དཀར་མཛེས་ཧོར་སྡེ་མགོན་ཁང་དུ་གྲགས་པའི་རྟེན་དང་བརྟེན་པའི་བྱུང་རིམ་མདོར་བསྡུས་སུ་བཀོད་པ་ཡིད་ཀྱི་པདྨོ་འཛུམ་པའི་ཉི་མ་གཞོན་ནུ་ཞེས་བྱ་བ་བཞུགས་སོ།།
ཐོག་མར་ས་འདིར་ཆགས་པའི་་་ཏྲེ་་་ཚིག་གྲོགས་དང་བཅས་པའི་དོན་བསྡུས་ཏེ་བཤད་ན།
བོད་མིའུ་གདུང་དྲུག་གི་ཡ་གྱལ་འབྲུ་ལས་མཆེད་པའི་ཏྲེ་ཞེས་པ་ནི། སྟག་ཚང་དཔལ་འབྱོར་བཟང་པོས། ཁྲི་ཟམ་འབྲུ་ཡི་ཆེ་དྲུག་དེ། །ཤར་ན་གྱི་དང་རོང་པོ་གཉིས། །ལྷོ་ན་བྷེ་དང་ཐོ་རི་གཉིས། །སྨད་ན་འབྲོམ་དང་ངོ་ཀྲོ་གཉིས། །ཆེ་དྲུག་བཙན་གྱི་བཙུན་དྲུག་དེ། །སྦས་དང་སྤོས་དང་ཚ་ཕྲོམ་གསུམ། །ཞུག་པ་སྟོང་ཉེ་ཉེ་སྒ་གསུམ། །ཆེ་བཙུན་སྤེལ་མ་བཅུ་གཉིས་ཡིན། །ཞེས་ཨ་ལྕགས་འབྲུ་ཡི་གདུང་རབས་དེ་དག་གི་ནང་ནས་འབྲུ་རྗེ་ལྷ་བུ་ཐོད་དཀར། འབྲུ་སྟག་རྒོད། འབྲུ་ཉི་མ་དཀར་ནག་ཁྲ་གསུམ་སོགས་དཔའ་མཛངས་ལྡན་པ་ཤ་སྟག་བྱུང་བར་བཤད། འབྲུ་རྗེ་ཉི་མ་དཀར་པོ་ལས་འབྲུ་ཡི་རྒྱལ་རབས་དགུ་བཅུ་གོ་བརྒྱད་བྱུང་ཞེས་ཏྲེ་རབས་ལས་གུངས་པར་བཀོད་འདུག །༼ ཏྲེ་རབས་མཇལ་མྱོང་མེད་ཀྱང་གཞན་གྱིས་དྲངས་པ་འགོད་པ ༽ཏྲེ་རབས་ལས། རྒྱལ་རབས་དགུ་བཅུ་གོ་བརྒྱད་བྱུང་། །ཕྱེད་དེ་ལྷ་ཡི་གདུང་རྒྱུད་ཡིན། །ཞེས་རིམ་བཞིན་དུ་འབྲུ་རྗེ་ཉི་མ་དཀར་པོའི་གདུང་རྒྱུད་ལས་ཏྲེ་རབས་གདུང་རྒྱུད་མཆེད་པ་ཡིན་པར་གསུངས། དེས་ན་དེང་གི་དུས་འདིར་ཏྲེ་ཧོར་ཞེས་པའི་མིང་འདི་རུས་ལ་བརྟེན་ཏེ་བཏགས་པ་ཡིན་པ་སྟེ། ཧོར་སོག་གིས་ས་གནས་འདི་དབང་བསྒྱུར་བ་ནས་བཟུང་འདི་ལ་ཧོར་ཞེས་པའི་མིང་ཟུར་པ་ཞིག་ཐོགས་སོང་བ་འདྲ། ཡང་ན། ཆུང་བའི་རིགས་ལས་ཏྲེ་བོ་བྱུང་་་ཞེས་པ་ལྟར་ཏྲེ་ནི་རུས་དང་བོ་ནི་ཚིག་གྲོགས་ཤིག་སྟེ་དེས་ན་ཏྲེ་བོ་ཞེས་འབོད་ན་འགྲིག་པར་སྣང་།
ཡང་ཤོད་ཚུལ་གཞན་པ་ཞིག་ལ། ཏྲེ་ཤོད་ཀྱང་ཟེར་བ་ཡིན། དེ་ནི་ཏྲེ་ཡི་གདུང་རྒྱུད་ལས་མཆེད་པ་ཡིན་ཐོག་ས་ཡི་ཁད་བབས་ལ་བརྟེན་ནས་བཏགས་པ་ཞིག་སྟེ། ཕུ་དང་ཤོད་གཉིས་ལས་ཤོད་ཀྱིས་རྒྱ་ཆེ་བ། ཡུལ་གྱི་སྒང་གཤོང་འབུར་ལེབ་ཕུ་ཤོད་སོགས་ཀྱི་ནང་གི་ཤོད་དེ། ༼ རྒྱ་ཤོད། དཔའ་ཤོད། རྟ་ཤོད། རྔོད་ཤོད། ཡག་ཤོད། ནགས་ཤོད། ཏྲེ་ཤོད། རྨེ་ཤོད། དེ་ཤོད། རྒྱངས་ཤོད། ༽ཡོངས་ལ་གྲགས་པའི་ཤོད་བཅུའི་ནང་གི་ཏྲེ་ཤོད་ཅེས་པ་དེ་ཡིན། དེ་ལྟ་བུའི་སའི་གནས་བབས་དང་ཡུལ་གྱི་ཐ་གྲུ་སོགས་གང་ཅིའི་ཐད་རབ་མཛེས་དྭངས་ཤེལ་མེ་ལོང་གཡའ་ཡིས་མ་གོས་པ་ལྟ་བུའི་རྣམ་པ་མངོན་དུ་གསལ་བའི་ཡུལ། ག་བུར་བཅུད་ཀྱི་དྭངས་མས་འགྲོ་ཀུན་ཚ་བའི་གདུང་བ་ལ་སོགས་མཛེ་ནད་ཡོངས་རྫོགས་སེལ་བའི་དཔྱིད་སྙན་རྣ་བའི་བུ་མོའི་མགུལ་པར་ཕྱོགས་ཕྱོགས་སུ་འཐོར་བའི་གནས་མཆོག །དེང་གི་དུས་འདིར་ཁམས་ཀྱི་བྱང་རྒྱུད་རོང་པ་ཚ་ནས་ཁམས་རྟའུ་བར་གྱི་ཡུལ་སྤྱི་ལ་ཏྲེ་ཞེས་གྲགས་པའི་ས་ཁོངས་རྒྱ་ཆེན་གྱི་དབུས། དེང་དཀར་མཛེས་རྫོང་གྲོང་གི་ཡུལ་དབུས་ཆགས་པའི་ཏྲེ་ཧོར་སྡེ་མགོན་ཁང་ཞེས་པ་འདིའི་ལོ་རྒྱུས་བྱུང་རིམ་བསྡུས་ཙམ་ཞིག་ཕྱོགས་མེད་འཛིན་མའི་ཁྱོན་ལ་རབ་ཏུ་རྒྱུ་བའི་སྐྱེ་བོའི་སྒྲ་འཛིན་ཕོ་གསར་གཞོན་ནུའི་ཕང་བར་བསྐྱིལ་བ་ལ།
དེ་ཡང་སྔོན་དྲི་མེད་ཀོ་ཤའི་མཚོ་གླིང་དུ་ཙནྡན་ལས་མགོན་པོའི་སྐུ་བརྙན་འདི་ཉིད་རང་བྱོན་དུ་བྱུང་། དེ་ཉིད་གུ་རུ་ཨོ་རྒྱན་ཆེན་པོས་གདན་དྲངས་ཏེ་པཎྚི་ཏ་དྷརྨཱ་པ་ལ་ལ་གནང་། དྷརྨཱ་པ་ལས་བོད་ཀྱི་གངས་ཏི་སེ་དང་། མཚོ་མ་ཕམ་སོགས་ལ་གཟིགས་པར་བྱོན་པའི་དུས་སུ་ལོ་ཆེན་རིན་ཆེན་བཟང་པོ་ལ་ཙནྡན་གྱི་མགོན་པོ་རང་བྱོན་འདིས་གཙོས་པའི་རྟེན་གཙོ་བྱིན་རླབས་ཅན་མང་པོ་གནང་བ། རིམ་བཞིན་བརྒྱུད་ནས་སྟོད་མངའ་རིས་བྲག་སྟེང་པ་ཆེན་པོ་ཡོན་ཏན་ཚུལ་ཁྲིམས་ལ་གནང་། དེས་སྐད་གཉིས་སྨྲ་བའི་མཁས་པ་ཆེན་པོ་མལ་གྱོ་ལོ་ཙཱ་བ་བློ་གྲོས་གྲགས་པ་ལ་གནང་། དེ་ནས་རིམ་བཞིན་བླ་མ་ས་སྐྱ་པ་ཆེན་པོ་ཀུན་དགའ་སྙིང་པོ་ལ་གནང་། མ་ཟད་མགོན་པོ་འདིའི་རྗེས་གནང་དང་སྒྲུབ་སྐོར་ཡོངས་རྫོགས། སྐུའི་གདུང་རྟེན་དུ་བསེ་འབག་ནག་པོ་འཕུར་ཤེས་སུ་གྲགས་པ་དང་། ཙནྡན་གྱི་མགོན་པོའི་སྐུ་རང་བྱོན། བྲམ་ཟེར་མཆོག་སྲེད་ཀྱི་གནམ་ལྕགས་ཀྱི་རྡོ་རྗེ་རྩེ་དགུ་པ། དར་ནག་ཁ་གང་དང་བཅས་པ་གནང་བ་རྣམས་རིམ་བཞིན་ས་ཆེན་ཀུན་དགའ་སྙིང་པོ་དང་། སློབ་དཔོན་བསོད་ནམས་རྩེ་མོ། རྗེ་བཙུན་གྲགས་པ་རྒྱལ་མཚན། ཆོས་རྗེ་འཇམ་དབྱངས་བླ་མ་ས་སྐྱ་པཎྚི་ཏ་རྣམས་ལས་བརྒྱུད་དེ་དེ་དག་གིས་ཐུགས་དམ་གྱི་རྟེན་མཛད་དེ་དཔལ་ལྡན་ས་སྐྱར་བཞུགས། དེ་ཡང་རྗེ་བཙུན་གྲགས་པ་ཞལ་བཞུགས་དུས་ཆོས་རྗེ་ལ་འདི་སྐད་དུ། དུས་ནམ་ཞིག་གི་ཚེ། སྐད་རིགས་མི་གཅིག་པ། ཞྭ་ཁྲ་འདྲ་བ། ལྷམ་ཕག་འདྲ་བ་གྱོན་མཁན་གྱི་ཡུལ་ནས་ཁྱོད་འབོད་མཁན་འོང་བར་འགྱུར། དེ་དུས་ཡུལ་དེར་སོང་དང་འགྲོ་བ་མང་པོ་ལ་ཕན་ཐོགས་པར་འགྱུར་རོ་ཞེས་ལུང་བསྟན་པར་ལྟར། ཆོས་རྗེ་འཇམ་དབྱངས་བླ་མ་ས་སྐྱ་པཎྚི་ཏ་ཀུན་དགའ་རྒྱལ་མཚན་མཆོག་དགུང་གྲངས་རེ་གསུམ་༼སྤྱི་ལོ་༡༢༤༤ཤིང་ཕོ་འབྲུག་གི་ལོར ༽དུ་སོན་པར་ཧོར་དུ་གོ་དན་རྒྱལ་པོའི་ཆེད་ཞུས་ལྟར་བོད་ཧོར་གཉིས་ཕན་གྱི་ཆེད་དུ་སྐུ་ངལ་ལ་མ་ལྟོས་པར་ཕེབས། སྐབས་དེར་ཙནྡན་གྱི་མགོན་པོའི་སྐུ་བརྙན་རང་བྱོན་སོགས་རྟེན་ཆ་རྣམས་ཀྱང་གདན་དྲངས་ནས་བྱོན། ཧོར་ཡུལ་དུ་ས་པཎ་ཉིད་གཞན་དོན་དུ་སྐུ་གཤེགས་པའི་ཚེ། རྟེན་ཆ་རྣམས་རྒྱལ་པོའི་བང་མཛོད་དུ་བཞུགས་སུ་གསོལ། རྗེས་མར་འགྲོ་མགོན་འཕགས་པ་སེ་ཆེན་གོང་མའི་མཆོད་གནས་རྩ་བའི་བླ་མ་དམ་པར་གྱུར་པ་ན། ཆོས་རྒྱལ་འཕགས་པས་ཙནྡན་གྱི་སྐུ་རང་བྱོན་དེས་ནང་རྟེན་བྱས་ཏེ་མགོན་ཁང་ཞིག་བཞེངས་དགོས་པར་དགོངས་ཏེ། རྒྱལ་པོ་ལ། ངའི་བླ་མ་གོང་མའི་རྟེན་ཆ་རྣམས་ང་རང་ལ་ཕུལ་ན་དེ་དག་གིས་ནང་རྟེན་བྱས་ནས་གཙུག་ལག་ཁང་ཞིག་བཞེངས་དགོས། དེའི་ཡོན་བདག་གི་མཐུན་རྐྱེན་ཡང་ཁྱེད་ཀྱིས་མཛད་དགོས་ཚུལ་གསུངས་ནས་ཙནྡན་སྐུ་རྟེན་གྱིས་གཙོས་པའི་ནང་རྟེན་རྣམས་དྲེལ་དཀར་པོ་ཞིག་ལ་བཀལ་ཏེ་སྒ་ཨ་གཉན་པཀྵིའམ་སྒ་ཨ་གཉེན་དམ་པ་ཀུན་དགའ་གྲགས་༼ ལོ་རྒྱུས་ཀྱི་ཡི་གེ་རྣམས་སུ ༡པཀྵི། ༢པཀྴི། ༣པག་ཤི་ཞེས་པའི་མིང་འདི་ཡི་གེའི་འགྲོས་མི་འདྲ་བ་གསུམ་དུ་འདུག་ཀྱང་བོད་རང་གི་ཡུལ་ལུང་མི་གཅིག་པའི་སྐད་གདངས་མི་འདྲ་བའི་སྒོ་ནས་བཀླགས་པ་ཙམ་སྟེ་འདི་ནི་སོག་པོས་བོད་ཀྱི་བླ་མ་ལ་ཆོས་འཆད་པོའི་སློབ་དཔོན་ཞེས་མིང་དུ་བཏགས་པའི་ཆེ་མཚན་ཞིག་ཡིན།༽ལ་གཏད་དེ་དྲེའུ་འདི་གང་དུ་ཉལ་བའི་ས་ཆར་རྟེན་ཆ་འདི་དག་གིས་ནང་བཞུགས་བྱས་ཏེ་གུར་གྱི་མགོན་པོའི་སྐུ་བརྙན་ཞིག་བཞེངས་དགོས་ཞེས་པའི་བསླབ་སྟོན་གནང་། དེ་ནས་ད་ལྟར་གཙུག་ལག་ཁང་བཞེངས་པའི་ས་གནས་འདིར་སླེབས་པ་ན་མཚོ་ཆུང་ཆུང་ཟངས་ཁ་ཙམ་ཡོད་པའི་ནང་དུ་དྲེའུ་དེས་རྔ་མ་བཙུད་དེ་ཉལ་བར། ཇི་ལྟར་ཡར་བསླངས་ཀྱང་མ་ལངས་པར་ལུས། དེ་ནས་སྔོན་འགྲོ་མགོན་འཕགས་པས་ལུང་བསྟན་པའི་གནད་ལ་ཁེལ་བར་རྟོགས་ཏེ་ཤིང་（སྤྱི་ལོ༡༢༧༢）ཕོ་སྤྲེལ་ལོར་སྦྱིན་བདག་ཧོར་ཆེ་ཆེན་ཧང་གིས་མཛད། བཟོ་བོ་ཨ་གཉན་པཀྵི་རང་གིས་མཛད་དེ་རྨང་བཏིང་（མཚན་ཡོངས་རྫོགས་ལ་སྒ་ཨ་གཉན་དམ་པ་ཀུན་དགའ་གྲགས་ཞེས་པ་གུར་གྱི་མགོན་པོ་རང་འགྲུབ་ཏུ་བྱུང་བ་ཁམས་ཀྱི་མགོན་པོ་རྣམ་གསུམ་བཞེངས་མཁན། མ་ཟད་ཁམས་ཕྱོགས་སུ་ས་སྐྱའི་དགོན་པ་བརྒྱ་དང་བརྒྱད་ཙམ་བཞེངས་པ་སོགས་འགྲོ་མགོན་ཆོས་རྒྱལ་འཕགས་པའི་སློབ་མ་གྲགས་པ་ཆེ་ཤོས་དང་མཛད་འཕྲིན་ཆེ་ཤོས་སུ་གྱུར་པ་ཞིག་ཡིན། མ་ཟད་ཁོང་ཉིད་རྒྱ་ནག་རྒྱལ་པོའི་དབུ་བླ་རུ་གྱུར་ཏེ་རྒྱ་ནག་གོང་མས་རྡོ་རྗེ་སློབ་དཔོན་དམ་པ་རིགས་ཀུན་ཁྱབ་བདག་རྡོ་རྗེ་འཆང་ཞེས་པའི་མཚན་དང་ཏི་ཤྲཱིའི་ཐམ་ག་ཕུལ།པཀྵི་ཞེས་ཆོས་འཆད་པོའི་མཚན་གནས་ཀྱི་གོ་བབས་ཕུལ་བས་དེང་ཡང་ཨ་གཉན་པཀྵི་ཞེས་གྲགས་བཞིན་པ་འདི་ལྟར་ཡིན）ཀྱིས་གཙོ་བོར་བྱས་ཏེ་（སྤྱི་ལོ་༡༢༧༤ ）ལེགས་པར་བཞེངས། མགོནན་ཁང་རྟེན་དང་བརྟེན་པ་ཡོངས་སུ་གྲུབ་ནས་ད་ལྟའི་བར་དུ་བསྟན་པའི་རྒྱན་དང་སྐྱེ་འགྲོའི་བསོད་ནམས་ཀྱི་ཞིང་དུ་ལེགས་པར་བཞུགས་བཞིན་པ་འདི་ལགས་སོ། །
འདིའི་ནང་རྟེན་དུ་བཞུགས་སུ་གསོལ་བའི་རྟེན་གཙོ་ཆེ་དག་ནི།
དབུ་སྐྲའི་ཐོར་ཅོག་ནང་དུ་པཎྚི་ཏ་ག་ཡ་དྷ་རས་རྒྱ་གར་ནས་གདན་དྲངས་པའི་གནམ་ལྕགས་ཀྱི་རྡོ་རྗེ་རྩེ་དགུ་པ། སངས་རྒྱས་རབས་བདུན་གྱི་རིང་བསྲེལ། བྱང་ཆུབ་ཤིང་ལས་གྲུབ་པའི་མི་བསྐྱོད་པའི་སྐུ། འཕགས་པ་རིན་པོ་ཆེའི་དབུ་སྐྲའི་བུབས་རྣམས་བཞུགས། སྤྱན་དབུས་མའི་ནང་དུ་སངས་རྒྱས་ཀྱི་རིང་བསྲེལ་བདུན། སྤྱན་གཡས་པའི་ནང་དུ་ཤྭ་རིའི་བུའི་རིང་བསྲེལ་བདུན། སྤྱན་གཡོན་མའི་ནང་དུ་མོའུ་འགལ་གྱི་བུའི་རིང་བསྲེལ་བདུན། དབུའི་ནང་དུ་ནཱ་རོ་པའི་དབུ་ཐོད་དུམ་བུ། ཤངས་ཀྱི་ནང་དུ་སངས་རྒྱས་འོད་སྲུང་གི་ཚེམས། མགྲིན་པའི་ནང་དུ་བྱང་ཆུབ་སེམས་དཔའ་ཆོས་འཕགས་ཀྱི་ཚེམས། ཐུགས་ཀར་ཡེ་ཤེས་སེམས་དཔའི་ཚུལ་དུ་གཙོ་བོར་གོང་དུ་ལོ་རྒྱུས་རྒྱས་པར་བཤད་པའི་ཙནྡན་གྱི་མགོན་པོའི་སྐུ་རང་བྱོན་དང་། མ་གཅིག་ལབ་ཀྱི་སྒྲོན་མའི་ཤངས་མཚལ་གྱིས་བྲིས་པའི་གུར་མགོན་གྱི་སྐུ། བསིལ་བ་ཚལ་གྱི་རྡོ་ནག་ལས་གྲུབ་པའི་གུར་མགོན་གྱི་སྐུ། རྗེ་བཙུན་གྲགས་པ་རྒྱལ་མཚན་གྱི་ཞུན་ཐིགས་ལས་བྱོན་པའི་ཞལ་བཞི་པའི་སྐུ། འཇམ་དབྱངས་ས་པཎ་གྱི་ཐུགས་དམ་གྱི་རྟེན་ཀྱེ་རྡོ་རྗེའི་སྐུ། གསེར་ལས་གྲུབ་པའི་ཕྱག་ན་རྡོ་རྗེ་འབྱུང་འདུལ་གྱི་སྐུ། ཆུ་ཤེལ་ལས་གྲུབ་པའི་སྤྱན་རས་གཟིགས་ཕྱག་བཞི་པའི་སྐུ་རྣམས་དང་། ལྟོ་བའི་ནང་དུ་སངས་རྒྱས་ཤཱཀྱ་ཐུབ་པ་གསོལ་ལྷུང་རིན་པོ་ཆེ་སྣ་ཚོགས་ཀྱིས་བཀང་བ་རྣམས་བཞུགས་ཤིང་། གཞན་ཡང་འཕགས་པ་རིན་པོ་ཆེའི་ཕྱག་ཕྲེང་། ཤྭ་རིའི་བུའི་སྐུ་ཆིངས། ཇོ་བོ་ཨ་ཏི་ཤའི་གདུང་རུས། པཎ་ཆེན་ཤཱཀྱ་ཤྲཱིའི་སྣམ་སྦྱར། པནྚི་ཏ་དྷརྨཱ་ཕ་ལའི་གདུང་རུས། རྒྱ་གར་རྡོ་རྗེ་གདན་གྱི་རྟེན་མ་ཧཱ་བོ་དྷིའི་ཞལ་ཕྱིས། དམ་པ་སངས་རྒྱས་ཀྱི་དབུ་སྐྲ། རྒྱ་གར་ཕྱག་ན་རྡོ་རྗེའི་སྒོམ་ཐག །པཎྚི་ཏ་ཀཱ་མ་ལ་ཤཱི་ལའི་གདུང་རུས། གྲུབ་ཆེན་ཤ་བ་རི་པའི་སྐུ་ཤ །པཎྚི་ཏ་ག་ཡ་དྷ་རའི་གདུང་རུས། པཎྚི་ཏ་ཀ་ལིངྒ་པའི་དབུ་སྐྲ། བྲམ་ཟེ་སྐྱེ་བ་བདུན་པའི་སྐུ་ཤ །བལ་པོ་པཎ་ཆེན་མ་ཧཱ་བོ་དྷིའི་དབུ་སྐྲ། དཔལ་ཆེན་རྒྭ་ལོའི་དབུ་ཞྭ། འབྲོག་མི་ཤཱཀྱ་ཡེ་ཤེས་ཀྱི་གདུང་ཐལ་དང་སྣམ་སྦྱར། ལོ་ཆེན་རིན་ཆེན་བཟང་པོའི་ཤངས་མཚལ། ཁྲོ་ཕུ་ལོ་ཙཱ་བའི་དབུ་སྐྲ། འབྲོམ་སྟོན་པའི་དབུ་སྐྲ། བཤེས་གཉེན་པོ་ཏོ་བའི་གདུང་རུས། བཤེས་གཉེན་བྱང་སེམས་ཟླ་བ་རྒྱལ་མཚན་གྱི་གདུང་རུས། ས་ཆེན་ཀུན་དགའ་སྙིང་པོའི་གདུང་རུས། རྗེ་བཙུན་བསོད་ནམས་རྩེ་མོའི་གདུང་རུས། རྗེ་བཙུན་གྲགས་པ་རྒྱལ་མཚན་གྱི་གདུང་རུས། འཇམ་དབྱངས་ས་པཎ་གྱི་གདུང་ཙྪ། ལྷོ་བྲག་མར་པའི་དབུ་ཐོད་དུམ་བུ་དང་དབུ་སྐྲ། མི་ལ་རས་པའི་ན་བཟའ། དྭགས་པོ་ལྷ་རྗེའི་གདུང་རུས། ཕག་མོ་གྲུབ་པའི་གདུང་རུས། ཨུ་རྒྱན་རིན་པོ་ཆེའི་དབུ་སྐྲ། འབྲི་གུང་འཇིག་རྟེན་མགོན་པོའི་སྒོམ་ཐག །རྒྱལ་བ་རྒོད་ཚང་པའི་གདུང་རུས། ཞང་གཡུ་བྲག་པའི་ན་བཟའ། མ་གཅིག་རེ་མའི་སྐུ་ཤ །གྲུབ་ཆེན་ཨུ་རྒྱན་པའི་གདུང་རུས་སོགས་རྒྱ་བོད་ཀྱི་མཁས་གྲུབ་ལོ་པཎ་ཕལ་ཆེར་གྱི་གདུང་རུས། རིང་བསྲེལ། དབུ་སྐྲ། ན་བཟའ་སོགས་བྱིན་རླབས་ཀྱི་རྟེན་རྣམས་དང་། སྟོན་པ་སངས་རྒྱས་ཀྱི་ཆོས་ཁྲིའི་ས། བྱང་ཆུབ་ཤིང་གི་ལོ་འདབ་དང་འབྲས་བུ། གནས་མཆོག་རྡོ་རྗེ་གདན་དང་། བྱ་རྒོད་སྤུངས་རི། ཤྲཱི་ན་ལེནྡྲ། བལ་ཡུལ་འཕགས་པ་ཤིང་ཀུན། ཨོ་རྒྱན། ཤམྦྷ་ལ། རི་བོ་རྩེ་ལྔ། གངས་ཏི་སེ། ལྷ་ས་བསམ་ཡས་ཁྲ་འབྲུག་སོགས་གཙུག་ལག་ཁང་རྣམས་ཀྱི་ས་སྣ་དང་། ཆུ་བོ་གངྒཱ་སོགས་ཆུ་བོ་ཆེན་པོ་བཞིའི་ཆུ་སྣ། རིན་པོ་ཆེའི་བྱེ་མ། རྒྱ་མཚོའི་གླིང་གི་འཇག་མ་སོགས། མདོར་ན་རྒྱ་གར། རྒྱ་ནག །བལ་པོ། ལི་ཡུལ། བོད་ཡུལ་རྣམས་ཀྱི་གཙུག་ལག་ཁང་། མཆོད་རྟེན། གནས་ཆེན། གངས་བྲག །མཚོ་ཆེན། དུར་ཁྲོད་ཀྱི་ས་སྣ། རྡོ་སྣ། ཆུ་སྣ། ཤིང་སྣ། ལྷ་རྟེན་རྣམས་ཀྱི་བག་རྡུལ་དང་། ན་བཟའ། གཞན་ཡང་པཎྚི་ཏ་སངས་རྒྱས་གསང་བ་རྐང་མགྱོགས་ཀྱི་དངོས་གྲུབ་བརྙེས་ནས། ཡུལ་ཉི་ཤུ་རྩ་བཞི། གནས་སུམ་ཅུ་སོ་གཉིས། དུར་ཁྲོད་ཆེན་པོ་བརྒྱད་ལ་སོགས་པ་གླིང་བཞི་གླིང་ཕྲན་བརྒྱད་ནས་བསྡུས་པའི་ས་སྣ་རྡོ་སྣ་ཆུ་སྣ་ཤིང་སྣ་ཁྱད་པར་ཅན་རྣམས་དང་། མཐིང་ཤོག་ལ་གསེར་གྱིས་བྲིས་པའི་རྒྱུད་སྡེ་བཞིའི་ལྷ་རྣམས་ཀྱི་སྙིང་པོ། ལྷག་པར་དུ་མགོན་པོ་རང་གི་སྲོག་སྔགས་ཀྱི་ཤོག་དྲིལ། ཞབས་འོག་ཏུ་གནོད་སྦྱིན་ཕོ་མོའི་འཁོར་ལོ་སོགས་གཟུངས་བཞུགས་ཀྱི་རིམ་པ་ཡང་གྲངས་ལས་འདས་པ་བཞུགས་ཤིང་། ལྷ་མོ་དང་སྟག་ཞོན་སོགས་འཁོར་རྣམས་ཀྱི་ནང་དུ་ཡང་གོང་དུ་བཤད་པའི་བྱིན་རླབས་ཀྱི་རྟེན་རྣམམས་དང་། ས་སྣ། རྡོ་སྣ། ཆུ་སྣ། ཤིང་སྣ་རྣམས་ཆ་ཚང་རེ་བཞུགས་ཤིང་། ལྷག་ཏུ་དཔལ་ལྡན་ལྷ་མོའི་ནང་རྟེན་ལ། རྗེ་ནཱ་རོ་པའི་ཤངས་མཚལ་གྱིས་བྲིས་པའི་རྗེ་བཙུན་སྒྲོལ་མའི་སྐུ་དང་། ཀླུ་སྒྲུབ་ཀྱི་ཤངས་མཚལ་ལས་བྱོན་པའི་གསང་འདུས་འཇམ་པའི་རྡོ་རྗེ། ཨཱ་ཙརྱ་དམར་པོའི་ཤངས་མཚལ་གྱིས་བྲིས་པའི་དཔལ་ལྡན་ལྷ་མོའི་སྐུ། རྒྱལ་པོའི་ནོར་བུ་ལ་ཁྲུས་གསོལ་བའི་མི་ནོར་ཟས་གསུམ་འཕེལ་བའི་གཏེར་རྣམས་བཞུགས། དཔལ་མགོན་སྟག་ཞོན་གྱི་ནང་དུ་སྡེ་བརྒྱད་ཀྱི་སྲོག་སྙིང་། ཨ་གཉན་པཀྵི་རང་གི་དབུ་སྐྲ། ན་བཟའ། ཕྱག་ཕྲེང་རྣམས་དང་། དམག་དཔོན་ཞབས་འོག་ཏུ་མགུལ་ལྷ་བཅུ་གསུམ་དང་། བརྟན་མ་བཅུ་གཉིས་བླ་རྡོ་དང་སྲོག་སྙིང་། སྔགས་པའི་ནང་དུ་ཀླུ་ཆེན་བརྒྱད་ཀྱི་སྲོག་འཁོར་དང་། རིན་པོ་ཆེ་སྣ་ལྔ་ལ་སོགས་པའི་ཀླུ་གཏེར་མང་དུ་བཞུགས་ཤིང་། ཡུམ་ཆེན་མོ་གནོད་སྦྱིན་ཡབ་ཡུམ། པུ་ཏྲ་མིང་སྲིང་། རུ་འདྲེན་གྱི་ནང་ཚན་དགེ་སློང་དང་བུད་མེད་བཅས་འདི་རྣམས་ལ་གཟུངས་གཞུག་གི་དམིགས་བསལ་མ་མཆིས་རུང་། སྐུ་རྟེན་ཐམས་ཅད་དུས་གཅིག་ཏུ་བཞེངས་འདུག་པས་གཟུངས་གཞུག་ལ་དབྱེ་བ་ཆེར་མེད་པར་འདྲ། དེ་ལ་སོགས་པའི་ནང་རྟེན་དང་གཟུངས་གཞུག་ཕུན་སུམ་ཚོགས་པའི་དངོས་པོ་མང་པོ་ཞིག་ཡོད་པ་ནི་སྨྲོས་མ་དགོས། རྗེས་སུ་མགོན་ཁང་འདི་ཉིད་བཞེངས་གྲུབ་དུས་འཕགས་པ་རིན་པོ་ཆེ་མཆོག་གིས་རྒྱ་ནག་ནས་རབ་གནས་མཛད་པར་མགོན་པོའི་སྐུའི་མདུན་དུ་འབྲས་ཀྱི་ཁ་བས་ས་སྐྱ་བ་ཙམ་བབས་འདུག་པ་དང་། ཡང་དུས་ཤིག་ལ་ཉག་ལེ་འབུམ་བཅུའི་དམག་གིས་ལྷ་ཁང་འདིའི་སྒོ་ལ་སྟ་རེ་བརྒྱབ་པར། སྟ་རེ་གཡུག་མཁན་དེ་མ་ཉིད་དུ་ཁ་ནས་ཁྲག་སྐྱུགས་ཏེ་ཤི་སོང་བ་སོགས་ཡེ་ཤེས་པ་དངོས་སུ་ཞུགས་པའི་རྟགས་མཚན་ཅི་རིགས་བྱུང་བར་བཤད། ད་ལྟར་ཡང་མཛེ་ནད་ལ་སོགས་པའི་ནད་རིགས་རིམ་གྲོ་དང་སྨན་དཔྱད་ཀྱིས་མ་ཐུབ་པ་རྣམས་ཀྱང་། གཙུག་ལག་ཁང་དེ་ཉིད་ལ་ཕྱག་མཆོད་སྐོར་བ་བྱས་པའི་མོད་ལ་ནད་ལས་གྲོལ་བ་སོགས་ནི་གནའ་དེང་གི་མི་མང་རྣམས་ཀྱི་ངག་རྒྱུན་དང་དངོས་བྱུང་གཉིས་ཀ་མཆིས་ཞེས་ཟེར། དེ་ལྟར་བྱིན་རླབས་ཀྱི་ཟེགས་མ་སྒོ་བརྒྱ་བྱེ་བའི་གཙུག་ལག་ཁང་ཆེན་པོ་དེ་ཉིད་ལ་སྲི་ཞུ་དང་རིམ་གྲོ་པ་བགྱིད་མཁན་རིམ་པར་བྱུང་ཚུལ་མདོར་བསྡུས་ནི། འཕགས་པ་རང་གི་སྤྲུལ་པར་གྲགས་པའི་དྲུང་དངོས་གྲུབ་བཟང་པོས་མགོན་ཁང་གི་སྐོར་དང་། སྟེང་འོག་གི་ལྷ་ཁང་རྣམས་ལ་ཞིག་གསོས་མཛད་འདུག་ཅིང་། ས་སྐྱའི་བདག་ཆེན་ཀུན་དགའ་ལེགས་པ་དང་། མཐུ་སྟོབས་པ། བྱང་བདག་བཀྲ་ཤིས་སྟོབས་རྒྱས། རིག་འཛིན་ངག་གི་དབང་པོ། ཆོས་རྗེ་ཞྭ་དམར་པ། སེམས་དཔའ་ཆེན་པོ། སྟོང་སྐོར་ཞབས་དྲུང་རྣམས་ཀྱིས་ཀྱང་སྤྱན་རས་གཟིགས། སྙན་དར་གསོལ་མཆོད་སོགས་རྒྱས་པར་མཛད། ཧོར་བཀའ་བཅུ་ནམ་མཁའ་འོད་ཟེར་གྱི་དུས་སུ་ལོ་རེ་བཞིན་དུ་ཟླ་བ་བཅུ་གཅིག་པའི་ནང་དུ་དགུ་གཏོར་གྱི་གཏོར་རྒྱག་པའི་སྲོལ་བཙུགས། ཧོར་དཔོན་ནམ་བློ་བཟང་གིས་སངས་རྒྱས་རབས་བདུན་ཁང་གི་བྲིས་འབུར་རྣམས་ལ་ཞིག་གསོ་མཛད། སྐུ་མདུན་བློ་བཟང་ངག་གི་དབང་པོས་དངུལ་གྱི་མཎྜལ་དང་། འཕན་བླ་བྲེ། སྙན་དར་སོགས་མང་དུ་ཕུལ། ཧོར་བཀའ་བཅུ་ནམ་མཁའ་རྒྱལ་མཚོ་དང་། དབོན་འབུམ་དགེ་རྒྱལ་གཉིས་ཀྱིས་ཕྱིའི་ཁྱམས་ཀྱི་འདུ་ཁང་གསར་རྒྱག་མཛད་ནས། ལོགས་བྲིས་དང་ནང་གི་ལྷ་རྣམས་ཀྱི་གདན་ཁྲི་ཞིག་གསོ། ཚེ་འབར་གྱི་རྒྱུན་བཙུགས། དཔོན་ནམ་མཁའ་རྒྱལ་མཚན་གྱིས་ལོ་རེ་བཞིན་དུ་ཆོ་འཕྲུལ་ཆེན་མོའི་སྨོན་ལམ་གྱི་རྒྱུན་བཙུགས་པ་དང་། གཞན་ཡང་མཆོད་འབུལ་སོགས་རྒྱས་པར་མཛད་པ་རྣམས་ཀྱང་། དུས་དབང་གིས་ཞིག་རལ་ཆེར་སོང་ནས་འཇིག་ཏུ་ཉེ་བ་ན། ཏྲེ་ཧོར་ཡུལ་གྱི་སྐྱེ་འགྲོ་རྣམས་ཀྱི་བསོད་ནམས་གསོག་པའི་རྟེན་དམ་པར་གྱུར་པའི་གཙུག་ལག་ཁང་འདི་ཉིད་ཞིག་གསོ་བྱས་ན་ཡུལ་ཁམས་འདི་ཉིད་ཀྱི་བཅུད་དུ་གྱུར་ནས་སྐྱེ་འགྲོ་རྣམས་ལ་ཕན་བདེ་རྒྱ་ཆེན་པོར་འབྱུང་བའི་གཞིར་དམིགས་ཏེ། ཧོར་ཆོས་རྗེ་ངག་དབང་ཕུན་ཚོགས་ཀྱིས་ས་ཕོ་སྤྲེལ་གྱི་ལོ་ལ་སངས་རྒྱས་རབས་བདུན་གྱི་དབུ་ཐོག་གི་རྒྱ་ཕིབས་སྟེང་ཤོད། བར་སྐོར་སྟེང་འོག །འདུ་ཁང་ཕྱི་ཁྱམས་དང་བཅས་པའི་ཤིང་ཆ་རྣམས་གསར་བརྗེ་དང་། སྟེང་འོག་བར་གསུམ་གྱི་ལོགས་བྲིས་ཚང་མ་གསར་བཀོད་ཤིང་དྲྭ་དང་བཅས་པ། སྟེང་འོག་གི་འབུར་སྐུ་རྣམས་ཆག་གྲུམ་སོང་བ་ཞིག་གསོ་དང་། ཞལ་བཞི་གཙོ་འཁོར་ལྔའི་སྐུ་གསར་བཞེངས། སྟེང་དུ་གཉྫི་ར་དང་། ནང་དུ་དྲིལ་གདང་འཕན་པ། སྙན་དར། གོ་ཁྲབ་སོགས་སྤྱན་གཟིགས་ཀྱི་ཚོགས་དང་། ཟླ་བ་ཡོད་དོ་ཅོག་གི་ཚེས་བཅོ་ལྔ་བྱུང་རིང་མར་མེ་དང་ཞལ་ཟས་བརྒྱ་ཚར་རེ། ཉིན་རེ་བཞིན་དུ་ཞལ་ཟས་བདུན་ཚར་རེ་འབུལ་རྒྱུའི་རྒྱུན་བཙུགས་པ་སོགས་རྣམ་དཀར་དགེ་བའི་རྩ་བ་འདི་ཡང་སྤྱི་བྱེའི་སངས་རྒྱས་ཀྱི་བསྟན་པ་དར་ཞིང་སེམས་ཅན་བདེ་སྐྱིད་འབྱུང་བ་དང་། བསྟན་འཛིན་གྱི་སྐྱེས་བུ་རྣམས་སྐུ་ཚེ་ཞབས་པད་བརྟན་ཅིང་མཛད་འཕྲིན་དབྱར་གྱི་མཚོ་ཆེན་ལྟར་བརྡོལ་བའི་ཆེད་དུ་བསྔོ་བར་བྱས་པ་སོགས་དགེ་ལེགས་ཆེན་པོ་བྱུང་ཡོད། དེང་སང་ནི་ཁམས་དཀར་མཛེས་དགོན་པས་ལྟ་སྐྱོང་བྱེད་བཞིན་ཡོད།
Leave a Reply