ་བཅའ་བསྒྲུབ་པ་གཞན་ལ་གྲགས་དང་། ཕྱོགས་ཆོས་ཁྱབ་པ་བསལ་བ་གསུམ་ཀ་ཕ་རོལ་ལ་གྲུབ་པས་ཕ་རོལ་གྱི་ངོར་བཟློག་པ་འཕངས་པ་འགལ་བ་བརྗོད་པའི་ཐལ་འགྱུར་ཡིན་ཞེས་བཞེད་པ་ནི་འཐད་པར་མ་གོ་སྟེ། ཚིག་གསལ་ལས། གཞན་ལ་གྲགས་ཀྱི་སྐབས་སུ་དངོས་པོ་བདག་གིས་བདག་ཉིད་དུ་ཡོད་པ་གཏན་ཚིགས་དང་། སྐྱེ་བ་དོན་མེད་པ་བསྒྲུབ་བྱའི་ཆོས་སུ་གསུངས་ཤིང་། འགལ་བ་བརྗོད་པའི་ཐལ་འགྱུར་ལའང་དེ་ཉིད་གཏན་ཚིགས་དང་། ཐལ་ཆོས་གསུངས་པས་ཕ་རོལ་པོའི་ངོར་སྐྱེ་བ་དོན་ཡོད་གྲུབ་ན་གཞན་ལ་གྲགས་ཀྱིས་མཐའ་གཅིག་ཏུ་ངེས་པའི་སྒྲུབ་བྱ་བསྒྲུབ་པ་དང་འགལ་ཞིང་། མ་གྲུབ་ན་འགལ་བ་བརྗོད་པས་བཟློག་པ་འཕངས་པ་དང་འགལ་བའི་ཕྱིར་དང་། ལོག་རྟོག་བཟློག་ནས་བདག་སྐྱེ་མེད་པར་ངེས་པ་ལ་ནི་གཉིས་ཀའང་མཚུངས་པའི་ཕྱིར་རོ། །འོ་ན་ཅི་ལྟར་ཞེ་ན་འགལ་བ་བརྗོད་པའི་ཐལ་འགྱུར་ཙམ་གྱིས་ཕ་རོལ་པོའི་ལོག་རྟོག་བཟློག་ནུས་ན་འགལ་བ་བརྗོད་པའི་ཐལ་འགྱུར་དང་། ཐལ་འགྱུར་གྱི་སྦྱོར་ངག་དེ་ཉིད་ལ་གཏམ་རྒྱུད་སྣ་ཚོགས་པའི་ངག་ཡན་ལག་ལྔ་པར་སྦྱོར་བའི་ཚེ་གཞན་ལ་གྲགས་ཀྱིས་རྗེས་དཔག་ཡིན་པར་ཚིག་གསལ་ལས་གསུངས་ཏེ། སྔར་བདག་སྐྱེ་འགོག་པའི་སྐབས་སུ་བཤད་ཟིན་ཏོ། །རྒྱུ་མཚན་མཚུངས་པའི་མགོ་སྙོམས་ནི་རྒྱུ་མཚན་མཚུངས་ཀྱང་རྒྱུ་མཚན་ཅན་མི་མཚུངས་པར་འདོད་པ་ལ་རྒྱུ་མཚན་ཅན་ཡང་མཚུངས་པར་མགོ་བསྒྲེ་བ་སྟེ། འདི་ལ་གཙང་ནག་པས་རྟོག་གེའི་མགོ་སྙོམས་དང་། ཐོད་རྒལ་གྱི་མགོ་སྙོམས་དང་། སྤྱི་ལྡོག་གཅིག་པ་ཡིན་པས་དགག་པ་དང་གསུམ་ལས། དང་པོ་ནི། ཐ་སྙད་ཀྱི་རྒྱུ་མཚན་ཡོད་པར་མཚུངས་པས་དགག་པ་སྟེ། མུ་སྟེགས་པ་དག དོན་དང་ཤེས་པ་ལ་རྟག་མི་རྟག་དང་། རྒྱུ་ཡོད་མེད་ཀྱི་ཁྱད་པར་ཁས་ལེན་པ་ལ་གནས་སྐབས་རེས་འགའ་བ་དང་། རྒྱུན་བརྟན་པས་རྒྱུ་མཚན་གསུམ་མཚུངས་པས་དགག་པ་དང་། ཉན་ཐོས་པ་དག་རྡུལ་དང་སྐད་ཅིག་བདེན། རགས་པ་དང་། རྒྱུན་མི་བདེན་པར་རྟོགས་པ་ལ་འགལ་བའི་ཆོས་ལྡན་དུ་མཚུངས་པས་དགག་པ་དང་། སེམས་ཙམ་པ་དོན་ཀུན་བརྟགས་དང་། ཤེས་པ་གཞན་དབང་དུ་རྟོག་པ་ལ་ཇི་ལྟར་སྣང་བའི་དོན་བྱེད་ཅིང་བརྟགས་ན་མི་རྙེད་པར་མཚུངས་པས་དགག་པའོ། །གཉིས་པ་ནི་ཡང་དག་པའི་རྒྱུན་མེད་པར་མཚུངས་པས་དགག་པ་སྟེ། གཅིག་ལ་བྱ་བྱེད་མི་རུང་བར་འགལ་བ་ལས་ཤེས་པའི་རང་རིག་པས་རང་མི་སྐྱེད་པ་དང་། མར་མེའི་རང་གསལ་བས་རང་མི་བསྲེག་པ་དང་། མུན་པས་གཞན་སྒྲིབ་པས་རང་མི་སྒྲིབ་པར་ངེས་པ་དང་། འབྱུང་བར་འདྲ་བ་ལས་འབྱུང་བའི་ནུས་པ་སོ་སོར་ངེས་པ་དང་། དབང་པོར་འདྲ་བ་ལས་དབང་པོའི་ནུས་པ་སོ་སོར་ངེས་པ་དང་། འབྲས་བུ་རྣམས་རྒྱུ་ལ་མེད་པར་འདྲ་བ་ལས་སྐྱེ་བ་དང་མི་སྐྱེ་བ་སོ་སོར་ངེས་པར་འདོད་པ་རྣམས་ལ་དེ་དག་གི་རྒྱུ་མཚན་རྟགས་ནས་དགག་པ་སྟེ། ཐ་མ་འདི་ལ་མཐོང་བ་ཉིད་ཀྱི་རྒྱུ་མཚན་རྟགས་པ་དང་། ཡང་དག་པར་མཐོང་བར་མ་གྲུབ་པ་དང་། འཁྲུལ་ངོར་མཐོང་ཡང་དེར་ངེས་པའི་རྒྱུ་མ་མཐོང་བས་དེ་ལྟར་མཐོང་ཞེས་པའི་ལན་དགག་པ་དང་། མཐོང་མ་མཐོང་གི་རྒྱུ་མཚན་བརྟགས་པས་ཆོས་ཉིད་ཡིན་ཞེས་པའི་ལན་དགག་པ་དང་། མེ་སོལ་ལྟ་བུ་གཞན་ལ་འབྲས་བུ་མྱུ་གུ་མ་མཐོང་བས་ནུས་པ་མི་ཁེགས་པས་ནུས་པ་ཡོད་མེད་ཀྱི་ལན་དགག་པ་སྟེ། དེ་དག་ཀྱང་སློབ་དཔོན་གྱི་གཞུང་ལས་འབྱུང་བ་ཡིན་ནོ། །གསུམ་པ་ནི། རྟོག་གེ་པ་དག་གིས་རྟགས་མི་འཁྲུལ་བའི་རྒྱུ་སྤྱི་ལྡོག་གཅིག་པའི་ཁྱབ་པ་འདོད་པ་ལ་མཐུན་ཕྱོགས་ལ་ལྡན་པ་དང་། མི་མཐུན་ཕྱོགས་ལ་བྲལ་བར་མཐོང་བའི་རྟགས། ལྡོག་པ་གཅིག་པའི་གཉའ་ཤིང་གིས་མནན་པ་སྟེ། ཇི་སྐད་དུ་གཞན་ཉིད་ཅེས་པའི། གཏན་ཚིགས་འདིས་ནི་ཁྱད་པར་དག་ཀྱང་འཇོམས། །ཞེས་གསུངས་པ་ལྟར་རོ་ཞེས་བཞེད་དོ། །སྒྲུབ་བྱེད་བསྒྲུབ་བྱ་དང་མཚུངས་པའི་མ་གྲུབ་པ་ནི་རྒོལ་བས་བསྒྲུབ་བྱ་བསྒྲུབ་པ་ལ་བདེན་པའི་ཆོས་འགའ་ཞིག་བཀོད་ན་ཕྱོགས་ཆོས་མི་འགྲུབ་པ་དང་། སྣང་བའི་ཆོས་འགའ་ཞིག་བཀོད་ན་ཁྱབ་པ་མི་འགྲུབ་པ་དང་། གཉིས་ཀ་ལ་ཚད་མས་གྲུབ་པའི་དཔེ་བསྟན་པར་མི་ནུས་པ་སྟེ། ཇི་སྐད་དུ། སྟོང་པ་ཉིད་ཀྱིས་བརྩད་བྱས་ཚེ། །ཞེས་སོགས་གསུངས་པ་ལྟར་རོ། །དེ་བཞིན་དུ་སུན་འབྱིན་བསྒྲུབ་བྱ་དང་མཚུངས་པ་ནི་དབུ་མ་པས་ཕུང་པོ་རང་བཞིན་མེད་པ་ཡིན་ཏེ། རྟེན་ནས་འབྱུང་བ་ཡིན་པའི་ཕྱིར་ཞེས་བཤད་པ་ལ་གཏན་ཚིགས་དེ་ཤེས་པའི་སྐད་ཅིག་མས་དངོས་སུ་མ་ངེས་པའི་སུན་འབྱིན་ཉིད་ཀྱང་བསྒྲུབ་བྱ་དང་མཚུངས་པར་མ་གྲུབ་པའོ། །ལུང་ཚད་མ་ནི་ངེས་དོན་སྟོང་ཉིད་སྟོན་པའི་ལུང་ལ་བརྟེན་ནས་བརྗོད་བྱ་ངེས་པ་སྟེ། དབང་རྣོན་ཆོས་ཀྱི་རྗེས་འབྲང་གི་ལྟ་བ་ལྟ་བུའོ། །དཔེ་ཉེར་འཇལ་གྱི་ཚད་མ་ནི་སྒྱུ་མ་དང་སྨིག་རྒྱུ་སོགས་དཔེར་བྱས་ནས་སྣང་བའི་དངོས་པོ་ཐམས་ཅད་ཀྱང་སྣང་བ་ལྟར་མི་བདེན་པར་རྟོགས་པ་སྟེ། དེ་ལྟར་ཚད་མ་བཞི་ལས་དང་པོ་ནི་མཐོང་བ་ཡང་དག་པ་དངོས་ཡིན་ལ་ཕྱི་མ་གསུམ་ནི། དོན་དམ་བདེན་པར་ཐབས་བྱུང་གྱུར་པ་སྟེ། །ཞེས་དང་། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །ཞེས་པའི་སྐབས་ནས་བསྟན་པའི་བསྟན་པ་དོན་དམ་རྟོགས་པའི་བློ་ཡིན་པས་དེར་བསྡུ་བའོ། །རིགས་ངོར་ཆོས་ཅན་དང་མཐུན་དཔེ་མ་གྲུབ་པས་རང་རྒྱུད་ཀྱི་གཏན་ཚིགས་མེད་ཅེས་པ་འདི་ལའང་ཐོག་མར་དཔྱད་གཞི་འཛིན་པའི་ཐ་སྙད་པའི་ཚད་མ་དང་། བར་དུ་དེ་ལ་དཔྱོད་པར་བྱེད་པའི་ཚེ་སྔ་རྒོལ་གྱི་ཚད་མ་དང་། ཐ་མར་དཔྱད་པ་རྫོགས་ནས་ཕྱིར་རྒོལ་གྱི་རྒྱུད་ལ་ཚད་མ་སྐྱེས་པའི་སྐབས་དང་གསུམ་ལས། དང་པོའི་ཚེ་སྔ་རྒོལ་གྱིས་ཀྱང་ཆོས་ཅན་ཁས་ལེན་ཏེ། ཐ་སྙད་ལ་ནི་མ་བརྟེན་པར། །དམ་པའི་དོན་ནི་བསྟན་མི་ནུས། །ཞེས་གསུངས་པའི་དོན་ནོ། །གཉིས་པའི་ཚེ་སྔར་རྒོལ་དབུ་མའི་ལྟ་བ་ལ་ཞུགས་ཟིན་པས་དེ་དག་ཁས་མི་ལེན་ཡང་ཕྱིར་རྒོལ་གྱིས་ཁས་ལེན་ཏེ། རྒྱུ་མཚན་སྔ་མ་ལྟར་རོ། །གསུམ་པའི་ཚེ་ཕྱིར་རྒོལ་གྱི་ངོར་ཡང་དེ་དག་ཁས་མི་ལེན་ཏེ། སྔར་རྒོལ་དང་ཁྱད་པར་མེད་པའི་ཕྱིར་རོ། །ལུགས་འདི་ལ་འདི་ཤིན་ཏུ་གནད་དུ་ཆེའོ། །བཞི་པ་བསྒྲུབ་བྱའི་སྒོ་ནས་བདག་མེད་གཉིས་སྒྲུབ་བྱེད་ཀྱི་རིགས་པ་ལ་ལྔ་སྟེ། ལུང་གི་སྒོ་ནས་ཐུན་མོང་དུ་བཤད། དགག་བྱའི་བདག་གཉིས་པོ་ངོས་བཟུང་། འགོག་བྱེད་ཀྱི་རིགས་པའི་རྣམ་གྲངས་བཤད། རིགས་པའི་གཙོ་བོ་གཉིས་སོ་སོར་བཤད། རིགས་པ་ཕན་ཚུན་མཚོན་པའི་ཚུལ་བཤད་པའོ། །དང་པོ་ནི། བཅོམ་ལྡན་འདས་ཉིད་ཀྱི་ལུང་ལས་ཀྱང་། དགག་གཞི་གང་ཟག་དང་ཆོས་ངོས་གཟུང་བ། དགག་བྱའི་བདག་ངོས་གཟུང་བ། དེ་མེད་པའི་རིགས་པ། བདག་མེད་རྟོགས་ནས་བསྒོམས་པའི་ཕན་ཡོན་རྣམས་གསལ་བར་གསུངས་ཏེ། རྒྱལ་པོ་འཆར་བྱེད་ལ་གདམས་པའི་མདོ་ལས། གང་ཟག་བདག་མེད་རྒྱལ་པོ་ཉན་པར་གྱིས། །གང་ཟག་ལྔ་ཕུང་རྒྱུན་ཡིན་ཅི་ཕྱིར་ན། །རྒྱུ་ནི་ལས་དང་ཉོན་མོངས་པས་གང་ནས། །འབྲས་བུ་ཕུང་པོ་ཟག་སྟེ་དེ་ཡི་བདག །བདག་ནི་སེམས་ཅན་སོ་སོའི་ལུས་འདི་ལ། །ང་དང་བདག་ཏུ་བཟུང་ནས་ཆགས་གྱུར་ཏེ། །བདག་ནི་ན་དང་ཤི་བཀྲེས་གྲང་གིས་དོགས། །བསྟོད་ན་དགའ་ཞིང་སྨད་ན་མི་དགའ་སྟེ། །དེ་ལ་དམིགས་ནས་མུ་སྟེགས་ལྟ་རྣམས་འཇུག །ངའམ་བདག་དེ་ཡོད་པ་མ་ཡིན་ཏེ། །ཕུང་པོ་འདི་ལ་བརྟགས་ནས་འཁྲུལ་པ་ཡིན། །མིང་ནི་བདག་མ་ཡིན་ཏེ་བཏགས་པ་ཙམ། །ལུས་ཀྱང་བདག་མ་ཡིན་ཏེ་ཤ་རུས་རྣམས། །འབྱུང་ཆེན་འདུས་པ་ཕྱི་རོལ་རྩིག་པ་འདྲ། །སེམས་ཀྱང་བདག་མ་ཡིན་ཏེ་དངོས་པོར་མེད། །ཆོས་ལ་བདག་མེད་རྒྱལ་པོ་ཉན་པར་གྱིས། །ཆོས་ནི་གཟུགས་སོགས་དངོས་པོ་ཐམས་ཅད་ཡིན། །བྱེད་པ་མེད་ལ་མཚན་ཉིད་འཛིན་ཕྱིར་རོ། །དེ་ལ་ལོག་རྟོག་མཚན་མར་བཅས་པ་དང་། །ལྟ་མི་མཐུན་པ་ཡིན་ཏེ་དེ་མེད་དོ། །དངོས་འདི་སྤངས་ནས་སྟོང་ཉིད་མི་བཙལ་ཏེ། །སྣང་བ་ཉིད་ན་སྟོང་པ་ཉིད་ཡིན་ཕྱིར། །གཞིག་བཅོམ་མི་རྟག་ཙམ་ལ་སྟོང་མི་གདགས། །སྣང་ལ་རང་བཞིན་མེད་པར་ཅིས་མངོན་ན། །ཡོད་མེད་དབུས་དང་གསུམ་དུ་མི་གནས་ཏེ། །ཡོད་པར་གྲགས་པ་འཁོར་བ་མྱ་ངན་འདས། །འཁོར་བའི་རང་བཞིན་ཡུལ་སེམས་རྣམ་གཉིས་ཏེ། །ཡུལ་འདི་དངོས་པོ་མེད་པ་འདི་ལྟར་བརྟག །རང་སྣང་རྡུལ་གཞིག་རྡུལ་ཡང་ཆས་གཞིག་མེད། །དངོས་སྣང་ཐམས་ཅད་སེམས་ཡིན་རྨི་ལམ་བཞིན། །སེམས་ཀྱང་ཁ་དོག་དབྱིབས་སོགས་རྣམས་དང་བྲལ། །དེས་ན་འཁོར་བ་སྟོང་ཞིང་བདག་མེད་དོ། །འཁོར་བ་མེད་པས་མྱ་ངན་འདས་པའང་མེད། །ཡོད་པ་མ་གྲུབ་པས་ན་མེད་པའང་མེད། །མཐའ་གཉིས་མེད་ཕྱིར་དབུས་ཀྱང་མེད་པ་ཡིན། །དེ་ལྟར་རྒྱལ་པོ་བདག་མེད་བསྒོམ་བྱས་ན། །བདག་འཛིན་འཁོར་བ་རྩད་ནས་ཆོད་པར་འགྱུར། །ཞེས་དེ་ལྟར་གསལ་བར་གསུངས་སོ། །གཉིས་པ་ལ་གསུམ་སྟེ། དགག་བྱ་མེད་པར་རྟོག་པ་དགག་པ་དང་། ཡོད་པའི་དགག་བྱའི་རྣམ་གྲངས་བསྟན་པ་དང་། སྐབས་ཀྱི་དགག་བྱ་བདག་གཉིས་ངོས་གཟུང་བའོ། །དང་པོ་ནི། ཁ་ཅིག་རྩོད་ཟློག་ལས། དགག་བྱ་ཅི་ཡང་མེད་པས་ན། །ང་ནི་ཅི་ཡང་མི་འགོག་གོ །ཞེས་གསུངས་པས་ན། དབུ་མ་པ་ལ་དགག་བྱ་ཅི་ཡང་ཡོད་པ་མ་ཡིན་ཏེ། ཡོད་ན་དགག་མི་ནུས་པའི་ཕྱིར་ཞེས་སྨྲའོ། །དེ་ནི་མི་རིགས་ཏེ། ལུང་གི་དགོངས་པ་ནི། རིགས་ངོར་དགོངས་པ་ཡིན་ལ། ཐ་སྙད་དུ་དགག་བྱ་དང་། འགོག་བྱེད་གཉིས་ཀ་སྒྱུ་མ་ཙམ་དུ་ཁས་ལེན་དགོས་ཏེ། ལུང་དེ་ཉིད་ལས། ཇི་ལྟར་སྤྲུལ་པས་སྤྲུལ་པ་དང་། །སྒྱུ་མའི་སྐྱེས་བུས་སྒྱུ་མ་ལ། །དགག་པར་བྱེད་པ་ཅི་འདྲ་བ། །དགག་པ་དེ་ཡང་དེ་འདྲར་འདོད། །ཅེས་གསུངས་པས་སོ། །དེས་ན་ལམ་གྱི་དགག་བྱ་ནི་བདེན་དངོས་སུ་ཞེན་པའམ། མཐའ་བཞིར་ཞེན་པའི་བློ་ཡིན་ཞིང་། རིགས་པའི་དགག་བྱ་ནི་གང་ལ་བདེན་འཛིན་ཞུགས་པའི་གཞི་ཐམས་ཅད་ཡིན་པས་དེ་དག་ཐ་སྙད་དུ་ཡོད་དེ། བུམ་པ་ལ་བདེན་འཛིན་ཞུགས་པ་ན་བུམ་པ་ཉིད་རང་གི་ཡན་ལག་རྣམས་ལ་རྣམ་པ་བདུན་གྱིས་བཙལ་ནས་དགག་དགོས་པ་བཞིན་ནོ། །བདེན་འཛིན་གྱི་འཛིན་སྟངས་ཀྱི་གཟུང་བྱ་བདེན་པར་གྲུབ་པ་ནི་ཐ་སྙད་དུའང་དགག་བྱ་ཡིན་ཏེ། ཇི་སྐད་དུ། སྟོང་ཉིད་བག་ཆགས་གོམས་པས་ནི། །དངོས་པོའི་བག་ཆགས་སྤོང་འགྱུར་ཞིང་། །ཅི་ཡང་མེད་ཅེས་གོམས་པས་ནི། །དེ་ཡང་ཕྱི་ནས་སྤོང་བར་འགྱུར། །ཞེས་དང་། རྟོག་པས་མཐོང་བ་འཆིང་བ་སྟེ། །དེ་ནི་འདི་རུ་དགག་པར་བྱ། །ཞེས་གསུངས་པ་ལྟར་རོ། །གཉིས་པ་ལ་ལམ་གྱིས་དགག་བྱ་དང་། རིགས་པའི་དགག་བྱ་གཉིས་ལས། དང་པོ་ནི། གང་དུ་བཟུང་བས་འཛིན་པ་པོ་འཁོར་བར་འཆིང་བའི་རྒྱུ་ཡོད་མེད་དུ་འཛིན་པའི་འཁྲུལ་པ་མཐའ་དག་ཡིན་ཏེ། འཁོར་བའི་ཉེས་པ་བསྐྱེད་པས་དགག་དགོས་པ་དང་། ཞེན་ཡུལ་ལ་ཚད་མས་གནོད་པས་དགག་ནུས་པ་དང་། དེ་ཕྱིར་ཡོད་དང་མེད་པ་ལ། །མཁས་པས་གནས་པར་མི་བྱ་འོ། །ཞེས་དགག་པར་གསུངས་པའི་ཕྱིར་རོ། །གཉིས་པ་ལ་གཉིས་ཏེ། རྒྱུ་ཞེན་ཡུལ་ལ་འཁྲུལ་པའི་རྟོག་པ་ལོག་ཤེས་དང་། སྣང་ཡུལ་ལ་འཁྲུལ་པའི་རྟོག་མེད་ལོག་ཤེས་སོ། །དང་པོ་ནི། རྒྱུའི་དུས་ན་ལྟ་བ་རྟོགས་པས་དང་། གཉིས་པ་ནི། འབྲས་བུའི་དུས་ན་གཉེན་པོ་གོམས་པས་སྤངས་བྱ་ཡིན་པ་ལས་འདིར་རེ་ཞིག་དང་པོའོ། །དེ་འགོག་པ་ལའང་དེ་ལྟ་བུའི་རྟོག་པ་དེས་ཅི་ལྟར་བརྟགས་པའི་ཡུལ་མཐའ་གཉིས་བཀག་པའི་སྒོ་ནས་དེར་འཛིན་གྱི་ལོག་རྟོག་སེལ་བ་ཡིན་ཏེ། འཇིག་རྟེན་རྣམ་པར་རྟོག་ལས་བྱུང་། །རྣམ་རྟོག་སེམས་ལས་བྱུང་གྱུར་ཅིང་། །གང་ཕྱིར་ཡུལ་ལས་སེམས་བྱུང་བ། །དེ་ཕྱིར་ཡུལ་ལ་རྣམ་པར་དཔྱོད། །ཅེས་དང་། འདི་ཡུལ་སུན་དབྱུང་མེད་པར་ནི། །དེ་སྤོང་བར་ནི་ནུས་མ་ཡིན། །ཞེས་དང་། ཡུལ་ལ་བདག་མེད་མཐོང་ན་ནི། །སྲིད་པའི་ས་བོན་འགག་པར་འགྱུར། །ཞེས་པའི་ཚུལ་གྱིས་དགག་དགོས་པ་དང་། ནུས་པ་དང་། དགག་པར་གསུངས་པའི་ཕྱིར་རོ། །དགག་བྱའི་མཐའ་དེའང་དབུ་མའི་གཞུང་ལུགས་རྣམས་ལས། གཅིག་ཏུ་བསྡུ་བ་དང་། གཉིས་སུ་བསྟན་པ་དང་། གསུམ་དུ་རྣམ་པར་གཞག་པ་དང་། བཞིར་ཕྱེ་བ་དང་བཞི་ལས་དང་པོ་ནི། རྟོག་པས་མཐོང་བ་འཆིང་བ་སྟེ། །དེ་ནི་འདི་རུ་དགག་པར་བྱ། །ཞེས་རྟོགས་པས་གང་དུ་ཞེན་པའི་ཡུལ་གཅིག་ཏུ་བསྡུས་པ་སྟེ། མཐར་འཛིན་ཐམས་ཅད་འདིར་འདུས་པའོ། །ཡང་འདིར་ནི་སྡུག་བསྔལ་རྒྱུར་གྱུར་པ། །བདེན་པར་ཞེན་པ་བཟློག་བྱ་ཡིན། །ཞེས་བདེན་འཛིན་གཅིག་ཏུ་བསྡུས་པའང་ཡོད་དེ། སྲིད་པའི་རྩ་བ་ལ་དགོངས་སོ། །གཉིས་པ་ནི། རིན་ཆེན་ཕྲེང་བར། མེད་པ་བ་ནི་ངན་འགྲོར་འགྲོ། །ཡོད་པ་བ་ནི་བདེ་འགྲོར་འགྲོ། །ཡང་དག་ཇི་བཞིན་ཡོངས་ཤེས་པས། །གཉིས་ལ་མི་བརྟེན་ཐར་པ་ལགས། །ཞེས་དང་། རྩ་བ་ལས། ཡོད་ཅེས་བྱ་བ་རྟག་པར་འཛིན། །མེད་ཅེས་བྱ་བ་ཆད་པར་ལྟ། །ཞེས་མེད་མཐའ་དང་ཡོད་མཐའ་གཉིས་སུ་བསྡུས་པའང་ཡོད་དེ། འདི་ནི་ཐེག་པ་གསུམ་གྱི་ཐུན་མོང་གི་དགག་བྱ་ལ་དགོངས་ནས་ཐ་སྙད་དུ་མེད་པ་སྐུར་འདེབས་ཀྱི་མཐའ་དང་། དོན་དམ་དུ་ཡོད་པ་སྒྲོ་འདོགས་ཀྱི་མཐའ་གཉིས་སུ་བསྡུས་པའོ། །ཡང་ཆོས་དབྱིངས་བསྟོད་པར། བདག་མེད་རྣམ་པ་གཉིས་མཐོང་ན། །སྲིད་པའི་ས་བོན་འགག་པར་འགྱུར། །ཞེས་དང་། འཇུག་པར། བདག་མེད་འདི་ནི་འགྲོ་བ་རྣམ་དགྲོལ་ཕྱིར། །ཆོས་དང་གང་ཟག་དབྱེ་བས་རྣམ་གཉིས་གསུངས། །ཞེས་ཆོས་དང་གང་ཟག་གི་བདག་གཉིས་སུ་བསྡུས་པའང་ཡོད་དེ། འདི་ནི་སྔར་སྲིད་པའི་རྒྱུ་དགག་བྱར་གསུངས་པ་དང་དོན་གཅིག་གོ །གསུམ་པ་ལ། བསོད་ནམས་མིན་པ་དང་པོར་བཟློག །བར་དུ་བདག་ནི་བཟློག་པ་དང་། །ཕྱི་ནས་ལྟ་བ་ཀུན་བཟློག་པ། །ཞེས་གསུངས་པ་ལྟར། བསོད་ནམས་མ་ཡིན་པའི་རྒྱུ་ལས་འབྲས་མེད་པར་ལྟ་བའི་ཆད་ལྟའི་ཡུལ་དང་། སྲིད་པའི་རྩ་བ་བདག་འཛིན་གཉིས་ཀྱི་ཡུལ་བདག་གཉིས་དང་། ཐམས་ཅད་མཁྱེན་པའི་གེགས་མཚན་འཛིན་གྱི་ཡུལ་སྤྲོས་པ་ཙམ་དང་གསུམ་དུ་ཕྱེ་བའང་ཡོད་དེ། དང་པོ་གཉིས་ཐེག་པ་གསུམ་ཆར་གྱི་ཐུན་མོང་གི་དགག་བྱ་དང་། ཕྱི་མ་ཐེག་ཆེན་ཐུན་མོང་མ་ཡིན་པའི་དགག་བྱ་ཡིན་པས་དགག་བྱ་ཐམས་ཅད་འདིར་འདུས་པའོ། །ཡང་བྱང་ཆུབ་སེམས་འགྲེལ་ལས། སངས་རྒྱས་རྣམས་ཀྱི་བྱང་ཆུབ་སེམས། །བདག་དང་ཕུང་སོགས་རྣམ་རིག་གི །རྟོག་པ་རྣམས་ཀྱིས་མ་སྒྲིབས་པ། །རྟག་ཏུ་སྟོང་ཉིད་མཚན་ཉིད་ཅན། །ཞེས་མུ་སྟེགས་པས་བརྟགས་པའི་བདག་གི་དངོས་པོ་དང་། ཉན་ཐོས་སྡེ་གཉིས་ཀྱིས་བརྟགས་པའི་ཕུང་ཁམས་སྐྱེ་མཆེད་ཀྱི་དངོས་པོ་དང་། རྣམ་རིག་པས་རྟགས་པའི་གཉིས་མེད་ཀྱི་རྣམ་པར་ཤེས་པའི་དངོས་པོ་གསུམ་དུ་བཞག་པའང་ཡོད་དེ། འདི་ནི་ཕྱི་ནང་གི་དངོས་པོར་སྨྲ་བ་རྣམས་ཀྱིས་བརྟགས་པའི་ཀུན་བརྟགས་ཀྱི་མཐའ་ལ་དགོངས་པའོ། །བཞི་པ་ནི། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་ཀྱང་མིན་པས། །མཐའ་བཞི་ལས་གྲོལ་དབུ་མ་པ། །མཁས་པ་རྣམས་ཀྱི་དེ་ཁོ་ན། །ཞེས་སོགས་མཐའ་བཞིའི་སྤྲོས་བྲལ་བསྟན་པའི་རིགས་པ་རྣམས་ཀྱི་དགག་བྱ་མཐའ་བཞིར་ཕྱེ་བ་སྟེ། འདི་ནི་ཐེག་ཆེན་གྱི་བྱང་ཆུབ་ཐོབ་པ་ལ་སྤྲོས་པ་མཐའ་དག་དགག་དགོས་པ་ལ་དགོངས་སོ། །དེ་ལྟར་གཞུང་ལས་རྣམ་གཞག་དུ་མ་ཡོད་ཀྱང་བསྡུ་ན། མེད་པ་སྐུར་འདེབས་ཀྱི་མཐའ་དང་། ཡོད་པ་སྒྲོ་འདོགས་ཀྱི་མཐའ་དང་། དགག་བྱ་བཀག་པའི་སྟོང་ཉིད་ལ་མངོན་པར་ཞེན་པའི་མཐའ་གསུམ་དུ་འདུས་པ་ལས། དང་པོ་ནི། མེད་པ་བ་ནི་ངན་འགྲོར་འགྲོ་ཞེས་པའི་ཚུལ་གྱིས་ཀུན་རྫོབ་རྟེན་འབྲེལ་ཅི་ལྟར་སྣང་བ་འདི་མེད་དོ་ཞེས་སྐུར་བ་འདེབས་པ་སྟེ། མདོར་ན་མེད་པར་ལྟ་བ་ཉིད། །ལས་ཀྱི་འབྲས་བུ་མེད་ཅེས་པ། །བསོད་ནམས་མ་ཡིན་ངན་སོང་བ། །དེ་ནི་ལོག་པར་ལྟ་ཞེས་བཤད། །ཅེས་སོ། །དེ་ལ་གསུམ་ལས། དང་པོ་ནི་ཚུ་རོལ་མཛེས་པ་བ་དག ལྷ་དང་དམྱལ་བ་ལ་སོགས་པ་མ་མཐོང་བའི་འགྲོ་བ་རྣམས་མེད་ཅེས་འགྲོ་བ་འགའ་ཞིག་གི་ངོ་བོ་ཉིད་ལ་སྐུར་བ་དང་། གཉིས་པ་ནི། འགྲོ་བ་རྣམས་ནི་འཇིག་རྟེན་འདིའི་འབྱུང་བའི་རྐྱེན་ཙམ་ཞིག་ཚོགས་པའམ། རྒྱུ་མེད་པ་ལས་གློ་བུར་དུ་འབྱུང་བའོ། །ཞེས་རྒྱུ་ལ་སྐུར་བ་དང་། གསུམ་པ་ནི། ལེགས་པར་སྤྱད་པ་དང་ཉེས་པར་སྤྱད་པའི་ལམ་བདག་མེད་གཉིས་བསྒོམས་པས་འབྲས་བུ་ཅིའང་མི་འབྱུང་ངོ་ཞེས་འབྲས་བུ་ལ་སྐུར་བ་གསུམ་ཡིན་ལ། འདི་དག་གི་ཡུལ་ཅན་ལྟ་བ་ནི་ལམ་གྱི་དགག་བྱ་དང་། དེ་ལའང་ཞེན་ཡུལ་དགག་དགོས་པས་ཡུལ་ནི་རིགས་པའི་དགག་བྱ་སྟེ། འོག་མ་རྣམས་ལའང་དེ་བཞིན་ནོ། །དེས་ན་དེ་ལྟ་བུའི་ངོ་བོ་རྒྱུ་འབྲས་ཐ་སྙད་དུའང་མེད་པ་ནི་འདིར་དགག་བྱ་ཡིན་ཏེ། བདེ་བར་གཤེགས་པའི་གསུང་རབ་དང་འགལ་ཞིང་། བདེ་ལེགས་དང་མི་མཐུན་པས་དགག་དགོས་པ་དང་། འཇིག་རྟེན་པའི་ཚད་མས་ཁེགས་ཤིང་བཀག་པ་ལ་གནོད་པ་མེད་པས་དགག་ནུས་པ་དང་། མེད་པ་བ་ནི་ངན་འགྲོར་འགྲོ་ཞེས་པའི་ཚུལ་གྱིས་དགག་པར་གསུངས་པའི་ཕྱིར་རོ། །གཉིས་པ་བདེན་དངོས་ཡོད་པ་སྒྲོ་འདོགས་ཀྱི་མཐའ་ནི། ཡོད་པ་བ་ནི་བདེ་འགྲོར་འགྲོ་ཞེས་པའི་ཚུལ་གྱིས་ཆོས་དང་གང་ཟག་ལ་སོགས་པ་རང་བཞིན་གྱིས་མེད་བཞིན་དུ་ཡོད་དོ་ཞེས་སྒྲོ་འདོགས་པས་ལས་འབྲས་ལ་བླང་དོར་བྱེད་པས་བདེ་འགྲོའི་རྒྱུ་ཙམ་དུ་འགྱུར་ཡང་འཁོར་བར་འཕྱན་པར་འགྱུར་ཏེ། མདོར་ན་ཡོད་པར་ལྟ་བ་ཉིད། །ལས་ཀྱི་འབྲས་བུ་ཡོད་ཅེས་པ། །བསོད་ནམས་བདེ་འགྲོ་རྒྱུ་མཐུན་པ། །ཡང་དག་ལྟ་བ་ཞེས་བཤད་དོ། །ཞེས་སོ། །དེ་ལ་གསུམ་སྟེ། འདུས་མ་བྱས་རྟག་པ་གཅིག་པུའི་དངོས་པོ་དང་། འདུས་བྱས་མི་རྟག་པ་དུ་མའི་དངོས་པོ་དང་། དེ་དག་གི་སྟོང་པའི་སྟོང་ཉིད་བདེན་པར་བརྟགས་པའོ། །དང་པོ་ནི། ཕྱི་རོལ་པ་རྣམས་ཀྱིས་གང་ཟག་གི་བདག་ཅེས་བྱ་བ་ཕུང་པོ་ལས་དོན་གཞན་པ། ཟ་བ་པོ་དང་། རྟག་དངོས་དང་། བྱེད་པ་པོ་མ་ཡིན་པ་དང་། ཡོན་ཏན་མེད་པ་དང་། བྱ་བ་མེད་པ་སྟེ་ཁྱད་པར་ལྔ་ལྡན་དང་། འགའ་ཞིག་བྱེད་པ་པོ་དང་བྱ་བ་ཡོད་པར་རྟོག་པ་དང་། འགའ་ཞིག་ལུས་ཀྱི་ཚད་ཙམ་དུ་རྟོག་པ་སོགས་སོ། །གཉིས་པ་ནི་བྱེ་བྲག་ཏུ་སྨྲ་བས། ཤེས་བྱ་བཞི་ལྔ་བདེན་པར་བརྟགས་པ་དང་། མདོ་སྡེ་པས། དོན་ཤེས་གཉིས་བདེན་པར་བརྟགས་པ་དང་། རྣམ་རིག་པས་གཉིས་མེད་ཀྱི་ཤེས་པ་བདེན་པར་བརྟགས་པ་ལ་སོགས་པའོ། །གསུམ་པ་ནི་དགག་བྱ་གཟུང་འཛིན་གཉིས་ཀྱི་སྟོང་པའི་སྟོང་ཉིད་བདེན་པར་བརྟགས་པ་སྟེ། འདིའང་རྣམ་རིག་པའི་ལྟ་བའི་ཁོངས་སུ་གཏོགས་སོ། །གསུམ་པ་སྟོང་ཉིད་ལ་མངོན་པར་ཞེན་པའི་མཐའ་ནི། དབུ་མ་པར་རློམ་པ། ཁ་ཅིག་དགག་བྱ་བདེན་པར་བཀག་ནས་བདེན་པས་སྟོང་པའི་སྟོང་ཉིད་ཡུལ་གྱི་གནས་ལུགས་མཐར་ཐུག་ཡིན་པས་དེར་མངོན་པར་ཞེན་པ་འགོག་ཏུ་མི་རུང་ཞེས་པ་སྟེ་སྔར་བཤད་ཟིན་ཏོ། །དེ་དག་ལས་ཕྱི་རོལ་པ་འདོད་པའི་བདག་རྟག་པའི་དངོས་པོ་ནི་ཐ་སྙད་དུའང་དགག་པར་བྱ་བ་ཡིན་ལ་འདུས་བྱས་མི་རྟག་པ་དུ་མའི་དངོས་པོ་དང་། སྟོང་ཉིད་ཙམ་ནི་ཐ་སྙད་དུ་དགག་པར་བྱ་བ་མ་ཡིན་ཡང་དེ་དག་བདེན་པར་བརྟགས་པ་ནི་དགག་པར་བྱ་བ་ཡིན་ཏེ། དེ་ལ་ཞེན་ནས་འཆིང་བར་འགྱུར་བས་དགག་དགོས་པ་དང་། མཐར་ཐུག་དཔྱོད་པའི་རིགས་པས་གནོད་པས་དགག་ནུས་པ་དང་། འདིར་ནི་སྡུག་བསྔལ་རྒྱུ་གྱུར་པའི། །བདེན་པར་ཞེན་པ་བཟློག་བྱ་ཡིན། །ཞེས་དགག་པར་གསུངས་པའི་ཕྱིར་རོ། །གསུམ་པ་སྐབས་ཀྱི་དགག་བྱ་བདག་གཉིས་ངོས་གཟུང་བ་ལ་གསུམ་སྟེ། ཁྱད་གཞི་དང་མ་སྦྱར་བའི་བདག་ཐ་སྙད་དུ་མེད་པ་དགག ཁྱད་གཞི་དང་སྦྱར་བའི་བདག་ཐ་སྙད་དུ་ཡོད་པ་དགག ལྷན་སྐྱེས་དང་ཀུན་བརྟགས་ཀྱིས་གཟུང་ཚུལ་བསྟན་པའི་སྒོ་ནས་འཁྲུལ་མེད་ཀྱི་གནད་བཤད་པའོ། །དང་པོ་ནི། ཁ་ཅིག་བདག་ཡོད་པར་འདོད་པ་ཕྱི་རོལ་པ་དང་། བདག་མེད་པར་འདོད་པ་ནང་པ་ཡིན་ཞེས་པའི་ཕལ་ཚིག་ཙམ་དང་། བདག་མེད་རྟོགས་པའི་ཤེས་རབ་ཡུལ་གྱི་གནས་ཚུལ་ལ་ཞུགས་ཞེས་པའི་རིགས་པ་ལྟར་སྣང་ལ་བརྟེན་ནས་ཐ་སྙད་དུའང་བདག་མེད་ཅིང་གང་ཟག་ཡོད་ཅེས་སྨྲའོ། །འདི་ནི་མདོ་ལས། ཇི་ལྟར་ཡན་ལག་རྣམས་བརྟེན་ནས། །ཀུན་རྫོབ་ཤིང་རྟར་འདོགས་པ་ལྟར། །དེ་བཞིན་ཕུང་པོ་རྣམས་བརྟེན་ནས། །ཀུན་རྫོབ་སེམས་ཅན་ཞེས་བྱ་འོ། །ཞེས་དང་། རྒྱལ་པོ་ཆེན་པོ། སྐྱེས་བུ་གང་ཟག་འདི་ནི་ཁམས་དྲུག་པ་ཅན་ནོ། །ཞེས་གསུངས་པའི་སེམས་ཅན་དང་། གང་ཟག་དང་སྐྱེས་བུ་རྣམས་འཇུག་པ་རྩ་འགྲེལ་དུ། བདག་གི་མིང་གི་རྣམ་གྲངས་སུ་བྱས་ནས་ཤིང་རྟའི་ཡན་ལག་ལ་བརྟེན་ནས་ཤིང་རྟར་འདོགས་པ་དང་། ཕུང་པོ་ལ་བརྟེན་ནས་བདག་ཏུ་འདོགས་པ་དང་། ཁམས་དྲུག་ལ་བརྟེན་ནས་བདག་ཏུ་འདོགས་པ། དཔེ་དོན་དུ་སྦྱར་བའི་བཤད་ཚུལ་ལ་བློ་ཁ་མ་ཕྱོགས་པར་རང་དགར་སྨྲས་པའོ། །གཞན་ཡང་བདག་དང་ཕུང་པོ་གཉིས་ཀྱིས་ཟླས་ཕྱེ་བའི་བདག་དེ་གང་ཟག་ལ་འཇོག་སྟེ། ཕུང་པོ་ལ་བརྟེན་ནས་བཏགས་པ་དང་། ཕུང་པོ་ཉེ་བར་ལེན་པ་པོ་ཡིན་པར་གསུངས་པའི་ཕྱིར་ཏེ། འཇུག་པར། འདི་ནི་ཕུང་པོ་རྣམས་བརྟེན་འགྲུབ་པར་འགྱུར། །ཞེས་དང་། བདག་ཉིད་ལེགས་པར་སྡོམ་པ་དང་ཞེས་པའི་འགྲེལ་པར། དེ་ལ་བདག་ཏུ་ང་རྒྱལ་བ་འདི་ལ་བཞག་ཅིང་བསྐྱེད་པས་བདག་ཉིད་དེ་ཕུང་པོ་ལ་བརྟེན་ནས་བཏགས་པའི་གང་ཟག་ལ་བདག་ཅེས་བྱའོ། །ཞེས་དང་། མེ་དང་ཤིང་གི་བདག་དང་ནི། །ཞེས་པའི་འགྲེལ་པར་དེ་ལ་ཉེ་བར་བླང་བར་བྱ་བས་ན་ཉེ་བར་ལེན་པ་སྟེ། ཉེ་བར་ལེན་པའི་ཕུང་པོ་ལྔའོ། །དེ་དག་ལ་ཉེ་བར་བརྟེན་ནས་བཏགས་པ་ཉེ་བར་ལེན་པ་པོ། འཛིན་པ་པོ། སྒྲུབ་པ་པོ་གང་ཡིན་པ་དེ་ནི་བདག་ཏུ་འཛིན་པའི་ཡུལ་ཡིན་པའི་ཕྱིར་འདི་ལ་བདག་ཏུ་ང་རྒྱལ་བ་བཞག་ཅིང་བསྐྱེད་པས་ན་བདག་ཅེས་བྱའོ། །ཞེས་གསུངས་པས་སོ། །གཉིས་པ་ནི། ཁ་ཅིག་གང་ཟག་དང་ཆོས་ཐ་སྙད་དུ་ཡོད་པ་བཞིན་དུ། གང་ཟག་གི་བདག་དང་ཆོས་ཀྱི་བདག་ཀྱང་ཐ་སྙད་དུ་ཡོད་དེ། འཇུག་པར། གང་ཟག་གི་བདག་མེད་སྒྲུབ་པའི་རིགས་པའི་གཙོ་བོ་གང་ཟག་ཉིད་ཕུང་པོ་ལ་རིགས་པ་རྣམ་བདུན་གྱིས་བཙལ་བའི་ཚེ་མི་རྙེད་པ་ལ་བྱས་པས་གང་ཟག་དང་གང་ཟག་གི་བདག་དོན་གཅིག་ཏུ་གྲུབ་པའི་ཕྱིར་ཞེས་སྨྲའོ། །འདི་ནི་ཞིབ་མོའི་བློ་གྲོས་ཀྱིས་དབེན་པ་སྟེ། རིགས་པ་དེས་གང་ཟག་ཕུང་པོ་ལ་རིགས་པ་བདུན་གྱིས་བཙལ་བའི་ཚེ་རྙེད་ན་དེ་དང་གང་ཟག་གི་བདག་དོན་གཅིག་ཡིན་པར་གྲུབ་ཀྱི་རྣམ་བདུན་གྱིས་དཔྱད་པ་མ་བྱས་པར་བརྟེན་ནས་བཏགས་པའི་གང་ཟག་དང་། གང་ཟག་གི་བདག་དོན་གཅིག་པར་མི་འགྲུབ་པའི་ཕྱིར་རོ། །གཞན་དུ་ན་ས་བོན་ལས་མྱུ་གུ་སྐྱེ་བ་དང་། དོན་དམ་པར་ས་བོན་ལས་མྱུ་གུ་སྐྱེ་བ་གཉིས་དོན་གཅིག་ཡིན་པར་ཐལ། དོན་དམ་པར་ས་བོན་ལས་མྱུ་གུ་སྐྱེ་བ་མེད་པའི་དོན་ས་བོན་ལས་མྱུ་གུ་སྐྱེ་བ་ཉིད་མཐའ་བཞིར་དཔྱད་ན་མི་རྙེད་པ་ལ་བྱས་འདུག་པའི་ཕྱིར། དེ་བཞིན་དུ་ཤིང་རྟ་དང་ཤིང་རྟ་དོན་དམ་པར་གྲུབ་པ་གཉིས་དོན་གཅིག་པར་ཐལ། ཤིང་རྟ་དོན་དམ་པར་མེད་པའི་དོན་ཤིང་རྟ་ཉིད་རང་གི་ཡན་ལག་ལ་རྣམ་པ་བདུན་གྱིས་བཙལ་ན་མི་རྙེད་པ་ལ་བྱས་འདུག་པའི་ཕྱིར་རོ། །ཞེས་སོགས་དབུ་མའི་རིགས་པ་ཐམས་ཅད་ལ་སྦྱར་བའོ། །དེས་ན་འདི་དག་ནི། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ཅེས་པའི་ངར་འཛིན་ལྷན་སྐྱེས་ཀྱི་ཡུལ་ང་ཙམ་དེ་ཉིད་བདག་དང་། གང་ཟག་ལ་སོགས་པའི་བྱེད་པའི་སྐྱེས་བུ་བཅུ་གཉིས་ཀྱི་མིང་གི་རྣམ་གྲངས་ཀྱིས་བསྟན་པས་གང་ཟག་ཙམ་ཡིན་ཅིང་དེ་ཉིད་བློ་དེས་ཡུལ་རང་གི་སྡོད་ལུགས་ཀྱི་ངོས་ནས་གྲུབ་པར་གཟུང་བའི་རྫས་ཡོད་ལ་གང་ཟག་གི་བདག་དང་། དེ་བཞིན་དུ་ཆོས་དང་ཆོས་ཀྱི་བདག་གི་ཁྱད་པར་གསུངས་པའི་གནད་མ་རྟོགས་པར་རང་དགར་སྨྲས་པ་སྟེ། སངས་རྒྱས་བསྐྱངས་ཀྱིས་ཆོས་ཐམས་ཅད་བདག་མེད་དོ། །ཞེས་གསུངས་པ་ལ་བདག་མེད་པ་ཞེས་བྱ་བ་ནི་ངོ་བོ་ཉིད་མེད་པའི་དོན་ཏེ། བདག་ཅེས་བྱ་བའི་སྒྲ་ནི་ངོ་བོ་ཉིད་ཀྱིས་ཚིག་ཡིན་པའི་ཕྱིར་རོ། །ཞེས་དང་། བཞི་བརྒྱ་པའི་འགྲེལ་པ་ལས་ཀྱང་དེ་ལ་བདག་ཅེས་བྱ་བ་ནི་གང་ཞིག་དངོས་པོ་རྣམས་ཀྱི་གཞན་ལ་རག་མ་ལས་པའི་ངོ་བོ་རང་བཞིན་ཏེ་དེ་མེད་པ་ནི་བདག་མེད་པའོ། །དེ་ནི་ཆོས་དང་གང་ཟག་གི་དབྱེ་བས་གཉིས་སུ་རྟོགས་ཏེ། ཆོས་ཀྱི་བདག་མེད་པ་དང་། གང་ཟག་གི་བདག་མེད་པ་དང་། ཞེས་གསུངས་པས་སོ། །དེས་ན་དེ་གཉིས་ཀྱི་ཚིག་ཟུར་གྱི་བདག་གཉིས་དང་། ཆོས་ཀྱི་སྡོམ་བཞིའི་ནང་ནས་ཆོས་ཐམས་ཅད་བདག་མེད་ཅེས་པའི་ཚིག་ཟུར་གྱི་བདག་དོན་གཅིག་པས་ངོ་བོ་ཉིད་ཀྱིས་གྲུབ་པ་ལ་འཇོག་པ་དང་། བདག་དང་ཕུང་པོ་ཞེས་བྱ་བའི་བདག་ནི་ཁྱད་གཞི་གང་ཟག་ཙམ་ལ་འཇོག་པའི་གནད་དམ་པ་ཤེས་པར་གྱིས་ཤིག གསུམ་པ་ནི་ལྷན་སྐྱེས་ཀྱིས་གཟུང་བའི་ཆོས་དང་གང་ཟག་གཉིས་དང་། དེ་གཉིས་ཀྱི་བདག་ཉིད་ཀྱི་ཁྱད་པར་གང་སྙམ་ན། ཐོག་མ་མེད་པ་ནས་ཕུང་པོ་དམིགས་ཡུལ་དུ་བྱས་པའི་བློ་སྐད་ཅིག་རེ་རེས་གཞི་མེད་ལ་ངའོ་སྙམ་དུ་འཛིན་པའི་བློ་སྐད་ཅིག་རེ་རེ་སྐྱེས་པའི་དམིགས་ཡུལ་དུ་གྱུར་པའི་ཕུང་པོ་ཙམ་དང་། ང་ཙམ་ནི་ཆོས་དང་གང་ཟག་ཡིན་པས་ཐ་སྙད་དུ་ཡོད་དེ། ཉེ་བར་བླང་བྱ་དང་ལེན་པ་པོ་དང་། ཆ་ཤས་དང་ཆ་ཤས་ཅན་དང་། ཡན་ལག་དང་ཡན་ལག་ཅན་ལ་སོགས་པའི་ཐ་སྙད་དུ་མས་གསུངས་ཤིང་དེ་དག་ཕན་ཚུན་ལྟོས་ནས་གྲུབ་པར་ཡང་གསུངས་པའི་ཕྱིར་རོ། །དེ་ལྟ་བུའི་ཆོས་དང་གང་ཟག་གཉིས་ཐ་སྙད་དུ་ཡོད་པ་དགག་བྱ་མ་ཡིན་ཡང་རིགས་པས་དཔྱད་པའི་ཚེ་རང་གི་ཡན་ལག་རྣམས་ལ་ལྟོས་ནས་འགོག་པ་ནི་བདག་མེད་གཉིས་སྒྲུབ་པའི་རིགས་པ་དང་གནད་གཅིག་གོ །འོན་ཀྱང་བློ་དེ་ཉིད་ཀྱིས་ཇི་སྲིད་དབུ་མའི་ལྟ་བ་མ་བསྐྱེད་ཀྱི་བར་དུ་རང་གིས་གང་དུ་གཟུང་བའི་ཡུལ་དེ་ཉིད་བདེན་པར་འཛིན་པ་ཡིན་ཏེ། བཞི་བརྒྱ་པར། ལུས་ལ་ལུས་དབང་ཇི་བཞིན་དུ། །གཏི་མུག་ཀུན་ལ་གནས་གྱུར་ཏེ། །དེ་ཕྱིར་ཉོན་མོངས་ཐམས་ཅད་ནི། །གཏི་མུག་བཅོམ་པས་བཅོམ་པར་འགྱུར། །ཞེས་དང་། འཇུག་པར། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ། །དེས་གང་བཅོས་མ་བདེན་པར་སྣང་དེ་ནི། །ཀུན་རྫོབ་བདེན་ཞེས་ཐུབ་པ་དེས་གསུངས་ཏེ། །ཞེས་གསུངས་པས་སོ། །དེས་ན་དེའི་འཛིན་སྟངས་ཀྱི་གཟུང་བྱ་ཆོས་དང་གང་ཟག་གཉིས་བདེན་པར་གྲུབ་པ་ནི་ཐ་སྙད་དུའང་དགག་པར་བྱ་བ་ཡིན་ལ་རིགས་པ་ནི་སྔ་མ་དང་དོན་གཅིག་པས་གང་ཟག་གི་བདག་དང་ཆོས་ཀྱི་བདག་འགོག་པའི་ཚེ་གང་ཟག་དང་ཆོས་གཉིས་རང་གི་ཡན་ལག་ལ་དཔྱད་ནས་འགོག་པའི་གནད་ཀྱང་འདི་ཉིད་ཡིན་ནོ། །ཀུན་བརྟགས་ཀྱི་གཟུང་ཡུལ་ནི་སྔར་གྱི་བདག་འཛིན་གཉིས་ཀྱི་ཡུལ་བདེན་པར་གྲུབ་པ་དེ་ཉིད་དགག་བྱར་མི་བྱེད་པར་བསྒྲུབས་བྱ་བྱས་ཏེ། ཕྱི་རོལ་པ་དང་། རང་སྡེ་གནས་མ་བུ་པའི་སྡེ་པས་གང་ཟག་རྫས་སུ་ཡོད་པའི་སྒྲུབ་བྱེད་མང་དུ་བཀོད་ཀྱང་རྣམ་པ་ལྔར་འདུས་ཤིང་། དེ་དག་ཀྱང་ཕུང་པོ་དང་དེ་ཉིད་དང་གཞན་ཉིད་གཉིས་སུ་འདུས་སོ། །གཞན་སྡེ་དང་རང་སྡེ་དངོས་པོར་སྨྲ་བ་གསུམ་གྱིས་ཆོས་བདེན་པར་ཡོད་པའི་སྒྲུབ་བྱེད་མང་དུ་བཀོད་ཀྱང་མཐའ་བཞིའི་སྐྱེ་བ་བཞིར་འདུས་སོ། །མདོར་ན་ལྷན་སྐྱེས་ཀྱིས་གཟུང་བའི་ཆོས་དང་གང་ཟག་གཉིས་དཔྱད་པ་མེད་པར་བག་ཆགས་ལ་བརྟེན་ནས་བདེན་པར་གཟུང་བའི་ཡུལ་ནི་ལྷན་སྐྱེས་ཀྱི་བདག་གཉིས་ཡིན་ལ། དེ་ཉིད་ལ་རིགས་པ་ལྟར་སྣང་གི་སྒྲུབ་བྱེད་དང་བཅས་པའི་སྒོ་ནས་བདེན་པར་གཟུང་བའི་ཡུལ་ནི་ཀུན་བརྟགས་ཀྱི་བདག་གཉིས་ཏེ། དགག་བྱར་བྱེད་པ་ལ་ནི་ཁྱད་པར་མེད་དོ། །གསུམ་པ་ལ། མེད་པ་བསྐུར་འདེབས་ཀྱི་མཐའ་འགོག་པའི་རིགས་པ་དང་། ཡོད་པ་སྒྲོ་འདོགས་ཀྱི་མཐའ་འགོག་པའི་རིགས་པ་དང་། སྤྲོས་པའི་མཐའ་ཐམས་ཅད་འགོག་པའི་རིགས་པ་དང་གསུམ་ལས་དང་པོ་ནི་རྨོངས་པ་རྣམས་ཀྱི་ཚབས་ཆེ་བ་དང་། ལྟ་བ་རྣམས་ཀྱི་ནང་ནས་མ་རུངས་པ་ཡིན་པ་དང་། གྲུབ་མཐའ་རྣམས་ཀྱི་ནང་ནས་ཐ་ཆད་ཡིན་པས་ཐོག་མ་ཉིད་དུ་དགག་པར་རིགས་པས། རིགས་པ་དྲུག་ཅུ་པར། རེ་ཞིག་ཉེས་ཀུན་འབྱུང་བའི་གནས། །མེད་ཉིད་རྣམ་པར་བཟློག་ཟིན་གྱིས། །རིགས་པ་གང་གིས་ཡོད་ཉིད་ཀྱང་། །དགག་པར་འགྱུར་བ་མཉན་པར་གྱིས། །ཞེས་གསུངས་པ་ལྟར་དགག་སླ་བ་དང་། ཕལ་ཆེར་དངོས་པོར་སྨྲ་བ་རྣམས་ཀྱིས་བཀག་ཟིན་པ་ལ་དགོངས་ནས་དེ་ཉིད་འགོག་པའི་རིགས་པ་གཞུང་ལས་མང་དུ་མ་གསུངས་མོད་ཀྱི། འོན་ཀྱང་རིགས་པ་དེ་དང་དེ་དག་གིས་འགོག་པའི་ཚུལ་ཕྱོགས་ཙམ་ཞིག་བརྗོད་པ་བྱ་སྟེ། དེ་ལ་རེ་ཞིག་ཚུ་རོལ་མཛེས་པ་བ་དག་འགྲོ་བའི་རིགས་ལ་མི་དང་དུད་འགྲོ་ལ་སོགས་པ་མཐོང་བ་འདི་ཙམ་ཞིག་ཡོད་ཀྱི་ལྷ་དང་དམྱལ་བ་ལ་སོགས་པ་འགྲོ་བ་གཞན་ནི་མེད་དེ་མ་མཐོང་བའི་ཕྱིར། སྐྱེ་བོ་རྣམས་ཀྱི་སེམས་ཀྱང་ལུས་ཀྱི་སྔ་ཕྱིར་ཡོད་པ་མ་ཡིན་ཏེ། ཆང་དང་མྱོས་པའི་ནུས་པ་ལྟར་ལུས་སེམས་རྫས་གཅིག་པའི་ཕྱིར། དེས་ན་སྐྱེ་བ་སྔ་ཕྱིའང་མེད་དོ་ཞེས་དོན་གྱི་ངོ་བོ་ལ་སྐུར་བ་འདེབས་པ་དེའང་མི་རིགས་ཏེ། འགྲོ་བ་གཞན་ཡོད་ཀྱང་བལྟར་མི་རུང་བས་དེ་འགོག་པའི་རྟགས་མ་ངེས་པའི་ཕྱིར་དང་། ལུས་སེམས་འགལ་བའི་ཆོས་དང་ལྡན་པས་སྐྱེ་བ་སྔ་ཕྱི་འགོག་པའི་རྟགས་མ་གྲུབ་པའི་ཕྱིར་ན་སྒྲུབ་བྱེད་མེད་ལ། ད་ལྟར་གྱི་སེམས་ཕྱི་མ་རྣམས་སྔ་མ་ཙམ་ལས་འབྱུང་བར་འཛིན་པའི་མངོན་སུམ་གྱིས་གནོད་པའི་ཡང་ཕྱིར་རོ། །ཡང་དཔྱོད་པ་བ་དག་འགྲོ་བ་རྣམས་རྒྱུ་མེད་པ་ཡིན་ཏེ། དངོས་པོ་ཉིད་ཡིན་པའི་ཕྱིར། ཚེར་མའི་རྣོ་བ་བཞིན་ནོ། །ཞེས་རྒྱུ་ལ་སྐུར་བ་འདེབས་པའང་མི་རིགས་ཏེ། རྟགས་ཀྱི་དཔེ་བསྒྲུབ་བྱ་དང་མཚུངས་པས་ཁྱབ་པ་མ་གྲུབ་པའི་ཕྱིར་སྒྲུབ་བྱེད་མེད་ལ། མར་མེ་ལྟར་ཡུལ་དུས་རྣམ་པ་རེས་འགའ་བར་མཐོང་བའི་རྟགས་དང་། འབྲས་བུའི་དོན་དུ་འབད་པ་མི་བྱེད་པར་ཐལ་བས་གནོད་པའི་ཡང་ཕྱིར་རོ། །ཡང་ཉེས་པ་དང་། ལེགས་པར་སྤྱད་པའི་འབྲས་བུ་ལ་སྐུར་བ་འདེབས་པ་ཁ་ཅིག་ལམ་བསྒོམས་ཀྱང་ཐར་པ་དང་ཐམས་ཅད་མཁྱེན་པ་མི་ཐོབ་སྟེ་དྲི་མ་སེམས་ཀྱི་རང་བཞིན་ཡིན་པས་སོལ་བའི་ནག་པོ་ལྟར་སྦྱོང་དུ་མི་རུང་བའི་ཕྱིར་དང་། རུང་ཡང་ཆུའི་ཚ་བ་ལྟར་བརྟན་མི་བརྟན་པས་འབྱོངས་པའི་དུས་མེད་པ་དང་། འབད་པ་ལ་ལྟོས་པས་འབྱོངས་པ་ལྟར་སྦྱངས་ཀྱང་ཕུལ་དུ་མི་འགྲོ་བའི་ཕྱིར་ཞེས་འབྲས་བུ་ལ་སྐུར་བ་འདེབས་པ་དེ་ཡང་མི་རིགས་ཏེ། རྟགས་དང་པོ་གཉིས་མ་གྲུབ་པ་དང་། གསུམ་པ་མ་ངེས་པས་སྒྲུབ་བྱེད་མེད་ལ་སྐྱོན་ཡོན་ཐམས་ཅད་གོམས་པ་ལས་ཁྱད་པར་དུ་འགྱུར་བ་མཐོང་བས་གནོད་པའི་ཕྱིར་རོ། །གཉིས་པ་ཡོད་པ་སྒྲོ་འདོགས་ཀྱི་མཐའ་དགག་པ་ནི་སྤྱིར་གང་ཟག་དེ་ལ་དཔྱད་གཞིའི་བློ་ཅན་དང་། དགག་བྱའི་བློ་ཅན་དང་། བཀག་པའི་བློ་ཅན་གསུམ་ལས། དང་པོ་ནི། འཇིག་རྟེན་གྲུབ་མཐའ་ལ་མ་ཞུགས་པའམ། ཞུགས་ཀྱང་། གྲུབ་མཐའ་མ་དཔྱད་པར་རང་དགར་གནས་པའི་ཚེ། འདི་ནི་ལྷས་བྱིན་ནོ། །འདི་ནི་མཆོད་སྦྱིན་ནོ། །ཞེས་སོགས་ཕུང་པོ་ལ་བརྟེན་ནས་གང་ཟག་ཙམ་དུ་འཛིན་པ་དང་། འདི་ནི་ཤིང་རྟའོ། །འདི་ནི་བུམ་པའོ། །ཞེས་སོགས་ཡན་ལག་དང་ཆ་ཤས་ལ་བརྟེན་ནས་ཆོས་ཙམ་དུ་འཛིན་པའོ། །གཉིས་པ་ནི། རྟོག་གེ་པ་ཆོས་དང་གང་ཟག་དེ་དག་ལ་རིགས་པའི་འཐད་པ་བཅུག་ནས་བདེན་པར་ཁས་ལེན་པའོ། །གསུམ་པ་ནི་དབུ་མ་པ་རིགས་པས་རྣམ་པར་དཔྱད་ནས་མཐར་གང་ཡང་ཁས་མི་ལེན་པའོ། །དེ་ལྟར་གསུམ་ལས། དང་པོས་གཟུང་བའི་ཆོས་དང་གང་ཟག་ཙམ་ནི་ཐ་སྙད་དུ་དགག་པར་བྱ་བ་མ་ཡིན་ཏེ། མདོ་ལས། འཇིག་རྟེན་ང་དང་རྩོད་ཀྱི་ང་ནི་འཇིག་རྟེན་དང་མི་རྩོད་དེ། འཇིག་རྟེན་ན་གང་ཡོད་པ་དེ་ང་ཡང་ཡོད་ཅེས་སྨྲའོ། །གང་མེད་པ་དེ་ང་ཡང་མེད་ཅེས་སྨྲའོ། །ཞེས་གསུངས་པ་ལྟར་ཡོད་མེད་དང་། ཡིན་མིན་དང་འགྲོ་འོང་ལ་སོགས་པའི་ཐ་སྙད་ཐམས་ཅད་ཀུན་རྫོབ་རྣམ་གཞག་གི་ཚེ་འཇིག་རྟེན་ན་གྲགས་པ་ལྟར་ཁས་ལེན་དགོས་པའི་ཕྱིར་དང་། ཐ་སྙད་བདེན་པ་ཐབས་སུ་གྱུར་པ་དང་། །ཞེས་པ་ལྟར་དོན་དམ་པ་ལ་དཔྱོད་པར་འདོད་པ་ནའང་ཐོག་མར་ཐབས་སུ་ཁས་ལེན་དགོས་པའི་ཕྱིར་རོ། །རིགས་པས་རྣམ་པར་དཔྱད་པའི་ཚེ་དགག་དགོས་ཏེ། རྣམ་པར་དཔྱད་ན་ཐ་སྙད་བདེན་པ་ལས་གཞན་དུ་སོང་བའི་ཕྱིར་ཏེ། གང་ཕྱིར་དངོས་པོ་འདི་དག་རྣམ་དཔྱད་ན། །དེ་ཉིད་བདག་ཅན་དངོས་ལས་ཚུ་རོལ་དུ། །གནས་རྙེད་མ་ཡིན་ཅེས་གསུངས་པའི་ཕྱིར་དང་། དེའི་ཚེ་མ་རྙེད་པ་ནི་དོན་དམ་བདེན་པ་ཐབས་བྱུང་འགྱུར་པ་སྟེ། ཞེས་པའི་སྐབས་ཀྱི་ཐབས་བྱུང་དེ་ཉིད་ཡིན་པའི་ཕྱིར་རོ། །གང་དག་རིགས་པས་དཔྱད་པའི་ཚེ་སྣང་བ་མི་འགོག་བདེན་པ་འགོག་ཅེས་འདོད་པ་ནི་ཤིང་རྟ་ཉིད་ཤིང་རྟའི་ཡན་ལག་ལ་དཔྱད་པའི་ཚེ་མ་རྙེད་པ་ཉིད་ལ་ཤིང་རྟ་བདེན་པ་འགོག་པར་བཞག་པའི་དོན་མ་རྟོགས་པའོ། །འོ་ན་དེ་ཕྱིར་འཇིག་རྟེན་གྱི། །ཐ་སྙད་བདེན་ལ་རྣམ་པར་དཔྱད་མི་བྱ། །ཞེས་པ་དང་འགལ་ལོ་སྙམ་ན། དེ་ནི་ཐ་སྙད་རྣམ་གཞག་གི་ཚེ་རིགས་པའི་དཔྱད་པ་མི་འཇུག་སྟེ། བཅུག་ན་ཐ་སྙད་བདེན་པ་མི་རྙེད་པར་འགྱུར་བ་གང་ཞིག འདིར་ཐ་སྙད་བདེན་པ་རྣམ་པར་འཇོག་པའི་སྐབས་ཡིན་པའི་ཕྱིར། ཞེས་པའི་དོན་ཏེ། བྱང་ཆུབ་སེམས་འགྲེལ་ལས། ལས་འབྲས་དཔྱད་པར་འདོད་པ་མེད། །ཅེས་དང་། འཇུག་པར། ལས་འབྲས་རྣམས་ལ་སེམས་པའང་དགག་པར་མཛད། །ཅེས་གསུངས་པ་དང་དོན་གཅིག་གོ །དེ་ལྟར་ལྷན་སྐྱེས་ཀྱིས་གཟུང་བའི་བདག་གཉིས་འགོག་པའི་རིགས་པ་ནི། རིན་ཆེན་ཕྲེང་བར། སྐྱེས་བུ་ས་མིན་ཆུ་མ་ཡིན། །མེ་མིན་རླུང་མིན་ནམ་མཁའ་མིན། །རྣམ་ཤེས་མ་ཡིན་ཀུན་མིན་ན། །དེ་ལས་གཞན་དོན་སྐྱེས་བུ་གང་། །སྐྱེས་བུ་ཁམས་དྲུག་འདུས་པའི་ཕྱིར། །ཡང་དག་མ་ཡིན་ཅི་ལྟ་བར། །དེ་བཞིན་ཁམས་ནི་རེ་རེ་ལའང་། །འདུས་ཕྱིར་ཡང་དག་ཉིད་དུ་མིན། །ཞེས་སྐྱེས་བུ་ཁམས་དྲུག་ལ་བཙལ་བའི་ཚེ་མ་རྙེད་པས། གང་ཟག་གི་བདག་མེད་པ་དང་ཁམས་དྲུག་རེ་རེའང་རང་གི་ཆ་ཤས་ལ་བཙལ་བའི་ཚེ་མ་རྙེད་པས་ཆོས་ཀྱི་བདག་མེད་པར་ངེས་པའོ། །སྤྱོད་འཇུག་ལས་ཀྱང་། བདག་ནི་རུས་པ་ཁྲག་མ་ཡིན། །ཞེས་སོགས་བདག་ལུས་ཀྱི་ཆ་ཤས་རྣམས་ལ་བཙལ་ནས་མ་རྙེད་པ་དང་། ལུས་ནི་རྐང་པ་བྱིན་པ་མིན། །ཞེས་སོགས་ལུས་ཉིད་ཀྱང་རང་གི་ཆ་ཤས་རྣམས་ལ་བཙལ་ནས་མ་རྙེད་པ་དང་། དེ་ཡང་ཚིགས་ཀྱི་ཚོགས་ཡིན་ཕྱིར། །ཚིགས་ཀྱང་རང་གི་ཆ་ཕྱེ་བས། །ཆ་ཡང་རྡུལ་དུ་ཕྱེ་བས་ཏེ། །རྡུལ་དེའང་ཕྱོགས་ཆའི་དབྱེ་བ་ཡིས། །ཕྱོགས་དབྱེའང་ཆ་ཤས་དང་བྲལ་ཕྱིར། །མཁའ་བཞིན་དེས་ན་རྡུལ་ཡང་མེད། །ཅེས་ཆ་ཤས་རྣམས་ཀྱང་མཐར་ནམ་མཁའ་བཞིན་དུ་མི་རྙེད་པར་གསུངས་པའི་རིགས་པ་རྣམས་བདག་གཉིས་མེད་པར་སྒྲུབ་པའི་རིགས་པའོ། །ལྷན་སྐྱེས་ཀྱི་བདག་འགོག་པའི་རིགས་པ་འདི་དག་ནི་སོ་སོ་སྐྱེ་བོའི་དུས་ནའང་སྟོང་པ་ཉིད་ཐོས་ནས། ཞེས་པ་ལྟར་རིགས་སད་ནས་དབུ་མའི་ལྟ་བ་ཉན་པར་འདོད་པའི་ཚེ་བསྟན་པར་བྱ་བ་ཡིན་ལ་དེའི་ཚེའང་མཐའ་བཞིའི་སྐྱེ་བ་འགོག་པ་དང་། གང་ཟག་རིགས་པ་བདུན་གྱི་བཙལ་བའི་ཚུལ་རྣམས་སྟོན་ན་མཐའ་གཞན་འགོག་པའི་རིགས་པའི་སྒོ་ནས་སྟོན་པ་ཡིན་གྱི་རྩོད་ལན་གྱི་ཚུལ་གྱིས་ནི་མ་ཡིན་ནོ། །གཞུང་དུ་བཤད་པ་ནི་ཀུན་བརྟགས་ཀྱི་བདག་འགོག་པའི་ཚུལ་གྱིས་བསྟན་པ་ཡིན་ལ། དེའི་ཚེ་ཀུན་བརྟགས་ཀྱི་བདག་ཁེགས་པས་ལྷན་སྐྱེས་ཀྱི་བདག་ཀྱང་ཁེགས་པར་འགྱུར་ཏེ། སྒྲུབ་བྱེད་ལ་གནོད་པ་མཐོང་བས་བསྒྲུབ་བྱ་འཛིན་པའི་བློ་ལྡོག་པ་རིགས་པ་ཁས་ལེན་པ་རྣམས་ཀྱི་ལུགས་ཡིན་པའི་ཕྱིར། ཞེས་རོང་སྟོན་དམ་པ་གསུངས་པ་ནི་རྨད་དུ་བྱུང་བའི་ལུགས་སོ། །གཉིས་པ་རྟོགས་གེས་འཐད་པ་བཅུག་ནས་ཀུན་བརྟགས་ཀྱི་བདག་འགོག་པ་ལ་ཡོད་ངེས་པའི་རྒྱུ་སྒྲུབ་བྱེད་ཀྱི་ཚད་མ་དགག་པ་དང་། མེད་ངེས་པའི་རྒྱུ་གནོད་བྱེད་ཀྱི་རིགས་པ་བརྗོད་པ་གཉིས་ལས། དང་པོ་ནི་འདི་ལྟར་རྟོག་གེ་པ་དག་ཚད་མ་ཞེས་བྱ་བ་དངོས་པོའི་སྟོབས་ཀྱིས་ཞུགས་པ་ཡང་དག་པའི་དོན་ལ་མི་འཁྲུལ་བ་ཞིག་རང་དང་གཞན་གྱི་རྒྱུད་ལ་བསྐྱེད་པའི་འདོད་པའི་དོན་འགྲུབ་པར་སྨྲའོ། །དེ་དགག་པ་ལ་གསུམ་སྟེ་ཡང་དག་པའི་ཚད་མ་ཉིད་མ་གྲུབ་པ་དང་། གྲུབ་ཀྱང་རྒྱུད་ལ་བསྐྱེད་པར་མི་ནུས་པ་དང་། ནུས་ཀྱང་འདོད་པའི་དོན་མི་འགྲུབ་པའོ། །དང་པོ་ནི། སློབ་དཔོན་གྱིས་རྩོད་ཟློག་ལས། གལ་ཏེ་ཁྱོད་ཀྱི་དོན་དེ་རྣམས། །ཚད་མ་ཉིད་ཀྱིས་རབ་བསྒྲུབས་ན། །ཁྱོད་ཀྱི་ཚད་མ་དེ་ཉིད་ཀྱང་། །ཇི་ལྟར་རབ་ཏུ་གྲུབ་པ་སྨྲོས། །ཞེས་གསུངས་པ་ལྟར་དངོས་པོ་བདེན་པར་ཡོད་པའི་སྒྲུབ་བྱེད་ཚད་མ་དགག་པ་ལ་གཉིས་ཏེ། སྤྱིར་དགག་པ་དང་། བྱེ་བྲག་ཏུ་དགག་པའོ། །དང་པོ་ལ་གསུམ་སྟེ། མཚོན་བྱའི་སྒྲ་དོན་དགག་པ་དང་། མཚན་ཉིད་དང་། དེའི་ངེས་བྱེད་དགག་པའོ། །དང་པོ་ནི་ཚད་མའི་སྐད་དོད་ལ། པྲ་མཱ་ཎ་ཞེས་འབྱུང་ལ་དེ་བོད་སྐད་དུ་བསྒྱུར་ན། དང་པོར་འཇལ་བྱེད་ཅེས་པར་འགྱུར་ཏེ། དེ་རིགས་པས་དཔྱད་ན་ཀུན་རྫོབ་ཙམ་དུ་མི་འགྲུབ་སྟེ། དེ་ལ་པྲའི་དོན་དང་པོར་འཇལ་བ་མི་འཐད་པ་དང་། མཱ་ཎའི་དོན་འཇལ་བ་མི་འཐད་པའོ། །དང་པོ་ནི། དང་པོ་འཇལ་ཞེས་པའི་དོན་མི་འཐད་དེ། འདི་ལྟར་བློའི་སྐད་ཅིག་དང་པོས་ཡུལ་གྱི་སྐད་ཅིག་དང་པོ་ངེས་པར་བྱ་མི་ནུས་ལ། དེས་ན་བློའི་སྐད་ཅིག་དང་པོ་ཚད་མ་མ་ཡིན་པར་ཐལ་ཏེ། དེས་སྒྲོ་འདོགས་གཅོད་མི་ནུས་པའི་ཕྱིར་དང་། སྣང་ལ་མ་ངེས་པ་ཡིན་པས་སོ། །ཕྱི་མ་རྣམས་ཀྱིས་ངེས་ཀྱང་དང་པོར་འཇལ་བྱེད་མ་ཡིན་པས་ཚད་མ་མིན་པར་ཐལ་བར་འགྱུར་རོ། །གཞན་ཡང་དང་པོར་འཇལ་ཞེས་པ་དེ་རྫས་སྔར་མ་རྟོགས་པའི་དང་པོ་འཇལ་ལམ་རིགས་སྔར་མ་རྟོགས་པའི་དང་པོ་འཇལ། དང་པོ་ལྟར་ན་རྫས་ལ་བཅད་ཤེས་མི་འཐད་པར་འགྱུར་ཏེ། རྫས་འཇལ་གྱི་བློ་ཐམས་ཅད་རྫས་སྔར་མ་རྟོགས་ཁོ་ན་ལ་འཇུག་པའི་ཕྱིར་ཏེ། དངོས་པོ་ཐམས་ཅད་སྐད་ཅིག་མ་ཡིན་པས་སོ། །གཉིས་པ་ལྟར་ནའང་མི་འཐད་དེ། རིགས་ཙམ་སྔར་མ་རྟོགས་པ་མིན་པས་སྐྱོན་གང་ཡང་མེད་དོ། །ཞེས་སྲིད་པའི་ཕྱིར་དང་། འགའ་ཞིག་སྲིད་དུ་ཆུག་ནའང་སྔོ་སེར་དང་བདེ་སྡུག་ལ་སོགས་པ་འཇལ་བའི་བློ་རྣམས་ནི་ཚད་མ་གཏན་མ་ཡིན་པར་འགྱུར་ཏེ། དེ་དག་གི་རིགས་རྟོགས་ཟིན་ཁོ་ན་ལ་འཇུག་པའི་ཕྱིར་རོ། །གལ་ཏེ་ཡུལ་དུས་རྣམ་པ་སོ་སོར་ངེས་པའི་རིགས་སྔར་མ་རྟོགས་པ་རྟོགས་པ་ཡིན་པས་སྐྱོན་གང་ཡང་མེད་དེ། ཞེས་ཀྱང་བརྗོད་མི་ནུས་ཏེ། དེ་ནི་རྫས་ཀྱི་མཐར་ཐུག་ཡིན་པས་སྔར་བཤད་པའི་སྐྱོན་ལས་མི་འདའ་བའི་ཕྱིར་དང་། ཡང་ཚད་མ་བདེན་པའི་དོན་ཅན་མ་ཡིན་པར་ཐལ་ཏེ། ལྡོག་པ་བརྫུན་པ་ལ་འཇུག་པའི་ཕྱིར་རོ། །གཉིས་པ་མཱ་ཎའི་དོན་འཇལ་བའང་མི་འཐད་དེ། བྱ་བྱེད་གཅིག་དང་ཐ་དད་བརྟགས་ན་མི་འཐད་པའི་ཕྱིར་དང་། བྱ་བ་དང་། བྱེད་པ་པོ་ལ་རྣམ་གྲངས་གསུམ་དུ་བརྟགས་ན་མི་འཐད་པའི་ཕྱིར་རོ། །དང་པོ་ནི། བྱ་བ་ཐམས་ཅད་ལས་དང་བྱེད་པ་པོ་ལ་ལྟོས་དགོས་པས་འཇལ་བ་ལ་གཞལ་བྱ་དང་། འཇལ་བྱེད་ཀྱིས་ཁྱབ་ལ། དེ་ལ་གཞལ་བྱ་འཇལ་བྱེད་གཉིས་རྫས་གཅིག་ན་བྱ་བྱེད་དང་འགལ་ལ། ཐ་དད་དུས་མཚུངས་ལ་འབྲེལ་བ་མེད་ཅིང་། མི་མཚུངས་ན་གང་རུང་གཅིག་ཡོད་པའི་ཚེ་གཅིག་མེད་པས་འཇལ་བར་མི་ནུས་སོ། །གཉིས་པ་ནི། འཇལ་བའི་བྱ་བའང་སྔར་གཞལ་བ་དང་། མ་གཞལ་བ་དང་། གཞལ་བཞིན་པ་གང་ཞིག་འཇལ་བ་བརྟགས་ན་མི་འཐད་པའི་ཕྱིར་རོ། །གསུམ་པ་ནི་འཇལ་བ་པོ་དང་། དེ་མིན་པ་དང་། དེ་གཉིས་ལས་མ་གཏོགས་པའི་གང་ཟག་གང་གིས་འཇལ་བརྟགས་ན་མི་འཐད་པའི་ཕྱིར་རོ། །ཅི་སྟེ་དཔྱད་ན་མི་འཐད་པས་དོན་དམ་པར་མེད་མོད། ཐ་སྙད་དུ་སྔར་མ་རྟོགས་པའི་འཇུག་ཡུལ་འཇལ་བའི་ཚད་མ་གཅིག་ཡོད་པས་དེ་རིགས་པས་ཇི་ལྟར་དགག་ནུས་ཞེ་ན། ཐ་སྙད་དུ་གཞལ་བྱ་འཇལ་བྱེད་དུ་སྣང་བ་ཙམ་ཞིག་གྲུབ་པ་ལ་རག་མོད། ཀུན་རྫོབ་བརྫུན་པ་ལ་བདེན་པར་ཞེན་པ་ཁྱོད་རྟོག་པ་ལྟ་བུའི་རང་གི་མཚན་ཉིད་དུ་བདེན་པ་ནི། དཔྱད་ན་ཐ་སྙད་དུའང་གྲུབ་པ་མ་ཡིན་ནོ། །གཉིས་པ་ཚད་མའི་མཚན་ཉིད་དགག་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། རིགས་པའི་དབང་ཕྱུག་རྣམ་པ་གཉིས་ཀྱི་གཞུང་ལུགས་ལས་ཚད་མའི་མཚན་ཉིད་སྟོན་པ་ཚད་མ་བསླུ་མེད་ཅན་ཤེས་པ། ཞེས་དང་། མ་ཤེས་དོན་གྱི་གསལ་བྱེད་ཀྱང་། །ཞེས་པ་དང་། འདི་དག་གིས་དོན་ཡོངས་སུ་བཅད་ནས་འཇུག་པ་ན་དོན་བྱ་བ་ལ་བསླུ་བ་མེད་པའི་ཕྱིར་རོ། །ཞེས་འབྱུང་བ་ལ། ཊཱི་ཀ་བྱེད་པ་རྣམས་ཀྱིས་དཔྱད་ནས་མི་མཐུན་པ་དུ་མར་སྨྲའོ། །དེ་ལ་དང་པོ་སློབ་དཔོན་ཆོས་མཆོག་ནི། མི་སླུ་བ་ཆོས་གསུམ་ལྡན་ཚད་མའི་མཚན་ཉིད་དུ་བཞེད་དེ། ཆོས་གསུམ་ནི་ངོ་བོ་དང་། ཡུལ་དང་། བྱེད་པའི་ཁྱད་པར་རོ། །དང་པོ་ངོ་བོའི་ཁྱད་པར་ནི་དོན་ཐོབ་པར་བྱེད་པའི་ནུས་པའོ། །གཉིས་པ་ཡུལ་གྱི་ཁྱད་པར་ནི་ཡོངས་སུ་བཅད་པའི་དོན་ཐོབ་པའི་ནུས་པ་སྟེ། དེ་ཡང་མ་བཟུང་བའི་དོན་ཐོབ་པ་ལ་བྱས་ན། དུང་སེར་འཛིན་ལ་སོགས་པ་ལོག་པ་ལའང་ཁྱབ་ཆེས་པར་འགྱུར་ཞིང་། བཟུང་བའི་དོན་ཐོབ་པ་ལ་བྱས་ན་མངོན་སུམ་གྱི་གཟུང་ཡུལ་སྐད་ཅིག་མ་ཡིན་པས་ཐོབ་མི་ནུས། རྗེས་དཔག་གི་གཟུང་ཡུལ་དངོས་མེད་ཡིན་པས་ཐོབ་རྒྱུ་མེད་པའི་ཕྱིར་ཏེ། གཟུང་བའམ་མ་བཟུང་བའི་དོན་ཐོབ་བྱེད་ལ་མི་བྱེད་ལ་ཡོངས་སུ་བཅད་པའི་མཐར་ཐུག་པའི་འཇུག་ཡུལ་ཐོབ་པའི་ནུས་པ་ལ་འཇོག་པས་སྐྱོན་གང་ཡང་མེད་དོ། །གསུམ་པ་བྱེད་པའི་ཁྱད་པར་ནི་དོན་ཡོངས་སུ་གཅོད་པར་བྱེད་པ་སྟེ། འདིའང་དབང་པོ་དང་རྐང་ལག་ལ་སོགས་པ་ལ་ཡོད་པའི་དོན་ཐོབ་པའི་ནུས་པ་བཅད་ནས་དོན་རྟོགས་པའི་བྱ་བས་ཐོབ་པའི་ནུས་པ་ཡིན་པར་སྟོན་པའོ། །ཞེས་གསུངས་སོ། །བྲམ་ཟེ་ཆེན་པོ་ལ་སོགས་པ་བདེན་པའི་དོན་རྟོགས་ཆོས་གསུམ་ལྡན་ཚད་མའི་མཚན་ཉིད་དུ་བཞེད། ཆོས་གསུམ་ནི་ངོ་བོ་དང་། ཡུལ་དང་འཛིན་སྟངས་ཀྱི་ཁྱད་པར་རོ། །དེ་ལ་ཤེས་བྱ་བདེན་པ་ནི་རིགས་པས་དཔྱད་བཟོད་དུ་བདེན་པ་མ་ཡིན་ཏེ། ཡིན་ན་ཀུན་རྫོབ་འཇལ་བའི་ཚད་མ་ལ་མ་ཁྱབ་པར་འགྱུར་བས་སོ། །དངོས་པོར་བདེན་པའང་མ་ཡིན་ཏེ། དངོས་མེད་འཇལ་བ་ལ་མ་ཁྱབ་པར་འགྱུར་བས་སོ། །སྒྲོ་མ་བཏགས་སུ་བདེན་པའང་མ་ཡིན་ཏེ། སྒྲོ་བཏགས་འཇལ་བ་ལ་མ་ཁྱབ་པར་འགྱུར་བས་སོ། །དེས་ན་ཤེས་པ་རང་གིས་སྒྲོ་མ་བཏགས་པར་དངོས་པོ་ལ་ཇི་ལྟར་གནས་པའོ། །དེ་རྟོགས་པའི་བློའང་ཆོས་གསུམ་དང་ལྡན་པ་སྟེ། ངོ་བོའི་ཁྱད་པར་སྒྲོ་འདོགས་སེལ་བ། ཡུལ་གྱི་ཁྱད་པར་སྔར་མ་རྟོགས་པའི་ཡུལ་རྟོགས་པ། འཛིན་སྟངས་ཀྱི་ཁྱད་པར་དོན་ལ་མི་འཁྲུལ་པའོ། །རྒྱན་མཁན་པོས་ནི་ཚད་མ་ནི་རྣམ་པ་གཉིས་ཏེ། དོན་དམ་རྟོགས་པའི་ཚད་མ་ནི་དུས་ཀྱི་ཁྱད་པར་ས་དང་པོ་ཡན་ཆད་ན་ཡོད་པ། གང་ཟག་འཕགས་པའི་རྒྱུད་ཀྱིས་བསྡུས་པ་གཞལ་བྱ་ཕྱི་རོལ་གྱི་དོན་མི་འཇལ་བར་ཤེས་པ་འཇལ་བ། དེའང་ཤེས་པའི་རྒྱུན་མི་འཇལ་བར་སྐད་ཅིག་ཆ་མེད་ཀྱི་དངོས་པོ་རེ་རེ་སྔར་མ་རྟོགས་པ་གསར་དུ་རྟོགས་པའི་དོན་གྱིས་མ་རྟོགས་དོན་གྱི་གསལ་བྱེད་ཡིན་གྱི་མི་བསླུ་བ་མ་ཡིན་ཏེ། སྔ་ཕྱི་གཅིག་ཏུ་འཛིན་པ་མེད་པས་བཅད་དོན་ཐོབ་པ་མེད་པའི་ཕྱིར་རོ། །ཐ་སྙད་པའི་ཚད་མ་ནི་དུས་ཀྱི་ཁྱད་པར་འཇིག་རྟེན་ཆོས་མཆོག་མན་ཆད་ན་ཡོད་པ་གང་ཟག་སོ་སྐྱེའི་རྒྱུད་ཀྱིས་བསྡུས་པ། གཞལ་བྱ་ཕྱི་རོལ་གྱི་དོན་འཇལ་བ་སྟེ་དེའི་མཚན་ཉིད་ནི་མ་རྟོགས་དོན་གྱི་གསལ་བྱེད་དང་མི་བསླུ་བ་གཉིས་ཀ་ཚོགས་པ་ཡིན་ཏེ། བཅད་པའི་དོན་ཐོབ་པ་ཡོད་པའི་ཕྱིར་ཞེས་བཞེད་དོ། །གཉིས་པ་དེ་དག་རིམ་པ་བཞིན་དགག་པ་ལ་དང་པོ་སློབ་དཔོན་ཆོས་མཆོག་གི་བཞེད་པ་བཅད་པའི་དོན་ཐོབ་པ་མི་བསླུ་བ་ཡང་མི་འཐད་དེ། དངོས་པོ་རྣམས་སྐད་ཅིག་མ་ཡིན་པ་ཉིད་ཀྱིས་ན་བཅད་པའི་དོན་མ་ཐོབ་ཅིང་དོན་མ་བཅད་པའི་ཕྱིར་རོ། །དངོས་པོ་ཙམ་གྱི་རྒྱུན་དང་ལྡོག་པ་ལ་ལྟོས་ནས་བཅད་དོན་ཐོབ་པ་ཡོད་པས་སྐྱོན་མེད་ཅེས་སྨྲ་བའང་མི་རིགས་ཏེ། རྒྱུན་དང་ལྡོག་པའང་རྫས་གཅིག་དང་ཐ་དད་བརྟགས་ན་མི་འཐད་པའི་ཕྱིར་རོ། །གཉིས་པ་བྲམ་ཟེ་ཆེན་པོའི་བདེན་པའི་དོན་རྟོགས་ཆོས་གསུམ་ལྡན་ཡང་དཔྱད་ན་ཐ་སྙད་དུའང་རིགས་པ་མ་ཡིན་ཏེ། དེ་ལ་ཡུལ་གྱི་ཁྱད་པར་སྔ་མ་རྟོགས་པའི་ཡུལ་ལ་འཇུག་པའང་རྫས་དང་རིགས་ལ་བརྟགས་ནས་མ་ཁྱབ་པ་དང་ཁྱབ་ཆེས་པར་འགྱུར་བའི་ཕྱིར་རོ། །ངོ་བོའི་ཁྱད་པར་སྒྲོ་འདོགས་སེལ་བའང་དཔྱད་ན་མི་འཐད་དེ་འདི་ལྟར་བསལ་བྱ་སྒྲོ་འདོགས་དང་། སེལ་བྱེད་ཚད་མ་གཉིས་ངོ་བོ་གཅིག་ན་རང་ལ་བྱ་བྱེད་འགལ་ཞིང་བཅད་བྱ་གཅོད་བྱེད་ལ་སོགས་པའང་གཅིག་ཏུ་འགྱུར་བ་དང་། ངོ་བོ་མི་གཅིག་ན་རྒྱུད་གཞན་གྱི་སྒྲོ་འདོགས་ཀྱང་སེལ་བར་འགྱུར་ཏེ་ངོ་བོ་མི་གཅིག་པར་མཚུངས་པའི་ཕྱིར་རོ། །གལ་ཏེ་ངོ་བོ་མི་གཅིག་པར་མཚུངས་ཀྱང་རྒྱུད་གཅིག་ཏུ་གཏོགས་པའི་སྒྲོ་འདོགས་སེལ་གྱི་རྒྱུད་གཞན་དུ་གཏོགས་པའི་སྒྲོ་འདོགས་མི་སེལ་ཞེས་ཀྱང་བརྗོད་པར་མི་ནུས་ཏེ། རྒྱུད་ཐ་དད་ལ་རྫས་གཅིག་པ་ཉིད་མི་འཐད་པའི་ཕྱིར་རོ། །འཛིན་སྟངས་ཀྱི་ཁྱད་པར་རང་རང་གིས་སྒྲོ་མ་བཏགས་པའི་དོན་ལ་མི་འཁྲུལ་བའང་མི་འཐད་དེ། རྣམ་པར་དཔྱད་ན་བློ་ཐམས་ཅད་རང་རང་གིས་སྒྲོ་བཏགས་པའི་ཡུལ་འཛིན་པར་མཚུངས་པའི་ཕྱིར་རོ། །བྱེ་བྲག་ཏུ་མངོན་སུམ་འཛིན་སྟངས་མི་འཁྲུལ་པའི་རྒྱུ་མཚན་སྣང་བ་དངོས་པོར་མི་འཐད་ཅིང་། དངོས་པོ་ཡང་སྣང་བར་མི་འཐད་པ་གཉིས་ལས། དང་པོ་ནི་སྣང་བ་དངོས་པོ་ཡིན་ན། རྟོག་མེད་ཀྱི་བློ་ལ་སྣང་བས་སམ། རྟོག་བཅས་ཀྱི་བློ་དངོས་པོར་ཞེན་པས་སམ། གཉིས་ཀ་ཚོགས་པས་སྣང་བ་དངོས་པོར་བདེན་པར་གྲུབ། དང་པོ་ལྟར་ན། རྟོག་མེད་འཁྲུལ་བའི་དམིགས་པ་ཟླ་བ་གཉིས་དང་། དུང་སེར་པོ་སོགས་ཀྱི་དངོས་པོར་སྣང་བས་དངོས་པོར་བདེན་པར་འགྱུར་རོ། །གཉིས་པ་ལྟར་ན་ཐག་པ་ལ་སྦྲུལ་དང་། སྒྲ་རྟག་པ་ལ་སོགས་པ་ལའང་རྟོག་བཅས་ཀྱི་བློས་བདེན་པར་ཞེན་པ་ཡོད་པས་བདེན་པའི་དངོས་པོར་འགྱུར་རོ། །གསུམ་པ་ལྟར་ན། རྨི་ལམ་གྱི་བློའི་ཡུལ་འགའ་ཞིག་ལའང་སྣང་ཞེན་གཉིས་ཀ་ཡོད་པས་བདེན་པའི་དངོས་པོར་འགྱུར་རོ། །དེ་ལྟར་ན་སྣང་བར་དངོས་པོར་མི་འཐད་ཅིང་། དུས་གསུམ་གྱི་དངོས་པོ་སྣང་བ་མི་འཐད་པས། དངོས་པོ་ཡང་སྣང་བར་མི་རུང་སྟེ་སྔ་ཕྱིའི་ཆ་མེད་ན་རྒྱུན་ཡང་མི་རུང་ཞིང་། ཆ་བཅས་ལ་ད་ལྟར་བ་མ་རྙེད་ལ་འདས་མ་འོངས་མངོན་སུམ་ལ་མི་སྣང་བའི་ཕྱིར་རོ། །དེ་ལྟར་ཡང་ཐོག་མ་དབུས་དང་ཐ་མ་ཡང་། །སྐད་ཅིག་བཞིན་དུ་བསམ་བྱས་ན། །འཇིག་རྟེན་སྐད་ཅིག་ལ་མི་གནས། །ཞེས་དང་། ཞིག་ནས་འགྲོ་མེད་འོང་མེད་ཅིང་། །སྐད་ཅིག་ཀྱང་ནི་མི་གནས་པ། །ཞེས་གསུངས་སོ། །ཡང་རྗེས་དཔག་འཛིན་སྟངས་མི་འཁྲུལ་བའི་རྒྱུ་མཚན། དོན་སྣང་མེད་ན་མི་འབྱུང་བའི་རྟགས་ཀྱི་རྗེས་སུ་འབྲང་བའང་མི་འཐད་དེ། རྗེས་དཔག་གི་རྟེན་རྟགས་ཀྱི་ཚུལ་གསུམ་མཐར་མངོན་སུམ་གྱིས་གྲུབ་དགོས་ན། སྔར་ཇི་སྐད་བཤད་པའི་རིགས་པས་མངོན་སུམ་འཛིན་སྟངས་འཁྲུལ་པར་གྲུབ་པས་སོ། །གཞན་ཡང་རྗེས་དཔག་རྟགས་ཀྱི་བསྒྲུབ་བྱ་འཇལ་བས། རྟགས་ཀྱི་གཞལ་བྱ་ལ་མི་འཁྲུལ་བ་དེ་རྟགས་བསྒྲུབ་བྱ་ལ་མི་འཁྲུལ་བ་ལ་རག་ལས་ཤིང་། དེའང་རྩ་བ་འབྲེལ་བ་ལ་རག་ལས། འབྲེལ་བའང་བདག་གཅིག་པ་དང་དེ་ལས་འབྱུང་བ་ལས་གཞན་ཡོད་པ་མ་ཡིན་ལ་དཔྱད་ན་འབྲེལ་བར་གཉིས་ཀྱང་འཐད་པ་མ་ཡིན་ཏེ། བདག་ཉིད་གཅིག་ལ་འབྲེལ་ཡུལ་འབྲེལ་ཆོས་གཉིས་མེད་པའི་ཕྱིར་དང་། ཐ་དད་ལ་གྲུབ་མ་གྲུབ་ལྟོས་པ་མེད་པས་འབྲེལ་བ་མི་འཐད་པའི་ཕྱིར་རོ། །རྒྱན་མཁན་པོས་ཐ་སྙད་པ་དང་དོན་དམ་པའི་ཚད་མ་གཉིས་སོ་སོར་ཕྱེ་ནས་འཇོག་པའང་མི་འཐད་དེ། དོན་དམ་པའི་ཚད་མའི་མཚན་ཉིད་ཁྱབ་ཆེས་ཤིང་། ཐ་སྙད་པའི་ཚད་མ་ལའང་དཔྱད་ན་མི་བསླུ་བ་མེད་པ་སྔར་བཤད་ཟིན་པའི་ཕྱིར་རོ། །ཚད་མའི་མཚན་ཉིད། ངེས་བྱེད་ཀྱང་འཐད་པ་མ་ཡིན་ཏེ། རང་ལ་ངེས་བྱ་ངེས་བྱེད་གཉིས་མེད་པས་རང་གིས་མི་ངེས་པའི་ཕྱིར་དང་། ངེས་བྱེད་ཐུག་མེད་དུ་ཐལ་བས་གཞན་གྱིས་ངེས་པར་ཡང་མི་འཐད་པའི་ཕྱིར་རོ། །དེ་དག་གིས་ཚད་མ་སྤྱིར་དགག་པ་བསྟན་ཟིན་ཏོ། །གཉིས་པ་བྱེ་བྲག་ཏུ་དགག་པ་ལ་བཞི་སྟེ། མངོན་སུམ་ཚད་མ་དགག་པ་དང་། རྗེས་དཔག་ཚད་མ་དང་། ལུང་གི་ཚད་མ་དང་། དཔེ་ཉེར་འཇལ་གྱི་ཚད་མ་བྱེ་བྲག་ཏུ་དགག་པའོ། །དེ་དག་ཀྱང་རིམ་པ་བཞིན་གཟུང་བ་དངོས་པོར་མེད་པས་གཟུང་ཡུལ་ལ་མི་འཁྲུལ་བའི་མངོན་སུམ་སྲིད་པ་མ་ཡིན་ཅིང་། རྩ་བ་འབྲེལ་བ་མེད་པས་མི་འཁྲུལ་བའི་རྟགས་ལས་རྟོགས་པའི་རྗེས་དཔག་སྲིད་པ་མ་ཡིན་ནོ། །འབྲེལ་མེད་ཕྱིར་ན་ཚིག་ལས་དོན་རྟོགས་པའི་ལུང་གི་ཚད་མ་ཉིད་ཀྱང་མི་འཐད་དོ། །ཀུན་གྱིས་འདྲ་བ་དང་ཕྱོགས་རིས་མི་འདྲ་བ་མེད་པས་དཔེ་ཉེར་འཇལ་ཚད་མའང་དཔེ་དང་གང་གིས་འདྲ་བ་ཚད་མར་འགྱུར་ཞེས་པའོ། །གཉིས་པ་དེ་ལྟ་བུའི་ཚད་མ་ཞིག་སྲིད་དུ་ཆུག་ནའང་དེ་རང་གི་རྒྱུད་ལ་སྐྱེ་བར་མ་ངེས་ཏེ། རྒྱུ་ཚོགས་མ་ཚང་བ་སྲིད་པའི་ཕྱིར་རོ། །ལན་ཅིག་ཡིད་ཆེས་པས་ཀྱང་མི་བསླུ་བར་མ་ངེས་ཏེ། རང་གཞན་གྱི་བློ་ཕྱི་མས་སུན་ཕྱུང་བར་མཐོང་བའི་ཕྱིར་རོ། །དེས་གཞན་ལ་ངེས་པ་བསྐྱེད་པར་ཡང་མི་ནུས་ཏེ། རང་གི་ཚད་མ་སྤོ་བའམ། དེའི་རྒྱུ་ཚོགས་པ་བསྒྲུབ་པར་མི་ནུས་ཤིང་གྲུབ་པར་ཁས་ལེན་པ་ཙམ་གྲུབ་པ་མ་ཡིན་པའི་ཕྱིར་རོ། །གསུམ་པ་སྤྱིར་ཡོད་ཅིང་རྒྱུད་ལ་བསྐྱེད་ནུས་ཀྱང་། འདིར་འདོད་པའི་དོན་མི་འགྲུབ་པ་ནི་རེ་ཞིག་མངོན་སུམ་གྱིས་ནི་དོན་དམ་པའི་དངོས་པོ་འགྲུབ་པར་མི་རུང་སྟེ། དེ་དག་དང་འགལ་བས་ཁྱབ་པ་ཆ་བཅས་ཉིད་སྣང་བའི་ཕྱིར་དང་། སྐྱེ་བོ་ཐམས་ཅད་བདེན་པ་མཐོང་ན་འཕགས་པར་འགྱུར་བས་ན་ཁས་ཀྱང་མི་ལེན་པའི་ཕྱིར་རོ། །ལུང་ལས་ཀྱང་། གལ་ཏེ་ཇི་ལྟར་མཐོང་དེ་བདེན། །ཐམས་ཅད་དེ་ཉིད་མཐོང་བར་འགྱུར། །ཞེས་དང་། གལ་ཏེ་དཔང་པོ་འདི་དག་ཚད་ཡིན་ན། །འཕགས་པའི་ལམ་གྱིས་སུ་ལ་ཅི་ཞིག་བྱ། །ཞེས་གསུངས་སོ། །རྗེས་དཔག་གིས་ཀྱང་བདེན་པའི་དངོས་པོ་མི་འགྲུབ་སྟེ། བདག་དང་གཙོ་བོ་དང་རྡུལ་ཕྲན་དང་། གཉིས་མེད་དོན་དམ་ལ་སོགས་པ་དཔེ་འགའ་ཡང་མཐོང་བ་མེད་པས་དེ་སྒྲུབ་ཀྱི་རྟགས་ཀྱི་ཡན་ལག་བསྒྲུབ་བྱ་ཉིད་དང་མཚུངས་པར་འགྱུར་བའི་ཕྱིར་རོ། །གཉིས་ལ་གནོད་པ་ཡོད་ཅིང་གསལ་བར་མྱོང་བའི་རྟགས་ཀྱིས་བསྒྲུབ་པའང་བདེན་པ་གཉིས་སུ་མ་གྲུབ་པ་དང་འཁྲུལ་བའི་ཕྱིར་ཏེ། རྟགས་དེ་ཀུན་རྫོབ་ཏུ་འགོད་ན་གཉིས་ལ་གནོད་པར་མ་གྲུབ་ཅིང་། དོན་དམ་པར་འགོད་ན་གསལ་བར་མྱོང་བ་མ་གྲུབ་ལ། ཆ་གཉིས་སུ་འགོད་ན་བསྒྲུབ་བྱ་གཉིས་མེད་དོན་དམ་གྱིས་བདེན་གཉིས་ལ་མ་ཁྱབ་པའི་ཕྱིར་རོ། །ལུང་ལས་ཀྱང་། ཉི་མ་དམུས་ལོང་ཡུལ་མིན་ལྟར། །དེ་ཉིད་དང་ནི་དོན་དམ་དེ། །རྟོག་གེ་པ་ཡི་ཡུལ་མ་ཡིན། །ཞེས་དང་། དོན་དམ་པའི་བདེན་པ་ནི་རྟོག་གེའི་ཡུལ་མ་ཡིན་ནོ་ཞེས་གསུངས་སོ། །ལུང་ཚད་མས་ཀྱང་དེ་མི་འགྲུབ་སྟེ། གཞན་གྱི་ལུང་ཁས་མི་ལེན་ཅིང་བདེ་བར་གཤེགས་པའི་ལུང་ལས་བསྟན་པ་མེད་པའི་ཕྱིར་ཏེ། ཇི་སྐད་དུ། ངས་ནི་ཆོས་རྣམས་ལ་བདེན་པའི་རང་བཞིན་ཅུང་ཟད་ཀྱང་བསྟན་པ་མེད་དོ་ཞེས་གསུངས་པ་ཡིན། གཉིས་ཀ་ལ་མཐུན་སྣང་དུ་གྲུབ་པའི་དཔེ་མེད་པའི་ཕྱིར། དཔེ་ཉེར་འཇལ་གྱི་ཚད་མས་ཀྱང་མི་འགྲུབ་པའི་ཕྱིར་རོ། །དེ་ལྟར་ན་སྐྱེས་བུ་རྣམས་ཀྱིས་ཤེས་བྱ་ལ་བདེན་པར་གྲུབ་པའི་ཆོས་ཅུང་ཟད་ཀྱང་ཡོད་ངེས་པའི་ཐ་སྙད་མི་བྱ་སྟེ། དེར་འཛིན་གྱི་ཚད་མ་མེད་པའི་ཕྱིར། ས་ཕྱོགས་སུ་ཤ་ཟ་བཞིན་ནོ། །ཞེས་ངེས་པར་བྱའོ། །དེ་ལ་ཁ་ཅིག་འདི་སྙམ་དུ་སྔར་དབུ་མའི་སྒྲུབ་བྱེད་ཚད་མ་ཉིད་ཡིན་པར་བརྗོད་ནས་ཡང་འདིར་ཚད་མ་དགག་པ་དང་། འགོག་བྱེད་ཀྱི་ཚད་མ་ཉིད་འདོད་པ་ནི་སྔ་ཕྱི་དང་དངོས་ཤུགས་ཀྱི་དོན་ཇི་ལྟར་མི་འགལ་ཞེ་ན། དེ་ལྟར་མོད་ཀྱི་འདིར་ཇི་ལྟར་བཀག་པའི་བདེན་པའི་ཡུལ་ཅན་གྱི་ཚད་མ་དཔྱད་ཀྱང་འཐད་པ་ཞིག་རྒྱུད་ལ་ངེས་པར་སྐྱེ་བ་ནི་སྔར་བརྗོད་པ་མེད་དོ། །དེ་ཉིད་ཀྱི་ཕྱིར་སློབ་དཔོན་གྱིས་ཚད་མ་བཤད་པ་དང་འགལ་བའི་སྐྱོན་ཡང་མེད་དེ། སློབ་དཔོན་ནི་དཔྱད་ན་འཐད་པའི་ཚད་མ་མི་བཞེད་ཀྱི། འཇིག་རྟེན་ལ་གྲགས་པའི་ཚད་མའི་རྣམ་གཞག་གསུངས་པ་ཙམ་ཡིན་པས་སོ། །གཞན་ཡང་ཚད་མ་དང་གཞལ་བྱ་ལ་སོགས་ཐམས་ཅད་ཐ་སྙད་ཀུན་རྫོབ་པ་ཉིད་དུ་ཟད་པས་ཤེས་པ་དང་ཤེས་བྱ་དང་རྟག་པ་དང་མི་རྟག་པ་ལ་སོགས་པ་དོན་དམ་པར་བདེན་པའི་དངོས་པོ་སྒྲུབ་པར་བྱེད་པའི་མངོན་སུམ་ལ་སོགས་པ་ནི་གང་ཡང་མི་རྙེད་པའོ། །འདི་ལྟར་རབ་རིབ་ཅན་གྱི་ཤེས་པ་ལྟར་བདེན་པར་སྣང་བ་ཙམ་གྱིས་ནི་བདེན་པའི་དོན་ཅན་གྱི་ཚད་མར་མི་འགྲུབ་ལ། ཡུལ་བདེན་པར་གནས་པས་ཀྱང་དེ་སྒྲུབ་པར་མི་ནུས་ཏེ། ཤེས་པའི་མི་བསླུ་བ་ཉིད་བསྒྲུབ་བྱར་གྱུར་ན། དེའི་ཡུལ་བདེན་པར་ཤིན་ཏུ་མི་འགྲུབ་པས་ཕན་ཚུན་བརྟེན་པ་ཉིད་དུ་འགྱུར་བས་ན་འགྱེལ་བས་འགྱེལ་བ་ལ་བརྟེན་པ་ལྟར། གཉིས་ཀ་མི་འགྲུབ་པ་ཉིད་དུ་འགྱུར་རོ། །འབྲས་བུ་བྱེད་པ་ལ་སོགས་པ་གཞན་ལ་ལྟོས་ནས་གྲུབ་པར་འདོད་ན་ནི། དེའང་འབྲས་བུ་གཞན་ལ་ལྟོས་པ་ལ་སོགས་པས་ཐུག་པ་མེད་པར་འགྱུར་རོ། །དེས་ན་ཐ་སྙད་ཙམ་གྱི་རྒྱུ་ལས་ནི་འབྲས་བུ་སྐྱེ་ཞིང་དེའི་རྒྱུ་རྟོགས་པ་ལ་སོགས་པ་ཐམས་ཅད་སྣང་བ་ཙམ་ཉིད་འགའ་ཡང་དེ་ནི་དཔང་བྱས་རིགས་པས་མིན་ཏེ། འདི་ལྟར་དེ་ཁོ་ནའི་ཡུལ་རིགས་པ་དམ་པའི་སྤྱོད་ཡུལ་དོན་དམ་པར་གྲུབ་པ་ནི་ནམ་ཡང་གང་ན་མེད་པར་ངེས་པར་བྱའོ། །དེ་དག་གིས་ཡོད་ངེས་པའི་རྒྱུ་སྒྲུབ་བྱེད་ཀྱི་ཚད་མ་དགག་པ་བཤད་ཟིན་ཏོ། །གཉིས་པ་མེད་ངེས་པའི་རྒྱུ་གནོད་བྱེད་ཀྱི་རིགས་པ་ལ་ཀུན་བརྟགས་ཀྱི་བདག་གཙོ་བོར་དགག་པ་དང་། ཀུན་བརྟགས་དང་ལྷན་སྐྱེས་སོ་སོར་མ་ཕྱེ་བར་དཔྱད་གཞིའི་ཆོས་ཅན་གྱི་སྟེང་དུ་གཙོ་བོར་དགག་པ་གཉིས་ལས་དང་པོ་ལ། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་པའི་ཚུལ་གྱིས་གྲུབ་མཐའ་གོང་མ་གོང་མའི་དགག་པས་དགག་པ་ནི་ཡེ་ཤེས་སྙིང་པོ་ཀུན་ལས་བཏུས་ལས་བཤད་པའི་རིགས་པ་ལྟ་བུ་སྟེ། ཕྱི་རོལ་པས་བརྟགས་པའི་གང་ཟག་གི་བདག་རྟག་པ་གཅིག་པུ་དང་། ཆོས་ཀྱི་བདག་གཙོ་བོ་དང་རྡུལ་ཕྲན་རྟག་པ་སོགས་བྱེ་བྲག་སྨྲ་བའི་རིགས་པས་བཀག དེས་བརྟགས་པའི་ལྡན་མིན་འདུ་བྱེད་དང་། འདུས་མ་བྱས་ཀྱི་གཞི་མདོ་སྡེ་པའི་རིགས་པས་བཀག དེས་བརྟགས་པའི་ཕྱི་རོལ་གྱི་དོན་བདེན་གྲུབ་རྣམ་རིག་པའི་རིགས་པས་བཀག དེས་བརྟགས་པའི་གཉིས་སྟོང་གི་ཤེས་པ་དང་སྟོང་ཉིད་བདེན་པར་གྲུབ་པར་དབུ་མ་པའི་རིགས་པས་བཀག་སྟེ། མཐའ་བཞིའི་སྤྲོས་བྲལ་ཉིད་ལ་སྦྱོར་བར་མཛད་པའོ། །ཀུན་བརྟགས་ཐམས་ཅད་དབུ་མ་ཉིད་ཀྱི་རིགས་པས་དགག་པ་ནི་བྱང་ཆུབ་སེམས་འགྲེལ་ལྟ་བུ་སྟེ་རང་གཞན་གྱི་སྡེ་པས་བརྟགས་པའི་བདེན་དངོས་ཐམས་ཅད་གང་ཟག་གི་བདག་རྟག་པ་གཅིག་པུ་དང་། གཟུང་འཛིན་གཉིས་ཀྱིས་བསྡུས་པའི་ཆོས་བདེན་པ་དང་། གཉིས་སྟོང་གི་རྣམ་རིག་དང་། སྟོང་ཉིད་བདེན་པ་བཞིར་བསྡུས་ནས་དབུ་མ་ཉིད་ཀྱི་རིགས་པས་བཀག་སྟེ་མཐར་སྤྲོས་བྲལ་ལ་སྦྱོར་བ་མཛད་པའོ། །གཉིས་པ་ནི་རིགས་ཚོགས་ནས་གསུངས་པའི་རིགས་པ་རྣམས་ཏེ། དབུ་མ་རྩ་བར། རྐྱེན་དང་འགྲོ་འོང་སོགས་དཔྱད་གཞི་འཇིག་རྟེན་ན་གྲགས་པའི་ཐ་སྙད་བདེན་པ་ཉི་ཤུ་རྩ་བདུན་དུ་བསྡུས་ནས་དེ་དག་ལ་བདེན་པར་འཛིན་པའི་ཞེན་ཡུལ་འགོག་པ་སྟེ། རྐྱེན་དང་ཕུང་ཁམས་སྐྱེ་མཆེད་སོགས་འགའ་ཞིག་ལ་ཀུན་བརྟགས་ཀྱི་བདག་དགག་པ་གཙོ་ཆེ་ཞིང་དེས་ལྷན་སྐྱེས་ཀྱི་ཡུལ་ཡང་ཁེགས་ལ། འགྲོ་འོང་དང་། ལས་དང་། བྱེད་པ་པོ་སོགས་འགའ་ཞིག་ལ་ལྷན་སྐྱེས་ཀྱི་བདག་དགག་པ་གཙོ་ཆེ་ཞིང་དེས་ཀུན་བརྟགས་ཀྱི་བདག་ཀྱང་ཁེགས་པ་ལྟ་བུའོ། །དེ་དག་གི་དོན་བསྡུ་ན་ཆོས་ཀྱི་བདག་འགོག་པའི་རིགས་པའི་རྣམ་གྲངས་དང་། གང་ཟག་གི་བདག་འགོག་པའི་རིགས་པའི་རྣམ་གྲངས་གཉིས་ལས། དང་པོ་ནི་འགལ་འབྲེལ་ལ་བརྟེན་པའི་རིགས་པའི་འཇུག་པ་བཞི་སྟེ། ཆོས་རྣམས་ཀྱི་རང་གི་མཚན་ཉིད་རྣམ་པར་བརྟགས་ནས་འགོག་པ་དང་གཞན་དང་ཁྱད་པར་རྣམ་པར་བརྟགས་ནས་འགོག་པ་དང་། ཐལ་བའི་སྒོ་ནས་དགག་པ་དང་། གཏན་ཚིགས་ཀྱི་སྒོ་ནས་དགག་པའོ། །དང་པོ་ལའང་བྱ་བ་བྱེད་པའི་དང་། ཡུལ་དང་ཡུལ་ཅན་གྱི་དང་། རྟེན་དང་བརྟེན་པའི་དང་། ལུས་དང་ཡན་ལག་གི་དང་། ཕན་ཚུན་ལྟོས་པའི་ཐ་སྙད་ཀྱི་དོན་དགག་པ་ལྔ་ལས། དང་པོ་ནི་འགྲོ་བ་དང་། འོང་བ་དང་། སྨྲ་བ་དང་། ལྟ་བ་ལ་སོགས་པ་འགའ་ཞིག་བྱེད་པའི་ཐ་སྙད་རྣམས་ཡིན་ལ། དེ་ནི་རྣམ་པར་བརྟགས་ན་རུང་བ་མ་ཡིན་ཏེ། འདི་ལྟར་བུམ་པ་ལ་སོགས་པ་འགའ་ཞིག་བྱེད་པ་ལ་ཐ་སྙད་དུ་ཆོས་བཞིས་ཁྱབ་པར་མཐོང་སྟེ། རྫ་མཁན་དང་བདག་པོ་ལ་སོགས་པ་དང་དངོས་དང་བརྒྱུད་པའི་བྱེད་པ་པོ་དང་། འཇིམ་པ་དང་བུམ་པ་ལ་སོགས་པ་གང་དུ་བྱ་བའི་ལས་དང་། ལག་པ་དང་། འཁོར་ལོ་ལ་སོགས་པ་དངོས་དང་བརྒྱུད་པའི་བྱེད་པ་དང་། སྐྱེ་བ་དང་འཁོར་བ་ལ་སོགས་པ་ལས་དང་བྱེད་པ་འཇུག་པའི་གཞིའི་བྱ་བའོ། །དེ་དག་ལས་འདིར་བྱེད་པ་ནི་བྱེད་པ་པོ་ཉིད་དུ་བསྡུས་ཏེ་འགྲོ་བྱ་འགྲོ་བྱེད་འགྲོ་བ་ལ་སོགས་པ་ལས་དང་བྱེད་པོ་བྱ་བ་གསུམ་གྱིས་ཁྱབ་པ་དང་། གཉིས་པོ་ལའང་རྟེན་དང་འབྲས་བུའི་ཚུལ་གྱིས་བྱ་བས་ཁྱབ་པར་བརྗོད་པར་བྱ་བ་བཀག་པ་ཉིད་ཀྱིས་ཐམས་ཅད་ཁེགས་པར་འགྱུར་རོ། །དེ་དགག་པ་ནི་གསུམ་གྱིས་ཏེ། བྱས་མ་བྱས་ཀྱི་ལས་ལ་འགག་པ་དང་མ་ཐོབ་པས་མེད་པ་དང་། གྱུར་མ་གྱུར་གྱི་བྱེད་པ་པོ་ལ་ཟློས་པ་དང་འགལ་བས་མེད་པ་དང་། བྱ་བ་དང་བྱེད་པ་པོ་གཅིག་ཉིད་དམ་ཐ་དད་མི་དད་པའི་སྒོ་ནས་སོ། །རིགས་པ་འདིས་ནི་དངོས་སུ་གང་ཅུང་ཟད་བྱེད་པའི་རང་ལྡོག་ཐམས་ཅད་ཁེགས་ལ་ཁྱབ་པའི་སྒོ་ནས་ནི་ཆོས་ཐམས་ཅད་ཁེགས་པར་འགྱུར་ཏེ། བྱ་བ་དང་མ་འབྲེལ་བའི་ཆོས་འགའ་ཡང་མེད་པའི་ཕྱིར། སྐྱེ་བ་བཀག་པའི་དངོས་པོ་བཞིན་ནོ། །རིགས་པ་འདི་ནི་རྩ་བ་ལས། འགྲོ་འོང་བཀག་པའི་རབ་བྱེད་དུ་གཙོ་བོར་འབྱུང་ངོ་། །གཉིས་པ་ནི་བློས་དོན་རིག་པ་ལ་སོགས་པའི་ཐ་སྙད་ཡིན་ལ། འདིའང་བརྟགས་ན་མི་རུང་སྟེ་དོན་རྣམས་ལ་སྔ་ཕྱིའི་དབུས་ན་འདུག་པས་ཁྱབ་ཅིང་སྣང་བ་ལ་ད་ལྟར་བས་ཁྱབ་ལ། ཡང་སྔ་ཕྱིའི་དབུས་ཡོད་པ་ལ་སྔ་ཕྱི་ཡོད་པས་ཁྱབ་ཅིང་ད་ལྟར་བ་ལ་སྔ་ཕྱི་མེད་པས་ཁྱབ་པས་དོན་བློའི་གཟུང་ཡུལ་དུ་མི་རུང་བ་དང་། འདས་པ་དང་མ་འོངས་པ་མེད་པ་ཉིད་ཀྱིས་བློ་ད་ལྟར་བའི་ཞེན་ཡུལ་དུའང་མི་རུང་སྟེ། བློ་འདས་མ་འོངས་ཀྱིས་ད་ལྟར་བའི་དོན་མི་ཤེས་པ་བཞིན་ནོ། །དེ་བཞིན་དུ་སྒྲས་དོན་བརྗོད་པ་དང་། ལག་གིས་བུམ་པ་གཟུང་བ་ལ་སོགས་པ་ལའང་དུས་གསུམ་དུ་དཔྱད་ན་མི་འཐད་པར་བལྟའོ། །འདིའང་རིན་ཆེན་ཕྲེང་བ་ལས། ཡུལ་ནི་འདས་དང་མ་འོངས་རྣམས། །དབང་པོ་དང་བཅས་དོན་མེད་ལ། །ཞེས་སོགས་འབྱུང་བ་ཡིན་ནོ། །གསུམ་པ་ནི་མཚན་གཞི་དང་། མཚན་ཉིད་ལ་སོགས་པ་རྟེན་དང་བརྟེན་པ་རྣམས་ཡིན་ལ། དེའང་བརྟགས་ན་མི་རུང་སྟེ། རྫས་གཅིག་ལ་བྱ་བྱེད་འགལ་བ་དང་། ཐ་དད་དུས་མཉམ་དུ་གྲུབ་པ་མི་ལྟོས་པ་དང་། སྔ་ཕྱི་མི་ཕྲད་པ་དང་། ཆོས་ཡོད་མེད་ཀྱི་གཞི་ལ་ཟློས་པ་དང་འགལ་བས་འཇུག་ཚུལ་མི་འཐད་པའི་ཕྱིར་རོ། །འདིའང་རྩ་བ་ལས་འདུས་བྱས་བརྟག་པའི་རབ་བྱེད་ཀྱི་སྐབས་སུ་གཙོ་བོར་འབྱུང་བ་ཡིན་ནོ། །བཞི་པ་ནི་ཤིང་རྟ་དང་། དམག་དང་ཕྲེང་བ་ལ་སོགས་པ་ཚོགས་པའི་ཐ་སྙད་ཡིན་ལ། དེའང་བརྟགས་ན་མི་རུང་སྟེ། འདི་ལྟར་ཁོག་པ་དང་། འཁོར་ལོ་ལ་སོགས་པ་ཡན་ལག་འདུས་པ་ལ་ཤིང་རྟ་གཅིག་གི་ཐ་སྙད་བརྗོད་པ་ན་ཐ་སྙད་དེ་འཁོར་ལོ་ལ་སོགས་པའི་ཡན་ལག་ལས་ལོགས་སུ་མ་སྨྲོས་ཤིང་མི་ལྟོས་པར་འགྱུར་བས་གཞན་དུ་མི་འཐད་པ་དང་། ཡན་ལག་དེ་ཉིད་ཀྱིས་ཤིང་རྟར་འགྱུར་བ་དང་། ཆོས་འགལ་བ་གཅིག་ཏུ་མི་རུང་བས་དེ་ཉིད་དུ་མི་འཐད་པས་ཁེགས་ལ། དེ་བཞིན་དུ་འཁོར་ལོ་ལ་སོགས་པའི་ཡན་ལག་ཉིད་ཀྱང་ལྟེ་བ་དང་རྩིབས་ལ་སོགས་པའི་ཚོགས་པའི་ཐ་སྙད་ཡིན་པ་ནི། རང་གི་ཡན་ལག་ལས་དེ་ཉིད་དང་གཞན་དུ་མེད་པའི་རིགས་པས་ཁེགས་པར་འགྱུར་ཏེ། ཚུལ་འདི་ཉིད་ཀྱི། བུམ་པ་སྣམ་བུ་རེ་ལྡེ་དམག་དང་ནགས་ཚལ་ཕྲེང་བ་ལྗོན་ཤིང་དང་། །ཁང་ཁྱིམ་ཤིང་རྟ་ཕྲན་དང་མགྲོན་གནས་ལ་སོགས་དངོས་རྣམས་གང་དག་དང་། །ཞེས་པའི་ཆོས་ཐམས་ཅད་ལ་སྦྱར་བས་ལུས་ཐམས་ཅད་བཏགས་ཙམ་ལས་རྫས་སུ་མེད་པར་གྲུབ་ལ། ཁྱབ་པའི་སྒོ་ནས་ནི་དངོས་པོ་ཙམ་ཡང་རང་བཞིན་མེད་པར་གྲུབ་སྟེ། ཚོགས་པ་ཉིད་ཀྱིས་ཁྱབ་པའི་ཕྱིར་རོ། །ཇི་སྐད་དུ་ལུང་ལས། ཚོགས་པ་མ་གཏོགས་པའི་དངོས་པོ་ཕྲ་བའང་མེད་ཅེས་དང་། གང་ཕྱིར་འདུས་ལས་མ་གཏོགས་པའི། །དངོས་པོ་བློ་ཡིས་མི་ཟིན་པ། །ཞེས་གསུངས་པས་སོ། །ལྔ་པ་ནི་ཕན་ཚུན་ལྟོས་པ་སྔ་ཕྱི་ལ་སོགས་པའི་དུས་དང་། ཤར་ལ་སོགས་པའི་ཕྱོགས་དང་། ཆེ་ཆུང་། རིང་ཐུང་། རྒན་གཞོན། མཆོག་དམན་ལ་སོགས་པའི་ཐ་སྙད་ཡིན་ལ། དེའང་བརྟགས་ན་མི་རུང་བ་ཉིད་དེ། འདི་ལྟར་རེ་ཞིག་དེ་དག་གི་ཐ་སྙད་སྔོན་པོ་ཉིད་ལ་སོགས་པ་ལྟར་ཟླ་བོ་གཞན་ལ་མ་ལྟོས་པ་ཉིད་དུ་བརྗོད་པར་མི་ནུས་ཏེ། སྔ་ཕྱི་སོགས་དེ་དག་གནས་སྐབས་ཐམས་ཅད་དུ་དེ་ཉིད་ཡིན་པར་ཐལ་བ་དང་། རྒན་གཞོན་སོགས་ཕན་ཚུན་ལྟོས་ནས་འདོགས་པ་མེད་པར་ཐལ་བའི་ཕྱིར་རོ། །དེ་ལྟར་ཡིན་པ་དང་། སྔ་མའི་ཐ་སྙད་ཅིག་ཤོས་ཕྱི་བ་ལ་ལྟོས་ཤིང་དེའི་ཐ་སྙད་ཀྱང་རིགས་སྔ་མ་ལ་ལྟོས་ཏེ་ཕན་ཚུན་བརྟེན་པས་མི་འགྲུབ་པ་དང་། བརྒྱུད་ནས་རང་ལ་རང་ལྟོས་སུ་འགྱུར་བས་གྲུབ་མ་གྲུབ་ལྟོས་པར་མི་རུང་བའི་ཕྱིར་རོ། །འདིས་ནི་དངོས་སུ་ཆེ་ཆུང་བཟང་ངན། སྡུག་མི་སྡུག་བདེ་སྡུག་གཅིག་དང་ཐ་དད། མཆོག་དམན་གྱི་ཐ་སྙད་རང་བཞིན་གྱིས་གྲུབ་པ་ཁེགས་ལ། ཁྱབ་པའི་སྒོ་ནས་ནི་ཆོས་ཐམས་ཅད་ཀྱི་རང་བཞིན་ཁེགས་པར་འགྱུར་ཏེ། རྟེན་འབྱུང་མ་ཡིན་པའི་ཆོས་འགའ་ཡང་མེད་པའི་ཕྱིར་རོ། །འདིའང་ལུང་ལས། གལ་ཏེ་དངོས་པོ་གང་ལྟོས་གྲུབ། །དེ་ཉིད་ལ་ཡང་ལྟོས་ནས་ནི། །ལྟོས་བྱ་གང་ཡིན་དེ་གྲུབ་ན། །ཞེས་སོགས་གསུངས་པ་ཡིན་ནོ། །གཉིས་པ་གཞན་དང་ཁྱད་པར་བརྟགས་ཏེ་དགག་པ་ནི་གཞན་དག་ཇི་ལྟར་སྣང་བའི་ཆོས་དག་ལ། རྣམ་པར་བརྟགས་ནས་འགའ་ཞིག་ཁོ་ན་བདེན་པ་དང་མི་བདེན་པར་ཁས་ལེན་པ་ལ། འདིའམ་དེའོ་ཞེས་གང་དུ། །རྣམ་པར་དཔྱད་ན་མི་དམིགས་ན། །ཞེས་པའི་དོན་རྒྱུ་མཚན་མཚུངས་པའི་མགོ་སྙོམས་པར་ཡིན་ཏེ། དེའང་ཐ་སྙད་ཀྱི་རྒྱུ་མཚན་ཡོད་པར་མཚུངས་པ་དང་། ཡང་དག་པའི་རྒྱུ་མཚན་མེད་པར་མཚུངས་པ་དང་། སྤྱི་ལྡོག་གཅིག་པར་ཡིན་པས་དགག་པ་སྟེ་གསུམ་བཤད་ཟིན་ཏོ། །གསུམ་པ་ཐལ་བའི་སྒོ་ནས་དགག་པ་ནི། ཁས་བླངས་པའི་རྟགས་ཀྱིས་མི་འདོད་པ་ཐལ་བར་འཕེན་པ་སྟེ། ལུང་ལས། རང་བཞིན་ཡོད་ན་འགྲོ་བ་རྣམས། །མ་སྐྱེས་པ་དང་མ་འགགས་དང་། །ཞེས་དང་། གལ་ཏེ་ཆོས་རྣམས་རང་བཞིན་འགའ་ཡོད་ན། །རྒྱལ་བ་ཉན་ཐོས་བཅས་པ་དེ་མཁྱེན་འགྱུར། །ཞེས་དང་། གལ་ཏེ་གཟུགས་དངོས་པོ་ཡོད་ཅིང་མེད་པ་མ་ཡིན་ན་ནི་ཐེག་པ་ཆེན་པོ་འདིས་ཀྱང་ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་ཟིལ་གྱིས་མནན་ཅིང་འབྱུང་བར་མི་འགྱུར་ཏེ། ཞེས་པའི་ཚུལ་གྱིས་ཐལ་བའི་སྦྱོར་ངག་མདོ་ལས་ཀྱང་གསུངས་ཤིང་སློབ་དཔོན་གྱི་རིགས་པ་ཕལ་ཆེར་འདི་ལྟར་གནས་པ་ནི་སྔར་ཐལ་རང་གི་སྐབས་སུ་བཤད་ཟིན་ཏོ། །བཞི་པ་གཏན་ཚིགས་ཀྱི་སྒོ་ནས་དགག་པ་ནི། མདོ་ལས། སྲིད་པ་རྣམས་ནི་ཡོང་ཡེ་སྟོང་པ་སྟེ། །ཉི་ཚེའི་སྟོང་པ་མུ་སྟེགས་ཅན་རྣམས་ཀྱིས། །ཞེས་པའི་ཚུལ་གྱིས་གང་ཞིག་མ་ཁེགས་ན་དབུ་མ་པར་མི་འགྱུར་བའི་དགག་བྱ་ལ་སྤྱི་ལྡོག་ནས་ཁྱབ་བྱེད་དགག་པ་གཅིག་དུ་བྲལ་ལ་སོགས་པའི་གཏན་ཚིགས་ཏེ། ཞིབ་པར་འོག་ཏུ་འཆད་པར་འགྱུར་ཞིང་། རང་རྒྱུད་དུ་འདོད་མི་འདོད་ཀྱི་ཁྱད་པར་ནི་བཤད་ཟིན་ཏོ། །གཉིས་པ་གང་ཟག་གི་བདག་དགག་པའི་རིགས་པའི་རྣམ་གྲངས་ལ། བདུན་དུ་དཔྱད་ནས་དགག་པ་དང་། དེ་ཉིད་ལྔར་བསྡུ་བ་དང་། དེ་ཉིད་བཞིར་བསྡུ་བ་དང་། དེའང་གཉིས་སུ་བསྡུ་བ་སྟེ་བཞི་ལས། དང་པོ་ནི་འཇུག་པར། ཕུང་པོ་དང་། དེ་ཉིད་དང་། གཞན་ཉིད་དང་། རྟེན་དང་། བརྟེན་པ་དང་། ལྡན་པ་དང་ལྔའི་སྟེང་དུ་ཕུང་པོའི་ཚོགས་ཙམ་དང་། ཕུང་པོའི་བཀོད་པ་དབྱིབས་ཏེ། རྣམ་པ་བདུན་དུ་དཔྱད་ནས་དགག་པར་མཛད་པའོ། །གཉིས་པ་ནི་རྩ་བར། མེ་དང་བུད་ཤིང་བརྟག་པའི་སྐབས་སུ། ཤིང་ཉིད་མེ་ནི་མ་ཡིན་ཏེ། །ཤིང་ལས་གཞན་ལ་མེ་ཡང་མེད། །མེ་ནི་ཤིང་དང་ལྡན་མ་ཡིན། །མེ་ལ་ཤིང་མེད་དེར་དེ་མེད། །ཞེས་རྣམ་པ་ལྔའི་སྒོ་ནས་དཔྱད་ཅིང་། མེ་དང་ཤིང་གིས་བདག་དང་ནི། །ཉེ་བར་ལེན་པའི་ཤེས་པ་ཀུན། །བུམ་སྣམ་སོགས་དང་ལྷན་ཅིག་ཏུ། །མ་ལུས་པར་ནི་རྣམ་པར་བཤད། །ཅེས་ཆོས་དང་གང་ཟག་ཐམས་ཅད་ལ་སྦྱར་བར་གསུངས་པ་དང་། དེ་བཞིན་གཤེགས་པ་བརྟག་པའི་སྐབས་སུ། ཕུང་མིན་ཕུང་པོ་ལས་གཞན་མིན། །དེ་ལ་ཕུང་མེད་དེ་དེར་མེད། །དེ་བཞིན་གཤེགས་པ་ཕུང་ལྡན་མིན། །དེ་བཞིན་གཤེགས་པ་གང་ཞིག་ཡིན། །ཞེས་རྣམ་པ་ལྔའི་སྒོ་ནས་དགག་པར་གསུངས་སོ། །གསུམ་པ་ལ་གཉིས་ལས། འཇིག་ལྟ་ཉི་ཤུ་འགོག་པའི་སྐབས་སུ། བདག་ཕུང་གཞན་དུ་ལྟ་བའི་ཕྱོགས་ལྔ་པ། བདག་འཇིག་ཚོགས་ལ་མ་ལྟོས་པར་གཟུང་བས་འཇིག་ལྟའི་གྲངས་སུ་མི་བགྲངས་པར་འཇུག་འགྲེལ་ལས་གསུངས་པས་ཕུང་པོ་རེ་རེའི་སྟེང་དུའང་དེ་ཉིད་དང་རྟེན་དང་བརྟེན་པ་ལྡན་པ་བཞི་བཞིར་དཔྱད་དེར་དགག་པར་གསུངས། ཡང་བྱང་ཆུབ་སེམས་འགྲེལ་ལས། ཕུང་རྣམས་ཡོད་དེ་དེ་རྟག་མིན། །དེ་ཡང་བདག་གི་ངོ་བོ་མིན། །གང་ཡང་རྟག་དང་མི་རྟག་གཉིས། །རྟེན་དང་བརྟེན་པའི་དངོས་པོར་མེད། །ཅེས་ལྡན་པའི་ཕྱོགས། །གཞན་ན་གནག་ལྡན་གཞན་མིན་གཟུགས་ལྡན་ན། །ཞེས་པའི་ཚུལ་གྱིས་དེ་ཉིད་དང་གཞན་ཉིད་གང་རུང་དུ་འདུས་པ་ལ་དགོངས་ནས་དེ་ཉིད་དང་གཞན་ཉིད་དང་། རྟེན་དང་བརྟེན་པ་རྣམ་པ་བཞིར་དཔྱད་ནས་དགག་པ་མཛད་དོ། །བཞི་པ་ནི་བདག་བརྟག་པའི་སྐབས་སུ། གལ་ཏེ་ཕུང་པོ་བདག་ཡིན་ན། །སྐྱེ་དང་འཇིག་པ་ཅན་དུ་འགྱུར། །གལ་ཏེ་ཕུང་པོ་རྣམས་ལས་གཞན། །ཕུང་པོའི་མཚན་ཉིད་མེད་པར་འགྱུར། །ཞེས་དེ་ཉིད་དང་གཞན་ཉིད་དུ་དཔྱད་པ་གཉིས་སུ་རྟགས་ནས་དགག་པར་མཛད་དེ། དེའི་འགྲེལ་པར། ཡང་གཞན་དེ་བཞིན་གཤེགས་པ་བརྟག་པ་དང་། མེ་དང་བུད་ཤིང་བརྟག་པར་ཕྱོགས་ལྔ་ཉེ་བར་བཀོད་ལ་འདིར་ནི་ཕྱོགས་གཉིས་ཉིད་ཡིན་པའི་ཅིའི་ཕྱིར་ཞེ་ན་བརྗོད་པར་བྱ་སྟེ། གང་ཕྱིར་དེ་དག་ཏུ་ཕྱོགས་ལྔ་བསྟན་པ་དེ་ཉིད་ཀྱི་ཕྱིར་གཞན་དུ་བསྟན་པས་ཡང་འདིར་མ་བསྟན་ཏེ། མདོར་བསྡུས་ནས་ཕྱོགས་གཉིས་ཤིག་ཉེ་བར་བཀོད་དོ། །ཞེས་དང་། ཕུང་མིན་ཕུང་པོ་ལས་གཞན་མིན། །ཞེས་པའི་འགྲེལ་པར། རྟེན་བརྟེན་པ་དང་ལྡན་པ་གསུམ་ཀ་གཞན་ཉིད་ཀྱི་ཁོངས་སུ་འདུས་པར་གསུངས་ཏེ། ལྡན་པའི་དཔེར་ལྷས་བྱིན་ནོར་དང་ལྡན་པ་ཞེས་གསུངས་ཏེ། འདི་ནི་ཕྱོགས་གཅིག་པའི་དབང་དུ་བྱས་སོ། །གལ་ཏེ་སངས་རྒྱས་ཕུང་པོ་ལ་ཞེས་པའི་སྔ་འགྲེལ་དུ། བདག་ལ་ཕུང་པོ་བརྟེན་པའི་དཔེར། རི་གངས་ཅན་ལ་ནགས་ཚལ་གནས་པ་དང་། ཕུང་པོ་ལ་བདག་བརྟེན་པའི་དཔེར་ནགས་ཁྲོད་དུ་སེང་གེ་གནས་པ་དང་། བདག་ཕུང་པོ་དང་ལྡན་པའི་དཔེར་འཁོར་ལོ་སྒྱུར་བའི་རྒྱལ་པོ་མཚན་དང་ལྡན་པ་སྨྲོས་པས་རྟེན་བརྟེན་པ་གཉིས་ནི་གཞན་ཉིད་ཀྱི་ཕྱོགས་སུ་འདུས་ཤིང་། ལྡན་པ་གཉིས་ཀར་འདུས་པ་གཞུང་གོང་འོག་ཀུན་གྱི་དགོངས་པའོ། །ཡོད་པ་སྒྲོ་འདོགས་ཀྱི་མཐའ་དགག་པའི་རིགས་པའི་རྣམ་གྲངས་བཤད་ཟིན་ཏོ། །གསུམ་པ་མཐར་སྤྲོས་པའི་མཐའ་ཐམས་ཅད་འགོག་པའི་རིགས་པ་ནི་ལུང་ལས། ཡོད་པ་མེད་པའི་ཟླས་དྲངས་ཏེ། །མེད་པའང་ཡོད་པའི་ཟླས་དྲངས་ཏེ། །ཞེས་དང་། སློབ་དཔོན་གྱིས། དགག་བྱ་ཅི་ཡང་མེད་པས་ན། །ང་ནི་ཅི་ཡང་མི་འགོག་གོ །ཞེས་དང་། བདེན་གཉིས་ལས། དགག་བྱ་ཡོད་པ་མ་ཡིན་པས། །ཡང་དག་ཏུ་ན་བཀག་མེད་གསལ། །ཞེས་སོགས་ཀྱི་དབུ་མའི་གཞུང་ལུགས་རྣམས་ལས་ཡོད་མེད་གང་རུང་གཅིག་དགག་བྱར་བྱེད་པའི་ཚེ་ན། གཅིག་ཤོས་ཡང་དགག་བྱར་བྱེད་དགོས་པར་གསུངས་པས་མཐར་ཡོད་མེད་སོགས་སྤྲོས་པའི་མཐའ་གང་དུའང་གཟུང་དུ་མེད་པར་གྲུབ་བོ། །བཞི་པ་རིགས་པའི་གཙོ་བོ་སོ་སོར་བཤད་པ་ལ་བཞི་སྟེ། ཆོས་ཀྱི་བདག་དགག་པའི་རིགས་པའི་གཙོ་བོར་བཤད་པ་དང་། གང་ཟག་གི་བདག་དགག་པའི་རིགས་པའི་གཙོ་བོར་བཤད་པ་དང་། དེ་ལྟར་བཀག་པས་གྲུབ་པའི་དོན་དང་། དགག་པའི་གོ་རིམ་བསྟན་པའོ། །དང་པོ་ལ་ངོ་བོ་ལ་དཔྱོད་པ་གཅིག་དུ་བྲལ། རྒྱུ་ལ་དཔྱོད་པ་རྡོ་རྗེ་གཟེགས་མ། འབྲས་བུ་ལ་དཔྱོད་པ་ཡོད་མེད་སྐྱེ་འགོག གཉིས་ཀ་ལ་དཔྱོད་པ་མུ་བཞི་སྐྱེ་འགོག ཐམས་ཅད་ལ་དཔྱོད་པ་རྟེན་འབྲེལ་གྱི་གཏན་ཚིགས་དང་ལྔ་ལས། དང་པོ་ལའང་གསུམ་སྟེ། རྟགས་འགོད་པ། ཚུལ་བསྒྲུབ་པ། གྲུབ་པའི་རྟགས་ལུང་དང་སྦྱར་བའོ། །དང་པོ་ནི། སྣང་བ་འདི་དག་ནི་རང་བཞིན་དུ་ཡོད་པ་མ་ཡིན་ཏེ། གཅིག་དང་དུ་མ་དང་བྲལ་བའི་ཕྱིར། གཟུགས་བརྙན་བཞིན་ཞེས་པའོ། །གཉིས་པ་ལ་ཆོས་ཅན། བསྒྲུབ་བྱ། གཏན་ཚིགས་ཀྱི་དོན་གསུམ་ངེས་པར་བྱ་བ་ལས། དང་པོ་ནི། འདིའི་ཆོས་ཅན་དུ་སྣང་བ་ཐམས་ཅད་ཚོགས་པའི་སྤྱི་འགོད་ན་མི་འགྲུབ་ཅིང་། བྱེ་བྲག་འགའ་ཞིག་འགོད་ན་གཞན་ལ་བདེན་པར་ཡོད་པའི་སྒྲོ་འདོགས་མི་ཆོད་པས་ཁྱབ་པའི་སྟོང་ཉིད་མི་འགྲུབ་བོ། །ཞེས་རྟོགས་ན་དེ་ནི་མ་ཡིན་ཏེ། སྣང་བ་ཙམ་གྱི་སྤྱི་འགོད་པས་དེ་བྱེ་བྲག་སོ་སོའི་སྟེང་དུ་ཐ་སྙད་པའི་མངོན་སུམ་གྱིས་གྲུབ་པ་ལ། དེ་ལ་བདེན་པར་ཡོད་པའི་སྒྲོ་འདོགས་དངོས་སུ་ཁེགས་པས་བྱེ་བྲག་ཐམས་ཅད་ལའང་བདེན་པར་ཡོད་པའི་སྒྲོ་འདོགས་ཤུགས་ལ་ཁེགས་པས། ཉི་ཚེ་བའི་སྟོང་པར་ཡང་མི་འགྱུར་རོ། །ཡང་སྐབས་ཁ་ཅིག་ཏུ་ནི་ཕ་རོལ་པོ་གང་ལ་ལོག་རྟོག་ཞུགས་པའི་གཞི་ཆོས་ཅན་དུ་གཟུང་བའང་ཡོད་དེ། རྣམ་རིག་པའི་ངོར་གཉིས་མེད་ཀྱི་རྣམ་ཤེས་ཆོས་ཅན་དུ་གཟུང་བ་ལྟ་བུའོ། །འདི་ལའང་སྔར་རྒོལ་དཔྱད་པ་མ་ཞུགས་པའི་གོང་དུ་ཆོས་ཅན་ཁས་ལེན་ཅིང་། ཕྱིར་རྒོལ་དཔྱད་པ་ཞུགས་ནས་བསྒྲུབ་བྱ་རྟོགས་པའི་རྗེས་དཔག་མ་སྐྱེས་ཀྱི་བར་དུ་ཆོས་ཅན་ཁས་ལེན་པ་ཐ་སྙད་བདེན་པ་ཐབས་སུ་གྱུར་པའི་དོན་ཡིན་པ་སྔར་བཤད་ཟིན་ལ། འཆད་པར་འགྱུར་བའི་གཏན་ཚིགས་ཐམས་ཅད་ལ་དེ་བཞིན་དུ་སྦྱར་བར་བྱའོ། །རང་རྒྱུད་པ་ནི་སྔར་རྒོལ་དཔྱད་པ་ཞུགས་པ་དང་། ཕྱི་རྒོལ་ལ་རྗེས་དཔག་སྐྱེས་པའི་ཚེ་ཆོས་ཅན་ཁས་ལེན་པ་ནི་རང་རྒྱུད་ཀྱི་ཁྱད་པར་རོ། །གཉིས་པ་རང་བཞིན་མེད་པའི་སྣང་བ་མ་ཡིན་དགག་གམ། རང་བཞིན་མེད་པ་མེད་དགག་བསྒྲུབ་བྱ་ཡིན། དང་པོ་ལྟར་ན་མ་ཡིན་དགག་དོན་དམ་དུ་འགྱུར་ལ། གཉིས་པ་ལྟར་ན་རིགས་ཤེས་ཆོས་དང་ཆོས་ཅན་ཚོགས་པའི་སྤྱི་མི་འཇལ་བས་རྗེས་དཔག་མ་ཡིན་པར་འགྱུར་རོ། །ཞེ་ན། འདི་ལ་ཁ་ཅིག་མ་ཡིན་དགག་བསྒྲུབ་བྱར་བྱེད་པ་ནི་མི་རིགས་ཏེ། སྣང་བ་རིགས་ངོར་མ་གྲུབ་པས་དེ་དང་ཚོགས་པའི་མ་ཡིན་དགག་རིགས་ངོར་མ་གྲུབ་པའི་ཕྱིར་རོ། །རྒྱ་སྟོན་ན་རེ་དོན་དམ་པར་སྣང་བ་དང་ཚོགས་པ་མེད་ཀྱང་རང་བཞིན་མེད་པ་དེ་ཉིད་མ་ཡིན་དགག་ཏུ་གྲུབ་བོ་ཞེས་ཟེར་བའང་མི་འཐད་དེ། གལ་ཏེ་མི་སྟོད་ཅུང་ཟད་ཡོད་ཅེས་སོགས་ཀྱི་རིགས་པས་དེ་ཉིད་ཀྱང་མི་དགོས་པར་གྲུབ་པའི་ཕྱིར། འོ་ན་ཅི་ཞེ་ན་དོན་དམ་རང་བཞིན་མེད་པ་ཙམ་དུའང་མ་གྲུབ་པའི་མེད་དགག་བསྒྲུབ་བྱར་བྱེད་པ་ཡིན་ཏེ། རིགས་ཤེས་ཀྱི་དོན་སྣང་བ་དེ་ཉིད་མ་དམིགས་པར་བྱ་དགོས་པའི་ཕྱིར། དེས་སྣང་བ་ལ་སྐུར་བ་བཏབ་པར་ཡང་མི་འགྱུར་ཏེ། ཐ་སྙད་ཀྱི་རྣམ་གཞག་གི་ཚེ་ཁས་ལེན་པའི་ཕྱིར། གསུམ་པ་ལ་ཕྱོགས་ཆོས་བསྒྲུབ་པ་དང་། ཁྱབ་པ་བསྒྲུབ་པ་གཉིས་ལས། དང་པོ་ལ་གསུམ་སྟེ། དགག་བྱ་གཅིག་དང་དུ་མ་ངོས་གཟུང་བ་དང་། དེ་སྣང་བ་ལ་ཇི་ལྟར་དགག་པ་དང་། བཀག་པ་ལ་སྐྱོན་སྤང་བའོ། །དང་པོ་ལ་བརྫུན་པའི་གཅིག་དང་དུ་མ་ནི་ཆ་ཤས་དང་བཅས་པའི་གཅིག་དང་དུ་མ་ཡིན་ཞིང་། བདེན་པའི་གཅིག་དང་དུ་མ་ནི་ཆ་ཤས་མེད་པའི་གཅིག་དང་དུ་མ་སྟེ། ཆ་ཤས་དང་བཅས་པའི་གཅིག་ནི་ཟླ་བཅས་སུ་འགྱུར་བས་དཔྱད་ན་གཅིག་གི་དོན་མེད་པའི་ཕྱིར་དང་། བརྫུན་པའི་གཅིག་སོགས་དེ་བདེན་པའི་དུ་མར་འགལ་བའི་ཕྱིར་རོ། །འདིར་ཐ་སྙད་དུ་གཅིག་དང་དུ་མ་ཙམ་ནི་དགག་བྱ་མ་ཡིན་ཏེ། ཡང་དག་ཀུན་རྫོབ་ཀྱི་དབང་དུ་བྱས་ནས་གཅིག་དང་དུ་མའི་ཐ་སྙད་མང་དུ་ཡོད་པའི་ཕྱིར་རོ། །དེས་ན་རིགས་པས་དཔྱད་པའི་ཚེ་གཅིག་དང་དུ་མར་གྲུབ་པ་ནི་དགག་བྱའོ། །གཉིས་པ་ལ་བདེན་པའི་གཅིག་དགག་པ་དང་། དེས་བདེན་པའི་དུ་མ་ཁེགས་པར་བསྟན་པ་གཉིས་ལས། དང་པོ་ལའང་གཉིས་ཏེ། རགས་པ་ཡན་ལག་ཅན་གཅིག་དགག་པ་དང་། དེ་རྩོམ་བྱེད་ཕྲ་མོ་ཡན་ལག་གཅིག་ཡོད་པ་དགག་པའོ། །དང་པོ་ནི། གཞན་གྱི་སྡེ་པ་དག་སྐྱེས་བུའི་ལུས་ལྟ་བུ་ཡན་ལག་ཐམས་ཅད་ལ་ཁྱབ་པ་དང་། དེ་ཉིད་ཀྱིས་ན་གཅིག་ཡིན་པ་དང་། དེ་ཉིད་ཀྱིས་ན་རྟག་པ་ཡིན་པ་སྟེ། ཆོས་གསུམ་དང་ལྡན་པའི་རགས་པ་ཡན་ལག་ཅན་གཅིག་ཏུ་སྨྲའོ། །དེ་ནི་མི་རུང་སྟེ། ཡན་ལག་ཅན་གྱི་ལུས་ནི་དོན་དམ་པར་ཡན་ལག་དུ་མ་དང་། དབྱེར་མེད་ཡིན་པའི་ཕྱིར་ན་དུ་མར་འགྱུར་པའི་ཕྱིར། སྣོད་ཐ་དད་ཀྱི་རྒྱ་ཤུགས་བཞིན་ནོ། །གཉིས་པ་ལ་རང་གི་སྡེ་པ་ཁ་ཅིག རགས་པ་ཡན་ལག་ཅན་གཅིག་ཡིན་པ་མ་གྲུབ་མོད། དེ་རྩོམ་བྱེད་ཀྱི་རྡུལ་ཕྲ་རབ་ཆ་མེད་ཀྱི་དངོས་པོ་དང་། སེམས་ཀྱི་རྒྱུན་རྩོམ་བྱེད་ཤེས་པ་སྐད་ཅིག་ཆ་མེད་ཀྱི་དངོས་པོ་བདེན་པའི་གཅིག་ཏུ་ཡོད་པར་སྨྲའོ། །འདི་ལ་དང་པོ་ཡུལ་གྱི་ཆ་ཤས་དཔྱད་པས་དགག་པ་དང་། གཉིས་པ་དུས་ཀྱི་ཆ་ཤས་དཔྱད་པས་དགག་པ་གཉིས་ལས། དང་པོ་ལའང་གསུམ་སྟེ། ཕྲད་མ་ཕྲད་དང་། ལྟས་མ་བལྟས་དང་། རིང་ཐུང་བརྟག་པས་དགག་པའོ། །དང་པོ་ནི། རགས་པ་རྩོམ་པའི་ཚེ་དབུས་ཀྱི་རྡུལ་ཕྱོགས་ཀྱི་རྡུལ་དང་ཕྲད་དམ་མ་ཕྲད། དང་པོ་ལྟར་ན། བདག་ཉིད་ཀུན་གྱིས་ཕྲད་ན་ཕྱོགས་ཀྱི་རྡུལ་དབུས་ཀྱི་གོ་སར་ཐིམ་པར་འགྱུར་བས་ན་ཕྱོགས་དྲུག་ནས་རྡུལ་ཅི་ཙམ་སྦྱར་ཡང་ཆེར་མི་འགྱུར་བར་ཐལ་ལོ། །ཕྱོགས་གཅིག་གིས་ཕྲད་ན་དབུས་ཀྱི་རྡུལ་ཕྱོགས་དྲུག་གི་རྡུལ་ལ་ཕྲད་པའི་ཆ་དྲུག་ཏུ་འགྱུར་བས་ཆ་མེད་གཅིག་ཡིན་པ་ཉམས་སོ། །གཉིས་པ་ལྟར་ན་རྡུལ་རྣམས་ཕན་ཚུན་མ་ཕྲད་པའི་ཕྱིར། རགས་པ་རྩོམ་པར་མི་རིགས་ཏེ། བར་དུ་ཆོད་པའི་རྡུལ་བཞིན། དེ་ལྟར་ཡང་ཉི་ཤུ་པ་ལས། དྲུག་གིས་གཅིག་ཅར་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ཀྱང་གོ་གཅིག་ན། །གོང་བུའང་རྡུལ་ཕྲན་ཙམ་དུ་འགྱུར། །ཞེས་གསུངས་སོ། །གཉིས་པ་ནི་དབུས་ཀྱི་རྡུལ་ཕྱོགས་བཅུའི་དབུས་ན་གནས་པ་ཉིད་ཀྱིས་ཤར་ལ་ལྟ་བའི་ངོས་དེ་ཉིད་ཀྱིས་ལྷག་མ་དགུའི་རྡུལ་ལ་ལྟའམ། ཕྱོགས་གཞན་དང་གཞན་གྱིས་ལྟ། དང་པོ་ལྟར་ན་ཕྱོགས་གཞན་གྱི་རྡུལ་རྣམས་ཀྱང་ཤར་ཕྱོགས་དེ་ཉིད་ལ་གནས་པར་འགྱུར་ཏེ། དབུས་རྡུལ་ཤར་ལ་ལྟ་བའི་ལྟ་ས་ཡིན་པའི་ཕྱིར། གཉིས་པ་ལྟར་ན་ཕྱོགས་བཅུའི་རྡུལ་ལ་ལྟ་བའི་ཆ་ཤས་བཅུ་ཡོད་པས་ཆ་ཤས་མེད་པའི་གཅིག་ཡིན་པ་ཉམས་སོ། །གསུམ་པ་ནི་རྡུལ་ཕྲན་གཉིས་མཐུད་པའི་བར་སྟེང་དུ་རྡུལ་ཕྲན་གཅིག་གནས་པ་ལ་རིང་ཐུང་ཡོད་དམ་མེད། ཡོད་ན་ཆ་ཤས་མེད་པ་ཉམས་ལ། མེད་ན་ཅི་ཙམ་མཐུད་ཀྱང་རྡུལ་གཅིག་ལས་རིང་བར་མི་འགྱུར་བས་རགས་པ་རྩོམ་པར་མི་འཐད་དོ། །གཉིས་པ་ནི་དེ་བཞིན་དུ་ཤེས་པའི་སྐད་ཅིག་ཀྱང་དབུས་ཀྱི་སྐད་ཅིག་དེ་སྔ་ཕྱི་དང་མ་ཕྲད་ན་རགས་པ་རྩོམ་པར་འགལ་ལ། ཕྲད་ན་བདག་ཉིད་ཀུན་གྱིས་ཕྲད་དམ། ཆ་འགའ་ཞིག་གིས་ཕྲད་པའི་བརྟགས་པའང་སྔ་མ་བཞིན་དུ་མཚུངས་ཤིང་། དེ་བཞིན་དུ་སྔ་ཕྱི་གཉིས་ཀྱི་དབུས་ན་གནས་པས་སྔ་ཕྱི་གཉིས་ལ་ཉེ་བའི་ཆ་དུ་མ་ཡོད་དགོས་པ་ཡིན་ཏེ། རིན་ཆེན་ཕྲེང་བ་ལས། ཐོག་མ་དབུས་དང་ཐ་མ་ཡང་། །སྐད་ཅིག་བཞིན་དུ་བསམ་བྱས་ན། །སྐད་ཅིག་གསུམ་གྱི་བདག་ཉིད་ཕྱིར། །འཇིག་རྟེན་སྐད་ཅིག་ལ་མི་གནས། །ཞེས་གསུངས་སོ། །གཉིས་པ་དེས་བདེན་པའི་དུ་མ་ཁེགས་པར་བསྟན་པ་ནི། ཕྱི་ནང་གི་དངོས་པོ་རྣམས་ལ་བདེན་པའི་གཅིག་མེད་ཕྱིར་བདེན་པའི་དུ་མའང་མི་འགྲུབ་པར་འགྱུར་ཏེ། གསོག་བྱེད་མེད་པས་བསགས་པ་མི་འགྲུབ་པས་སོ། །གསུམ་པ་བཀག་པ་ལ་སྐྱོན་སྤང་བ་ནི། གལ་ཏེ་དེ་ལྟར་ན་ཆ་དུ་མ་བསྒྲུབས་ནས་གཅིག་བཀག་ལ་གཅིག་བཀག་པས་དུ་མ་བཀག་པ་ཡིན་ན། གཅིག་དང་དུ་མ་འགལ་ལམ་འབྲེལ། དང་པོ་ལྟར་ན་གཅིག་བཀག་ནས་དུ་མ་འགོག་པ་མི་འཐད་ལ། གཉིས་པ་ལྟར་ན་དུ་མ་བསྒྲུབས་ནས་གཅིག་འགོག་པ་མི་འཐད་དོ་ཞེ་ན། འདི་ལ་ཁ་ཅིག་གཅིག་ཡིན་དང་དུ་མ་ཡིན་པ་འགལ་ཞིང་། ཡོད་པ་འབྲེལ་བས་ཕྱོགས་གཉིས་ཀ་ལ་སྐྱོན་མེད་ཅེས་འཆད་ཀྱང་། རྨ་བྱས་ནི་དེ་ལྟར་ན་དུ་མ་བསྒྲུབ་པས་གཅིག་ཡིན་པ་ཁེགས་ཀྱང་ཡོད་པའི་མི་ཁེགས་པས་སྐབས་དོན་ལས་ཉམས་པར་འགྱུར་རོ། །དེས་ན་ཆ་ཤས་དང་བཅས་པའི་དུ་མ་དང་། ཆ་ཤས་མེད་པའི་གཅིག་འགལ་བས་རྣམ་གཞག་དང་པོ་འཐད་ལ། ཆ་ཤས་མེད་པའི་དུ་མ་ཡིན་ན་ཆ་ཤས་མེད་པའི་གཅིག་དང་འབྲེལ་དགོས་པས་རྣམ་གཞག་ཕྱི་མ་འཐད་པ་ཡིན་ནོ་ཞེས་བཞེད་དོ། །གཉིས་པ་ཁྱབ་པ་བསྒྲུབ་པ་ནི་བདེན་པའི་དངོས་པོ་ཡོད་ན་བདེན་པའི་གཅིག་དང་དུ་མ་གང་རུང་དུ་འགྱུར་དགོས་ཏེ། གཞི་གཅིག་གི་སྟེང་དུ་ཟླ་བོ་ཡོད་མེད་དངོས་འགལ་ཡིན་པའི་ཕྱིར་རོ། །དེ་ན་གཏན་ཚིགས་འདི་ཐ་སྙད་བསྒྲུབ་ཡིན་ཏེ། བདེན་པའི་གཅིག་དང་དུ་མ་ཁེགས་པ་ན་བདེན་དངོས་ཀྱི་དོན་ཁེགས་ཟིན་པའི་ཕྱིར་རོ། །གསུམ་པ་གྲུབ་པའི་རྟགས་ལུང་དང་སྦྱར་བ་ནི། རྒྱན་ལས། བདག་དང་གཞན་སྨྲའི་དངོས་འདི་དག །ཡང་དག་ཏུ་ན་གཅིག་པ་དང་། །དུ་མའི་རང་བཞིན་བྲལ་བའི་ཕྱིར། །རང་བཞིན་མེད་དེ་གཟུགས་བརྙན་བཞིན། །ཞེས་དང་། འཕགས་པ་ལྷས། རྣམ་ཤེས་དམ་པའི་དོན་ལྡན་པ། །དེ་ཡང་བརྟན་རྣམས་མི་འདོད་དེ། །གཅིག་དང་དུ་མའི་རང་བཞིན་དང་། །བྲལ་ཕྱིར་ནམ་མཁའི་པདྨོ་བཞིན། །ཞེས་གསུངས་སོ། །གཉིས་པ་རྒྱུ་ལ་དཔྱོད་པ་རྡོ་རྗེ་གཟེགས་མའི་གཏན་ཚིགས་ནི་སྔར་ཐལ་རང་གི་སྐབས་སུ་རྒྱས་པར་བཤད་ཟིན་ཏོ། །གསུམ་པ་འབྲས་བུ་ལ་དཔྱོད་པ་ཡོད་མེད་སྐྱེ་འགོག་གི་གཏན་ཚིགས་ལའང་གསུམ་སྟེ། རྟགས་འགོད་པ། སྦྱོར་བའི་ཚུལ་བསྒྲུབ་པ། གྲུབ་པའི་དོན་ལུང་དང་སྦྱར་བའོ། །དང་པོ་ནི། སྣང་བ་འདི་དག་རང་བཞིན་གྱིས་མེད་དེ། འབྲས་བུ་ཡོད་མེད་སྐྱེ་བ་དང་བྲལ་བའི་ཕྱིར། གཟུགས་བརྙན་ལ་སོགས་པ་བཞིན། །ཞེས་པའོ། །གཉིས་པ་ལ་ཆོས་ཅན་དང་བསྒྲུབ་བྱའི་དོན་ནི་སྔར་བཤད་ཟིན་ཅིང་། གཏན་ཚིགས་ཀྱི་དོན་ལ་ཕྱོགས་ཆོས་བསྒྲུབ་པ་དང་། ཁྱབ་པ་བསྒྲུབ་པ་གཉིས་ལས། དང་པོ་ལའང་གཉིས་ཏེ། འབྲས་བུ་སྔར་ཡོད་པ་སྐྱེ་བ་དགག་པ་དང་། མེད་པ་སྐྱེ་བ་དགག་པའོ། །དང་པོ་ནི། གྲངས་ཅན་པ་དག་འབྲས་བུ་རྒྱུའི་བདག་ཉིད་དུ་མི་གསལ་བར་ཡོད་པ་གསལ་བར་སྐྱེ་བར་སྨྲའོ། །དེ་ནི་མི་འཐད་དེ། འབྲས་བུ་ནི་རྒྱུ་དེ་དག་ལ་ལྟ་རུང་མ་དམིགས་པའི་ཕྱིར། ཇི་སྐད་དུ། རྩ་བ་ལས། གལ་ཏེ་རྒྱུ་དང་རྐྱེན་རྣམས་ཀྱི། །ཚོགས་ལ་འབྲས་བུ་ཡོད་ན་ནི། །ཚོགས་ལ་གཟུང་དུ་ཡོད་རིགས་ན། །ཚོགས་པ་ཉིད་ལ་གཟུང་དུ་མེད། །ཅེས་གསུངས་སོ། །ཡང་བྱེ་བྲག་ཏུ་སྨྲ་བས་འབྲས་བུ་མ་འོངས་པ་ན་ཡོད་པ་ད་ལྟ་བར་སྐྱེ་བར་སྨྲ་བའང་མི་འཐད་དེ། མ་འོངས་པ་ནི་བདག་ཉིད་ཀྱི་དངོས་པོ་མ་ཐོབ་ཅིང་མེད་པས་ཡོད་པར་འགལ་བའི་ཕྱིར་རོ། །དེ་ལྟར་ཡང་། གལ་ཏེ་དངོས་པོ་མ་སྐྱེས་པ། །འགའ་ཞིག་གང་ན་ཡོད་གྱུར་ན། །དེ་ནི་སྐྱེ་འགྱུར་དངོས་པོ་མེད། །མེད་ན་གང་ཞིག་སྐྱེ་བར་འགྱུར། །ཞེས་གསུངས་སོ། །གཉིས་ཀ་ལ་ཐུན་མོང་དུ་ཡོད་པ་ནི་སྐྱེ་བར་མི་འགྱུར་ཏེ། སྐྱེ་བ་ནི་དངོས་པོ་གྲུབ་པའི་དོན་དུ་ཡིན་ལ། དངོས་པོ་ཉིད་གྲུབ་ཟིན་པའི་ཕྱིར་རོ། །ཇི་སྐད་དུ། ཡོད་ན་རྐྱེན་གྱིས་ཅི་ཞིག་བྱ། །ཞེས་གསུངས་སོ། །གཉིས་པ་ནི་མདོ་སྡེ་པ་དང་། རྣམ་རིག་པ་དག འབྲས་བུ་སྔར་མེད་གསར་དུ་སྐྱེར་བར་འདོད་དོ། །འདི་དགག་པ་ལ་བཞི་སྟེ། རྟེན་མེད་པས་བྱ་བ་འགལ་བ་དང་། འབྲས་བུ་མེད་པས་རྣམ་འཇོག་གི་རྒྱུ་མི་འགྲུབ་པ་དང་། རྒྱུ་མཚན་མ་མཚུངས་པས་ཧ་ཅང་ཐལ་བ་དང་། མེད་པའི་རང་བཞིན་དོར་མ་དོར་ལ་བརྟགས་ནས་དགག་པའོ། །དང་པོ་ནི་ཆོས་གཞན་ལ་སྐྱེ་བའི་བྱ་བ་བརྟེན་པས་ཆོས་གཞན་སྐྱེ་བ་མི་རུང་བས་ན་འབྲས་བུ་དེ་ཉིད་ལ་བརྟེན་དགོས་ལ། འབྲས་བུ་དེ་མེད་ན་བརྟེན་པས་སྐྱེ་བའི་བྱ་བ་མེད་པས་ཅི་ལྟར་སྐྱེ་བར་འགྱུར། དེས་ན་སྐྱེ་བའི་བྱ་བ་དང་། རྟེན་འབྲས་བུའི་དངོས་པོ་ཕན་ཚུན་བརྟེན་པས་མཐར་གང་ཡང་མི་འགྲུབ་པ་ཉིད་དེ། རྩ་བ་ལས། གང་ཚེ་སྐྱེ་བ་ཡོད་པ་ན། །སྐྱེ་བཞིན་འདི་འབྱུང་མེད་པའི་ཚེ། །ཅི་ལྟར་སྐྱེ་ལ་བརྟེན་ནས་ནི། །སྐྱེ་བཞིན་ཞེས་ནི་བརྗོད་པར་བྱ། །ཞེས་སོ། །གཉིས་པ་ནི། འདི་ནི་འདིའི་རྒྱུ་ཡིན་ལ། །འདི་ནི་འདིའི་འབྲས་བུ་ཡིན་ནོ། །ཞེས་རྒྱུ་འབྲས་ཀྱི་ཐ་སྙད་ཕན་ཚུན་ལྟོས་ནས་འཇོག་པས་ན་འབྲས་བུ་དེ་མེད་ན་གང་གི་རྒྱུར་བཏགས་ཏེ་རྒྱུའི་རྣམ་འཇོག་གི་རྒྱུ་མེད་པའི་ཕྱིར་ཏེ། ལུང་ལས། འབྲས་བུ་ཡོད་པ་མ་ཡིན་པར། །རྒྱུ་ཡི་རྒྱུ་ཉིད་ཡོད་མིན་པས། །དེ་ཡི་ཕྱིར་ན་འབྲས་བུ་ཀུན། །རྒྱུ་ཉིད་དུ་ནི་ཐལ་བར་འགྱུར། །ཞེས་གསུངས་སོ། །གསུམ་པ་ནི་འབྲས་བུའི་ངོ་བོ་སྔར་མེད་པའམ་རྐྱེན་ལ་མེད་ཀྱང་སྐྱེ་ན་ནི། རི་བོང་གི་རྭ་ལ་སོགས་པའི་རྐྱེན་མ་ཡིན་པ་ལས་ཀྱང་སྐྱེ་བར་འགྱུར་ཏེ། མེད་པར་ཁྱད་པར་མེད་པའི་ཕྱིར་རོ། །ཇི་སྐད་དུ་རྩ་བ་ལས། ཅི་སྟེ་དེ་ནི་མེད་པར་ཡང་། །རྐྱེན་དེ་དག་ལས་སྐྱེ་འགྱུར་ན། །རྐྱེན་མ་ཡིན་པ་དག་ལས་ཀྱང་། །ཅི་ཡི་ཕྱིར་ན་སྐྱེ་མི་འགྱུར། །ཞེས་སོ། །བཞི་པ་ནི་སྔར་གྱི་དངོས་པོ་མེད་པའི་རང་བཞིན་དོར་ནས་སམ། མ་དོར་བ་དངོས་པོ་འགྱུར་གྲང་། ཕྱི་མ་ལྟར་ན་ཕན་ཚུན་འགལ་ཞིང་སྔ་མ་ལྟར་ན་དོན་མེད་པ་དང་། ཕན་ཚུན་བརྟེན་པར་འགྱུར་ཏེ། ཇི་སྐད་དུ། སྤྱོད་འཇུག་ལས། གནས་སྐབས་དེ་དངོས་ཇི་ལྟར་ཡིན། །དངོས་གྱུར་གཞན་ཡང་གང་ཞིག་ཡིན། །མེད་ཚེ་དངོས་ཡོད་སྲིད་མིན་ན། །དངོས་པོ་ཡོད་པར་ནམ་ཞིག་འགྱུར། །དངོས་པོ་སྐྱེས་པར་མ་གྱུར་པ། །དངོས་མེད་དང་ནི་འབྲལ་མི་འགྱུར། །དངོས་མེད་དང་ནི་མ་བྲལ་ན། །དངོས་པོ་ཡོད་པའི་སྐབས་མི་སྲིད། །ཅེས་གསུངས་སོ། །གཉིས་པ་ཁྱབ་པ་བསྒྲུབ་པ་ནི། སྐྱེ་བ་ལ་འབྲས་བུ་སྔར་ཡོད་མེད་དངོས་འགལ་ཡིན་པས་བར་དུ་ཕུང་པོ་གསུམ་པ་གཞན་མི་སྲིད་ལ། མ་སྐྱེས་པའི་དངོས་པོ་གཞན་མི་སྲིད་པ་ནི་བཤད་ཟིན་ཏོ། །གསུམ་པ་ནི་རྩ་བ་ལས། མེད་དམ་ཡོད་པའི་དོན་ལ་ཡང་། །རྐྱེན་ནི་རུང་བ་མ་ཡིན་ཏེ། །ཞེས་པ་དང་། སྤྱོད་འཇུག་ལས། དངོས་པོ་ཡོད་པར་གྱུར་པ་ལ། །རྒྱུ་ཡིས་དགོས་པ་ཅི་ཞིག་ཡོད། །འོན་ཏེ་དེ་ནི་མེད་ན་ཡང་། །རྒྱུ་ཡིས་དགོས་པ་ཅི་ཞིག་ཡོད། །བྱེ་བ་བརྒྱ་ཕྲག་རྒྱུ་ཡིས་ཀྱང་། །དངོས་པོ་མེད་པ་བསྒྱུར་དུ་མེད། །ཅེས་དང་། བརྒྱ་པ་ལས། འབྲས་བུ་ཡོད་པར་གང་འདོད་དང་། །འབྲས་བུ་མེད་པར་གང་འདོད་ལ། །ཁྱིམ་གྱི་དོན་དུ་ཀ་བ་ལ། །སོགས་པའི་རྒྱན་ནི་དོན་མེད་འགྱུར། །ཞེས་གསུངས་སོ། །བཞི་པ་རྒྱུ་འབྲས་གཉིས་ཀ་ལ་དཔྱོད་པ་མུ་བཞི་སྐྱེ་འགོག་ལའང་གསུམ་སྟེ། རྟགས་འགོད་པ་དང་། སྦྱོར་བའི་ཚུལ་གསུམ་ངེས་པར་བྱ་བ། གྲུབ་པའི་དོན་ལུང་དང་སྦྱར་བའོ། །དང་པོ་ནི་སྣང་བ་འདི་དག་རང་བཞིན་གྱིས་མེད་དེ། རྒྱུ་གཅིག་གིས་འབྲས་བུ་གཅིག་དང་དུ་མ་མི་བསྐྱེད། རྒྱུ་དུ་མས་འབྲས་བུ་གཅིག་དང་དུ་མ་མི་བསྐྱེད་པའི་ཕྱིར་ཞེས་པའོ། །གཉིས་པ་ལ་ཆོས་ཅན་དང་། བསྒྲུབ་བྱའི་དོན་ནི་སྔར་དང་འདྲ་ལ། གཏན་ཚིགས་ཀྱི་དོན་ལ་ཕྱོགས་ཆོས་བསྒྲུབ་པ་དང་། ཁྱབ་པ་བསྒྲུབ་པ་གཉིས་ལས། དང་པོ་ནི། འདི་ལྟར་རྒྱུ་གཅིག་གིས་འབྲས་བུ་གཅིག་བྱེད་པ་ནི་མེད་དེ། རྒྱུ་དང་འབྲས་བུ་ནི་ཐ་ན་རྡུལ་ཕྲ་མོ་ལྟ་བུ་ལ་སོགས་པའི་ཆ་དུ་མ་ཉིད་དུ་མཐོང་བས་གཅིག་ཏུ་གྲུབ་པ་མེད་པའི་ཕྱིར་དང་། མིག་ལ་སོགས་པ་ལས་མིག་གི་རྣམ་པར་ཤེས་པ་ལ་སོགས་པ་འབྱུང་བ་ཉིད་དུ་མཐོང་བས་ན་མིག་ལ་སོགས་པའི་རྒྱུ་ནི་ཕྱི་མ་མི་འབྱུང་བར་འགྱུར་ན་འབྱུང་བ་ཡང་མཐོང་བའི་ཕྱིར་རོ། །རྒྱུ་གཅིག་གིས་འབྲས་བུ་དུ་མ་བྱེད་པའང་མ་ཡིན་ཏེ། དབང་ཕྱུག་དང་གཙོ་བོ་ལ་སོགས་པ་རྟག་པ་གཅིག་པུ་ནི་རྒྱུ་ཡིན་པ་བཀག་ཟིན་པའི་ཕྱིར་དང་། རྒྱུ་གཅིག་ལས་ཀྱང་འབྲས་བུ་དུ་མ་འབྱུང་ན་འབྲས་བུ་ཐ་དད་པའི་ཆོས་རྣམས་རྒྱུ་མེད་པ་ཉིད་དུ་འགྱུར་ཏེ། རྒྱུ་ལ་མི་འདྲ་བའི་ཁྱད་པར་མེད་པའི་ཕྱིར་རོ། །རྒྱུ་དུ་མས་འབྲས་བུ་གཅིག་བསྐྱེད་པའང་མིན་ཏེ། རྒྱུ་མི་འདྲ་བས་འབྲས་བུ་མི་འདྲ་བར་བྱེད་པར་མི་འགྱུར་བ་དེ་ལྟ་ནའང་མི་འདྲ་བ་སྣ་ཚོགས་རྒྱུ་མེད་པར་འགྱུར་བའི་ཕྱིར་རོ། །རྒྱུ་དུ་མས་འབྲས་བུ་དུ་མ་བྱེད་པའང་མ་ཡིན་ཏེ། དེའང་རྒྱུ་ཐམས་ཅད་ཀྱིས་འབྲས་བུ་ཐམས་ཅད་བྱེད་པ་ལ་འདོད་ན་དེ་མི་སྲིད་པའི་ཕྱིར་དང་། སྲིད་ཀྱང་དུ་མས་གཅིག་བྱེད་པའི་ནང་དུ་འདུས་ལ་དེ་ལའང་ཉེས་པ་བརྗོད་ཟིན་ཏོ། །རྒྱུ་རེ་རེས་འབྲས་བུ་རེ་རེ་བྱེད་པ་ལ་འདོད་ན་དེ་ནི་གཅིག་གིས་གཅིག་བྱེད་པ་ཡིན་ལ། དེ་ལའང་ཉེས་པ་བརྗོད་ཟིན་པའི་ཕྱིར་རོ། །གཉིས་པ་ནི་སྐྱེ་བ་མུ་བཞི་པོ་དེ་ལས་མི་སྲིད་ལ་མུ་བཞིའང་ཁེགས་པའི་ཕྱིར་སྐྱེ་བ་མེད་དེ་ནམ་མཁའ་ལ་སོགས་པ་བཞིན་ནོ། །གསུམ་པ་གྲུབ་པའི་དོན་ལུང་དང་སྦྱར་བ་ནི་བདེན་གཉིས་ལས། དུ་མས་དངོས་པོ་གཅིག་མི་བྱེད། །དུ་མས་དུ་མ་བྱེད་མ་ཡིན། །གཅིག་གིས་དུ་མའི་དངོས་མི་བྱེད། །གཅིག་གིས་གཅིག་བྱེད་པའང་མིན། །ཞེས་གསུངས་སོ། །ལྔ་པ་ཐམས་ཅད་ལ་དཔྱོད་པ་རྟེན་འབྲེལ་གྱི་གཏན་ཚིགས་ལའང་གསུམ་སྟེ། དང་པོ་རྟགས་འགོད་པ་ནི། སྣང་བ་འདི་དག་རང་བཞིན་མེད་དེ། རྟེན་ཅིང་འབྲེལ་བར་འབྱུང་བ་ཡིན་པའི་ཕྱིར། སྒྱུ་མ་བཞིན་ཞེས་པའོ། །གཉིས་པ་སྦྱོར་བའི་དོན་ངོས་གཟུང་བ་ནི་ཆོས་ཅན་གྱི་དོན་ནི་སྔར་བཤད་པ་ལྟར་སྣང་བ་ཙམ་ཡིན་ལ། འདི་ལ་གཙང་ནག་པས་འཁྲུལ་པའི་གཟུང་ཡུལ་དངོས་མེད་ལ་རྟེན་ནས་འབྱུང་བའི་རྟགས་མ་གྲུབ་པས་ཆོས་ཅན་གྱི་ཕྱོགས་གཅིག་ལ་མ་གྲུབ་པར་འགྱུར་རོ། །ཞེས་གསུངས་པ་ལ། རྨ་བྱས་དེ་ནི་སློབ་དཔོན་གྱི་དགོངས་པར་ནི་མ་མངོན་ཏེ། དེ་ལ་རང་གི་མཚན་ཉིད་དུ་གྲུབ་པའི་རྟེན་ནས་འབྱུང་བ་མེད་ཀྱང་། དེ་ནི་རྟེན་འབྲེལ་གྱི་དོན་མ་ཡིན་ཞིང་རྟེན་འབྱུང་དུ་སྣང་བ་ཙམ་རྟེན་འབྲེལ་གྱི་དོན་ཡིན་ལ། དེ་ནི་འཁྲུལ་པའི་གཟུང་ཡུལ་ཟླ་གཉིས་ཀྱི་རྣམ་པ་དང་། དོན་སྤྱི་སོགས་ལའང་ཡོད་པའི་ཕྱིར་ཏེ། བློ་དེ་ཉིད་ཀྱི་ངོར་ཡུལ་ཤེས་གཉིས་ཀ་སྐྱེ་བར་མཚུངས་ཤིང་བློ་གཞན་གྱི་ངོར་ནི་ཡུལ་ཤེས་གཉིས་ཀ་སྐྱེ་མེད་དུ་མཚུངས་པའི་ཕྱིར་ཏེ། འཇུག་པ་ལས། དབང་པོ་རབ་རིབ་བཅས་པ་བློ་གང་གིས། །རབ་རིབ་མཐུ་ལས་སྐྲ་རྣམས་གང་མཐོང་བ། །དེ་བློ་ལ་ལྟོས་གཉིས་ཆར་བདེན་པ་སྟེ། །དོན་གསལ་མཐོང་ལ་གཉིས་ཀའང་བརྫུན་པ་ཡིན། །ཞེས་དང་། དངོས་པོ་སྟོང་པ་གཟུགས་བརྙན་ལ་སོགས་པ། །ཚོགས་ལ་ལྟོས་རྣམས་མ་གྲགས་པ་ཡང་མིན། །ཞེས་དང་། རྩ་བ་ལས། གང་ཞིག་རྟེན་འབྱུང་མ་ཡིན་པའི། །དངོས་པོ་ཡོད་པ་མ་ཡིན་ནོ། །ཞེས་གསུངས་པས་སོ། །ཞེས་པའི་སྐྱོན་བརྗོད་མཛད་པ་ནི་ཤིན་ཏུ་འཐད་པར་སྣང་སྟེ། གཞན་དུ་ན་སྒྱུ་མ་དང་ཆུ་ཟླ་དཔེར་བརྗོད་པའི་ཚེ་གཏན་ཚིགས་ཀྱིས་སྟོང་པར་ཐལ་བའི་ཕྱིར་རོ། །བསྒྲུབ་བྱའི་དོན་ནི་སྔར་བཤད་པ་བཞིན་ནོ། །གཏན་ཚིགས་ཀྱི་དོན་ལ་གཉིས་ཏེ། ཕྱོགས་ཆོས་བསྒྲུབ་པ་དང་ཁྱབ་པ་བསྒྲུབ་པའོ། །དང་པོ་ལ་གཉིས་ཏེ། རྟེན་འབྲེལ་གྱི་དོན་ངོས་གཟུང་བ་དང་། དེ་སྣང་བ་ལ་ཇི་ལྟར་བསྒྲུབ་པའོ། །དང་པོ་ནི། ཆོས་འགའ་ཞིག་ལ་བརྟེན་ནས་འབྱུང་བ་ཡིན་པས། ཡེ་མ་བྱུང་བ་དང་། རྒྱུ་མེད་དུ་བྱུང་བ་དང་། རྒྱུ་ངེས་མེད་ལས་འབྱུང་བ་རྣམས་སེལ་བར་བྱེད་དོ། །དེ་ལ་ངོ་བོ་ལྟོས་པ་དང་། རྣམ་འཇོག་ལྟོས་པ་གཉིས་ལས། དང་པོ་ནི། ཆོས་འགའ་ཞིག་ལས་འགའ་ཞིག་གི་ངོ་བོ་གྲུབ་པ་མར་མེ་ལ་ལྟོས་ནས་འོད་འབྱུང་བ་ལྟ་བུ་སྟེ། རིན་ཆེན་ཕྲེང་བར། འདི་སྐྱེས་པས་ན་འདི་སྐྱེ་དཔེར། །མར་མེ་སྐྱེས་པས་འོད་བཞིན་ནོ། །ཞེས་སོ། །གཉིས་པ་ནི་ཆོས་འགའ་ཞིག་ལས། འདི་ནི་འདིའོ་ཞེས་བྱ་བའི་ཐ་སྙད་གྲུབ་པ་སྟེ། དེ་ཉིད་ལས། འདི་ཡོད་པས་ན་འདི་འབྱུང་དཔེར། །རིང་པོ་ཡོད་པས་ཐུང་ངུ་བཞིན། །ཞེས་སོ། །གཉིས་པ་ནི། སྣང་བའི་ཆོས་རྣམས་ཐ་སྙད་དུ་རྐྱེན་ལ་ལྟོས་པ་ནི་སྔར་རྒྱུ་མེད་བཀག་པའི་སྐབས་སུ་བཤད་ཟིན་ཏོ། །རྒྱུ་འབྲས་ལ་སོགས་པའི་ཐ་སྙད་ཀྱང་ཕན་ཚུན་ལྟོས་པ་ཉིད་དེ། འདིའི་འབྲས་བུའོ་ཞེས་རྒྱུ་ལ་ལྟོས་པ་མ་ཡིན་ན་འབྲས་བུའི་འཇོག་བྱེད་མེད་ཅིང་། འདིའི་རྒྱུའོ་ཞེས་འབྲས་བུ་ལ་ལྟོས་པ་མ་ཡིན་ན། རྒྱུའི་འཇོག་བྱེད་མེད་པའི་ཕྱིར་ཏེ། ལུང་ལས། འབྲས་བུ་ཡོད་པ་མ་ཡིན་པར། །རྒྱུ་ཡི་རྒྱུ་ཉིད་ཡོད་མིན་པས། །དེ་ཡི་ཕྱིར་ན་འབྲས་བུ་ཀུན། །རྒྱུ་ཉིད་དུ་ནི་ཐལ་བར་འགྱུར། །ཞེས་གསུངས་སོ། །འདི་ཉིད་ཀྱིས་མཚན་ཉིད་དང་མཚོན་བྱ། གཏན་ཚིགས་དང་བསྒྲུབ་བྱ། ཤེས་པ་དང་ཤེས་བྱེད། ཡན་ལག་དང་ཡན་ལག་ཅན། དགག་བྱ་དང་བཀག་ཆོས། རིང་པོ་དང་ཐུང་ངུ་། སྔ་མ་དང་ཕྱི་མ། ཕ་རོལ་དང་ཚུ་རོལ་ལ་སོགས་པ་ཐམས་ཅད་ཕན་ཚུན་ལྟོས་བར་འགྲུབ་བོ། །དེའི་ཕྱིར་སྣང་བའི་ཆོས་འདི་ཉིད་ཀྱི་སྟེང་དུ་ངོ་བོའམ་ཐ་སྙད་ལ་མ་ལྟོས་པའི་ཆོས་ཅུང་ཟད་ཀྱང་མེད་པར་གྲུབ་པས་ཆོས་ཅན་སྣང་བ་ལ་རྟེན་འབྲེལ་གྱི་གཏན་ཚིགས་གྲུབ་བོ། །གཉིས་པ་ཁྱབ་པ་བསྒྲུབ་པ་ལ་གཉིས་ཏེ། རང་བཞིན་གཞིར་བྱས་ལ་རྟེན་འབྱུང་དགག་པ་དང་། རྟེན་འབྱུང་གཞིར་བྱས་ལ་རང་བཞིན་དགག་པའོ། །དང་པོ་ནི། འཇིག་རྟེན་ན་རང་བཞིན་ཆོས་རྣམས་ཀྱི་ངོ་བོའམ། གཤིས་ལ་བརྗོད་པས་མེའི་ཚ་བའམ་ཆུའི་གཤེར་བ་ལྟར་ཡུལ་དུས་རྣམ་པ་གང་དུའང་མི་འཁྲུལ་ཞིང་དེར་གནས་པའི་ངོ་བོ་ལ་གྲགས་པ་ཡིན་ནོ། །དེས་ན་རང་བཞིན་ལ་ཆུའི་ཚ་བ་བཞིན་ངོ་བོ་རྐྱེན་གྱིས་བསྐྱེད་པ་མ་ཡིན་པ་དང་། རིང་ཐུང་དང་སྔ་ཕྱི་བཞིན། རྣམ་འཇོག་གཞན་ལ་ལྟོས་པ་མ་ཡིན་པ་དང་། གར་མཁན་གྱི་ཆ་ལུགས་བཞིན་གཞན་དུ་འགྱུར་པ་མ་ཡིན་པ་ཞེས་བྱ་བའི་ཆོས་སུམ་ལྡན་དགོས་པ་ཡིན་ཏེ། གཞན་དུ་ན་རང་བཞིན་དུ་མི་འགྱུར་བའི་ཕྱིར་རོ། །དེ་ལྟ་བུའི་ཆོས་གསུམ་ལྡན་གྱི་རང་བཞིན་ལ་གཏན་ཚིགས་བརྟེན་ནས་འབྱུང་བ་མེད་པ་ནི་རྟེན་འབྱུང་ལ་ངོ་བོ་ལྟོས་པ་དང་། རྣམ་འཇོག་ལྟོས་པ་ངེས་པ་ཉིད་ཀྱིས་གྲུབ་བོ། །གཉིས་པ་ལ་གསུམ་སྟེ། རྣམ་འཇོག་ལྟོས་པ་ཕན་ཚུན་བརྟེན་པས་དང་། ངོ་བོ་ལྟོས་པ་གྲུབ་མ་གྲུབ་བརྟགས་པས་དང་། དེ་གཉིས་ཀ་དུས་མཉམ་མི་མཉམ་བརྟགས་པས་རང་བཞིན་དགག་པའོ། །དང་པོ་ནི། རིང་ཐུང་ངམ་རྒྱུ་འབྲས་རྣམ་འཇོག་ལྟོས་པ་ཕན་ཚུན་ལྟོས་པར་འགྱུར་བས་མཐའ་གཉིས་ལ་ལྟོས་ནས་དེར་འཇོག་དགོས་ལ་དེ་ལ་རང་གྲུབ་ན་ལྟོས་མི་དགོས་ཤིང་མ་གྲུབ་ན་དེ་ལ་ལྟོས་པའི་ལྟོས་པ་ཉིད་མི་གྲུབ་པས། རང་བཞིན་གྱིས་གྲུབ་པ་འགལ་བས། ཇི་སྐད་དུ། རྩ་བ་ལས། གལ་ཏེ་དངོས་པོ་གང་ལྟོས་གྲུབ། །དེ་ཉིད་ལ་ཡང་ལྟོས་ནས་ནི། །ལྟོས་བྱ་གང་ཡིན་དེ་གྲུབ་ན། །གང་ལ་ལྟོས་ནས་གང་ཞིག་གྲུབ། །ཅེས་གསུངས་པས་སོ། །གཉིས་པ་ནི་ངོ་བོ་གྲུབ་པའམ། མ་གྲུབ་པ་ཉིད་ལྟོས་གྲང་། དང་པོ་ལྟར་ན་ལྟོས་པ་དོན་མེད་དུ་འགྱུར་ལ། གཉིས་པ་ལྟར་ན་བོང་བུའི་རྭ་ལྟར་ལྟོས་པ་པོ་མེད་པས་གང་ཞིག་ལྟོས་པར་འགྱུར་ཏེ། རྩ་བ་ལས། དངོས་པོ་ལྟོས་སྒྲུབ་གང་ཡིན་པ། །དེ་མ་གྲུབ་ན་ཇི་ལྟར་ལྟོས། །ཅི་སྟེ་གྲུབ་པ་ལྟོས་ཞེ་ན། །དེ་ནི་ལྟོས་པར་མི་རིགས་སོ། །ཞེས་གསུངས་པས་སོ། །གསུམ་པ་ནི། དུས་མཉམ་པ་ལ་ཕན་གདགས་བྱ་འདོགས་བྱེད་མེད་ལ། དུས་མི་མཉམ་པ་ལ་ལྟོས་ས་ཡོད་པའི་ཚེ་ལྟོས་ཆོས་མེད་ཅིང་། ལྟོས་ཆོས་ཡོད་པའི་ཚེ་ལྟོས་ས་མེད་པས་གང་ཞིག་གང་ལ་ལྟོས་པར་འགྱུར་ཏེ། རྩ་བ་ལས། འདོད་ཆགས་དང་ནི་ཆགས་པ་དག །ལྷན་ཅིག་ལྷན་ཅིག་མིན་མི་འགྲུབ། །འདོད་ཆགས་བཞིན་དུ་ཆོས་རྣམས་ཀུན། །ལྷན་ཅིག་ལྷན་ཅིག་མིན་མི་འགྲུབ། །ཅེས་གསུངས་པས་སོ། །དེའི་ཕྱིར་རྟེན་འབྲེལ་ནི་དཔྱད་ན་རང་བཞིན་མེད་པར་གྲུབ་ལ། སྔར་ཆོས་རྣམས་རྟེན་འབྲེལ་དུ་བསྒྲུབ་པ་དང་འགལ་བར་ཡང་མི་འགྱུར་ཏེ། དཔྱད་ན་རང་བཞིན་མེད་པ་དེ་ཉིད་རྟེན་འབྲེལ་གྱི་དོན་ཡིན་པའི་ཕྱིར་རོ། །གསུམ་པ་རིགས་པས་དཔྱད་པའི་རྟགས་ལུང་དང་སྦྱར་བ་ནི། མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པར་བཤད། །གང་ཞིག་སྟོང་ཉིད་ཤེས་ཏེ་བག་ཡོད་ཡིན། །ཞེས་དང་། རིགས་པ་དྲུག་ཅུ་པ་ལས། དེ་དང་དེ་རྟེན་གང་འབྱུང་བ། །རང་གི་ངོ་བོར་དེ་མ་སྐྱེས། །རང་གི་ངོ་བོར་གང་མ་སྐྱེས། །དེ་ལ་སྐྱེས་ཞེས་ཇི་སྐད་བྱ། །ཞེས་དང་། རྩ་བ་ལས། རྟེན་ཅིང་འབྲེལ་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་པ་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པས་སོ། །དེ་དག་གིས་ནི་ཆོས་ཀྱི་བདག་དགག་པའི་རིགས་པའི་གཙོ་བོ་བསྟན་ཟིན་ཏོ། །གཉིས་པ་གང་ཟག་གི་བདག་དགག་པའི་རིགས་པའི་གཙོ་བོ་བསྟན་པ་ལ་གསུམ་སྟེ། འགོག་དགོས་པའི་རྒྱུ་མཚན་དང་། ཅི་ལྟར་འགོག་པའི་ཚུལ་དང་། བཀག་པས་གྲུབ་པའི་དོན་ནོ། །དང་པོ་ནི་འཇུག་པར། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་བར་བློ་ཡི་མཐོང་གྱུར་ཅིང་། །བདག་ནི་འདི་ཡི་ཡུལ་དུ་རྟོགས་བྱས་ནས། །རྣལ་འབྱོར་པ་ཡིས་བདག་ནི་འགོག་པར་བྱེད། །ཅེས་དང་། གཞུང་གཞན་ལས་ཀྱང་། ཉེས་པ་རྣམ་པ་ཐམས་ཅད་དག །འཇིག་ཚོགས་ལྟ་ལས་སྐྱེས་པ་ཡིན། །ཞེས་དང་། དེ་ཕྱིར་གྲོལ་འདོད་ཐོག་མེད་པའི། །རྒྱུ་ཅན་རིགས་མཐུན་ས་བོན་ལས། །བྱུང་བའི་འཇིག་ཚོགས་ལྟ་བ་དག །རྩ་བ་ཉིད་ནས་དབྱུང་བར་གྱིས། །ཞེས་སོ། །དེ་དབྱུང་བ་ལ་དེའི་ཞེན་ཡུལ་སུན་དབྱུང་དགོས་ཏེ། འདི་ཡུལ་སུན་དབྱུང་མེད་པར་ནི། །དེ་སྤོང་བར་ནི་ནུས་མ་ཡིན། །ཞེས་དང་། འཕགས་པ་ལྷས་ཀྱང་། ཡུལ་ལ་བདག་མེད་མཐོང་ན་ནི། །སྲིད་པའི་ས་བོན་ལྡོག་པར་འགྱུར། །ཞེས་གསུངས་པས་སོ། །འཇིག་ལྟའི་ངོ་བོ་ནི། འཇུག་འགྲེལ་ལས། དེ་ལ་འཇིག་ཚོགས་ལ་ལྟ་བ་ནི། ང་དང་ངའི་སྙམ་པ་དེ་ལྟ་བུའི་རྣམ་པར་ཞུགས་པ་ཤེས་རབ་ཉོན་མོངས་པ་ཅན་ནོ། །ཞེས་གསུངས་པས། ཕུང་པོ་ལ་བརྟེན་ནས་ངར་འཛིན་པ་འཇིག་ཚོགས་ལ་ལྟ་བ་ཡིན་པར་མ་ཟད་ངའི་གཟུགས་ཕུང་ངོ་སྙམ་པ་ལྟ་བུ་ངས་ཁྱད་པར་དུ་བྱས་ནས་ཕུང་པོར་འཛིན་པའང་འཇིག་ཚོགས་ལ་ལྟ་བ་ཡིན་པར་གསུངས་སོ། །དེ་ཉིད་ཆོས་ཀྱི་བདག་འཛིན་མ་ཡིན་ནམ་སྙམ་ན། ངས་ཁྱད་པར་དུ་མ་བྱས་པར་སྤྱིར་ཕུང་པོ་ཙམ་དུ་འཛིན་པར་ཆོས་ཀྱི་བདག་འཛིན་དུ་འཇོག་པས་ཁྱད་པར་ཤིན་ཏུ་ཆེ་བ་སྟེ། དང་པོར་ང་ཞེས་བདག་ལ་ཞེན་གྱུར་ཅིང་། །བདག་གི་འདི་ཞེས་དངོས་ལ་ཆགས་བསྐྱེད་པ། །ཞེས་པའི་སྐབས་ཀྱི་ཕུང་པོའི་དངོས་པོ་ལ་ཆགས་པའི་བློ་དང་། ཇི་སྲིད་ཕུང་པོར་འཛིན་ཡོད་པ། །ཞེས་པའི་སྐབས་ཀྱི་ཕུང་པོར་འཛིན་པའི་བློའི་ཁྱད་པར་ལྟ་བུའོ། །གཉིས་པ་ལ་གཉིས་ཏེ། གང་ཟག་རྣམ་པ་བདུན་དུ་གྲུབ་པ་དགག བརྗོད་དུ་མེད་པའི་གང་ཟག་དགག་པའོ། །དང་པོ་ལ་ལྔ་སྟེ། ཕུང་པོ་ལས་གཞན་དུ་གྲུབ་པ་དགག ཕུང་པོ་དང་གཅིག་ཏུ་གྲུབ་པ་དགག རྟེན་དང་བརྟེན་པའི་ཕྱོགས་གཉིས་དགག ལྡན་པའི་ཕྱོགས་དགག ཚོགས་པ་དང་དབྱིབས་དགག་པའོ། །དང་པོ་ནི། གཞན་དུ་འདོད་པ་ནི་ཕྱི་རོལ་པ་སྟེ། གྲངས་ཅན་པས། ཟ་པོ་རྟག་དངོས་བྱེད་པོ་མིན་པའི་བདག །ཡོན་ཏན་བྱ་མེད་མུ་སྟེགས་རྣམས་ཀྱིས་བརྟགས། །ཞེས་པ་ལྟར་ཁྱད་པར་ལྔ་ལྡན་དུ་འདོད་ལ། བྱེ་བྲག་པས་གཞན་གསུམ་འདྲ་བ་ལས་བྱེད་པ་པོ་ཡིན་པ་དང་། ཡོན་ཏན་དགུ་དང་ལྡན་པས་ཡོན་ཏན་དང་བཅས་པར་འདོད་དོ། །རིག་བྱེད་དུ་སྨྲ་བ་དག་ནི་བུམ་པ་ལ་སོགས་པའི་ནམ་མཁའ་ལྟར་ལུས་ཐ་དད་པས་བདག་གཅིག་སྣ་ཚོགས་པ་ཉིད་དོ་ཞེས་བྱ་བ་ལ་སོགས་པར་འདོད་དོ། །གསང་མཐའ་པས་ནི་གཟུང་འཛིན་གཉིས་སྟོང་གི་རྟག་གཅིག་ཆ་མེད་ཤེས་རིག་སྟེ་ཁྱད་པར་ལྔ་ལྡན་དུ་འདོད་དོ། །གཅེར་བུ་པ་ནི་ལུས་ཀྱི་ཚད་ཙམ་དུ་གནས་པས་ཞུམ་པ་དང་རྒྱས་པར་འདོད་དོ། །ཐམས་ཅད་ཀྱང་ཕུང་པོ་ལས་དོན་གཞན་པ་དང་། རྟག་དངོས་སུ་འདོད་པ་ནི་འདྲའོ། །དེ་དག་འགོག་པའི་རིག་པ་ལ། མུ་སྟེགས་རང་ལ་གྲགས་པའི་གཏན་ཚིགས་དང་། འགལ་འབྲེལ་ལ་བརྟེན་པའི་རིགས་པས་དགག་པ་གཉིས་ལས། དང་པོ་ནི། དེ་ལྟ་བུའི་བདག་ནི་དོན་དམ་དུ་ཡོད་པ་དང་། ངར་འཛིན་ལྷན་སྐྱེས་ཀྱི་རྟེན་ཡིན་པ་དང་། ཀུན་རྫོབ་ཏུ་ཡོད་པ་གསུམ་ཆར་ཡང་མི་འཐད་དེ་མ་སྐྱེས་པའི་ཕྱིར་དཔེར་ན་མོ་གཤམ་གྱི་བུ་བཞིན། ཞེས་པའི་རང་ལ་གྲགས་ཀྱི་གཏན་ཚིགས་ཀྱིས་གནོད་ཅིང་། དེ་བཞིན་དུ་ཟ་བ་པོ་སོགས་ཀྱི་ཁྱད་པར་ཀུན་ལའང་གཏན་ཚིགས་དེ་ཉིད་ཀྱིས་གནོད་པའོ། །གཉིས་པ་ནི། ཕུང་པོ་ལས་དོན་གཞན་དུ་མེད་དེར་སྣང་རུང་མ་དམིགས་པའི་ཕྱིར་ཞེས་པའི་གཏན་ཚིགས་དང་། ངར་འཛིན་ལྷན་སྐྱེས་ཀྱི་བློའི་རྟེན་དུ་མི་འཐད་དེ། དེ་ལྟ་བུའི་ཁྱད་པར་རིག་པ་མེད་པར་ཡང་ངར་འཛིན་ལྷན་སྐྱེས་སྐྱེ་བ་ཡོད་པའི་ཕྱིར་ཞེས་པའི་གཏན་ཚིགས་གཉིས་ཀྱིས་གནོད་པའོ། །གཉིས་པ་ནི་གཅིག་ཏུ་འདོད་པ་རང་སྡེ་མང་པོས་བཀུར་བའི་སྡེ་པ་སྟེ། དེ་དག་གིས་བདག་ཕུང་པོ་ལས་དོན་གཞན་དུ་ཡོད་པ་ལ་རིགས་པས་གནོད་ཅིང་རྫས་སུ་ནི་ཡོད་པས་ཕུང་པོ་ཉིད་བདག་ལྟའི་དམིགས་པ་ཡིན་ནོ། །དེ་ལའང་ཁ་ཅིག་ཕུང་པོ་ལྔ་ཆར་བདག་ཏུ་འདོད་དེ། ཇི་སྐད་དུ། བཅོམ་ལྡན་འདས་ཀྱིས་དགེ་སྦྱོང་ངམ་བྲམ་ཟེ་གང་སུ་དག་གཅིག་བདག་གོ་སྙམ་དུ་ཡང་དག་པར་རྗེས་སུ་ལྟ་བ་དེ་དག་ནི་ཉེ་བར་ལེན་པའི་ཕུང་པོ་ལྔ་པོ་འདི་དག་ཁོ་ན་ལ་ཡང་དག་པར་རྗེས་སུ་ལྟའོ། །ཞེས་གསུངས་པ་ལྟ་བུའོ། །དེས་ན་ལུང་འདི་འཇིག་ཚོགས་ལ་ལྟ་བ་ཕུང་པོ་ལ་དམིགས་ནས་བདག་དང་བདག་གི་བའི་རྣམ་པར་ཞུགས་པ་བསལ་བའི་ཆེད་དུ་གསུངས་པ་ཡིན་ནོ་ཞེས་འདོད་དོ། །གཞན་དག་ནི་སེམས་ཁོ་ནར་བདག་ཏུ་འདོད་དེ། བདག་ཉིད་བདག་གི་མགོན་ཡིན་གྱི། །གཞན་ནི་སུ་ཞིག་མགོན་དུ་འགྱུར། །བདག་ཉིད་ལེགས་པར་ཐུལ་བས་ནི། །མཁས་པས་མཐོ་རིས་ཐོབ་པར་འགྱུར། །ཞེས་གསུངས་པས་སོ། །འདིས་སེམས་ལ་བདག་ཏུ་གསུངས་པར་ཅིས་ཤེས་ན། ཕུང་པོ་ལས་ཐ་དད་པའི་བདག་མེད་པའི་ཕྱིར་དང་། མདོ་གཞན་ལས་སེམས་འདུལ་བར་གསུངས་པའི་ཕྱིར་ཏེ། སེམས་འདུལ་བ་ནི་ལེགས་པར་སྟེ། །སེམས་ཐུལ་བས་ནི་བདེ་བ་འདྲེན། །ཞེས་གསུངས་པ་དེ་ལས་སོ་ཞེས་འདོད་དོ། །འདིར་ཙོང་ཁ་པས། སློབ་དཔོན་ལེགས་ལྡན་འབྱེད་ཀྱིས། ཡིད་ཀྱི་རྣམ་ཤེས་བདག་གི་མཚན་གཞིར་འདོད་སེམས་ཙམ་པས་ཀུན་གཞིའི་རྣམ་ཤེས་བདག་གི་མཚན་གཞིར་འདོད་པས་དེ་དག་ཀྱང་བདག་ཕུང་གཅིག་ཏུ་འདོད་དོ། །ཞེས་སྨྲ་བ་ནི་མ་དཔྱད་པ་སྟེ། དེ་དག་ནི་ཕུང་པོ་བདག་གི་གདགས་གཞིར་འདོད་ཀྱི་མཚན་གཞིར་མི་འདོད་པའི་ཕྱིར། ཕུང་པོ་བདག་འཛིན་ལྷན་སྐྱེས་ཀྱི་དམིགས་པ་ཡིན་ན། བདག་ཏུ་ཁས་ལེན་དགོས་སོ་ཞེས་ཐལ་འགྱུར་བས་འཕུལ་བ་ཡིན་གྱི་རང་ངོས་ནས་བདག་ཕུང་གཅིག་ཏུ་འདོད་པའང་མ་ཡིན་ཏེ། ཁ་ཆེ་བྱེ་བྲག་སྨྲ་བ་ཡན་ཆད་ལ་བདག་ཕུང་གཅིག་ཏུ་འདོད་པ་མེད་པའི་ཕྱིར་རོ། །དེ་ལྟར་མང་བཀུར་བས་བདག་ཕུང་གཅིག་ཏུ་འདོད་པ་འགོག་པ་ལ། སློབ་དཔོན་ཟླ་བའི་རིགས་པས་གནོད་པ་དང་། ལུང་གི་དོན་དུ་མི་འཐད་པ་གཉིས། དང་པོ་ལ། རིགས་པ་བདུན་ཡོད་པའི་དང་པོ་ནི། གང་ཟག་གཅིག་གི་བདག་དུ་མར་ཐལ། ཕུང་པོ་དུ་མ་ཡིན་པའི་ཕྱིར་སེམས་ཁོ་ན་བདག་ཏུ་འདོད་པ་ལའང་། མིག་གི་རྣམ་ཤེས་སོགས་སམ། སྐད་ཅིག་སྔ་ཕྱིའི་དབྱེ་བས་དུ་མ་ཡོད་པའི་ཕྱིར། འདོད་ན། འཇིག་རྟེན་སྐྱེ་བ་ན་གང་ཟག་ཉག་ཅིག་སྐྱེའོ་ཞེས་བྱ་བའི་ལུང་ལས་ན་བདག་མང་པོ་དག་ཏུ་འདོད་པའང་མ་ཡིན་ནོ། །གཉིས་པ་ནི། བདག་རྫས་སུ་འགྱུར་ཏེ། ཕུང་པོ་རྫས་སུ་འདོད་པའི་ཕྱིར་ཏེ། འདོད་ན། དགེ་སློང་དག་ལྔ་པོ་འདི་དག་མིང་ཙམ་ཐ་སྙད་ཙམ་བཏགས་པ་ཙམ་སྟེ་གང་འདི་ལྟ་སྟེ། འདས་པའི་དུས་དང་། མ་འོངས་པའི་དུས་དང་། ནམ་མཁའ་དང་། མྱ་ངན་ལས་འདས་པ་དང་། གང་ཟག་གོ །ཞེས་བྱ་བའི་ལུང་དང་འགལ་ལོ། །གསུམ་པ་ནི་འཇིག་ཚོགས་ལ་ལྟ་བ་ཕྱིན་ཅི་ལོག་ཏུ་མི་འགྱུར་བར་ཐལ། སྔོ་སེར་ལ་སོགས་པའི་ཤེས་པ་ལྟར་རྫས་ཀྱི་ཡུལ་ཅན་ཡིན་པའི་ཕྱིར། འདོད་ན་དེ་སྤང་བར་མི་འགྱུར་བའམ། དེ་ལ་དམིགས་པའི་འདུན་པའི་འདོད་ཆགས་སྤངས་པ་ཁོ་ནས་སྤོང་བར་འགྱུར་རོ། །བཞི་པ་ནི། ལྷག་མེད་ཀྱི་མྱ་ངན་ལས་འདས་པའི་ཚེ་བདག་ཆད་པར་ཐལ། དེར་ཕུང་པོ་རྒྱུན་ཆད་པའི་ཕྱིར། འདོད་ན། ཆད་པའི་མཐར་འཛིན་པས་མཐར་འཛིན་པར་ལྟ་བ་ཐལ་བར་འགྱུར་རོ། །ལྔ་པ་ནི་མྱ་ངན་ལས་འདས་པའི་སྔ་རོལ་དུ་བདག་སྐད་ཅིག་གིས་སྐྱེ་འཇིག་བྱེད་པར་ཐལ། དེར་ཕུང་པོ་སྐད་ཅིག་གིས་སྐྱེ་འཇིག་བྱེད་པའི་ཕྱིར། འདོད་ན། ཇི་ལྟར་ངའི་ལུས་འདི་བྱུང་བར་གྱུར་ཏོ་ཞེས་བྱ་བ། དེའི་ཚེ་དེའི་དུས་ན་ང་རྒྱལ་པོ་ང་ལས་ནུ་ཞེས་བྱ་བར་གྱུར་ཏོ། །ཞེས་བྱ་བ་འདིའང་གསུང་བར་མི་འགྱུར་ཏེ། དེའི་ཚེ་བདག་ཀྱང་ལུས་ལྟར་ཞིག་པའི་ཕྱིར་དང་། འདིར་གཞན་ཉིད་སྐྱེ་བར་འགྱུར་བའི་ཕྱིར་རོ། །གཞན་ཡང་ལས་བྱེད་པའི་ཚེ་རྣམ་སྨིན་མྱོང་བ་པོ་མེད་ཅིང་རྣམ་སྨིན་མྱོང་བའི་ཚེ་ལས་བྱེད་པ་པོ་མེད་པར་འགྱུར་ཏེ། བདག་སྐད་ཅིག་གིས་སྐྱེས་འཇིག་བྱེད་པས་དེ་གཉིས་གཞན་དུ་ཁས་བླངས་པའི་ཕྱིར་རོ། །གལ་ཏེ་སྐད་ཅིག་སྔ་མ་རྣམས་སུ་བྱས་པའི་འབྲས་བུ་ཕྱི་མར་སྤྱོད་པ་སྐྱོན་མེད་ནའང་། ལས་བྱས་པ་ཆུད་ཟོས་པ་དང་མ་བྱས་པ་དང་ཕྲད་པར་འགྱུར་ཏེ། གཞན་གྱིས་བསགས་ལ་གཞན་གྱིས་ཟ་བར་འགྱུར་བའི་ཕྱིར་རོ། །གལ་ཏེ་རྒྱུད་གཅིག་ཏུ་གཏོགས་པས་སྐྱོན་མེད་དོ་ཞེས་ཀྱང་བརྗོད་པར་མི་ནུས་ཏེ། རང་གི་མཚན་ཉིད་ཀྱིས་གཞན་ཡིན་པ་ལ་རྒྱུད་གཅིག་པ་མི་འཐད་པའི་ཕྱིར་རོ། །དྲུག་པ་ནི་འཇིག་རྟེན་མཐའ་དང་ལྡན་པ་དང་། མི་ལྡན་པ་དང་། གཉིས་ཀ་དང་། གཉིས་ཀ་མ་ཡིན་པ་སྟེ་མུ་བཞི་དང་། འཇིག་རྟེན་རྟག་སོགས་མུ་བཞི་དང་། དེ་བཞིན་གཤེགས་པ་གྲོངས་ཕན་ཆད་འབྱུང་མི་འབྱུང་མུ་བཞི་པོ་རྣམས་ལ་ནི་ལུང་དུ་མ་བསྟན་པའི་དངོས་པོར་གཞག་པ་མི་འཐད་པར་ཐལ། བདག་ཕུང་གཅིག་ཡིན་ན་སྐབས་འདིའི་འཇིག་རྟེན་གྱི་སྒྲས་ཕུང་པོ་འཛིན་དགོས་པས་འཇིག་རྟེན་མཐའ་དང་ལྡན་པ་དང་། མི་རྟག་པ་དང་། དེ་བཞིན་གཤེགས་པ་གྲོངས་ཕན་ཆད་མི་འབྱུང་བར་ཁས་ལེན་དགོས་པའི་ཕྱིར། འདིར་སློབ་དཔོན་ཟླ་བས་ལུང་མ་བསྟན་གྱི་ལྟ་བ་དང་པོ་བརྒྱད་ལ་བདག་དང་འཇིག་རྟེན་ཞེས་པའི་ཚིགས་གཉིས་ཀ་མི་སྨྲོས་པར་འཇིག་རྟེན་ཁོ་ན་སྨྲོས་པར་བཞེད་ཅིང་། དེའི་ཚེ་འཇིག་རྟེན་གྱི་སྒྲས་བདག་བསྟན་པར་བཞེད་པར་སྣང་སྟེ། འཇིག་རྟེན་ཕུང་པོར་རབ་གྲགས་པ། །དེ་ལ་འཇིག་རྟེན་ངེས་པར་བརྟེན། །ཞེས་པའི་ལུང་ལ་བརྟེན་ནས་འཇིག་རྟེན་ཀུན་རྫོབ་ཞེས་པའི་སྐབས་ཀྱི་འཇིག་རྟེན་གང་ཟག་ལ་འཇུག་པར་ཚིགས་གསལ་ལས་གསུངས་པ་དང་དོན་གཅིག་ཏུ་སྣང་ངོ་། །བདུན་པ་ནི་རྣལ་འབྱོར་མངོན་སུམ་གྱིས་བདག་མེད་པར་མཐོང་བའི་ཚེ་ཕུང་པོ་མེད་པར་མཐོང་བར་འགྱུར་ཏེ། བདག་ཕུང་གཅིག་ཡིན་པའི་ཕྱིར། གལ་ཏེ་ལས་དང་འབྲས་བུ་འབྲེལ་བའི་དུས་སུ་བདག་གི་སྒྲ་ཕུང་པོ་ལ་འཇུག་ལ། རྣལ་འབྱོར་པས་བདག་མེད་མཐོང་བའི་ཚེ་གཞན་གྱིས་ཀུན་བརྟགས་པའི་ནང་གི་བྱེད་པའི་སྐྱེས་བུ་ལ་འཇུག་པས་དེ་མེད་པར་མཐོང་བའི་ཕྱིར་སྐྱོན་མེད་དོ་སྙམ་ན། དེའང་མི་འཐད་དེ་ཕུང་པོ་རྣམས་བདག་ཡིན་ན་ཆོས་ཐམས་ཅད་བདག་མེད་ཅེས་པའི་ཚེའང་ཕུང་པོ་བདག་ཏུ་འདོད་དགོས་པའི་ཕྱིར་ཏེ། གཞན་དུ་ན་འདོད་དགུར་སྤྱོད་པར་འགྱུར་བའི་ཕྱིར་རོ། །གཞན་ཡང་རྣལ་འབྱོར་པས་བདག་མེད་མཐོང་བའི་ཚེ་གཟུགས་སོགས་ཀྱི་དེ་ཁོ་ན་ཉིད་རྟོགས་པར་མི་འགྱུར་བར་ཐལ། དེའི་ཚེ་བདག་གི་སྒྲ་གཟུགས་སོགས་ལས་དོན་གཞན་དུ་གྱུར་པའི་གཞན་གྱི་ཀུན་བརྟགས་པའི་བདག་ཁོ་ན་ལ་འཇུག་པའི་ཕྱིར་རོ། །འདོད་ན། བདག་མེད་མངོན་སུམ་དུ་མཐོང་བའི་ཚེའང་གཟུགས་ལ་སོགས་པ་དམིགས་ནས་ཆགས་སྡང་སོགས་སྐྱེ་བས་གྲོལ་བ་མི་འཐད་པར་འགྱུར་རོ། །གཉིས་པ་ལུང་གི་དོན་དུ་མི་འཐད་པ་ནི། ལུང་ལས། ཕུང་པོ་རྣམ་བདག་ཡིན་ཞེས་གསུངས་པའི་དོན་ཕུང་པོ་བདག་ཏུ་སྟོན་ན། ཕུང་པོའི་ཚོགས་པ་བདག་ཏུ་ཁས་བླངས་དགོས་ཀྱི་ཕུང་པོ་རེ་རེ་བདག་ཏུ་ཁས་བླངས་པ་མི་འཐད་དེ། ཤིང་རྣམས་ནགས་ཚལ་ཡིན་ཞེས་པས་ཤིང་གི་ཚོགས་པ་ནགས་ཚལ་དུ་སྟོན་པ་བཞིན་ནོ། །དེ་ལྟར་ན་ཚོགས་པ་ནི་རྫས་སུ་ཅི་ཡང་ཡོད་པ་མ་ཡིན་པ་ཉིད་ཀྱི་ཕྱིར་མགོན་ཉིད་དང་། འདུལ་བ་དང་། དབང་པོ་ཉིད་དུ་རིགས་པ་ནི་མ་ཡིན་ནོ། །ཤིང་རྟའི་ཡན་ལག་ཚོགས་ཙམ་ཤིང་རྟར་འགྱུར་ཏེ། ཕུང་པོ་ཚོགས་ཙམ་བདག་ཡིན་པ་གང་ཞིག མདོ་ལས། བདག་དང་ཤིང་རྟ་འཇོག་ཚུལ་མཚུངས་པར་གསུངས་པའི་ཕྱིར་ཏེ། བདག་ཅེས་བྱ་བ་བདུད་ཀྱི་སེམས། །ཁྱོད་ནི་ལྟ་བར་གྱུར་པ་ཡིན། །འདུ་བྱེད་ཕུང་པོ་འདི་སྟོང་སྟེ། །འདི་ལ་སེམས་ཅན་ཡོད་མ་ཡིན། །ཇི་ལྟར་ཡན་ལག་ཚོགས་རྣམས་ལ། །བརྟེན་ནས་ཤིང་རྟར་བརྗོད་པ་ལྟར། །དེ་བཞིན་ཕུང་པོ་རྣམས་བརྟེན་ནས། །ཀུན་རྫོབ་སེམས་ཅན་ཞེས་བྱའོ། །ཞེས་གསུངས་པས་སོ། །གཞན་ཡང་མདོའི་དོན། ཕུང་པོ་འདུས་ཙམ་བདག་མ་ཡིན་ཏེ། ཕུང་པོ་ལ་བརྟེན་ནས་བདག་བཏགས་པར་གསུངས་པའི་ཕྱིར། དཔེར་ན་འབྱུང་བ་ལས་གྱུར་པ་བཞིན་ནོ། །མདོ་ལས་ཕུང་པོ་བདག་གོ་ཞེས་གསུངས་པ་ཙམ་གྱིས་ཕུང་པོ་བདག་ཏུ་འདོད་པའང་མི་འཐད་དེ། མདོ་གཞན་ལས་གཟུགས་བདག་མ་ཡིན་ཚོར་བ་བདག་མ་ཡིན་ཞེས་སོགས་གསུངས་པའི་ཕྱིར་རོ། །ཁྱད་པར་དུ་ངར་འཛིན་ལྷན་སྐྱེས་ཀྱི་དམིགས་པ་ཕུང་པོ་ཡིན་པ་ཉིད་མི་འཐད་དེ། མདོ་ལས། རྒྱལ་པོ་ཆེན་པོ་སྐྱེས་བུ་གང་ཟག་དེ་དག་ནི་ཁམས་དྲུག་དང་། རིག་པའི་སྐྱེ་མཆེད་དྲུག་དང་། ཡིད་ཉེ་བར་རྒྱུ་བ་བཅོ་བརྒྱད་དོ་ཞེས་ཆོས་དེ་རྣམས་ཉེ་བར་བཟུང་ནས་བདག་ཏུ་བཏགས་པར་གསུངས་པའི་ཕྱིར་རོ། །རིགས་པས་ཀྱང་གནོད་དེ། ཕུང་པོ་ཇི་སྲིད་དུ་ཡོད་པ་དེ་སྲིད་དུ་ངར་འཛིན་འཇུག་པར་ཐལ། ཕུང་པོ་ངར་འཛིན་ལྷན་སྐྱེས་ཀྱི་དམིགས་པ་ཡིན་པའི་ཕྱིར། འདོད་ན། བདག་མེད་མངོན་སུམ་དུ་རྟོགས་པའི་ཚེ་ངར་འཛིན་ལྷན་སྐྱེས་ཀྱི་དམིགས་ཡུལ་སུན་དབྱུང་མི་ནུས་པར་ཐལ། དེའི་ཚེ་རྟག་པའི་བདག་སྤོང་བ་ཙམ་ཡིན་གྱི་ཕུང་པོ་མ་སྤངས་པའི་ཕྱིར་རོ། །དཔེར་ན་རང་གི་ཁྱིམ་ན་སྦྲུལ་ཡོད་བཞིན་དུ་གླང་པོ་ཆེ་མ་མཐོང་བས་སྦྲུལ་གྱི་འཇིགས་པ་སྤོང་མི་ནུས་པ་བཞིན་ནོ། །འདི་ནི་འདི་ལྟར་ཡིན་གྱི་གཞན་དག་ཀུན་བརྟགས་ཀྱི་བདག་བཀག་པས་ངར་འཛིན་ལྷན་སྐྱེས་ཀྱི་དམིགས་ཡུལ་མི་ཁེགས་པར་ཐལ། དེ་དེར་མ་ཡིན་པའི་ཕྱིར་ཞེས་སྨྲ་བ་ལ་མཁས་པ་གཞན་དག་མཐའ་བཞིའི་སྐྱེ་བ་བཀག་པས་བདེན་འཛིན་ལྷན་སྐྱེས་ཀྱི་དམིགས་ཡུལ་མི་ཁེགས་པར་ཐལ། དེ་དེར་མ་ཡིན་པའི་ཕྱིར་ཞེས་གསུངས་པ་ནི་སུས་ཀྱང་བཟློག་པར་མི་ནུས་སོ། །གསུམ་པ་རྟེན་དང་བརྟེན་པའི་ཕྱོགས་གཉིས་དགག་པར་ནི་ཕུང་པོ་ལ་བདག་བརྟེན་པའི་ཚུལ་དུ་ཡོད་པའང་མ་ཡིན། བདག་ལ་ཕུང་པོ་བརྟེན་པའི་ཚུལ་དུ་ཡོད་པའང་མ་ཡིན་ཏེ། གཞན་ཉིད་དུ་ཡོད་ན་འཁར་གཞོང་ན་ཞོ་ཡོད་ཅེས་པ་ལྟར་རྟེན་དང་བརྟེན་པར་འཐད་ཀྱང་གཞན་ཉིད་བཀག་ཟིན་པའི་ཕྱིར་རོ། །བཞི་པ་ལྡན་པའི་ཕྱོགས་དགག་པ་ནི་བདག་ནི་གཟུགས་སོགས་ཕུང་པོ་དང་ལྡན་པར་ཡང་མི་འདོད་དེ། ལྷས་བྱིན་གཟུགས་དང་ལྡན་ཞེས་པ་ལྟ་བུ་ཐ་དད་མ་ཡིན་པའི་ལྡན་པ་དང་། ལྷས་བྱིན་བ་ལང་དང་ལྡན་ཞེས་པ་ལྟ་བུ་ཐ་དད་པའི་ལྡན་པ་གཉིས་ཀའང་མི་འཐད་པའི་ཕྱིར་ཏེ། དེ་ཉིད་དང་གཞན་ཉིད་བཀག་ཟིན་པའི་ཕྱིར་རོ། །ལྔ་པ་ཚོགས་པ་དང་དབྱིབས་དགག་པ་ནི། ཕུང་པོ་ཚོགས་ཙམ་བདག་ཏུ་མི་འཐད་དེ། བདག་དང་ཤིང་རྟའི་འཇོག་ཚུལ་མཚུངས་པ་གང་ཞིག ཤིང་རྟའི་ཡན་ལག་ཚོགས་ཙམ་ཤིང་རྟ་ཡིན་ན་ཡན་ལག་སིལ་བུར་གནས་པ་ལའང་ཤིང་རྟ་ཡོད་པར་ཐལ་བའི་ཕྱིར་རོ། །གལ་ཏེ་ཚོགས་ཙམ་ཤིང་རྟ་མ་ཡིན་ཡང་ཡན་ལག་གི་བཀོད་པ་ཁྱད་པར་ཅན་གྱི་དབྱིབས་ཤིང་རྟ་ཡིན་ནོ་ཞེ་ན་དེའང་མི་འཐད་དེ། ཡན་ལག་ཅན་མེད་པའི་ཡན་ལག་མེད་པའི་ཕྱིར་རོ། །གཞན་ཡང་དབྱིབས་ཤིང་རྟར་འདོད་ན་ཡན་ལག་རེ་རེའི་དབྱིབས་སམ། ཚོགས་པའི་དབྱིབས་ཡིན་གྲང་། དེ་ལྟར་ན་སྔར་གྱི་དབྱིབས་ཀྱི་ཁྱད་པར་མ་བཏང་བ་ཡིན་ནམ་བཏང་བ་ཡིན། མ་བཏང་བ་ཡིན་ན་ཡན་ལག་ཅེས་བྱ་བ་ལ་ཤིང་རྟ་མེད་པ་ལྟར། ཤིང་རྟ་ཉིད་ཀྱི་དུས་སུའང་ཤིང་རྟ་མེད་པར་འགྱུར་ཏེ། སྔར་གྱི་ཡན་ལག་རེ་རེའི་དབྱིབས་ཀྱི་ཁྱད་པར་མ་བཏང་བའི་ཕྱིར། བཏང་བ་ཡིན་ན་དེའང་མི་འཐད་དེ། ཤིང་རྟ་ཉིད་ཀྱི་དུས་སུ་སྔར་མེད་པའི་དབྱིབས་ཀྱི་ཁྱད་པར་ཡོད་ན་བཟུང་དུ་རིགས་པ་ལས་མ་བཟུང་བའི་ཕྱིར་རོ། །གལ་ཏེ་ཕྱོགས་གཉིས་པ་ལྟར་ཡན་ལག་ཚོགས་པའི་དབྱིབས་ཤིང་རྟ་ཡིན་ནོ་ཞེ་ན། དེའང་མི་རིགས་ཏེ། ཚོགས་པ་ནི་ཁྱོད་ཀྱི་རྫས་སུ་མི་འདོད་པས་དེ་ལ་བཏགས་པའི་དབྱིབས་མི་འཐད་པའི་ཕྱིར་ཏེ། ཁྱོད་བཏགས་པ་ལ་གདགས་གཞི་རྫས་སུ་ཡོད་པར་འདོད་དགོས་པའི་ཕྱིར་རོ། །དེ་ལྟར་ཤིང་རྟ་ལ་དཔྱད་པའི་རིགས་པ་དེ་དག་བདག་དང་ཕུང་པོ་ལ་སྦྱར་བར་བྱ་ཞིང་ཁྱད་པར་ཕུང་པོའི་དབྱིབས་བདག་ཡིན་ན་སེམས་བདག་མ་ཡིན་པར་གཟུགས་ཁོ་ན་བདག་ཏུ་འདོད་དགོས་པར་འགྱུར་ཏེ། དབྱིབས་དེ་གཟུགས་ཅན་ཁོ་ན་ལ་ཡོད་པའི་ཕྱིར་རོ། །གཉིས་པ་བརྗོད་དུ་མེད་པའི་གང་ཟག་དགག་པ་ནི། རང་སྡེ་མང་པོས་བཀུར་བའི་ནང་ཚན་གནས་མ་བུའི་སྡེ་པ་ཁ་ཅིག་ན་རེ་ལས་བྱེད་པ་པོ་དང་རྣམ་སྨིན་མྱོང་བའི་རྟེན་ཡིན་པས་བདག་རྫས་སུ་ཡོད་དགོས་ཤིང་ཕུང་པོ་དང་དེ་ཉིད་དང་། གཞན་ཉིད་དང་། རྟག་པ་དང་མི་རྟག་པ་གང་དུའང་བརྗོད་དུ་མེད་པས་བརྗོད་དུ་མེད་པའི་གང་ཟག་ཅེས་བྱ་བ་རྫས་སུ་ཡོད་དོ་ཞེ་ན་དེའང་མི་འཐད་དེ། བདག་རྫས་སུ་ཡོད་ན་ཕུང་པོ་དང་། དེ་ཉིད་དང་གཞན་ཉིད་དུ་མེད་པར་འགལ་བའི་ཕྱིར་ཏེ། དཔེར་ན་སེམས་རྫས་སུ་ཡོད་པར་འདོད་པས་གཟུགས་ལས་རྫས་གཞན་དང་སེམས་དང་རྫས་གཅིག་ཏུ་འདོད་པ་བཞིན་ནོ། །དེས་ན་ཁྱོད་ཀྱི་འདོད་པ་འདིས་བདག་རྫས་སུ་མ་གྲུབ་པར་བཏགས་ཡོད་དུ་འདོད་པར་རིགས་ཏེ། དེ་ཉིད་དང་གཞན་ཉིད་དུ་མ་གྲུབ་པས་ཀྱང་བཏགས་ཡོད་དུ་འདོད་པའི་ཕྱིར་རོ། །གསུམ་པ་དེས་གྲུབ་པའི་དོན་ནི། དེ་ལྟར་རྣམ་པ་བདུན་དང་། བརྗོད་དུ་མེད་པའི་བདག་དགག་པའི་རིགས་པ་དེ་དག་གིས་བདག་ཏུ་གདགས་པའི་རྒྱུ་ཕུང་པོ་ཉིད་ཀྱང་རང་བཞིན་མེད་པར་གྲུབ་སྟེ། ཚུལ་དེ་ལྟར་དཔྱད་ན་ནང་ཉེར་ལེན་གྱི་ཕུང་པོ་དང་། ཕྱི་རོལ་བུམ་སྣམ་སོགས་གང་ཡང་མི་རྙེད་པའི་ཕྱིར་ཏེ། འཇུག་པར། བུམ་པ་སྣམ་བུ་རེ་ལྡེ་དམག་དང་ནགས་ཚལ་ཕྲེང་བ་ལྗོན་ཤིང་དང་། །ཁང་ཁྱིམ་ཤིང་རྟ་ཕྲན་དང་མགྲོན་གནས་ལ་སོགས་དངོས་རྣམས་གང་དག་དང་། །ཞེས་པ་ནས། དེ་རྣམས་ཤིང་རྟའི་རྣམ་དཔྱད་བྱས་པས་རྣམ་བདུན་ཡོད་པ་མ་ཡིན་ཞིང་། །དེ་ལས་གཞན་དུ་གྱུར་པར་འཇིག་རྟེན་གྲགས་པའི་སྒོ་ནས་ཡོད་པ་ཡིན། །ཞེས་དང་། སྤྱོད་འཇུག་དང་རིན་ཆེན་ཕྲེང་བར་གསུངས་པའི་རིགས་པ་སྔར་བཤད་པ་ལྟ་བུའོ། །གང་ཟག་གི་བདག་དགག་པའི་རིགས་པའི་གཙོ་བོ་བསྟན་ཟིན་ཏོ། །གསུམ་པ་དེ་ལྟར་བཀག་པའི་གྲུབ་པའི་དོན་ལ་གཉིས་ཏེ། ཆོས་ཀྱི་བདག་བཀག་པས་ཐ་སྙད་དུ་ཆོས་བཏགས་ཡོད་དུ་གྲུབ་པ་དང་། གང་ཟག་གི་བདག་བཀག་པས་ཐ་སྙད་དུ་གང་ཟག་བཏགས་ཡོད་དུ་གྲུབ་པའོ། །དང་པོ་ནི། འཇིག་རྟེན་གྱིས་ཐ་སྙད་དུ་ས་བོན་ལས་མྱུ་གུ་སྐྱེ་བ་བདེན་ཞེས་པའི་དོན་སྐྱེ་ཚུལ་མཐའ་བཞིར་རྣམ་པར་དཔྱད་པ་ན་མ་རྙེད་པའི་ཚེ་ས་བོན་ལས་མྱུ་གུ་སྐྱེ་བ་དེའང་མ་དཔྱད་པའི་ངོར་བདེན་པར་སྣང་བ་ཙམ་ཡིན་གྱི་དཔྱད་ན་བདེན་པར་མེད་པའི་ཚོགས་པ་ཡིན་པས་སྒྱུ་མ་ལ་སོགས་པ་བཞིན་དུ་བརྟེན་ནས་བཏགས་པ་ཙམ་དུ་གྲུབ་སྟེ། འཇུག་པར། གང་ཕྱིར་རྒྱུ་མེད་པ་དང་དབང་ཕྱུག་གི །རྒྱུ་ལ་སོགས་དང་བདག་གཞན་གཉིས་ཀ་ལས། །དངོས་རྣམས་སྐྱེ་བར་འགྱུར་བ་མ་ཡིན་པ། །དེ་ཕྱིར་བརྟེན་ནས་རབ་ཏུ་སྐྱེ་བར་འགྱུར། །ཞེས་གསུངས་སོ། །ཀུན་རྫོབ་ཀྱི་འཇོག་ཚུལ་འདི་ནི་དངོས་པོར་སྨྲ་བ་རྣམས་ཀྱི་ལུགས་ལས་ཁྱད་པར་དུ་གྱུར་པ་དབུ་མ་པ་རང་ལུགས་ཀྱི་ཀུན་རྫོབ་བདེན་པ་ཡིན་ཏེ། འཇུག་འགྲེལ་ལས། ཇི་ལྟ་དབུ་མའི་བསྟན་ཆོས་མ་གཏོགས་པར་བསྟན་བཅོས་གཞན་ལས་སྟོང་པ་ཉིད་ཅེས་བྱ་བའི་ཆོས་འདི་ཕྱིན་ཅི་མ་ལོག་པར་མི་བརྗོད་པ་དེ་བཞིན་དུ་ཁོ་བོ་ཅག་གིས་འདིར་ལུགས་གང་ཞིག་བརྒལ་ལན་དང་བཅས་པར་བསྙད་པའི་ལུགས་འདི་ནས་འབྱུང་བ་དེ་ཡང་སྟོང་པ་ཉིད་ཀྱི་ཆོས་ལྟར་བསྟན་བཅོས་གཞན་ན་མེད་དོ་ཞེས་མཁས་པ་རྣམས་ཀྱིས་ངེས་པར་མཛད་དུ་གསོལ། ཞེས་གསུངས་པས་སོ། །འདིའི་དོན་དངོས་སྨྲ་བའི་གཞུང་ལས་འདིར་བཤད་པའི་སྟོང་པ་ཉིད་ཀྱི་དོན་མེད་པ་ལྟར་རང་རྒྱུད་པའི་གཞུང་ལའང་མེད་ཅེས་པའི་དོན་དུ་འཆད་པའང་ནོར་ཏེ། ལུང་དེ་ཉིད་ཀྱི་མཇུག་ཏུ། དེའི་ཕྱིར་ཁ་ཅིག་གིས་མདོ་སྡེ་པ་རྣམས་ཀྱི་ལུགས་གང་ཞིག་དོན་དམ་པར་སྨྲས་པ་དེ་ཉིད་དབུ་མ་པ་རྣམས་ཀྱིས་ཀུན་རྫོབ་ཏུ་འདོད་དོ་ཞེས་སྨྲས་པ་གང་ཡིན་པ་དེ་ནི་དབུ་མའི་བསྟན་བཅོས་ཀྱི་དོན་གྱི་དེ་ཁོ་ན་ཉིད་མངོན་པར་མི་ཤེས་པ་ཁོ་ནས་སྨྲ་བ་ཡིན་ནོ་ཞེས་ཤེས་པར་བྱའོ། །ཡང་གང་དག་བྱེ་བྲག་ཏུ་སྨྲ་བ་རྣམས་ཀྱིས་གང་དོན་དམ་པར་སྨྲས་པ་དེ་དབུ་མ་པ་རྣམས་ཀྱིས་ཀུན་རྫོབ་ཏུ་ཡིན་ནོ་སྙམ་དུ་སེམས་པ་དེ་དག་གིས་ཀྱང་བསྟན་བཅོས་ཀྱི་དོན་གྱི་དེ་ཉིད་ཡོངས་སུ་མ་ཤེས་པ་ཁོ་ན་སྟེ། འདི་ལྟར་འཇིག་རྟེན་ལས་འདས་པའི་ཆོས་ནི་འཇིག་རྟེན་པའི་ཆོས་དང་མཚུངས་པར་མི་རིགས་པའི་ཕྱིར་ཏེ། ལུགས་འདི་ནི་ཐུན་མོང་མ་ཡིན་པའོ་ཞེས་མཁས་པ་རྣམས་ཀྱིས་ངེས་པར་བྱའོ། །ཞེས་གསུངས་པ་དང་མ་འབྲེལ་པའི་ཕྱིར་རོ། །ཅི་ལྟར་མ་འབྲེལ་ན་གཞུང་སྔ་མས་བསྟན་བཅོས་གཞན་ན་མེད་ཅེས་པའི་སྒྲུབ་བྱེད་དུ་གཞུང་ཕྱི་མས་ཉན་ཐོས་སྡེ་གཉིས་ཀྱི་དོན་དམ་དང་ཀུན་རྫོབ་གང་ཡང་དབུ་མ་པའི་ཀུན་རྫོབ་བདེན་པར་མི་རུང་བས་ལུགས་ཐུན་མོང་མ་ཡིན་པ་ཡིན་ཞེས་བསྟན་གྱི་རང་རྒྱུད་པ་ལ་ཟུར་ཟ་བ་ཅུང་ཟད་ཀྱང་མི་སྣང་བའི་ཕྱིར་རོ། །དངོས་པོ་སྨྲ་བ་རྣམས་ཀྱང་ཀུན་རྫོབ་བཏགས་ཡོད་དུ་འདོད་པ་མ་ཡིན་ནམ་སྙམ་ན་རང་ངོས་ནས་བཏགས་ཡོད་ཙམ་དུ་འདོད་ཀྱང་དེའི་གདགས་གཞི་ལ་རྫས་ཡོད་དགོས་པར་འདོད་པས་བཏགས་ཡོད་ཉིད་ཀྱང་མི་གྲུབ་སྟེ། འཇུག་འགྲེལ་ལས། ཤེས་རབ་མེད་པས་རྫས་ཙམ་ལ་ཆགས་པའི་སྒོ་ནས་གཞན་གྱི་དབང་གི་བུམ་པ་སོ་མ་བཏང་བར་ཆུ་དང་འདྲ་བ་བླུགས་ནས་རང་གི་བློ་གྲོས་ཀྱི་ཚུལ་ངན་པའི་ཕྱིར། འཇིག་རྟེན་པའི་རྣམ་པར་གཞག་པ་འཇིག་རྟེན་ཁོ་ན་ལས་གྲུབ་པ་འདུག་ཤིག་སོང་ཤིག་བྱོས་ཤིག་ཚོས་ཤིག་ཅེས་བྱ་བ་དེ་ལྟ་བུ་ལ་སོགས་པ་དང་། དེ་བཞིན་དུ་གཟུགས་དང་། ཚོར་བ་ལ་སོགས་པ་གང་ཡིན་པ་དེ་དག་ཐམས་ཅད་འཇིགས་པར་རྟོགས་ཏེ། དེའི་ཕྱིར་འདི་ལ་རྒུད་པ་འབའ་ཞིག་སྲིད་པར་འགྱུར་གྱི་མངོན་པར་མཐོ་བ་ནི་མ་ཡིན་ནོ། །ཞེས་གསུངས་པས་སོ། །གཉིས་པ་ནི། འཇིག་རྟེན་གྱི་ཐ་སྙད་དུ་ངའོ་བདག་གོ །ཞེས་གང་ཟག་བདེན་པའི་ཐ་སྙད་བྱེད་པའི་དོན་ལ་རིགས་པ་རྣམ་པ་བདུན་གྱིས་བཙལ་བའི་ཚེ་མ་རྙེད་པས་ང་དང་། བདག་དང་སྐྱེས་བུ་སོགས་བརྟེན་ནས་བཏགས་པ་ཙམ་གྱིས་ཀུན་རྫོབ་ཏུ་གྲུབ་སྟེ། འཇུག་པར། དེ་ནི་དེ་ཉིད་དུའམ་འཇིག་རྟེན་དུ། །རྣམ་པ་བདུན་གྱིས་འགྲུབ་གྱུར་མིན་མོད་ཀྱི། །རྣམ་དཔྱད་མེད་པར་འཇིག་རྟེན་ཉིད་ལས་འདིར། །རང་གི་ཡན་ལག་བརྟེན་ནས་འདོགས་པ་ཡིན། །ཞེས་ཤིང་རྟ་རྣམ་པ་བདུན་གྱིས་བཙལ་ན་མ་རྙེད་ཀྱང་མ་དཔྱད་པའི་ངོར་རང་གི་ཡན་ལག་ལ་བརྟེན་པའི་ཤིང་རྟ་འདོགས་ཚུལ་དང་། བདག་ཕུང་པོ་ལ་བརྟེན་ནས་འདོགས་ཚུལ་མཚུངས་པར་གསུངས་པའི་ཕྱིར། བདག་བརྟེན་ནས་བཏགས་པ་འདིའང་དབུ་མ་པའི་ལུགས་ཀྱི་ཐུན་མོང་མ་ཡིན་པའི་ཀུན་རྫོབ་བདེན་པ་ཡིན་ཏེ། འཇུག་པར། འདི་ནི་ཕུང་པོ་རྣམ་བརྟེན་འགྲུབ་པར་འགྱུར། །ཞེས་པའི་འགྲེལ་པར། ཇི་ལྟར་འདི་ལ་བརྟེན་ནས་འདི་འབྱུང་ཞེས་བྱ་བ་འདི་ཙམ་ཞིག་ཀུན་རྫོབ་ཀྱི་བདེན་པའི་རྣམ་པར་གཞག་པ་མ་ཆད་པར་བྱ་བའི་ཕྱིར། ཁས་ལེན་གྱི་རྒྱུ་མེད་པ་ལ་སོགས་པ་དག་ལས་སྐྱེ་བ་མ་ཡིན་པ་དེ་བཞིན་དུ་འདིར་ཡང་བརྟེན་ནས་གདགས་པ་ལ་ཡང་དག་པར་བརྟེན་པ་ན་ཇི་སྐད་བཤད་པའི་སྐྱོན་དང་ལྡན་པའི་རྣམ་པ་བསལ་ནས་ཕུང་པོ་རྣམས་ལ་བརྟེན་ནས་གདགས་པ་ཞེས་བྱ་བ་འདི་ཙམ་ཞིག་འཇིག་རྟེན་གྱི་ཐ་སྙད་རྣམ་པར་གནས་པར་བྱ་བའི་ཕྱིར་ཁས་བླངས་པར་བྱ་སྟེ། བདག་དུ་ཐ་སྙད་བཏགས་པ་མཐོང་བའི་ཕྱིར་རོ། །ཞེས་གསུངས་པས་སོ། །འདིར་ཡང་རང་སྡེ་དངོས་པོར་སྨྲ་བ་དང་། དབུ་མ་པ་གཉིས་གང་ཟག་བཏགས་ཡོད་དུ་འདོད་པར་འདྲ་ཡང་། གདགས་གཞི་རྫས་ཡོད་དགོས་པ་དང་མི་དགོས་པའི་ཁྱད་པར་གྱིས་བཏགས་ཡོད་ཉིད་མི་འགྲུབ་པ་དང་། འགྲུབ་པའི་ཁྱད་པར་སྔ་མ་བཞིན་ཤེས་པར་བྱའོ། །བཞི་པ་བཀག་པའི་གོ་རིམ་བསྟན་པ་ནི་བྱང་ཆུབ་སེམས་འགྲེལ་དང་ཡེ་ཤེས་སྙིང་པོ་ཀུན་ལས་བཏུས་སོགས་ནས་ཕྱི་རོལ་པས་བཏགས་པའི་བདག་རྟག་པ་ནས་སེམས་ཙམ་པ་འདོད་པའི་གཉིས་མེད་ཀྱི་རྣམ་ཤེས་ཀྱི་བར་རིམ་པ་བཞིན་འགོག་ཚུལ་གསུངས་པ་ནི་གྲུབ་མཐའི་རིམ་པ་དང་སྦྱར་ནས་བཤད་བདེ་བའི་དབང་དུ་བྱས་པ་ཡིན་གྱི་གདུལ་བྱ་སོ་སོའི་ངོར་རིམ་པ་དེ་ལྟར་དགོས་པ་མ་ཡིན་ཏེ། མང་བཀུར་བ་མ་གཏོགས་བྱེ་བྲག་སྨྲ་བའི་ངོར་གང་ཟག་གི་བདག་འགོག་མི་དགོས་པའི་ཕྱིར་དང་། མདོ་སྡེ་པའི་ངོར་ལྡན་མིན་འདུ་བྱེད་དང་། འདུས་མ་བྱས་རྫས་གྲུབ་འགོག་མི་དགོས་པའི་ཕྱིར་དང་། སེམས་ཙམ་པའི་ངོར་གཟུགས་རྫས་ཡོད་འགོག་མི་དགོས་པའི་ཕྱིར་རོ། །འོ་ན་གྲུབ་མཐའ་ལ་མ་ཞུགས་པ་དེ་ཁོ་ན་ཉིད་བསྟན་པའི་སྣོད་དུ་རུང་བའི་རིམ་པ་ཇི་ལྟར་སྙམ་ན། འདི་ལའང་ངེས་པ་མེད་དེ། འཇུག་པ་ཉིད་ལས། དེ་ཉིད་ཉེ་བར་བསྟན་པའི་སྣོད་ནི་དེ་ཡིན་ཏེ། །དེ་ལ་དམ་པའི་དོན་གྱི་བདེན་པ་བསྟན་པར་བྱ། །ཞེས་དང་། དེ་ཉིད་དེ་ལས་འབྱུང་མིན་གཞན་དག་ལས་ལྟ་ག་ལ་ཞིག ཅེས་སོགས་གདུལ་བྱ་སྣོད་ལྡན་ལ་ཐོག་མར་ཕྱི་ནང་གི་དངོས་པོ་རྣམས་ལ་མཐའ་བཞིའི་སྐྱེ་བ་བཀག་པའི་ཆོས་ཀྱི་བདག་མེད་བསྟན་པའང་ཡོད། ཡང་། རྣམ་བདུན་གྱིས་མེད་གང་དེ་ཇི་ལྟ་བུར། །ཡོད་ཅེས་རྣལ་འབྱོར་པས་འདིའི་ཡོད་མི་རྙེད། །དེས་དེ་ཉིད་ལའང་བདེ་བླག་འཇུག་འགྱུར་བས། །འདིར་དེའི་གྲུབ་པ་དེ་བཞིན་འདོད་པར་བྱ། །ཞེས་དང་། དེའི་འགྲེལ་པར། ཉེ་བར་རྟོགས་པའི་རྣལ་འབྱོར་པ་ལ་གལ་ཏེ་ཤིང་རྟ་ཞེས་བྱ་བའི་དངོས་པོ་རང་བཞིན་གྱིས་གྲུབ་པ་འགའ་ཞིག་ཡོད་པར་འགྱུར་ན་ནི་ཐེ་ཚོམ་མེད་པར་དེ་རྣམ་པ་བདུན་ལས་རྣམ་པ་གང་ཡང་རུང་བ་ཞིག་གི་བདག་ཉིད་ཡོད་པ་རྙེད་པར་འགྱུར་བ་ཞིག་ན་རྙེད་པའང་མ་ཡིན་ནོ། །དེའི་ཕྱིར་ཤིང་རྟ་ཞེས་བྱ་བ་ནི་མ་རིག་པའི་ལིང་ཏོག་གིས་ཉམས་པར་བྱས་པ་དག་ཁོ་ན་བཏགས་པ་ཡིན་གྱིས། རང་བཞིན་གྱིས་གྲུབ་པ་ནི་ཡོད་པ་མ་ཡིན་ནོ་སྙམ་དུ་དེ་ལྟར་ངེས་པ་སྐྱེ་བར་འགྱུར་ཞིང་། དེ་ཁོ་ན་ཉིད་ལའང་རྣལ་འབྱོར་པ་བདེ་བླག་ཏུ་འཇུག་པར་འགྱུར་རོ་ཞེས་གསུངས་པ་ལྟར། ཐོག་མར་གང་ཟག་ཕུང་པོ་ལ་རྣམ་པ་བདུན་གྱིས་བཙལ་བའི་ཚེ་མ་རྙེད་པར་བྱས་ནས། དེའི་འོག་ཏུ་ཕུང་པོ་སྐྱེ་བ་མེད་པའི་དེ་ཁོ་ན་ཉིད་ལ་འཇུག་པར་གསུངས་པའང་ཡོད་པའི་ཕྱིར་རོ། །དེ་ལྟར་རིམ་པ་གཉིས་ལས། དང་པོའི་ཕྱོགས་ལ་ནི་གང་ཟག་རྣམ་པ་བདུན་གྱིས་བཙལ་བའི་རིགས་པ་དགོས་པ་མ་ཡིན་ཏེ། ཕུང་པོ་མི་བདེན་པར་རྟོགས་པའི་ཚེ་དེ་ལ་བརྟེན་ནས་བཏགས་པའི་གང་ཟག་ཀྱང་མི་བདེན་པ་ཉིད་དུ་རྟོགས་པར་འགྱུར་བའི་ཕྱིར་ཏེ། རིན་ཆེན་ཕྲེང་བར། ཕུང་པོ་དེ་ལྟར་མི་བདེན་པར། །ཤེས་ནས་ངར་འཛིན་སྤོང་བར་འགྱུར། །ངར་འཛིན་པ་དག་སྤངས་ནས་ནི། །ཕྱིས་ནི་ཕུང་པོ་འབྱུང་མི་འགྱུར། །ཞེས་གསུངས་པས་སོ། །ཕྱི་མའི་ཕྱོགས་ལ་གང་ཟག་བཏགས་ཡོད་དུ་རྟོགས་པ་ཙམ་གྱིས་དབང་པོ་རྣོན་པོའི་ཕྱོགས་ལ་རིགས་པ་དེ་ཉིད་ཀྱིས་ཕུང་པོ་མི་བདེན་པར་རྟོགས་པར་འགྱུར་ཡང་། དབང་བརྟུལ་རྣམས་ལ་ད་དུང་ཕུང་པོ་བདེན་མེད་དུ་སྒྲུབ་པའི་རིགས་པ་དགོས་པས། སྤྱོད་འཇུག་ལས་གསུངས་པ་ལྟར་སྔར་གྱི་རིགས་པ་དེ་ཉིད་སྦྱར་ནས་རྡུལ་ཕྲ་རབ་གྱི་བར་དུ་མི་རྙེད་པར་བྱ་བའམ། ཆོས་ཀྱི་བདག་མེད་བསྒྲུབ་པའི་སྐབས་ནས་བཤད་པ་ལྟར་རྡོ་རྗེ་གཟེགས་མ་ལ་སོགས་པའི་རིགས་པས་བདེན་མེད་དུ་བསྒྲུབ་པ་གང་ཡང་རུང་བ་ངེས་པར་དགོས་ཏེ། གཞན་དུ་ན་གཟུགས་ལ་དམིགས་ནས་འཇུག་ཕྱིར་འདོད་ཆགས་སོགས་ཞེས་གསུངས་པ་ལྟར་ཕུང་པོ་ལ་བདེན་འཛིན་ཡོད་ན་གང་ཟག་གི་བདག་འཛིན་སླར་ཡང་སྐྱེ་བའི་ཕྱིར་རོ། །མདོར་ན། གྲུབ་མཐའ་ལ་ཞུགས་པ་རྣམས་ལ་ནི། གྲུབ་མཐའ་འོག་མའི་ཀུན་བརྟགས་གྲུབ་མཐའ་དེ་ཉིད་ཀྱིས་བཀག་ཟིན་པས་དེ་ཉིད་ཀྱི་ཀུན་བརྟགས་དགག་པ་ནས་བརྩམས་དགོས་ལ་གྲུབ་མཐའ་ལ་མ་ཞུགས་པ་རྣམས་ལ་ནི་རྡོ་རྗེ་གཟེགས་མ་དང་། རྣམ་པ་བདུན་གྱིས་བཙལ་བའི་རིགས་པ་གཉིས། ཐོག་མར་གང་བསྟན་ཀྱང་འདྲ་བ་ནི་གནད་ཀྱི་དོན་དུ་ཤེས་པར་བྱའོ། །ལྔ་པ་རིགས་པ་ཕན་ཚུན་མཚོན་པའི་ཚུལ་ནི། དེ་ལྟར་བདག་གཉིས་འགོག་པའི་རིགས་པ་གཉིས། ཆོས་དང་གང་ཟག་གི་བདག་འགོག་པ་ལ་ངེས་པར་སོ་སོར་སྦྱར་དགོས་སམ་སྙམ་ན་སྡུག་བསྔལ་བདག་གིས་བྱས་པ་དང་། གཞན་གྱིས་བྱས་དང་གཉིས་ཀས་བྱས། །རྒྱུ་མེད་པར་ནི་རྟོག་གེ་འདོད། །ཅེས་དང་། ཕྱི་རོལ་པས་བདག་ཕུང་གཞན་དང་། མང་བཀུར་བ་ཁ་གཅིག་བདག་ཕུང་གཅིག་ཏུ་འདོད་པར་གསུངས་པ་ལྟར་རང་གཞན་གྱི་སྡེ་པ་རྣམས་མཐའ་བཞིའི་སྐྱེ་བ་ཆོས་ཀྱི་སྟེང་དུ་འདོད་པ་དང་། རྣམ་པ་ལྔའམ་བདུན་གྱིས་གྲུབ་ཚུལ་གང་ཟག་གི་སྟེང་དུ་འདོད་པ་གཙོ་ཆེ་བས་གཞུང་རྣམས་ལས་སོ་སོར་བཤད་པ་ཙམ་ཡིན་གྱི་གཉིས་ཀས་ཀྱང་གཉིས་ཀ་དགག་ནུས་ཏེ། འཇིག་རྟེན་སྐྱེ་བ་ན་གང་ཟག་ཉག་ཅིག་སྐྱེའོ་ཞེས་པ་ལ་བརྟེན་ནས་གང་ཟག་ལ་བདེན་སྐྱེ་འདོད་པ་འགོག་པ་ན། རྡོ་རྗེ་གཟེགས་མའི་རིགས་པ་སོགས་ཀྱིས་འགོག་དགོས་ཤིང་། བུམ་སྣམ་སོགས་ཀྱི་ཡན་ལག་ལ་བརྟེན་ནས་ཡན་ལག་ཅན་དུ་བདེན་པར་འཛིན་པ་འགོག་པ་ན་རྣམ་པ་བདུན་གྱིས་བཙལ་བའི་རིགས་པས་དགག་དགོས་པའི་ཕྱིར་ཏེ། གང་ཟག་གི་བདག་བཀག་པའི་རིགས་པ་བུམ་སྣམ་སོགས་ལའང་སྦྱར་བར་བྱང་ཆུབ་སེམས་འགྲེལ་དུ་གསུངས་པ་ལ་བརྟེན་ནས། འཇུག་པར། བུམ་པ་སྣམ་བུ་རེ་ལྡེ་དམག་དང་ནགས་ཚལ་ཕྲེང་བ་ལྗོན་ཤིང་དང་། །ཁང་ཁྱིམ་ཤིང་རྟ་ཕྲན་དང་མགྲོན་གནས་ལ་སོགས་དངོས་རྣམས་གང་དག་དང་། །ཞེས་སོགས་དངོས་པོ་ཀུན་ལ་སྦྱར་བར་གསུངས་པའི་ཕྱིར་རོ། །མདོར་ན། ཐ་སྙད་བདེན་པར་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་པ་སྟེ། །ཞེས་པ་ལྟར་ཆོས་དང་གང་ཟག་ཐ་སྙད་བདེན་པས་བསྡུས་པ་འདི་རྣམས་ལ་ཇི་སྐད་བཤད་པའི་རིགས་པ་གཉིས་ཀྱིས་བཙལ་བ་ན་བདེན་པའི་དངོས་པོ་གང་ཡང་མ་རྙེད་པ་འདི་ནི་ཆོས་ཀྱི་བདག་མེད་རགས་པར་རྟོགས་པ་ཞེས་བྱ་བར་འཇོག་སྟེ། སྤྲོས་པའི་མཐའ་བཞིའི་ནང་ནས་ཐོག་མར་བདེན་པ་བཀག་པའི་རིགས་པ་ཡིན་པའི་ཕྱིར་རོ། །དེའི་འོག་ཏུ་བདེན་པར་མེད་པ་དང་། གཉིས་ཀ་དང་གཉིས་ཀ་མ་ཡིན་པ་སྟེ། སྤྲོས་པའི་མཐའ་ཕྱི་མ་རྣམས་འགོག་པའི་རིགས་པས་སྤྲོས་པའི་མཐའ་གང་ཡང་མ་རྙེད་པ་ནི་ཆོས་ཀྱི་བདག་མེད་ཕྲ་བར་རྟོགས་པ་ཞེས་བྱ་བར་འཇོག་སྟེ། མགོན་པོ་བྱམས་པས། བདེན་པ་བཀག་ནས་བཏགས་ཡོད་ཀྱི་དངོས་པོ་ལ་མངོན་པར་ཞེན་པ་ལ་ཆགས་པ་ཕྲ་མོར་གསུངས་པ་ལས་ཤེས་སོ། །བདེན་པ་ཙམ་དུ་མངོན་པར་ཞེན་པ་ཉན་རང་གི་དགག་བྱ་མ་ཡིན་ཡང་ཐེག་པ་ཆེན་པོར་ནི། སློབ་དཔོན་ཟླ་བས་ཆོས་ཀྱི་བདག་མེད་གསལ་བ་དང་། རྒྱས་པ་དང་། ཚང་བར་རྟོགས་དགོས་པར་གསུངས་པ་ནི་སྤྲོས་པའི་མཐའ་ཕྱི་མ་མཐའ་དག་བཀག་པ་ལ་དགོངས་ཏེ། གཞན་དུ་ན་ཉན་རང་གིས་རྟོགས་པའི་ཆོས་ཀྱི་བདག་མེད་དང་། ཐེག་པ་ཆེན་པོས་རྟོགས་པའི་ཆོས་ཀྱི་བདག་མེད་ལ་གསལ་མི་གསལ་དང་། ཚང་མ་ཚང་གི་ཁྱད་པར་མེད་པར་ཐལ་བའི་ཕྱིར་རོ། །དེའང་འདོད་ན། དེ་ནི་རིང་དུ་སོང་བར་བློ་ཡང་ལྷག་པར་འགྱུར། །ཞེས་པའི་འགྲེལ་པའི་ཐད་དུ་ཆོས་ཀྱི་བདག་མེད་གསལ་བ་དང་རྒྱས་པ་དང་། ཚང་བར་རྟོགས་པའི་སྒོ་ནས་ཐེག་པ་ཆེན་པོ་ཁྱད་པར་དུ་འཕགས་པར་གསུངས་པ་དང་། བདག་མེད་འདི་ནི་འགྲོ་བ་རྣམས་དགྲོལ་ཕྱིར། །ཞེས་པའི་འགྲེལ་པར། ཉན་རང་ལ་ཁམས་གསུམ་གྱི་ཉོན་མོངས་པ་སྤོང་བའི་ཐབས་ཙམ་གྱི་ཆོས་ཀྱི་བདག་མེད་རྟོགས་པ་ཡོད་ཀྱི་ཆོས་ཀྱི་བདག་མེད་མཐའ་དག་རྟོགས་པ་མེད་ཅིང་། བྱང་ཆུབ་སེམས་དཔའ་ལ་ཆོས་ཀྱི་བདག་མེད་མཐའ་དག་རྟོགས་པ་ཡོད་པར་གསུངས་པ་དང་འགལ་ལོ། །དེ་ནས་ཉན་རང་གི་བྱང་ཆུབ་འདོད་པས་གང་ཟག་གི་བདག་མེད་ཚང་བར་རྟོགས་དགོས་ཤིང་། དེ་ལ་གང་ཟག་ཏུ་གདགས་པའི་རྒྱུ་ཕུང་པོ་བདེན་མེད་དུ་རྟོགས་དགོས་པས། དེ་ལྟ་བུའི་བདག་མེད་གཉིས་ཀ་རྟོགས་པའི་མཉམ་གཞག་གི་ལྟ་བ་དང་། དེས་དྲངས་པའི་རྗེས་ཐོབ་ཀྱི་ཆོས་དང་གང་ཟག་བཏགས་ཡོད་ཙམ་དུ་ཤེས་པའི་སྒོ་ནས་རང་རང་གི་ཚོགས་ལ་འབད་པ་དང་བྱང་ཆུབ་སེམས་དཔས་ནི་བློས་འདིའོ་སྙམ་དུ་མངོན་པར་ཞེན་པའི་ཡུལ་དུ་གྱུར་པའི་སྤྲོས་པ་མ་ལུས་པ་བཀག་པའི་མཉམ་གཞག་གི་ལྟ་བ་དང་། དེས་དྲངས་པའི་རྗེས་ཐོབ་ཀྱི་ཆོས་ཅན་ཇི་སྙེད་པའི་དངོས་པོ་ཐམས་ཅད་བཏགས་ཡོད་དུ་ཤེས་པའི་སྒོ་ནས་བསྐལ་པ་གྲངས་མེད་གསུམ་དུ་ཚོགས་གཉིས་ལ་འབད་དགོས་པས་ན་ཐེག་པ་གསུམ་ཆར་གྱི་བྱང་ཆུབ་འདོད་པས་ངེས་པའི་དོན་གྱི་བཀའ་དང་བསྟན་བཅོས་ནས་གསུངས་པའི་དབུ་མའི་ལྟ་བ་འདི་ཉིད་བློ་ཡུལ་དུ་ངེས་པར་བྱ་དགོས་པ་ནི་གནད་ཀྱི་གདམས་པའོ། །གཞི་དབུ་མ་བདེན་གཉིས་ཟུང་འཇུག་ལེགས་པར་བཤད་ཟིན་ཏོ།། ༈ །།དེ་ལྟར་ཆོས་རྣམས་ཀྱི་རང་བཞིན་སྤྲོས་པའི་མཐའ་ཐམས་ཅད་དང་བྲལ་བའི་རང་བཞིན་གྱི་མྱ་ངན་ལས་འདས་པ་ཐོས་བསམ་གྱི་གཏན་ལ་ཕབ་ནས་ངེས་པའི་ཤེས་པ་སྐྱེས་ཀྱང་བསྒོམས་པས་ཉམས་སུ་མ་བླངས་ན་དེ་མངོན་དུ་མི་འགྱུར་བས་དེ་མངོན་དུ་འགྱུར་བའི་ཐབས་ལམ་དབུ་མ་བཤད་པར་བྱའོ། །འདི་ལ་གསུམ་སྟེ། གཞན་གྱིས་བརྟགས་པའི་ལམ་དགག་པ་རང་གི་ལམ་ངོས་གཟུང་བ། དེའི་ཉམས་ལེན་ཞིབ་ཏུ་བཤད་པའོ། །དང་པོ་ལ་གསུམ་སྟེ། ལམ་ལོག་པ་དགག་པ། ལམ་ཐ་དད་པ་དགག་པ། ལམ་མ་ཚང་བ་དགག་པའོ། །དང་པོ་ནི། འདིར་ལམ་ཞེས་བྱ་བ་འཁོར་བའི་རྒྱུ་འཁྲུལ་པ་མཐའ་དག་སྤངས་ནས་མྱ་ངན་ལས་འདས་པའི་སར་བགྲོད་པར་བྱེད་པ་ཞིག་ལ་འཇོག་པས་ཕྱི་རོལ་པས་ཀུན་ཏུ་བརྟགས་པའི་དེ་ཉིད་ཉི་ཤུ་རྩ་ལྔ་ཤེས་པ་དང་། འཇུག་ངོགས་ཀྱི་ཁྲུས་དང་། དབང་ཕྱུག་གི་དབང་བསྐུར་དང་། ཁྱི་དང་བ་ལང་གི་བརྟུལ་ཞུགས་དང་། མེ་ལྔ་བསྟེན་པ་དང་། གཅེར་བུར་གནས་པ་ལ་སོགས་པའི་དཀའ་ཐུབ་དང་། དབང་སོགས་སྡུག་བསྔལ་དུ་བསྒོམ་པ་ལ་སོགས་པ་ཐམས་ཅད་ནི་ཐར་བའི་ལམ་ཉིད་མ་ཡིན་ཏེ། འཁོར་བའི་རྒྱུ་དང་མི་འགལ་བའི་ཕྱིར་དང་། ལོག་ལྟས་ཀུན་ནས་བསླངས་པའི་ཕྱིར་བདག་ཏུ་ལྟ་བ་བཞིན། ལུང་ལས་ཀྱང་། ལོག་ལྟས་མྱ་ངན་མི་འདའ་བར། །དེ་བཞིན་གཤེགས་པ་རྣམས་ཀྱིས་གསུངས། །ཞེས་སོ། །གཉིས་པ་ནི། རང་གི་སྡེ་པ་དངོས་པོར་སྨྲ་བ་དག་རང་རང་གི་བློས་རྣམ་པར་བརྟགས་པའི་གྲུབ་པའི་མཐའ་དེ་ཉིད་ལ་བྱང་ཆུབ་གསུམ་འཐོབ་པར་བྱེད་པའི་ལམ་ཡོངས་སུ་རྫོགས་པ་གནས་པར་འདོད་དོ། །འདི་ཡང་ཆོས་ཉིད་རང་གི་ངོ་བོ་ལས་མི་གཡོ་བར་ཐ་དད་པར་ཐམས་ཅད་ལ་སྣང་བའི་མདོ་ལས་གསུངས་པ་ལྟར། དབུ་མའི་ལྟ་བ་ལ་བློ་སྦྱོང་བའི་ཐབས་སུ་འདོད་ན་ཐམས་ཅད་ཀྱང་ལམ་དུ་འགལ་བ་མེད་དེ་རྫོགས་པའི་སངས་རྒྱས་ཀྱིས་གདུལ་བྱའི་བློ་དང་འཚམ་པར་བསྟན་པའི་ཕྱིར་རོ། །ངེས་པའི་དོན་དུ་འདོད་ན་ནི་མི་འཐད་དེ་ཉེར་ལེན་གྱི་ཕུང་པོ་བདེན་པའི་སྐྱེ་མེད་དུ་གཏན་ལ་ཕབ་པའི་དོན་སྒོམ་པ་མེད་པས་གང་ཟག་གི་བདག་མེད་རྟོགས་པར་མི་འགྱུར་ལ། དེ་མ་རྟོགས་པར་འཁོར་བའི་རྩ་བ་སྤོང་མི་ནུས་པའི་ཕྱིར་རོ། །ཉན་ཐོས་སྡེ་གཉིས་ཀྱི་གྲུབ་པའི་མཐའ་ལས་ནི་སྡེ་པ་རང་གི་ལུགས་ཀྱི་ཐེག་ཆེན་སེམས་བསྐྱེད་སོགས་བཤད་ཀྱང་རྫོགས་པའི་སངས་རྒྱས་སྒྲུབ་ནུས་ཀྱི་བྱང་ཆུབ་སེམས་དཔའི་སེམས་བསྐྱེད་དང་། སྦྱིན་སོགས་ཕ་རོལ་ཏུ་ཕྱིན་པའི་སྤྱོད་པ་དང་ཡོངས་སུ་བསྔོ་བ་ཁྱད་པར་ཅན་མ་བཤད་པས་སྤྱོད་པའི་སྒོ་ནས་ཀྱང་རྫོགས་པའི་སངས་རྒྱས་སྒྲུབ་པར་མི་ནུས་ཏེ། ཀླུ་སྒྲུབ་ཀྱིས། ཉན་ཐོས་ཐེག་པ་དེ་ལས་ནི། །བྱང་ཆུབ་སེམས་དཔའི་སེམས་བསྐྱེད་དང་། །སྤྱོད་པ་ཡོངས་བསྔོ་མ་བཤད་དེ། །ཐེག་པ་ཆེན་པོ་ག་ལ་འགྱུར། །ཞེས་གསུངས་པ་ལྟར་རོ། །སེམས་ཙམ་པའི་གཞུང་ལས་བཤད་པའི་བྱང་ཆུབ་སེམས་དཔའི་སྤྱོད་པ་དང་། དབུ་མའི་ལྟ་བ་སྦྱར་ནས་ཉམས་སུ་བླངས་ན་རྫོགས་པའི་སངས་རྒྱས་སྒྲུབ་ནུས་པར་དམ་པ་དག་བཞེད་དེ། ས་པཎ་གྱི་ཞལ་ནས། ཕལ་ཆེར་ལྟ་བ་དབུ་མའི་ཚུལ། །འཕགས་པ་ཀླུ་སྒྲུབ་ལུགས་རྗེས་འབྲང་། །སྤྱོད་པ་སེམས་ཙམ་སྨྲ་བའི་གཞུང་། །ཐོགས་མེད་བཞེད་པའི་སེམས་བསྐྱེད་མཛད། །འདི་ནི་ལྟ་སྤྱོད་མ་འཁྲུལ་ཅིང་། །ཕན་ཚུན་ཐུན་ཚགས་མ་ཡིན་པ། །ཇི་སྐད་བཤད་བཞིན་ཉམས་ལེན་པ། །རྫོགས་པའི་སངས་རྒྱས་བསྟན་པ་ཡིན། །ཞེས་གསུངས་སོ། །འདིས་ཀྱང་དབུ་མའི་ལྟ་བ་མེད་ན་བྱང་ཆུབ་གསུམ་པོ་སྒྲུབ་མི་ནུས་པ་ནི་སྔར་བཤད་པ་ལྟར་རོ། །གསུམ་པ་ནི། གངས་རིའི་ཁྲོད་འདིར་ཐེག་པ་ཆེན་པོར་རློམ་པ་དག དཀར་པོ་ཆིག་ཐུབ་ཅེས་བྱ་བ་སྟོང་ཉིད་ཁོ་ནར་བསྒོམས་པས་ཐམས་ཅད་མཁྱེན་པ་སྒྲུབ་པར་འདོད་པ་ལ་ནི་མཁས་པ་ཀ་མ་ལ་ཤཱི་ལ་དང་། དཔལ་ལྡན་ས་སྐྱ་པཎྜི་ཏ་ལ་སོགས་པ་དོན་མ་འཁྲུལ་བར་གཟིགས་པ་རྣམས་ཀྱིས་ཐབས་ཀྱི་ཆ་མ་ཚང་བས་རྫོགས་པའི་སངས་རྒྱས་སྒྲུབ་པར་མི་ནུས་སོ། །ཞེས་ལུང་དང་རིགས་པ་དུ་མའི་སྒོ་ནས་སུན་ཕྱུང་ཟིན་པས་འདིར་འབད་པ་མ་བྱས་སོ། །གཞན་ཡང་ཆོས་དབྱིངས་བདེན་གྲུབ་ཏུ་ལྟ་བ་སེམས་ཙམ་པ་དང་ཚུལ་མཚུངས་པ་དང་། སྟོང་ཉིད་མེད་དགག་ལ་མངོན་པར་ཞེན་པ་ལྟ་བའི་གཙོ་བོར་འདོད་པ་དང་། རྗེས་མ།>>>
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།