ཡང་དག་པར་རྫོགས་པའི་སངས་རྒྱས་གཟི་བརྗིད་ཀྱི་རྒྱལ་པོའི་བརྟག་པའི་རྣམ་པར་བཤད་པ་གཞན་ཕན་ཀུན་ཁྱབ། ཁ༽

།དེ་ལ་རྒྱས་པའི་ཐབ་ཀྱི་ཁྱད་པར་ནི། ཁྲུ་དོ་པ་ནས་བརྒྱད་པའི་བར་སེར་པོ། དབུས་རིན་པོ་ཆེས་མཚན་པ་གྲུ་བཞི་པའོ། །བུད་ཤིང་དང་མཆོད་རྫས་ཐམས་ཅད་སེར་པོའོ། །ཡམ་ཤིང་ནི་མཛུབ་གང་པ་ནས་ཁྲུ་བཞི་པའི་བར་རོ། །བསྲེག་རྫས་ནི་འབྲུ་སྣ་ཚོགས་པ་དང་། །མེ་ཏོག་སེར་པོ་སྣ་ཚོགས་པ་དང་། མར་དང་། སྦྲང་རྩི་དང་དཔལ་འབྲས་རྣམས་སོ། །སྒྲུབ་པ་པོའི་གོས་དང་རྒྱན་སེར་པོ་དང་། ཉི་མའི་གུང་ལ་ཁ་བྱང་དུ་ལྟས་ལ་རྒྱས་པའི་བསམ་པས་བྱའོ། །སྤྱན་དྲང་ཞིང་མཆོད་བསྟོད་ནི་འཇིག་རྟེན་པ་དང་། འདས་པ་ཐམས་ཅད་སེར་པོ་རིན་པོ་ཆེའི་རྒྱན་ཅན་ཡིན་ལ། ཁྱད་པར་དུ་མཇུག་ཏུ་རྣམ་ཐོས་སྲས་ལ་སོགས་པ་གནོད་སྦྱིན་རྣམས་ལ་མང་དུ་མཆོད་ལ་བདག་གཞན་གྱི་བསམ་པ་ཐམས་ཅད་ཚིམ་ཞིང་རྒྱས་པར་བྱས་པར་བསམ་མོ། །དགོས་པ་ནི། དེ་ནི་བདེ་འགྲོར་སྐྱེས་ནས་ཀྱང་། །མཁས་པས་རྒྱས་པར་བྱ་དགོས་ཏེ། །ཞེས་པ་དང་། ལུས་ཅན་དེ་ཡི་ཚེ་དང་དཔལ། །གཟི་བརྗིད་བདེ་བའི་ལོངས་སྤྱོད་འཕེལ། །ཞེས་བཤད་དོ། །སྔགས་ཀྱི་སྤེལ་ཚིག་མ་གཏོགས་པ་ལྷག་མ་རྣམས་ནི་སྔ་མ་བཞིན་ནོ། །རྒྱས་པའི་སྦྱིན་སྲེག་གོ །དབང་ནི། དེ་ནས་ཕན་ཕྱིར་ངེས་པར་ཡང་། །དབང་དུ་བྱ་བའི་ལས་བྱ་སྟེ། །ཞེས་བྱ་བ་ལ་སོགས་པའི་དོན་ནི། ཐབ་ཀྱི་ཁྱད་པར་ནི་ཁྲུ་གང་པ་ནས་བཞི་པའི་བར་ཅི་རིགས་པར་དམར་པོ་གཞུའི་དབྱིབས་ལྟ་བུ་དབུས་སུ་པདྨ་བྲིས་པའོ། །འདི་ལ་ཁོར་ཡུག་ལ་ཁྱད་པར་དུ་མདའ་གཞུའོ། །བུད་ཤིང་དང་མཆོད་རྫས་ཐམས་ཅད་ནི་དམར་པོའོ། །བུད་ཤིང་ནི་ཞི་བ་དང་ཚད་མཉམ་པ་ལས་རྒྱུ་དམར་པོའམ། ཙག་ལ་སོགས་པས་དམར་པོར་བཀུས་པའོ། །བསྲེག་རྫས་ནི་པདྨ་ལ་སོགས་པ་མེ་ཏོག་དང་འབྲས་བུ་དམར་པོ་ཉིད་དོ། །དམར་པོ་མ་ཡིན་པ་རྣམས་ཀྱང་དམར་པོར་བཀུས་པ་དང་། མར་དང་། གུར་གུམ་དང་། ཙན་དན་དམར་པོ་དང་། ཡུངས་དམར་དང་། ཙག མཚལ། ཟངས་ཕྱེ། ཀེ་ཚེ། ལན་ཚ། ཏིལ། ཞིམ་ཚེ། ལ་ཕུག ཁྲག་རྔུལ་ཆེན་པོ་རྣམས་ཡིན་ནོ། །སྒྲུབ་པ་པོའི་གོས་དང་རྒྱན་དམར་པོ་དང་། ཆགས་པའི་ཡིད་ཀྱིས་ཕྱི་དྲོ་ཁ་ནུབ་ཏུ་བལྟས་པར་བྱའོ། །འཇིག་རྟེན་དང་དེ་ལས་འདས་པའི་ལྷ་རྣམས་དམར་པོར་སྤྱན་དྲངས་ཤིང་མཆོད་པ་ནི། སྦྱིན་སྲེག་བྱས་ནས་ལྷ་ལ་སོགས། །ཐམས་ཅད་དེ་ཡི་དབང་དུ་འགྱུར། །ཞེས་སོ། །སྔགས་རྣམས་ཀྱི་སྤེལ་ཚིག་མ་གཏོགས་ལྷག་མ་རྣམས་ནི་སྔ་མ་བཞིན་ནོ། །དབང་གི་སྦྱིན་སྲེག་གོ །དྲག་པོ་ནི། དེ་ལ་གདོན་རྣམས་རྣམ་གཞོམ་ཕྱིར། །མངོན་སྤྱོད་ཀྱང་ནི་བརྩམས་བྱ་སྟེ། །ཞེས་བྱ་བ་ལ་སོགས་པའི་དོན་ནི། ཐབ་ཀྱི་ཁྱད་པར་ནི་ཁྲུ་ཕྱེད་དང་གསུམ་པ་ནས་དགུ་པའི་བར་ནག་པོ་གྲུ་གསུམ་པ། དབུས་སུ་རྡོ་རྗེ་རྩེ་དགུ་པ་དང་། རྩེ་གསུམ་པ་དང་། རྡོ་རྗེ་རྒྱ་གྲམ་དང་། རྡོ་རྗེ་དབྱུག་པ་དང་། རྡོ་རྗེ་རྩེ་གསུམ་པའི་དབྱུག་པ་དང་ལྔས་བརྒྱན་ལ་དགྲ་སཏྭས་མཐའ་བསྐོར་བའོ། །མཆོད་རྫས་རྣམས་ཀྱང་ནག་པོ་སྟེ་ཤ་དང་ཁྲག་གི་གང་བའི་ཐོད་པའོ། །བསྲེག་རྫས་ནི་ཁྲག་དང་། དུག་དང་། ཡུངས་ཀར་དང་། སྒྲུབ་པ་པོའི་གོས་དང་རྒྱན་ནག་པོ་དང་། བགེགས་ཚར་གཅད་པའི་ཡིད་ཀྱིས་སྲོད་དམ་ནམ་གྱི་གུང་ལ་ཁ་ལྷོར་བལྟས་ལ་བྱའོ། །འཇིག་རྟེན་དང་འཇིག་རྟེན་ལས་འདས་པའི་ལྷ་རྣམས་ནག་པོའི་རྣམ་པས་སྤྱན་དྲངས་ལ་མཆོད་པར་བྱའོ། །དགོས་པ་ནི། དེ་ནས་དེ་ཡི་སྡིག་འཇོམས་ལུས། །བགེགས་དང་བྲལ་ཏེ་ཅི་བདེ་བར། །མཐོ་རིས་འཇིག་རྟེན་མི་ཡི་ནང་། །ཁམས་གསུམ་ན་ནི་ཅི་བདེར་སྤྱོད། །ཅེས་བཤད་དོ། །སྔགས་རྣམས་ཀྱི་སྤེལ་ཚིག་མ་གཏོགས་པ་ལྷག་མ་རྣམས་ནི་སྔ་མ་བཞིན་ཉམས་སུ་བླང་བར་བྱའོ། །དྲག་པོའི་སྦྱིན་སྲེག་གོ །དེ་ལྟ་བུའི་སྦྱིན་སྲེག་རྣམས་ཚེ་དང་ལྡན་པ་རྣམས་ཀྱི་དོན་དུའང་བྱ་སྟེ། ཚེ་དཔག་མེད་ཉིད་ལས། གོ་རིམ་འདི་དག་ཉིད་ཀྱིས་ནི། །ཚེ་ལྡན་རྣམས་ལའང་བྱ་བ་སྟེ། །དེ་ནས་གང་གི་ཕྱིར་བྱས་ལ། །དེ་ཡི་ཕྱིར་ཡང་དེ་བཞིན་འགྱུར། །གཞན་དག་ཀྱང་ནི་ལས་རྣམས་ཀྱང་། །སྔ་མ་ཇི་བཞིན་དེ་ལྟར་བྱ། །དེ་ནས་སེམས་ཅན་ཐམས་ཅད་ལའང་། །མྱུར་དུ་བདེ་སྐྱིད་འཐོབ་པར་འགྱུར། །ཞེས་བཤད་པས་སོ། །སྦྱིན་སྲེག་གི་སྤྱིའི་དོན་འདི་དག་ནི་འོག་ཚེ་དཔག་མེད་དང་། འཁོར་ལོས་སྒྱུར་བའི་སྐབས་སུའང་སྦྱར་བར་བྱའོ། །གཞུང་གི་དོན་ནི་གོ་སླའོ། །བདུན་པ་རོ་བསྲེགས་ཏེ་སྡིག་པ་སྦྱོང་བ་ལ་བརྒྱད་དེ། ཐབ་ཁུང་གི་དཀྱིལ་འཁོར་བྲི་བ་དང་། མཆོད་པའི་རྫས་དགོད་པ་དང་། ཡེ་ཤེས་ཀྱི་དཀྱིལ་འཁོར་སྤྱན་དྲངས་ཏེ་མཆོད་པ་དང་། རང་ལྷའི་རྣལ་འབྱོར་དང་ལྡན་པས་བསྲེག་རྫས་བྱིན་གྱིས་བརླབ་པ་དང་། རོ་བྱིན་གྱིས་བརླབས་ཏེ་ཆས་སུ་གཞུག་པ་དང་། སྦྱིན་སྲེག་བྱ་བའི་རིམ་པ་དངོས་དང་། མཆོད་རྟེན་གདབ་པ་དང་། རྟགས་དང་ཕན་ཡོན་འབྱུང་བར་བསྟན་པའོ། །དང་པོ་ནི། གྲུ་བཞི་པ་ཡི་ཚད་དུ་ནི། །ཞེས་སོགས་ཏེ། ཕྱི་དྲོའི་དུས་སུ་མཐོང་བ་བརྒྱུད་པ་བཞིན་ཐིག་གདབ། རོ་ནར་མོར་བསྲེག་ན་ཁྲུ་བཞི་པ་ཙོག་པུར་བསྲེག་ན་ཁྲུ་གང་པ་ལ་ཤོང་བས་ཁྲུ་ཕྱེད་མར་བྲུས་པའམ། མ་བྲུས་ཀྱང་རུང་སྟེ། ཁྲུ་གང་པ་ཟླུམ་པོ་དཔངས་ཅི་རིགས་བརྩིགས་པ་དེའི་ཁ་ལ་རྡོ་རྗེ་ཕྲེང་བ་བྲི་བར་བྱ། ནང་དུ་འཁོར་ལོ་རྩིབས་བརྒྱད་པའི་ལྟེ་བ་ལ་རྡོ་རྗེ། ཕྱོགས་བཞིར་འཁོར་ལོ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་དང་། མཚམས་སུ་ལྷ་མོ་བཞིའི་མཚན་མ་བྲི་བར་བྱའོ། །དེའི་ཕྱི་རོལ་དུ་རྒྱ་དང་དཔངས་སོར་བཞི་པ་གཞི་དཀར་པོ་ལ་སྣ་ཚོགས་རྡོ་རྗེ་ལྗང་ཁུ། དེའི་ཕྱི་རོལ་དུ་རྒྱ་དང་དཔངས་སོར་གཉིས་པ་ལྗང་ཁུ་ལ་རིན་པོ་ཆེ་སེར་པོ། དེའི་ཕྱི་རོལ་ཏུ་རྒྱ་དང་དཔངས་སོར་གཅིག་པ་སེར་པོ་ལ་པདྨ་དམར་པོ་བྲི། ཡང་ན་དཔངས་སུ་མ་བྱས་པར་གཞི་མཉམ་པོར་བྲིའོ། །དེའི་ཕྱི་རོལ་ཏུ་ལྷ་སྣམ་ལ་སེམས་དཔའ་བཅུ་དྲུག་དང་། ཉན་ཐོས་དང་། རང་རྒྱལ་དང་། ཁྲོ་བོ་རྣམས་བྲི། སྒོ་བྱེད་ན་སྒོ་བ་རྣམས་བྲིས་བར་བྱའོ། །དེའི་ཕྱི་རོལ་ཏུ་ཁོར་ཡུག་ལ་འཇིག་རྟེན་པ། ལྷ་ཆེན་པོ་བརྒྱད། ཀླུ་ཆེན་པོ་བརྒྱད། གཟའ་ཆེན་པོ་བརྒྱད་རྒྱུ་སྐར་དང་བཅས་པ། འཇིགས་བྱེད་དགུ། ཕྱོགས་སྐྱོང་བཅུ་དང་། རྒྱལ་པོ་ཆེན་པོ་བཞི་རྣམས་མིང་ངམ། བརྡའམ། ཐིག་ལེར་བྲི་བར་བྱའོ། །གཉིས་པ་ནི། བྱ་དང་བུམ་པ་གང་བ་དང་། །ཞེས་སོགས་ཏེ་བྱ་ནི་མཆོད་པའི་བུམ་པ་དང་། བུམ་པ་གང་བ་ནི་ཁྲུས་ཀྱི་བུམ་པའོ། །གཏོར་མས་སྣོད་རྣམས་བཀང་བ་ནི། གཏོར་མ་གསུམ། གཞི་བདག་ལ་གཅིག རིགས་དྲུག་ལ་གཅིག ཡི་དྭགས་ལ་གཅིག་སྟེ་དྲུག་ནི་ཅིས་ཀྱང་བཤམ་མོ། །ལྷག་མ་རྣམས་ནི་གོ་སླའོ། །གསུམ་པ་ནི། ལྷ་རྣམས་མང་པོ་སྤྱན་དྲངས་ལ། །ཞེས་སོགས་ཏེ། འོག་སྦྱིན་སྲེག་བྱ་བའི་རིམ་པ་དང་དངོས་ཀྱི་སྐབས་སུ་ཕྱོགས་གཅིག་ཏུ་བཤད་པར་བྱའོ། །བཞི་པ་ནི། ལྷ་ཡི་སྦྱོར་བ་རབ་གནས་ལ། །ཞེས་སོགས་ཏེ། གོང་དུ་སྨོས་པའི་བསྲེག་རྫས་རྣམས་ཅི་འབྱོར་པར་སྟ་གོན་བྱས་ལ་བུད་ཤིང་ལ་རྩ་བའི་རིག་པ་བཟླས་ཤིང་། དྲི་ཞིམ་པོ་གཏོར་ལ་ཁུང་བུར་ལེགས་པར་བརྩིགས་སྒྱེད་བུ་གཟུགས་སོ། །དེ་ནས་རོའི་དྲུང་དུ་ཅི་འབྱོར་པའི་མཆོད་པ་བཤམས་ལ་བདག་གི་རྣལ་འབྱོར་དཔའ་བོ་གཅིག་པ་བཟླས་པ་དང་བཅས་པ་བྱས་ནས་རོའི་བྱ་བ་ལ་འཇུག་པར་བྱའོ། །དེ་དག་གིས་ནི་བསྲེག་རྫས་བཤམ་པ་དང་། བུད་ཤིང་བརྩིག་པ་དང་། བདག་གི་རྣལ་འབྱོར་རྣམས་བསྟན་ཏོ། །ལྔ་པ་ནི། རོ་ལ་སྔགས་ཀྱིས་བཏབ་ནས་ཀྱང་། །ཞེས་སོགས་ཏེ། བདག་གི་རྣལ་འབྱོར་རྫོགས་པ་དང་། ཆང་བུས་བགེགས་ཞི་བས་སྦྱང་ངོ་། །བགེགས་དྲག་པོས་ཉེ་བར་ཞི་བར་བྱ་བའི་དོན་དུ་ཁམས་གསུམ་རྣམ་རྒྱལ་གྱི་སྔགས་ལན་ཅི་རིགས་པ་བཟླས་པས་བགེགས་སྦྱང་བའོ། །བུམ་པ་ལ་རྩ་བའི་རིག་པ་བཟླས་པའི་ཆུས་བཀྲུ་བར་བྱའོ། །རྩ་རིག་བཟླས་པའི་དྲིས་ཉེ་བར་བྱུག་པར་བྱའོ། །རྩ་རིག་བཟླས་ཏེ་སྟོད་གཡོགས་དང་། སྨད་གཡོགས་དང་། ཅི་རིགས་པའི་རྒྱན་གྱིས་བཀླུབས་ཏེ་མཛེས་པར་བྱའོ། །གུ་གུལ་ལ་སོགས་པའི་བདུག་པས་བདུག་ཅིང་ཁྲོ་བོ་གང་ཡིན་པའི་སྔགས་བཟླ་བར་བྱས་ནས། རོ་དེ་ཉིད་ལྷ་ཡིན་པ་སྙམ་དུ་བསམས་ལ་ཅི་འབྱོར་པའི་མཆོད་པས་མཆོད་དེ། རྡོ་རྗེ་ཁུ་ཚུར་གཉིས་ཀྱི་སྙིང་ག་དང་། ཀློག་མ་དང་། སྤྱི་གཙུག་དང་། རྣ་བ་རྣམས་སུ་གཏུག་ཅིང་། ཨོཾ་སརྦ་བིད་ཨ་དྷི་ཏིཥྛ་ཛྙཱ་ན་ས་མ་ཡེ་ཧཱུྃ་ཞེས་པས་བྱིན་གྱིས་བརླབ་པའོ། །ཉིན་མོ་ཤོག་བུ་ལ་བྲིས་ཏེ་སྟ་གོན་བྱས་པའི་ཡི་གེ་རྣམས་གནས་བཅོ་བརྒྱད་པོ་རྣམས་སུ་གདགས་པར་བྱའོ། །དེ་ཙམ་མ་གྲུབ་ན་གཞུང་ནས། གཙུག་ཕུད་དཔུང་པར་དེ་བཞིན་དུ། །སྔགས་བྲིས་པས་ནི་གདགས་པར་བྱ། །ཞེས་འབྱུང་བ་སྔགས་རྣམས་རྫོགས་པར་ཚར་གསུམ་བྱས་ལ་མགོ་དང་དཔུང་པ་གཉིས་ཀྱི་ཕྱོགས་སུ་བཏགས་ལ་གཞན་གནས་བཅོ་བརྒྱད་པོ་རྣམས་སུ། དེ་ལྟར་གཞན་དུ་ཡི་གེ་སྔགས། །མཆོག་དུ་དགེ་བ་རྣམས་གཞག་གོ །ཞེས་པས་གནས་བཅོ་བརྒྱད་པོར་སྔགས་བྲིས་ནས་གློན་པ་བཞིན་བསམ་ཡང་འགལ་བ་མེད་དོ་ཞེས་མཆན་རྙིང་པའི་བཤད་པ་ལས་འབྱུང་སྟེ། དེ་ནི་ལེགས་པར་རྟོགས་སོ། །དེ་ནས་རས་ཁྲུ་གང་པ་ལ་སོགས་པའི་སྟན་དང་བཅས་ཏེ། རོལ་མོ་དང་བགེགས་བསྐྲད་པ་དང་བཅས་པས་ཐབ་ཀྱི་དབུས་སུ་བཅུག་ལ་ཡང་རྩ་བའི་རིག་པ་བཟླའོ། །གཞན་དུ་ཅི་རིགས་པའི་གོས་གཡོགས་པར་བྱའོ། །དྲུག་པ་ནི། དེ་ནས་བྱིན་ཟ་དགེ་བ་རབ་སྦར་ལ། །ཞེས་སོགས་ཚིགས་བཅད་ཕྱེད་གཉིས་དང་། དེ་ནས་བྱིན་ཟ་ལ་ནི་བརྟགས་བྱ་བ། །ཞེས་སོགས་ཚིག་རྐང་གཉིས་ཀྱི་དོན་ནི། མེ་སྦར་ཏེ་ཐབ་དང་ཡོ་བྱད་ཐམས་ཅད་ལ་བདུད་རྩི་འཁྱིལ་བའི་སྔགས་བཟླས་ཤིང་ཀུ་ཤའི་ཆུན་པོས་དྲིའི་ཆུས་རོ་ལ་བགེགས་དང་མི་གཙང་བ་ཐམས་ཅད་བསངས་ལ། ལས་ཁ་ཚར་བ་སྔོན་དུ་སོང་བས། བདག་གི་རྣལ་འབྱོར་དཔའ་བོ་གཅིག་པ་བསྙེན་པ་བཞིན་རྫོགས་པར་བསྒོམ་བཟླས་པ་ཅི་རིགས་པར་བྱས་ལ་མཆོད་པ་ལ་འཇུག་པར་བྱ་སྟེ། རྡོ་རྗེ་དྲིལ་བུ་འཛིན་པའི་སྔགས་པས་ཚིགས་བཅད་ཅི་ཤེས་པ་དབྱངས་དང་བཅས་པས། ཨོཾ་ཨགྣེ་ཡ་མ་ཧཱ་ཏེ་ཛ་བཛྲ་སརྦ་ཀརྨཱ་པྲ་སཱ་དྷ་ཀ་ཀཱ་རུ་ཎ་ཡ་ཀྲྀ་ཏ་མ་ཧཱ་ཏེ་ཛ་པ་ཏ་ཀཾ་ཨསྨིན་ས་ནི་ཧི་ཏོ་བྷ་ཝ། ཞེས་བྱ་བས་མེའི་ཕྱོགས་ནས་མེ་ལྷ་དཀར་པོ། ཞལ་གཅིག་ཕྱག་བཞི་པ་པདྨ་དང་ར་དཀར་པོའི་གདན་ལ་བཞུགས་པ། གཡས་རིན་པོ་ཆེའི་དབྱུག་པ། གཡོན་པདྨ་སྤྱི་བླུགས་འཛིན་པ་སྤྱན་དྲངས་ལ་ཐབ་ཏུ་བཞུགས་སུ་གསོལ་ཏེ་མཆོད་ཡོན་སྔོན་དུ་སོང་བའི་མཆོད་པས་བསྲེག་རྫས་རྣམས་བདུད་རྩིར་བསམས་ཏེ་ཐམས་ཅད་བསྲེས་པའམ་སོ་སོར་བྱས་ཀྱང་རུང་སྟེ། ཨོཾ་ཨགྣེ་ཡེ་སརྦ་པཱ་པཾ་ད་ཧ་ན་ཤཱནྟིཾ་ཀུ་རུ་སྭཱཧཱ། ཞེས་བྱ་བས་སྦྱིན་སྲེག་ལན་ཅི་རིགས་པ་ཕུལ་ལ་བསྟོད་པར་བྱའོ། །དེ་ནས་མེ་ལྟར་འབར་བ་ནས་འབྱུང་བ་བཞིན་ཁྲོ་བོ་མེ་ལྟར་འབར་བ་སྤྱན་དྲངས་ལ་ལན་གསུམ་དབུལ་ལོ། །དེ་ནས་དཀོན་མཆོག་གསུམ་ལ་ལན་གསུམ་དབུལ་བར་བྱའོ། །དེ་ནས་ཡང་། ཇི་ལྟར་གསུངས་བཞིན་འདོད་པ་ཡིས། །ཞེས་སོགས་ཚིགས་བཅད་གཅིག་དང་། དེ་ནས་བསྲེག་བྱས་བཀང་སྟེ་རིམ་གྱིས་ནི། །ཞེས་སོགས་ཚིགས་བཅད་ཕྱེད་དང་གཉིས་ཀྱི་དོན་ནི་སྔར་དཀྱིལ་འཁོར་གྱི་སྐབས་སུ་བཤད་པའི་ཚིགས་བཅད་དབྱངས་དང་བཅས་པས་དཀྱིལ་འཁོར་གྱི་འཁོར་ལོ་འཁོར་དང་བཅས་པ་མེ་ལྷའི་ལྟོ་བར་སྤྱན་དྲངས་ལ་སྔར་དཀྱིལ་འཁོར་དུ་བཤད་པའི་མཆོད་པ་དང་བསྟོད་པ་ཅི་རིགས་པས་བསྟོད་དེ། བསྲེག་རྫས་གཞན་རྣམས་དང་རོའི་ཤ་ཁྲག་རུས་པ་དང་བཅས་པ་རྣམས་བདུད་རྩིར་བསམས་ཏེ། རྩ་བའི་རིག་པའི་མཇུག་ཏུ་སརྦ་པཱ་པཾ་ཤཱནྟིཾ་ཀུ་རུ་སྭཱཧཱ། ཞེས་བཏགས་ལ་གཙོ་བོ་ལ་བརྒྱ་རྩ་བརྒྱད་དབུལ་བར་བྱའོ། །དེ་ནས་གཙོ་བོའི་ཤར་ཕྱོགས་ན་བཞུགས་པའི་སྦྱོང་བའི་རྒྱལ་པོ་ལ་རང་གི་སྔགས་ཀྱིས་ཉི་ཤུ་རྩ་གཅིག་དབུལ་བར་བྱའོ། །དེ་ནས་འཁོར་གཞན་རྣམས་ལའང་རང་སྔགས་ཀྱིས་ལན་གསུམ་གསུམ་ཕུལ་ལ་མཆོད་དེ་བསྟོད་པར་བྱའོ། །དེ་ནས་ཡང་། ཕྱག་ན་རྡོ་རྗེ་པདྨ་ཞགས་པ་བསྣམས། །ཞེས་སོགས་ཚིག་རྐང་བཅུ་གཅིག་གི་དོན་ནི། དེ་ལྟར་དཀྱིལ་འཁོར་མཆོད་ནས་མ་གཤེགས་པར་ཕྱག་ན་རྡོ་རྗེ་འཇིག་རྟེན་གསུམ་ལས་རྣམ་རྒྱལ་གྱི་གཟུགས་སུ་བཞུགས་པ་སྤྱན་དྲངས་ལ་ཀུན་རིག་གི་སྤྱན་སྔར་བཞུགས་སུ་གསོལ་ལ་ཅི་འབྱོར་གྱིས་མཆོད་དེ། སྦྱིན་སྲེག་བྱ་བ་ནི་བསྲེག་རྫས་རྣམས་དང་། རོའི་ཤ་དང་ཁྲག་དང་རུས་པ་རྣམས་བདུད་རྩིར་བསམས་ལ་དབུལ་ཏེ། ཨོཾ་བཛྲ་སཏྭ་ཀྲོ་དྷ་ཨ་ན་ལརྐ་མ་ཧཱ་བཛྲ་ཀྲོ་དྷ་དྲ་བ་དྲ་བ་བི་དྲ་བ་བི་དྲ་བ་སརྦ་ཨ་པ་ཡ་ནཱ་ཤ་ཡ་ནཱ་ཤ་ཡ་ཧ་ར་ཧ་ར་པྲ་ནན་ཧཱུྃ་ཕཊ། ཆེ་གེ་མོའི་སྡིག་པ་ཐམས་ཅད་ཤཱནྟིཾ་ཀུ་རུ་སྭཱཧཱ། ཞེས་བྱ་བ་བརྒྱ་ནས་བྱེ་བའི་བར་ཅི་རིགས་པས་ཕུལ་ལ་སྦྱིན་སྲེག་བྱའོ། །དེས་ནི་མེའི་དབུས་སུ་མཚན་མ་སྟོན་པ་ལ་སོགས་པའི་སྡིག་པ་དག་པའི་རྟགས་རྣམས་ཞི་བའི་སྦྱིན་སྲེག་དང་མཐུན་པར་སྟོན་པར་འགྱུར་རོ། །དེ་ནས་དཀྱིལ་འཁོར་གྱི་གཙོ་བོ་དང་ཕྱག་ན་རྡོ་རྗེ་འཁོར་དང་བཅས་པ་དཀྱིལ་འཁོར་གྱི་སྐབས་བཞིན་མཆོད་ཅིང་བསྟོད་དེ་ལྷག་ཆད་ཁ་བསྐང་བའི་ཕྱིར་ཡེ་གེ་བརྒྱ་པ་བརྗོད་ཅིང་བཟོད་པར་གསོལ་ལ། འདོད་པའི་དོན་ལ་གསོལ་བ་བཏབ་ལ་ཅུང་ཟད་མཆོད་དེ་གཤེགས་སུ་གསོལ་བར་བྱའོ། །དེ་ནས་ཡང་མེ་ལྟར་འབར་བའི་སྐབས་ནས་འབྱུང་བ་བཞིན་རང་གི་ལྷ་དང་། ཀླུ་དང་། ཕྱོགས་སྐྱོང་བ་དང་། གཟའ་དང་། རྒྱུ་སྐར་དང་། འཇིགས་བྱེད་དང་། རྒྱལ་ཆེན་བཞི་རྣམས་སྤྱན་དྲངས་ལ་རང་སྔགས་ཀྱིས་ཕུལ་ལ་མཆོད་དེ་རང་སར་གཏང་བར་བྱའོ། །དེ་ནས་ཡང་བགེགས་ལ་སོགས་པ་འཇིག་རྟེན་པ་རང་གིས་ཡིད་ལ་འདོད་པ་གང་ཡིན་པ་བཀུག་ལ་མཆོད་ལ་གཏང་བར་བྱའོ། །དེ་ནས་ཡང་མེ་ལྷ་མཆོད་དེ་བསྟོད་ལ་འདོད་པའི་དོན་ལ་གསོལ་བ་བཏབ་ལ། ལྷག་ཆད་བཟོད་པར་གསོལ་ཏེ་མཉེས་པར་བྱས་ལ་གཤེགས་སུ་གསོལ་བར་བྱའོ། །དེ་ནས་མཇུག་གི་བྱ་བ་ནི་གཏོར་མ་རྣམས་གཏང་། ཆོས་ཀྱི་སྦྱིན་པ་རྒྱས་པར་བྱ། དགེ་བའི་རྩ་བ་བསྔོ་བ་རྒྱས་པར་བྱ། གསོན་པོ་རྣམས་ལ་བཀྲ་ཤིས་པའི་སྨོན་ལམ་ཡང་གདབ། བཀྲ་ཤིས་བྱ། ཡོན་བདག་གིས་དཔོན་སློབ་འཁོར་དང་བཅས་པ་ལ་སྟོན་མོ་དང་ཡོན་དབུལ་བ་དང་། བསྔོ་བ་རྒྱས་པར་བྱའོ། །དེ་དག་ནུབ་གཅིག་ལ་བྱས་ཀྱང་རུང་། ནུབ་གཉིས་པར་བྱས་ན་རོ་ཆས་སུ་གཞུག་པ་ཡན་ཆད་ནུབ་གཅིག མེ་སྦར་བ་མན་ཆད་ནུབ་གཉིས་པ་ལ་བྱེད་པ་ཡིན་ཏེ། གང་ལྟར་ཡང་འགལ་བ་མེད་དོ། །བདུན་པ་ནི། དེ་ནས་ཐལ་བར་གྱུར་པ་དང་། །ཞེས་པ་སྟེ། འདི་ལ་རུས་པའི་ཆོ་ག་དང་། འཇིམ་པའི་ཆོ་ག་དང་། མཆོད་རྟེན་གདབ་པ་དང་། རབ་ཏུ་གནས་པར་བྱས་ཏེ་བསྒྲུབ་པ་དང་བཞི་ལས། དང་པོ་ནི། བསྲེག་ཁང་གི་དྲུང་དུ་ཕྱིན་ལ་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿ ཞེས་བརྗོད་ཅིང་ལག་པ་བསྣོལ་བ་སེལ་གོལ་མང་དུ་བརྡབ་པར་གསུངས་ལ། རུས་པ་བསྡུ་བར་བྱའོ། །དེ་ནས་བ་བྱུང་ལྔ་དང་དྲི་ཞིམ་པོའི་ཆུ་བསྲེས་ལ་བུམ་པར་བླུགས་པ་ལྷར་བསྐྱེད་ཅིང་མཆོད་ཀྱང་རུང་། མ་མཆོད་ཀྱང་རུང་སྟེ་རྩ་བའི་རིག་པ་མང་དུ་བཟླས་པས་ཆུ་བྱིན་རླབས་ཅན་དུ་བྱས་པ་དེས། རྩ་རིག་གི་རྗེས་སུ་སྦྱོང་བའི་རྒྱལ་པོའི་སྔགས་བཟླས་པ་དང་བཅས་པས་བཀྲུས་ལ་ཞིབ་ཏུ་བརྫི་ཞིང་བརྡུང་བར་བྱའོ། །གཉིས་པ་ནི། རུས་བུ་དང་། དྲི་བཟང་པོ་དང་། འཇིམ་པ་གཙང་མར་བསྲེས་ལ་འཇིམ་པའི་གོང་བུ་ལ་ཡང་རྩ་རིགས་མང་དུ་བཟླས་ཏེ་བྱིན་གྱིས་བརླབ་པར་བྱའོ། །གསུམ་པ་ནི། མདོར་བསྡུས་པའི་སྐབས་ནས་འབྱུང་བ། དེ་ཡི་མིང་ནས་སྨོས་ནས་ནི། །གུར་གུམ་བཟང་པོས་སྔགས་བྲིས་ལ། །ཞེས་འབྱུང་བས་རྩ་བའི་རིག་པའི་མཇུག་ཏུ་ཆེ་གེ་མོ་ཞེས་བྱ་བའི་སྡིག་པ་ཐམས་ཅད་ཤཱནྟིཾ་ཀུ་རུ་སྭཱཧཱ། ཞེས་བྱ་བའི་མིང་གུར་གུམ་གྱིས་བྲིས་ལ་འབི་འབིའི་དབུས་སུ་བཅུག་སྟེ། ལྷའི་སྐུའམ་མཆོད་རྟེན་དུ་རྩ་བའི་རིག་པ་ཟློས་ཤིང་གདབ་བོ། །བཞི་པ་ནི། མཆོད་རྟེན་ཐེབས་པ་དང་། སྟོང་པའི་ངང་ལས་མཆོད་རྟེན་ཉིད་ཆེན་པོ་མང་པོར་བསམས་ལ་བུམ་པའི་ནང་དུ་ཀུན་རིག་རིགས་ལྔའམ། སུམ་ཅུ་སོ་བདུན་གྱི་བར་དུ་སྐད་ཅིག་གིས་བསྐྱེད་ལ། དཀྱིལ་འཁོར་གྱི་སྐབས་ནས་འབྱུང་བ་བཞིན་ཡེ་ཤེས་པ་སྤྱན་དྲངས་ནས་རྩ་བའི་རིག་པ་ཉིས་འབུམ་གྱི་བར་ཅི་རིགས་པ་བཟླས་པས་བྱིན་གྱིས་བརླབས་ལ། ཅི་གྲུབ་པས་མཆོད་དེ་གཏོར་མ་གཏང་བར་བྱའོ། །དེ་ནས་ཡང་མཆོད་རྟེན་རྣམས་ཞུ་བ་ལས་སླར་བཏབ་པའི་མཆོད་རྟེན་གྱི་རྣམ་པར་བསམས་ལ་ཕྱག་བྱས་ལ་ཅི་འབྱོར་པས་མཆོད་དེ་བསྟོད་ལ་སྨོན་ལམ་རྒྱས་པར་གདབ་བོ། །བརྒྱད་པ་ལ་གསུམ་སྟེ་རྟགས་དངོས་དང་། རྟགས་མ་བྱུང་ན་བསྐྱར་བའི་ཆོ་ག་དང་། བསྐྱར་ཆོག་བྱས་པས་རྟགས་འབྱུང་བར་བསྟན་པའོ། །དང་པོ་ནི། དེ་ནས་མཆོད་རྟེན་འབར་གྱུར་ཏམ། །ཞེས་སོགས་ཚིགས་བཅད་ཕྱེད་དང་གསུམ་སྟེ། གོང་དུ་བཤད་པ་ལྟར་གྱི་མཆོད་རྟེན་ལ་སྒྲུབ་པ་བྱས་པས་སྡིག་པ་དག་པའི་རྟགས་འདི་དག་འབྱུང་བའི་དོན་ཏོ། །གཉིས་པ་ནི། ཅི་སྟེ་མཚན་མ་དེ་དག་ནི། །ཞེས་སོགས་ཚིགས་བཅད་གཉིས་ཏེ་གོ་སླའོ། །གསུམ་པ་ནི། དེ་ནས་དེ་ཡི་སྡིག་པ་ནི། །ཞེས་སོགས་ཚིགས་བཅད་གཉིས་ཏེ་བསྐྱར་ཆོག་བྱས་པས་ཚེ་འདས་དེའི་སྡིག་པ་དག་པའི་མཚན་མ་ངེས་པར་མཐོང་ཞིང་ཕྱི་མར་ལྷའི་ལུས་ཀྱི་གཟུགས་སུ་འགྱུར་ལ། དེའི་ཚེ་སྔར་འདིར་སྐྱེས་པ་དང་། འདི་ནས་ཤི་ནས་འདིར་སྐྱེས་ཞེས་དྲན་པའི་སྒོ་ནས་རང་གི་རྒྱུད་དུ་ངོ་ཤེས་པར་འགྱུར་རོ། །དེ་ལྟར་ན་ཚེ་སྔ་ཕྱིའི། མཚན་མ་འདི་དག་ཤེས་ནས་ནི། །ཞེས་སོགས་སོ། །བརྒྱད་པ་རྟེན་མེད་པ་ལ་སྡིག་པ་སྦྱང་བ་ནི། ཡང་ན་མེད་པར་གྱུར་ན་ནི། །ཞེས་སོགས་ཏེ་ཤཱཀ་ཐུབ་ནས་ཀྱང་། ལྷ་དང་། ཀླུ་དང་། གནོད་སྦྱིན་དང་། སྲིན་པོ་ལ་སོགས་པ་ངན་སོང་གི་རྒྱུད་ཀྱི་དབང་དུ་གྱུར་པ་རྣམས་ཀྱི་ཤི་བའི་རོའམ་ཞེས་སོགས་དང་། ཚེ་དཔག་མེད་ནས་ཀྱེ་ལྷའི་བུ་རྣམས་ངན་སོང་གི་རྒྱུད་དུ་སྐྱེས་ཟིན་པ་གང་ཡིན་པ་དེ་དག་གི་མིང་ལ་ཡང་དབང་བསྐུར་ཅིག་ཅེས་སོགས་འབྱུང་བའི་དོན་ནི་སྔར་བསྟན་པ་རྣམས་ལས་རོ་བསྲེག་མ་ཡིན་པ་རྣམས་མིང་ལ་སོགས་པ་ཐམས་ཅད་ལ་བྱ་བར་ནུས་སོ། །དགུ་པ་ཕྱིར་བཟློག་གི་སྒོ་ནས་སྡིག་པ་སྦྱང་བ་ནི། ཐལ་བ་ཡུངས་ཀར་བྱེ་མ་སོགས། །ཞེས་སོགས་ཚིགས་བཅད་གཅིག་སྟེ། འདིའི་མངོན་པར་རྟོགས་པ་བསྡུས་ཏེ་བྱེད་ན། བསྙེན་པ་ནས་མཆོད་གཏོར་གྱི་བར་དང་། རྟེན་བསྐྱེད་པའི་བར་དུ་རྒྱས་བསྡུས་གང་བྱེད་པ་སྔ་མ་བཞིན་དུ་ཉམས་སུ་བླངས་ལ། རྟེན་དེ་ལ་བྱེད་མའམ་ཡུངས་ཀར་ཐོགས་པས་རྒྱུད་ནས་འབྱུང་བའི་སྔགས་རྣམས་ཟློས་ཤིང་བྲབས་ནས། ནུབ་དུ་བྱེད་པ་རྫོགས་པའི་མཇུག་ཏུ་བྱེ་མ་ལ་སོགས་པའི་དམན་པ་རྣམས་རྒྱ་མཚོ་ལ་འབབ་པའི་ཆུ་བོར་དོར་བར་བྱའོ། །རྒྱུད་ན་ནི་དེ་ཉིད་བཞུགས་སོ། །ཇོ་བོ་རིན་ཆེན་བཟང་པོའི་ཕྱག་ལེན་རྒྱས་པ་བརྗོད་ན། ཡ་མཐའ་བསྙེན་པ་ནས་བཟུང་སྟེ་མ་མཐའ་མཆོད་པ་དང་གཏོར་མའི་བར་རྣམས་རྒྱས་བསྡུས་གང་བྱེད་པ་སྔ་མ་བཞིན་བྱས་ལ། དེ་ནས་རྟེན་ལ་བྱ་བའི་བགེགས་སྦྱང་བ་དང་། རྟེན་བསྐྱེད་པ་དང་། རྣམ་པར་ཤེས་པ་དགུག་པ་དང་། སྡིག་པ་དང་བྲལ་བ་དང་བཞི་ཡང་སྔ་མ་བཞིན་བྱས་ལ། ཡང་བགེགས་ཞི་བའི་སྦྱང་བ་སྤྲོས་པའི་བྱེ་བྲག་གིས་རྒྱས་བསྡུས་གང་རུང་ཅིག་འདིར་ཡང་བྱ་སྟེ། དེའང་ཞི་བས་སྦྱང་བ་ནི་སྔར་བྱས་ལ། འདིར་དྲག་པོས་སྦྱང་བ་བྱས་ན་མཛེས་སོ། །དེ་ནས་བརྡེག་པ་ནི་རྒྱུད་འདི་ནས་ཀྱང་གསུངས་ལ། གཙུག་དགུ་ནས་ཀྱང་། ཡུངས་ཀར་མེ་ཏོག་དང་ལྡན་པས། །གསང་སྔགས་ཟློས་ཤིང་བརྡེག་པར་བྱ། །ཞེས་འབྱུང་བས། བྱེ་མའམ་ཡུངས་ཀར་གྱིས་རྟེན་ལ་བྲབ་ཅིང་། རྩ་རིག་ལ་སོགས་པའི་དཀྱིལ་འཁོར་གྱི་ལྷའི་སྔགས་ཅི་ཙམ་ནུས་པ་བཟླས་པའི་རྗེས་ལ་ཤཱཀ་ཐུབ་ནས་འབྱུང་བའི་བརྡེག་སྔགས་བཅོ་ལྔ་དང་། གཞན་ཡང་རིག་སྔགས་མཐུ་དང་གཟི་བརྗིད་ཆེན་པོ་རྣམས་ཟློས་ཤིང་རྟེན་ལ་བྲབ་བོ། །དེ་ནས་རྒྱུད་འདི་ཉིད་ནས་ཀྱང་། དེ་ནས་ཁྲུས་ལ་སོགས་བྱས་ལ། །ཞེས་པས་དངོས་སུ་སློབ་དཔོན་གྱི་ལས་བསྟན་ཀྱང་ཁྲུས་ཅུང་ཟད་ཟིན་ལ་གཙུག་དགུ་ནས་རུས་པའམ་གོས་སམ་མིང་ལ་ནི། རྡོ་རྗེ་ཆུ་ཡིས་བཀྲུ་བར་བྱ། །ཞེས་དང་། །སླར་ཡང་བཀྲ་ཤིས་ཚིགས་བཅད་ཀྱིས། །དུས་གསུམ་དུ་ནི་ཁྲུས་བྱའོ། །ཞེས་གསུངས་པས་ན། རྣམ་རྒྱལ་བུམ་པའི་ཆུས་ལུགས་མའམ། རས་བྲིས་ལ་སོགས་པའི་རྟེན་རྙིང་པ་ལ་ཚིགས་བཅད་དང་སྔགས་ཅི་རིགས་པས་བཀྲུས་ཏེ་སླར་བུམ་པར་བླུགས། དེ་ནས་བུམ་པ་ཐོགས་ལ་ནུབ་གོང་མ་ལ་ནི་མེ་ལོང་ལ་གཟུགས་བརྙན་འཆར་བ་ལ་བཀྲུ། ནུབ་ཐ་མ་ལ་མིང་བྱང་ལ་སོགས་པའི་རྟེན་ལ་དངོས་སུ་བཀྲུ་སྟེ། ཕར་ཕྱིན་དྲུག་གི་ཚིགས་བཅད་དང་། ཆུ་བོ་དྲུག་གི་ཁྲུས་བྱས་པས། །ཞེས་སོགས་ཚིགས་བཅད་ཕྱེད་དང་གསུམ་ལ་རྩ་རིག་རེ་རེ་སྤེལ་ཞིང་བཀྲུའོ། །དེ་ནས། གང་ལ་སེར་སྣ་རྣམ་ཆགས་པ། །ཞེས་སོགས་བཀྲ་ཤིས་ཀྱི་ཚིགས་བཅད་དང་། འདོད་ཆགས་ཞེ་སྡང་གཏི་མུག་གསུམ། །ཞེས་སོགས་དང་། ས་ནི་དུག་གི་ཕ་ཡིན་ཏེ། །ཞེས་སོགས་ཀྱིས་ཀྱང་བཀྲུའོ། །དེ་ནས་བུ་ལ་སོགས་པས་མིང་བྱང་འཛིན་ལ་ཡིད་ཀྱིས་ཚེ་འདས་དེས་ཕྱག་བྱེད་ཅིང་འོག་ནས་འབྱུང་བ་རྣམས་ངག་ཏུ་བརྗོད་པས་སྐྱབས་སུ་འགྲོ་བར་བསམ་ཤིང་། གཙོ་བོ་རྒྱལ་བ་འགྲོ་བའི་མགོན། །ཞེས་སོགས་ཀྱིས་ཕྱག་བྱེད་དུ་བཅུག་གོ །དེ་ལ་གོང་དུ་བསྟན་པ་རྣམས་རིམ་པ་ཇི་ལྟར་ཉམས་སུ་བླང་ཞེ་ན། རོ་སྦྱོང་བ་ནི་ཐམས་ཅད་ཀྱི་ཐོགས་མ་དང་མཇུག་ཏུ་བྱས་ཀྱང་འདྲ་ལ། གཞན་བཟླས་པའི་རྗེས་ལ་ཕྱིར་བཟློག དེ་ནས་དབང་བྱའོ། །སྦྱིན་སྲེག་ནི་མཆོད་པའི་སྐབས་སམ་མཇུག་ཏུ་བྱ་བ་གང་རུང་ཡིན་ནོ། །སཱཙྪ་ནི་རོ་ཡོད་ན་སྦྱང་བའི་རྗེས་ལ་བྱ་སྟེ། རོ་མེད་ན་གོང་དུ་བྱས་ཀྱང་འགལ་བ་མེད་དོ། །བཞི་པ་དེའི་ཕན་ཡོན་ལ་གཉིས་ཏེ། ཕན་ཡོན་དངོས་དང་། དགེ་བའི་རྩ་བ་མ་བསྐྱེད་པའི་རྟེན་ལ་ཐབས་སྔགས་དང་། ཕྱག་རྒྱ་མེད་ན་མི་འབྱོངས་པར་བསྟན་པའོ། །དང་པོ་ནི། དེ་ལྟར་བྱས་ན་སྡིག་ཅན་ཡང་། །ཞེས་སོགས་ཏེ་གོང་དུ་བསྟན་པའི་སྡིག་པ་སྦྱོང་བའི་ཐབས་གང་རུང་རེ་རེའམ་ཐམས་ཅད་བྱས་ན། སྡིག་པ་སྟོབས་ཆེན་པོ་དང་ལྡན་པ་ཡང་ངན་སོང་ལས་ཐར་བར་འགྱུར་ན། དགེ་བའི་མཆོག་བསྐྱེད་པ་དང་། བྱང་ཆུབ་ཏུ་སེམས་བསྐྱེད་པ་དང་། ཕ་རོལ་ཏུ་ཕྱིན་པ་དྲུག་ལ་གོམས་པའི་སོ་སོ་སྐྱེ་བོ་རེ་ཞིག་ལས་ཀྱི་དབང་གིས་ངན་སོང་དུ་སྐྱེས་པ་རྣམས་གྲོལ་བ་ལྟ་སྨོས་ཀྱང་ཅི་དགོས་སོ། །གཉིས་པ་ནི། དགེ་བའི་རྩ་བ་མ་བསྐྱེད་ལ། །ཞེས་སོགས་གོ་སླའོ། །ལྔ་པ་ནོར་བུ་དྲི་མ་མེད་པ་ངན་སོང་ལས་ཐོན་པའི་ཐབས་ཕན་ཡོན་དང་བཅས་ཏེ་བསྟན་པ་ལ་བདུན་ཏེ། བརྒྱ་བྱིན་ལ་སོགས་པས་ཆོ་ག་ཇི་ལྟ་བ་བཞིན་བྱས་པས་དྲི་མ་མེད་པ་སྡུག་བསྔལ་ལས་ཐར་ཏེ་དགའ་ལྡན་དུ་སྐྱེས་པ་དང་། ནོར་བུ་དྲི་མ་མེད་པ་ལ་སོགས་པས་བཅོམ་ལྡན་འདས་ལ་མཆོད་པ་བྱས་ཏེ་ངོ་མཚར་བར་བསྟན་པ་དང་། བརྒྱ་བྱིན་ལ་སོགས་པས་ཆེད་དུ་བརྗོད་པ་བསྟན་པ་དང་། དགའ་ལྡན་པས་ངོ་མཚར་ཏེ་ཆེད་དུ་བརྗོད་པ་དང་། སུམ་ཅུ་རྩ་གསུམ་པ་རྣམས་ཀྱིས་ཡ་མཚན་སྐྱེས་ཏེ་ཆེད་དུ་བརྗོད་པ་དང་། ཡང་དགའ་ལྡན་པས་ངོ་མཚར་སྐྱེས་ཏེ་ཆེད་དུ་བརྗོད་པ་དང་། ནོར་བུ་དྲི་མ་མེད་པ་ལ་སོགས་པས་མཆོད་པ་བྱས་ཏེ། སླར་དོང་བར་བསྟན་པའོ། །དང་པོ་ནི། དེ་ནས་བརྒྱ་བྱིན་ལ་སོགས་ལྷ། །ཞེས་སོགས་ཏེ་སྔར་བཤད་པའི་སྡིག་སྦྱོང་གི་སྒོ་དེ་རྣམས་ནོར་བུ་དྲི་མ་མེད་པའི་ཆེད་དུ་བརྒྱ་བྱིན་གྱིས་བྱས་པས་ནོར་བུ་དྲི་མ་མེད་པ་དགའ་ལྡན་དུ་སྐྱེས་ཏེ། སྐྱེས་མ་ཐག་ཏུ་བྱང་ཆུབ་མཆོག་ཏུ་སེམས་བསྐྱེད་པས་ན། སེམས་ཅན་ཀུན་ལ་ཕན་ཕྱིར་བདེར་གཤེགས་འདྲ་བར་སྐྱེས། །ཞེས་སོ། །གཉིས་པ་ནི། དེ་ནས་དབང་པོར་བཅས་པ་ཡིས། །ཞེས་སོགས་ཏེ། དགའ་ལྡན་གྱི་ལྷ་རྣམས་ལ་དབང་བས་ན་དབང་པོ་ཞེས་བྱ་ཡི་བརྒྱ་བྱིན་ནི་མ་ཡིན་ནོ། །གསུམ་པ་ནི། དེ་ནས་བརྒྱ་བྱིན་ལ་སོགས་པའི་ལྷའི་བུ་ཐམས་ཅད་ཀྱིས་ཞེས་སོགས་སོ། །བཞི་པ་ནི་དེ་ནས་ལྷའི་བུ་དེ་དག་གིས་ཞེས་སོགས་ཀྱིས་སྔར་དགའ་བའི་ཚལ་ནི་གང་བར་བྱས་ཞེས་པ་ནི། དབང་པོར་བཅས་པའི་དྲག་ཆེན་ལྷ་རྣམས་དགའ་ལྡན་ཉིད་དུ་གནས་ནས་མཆོད་པའི་སྤྲིན་གྱིས་གང་བར་བྱས་པ་ཡིན་ལ། འདིར་འོད་ཟེར་གྱིས་བསྐུལ་བའི་རྗེས་སུ་ནོར་བུ་དྲི་མ་མེད་པའི་འོད་དེ་ཉིད་ལྷའི་འཁོར་དང་བཅས་ཏེ་དགའ་ལྡན་དུ་མི་སྣང་བར་བྱས་ཏེ། དགའ་བའི་ཚལ་དུ་འོངས་ནས་བཅོམ་ལྡན་འདས་ཀྱི་འོད་ཟིལ་གྱིས་གནོན་མི་ནུས་ལ། བརྒྱ་བྱིན་དྲིན་ཆེ་བས་དེ་ལས་གཞན་པའི་ལྷ་རྣམས་ཀྱི་འོད་ཟིལ་གྱིས་མནན་ནས་བཅོམ་ལྡན་འདས་ལ་ཆེད་དུ་བརྗོད་པའོ། །ལྔ་པ་ནི། དེ་ནས་སྐད་ཅིག་མ་དེ་ཉིད་ཀྱི་ཚེ་ཞེས་སོགས་སོ། །དྲུག་པ་ནི། དེ་ནས་ལྷའི་བུ་དེ་དག་དེ་ལྟ་བར་འདོད་ནས་ཞེས་སོགས་ཏེ། སུམ་ཅུ་རྩ་གསུམ་པའི་ལྷའི་བུ་རྣམས་ཀྱིས་དྲི་མ་མེད་པའི་འོད་ལྟ་བར་འདོད་ནས་བཅོམ་ལྡན་འདས་ལ་ཞུས་པས། བཅོམ་ལྡན་འདས་ཀྱིས་འོད་ཟེར་གྱིས་བསྐུལ་ནས་སྣང་བར་བྱས་སོ། །དེ་ནས་དྲི་མ་མེད་པའི་འོད་འཁོར་དང་བཅས་པ་རྣམས་ཀྱིས་རྫུ་འཕྲུལ་བསྟན་ནས་བསྐོར་བ་བྱས་ཏེ་ཆེད་དུ་བརྗོད་པའོ། །བདུན་པ་ནི། དེ་ནས་ནོར་བུ་དྲི་མ་མེད་པའི་འོད་ཅེས་བྱ་བའི་ལྷའི་བུ་དེ་དག་གིས་བཅོམ་ལྡན་འདས་ལ་ནོར་བུ་དང་ཞེས་སོགས་ཏེ་རྗེས་འཇུག་གི་ཉམས་ལེན་ལ་མཆོད་པ་ཉེར་ལྔ་པ་བསྟན་ནོ། །དྲུག་པ་རྒྱུད་ཀྱི་ཆེ་བ་བསྟན་པ་ལ་བཞི་སྟེ། བརྒྱ་བྱིན་ལ་སོགས་པས་བཤད་པར་གསོལ་བ་གདབ་པ་དང་། བཅོམ་ལྡན་འདས་ཀྱི་ཉོན་ཅིག་པར་གདམས་པ་བསྟན་པ་དང་། བཤད་པ་དངོས་དང་། བཅོམ་ལྡན་འདས་ཀྱིས་བརྒྱ་བྱིན་ལ་ཡོན་ཏན་དེ་ལྟ་བུ་དང་ལྡན་པའི་རྒྱུད་དེ་འཛམ་བུ་གླིང་པ་རྣམས་ཀྱི་དོན་དུ་བག་ཡོད་པར་སྒྲུབས་ཤིག་པར་བཀའ་གནང་བའོ། །དང་པོ་ནི། དེ་ནས་བརྒྱ་བྱིན་དང་། ཚངས་པ་ལ་སོགས་པའི་ལྷ་རྣམས་མཆོག་ཏུ་ཡ་མཚན་དུ་གྱུར་ནས་ཞེས་སོགས་སོ། །གཉིས་པ་ནི། བརྒྱ་བྱིན་དང་ཞེས་སོགས་སོ། །གསུམ་པ་ལ་ལྔ་སྟེ། སྣོད་དང་ལྡན་པས་ཐོས་པར་བསྟན་པ་དང་། ལྷ་རྣམས་ཀྱིས་སྣོད་དང་ལྡན་པར་ཁས་བླངས་པ་དང་། གཞན་གྱི་དོན་བྱས་པའི་ཕན་ཡོན་བསྟན་པ་དང་། བརྒྱ་བྱིན་ལ་སོགས་པས་བསྟན་པ་བསྲུང་བར་དམ་བཅས་པ་དང་། རྒྱུད་བཅང་བ་ལ་སོགས་པའི་ཕན་ཡོན་བསྟན་པའོ། །དང་པོ་ནི། ལྷའི་བུ་རྣམས་དགེ་བ་དང་ལྡན་པའི་སེམས་རྣམས་ཀྱིས་ཞེས་སོགས་ཏེ་མ་རབས་དང་པོ་ནི་མི་དགེ་བ་བཅུ་དང་ལྡན་པ། གཉིས་པ་ནི་དགེ་སྡིག་གང་ཡང་མེད་པ་སྟེ་ཕལ་པ་ཞེས་ཀྱང་ཟེར་རོ། །བསམ་པ་ངེས་པ་ནི། ཐེག་ཆེན་དུ་རིགས་ངེས་པ། ཕྱིར་མི་ལྡོག་པའི་གནས་མངོན་པར་འདོད་པ་ནི་ས་དང་པོ་ཡན་ཆད་ཀྱི་ཡོན་ཏན་འདོད་པའོ། །གཉིས་པ་ནི། དེ་ནས་བརྒྱ་བྱིན་དང་ཚངས་པ་ལ་སོགས་པའི་ལྷའི་བུ་དེ་དག་ཞེས་སོགས་སོ། །གསུམ་པ་ལ་གཉིས་ཏེ། དྲི་བ་དང་། ལན་ནོ། །དང་པོ་ནི། བཅོམ་ལྡན་འདས་བརྟག་པའི་རྒྱལ་པོ་འདིས་ཞེས་སོགས་སོ། །གཉིས་པ་ནི། བཅོམ་ལྡན་འདས་ཀྱི་བཀའ་སྩལ་པ་ཞེས་སོགས་ཏེ་ཡང་དག་པར་རྫོགས་པའི་སངས་རྒྱས་ཉིད་དུ་བལྟ་བ་ནི། གཞན་དོན་བྱས་པས་སངས་རྒྱས་དང་མཛད་པ་འདྲ་བའི་དོན་ཏེ། འོག་ཏུ་ལྷའི་དབང་པོ་དཔེར་ན་ཞེས་སོགས་གསུངས་པ་ལས་ཤེས་སོ། །བཞི་པ་ནི། དེ་ནས་བརྒྱ་བྱིན་དང་ཚངས་པ་ལ་སོགས་པའི་ལྷའི་བུ་རྣམས་དང་རྒྱལ་པོ་བཞི་དང་ཞེས་སོགས་ཏེ་འཇིག་རྟེན་སྐྱོང་བ་བརྒྱད་ནི་ཕྱོགས་སྐྱོང་བ་བརྒྱད་དོ། །གནོད་སྦྱིན་གྱི་སྡེ་དཔོན་ཉེར་བརྒྱད་ནི་གཟུངས་གྲྭ་ལྔ་ལས་ཕྱོགས་བཞིར་སྲུང་བ་བཞི་བཞི། མཚམས་བཞིར་སྲུང་བ་རེ་རེ། སྟེང་འོག་གི་སྲུང་བ་བཞི་བཞི་སྟེ་ཉེར་བརྒྱད་དོ། །ཞེས་གསུངས་སོ། །འཕྲོག་མ་བུ་ལྔ་བརྒྱས་བསྐོར་བ་རྣམས་ནི། ཁམས་གསུམ་གྱི་སེམས་ཅན་ཐམས་ཅད་ཀྱི་གཟི་བརྗིད་དང་སྲོག་འཕྲོག་པར་བྱེད་ཅིང་། ཟ་མ་རེ་རེ་ལ་སེམས་ཅན་ལྔ་བརྒྱའི་དབུགས་ལེན་པ་སེམས་ཅན་ལ་ཤིན་ཏུ་གནོད་ཅིང་གདུག་པ་ཅན་ཏེ་དེ་འདུལ་བའི་ཕྱིར། སངས་རྒྱས་ཐུགས་རྗེ་ཆེ་ལ་ཐབས་མཁས་པས་ཆང་ཟན་བྱིན་གྱིས་བརླབས་ཏེ་ཁ་ཟས་སུ་བྱིན་པས་ཚིམ་པར་བྱས་ཤིང་། འཕྲོག་མ་འཁོར་དང་བཅས་པ་བཅོམ་ལྡན་འདས་ཀྱི་བཀའ་འབངས་སུ་བཀོད་པ་ཡིན་ནོ། །ལྔ་པ་ནི། བཅོམ་ལྡན་འདས་གང་དུ་བརྟག་པའི་རྒྱལ་པོ་འདི་རིགས་ཀྱི་བུའམ་རིགས་ཀྱི་བུ་མོ་དད་པས་འཆང་ངམ་ཞེས་སོགས་སོ། །བཞི་པ་ནི། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་ཁྱོད་ཀྱིས་ཇི་སྐད་སྨྲས་པ་དེ་དེ་བཞིན་ཏེ་ཞེས་སོགས་སོ། །དེ་དག་གིས་ནི་བརྟག་པ་དང་པོའི་དོན་རྗེ་བཙུན་ས་སྐྱ་པའི་དགོངས་པ་ཇི་ལྟ་བ་བཞིན་དུ་བཤད་ཟིན་ཏོ། །གཉིས་པ་ཕྱག་ན་རྡོ་རྗེའི་ཞལ་ནས་གསུངས་པའི་བརྟག་པ་ཕྱི་མ་ལ་གཉིས་ཏེ། སྤྱི་དོན་དང་གཞུང་གི་དོན་ནོ། །དང་པོ་ནི། དཀྱིལ་འཁོར་ཕྱི་མ་བཅུ་གཅིག་པོ་འདི་དག་ལ་རྗེ་བཙུན་ས་སྐྱ་པའི་བཞེད་པས་ཆོ་གའི་ཆིངས་ཀུན་རིག་དང་འདྲ་བ་ལས། མི་འདྲ་བའི་ཁྱད་པར་གཞུང་ལས་དངོས་སུ་བཤད་པ་རྣམས་སོ་སོར་སྦྱར་བར་བཞེད་དོ། །དེ་ཡང་བདག་བསྐྱེད་ཀྱི་སྐབས་སུ་དཀྱིལ་འཁོར་ཐམས་ཅད་དུ་འཇུག་པ་རྡོ་རྗེ་སེམས་དཔའ་བསྐྱེད་པ་ལ་ནི་ཁྱད་པར་མེད་ལ། རང་རང་གི་དཀྱིལ་འཁོར་གྱི་གཙོ་བོ་བསྐྱེད་པ་ལ་ཞལ་ཕྱག་དང་སྔགས་སོ་སོར་བྱའོ། །བསྐྱེད་པ་རྒྱས་པ་ལ་ནི་རང་རང་གི་དཀྱིལ་འཁོར་ཡོངས་རྫོགས་བསྒོམས་ནས་སྔགས་དང་ཕྱག་རྒྱ་བཞིའི་རྒྱས་འདེབས་རྣམས་ཀྱང་དེ་བཞིན་དུ་སྦྱར་བར་བྱའོ། །མདུན་བསྐྱེད་བསྒྲུབ་ཚུལ་ཡང་དེ་དང་འདྲ་ཞིང་། དབང་གི་འཇུག་པའི་སྐབས་དང་དངོས་གཞིའི་སྐབས་སུ་མི་འདྲ་བའི་ཁྱད་པར་ཡོད་པ་རྣམས་སོ་སོར་སྦྱར་ཞིང་། ཆོ་ག་གཞན་རྣམས་ནི་ཁྱད་པར་མེད་པར་བཞེད་དོ། །འོན་ཀྱང་ད་ལྟ་དབང་བསྐུར་གྱི་ཕྱག་ལེན་ཡོད་པ་ནི་རྩ་སྐྱ་པ་ནས་བརྒྱུད་པ་ཡིན་པས་དེའི་ལུགས་ལྟར་བརྗོད་ན། རང་རང་གི་དཀྱིལ་འཁོར་དུ་དབང་བསྐུར་ལེགས་པར་ཐོབ་པའི་རྣལ་འབྱོར་པས་སེམས་ཅན་ཐམས་ཅད་ཀྱི་སྒྲིབ་པ་སྦྱངས་ཏེ་སངས་རྒྱས་ཐོབ་པར་བྱེད་པ་ལ་བཞི་སྟེ། སློབ་དཔོན་ལས་ཀྱི་ཆོ་ག་དང་། སློབ་མ་དཀྱིལ་འཁོར་དུ་འཇུག་ཅིང་དབང་བསྐུར། དངོས་གྲུབ་ཀྱི་ཡེ་ཤེས་ལ་བསླབ་པ། སྡིག་པ་སྦྱོང་ཐབས་ཕན་ཡོན་དང་བཅས་པ་བསྟན་པའོ། །དང་པོ་ལ་ལྔ་སྟེ། དང་པོ་བསྙེན་པ་ནི་གནས་མཚན་ཉིད་དང་ལྡན་པར་དུས་ཁྱད་པར་ཅན་གྱི་ཚེ། ཡོ་བྱད་དང་ལྡན་པས། སྔོན་འགྲོ། དངོས་གཞི། རྗེས་གསུམ་གྱིས་མཆིང་བ་ཡང་ཀུན་རིག་བཞིན་དུ་ཤེས་པར་བྱ་ཞིང་། འདིར་ཡིག་ཐོ་ཙམ་བསྟན་པར་བྱའོ། །སྐྱབས་འགྲོ་སེམས་བསྐྱེད་ཚད་མེད་བཞི། །མི་རྟོག་སྟོང་ཉིད་དྲན་པར་བྱ། །ཚོགས་གཉིས་གསག་པའི་ལམ་དང་གཅིག །དེ་ཡི་ངང་ལས་བདག་དང་གནས། །རྣལ་འབྱོར་བསྲུང་སྟེ་གཉིས་པའོ། །ལག་པ་བྱིན་བརླབ་གཟུགས་སྦྱོར་བསྒོམ། །སྡིག་པ་བྲལ་ཞིང་ཡེ་ཤེས་དབབ། །དེ་ཉིད་བརྟན་པ་བྱེད་པ་གསུམ། །སྟོང་པ་ཉིད་དང་ཟླ་བར་བསྒོམ། །དེ་སྟེང་ཐུན་མང་རིག་པ་དང་། །ཁྱད་པར་ས་བོན་སྤྲོ་བསྡུ་ཡིས། །རང་རང་ཕྱག་མཚན་དེ་གྱུར་ལ། །ས་བོན་བརྗོད་ཅིང་རང་ལྷར་བསྐྱེད། །དམ་ཚིག་ལྡན་དང་རིགས་གསུམ་གྱིས། །བརྟན་པར་བྱ་བའི་བྱིན་བརླབ་གསུམ། །དེ་ལ་རིགས་ལྔའི་དབང་བསྐུར་ནས། །ཏིང་འཛིན་རྩེ་གཅིག་བཞི་པའོ། །སེམས་ཅན་སྒྲིབ་སྦྱངས་སླར་འདུས་པས། །བསང་སྦྱང་བྱིན་བརླབ་མཆོད་པ་དང་། །བདག་ལ་བསྟོད་དེ་ལྔ་པའོ། །རང་ལྷ་རྐྱང་པའི་བསྙེན་བྱེད་ན། །སྐབས་འདིར་བཟླས་བརྗོད་ཤེས་བྱ་སྟེ། །འདས་པ་རྣམས་ལའང་ཉན་མོད་ཀྱི། །དེ་ལོག་དྲུག་ལ་རབ་ཏུ་བསྔགས། །ལྷ་ཚངས་བསྙེན་པའི་སྔོན་འགྲོའོ། །དངོས་གཞི་ལ་ཡང་རྣམ་གཉིས་ཏེ། །ཏིང་འཛིན་དཀྱིལ་འཁོར་བསྐྱེད་པ་དང་། །ནུས་དང་ལྡན་ཕྱིར་བསྒྲུབ་པའོ། །དང་པོ་ལ་ཡང་རྣམ་གསུམ་སྟེ། །མ་དག་པ་ཡི་ཁམས་སྦྱང་དང་། །འབྱུང་བཞི་རི་རབ་གཞལ་ཡས་ཁང་། །གསུམ་གྱིས་བརྟེན་པ་བསྐྱེད་པ་ཡང་། །ཀུན་རིག་བཞིན་ལས་ཁྱད་པར་ནི། །བྷྲུྃ་ལས་གཞལ་ཡས་ཁང་གྲུ་བཞི་སྒོ་བཞི་པ་ཤར་ཤེལ་དཀར་པོ། ལྷོ་བཻཌཱུརྻ་སྔོན་པོ། ནུབ་པདྨ་ར་ག་དམར་པོ། བྱང་ཨིནྡྲ་ནཱི་ལ་ལྗང་གུ། དབུས་གསེར་གྱི་རང་བཞིན་ལ་ལྷའི་གཙོ་བོའི་འོད་ཟེར་གྱི་མདངས་ཀྱིས་ཁྱབ་པའོ། །དེ་རྣམས་ལ་ཐུན་མོང་དུ་པད་ཟླའི་གདན་ཅན། དབུས་ཀྱི་གཙོ་བོ་རྣམས་ལ་སེང་གེ་ལ་སོགས་པའི་གདན་བསམ་པའོ། །དེ་ནས་དབུས་ཀྱི་གདན་གྱི་སྟེང་དུ་སྔར་གྱི་ཕྱག་རྒྱ་ཆེན་པོ་གཙོ་བོའི་ང་རྒྱལ་གྱིས་གནས་ནས། དེའི་ཐུགས་ཀར་ཟླ་བའི་སྟེང་དུ། མཐའ་སྐོར་དུ་རྩ་རིག་དང་ནང་སྐོར་དུ་གཙོ་བོའི་སྔགས་བཀོད་པ་ལས་འོད་ཟེར་སྤྲོ་བསྡུས་བྱས་པས་གཙོ་བོ་བསྐྱེད་དེ། དེའི་ཐུགས་ཀར་ཟླ་བའི་སྟེང་དུ་མཐའ་སྐོར་དུ་རྩ་རིགས་ནང་སྐོར་དུ་རང་གི་སྔགས་བཀོད་པ་ལས་འཁོར་བསྐྱེད་ནས་སོ་སོའི་གནས་སུ་བཀོད་དེ། འདི་དག་གི་སྔགས་དང་ཕྱོགས་གང་དུ་དགོད་པ་དང་། སྐུ་མདོག་དང་ཕྱག་མཚན་རྣམས་ནི་འོག་གཞུང་དོན་གྱི་སྐབས་སུ་འབྱུང་ངོ་། །དེ་ལྟར་ཏིང་ངེ་འཛིན་གྱི་དཀྱིལ་འཁོར་བསྐྱེད་ནས་དེ་ཉིད་བསྒྲུབ་པ་ལ་ཆོས་ལྔ་ལས། དང་པོ་ཡེ་ཤེས་སེམས་དཔའ་སྤྱན་དྲངས་པ་ནི་ཀུན་རིག་ཏུ་བསྟན་པའི་སྔགས་དང་། ཕྱག་རྒྱ་དེ་བཞིན་གཤེགས་པ་རང་རང་གི་ལྷ་ཚོགས་ཀྱི་རྣམ་པར་སྤྱན་དྲངས་ཏེ་མཆོད་ནས། འཇིག་རྟེན་པ་རྣམས་ནི་རང་རྒྱུད་པར་རང་སྔགས་ལ་ཛཿཧཱུྃ་བཾ་ཧོཿབཏགས་ཏེ་སྤྱན་འདྲེན་པའོ། །གཉིས་པ་དགུག་གཞུག་བྱ་བ་ནི་ཀུན་རིག་བཞིན་ནོ། །གསུམ་པ་བྱིན་གྱིས་བརླབ་ཅིང་རྒྱས་གདབ་པའི་དང་པོ་བྱིན་གྱིས་བརླབ་པ་ནི་ཐམས་ཅད་ཀུན་རིག་བཞིན་དུ་ཤེས་པ་བྱའོ། །དེ་ལ་ཕྱག་རྒྱ་བཞིས་རྒྱས་གདབ་པ་ལ་བཞི་ལས། དམ་ཚིག་གི་ཕྱག་རྒྱ་ནི། ལུས་ཀྱི་ལས་སུ་ལག་པའི་ཕྱག་རྒྱ་བཅའ་བ་རྣམས་རིམ་པ་བཞིན་དུ་བསྟན་པར་བྱ་བ་ནི། ཤཱཀ་ཐུབ་ཀྱི་ལ། ལག་གཉིས་ཏིང་ངེ་འཛིན་དུ་བཞག །བསྡམས་པའི་གུང་མོ་མཐའ་སྦྱར་དང་། །ཁུ་ཚུར་གཉིས་ལས་མཛུབ་གཉིས་དང་། །མཐེའུ་ཆུང་འདུ་བྱེད་གྱེན་དུ་བསྐོར། །བསྡམས་པའི་གུང་སྒྲེང་ཧཱུྃ་གཉིས་བཅག །བསྡམས་པ་ཧཱུྃ་སྒྲེང་རྣམ་རྒྱལ་གྱིའོ། །སོར་མོ་ཐམས་ཅད་འབར་བ་དང་། །བསྡམས་པ་སྤྱི་བོར་འཇོག་པ་དང་། །བཅིང་བའི་གུང་སྒྲེང་གཞན་རྣམས་བརྐྱང་། །དེ་ལས་མཐའ་གཉིས་བསྣོལ་ནང་བཀུག །མཆོད་བཞི་སྒོ་བ་ཀུན་རིག་བཞིན། །འདིར་ཡང་འཆིང་བར་ཤེས་པར་བྱོས། །ཚེ་དཔག་མེད་ཀྱི་ལ། ཐལ་མོའི་ཨོཾ་བརྐྱང་ཨཱཿནང་གཞུག །ཏྲྃ་གཞིབ་ཧཱུྃཿཧྲཱི་པད་འདབ་ཚུལ། །དེ་ཉིད་མདུན་དུ་འདེབས་པ་དང་། །དེ་ཉིད་གཡས་སུ་བསྐོར་བ་དང་། །དེ་ལས་ཁ་སྦྱར་སྤྱི་བོར་སྦྱར། །ཕྱག་ན་རྡོ་རྗེའི་གཞི་ཐལ་མོ། །ཧཱུྃ་བརྐྱང་ཏྲཱཾ་གཞིབ་ཧཱུྃ་པདྨ། །སྲིན་ལག་ནང་གཞུག་ཨཱཿསྒྲེང་བ། །བསྡམས་པའི་ཧཱུྃ་ཚིགས་བར་མ་བཅག །ཧཱུྃ་བཅིང་ཧྲཱིཿནི་པདྨོར་བྱ། །དེ་ཉིད་ཧཱུྃ་ཧྲཱིཿནང་དུ་གཞུག །མཆོད་དང་སྒོ་སྲུང་སྔར་བཞིན་ནོ། །འཁོར་ལོས་སྒྱུར་བའི་དཀྱིལ་འཁོར་ལ། །བསྡམས་པའི་ཧཱུྃ་གཉིས་གཤིབས་པ་དང་། །དེ་ཉིད་པདྨོའི་ཚུལ་སྦྱོར་དང་། །འོད་ཟེར་འབར་བའི་ཚུལ་དུ་བྱ། །ལྷག་མ་རྣམས་ནི་སྔ་མ་བཞིན། །མེ་ལྟར་འབར་བའི་དཀྱིལ་འཁོར་ལ། །རྡོ་རྗེ་ཁུ་ཚུར་མཁྲིག་གཉིས་བསྣོལ། །ཨཱཿསྦྲེལ་ཧཱུྃ་གཉིས་སྒྲེང་བའོ། །བསྡམས་པ་ཧཱུྃ་ཨཱཿགཉིས་གཤིབས་སྒྲེང་། ཨོཾ་སྒྲེང་འཇིག་རྟེན་སྣང་བྱེད་ཅིང་། །དེ་ལས་ཨཱ་བཅིང་ཨོཾ་ནང་གཞུག །ཨོཾ་ཨཱཿསྔར་བཞིན་བརྐྱང་བ་དང་། །དེ་ལས་ཏྲཱཾ་གཞིབ་གསུམ་འཆིང་གི །ཨཱཿཨོཾ་ནང་དུ་ལུ་གུ་རྒྱུད། །ལྷག་གཤིབས་བདུད་རྩི་འཁྱིལ་པའོ། །ཧྲཱིཿཧཱུྃ་སྒྲེང་བ་མི་གཡོ་མགོན། །ཧཱུྃ་སྒྲེང་ལྷག་མ་འབར་བར་བྱ། །ཐལ་མོའི་ཧཱུྃ་ཧྲཱིཿཨཱཿསྦྱར་སྒྲེང་། །ཨོཾ་བརྐྱང་ཕྱེ་ལ་ཾཧྲཱིཿབསྣོལ་བའོ། །འཇིག་རྟེན་པ་རྣམས་ཀྱི་ལ་རིམ་པར། །ཐལ་མོའི་ཨོཾ་སྦྲེལ་ཨ་བསྣོལ་དང་། །པི་ཝཾ་གཡོན་ཐོགས་ཡུལ་འཁོར་སྲུང་། །བསྡམས་པ་ཨཱཿསྒྲེང་འཕགས་སྐྱེས་པོ། །དེ་ལ་ཧཱུྃ་སྦྱར་མིག་མི་བཟང་། །རྣོ་ལ་ཁྲོ་དང་དབང་སྦྱར་བྱ། །དབུས་མ་གསུམ་ནི་རྡོ་རྗེ་ཅན། །ལག་པ་གཉིས་འབར་མེ་འབར་བ། །གུང་མོ་དབྱུགས་འདྲ་གཤིན་རྗེ་ཡི། །སྲིན་པོ་ཡི་ནི་ཁྲག་འཕྲོག་པ། །དེ་ཉིད་བསྡུས་བཏུད་སྦྲུལ་མགོར་འགྱུར། །ཐལ་མོ་བསྐོར་བ་རླུང་གི་ལྷ། །དབྱུག་པར་ལྡན་པ་གནོད་སྦྱིན་མོ། །བུམ་པར་བཞག་པ་ས་ཡི་ལྷ། །ལག་པ་གཡོན་ནས་འཁོར་ལོ་ཡིས། །འདི་ནི་ཉི་མ་ཟླ་བའི་ཞལ། །ཐལ་མོ་དམ་སྦྱར་མིག་མི་བཟང་། །གཟའ་ལྷག་ལ་ནི་སེ་གོལ་ཏོག །གཡས་ཀྱི་མཛུབ་མོ་ཁ་ནང་ནས། །ཚིག་དབྱུང་ཕུར་བུར་ཤེས་པར་བྱ། །པ་ཝ་སངས་ནི་གཉིས་སྙོམས་སྦྱོར། །སྤེན་པ་དབྱུག་པ་འཛིན་པར་བྱ། །རཱ་ཧུ་ལ་ནི་ཆུ་སྲིན་འདྲ། །ཤེས་བྱ་རྒྱུ་སྐར་མེ་སྟག་བཞིན། །དེ་ཉིད་བསྐོར་ནས་གློག་ཕྲེང་གི །བླ་འོག་བཞག་པ་གླུ་ཡི་རྒྱ། །མགོ་བོ་ཐོད་པ་ནག་པོ་སྟེ། །གཡོན་པ་མགོ་ཐོད་ཐོགས་འདྲ་དང་། །གཡས་པས་མདུང་རྩེ་རྩེ་གསུམ་པ། །གཡོན་པས་པདྨ་ཁ་འཛུམ་དང་། །གཡས་པས་ཨོཾ་ཞེས་བྱ་བར་བཞག །གཡོན་པས་འཁོར་ལོ་དབྱུག་ཐོ་གསུམ། །ཨཱཿདང་ཨོཾ་གཉིས་རྩེ་སྤྲད་ལ། །ལྷག་མ་གསུམ་ནི་བརྒྱ་བྱིན་གྱིས། །ཧཱུྃ་དང་ཨོཾ་གཉིས་གཞུར་བྱས་ལ། །ལྷག་མ་མདར་བྱས་ཀ་མ་ལའི། །བ་གླང་སྣ་ཡི་ཆུ་སྲིན་ཚུལ། །རྩེ་གསུམ་པ་ནི་ཀརྟི་ཀ །བྷྲྀཾ་གི་རི་ཏི་ལག་བརྐྱང་བ། །སྒོ་བ་ཐམས་ཅད་ཀུན་རིག་བཞིན། །མཁས་པས་རིམ་བཞིན་བཅིང་བར་བྱ། །ངག་ཏུ་རང་རང་གི་འབྱིན་སྔགས་ལན་གསུམ་གླུར་ལེན་ཅིང་། སེམས་ཀྱི་རང་རང་གི་ཐུགས་ཀར་ཧཱུྃ་ལས་དང་པོའི་རྡོ་རྗེ་རྩེ་ལྔ་པ་རེ་རེ་བསྒོམ་པར་བྱ་བ་ནི་དམ་རྒྱའོ། །ཆོས་ཀྱི་ཕྱག་རྒྱའི་ལུས་ཀྱི་བཅའ་བ་རྣམ་སྣང་གི་ཆོས་བདུན་སྔར་བཞིན་བྱས་ལ། ངག་སེམས་ཀྱི་ཧྲཱིཿལས་ལྷཾག་མ་དམིགས་པ་དེའི་མགྲིན་པར་པདྨའི་སྟེང་གི་ཟླ་བ་རྡོ་རྗེ་ཕྲ་མོ་བསམ་པའི་ལྟེ་བར་རང་རང་གི་འབྱིན་སྔགས་ལན་རེ་དགོད་པའོ། །རྡོ་རྗེ་ལས་ཀྱི་ཕྱག་རྒྱ་བཅའ་བ་ནི། ཐལ་མོ་གཉིས་སུ་ཕྱེ་བའི་གར་སྔོན་དུ་སོང་བའི་འཆིང་བ་སྟེ། དེ་ཉིད་གཉིས་སུ་བྱས་ནས་ལན་གཉིས་ཀྱིས་བསྐོར་བ་ནི་ལས་ཀྱི་ཕྱག་རྒྱའོ་ཞེས་སོ། །དེ་ཡང་གར་སྔོན་དུ་འགྲོ་བས་རང་རང་གི་དཀྱིལ་འཁོར་དུ་བཞུགས་པའི་ཚུལ་དུ་འདས་པ་རྣམས་ལ་བཅིང་ཞིང་། འཇིག་རྟེན་པ་རྣམས་ཀྱི་དམ་རྒྱ་བཞིན་ཏེ། འདི་དག་སྙིང་པོའི་ཕྱག་རྒྱ་སྟེ། །ལས་ཀྱི་ཕྱག་རྒྱའང་དེ་བཞིན་ནོ། །ཞེས་སོ། །ངག་གིས་རང་རང་གི་སྔགས་ལན་རེ་རེ་གླུ་རུ་བླངས་ནས་ཡིད་ཀྱིས་རང་རང་གི་ཐུགས་ཀར་ཨཱཿལས་སྣ་ཚོགས་རྡོ་རྗེ་བསྐྱེད་པའོ། །ཕྱག་རྒྱ་ཆེན་པོ་ནི། རང་རང་གི་གནས་ཚུལ་ཇི་ལྟ་བར་བཅིང་ཞིང་དེར་མོས་ལ་རང་རང་གི་སྔགས་ལན་རེ་བརྗོད། རང་རང་གི་ཐུགས་ཀར་དང་པོའི་རྡོ་རྗེ་ཧཱུྃ་གིས་མཚན་པ་གསལ་གདབ་པའོ། །བཞི་པ་དེ་ལ་མཆོད་ཅིང་བསྟོད་པ་བྱ་བ་ནི། ཨརྒྷ་མཆོག་བརྟག་ལ་སོགས་པའི་ལུང་གིས་མཚོན་ནས་མཆོད་པ་བྱིན་གྱིས་བརླབ་པ་སྔོན་དུ་སོང་བས། མཆོད་ཡོན་རང་རང་གི་དཀྱིལ་འཁོར་གྱི་གཙོ་བོའི་སྔགས་ཀྱིས་དབུལ་བ་ནི་ཁྱད་པར་གྱི་ཕྱག་ལེན་ནོ། །གཞན་དངོས་འབྱོར་གྱི་ལྔ་དང་། གསང་བ་ལྷ་མོ་བརྒྱད་ཀྱི་མཆོད་པ་དང་། པཱུ་ཙ་ཉི་ཤུ་རྩ་ལྔ་པ་དང་། ཕྱག་ན་རྡོ་རྗེའི་མཚན་བརྒྱ་རྩ་བརྒྱད་ཀྱིས་བསྟོད་པ་རྣམས་ནི་ཀུན་རིག་བཞིན་དུ་འདིར་ཡང་མཆོད་ཅིང་བསྟོད་ནས། སྤྲོས་པ་ལ་དགའ་ན་སྐབས་དང་སྦྱར་བའི་མཆོད་བསྟོད་ཅི་རིགས་པར་སྦྱར་ཏེ་ཤེས་པར་བྱའོ། །ལྔ་པ་ཕྲིན་ལས་གཞོལ་ཞིང་བཟླས་པ་བྱེད་པ་ནི། དང་པོ་ལ་ལྷ་རང་རང་གི་ཕྱག་རྒྱ་འཆིང་ཞིང་རང་རང་གི་མཚན་མ་བརྗོད་པ་སྔོན་དུ་སོང་བས། སེམས་ཅན་ཐམས་ཅད་ངན་སོང་ལས་བཏོན་ནས་མངོན་པར་རྫོགས་པར་སངས་རྒྱས་པར་མཛོད་ཅིག་ཅེས་པ་དང་། འཇིག་རྟེན་པ་རྣམས་ལ་མངོན་པར་སངས་རྒྱ་བའི་གྲོགས་མཛོད་ཅིག་ཅེས་བསྐུལ་བར་བྱའོ། །དེའི་རྗེས་སུ་རང་རང་གི་དཀྱིལ་འཁོར་གྱི་གཙོ་བོའི་ང་རྒྱལ་གྱིས་རང་རང་གི་ལྷ་ཐམས་ཅད་གསུངཾ་བར་དམིགས་པའི་ཐུགས་ཀར་ཟླ་བ་ལ་མཐར་རྩ་རིག དེའི་དབུས་སུ་རང་རང་གི་སྔགས་བཀོད་ནས་ཕྱིར་དྲིལ་ཅིག་ཆར་གྱིས་བཟླས་པའམ། རྐྱང་དོན་རིམ་གྱིས་བཟླས་པ་གཉིས་ཀྱི་བྱེ་བྲག་སྔར་བཞིན་ཤེས་པར་བྱས་ལ་འོད་ཟེར་སྤྲོས། དོན་གཉིས་བྱས་ཚུར་འདུས་སྔགས་ལ་ཐིམ་པར་བསམ་ཞིང་། ཐུན་བཞིའི་དང་པོ་ཐོ་རངས་ཐམས་ཅད་བསྐྱེད་ལ་བཟླའོ། །གསུམ་པ་རྗེས་ནི། བཟླས་པས་སྐྱོ་ན་ཐུན་མཚམས་སུ་ཡི་གེ་བརྒྱ་པས་ནུས་པ་བརྟན་པར་བྱས་ལ་མཆོད་ཅིང་བསྟོད་དེ་སྤྱོད་ལམ་བྱའོ། །ཐུན་གཉིས་པ་དང་གསུམ་པ་ལ་རང་བྱུང་རང་ཞུགས་སོ། །ཐུན་བཞི་པ་བཟླས་པས་སྐྱོ་ན་མཆོད་ཅིང་བསྟོད་པ་རྩ་རིག་གིས་ཕྱག་རྒྱ་དགྲོལ་ཞིང་ཡི་གེ་བརྒྱ་པ་བརྗོད། དགེ་བ་བསྔོ། བཟོད་པར་གསོལ། མཆོད་ཡོན་ཕུལ་ལ། སྤྱན་དྲངས་པའི་ཡེ་ཤེས་པ་གཤེགས་ཤིང་དམ་ཚིག་པ་བསྡུས་ཏེ། བདག་ཉིད་བསྲུངས་ལ་ཀུན་སྤྱོད་དགེ་བའི་ལས་འབའ་ཞིག་བྱ་སྟེ། ལྷའི་མཚན་མ་ཐོབ་པར་བྱེད་པ་ནི་བསྙེན་པའོ། །གཉིས་པ་སའི་ཆོ་ག་ལ་ནི་གསུམ། །ས་གཞི་གཟུང་དང་སྦྱང་བ་གཉིས། །ལྷ་ཡི་རྣལ་འབྱོར་སྔོན་སོང་ནས། །བགེགས་བསྐྲད་བསྲུང་པ་གསུམ་ཡིན་ཏེ། །གཟུང་བདེའི་ཕྱིར་དུ་ཀུན་རིག་བཞིན། །ཉམས་ལེན་ཐམས་ཅད་ཐུན་མོང་དུ། །གནས་ཀྱི་བྱེ་བྲག་བརྟགས་བྱས་ལ། །མཁས་པས་རིམ་བཞིན་སྦྱང་བར་བྱ། །གསུམ་པ་ཐིག་ལ་གསུམ་ཡིན་ཏེ། །བྱིན་གྱིས་བརླབ་པ་ཀུན་རིག་བཞིན། །གདབ་པ་དང་ནི་ཆ་དབྱེ་བ། །སྒོ་རྐྱང་མཐོང་བ་བརྒྱུད་བཞིན་གདབ། །བཞི་པ་སྟ་གོན་དག་ལ་གསུམ། །ལྷ་དང་བུམ་པ་སློབ་མའོ། །དང་པོ་རང་གི་འབྱིན་སྔགས་ཀྱིས། །ཐིག་ལེ་དང་ནི་ཚོམ་བུ་ལས། །ལྷ་རྣམས་བསྐྱེད་པ་སྤྱན་དྲངས་བསྒྲུབ། །མཆོད་བསྟོད་མཉེས་བྱས་སླར་བསྡུའོ། །བུམ་པ་མཚན་ཉིད་ལྡན་པ་ལ། །རྫས་དང་རྒྱན་གྱིས་མཛེས་པ་ཡིས། །སྦྱངས་ཏེ་ཐུན་མོང་ཁྱད་པར་སྔགས། །བཟླས་བྱས་མཆོད་དེ་བདུད་རྩིར་བསམ། །སློབ་མས་ཡོན་དབུལ་གསོལ་བ་གདབ། །ཉན་པར་བསྐུལ་ཞིང་སྡིག་པ་བཤགས། །རྗེས་སུ་ཡི་རང་སྐྱབས་སུ་འགྲོ། །སེམས་བསྐྱེད་ལམ་གནས་སྨོན་པ་བརྒྱད། །ཁྱད་པར་སེམས་བསྐྱེད་བྱིན་བརླབ་མཆོད། །སོ་ཤིང་དོར་དང་ཀུ་ཤ་སྦྱིན། །སྲུང་སྐུད་སྨོན་ལམ་གདབ་པ་ལྔ། །ཟབ་མོའི་ཆོས་བཤད་ངན་པ་བཟློག །རྣམ་པར་ཕྱེ་ན་བཅོ་ལྔ་ཡང་། །སྦྱར་བ་དངོས་གཞི་རྗེས་ཀྱིས་བསྡུ། །དེ་རྣམས་ཚིག་གིས་བྱེད་པ་རྣམས། །ཀུན་རིག་བཞིན་དུ་ཤེས་པར་བྱའོ། །ལྔ་པ་བྲི་ཞིང་བསྒྲུབ་པ་གཉིས། །བྲི་ལ་བྱིན་བརླབ་ཕུར་བུ་དབྱུང་། །ཀུན་རིག་བཞིན་དུ་ཀུན་ལ་སྦྱར། །ཚོན་རིམ་དཀར་སྔོ་དམར་ལྗང་ནི། །ཤིང་སོགས་ཕྱོགས་བཞི་མཚམས་བརྒྱད་མཚོན། །དབུས་ནི་གཙོ་བོའི་ཁ་དོག་བཞིན། །ཀ་གདུང་རྩིབས་བརྟེན་འཁོར་ལོ་སྔོ། །གོང་རས་མཛེས་ཚོན་སྣམ་བུ་དམར། །པདྨ་ཟླ་བའི་གདན་དག་ལ། །རང་རང་སྔགས་ཀྱིས་ལྷ་བསྐྱེད་པ། །བསྙེན་པའི་སྐབས་བཞིན་རང་གནས་སུ། །ཅི་རིགས་པ་ཡི་མཚན་མ་དགོད། །དེ་རྗེས་མཆོད་པའི་རྫས་དགོད་པ། །འཇིག་རྟེན་པ་ལ་རང་རིགས་ཀྱི། །མཚན་མའི་ལྷ་བུམ་དང་བཅས་པ། །ཐམས་ཅད་ཀུན་རིག་བཞིན་དུ་བཤམ། །བསྒྲུབ་པ་ལ་ནི་རྣམ་ལྔ་སྟེ། །དང་པོ་བདག་བསྐྱེད་རྣལ་འབྱོར་ནི། །བསྙེན་པའི་སྐབས་སུ་བསྟན་པ་བཞིན། །རང་རང་གཙོ་བོར་བསྐྱེད་ནས་ཀྱང་། །ཅུང་ཞིག་བཟླས་པ་བྱེད་པའོ། །གཉིས་པ་བུམ་པར་བཟླས་པ་ནི། །ཐུན་མོང་རྩ་བའི་རིག་པ་དང་། །ཁྱད་པར་རང་གི་སྔགས་ཉིད་ཀྱིས། །བདུད་རྩིར་བསྐྱེད་ནས་དབུལ་བའོ། །གསུམ་པ་སློབ་དཔོན་འཇུག་པ་ནི། །རྣམ་པ་བརྒྱད་ཀྱིས་ཤེས་བྱ་སྟེ། །ཀུན་རིག་བཞིན་ལས་ཁྱད་པར་དག །སློབ་འཇུག་སྐབས་བཞིན་འདིར་ཤེས་བྱ། །བཞི་པ་དངོས་ཀྱི་བྱ་བ་ནི། །སྟོང་པའི་ངང་ལས་རྟེན་དང་ལྷ། །བསྐྱེད་ལ་སྤྱན་དྲངས་གཅིག་ཏུ་བསྒྲུབ། །བྱིན་གྱིས་བརླབ་ཅིང་རྒྱས་གདབ་སྟེ། །མཆོད་དང་བསྟོད་པས་མཉེས་བྱས་ནས། །ལས་གཞོལ་བཟླས་པ་བྱེད་པའོ། །ལྔ་པ་གཏོར་མའི་ཆོ་ག་ནི། །འབྱུང་པོ་ཐམས་ཅད་ཚིམ་བྱས་ཏེ། །སློབ་མའི་སྐབས་བཞིན་བདག་ཉིད་ཀྱིས། །དབང་བསྐུར་ལ་ནི་སཾར་བྱེད་པའོ། །རྡོ་རྗེ་སློབ་དཔོན་གྱི་ལས་ཀྱི་རིམ་པའོ། །དོན་གཉིས་པ་སློབ་མ་འཇུག་ཅིང་དབང་བསྐུར་བ་ལ་གཉིས་ལས། འཇུག་པ་ལ་ནི་ཆོས་བརྒྱད་ཀྱི། །དང་པོ་ཆས་སུ་གཞུག་པ་ནི། །ཁྲུས་དང་ཕྱག་ཡོན་སྔོན་སོང་ནས། །གོས་བྱིན་མིག་དར་བཅིང་བྱས་ལ། །སྔགས་ཀྱི་སྡོམ་པ་ལེགས་གནས་པའོ། །གཉིས་པ་འཇུག་པ་དངོས་ཉིད་ནི། ཤཱཀ་ཐུབ་ལ་ནི་ཀུན་རིག་བཞིན། །ཐུགས་ལ་ཏི་རིའི་ཕྱག་རྒྱ་འོ། །གསུང་ལ་ཁྱད་པར། ཨོཾ་བཛྲ་དྷ་ར་རཏྣ་དྷ་ར། སོགས་ཀྱིས་སློབ་མ་རིགས་ལྔར་བསྐྱེད་པའོ། །འཁོར་ལོས་སྒྱུར་བར། ཨོཾ་བཛྲ་ཧཱུྃ་ཛཿཡིས་སྒོ་བཞི་ནས་འཇུག་པའོ། །མེ་ལྟར་འབར་བར་ཨོཾ་བཛྲ་ཀྲོ་དྷ་ས་མ་ཡ་ཧཱུྃ་གིས་སོ། །ཕྱོགས་སྐྱོང་བཅུའི་དཀྱིལ་འཁོར་དུ། རྡོ་རྗེ་ཐལ་མོའི་མཛུབ་མོ་བརྐྱང་བ་རྡོ་རྗེ་གནོད་སྦྱིན་གྱི་ཕྱག་རྒྱས་སོ། །གཟའ་ཆེན་གྱི་ལ། ཨོཾ་བཛྲ་ཧ་ན་ཧ་ན་ཧཱུྃ་ཕཊ་ཀྱིས་སོ། །ཀླུའི་ལ་ཐལ་མོའི་ཧཱུྃ་གཉིས་རྩེ་སྤྲད་དེ། ཨོཾ་གཉིས་བསྣོལ་ལྷག་མ་རྣམས་བརྐྱང་བ་སྦྲུལ་མགོའི་ཕྱག་རྒྱས་སོ། །འཇིག་རྟེན་དུ་སྙིམ་པ་བཟེད་པ་མགོ་ཐོད་ཕྱག་རྒྱའོ། །གསུམ་པ་ཡེ་ཤེས་ཕབ་བརྟན་བྱ་བ་ནི། ཡོན་ཏན་གྱི་ལ། ཨོཾ་བཛྲ་ས་མ་ཡ་པྲ་བེ་ཤ་ཡ་ཧཱུྃ་གིས་འབེབས་པའོ། །ཕྲིན་ལས་ཀྱི་ལ། ཨོཾ་བཛྲ་ནཾཾ་ཤཾཾ་བཾཾ་ཧཱུྃ་ཕཊ། ཀྱིས་བརྟེན་པར་བྱེད་པའོ། །བཞི་པ་མེ་ཏོག་དོར་ལ་བཅིང་བ་ནི། ཐུགས་སུ། ཨོཾ་པྲ་ཏཱི་ཙ་བཛྲ་ཧཱུྃ་གིས་སོ། །ཨོཾ་སརྦ་ཏ་ཐཱ་ག་ཏ་པྲ་ཏཱིཙྪ་ཧོཿས་མ་ཡ་སཏྭཾ་གྱིས་འདོར་འཆིང་གཉིས་ཀའོ། །ཨོཾ་བཛྲ་པཱ་ཎི་པྲ་ཏཱིཙྪ་བཛྲ་ས་ཏྭ་མ་ཧཱ་སུ་ཁ་ཧཱུྃ་ཧ་ཧ་ཧ་ཧ་ཧོཿས་མ་ཡ་སཏྭཾ་གྱིས་དོར་ནས་བབ་པའི་ལྷ་དེའི་སྔགས་ཀྱིས་འཆིང་བའོ། །ཨོཾ་བཛྲ་ཀྲོ་དྷ་ཨ་ན་ལ་སྤུ་ཏྲ་པྲ་ཏཱིཙྪ་ཧཱུྃ་གིས་སོ། །རྒྱལ་པོའི་ལ། ཨོཾ་པྲ་ཏཱིཙྪ་དྷི་མ་ཧོ་ཏ་མ་ཡིས་སོ། །ཨོཾ་གྲ་ཧ་ས་མ་ཡེ་ཧཱུྃ་གིས་དོར། ཨོཾ་བཛྲ་གྲ་ཧ་པྲ་ཏཱིཙྪ་ས་མ་ཡ་ཧཱུྃ་གིས་འཆིང་བའོ། །པྲ་ཏཱིཙྪ་དྷཾ་མ་ཧཱ་ས་ཏྭ་བཛྲ་དྷ་ར་ཨཱཏྨ་ཡ་ཧ་ཧ་ཧ་ཧ་ཧོཿཡིས་དོར་བའོ། །ལྔ་པ་མིག་དབྱེ་ཞིང་དཀྱིལ་འཁོར་བསྟན་པ་ནི། ཨོཾ་བཛྲ་ཙཀྵུ་པ་ཤ་ཧོ་ཨཱཏྨ་ས་མ་ཡ་ན་ཏ་མནྟྲ་ཀྵེ་ཧཱུྃ་གིས་ཕྱེ་ལ། ཨོཾ་བཛྲ་ཀྲོ་དྷ་ན་ནི་རཀྵ་ཧཱུྃ་པ་ཤེ་ཕཊ། ཨོཾ་བཛྲ་ཀྲོ་དྷ་ས་མ་ཡེ་ན་བྷིཾ་རཾ་བྷཾ་ཧུ་ཧཱུྃ་ཕཊ་ཀྱིས་ཕྱེ་ཞིང་བསྟན་པའོ། །དྲུག་པ་དམ་ཚིག་བསྐྱེད་ཅིང་བརྟན་པ་ནི། ཨོཾ་ཅི་སྟེ་ཁྱོད་ཀྱིས་སུ་ཡང་རུང་བ་ལ་སྨྲས་ན་ནི། ཕྱག་ན་རྡོ་རྗེ་ཉིད་ཀྱིས་རྡོ་རྗེ་འབར་བ་རབ་ཏུ་འབར་བས་ཁྱོད་ཀྱི་མགོ་བོ་བཀས་པར་འགྱུར་རོ། །ཨོཾ་བཛྲ་ས་མ་ཡ་ཌི་ཏ་ཏིཥྛ་ཧཱུྃ་ཨཱཿཡིས་སོ། །ཨོཾ་བཛྲ་ཀྲོ་དྷ་ས་མ་ཡ་མ་ཏི་ཀྲ་མ་ཧཱུྃ་ཕཊ་ཀྱིས་སོ། །བདུན་པ་དམ་ཚིག་བསྒྲག་པ་ཀུན་རིག་བཞིན་ནོ། །བརྒྱད་པ་སྡོམ་པ་འབོགས་པ་ནི་ཀུན་རིག་བཞིན་ནོ། །དེ་ལྟར་འཇུག་པའི་ཆོས་བརྒྱད་ནི་དམིགས་བསལ་མེད་པ་རྣམས་ནི་ཀུན་རིག་བཞིན་དུ་ཤེས་པར་བྱའོ། །འཇུག་པའི་ཆོས་བསྟན་ཏེ། དབང་བསྐུར་བ་ལ་ནི་རྣམ་པ་གཉིས་ཏེ། བསྐུར་བ་དངོས་དང་། མཇུག་གི་ཆོས། དངོས་གཞི་ལ་རིམ་པ་ཉི་ཤུ་སྟེ། ཀུན་རིག་བཞིན་ལས་ཁྱད་པར་ནི། ཚེ་དཔག་མེད་ཀྱི་དཀྱིལ་འཁོར་དུ་བུམ་དབང་གི་ཁྱད་པར། ཨོཾ་སརྦྦ་ཏ་ཐཱ་ག་ཏ་ཨ་བྷི་ཥིཉྩ་བཛྲ་དྷ་ར་ཡ་ཛྙཱ་ཡ་ཧཱུྃ་ཧཱུྃ་སོགས་སོ། །འཁོར་ལོས་སྒྱུར་བ་ཡོན་ཏན་གྱི་དཀྱིལ་འཁོར་དུ་བུམ་དབང་གི་ཁྱད་པར། ཨོཾ་བཛྲ་པཱ་ནི་སྭོ་ཡཾན་ཏེ་ཨ་ནུ་རཀྟོ་ཨ་བྷི་ཥིཉྩ་ཏྲཱཾ་ཞེས་སོགས་སོ། །མེ་ལྟར་འབར་བའི་དཀྱིལ་འཁོར་དུ་བུམ་དབང་གི་ཁྱད་པར། ཨོཾ་བཛྲ་ཀྲོ་དྷ་ར་ཀྲི་ས་མ་ཡ་ཨ་བྷི་ཥིཉྩ་ཧཱུྃ་ཕཊ་ཀྱིས་སོ། །འཇིག་རྟེན་པ་རྣམས་ཀྱིས་ལ་རང་རང་གི་ས་བོན་ལ་ཨ་བྷི་ཥིཉྩ་ཧཱུྃ་བཏགས་ལ་བུམ་པའི་དབང་བསྐུར་བ་ནི་ཁྱད་པར་རོ། །དེ་རྗེས་ཆུ་དང་ཅོད་པཎ་དར་དཔྱངས་དང་། །ཕྱག་མཚན་བདག་པོ་མིང་དབང་དང་། །འཁོར་ལོ་ཕྲིན་ལས་གཟུངས་དང་ནི། །གསང་དབང་ཤེས་རབ་ཡེ་ཤེས་ནི། །ཀུན་རིག་བཞིན་ལས་ཁྱད་པར་དུ། །རང་རིགས་དང་པོར་སྨོས་པས་སོ། །འཁོར་ལོ་གླང་པོ་རྟ་མཆོག་དང་། །ནོར་བུ་བཙུན་མོ་བློན་པོ་དང་། །དམག་དཔོན་རིན་ཆེན་བདུན་གྱི་དབང་། །ཆོས་ཀྱི་རྗེས་གནང་ཀུན་རིག་བཞིན། །རང་རང་སྔགས་ཀྱི་གནང་བ་སྦྱིན། །འདས་པ་ལྔ་ལ་བཀའ་དབང་བསྐུར། །དམ་ཚིག་སྦྱིན་ཞིང་བཀའ་བསྒོ་བ། །ཀུན་རིག་བཞིན་དུ་ཐམས་ཅད་ལའོ། །མཆོད་ཡོན་སྔོན་སོང་ཡོན་དབུལ་ཞིང་། །སྟོན་མོས་ཚིམ་བྱས་ཤིས་པ་བརྗོད། །སློབ་མ་བསྲུང་བ་དག་རྗེས་སོ། །གཏོར་མ་དབུལ་ཞིང་མཆོད་དང་བསྟོད། །ཡི་གེ་བརྒྱ་པས་བརྟན་བྱ་ཞིང་། །བཟོད་གསོལ་དགེ་བ་བསྔོ་བ་དང་། །མཆོད་ཅིང་ཡེ་ཤེས་གཤེགས་སུ་གསོལ། །སྤྲུལ་པ་བསྡུས་དེ་དམིགས་མེད་བསྒོམ། །རྡུལ་ཚོན་ཕྱགས་ལ་ཆུ་བོར་དོར། །ལས་རྗེས་བསྡུས་ཤིང་བདག་བསྲུངས་ནས། །སྤྱོད་ལམ་དགེ་ལ་བརྩོན་བྱེད་པ། །དཀྱིལ་འཁོར་རྗེས་ཀྱི་བྱ་བའོ། །སོ་སོའི་དཀྱིལ་འཁོར་དུ་གཞུག་ཅིང་དབང་བསྐུར་བའི་རིམ་པའོ། །གསུམ་པ་དངོས་གྲུབ་ཀྱི་ཡེ་ཤེས་ལ་བསླབ་པ་ནི། རང་རང་དཀྱིལ་འཁོར་དུ་རང་རང་གི་སྔགས་ཀྱི་གནང་བ་ཐོབ་པའི་རྣལ་འབྱོར་པས་གནས་ཁྱད་པར་ཅན་དུ་དུས་བཟང་པོ་ལ་ཡོ་བྱད་འཚོགས་པར་བྱས་ནས། ལྷའི་མཚན་མ་ཐོབ་པས་སྤྱིར་བསྒྲུབ་པར་ཤེས་པར་བྱའོ། །ཤཱཀ་ཐུབ་ཀྱི་ལ་བརྟེན་རས་རིས་རང་གི་ཚུལ་དུ་བྲིས་ལ། བསྒྲུབ་པ་ཀུན་རིག་བཞིན་ནོ། །ཐུགས་ཀྱི་དང་། གསུང་གི་བསྒྲུབ་ཚུལ་ནི་གཞུང་དུ་འབྱུང་ངོ་། །ཡོན་ཏན་གྱི་དང་། ཕྲིན་ལས་ཀྱིའང་རང་རང་གི་རྣལ་འབྱོར་གྱིས་མཚན་མའི་བསྙེན་པ་ཐོབ་པར་བྱས་ནས་བསྒྲུབ་པའི་ཚེ། དཀྱིལ་འཁོར་གྱི་དབུས་སུ་ལས་གང་བསྒྲུབ་ཀྱི་ཐུགས་ཀར་སྔགས་ཕྲེང་བཀོད་དེ། བཟླས་བརྗོད་ཀྱིས་རང་ཉིད་དངོས་གྲུབ་ཐོབ་པར་བྱས་ནས་གཞན་དོན་ཕྲིན་ལས་སྣ་ཚོགས་བྱེད་པའོ། །འཇིག་རྟེན་པའི་དཀྱིལ་འཁོར་རྣམས་ལ་གཙོ་བོ་ཕྱག་ན་རྡོ་རྗེ་ཞི་ཁྲོ་གཉིས་ཀྱི་རྣལ་འབྱོར་གྱིས་མཚན་མ་ཐོབ་པས་སྒྲུབ་པའི་ཚུལ་ནི་རང་རང་འཇིག་རྟེན་པ་གང་རུང་མདུན་དུ་བསྐྱེད་པ་དང་། རང་རྒྱུད་པ་སྤྱན་དྲངས་པ་གཉིས་གཅིག་ཏུ་བསྒྲུབས་ནས། བཟླས་བརྗོད་ཀྱིས་ཐུན་མོང་གི་དངོས་གྲུབ་ཅི་རིགས་པ་ཐོབ་པར་བྱེད་པའོ། །བཞི་པ་སྡིག་པ་སྦྱོང་བའི་ཐབས་ཀྱི་བྱེ་བྲག་ནི། ཀུན་རིག་ལས་འབྱུང་བ་བཞིན། འཇིག་རྟེན་ལས་འདས་པའི་དཀྱིལ་འཁོར་ལྔ་རྣམས་སུ་ཤེས་པར་བྱ་བ་ནི། རྟེན་གྱི་བྱེ་བྲག་ཕྱེ་བ་ཡིས། །དབང་བསྐུར་གཉིས་ཀྱི་སྦྱོར་བ་དང་། །མཆོད་རྟེན་དྲི་གཙང་ཁང་ནང་དུ། །བཞག་པར་བྱ་སྟེ་དབང་བསྐུར་རོ། །མཆོད་རྟེན་བཟླས་བརྗོད་བྱེ་བ་སྟོང་། །སྦྱིན་སྲེག་རོ་སྲེག་རྣམ་གཉིས་དང་། །ཕྱིར་བཟློག་སྦྱང་བའི་ཐབས་དགུ་ནི། །ཀུན་རིག་བཞིན་དུ་ཤེས་བྱའོ། །ཞེས་ངན་སོང་སྦྱོང་རྒྱུད་ཀྱི་དཀྱིལ་འཁོར་གྱི་ཆོ་ག་རིན་ཆེན་སྒྲོན་མ་ལས་འབྱུང་ངོ་། །འདི་ལ་ཐོག་མར་ཚད་མེད་བཞི་བསྒོམ་པ་ནི་མི་དགོས་ཤིང་། གཞལ་ཡས་ཁང་གྲུ་བཞི་སྒོ་བཞི་པ་ཤར་ཤེལ་དཀར་པོ་ལ་སོགས་པ་ནི། རྩིག་པའི་ཁ་དོག་དང་ལྷ་རྣམས་གང་ལ་སྦྱར་ནའང་། འདིའི་ལུགས་ལ་མེད་པས་ལུགས་གཞན་ཞིག་གིས་འཁྲུལ་གཞི་བྱས་པའོ། །ཕྱག་རྒྱ་འགའ་ཞིག་ཀྱང་རྒྱུད་དང་བསྟུན་ནས་དག་པར་བྱ་དགོས་པར་སྣང་ཞིང་། དཀྱིལ་འཁོར་མ་བསྒྲུབ་པའི་གོང་དུ་འཇུག་པ་སྔར་བཀག་ཟིན། འདས་པ་ལྔ་ལ་བཀའི་དབང་བསྐུར་ཞེས་པ་ཡང་བཀའི་དབང་བསྐུར་བ་ཚེ་དཔག་མེད་ལ་དགོས་ཀྱི་གཞན་ལ་མི་དགོས་སོ། །འཇིག་རྟེན་པ་རྣམས་རང་རྒྱུད་པར་འདོད་པ་ནི་འོག་ཏུ་འགོག་པར་འགྱུར་རོ། །གཞན་རྣམས་ནི་ལུགས་འདི་ལ་ཆོ་ག་འདི་བཞིན་དུ་བྱེད་དགོས་པ་འདྲའོ། །ཡང་འཛིན་པ་བློ་ཆེན་གྱིས་བདག་བསྐྱེད་དཔའ་བོ་གཅིག་པའི་སྐབས་སུ་སྲུང་འཁོར་དང་གཟུགས་བརྙན་གྱི་སྦྱོར་བ་སོགས་མི་བྱེད་པར་ཚོགས་གཉིས་བསགས་པ་སྔོན་དུ་སོང་ནས་རྡོ་རྗེ་ཆོ་ག་གསུམ་ལས་རྡོ་རྗེ་སེམས་དཔའ་བསྐྱེད་ནས། སྐུ་གསུང་ཐུགས་བྱིན་བརླབ་དང་། ཡེ་ཤེས་ཀྱི་འཁོར་ལོ་དགུག་གཞུག་དང་། དབང་བསྐུར་རིགས་བདག་གིས་རྒྱས་གདབ་རྣམས་བླ་མེད་ལྟར་བྱེད་པ་དང་། བསྙེན་པ་རྒྱས་པའི་སྐབས་དང་། མདུན་བསྐྱེད་རྣམས་ལའང་དེ་བཞིན་དུ་བྱེད་པ་དང་། བུམ་བསྐྱེད་ཀྱི་སྐབས་སུ་ལས་བུམ་དང་། གཏོར་མའི་སྐབས་སུ་འདས་གཏོར་དང་། འཇུག་པའི་སྐབས་སུ་དམ་གཞག་བཞི་བྱེད་པ་དང་། དབང་གི་དངོས་གཞིའི་སྐབས་སུ་སྔགས་དབང་རྣམས་ཆུ་དབང་གི་སྐབས་སུ་བྱེད་པ་དང་། འདིར་དབང་པོ་རབ་ཀྱི་དབང་དུ་བྱས་ནས་སྐད་ཅིག་གིས་བསྐྱེད་པའི་རིམ་པ་གསུངས་པའི་ཤེས་བྱེད་དུ། རྣམ་སྣང་མངོན་བྱང་དང་། མཚན་བརྗོད་ཀྱི་ལུང་དྲངས་པ་རྣམས་ནི་ཕན་ཚུན་ནང་འགལ་ཞིང་། བླ་མེད་ཀྱི་ཆོ་ག་བསྲེས་ནས་རྒྱུད་འདི་ནས་འབྱུང་བའི་ཆོ་ག་རྣམས་དོར་བར་སྣང་བས་ཤེས་ལྡན་དག་གིས་སྤང་བ་བྱའོ། །གཉིས་པ་གཞུང་དོན་ལ་གསུམ་སྟེ། སྡུད་པ་པོའི་མཚམས་སྦྱོར་དང་། སྟོན་པ་གདན་ལས་བཞེངས་ཏེ་ཕྱག་བྱས་ནས་ཏིང་ངེ་འཛིན་ལ་སྙོམས་པར་ཞུགས་པ་དང་། རྒྱུད་ཀྱི་གཞུང་ངོ་། །དང་པོ་ནི། དེ་ནས་བཅོམ་ལྡན་འདས་ཞེས་སོགས་སོ། །གཉིས་པ་ནི། བདུད་བཞི་འཇོམས་པས་ན་དཔའ་བོ་སྟེ། འཁོར་གྱི་ཚུལ་སྟོན་པའི་ཕྱག་ན་རྡོ་རྗེ་ཡེ་ཤེས་ཀྱི་སྣང་བ་ལས་གྲུབ་པའི་གདན་ལས་བཞེངས་ནས་ནི་ཞེས་སོགས་སོ། །གསུམ་པ་ལ་ལྔ་སྟེ། ཤཱཀྱ་ཐུབ་པ་སྐུའི་དཀྱིལ་འཁོར་དང་། ཕྱག་ན་རྡོ་རྗེ་ཐུགས་ཀྱི་དཀྱིལ་འཁོར་དང་། ཚེ་དཔག་མེད་གསུང་གི་དཀྱིལ་འཁོར་དང་། འཁོར་ལོས་སྒྱུར་བ་ཡོན་ཏན་གྱི་དཀྱིལ་འཁོར་དང་། མེ་ལྟར་འབར་བ་ཕྲིན་ལས་ཀྱི་དཀྱིལ་འཁོར་རོ། །དང་པོ་ལ་ལྔ་སྟེ། སྔགས་ཀྱི་ཕྲེང་བ་དང་། རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་ཕན་ཡོན་དང་བཅས་ཏེ་བསྟན་པ་དང་། ཕྱག་རྒྱའི་ཡེ་ཤེས་དང་། དངོས་གྲུབ་ཀྱི་ཡེ་ཤེས་དང་། ནོར་བུ་དྲི་མ་མེད་པའི་འོད་ཀྱི་སྐྱེ་རྒྱུད་བསྟན་པའོ། །དང་པོ་ནི། ངན་སོང་ཐམས་ཅད་རྣམ་པར་སྦྱོང་བ་ཞེས་སོགས་ཏེ། འདི་མན་ཆད་དུ་སྔགས་ཕྲེང་རྣམས་ནི་བསྙེན་པ་རྒྱས་པ་ལ་བསྐྱེད་སྔགས་དང་། བཟླས་སྔགས་དང་། མདུན་བསྐྱེད་ལ་བཀོད་པའི་སྔགས་དང་ཕྱག་རྒྱ་སྟོན་པ་དང་། བུམ་པ་ལ་བཟླས་པ་ཐམས་ཅད་དུ་དགོས་པར་ཤེས་པར་བྱའོ། །སྐབས་འདིར་སྔགས་གང་ལས་ལྷ་གང་བསྐྱེད་པ་དང་ཕྱོགས་གང་དུ་དགོད་པ་དང་། སྐུ་མདོག་དང་ཕྱག་མཚན་ཙམ་ཞིག་བརྗོད་པ་ཡིན་ལ། ཆོ་གའི་ཆིངས་ནི་སྔར་བཤད་པ་ལྟར་ཤེས་པར་བྱའོ། །དེ་ལ་འདིར་གཞལ་ཡས་ཁང་སྒོ་རྐྱང་སྤྱི་དང་མཐུན་པའི་ལྷ་སྣམ་གྱི་དབུས་སུ་འཁོར་ལོ་རྩིབས་བརྒྱད་ལྟེ་བ་དང་བཅས་ཤིང་རྩིབས་རྟེན་རྡོ་རྗེའི་ཕྲེང་བས་བསྐོར་བའི་སྟེང་དུ་སྣ་ཚོགས་པདྨ་དང་ཟླ་བ་ལ་ཨོཾ་སརྦ་པཱ་པཾ་ད་ཧ་ན་བཛྲ་ཧཱུྃ་ཕཊ་ལས་ཤཱཀྱ་ཐུབ་པ་སེར་པོ་གཡས་མཆོག་སྦྱིན་གཡོན་མི་འཇིགས་པ་སྦྱིན་པའམ། ཡང་ན་ཆོས་འཆད་ཀྱི་ཕྱག་རྒྱ་ཅན་དུ་རྩ་སྐྱ་པ་བཞེད་ལ། འཛིམ་པ་རིན་ཤེས་ནི། གཡས་གསེག་ཤང་། གཡོན་སྤར་བུ་འཛིན་པར་བཞེད་དོ། །ཤར་དུ་ཨོཾ་སརྦ་པཱ་པཾ་བི་ཤོ་དྷ་ན་བཛྲ་ཧཱུྃ་ཕཊ། ལས་ཕྱག་རྡོར་དཀར་པོ་རྡོ་རྗེ་དང་དྲིལ་བུ་འཛིན་པའོ། །ལྷོར་ཨོཾ་སརྦ་ཀརྨཱ་ཨཱ་ཝ་ར་ཎ་བྷསྨི་ཀུ་རུ་ཧཱུྃ་ཕཊ། ལས་རྒྱལ་བའི་གཙུག་ཏོར་སྔོན་པོ་མཆོག་སྦྱིན་གྱི་རིན་པོ་ཆེ་འཛིན་པའོ། །ནུབ་ཏུ་ཨོཾ་བྷྲཱུྃ་བི་ཤ་ན་ཡ་ཨཱ་བ་ར་ཎ་ནི་ཧཱུྃ་ཕཊ། ལས་འཁོར་ལོས་སྒྱུར་བ་དམར་སྐྱ་ཆོས་འཆད་དམ་ཏིང་ངེ་འཛིན་གྱི་ཕྱག་རྒྱས་འཁོར་ལོ་རྩིབས་བརྒྱད་པ་འཛིན་པའོ། །བྱང་དུ་ཨོཾ་བྷྲཱུྃ་བི་ཤོ་དྷ་ཡ་ཨཱ་ཝ་ར་ཎ་ནི་ཧཱུྃ་ཕཊ། ལས་རྣམ་པར་རྒྱལ་བ་ལྗང་གུ་མི་འཇིགས་པ་སྦྱིན་པས་སྣ་ཚོགས་རྡོ་རྗེ་འཛིན་པའོ། །ཤར་ལྷོར་ཨོཾ་ཛྭ་ལ་ཛྭ་ལ་དྷ་ཀ་དྷ་ཀ་ཧ་ན་ཧ་ན་ཨཱ་ཝ་ར་ཎ་ནི་ཧཱུྃ་ཕཊ། ལས་གཟི་བརྗིད་ཕུང་པོ་དཀར་དམར་ཕྱག་གཉིས་གཡས་ཉི་མ་གཡོན་དཀུར་བརྟེན་པའོ། །བྱང་ཤར་དུ་ཨོཾ་སྲུཾ་ས་ར་ས་ར་པྲ་ས་ར་པྲ་ས་ར་ཨཱ་ཝ་ར་ཎ་ནི་ཧཱུྃ་ཕཊ། ལས་གདུགས་དཀར་པོ་ཅན་ཕྱག་གཡས་ཀྱིས་གདུགས་འཛིན་པའོ། །ནུབ་བྱང་དུ་ཨོཾ་ཧཱུྃ་ཧ་ར་ཧ་ར་ཨཱ་ཝ་ར་ཎ་ནི་ཧཱུྃ་ཕཊ། ལས་རྣམ་པར་འཐོར་བ་སྔོན་པོ་གཡས་རལ་གྲི། གཡོན་པོ་ཏི་འཛིན་པའོ། །ལྷོ་ནུབ་ཏུ་ཨོཾ་ཧཱུྃ་ཕཊ་སརྦ་ཨཱ་ཝ་ར་ཎ་ནི་ཧཱུྃ་ཕཊ། ལས་གདུགས་དཀར་པོ་ཅན་ཕྱག་གཡས་ཀྱིས་གདུགས་འཛིན་པའོ། །དེ་ཉིད་ཀྱི་གྲྭ་བཞིར་བདུག་སྤོས་མ་ལ་སོགས་པ་བཞི་ནི། ཨོཾ་སརྦ་ཨ་པ་ཡ་བི་ཤོ་དྷ་ནི་དྷ་མ་དྷ་མ་དྷུ་པ་ཡ་ཨ་པཱ་ཡ་ག་ཏི་གནྡྷ་ནི་གནྡྷ་པ་ཏཾ་ཧཱུྃ་ཕཊ། ལས་བྱང་ཤར་དུ་དྲི་ཆབ་མ་དང་། ཨོཾ་སརྦ་ན་ར་ཀ་ག་ཏི་ཨཱ་ཀརྵ་ནི་ཧཱུྃ་ཕཊ། ལས་ཤར་སྒོར་རྡོ་རྗེ་ལྕགས་ཀྱུ་དང་། ཨོཾ་སརྦ་ན་ར་ཀ་བྷི་དྷ་ཏི་ར་ཎི་ཧཱུྃ་ཕཊ། ལས་ལྷོ་སྒོར་རྡོ་རྗེ་ཞགས་པ་དང་། ཨོཾ་སརྦ་ཨ་བྷ་ཡ་བནྡྷ་ནི་མོ་ཙ་ནི་ཧཱུྃ་ཕཊ། ལས་ནུབ་སྒོར་རྡོ་རྗེ་ལྕགས་སྒྲོག་དང་། ཨོཾ་སརྦ་ཨ་བྷ་ག་ཏི་ག་ཧ་ན་བི་ན་ཤ་ནི་ཧཱུྃ་ཕཊ། ལས་བྱང་སྒོར་རྡོ་རྗེ་དྲིལ་བུའོ། །ཨོཾ་བྷྲི་ཏ་སོགས་གསུམ་ནི། ལུས་ངག་ཡིད་གསུམ་གྱི་སྡིག་པ་སྦྱང་། སྐུ་གསུང་ཐུགས་བྱིན་གྱིས་བརླབ་པ་འོག་གི་ཕྱག་རྒྱ་དང་སྦྱར་ཏེ་དཀྱིལ་འཁོར་ཐམས་ཅད་ལ་དགོས་སོ། །ཨོཾ་ད་ཧ་སོགས་ནི། ཕྲེང་སྔགས་ཀྱི་མཇུག་ལ་བཏགས་ལ་བཟླས་ཏེ་ཕྱིར་བཟློག་དང་འབྲེལ་ལོ། །གཉིས་པ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་དབང་བསྐུར་བ་ཕན་ཡོན་དང་བཅས་པའོ། །དང་པོ་ལ་གཉིས་ཏེ། བྲི་ཞིང་ལྷ་དགོད་པ་དང་། དཀྱིལ་འཁོར་དུ་ཞུགས་ཏེ་བདག་བསྐྱེད་ལ། མདུན་བསྐྱེད་བསྒྲུབ་པའོ། །དང་པོ་ནི། དེ་ནས་དེའི་དཀྱིལ་འཁོར་བཤད་དེ། །ཞེས་སོགས་སོ། །གཉིས་པ་ནི། དེ་ནས་དྲི་ཞིམ་ལ་སོགས་པ་ཞེས་སོགས་ཏེ། སྤྱན་འདྲེན་གྱི་སྔགས་འདི་ནི་གོང་འོག་ཀུན་ཏུ་དགོས་སོ། །གཉིས་པ་ནི། དེ་བཞིན་དུ་བཅུག་སྟེ་དབང་བསྐུར་ཞེས་སོགས་སོ། །གསུམ་པ་ཕྱག་རྒྱའི་ཡེ་ཤེས་ནི། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་སེང་གེའི་ལྟ་སྟངས་ཀྱིས་ཞེས་སོགས་ཏེ། སྐུ་གསུང་ཐུགས་བྱིན་གྱིས་བརླབ་པའི་ཕྱག་རྒྱ་ནི། སྔར་གྱི་སྔགས་དང་སྦྱར་ཏེ་གོང་འོག་ཀུན་ཏུ་དགོས་སོ། །རིགས་ལྔའི་ཕྱག་རྒྱ་དང་བདུག་པ་མ་སོགས་བཞིའི་ཕྱག་རྒྱ་ནི་ཀུན་རིག་གི་སྐབས་སུ་ཡང་དགོས་ཤིང་འོག་ཏུ་ཡང་དགོས་སོ། །སེམས་དཔའ་བཅུ་དྲུག་གི་ཕྱག་རྒྱ་ནི་ཀུན་རིག་གི་སྐབས་སུ་དགོས་སོ། །སྒོ་བ་བཞིའི་ཕྱག་རྒྱ་ནི་གོང་འོག་ཀུན་ཏུ་དགོས་སོ། །བདུག་པ་མ་སོགས་བཞིའི་ཕྱག་རྒྱ་གོང་མ་ནི་མཆོད་པའི་ཕྱག་རྒྱ་ཡིན་ལ། འོག་མ་ནི་དམ་ཚིག་གི་ཕྱག་རྒྱ་ཡིན་ནོ། །བཞི་པ་དངོས་གྲུབ་ཀྱི་ཡེ་ཤེས་ནི། སྐུ་གཟུགས་ཀྱི་ཆོ་ག་ནི་འདིར་དེ་བཞིན་དུ་བྱ་སྟེ་ཞེས་སོགས་ཏེ། ཀུན་རིག་གི་སྐབས་དང་བསྒྲུབ་ཚུལ་འདྲ་ཞིང་། བྲི་ཚུལ་ནི་གཞུང་དུ་གསལ་ལ། ཡང་ན་སྐུ་གཟུགས་ནི་དཀྱིལ་འཁོར་གྱི་ཚུལ་དུ་བྲིས་ལ་ཞེས་པས་རས་བྲིས་ཀྱི་དཀྱིལ་འཁོར་ལ་གསལ་བར་བསྟན་ནོ། །ལྔ་པ་ནོར་བུ་དྲི་མ་མེད་པའི་སྐྱེས་རྒྱུད་བསྟན་པ་ལ་གཉིས་ཏེ། དྲི་བ་དང་། ལན་ནོ། །དང་པོ་ནི། དེ་ནས་ཚངས་པ་ལ་སོགས་པའི་ལྷ་ཚོགས་རྣམས་ཀྱིས་ཞེས་སོགས་སོ། །གཉིས་པ་ནི། དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་ཞེས་སོགས་ཏེ། མཚམས་མེད་པ་བྱས་པའི་གང་ཟག་འགྲོ་བ་གཞན་གྱིས་བར་མ་ཆོད་པར་དམྱལ་བར་སྐྱེ་བས་ཁྱབ་པ་ནི་ཕ་རོལ་དུ་ཕྱིན་པའི་ལུགས་ཡིན་ལ། འདིར་ལྷར་སྐྱེས་པར་བཤད་པ་ནི་རྡོ་རྗེ་ཐེག་པའི་ལུགས་ཡིན་ཞིང་། ཀྱེ་རྡོ་རྗེའི་རྒྱུད་ལས་ཀྱང་འདི་ཉིད་འབྱུང་ངོ་། །ཕྱག་ན་རྡོ་རྗེ་ཐུགས་ཀྱི་དཀྱིལ་འཁོར་ལ་གཉིས་ཏེ། ཕྱག་ན་རྡོ་རྗེ་ལ་འཁོར་དེ་བཞིན་གཤེགས་པས་བསྐོར་བའི་དཀྱིལ་འཁོར་དང་། འཇིག་རྟེན་པས་བསྐོར་བའི་དཀྱིལ་འཁོར་རོ། །དང་པོ་ལ་གཉིས་ཏེ། གླེང་བསླང་བ་དང་། གཞུང་ངོ་། །དང་པོ་ལ་གཉིས་ཏེ། འཁོར་གྱིས་བསླང་བ་དང་། སྟོན་པས་བསླང་བའོ། །དང་པོ་ནི། དེ་ནས་བརྒྱ་བྱིན་དང་ཚངས་པ་ལ་སོགས་པ་ལྷའི་བུ་རྣམས་ཞེས་སོགས་ཏེ། ཀོ་ཊ་ཀྵ་ལ་སོགས་པ་བཅུ་ནི་སྒྲ་ཇི་བཞིན་མ་ཡིན་པས་སྒྲ་དྲང་ཐད་དུ་བསྒྱུར་དུ་མི་བཏུབ་སྟེ། སྒྲོན་གསལ་ལས། ཀོ་ཊ་ཀྵ་ལ་སོགས་པའི་སྒྲ། །འཇིག་རྟེན་བསྟན་བཅོས་ལ་མེད་ཅིང་། །དེ་བཞིན་གཤེགས་པའི་བརྡར་གྱུར་པ། །དེ་ནི་ཇི་བཞིན་མིན་པར་བསྒྲགས། །ཞེས་སོ། །དོན་མང་པོ་ལ་འཇུག་སྟེ། སངས་རྒྱས་མཉམ་སྦྱོར་ལས། ཁྱོད་ནི་གླང་པོའི་རྣ་བ་ཅན། །ཁྱོད་ནི་སེང་གེའི་ལྟ་སྟངས་ཅན། །ཁྱོད་ནི་མེ་ལྕེ་འབར་བ་ཅན། །ཁྱོད་ནི་བདེན་པའི་སྤྲིན་ཡིན་ཏེ། །ཁྱོད་ནི་ཕ་ལྟར་སློབ་པ་ཡིན། །ཁྱོད་ནི་མ་ལྟར་སློབ་པ་ཡིན། །ཁྱོད་ནི་བརྟན་པའི་ས་ཡང་ཡིན། །ཁྱོད་ནི་ཆུ་བོའི་གཞུང་ཡང་ཡིན། །ཁྱོད་ནི་འཐོར་བྱེད་རླུང་ཡང་ཡིན། །ཁྱོད་ནི་རིན་ཆེན་འབྱུང་གནས་མཛོད། །ཞེས་གསུངས་ཤིང་། །ཡང་ཁྱོད་ནི་ཕ་ལྟར་བྱམས་པ་སྟེ་ཞེས་སོགས་བཤད་པ་ཡང་སྣང་ལ། གཞན་ཡང་ས་བཅུ་དང་། ཕར་ཕྱིན་བཅུ་དང་། སྟོབས་བཅུ་ལ་འཇུག་གོ །དེ་ན་ཕྱག་ན་རྡོ་རྗེ་ནི། གསང་བའི་མཛོད་ལས། བྱང་ཆུབ་སེམས་དཔའ་ཀུན་ཏུ་བཟང་པོས་གནས་སྐབས་ཀྱི་སྐྱེ་བ་ཐ་དད་པ་ལེན་པར་སྨོན་ལམ་བཏབ་སྟེ་འོག་མིན་གྱི་གནས་སུ་རྡོ་རྗེ་སེམས་དཔའོ། །གཞི་དང་མེ་ཏོག་གིས་བརྒྱན་པར་ནི་ཀུན་ཏུ་བཟང་པོའོ། །གནོད་སྦྱིན་འདུལ་བའི་དབང་ཉེ་བར་བཟུང་ནས་གནོད་སྦྱིན་གྱི་སྡེ་དཔོན་འབྲོག་གནས་བུའི་གནས་སུ་གནས་སོ། །མི་རྣམས་ཀྱི་ཕྱིར་ནི་གནས་བརྟན་ཀུན་དགའ་བོ་ཡིན་ནོ་ཞེས་གསུང་ཤིང་ཐུན་མོང་མ་ཡིན་པའི་གསང་བ་ནས་ཀྱང་འདི་བཞིན་དུ་གསུངས་པས་ཐུགས་རྒྱུད་ཡེ་ཤེས་སུ་སྣང་བའི་ཕྱག་ན་རྡོ་རྗེ་དེ་ཉིད་འཁོར་གྱི་ཚུལ་སྟོན་པའོ། །གཉིས་པ་ནི། དེ་ནས་བཅོམ་ལྡན་འདས་ཕྱག་ན་རྡོ་རྗེས་ཞེས་སོགས་སོ། །གཉིས་པ་གཞུང་ལ་གསུམ་སྟེ། སྔགས་ཀྱི་ཕྲེང་བ་ཕན་ཡོན་དང་བཅས་ཏེ་བསྟན་པ་དང་། རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་དང་། དངོས་གྲུབ་ཀྱི་ཡེ་ཤེས་བསྟན་པའོ། །དང་པོ་ནི། དེ་ནས་བཅོམ་ལྡན་འདས་ཕྱག་ན་རྡོ་རྗེས་ཐམས་ཅད་ཀྱི་ཚེ་དཔག་དུ་མེད་པས་ཁྱབ་པར་འབྱུང་བའི་རྡོ་རྗེ་ཞེས་སོགས་ཏེ། དཀྱིལ་འཁོར་གྱི་ནང་དུ་སྣམ་བུའི་དབུས་སུ་འཁོར་ལོ་རྩིབས་བཞི་པའི་ལྟེ་བར་པདྨ་ལ། ཨོཾ་པུནྱ་པུནྱ་མ་ཧཱ་པུནྱ་ཨ་པ་ར་མི་ཏ་ཨཱ་ཡུར་པུནྱ་ཛྙ་ན་སཾ་བ་རོ་པཱ་ཙི་ཡ་ཀ་རི་སྭཱཧཱ། ལས་ཕྱག་ན་རྡོ་རྗེ། ནུབ་ཏུ་ཨོཾ་ཨ་མྲི་ཏེ་ཨ་མྲི་ཏེ་ཨ་མི་ཏོ་བྷ་ཝ། ཨ་མི་ཏ་བི་ཀྲཱན་ཏེ། ཨ་མི་ཏ་བི་ཀྲཱན་ཏ་ག་མི་ནི་སརྦ་ཀརྨཱ་ཀླེ་ཤཀྵ་ཡཾ་ཀ་རི་ནི་སྭཱཧཱ་ལས་འོད་དཔག་མེད། ཤར་དུ་ཨོཾ་ཀཾ་ཀ་ནི་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཏ་ནི་ཏྲོ་ཏ་ནི། ཏྲ་ས་ནི་ཏྲ་ས་ནི། པྲ་ཏི་ཧ་ན་པྲ་ཏི་ཧ་ན་སརྦ་ཨཱ་བ་ར་ཎ་བི་ཎ་ཤ་ནི་ཧ་ར་ཧ་ར་ཀརྨ་པ་རཾ། པ་ར་ནི་མེ་སརྦ་སཏྭ་ནན་སྭཱ་ཧཱ་ལས་མི་བསྐྱོད་པ། ལྷོར་ཨོཾ་རཏྣེ་རཏྣེ་མ་ཧཱ་རཏྣེ་སཾ་བྷ་ཝེ། རཏྣ་ཀེ་རཏྣེ། རཏྣ་མ་ལ་བི་ཤུདྡྷེ་ཤོདྷ་ཡ་སརྦ་པཱ་པཾ་ཧཱུྃ་ཏྲ་ཐ། ལས་རིན་ཆེན་འབྱུང་ལྡན། བྱང་དུ་ཨོཾ་ཨ་མོ་གྷ་ཨ་པྲ་ཏི་ཧ་ཏ་སརྦ་ཨཱ་ཝ་ར་ཎ་བི་ན་ཤ་ནི་ཧ་ར་ཧ་ར་ཧཱུྃ་ཕཊ། ལས་དོན་ཡོད་གྲུབ་པ་སྟེ་ཐམས་ཅད་ཀྱང་སྐུ་མདོག་དཀར་པོ་རིན་པོ་ཆེ་སྣ་ཚོགས་ཀྱིས་བརྒྱན་པ། གཙོ་བོ་ནི་རྡོ་རྗེ་དང་དྲིལ་བུ་འཛིན་པ། གཞན་རྣམས་གཡས་མཆོག་སྦྱིན། གཡོན་མི་འཇིགས་པ་སྦྱིན་པ་རྡོ་རྗེའི་སྐྱིལ་ཀྲུང་གིས་བཞུགས་པའོ། །གྲྭ་བཞིར་བདུག་སོགས་བཞི་དང་། སྒོ་བཞིར་སྒོ་བ་བཞི་ནི། སྔར་དང་འདྲ་བ་ལས་འདིར་སྒོ་བ་རྣམས་ཁྲོ་བོའི་ཆ་ལུགས་ཀྱིས་བཞུགས་པའོ། །གཞན་ཕན་འོད་ཟེར་ལས་སྒོ་བ་བཞི་བཞེངས་པའི་ཁྲོ་བོ་ཡིན་པ་དགག་པ་ནི་བཞེངས་པ་དགག་པ་ཡིན་གྱི་ཁྲོ་བོ་ཡིན་པ་དགག་པ་མ་ཡིན་ནོ། །གཉིས་པ་རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་ལ་དབང་བསྐུར་བའོ། །དང་པོ་ལ་གཉིས་ཏེ། བྲི་ཞིང་ལྷ་དགོད་པ་དང་། དཀྱིལ་འཁོར་བསྒྲུབ་པའོ། །དང་པོ་ནི། དེ་ནས་དཀྱིལ་འཁོར་ནི་འདི་ཡིན་ཏེ་ཞེས་སོགས་ཏེ་ལྷ་བཅུ་གསུམ་བྲིའོ། །གཉིས་པ་ནི། དེ་ནས་རྣལ་འབྱོར་ཅན་ཉིད་ཞུགས། །ཞེས་སོགས་སོ། །གཉིས་པ་སློབ་མ་ལ་དབང་བསྐུར་བ་ནི། འཆི་བདག་སྦྲུལ་གྱིས་འཇིགས་ལྡན་རྣམས། །ཞེས་སོགས་ཏེ་འཇུག་པའི་སྔགས་ནི་ཀུན་རིག་དང་ཐུན་མོང་བ་ཡིན་ཅིང་། ཕྱག་རྒྱ་དང་། དམ་ཚིག་སྦྱིན་པ་ནི་འདིའི་ཐུན་མོང་མ་ཡིན་པ་ཡིན་ལ། གཞན་རྣམས་ནི་གོང་འོག་ཀུན་ཏུ་དགོས་སོ། །གསུམ་པ་དངོས་གྲུབ་ཀྱི་ཡེ་ཤེས་བསྟན་པ་ནི། དེ་ལྟར་དབང་བསྐུར་ནས་ཚེ་བསྲིང་བའི་རིག་པ་འདི་སྦྱིན་པར་བྱའོ་ཞེས་སོགས་ཏེ་རས་རིས་གཞུང་བཞིན་དུ་བྲིས་ནས་མདུན་དུ་བཀྲམ། རང་ལྷའི་རྣལ་འབྱོར་གྱིས་རང་གི་སྔགས་ལ། ཨོཾ་བཛྲ་ཨཱ་ཡུ་ཤེ་ཧཱུྃ་ཨཱཿབཏགས་ལ་བསྙེན་པ་འབུམ་ཕྲག་གཅིག་གིས་མཚན་མ་ཐོབ་པར་བྱས་ལ། སྒྲུབ་པའི་རྟེན་རིན་པོ་ཆེའི་སྣོད་དུ་བ་དམར་སེར་གྱི་མར་བཟང་པོ་བཅུག་ལ། མཆོད་པ་རྒྱ་ཆེན་པོ་བཤམས་ཏེ། རང་གི་ལག་པ་གཡོན་རྡོ་རྗེ་དང་བཅས་པས་རྫས་དེ་མནན་ལ་བཟླས་བརྗོད་བྱས་པས། བཅོམ་ལྡན་འདས་ཀྱི་ནུས་པ་བསྐུལ་བདུད་རྩི་སྣོད་དུ་བབ་པར་བསམ་ཞིང་། མཚན་ཐོག་ཐག་བཟླས་པས་དྲི་ངད་ཀྱི་རྟགས་འབྱུང་། དེ་བྱུང་བ་དང་བཟའ་བཏུང་གང་ཡང་རུང་བ་ལ་སྦྱར་ཏེ། རང་ཉིད་ལྷའི་རྣལ་འབྱོར་དང་ལྡན་པས་འཐུང་ངམ། ཟོས་ན་རིག་འཛིན་ཚེའི་དངོས་གྲུབ་ཐོབ། འབྲིང་གི་རྫུ་འཕྲུལ་གྱི། ཐ་མས་ཞི་སོགས་དམན་པའི་དངོས་གྲུབ་འགྲུབ་པར་འགྱུར་བའོ། །དེ་དག་ལ་བརྟེན་ནས་མཆོག་གི་དངོས་གྲུབ་སངས་རྒྱས་ཀྱང་ཐོབ་པར་བྱེད་པའོ། །གཉིས་པ་ཕྱག་ན་རྡོ་རྗེ་ལ་འཇིག་རྟེན་པས་བསྐོར་བའི་དཀྱིལ་འཁོར་ལ་གཉིས་ཏེ། སྤྱིའི་དོན་དང་གཞུང་གི་དོན་ནོ། །དང་པོ་ནི། ཁ་ཅིག་འཇིག་རྟེན་པ་འདི་རྣམས་རང་རྒྱུད་པ་ཡིན་པས། མེ་ཏོག་དོར་བའི་ཚེ། གཙོ་བོ་ལ་དོར་གྱིས་འཁོར་ལ་མི་དོར་བ་དང་། དབང་ལེན་པའི་ཚེ་གཙོ་བོ་ལ་ལེན་གྱིས་འཁོར་ལ་མི་ལེན་པ་དང་། ཆུ་དབང་གི་ཚེ་གཙོ་བོའི་ཆུ་དབང་བསྐུར་གྱི་འཁོར་གྱི་ཆུ་དབང་མི་བསྐུར་བ་དང་། བསྙེན་པའི་ཚེ་ཡང་གཙོ་བོའི་བསྙེན་པ་བྱེད་ཀྱིས་འཁོར་གྱི་བསྙེན་པ་མི་བྱེད་ཞེས་ཟེར་བར་གྲག་གོ །དེ་ལ་འཇིག་རྟེན་པ་རང་རྒྱུད་པར་འདོད་པ་ནི་མི་འཐད་དེ། སྒོ་བ་བཞི་པོ་འདས་པ་ཡིན་པས་འཇིག་རྟེན་པ་རང་རྒྱུད་པས་དཀྱིལ་འཁོར་གྱི་རྩ་བའི་ལྷ་བྱས་ནས་འདས་པས་སྒོ་སྲུང་བྱེད་པ་ནི་བཞད་གད་ཀྱི་གནས་ཡིན་པའི་ཕྱིར་དང་། དཀྱིལ་འཁོར་ལ་བཀོད་པའི་ལྷ་ཚོགས་ཐམས་ཅད་དཀྱིལ་འཁོར་གྱི་གཙོ་བོའི་རྣམ་འཕྲུལ་ཡིན་པ་རྡོ་རྗེ་ཐེག་པའི་ལུགས་ཡིན་པའི་ཕྱིར། རྒྱུད་ལས་ཀྱང་། རྒྱལ་པོ་བཞིས་བཅོམ་ལྡན་འདས་ལ་ཞུས་པའི་སྐབས་སུ། དེ་ལ་རྡོ་རྗེ་འཛིན་བདག་རྒྱལ། །བུ་སྡུག་བཞིན་དུ་བསྐྱང་བར་བྱ། །རྡོ་རྗེ་ཞེས་རྡོ་རྗེ་འཛིན་པའི་བདག་ཉིད་ཡིན་པར་ཁས་བླངས་པའི་ཕྱིར་རོ། །རྒྱལ་པོ་མ་ཡིན་རྒྱལ་པོར་འགྱུར། །རྒྱལ་པོ་ཡིན་ན་ཆེན་པོར་འགྱུར། །ཞེས་པ་ཤེས་བྱེད་དུ་དྲངས་པ་ཡང་མི་འཐད་དེ། ཕན་ཡོན་དེ་ཡོད་པར་གསུངས་པས་གཞན་མེད་པར་མི་འགྲུབ་པའི་ཕྱིར་རོ། །འདི་དག་འཇིག་རྟེན་པ་རང་རྒྱུད་པ་ཡིན་ན་ཀུན་རིག་གི་ཁོར་ཡུག་ཏུ་བཀོད་པ་རྣམས་ཀྱང་དེ་ལྟར་དུ་འདོད་དགོས་ཤིང་། དེའང་འདོད་ན་ཁྱམས་ལ་བཀོད་པའི་ཉན་ཐོས་དང་རང་རྒྱལ་རྣམས་ཀྱང་རང་རྒྱུད་པར་འདོད་དགོས་པས་རྡོ་རྗེ་ཐེག་པའི་དཀྱིལ་འཁོར་གྱི་ལྷ་ལ་ཐེག་དམན་གྱི་གང་ཟག་བཀོད་པ་ནི། གསང་སྔགས་རང་བཟོར་བྱེད་པ་མ་གཏོགས་པ་གཞན་སུ་ཞིག་གིས་སྨྲ་བར་ནུས། འཁོར་ལ་མེ་ཏོག་མི་འདོར་བར་ནི་མི་འཐད་དེ། དེ་ནས་མེ་ཏོག་གམ་རིན་པོ་ཆེ་འདིས་དོར་བར་བྱའོ། །ཨོཾ་བཛྲ་པྲ་ཏཱིཙྪ་དྷཾ་མ་ཧོ་དྷ་མ། གང་ལ་བབ་པའི་རྒྱལ་པོ་ནི། །དེས་ནི་འདི་འགྲུབ་གཞན་དུ་མིན། །ཞེས་གསུངས་པའི་ཕྱིར་རོ། །འཁོར་ལ་དབང་མི་ལེན་པ་ཡང་མི་འཐད་དེ། ལན་བཞིར་དབང་ནི་བསྐུར་བ་དང་། །ལན་བཞིར་འཇུག་པ་བྱས་ནས་ནི། །ཞེས་གསུངས་པའི་ཕྱིར་རོ། །འཁོར་གྱི་ཆུ་དབང་མི་བྱེད་པ་ཡང་མི་འཐད་དེ། ཕྱོགས་སྐྱོང་རང་གི་སྔགས་བཏབ་པའི། །བུམ་པ་རྣམས་ཀྱིས་དབང་བསྐུར་ཏེ། །ཞེས་དང་། དེ་ནས་གཟའ་བརྒྱད་སྔགས་བཏབ་པའི། །བུམ་པ་བརྒྱད་ཀྱིས་དབང་བསྐུར་རོ། །ཞེས་དང་། བུམ་པའམ་མགོ་ཡི་ཐོད་པ་ནི། །དེ་ལྟར་བརྒྱད་ཀྱིས་དབང་བསྐུར་རོ། །ཞེས་གསུངས་པའི་ཕྱིར་རོ། །འཁོར་གྱི་བསྙེན་པ་མི་བྱེད་པ་ཡང་མི་འཐད་དེ། འདིར་སྔགས་ཕྲེང་གསུངས་པ་རྣམས་བསྙེན་པ་རྒྱས་པའི་སྐབས་ཡིན་པའི་ཕྱིར་རོ། །ཡང་བླ་མ་མཁས་པ་དག དེ་བཞིན་གྲུ་བཞིར་བྲིས་ནས་ནི། །སྒོ་ཁྱུད་ལ་སོགས་རྣམ་པར་སྤང་། །ཞེས་ཤེས་བྱེད་དུ་དྲངས་ནས། འཇིག་རྟེན་པའི་དཀྱིལ་འཁོར་རྣམས་ལ་སྒོ་ཁྱུད་སོགས་མེད་པར་བཞེད་ལ། རྗེ་བཙུན་གྱིས་ཀླུ་ཆེན་བརྒྱད་མ་གཏོགས་པར་གཞན་རྣམས་ལ་རྟ་བབས་སོགས་རྫོགས་པར་བྱེད་པ་གསུངས་སོ། །སྤྱན་འདྲེན་པའི་ཚེ་དང་པོ་གཙོ་བོ་སྤྱན་དྲངས་ནས་དེའི་རྗེས་སུ་འཁོར་སྤྱན་འདྲེན་པ་འཇིག་རྟེན་པའི་ཁྱད་པར་ཡིན་ནམ་སྙཾམ་ཏེ། འདས་པའི་སྐབས་སུ། གཙོ་བོ་རྒྱལ་བ་སྲས་ཀྱི་འཁོར། །མང་པོ་རྣམས་ཀྱི་སྤྱན་དྲངས་ཏེ། །ཞེས་དང་། བདེ་བར་གཤེགས་པ་སྲས་དང་འབངས་སུ་བཅས་ཤིང་འཁོར་གྱིས་བསྐོར་བའི་རིག་པ་ལྷན་ཅིག་སྤྱན་དྲངས་ཞེས་དང་། རྒྱལ་པོ་བཞིའི་སྐབས་སུ། སྔགས་མཁན་ཉིད་ནི་ཞུགས་ནས་ཀྱང་། །བཅོམ་ལྡན་འདས་ནི་སྤྱན་དྲངས་ཏེ། །དེ་ནས་རྒྱལ་པོ་སྤྱན་དྲང་ང་ོ། །ཞེས་གསུངས་པའི་ཕྱིར་རོ། །འདིར་རྗེ་བཙུན་བླ་མ་ཐམས་ཅད་མཁྱེན་པའི་ཞལ་སྔ་ནས་བདག་བསྐྱེད་ཀྱི་སྐབས་སུ། དཀྱིལ་འཁོར་གྱི་གཙོ་བོའམ་རྡོ་རྗེ་སེམས་དཔའ་བསྐྱེད་པ་ཆོས་སྐུའི་ཉམས་ལེན། དེ་ནས་གཞལ་ཡས་ཁང་གི་དབུས་སུ་གཙོ་བོ་བསྐྱེད་པ་ལོངས་སྐུའི་ཉམས་ལེན། དེའི་ཐུགས་ཀར་རིགས་བཞི་ནས་ཁོར་ཡུག་པའི་བར་རྣམས་བསྐྱེད་ནས་རང་གི་གནས་སུ་དགོད་པ་སྤྲུལ་སྐུའི་ཉམས་ལེན་དུ་མཛད་ནས། དེའི་དོན་ཡང་ལོངས་སྤྱོད་རྫོགས་པའི་སྐུ་ཉིད། སངས་རྒྱས། བྱང་སེམས། ཉན་ཐོས། རང་རྒྱལ། འཇིག་རྟེན་པའི་གཟུགས་ཀྱིས་འདུལ་བ་རྣམས་ལ་དེ་དང་དེའི་སྐུར་སྟོན་པར་གསུངས་པ་འདི་སྙིང་གི་དཀྱིལ་དུ་ཞོག་ཅིག གཉིས་པ་གཞུང་གི་དོན་ལ་དྲུག་སྟེ། རྒྱལ་པོ་ཆེན་པོ་བཞིའི་དཀྱིལ་འཁོར་དང་། ཕྱོགས་སྐྱོང་བཅུའི་དཀྱིལ་འཁོར་དང་། གཟའ་ཆེན་པོ་བརྒྱད་འཁོར་རྒྱུ་སྐར་དང་བཅས་པའི་དཀྱིལ་འཁོར་དང་། ཀླུ་ཆེན་པོ་བརྒྱད་ཀྱི་དཀྱིལ་འཁོར་དང་། འཇིགས་བྱེད་བརྒྱད་ཆུང་མ་དང་བཅས་པའི་དཀྱིལ་འཁོར་དང་། ལྷ་ཆེན་པོ་བརྒྱད་ཀྱི་དཀྱིལ་འཁོར་བསྟན་པའོ། །དང་པོ་ལ་གསུམ། སྔགས་ཀྱི་ཕྲེང་བ་དང་། རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་དང་། དབང་བསྐུར་བའི་ཕན་ཡོན་བསྟན་པའོ། །དང་པོ་ནི། དེ་ནས་རྒྱལ་པོ་ཆེན་པོ་བཞིས་ཞེས་སོགས་ཏེ། དཀྱིལ་འཁོར་གྱི་དབུས་སུ་འཁོར་ལོ་རྩིབས་བཞི་པའི་ལྟེ་བར་པད་ཟླའི་སྟེང་དུ་སྔར་གྱི་པུཎྱ་ལས་ཕྱག་ན་རྡོ་རྗེ་སྐུ་མདོག་དཀར་པོ་འགྱིང་བག་ཅན་རྡོ་རྗེ་དང་དྲིལ་བུ་འཛིན་པ། ཤར་དུ་ཨོཾ་དྷི་ལས་ཡུལ་འཁོར་སྲུང་ལྗང་གུ་པི་ཝཾ་འཛིན་པ། ལྷོར་ཨོཾ་བྷི་ལས་འཕགས་སྐྱེས་པོ་སྐུ་མདོག་སྔོན་པོ་རལ་གྲི་འཛིན་པ། ནུབ་དུ་ཨོཾ་ཀྵཾཾ་ལས་མིག་མི་བཟང་དམར་སྐྱ་སྦྲུལ་མགོ་བདུན་གྱིས་བསྐོར་བ་རྡོ་རྗེ་ཞགས་པ་འཛིན་པ། བྱང་དུ་ཨོཾ་བྷེ་ལས་རྣམ་ཐོས་སྲས་སེར་པོ་བེ་ཅོན་འཛིན་པ། གཡོན་ནེའུ་ལེ་ཐོགས་པའོ། །སྒོ་བཞིར་སྒོ་བ་བཞི་ཁྲོས་པའོ། །གཉིས་པ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་འཇུག་ཅིང་དབང་བསྐུར་བའི་ཆོ་གའོ། །དང་པོ་ལ་གཉིས་ཏེ། བྲི་ཞིང་ལྷ་དགོད་པ་དང་། སློབ་དཔོན་ཞུགས་ཏེ་བསྒྲུབ་པའོ། །དང་པོ་ནི། དེ་ནས་དེ་དག་གི་དཀྱིལ་འཁོར་བཤད་དེ་ཞེས་སོགས་སོ། །གཉིས་པ་ནི། དེ་ནས་རྡོ་རྗེའི་ཕྱག་རྒྱ་ཞེས་བྱ་བས་ཞེས་སོགས་སོ། །གཉིས་པ་སློབ་མ་འཇུག་ཅིང་དབང་བསྐུར་བའི་ཆོ་ག་ནི། དེ་ནས་སྔགས་མཁན་སྔགས་འདི་དང་། །ཞེས་སོགས་ཏེ། མེ་ཏོག་དོར་བའི་སྔགས་ནི་ཁྱད་པར་གྱི་ཆོས་སོ། །གསུམ་པ་དབང་བསྐུར་བའི་ཕན་ཡོན་ནི། རྒྱལ་པོ་མ་ཡིན་རྒྱལ་པོར་འགྱུར། །ཞེས་སོགས་སོ། །གཉིས་པ་ཕྱག་ན་རྡོ་རྗེ་ལ་ཕྱོགས་སྐྱོང་བཅུས་བསྐོར་བའི་དཀྱིལ་འཁོར་ལ་བཞི་སྟེ། སྔགས་ཀྱི་ཕྲེང་བ་དང་། རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་དང་། སྙིང་པོ་རྗེས་སུ་གནང་བ་བྱིན་ཏེ་བསྒྲུབ་པར་བསྟན་པ་དང་། ཕྱོགས་སྐྱོང་རྣམས་ཀྱིས་བསྟན་པ་བསྲུང་བར་ཁས་བླངས་པའོ། །དང་པོ་ནི། དེ་ནས་ཕྱོགས་སྐྱོང་བཅུ་རྣམས་ཀྱི། །ཞེས་སོགས་ཏེ་གཞལ་ཡས་ཁང་གི་དབུས་སུ་འཁོར་ལོ་རྩིབས་བརྒྱད་པའི་ལྟེ་བར་ཕྱག་རྡོར་སྔར་བཞིན་བསྐྱེད། ཤར་དུ་ཨོཾ་ཨི་ལས་བརྒྱ་བྱིན་སེར་པོ་གླང་པོ་ཆེ་ལ་ཞོན་པ་རྡོ་རྗེ་འཛིན་པ། ཐིག་ལེ་འཛིན་ཤ་རྩི་དང་། ཐིག་ལེ་མཆོག་གཉིས་དཀར་པོའོ། །ལྷོར་ཨོཾ་ཡ་ལས་གཤིན་རྗེ་སྔོན་པོ་མ་ཧེ་ལ་ཞོན་པ་དབྱུག་པ་ཐོགས་པ། རེ་མ་ཏི་ལག་ཆ་སྣ་ཚོགས་པ་ནག་པོ། ནུབ་ཏུ་ཨོཾ་བཾ་ལས་ཆུ་ལྷ་དཀར་པོ་ཆུ་སྲིན་ལ་ཞོན་པ་སྦྲུལ་ཞགས་འཛིན་པ། བྱང་དུ་ཨོཾ་ཀུ་ལས་གནོད་སྦྱིན་སེར་པོ་རྟ་ལ་ཞོན་པ་རིན་པོ་ཆེ་འཛིན་པ། བྱང་ཤར་དུ་ཨོཾ་ཨི་ལས་དབང་ཕྱུག་དཀར་པོ་གླང་ལ་ཞོན་པ་རྩེ་གསུམ་འཛིན་པ། ཤར་ལྷོར་ཨོཾ་ཨ་ལས་མེ་ལྷ་དམར་པོ་ར་ལ་ཞོན་པ་དབྱུག་གུ་འཛིན་པ། ལྷོ་ནུབ་ཏུ་ཨོཾ་རི་ལས་སྲིན་པོ་ནག་པོ་མི་ལ་ཞོན་པ་རལ་གྲི་འཛིན་པ། ནུབ་བྱང་དུ་ཨོཾ། ཨཾ་ལས་རླུང་ལྷ་ལྗང་ཁུ་ཤྭ་བ་ལ་ཞོན་པ་བ་དན་འཛིན་པ། ལྷོར་ཨོཾ་ཨ་ལས་ཉི་མ་དམར་པོ་རྟ་ལ་ཞོན་པ་ཉི་མ་འཛིན་པ། བྱང་དུ་ཨོཾ་སྭ་ལས་ཟླ་བ་དཀར་པོ་ངང་པ་ལ་ཞོན་པ་ཟླ་བ་འཛིན་པ། བྱང་ཤར་དུ་ཨོཾ་བྲ་ལས་ས་བདག་ཕག་མགོ་ཅན་སེར་པོ་ཕག་ལ་ཞོན་པ་པི་ཝཾ་འཛིན་པའོ་ཞེས་རྗེ་བཙུན་བཞེད་ལ། རྩ་སྐྱ་པས་གཞན་འདྲ་བ་ལས། ཨོཾ་ཨ་ལས། གཙོ་བོའི་མདུན་དུ་ཚངས་པ་དཀར་པོ་ཕྱག་བཞི་པ་གཡས་གཉིས་ན་གླེགས་བམ་དང་ཕྲེང་བ། གཡོན་མཆོག་སྦྱིན་དང་བུམ་པ་འཛིན་ཅིང་ངང་པ་ཆིབས་ནས། གཡས་སུ་ཉི་མ་དམར་པོ་པདྨ་ཉི་མས་བརྒྱན་པ་འཛིན་པ་དང་། གཡོན་དུ་ཟླ་བ་དཀར་པོ་ཀུ་མུ་ཏ་བསྣམས་པའོ། །ཨོཾ་བྲི་ལས་གཙོ་བོའི་རྒྱབ་ཏུ་སའི་ལྷ་མོ་སེར་མོ་བུམ་པ་འཛིན་ཅིང་ཕག་ལ་ཆིབས་ནས། གཡས་སུ་ལྷ་མ་ཡིན་ནག་པོ་གོ་ཆ་འཛིན་པ། གཡོན་དུ་ཀླུ་དཀར་པོ་སྦྲུལ་ཐོགས་པ་ཅན་བསྐྱེད་དོ། །ཞེས་བཞེད་དོ། །གཉིས་པ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་འཇུག་ཅིག་དབང་བསྐུར་བའི་ཆོ་གའོ། །དང་པོ་ལ་གཉིས་ཏེ། བྲི་ཞིང་ལྷ་དགོད་པ་དང་། ཞུགས་ཏེ་བསྒྲུབ་པའོ། །དང་པོ་ནི། དེ་ནས་དེ་དག་གི་དཀྱིལ་འཁོར་བཤད་དེ། ཞེས་སོགས་སོ། །གཉིས་པ་ནི། དེ་ནས་སྤྱན་དྲངས་ཏེ་ཀུན་ལ། །ཞེས་སོགས་སོ། །གཉིས་པ་ནི། སློབ་མ་རྣམས་ནི་གཞུག་པའི་ཕྱིར། །ཞེས་སོགས་སོ། །གསུམ་པ་ནི། དེ་ལ་ཕན་པར་འདོད་པ་ཡིས། །ཞེས་སོགས་སོ། །བཞི་པ་ལ་གཉིས་ཏེ། སྤྱིར་ཁས་བླངས་པ་དང་། བྱེ་བྲག་ཏུ་ཁས་བླངས་པའོ། །དང་པོ་ནི། དེ་ནས། དེ་དག་མགུ་ནས་འདི་སྐད་ཅེས་གསོལ་ཏེ་ཞེས་སོགས་སོ། །གཉིས་པ་ནི། དེ་ནས་ཆོས་ཀྱི་རྒྱལ་པོ་གཤིན་རྗེས་ཞེས་སོགས་ཏེ། བརྒྱ་བྱིན་དང་མེ་ལྷ་གཉིས་ཀྱིས་ཁས་བླངས་པ་མི་སྣང་ངོ་། །གསུམ་པ་གཟའ་བརྒྱད་རྒྱུ་སྐར་དང་བཅས་པའི་དཀྱིལ་འཁོར་ལ་བཞི་སྟེ། སྔགས་ཀྱི་ཕྲེང་བ་དང་། རྡུལ་ཚོན་གྱི་དཀྱིལ་འཁོར་དུ་དབང་བསྐུར་བ་དང་། སྒྲུབ་པ་དང་། བསྟན་པ་བསྲུང་བར་ཁས་བླངས་པའོ། །དང་པོ་ནི། དེ་ནས་གཟའ་ཆེན་པོ་བརྒྱད་དང་འཁོར་རྒྱུ་སྐར་དང་བཅས་པ་རྣམས་ཀྱིས་ཀྱང་ཞེས་སོགས་ཏེ། རྩ་སྐྱ་པས་ཕྱིའི་དཀྱིལ་འཁོར་གྱི་ནང་དུ་ཟླུམ་པོར་ཆ་ཆེན་གཅིག་གི་ཚད་བསྐོར་བའི་དབུས་ལེ་ཚེ་དགུར་ཕྱེ་བའི་དབུས་ཀྱི་པད་ཉི་ལ་རྩ་རིག་དང་། མེ་ཉི་མའི་སྔགས་ཀྱིས་ཁམས་གསུམ་རྣམ་རྒྱལ་བསྐྱེད་པར་བཞེད་ལ། རྗེ་བཙུན་གྱིས། ཤར་དུ་ཨོཾ་ཤཱུ་ལས་པ་ཝ་སངས་དཀར་པོ་སྟན་ནང་ཚངས་ཅན་ལ་འདུག་པ་རྒྱན་ཐམས་ཅད་ཀྱིས་བརྒྱན་པ་ཤིང་ཐོག་ཐོགས་པ། ལྷོར་ཨོཾ་བྲི་ལས་ཕུར་བུ་དཀར་པོ་ཟླ་བ་ལ་གནས་པ་གཡས་པོ་ཏི་གཡོན་ཆོས་འཆད་པའི་ཚིག་འདྲེན་པའི་ཚུལ། སྟོད་གཡོགས་སེར་པོ་ཅན་ནོ། །ནུབ་ཏུ་ཨོཾ་སྭ་ལས་ཟླ་བ་དཀར་པོ་ཨུཏྤ་ལ་ཐོགས་པ་ངང་པ་ལ་ཞོན་པ། བྱང་དུ་ཨོཾ་ཕུ་ལས་གཟའ་ལྷག་སེར་པོ་གཡས་མཆོག་སྦྱིན་གཡོན་ཨུཏྤ་ལ་འཛིན་ལ། སྟན་ནང་ཚངས་ཅན་ནོ། །རླུང་དུ་ཨོཾ་ཨ་ལས་ཉི་མ་དམར་པོ་རྟ་ལ་ཞོན་པ་ཡ་ལད་གྱོན་པ་ལག་ན་པདྨ་འཛིན་པའོ། །དབང་ལྡན་དུ་ཨོཾ་སྭ་ལས་སྤེན་པ་མདོག་ནག་པོ་རྒྱན་མེད་པ། སྐྲ་བཤིག་པ། དབྱུག་ཐོ་ཐོགས་པ་སྟན་ནང་ཚངས་ཅན་ནོ། །ཤར་ལྷོར་ཨོཾ་ཨཾ་ལས་མིག་དམར་མདོག་དམར་པོ་གཡས་བུམ་པ་ཆུས་གང་བ། གཡོན་མགལ་མེ་འཛིན་པ་སྟན་ནང་ཚངས་ཅན་ནོ། །སྲིན་པོར་ཨོཾ་ཨ་ར་ལས་སྒྲ་གཅན་མདོག་དུད་ཁ་བཞིན་ཁྲོས་པ་མཆེ་བ་གཙིགས་པ། སྐྲ་སེར་པོ་གྱེན་དུ་བརྫེས་པ། རྐེད་པ་མན་ཆད་སྦྲུལ་སྤྲིན་གསེབ་ན་འདུག་པ་དེ་དག་ནི་ལེ་དགུའི་ཕྱོགས་མཚམས་བརྒྱད་དོ། །དེའི་ཕྱི་རོལ་གྱི་ལྷ་སྣམ་ལ་ཕྱོགས་རེ་རེར་རྒྱུ་སྐར་བདུན་བདུན་གནས་པ་ནི། ཤར་དུ་སྨིན་དྲུག་དམར་པོ་བུམ་པ་ལ་གནས་པ། སྣར་མ་ལྗང་ཁུ་བ་དཀར་མོ་ལ་ཞོན་པ། མགོ་སེར་པོ་ཤྭ་བ་ལ་ཞོན་པ། ལག་དམར་པོ་སྦྲུལ་ལ་ཞོན་པ། ནམས་སོ་དམར་པོ་པདྨ་ལ་འདུག་པ། རྒྱལ་ལྗང་ཁུ་བུམ་པ་ལ་འདུག་པ། སྐག་ལྗང་ཁུ་བྱ་རོག་ལ་ཞོན་པ། ལྷོ་རུ་མཆུ་སེར་པོ་མེ་ཏོག་ལ་འདུག་པ། བྲེ་དཀར་པོ་པདྨོ་ལ་འདུག་པ། དབོ་ལྗང་ཁུ་ཁྲི་ལ་འདུག་པ། མེ་བཞི་སེར་པོ་གླང་ལ་ཞོན་པ། ནག་པ་ལྗང་ཁུ་རྨ་བྱ་ལ་ཞོན་པ། ས་རི་དམར་པོ་སྤྱང་མོ་ལ་ཞོན་པ། ས་ག་ལྗང་ཁུ་ར་དཀར་པོ་ལ་ཞོན་པ། ནུབ་ཏུ་ལྷ་མཚམས་སེར་པོ་བྱ་རོག་ལ་ཞོན་པ། སྣྲོན་དམར་པོ་སྟན་ནང་ཚངས་ཅན་ལ་འདུག་པ། སྣྲུབས་ལྗང་ཁུ་རུས་སྦལ་ལ་ཞོན་པ། ཆུ་སྟོད་སེར་པོ་སྟན་ནང་ཚངས་ཅན་ལ་འདུག་པ། ཆུ་སྨད་ལྗང་ཁུ་མིའི་སྙིང་ལ་འདུག་པ། བྱི་བཞིན་དཀར་པོ་སྟན་ནང་ཚངས་ཅན་ལ་འདུག་པ། གྲོ་ཞུན་སེར་པོ་མོན་སྐུད་ལ་འདུག་པ། བྱང་དུ་མོན་གྲུ་དམར་པོ་སྟན་ནང་ཚངས་ཅན་ལ་འདུག་པ། མོན་གྲེ་ལྗང་ཁུ་བ་ལ་ཞོན་པ། ཁྲུམས་སྟོད་ལྗང་ཁུ་གསེར་ཁྲི་ལ་འདུག་པ། ཁྲུམས་སྨད་སེར་པོ་གསེར་ཁྲི་ལ་འདུག་པ། ནམ་གྲུ་དམར་པོ་རྟ་ལ་ཞོན་པ། ཐ་སྐར་ལྗང་ཁུ་མིའི་སྙིང་ལ་འདུག་པ། བྲ་ཉེ་སེར་པོ་འཁོར་ལོ་ལ་འདུག་པའོ། །སྒོ་བཞིར་སྒོ་བ་བཞི་ཁྲོས་པའོ། །གཉིས་པ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་འཇུག་ཅིང་དབང་བསྐུར་བའི་ལས་སོ། །དང་པོ་ལ་གཉིས་ཏེ། བྲི་ཞིང་ལྷ་དགོད་པ་དང་། ཞུགས་ཏེ་སྒྲུབ་པའོ། །དང་པོ་ནི། དེ་ནས་དེ་དག་གི་དཀྱིལ་འཁོར་བཤད་དེ་ཞེས་སོགས་སོ། །གཉིས་པ་ནི། རྡོ་རྗེ་འཛིན་མས་ཞུགས་ནས་ནི། །ཞེས་སོགས་སོ། །གཉིས་པ་ནི། དེ་ནས་སློབ་མ་རྣམས་གཞུག་སྟེ། །ཞེས་སོགས་སོ། །དཀྱིལ་འཁོར་དུ་འཇུག་པ་དང་དམ་ཚིག་པ་བསྐྱེད་པ་དང་། མེ་ཏོག་དོར་བའི་སྔགས་གསུམ་ནི་ཁྱད་པར་རོ། །གསུམ་པ་ནི། གཟའ་ཐམས་ཅད་སྒྲུབ་པར་བྱའོ་ཞེས་པ་སྟེ་གཙོ་བོའི་སྔགས་ལ་བཏགས་ནས་བསྒྲུབ་པའོ། །བཞི་པ་ནི། དེ་ནས་གཟའ་ཆེན་པོ་དེ་དག་གིས་བཅོམ་ལྡན་འདས་ལ་ཕྱག་འཚལ་ནས། ཞེས་སོགས་སོ། །བཞི་པ་ཀླུ་ཆེན་བརྒྱད་ཀྱི་དཀྱིལ་འཁོར་ལ་གསུམ་སྟེ། སྔགས་ཀྱི་ཕྲེང་བ་དང་། རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་ཕན་ཡོན་དང་བཅས་པ་དང་། དངོས་གྲུབ་ཀྱི་ཡེ་ཤེས་ལ་བསླབ་པའོ། །དང་པོ་ནི། དེ་ནས་ཀླུ་ཆེན་པོ་བརྒྱད་ཀྱི་ཕུཿཊ་ཅེས་བྱ་བའི་སྒྲས་ཞེས་སོགས་ཏེ། པདྨ་འདབ་བརྒྱད་ཀྱི་ལྟེ་བར་པུཎྱའི་སྔགས་ལ་ཕྱག་ན་རྡོ་རྗེ་དཀར་པོ་རྡོ་རྗེ་དང་དྲིལ་བུ་འཛིན་པར་རྩ་སྐྱ་པས་བཤད་ལ། རྗེ་བཙུན་གྱིས་སྔོ་ལྗང་དུ་བཞེད་དོ། །འདབ་མ་བརྒྱད་ལ་ཤར་དུ་ཨོཾ་ཕུ་ལས་མཐའ་ཡས་སྔོན་པོ། ལྷོར་ཨོཾ་ཕ་ལས་འཇོག་པོ་དམར་པོ། ནུབ་ཏུ་ཨོཾ་ཕུཾ་ལས་སྟོབས་ཀྱི་རྒྱུ་ལྗང་ཁུ། བྱང་དུ་ཨོཾ་ཕ་ལས་རིགས་ལྡན་ཁྲ་བོ། ཤར་ལྷོར་ཨོཾ་ཕིཾ་ལས་ནོར་རྒྱས་དཀར་པོ། ལྷོ་ནུབ་ཏུ་ཨོཾ་ཕཱཾ་ལས་དུང་སྐྱོང་སེར་པོ། ནུབ་བྱང་དུ་ཨོཾ་ཕེཾ་ལས་པདྨ་དམར་པོ། བྱང་ཤར་དུ་ཨོཾ་ཕཱོུ་ལས་ཆུ་ལྷ་དཀར་པོ། སྦྲུལ་མགོ་བདུན་བདུན་གྱིས་བསྐོར་བ་ཆུང་མའི་མགུལ་ནས་འཁྱུད་པའོ། །ཆུང་མ་རྣམས་སྐུ་མདོག་ཡབ་དང་འདྲ་བ་ལ་ཨུཏྤ་ལ་འཛིན་པ། སྦྲུལ་མགོ་གསུམ་གསུམ་གྱིས་བསྐོར་བ་ཡབ་ལ་འཁྱུད་པའོ། །སྒོ་བ་བཞི་ནི་མ་བཤད་དོ། །གཉིས་པ་ལ་གཉིས་ཏེ། དབང་བསྐུར་བ་དང་། ཕན་ཡོན་ནོ། །དང་པོ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་གཞུག་ཅིང་དབང་བསྐུར་བའོ། །དང་པོ་ལ་གཉིས་ཏེ། བྲི་ཞིང་ལྷ་དགོད་པ་དང་། ཞུགས་ཏེ་སྒྲུབ་པའོ། །དང་པོ་ནི། དེ་ནས་དེ་དག་གི་དཀྱིལ་འཁོར་བཤད་དེ་ཞེས་སོགས་སོ། །གཉིས་པ་ནི། དེ་ནས་རྡོ་རྗེའི་བདག་ཉིད་ཞུགས། །ཞེས་སོགས་སོ། །གཉིས་པ་ནི། དེ་ནས་བུ་ནི་རྒྱལ་པོ་དང་། །ཞེས་སོགས་སོ། །གཉིས་པ་ཕན་ཡོན་ནི། དེ་ནས་མིང་ཙམ་བརྗོད་པས་ཀྱང་། །ཞེས་སོགས་སོ། །གསུམ་པ་དངོས་གྲུབ་ཀྱི་ཡེ་ཤེས་བསྟན་པ་ནི། དེ་ནས་སྒྲུབ་པ་བཤད་དེ། ཞེས་སོགས་སོ། །ལྔ་པ་འཇིགས་བྱེད་ཀྱི་དཀྱིལ་འཁོར་ལ་གསུམ་སྟེ། སྔགས་ཀྱི་ཕྲེང་བ་དང་། རྡུལ་ཚོན་གྱི་དཀྱིལ་འཁོར་དུ་སློབ་མར་དབང་བསྐུར་བ་དང་། དངོས་གྲུབ་ཀྱི་ཡེ་ཤེས་ལ་བསླབ་པའོ། །དང་པོ་ནི། དེ་ནས་ལྷ་ཆེན་པོ་རྣམས་ཀྱི་བདག་པོ་འཇིགས་པར་བྱེད་པ་ཆེན་པོ་ཞེས་སོགས་ཏེ། གཞལ་ཡས་ཁང་གི་དབུས་སུ་འཁོར་ལོ་རྩིབས་བརྒྱད་པའི་ལྟེ་བར་པད་ཉི་ལ་མེ་ཉི་མའི་སྔགས་ཀྱིས་ཁམས་གསུམ་རྣམ་རྒྱལ། ཤར་དུ་ཨོཾ་བྷཻ་ར་ལས་འཇིག་བྱེད་ཆེན་པོ་སྐུ་མདོག་སྔོ་ནག་གཡས་གྲི་གུག་གཡོན་ཐོད་པ། སྤྱན་གསུམ་པ། མཆེ་བ་གཙིགས་པ། གླང་པོ་ཆེའི་ཀོ་རློན་གྱོན་པ། དབུ་ལ་ཐོད་པ་ཟླ་ཚེས་ཀྱིས་བརྒྱན་པ་མཚན་མ་བཙུན་མོ་ལ་བསྟན་པ། ཡུམ་དབུ་མ་ཨོཾ་བྷཻ་ར་བྷེ་སྭཱཧཱ་ལས་དཀའ་ཐུབ་བཟློག་པའི་ཚུལ་སྐུ་མདོག་ཕྱག་མཚན་གཙོ་བོ་དང་འདྲ། གྷ་ག་དཀར། ཡ་མི་ནི་ལྗང་། དཔལ་མོ་སེར། འཇིགས་བྱེད་དཀར། རྫོང་གི་ལྷ་མོ་དམར། སྟོབས་བཟང་མ་དཀར། ཀུ་མཱ་རི་དམར་སྐྱ་ཅི་བདེ་བའི་ལག་ཆ་འཛིན་པའོ། །ཡང་ཤར་དུ་ཨོཾ་ཕུ་སྭཱཧཱ། ལས་ལྷ་ཆེན་ཁྲོས་པ་དཀར་པོ་ཡུམ་དང་བཅས་པའོ། །ལྷོར་ཨོཾ་བྷཻ་སྭཱཧཱ་ལས་བརྒྱ་བྱིན་ཁྲོས་པ་སེར་པོ་ཡུམ་ཐིག་ལེ་འཛིན་ཤ་རྩི་དང་། ཐིག་ལེ་མཆོག་གཉིས་དཀར་མོའོ། །ནུབ་ཏུ་ཨོཾ་བྷཻ་སྭཱཧཱ་ལས་ཚངས་པ་ཁྲོས་པ་དམར་པོ། ཡུམ་ཚངས་མ་དང་དབྱངས་ཅན་གཉིས་འཁོར་ཚངས་མ་བརྒྱད་དང་བཅས་པ། བྱང་དུ་ཨོཾ་བྷི་སྭཱཧཱ་ལས་ཁྱབ་འཇུག་ཁྲོས་པ་སྔོན་པོ། ཡུམ་ནོར་རྒྱུན་མ་དང་དབྱངས་ཅན་གཉིས་སེར་དང་དཀར་བའོ། །ཤར་ལྷོར་ཨོཾ་བྷཻ་སྭཱཧཱ་ལས་འདོད་པའི་རྒྱལ་པོ་ཁྲོས་པ་དམར་པོ་ཡུམ་དང་བཅས་པ། ལྷོ་ནུབ་ཏུ་ཨོཾ་བྷཽ་སྭཱཧཱ་ལས་ཚོགས་བདག་ཁྲོས་པ་དུད་ཁ་ཡུམ་དང་བཅས་པ། ནུབ་བྱང་དུ་ཨོཾ་བྷྲྀ་སྭཱཧཱ་ལས་བྷྲྀཾ་གི་རི་ཏི་ཁྲོས་པ་སྔོ་སྐྱ་ཆུང་མ་དང་བཅས་པ། བྱང་ཤར་དུ་ཨོཾ་བྷ་སྭཱཧཱ་ལས་སྨིན་དྲུག་ཁྲོས་པ་ཆུང་མ་དང་བཅས་པའོ། །སྒོ་བཞིར་སྒོ་བ་བཞི་ཁྲོས་པ་ནི་སྔར་བཞིན་ནོ། །གཉིས་པ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་གཞུག་ཅིང་དབང་བསྐུར་བའོ། །དང་པོ་ལ་གཉིས་ཏེ། བྲི་ཞིང་ལྷ་དགོད་པ་དང་། ཞུགས་ཏེ་བསྒྲུབ་པའོ། །དང་པོ་ནི། དེ་དག་གི་དཀྱིལ་འཁོར་བཤད་དེ། ཞེས་སོགས་སོ། །གཉིས་པ་ནི། དེ་ནས་ལྕགས་ཀྱུ་ལ་སོགས་པས། །ཞེས་སོགས་སོ། །གཉིས་པ་ནི། དེ་ནས་འཇིག་རྟེན་གསུམ་རྒྱལ་གྱིས། །ཞེས་སོགས་སོ། །གསུམ་པ་ནི། དེ་ནས་ལས་རྣམས་སྦྱིན་བྱ་སྟེ། །ཞེས་སོགས་སོ། །དྲུག་པ་ལྷ་ཆེན་བརྒྱད་ཀྱི་དཀྱིལ་འཁོར་ལ། སྔགས་ཀྱི་ཕྲེང་བ་དང་། རྡུལ་མཚོན་གྱི་དཀྱིལ་འཁོར་དུ་སློབ་མ་ལ་དབང་བསྐུར་བ་དང་། དངོས་གྲུབ་ཀྱི་ཡེ་ཤེས་ལ་བསླབ་པ་དང་། འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་དུ་ཞུགས་པ་ལས་དངོས་གྲུབ་གསོལ་བར་བསྟན་པའོ། །དང་པོ་ནི། དེ་ནས་ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས། ཞེས་སོགས་ཏེ། དཀྱིལ་འཁོར་གྱི་ནང་དུ་འཁོར་ལོ་རྩིབས་བརྒྱད་པའི་ལྟེ་བར་པད་ཉི་ལ་འཇིག་རྟེན་གསུམ་རྒྱལ་སྔར་བཞིན། ཤར་དུ་ཨོཾ་རུ་ལས་དབང་ཕྱུག་ཆེན་པོ་སྔོ་སྐྱ་གླང་ལ་ཞོན་ཅིང་ཟླ་བ་ཕྱེད་པའི་ཅོད་པཎ་ཅན། ཕྱག་བཞིའི་གཡས་དང་པོས་ཨུ་མ་ལ་འཁྱུད་ཅིང་། གཉིས་པ་རྡོ་རྗེ་རྩེ་གསུམ་དང་ལྡན་པའི་མཆོག་སྦྱིན། གཡོན་དང་པོས་མདུང་རྩེ་གསུམ་པ། གཉིས་པས་རལ་གྲི་འཛིན་པའོ། །ནུབ་ཏུ་ཨོཾ་ཨོཾ་ལས་ངང་པའི་སྟེང་དུ་ཚངས་པ་སེར་པོ་གདོང་བཞི་པ་དང་། རྡོ་རྗེ་ཞི་བ་མ་ནི་གཡས་གཉིས་ཀྱིས་རྡོ་རྗེ་དང་བགྲང་ཕྲེང་། གཡོན་གཉིས་ཀྱིས་དབྱུག་པ་དང་སྤྱི་བླུགས་འཛིན་པ། བྱང་དུ་ཨོཾ་བྷི་ལས་ཁྱབ་འཇུག་ནག་པོ་དང་། ཡུམ་རྡོ་རྗེ་གསེར་ནི་སེར་མོ་ནམ་མཁའ་ལྡིང་གི་སྟེང་ན་ཕྱག་བཞིའི་གཡས་གཉིས་ཀྱིས་དབྱུག་པ་དང་རྡོ་རྗེ་འཛིན་པ། གཡོན་གཉིས་དུང་དང་འཁོར་ལོ་འཛིན་པའོ། །ལྷོར་ཨོཾ་ཨི་ལས་བརྒྱ་བྱིན་དང་། ཁུ་ཚུར་མ་ནི་སེར་སྐྱ་གླང་ཆེན་ལ་ཞོན་པ་གཡས་རྡོ་རྗེ་རྩེ་ལྔ་པ། གཡོན་རྡོ་རྗེ་རྩེ་གསུམ་པ་འཛིན་པའོ། །ཤར་ལྷོར་ཨོཾ་ཀཾ་ལས་འདོད་པའི་དབང་ཕྱུག་དཀར་པོ་ཕྱག་གཉིས་རལ་གྲི་དང་གཤོལ་མདའ་འཛིན་པའོ། །ལྷོ་ནུབ་ཏུ་ཨོཾ་ག་ལས་ཚོགས་བདག་དཀར་པོ་གླང་པོ་ཆེའི་ཞལ་ཅན་ཕྱག་གཡས་གཉིས་ཀྱིས་རྩེ་གསུམ་དང་ལ་དུ། གཡོན་གཉིས་ཀྱིས་དགྲ་སཏྭ་དང་ལ་ཕུག་འཛིན་པ་ནི་བྱི་བའི་གདན་ལའོ། །བྱང་ཤར་དུ་ཨོཾ་བྷྲི་ལས་རྡོ་རྗེ་གཞོན་ནུ་དང་། ཡུམ་ནི་དམར་མོ་ཞལ་དྲུག་པ་ཕྱག་གཡས་གཉིས་ཀྱིས་མདུང་དང་རྡོ་རྗེ་འཛིན་པ། གཡོན་གཉིས་ཀྱིས་ཁྱིམ་བྱ་ཅན་རྨ་བྱའི་གདན་ལ་བཞུགས་པའོ། །ནུབ་བྱང་དུ་ཨོཾ་ཀ་ལས། བྷྲིང་གི་རི་ཏི་ནག་པོ་རྔ་ལ་ཞོན་ཅིང་ཕྱག་གཉིས་ཀྱིས་རྔ་བརྡུང་བའོ། །སྒོ་བ་བཞི་ཁྲོས་པ་སྔར་གྱི་ས་བོན་ལས་བསྐྱེད་པ་སྟེ་ལྷ་བཅུ་གསུམ་མོ། །གཉིས་པ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་གཞུག་ཅིག་དབང་བསྐུར་བའོ། །དང་པོ་ལ་གཉིས་ཏེ། བྲི་ཞིང་ལྷ་དགོད་པ་དང་། ཞུགས་ཏེ་བསྒྲུབ་པའོ། །དང་པོ་ནི། དེ་ནས་དེ་དག་གི་དཀྱིལ་འཁོར་བཤད་དེ་ཞེས་སོགས་སོ། །གཉིས་པ་ནི། དེ་ནས་ཞུགས་ནས་ལྷ་རྣམས་ནི། །ཞེས་སོགས་སོ། །གཉིས་པ་ནི། དེ་ནས་རྡོ་རྗེ་འཛིན་མའི་ཞེས་སོགས་ཏེ། མེ་ཏོག་དོར་བའི་སྔགས་ནི་འདིའི་ཁྱད་པར་རོ། །གསུམ་པ་ནི། དེ་ནས་ལྷ་རྣམས་གང་དགའ་བའི། །ཞེས་སོགས་ཏེ། གང་ཕྱིར་མཆོག་ནི་ཁྱོད་ལ་སྦྱིན། །ཞེས་པས་མཆོག་གི་དངོས་གྲུབ་སྦྱིན་ནུས་པར་བསྟན་ལ། གལ་ཏེ་དེ་ནི་ཐུན་མོང་གི་དངོས་གྲུབ་རྣམས་ཀྱི་ནང་ནས་མཆོག་ཏུ་གྱུར་པ་ལ་དགོངས་སོ་སྙམ་ན་མ་ཡིན་ཏེ། ལྷ་ལ་མཆོག་ནི་གསོལ་བ་གདབ། །ཅེས་པ་ལ་སོགས་པ་དང་། ལྷ་རྫས་ཁུ་བ་བྲོ་བརྡུང་དང་། །མི་སྣང་བ་དང་མཁའ་འགྲོ་དང་། །རིལ་བུ་རྫས་དང་རྒྱལ་ལ་སོགས། །ཡིད་འདོད་ཚད་མེད་གསོལ་བ་གདབ། །ཞེས་གསུངས་པའི་ཕྱིར་རོ། །བཞི་པ་ནི། དེ་ནས་དབང་ཕྱུག་ཆེན་པོ་ལ་སོགས་པས་ཞེས་སོགས་ཏེ། འདིར་ཡང་སྒྲིབ་པ་མ་མཆིས་པའི་ལམ་བསྟན་པར་བགྱིའོ་ཞེས་པ་ནས་རྡོ་རྗེ་འཛིན་པ་ཉིད་དུ་འགྲུབ་པའི་ལམ་བསྟན་པར་བགྱིའོ་ཞེས་པའི་བར་གྱིས་འདི་དག་འཇིག་རྟེན་པ་རང་རྒྱུད་པ་ཡིན་པ་བཀག་སྟེ། འཇིག་རྟེན་པ་རང་རྒྱུད་པ་ལ་འདི་དག་བསྟན་པའི་ནུས་པ་ག་ལ་ཡོད། གསུམ་པ་ཚེ་དཔག་མེད་གསུང་གི་དཀྱིལ་འཁོར་ལ་གཉིས་ཏེ། གླེང་བསླང་བ་དང་རྒྱུད་ཀྱི་གཞུང་བསྟན་པའོ། །དང་པོ་ལ་གཉིས་ཏེ། སྟོན་པས་གླེང་བསླང་བ་དང་། འཁོར་གྱི་གླེང་བསླང་བའོ། །དང་པོ་ནི་དེ་ནས་བཅོམ་ལྡན་འདས་ཕྱག་ན་རྡོ་རྗེ་ཉིད་ཀྱིས་དཀྱིལ་འཁོར་ཀུན་ཏུ་གཟིགས་ནས་ཞེས་སོགས་སོ། །གཉིས་པ་ནི། དེ་ནས་ཞེས་སོགས་སོ། །གཉིས་པ་རྒྱུད་ཀྱི་གཞུང་ལ་བཞི་སྟེ། སྔགས་ཀྱི་ཕྲེང་བ་དང་། རྡུལ་ཚོན་གྱི་དཀྱིལ་འཁོར་དུ་སློབ་མ་ལ་དབང་བསྐུར་བ་དང་། ངན་སོང་དུ་སྐྱེ་བ་དང་སྐྱེས་ཟིན་པའི་སྡིག་པ་སྦྱོང་བ་དང་། རྒྱུད་ཀྱི་ཆེ་བ་བསྟན་པའོ། །དང་པོ་ནི། དེ་ནས་ཚངས་པ་ལ་སོགས་པ་ལྷ་རྣམས་ཤིན་ཏུ་མང་བར་གྱུར་ནས་ཞེས་སོགས་ཏེ། གཞལ་ཡས་ཁང་གི་ནང་དུ་འཁོར་ལོ་རྩིབས་བཞི་པའི་ལྟེ་བར་པད་ཟླ་ལ། ཨོཾ་བྷྲཱུྃ་སྭཱཧཱ་ལས་ཚེ་དཔག་མེད་དཀར་དམར་གཡོན་ཏིང་ངེ་འཛིན་ཅན་གཡས་སྐྱབས་སྦྱིན་གྱིས་བུམ་པ་འཛིན་པའོ། །ཤར་དུ་ཨོཾ་དྷྲཱིཾ་སྭཱཧཱ་ལས་ཕྱག་རྡོར་དཀར་ལྗང་རྡོ་རྗེ་དང་དྲིལ་བུ་འཛིན་པ། བྱང་དུ་ཨོཾ་ཀྲུཾ་སྭཱཧཱ་ལས་ཁམས་གསུམ་རྣམ་རྒྱལ་སྔོ་སྐྱ་གཡས་རྡོ་རྗེ་དབྱུག་པ། གཡོན་སྡིག་མཛུབ་ཅན། ལྷོར་ཨོཾ་ཏྲཾ་སྭཱཧཱ་ལས་ནམ་སྙིང་སྔོ་སྐྱ་གཡས་རིན་པོ་ཆེ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ། ནུབ་ཏུ་ཨོཾ་ཧྲཱིཿསྭཱཧཱ། ལས་སྤྱན་རས་གཟིགས་དམར་སྐྱ་གཡས་པདྨ། གཡོན་མི་འཇིགས་པ་སྦྱིན་པ། བདུག་སོགས་བཞི་དང་། སྒོ་བ་བཞི་ནི་ཀུན་རིག་བཞིན་ཏེ་ལྷ་བཅུ་གསུམ་མོ། །གཉིས་པ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་གཞུག་ཅིང་དབང་བསྐུར་བ་ཡན་ལག་དང་བཅས་པའོ། །དང་པོ་ལ་གཉིས་ཏེ། བྲི་ཞིང་ལྷ་དགོད་པ་ལ་སོགས་པ་དང་། ཞུགས་ཏེ་སྒྲུབ་པ་ལ་སོགས་པའོ། །དང་པོ་ནི། དེ་ནས་དེ་དག་གི་དཀྱིལ་འཁོར་བཤད་དེ། ཞེས་སོགས་ཏེ། བུམ་པ་ལྔ་དང་བརྒྱད་ནི་དབང་བུམ་དང་མཆོད་བུམ་ཡིན་ལ། བདུག་པ་ལ་སོགས་ནི་མཆོད་རྫས་ཏེ། ལས་ཐམས་ཅད་པའི་སྔགས་ཀྱིས་བཏབ་པ་ནི་ཁམས་གསུམ་རྣམ་རྒྱལ་གྱི་སྔགས་སོ། །མཆོད་པ་ལ་སོགས་པ་བཞག་སྟེ་ཞེས་པ་ནི་བདུག་སོགས་བཞི་གྲྭ་བཞིར་དགོད་པའོ། །གཉིས་པ་ནི། དེ་ནས་སྔགས་མཁན་བདག་ཉིད་ཞུགས་ལ་ཞེས་སོགས་ཏེ། སྔགས་མཁན་ཞེས་པ་གོང་འོག་ཏུ་མང་དུ་འབྱུང་བ་རྣམས་ཀྱིས་ནི། མདུན་བསྐྱེད་མ་བསྒྲུབ་པའི་གོང་དུ་བདག་བསྐྱེད་བསྒོམ་པ་བསྟན་སྙམ་མོ། །འདིར་མདུན་བསྐྱེད་བསྒྲུབས་པའི་རྗེས་སུ་བདག་ཉིད་དབང་བསྐུར་ཞིང་། མདུན་བསྐྱེད་ལ་དམིགས་པའི་བཟླས་པ་བྱ་བར་གསུངས་པ་ནི་གོང་འོག་ཀུན་ལ་སྦྱར་བར་བྱའོ། །གཉིས་པ་ལ་བཞི་སྟེ། སློབ་མ་གཞུག་ཅིང་དབང་བསྐུར་བ་དང་། བླ་མ་ལ་ཡོན་དབུལ་བ་དང་། དངོས་གྲུབ་ཀྱི་ཡེ་ཤེས་དང་། དབང་བསྐུར་བའི་ཕན་ཡོན་བསྟན་པའོ། །དང་པོ་ནི། དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ་ཞེས་སོགས་ཏེ། བདག་འཇུག་གི་རྗེས་སུ་བདག་མདུན་ཐ་མི་དད་དུ་བསྒྲུབ་ཚུལ་འདི་ནི་འདས་པའི་དཀྱིལ་འཁོར་ཀུན་ལ་སྦྱར་བར་བྱའོ། །འདིར་ཨོཾ་བཛྲ་དྷ་ར་ཞེས་སོགས་ནི་འཇུག་པའི་ཚེ་མེ་ཏོག་གཟུང་བའི་སྔགས་ཀྱང་ཡིན་ལ། ཨོཾ་ཏ་ཐཱ་ག་ཏ་ཞེས་སོགས་ནི་མེ་ཏོག་འདོར་འཆིང་གཉིས་ཀའི་སྔགས་དང་། ཨོཾ་སརྦ་ཏ་ཐཱ་ག་ཏ་ཞེས་སོགས་ནི་ཆུ་དབང་གི་སྔགས་སོ། །དེ་དག་དང་། དམ་ཚིག་དང་། བཀའི་དབང་བསྐུར་བ་དང་། ལས་ཀྱི་དབང་བསྐུར་བ་རྣམས་ནི་འདིའི་ཁྱད་ཆོས་སོ། །གཉིས་པ་ནི། དེ་ནས་བླ་མ་བླ་མའི་ཕྱིར། །ཞེས་སོགས་སོ། །གསུམ་པ་ནི། དེ་ནས་བྱང་ཆུབ་བར་དུ་ནི། །ཞེས་སོགས་ཏེ། ཆོས་རྣམས་ཐམས་ཅད་དངོས་མེད་པ། །སེམས་ཀྱིས་བསྒོམས་པ་བྱས་ནས་ཀྱང་། །ཞེས་པས་སྣོད་བཅུད་སྟོང་ཉིད་དུ་བསྒོམ་པ་བསྟན། ཨ་ལས་ཟླ་བའི་དཀྱིལ་འཁོར་བསམ། །ཞེས་པས་ནི་གདན་གྱི་ཟླ་བ་བསྟན་ལ། དེའི་འོག་ཏུ་པདྨ་ནི་གླེང་བཞིར་བསྟན་ཟིན་ཏོ། །རང་གི་ས་བོན་དེ་དབུས་སུ། །བསམས་ནས་ཞེས་དང་། དམ་ཚིག་གི་ཕྱག་རྒྱ་ཡང་། བསམ་ཞིང་ཞེས་པས་ནི་རྡོ་རྗེ་སེམས་དཔའ་དང་། དཀྱིལ་འཁོར་གྱི་གཙོ་བོ་གང་བསྐྱེད་པ་དེའི་ས་བོན་དང་། དེ་ལས་ཕྱག་མཚན་དུ་གྱུར་པ་བསྟན། དེ་བཞིན་དེ་ཉིད་དུ་ཞེས་པས་ནི་ཕྱག་མཚན་ལ་ས་བོན་གྱིས་མཚན་པ་བསྟན། སྒྲུབ་པ་པོས་ནི་བསྒྱུར་བར་བྱ། །ལྷ་ཡི་རྣལ་འབྱོར་ཚུལ་དུ་བསྒྱུར། །ཞེས་པས་ནི་དེ་ལས་ལྷའི་སྐུར་བསྒོམ་པ་བསྟན། དེ་ནས་རང་གི་ས་བོན་དང་། །ཕྱག་རྒྱས་ཕྱག་རྒྱ་དེ་བྱིན་བརླབ། །ཅེས་པས་ནི། ཤཱཀ་ཐུབ་ནས་འབྱུང་བའི་སྔགས་དང་ཕྱག་རྒྱས། གནས་གསུམ་བྱིན་གྱིས་བརླབ་པ་བསྟན། ལྟག་འོག་གོ་རིམ་ཇི་བཞིན་དུ། །སངས་རྒྱས་རྣམས་ཀྱིས་དབང་བསྐུར་རོ། །ཞེས་པས་གནས་ལྔར་དབང་བསྐུར་བ་བསྟན་ནོ། །འདི་བདག་བསྐྱེད་ཡིན་པ་ནི། །དེ་ནས་ང་རྒྱལ་བསྐྱེད་པ་དང་། །ཞེས་པས་ཤེས་སོ། །བཞི་པ་ནི། དེ་ནས་ཚངས་པ་ལ་སོགས་པའི་ལྷ་ཆེན་པོ་རྣམས་ཀྱིས་ཞེས་སོགས་སོ། །གསུམ་པ་ངན་སོང་དུ་སྐྱེ་བ་དང་སྐྱེས་ཟིན་པའི་སྡིག་པ་སྦྱོང་བ་ལ་གཉིས་ཏེ། ལྷ་རྣམས་ཀྱིས་ཞུས་པ་དང་། བཅོམ་ལྡན་འདས་ཀྱིས་གསུངས་པའོ། །དང་པོ་ནི། དེ་ནས་ལྷ་དེ་དག་གིས་དེ་བཞིན་དུ་ཕྱག་འཚལ་ནས། ཞེས་སོགས་སོ། །གཉིས་པ་ལ་གཉིས་ཏེ། ཚེ་འདས་ལ་སྦྱང་བ་དང་། ཚེ་ལྡན་ལ་སྦྱང་བའོ། །དང་པོ་ལ་གསུམ་སྟེ། དབང་བསྐུར་བས་སྡིག་པ་སྦྱོང་བ་དང་། བཟླས་པས་སྦྱང་བ་དང་། སྦྱིན་སྲེག་གིས་སྦྱང་བའོ། །དང་པོ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ཀྱེ་ལྷ་ཡི་བུ་རྣམས་དེ་དག་ནི། །ཞེས་སོགས་སོ། །གཉིས་པ་ནི། ཀྱེ་ལྷའི་བུ་རྣམས་ངན་སོང་དུ་སྐྱེས་ཟིན་པ་ཞེས་སོགས་ཏེ། མཆོད་རྟེན་དང་རང་གི་ལྷའི་སྐུ་ནི་རུས་པ་ལ་བཏབ་པ་སྟེ། རྟེན་བསྐྱེད་ནས་དབང་བསྐུར་བའོ། །རིགས་མཐུན་པ་དང་བུ་ལ་སོགས་པ་ནི་རྟེན་བསྐྱེད་དུ་མི་རུང་གི ཚེ་འདས་དེའི་ཆེད་དུ་དེ་དག་ལ་དབང་བསྐུར་བའོ། །གཉིས་པ་ནི། ལྷའི་བུ་རྣམས་དེའི་མིང་ནས་སྨོས་ཏེ། ཞེས་སོགས་སོ། །གསུམ་པ་ལ་བཞི་སྟེ། ཞི་བ་དང་། རྒྱས་པ་དང་། དབང་དང་། མངོན་སྤྱོད་དོ། །དང་པོ་ནི། ལྷ་ཡི་བུ་རྣམས་ཞི་བ་ཡི། །ཞེས་སོགས་སོ། །གཉིས་པ་ནི། དེ་ནི་བདེ་འགྲོར་སྐྱེས་ནས་ཀྱང་། །ཞེས་སོགས་སོ། །གསུམ་པ་ནི། དེ་ནས་ཕན་ཕྱིར་ངེས་པར་ཡང་། །ཞེས་སོགས་སོ། །བཞི་པ་ནི། དེ་ལ་གདོན་རྣམས་གཞོམ་པ་ནི། །ཞེས་སོགས་ཏེ། མངོན་པར་རྟོགས་པ་རྣམས་ཀུན་རིག་གི་སྐབས་སུ་བསྟན་ཟིན་ནོ། །གཉིས་པ་ཚེ་ལྡན་ལ་སྦྱང་བ་ནི། གོ་རིམ་འདི་དག་ཉིད་ཀྱིས་ནི། །ཞེས་སོགས་ཏེ། རོ་བསྲེག་པ་དང་། རུས་བུའི་སཱཙྪ་མ་གཏོགས་པ་སྡིག་སྦྱོང་གི་སྒོ་ཐམས་ཅད་གསོན་པོ་ལ་ཡང་འཇུག་པར་ཤེས་པར་བྱའོ། །བཞི་པ་རྒྱུད་ཀྱི་ཆེ་བ་བསྟན་པ་ལ་བཞི་སྟེ། རྒྱུད་བྲིས་པའི་ཕན་ཡོན། མངའ་གསོལ་བའི་ཕན་ཡོན། རྒྱུད་བཤད་པའི་ཕན་ཡོན། དཀྱིལ་འཁོར་དུ་ཞུགས་པའི་ཕན་ཡོན་ནོ། །དང་པོ་ནི། དེ་ནས་ཚངས་པ་ལ་སོགས་པའི་ལྷའི་བུ་རྣམས་ཡིད་མགུ་ནས་ཞེས་སོགས་སོ། །གཉིས་པ་ནི། གང་གིས་བརྟགས་པའི་རྒྱལ་པོ་འདི་དད་པས་ཞེས་སོགས་སོ། །གསུམ་པ་ནི། བདག་ཅག་ཚངས་པ་ལ་སོགས་པའི་ལྷ་རྣམས་ཀྱིས་ཞེས་སོགས་སོ། །བཞི་པ་ནི། བཅོམ་ལྡན་འདས་དཀྱིལ་འཁོར་དུ་ཞུགས་ཏེ། དབང་བསྐུར་བ་གང་ལགས་པ་དེ་དག་ཀྱང་ཞེས་སོགས་སོ། །བཞི་པ་འཁོར་ལོས་སྒྱུར་བ་ཡོན་ཏན་གྱི་དཀྱིལ་འཁོར་ལ་བཞི་སྟེ། སྔགས་ཀྱི་ཕྲེང་བ་དང་། རྡུལ་ཚོན་གྱི་དཀྱིལ་འཁོར་དུ་སློབ་མར་དབང་བསྐུར་བ་དང་། དངོས་གྲུབ་ཀྱི་ཡེ་ཤེས་དང་། ཕྱག་རྒྱའི་ཡེ་ཤེས་སོ། །དང་པོ་ནི། དེ་ནས་བཅོམ་ལྡན་འདས་ཕྱག་ན་རྡོ་རྗེས་གསང་སྔགས་དང་། རིག་པ་དང་། ཞེས་སོགས་ཏེ། གཞལ་ཡས་ཁང་གི་ནང་དུ་འཁོར་ལོ་རྩིབས་བཞི་པ་སྔོན་པོའི་ཕྱིར་ལྷ་སྣམ་རིམ་པ་བརྒྱད་བྱས་པའི་དབུས་ཀྱི་པད་ཟླ་ལ། ཨོཾ་བྷྲཱུྃ་དྷྲུྃ་ལས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པའམ། ཨོཾ་བཛྲ་པཱ་ཎི་ཧྲཱིཿཏ་ཏིཥྚ་ཧཱུྃ་ལས་ཀུན་བཟང་སེར་པོ་རིན་པོ་ཆེའི་སྙེ་མ་འཛིན་པའམ། ཨོཾ་ཧཱུྃ་ཨ་ལས་བདེ་བ་ཆེན་པོ་དམར་པོ་མདའ་གཞུ་འཛིན་པ་གང་མོས་སུ་བསྐྱེད། ཤར་དུ་ཨོཾ་བཛྲ་ཧཱུྃ་ཕཊ་ལས་ཕྱག་ན་རྡོ་རྗེ་དཀར་སེར་རྡོ་རྗེ་དྲིལ་བུ་འཛིན་པ། ལྷོར་ཨོཾ་དྷྲི་ཌ་བཛྲ་ཧཱུྃ་ཕཊ་ལས་རྡོ་རྗེ་རིན་ཆེན་སེར་པོ་རཏྣ་འཛིན་པ། ནུབ་རྩིབས་ལ་ཨོཾ་བཛྲ་ཧཱུྃ་ཧྲཱིཿལས་རྡོ་རྗེ་ཆོས་དམར་སྐྱ་པད་སྡོང་འཛིན་པ། བྱང་དུ་ཨོཾ་བཛྲ་ཧཱུྃ་ཨ་ལས་རྡོ་རྗེ་ལས་ལྗང་སེར་ཕྱག་གཡས་སྣ་ཚོགས་རྡོ་རྗེ་གཡོན་དེས་ཡུ་བ་བྱས་པའི་དྲིལ་བུ་འཛིན་པ། ལྷ་སྣམ་གཉིས་པའི་ཕྱོགས་བཞིར་སེམས་དཔའ་བཅུ་དྲུག་ཀུན་རིག་བཞིན་བསྐྱེད། སྒོ་བ་བཞི་ཡང་བསྐྱེད་དེ་རྩ་བའི་ལྷ་ཉེར་ལྔར་རྩ་སྐྱ་པ་བཞེད་ལ། འཛིམ་པ་རིན་ཤེར་ནི་སྒེག་སོགས་བརྒྱད་ཀྱང་འདོད་པ་ནི་གཞུང་ན་མི་གསལ་ལོ། །མགྲོན་ཐབས་ཀྱི་ལྷ་ནི། ལྷ་སྣམ་དང་པོ་ལ་སངས་རྒྱས་རབ་བདུན། ཤཱཀ་ཐུབ་དང་བརྒྱད་བྲི་གསུང་ཡང་། ཤཱཀྱ་ཐུབ་པ་ཉིད་བདུན་གྱི་ཁོངས་སུ་གཏོགས་པས་དཔེ་མ་དག་པ་འདྲའོ། །རྩ་སྐྱ་པ་དང་། འཛིམ་པས་སངས་རྒྱས་རབ་བདུན། རིགས་ལྔ་དང་བཅུ་གཉིས་ཕྱོགས་རེ་རེར་བཀོད། ཤར་དུ་རྣམ་སྣང་མི་བསྐྱོད་པ། རྣམ་གཟིགས་དེས་འགྲེའོ། །གསུམ་པ་ལ་བསྐལ་བཟང་བཅུ་དྲུག བཞི་པ་ལ་ཉན་ཐོས་བཅུ་དྲུག རང་རྒྱལ་བཅུ་གཉིས། ལྔ་པ་ལ་ལྷ་ཆེན་བརྒྱད། དྲུག་པ་ལ་གཟའ་བརྒྱད་རྒྱུ་སྐར་དང་བཅས་པའོ། །བདུན་པ་ལ་རྒྱལ་པོ་བཞི་དང་ཀླུ་ཆེན་པོ་བརྒྱད་བྲི། བརྒྱད་པ་ལ་ཕྱོགས་སྐྱོང་བཅུ། གྲྭ་བཞིའི་ཤར་ལྷོ་དམྱལ་བ། སྲིན་པོར་བྱ། རླུང་དུ་ཕག འབྱུང་པོར་རྩངས་པ་རྣམས་སོ། །གཉིས་པ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་གཞུག་ཅིང་དབང་བསྐུར་བའོ། །དང་པོ་ལ་གཉིས་ཏེ། བྲི་ཞིང་ལྷ་དགོད་པ་ལ་སོགས་པ་དང་། ཞུགས་ཏེ་སྒྲུབ་པའོ། །དང་པོ་ནི། དེ་ནས་དེ་དག་གི་དཀྱིལ་འཁོར་བཤད་དེ་ཞེས་སོགས་སོ། །གཉིས་པ་ནི། དེ་ནས་སྔགས་མཁན་ཉིད་ཀྱིས་ནི། །ཞེས་སོགས་ཏེ། འདིར་སྤྱན་དྲངས་པའི་རྗེས་སུ་སློབ་དཔོན་བདག་ཉིད་འཇུག་ཅིང་དབང་བླང་བ་གསལ་ལོ། །གཉིས་པ་ལ་གསུམ་སྟེ། སློབ་མའི་མཚན་ཉིད་དང་། གཞུག་ཅིང་དབང་བསྐུར་བ་དངོས་དང་། བླ་མ་ལ་ཡོན་དབུལ་ཞིང་བཀའ་ནོད་པའོ། །དང་པོ་ནི། སྡོམ་གནས་དམ་ཚིག་ལྡན་པ་དང་། །ཞེས་སོགས་ཏེ། སློབ་མའི་མཚན་ཉིད་འདི་ནི་གོང་འོག་ཀུན་ཏུ་ཤེས་པར་བྱའོ། །གཉིས་པ་ནི། སྔགས་འདི་ཡིས། བྱང་ཆུབ་ཏུ་སེམས་བསྐྱེད་ལ། ཞེས་སོགས་ཏེ། ཡེ་ཤེས་དབབ་པའི་སྔགས་ནི་གཞན་དང་ཐུན་མོང་བ་ཡིན་ལ། གཞན་རྣམས་ནི་འདིའི་ཁྱད་ཆོས་སོ། །གསུམ་པ་ནི། དེ་ནས་བདག་གི་ལུས་ལ་སོགས་པ། །ཞེས་སོགས་སོ། །གསུམ་པ་དངོས་གྲུབ་ཀྱི་ཡེ་ཤེས་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ནས་ལས་ཐམས་ཅད་བྱེད་དུ་གཞུག་ཅིང་ཞེས་སོགས་སོ། །གཉིས་པ་ལ་གཉིས་ཏེ། རང་དོན་དང་གཞན་དོན་བསྟན་པའོ། །དང་པོ་ནི། བདེ་བས་བདེ་བ་བསྐྱེད་ན་ནི། །ཞེས་སོགས་སོ། །གཉིས་པ་ལ་ལྔ་སྟེ། ཕྲིན་ལས་བཞི་མདོར་བསྟན་པ་དང་། རྒྱས་པར་བཤད་པ་དང་། སེམས་དཔའ་བཅུ་དྲུག་གི་ལས་ཚོགས་དང་། ཕྲིན་ལས་བཞིའི་མཇུག་སྡུད་བསྟན་པ་དང་། འཁོར་གྱིས་ལེགས་སོ་བྱིན་པའོ། །དང་པོ་ནི། དེ་ནས་ལས་རྣམས་བཤད་བྱ་སྟེ། །ཞེས་སོགས་སོ། །གཉིས་པ་ནི། རྡོ་རྗེ་སེམས་དཔའ་བདག་སྒྱུར་ལ། །ཞེས་སོགས་སོ། །གསུམ་པ་ནི། འདྲེན་པ་ཀུན་ཏུ་བཟང་པོ་ཡིས། །ཞེས་སོགས་སོ། །བཞི་པ་ནི། བཟླས་དང་སྦྱིན་སྲེག་ལས་རྣམས་ཀྱིས། །ཞེས་སོགས་སོ། །ལྔ་པ་ནི། དེ་ནས་བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ནས་ཞེས་སོགས་སོ། །བཞི་པ་ཕྱག་རྒྱའི་ཡེ་ཤེས་ལ་བསླབ་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ནས་བཅོམ་ལྡན་འདས་ཞེས་སོགས་སོ། །གཉིས་པ་ལ་གསུམ་སྟེ། ལག་པ་བྱིན་གྱིས་བརླབ་པ་དང་། ཕྱག་རྒྱ་བཅིང་ཐབས་དངོས་དང་། ཞར་ལས་བྱུང་བ་སྔགས་བསྟན་པའོ། །དང་པོ་ནི། ལག་པ་གཉིས་མདུན་དུ་བཞག་ལ་ཞེས་སོགས་ཏེ། དེ་བཞིན་གཤེགས་པ་རྣམས་ཡིན་པར་མོས་པ་བསྐྱེད་དེ་ཞེས་པ་ཡན་ཆད་ཀྱིས་ལག་པ་བྱིན་གྱིས་བརླབ་པ་བསྟན། ཆོས་ཐམས་ཅད་གཅིག་ལ་གཅིག་འདྲེས་པ་དང་། ཞེས་པས་གཟུགས་བརྙན་གྱི་སྦྱོར་བ་བསྟན་ཏེ། ཨ་ནུ་ནྱ། ཞེས་པ་བོད་སྐད་དུ་བསྒྱུར་བ་ལ་ཆོས་ཐམས་ཅད་གཅིག་ལ་གཅིག་འདྲེས་པ་ཞེས་འབྱུང་བའི་ཕྱིར་རོ། །བདག་དང་ཡང་རྗེས་སུ་མཐུན་པར་བྱ་སྟེ། ཞེས་པས་ནི་བདག་བསྐྱེད་དངོས་བསྟན་ནམ་སྙམ། རྩ་སྐྱ་པས་ནི་དེ་གཉིས་ཆར་གྱིས་གཟུགས་བརྙན་གྱི་སྦྱོར་བ་དང་། རྡོ་རྗེ་རྩེ་མོ་ནས་བཤད་པའི་སྡིག་པ་དྲལ་བ་དང་། ཡེ་ཤེས་དབབ་ཅིང་བརྟན་པ་རྣམས་གསུངས་སོ། །གཉིས་པ་ནི། ལག་པ་གཉིས་པདྨ་འདྲ་བར་སྦྱར་བར་བྱས་ནས། ཞེས་སོགས་སོ། །གསུམ་པ་ནི། ས་བཅུ་དྲུག བ་བཅུ་དྲུག ཛ་བཅུ་དྲུག ཏྭ་བཅུ་དྲུག་རྣམས་སོ་སོར་སྦྱར་ན་བཛྲ་སཏྭ་འབྱུང་ལ། ཧཱུྃ་ལ་སོགས་པའི་ས་བོན་བཅུ་དྲུག་དང་སྦྱར་བའི་ཚེ། བཛྲ་ས་ཏྭ་ཧཱུྃ་བཛྲ་ས་ཏྭ་ཛཿལ་སོགས་པ་བཅུ་དྲུག་ཏུ་འགྱུར་བ་ནི་སེམས་དཔའ་བཅུ་དྲུག་གི་སྙིང་པོ་དང་། འབྱིན་སྔགས་སུ་རྩ་སྐྱ་པ་བཞེད་ལ། རྗེ་བཙུན་གྱིས་སེམས་དཔའ་བཅུ་དྲུག་གི་ཞལ་ཕྱག་དེ་ཉིད་འདུས་པ་ལྟར་བྱ་དགོས་པས། སྔགས་ཀྱང་དེ་ཉིད་འདུས་པ་ལྟར་བྱ་དགོས་པར་དགོངས་ནས་གཞན་ཕན་འོད་ཟེར་དུ་དེ་ལྟར་གསུངས་ལ། འདིར་བཛྲ་སཏྭ་ཧཱུྃ་ཞེས་པ་ལ་སོགས་པ་ཡི་གེ་ལྔའི་མཐའ་བརྟེན་དུ་ཤམ་ཊ་དང་། གྷུ་དང་། ཧོཿཏཾ་དང་། ཁ་ཊཱཾ་རྣམས་སྦྱར་བའི་ཚེ་ལས་བཞིའི་རོལ་མོ་བརྡུང་བའི་སྔགས་སུ་བཞེད་དོ། །ཡུམ་བཞིའི་སྔགས་ཀུན་རིག་གི་གནས་སྐབས་སུ་སྦྱར་དགོས་པ་ལ་བལྟས་ན་སྔ་མ་རྣམས་སེམས་དཔའ་བཅུ་དྲུག་གི་བཟླས་སྔགས་སུ་བྱས་ཀྱང་ཉེས་པ་མེད་དམ་སྙམ་མོ། །ལྔ་པ་མེ་ལྟར་འབར་བའི་ཕྲིན་ལས་ཀྱི་དཀྱིལ་འཁོར་ལ་གཉིས་ཏེ། ལྷ་རྣམས་ཀྱིས་ཞུས་པ་དང་། ཕྱག་ན་རྡོ་རྗེས་བཤད་པའོ། །དང་པོ་ནི། དེ་ནས་ལྷ་རྣམས་ཀུན་མགུ་ནས། །ཞེས་སོགས་སོ། །གཉིས་པ་ལ་བཞི་སྟེ། སྔགས་ཀྱི་ཕྲེང་བ་དང་། རྡུལ་ཚོན་གྱི་དཀྱིལ་འཁོར་དུ་སློབ་མར་དབང་བསྐུར་བ་དང་། སྒྲུབ་པ་དང་། ཕྲིན་ལས་བསྟན་པའོ། །དང་པོ་ནི། དེ་ནས་བཅོམ་ལྡན་འདས་ཕྱག་ན་རྡོ་རྗེས། རང་གི་སྐུ་ཞི་བ་དེ་བོར་ཏེ་རྡོ་རྗེ་སེམས་དཔའ་ཁྲོ་བོ་མེ་ཉི་མ་ཞེས་བྱ་བའི་སྐུར་ཞུགས་ནས་ཞེས་སོགས་སོ། །འདིས་ཕྱག་ན་རྡོ་རྗེ་འཇིག་རྟེན་གསུམ་རྒྱལ་དུ་བསྒྱུར་ནས། ཨོཾ་བཛྲ་སཏྭ་ཀྲོ་དྷ་སོགས་ཀྱི་སྔགས་ཕྱུང་བར་གསུངས་པས་སྲུང་འཁོར་བསྡུས་པའི་སྐབས་སུ་འདི་ལྟར་ཉམས་སུ་ལེན་པ་ནི་རྒྱུད་ཀྱི་དགོངས་པ་བླ་ན་མེད་པའོ། །དཀྱིལ་འཁོར་སྒྲུབ་ཚུལ་ནི། འཁོར་ལོ་རྩིབས་བཅུ་གཉིས་པ་རྩིབས་རྟེན་དང་བཅས་པའི་དབུས་ཀྱི་པད་ཉི་ལ། བཛྲ་སཏྭ་ཀྲོ་དྷ་སོགས་ཀྱིས་འཇིག་རྟེན་གསུམ་རྒྱལ་བསྐྱེད་དེ། ཤར་རྩིབས་སུ་ཨོཾ་ཏྲཻ་ལོ་ཀ་ཀ་ར་ཧཱུྃ་ཕཊ་ལས་འཇིག་རྟེན་གསུམ་སྣང་། ལྷོར་ཨོཾ་ཏྲཻ་ལོ་ཀ་ད་མ་ཀ་ཧཱུྃ་ཕཊ་ལས་གསུམ་འདུལ། ནུབ་ཏུ་ཨོཾ་ཏྲཻ་ལོ་ཀ་ན་ཤཱ་ཡ་ཧཱུྃ་ཕཊ་ལས་གསུམ་འཇིག བྱང་དུ་ཨོཾ་ཏྲཻ་ལོ་ཀ་བན་དྷ་ཧཱུྃ་ཕཊ་ལས་གསུམ་འཆིང་། དེ་བཞིའི་གཡས་རྩིབས་ལ་རིམ་པར་ཨོཾ་ཨ་མྲྀ་ཏེ་ཧཱུྃ་ཕཊ་ལས་དབང་ལྡན་དུ་བདུད་རྩི་འཁྱིལ་པ། ཨོཾ་ཀ་ལ་དཎྜ་ཧཱུྃ་ཕཊ་ལས་མེ་རུ་དབྱུག་སྔོན་ཅན། ཨོཾ་ཀ་ནི་དུ་ནི་ཧཱུྃ་ཕཊ་ལས་སྲིན་པོར་མི་གཡོ་བ། ཨོཾ་ཧྲཱིཿཏྲི་ཧཱུྃ་ཕཊ་ལས་རླུང་དུ་རྟ་མགྲིན། གཡོན་རྩིབས་ལ་རིམ་པར་ཨོཾ་ཀ་ལ་རཀྵ་སཱི་ཧཱུྃ་ཕཊ་ལས་དུས་ཀྱི་བདུག་པ་མ། ཨོཾ་ཀ་ལ་དན་ཏི་དུན་ཏི་ཧཱུྃ་ཕཊ་ལས་སྲིན་པོར་མེ་ཏོག་མ། ཨོཾ་ཀ་ལ་རཀྵི་ཧཱུྃ་ཕཊ་ལས་རླུང་དུ་མར་མེ་མ། ཨོཾ་ཀ་ལ་ཡཀྵ་ཧཱུྃ་ཕཊ་ལས་བྱང་ཤར་དུ་དུས་ཀྱི་གནོད་སྦྱིན་མོའོ། །ཞེས་རྩ་སྐྱ་པས་བཞེད་ལ། རྗེ་བཙུན་གྱིས་དེ་བཞི་རིམ་པ་བཞིན། དུས་ཀྱི་སྲིན་མོ། དུས་ཀྱི་དབྱུག་པ་མ། དུས་ཀྱི་མཚན་མོ། དུས་ཀྱི་གནོད་སྦྱིན་མོར་བཞེད་དེ་སྔགས་དོན་ལ་དེ་ཉིད་གསལ་ལོ། །ཨོཾ་ཀ་ལ་ཨཾ་ཀུ་ཤ་ཧཱུྃ་ཕཊ་ལས་ཤར་སྒོར་ལྕགས་ཀྱུ། ཨོཾ་ཀ་ལ་པཱ་ཤ་ཧཱུྃ་ཕཊ་ལས་ལྷོ་སྒོར་ཞགས་པ། ཨོཾ་ཀ་ལ་བན་དྷ་ཧཱུྃ་ཕཊ་ལས་ནུབ་སྒོར་ལྕགས་སྒྲོག ཨོཾ་ཀ་ལ་རཀྵ་ཧཱུྃ་ཕཊ་ལས་བྱང་སྒོར་དུས་ཀྱི་འབེབས་པ་སྟེ། དེ་རྣམས་ཐམས་ཅད་སྐུ་མདོག་སྔོ་ནག་ཞལ་ཕྱག་མཐའ་ཡས་པ་ཁྲོ་བོའི་རྒྱན་ཐམས་ཅད་ཀྱིས་བརྒྱན་ཅིང་། དབང་ཕྱུག་ཆེན་པོ་ལ་སོགས་པའི་རོའི་གདན་ལ་ཞབས་གཡོན་བརྐྱང་ཞིང་གཡས་བསྐུམ་སྟེ། གྲི་གུག་དང་ཐོད་པ་ལ་སོགས་པའི་མཚོན་ཆས་རྒྱུ་མ་དྲངས་ནས་ཞལ་དུ་གསོལ་བའོ། །གཉིས་པ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་གཞུག་ཅིང་དབང་བསྐུར་བའོ། །དང་པོ་ལ་གཉིས་ཏེ། བྲི་ཞིང་ལྷ་དགོད་པ་ལ་སོགས་པ་དང་། ཞུགས་ཏེ་སྒྲུབ་པའོ། །དང་པོ་ནི། དེ་ནས་དཀྱིལ་འཁོར་མི་བཟད་པ། །ཞེས་སོགས་ཏེ་སྔར་གྱི་རྡོ་རྗེ་སེམས་དཔའི་སྐུར་ཞུགས་ནས་ཞེས་པ་ཁྲོ་བོ་ཡིན་པ་གཞུང་འདིས་ཤེས་སོ། །གཉིས་པ་ནི། དེ་ནས་སློབ་དཔོན་བདག་ཉིད་ཅེས་སོགས་སོ། །གཉིས་པ་ནི། དེ་ནས་སློབ་མ་བསྡུས་ནས་ཞེས་སོགས་ཏེ། སྔགས་བརྒྱཾད་ནི་རིམ་པ་ལྟར་དཀྱིལ་འཁོར་དུ་འཇུག་པ་དང་། དམ་ལ་གཞག་པ་དང་། ཕྲེང་བ་དོར་བ་དང་། མིག་དབྱེ་བ་དང་། དཀྱིལ་འཁོར་བསྟན་པ་དང་། དམ་ཚིག་བརྟན་པར་བྱེད་པ་དང་། ཆུའི་དབང་བསྐུར་བའི་སྔགས་ཡིན་ལ། དེ་བཞིན་དུ་དབང་བསྐུར་བར་བྱའོ། །ཞེས་པས་ནི་དབང་བསྐུར་ལྷག་མ་རྣམས་བསྟན་ནོ། །གསུམ་པ་ནི། དེ་ནས་དེ་དག་གི་སྒྲུབ་པ་བཤད་དེ་ཞེས་སོགས་སོ། །བཞི་པ་ལ་གསུམ་སྟེ། ཞི་བ་དང་། རྒྱས་པ་དང་། དབང་ངོ་། །དང་པོ་ལ་བཅུ་སྟེ། ཐབ་ཁུང་དང་བཅས་པའི་དཀྱིལ་འཁོར་བྲི་བ་དང་། མཆོད་པའི་རྫས་དགོད་པ་དང་། ཕྱོགས་ཀྱི་ཤིས་པ་སྔོན་དུ་སོང་ནས་ལྷའི་རྣལ་འབྱོར་དང་། སྒྲུབ་པ་པོའི་ཆས་དང་བསྲེག་རྫས་ཀྱི་ཁྱད་པར་དང་། ཡམ་ཤིང་དང་བུ་ཤིང་གི་ཁྱད་པར་དང་། བུ་ཤིང་ལ་མེ་སྦར་བ་སྔོན་དུ་སོང་ནས་མེ་ལྷའི་ཁྱད་པར་བསྟན་པ་དང་། མེ་ལྷ་དང་། ཡེ་ཤེས་ཀྱི་ལྷ་ལ་སྦྱིན་སྲེག་བྱ་བ་དངོས་དང་། བསྒྲུབ་བྱ་ལ་བསྲུང་བ་དང་། གཤེགས་སུ་གསོལ་བའི་ཆོ་ག་དང་། མ་གྲུབ་ན་བསྐྱར་བའི་ཆོ་ག་བསྟན་པའོ། །དང་པོ་ནི། དེ་ནས་ཁུང་བུ་གསུམ་ལ་རྣམ་གཅིག་ནི། །ཞེས་སོགས་སོ། །གཉིས་པ་ནི། དྲི་ཞིམ་ཆུས་བཀང་མདོག་འོད་དཀར་གྱུར་ལ། །ཞེས་སོགས་སོ། །གསུམ་པ་ནི། ཁ་ནི་ཤར་ཕྱོགས་བལྟས་ཏེ་སྦྱིན་སྲེག་བྱ། །ཞེས་སོགས་སོ། །བཞི་པ་ནི། གོས་ལ་སོགས་པ་ཕྲེང་བ་དཀར་གྱིས་བརྒྱན། །ཞེས་སོགས་སོ། །ལྔ་པ་ནི། འདབ་བདུན་འབྲས་བུ་མེ་ཏོག་རྣམས། །ཞེས་སོགས་སོ། །དྲུག་པ་ནི། བུད་ཤིང་དེ་ལས་བྱུང་བའི་མེ། །ཞེས་སོགས་སོ། །བདུན་པ་ནི། དེ་ནས་དེ་ལྟར་བསམས་ནས་ཀྱང་། །ཞེས་སོགས་སོ། །བརྒྱད་པ་ནི། དེ་ཡི་ལུས་ལ་དབང་བསྐུར་ཞིང་། །ཞེས་སོགས་སོ། །དགུ་པ་ནི། མཇུག་ཏུ་མངོན་པར་མཆོད་ནས་ནི། །ཞེས་སོགས་སོ། །བཅུ་པ་ནི། ཅི་སྟེ་དེ་ནི་སྡིག་ཅན་ནམ། །ཞེས་སོགས་སོ། །གཉིས་པ་རྒྱས་པ་ལ་བཅུ་གཅིག་སྟེ། སྦྱིན་སྲེག་གི་གནས་དང་། ཐབ་དང་དཀྱིལ་འཁོར་བྲི་བ་དང་། མཆོད་པའི་རྫས་དགོད་པ་དང་། སྒྲུབ་པའི་ཆོས་དང་ཕྱོགས་ཀྱི་ཤིས་པ་སྔོན་དུ་སོང་བས་ལྷའི་རྣལ་འབྱོར་བྱ་བ་དང་། ཏིང་ངེ་འཛིན་དང་བཟླས་བརྗོད་ཀྱི་ཁྱད་པར་དང་། མཆོད་པ་དང་། ཡམ་ཤིང་དང་བུད་ཤིང་གི་ཁྱད་པར་དང་། བསྲེག་རྫས་ཀྱི་ཁྱད་པར་དང་། མེ་ལྷ་ལ་སྦྱིན་སྲེག་བྱ་བ་དང་། ཡེ་ཤེས་ཀྱི་ལྷ་ལ་སྦྱིན་སྲེག་བྱ་བ་དང་དབང་བསྐུར་བ་དང་། བསྲུང་བའོ། །དང་པོ་ནི། ད་ནི་རྒྱས་པའི་ལས་བཤད་དེ། །ཞེས་སོགས་སོ། །གཉིས་པ་ནི། ཁྲུ་དོའམ་ཡང་ན་ཁྲུ་བཞི་པའམ། །ཞེས་སོགས་སོ། །གསུམ་པ་ནི། བུམ་པ་ཁ་དོག་གསེར་འདྲ་ཞིང་། །ཞེས་སོགས་སོ། །བཞི་པ་ནི། བདག་ཉིད་གོས་དང་རྒྱན་རྣམས་དང་། །ཞེས་སོགས་སོ། །ལྔ་པ་ནི། ལྷ་ཡི་ཡིད་བཞིན་ནོར་རྒྱལ་མཚན། །ཞེས་སོགས་སོ། །དྲུག་པ་ནི། དུང་དང་པི་ཝཾ་ཅང་ཏེའུ་དང་། །ཞེས་སོགས་སོ། །བདུན་པ་ནི། ཐབ་ཁུང་ཁྱད་པར་ཉིད་ལས་ཀྱང་། །ཞེས་སོགས་སོ། །བརྒྱད་པ་ནི། འབྲུ་རྣམས་ཐམས་ཅད་འབྱོར་པ་དང་། །ཞེས་སོགས་སོ། །དགུ་པ་ནི། མེ་ལྷ་གསེར་དང་འདྲ་བ་ལ། །ཞེས་སོགས་སོ། །བཅུ་པ་ནི། དེ་ཡི་ལུས་ལ་ཁྲོ་རྒྱལ་པོ། །ཞེས་སོགས་སོ། །བཅུ་གཅིག་པ་ནི། དེ་ནས་མཇུག་ཏུ་འོད་ཟེར་གྱིས། །ཞེས་སོགས་སོ། །གསུམ་པ་དབང་ལ་བཅུ་གསུམ་སྟེ། ལྷ་དང་བསམ་པ་བསྟན་པ་དང་། གནས་དང་ཐབ་ཁུང་གི་ཁྱད་པར་དང་། ཡམ་ཤིང་དང་བུད་ཤིང་བསྟན་པ་དང་། བསྲེག་པའི་རྫས་དང་། ཐབ་ཁུང་ལ་བྱུག་པ་བྱ་ཞིང་མཚན་མ་དྲི་བ་དང་། མཆོད་པ་དང་། སྒྲུབ་པ་པོའི་ཆས་གོས་སྔོན་དུ་སོང་ནས་ཕྱོགས་དང་དུས་ཀྱི་ཤིས་པ་དང་། ཏིང་ངེ་འཛིན་གྱི་ཁྱད་པར་དང་། སྦྱིན་སྲེག་གི་མེ་ལྷའི་ཁྱད་པར་དང་། སྦྱིན་སྲེག་གི་མེ་ལྷའི་ཕན་ཡོན་དང་། བསྲུང་བ་དང་། གཤེགས་སུ་གསོལ་ཞིང་རང་ལ་བསྲུང་བའོ། །དང་པོ་ནི། དབང་ནི་ཞེས་སོགས་སོ། །གཉིས་པ་ནི། ཕྱོགས་དང་མཐུན་པའི་ས་ཕྱོགས་སམ། །ཞེས་སོགས་སོ། །གསུམ་པ་ནི། དེར་ནི་སྟེགས་བུ་ཁྲུ་བརྒྱད་པ། །ཞེས་སོགས་སོ། །བཞི་པ་ནི། ཐ་མ་མཆོག་གི་ཁྱད་པར་ལས། །ཞེས་སོགས་སོ། །ལྔ་པ་ནི། མེ་ཏོག་འབྲས་བུ་དམར་པོའམ། །ཞེས་སོགས་སོ། །དྲུག་པ་ནི། དེ་ནས་ཐབ་ཁུང་དམར་པོ་ལ། །ཞེས་སོགས་སོ། །བདུན་པ་ནི། མེ་ཏོག་དམར་པོ་ལ་སོགས་པས། །ཞེས་སོགས་སོ། །བརྒྱད་པ་ནི། དཔལ་ལྡན་གོས་དང་ཕྲེང་བ་དང་། །ཞེས་སོགས་སོ། །དགུ་པ་ནི། པདྨ་དམར་པོའི་གདན་བསམས་ལ། །ཞེས་སོགས་སོ། །བཅུ་པ་ནི། མདའ་དང་གཞུ་ཐོགས་དེ་བཞིན་དུ། །ཞེས་སོགས་སོ། །བཅུ་གཅིག་པ་ནི། ལས་བྱེད་པ་ནི་གང་ཡིན་པ། །ཞེས་སོགས་སོ། །བཅུ་གཉིས་པ་ནི། ལས་རྣམས་ཟིན་པར་གྱུར་པ་དང་། །ཞེས་སོགས་སོ། །བཅུ་གསུམ་པ་ནི། དེ་ནས་རྡོ་རྗེ་འདོད་པ་ཡིས། །ཞེས་སོགས་སོ། །བཞི་པ་རྗེས་སུ་ཡི་རང་བ་ལ་བདུན་ཏེ། གང་གིས་བསྟོད་པ་དང་། མཆོད་པ་དང་། བསྟོད་པའི་ཡུལ་དང་། བསམ་པ་དང་། བསྟོད་པའི་ཚིག་དང་། བསྟོད་པའི་ཕན་ཡོན་དང་། རྗེས་སུ་ཡི་རང་བ་དངོས་སོ། །དང་པོ་ནི། དེ་ནས་བརྒྱ་བྱིན་ཚངས་སོགས་ལྷ། །ཞེས་སོགས་སོ། །གཉིས་པ་ནི། ཡང་དང་ཡང་དུ་སྟེ་ཞེས་སོགས་སོ། །གསུམ་པ་ནི། ཕྱག་ན་རྡོ་རྗེ་རྒྱལ་སྤྱན་ལ། །ཞེས་པའོ། །བཞི་པ་ནི། དགའ་བའི་བསམ་པས་བསྟོད་བྱེད་པ། །ཞེས་སོགས་སོ། །ལྔ་པ་ནི། སེམས་དཔའ་བཅུ་དྲུག་གི་སྒོ་ནས་མཚན་བརྒྱ་རྩ་བརྒྱད་དུ་སྦྱར་བ་ལ། དང་པོ་རྡོ་རྗེ་སེམས་དཔའི་སྒོ་ནས་མཚན་བཅུ་ནི། སངས་རྒྱས་ཀུན་པས་སྔར་སངས་རྒྱས། །ཞེས་སོགས་སོ། །རྡོ་རྗེ་རྒྱལ་པོའི་སྒོ་ནས་མཚན་བརྒྱད་ནི། རྡོ་རྗེ་ཡན་ལག་སོགས་སོ། །རྡོ་རྗེ་ཆགས་པའི་སྒོ་ནས་མཚན་བརྒྱད་ནི། ཕྱག་ན་རྡོ་རྗེ་སོགས་སོ། །རྡོ་རྗེ་ལེགས་པའི་སྒོ་ནས་མཚན་བརྒྱད་ནི། རྡོ་རྗེ་པདྨ་སོགས་སོ། །རྡོ་རྗེ་ལས་ཀྱི་སྒོ་ནས་མཚན་དྲུག་ནི། རྡོ་རྗེ་རྒྱུ་སོགས་སོ། །རྡོ་རྗེ་སྲུང་བའི་སྒོ་ནས་མཚན་བརྒྱད་ནི། རྡོ་རྗེ་འཇིགས་པ་སོགས་སོ། །རྡོ་རྗེ་གནོད་སྦྱིན་གྱི་སྒོ་ནས་མཚན་དགུ་ནི། རྡོ་རྗེ་གནོད་སྦྱིན་སོགས་སོ། །རྡོ་རྗེ་ཁུ་ཚུར་གྱི་སྒོ་ནས་མཚན་བདུན་ནི། བསྒྲུབ་དཀའ་སོགས་སོ། །རྡོ་རྗེ་རིན་ཆེན་གྱི་སྒོ་ནས་མཚན་དྲུག་ནི། འོད་སྟུག་པ་ནི་ཞེས་སོགས་སོ། །རྡོ་རྗེ་རྒྱལ་མཚན་གྱི་སྒོ་ནས་མཚན་དྲུག་ནི། རྡོ་རྗེ་རྒྱལ་མཚན་སོགས་སོ། །རྡོ་རྗེ་གཟི་བརྗིད་ཀྱི་སྒོ་ནས་མཚན་དྲུག་ནི། སྒྲ་ཆེན་ཞིང་ནི་སོགས་སོ། །རྡོ་རྗེ་བཞད་པའི་སྒོ་ནས་མཚན་དྲུག་ནི། གློག་བཞིན་སོགས་སོ། །རྡོ་རྗེ་ཆོས་ཀྱི་སྒོ་ནས་མཚན་བདུན་ནི། སྤྱན་དམར་སོགས་སོ། །རྡོ་རྗེ་རྣོན་པོའི་སྒོ་ནས་མཚན་ལྔ་ནི། འཁྱིལ་ཞིང་སོགས་སོ། །རྡོ་རྗེ་འཁོར་ལོའི་སྒོ་ནས་མཚན་བཞི་ནི། འདོད་ཆགས་ཞེ་སྡང་སྲིད་མཐར་མཛད། །སོགས་སོ། །རྡོ་རྗེ་སྨྲ་བའི་སྒོ་ནས་མཚན་བཞི་ནི། སྲིད་དང་སྲིད་མིན་རྣམ་སྦྱོང་བ། །སོགས་སོ། །དེ་ལྟར་མཚན་བརྒྱ་རྩ་བརྒྱད་པོ་སུ་ལ་ལྡན་ན། རྡོ་རྗེ་རབ་སྐྱེས་རྡོ་རྗེ་སེམས། །སོགས་སོ། །དྲུག་པ་ནི། གང་གིས་འདི་བྲིས་བཀླགས་གྱུར་ཏམ། །སོགས་སོ། །བདུན་པ་ནི། བཅོམ་ལྡན་འདས་ཀྱིས་བཀའ་སྩལ་པ། །སོགས་སོ། །བརྟག་པ་ཕྱི་མའི་ཚིག་དོན་རྒྱས་པར་གཞན་དུ་འཆད་པར་འགྱུར་རོ། །རྫོགས་སངས་རྒྱས་དང་མཛད་པ་མཚུངས་པའི་རྒྱུད་རྒྱལ་འདི། །རིན་ཆེན་བཟང་པོའི་གསུང་གི་རྗེས་འབྲང་ས་སྐྱ་པའི། །བཞེད་པ་ཇི་བཞིན་དམ་པའི་གསུང་ལ་བརྟེན་ནས་ནི། །བདག་དང་སྐལ་བ་མཉམ་པ་གཞན་ལའང་ཕན་ཕྱིར་བཤད། །བྱིས་བློས་རྒྱུད་དོན་རང་དགར་འགྲེལ་བར་མི་ནུས་ཤིང་། །སྔོན་མེད་གཏམ་གྱིས་གདུལ་བྱ་བསླུ་བར་འདོད་མིན་ཡང་། །འཁྲུལ་ཟད་གོང་མའི་གསུང་གི་ཆ་ཤས་གོ་རིམ་བཞིན། །ལེགས་པར་བཀོད་ལ་ཉེས་པར་འགྱུར་བ་མེད་སྙམ་སེམས། །འདི་སྦྱར་དགེ་ཚོགས་མཛོད་སྤུའི་འོད་ལྟར་དཀར་བ་ཡིས། །རྒྱུ་དང་འབྲས་བུས་བསྡུས་པའི་ངན་སོང་ཀུན་ཞི་ནས། །ཐེག་ཆེན་ལུས་བཟང་ཐོབ་སྟེ་དཔག་མེད་སྤྲུལ་པ་ཡིས། །སངས་རྒྱས་ཞིང་གི་དགའ་ཚལ་ཀུན་ཏུ་གང་བར་ཤོག །ངན་སོང་ཐམས་ཅད་ཡོངས་སུ་སྦྱོང་བའི་བརྟག་པའི་རྒྱལ་པོའི་རྣམ་པར་བཤད་པ་གཞན་ཕན་ཀུན་ཁྱབ་ཅེས་བྱ་བ་འདི་ནི། བདེ་བར་གཤེགས་པའི་རིང་ལུགས་པ་མཐའ་དག་གི་གཙུག་གི་ནོར་བུར་གྱུར་པ་རྗེ་བཙུན་མཁས་པའི་དབང་པོ་ཀུན་དགའ་བཟང་པོ་དང་། ངེས་དོན་གྱི་ཟབ་མོའི་གནད་ཕྱིན་ཅི་མ་ལོག་པར་སྟོན་པ་ལ་འགྲན་ཟླ་ཐམས་ཅད་དང་བྲལ་བ་མཚུངས་མེད་དཀོན་མཆོག་རྒྱལ་མཚན་དཔལ་བཟང་པོ་ལ་སོགས་པ་ཡོངས་འཛིན་དུ་མའི་ཞབས་རྡུལ་སྤྱི་བོས་བླངས་པ་ལ་བརྟེན་ནས་སྡེ་སྣོད་དང་རྒྱུད་སྡེའི་དོན་ལ་བློ་ཁ་ཅུང་ཟད་ཕྱོགས་པ་ཤཱཀྱའི་དགེ་སློང་བསོད་ནམས་སེང་གེས་མཁས་གྲུབ་ཆེན་པོ་གཡག་གི་དངོས་སློབ་མཁན་ཆེན་བློ་གྲོས་དཔལ་བཟང་པོའི་གསུང་གིས་བསྐུལ་ཞིང་། རང་གི་སློབ་མ་དུ་མས་ཉེ་བར་བསྐུལ་བའི་ངོར། ས་མོ་གླང་གི་ལོ་སྨིན་དྲུག་ཟླ་བའི་ཡར་གྱི་ངོ་ལ་དཔལ་ཨེ་ཝཾ་ཆོས་ལྡན་དུ་སྦྱར་བའི་ཡི་གེ་པ་ནི་མདོ་ཁམས་པ་འོད་ཟེར་བཟང་པོ་དང་། ལ་སྟོད་པ་གཞོན་ནུ་བཟང་པོས་བགྱིས་སོ། །དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་རྒྱས་ཡུན་དུ་འབར་གྱུར་ཅིག །དགེའོ། །དགེའོ། །དགེའོ།།  །། ༈ བལ་ཡུལ་མཆོད་རྟེན་ཉེ་འདབས་ནས་རྒྱལ་ཡོངས་ས་ཆེན་ཞེས་པ་ལས། སློབ་བུ་ཐ་ཤལ་པ་གུ་རུས་སྤེལ་བའོ།།

རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com