བསྐལ་པ་བརྒྱ་ན་སྒྱུ་མ་མཁན་གྱིས་སྤྲུལ་པའི་སྒྱུ་མས་འཇིག་རྟེན་འཚེ་བར་བྱེད་དོ། །ཞེས་ཟེར་བས་དེ་ལྟ་བུའི་དྭོགས་པ་སྤངས་པ་ལ་སོགས་པའི་དོན་དུའོ། །གཉིས་པ་ལ་གཉིས་ཏེ། ངོ་བོ་སྒྲུབ་བྱེད་དང་བཅས་པ་དང༌། ཤ་ཚུགས་སོགས་ཀྱི་ཁྱད་པར་བཤད་པའོ། །དང་པོ་ནི། སྲིད་པ་བར་མ་ཞེས་པ་ཅི་ཞེ་ན། འདིར་གང་ཡུལ་གཞན་དུ་སྐྱེ་བ་ཐོབ་པར་བྱ་བའི་འཆི་སྲིད་དང་སྐྱེ་བའི་སྲིད་པའི་བར་དུ་འབྱུང་བ་དེ་ནི་སྲིད་པ་བར་མ་སྟེ། འགྲོ་བའི་བར་མ་ཡིན་པས་སོ། །ཅི་འདི་སྐྱེས་པ་དང་འབྱུང་བ་གཉིས་ཀ་ཡིན་ནམ་ཞེ་ན། བགྲོད་བྱའི་ཡུལ་རྣམ་སྨིན་འཕངས་པ་རྫོགས་པར་མ་ཕྱིན་པའི་ཕྱིར་སྲིད་པ་བར་མ་ནི་བྱུང་བ་མ་ཡིན་གྱི་འབྱུང་བ་ཡིན་ནོ། །ཕལ་ཆེན་པ་སོགས་བར་སྲིད་མེད་པར་འཆི་སྲིད་ཆད་པ་ཙམ་ལ་སྐྱེ་སྲིད་འབྱུང་བར་སྨྲའོ། །འདི་འགོག་པ་ལ་རིགས་པ་དང་ལུང་གཉིས། རིགས་པ་ནི། གང་རྒྱུན་གྱིས་འཇུག་པའི་ཆོས་རྣམས་ནི་རྒྱུན་མི་ཆད་པར་ཡུལ་གཞན་དུ་འབྱུང་བ་མཐོང་སྟེ། དཔེར་ན་འབྲས་བུ་སྣོད་དུ་བླུགས་པའི་ཁུར་ཞིག་གྲོང་གཞན་དུ་ཁྱར་བ་ན་བར་མ་ཆད་པའི་རིམ་གྱིས་གྲོང་གཞན་དུ་ཕྱིན་པ་བཞིན་ནོ། །ཁམས་འོག་མ་གཉིས་ཀྱི་སྐྱེ་སྲིད་ཀྱང་སྔ་མའི་འཆི་སྲིད་ཀྱི་རྒྱུན་ཡིན་ནོ། །ཞེས་བྱ་བ་ནི་རྒྱུ་སྔོན་སོང་སྒྲུབ་པའི་འབྲས་རྟགས་སོ། །སྐྱེ་སྲིད་ནི་བར་སྲིད་མེད་པར་འཆི་སྲིད་ཆད་པ་ཙམ་ལས་འབྱུང་བ་མ་ཡིན་ཏེ། འབྲུའི་རྒྱུན་དང་རྒྱུན་མ་ཆད་པར་ཡུལ་གཞན་དུ་འབྱུང་བར་ཆོས་མཐུན་པའི་ཕྱིར། གཟུགས་མེད་དུ་སྐྱེ་བ་ལ་ནི་བར་སྲིད་མེད་དེ། གང་དུ་ཤི་བའི་དེ་མ་ཐག་ཏུ་མིང་གཞིའི་ཕུང་པོ་གྲུབ་པ་ལ་གཟུགས་མེད་དུ་འདོགས་ལ། གཟུགས་མེད་དུ་གནས་གཞན་མེད་པས་གནས་གཞན་དུ་སེམས་འཕོ་བའི་རྟེན་མི་དགོས་པའི་ཕྱིར་དང༌། གང་དུ་སྐྱེ་བར་འགྱུར་བའི་བྱད་གཟུགས་འཛིན་པ་མེད་པའི་ཕྱིར། གལ་ཏེ་ཟླ་བའི་གཟུགས་ཀྱི་རྒྱུན་འཇུག་པ་མེད་པར་ཆུ་ནང་དུ་ཟླ་བའི་གཟུགས་བརྙན་གྱི་ཁ་དོག་རྫས་གཞན་འབྱུང་བ་བཞིན་དུ་བར་སྲིད་མེད་པར་འཆི་སྲིད་ཆད་པ་ཙམ་ལས་སྐྱེ་སྲིད་འབྱུང་ངོ་ཞེ་ན། ཟླ་བའི་གཟུགས་བརྙན་ཆོས་ཅན། ཁྱོད་ཁ་དོག་གི་རྫས་གཞན་ཞིག་ཆུ་ནང་དུ་གསར་དུ་བྱུང་བ་མ་ཡིན་པར་ཐལ། ཁྱོད་ཐོགས་བཅས་ཀྱི་གཟུགས་སུ་མ་གྲུབ་པའི་ཕྱིར། གལ་ཏེ་ཐོགས་བཅས་ཀྱི་གཟུགས་སུ་གྲུབ་ཏུ་ཟིན་ཀྱང་བར་སྲིད་མེད་པར་འཆི་སྲིད་ཆད་པ་ཙམ་ལ་སྐྱེ་སྲིད་འབྱུང་བའི་དཔེ་མ་ཡིན་པར་ཐལ། དེ་དང་ཚུལ་མི་འདྲ་བའི་ཕྱིར། གཏན་ཚིགས་སྔ་མ་སྒྲུབ་པ་ནི་ཐོགས་བཅས་ཀྱི་རྫས་སུ་མ་གྲུབ་པར་ཐལ། ཆུ་དང་གོ་ས་གཅིག་ཏུ་དམིགས་ཤིང་གོ་ས་གཅིག་ན་ཐོགས་བཅས་ཀྱི་རྫས་ཐ་དད་གཉིས་ལྷན་ཅིག་གནས་པ་མེད་པའི་ཕྱིར། མི་འདྲ་བའི་གཏན་ཚིགས་ནི་སྐྱེ་སྲིད་འཆི་སྲིད་ཀྱི་རྒྱུན་ཡིན་པ་ལྟར་གཟུགས་བརྙན་ནི་ཐོགས་བཅས་ཀྱི་གཟུགས་ཀྱི་རྒྱུན་མ་ཡིན་པའི་ཕྱིར། སྐྱེ་སྲིད་ནི་འཆི་སྲིད་གཅིག་པུ་ལས་འབྱུང་ལ། གཟུགས་བརྙན་ནི་ཆུ་དང་ཟླ་བ་གཉིས་ལས་འབྱུང་བའི་ཕྱིར་རོ། །ལུང་ནི་ཐུབ་པའི་མགུར་ནས་སྲིད་པ་ནི་བདུན་ཏེ། འགྲོ་བ་ལྔའི་སྲིད་པ་དང་ལས་ཀྱི་སྲིད་པ་དང་སྲིད་པ་བར་མའོ། །ཞེས་གསུངས་པའི་ཕྱིར་བར་སྲིད་ཡོད་དོ། །ཡང་གནས་གསུམ་མངོན་དུ་གྱུར་ནས་མའི་མངལ་དུ་བུ་ཆགས་ཏེ། མ་རུང་ཞིང་ཟླ་མཚན་ལྡན་པ་དང༌། ཕ་མ་ཆགས་ཤིང་ཕྲད་པ་དང༌། དྲི་ཟ་ཉེ་བར་གྱུར་པའོ། །ཞེས་པ་ལས་གྲུབ་སྟེ། འདིར་དྲི་ཟ་ནི་བར་སྲིད་ཡིན་པས་སོ། །ཡང་ཕྱིར་མི་འོང་བ་ནི་ལྔ་སྟེ་བར་དོ་དང༌། སྐྱེས་གནས་དང༌། འདུ་བྱེད་མེད་པ་དང༌། འདུ་བྱེད་དང་བཅས་ཏེ་མྱ་ངན་ལས་འདའ་བ་དང༌། གོང་དུ་འཕོ་བའོ། །ཞེས་ལྔར་གསུངས་པ་ལས་གྲུབ་སྟེ། བར་སྲིད་མེད་ན་བར་དོར་འདའ་བ་མི་འཐད་པས་སོ། །ཡང་སྐྱེས་བུ་དམ་པའི་འགྲོ་བ་བདུན་གྱི་མདོ་ལས་བར་དོར་འདའ་བ་གསུམ་བཀའ་སྩལ་བ་ལས་གྲུབ་བོ། །ཀྱང་ནི་རིགས་པར་མ་ཟད་པའོ། །འོ་ན་མདོ་ལས་སངས་རྒྱས་འོད་སྲུངས་ཀྱི་ཉན་ཐོས་ཤིག་གི་ཀླད་པར་བདུད་སུན་འབྱིན་བྱེད་ཀྱིས་ཁུ་ཚུར་བསྣུན་ཏེ་དཀྲོངས་པས་དེ་སྐད་ཅིག་དེ་ཉིད་ལ་རང་གི་ལུས་དེ་ཉིད་ཀྱི་མནར་མེད་དུ་ལྟུང་ངོ༌། །ཞེས་པ་ཇི་ལྟར་ཞེ་ན། དེ་ནི་དང་པོར་མཐོང་ཆོས་ལ་མྱོང་འགྱུར་དམྱལ་བའི་མེས་བསྐོར་ཏེ་སྨིན་ཅིང་ཤི་ནས་བར་དོས་མནར་མེད་དུ་སོང་བའོ། །མཚམས་མེད་ལྔ་བྱས་མ་ཐག་དམྱལ་བར་སྐྱེའོ། །ཞེས་པ་ཇི་ལྟར་ཞེ་ན། འགྲོ་བ་གཞན་གྱིས་བར་མ་ཆོད་པ་ལ་དགོངས་སོ། །འོ་ན་བྲམ་ཟེ་སྡིག་ཅན་ཞིག་བཅོམ་ལྡན་འདས་ཀྱི་སྤྱན་སྔར་འོངས་པ་ལ། བྲམ་ཟེ་ན་ཚོད་ཁྱེར་ཟིན་རྒ་བ་དང༌། ན་བ་ཡིན་ཏེ། གཤིན་རྗེའི་དྲུང་དུ་ཕྱིན་པར་ན་ཁྱོད་ཀྱི་གནས་ཀྱང་ཡོད་མ་ཡིན། ཞེས་པ་ཇི་ལྟར་ཞེ་ན། མིའི་ནང་ན་གནས་མེད་པ་ལ་དགོངས་སོ། །གཉིས་པ་ནི། འགྲོ་བ་གང་དུ་སྐྱེ་བའི་བར་སྲིད་ཀྱི་ཤ་ཚུགས་ཇི་ལྟ་བུ་ཞེ་ན། བར་སྲིད་དེ་ནི་ད་གདོད་འབྱུང་བར་འགྱུར་བའི་སྔོན་དུས་ཀྱི་སྲིད་པའི་དབྱིབས་ཅན་ཏེ། སྔོན་དུས་ཀྱི་སྲིད་པ་དེ་དང་འཕེན་པ་གཅིག་པའི་ཕྱིར་ཏེ། སའི་དངོས་གཞིར་ཡང༌། གང་དུ་སྐྱེ་བར་འགྱུར་བ་དེའི་བྱད་གཟུགས་སོ། །ཞེས་སོ། །ཚེ་སྔ་མའི་གཟུགས་སུ་སྨྲ་བ་ལ་ནི་འཕེན་པ་གཅིག་པའི་གཟུགས་མེད་ཅིང༌། གཟུགས་མེད་ནས་སྐྱེས་པ་ལ་དབྱིབས་མེད་པར་འགྱུར་རོ། །སྲིད་པ་འཕོ་བའི་མདོ་ལས། དམྱལ་བའི་བར་དོ་སྡོང་དུམ་མེས་ཚིག་པ་ལྟ་བུ་དང༌། ཡི་དྭགས་ཀྱི་ཆུ་དང་དུད་འགྲོའི་དུ་བ་དང༌། མིའི་གསེར་དང༌། ལྷའི་སྣམ་བུ་དཀར་པོ་ལྟ་བུར་གསུངས། བོངས་ཚོད་ནི་བྱིས་པ་ལོ་ལྔ་དྲུག་ཙམ་པ་དང་ལྷའི་བར་དོ་བོངས་ཚོད་རྫོགས་པའོ། །འོ་ན་དམུས་ལོང་དུ་སྐྱེ་བའི་བར་དོ་ལ་མིག་མེད་པས་དབང་པོ་ཀུན་ཚང་ཞེས་པ་མི་རུང་ངོ་ཞེ་ན། རྣམ་པ་ཀུན་འདྲ་བ་མ་ཡིན་ཡང་འདྲ་བར་འཇོག་སྟེ། བུ་ཕ་དང་འདྲ་ཞེས་པ་བཞིན་ནོ། །རྒྱལ་བུ་དོན་གྲུབ་ཀྱི་བར་དོ་ནི་མཚན་དཔེས་སྤྲས་ཤིང་སྟོང་གསུམ་སྣང་བར་མཛད་པའོ། །སྔོན་དུས་ཀྱི་སྲིད་པ་དེ་ནི་འཆི་བའི་སྔོན་རོལ་ཚུན་ཆད་ནས་སྐྱེ་བའི་སྲིད་པའི་སྐད་ཅིག་མ་གཅིག་ཕན་ཆད་དོ། །བར་སྲིད་དེ་ཡང་རིགས་མཐུན་པ་ནང་དང་ལྷའི་མིག་དག་པ་མངོན་ཤེས་ཀྱིས་མཐོང་གི་ཤིན་ཏུ་དྭངས་པས་ལྷའི་མིག་སྐྱེས་ཐོབ་ཀྱིས་མི་མཐོང་ངོ༌། །གཞན་ནི་གོང་མའི་བར་དོས་འོག་མ་ཀུན་ཀྱང་མཐོང་བར་སྨྲའོ། །དེ་ནི་ལས་ལས་སྐྱེས་པའི་རྫུ་འཕྲུལ་ནམ་མཁའ་ལ་འགྲོ་བའི་ཤུགས་ཏེ་འགྱོགས་པ་དང་ལྡན་ཞིང༌། དབང་པོ་ལྔ་པོ་ཀུན་ཚང་ལ་རྡོ་སོགས་ལའང་ཐོགས་མེད་འགྲོ་བའི་ལུས་དྭངས་པ་དང་ལྡན་ནོ། །སྐྱེ་གནས་སུ་ནི་ཐོགས་ཞེས་ཀྱང་གྲགས་སོ། །འགྲོ་བ་གང་དུ་སྐྱེ་བའི་བར་སྲིད་གྲུབ་ནས་འགྲོ་བ་གཞན་དུ་མི་ཟློག་སྟེ། དེ་གཉིས་ལས་གཅིག་གིས་འཕེན་ཅིང་དེར་ལས་སྟོབས་ལྡན་གསར་པ་གསོག་མི་ནུས་སོ། །མངོན་པ་གོང་མ་བ་ནི་གསོག་ནུས་པས་རྗེས་ཀྱི་སྦྱིན་སོགས་དགེ་བས་བཟློག་པར་འཆད་དོ། །ཅི་འདོད་པའི་བར་སྲིད་ཀྱང་ཁམ་ཟས་ཟའམ་ཞེ་ན། བར་སྲིད་དེ་ནི་དབང་ཆེ་ཆུང་དག་དྲི་ཞིམ་མི་ཞིམ་ཟའོ། །ཚེའི་ཚད་དུ་བཤད་པ་ཐུབ་པའི་ངེས་པ་མེད་དེ། ཇི་སྲིད་སྐྱེ་བའི་ཚོགས་པ་མ་རྙེད་ཀྱི་བར་དུ་གནས་ལ་དེའི་ཚེའི་འཕེན་པ་སྔོན་དུས་དང་གཅིག་པས་དེར་ཚེ་རིང་ཐུང་གིས་སྔོན་དུས་ཚེ་རིང་ཐུང་དུ་འགྱུར་ཞེས་འདོད་དོ། །གསུམ་པ་སྐྱེས་གནས་སུ་བགྲོད་ཚུལ་ནི། བར་སྲིད་དེ་བསམ་པ་གང་གིས་སྐྱེ་གནས་སུ་འཇིག་ཅེ་ན། མངལ་དང་སྒོ་ངའི་སྐྱེས་གནས་ཀྱི་བར་སྲིད་ཀྱིས་རྒྱང་རིང་པོ་ནས་ཕ་མ་ཉལ་པོ་བྱེད་པ་མཐོང་སྟེ། བློ་ཕྱིན་ཅི་ལོག་ཏུ་གྱུར་པས་ཕོར་སྐྱེ་ན་མ་ལ་ཆགས་ཤིང་ཕ་ལ་སྡང་བ་དང༌། མོར་སྐྱེ་ན་ཕ་ལ་ཆགས་ཤིང་མ་ལ་སྡང་བའི་སྒོ་ནས་རྩེ་དགའ་བྱ་བར་འདོད་པས་འགྲོ་བའི་ཡུལ་བུ་སྣོད་དུ་འགྲོའོ། །དྲོད་གཤེར་སྐྱེས་ནི་དྲི་འདོད་པ་དང༌། རྫུས་སྐྱེས་ནི་གནས་མངོན་པར་འདོད་པས་འགྲོའོ། །དབྱིབས་གང་གིས་འཇུག་ཅེ་ན། དམྱལ་བའི་བར་དོ་ནི་སྤྱིའི་ཚུགས་སུ་འཇུག་པ་ཡིན་ཏེ། ཡང་དག་སྡོམ་དང་དཀའ་ཐུབ་ཅན། །དྲང་སྲོང་རྣམས་ལ་སྐུར་འདེབས་པ། །དེ་དག་སྤྱི་ཚུགས་དག་ཏུ་ནི། །དམྱལ་བ་ཁོ་ནར་ལྟུང་བར་འགྱུར། །ཞེས་སོ། །ལྷ་ནི་གྱེན་དུ་འགྲོ་ལ། མི་ལ་སོགས་པའི་ནི་མི་ལ་སོགས་པ་བཞིན་ནོ། །འོ་ན་མངལ་དུ་འཇུག་པའི་བར་སྲིད་ཀུན་གོང་གི་བསམ་པ་དེར་ངེས་སམ་ཞེ་ན། མདོ་ལས་བཞི་གསུངས་ཏེ། གཅིག་ནི་ཤེས་བཞིན་དུ་འཇུག་གི་གནས་པ་དང་འབྱུང་བ་ཤེས་བཞིན་མ་ཡིན་པའོ། །གཞན་ནི་འཇུག་པར་མ་ཟད་གནས་པ་ཡང་ཤེས་ལ་འབྱུང་བ་མི་ཤེས་པ་དང་གཞན་ནི་འཇུག་གནས་སུ་མ་ཟད་འབྱུང་བའང་ཤེས་པ་དང་གཞན་ནི་འཇུག་གནས་འབྱུང་བ་ཐམས་ཅད་རྨོངས་པ་སྟེ། ཤེས་བཞིན་མ་ཡིན་པའོ། །སྒོ་ང་ལས་སྐྱེས་པ་ནི་རྟག་ཏུ་འཇུག་གནས་འབྱུང་བ་ཐམས་ཅད་རྨོངས་པའོ། །འདི་ནི་ཚོགས་སྤྱོད་མི་འདོད་པའི་ཁ་ཆེ་པའི་ལུགས་སོ། །ཡང་མངལ་དུ་འཇུག་པ་དང་པོ་གསུམ་པོ་རྣམས་ནི་རིམ་པ་ལྟར་འཁོར་ལོ་སྒྱུར་བ་དང་རང་འབྱུང་རང་རྒྱལ་དང༌། རྫོགས་པའི་སངས་རྒྱས་གཉིས་དག་སྟེ་དེ་ཡང་ལས་བསོད་ནམས་རྒྱ་ཆེན་བྱེད་པ་དང༌། ཡེ་ཤེས་ཐོས་པ་མང་བ་སོགས་དང༌། བསོད་ནམས་དང་ཡེ་ཤེས་གཉིས་ཀ་རྒྱ་ཆེ་བའི་ཕྱིར་ན་གོ་རིམ་བཞིན་ནོ། །གཉིས་པ་སྐྱེ་ཚུལ་རྟེན་འབྲེལ་གྱི་མཚན་ཉིད་དང་རང་བཞིན་ལ་གསུམ་སྟེ། ཕུང་པོ་ཉིང་མཚམས་སྦྱོར་ཚུལ། ཕུང་པོའི་རྒྱུན་ཐོག་མ་མེད་པ། རྟེན་འབྲེལ་གྱི་རང་བཞིན་གཏན་ལ་དབབ་པའོ། །དང་པོ་ནི། གལ་ཏེ་སེམས་ཅན་འཇིག་རྟེན་གཞན་དུ་འཕོ་ན་བདག་གྲུབ་བམ་ཞེ་ན། ཕུང་པོ་འདོར་ཞིང་ཉིང་མཚམས་སྦྱོར་བའི་བདག་ཉིད་ཀྱི་ཕུང་པོ་ཙམ་ཉིད་ལ་བདག་ཏུ་འདོགས་ན་དགག་པ་མེད་དོ། །འོ་ན་ཕུང་པོ་ཉིད་འཇིག་རྟེན་གཞན་དུ་འཕོ་བར་འགྱུར་རོ། །ཞེ་ན། ཕུང་པོ་སྐད་ཅིག་མ་ལ་ནི་འཕོ་བའི་མཐུ་མེད་ཀྱི། ཉོན་མོངས་དང་ལས་ཀྱིས་བསྒོས་པའི་ཕུང་པོ་ཙམ་གྱི་སྲིད་པ་བར་མའི་རྒྱུན་གྱིས་མའི་མངལ་དུ་འགྲོ་སྟེ། དཔེར་ན་མར་མེ་སྐད་ཅིག་མ་ཡིན་པ་ཡང་རྒྱུན་གྱིས་ཡུལ་གཞན་དུ་འགྲོ་བ་བཞིན་ནོ། །གཉིས་པ་ནི། སེམས་ཅན་གྱི་ཚེའི་འཕེན་བྱེད་ཀྱི་ལས་ཐ་དད་ཀྱིས་ཇི་ལྟར་འཕངས་པ་བཞིན་ནུར་ནུར་པོ་སོགས་ཀྱི་རིམ་གྱིས་ཕུང་པོའི་རྒྱུན་འཕེལ་བའི་དབང་པོ་སྨིན་ནས་ཡང་ལས་བསགས་ཤིང་ཉོན་མོངས་སྤྱོད་པ་དེ་དག་རྣམས་འཇིག་རྟེན་ཕ་རོལ་ཏུ་སྲིད་པ་བར་མའི་རྒྱུན་གྱིས་འགྲོ་ཞེས་པའི་ཚུལ་གྱིས་སྲིད་པའི་འཁོར་ལོ་ཐོག་མ་མེད་དེ། གལ་ཏེ་ཡོད་ན་ཐོག་མ་དེ་རྒྱུ་མེད་དུ་འགྱུར་རོ། །ལམ་བསྒོམས་པའི་རྒྱུ་ལས་ཉོན་མོངས་ཟད་ནས་ཐ་མར་གྲོལ་བ་ནི་ཡོད་དེ། དབུ་མ་བཞི་བརྒྱ་པ་ལས། ཇི་ལྟར་ས་བོན་མཐའ་མཐོང་ཞིང༌། །དེ་ལ་ཐོག་མ་ཡོད་མིན་ལྟར། །དེ་བཞིན་རྒྱུ་ནི་མ་ཚང་ཕྱིར། །སྐྱེ་བ་འབྱུང་བར་མི་འགྱུར་རོ། །ཞེས་སོ། །དེས་ན་ཡང་དག་པའི་ལམ་སྒོམ་པ་ལ་འབད་པར་བྱའོ། །གསུམ་པ་རྟེན་འབྲེལ་གྱི་རང་བཞིན་གཏན་ལ་དབབ་པ་ལ་བཞི་སྟེ། གནས་སྐབས་པའི་རྟེན་འབྲེལ། ཡན་ལག་སོ་སོའི་ངོ་བོ། ཀུན་ནས་ཉོན་མོངས་པ་གསུམ་དཔེ་ཡིས་བསྟན་པ། དེ་རྣམས་སྲིད་པ་བཞིར་བསྟན་པའོ། །དང་པོ་ལ་གཉིས་ཏེ། དབྱེ་བ་མདོར་བསྟན། ཡན་ལག་རྒྱས་པར་བཤད་པའོ། །དང་པོ་ནི། ཕུང་པོའི་རྒྱུན་སྐྱེ་བའི་གནས་སྐབས་གསུམ་པོ་དེ་ནི། རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ཏེ། སྔོན་དང་ཕྱི་མཐའ་དང་བར་རྣམས་ཏེ་ཆ་གསུམ་མོ། །གཉིས་པ་ལ་གསུམ་སྟེ། ཚེ་གསུམ་ལ་རྫོགས་པའི་ཚུལ། ཉོན་མོངས་པ་གསུམ་དུ་བསྡུ་བ། གཞན་གྱི་དྭོགས་པ་བསལ་བའོ། །དང་པོ་ནི། ཡན་ལག་བཅུ་གཉིས་ཆ་གསུམ་དུ་ཇི་ལྟར་བཞག་ཅེ་ན། སྔོན་གྱི་མཐར་མ་རིག་པ་དང་འདུ་བྱེད་གཉིས་དང༌། ཕྱི་མཐར་སྐྱེ་བ་དང༌། རྒ་ཤི་གཉིས་དང༌། བར་དུ་ལྷག་མ་བརྒྱད་དེ། དེ་ཡང་འདོད་པའི་གང་ཟག་རྫུས་སྐྱེས་མ་ཡིན་པ་ཚེ་ཡོངས་སུ་རྫོགས་པ་དང་ལྡན་པ་ལ་ཡིན་གྱི། དུས་མིན་དུ་འཆི་བ་དང་ཁམས་གོང་མ་བ་ལ་ནི་མ་ཡིན་ནོ། །དེ་ལ་མ་རིག་པ་ནི་སྔོན་ཚེ་སྔ་མའི་ཉོན་མོངས་པའི་གནས་སྐབས་ཀྱི་ཕུང་པོ་ལྔ་སྟེ། འོན་ཀྱང་མ་རིག་པ་ཉིད་སྨོས་པ་ནི་དེའི་དབང་གིས་ཉོན་མོངས་པ་རྣམས་སྐྱེ་བའི་ཕྱིར་གཙོ་ཆེ་བ་སྟེ། དཔེར་ན་རྒྱལ་པོ་གཤེགས་པ་ལ་དེའི་ཞབས་འབྲིང་པའང་འོང་བར་གྲུབ་པ་བཞིན་ནོ། །འདུ་བྱེད་དག་ནི་སྔོན་ཚེ་སྔ་མའི་བསོད་ནམས་སོགས་ལས་ཀྱི་གནས་སྐབས་སོ། །རྣམ་ཤེས་ནི་ཚེ་བར་པར་མངལ་དུ་ཉིང་མཚམས་སྦྱོར་བའི་སྐད་ཅིག་གི་ཕུང་པོ་ལྔའོ། །མིང་དང་གཟུགས་ནི་མཚམས་སྦྱར་བ་དེ་ཕན་ཆད་ནས་སྐྱེ་མཆེད་དྲུག་དོད་པ་ཚུན་ཆད་དོ། །སྐྱེ་མཆེད་དྲུག་དེ་ནི་རང་ཉིད་དོད་ནས་ཡུལ་དབང་རྣམ་ཤེས་གསུམ་འདུས་པ་ཚུན་ཆད་དོ། །རེག་པ་ནི་གསུམ་འདུས་ནས་བདེ་སྡུག་དང་སོགས་པས་བཏང་སྙོམས་ཀྱི་རྒྱུ་ཤེས་བཞིན་ཡོངས་སུ་སྤྱོད་ནུས་པ་ཚུན་ཆད་ཀྱི་གནས་སྐབས་སོ། །ཚོར་བ་ནི་རང་ཉིད་ཀྱིས་རྒྱུ་འདི་དང་འདིའོ་ཞེས་སྤྱོད་ནུས་པ་ནས་འཁྲིག་པ་མི་སྤྱོད་ཀྱི་བར་རོ། །སྲེད་པ་ནི་གཟུགས་སོགས་འདོད་ཡོན་གྱི་ལོངས་སྤྱོད་དང་འཁྲིག་པ་ལ་ཆགས་པ་ཅན་གྱི་གནས་སྐབས་ཏེ། དེ་དག་གི་ཡུལ་ཚོལ་བ་ལ་མ་ཞུགས་པའི་བར་རོ། །ཉེ་བར་ལེན་པ་ནི་ཡུལ་གྱི་ལོངས་སྤྱོད་རྣམས་ཐོབ་པར་བྱ་བའི་ཕྱིར་ཐམས་ཅད་དུ་ཡོངས་སུ་རྒྱུག་པའི་གནས་སྐབས་སོ། །རྒྱུག་པ་དེ་ཉིད་ཡང་སྲིད་པ་སྐྱེ་བ་ཕྱི་མའི་འབྲས་བུ་འབྱུང་བར་འགྱུར་བའི་ལས་བྱེད་པའི་གནས་སྐབས་དེ་ནི་སྲིད་པའི་ཡན་ལག་ཡིན་ནོ། །ལས་དེས་ཀྱང་ཚེ་ཕྱི་མར་ཉིང་མཚམས་སྦྱོར་བ་སྟེ། ཚེ་འདིར་རྣམ་ཤེས་ཀྱི་ཡན་ལག་ཏུ་བཞག་པ་སྟེ་ཚེ་གཞན་དུ་སྐྱེ་བ་ཡིན་ནོ། །དེ་ཕན་ཆད་ཚེ་འདིར་མིང་གཟུགས་ནས་ཚོར་བར་བཞག་པའི་བར་བཞི་ནི་ཚེ་གཞན་དུ་རྒ་ཤི་ཡིན་ཏེ། གདུལ་བྱ་སྐྱོ་བའི་ཆེད་དུ་དེ་བཞི་རྒ་ཤིའི་སྒྲས་གསུངས་སོ། །སྤྱིར་རྟེན་འབྲེལ་ལ། སྐད་ཅིག་མ། རྒྱུན་ཆགས་པ། འབྲེལ་པ་ཅན། གནས་སྐབས་པ་སྟེ་བཞི་ལས་སྔར་བཤད་པ་འདི་ནི་ཚེ་གསུམ་གྱི་ཕུང་པོ་ལྔའི་གནས་སྐབས་བཅུ་གཉིས་ཡིན་པས་གནས་སྐབས་པར་འདོད་དེ། དེ་ཉིད་རྒྱུན་ཆགས་པ་ཡང་ཡིན་ལ་གཞན་གཉིས་ནི་སྲོག་ཆགས་གསོད་པའི་སྐད་ཅིག་མ་ལྟ་བུ་སྐད་ཅིག་རེ་ལ་ཡན་ལག་བཅུ་གཉིས་བརྩི་བའོ། །ལོ་ཞེས་པ་མ་རངས་པ་སྟེ། མདོ་ལས་མ་རིག་པ་ཅི་ཞེ་ན། གང་སྔོན་གྱི་མཐའ་མི་ཤེས་པའོ། །ཞེས་སོགས་དང་འགལ་བས། ཕུང་པོ་ལྔ་པར་མི་སྲིད་པར་མདོ་སྡེ་པ་འདོད་དོ། །ཡན་ལག་རེ་རེ་ལ་ཕུང་པོ་ལྔ་ཆར་ཡོད་ན་མ་རིག་པ་སོགས་ཁོ་ནར་ཅིའི་ཕྱིར་བསྒྲགས་ཤེ་ན། མ་རིག་པ་སོགས་གཙོ་བོ་ཡིན་པའི་ཕྱིར་ན་ཡན་ལག་དེ་དང་དེ་མ་རིག་པ་སོགས་སུ་བསྒྲགས་སོ། །ཡང་ཆོས་མངོན་པར་འདུས་བྱས་ཐམས་ཅད་རྟེན་འབྲེལ་དུ་བཤད་ལ། མདོ་ལས་ནི་སེམས་ཅན་དུ་སྟོན་པ་ཁོ་ན་གསུངས་པ་ཅི་ཞེ་ན། མངོན་པར་བཤད་པ་ནི་མཚན་ཉིད་པ་ཡིན་ལ། མདོ་ལས་ནི། བདག་སྔོན་འབྱུང་ངམ་དང་ཕྱི་མའི་མཐར་འབྱུང་ངམ་དང༌། བར་དུ་འདི་ཅི་ཡིན་སྙམ་པ་རྣམས་ལ་རྨོངས་པ་རྣམ་པར་བཟློག་པའི་ཕྱིར་སེམས་ཅན་དུ་སྟོན་པ་ཁོ་ན་ཆ་གསུམ་དུ་བསྟན་ཏོ། །གཉིས་པ་ཉོན་མོངས་པ་གསུམ་དུ་བསྡུ་བ་ནི། ཡན་ལག་བཅུ་གཉིས་པོ་གསུམ་དུ་འདུས་ཏེ། དེ་ལ་ཉོན་མོངས་པ་ནི་གསུམ་སྟེ། མ་རིག་པ་དང་སྲེད་ལེན་ནོ། །ལས་ནི་གཉིས་ཏེ། འདུ་བྱེད་དང་སྲིད་པའོ། །གཞི་བདུན་ཏེ་རྣམ་ཤེས་སོགས་ལྷག་མ་བདུན་ནོ། །ལས་ཉོན་གྱི་རྟེན་ཡིན་པས་གཞི་ཞེས་བྱའོ། །བདུན་པོ་དེ་གཞི་ཡིན་པ་དེ་བཞིན་དུ་འབྲས་བུ་ཡིན་ལ། གཞན་ལྔ་ནི་རྒྱུའོ། །ཅིའི་ཕྱིར་བར་གྱི་རྒྱུ་འབྲས་རྒྱས་པར་ཕྱེ་ལ། སྔོན་དང་ཕྱི་མཐའི་ཡན་ལག་བསྡུས་ཤེ་ན། སྔ་ཕྱི་གཉིས་ཀྱི་རྒྱུ་དང་འབྲས་བུ་མདོར་བསྡུས་པ་ནི་བར་མར་སྔ་མའི་འབྲས་བུ་རྣམ་ཤེས་སོགས་ལྔ་དང༌། ཕྱི་མའི་རྒྱུ་སྲེད་ལེན་གཉིས་སུ་ཕྱེ་བའི་སྒོ་ནས་རྗེས་སུ་དཔག་པ་ལས་སྔ་ཕྱི་གཉིས་ཀྱི་རྒྱུ་འབྲས་ཀྱི་དབྱེ་བ་ལེགས་པར་རྟོགས་ནུས་པས་རྒྱས་པར་མ་ཕྱེའོ། །གསུམ་པ་གཞན་གྱི་དྭོགས་པ་བསལ་བ་ནི། མ་རིག་པ་ལ་རྒྱུ་མེད་ན། འཁོར་བ་རྒྱུ་མེད་དུ་ཐལ་པ་དང༌། རྒ་ཤི་ལ་འབྲས་བུ་མེད་ན་འཁོར་བ་ཕྱི་མཐའ་ཅན་དུ་འགྱུར་ལ། རིམ་པ་ལྟར་དེ་གཉིས་ཀྱི་རྒྱུ་དང་འབྲས་བུ་ཡོད་ན་ཡན་ལག་བཅུ་གཉིས་སུ་གྲངས་མ་ངེས་པར་འགྱུར་རོ། །ཞེ་ན། ཡན་ལག་བཅུ་གཉིས་པོ་ཕན་ཚུན་རྒྱུ་འབྲས་སུ་འགྱུར་བས་ཡན་ལག་དོན་གཞན་བཙལ་མི་དགོས་ཞེས་སྟོན་པ་ནི། ཉོན་མོངས་པ་ལས་ཉོན་མོངས་པ་སྐྱེ་སྟེ། སྲིད་པ་ལས་ལེན་པའོ། །ཉོན་མོངས་པ་ལས་བྱ་བ་ལས་ཀྱི་རྟེན་འབྲེལ་སྐྱེ་སྟེ། ལེན་པ་ལས་སྲིད་པ་དང་མ་རིག་པ་ལས་འདུ་བྱེད་སྐྱེ་བའི་ཕྱིར། ལས་དེ་ལས་གཞི་སྐྱེ་སྟེ། འདུ་བྱེད་ལས་རྣམ་ཤེས་དང༌། སྲིད་པ་ལས་སྐྱེ་བ་འབྱུང་བའི་ཕྱིར། གཞི་དེ་ལས་གཞི་སྐྱེ་སྟེ། རྣམ་ཤེས་ལས་མིང་གཟུགས་དང༌། སྐྱེ་བ་ལས་རྒ་ཤི་སྐྱེ་བའི་ཕྱིར། གཞི་ལས་ཉོན་མོངས་སྐྱེ་སྟེ་ཚོར་བ་ལས་སྲེད་པ་སྐྱེ་བའི་ཕྱིར། འདི་ནི་སྲིད་པའི་ཡན་ལག་རྟེན་འབྲེལ་ལུགས་འབྱུང་དུ་སྐྱེ་བའི་ལུགས་སོ། །དེ་ལྟར་ན་ཉོན་མོངས་པ་ལས་ལས་དང༌། ལས་ལས་གཞིའི་རྟེན་འབྲེལ་དང༌། དེ་ལས་སླར་ཡང་ཉོན་མོངས་པའི་རྟེན་འབྲེལ་འབྱུང་བས། མ་རིག་པ་ལ་རྒྱུ་དང་རྒ་ཤི་ལ་འབྲས་བུ་ཡོད་ཀྱང་ཕན་ཚུན་གཅིག་གིས་གཅིག་གི་རྒྱུ་བྱེད་པས་ཡན་ལག་དོན་གཞན་བཙལ་མི་དགོས་སོ། །མདོར་རྟེན་ཅིང་འབྲེལ་བར་འབྱུང་བ་དང༌། བྱུང་བ་ཞེས་གསུངས་ན་འདི་གཉིས་ཀྱི་ཁྱད་པར་ཅི་ཞེ་ན། བསྟན་བཅོས་ལས་ནི། འདུས་བྱས་ཐམས་ཅད་དེ་གཉིས་ཀ་ཡིན་པར་གསུངས་སོ། །མདོའི་དགོངས་པ་འདིར་ནི་རྟེན་ཅིང་འབྲེལ་བར་འབྱུང་བ་ནི། རྒྱུའི་ཡན་ལག་ཡིན་ལ་བྱུང་བ་ནི་འབྲས་བུའི་ཡན་ལག་ཡིན་པར་འདོད་དོ། །གཉིས་པ་ཡན་ལག་སོ་སོའི་ངོ་བོ་ལ་གཉིས་ཏེ། སྤྱིའི་དོན་དང༌། ཚིག་གི་དོན་ནོ། །དང་པོ་ལ་གསུམ་སྟེ། ངོ་བོ་དབྱེ་བ་དང་བཅས་པ། གྲངས་ངེས་ཚུལ། གོ་རིམ་རྣམ་པར་བཞག་པའོ། །ཐོགས་མེད་སྐུ་མཆེད་ལྟར་ན་མ་རིག་པ་ནི་ཡང་སྲིད་ཀྱི་རྒྱུའི་ལས་ཀུན་ནས་སློང་ནུས་རིག་པ་ཡེ་ཤེས་ཀྱི་མི་མཐུན་ཕྱོགས་ཏེ། དབྱེ་ན་ལས་འབྲས་ལ་རྨོངས་པ་དང༌། དེ་ཁོ་ན་ཉིད་ལ་རྨོངས་པ་གཉིས་སོ། །འདུ་བྱེད་ནི་ལས་འགྲུབ་བྱེད་ཀྱི་སེམས་པ་དང་དེས་སྐྱེད་པའི་ཡང་སྲིད་འཕེན་བྱེད་བསམ་པའི་ལས་སོ། །རྣམ་ཤེས་ནི་འདུ་བྱེད་ཀྱིས་བཞག་པའི་ཡང་སྲིད་སྐྱེད་པའི་ལས་ཀྱི་ས་བོན་ཅན་ཏེ། ཉན་ཐོས་སྡེ་གཉིས་ལྟར་ན་ཡིད་ཤེས་སོ། །སེམས་ཙམ་པས་ཀུན་གཞིར་བཞེད་ཅིང་དེ་ཡང་ས་བོན་བཞག་ཙམ་རྒྱུ་དུས་ཀྱི་རྣམ་ཤེས་དང་ལས་དེ་ནུས་པ་བརྟས་ཏེ་སྐྱེ་གནས་སུ་ཁྲིད་དུས་ཀྱི་འབྲས་དུས་ཀྱི་རྣམ་ཤེས་གཉིས་སོ། །མིང་གཟུགས་ནི་རྣམ་ཤེས་དེ་མངལ་དུ་ཞུགས་པས་གྲུབ་པའི་ཕུང་པོ་ལྔའོ། །སྐྱེ་མཆེད་དྲུག་ནི་མིང་གཟུགས་དེ་འཕེལ་བས་མིག་སོགས་དྲུག་ཚང་བའོ། །རེག་པ་ནི་ཡུལ་དབང་རྣམ་ཤེས་གསུམ་འདུས་ནས་དབང་པོའི་འགྱུར་བ་དང་འདྲ་བའི་ཡུལ་སྤྱོད་པ་སྟེ། རེག་པའི་ཚོགས་དྲུག་གོ །ཚོར་བ་ནི་ཡུལ་དང་རྣམ་སྨིན་ལ་ལོངས་སྤྱོད་པའི་མྱོང་བ་སྟེ་བདེ་སྡུག་སོགས་གསུམ་མམ། ཡིད་བདེ་སོགས་ལྔའོ། །སྲེད་པ་ནི་ཚོར་བ་ལ་བླང་དོར་དུ་འདོད་ཆགས་པ་སྟེ། ཁམས་གསུམ་གྱི་སྲེད་པ་གསུམ་མམ་འདོད་སྲེད་འཇིག་སྲེད་སྲིད་སྲེད་གསུམ་མོ། །ལེན་པ་ནི་ལྟ་བ་སོགས་བཞི་ལ་འདུན་ཅིང་ཆགས་པ་སྟེ་ཟག་བཅས་མ་འོངས་པ་ལ་འདུན་པ་དང་ད་ལྟ་བ་ལ་ཆགས་པ་གཉིས་སམ། འདོད་པ་ཉེ་བར་ལེན་པ་སོགས་བཞིའོ། །སྲེད་ལེན་གྱི་ཁྱད་པར་ནི་སྲིད་པའི་རིང་རྒྱུ་དང་ཉེ་རྒྱུའམ། ཚོར་བ་སོགས་གསུམ་ལ་སྤྱི་རིལ་དུ་ཆགས་པ་དང་བྱེ་བྲག་ཏུ་འདོད་པ་སོགས་བཞི་ལ་འདུན་ཅིང་ཆགས་པའོ། །སྲིད་པ་ནི་ལས་ཀྱི་ནུས་པ་མཐུ་ཅན་དུ་སྐྱེ་བ་བསྐྱེད་པར་ངེས་པ་སྟེ། འཆི་བའི་ཚེ་ལེན་པས་ལས་ཀྱི་ས་བོན་བརྟས་པར་བྱས་པས་འགྲོ་བ་བྱེ་བྲག་ཅན་དུ་ངེས་པར་བྱེད་ལ། མཚམས་མེད་ཀྱི་ལས་ནི་བྱས་མ་ཐག་ཏུ་ངེས་པར་བྱེད་ཀྱང་འཕྲལ་དུ་དམྱལ་བ་སོགས་སུ་མི་སྐྱེ་བ་ནི་སྔོན་གྱི་རྣམ་སྨིན་གྱི་ལྷག་མ་ལུས་པའོ། །མདོར་སྲིད་པ་དང་བདུན་གསུངས་པའི་ལས་ཀྱི་སྲིད་པ་སྟེ། དབྱེ་ན། ཁམས་གསུམ་གྱི་ལས་སྲིད་གསུམ་མོ། །སྐྱེ་བ་ནི་མིང་གཟུགས་སོགས་སྔར་མ་བྱུང་བ་ལས་བྱུང་བའོ། །རྒ་ཤི་ནི་ཕུང་པོའི་རྒྱུན་གཞན་དུ་འགྱུར་བ་དང་ཆད་པའོ། །གཉིས་པ་ནི། མངལ་སྐྱེས་ཀྱི་སྲིད་པ་གཅིག་གི་མགོ་རྩོམ་པ་ནས། མཇུག་རྫོགས་ཀྱི་བར་ལ་རིང་བའི་རྒྱུ་འབྲས་ཆ་གཉིས། ཉེ་བའི་རྒྱུ་འབྲས་ཆ་གཉིས་ཀྱི་དབང་དུ་བྱས་ནས་བཅུ་གཉིས་སུ་ངེས་ཏེ། སྔ་མ་ལ་མ་རིག་པ་དང་འདུ་བྱེད་གཉིས་རྒྱུ་ཡིན། རྣམ་པར་ཤེས་པ་ནས་ཚོར་བའི་བར་ལྔ་ནི་འབྲས་བུའོ། །འདི་གཉིས་ནི་རིང་བའི་རྒྱུ་འབྲས་ཡིན་ཏེ། རྒྱུ་འབྲས་གཉིས་ཀྱི་བར་དུ་སྐྱེ་བར་དུ་མས་ཆོད་པ་སྲིད་པའི་ཕྱིར། རྒྱུ་འབྲས་ཕྱི་མ་ལ་སྲེད་ལེན་སྲིད་པ་གསུམ་རྒྱུ་ཡིན་ལ་སྐྱེ་བ་དང༌། རྒ་ཤི་གཉིས་འབྲས་བུའོ། །འདི་གཉིས་ཉེ་བའི་རྒྱུ་འབྲས་ཡིན་ཏེ། སྐྱེ་བ་གཞན་གྱིས་བར་མ་ཆོད་པར་འབྱུང་བའི་ཕྱིར། འབྱུང་བའི་རིམ་པ་ནི་ཐོག་མར་མ་རིག་པ་དང་འདུ་བྱེད་གཉིས་ཀྱིས་རྣམ་ཤེས་ནས། ཚོར་བའི་བར་འཕངས་པ་ཉིད་སྲེད་ལེན་གཉིས་ཀྱིས་གསོས་བཏབ་ནས་ལས་ནུས་པ་ཅན་གྱི་སྲིད་པར་གྱུར་ནས་སྐྱེ་བ་དང༌། རྒ་ཤ་གཉིས་སྐྱེ་བ་གཞན་གྱིས་མ་ཆོད་པར་འགྲུབ་པར་བྱེད་པ་ནི་རྒྱུ་འབྲས་སྔ་ཕྱི་གཉིས་ཀྱི་ཁྱད་པར་རོ། །འོ་ན་རྣམ་ཤེས་སོགས་ལྔའི་སྔ་རོལ་དུ་སྲེད་པ་སོགས་འབྱུང་རིགས་པར་ཐལ། རྣམ་ཤེས་སོགས་ལྔ་པོ་འགྲུབ་བྱེད་ཀྱི་རྒྱུ་ཡིན་པའི་ཕྱིར། ཞེ་ན། རྒྱུ་འབྲས་སྔ་མ་ལ་ཡང་སྲེད་ལེན་སྲིད་པ་གསུམ་དོན་ཐོབ་ཏུ་ཡོད་ཀྱང་དངོས་སུ་མ་སྨོས་ཏེ། རིང་བའི་རྒྱུ་འབྲས་སྟོན་པའི་སྐབས་ཡིན་པའི་ཕྱིར། རྒྱུ་འབྲས་ཕྱི་མ་ལ་ཡང་འཕེན་བྱེད་ཀྱི་རྒྱུ་དོན་གྱིས་ཡོད་ཀྱང་དངོས་སུ་མ་སྨོས་ཏེ། ཉེ་བའི་རྒྱུ་འབྲས་སྟོན་པའི་སྐབས་ཡིན་པའི་ཕྱིར། སྔ་མའི་འགྲུབ་བྱེད་ཀྱི་རྒྱུ་ཕྱི་མ་ལ་དང༌། ཕྱི་མའི་འཕེན་བྱེད་ཀྱི་རྒྱུ་སྔ་མ་ལ་དཔགས་ཏེ་ཤེས་པས་མི་རྟོག་པ་ཡང་མ་ཡིན་ནོ། །གཞུང་འདི་ལྟར་ན་རྒྱུ་འབྲས་ཆ་གཉིས་ཀྱི་ཁྱད་པར་ནི་སྔ་མ་རྒྱུ་བསྡུས་འབྲས་བུ་ཕྱེ་བ་དང༌། ཕྱི་མ་རྒྱུ་ཕྱེ་འབྲས་བུ་བསྡུ་བའི་དབང་དུ་བྱས་སོ། །སྔ་མའི་སྐབས་སུ་འབྲས་བུ་རང་མིང་ནས་སྨོས་ལ་ཕྱི་མའི་སྐབས་སུ་རང་མིང་མ་སྨོས་པར། རྒ་ཤི་ཞེས་ཉེས་དམིགས་ཀྱི་ཆ་ནས་སྨོས་སོ། །སྡུག་ཀུན་གཉིས་སུ་བསྡུ་ན་སྔ་ཕྱི་གཉིས་ཀའི་རྒྱུའི་ཆ་ཀུན་འབྱུང་བདེན་པ་ཡིན་ལ། འབྲས་བུའི་ཆ་སྡུག་བསྔལ་གྱི་བདེན་པ་ཡིན་ནོ། །གཉིས་པ་གཞུང་གི་དོན་ལ་གཉིས་ཏེ། ཡན་ལག་བཞི་དངོས་སུ་བཤད། ལྷག་མ་གཞན་ལས་ཤེས་པར་བསྟན་པའོ། །དང་པོ་ལ་བཞི་སྟེ། མ་རིག་པ་བཤད། མིང་བཤད། རེག་པ་བཤད། ཚོར་བ་བཤད་པའོ། །དང་པོ་ལ་གཉིས་ཏེ། ངོ་བོ་ངོས་བཟུང་བ། ལོག་རྟོག་བསལ་བའོ། །དང་པོ་ནི། སྔར་ཡན་ལག་རེ་རེའང་ཕུང་པོ་ལྔ་ལྔར་བཤད་པ་ནི། བྱེ་བྲག་སྨྲ་བའི་ལུགས་ཡིན་ལ། འདིར་འཆད་པ་ནི་མདོ་སྡེ་པའི་ལུགས་སོ། །དེ་ལ་མ་རིག་པ་ནི་རིག་པ་གཏན་མེད་མ་ཡིན་གྱི། རིག་པ་ཡེ་ཤེས་ཀྱི་མི་མཐུན་པའི་ཕྱོགས་གཞན་ཡུལ་ལ་ཤིན་ཏུ་མི་གསལ་བའི་རྣམ་པར་འཇུག་པའོ། །དཔེར་ན་མཛའ་བའི་མི་མཐུན་ཕྱོགས་ལ་མི་མཛའ་བ་དང༌། བདེན་པའི་མི་མཐུན་ཕྱོགས་ལ་རྫུན་པ་ཞེས་སོགས་བཞིན་ནོ། །རིག་པ་མ་ཡིན་པ་ཙམ་དང་རིག་པ་མེད་ཙམ་ནི་མ་ཡིན་ཏེ། མདོ་ལས་ཀུན་སྦྱོར་དང་ཆུ་བོ་དང་སྦྱོར་བ་དང་ཟག་པ་སོགས་སུ་གསུངས་པའི་ཕྱིར་རོ། །གཉིས་པ་ནི། གལ་ཏེ་དམན་པ་ལ་དགག་པའི་སྒྲ་སྦྱར་ནས་ཤེས་རབ་ངན་པ་ནི་མ་རིག་པའོ་ཞེ་ན་མ་ཡིན་ཏེ། མ་རིག་པ་དང་ལྟ་བའི་ཀུན་སྦྱོར་ཐ་དད་དུ་གསུངས་པའི་ཕྱིར་དང༌། ལྟ་བའང་མ་རིག་པ་དེ་དང་མཚུངས་ལྡན་དུ་བཤད་པའི་ཕྱིར་དང༌། ཤེས་རབ་ཀྱི་རྫས་གཉིས་མཚུངས་ལྡན་དུ་མི་སྲིད་པའི་ཕྱིར་རོ། །ཡང་ཤེས་རབ་ངན་པ་མ་རིག་པར་བསྟན་པ་ནི་མ་ཡིན་ཏེ། ཤེས་རབ་ནི་མ་རིག་པས་ཉོན་མོངས་པར་བྱ་བའི་ཕྱིར་ཡུལ་དུ་བསྟན་པའི་ཕྱིར་ཏེ། མདོ་ལས་མ་རིག་པས་ཉེ་བར་ཉོན་མོངས་པ་ཅན་དུ་གྱུར་པའི་ཤེས་རབ་ནི་རྣམ་པར་མི་དག་གོ །ཞེས་གསུངས་པས་སོ། །མ་རིག་པའི་ངོས་འཛིན་འདི་ནི་ཚད་མ་དང་མི་མཐུན་པར་སྣང་ངོ༌། །གཉིས་པ་ནི། མིང་ནི་གཟུགས་ཅན་མ་ཡིན་པའི་ཕུང་པོ་ཚོར་བ་ནས་རྣམ་ཤེས་ཀྱི་བར་བཞི་སྟེ། མིང་ལྟར་དོན་ལ་གཞོལ་བས་སོ། །གསུམ་པ་རེག་པ་ནི། མ་རིག་ནས་ཡིད་ཀྱིས་འདུས་ཏེ་རེག་པའི་བར་དྲུག་སྟེ། དེ་ཡང་ཡུལ་དབང་རྣམ་ཤེས་གསུམ་འདུས་ཏེ་འབྱུང་བ་ཡིན་ནོ། །དེ་དྲུག་ལས་དང་པོ་ལྔ་ནི་ཐོག་བཅས་ཀྱི་དབང་པོ་ལ་བརྟེན་པས་ཐོགས་པའི་རེག་པའོ། །དྲུག་པ་ནི་ཚིག་བླ་དྭགས་ཏེ། མིང་ལ་དམིགས་པས་ཚིག་བླ་དྭགས་པའོ། །ཡང་རེག་པ་ལ་གསུམ་སྟེ། རིག་པའི་དང༌། མ་རིག་པའི་དང༌། དེ་གཉིས་ལས་གཞན་པའི་རེག་པའོ། །དེ་གསུམ་ནི་རིམ་པ་བཞིན་དྲི་མེད་ཀྱི་དང་ཉོན་མོངས་ཅན་གྱི་དང༌། ལྷག་མ་སྟེ་དགེ་བ་ཟག་བཅས་དང་མ་བསྒྲིབས་ལུང་མ་བསྟན་གྱི་རེག་པའོ། །མ་རིག་པའི་རེག་པའང་ཕྱོགས་གཅིག་སྨོས་ན་གནོད་སེམས་དང༌། རྗེས་སུ་ཆགས་པ་དག་དང་ལྡན་པའི་རེག་པ་གཉིས་སོ། །ཡང་ཐམས་ཅད་བསྡུས་ན་བདེ་བ་མྱོང་འགྱུར་གྱི་རེག་པ་སོགས་གསུམ་སྟེ། དེ་རྣམས་རེག་པ་བཅུ་དྲུག་གོ །བཞི་པ་ལ་གཉིས་ཏེ། སྤྱིར་དབྱེ་བ་དང༌། སེམས་ཚོར་བྱེ་བྲག་ཏུ་བཤད་པའོ། །དང་པོ་ནི། རེག་པ་དེ་ལས་བྱུང་བའི་ཚོར་བ་དྲུག་སྟེ། མིག་གི་འདུས་ཏེ་རེག་པ་ལས་བྱུང་བའི་ཚོར་བ་སོགས་སོ། །དེ་དྲུག་ལས་དང་པོ་ལྔ་ནི་ལུས་ཀྱི་ཚོར་བའོ། །སེམས་ཀྱི་ཚོར་བ་ནི་གཞན་ཡིད་ཀྱིས་འདུས་ཏེ་རེག་པ་ལས་བྱུང་བའོ། །གཉིས་པ་ལ་གསུམ་སྟེ། བསྟན་བཤད་བསྡུ་བའོ། །དང་པོ་ནི། སེམས་ཚོར་ཏེ་ཡུལ་དྲུག་ལ་རྟོག་བཅས་མི་བརྟེན་པའི་ཚུལ་གྱིས་ཉེ་བར་རྒྱུ་བ་ལས་ཡིད་བདེ་དང་ཡིད་མི་བདེ་དང་བཏང་སྙོམས་རྣམས་ལ་དྲུག་དྲུག་སྟེ། རྣམ་པ་དག་ནི་ཡང་བཅོ་བརྒྱད་དོ། །གཉིས་པ་ནི། འདོད་ཁམས་ན་བཅོ་བརྒྱད་པོ་ཐམས་ཅད་ཡོད་ལ་དེ་ཡང་རང་སའི་ཡུལ་དྲུག་ལ་དམིགས་པ་ཅན་ནོ། །དེ་རྣམས་ཀྱི་སྤྱོད་ཡུལ་གཟུགས་ཁམས་ཅན་གྱི་དྲི་རོ་ལ་རྒྱུ་བ་དྲུག་མིན་པ་བཅུ་གཉིས་སོ། །འདོད་པའི་ཚོར་བ་གསུམ་གོང་མ་གཟུགས་མེད་པ་ལ་དམིགས་ན་ཆོས་ལ་རྒྱུ་བ་གསུམ་མོ། །བསམ་གཏན་འོག་མ་གཉིས་འདོད་པའི་ཡུལ་དྲུག་ལ་འགྲོ་ཞིང༌། དམིགས་ན་ཡིད་མི་བདེའི་རྒྱུ་བ་དྲུག་མ་ཡིན་པ་བཅུ་གཉིས་སོ། །རང་གཟུགས་ཁམས་ལ་དམིགས་ན་དྲི་རོ་ལ་རྒྱུ་བ་བཞི་མིན་པ་བརྒྱད་དང༌། གཟུགས་མེད་པ་ལ་དམིགས་ན་ཚོར་བ་གཉིས་ཀྱི་ཆོས་ལ་རྒྱུ་བ་གཉིས་སོ། །བསམ་གཏན་གོང་མ་གཉིས་ཡན་ཆད་ན་བཏང་སྙོམས་ཀྱི་རྒྱུ་བ་ལས་མེད་པས་དེ་ཉིད་དྲུག་སྟེ། དེ་དྲུག་གི་དམིགས་པ་ནི་འདོད་པའོ། །རང་ས་གཟུགས་ཁམས་ལ་རྒྱུ་བ་ནི་ཡུལ་བཞི་ལ་དམིགས་པའོ། །གོང་མ་གཟུགས་མེད་ལ་རྒྱུ་བ་ནི་ཆོས་གཅིག་པུ་ལ་དམིགས་པའོ། །གཟུགས་མེད་ནམ་མཁའི་ཉེར་བསྡོགས་ན་བཞི་སྟེ། གཟུགས་ཀྱི་ཡུལ་བཞི་ལ་འགྲོ་ཞིང་དམིགས་པའོ། །གོང་མ་གཟུགས་མེད་པར་འགྲོ་ཞིང་དམིགས་པ་ནི་ཆོས་ལ་རྒྱུ་བ་གཅིག་པུའོ། །གཟུགས་མེད་དངོས་གཞི་ན་ཆོས་ལ་རྒྱུ་བའི་བཏང་སྙོམས་གཅིག་པུ་སྟེ། དེ་ཡང་རང་སའི་ཡུལ་ཅན་ནོ། །དོན་བསྡུ་བ་ནི། ཡིད་ཚོར་བཅོ་བརྒྱད་པོ་ཐམས་ཅད་ཟག་བཅས་སོ། །རྒྱུ་ཚུལ་ནི་བྱེ་བྲག་ཏུ་སྨྲ་བ་ལྟར་རོ། །སློབ་དཔོན་ནི་ཆགས་པ་དང་བྲལ་བའི་འོག་ས་སོགས་གང་ལ་དམིགས་པ་དེའི་ཉེ་བར་རྒྱུ་བ་མི་འདོད་ཀྱི་ཉོན་མོངས་པས་ཡིད་ཡུལ་ལ་རྒྱུ་བར་བྱེད་པ་ཉིད་ཡིན་པ་མདོའི་དོན་དུ་འཆད་དོ། །གཉིས་པ་ལྷག་མ་གཞན་ལས་ཤེས་པར་བསྟན་པ་ནི། རྣམ་ཤེས་ཀྱི་རྟེན་འབྲེལ་དང༌། སྐྱེ་མཆེད་དྲུག་དང༌། གཟུགས་ནི་བཤད་ཟིན་ཅིང་ཡན་ལག་གཞན་དུ་འདུ་བྱེད་སྲིད་པ་གཉིས་ལས་བསྟན་པར་དང༌། སྲེད་ལེན་གཉིས་ཕྲ་རྒྱས་བསྟན་པར་འཆད་པར་འགྱུར་རོ། །གསུམ་པ་ཀུན་ནས་ཉོན་མོངས་པ་གསུམ་དཔེ་ཡིས་བསྟན་པ་ནི། འདིར་ནི་ཉོན་མོངས་པའི་ཡན་ལག་གསུམ་ནི་ས་བོན་ལས་སྡོང་བུ་སོགས་སྐྱེ་བ་བཞིན་ཏེ། དེ་ལས་ཉོན་མོངས་པ་དང་ལས་དང་གཞི་སྐྱེ་བས་སོ། །ཀླུ་གནས་པའི་མཚོ་མི་སྐམ་པ་བཞིན་ཏེ། དེ་ཡོད་པས་སྐྱེ་བའི་རྒྱ་མཚོ་མི་སྐམ་པས་སོ། །ནགས་ཚལ་རྩ་བ་ནས་མ་ཕྱུང་ན་བཅད་ཀྱང་སླར་སྐྱེ་བ་བཞིན་ཏེ། དེའི་རྩ་བ་མ་ཕྱུང་ན་ཡང་འཁོར་བར་སྐྱེ་བས་སོ། །ལྗོན་ཤིང་གིས་དུས་སུ་མེ་ཏོག་དང་འབྲས་བུ་བསྐྱེད་པ་བཞིན་ཏེ། དེས་ཡང་ནས་ཡང་དུ་ལས་ཉོན་སོགས་བསྐྱེད་པས་སོ། །ཤུན་པ་དང་བཅས་པའི་འབྲས་སླར་སྐྱེ་ཡི་འབྲས་རྐྱང་པ་མི་སྐྱེ་བ་བཞིན་དུ་དེའི་ཐོབ་པ་དང་བཅས་པའི་ལས་ཀྱིས་ཡང་སྲིད་སྐྱེད་ཀྱི་ལས་རྐྱང་པས་མི་བསྐྱེད་དོ། །ལས་ཀྱི་ཡན་ལག་གཉིས་ནི། ཤུན་པ་དང་བཅས་པའི་འབྲས་དང་འདྲ་སྟེ་ཉོན་མོངས་པའི་ཤུན་པ་དང་བཅས་པས་སོ། །དེ་བཞིན་དུ་སྨན་ལན་གཅིག་ཁོ་ནས་ནུས་པ་འབྱིན་པ་བཞིན་ཏེ། ལན་གཅིག་ཁོ་ན་རྣམ་སྨིན་འབྱིན་པས་སོ། །མེ་ཏོག་འབྲས་བུའི་ཉེ་རྒྱུ་ཡིན་པ་བཞིན་ཏེ། དེ་རྣམ་སྨིན་གྱི་ཉེ་རྒྱུ་ཡིན་པས་སོ། །གཞི་བདུན་ནི་བཟའ་བཏུང་གཡོས་སུ་གྲུབ་པ་བཞིན་ཏེ། ལོངས་སྤྱད་བྱ་ཁོ་ན་ཡིན་གྱི་ཡང་བསྐྱེད་བྱ་མིན་པས་སོ། །བཞི་པ་དེ་རྣམས་སྲིད་པ་བཞིར་བསྟན་པ་ནི། དེ་ལྟར་བྱུང་བའི་རྟེན་འབྲེལ་ཡང་སྔར་བཤད་པའི་སྲིད་པ་བཞི་ལས་མི་འདའ་སྟེ། སྲིད་པ་བཞི་པོ་དེ་དག་ལས་སྐྱེ་བའི་སྲིད་པ་ནི་གཅིག་ཏུ་ཉོན་མོངས་ཅན་ཏེ། དེ་ཡང་རང་སའི་ཉོན་མོངས་ཀུན་གྱི་ཉོན་མོངས་སོ། །ཕྲག་དོག་སོགས་ཆིག་རྐྱང་ཐུབ་པ་ནི་མ་ཡིན་ཏེ། མ་རིག་པ་མིན་པ་དང་མི་ལྡན་པས་སོ། །བར་སྲིད་དང་སྔོན་དུས་ཀྱི་སྲིད་པ་དང་འཆི་སྲིད་དེ་སྲིད་པ་གཞན་གསུམ་ནི་ཉོན་མོངས་ཅན་དང་དགེ་བ་དང་མ་བསྒྲིབས་པ་སྟེ། རྣམ་པ་གསུམ་ཀ་སྲིད་ལ་བར་སྲིད་དུའང་སྐྱེ་བའི་ཚེ། ཉོན་མོངས་ཅན་ཉིད་དོ། །གཟུགས་མེད་ན་བར་སྲིད་མིན་པ་གསུམ་སྟེ། བར་སྲིད་མེད་པའི་སྒྲུབ་བྱེད་སྔར་བཤད་པ་ཉིད་དོ། །གསུམ་པ་སྐྱེས་པ་གནས་པའི་རྐྱེན་ལ་གསུམ་སྟེ། མདོར་བསྟན། རྒྱས་པར་བཤད། ཟས་བཞིར་ངེས་པས་མཇུག་བསྡུ་བའོ། །དང་པོ་ནི། སེམས་ཅན་རྣམས་གནས་པའི་རྐྱེན་ཅི་ཞེ་ན། འགྲོ་བ་ཐམས་ཅད་ཟས་ཀྱིས་གནས་པར་མདོ་ལས་གསུངས་སོ། །གཉིས་པ་ལ་གསུམ་སྟེ། ཁམ་ཟས་བཤད་པ་དང༌། ཟས་ལྷག་པ་བཤད་པ། ཞར་ལ་བར་སྲིད་ཀྱི་རྣམ་གྲངས་སོ། །དང་པོ་ནི། ཟས་བཞི་ལས་ཁམ་གྱི་ཟས་ནི་འདོད་པ་ཉིད་ན་ཡོད་དེ། གོང་མ་གཉིས་ནི་དེ་ལ་ཆགས་པ་དང་བྲལ་བས་སོ། །དེའི་ངོ་བོ་དྲི་རོ་རེག་བྱའི་སྐྱེ་མཆེད་གསུམ་གྱི་བདག་ཉིད་དེ། སྣ་ལྕེ་ལུས་གསུམ་གྱིས་ཁམ་དུ་བཅད་ནས་མིད་པས་སོ། །གཟུགས་སྒྲ་གཉིས་ཀྱི་སྐྱེ་མཆེད་ནི་ཟས་མ་ཡིན་ཏེ། ཟས་ནི་དབང་པོ་ལ་ཕན་པ་ཡིན་པ་ལ་རང་གི་ཡུལ་ཅན་དབང་པོ་ལ་མི་ཕན་པས་སོ། །འོ་ན་ཟས་ཡིད་འོང་མཐོང་བའི་ཚེ་ཕན་པ་ཅི་ཞེ་ན། དེའི་ཚེ་ཡང་རེག་པ་ཟས་ཡིན་གྱི་གཟུགས་ཟས་མ་ཡིན་ཏེ། ཡིན་ན་གྲོལ་བས་ཟས་མཐོང་བའི་ཚེའང་ཕན་པར་རིགས་པ་ལས་གྲོལ་བ་ཕྱིར་མི་འོང་དང་དགྲ་བཅོམ་པས་ཟས་ཡིད་དུ་འོང་བ་མཐོང་ཡང་དེ་དག་གི་དབང་པོ་ལ་མི་ཕན་པས་སོ། །གཉིས་པ་ནི། གསུམ་འདུས་ནས་ཡུལ་ཡིད་དུ་འོང་བ་གཅོད་པའི་རེག་པ་དང་མ་འོངས་པ་གཅོད་པའི་རེག་པ་དང་མ་འོངས་པའི་འདོད་བྱ་ལ་དམིགས་པའི་སེམས་པ་དང༌། རྣམ་ཤེས་གསུམ་ཟག་བཅས་ཁོ་ན་ཟས་ཡིན་ལ་འདི་དག་ནི་ཁམས་གསུམ་ཆར་དག་ན་ཡོད་དོ། །དེ་གསུམ་ཟག་མེད་ཀྱི་ཆ་ནི་ཟས་མ་ཡིན་ཏེ། ཟས་ཀྱི་དོན་སྲིད་པ་གསོ་བྱེད་དང༌། མདོ་ལས་སེམས་ཅན་འབྱུང་བ་གནས་བྱེད་དང༌། སྲིད་པ་གསོ་བ་ལ་ཕན་བྱེད་དུ་ཞུགས་པ་ལ་བཤད་ན། ཟག་མེད་ནི་དེ་ལྟར་མ་ཡིན་པས་སོ། །གསུམ་པ་ཞར་ལ་བར་སྲིད་ཀྱི་རྣམ་གྲངས་ནི། ཁུ་ཁྲག་སོགས་ལ་མི་ལྟོས་པར་ཡིད་ཙམ་ལས་སྐྱེས་པའི་དོན་གྱིས་ན་ཡིད་ལས་བྱུང་བ། སྐྱེ་སྲིད་འཚོལ་བར་བྱེད་པའི་དོན་གྱིས་ན་སྲིད་ཚོལ། ཟས་སུ་དྲི་ཟ་བའི་དོན་གྱིས་ན་དྲི་ཟ། སྐྱེ་སྲིད་དང་འཆི་སྲིད་གཉིས་ཀྱི་བར་ན་གནས་པའི་དོན་གྱིས་ན་སྲིད་པ་བར་མ། སྐྱེ་སྲིད་འགྲུབ་པར་བྱེད་པའི་དོན་གྱིས་ན་འགྲུབ་པ་སྟེ། འདི་དག་ནི་བར་སྲིད་ཀྱི་མིང་གི་རྣམ་གྲངས་སོ། །གསུམ་པ་ཟས་བཞིར་ངེས་པས་མཇུག་བསྡུ་བ་ནི། ཟག་བཅས་ཐམས་ཅད་སྲིད་པ་གསོ་བྱེད་ཡིན་པས་ཟས་བཞིར་གྲངས་ངེས་པ་མི་འཐད་ཅེ་ན། གཙོ་བོ་བཤད་པ་སྟེ། ཚེ་འདི་ལ་གནས་དབང་པོ་དང་བཅས་པའི་ལུས་རྒྱས་པ་དང༌། བརྟེན་པ་སེམས་དང་སེམས་བྱུང་རྒྱས་པའི་དོན་ལ་རིམ་བཞིན་ཁམ་དང་རེག་པའི་ཟས་གཉིས་གཙོ་ཆེ་ཞིང༌། ཡང་སྲིད་པ་གཞན་འཕེན་པ་དང༌། ལས་ཀྱིས་འཕངས་པ་ལས་ཀྱིས་བསྒོས་པའི་རྣམ་ཤེས་ཀྱི་ས་བོན་ལས་འགྲུབ་པའི་དོན་དུ་རིམ་བཞིན་སེམས་པ་དང་རྣམ་ཤེས་ཀྱི་ཟས་གཉིས་གཙོ་ཆེ་བས་གོ་རིམ་བཞིན་ནོ། །ཟས་སྔ་མ་གཉིས་ནི་སྐྱེས་ཟིན་གསོ་བ་ཡིན་ལ། ཕྱི་མ་གཉིས་ནི་ཕུང་པོ་གསར་དུ་སྐྱེད་བྱེད་དང་གནས་བྱེད་གཉིས་ཀའོ། །སེམས་པའི་ཟས་ལུས་གནས་བྱེད་ཡིན་པའི་དཔེ་ནི། ལོ་ཉེས་པའི་ཚེ་ཕ་ཡིས་ཐལ་བའི་རྐྱལ་པ་ལ་བུ་གཉིས་ཕྱེའི་འདུ་ཤེས་སྐྱེ་བར་བྱས་པས་དེ་སྲིད་དུ་བུ་གཉིས་འཚོ་བ་དང༌། རྒྱ་མཚོར་གྲུ་ཞིག་པའི་མི་ལྦུ་བའི་ཕུང་པོ་ལ་ཐང་དུ་འདུ་ཤེས་པས་དེ་སྲིད་དུ་འཚོ་བ་ལྟ་བུའོ། །རྣམ་ཤེས་ཀྱི་ཟས་ཀྱིས་ལུས་མི་འདྲུལ་བར་གནས་པར་བྱེད་དེ། མངོན་པ་གོང་མ་བས་ཀུན་གཞི་ལ་བཞེད་དོ། །བསྡུ་བ་ལས། ཁ་ཟས་ལོངས་སྤྱོད་པའི་ཚེ་གནོད་ལ་འཇུ་བའི་ཚེ་ཕན་པ་དང༌། གནོད་པ་ཡང་ཡོད་པས་འཇུ་བའི་ཚེ་ཁོ་ན་ཟས་ཡིན་པར་བཤད་ལ། བྱེ་བྲག་ཏུ་སྨྲ་བས་འཇུ་བའི་ཚེ་གནོད་ལ། ཟས་དང་པོ་ཟ་བའི་ཚེ་ཕན་འདོགས་པས་ཟས་ཡིན་ཏེ། ཟས་ནི་ལོངས་སྤྱོད་པ་དང་འཇུ་བ་གཉིས་ཀྱི་དུས་སུ་བྱ་བ་བྱེད་པས་སོ། །འགྲོ་བ་དང་སྐྱེ་གནས་ཀུན་ན་ཟས་ཐམས་ཅད་ཡོད་དེ། དམྱལ་བ་ནའང་ཐོ་ལུམ་དང་ཟངས་ཞུན་དག་བཀྲེས་སྐོམ་འཇོམས་ནུས་པས་ཟས་ཀྱི་མཚན་ཉིད་ཐོབ་པའི་ཕྱིར་ཟས་སུ་འདོད་དོ། །ཉི་ཚེ་བའི་དམྱལ་བ་ལ་ཁམ་ཟས་མི་དང་འདྲ་བར་ཡོད་པར་བཤད་དོ། །བྱེ་བྲག་ཏུ་སྨྲ་བས། སའི་དངོས་གཞིར་ཡང་དམྱལ་བ་རྣམས་རླུང་རྒྱུ་བའི་ཁམ་ཟས་ཕྲ་བས་གནས་པར་བཤད་དོ། །བཞི་པ་གནས་པ་འཆི་འཕོ་བ་ལ་གསུམ་སྟེ། འཆི་སེམས་ངོས་བཟུང༌། རྣམ་ཤེས་གང་དུ་འགག་པ། གནད་གཅོད་པའི་རྒྱུའོ། །དང་པོ་ལ་འཆི་སེམས་སྤྱིར་བསྟན་པ་ནི། དགེ་རྩ་འཆད་པ་དང་མ་ཆད་པ་མཚམས་སྦྱོར་བ་དང༌། ཁམས་དང་ས་ལས་འདོད་ཆགས་དང་བྲལ་བ་དང༌། དེ་ལས་ཉམས་པ་དང༌། འཆི་འཕོ་བ་དང༌། སྐྱེ་བ་སྟེ། གནས་སྐབས་དྲུག་གི་སེམས་རྣམས་ནི་ཡིད་ཀྱི་ཤེས་པ་ཁོ་ནར་འདོད་དོ། །ལྟ་བ་དང༌། ཐེ་ཚོམ་དང༌། མཉམ་བཞག་དང༌། ཚུལ་མིན་ཡིད་བྱེད་སོགས་ནི་ཡིད་ཀྱི་རྣམ་ཤེས་ཉིད་ལ་ཡོད་པས་སོ། འདི་ནི་སའི་དངོས་གཞིར་ཀུན་གཞི་མ་བཞག་པའི་དབང་དུ་བྱས་ལ། ཀུན་གཞི་བཞག་ན། དེ་ཉིད་ཀྱིས་སྐྱེ་འཆིའི་སེམས་བྱེད་པར་བཤད་དོ། །འཆི་སེམས་བྱེ་བྲག་ཏུ་བཤད་པ་ལ་གསུམ་སྟེ། ཚོར་བའི་ཁྱད་པར། སེམས་ཀྱི་ཁྱད་པར། ལྷག་མེད་དུ་འཇུག་ཚུལ་ལོ། །དང་པོ་ནི། འཆི་བ་དང་སྐྱེ་བའི་གནས་སྐབས་ཀྱི་ཚོར་བ་ནི་བཏང་སྙོམས་ལ་འདོད་དེ། འདི་ནི་མི་གསལ་བས་རུང་ལ། བདེ་སྡུག་གི་ཚོར་བ་ནི་གསལ་བས་མི་རུང་ངོ༌། །གཉིས་པ་ནི། མཉམ་བཞག་རྩེ་གཅིག་པའི་ཡེ་ཤེས་དང༌། སེམས་མེད་གསུམ་ལ་གནས་པའི་ངང་ལས་འཆི་འཕོ་བ་དང་སྐྱེ་བ་དེ་དག་མེད་དེ། མཉམ་བཞག་གི་སེམས་ནི་ཤིན་ཏུ་གསལ་བ་ཡིན་ལ། སེམས་མེད་ལ་སེམས་ཡོད་པར་འགལ་བས་སོ། །གསུམ་པ་ནི། དགྲ་བཅོམ་ལྷག་མེད་དུ་མྱ་ངན་ལས་འདའ་བ་ནི་ལུང་བསྟན་མིན་པའི་བྱེ་བྲག་གཉིས་ཏེ། རྣམ་སྨིན་སྐྱེས་དང་སྤྱོད་ལམ་པའི་ཚོར་བ་བཏང་སྙོམས་སོ། །དེ་གཉིས་ནི་མི་གསལ་ཞིང་ཉམས་ཆུང་བས། སེམས་འགག་པ་དང་ཆོས་མཐུན་པས་སོ། །གཉིས་པ་ནི། འཆི་བ་ན་ལུས་ཀྱི་ཕྱོགས་གང་དུ་རྣམ་ཤེས་འགག་ཅེ་ན། ཅིག་ཅར་འཆི་ན་ལུས་དབང་འགག་པ་དང༌། ཡིད་འཕོ་བ་ལྷན་ཅིག་ཏུ་འབྱུང་ལ། རིམ་གྱིས་འཆི་ན་འོག་ངན་སོང་དུ་འགྲོ་བ་དང༌། མིར་འགྲོ་བ་དང༌། ལྷར་འགྲོ་བ་རྣམས། རིམ་བཞིན་དུ་རྐང་པ་དང་ལྟེ་བ་དང་སྙིང་གར་ལུས་དབང་འགག་པས་ཡིད་འཆི་འཕོའོ། །སླར་མི་སྐྱེ་བ་དགྲ་བཅོམ་པའི་ཡིད་ཀྱང་སྙིང་གར་འགག་ཅིང་གཞན་ནི་སྤྱི་བོར་རོ་ཞེས་ཟེར་རོ། །རྣམ་ཤེས་ཡུལ་ལ་མི་གནས་པས། ཇི་ལྟར་གནས་དེ་རྣམས་ལ་འཆི་འཕོ་ཞེ་ན། གནས་དེ་རྣམས་སུ་ལུས་དབང་འགག་པས་ཡིད་ཀྱི་རྟེན་མེད་ལ། ཁམས་འོག་མ་གཉིས་སུ་ཡིད་འཇུག་པ་བརྟེན་ལུས་ལ་རག་ལས་པའི་ཕྱིར་རོ། །གསུམ་པ་ནི་ལུས་ཀྱི་ཕྱོགས་གང་ཉམས་ནས་འཆི་བ་ནི་གནད་ཡིན་ལ། དེ་གཅོད་པ་ནི་ཆུ་དང་སོགས་པས་མེ་དང་རླུང་གི་ཁམས་འཁྲུགས་པས་མཚོན་བརྡར་བས་བཏབ་པ་ལྟ་བུ་ཉམས་སུ་མྱོང་བའོ། །སའི་ཁམས་ནི་གནད་གཅོད་བྱེད་དུ་མ་བཤད་དེ། ལུས་ཀྱི་ནད་བསྐྱེད་པའི་རྒྱུ་ནི་རླུང་མཁྲིས་བད་ཀན་གསུམ་དུ་ངེས་པས་སོ། །སའི་དངོས་གཞི་ལས། དགེ་བ་བྱེད་པ་དང༌། སྒྲ་མི་སྙན་པ་ལ་ཚབས་ཆུང་ཞིང་ལྷ་དང་དམྱལ་བ་ལའང་གནད་གཅོད་པ་མེད་པར་བཤད་ལ། བར་དོ་ལ་ཡང་མེད་པར་མངོན་ནོ། །འོན་ཀྱང་འདོད་ལྷ་ལ་འཆི་ལྟས་ཀྱི་སྡུག་བསྔལ་འབྱུང་སྟེ། ལུས་ཀྱི་ཁ་དོག་མི་སྡུག་འགྱུར་བ་དང༌། །སྟན་ལ་མི་དགའ་མེ་ཏོག་ཕྲེང་རྙིང་དང༌། །གོས་ལ་དྲི་མ་ཆགས་ཤིང་ལུས་ལས་ནི། །སྔོན་ཆད་མེད་པའི་རྔུལ་འབྱུང་ཞེས་བགྱི་བ། །མཐོ་རིས་འཆི་འཕོ་སྦྲོན་བྱེད་འཆི་ལྟས་ལྔ། །ཞེས་དང༌། གོས་དང་རྒྱན་ལས་སྒྲ་མི་སྙན་པ་འབྱུང་བ་དང༌། འོད་ཆུང་བ་དང༌། ཁྲུས་ཀྱི་ཆུ་ཐིགས་ལུས་ལ་ཆགས་པ་དང༌། གཡོ་བའི་བདག་ཉིད་ཅན་གྱི་བློ་ཡང་ཡུལ་གཅིག་ལ་གནས་པ་དང༌། མིག་འབྱེད་འཛུམ་སྟེ། དེ་ལྔ་བཟློག་ཅིང་སྔ་མ་ལྔ་མི་བཟློག་པར་བཤད་དོ། །ལྔ་པ་སེམས་ཅན་གྱི་ཚོགས་གསུམ་དུ་བསྡུ་བ་ནི། མདོ་ལས་སེམས་ཅན་རྣམས་ཚོགས་གསུམ་དུ་གསུངས་པ་ལ་སྡུག་པའི་ཆོས་ལས་རིང་དུ་སོང་བའི་འཕགས་པ་དང༌། མཚམས་མེད་པའི་ལས་བྱེད་པ་རྣམས་རིམ་པ་བཞིན་ཡང་དག་པ་མྱ་ངན་ལས་འདས་པ་དང༌། ལོག་པ་ངན་སོང་ཉིད་དུ་ངེས་པའི་ཚོགས་དག་སྟེ། ལྷག་མ་ནི་མ་ངེས་པའི་ཚོགས་སོ། །གཉིས་པ་སྣོད་ཀྱིས་འཇིག་རྟེན་ལ་གསུམ་སྟེ། རྟེན་སྣོད་ཀྱི་གནས་ཚུལ་དང༌། ཞར་ལ་སེམས་ཅན་གྱི་ཚད། དེ་དག་འཇལ་བྱེད་ཀྱི་ཚད་དོ། །དང་པོ་ལ་བཞི་སྟེ། སྣོད་ཀྱི་གནས་ཚུལ་སྤྱིར་བསྟན་པ། གནས་བྱེ་བྲག་ཏུ་བཤད་པ། སྟོང་གསུམ་གྱི་འཇིག་རྟེན་ངོས་བཟུང་བ། དེ་དག་འབྱུང་འཇིག་མཉམ་པར་བསྟན་པའོ། །དང་པོ་ལ་གཉིས་ཏེ། རྟེན་གྱི་དཀྱིལ་འཁོར་གསུམ་བཤད་པ། བརྟེན་པ་རི་མཚོ་བཤད་པའོ། །དང་པོ་ནི། དེ་ལ་ཞེས་པ་ཚིག་ཕྲད་དམ། འཇིག་རྟེན་གཉིས་ཡོད་པ་དེ་ལ་སེམས་ཅན་གྱི་སྣོད་དུ་གྱུར་ཅིང་འཇིག་པས་ན་འཇིག་རྟེན་ཏེ། དེ་ཉིད་འདི་ལྟར་གནས་པར་འདོད་དོ། །འོག་རླུང་གི་དཀྱིལ་འཁོར་ནི་ལས་ཀྱི་དབང་གིས་ནམ་མཁའ་ལས་གྲུབ་ཅིང༌། དེའི་རྔམས་སུ་དཔག་ཚད་ས་ཡ་གཅིག་དང་དྲུག་འབུམ་སྟེ། རྒྱར་གྲངས་མེད་པ་ཚན་པོ་ཆེའི་རྡོ་རྗེས་ཀྱང་གཞིག་མི་ནུས་པས་སྲ་བའོ། །དེའི་སྟེང་ན་ཆུའི་དཀྱིལ་འཁོར་ཏེ། དེའི་རྔམས་སུ་དཔག་ཚད་འབུམ་ཕྲག་བཅུ་གཅིག་དང་སྟོང་ཕྲག་ཉི་ཤུ་སྟེ། ས་སྡེར་འོག་གཞི་དང༌། གློ་ན་གནས་པའི་རླུང་གིས་ཆུ་དེ་རྣམས་ཐུར་དང་ཐད་ཀར་མི་འཛག་པར་གསུངས་སོ། །ཆུ་དེ་རླུང་གིས་བསྲུབས་པས་ཕྱིས་ནི་ཆུའི་རྔམས་སུ་དཔག་ཚད་འབུམ་ཕྲག་བརྒྱད་དོ། །ལྷག་མ་སུམ་འབུམ་སུམ་ཁྲི་དག་ནི། དེའི་སྟེང་དུ་འོ་མའི་སྤྲིས་མ་ལྟར། གསེར་གྱི་དཀྱིལ་འཁོར་དུ་གྱུར་ཏེ་ཆུ་དང་གསེར་གྱི་དཀྱིལ་འཁོར་གྱི་ཐད་ཀར་དཔག་ཚད་འབུམ་ཕྲག་བཅུ་གཉིས་དང༌། སྟོང་ཕྲག་གསུམ་དང༌། བརྒྱ་ཕྲག་ཕྱེད་དང་ལྔ་རྣམས་ཁོ་ནར་མཉམ་མོ། །དེ་གཉིས་ཀྱི་ཁོར་ཡུག་ཏུ་ནི་ཐད་ཀའི་དཔག་ཚད་སུམ་འགྱུར་ཏེ། དེ་གཉིས་གླིང་བཞི་པ་གཅིག་གིས་རྟེན་དུ་དུམ་བུར་ཆགས་པར་བཞེད་ལ། མངོན་པ་གོང་མ་བ་ནི་དཀྱིལ་འཁོར་གསུམ་ཀ་རྒྱ་མཉམ་པར་བཞེད་དོ། །ཡུམ་དུ། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །དེ་ལས་ས་ཆེན་འདི་བརྟེན་ཞེས་བཀའ་སྩལ་པ་ལྟར་རོ། །གཉིས་པ་ལ་གཉིས་ཏེ། རི་དགུ་བཤད། མཚོ་བརྒྱད་བཤད་པའོ། །དང་པོ་གསེར་གྱི་དཀྱིལ་འཁོར་དེ་ལ་དབུས་སུ་ལྷུན་པོ། དེ་ལ་གཉའ་ཤིང་འཛིན་དང༌། གཤོལ་མདའ་འཛིན་དང༌། སེང་ལྡེང་ཅན་དང༌། དེ་བཞིན་དུ། ལྟ་ན་སྡུག་རི་དང༌། རྟ་རྣ་དང༌། རྣམ་འདུད་དང༌། མུ་ཁྱུད་འཛིན་རི་རྣམས་ཀྱིས་བསྐོར་ཏེ། དེ་ནས་དེའི་ཕྱི་ན་གླིང་བཞི་རྣམས་ཡིན་ནོ། །དེ་རྣམས་ཀྱི་ཕྱི་རོལ་ན་འཁོར་ལོ་ལྟ་བུའི་ཁོར་ཡུག་སྟེ། གཉའ་ཤིང་འཛིན་སོགས་བདུན་ནི་གསེར་ཡིན་ཞིང༌། དབྱིབས་གྲུ་བཞི་ནར་མའོ། །ཁོར་ཡུག་དེ་ལྕགས་ཏེ་དབྱིབས་ཟླུམ་པོའོ། །ལྷུན་པོ་ནི། ཤར་དངུལ་དང༌། ལྷོ་བཻཌཱུརྻ་དང༌། ནུབ་ཤེལ་དང༌། བྱང་གསེར་ལས་གྲུབ་པས་རིན་ཆེན་བཞིའི་རང་བཞིན་ཏེ། དེའི་དབང་གིས་དེའི་ངོས་ཀྱི་ནམ་མཁའ་དེའི་ཁ་དོག་ཏུ་སྣང་བའོ། །རི་དེ་དགུ་ཆུའི་ནང་དུ་གསེར་གྱི་ས་གཞི་ལ་ཐུག་པར་དཔག་ཚད་བརྒྱད་ཁྲི་ནུབ་པར་མཉམ་མོ། །ཆུའི་སྟེང་དུ་ཡང་ལྷུན་པོ་ནི་དཔག་ཚད་བརྒྱད་ཁྲི་འཕགས་སོ། །དྲན་པ་ཉེར་བཞག་ཏུ། ལྷུན་པོ་ཆུའི་ནང་དང་སྟེང་གཉིས་གར་བརྒྱད་ཁྲི་བཞི་སྟོང་ཡོད་པར་གསུངས་སོ། །གཉའ་ཤིང་འཛིན་སོགས་རི་ཕྱི་མ་བརྒྱད་པོ་ཆུའི་སྟེང་དུ་རྔམས་སྔ་མ་སྔ་མ་ལས་ཕྱི་མ་ཕྱི་མ་ཕྱེད་ཕྱེད་དབྲི་བ་སྟེ། བཞི་ཁྲི་ནས་སུམ་བརྒྱ་ཕྱེད་དང་བཅུ་གསུམ་གྱི་བར་རོ། །རི་དགུ་པོ་དེ་རྣམས་རྔམས་སུ་འཕང་སྟེ་ཞེང་དང་མཉམ་མོ། །གཉིས་པ་ནི་མུ་ཁྱུད་འཛིན་ལ་ཐུག་པ་དེ་དག་གི་བར་གྱི་མཚོ་བདུན་ནི་རོལ་མཚོ་ཡིན་ལ། མཚོ་དང་པོ་ནི་ཞེང་དུ་སྟོང་ཕྲག་བརྒྱད་བཅུའོ། །དེ་ནི་ནང་གི་རྒྱ་མཚོ་ཡིན་ལ། དེའི་ངོས་ཏེ་འགྲམ་ལ་སུམ་འགྱུར་ཡིན་པས་ཉིས་འབུམ་བཞི་ཁྲིའོ། །རོལ་མཚོ་གཞན་དྲུག་ནི་ཞེང་དུ་སྔ་མ་ལས་ཕྱི་མ་ཕྱེད་ཕྱེད་དབྲི་བ་སྟེ། བདུན་པའི་ཞེང་དུ་སྟོང་གཉིས་བརྒྱ་ལྔ་བཅུའོ། །དེ་རྣམས། བསིལ་དང་ཞིམ་དང་འཇམ་དང་ཡང༌། །དང་བ་དང་ནི་དྲི་མ་མེད། །འཐུང་ན་མགྲིན་དང་ལྟོ་བ་ལ། །མི་གནོད་ཡན་ལག་བརྒྱད་དང་ལྡན། །ཤཱི་ཏ་ཞེས་པ་རྨོས་བྱས་པའི་རོལ་དང་འདྲ་བས་ན་རོལ་མཚོའོ། །གང་དག་རྩེ་ཞིང་རོལ་པས་རོལ་མཚོ་ཞེས་སོགས་ནི་ལེགས་སྦྱར་དང་མི་མཐུན་ནོ། །དེ་ལ་ཀླུ་དགའ་བོ་ཉེར་དགའ་བོ། རྟས་བཏང་བཟུང༌། གཟི་ཅན། ཡུལ་འཁོར་སྲུང༌། ནག་པོ་ཆེན་པོ། ཨེ་ལའི་འདབ་རྣམས་གནས་ཏེ། བརྒྱ་བྱིན་གྱི་དཔུང་ངོ༌། །ལྷག་མ་མུ་ཁྱུད་འཛིན་དང་ཁོར་ཡུག་གི་བར་གྱི་རྒྱ་མཚོ་ནི་ཕྱིའི་རྒྱ་མཚོ་ཆེན་པོ་ཡིན་ཏེ། བ་ཚྭའི་ཆུས་གང་ལ་སྲོག་ཆགས་དང་རིན་པོ་ཆེའི་རིགས་དུ་མ་ཅན་ནོ། །དེའི་ཁ་ཞེང་དུ་དཔག་ཚད་འབུམ་ཕྲག་གསུམ་དང་སྟོང་ཕྲག་ཉི་ཤུ་གཉིས་སོ། །འོ་ན་རྒྱ་མཚོར་ཆུ་བོ་དང་ཆར་འབབ་པས་ཆུ་བྲེས་ལས་མི་འདའ་ཅི་ཞེ་ན། ཕལ་པོ་ཆེ་ལས། ཀླུས་ཆར་ཕབ་པས་རྒྱ་མཚོ་སྲིད་དེ་ལས་འདའ་བར་འགྱུར་བ་ལས། ཆུ་དང་གསེར་གྱི་ས་གཞིའི་མཚམས་ཀྱི་རིན་པོ་ཆེ་ཉི་མའི་སྙིང་པོས་ཆུ་རྣམས་འོ་མ་དང་ཞོར་བྱེད་ལ། རིན་པོ་ཆེ་རླན་དང་བྲལ་བ་ཞེས་པས་མར་གྱི་ཉིང་ཁུར་བྱེད། རིན་པོ་ཆེ་མེའི་འོད་ཅེས་པས་མེ་འབར་བར་བྱེད། རིན་པོ་ཆེ་མ་ལུས་པ་མཐར་ཐུག་པ་ཞེས་པས་ཅིའང་མི་སྣང་བར་བྱེད་དོ། །ཞེས་བཀའ་སྩལ་ཏོ། །མཛངས་བླུན་དུ་དམྱལ་བའི་ཚད་པས་སྐེམ་པ་དང༌། གཞན་དུ་རྒོད་མ་ཁའི་མེས་སྐེམས་པ་དང༌། གདགས་པར་དེའི་སེམས་ཅན་གྱིས་སྤྱད་ཅིང་རླུང་དང་ཉིན་མཚན་གྱིས་ཟད་པ་དང༌། ལན་ཚྭའི་རོ་ལྡན་པ་དང༌། དེའི་སེམས་ཅན་གྱི་ལུས་ཀྱི་དྲི་མ་དང༌། ལན་ཚྭའི་རོའི་ཁུ་བ་སོགས་ཆུས་ཁྱེར་བ་རུལ་པ་ཡིན་པར་བཤད་དོ། །གཉིས་པ་གནས་བྱེ་བྲག་ཏུ་བཤད་པ་ལ་གསུམ་སྟེ། མི་སོགས་ཀྱི་གནས། དམྱལ་བའི་གནས། ལྷའི་གནས་སོ། །དང་པོ་ལ་གཉིས་ཏེ། གླིང་བཅུ་གཉིས་སྤྱིར་བཤད། འཛམ་གླིང་བྱེ་བྲག་ཏུ་བཤད་པའོ། །དང་པོ་ནི། དེ་ལ་རི་རབ་ཀྱི་ངོས་བཞི་ན་གླིང་བཞི་སྟེ། འཛམ་བུའི་གླིང་གི་ངོས་གསུམ་ལ་དཔག་ཚད་སྟོང་ཕྲག་གཉིས་གཉིས་པ་ཤིང་རྟའི་དབྱིབས་ཅན་ངོས་གཅིག་ལ་དཔག་ཚད་ཕྱེད་དང་བཞི་སྟེ་ཁོར་ཡུག་ཕྱོགས་སོ། །བྱམས་པ་བྱོན་པའི་དུས་སུ། དེ་ཚེ་འཛམ་བུའི་གླིང་བཞི་ཡང༌། །ཆུ་ཞེང་ཐ་གྲུ་མཉམ་པར་ནི། །དཔག་ཚད་སྟོང་ཕྲག་བཅུ་པ་སྟེ། །ཞེས་བྱམས་པ་ལུང་བསྟན་པའི་མདོར་གསུངས་སོ། །འདི་ནས་ཤར་གྱི་རི་རབ་ཀྱི་ངོས་ན་ལུས་ཁྱད་པར་དུ་འཕགས་པར་བཟང་བའི་གླིང་དབྱིབས་ཟླ་གམ་འདྲ་བ་ངོས་གསུམ་གླིང་འདི་དང་འདྲ་ཞིང༌། ངོས་གཅིག་ལ་དཔག་ཚད་སུམ་བརྒྱ་ལྔ་བཅུ་པ་དེའང་གླིང་འདི་བཞིན་ཁོར་ཡུག་ཕྱོགས་སོ། །གདགས་པར་སྔ་ཕྱི་འགལ་ཏེ། རྒྱ་དཔེ་འགྱུར་མ་དག་པའོ། །འདི་ནས་ནུབ་ཀྱི་རི་རབ་ཀྱི་ངོས་ན་བ་ལང་སྦྱིན་ཞིང་ཚོང་བ་དང་སྤྱོད་པའི་གླིང་ནི་དབྱིབས་ཟླུམ་པོ་སྟེ་མཐའ་བསྐོར་དུ་དཔག་ཚད་སྟོང་ཕྲག་ཕྱེད་དང་བརྒྱད་དང༌། དེའི་དབུས་ལ་སྟོང་ཕྲག་ཕྱེད་དང་གསུམ་མོ། །འདི་ནས་བྱང་གི་རི་རབ་ཀྱི་ངོས་ན་སྒྲ་ངན་པ་སྨྲ་བས་སམ། འཆི་ཁར་སྒྲ་མི་སྙན་པ་བྱུང་སྟེ་འཆི་བས་སྒྲ་མི་སྙན་ཏེ། མཐའ་བསྐོར་དུ་དཔག་ཚད་བརྒྱད་སྟོང་པ་དབྱིབས་གྲུ་བཞི་པ་ངོས་རེ་རེ་ལ་ཉིས་སྟོང་པར་མཉམ་མོ། །གླིང་གི་དབྱིབས་དང་དེ་ན་གནས་པའི་གདོང་པ་འདྲའོ། །གདགས་པར། འཛམ་བུའི་གླིང་ན་གསེར་དངུལ་ལ་ཉོ་ཚོང་བྱེད་ཅིང༌། ཤར་ན་རས་དང་བེའུ་རས་དང༌། ནུབ་ན་བ་ལང་དང་ནོར་བུ་ལ་སྟེ། བྱང་ན་མེད་དོ། །ཁ་ཟས་ནི་ཤར་ནུབ་གཉིས་འདི་དང་འདྲ་ལ། བྱང་ན་མ་རྨོས་པའི་འབྲས་སཱ་ལུ་ཟའོ། །འདི་ན་ཆར་འབབ་མཁས་མི་མཁས་དང༌། ལོ་ལེགས་ཉེས་དང་བདེ་སྡུག་སོགས་ཡོད་པ་བཞིན་ཤར་ནུབ་གཉིས་ནའང་ཡོད་ལ། བག་མ་གཏོང་ལེན་དང་རྗེ་ཁོལ་སོགས་ཀྱང་འདི་དང་འདྲ་བ་ཡོད་ལ་བྱང་ན་མེད་དེ་དཔག་བསམ་གྱི་ཤིང་ལས་འདོད་ཡོན་འབྱུང་བས་གང་ལ་ཡང་ཡོངས་སུ་འཛིན་པ་མེད་པའི་ཕྱིར་དང༌། བུ་ཚ་རྣམས་ཀྱང་སྐྱེས་མ་ཐག་ཏུ་མས་འདོར་ཞིང་རང་གི་མཐེ་བོང་ལས་ནུ་ཞོ་འབྱུང་བར་བཤད་དོ། །དེ་ཡང་དྲན་པ་ཉེར་བཞག་ཏུ་བླུན་པོས་དགེ་བ་བྱས་པ་སྒྲ་མི་སྙན་དུ་སྐྱེ་ཞེས་དང༌། མདོ་མྱང་འདས་སུ་གཞན་གྱིས་བདེ་བ་མི་འདོད་བཞིན་དུ་ཚུལ་ཁྲིམས་བསྲུང་དུ་བཅུག་པ་ཤར་ནུབ་གཉིས་སུ་སྐྱེ་བར་གསུངས་སོ། །གླིང་དེའི་བར་གྱི་གླིང་བརྒྱད་ནི། ཤར་གྱི་ལུས་དང་ལུས་འཕགས། བྱང་གི་སྒྲ་མི་སྙན་དང་སྒྲ་མི་སྙན་གྱི་ཟླ། ལྷོའི་རྔ་ཡབ་དང་རྔ་ཡབ་གཞན། ནུབ་ཀྱི་གཡོ་ལྡན་དང་ལམ་མཆོག་འགྲོ་སྟེ། ཐམས་ཅད་ན་མི་གནས་ཤིང་རྔ་ཡབ་ན་སྲིན་པོ་གནས་པ་དེའང་མིའི་བྱེ་བྲག་གོ །གླིང་ཞེས་པ་ཆུའི་ནང་ནས་སྐམ་པར་གནས་པ་སྟེ། ཐམས་ཅད་ཀྱང་རྩ་བ་གསེར་གྱི་ས་གཞི་ལ་ཐུག་པའོ། །གཉིས་པ་ནི་རྡོ་རྗེའི་གདན་ནམ་མཉན་ཡོད་འདི་ནས་ཞེས་པ་ནི་འགྲེལ་པ་དང་འགལ་ཞིང༌། ལེགས་སྦྱར་དང་མི་མཐུན་པས་འཛམ་བུའི་གླིང་འདི་ནས་བྱང་དུ་རི་ནག་པོ་གསུམ་གསུམ་སྟེ་དགུ་འདས་པའི་ཕ་རོལ་ན་གངས་རིའོ། །གངས་རི་དེའི་ཕ་རོལ་ནས་རི་སྤོས་ངད་ལྡན་པའི་ཚུ་རོལ་ན། མཚོ་མ་དྲོས་པ་ཞེས་པ་ཆུ་ཞེང་དུ་དཔག་ཚད་ལྔ་བཅུ་པ་ཡན་ལག་བརྒྱད་ལྡན་གྱི་ཆུས་གང་བ། དེ་ལས་ཤར་དུ་ཆུ་བོ་གངྒཱ་དང༌། ལྷོར་སིན་དྷུ་དང༌། ནུབ་ཏུ་པཀྵུ་དང༌། བྱང་དུ་སི་ཏ་འབབ་བོ། །གདགས་པར་མཚོ་དེའི་དབུས་ན་ཀླུའི་རྒྱལ་པོ་མ་དྲོས་པའི་ཕོ་བྲང་རིན་པོ་ཆེ་ལས་གྲུབ་པ་ཡོད་ཅིང༌། ཕྱོགས་བཞི་ནས་གླང་པོ་ཆེ་དང༌། རྨ་བྱ་དང༌། རྟ་དང༌། སེང་གེའི་ཁ་ནས་ཆུ་བོ་བཞི་འབབ་པར་བཤད་དོ། །མཚོ་དེའི་དྲུང་དུ་འབྲས་བུ་མངར་པོ་ཡོད་པའི་ཤིང་ཛམྦུ་ཞེས་པ་ཡོད་དེ། ཤིང་དེས་མཚོན་ནས་གླིང་དེའི་མིང་བཏགས་སོ། །གདགས་པར་རི་སྤོས་ངད་ལྡན་གྱི་ལྷོའི་དཔག་ཚད་བཅུ་ན་མ་དྲོས་པ་དང༌། རི་དེའི་བྱང་གི་དཔག་ཚད་ཉི་ཤུ་ན་བྲག་གསེར་གྱི་བྱ་སྐྱིབས་བྲག་ཕྲན་བརྒྱད་སྟོང་གིས་བསྐོར་བ་དང༌། དེ་ནས་བྱང་གི་དཔག་ཚད་ཉི་ཤུ་ན་ཤིང་རབ་བརྟན་དང༌། དེ་ནས་བྱང་གི་དཔག་ཚད་ཉི་ཤུ་ན་རྫིང་བུ་མཚོ་མ་དྲོས་པ་དང་ཚད་མཉམ་པ་རྫིང་བུ་བརྒྱད་སྟོང་གིས་བསྐོར་བ་ཡོད་ལ། གླང་པོ་ཆེ་རབ་བརྟན་གླང་གཡོག་བརྒྱད་སྟོང་དང་བཅས་པ་དགུན་ཟླ་བཞི་བྲག་བྱ་སྐྱིབས། དཔྱིད་ཟླ་བཞི་ཤིང་རབ་བརྟན་དུ་གནས་པར་བཤད་དོ། །ཡང་གླིང་འདིའི་དབུས་ན། བྱང་སེམས་སྲིད་པ་ཐ་མ་པས་རྡོ་རྗེ་ལྟ་བུའི་ཏིང་ངེ་འཛིན་སྐྱེད་པར་མཛད་པ་རྡོ་རྗེའི་གདན་དང༌། ཡུམ་གསུངས་པའི་གནས་བྱ་རྒོད་ཕུང་པོའི་རི་དང༌། ཤར་ན་འཇམ་དབྱངས་ཀྱི་གནས་རི་རྩེ་ལྔ་དང༌། ལྷོ་ན་སྤྱན་རས་གཟིགས་ཀྱི་གནས་རི་བོ་གྲུ་འཛིན་དང༌། ནུབ་ན་མཁའ་འགྲོའི་གནས་ཨོ་རྒྱན་དང༌། བྱང་ནས་རིགས་ལྡན་གྱི་གནས་ཤམ་བྷ་ལ་དང༌། སྐྱེ་བོ་ཕལ་པའི་ཡུལ་ཆེན་བཅུ་དྲུག་དང༌། ཡུལ་ཕྲན་སྟོང་དང་མི་རིགས་དང་སྐད་རིགས་དུ་མ་ཡོད་དོ། །ཡང་གླིང་འདི་ནི་ཆོས་དར་ཞིང་ལས་ཀྱི་ས་པའོ། །གཉིས་པ་དམྱལ་བའི་གནས་ལ་གཉིས་ཏེ། ཚ་དམྱལ་ཉེ་འཁོར་བ་དང་བཅས་པ་དང༌། གྲང་དམྱལ་གྱི་གནས་བཤད་པའོ། །དང་པོ་ནི། དམྱལ་བ་རྣམས་ཕྱོགས་གང་ན་ཡོད་ཚད་ཇི་ཙམ་ཞེ་ན། ཛམྦུའི་གླིང་འདིའི་འོག་དཔག་ཚད་སྟོང་ཕྲག་ཉི་ཤུ་ན་མནར་མེད་པའི་གནས་ཡོད་ལ། གནས་དེའི་རྔམས་དང་རྒྱར་ཡང་དེ་ཙམ་སྟེ་གྲུ་བཞིའོ། །སྡུག་བསྔལ་བར་མ་ཆད་དུ་ཡོད་པས་མནར་མེད་པའོ། །གཞན་ན་བར་ཆད་དང་བཅས་ཏེ། ཡང་སོས་ན་རླུང་གྲང་མོ་ལངས་པས་སོས་པས་ན་ཡང་སོས་སོ། །དེའི་སྟེང་ན་ཚ་བའི་དམྱལ་བ་གཞན་བདུན་གྱི་གནས་ཡོད་དེ། བརྒྱད་ཆར་ལྕགས་ཀྱི་ས་གཞི་འབར་བ་མེ་ལྕེས་ཁྱབ་པ་ལྕགས་ཀྱི་རྭ་བས་ཀུན་ནས་བསྐོར་བ་ཕྱོགས་བཞི་ནས་སྒོ་བཞི་དང་བཅས་པའོ། །ཡང་སོས་ཀྱི་ལས་ལས་བྱུང་བའི་མཚོན་ཆ་སྣ་ཚོགས་ཀྱིས་དགྲའི་འདུ་ཤེས་ཀྱིས་ཕན་ཚུན་བསྣུན་པས་བརྒྱལ་ཏེ་ས་ལ་འགྱེལ་པ་ན་ནམ་མཁའ་ལས་ཁྱེད་རྣམས་ཡང་སོས་པར་གྱུར་ཅིག་ཅེས་སྒྲ་བྱུང་བ་ན། ཡང་སོས་ཏེ་སྔར་བཞིན་དུ་སྡུག་བསྔལ་མྱོང་ངོ༌། །ཐིག་ནག་གི་ལུས་ལ་དམྱལ་སྲུང་རྣམས་ཀྱིས་ཐིག་བཏབ་སྟེ་གཤོགས་པ་དང༌། བསྡུས་འཇོམས་ཀྱི་ལྕགས་ཀྱི་རི་རའི་གདོང་ལྟ་བུའམ་ལུག་རྟ་གླང་པོ་ཆེ་སེང་གེ་སྟག་གདོང་ལྟ་བུ་གཉིས་ཀྱི་བར་དུ་བཙིར་བས་སྒོ་ཀུན་ནས་ཁྲག་འབབ་པ་དང༌། ཡང་འདུས་པ་ན་ལྕགས་ཀྱི་འཁྲུལ་འཁོར་ཆེན་པོས་བུར་ཤིང་འཚིར་བ་བཞིན་དང༌། ཡང་འདུས་པ་ན་ལྕགས་ཀྱི་ཕ་བོང་གི་ཆར་པས་ས་གཞི་ལ་འཇར་འཇིར་དུ་བརྡུང་པ་ན་ཁྲག་འབབ་པའོ། །ངུ་འབོད་ཀྱིས་གནས་འཚོལ་བ་ན་ལྕགས་ཀྱི་ཁང་པར་ཞུགས་པས་དེར་མེ་འབར་ཞིང་ཆེས་ཆེར་བསྲེགས་པས་ངུ་ཞིང་སྡུག་སྐད་འབྱིན་པའོ། །ངུ་འབོད་ཆེན་པོ་དེ་དང་འདྲ་བ་ལས་ཁང་པ་སུམ་སྦྲགས་སུ་འདུག་པའོ། །ཚ་བ་ནི་ལྕགས་ཀྱི་ཕྲུ་བ་དཔག་ཚད་དུ་མ་ཡོད་པའི་ནང་དུ་ཉ་བཞིན་དུ་བསྲེགས་པ་དང༌། ལྕགས་ཀྱི་གསལ་ཤིང་འབར་བས་འཕོངས་ནས་ཕུག་པ་སྤྱི་བོར་ཕྱུང་ཞིང་ལུས་ཀྱི་བུ་ག་དང༌། བ་སྤུའི་ཁུང་བུ་ཀུན་ནས་མེ་འབར་བ་དང་ལྕགས་བསྲེགས་ཀྱི་ས་གཞི་ལ་ལྕགས་ཀྱི་ཐོ་བ་འབར་བས་བརྡུངས་པའོ། །རབ་ཏུ་ཚ་བ་ནི་གསལ་ཤིང་རྩེ་གསུམ་པས་འཕོངས་ནས་ཕུག་པ་ཕྲག་པ་གཉིས་དང་སྤྱི་བོར་ཕྱུང་ཞིང་བུ་ག་ཀུན་ནས་མེ་ལྷབ་ལྷབ་འབར་བ་དང༌། ལྕགས་ལེབ་འབར་བས་ལུས་ལ་ཀུན་ཏུ་འཁྲི་བའོ། །མནར་མེད་ན་ཕྱོགས་བཞི་ནས་མེ་འབར་བས་མར་མེའི་སྡོང་བུ་ལྟར་བསྲེགས་པ་ན་མེ་ཉིད་ཀྱི་ཕུང་པོར་སྣང་ཞིང༌། སྡུག་སྐད་ཙམ་ལས་སེམས་ཅན་ཡོད་པར་ཤེས་པ་ཙམ་དང༌། ལྕགས་ཀྱི་ཞིབ་མ་མེ་འདག་ལ་འཁྲིལ་པ་དང༌། ལྕགས་ཀྱི་རི་ཆེན་པོ་ལ་འབབ་འཛེག་བྱེད་དུ་འཇུག་པ་དང༌། ལྕེ་ལ་ལྕགས་ཀྱི་ཕུར་པ་འདེབས་པ་དང༌། ཁ་ནས་ཟངས་ཞུན་འཁོལ་མ་བླུག་པ་སོགས་ཀྱི་སྡུག་བསྔལ་མྱོང་བར་བྱེད་དོ། །ས་སྡེར་གངས་རིའི་འོད་དཔག་ཚད་སུམ་ཁྲི་ཉིས་སྟོང་ན་ཡང་སོས་དང༌། དེའི་འོག་བཞི་སྟོང་བཞི་སྟོང་ན་གཞན་བདུན་ཡོད་པར་བཤད་དོ། །ཚ་དམྱལ་བརྒྱད་པོ་ཀུན་ཏེ་རེ་རེ་ལའང་དེ་ལས་ཐར་ཡང་སྡུག་བསྔལ་མྱོང་བའི་གནས་ལྷག་པ་སྟེ་ཉེ་འཁོར་བཞི་བཞི་སྟེ་བཅུ་དྲུག་ཡོད་དོ། །དེ་གང་ཞེ་ན། བརྒྱད་པོ་དེ་དག་གི་ནི་ངོས་བཞི་ན་མེ་མ་མུར་པུས་ནུབ་ཙམ་ལ་རྒལ་བ་ན། རྐང་པ་འདེགས་འཇོག་གིས་ཤ་སྐྱེ་འཇིག་བྱེད་པ་དང༌། རོ་མྱགས་འདམ་ཁྱིལ་ཕྱི་སའི་འདམ་དྲི་ང་བ་ན་སྲིན་འབུ་མཆུ་རྣོན་གྱིས་རུས་པའི་བར་དུ་འབིགས་པ་དང༌། སྤུ་གྲིས་གཏམས་པའི་ལམ་དང་སོགས་པས་རལ་གྲི་ལོ་མའི་ནགས་དང༌། ལྕགས་ཀྱི་ཤལ་མ་རི་སྟེ་གསུམ་མཚོན་ཆར་འདྲ་བས་གཅིག་ཏུ་བྱས་ལ། དེ་དེའི་དང་པོར་སྔར་བཞིན་རྐང་པའི་ཤ་སྐྱེ་འཇིག་བྱེད་པ་དང༌། གཉིས་པར་དེའི་གྲིབ་མ་ལ་འཁོད་པ་ན་རལ་གྲི་ལྷུང་བས་གཅོད་ཅིང་འགྱེལ་ཏེ་ཁྱི་སྲེ་བོ་རྣམས་ཀྱིས་བཤུལ་ཟ་བ་དང༌། གསུམ་པར་ཚེར་མ་རྣོན་པོ་སོར་བཅུ་དྲུག་པ་ཡན་མན་དུ་ཁ་བལྟས་པས་འཛེགས་པ་དང་འབབ་པ་ན་འབིགས་ཤིང༌། བྱ་ཁྭ་ཏ་ལྕགས་ཀྱི་མཆུ་ཅན་གྱིས་མིག་འབྱིན་པ་དང༌། ཆུ་བོ་རབ་མེད་འགྱུར་བྱེད་ཀྱི་ཆུ་ཁོལ་མས་གང་བ་ལ་ལྷུངས་ཏེ་ངོས་གཉིས་ནས་སྐྱེས་བུ་མཚོན་ཆ་སྣ་ཚོགས་ཐོགས་པས་བསྲུངས་ཤིང་འཚེད་པའོ། །འོ་ན་དམྱལ་སྲུང་སེམས་ཅན་ཡིན་ནམ་མིན་ཞེ་ན། བྱེ་བྲག་ཏུ་སྨྲ་བས་སེམས་ཅན་དུ་སྨྲ་ལ། མདོ་སྡེ་པས་ལས་ཀྱི་མཐུ་ལས་བྱུང་བའི་འབྱུང་བའི་ཁྱད་པར་དུ་འདོད་དོ། །ཐེག་ཆེན་པ་རྣམས་སྡིག་པའི་བག་ཆགས་ཀྱིས་བསླད་པའི་སེམས་ཀྱི་སྣང་བར་འཆད་དོ། །གཉིས་པ་ནི། ཆུ་བུར་ཅན་སོགས་གྲང་དམྱལ་བརྒྱད་ནི་ཚ་དམྱལ་ལས་གཞན་པའི་གནས་ཏེ། ཚ་དམྱལ་རྣམས་ཀྱི་ཐད་ཀ་ན་ཡོད་དོ། །ས་སྡེར་ནི། ཡང་སོས་ཀྱི་ཐད་དཔག་ཚད་བཞི་ཁྲིའི་ཕ་རོལ་ན་དང་པོ་དང༌། དེའི་འོག་ཉིས་སྟོང་ཉིས་སྟོང་ན་གཞན་བདུན་ཡོད་པར་བཤད་དོ། །བརྒྱད་ཆར་ཉི་ཟླའི་སྣང་བ་མེད་པའི་འཁྱགས་པའི་སྦུབས་ན་གྲང་བས་ཉེན་ནས་ཆུ་བུར་བྱུང་བ་དང༌། ཆུ་བུར་དེ་རྡོལ་ཏེ་འཁུམས་པ་དང༌། གྲང་ནས་སོ་ཐམ་ཐམ་པ་དང༌། ཨ་ཆུ་ཟེར་བ་དང༌། ཀྱི་ཧུད་ཟེར་བ་དང༌། ཨུཏྤལ་ལྟར་གས་པ་ནི་པགས་པ་སྔོན་པོ་ཁ་ལྔ་དྲུག་ཙམ་དུ་གས་པ་དང༌། པདྨ་ལྟར་གས་པ་པགས་པ་དམར་པོ་ཁ་བཅུ་ལ་སོགས་པར་གས་པ་དང༌། པདྨ་ལྟར་ཆེར་གས་པ་ནི། ཤིན་ཏུ་དམར་བ་ཁ་བརྒྱ་ལ་སོགས་པར་གས་པའོ། །ཞེས་སོ། །ཉེ་ཚེ་བའི་དམྱལ་བའི་གནས་ནི་རི་དང་ཆུ་སོགས་ངེས་མེད་ན་ཡོད་དོ། །ཡི་དྭགས་ཀྱི་གནས་ཀྱི་རྩ་བ་རྒྱལ་པོའི་ཁབ་ཀྱི་འཛམ་བུའི་གླིང་གི་འོག་དཔག་ཚད་ལྔ་བརྒྱ་ན་སྟེ། གཞན་ནི་དེ་ལས་འཕྲོས་པའོ། །དེའི་རིགས་དྲན་པ་ཉེར་བཞག་ཏུ་སོ་དྲུག་གསུངས་ཤིང༌། ས་སྡེར་གསུམ་དུ་བཤད་དེ། ཟས་སྐོམ་ལ་ཕྱིའི་སྒྲིབ་པ་ཅན་བཀྲེས་སྐོམ་གྱིས་ཉེན་ཏེ་ཆུ་མིག་སོགས་སུ་རྒྱུག་པ་ན་མཚོན་ཐོགས་པས་བསྲུང་བ་དང་ཆུ་ཡང་རྣག་ཁྲག་ཏུ་སྣང་བའོ། །ནང་གི་སྒྲིབ་པ་ཅན་ནི་བཤེས་སྤྲིང་ལས། ཁ་ཅིག་ཁ་ནི་ཁབ་ཀྱི་མིག་ཙམ་ལ། །ལྟོ་བ་རི་ཡི་གཏོས་ཙམ་བཀྲེས་པས་ཉེན། །མི་གཙང་གི་ནར་བོར་བ་ཅུང་ཟད་ཀྱང༌། །འཚལ་བའི་མཐུ་དང་ལྡན་པ་མ་ལགས་སོ། །ཞེས་པ་ལྟར་རོ། །ཟས་སྐོམ་ཉིད་ལ་སྒྲིབ་པ་ཅན་ནི་མེ་ལྕེའི་ཕྲེང་བ་ཅན་ཟོས་པ་དང་འཐུངས་པ་ཀུན་གྱིས་འཚིག་པའོ། །དུད་འགྲོའི་གནས་ཀྱི་རྩ་བ་རྒྱ་མཚོ་སྟེ། ཁ་འཐོར་འདོད་ལྷ་དང་མི་དང་ལྷན་ཅིག་གོ །དེ་ཡང་བྱིངས་ན་གནས་པ་རྣམས་ཆེ་བས་ཆུང་བ་ཟ། དེས་ཆེ་བའི་ལུས་ཕུག་སྟེ་ཟ་བ་དང༌། ཀླུ་རྣམས་ནི་ཉིན་རེ་བཞིན་བྱེ་ཚན་གྱིས་རུས་པ་ལ་ཐུག་པར་སྲེག་པ་དང༌། མཁའ་ལྡིང་གིས་ཟ་བ་སྟེ་གསུམ་ལ་སྐྱབས་སུ་འགྲོ་བས་དེ་དག་བཟློག་པར་བཤད་དོ། །ཁ་འཐོར་བ་རྣམས་གསོད་པ་དང་བཀོལ་གཅོད་སོགས་ཀྱིས་མནར་རོ། །རྒྱས་པར་གཞན་དུ་བལྟས་ལ་འཁོར་བ་ལ་སྐྱོ་བའི་སེམས་བསྐྱེད་དོ། །གསུམ་པ་ལྷའི་གནས་བཤད་པ་ལ་གཉིས་ཏེ། དངོས་དང༌། ཞར་ལ་དེའི་སེམས་ཅན་གྱི་ཁྱད་པར་རོ། །དང་པོ་ལ་གཉིས་ཏེ། ས་དང་འབྲེལ་བ་དང༌། མ་འབྲེལ་བའོ། །དང་པོ་ལ་གཉིས་ཏེ། རྒྱལ་ཆེན་རིས་བཞི་པ་དང༌། སུམ་ཅུ་རྩ་གསུམ་པའི་གནས་སོ། །དང་པོ་ལ་གཉིས་ཏེ། གཞལ་མེད་ཁང་པ་དང༌། རི་ལ་བརྟེན་པའོ། །དང་པོ་ལ་བཞི་སྟེ། ཉི་ཟླའི་ཐག་ཚད། བྱ་བ་བྱེད་ཚུལ། དེ་ལ་བརྟེན་པའི་དུས་ཚིགས་ཀྱི་ཁྱད་པར། ཟླ་བ་འཕེལ་འགྲིབ་ཀྱི་རྒྱུ་མཚན་ནོ། །དང་པོ་ནི། ཉི་ཟླ་དག་འདི་ནས་ཐག་ཇི་སྲིད་ན་ཡོད་ཅེ་ན། ཉི་ཟླ་ནི་ལྷུན་པོའི་ཕྱེད་གཉའ་ཤིང་འཛིན་གྱི་རྩེ་དང་མཉམ་པ་ནའོ། །ཚད་ཇི་ཙམ་ཞེ་ན། ཐད་ཀར་ཟླ་བ་དཔག་ཚད་ལྔ་བཅུ་དང༌། ཉི་མ་དཔག་ཚད་ལྔ་བཅུ་གཅིག་དང་བཅས་པའོ། །འོག་ཆུ་ཤེལ་དང་མེ་ཤེལ་གྱི་ངོ་བོ། གཉིས་ཀའང་རྔམས་སུ་ཕྱེད་དང་དྲུག་དང་བཅོ་བརྒྱད་ཀྱི་ཆ་ཡོད་པར་གདགས་པ་ལས་བཤད་དོ། །སྐར་མ་ཆེ་བ་ལ་རྒྱང་གྲགས་བཅོ་བརྒྱད་དང་འབྲིང་ལ་བཅུ་གཉིས། ཆུང་བ་ལ་བཞི་ཞེས་ས་སྡེར་བཤད་ལ། འདིར་ཆུང་བ་ལ་རྒྱང་གྲགས་གཅིག་ཏུ་བཤད་དོ། །གཉིས་པ་བྱ་བ་བྱེད་ཚུལ་ལ་གཉིས་ཏེ། སྤྱིའི་དོན་དང༌། ཚིག་གི་དོན་ནོ། །དང་པོ་ནི། འཛམ་བུའི་གླིང་དུ་དབྱར་ཉི་རིང་བའི་མཐར་ཐུག་པའི་ཚེ་ཉིན་ཡུད་ཙམ་བཅོ་བརྒྱད་དང༌། མཚན་ཡུད་ཙམ་བཅུ་གཉིས་ཡོད་དོ། །དེའི་ཚེ་བྱང་སྒྲ་མི་སྙན་དུ་དགུན་ཉི་ཐུང་བ་མཐར་ཐུག་པས་ཉིན་ཡུད་ཙམ་བཅུ་གཉིས། མཚན་ཡུད་ཙམ་བཅོ་བརྒྱད་དོ། །དུས་དེའི་ཚེ་ཤར་དུ་སྟོན་གྱི་དང༌། ནུབ་ཏུ་དཔྱིད་ཀྱི་ཉིན་མཚན་མཉམ་པའི་དུས་ཡིན་པས། ཉིན་མཚན་གཉིས་ཡུད་ཙམ་བཅོ་ལྔ་ཡོད་དོ། །དེའི་ཚེ་སྒྲ་མི་སྙན་གྱི་ཕྱི་དྲོ་ཡུད་ཙམ་དྲུག ལུས་འཕགས་པོའི་སྔ་དྲོ་ཡུད་ཙམ་དྲུག་སྟེ་གཉིས་ཀ་ཉི་མའི་བགྲོད་པ་གཅིག་པའི་ཕྱིར་ཏེ། བྱང་གི་ཉི་མ་ཕྱེད་པ་དང་ཤར་དུ་ཉི་མ་ཤར་བ་གཉིས་དུས་གཅིག བྱང་དུ་ཉི་མ་ནུབ་པ་དང་ཤར་གྱི་ཉི་མ་ཕྱེད་པ་དུས་གཅིག་པའི་ཕྱིར། ཤར་གྱི་ཕྱི་དྲོ་དང་གླིང་འདིའི་སྔ་དྲོ་གཉིས་ལ་ཡུད་ཙམ་དགུ་དགུ་ཡོད་དེ། དེ་གཉིས་ཀྱང་ཉི་མའི་བགྲོད་པ་གཅིག་པའི་ཕྱིར་ཏེ། ཤར་དུ་ཉི་མ་ཕྱེད་པ་དང་ལྷོར་ཉི་མ་ཤར་བ་དུས་གཅིག ཤར་གྱི་ཉི་མ་ནུབ་པ་དང་ལྷོར་ཉི་མ་ཕྱེད་པ་དུས་གཅིག་པའི་ཕྱིར། གླིང་འདིའི་ཕྱི་དྲོ་དང་བ་གླང་སྤྱོད་ཀྱི་སྔ་དྲོ་གཉིས་ལ་ཡུད་ཙམ་དགུ་དགུ་ཡོད་དེ། དེ་གཉིས་ཉི་མའི་བགྲོད་པ་གཅིག་པའི་ཕྱིར། བ་གླང་སྤྱོད་ཀྱི་ཕྱི་དྲོ་དང་སྒྲ་མི་སྙན་གྱི་སྔ་དྲོ་གཉིས་ཀྱང་ཡུད་ཙམ་དྲུག་དྲུག་ཡོད་དེ། དེ་གཉིས་ཀྱང་བགྲོད་པ་གཅིག་པའི་ཕྱིར་ཏེ། གཉིས་ཀའི་རྒྱུ་མཚན་སྔ་མ་བཞིན་ནོ། །འོ་ན་ཤར་ནུབ་གཉིས་སུ་སྔ་དྲོ་དང་ཕྱི་དྲོ་གཉིས་ཡུན་མི་མཉམ་པས་ཉི་མ་ཕྱེད་དུ་གང་གིས་འཇོག་ཅེ་ན། རིང་ཐུང་མཉམ་པའི་སྒོ་ནས་ཉི་མ་ཕྱེད་དུ་མི་བྱའོ་གླིང་གི་དཀྱིལ་དུ་ཉི་མ་ཕྱིན་པ་ན་ཉི་མ་ཕྱེད་དུ་འཇིག་རྟེན་ན་བརྗོད་དོ། །དགུན་གྱི་དུས་སུ་ཉི་མ་བགྲོད་མགྱོགས་པས་ལུས་འཕགས་པོའི་སྔ་དྲོ་ཡུན་ཐུང་བ་ཡིན་ཏེ། བྱང་གི་དགུན་ཉི་མྱུར་བ་དང་བགྲོད་པ་གཅིག་པའི་ཕྱིར། ལུས་འཕགས་པོའི་ཕྱི་དྲོ་ཡུན་རིང་བ་ཡིན་ཏེ། གླིང་འདིའི་དབྱར་ཉིའི་བགྲོད་པ་བུལ་བའི་སྔ་དྲོ་དང་བགྲོད་པ་གཅིག་པའི་ཕྱིར། ཡང་དགུན་ཉི་མགྱོགས་པ་ཡིན་ཏེ། གླིང་གི་མཐའ་བགྲོད་པས། རང་གི་རྟའི་རླུང་ལས་ལྷག་པ། ལྕགས་རིའི་རླུང་དྲག་པོ་བསྣན་པའི་ཕྱིར། དབྱར་ཉི་བུལ་བ་ཡིན་ཏེ། གླིང་གི་དབུས་སུ་རྒྱུ་བས་རང་རྟའི་རླུང་ལས་ལྷག་པ་མེད་པའི་ཕྱིར། དུས་བཞི་ཀར་སྔ་དྲོ་དང་ཕྱི་དྲོ་གཉིས་ཡུན་རིང་ཐུང་མཉམ་དགོས་ན། ནམ་ཕྱེད་ཉི་མ་ནུབ་པ་དང༌། །ཉི་མ་ཕྱེད་དང་འཆར་དུས་གཅིག །ཞེས་པ་ནམ་ཡང་འགྲིག་པར་མི་འགྱུར་རོ། །ཞག་རེ་བཞིན་ཉིན་མཚན་གཉིས་ཐང་གཅིག་རེ་སྐྱེ་འབྲི་བྱེད་ཚུལ་ཡང་སྔར་བཤད་པ་ལས་དཔགས་ཏེ་ཤེས་པར་བྱའོ། །གཉིས་པ་ནི། ལས་ཀྱི་དབང་གིས་བར་སྣང་ལ་འདེགས་པ་དང༌། སྐྱོར་བའི་རླུང་གི་སྟོབས་ཀྱིས་འཁོར་བས་བྱང་དུ་ནམ་ཕྱེད་པ་དང་ཤར་དུ་ཉི་མ་ནུབ་པ་དང༌། ལྷོར་ཉི་མ་ཕྱེད་པ་དང༌། ནུབ་ཏུ་ཉི་མ་འཆར་བ་རྣམས་དུས་གཅིག་གོ །གསུམ་པ་དེ་ལ་བརྟེན་པའི་དུས་ཚིགས་ཀྱི་རྣམ་བཞག་ནི། འདིར་འདོད་ཚུལ་གཉིས་ཡོད་དེ། རྒྱལ་སྲས་དང་མཐུན་པར་བོད་སྔ་མ་རྣམས་འཇིག་རྟེན་པ་རྣམས་ལ་སྟོན་ཐ་ཆུང་དུ་གྲགས་པའི་ཉ་ལ་སྐར་མ་སྨིན་དྲུག་འབྱུང་བའི་ཕྱི་ཉིན། ཚེས་བཅུ་དྲུག་ནས་ལོ་མགོ་འཛིན། དེའི་མར་ངོ་དང་དགུན་ཟླ་ར་བའི་ཡར་ངོ་གཉིས་བསྡོམ་པ་དགུན་ཟླ་བ་དང་པོ་ཡིན་ཞིང༌། མགོའི་ཟླ་བ་ཡང་ཡིན་པས་དེ་དང་རྒྱལ་དང་མཆུ་དང་དབོ་ཡིས་ཉ་བའི་བར་བཞི་པོ་ནི་དགུན་དང༌། དེའི་བཅུ་དྲུག་ནས་བཟུང་ནས་ནག་པ་དང་ས་ག་དང༌། སྣྲོན་དང༌། ཆུ་སྟོད་ཀྱིས་ཉའི་བར་བཞི་ནི་དཔྱིད་དོ། །དེའི་ཚེས་བཅུ་དྲུག་ནས་གྲོ་ཞུན་དང༌། ཁྲུམས་དང༌། ཐ་སྐར་དང༌། སྨིན་དྲུག་གིས་ཉའི་བར་བཞི་ནི་དབྱར་རོ། །དེ་ལྟར་མར་ངོ་སྔོན་དུ་སོང་བའི་དབྱར་ཟླ་གཉིས་པ་ནི་དབྱར་ཟླ་ཐ་ཆུང་གི་མར་ངོ་དང༌། སྟོན་ཟླ་ར་བའི་ཡར་ངོ་བསྡོམས་པའི་ཟླ་བ་དེའི་ཚེས་བཅོ་ལྔ་ལ་སྐར་མ་ཁྲུམས་འབྱུང་བ་དེ་ལ་བཞེད་ཅིང༌། དབྱར་ཉིའི་ལྡོག་མཚམས་ཀྱང་དེ་ཉིད་ལ་འདོད་དོ། །རང་འགྲེལ་དང༌། སློབ་དཔོན་ཕྱོགས་གླང་དང༌། གདགས་པ་ནས་བཤད་པ་རྣམས་མཐུན་པར། འཇིག་རྟེན་པས་སྟོན་ཟླ་འབྲིང་པོ་ཞེས་ཐ་སྙད་བྱེད་པའི་ཆོས་བཅོ་ལྔ་ལ་སྐར་མ་ཐ་སྐར་འབྱུང་བས་ལོ་རྫོགས་པར་བྱས་ནས་དེའི་ཚེས་བཅུ་དྲུག་ནས་སྟོན་ཟླ་ཐ་ཆུང་གི་ཉའི་བར་གྱི་ཟླ་བ་དེ་ནི་དགུན་ཟླ་དང་པོ་ཡིན་ཅིང༌། འདིའི་ཚེས་བཅོ་ལྔ་ལ་སྐར་མ་སྨིན་དྲུག་འབྱུང་བས་སྨིན་དྲུག་གི་ཟླ་བ་ཞེས་ཀྱང་བརྗོད་དོ། །ལོ་མགོ་འཛིན་པའི་ཟླ་བ་འདི་འཇིག་རྟེན་པ་དག་གིས་དབྱུག་པ་ཟླ་བ་ཞེས་པ་དང༌། བསྟན་བཅོས་ལས་སྨིན་དྲུག་ཟླ་བ་ཞེས་ཐ་སྙད་འདོགས་ཚུལ་མི་འདྲ་སྟེ། རིམ་པ་བཞིན་ཡར་ངོ་སྔོན་འགྲོ་དང་མར་ངོ་སྔོན་འགྲོའི་ཁྱད་པར་ཡིན་ནོ། །འདིར་ནི་རང་འགྲེལ་དང་སློབ་དཔོན་ཕྱོགས་གླང་གིས་མཛད་པའི་འགྲེལ་པ་གཉིས་ཀ་ནས་དགུན་ཟླ་བཞི་པ། དགུན་ཟླ་ཐ་ཆུང་དང༌། དབྱར་གྱི་ཟླ་བ་གཉིས་པའང་དབྱར་ཟླ་ཐ་ཆུང་དང༌། དེའི་ཐ་མའི་ཚེས་དགུ་ཡར་ངོའི་ཚེས་དགུ་ལ་བཤད་པས་འདི་ཆེས་འཐད་པ་ཡིན་ནོ། །ཚིག་གི་དོན་ནི། དེ་ཡང་ཉི་མ་ལྷོ་བྱང་དུ་འགྲོ་བའི་བྱེ་བྲག་ལས་ཉི་མ་རིང་ཐུང་དུ་འགྱུར་ཏེ། དབྱར་གྱི་ཟླ་བ་གཉིས་པ་དབྱར་ཟླ་ཐ་ཆུང་གི་ཐ་མ་ཡར་ངོའི་ཚེས་དགུ་ནས་མཚན་མོ་རིང་དུ་འགྱུར་ལ། དགུན་རྣམས་ཀྱི་ཟླ་བ་བཞི་པ། དགུན་ཟླ་ཐ་ཆུང་གི་ཡར་ངོའི་ཚེས་དགུ་ལ་མཚན་མོ་ཐུང་དུ་འགྱུར་རོ། །ཉིན་མོ་དེ་ལས་ལྡོག་སྟེ་རིང་བར་འགྱུར་རོ། །ཐ་མ་ཞེས་པ་ནི་མར་ངོ་སྔ་བས། ཡར་ངོ་ལ་ཐ་མ་ཞེས་བསྟན་ཏོ། །སྔོན་ཆད་གཞན་གྱིས་འབད་ཀྱང་མ་རྟོགས་པའི། །གཞུང་ལུགས་དྲི་མེད་ལེགས་བཤད་འདབ་བརྒྱ་པ། །བློ་གྲོས་ཉིན་མོར་བྱེད་པའི་འོད་ཟེར་གྱིས། །དགོངས་དོན་གེ་སར་སྙིང་པོ་གསལ་བར་བྱས། །ཇི་ཙམ་གྱིས་རིང་དུ་འགྱུར་ཞེ་ན། ཉིན་མོའམ་མཚན་མོ་རིང་བར་འགྱུར་བ་ནི། ཐང་གཅིག་རེ་རེས་སོ། །དེས་ན་མཉམ་པ་ན་ཡུད་ཙམ་བཅོ་ལྔ་དང༌། ཐུང་བ་ན་བཅུ་གཉིས་དང༌། །རིང་བ་ན་བཅོ་བརྒྱད་དུ་འགྱུར་རོ། །དགུན་གྱི་དུས་སུ་གྲང་ཞིང༌། དབྱར་དྲོ་བ་ཅི་ཞེ་ན། ཉི་མའི་འོད་ཀྱི་དངོས་གཞི་གླིང་ལས་འགྱངས་ཏེ་རྒྱ་མཚོར་བབས་པའི་ཚེ་གླིང་གྲང་ལ། ཉི་མའི་འོད་ཀྱི་དངོས་གཞི་གླིང་དུ་བབས་པའི་ཚེ། གླིང་དྲོ་བ་ཡིན་ནོ། །ཞེས་སྨྲ་ལ། དེ་ལྟར་ན་དགུན་ཉི་ལོག་མ་ཐག་ནས་གླིང་ལ་ཐག་ཉེར་སོང་བས་དྲོ་བར་འགྱུར་བར་ཐལ་བ་ལས། གྲང་བར་མངོན་སུམ་གྱིས་གྲུབ་པའི་ཕྱིར། འཐད་པར་མ་མངོན་ཞིང༌། རང་ལུགས་ནི་ཀླུ་རྣམས་ས་འོག་ཏུ་སོང་བ་ན་དྲོད་ས་འོག་ཏུ་འདུས་ཤིང༌། ཀླུ་རྣམས་སྟེང་དུ་ཐོན་པ་ན། དྲོད་ཀྱང་སྟེང་དུ་འོང་བ་ཡིན་ལ་ཀླུའི་མཐུས། རྩི་ཤིང་ནགས་ཚལ་རྒྱས་པའི་དོན་ཡང་དེ་ཡིན་ནོ། །བཞི་པ་ཟླ་བ་འཕེལ་འགྲིབ་ཀྱི་རྒྱུ་མཚན་ནི། ཟླ་བ་མར་ངོ་ལ་མ་རངས་པར་སྣང་བ་ཅི་ཞེ་ན། གདགས་པ་ལས་མར་ངོ་ལ་ཉི་མ་དང་ཇེ་ཉེར་གྱུར་པ་ལས་ཟླ་བ་རང་གི་གྲིབ་མ་བབས་པས་རིམ་གྱིས་མ་རངས་པར་སྣང་ལ་གནམ་སྟོང་གི་ཚེ་ཤིན་ཏུ་ཉེ་བས་རང་གི་གྲིབ་པས་རིལ་པོ་བསྒྲིབས་པས་མི་མཐོང་ལ། ཡར་ངོ་ལ་ཉི་མ་དང་ཇེ་རིང་དུ་གྱུར་པས། གྲིབ་མ་ཇེ་ཆུང་དུ་གྱུར་ནས། ཉའི་ཚེ་ཤིན་ཏུ་རིང་བས་སྒྲིབ་བྱེད་ཀྱི་དྲི་མ་མེད་པའི་ཕྱིར། རངས་པ་མཐོང་བར་བཤད་དོ། །སྒྲོན་མེ་ལ་རིང་བ་དང་ཉེ་བའི་ཀ་བ་བཞིན་ནོ། །ཟླ་བའི་ནང་གི་ནག་པོ་རབ་རིབ་ནི་རྒྱ་མཚོའི་ནང་གི་ཉ་དང་རུས་སྦལ་གྱི་གཟུགས་བརྙན་ཡིན་པར་ས་སྡེ་ལས་བཤད་དོ། །གདགས་པ་ལས་གླིང་གི་གཟུགས་བརྙན་སྣང་བས་དབུས་བརྙོགས་ཤིང༌། རྒྱ་མཚོ་སྣང་བས་མཐའ་དྭངས་པར་བཤད་དོ། །བརྒྱ་བྱིན་གྱིས་རི་བོང་གི་གཟུགས་བྲིས་པའོ་ཞེས་སྐྱེས་རབས་ལས་བཤད། གཉིས་པ་རི་ལ་བརྟེན་པ་ནི། རི་རབ་འདི་ལ་ཆུ་མཚམས་ནས་རྩེག་པའི་བང་རིམ་བཞི་ཡོད་དེ། དེ་བཞིའི་བར་གྱི་ཚད་ནི་དཔག་ཚད་སྟོང་ཕྲག་བཅུ་ཡོད་པས། རི་རབ་ཀྱི་ཕྱེད་མན་ཆད་དུ་ཕྱིན་ཏེ། བང་རིམ་དང་པོ་སྟོང་ཕྲག་བཅུ་དྲུག་དང༌། གཉིས་པ་བརྒྱད་དང༌། གསུམ་པ་བཞི་དང༌། བཞི་པ་གཉིས་རི་རབ་ལས་འཕགས་སོ། །དེ་བཞི་ལ་རིམ་པ་བཞིན། གནོད་སྦྱིན་ལག་ན་གཞོང་ཐོགས་དང༌། ཕྲེང་ཐོགས་དང༌། རྟག་ཏུ་མྱོས་པ་དང༌། བཞི་པ་ལ་རྒྱལ་ཆེན་བཞི་པོ་རང་ཉིད་དང་དེའི་འཁོར་གྱི་ལྷ་རྣམས་གནས་ཏེ། གསེར་གྱི་རི་བདུན་པོ་དག་ལ་ཡང་དེ་རྣམས་ཀྱི་གྲོང་དང་གྲོང་བརྡལ་གནས་སོ། །ཁོར་ཡུག་ལའང་ལག་ན་རྡོ་རྗེ་གོས་སྔོན་ཅན་ཞེས་པ་རྒྱལ་ཆེན་བཞིའི་རིགས་ཀྱི་ལྷ་གནས་པར་ལུང་ཕྲན་ཚེགས་ནས་བཤད་ཅིང༌། གཞན་ཡང་ཉི་ཟླ་སྐར་མ་ཆུ་ཀླུང་རི་ལྗོན་ཤིང་ནགས་ཚལ་ས་བླ་ནམ་མཁའ་རྒྱ་མཚོ་རྣམས་ལའང་དེ་རྣམས་ཀྱི་རིགས་གནས་ཏེ། འགྲེལ་པར། དེ་ཉིད་ཀྱི་ཕྱིར་ལྷའི་རིས་ཐམས་ཅད་པས་ཆེ་བའོ་ཞེས་སོ། །རྒྱལ་ཆེན་བཞི་ནི་གཉའ་ཤིང་འཛིན་གྱི་ངོས་ན་སྟེ། ཤར་ན་ཡུལ་འཁོར་བསྲུང་གི་ཕོ་བྲང་ཡུལ་འཁོར་བསྲུང་དང༌། ལྷོ་ན་འཕགས་སྐྱེས་པོའི་ཕོ་བྲང་འཕགས་པར་སྐྱེས་དང༌། ནུབ་ན་མིག་བཟང་གི་ཕོ་བྲང་སྣ་ཚོགས་གཟུགས་དང༌། བྱང་ན་རྣམ་སྲས་ཀྱི་ཕོ་བྲང་ལྕང་ལོ་ཅན་ཡོད་ལ། ལྕང་ལོ་ཅན་གྱི་གསང་བདག་ལག་ན་རྡོ་རྗེ་བཞུགས་སར་བཀའ་སྩལ་ཏོ། །གཉིས་པ་སུམ་ཅུ་རྩ་གསུམ་པའི་གནས་ནི། ལྷུན་པོའི་རྩེ་ན་སུམ་ཅུ་རྩ་གསུམ་པའི་ལྷ་གནས་སོ། །ལྷུན་པོའི་རྩེ་དེའི་ངོས་རེ་རེ་ལ་དཔག་ཚད་བརྒྱད་ཁྲིའོ། །ཕྱོགས་མཚམས་ན་དཔག་ཚད་ལྔ་བརྒྱའི་ཚད་ཙམ་བརྩེགས་པའི་ཁང་པ་བཞི་ལ་གནོད་སྦྱིན་ལག་ན་རྡོ་རྗེ་གནས་སོ། །རྩེ་དེའི་དབུས་ན་བརྒྱ་བྱིན་གྱི་གྲོང་ཁྱེར་ལྟ་ན་སྡུག་ཅེས་བྱ་བ་ངོས་རེ་ལ་དཔག་ཚད་ཉིས་སྟོང་ལྔ་བརྒྱ་པ་འཕང་དུ་དཔག་ཚད་ཕྱེད་དང་གཉིས་པའི་རྭ་བ་གསེར་གྱི་རང་བཞིན་ཏེ། ས་གཞི་མཚོན་བརྒྱས་བཀྲ་བ་ཤིང་བལ་ལྟར་འཇམ་ཞིང་མཉེན་པ་ཡོད་དོ། །གྲོང་ཁྱེར་གྱི་དབུས་དེ་ན་བརྒྱ་བྱིན་གྱི་ཁང་བཟང་རྣམ་པར་རྒྱལ་བྱེད་ཡོད་དེ། ངོས་རེ་ལ་དཔག་ཚད་ཉིས་བརྒྱ་ལྔ་བཅུ་རེ་ཡོད་པ་གྲོང་ལས་དཔག་ཚད་ཕྱེད་དང་ལྔ་འཕགས་པ་ཡོད་དོ། །གྲོང་དེའི་ཕྱིའི་ངོས་བཞི་ན་ལྷ་རྣམས་ཀྱི་རྩེ་བའི་གནས་སྐྱེད་ཚལ་བཞི་སྟེ། ཤིང་རྟ་སྣ་ཚོགས་ཅན་དང༌། དེར་ཕྱིན་ན་ཤེས་པ་རྩུབ་པར་འགྱུར་བའི་ཚལ་དང༌། ལྷ་ཕོ་མོ་འདྲེས་ཤིང་འདོད་ཡོན་ལ་སྤྱོད་པའི་ཚལ་དང༌། དེར་ཕྱིན་ན་ཡིད་དགའ་བ་སྐྱེད་པའི་ཚལ་དང་བཞིས་བརྒྱན་ནོ། །རྩེ་ཚུལ་ནི། གདགས་པ་ལས། ཤིང་རྟ་སྣ་ཚོགས་ཀྱི་ཚལ་ན་གླང་པོ་ཆེ་ས་བསྲུངས་ཀྱི་བུ་གཟུགས་བཟང་ཞིང་མཛེས་པ་དཀར་བ་ཡན་ལག་བདུན་ལེགས་པར་གནས་པ་མགོ་བོ་དམར་བ་མཆེ་བ་དྲུག་དང་ལྡན་པ། སྲིད་དུ་དཔག་ཚད་གཅིག་དང་ཁོར་ཡུག་ཏུ་བདུན་ཡོད་པ། གླང་གཡོག་བརྒྱད་སྟོང་དང་བཅས་པ་གནས་ཏེ། ལྷ་དེ་རྣམས་སྐྱེད་མོས་ཚལ་དུ་འགྲོ་བ་ན་གླང་པོའི་མགོ་བོ་སུམ་ཅུ་རྩ་གསུམ་དུ་སྤྲུལ་ཞིང༌། མགོ་དབུས་མ་ལ་དབང་པོ་དང༌། གཞན་ལ་ཉེ་དབང་སོ་གཉིས་དང༌། གླང་པོ་གཞན་རྣམས་ལ་འཁོར་རྣམས་བཞོན་ཏེ་ལྷ་རྣམས་གྲོང་ནས་སྐྱེད་མོས་ཚལ་དུ་སྐྱེལ་བར་བྱེད་ལ། དེ་ནས་རྫུ་འཕྲུལ་སྔ་མ་བཏང་སྟེ་ལྷར་སྤྲུལ་ཏེ་འདོད་པ་ལ་ལོངས་སྤྱོད་པར་གསུངས་སོ། །སྐྱེད་ཚལ་དེ་རྣམས་ཀྱི་ཕྱོགས་བཞི་དཔག་ཚད་ཉི་ཤུས་བཅད་པ་ན་ས་གཞི་བཟང་པོ་ཚལ་དང་འགྲན་པ་ལྟ་བུ་ལྷ་རྣམས་རྩེ་བའི་གནས་བཞི་ཡོད་དེ། གྲོང་ཁྱེར་དེའི་ཕྱིའི་བྱང་ཤར་མཚམས་ན་ཤིང་ཡོངས་འདུ་ས་བརྟོལ་ཏེ། དཔག་ཚད་ལྔ་བཅུ་ཐུར་དུ་ཟུག་པ་བརྒྱ་གྱེན་དུ་འཕགས་པ་ཡལ་འདབ་ཀྱིས་ལྔ་བཅུར་ཁྱབ་པ། མེ་ཏོག་རྒྱས་པའི་དྲི་རྫི་ཕྱོགས་སུ་དཔག་ཚད་བརྒྱ་དང༌། དེ་མིན་དུ་ལྔ་བཅུར་ཁྱབ་པའོ། །གདགས་པར། དེའི་དྲུང་ན་ཨར་མོ་ལི་ཀ་ལྟ་བུའི་རྡོ་ལེབ་དཀར་པོ་ཆུ་ཞེང་དུ་དཔག་ཚད་ལྔ་བཅུ་དང་རྔམས་སུ་དྲུག་དང་བཅོ་བརྒྱད་ཀྱི་ཆ་ཡོད་པའི་དབུས་ན་བརྒྱ་བྱིན་གྱི་ཁྲི་དང༌། ཉེ་འཁོར་ན་ཉེ་དབང་རྣམས་ཀྱི་ཁྲི་ཡོད་པར་བཤད་དོ། །ལྷོ་ནུབ་ཀྱི་མཚམས་ན་འདུན་ས་ཆོས་བཟང་སྟེ། དེར་ལྷ་རྣམས་བྱ་བ་དང་བྱ་བ་མིན་པ་བཀའ་གྲོས་སོ། །གཉིས་པ་ས་དང་མ་འབྲེལ་བའི་གནས་ནི། སུམ་ཅུ་རྩ་གསུམ་དེའི་སྟེང་ནས་སྟེང་དུ་འཐབ་བྲལ་སོགས་འདོད་གཟུགས་ཀྱི་ལྷ་རྣམས་ནི་ནམ་མཁའི་གཞལ་མེད་ཁང་ལ་གནས་སོ། །དེ་ཡན་ཆད་ཀུན་འཐབ་བྲལ་ཡིན་ཡང་སྤྱི་མིང་བྱེ་བྲག་ལ་བཏགས་ནས་འོག་མ་ལ་ལྟོས་ཏེ་འཐབ་བྲལ་ཞེས་བྱ་སྟེ། ལྷ་འོག་མ་གཉིས་ནི་ལྷ་མ་ཡིན་དང་འཐབ་པས་སོ། །དེ་ལ་ལྷ་མ་ཡིན་གྱི་གནས་ནི་རི་རབ་ཀྱི་ཆུ་ལ་ནུབ་པའི་ཁོང་སེང་དཔག་ཚད་སུམ་ཁྲི་ན་འོད་ལྡན་གྱི་གྲོང་ན་ལྷ་མ་ཡིན་གྱི་དབང་པོ་སྒྲ་གཅན་དང༌། དེ་ནས་བཞི་སྟོང་ན་སྐར་ཕྲེང་གི་གྲོང་ན་མགུལ་ཕྲེང་དང༌། དེ་ནས་བཞི་སྟོང་ན་བརྟེན་པའི་གྲོང་ན་རབ་གནོན་དང༌། དེ་ནས་བཞི་སྟོང་ན་གསེར་ལྡན་གྱི་གྲོང་ན་འཐག་བཟང་རིས་གནས་ལ། དེ་རྣམས་དམའ་ཤོས་བཟང་ཞིང༌། བཞི་པའི་གསེར་གྱི་ས་གཞི་ལ་སུམ་ཅུ་རྩ་གསུམ་གྱི་ལྟ་ན་སྡུག་ལ་འགྲན་པ་གྲོང་ཁྱེར་གསེར་ལྡན་དང༌། རྣམ་རྒྱལ་གྱི་དོད་གཏམས་པ་ཅན་དང༌། གཞན་ཡང་འདུན་ས་དང༌། ཡངས་འདུ། རྡོ་ལེབ། ཚལ། ས་གཞི་རྣམས་ཀྱང་དེ་དང་འདྲ་བ་ཡོད། གླང་པོ་ཆེ་རབ་བརྟན་གྱི་དོད་བཟོད་དཀའ་དང༌། ས་བསྲུང་གི་བུའི་དོད་ཏི་སི་གངས་བརྩེགས་དང༌། རྟ་སྤྲིན་གྱི་ཤུགས་ཅན་གྱི་དོད་བྲག་འཇིགས་ཞེས་པ་ཡོད་དོ། །ལྷ་དང་འཐབ་པ་ནི་ལྷ་རྣམས་ལྷ་མ་ཡིན་གྱི་བུ་མོ་འདོད། ལྷ་མིན་རྣམས་ལྷའི་བདུད་རྩི་འདོད་པས་ཞེ་འགྲས་ཏེ། ལྷ་མིན་རྣམས་རི་རབ་ཀྱི་ཁོང་སེང་ནས་ཐོན་ཏེ། རིན་པོ་ཆེའི་གོ་གྱོན་མཚོན་ཐོགས་ནས་ཆས་པ་ན་དམག་གི་འབེར་གྱིས་བརྒྱ་བྱིན་གྱི་གདན་འགུལ་བས་དམག་འོང་བར་ཤེས་སོ། །དེ་ནས་ཀླུ་དང་འཐབ་པས་ཕམ་ན་རང་གནས་སུ་བཟློག དཀར་ཕྱོགས་ཀྱི་ཀླུ་ཕམ་ན་ཆུ་མཚམས་ནས་ཐོན་ཏེ་རྫུ་འཕྲུལ་གྱིས་ནམ་མཁའ་ལ་འཕགས་ཏེ་བང་རིམ་གྱི་ལྷ་དང་འཐབ། དེའི་ཚེ་ལྷའི་གནས་གསལ་བའི་ཕྱིར་དུ་སྒྲ་གཅན་གྱིས་ཉི་ཟླ་ལག་པས་སྒྲིབ་ཅིང༌། རྒྱལ་ཕམ་དང་བདེ་སྡུག་འཛམ་བུ་གླིང་པའི་དགེ་སྡིག་ལ་རག་ལས་པས་ལྷ་རྣམས་གླིང་འདི་ཡང་ཡང་ཉིལ་ལོ། །བང་རིམ་གྱི་ལྷ་ཕམ་ན་ལྷའི་དབང་པོའི་དྲུང་དུ་ཕོ་ཉ་རྒྱུགས། དབང་པོས་གཞན་རྣམས་ལ་བསྒོ་བ་ན་དེ་རྣམས་ཀྱིས་རྩུབ་འགྱུར་གྱི་ཚལ་དུ་ཕྱིན་པས་འཐབ་པར་མོས་ཏེ། རི་རབ་ཀྱི་ནུབ་ཀྱི་སྟེང་དུ་འཐབ་པ་ན། ལྷ་མིན་རྣམས་རི་འཕེན་ཞིང་དེ་ཐམས་ཅད་དབང་པོའི་རྡོ་རྗེས་དུམ་བུར་བཅོམ་པ་རྣམས། རོལ་མཚོ་སོགས་སུ་ལྷུང་བས་སྲོག་ཆགས་དུ་མ་ཤི་སྟེ་མཚོ་དམར་པོར་འགྲོའོ། །ལྷའི་མགོ་དང་སྐེད་པ་བཅད་ན་འཆི་ལ་ཡན་ལག་བཅད་ཀྱང་སླར་སྐྱེའོ། །ལྷ་མིན་ནི་མི་བཞིན་དུ་གནད་དུ་ཕོག་ན་འཆི་ལ། དེའང་མཚོ་དང་ས་ལ་ཤི་བ་དང་རྐང་པ་ལག་པ་བཅད་པ་སོགས་ཀྱི་གཟུགས་བརྙན་ཤར་ཏེ་དམག་མ་ལོག་གོང་ནས་མྱ་ངན་བྱེད་པར་ཟད་དོ། །དེ་དག་སུ་ཕམ་པ་དང་རང་གི་གྲོང་དུ་ཞུགས་ནས་སྒོ་བཅད་དེ་གནས་པ་ན་དངངས་སྐྲག་འབྱུང་ཡང་ཕན་ཚུན་མི་ཚུགས་སོ། །གཉིས་པ་ཞར་ལ་དེའི་སེམས་ཅན་གྱི་ཁྱད་པར་ལ་ལྔ་སྟེ། འདོད་པ་སྤྱོད་པ། ལྷའི་བུ་སྐྱེ་བ། འདོད་བདེ་སྐྱེ་བ། བར་ཐག་གི་ཚད། གྲོང་དུ་བགྲོད་ཚུལ་ལོ། །དང་པོ་ནི། ལྷ་དེ་རྣམས་ལས་འདོད་པ་སྤྱོད་པ་ནི་དང་པོ་དྲུག་ཡིན་ནོ། །དྲུག་གིའང་རིས་འོག་མ་གཉིས་ནི་དབང་པོ་གཉིས་སྦྱོར་དང༌། གསུམ་པ་འཁྱུད་པ་དང༌། བཞི་པ་ལག་བཅངས་དང༌། ལྔ་པ་རྒོད་པ་དང༌། དྲུག་པས་བལྟས་པ་ཙམ་གྱིས་འཁྲིག་པའི་བདེ་བ་མྱོང་ངོ༌། །ས་སྡེར། འདོད་ལྷ་གོང་མ་གཉིས་ལ་བག་མ་གཏོང་ལེན་དང་ཆུང་མ་འཆང་བ་མེད་པར་བཤད་ཅིང༌། གདགས་པ་ལས། དྲུག་ཀ་ལ་ཡོད་པར་བཤད་དོ། །དྲུག་ཆར་ལུས་ཀྱི་ཕྱི་ནང་གཙང་ཞིང་རྡུལ་དང་དྲི་མ་དང་རུས་པ་དང་རྩ་རྒྱུས་དང་ནང་ཁྲོལ་དང་བཤང་གཅི་མེད། བཟའ་བ་བདུད་རྩི་སྔོ་སེར་དཀར་དམར་བཞི་འབྱུང་བའི་ལྗོན་ཤིང་དང༌། སྦྲང་རྩི་དང་སྦྲང་ཆང་སོགས་བཏུང་བ་འབྱུང་བའི་དང༌། ཤིང་རྟ་སོགས་བཞོན་པ་འབྱུང་བའི་དང༌། གོས་དང་རྒྱན་འབྱུང་བའི་དང༌། དྲི་དང་བདུག་པ་དང་མེ་ཏོག་གི་ཕྲེང་བ་འབྱུང་བའི་དང༌། བཞད་གད་གླུ་གར་དང་རོལ་མོའི་སྒྲ་འབྱུང་བའི་དང༌། སྣོད་སྤྱད་སོགས་ཡོ་བྱད་སྣ་ཚོགས་འབྱུང་བའི་ལྗོན་ཤིང་ཡོད་དེ། ཅི་བསམས་པ་ཙམ་གྱིས་ལག་ཏུ་འོང་ལ། སྒྲ་མི་སྙན་གྱི་དཔག་བསམ་གྱི་ཤིང་ལས་བསམས་པ་ཙམ་གྱིས་མི་འོང་གི་རང་གིས་ལེན་དགོས་སོ། །དགའ་ལྡན་པ་ནི་ས་བཅུའི་དབང་ཕྱུག་གི་དྲུང་དུ་རྟག་ཏུ་ཐེག་ཆེན་གྱི་ཆོས་ལ་སྤྱོད་པས་ཀྱང་ལྷག་སྟེ། ཐོས་པ་མང་དང་ཆོས་འཛིན་དང༌། །ཤེས་རབ་ལྡན་ཞིང་ཐར་པ་འདོད། །ཡོན་ཏན་རྣམས་ལ་དགའ་བའི་མི། །དེ་རྣམས་དགའ་ལྡན་ཉེ་བར་འགྲོ། །ཞེས་དྲན་པ་ཉེར་བཞག་ཏུ་བཀའ་སྩལ་ཏོ། །གཉིས་པ་ནི། ལྷ་མོ་རྣམས་ལ་མངལ་གྱི་གནས་མེད་ཅེས་ས་སྡེ་ལས་བཤད་པས། ལྷའམ་ལྷ་མོའི་པང་དུ་བྱིས་པ་ལོ་ལྔ་ལོན་པ་ཙམ་ནས་ལོ་བཅུ་ལོན་པ་ལྟ་བུའི་བར་དུ། རིམ་པ་བཞིན་འདོད་ལྷ་དྲུག་པོ་དེ་རྣམས་སུ་སྐྱེ་ལ། གཞན་རྣམས་ལུས་མྱུར་དུ་རྫོགས་པར་འགྱུར་ཞིང༌། བརྒྱ་བྱིན་ལུས་དང་པོ་ནས་རྫོགས་པར་སྐྱེ་བས་སྔ་ཕྱི་བརྗེ་བའང་གཞན་གྱིས་མི་ཚོར་རོ། །གཟུགས་ཅན་གྱི་ལྷ་རྣམས་ལུས་ཀུན་རྫོགས་པ་དང་གོས་དང་བཅས་པ་ཉིད་དུ་སྐྱེ་ཞིང༌། འདོད་ཁམས་པ་ནི་ངོ་ཚ་ཁྲེལ་ཡོད་ཤས་ཆུང་བས་གཅེར་བུར་སྐྱེ་ལ། རྒྱལ་བུ་དོན་གྲུབ་དང་དགེ་སློང་མ་དཀར་མོ་དང༌། དགེ་ཚུལ་མ་སྣ་མ་ནི་གོས་དང་བཅས་པར་རོ། །ལྷ་ཀུན་ཀྱང་སྐད་ནི་སཾ་སྐྲྀ་ཏའི་སྐད་དུའོ། །གསུམ་པ་ནི། འདོད་པ་ཇི་ལྟར་གནས་པ་དང༌། རང་གིས་སྤྲུལ་པ་དང༌། གཞན་གྱིས་སྤྲུལ་པ་ལ་དབང་བྱེད་པའི་སྐྱེ་བ་གསུམ་པོ་ནི་རིམ་པ་བཞིན། འདོད་ལྷ་དང་པོ་བཞི་མིར་བཅས་པ་དང༌། འཕྲུལ་དགའ་བ་དང༌། གཞན་འཕྲུལ་དབང་བྱེད་པའོ། །དབེན་པ་ལས་སྐྱེས་པ་དང་ཏིང་ངེ་འཛིན་ལས་སྐྱེས་པ་དང༌། དགའ་བ་མེད་པའི་བདེ་བ་ཅན་གྱི་སྐྱེ་བ་གསུམ་པོ་ནི་རིམ་པ་བཞིན། བསམ་གཏན་དང་པོ་གསུམ་གྱི་སྐྱེ་བ་སྟེ། དེ་རེ་རེ་ལ་ཡང་ས་གཞན་གསུམ་གསུམ་སྟེ་དགུའོ། །བཞི་པ་ནི། ལྷའི་གནས་དེ་རྣམས་ཀྱི་བར་ཐག་ཇི་ཙམ་ཞེ་ན། གནས་དང་གནས་ནས་འོག་འཛམ་གླིང་གི་ཇི་སྲིད་དེ་དང་དེའི་གོང་དུ་དེ་སྲིད་དེ། འདི་ནས་རྒྱལ་ཆེན་བཞིའི་ཕོ་བྲང་ལ་དཔག་ཚད་བཞི་ཁྲི་དང༌། དེ་ནས་སུམ་ཅུ་རྩ་གསུམ་ལ་བཞི་ཁྲི། དེ་ནས་འཐབ་བྲལ་ལ་བརྒྱད་སོགས་ཏེ། འདི་ནས་ཤིན་ཏུ་མཐོང་བ་ཙམ། དེ་ནས་འོག་མིན་གྱི་བར་ལ་ཡོད་པའོ། །ལྔ་པ་ནི། ཅི་འོག་མས་གོང་མའི་གནས་སུ་ཕྱིན་ནས་མཐོང་ངམ་ཞེ་ན། རང་གིས་ས་གོང་མའི་རྫུ་འཕྲུལ་ཐོབ་པའམ་གཞན་དེ་རྣམས་ཀྱང་ནམ་མཁའ་དང་ནོར་བུའི་རྒྱ་མཚོ་དང༌། པདྨའི་རྒྱ་མཚོ་དང༌། སངས་རྒྱས་ཀྱི་སྐུའི་བྱིན་གྱིས་བརླབས་པ་ལ་སོགས་པ་གནས་ཤིང༌། དབྱིབས་ནི་ཟླུམ་པོ་དང་ཟུར་གསུམ་དང་གྲུ་བཞི་དང༌། ནོར་བུ་དང་སྨན་དང་འཁོར་ལོ་ལྟ་བུ་དང༌། ཟུར་བརྒྱད་པ་དང༌། སངས་རྒྱས་ཀྱི་མཚན་ལྟ་བུ་ལ་སོགས་པ་ཡོད་དེ། ཕལ་པོ་ཆེར་ལྟའོ། །གོང་མའི་ལྷ་ལ་བརྟེན་ཏེ་དེས་ཁྲིད་ན་མཐོང་གི་དེ་མ་གཏོགས་པ་དེ་དག་གི་ཁམས་དང་ས་གོང་མར་འགྲོ་བ་དང་མཐོང་བ་མེད་དོ། །དེ་རྣམས་ཀྱི་ཚད་ནི་འཐབ་བྲལ་སོགས་བཞི་རི་རབ་ཀྱི་སྟེང་ཙམ་ཞེས་དང༌། གཞན་གོང་མ་གཉིས་འགྱུར་དུ་སྨྲའོ། །བསམ་གཏན་དང་པོ་གླིང་བཞི་ཙམ་དང༌། གཉིས་པ་སྟོང་སྤྱི་ཕུད་ཙམ་དང༌། གསུམ་པ་སྟོང་གཉིས་པ་ཙམ་དང༌། བཞི་པ་སྟོང་གསུམ་དུ་སྨྲ་ལ། གཞན་ནི་འོག་མ་གསུམ་སྟོང་སྤྱི་ཕུད་སོགས་གསུམ་ཙམ་དང༌། བཞི་པ་ཚད་མེད་པར་སྨྲའོ། །གསུམ་པ་སྟོང་གསུམ་ངོས་བཟུང་བ་ནི། གླིང་བཞི་པ་དང་ཉི་ཟླ་དང་རི་རབ་དང་ནི་འདོད་ལྷ་དང་ཚངས་པའི་འཇིག་རྟེན་བསམ་གཏན་དང་པོ་མན་ཆད་སྟོང་ལ་ནི་སྤྱི་ཕུད་ཅེས་པར་འདོད་དེ། སྟོང་ཆེན་པོའི་འཇིག་རྟེན་གྱི་སྤྱི་ཕུད་ལྟ་བུ་ཡིན་པས་སོ། །སྤྱི་ཕུད་དེ་སྟོང་ལ་ནི་སྟོང་གཉིས་པ་བར་མའི་འཇིག་རྟེན་གྱི་ཁམས་ཞེས་པ་ཡིན་ནོ། །སྟོང་གཉིས་པ་དེ་སྟོང་ལ་ནི་སྟོང་གསུམ་གྱི་འཇིག་རྟེན་ཞེས་བྱ་སྟེ། གླིང་བཞི་བྱེ་བ་ཕྲག་བརྒྱའོ། །དེ་གསུམ་ཀ་ལའང་ལྕགས་རི་རེ་དབང་བྱེད་པའི་ཚངས་པ་རེ་བཤད་དོ། །བཞི་པ་དེ་དག་འབྱུང་འཇིག་མཉམ་པར་བསྟན་པ་ནི། དེ་ཐམས་ཅད་མེ་སོགས་ཀྱིས་མཉམ་དུ་འཇིག་ཅིང་འབྱུང་བ་སྟེ་ཆགས་པའོ། །དཔལ་དུས་ཀྱི་འཁོར་ལོར་འཇིག་རྟེན་གྱི་ཁམས་དཔག་ཚད་འབུམ་ཕྲག་བཞི་ལ་སོགས་འདི་དང་མི་འདྲ་བའི་བཀོད་པ་དང༌། ཕལ་པོ་ཆེར་སྟོང་གསུམ་ན་འོག་མིན་བྱེ་བ་ཕྲག་བརྒྱ་བཀའ་སྩལ་བ་ནི། སེམས་ཅན་སོ་སོའི་སྣང་བ་བཞིན་བཀོད་པ་སྟེ། དེ་ཉིད་ལས། ཞིང་རྣམས་འདི་ཀུན་སེམས་ཀྱིས་རྣམ་པར་བཏགས། །ཞེས་སོ། །དག་པ་དང་མ་དག་པའི་ཞིང་རབ་འབྱམས་ཕྱོགས་བཅུ་ན་ཡོད་ལ། གླིང་བཞིའམ་བདེ་བ་ཅན་ན་མེད་ཅིང་སངས་རྒྱས་རི་རབ་འོད་ཀྱི་ཞིང་ན་འཛམ་བུ་གླིང་ལ་དཔག་ཚད་བྱེ་བ་དང༌། གཞན་གསུམ་ལ་བརྒྱད་ཁྲི་རེ་དང༌། སྣང་བའི་ཁྱད་པར་ཡང་སངས་རྒྱས་ཀུན་ཏུ་བཟང་པོའི་ཞིང་ན་སྟོང་གསུམ་རིལ་པོ་ཉི་ཟླ་ཟུང་གཅིག་གིས་གསལ་བ་སོགས་བཤད་དེ། རྒྱ་ཆེར་གཞན་དུ་བལྟའོ། །གཉིས་པ་ཞར་ལ་སེམས་ཅན་གྱི་ཚད་བཤད་པ་ལ་གཉིས་ཏེ། ལུས་ཚད་དང༌། ཚེ་ཚད་དོ། །དང་པོ་ལ་གསུམ་སྟེ། མིའི་ལུས་ཚད། འདོད་ལྷའི་ལུས་ཚད། གཟུགས་ཁམས་པའི་ལུས་ཚད་དོ། །དང་པོ་ནི། འཛམ་བུ་གླིང་པ་ཚེ་ལོ་བརྒྱ་པ་རྣམས་ཀྱི་ལུས་ཚད་ནི། ཞེང་དུ་ཁྲུ་བཞི་པ་དང༌། མཐོ་དམན་ཕྱེད་དང་བཞི་སྟེ། ཁྲུ་ནི་ཆོས་མངོན་པ་བཤད་པའི་དུས་ཀྱི་ཁྲུས་བརྩི་བར་རྒྱལ་པོ་སྲས་སུ་བཤད་ཀྱང༌། འོག་ནས་བཤད་པའི་འགྱུར་བསྒྲེས་པའི་ཁྲུའོ། །བསྐལ་པ་དང་པོའི་མི་འགའ་ཞིག་བརྒྱ་བྱིན་དང་མཉམ་སྟེ་ཡབ་སྲས་མཇལ་བའི་མདོར་སྤྱི་བོ་སྐྱེས་དང་བརྒྱ་བྱིན་གཉིས་མིག་འབྱེད་འཛུམ་ཡོད་མེད་མ་གཏོགས་པ་ཁྱད་མེད་པར་གསུངས་པས་སོ། །ཤར་ལུས་འཕགས་པོ་ཁྲུ་བརྒྱད་དང༌། བ་ལང་སྤྱོད་པ་བཅུ་དྲུག་དང༌། བྱང་སྒྲ་མི་སྙན་པ་སོ་གཉིས་ཞེས་བྱ་བ་ཕྱི་མ་གཉིས་འགྱུར་དུ་བསྐྱེད་དོ། །གཉིས་པ་ནི། འདོད་དང་ལྡན་པ་ལྷའི་ལུས་ཚད་རྒྱལ་ཆེན་བཞི་པ་རྒྱང་གྲགས་ཀྱི་བཞི་ཆ་གཅིག་ནས། དགའ་ལྡན་པ་གཅིག་དང༌། འཕྲུལ་དགའ་བ་གཅིག་དང་བཞི་ཆ། གཞན་འཕྲུལ་དབང་བྱེད་པ་རྒྱང་གྲགས་ཕྱེད་དང་གཉིས་ཀྱི་བར་དུ་རྒྱང་གྲགས་བཞི་ཆ་རེ་བསྐྱེད་དོ། །ལྷ་མ་ཡིན་གྱི་ལུས་ཚད་དང༌། ཚེ་ཚད་ལོངས་སྤྱོད་རྣམས་སུམ་ཅུ་རྩ་གསུམ་པ་དང་འདྲ་བར་ས་སྡེ་ལས་གསུངས་སོ། །གསུམ་པ་ནི། གཟུགས་ཅན་དང་པོ་ཚངས་རིས་པ་དཔག་ཚད་ཕྱེད་དང༌། དེ་གོང་མ་གཉིས་དཔག་ཚད་ཕྱེད་ཕྱེད་བསྐྱེད་དེ། འོད་ཆུང་བའི་གཉིས་སོ། །དེའི་ལྟག་ཚད་མེད་འོད་ཡན་ཆད་ཀྱི་ལུས་ནི་འོག་མ་འོག་མ་ལས་ཉིས་འགྱུར་གྱི་ཆེ་སྟེ། དགེ་རྒྱས་པའི་དྲུག་ཅུ་རེ་བཞི་དང༌། དེ་ཉིས་འགྱུར་ལས་སྤྲིན་མེད་པའི་དཔག་ཚད་གསུམ་དོར་བས་བརྒྱ་ཉེར་ལྔ་ནས་འོག་མིན་པའི་ཁྲི་དྲུག་སྟོང་གི་བར་རོ། །ཚེ་ཚད་ལ་གཉིས་ཏེ། དངོས་དང༌། བར་དུ་འཆི་བ་ཡོད་མེད་དཔྱད་པའོ། །དང་པོ་ལ་གཉིས་ཏེ། བདེ་འགྲོའི་ཚེ་ཚད་དང༌། ངན་འགྲོའི་ཚེ་ཚད་དོ། །དང་པོ་ནི། སྤྱིར་བོང་ཚོད་ཐ་དད་པ་རྣམས་ཀྱི་ཚེ་ཚད་ཀྱང་ཐ་དད་དམ་ཞེ་ན། སྒྲ་མི་སྙན་ན་ཚེ་ལོ་སྟོང་སྟེ། ནུབ་དང་ཤར་གཉིས་ན་སྔ་མའི་ཕྱེད་ཕྱེད་སྤངས་པ་རིམ་པ་བཞིན་ལྔ་བརྒྱ་དང༌། ཉིས་བརྒྱ་ལྔ་བཅུའོ། །འཛམ་གླིང་འདི་ན་མ་ངེས་ཏེ། འགྲིབ་པའི་ཐ་མར་ལོ་བཅུ་དང་བསྐལ་པ་དང་པོའི་མིའི་ཚེ་ལོ་དཔག་ཏུ་མེད་དོ། །མི་ལོ་ལྔ་བཅུ་ལ་འདོད་ལྷ་འོག་མ་རྒྱལ་ཆེན་བཞི་པའི་ཉིན་ཞག་གཅིག་སྟེ། ཉིན་ཞག་དེ་ཡིས་བགྲངས་པའི་ཞག་སུམ་ཅུ་ཟླ་བ་དང་དེ་བཅུ་གཉིས་ལ་ལོར་བྱས་པའི་རྒྱལ་ཆེན་བཞི་པའི་ཚེ་ལོ་ལྔ་བརྒྱའོ། །འདོད་ལྷ་གོང་མ་ལྔའི་ཞག་དང་ལོའི་ཚད་ཉིས་འགྱུར་ཉིས་འགྱུར་ཏེ། མི་ལོ་བརྒྱ་དང་ཉིས་བརྒྱ་དང་བཞི་བརྒྱ་དང་བརྒྱད་བརྒྱ་དང་སྟོང་དྲུག་བརྒྱ་ལ་རིམ་པ་བཞིན་དུ་ཉིན་ཞག་སྟེ། དེ་ཡིས་བགྲངས་པའི་ལོ་སྟོང་དང་ཉིས་སྟོང་དང༌། བཞི་སྟོང་དང༌། བརྒྱད་སྟོང་དང༌། ཁྲི་དྲུག་སྟོང་ཚེ་ཚད་དོ། །གཉའ་ཤིང་འཛིན་ཡན་ཆད་ན་ཉི་ཟླ་མེད་ཀྱང་ཉིན་མཚན་ནི་ཀུ་མུད་ཏ་དང་པདྨ་ཁ་ཕྱེ་ཙུམ་དང༌། བྱ་སྐད་འབྱིན་མི་འབྱིན་དང༌། གཉིད་སངས་ཕྲོ་ལས་ཏེ་སྣང་བའི་བྱ་བ་ནི་རང་གི་འོད་ཀྱིས་སོ། །གཟུགས་ཅན་རྣམས་ན་ཉིན་མཚན་མེད་པས། ཚེའི་ཚད་ནི་ལོས་མི་བགྲང་གི་རང་གི་ལུས་གཞལ་བའི་དཔག་ཚད་ཀྱི་གྲངས་ཀྱི་བསྐལ་པ་ཡིས་ཏེ། གཟུགས་ཅན་དང་པོ་བསྐལ་པ་ཕྱེད། །དེ་ཡི་གོང་མ་ཕྱེད་ཕྱེད་བསྐྱེད། །འོད་ཆུང་རྣམས་ཀྱི་ལྟག་ཡན་ཆད། །ཚེ་ནི་ཉིས་འགྱུར་ཉིས་འགྱུར་ཏེ། །སྤྲིན་མེད་བསྐལ་པ་གསུམ་དོར་རོ། །ཞེས་པའོ། །གཟུགས་མེད་དང་པོའི་ཚེ་ཚད་བསྐལ་པ་སྟོང་ཕྲག་ཉི་ཤུ་སྟེ། གོང་མ་གསུམ་ཉི་ཤུ་རེས་ལྷག་གོ །ཚེ་ཚད་ཀྱི་བསྐལ་པ་དེ་གང་ཞེ་ན། འོད་ཆུང་ནས་བཟུང་བསྐལ་ཆེན་ཏེ། དེའི་འོག་མ་ཚངས་ཆེན་གསུམ་གྱིས་ནི་བསྐལ་ཆེན་ཕྱེད་ལ་བསྐལ་པར་བྱས་ལ་ཡིན་ནོ། །གཉིས་པ་ནི། ཡང་སོས་སོགས་དྲུག་གིས་རིམ་པ་བཞིན་འདོད་ལྷའི་ཚེ་དང་ཉིན་ཞག་མཉམ་ལ། རང་གིས་ཉིན་ཞག་དེ་ཡིས་བགྲངས་པའི་དྲུག་པོ་དེ་རྣམས་ཀྱི་ཚེ་འདོད་ལྷ་དྲུག་དང་ལོ་གྲངས་འདྲ་བ་ཡིན་ཏེ། རྒྱལ་ཆེན་བཞིའི་ཚེ་ཚད་ནི་ཡང་སོས་པའི་ཞག་གཅིག་སྟེ། དེ་སུམ་ཅུ་ལ་ཟླ་བ། དེ་བཅུ་གཉིས་ལ་ལོར་བྱས་པའི་ལྔ་བརྒྱ་ཐུབ་པ་སོགས་སོ། །རབ་ཏུ་ཚ་བ་ནི་བར་བསྐལ་ཕྱེད་དང༌། མནར་མེད་ནི་བར་བསྐལ་གཅིག་གོ །དུད་འགྲོ་རྣམས་ཚེ་མཆོག་ཏུ་རིང་བ་ནི་བར་བསྐལ་གཅིག་སྟེ། དགེ་སློང་དག་ཀླུ་བརྒྱད་པོ་ནི་ཀླུ་ཆེན་པོ་སྟེ། བསྐལ་པར་གནས་པས་ས་འཛིན་པའོ། །ཞེས་སོ། །ཐུང་བ་ཡུད་ཙམ་པར་ཉི་མའི་སྙིང་པོར་བཤད་དོ། །ཡི་དྭགས་རྣམས་ཀྱི་ཚེ་ནི་མིའི་ཟླ་བ་གཅིག་ལ་ཉིན་ཞག་ཏུ་བྱས་པའི་ལོ་ལྔ་བརྒྱ་སྟེ། མི་ལོ་ཁྲི་ལྔ་སྟོང་ངོ༌། །མདོ་ཉི་མའི་སྙིང་པོར། ཐུང་བས་སྟོང་ཕྲག་གཅིག་དང་རིང་བས་སྟོང་ཕྲག་བརྒྱད་ཅུ་ཐུབ་པར་བཀའ་སྩལ་ཏོ། །མ་ག་དྷའི་ཁལ་བརྒྱད་ཅུ་ཤོང་བའི་ཏིལ་གྱི་སྦྱང་བ་ཏིལ་གྱིས་ཕྱུར་བུར་བཀང་བའི་ནས་ནས་ལོ་བརྒྱ་བརྒྱ་ཞིང་ཏིལ་ཉག་གཅིག་ཕྱུང་བས་ཟད་པར་གྱུར་པ་ནི་ཆུ་བུར་ཅན་གྱི་ཚེ་སྟེ། གྲང་དམྱལ་གཞན་བདུན་གྱི་ཚེ་ནི་ཉི་ཤུ་ཉི་ཤུར་བསྒྱུར་རོ། །ས་སྡེར་ནི། ཚ་དམྱལ་རྣམས་ཀྱི་ཕྱེད་ཕྱེད་དུ་བཤད་དོ། །གཉིས་པ་ནི། ཚེ་ཚད་མ་རྫོགས་པར་འཆི་བ་ཡོད་དམ་མེད་ཅེ་ན། སྒྲ་མི་སྙན་པ་ནི་ཚེ་ཚད་ཐུབ་པར་ངེས་ལ། དེ་མ་གཏོགས་པ་ལ་བར་སྐབས་སུ་འཆི་བ་ཡོད་དོ། །བར་སྐབས་སུ་མི་འཆི་བ་གཞན་ཡང་སྲིད་པ་ཐ་མ་པ་སོགས་སོ། །གསུམ་པ་དེ་དག་འཇལ་བྱེད་ཀྱི་ཚད་ལ་གཉིས་ཏེ། རྩོམ་གཞི་དང༌། བརྩམས་པ་འཇལ་བྱེད་དོ། །དང་པོ་ནི། གཟུགས་ཀྱི་ཆུང་མཐའ་རྡུལ་ཕྲ་རབ་དང༌། མིང་གི་མཐའ་ཡི་གེ་དང༌། དུས་ཀྱི་ཐུང་མཐའ་སྐད་ཅིག་སྟེ། དེའི་ཚད་ནི་རྣམ་འགྲེལ་དུ། རྡུལ་ཅིག་བསྒྲེས་རྡུལ་ཆུང་བ་ཡིས། །མཐར་ཐུག་དུས་ནི་སྐད་ཅིག་འདོད། །ཅེས་པ་ལྟར་རོ། །ཆོས་མངོན་པ་བ་རྣམས་ནི། སྐྱེས་བུ་སྟོབས་ལྡན་གྱིས་སེ་གོལ་གཏོགས་པ་ཙམ་ལ་སྐད་ཅིག་དྲུག་ཅུ་རྩ་ལྔ་འདའོ། །ཞེས་སྨྲའོ། །གཉིས་པ་ལ་གཉིས་ཏེ། ཡུལ་གྱི་ཚད་དང༌། དུས་ཀྱི་ཚད་དོ། །དང་པོ་ནི། ཕྲ་རབ་རྡུལ་དང་རྡུལ་ཕྲན་དང་དེ་བཞིན་དུ་ལྕགས་རྡུལ་དང༌། ཆུ་རྡུལ་དང༌། རི་བོང་རྡུལ་དང༌། ལུག་རྡུལ་དང༌། གླང་རྡུལ་དང༌། ཉི་ཟེར་རྡུལ་དང༌། སྲོ་མ་དང༌། དེ་ལས་བྱུང་བ་ཤིག་དང༌། དེ་བཞིན་དུ་ནས་དང༌། སོར་ཚིགས་རྣམས་ནི་གོང་ནས་གོང་དུ་བདུན་དུ་བསྒྱུར་བར་ཤེས་པར་བྱའོ། །སོར་མོ་ཉི་ཤུ་རྩ་བཞི་ལ་ཁྲུ་དང༌། ཁྲུ་བཞི་ལ་གཞུ་སྟེ་འདོམ་གང་ངོ༌། །གཞུ་དེ་ལྔ་བརྒྱ་རྣམས་ལ་རྒྱང་གྲགས་ཏེ། དེ་ཙམ་གྲོང་ནས་འཕགས་པ་ལ་དགོན་པར་འདོད་ལ། རྒྱང་གྲགས་དེ་བརྒྱད་ལ་དཔག་ཚད་ཅེས་བྱའོ། །ལུང་རྣམ་འབྱེད་དུ་དྲུག་འགྱུར་དང༌། གདགས་པར་རྡུལ་ཕྲན་བདུན་ལ་ཉི་ཟེར་རྡུལ་དུ་བཤད་ལ། དུས་འཁོར་དུ་གཞུ་ཉིས་སྟོང་ལ་རྒྱང་གྲགས་དང༌། དེ་བཞི་ལ་དཔག་ཚད་དུ་གསུངས་སོ། །གཉིས་པ་ལ་གཉིས་ཏེ། ལོའི་ཚད་དང༌། བསྐལ་པའི་ཚད་དོ། །དང་པོ་ནི། དུས་མཐའི་སྐད་ཅིག་མ་བརྒྱ་ཉི་ཤུ་ལ་དེའི་སྐད་ཅིག་གོ །དེའི་སྐད་ཅིག་དྲུག་ཅུ་ཐང་ཅིག་གོ །ཐང་ཅིག་སུམ་ཅུ་ཡུད་ཙམ་སྟེ། དེ་དང་ཉིན་ཞག་དང་ཟླ་བ་གསུམ་གོང་ནས་གོང་དུ་སུམ་ཅུར་འགྱུར་རོ། །ཞག་མི་ཐུབ་པ་དྲུག་དང་བཅས་པ་ཟླ་བ་བཅུ་གཉིས་ལ་ལོ་གཅིག་སྟེ། ཞག་མི་ཐུབ་ནི། དགུན་དང་དཔྱིད་དང་དབྱར་རྣམས་ཀྱི། །ཟླ་བ་ཕྱེད་དང་གཉིས་འདས་ནས། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་དེར། །ཞེས་པ་ལྟར་ཏེ། རྒྱལ་དང་སྦོ་དང་ས་ག་དང༌། ཆུ་སྟོད་དང་ཁྲུམས་དང༌། སྨིན་དྲུག་ཅན་རྣམས་ཀྱི་གནམ་སྟོང་དོར་བའོ། །དེ་ཡང་དབྱར་དགུན་གྱི་འབྲིང་ཐུབ་ཅིང༌། སྟོན་དཔྱིད་འབྲིང་མི་ཐུབ་ཅེས་རྒྱ་ཆེར་འགྲེལ་དུ་གསུངས་པ་ནི། འདུལ་བའི་ལུགས་ཀྱིས་སྟོན་ཟླ་ཐ་ཆུང་ནས་ལོ་མགོ་འཛིན་པའི་དབང་དུ་བྱས་པའོ། །གཉིས་པ་ལ་གསུམ་སྟེ། བསྐལ་པ་ངོས་བཟུང༌། ཡ་ཐོག་རིང་པོའི་འགྲིབ་ཚུལ། འཇིག་པའི་བསྐལ་པའི་ཚུལ་ལོ། །དང་པོ་ལ་བསྟན་བཤད་གཉིས་ཀྱི་དང་པོ་ནི། བསྐལ་པ་རྣམ་པ་མང་པོ་བར་བསྐལ་དང༌། འཇིག་པ་དང་ཆགས་པ་དང༌། གནས་པའི་བསྐལ་པ་དང༌། བསྐལ་ཆེན་སོགས་བཤད་དོ། །གཉིས་པ་ལ་གསུམ་སྟེ། འཇིག་ཆགས་ཀྱི་བསྐལ་པ་བཤད། གནས་པའི་བསྐལ་པ་བཤད། བསྐལ་ཆེན་བཤད་པའོ། །དང་པོ་ནི། འཇིག་པའི་བསྐལ་པ་ནི་དམྱལ་བའི་སྲིད་པ་གསར་སྐྱེ་མེད་པ་ནས། སྣོད་ཟད་པའི་བར་ཏེ། དམྱལ་བ་ལས་ཟད་པ་རྣམས་འགྲོ་བ་གཞན་དུ་སྐྱེ་ལ་མ་ཟད་པ་རྣམས་ཞིང་གཞན་གྱི་དམྱལ་བར་སྐྱེ་བས་འདིར་གཅིག་ཀྱང་མེད་པ་དང༌། ཡི་དྭགས་དང་དུད་འགྲོའང་དེ་དང་འདྲ་ལ། དེའང་རྒྱ་མཚོའི་དུད་འགྲོ་སྔར་འཇིག་ཅིང༌། མི་ཡུལ་བ་རྣམས་མི་དང་ལྷན་ཅིག་ཏུའོ། །གླིང་གསུམ་གྱི་མི་གང་རུང་རེས་ཆོས་ཉིད་ཀྱིས་བསམ་གཏན་དང་པོ་ཏིང་ངེ་འཛིན་བསྐྱེད་དེ། གཞན་རྣམས་དེའི་རྗེས་སུ་སློབ་ཅིང་ཤི་ནས་ཚངས་པའི་འཇིག་རྟེན་དུ་སྐྱེའོ། །སྒྲ་མི་སྙན་པ་ལ་ཆགས་བྲལ་གྱི་ལམ་མེད་པས། འདོད་ལྷར་སྐྱེས་ཏེ། འདོད་ལྷ་རྣམས་བསམ་གཏན་དང་པོ་ཐོབ་ནས་ཚངས་པའི་འཇིག་རྟེན་དུ་སྐྱེའོ། །དེ་རྣམས་ཀྱིས་བསམ་གཏན་གཉིས་པའི་ཏིང་ངེ་འཛིན་ཆོས་ཉིད་ཀྱིས་ཐོབ་པས་འོད་གསལ་དུ་སྐྱེའོ། །ཆུས་འཇིག་པ་ན་བསམ་གཏན་གསུམ་པ་དང༌། རླུང་གིས་འཇིག་པ་ན་བཞི་པ་ཐོབ་སྟེ་དེ་དག་ཏུ་སྐྱེ། དེ་ལྟར་སེམས་ཅན་འཇིག་པ་ལ་བར་བསྐལ་བཅུ་དགུའོ། །དེ་ནས་ཆར་བ་མ་བབས་པས་རྩི་ཤིང་རྣམས་ཉི་མ་འདི་ཉིད་ཀྱིས་བསྲེགས། ཉི་མ་གཞན་རྣམས་འདི་བས་བཞི་འགྱུར་རེས་ཚ་ཞིང༌། གཉིས་པས་ལྟེང་ཀ་ཆེ་ཆུང་དང༌། གསུམ་པས་ཆུ་བོ་ཆེ་ཆུང་དང༌། བཞི་པས་མཚོ་མ་དྲོས་པ་དང༌། ལྔ་པ་དང་དྲུག་པས་ཕྱོགས་ཀྱི་རྒྱ་མཚོ་ཆེན་པོ་སྐེམས་ལ། དྲུག་པ་དང་བདུན་པས་རི་རབ་དང་ས་ཆེན་པོ་བསྲེགས་ཏེ། དེ་ལས་མེ་ལྕེ་རླུང་གིས་ཁྱེར་ནས་ཚངས་པའི་འཇིག་རྟེན་སྲེག་ལ། དེའི་ཚེ་འོད་གསལ་བའི་ལྷ་གཞོན་པ་རྣམས་མེ་དེ་བྱུང་གི་དོགས་ནས་སྐྲག་པ་ལ། ལྷ་རྒན་པོ་ཆགས་འཇིག་ཤེས་པ་རྣམས་ཀྱིས། གྲོགས་པོ་དག་མ་འཇིགས་ཤིག མེ་ལྕེ་འདིས་སྔོན་ཡང་ཚངས་པའི་འཇིག་རྟེན་བསྲེགས་ནས་དེ་ཉིད་དུ་མེད་པར་གྱུར་ཏོ། །ཞེས་དབུགས་འབྱིན་ཏོ། །ཆུས་འཇིག་ན་བསམ་གཏན་གཉིས་པ་ཉིད་ལས་བྱུང་བའི་ཆུས་སྣོད་ཀྱི་འཇིག་རྟེན་ལན་ཚྭ་བཞིན་དུ་བཞུས་ནས་ཆུ་དེ་ཡང་མེད་པར་འགྱུར་རོ། །རླུང་གིས་འཇིག་ན་བསམ་གཏན་གསུམ་པ་ལས་བྱུང་བའི་རླུང་གིས་རླུང་ནད་ཀྱི་ལུས་སྐམས་པ་ལྟར་སྣོད་མེད་པར་བྱེད་ཅིང་རླུང་དེ་ཡང་མེད་པར་འགྱུར་རོ། །དེ་ལྟར་སྣོད་འཇིག་པ་ལ་བར་བསྐལ་གཅིག་གོ །ཆགས་པའི་བསྐལ་པ་ནི་དང་པོ་རླུང་ཆགས་པ་ནས། དམྱལ་བའི་སྲིད་པ་ཆགས་པའི་བར་བསྐལ་ཉི་ཤུའོ། །དེ་ཡང་རླུང་གིས་ཞིག་རྗེས་ལ་བསམ་གཏན་གསུམ་པ་ནས་དང༌། ཆུས་ཞིག་རྗེས་ལ་གཉིས་པ་ནས་དང༌། མེས་ཞིག་རྗེས་སུ་དང་པོ་ནས་འདོད་ལྷའི་གཞལ་ཡས་ཁང་རྣམས་ཆགས་སོ། །དེ་ནས་རླུང་འཇམ་པོ་ལངས་པ་རླུང་གི་དཀྱིལ་འཁོར་དུ་འགྱུར་ཞིང་དེ་རྗེས་སྤྲིན་གསེར་གྱི་སྙིང་པོ་ཅན་ལས་ཆར་ཆེན་པོ་བབ་པས་ཆུའི་དཀྱིལ་འཁོར་དང་དེའི་སྟེང་རླུང་གིས་འཐས་པར་བྱས་པས་གསེར་གྱི་དཀྱིལ་འཁོར་དང་དེའི་སྟེང་ཁམས་སྣ་ཚོགས་པ་ཅན་གྱི་སྤྲིན་ལས་ཆར་བབ་པས་རྒྱ་མཚོ་ཆགས་ཤིང༌། དེའི་ཁམས་རབ་རྣམས་རླུང་གིས་བསྲུབས་པས་རི་རབ་དང༌། འབྲིང་རྣམས་བསྲུབས་པས་གསེར་གྱི་རི་བདུན་དང༌། ཐ་མ་རྣམས་ལས་གླིང་བཅུ་གཉིས་དང་ཁོར་ཡུག་གི་རི་རྣམས་འབྱུང་སྟེ། སྣོད་ཆགས་པ་ལ་བར་བསྐལ་གཅིག་གོ །དེ་རྣམས་ཀྱང་བྱེ་བྲག་པ་འཇིག་རྟེན་འཇིག་དུས་རྡུལ་ཕྲ་རབ་རྟག་པ་མ་ཞིག་པ་ལས་སྐྱེ་བར་འདོད་པ་འགྲེལ་པར་བཀག་གོ །མདོ་སྡེ་པའི་མདོར། འཇིག་རྟེན་གྱི་ཁམས་གཞན་ནས་ས་བོན་ཁྱེར་ཏེ་འོང་ངོ་ཞེས་འབྱུང་མོད། ལས་ལས་བྱུང་བའི་རླུང་ཁྱད་པར་ཅན་ལས་འབྱུང་ངོ༌། །ཞེས་གནས་སོ། །སེམས་ཅན་ཆགས་པ་ནི་བསྐལ་པ་འདི་ལ་འོད་གསལ་གྱི་ལྷ་ཚེ་དང་ལས་ཟད་པ་ཞིག་ཚངས་པ་ཆེན་པོར་སྐྱེས་པ་ལ་ཤེད་བདག་ཏུ་རློམ་མོ། །དེ་སྐྱོ་སྟེ་གྲོགས་སྐྱེས་ན་ཅི་མ་རུང་སྙམ་པ་ན། ཡང་འོད་གསལ་ནས་ཚངས་པའི་འཇིག་རྟེན་དུ་སྐྱེས་པ་ལ་ཤེད་ལས་སྐྱེས་སུ་རྟོག་གོ །དེ་བཞིན་དུ་འོད་གསལ་ནས་འདོད་ལྷ་དང༌། བྱང་དང་ནུབ་དང་ཤར་དང་གླིང་འདིའི་མི་རིམ་གྱིས་སྐྱེ་ལ། སེམས་ཅན་གང་རུང་གཅིག་བདག་པོ་མྱོང་བའི་ལས་ཀྱིས་དམྱལ་བར་གཤིན་རྗེའི་རྒྱལ་པོར་སྐྱེ་ཞིང༌། ཡི་དྭགས་དང་དུད་འགྲོ་དང་དམྱལ་བ་ཆགས་ཏེ། སེམས་ཅན་ཆགས་པ་ལ་བར་བསྐལ་བཅུ་དགུའོ། །ཆགས་པ་རྫོགས་པ་དང་གནས་པ་རྩོམ་པ་དང༌། མནར་མེད་པར་གཅིག་སྐྱེས་པ་དང༌། ཚེ་ལོ་དཔག་མེད་ནས་འགྲིབ་པ་རྩོམ་པ་དུས་མཉམ་མོ། །གཉིས་པ་ནི། བར་གྱི་བསྐལ་པ་ནི་དཔག་མེད་ནས་འགྲིབ་པ་ནས་བཟུང་སྟེ། ཚེ་ལོ་བཅུ་པར་གྱུར་པའི་བར་དུ་སྟེ་ཡ་ཐོག་རིང་པོ་ཞེས་གྲགས་ལ། འགྲིབ་ཚུལ་འོག་ཏུ་འཆད་དོ། །ཡང་དེ་ནས་ཡར་སྐྱེ་བ་དང༌། མར་འགྲིབ་པ་ཟུང་དུ་བྱས་པའི་བསྐལ་པ་ཡ་ཐོག་མ་ཐོག་ལས་གཞན་བཅོ་བརྒྱད་དེ། སྙིང་རྗེ་པད་དཀར་དུ། ཚེ་ལོ་བཅུ་པའི་ཚེ་རྗེ་བཙུན་བྱམས་པ་ཁྲུ་གང་པ་ཞིག་འབྱོན་ཏེ། ལུས་ཆེ་བའི་རྒྱུ་མི་དགེ་བ་སྤངས་པའོ་ཞེས་གསུངས་པས། ལུས་ཀྱི་གསུམ་སྤངས་པས་ཉི་ཤུ་པ་དང༌། ལྔ་བཅུ་པ་དང༌། བརྒྱ་པ་དང༌། ངག་གི་བཞི་སྤངས་པས་ཉིས་སྟོང་པ་དང༌། ཡིད་ཀྱི་གསུམ་སྤངས་པས་བཞི་ཁྲི་པ་དང༌། ཕ་དང་མར་བཟུང་བས་བརྒྱད་ཁྲི་བར་འཕེལ་བར་གསུངས་སོ། །ཡང་ཡར་སྐྱེ་ཞིང་འཕེལ་བ་ནི་བར་བསྐལ་གཅིག་ཡིན་ཏེ། མ་ཐོག་རིང་པོ་ཞེས་གྲགས་སོ། །ཡར་སྐྱེ་བ་རྣམས་ཇི་ཙམ་དུ་སྐྱེ་ཞེ་ན། ཡར་འཕེལ་བ་བཅུ་དགུ་པོ་དེ་དག་ཚེ་ལོ་བརྒྱད་ཁྲིའི་བར་དུ་སྐྱེའོ། །ཐེག་ཆེན་དུ་ནི་མ་ཐོག་རིང་པོ་ཚེ་ལོ་དཔག་ཏུ་མེད་པར་བཤད་དོ། །ཐོག་མཐའི་རྐྱང་པ་དང་བར་གྱི་ཁུག་པ་རེ་དུས་མཉམ་ལ། ལོ་ཇི་སྙེད་རེ་ལ་འཕེལ་འགྲིབ་བྱེད་ཅེ་ན། དགེ་སྡིག་སྤྱོད་པ་སྟོབས་ཆེ་ཆུང་གིས་ལོ་འཕེལ་འགྲིབ་སྟོབས། དེ་མཚུངས་སུ་འགྱུར་རོ། །ཚུལ་དེ་ལྟར་འཇིག་རྟེན་ཆགས་པ་འདི་བར་གྱི་བསྐལ་པ་བཟང་པོ་ཉི་ཤུ་གནས་པ་ཡིན་ནོ། །བསྐལ་པ་བཟང་པོ་འདིའི་གནས་སྐལ་ལ་སངས་རྒྱས་སྟོང་འབྱུང་སྟེ། དེ་ཡང་གསང་བ་བསམ་གྱིས་མི་ཁྱབ་པའི་མདོ་ལས། སྔོན་བསྐལ་པ་མཛེས་པར་སྣང་བ་ལ་འཇིག་རྟེན་གྱི་ཁམས་རྣམ་པར་བརྒྱན་པར་རྫོགས་པའི་སངས་རྒྱས་ཡོན་ཏན་མཐའ་ཡས་པ་རིན་ཆེན་སྣ་ཚོགས་བཀོད་པའི་རྒྱལ་པོ་ཞེས་བྱ་བ་བྱོན་པའི་ཚེ། སངས་རྒྱས་མར་མེ་མཛད་འཁོར་ལོས་བསྒྱུར་བའི་རྒྱལ་པོ་ཡུལ་འཁོར་བསྲུང་དུ་གྱུར་པ་ལ་སྲས་སྟོང་ཡོད་པ་རྒྱལ་པོ་དེས་རྫོགས་པའི་བྱང་ཆུབ་ཏུ་ཞུགས་པར་ཤེས་ཏེ། གང་སྔོན་ལ་འཚང་རྒྱ་བརྟག་པའི་ཕྱིར་རིན་ཆེན་སྣ་བདུན་གྱི་བུམ་པའི་ནང་དུ་མཚན་བྱང་རྣམས་བཅུག་ནས་ཞག་བདུན་མཆོད་པ་བྱས་ཏེ་སྟོན་པས། སྔོན་ལ་ཆེ་ཤོས་རྣམ་པར་དག་པའི་བློ་གྲོས་བྱུང་སྟེ་དེ་སངས་རྒྱས་འཁོར་བ་འཇིག་གོ །ཕྱི་མ་ལ་རྒྱལ་བུ་ཆུང་ཤོས་བློ་གྲོས་མཐའ་ཡས་བྱུང་སྟེ། དེ་སངས་རྒྱས་མོས་པའམ་སྣང་མཛད་དོ། །བཙུན་མོ་དམ་པ་མ་སྨད་པའི་པང་དུ་རྫུས་ཏེ་སྐྱེས་པའི་ཁྱེའུ་ཆོས་ཀྱི་སེམས་པ་སངས་རྒྱས་སྟོང་གི་སྐུ་དང་བསྟན་པ་བསྲུང་བར་སྨོན་ལམ་བཏབ་པ་ནི་ཕྱག་ན་རྡོ་རྗེའོ། །བཙུན་མོ་དཔེ་མེད་པའི་པང་དུ་སྐྱེས་པའི་ཁྱེའུ་ཆོས་ཀྱི་བློ་གྲོས་སངས་རྒྱས་སྟོང་ལ་ཆོས་ཀྱི་འཁོར་ལོ་བསྐོར་བར་བསྐུལ་བའི་སྨོན་ལམ་བཏབ་པ་ནི་ཚངས་པ་གཙུག་ཕུད་ཅན་ནོ། །ཞེས་བཀའ་སྩལ་ཏོ། །སྙིང་རྗེ་པད་དཀར་དུ། བར་བསྐལ་དང་པོ་འདིའི་ཚེ་ལོ་བཞི་ཁྲི་པ་ལ་སངས་རྒྱས་འཁོར་བ་འཇིག སུམ་ཁྲི་པ་ལ་གསེར་ཐུབ། ཉིས་ཁྲི་པ་ལ་རྒྱལ་བ་འོད་སྲུངས། །བརྒྱ་པ་ལ་འདྲེན་པ་ཤཱཀྱའི་ཏོག་འབྱོན་པར་བཀའ་སྩལ་ཏོ། །ཕྱིས་བརྒྱད་ཁྲི་པར་འཕེལ་བ་ན། མགོན་པོ་བྱམས་པ་འབྱོན་ཏེ། འཁོར་དགྲ་བཅོམ་ཁྲག་ཁྲིག་ཕྲག་དགུ་དང༌། ཐེར་འབུམ་ཆེན་པོ་ཕྲག་དྲུག་འབྱུང་ངོ༌། །ལུང་བཞི་ལས་དེའི་ཚེ་ཁྱིམ་བདག་མགོན་མེད་ཟས་སྦྱིན། ཁྱིམ་བདག་ནོར་བུ་བཟང་དུ་གྱུར་ཏེ། དགྲ་བཅོམ་པ་ཐོབ་པར་གསུངས་སོ། །བསྐལ་པ་འདིའི་འོག་ཏུ་མུན་བསྐལ་དྲུག་ཅུ་རྩ་གཉིས་འབྱུང༌། དེ་ནས་སངས་རྒྱས་བདུན་འབྱུང་ཞེས་བྱང་ཆུབ་སེམས་དཔའི་སྡེ་སྣོད་དུ་འབྱུང་ངོ༌། །དེའི་འོག་ཏུ་འཇིག་རྟེན་གྱི་ཁམས་འདི་མངོན་པར་དང་བ་ཞེས་བྱ་བར་འགྱུར་ཏེ། སློབ་དཔོན་ཀླུ་སྒྲུབ་སངས་རྒྱས་ཡེ་ཤེས་འབྱུང་གནས་འོད་ཅེས་བྱ་བར་འཚང་རྒྱ་ཞེས་མདོ་སྡེ་སྤྲིན་ཆེན་པོར་བཤད་དོ། །གནས་བསྐལ་གྱི་དུས་དེ་དང་ཆགས་པ་དང་འཇིག་པ་དང་ཞིག་ཅིང་སྟོངས་ནས་འདུག་པ་གསུམ་དུས་བར་བསྐལ་ཉི་ཤུར་མཉམ་མོ། །ཞིག་པའི་ཚེ་འཕེལ་འགྲིབ་མེད་ཀྱང་དུས་མཉམ་པར་རྩིའོ། །གསུམ་པ་ལ་གཉིས་ཏེ། དངོས་དང༌། ཞར་ལ་གང་ཟག་གསུམ་འབྱུང་ཚུལ་ལོ། །དང་པོ་ནི། བར་བསྐལ་ཉི་ཤུ་པོ་དེ་དག་བསྡོམས་པ་བརྒྱད་ཅུ་ལ་ནི་བསྐལ་པ་ཆེན་པོ་ཞེས་བྱའོ། །འདི་ནི་བསྐལ་པ་བཟང་པོ་འདིའི་དབང་དུ་བྱས་ཀྱི་སྨོན་ལམ་དང་དགེ་བའི་རྩ་བའི་དབང་གིས་དེ་ལས་རིང་བ་ཡོད་དེ། ཕལ་པོ་ཆེར། མི་མཇེད་དང༌། བདེ་བ་ཅན་ལ་སོགས་པའི་འཇིག་རྟེན་བཅུ་གཅིག་ལས། སྔ་མའི་བསྐལ་པ་ཕྱི་མའི་ཞག་རེར་བཀའ་སྩལ་ཏོ། །གཉིས་པ་ལ་གསུམ་སྟེ། སངས་རྒྱས་འབྱུང་ཚུལ། རང་རྒྱལ་འབྱུང་ཚུལ། འཁོར་བསྒྱུར་འབྱུང་ཚུལ་ལོ། །དང་པོ་ནི། བསྐལ་ཆེན་དེ་གྲངས་མེད་གསུམ་དུ་ཚོགས་བསགས་པ་ལས་སངས་རྒྱས་འབྱུང་ངོ༌། །གྲངས་མེད་ནི། གྲངས་གཏན་མེད་མ་ཡིན་གྱི་ལུང་སིལ་བུར། གྲངས་ཀྱི་གནས་གཞན་དྲུག་ཅུ་གསུངས་པའི་ཐ་མ་སྟེ། གཅིག་བཅུ་བརྒྱ་སྟོང་ཁྲི་འབུམ་དང༌། །ས་ཡ་བྱེ་བ་དུང་ཕྱུར་རྣམས། །ཟླ་བོ་མེད་པའི་གྲངས་སུ་བཤད། །ཆེན་པོའི་ཟླ་དང་བཅས་པ་ནི། ཐེར་འབུམ་ཁྲག་ཁྲིག་རབ་བཀྲམ་དང༌། །གཏམས་དཀྲིགས་མི་འཁྲུགས་ཁྱད་འབྱིན་དང༌། །སྤང་རྟེན་དེད་འདྲེན་མཐའ་སྣང་དང༌། །རྒྱུ་རིག་འོད་མཛེས་དབང་པོ་དང༌། །ལེགས་འབྱིན་རྟོགས་འགྲོ་འབྱིང་རྡུལ་དང༌། །རྒྱ་རྟགས་སྟོབས་འཁོར་བརྡ་ཤེས་དང༌། །རྣམ་བྱུང་སྟོབས་མིག་ཉི་ཤུ་གཅིག །གྲངས་མེད་ཀུན་ཀྱང་བཅུ་འགྱུར་བསྒྲེ། །བར་ནས་བརྒྱད་ནི་མ་རྙེད་དོ། །གྲངས་མེད་གསུམ་ནི་ཉན་ཐོས་སྡེ་གཉིས་ཀྱིས་ཚོགས་ལམ་ཉིད་དུ་རྫོགས་པར་འདོད་ལ། ཐེག་ཆེན་པས་མོས་སྤྱོད་དང་མ་དག་ས་བདུན་དང་དག་པ་ས་གསུམ་དུ་རྫོགས་པར་འདོད་དོ། །སངས་རྒྱས་རྣམས་ཡར་འཕེལ་དང་མར་འགྲིབ་གང་ལ་འབྱུང་ཞེ་ན། མར་འགྲིབ་པའི་བརྒྱད་ཁྲི་པ་ནས་བརྒྱ་པའི་བར་ལ་སངས་རྒྱས་དེ་དག་འབྱུང་ངོ༌། །ཡར་འཕེལ་གྱི་ཚེ་མི་འབྱུང་སྟེ། གདུལ་བྱ་རྣམས་སྐྱོ་བ་སྐྱེད་དཀའ་བའི་ཕྱིར། བརྒྱ་པ་མན་ཆད་དུ་ཡང་མི་འབྱུང་སྟེ། ཚེ་དང་དུས་དང་ཉོན་མོངས་པ་དང་ལྟ་བ་དང་སེམས་ཅན་གྱི་སྙིགས་མ་སྟེ། ལྔ་པོ་ཤས་ཆེ་བའི་ཕྱིར། ཐེག་ཆེན་པ་ལྟར་ན། སྙིང་རྗེ་པད་དཀར་དུ། འཇིག་རྟེན་གྱི་ཁམས་མཐེ་བོང་ཅན་ཞེས་བྱ་བར། མཐེ་བོང་གི་ཚད་ཙམ་གྱི་མི་རྣམས་ཀྱི་ནང་དུ། ཚེ་ལོ་བཅུ་པའི་ཚེ་སངས་རྒྱས་སྐར་མ་ལ་དགའ་བ་འབྱོན་པར་གསུངས། མདོ་བསྐལ་བཟང་དུ། མི་ཡི་འདྲེན་པ་སྣང་མཛད་པའི། །མི་རྣམས་ཚེ་ལོ་དཔག་ཏུ་མེད། །སངས་རྒྱས་དགུ་བརྒྱ་དགུ་བཅུ་དགུས། །ཇི་སྙེད་མཛད་ཀུན་དེས་མཛད་འགྱུར། །ཞེས་ཀྱང་བཀའ་སྩལ་ཏོ། །གཉིས་པ་རང་རྒྱལ་འབྱུང་ཚུལ་ནི། རང་རྒྱལ་དུས་གང་གི་ཚེ་འབྱུང་ཞེ་ན། རང་རྒྱལ་རྣམས་ཡར་འཕེལ་དང་མར་འགྲིབ་གཉིས་ཀ་ལ་འབྱུང་ངོ༌། །རྩ་ཤེས་ལས། རྫོགས་སངས་རྒྱས་རྣམས་མ་བྱུང་ཞིང༌། །ཉན་ཐོས་རྣམས་ཀྱང་ཟད་པ་ན། །རང་སངས་རྒྱས་ཀྱི་ཡེ་ཤེས་ནི། །བརྟེན་པ་མེད་པར་རབ་ཏུ་སྐྱེ། །ཞེས་པ་ལྟར་རོ། །རང་རྒྱལ་བསེ་རུ་ལྟ་བུ་ནི། བསྐལ་ཆེན་བརྒྱར་ཚོགས་ལམ་གྱི་སྐབས་སུ་བྱང་ཆུབ་ཀྱི་རྒྱུ་ཚོགས་ལ་སྤྱོད་པའི་མཐུས་བྱང་ཆུབ་ཐོབ་སྟེ། ངེས་འབྱེད་ཆ་མཐུན་ནས་ཟད་ཤེས་ཀྱི་བར་མཉམ་བཞག་ཐུན་གཅིག་ལ་སེམས་བསྐྱེད་པས་རྒྱུད་ཤིན་ཏུ་སྨིན་པའི་ཕྱིར། ཁ་ཆེ་བ་ནི་རང་རྒྱལ་ཚོགས་སྤྱོད་མི་འདོད་པས་དེའི་ཚོགས་གསོག་ཚུལ་སོགས་དངོས་སུ་མ་བཀོད་དོ། །གསུམ་པ་འཁོར་བསྒྱུར་འབྱུང་ཚུལ་ནི། འཁོར་ལོ་བསྒྱུར་རྒྱལ་དུས་ནམ་འབྱུང་ཞེ་ན། འཁོར་ལོས་རྒྱལ་སྲིད་བསྒྱུར་བའི་ངང་ཚུལ་ཅན་འབྱུང་བ་ནི་ཚེ་ལོ་དཔག་མེད་ནས་སྟོང་ཕྲག་བརྒྱད་ཅུའི་བར་ལ་འབྱུང་གི། དེ་ལས་མི་འཕྱི་སྟེ། དེ་མན་ཆད་དུ་ལོངས་སྤྱོད་མི་རྫོགས་པས་སོ། །རིན་པོ་ཆེ་བདུན་ཕྲག་གསུམ་ལས། མཆོག་གི་རིན་ཆེན་སྣ་བདུན་ནི། དེ་ཚེས་བཅོ་ལྔ་ལ་ཁྲུས་བྱས་ནས་བསྙེན་གནས་ལ་གནས་ཤིང་བློན་པོའི་ཚོགས་ཀྱིས་བསྐོར་ཏེ་འདུག་པ་ན། ཤར་ཕྱོགས་ནས་ལྷའི་འཁོར་ལོ་བརྒྱ་བྱིན་གྱི་ཚིག་གིས་ལས་ཐམས་ཅད་པས་བྱས་པ་རྒྱལ་པོ་ཆེན་པོ་བཞིས་རྒྱལ་པོ་ལ་བརྟན་པར་འགྱུར་རོ། །ཞེས་རང་འགྲེལ་དུ་མདོ་དྲངས་པ་ནའོ། །མདོ་དང་གདགས་པར་རིན་པོ་ཆེ་དེ་བཟོས་པ་མ་ཡིན་གྱི་ལས་ཐམས་ཅད་པས་སྤྲུལ་པར་བཤད་དོ། །དྲན་པ་ཉེར་བཞག་ཏུ་གསེར་ལས་བྱས་པ་དཔག་ཚད་ལྔ་བརྒྱ་པ་རྩིབས་སྟོང་ཡོད་པ་མཛེས་པ། ནམ་མཁའ་ལ་དཔག་ཚད་འབུམ་དུ་ཉི་མ་གཅིག་གིས་འགྲོ་བ། གླིང་བཞི་དང་ལྷའི་རིས་སུའང་གླང་པོ་ཆེ་ལ་སོགས་པ་ཀུན་ནམ་མཁའ་ལ་འགྲོ་བ། རྒྱལ་པོས་མི་ཐོས་པ་ཐོས་པར་བྱེད་པ། འགྲན་པའི་ཟླ་མེད་པར་བྱེད་པ། རྒྱལ་པོ་ཤི་ནས་སྒོ་ཁང་དུ་ཟུག་སྡོད་པས་བུ་ལ་མི་ཕན་ནོ། །ནོར་བུ་ནི་མི་ཆེན་པོའི་བརླ་ཙམ་པ་ཟུར་བརྒྱད་པ་སྟེ། མཚན་མོ་དཔག་ཚད་བརྒྱར་འོད་འབྱུང་བ། ཚ་བའི་དུས་སུ་བསིལ་བ་འབྱུང་བ། སྐོམ་པའི་དུས་སུ་ཡན་ལག་བརྒྱད་ལྡན་གྱི་ཆུ་འབྱུང་བ། རྒྱལ་པོས་ཅི་བསམ་པ་འབྱུང་བ། འོད་སྣ་ཚོགས་ལྡན་ཞིང་དཔག་ཚད་བརྒྱར་ནད་མེད་པར་བྱེད་པ། ཇི་ལྟར་འདོད་པའི་འབྲས་བུ་འབྱུང་བ། ཀླུས་སེར་བ་འབེབས་མི་ནུས་པ་ཡུལ་ཀུན་ལྗོན་པ་དང་མཚེའུ་ཕུན་སུམ་ཚོགས་པར་འགྱུར་བ། མི་རྣམས་དུས་མ་ཡིན་པར་མི་འཆི་ཞིང༌། དུད་འགྲོ་གང་གིས་ཀྱང་མི་གནོད་པ་ཞིག་དབང་པོས་སྟེར་རོ། །གདགས་པ་དང་ས་འགྲེལ་དུ། ཀླུའམ་རྒྱལ་ཆེན་བཞིས་འབུལ་བར་བཤད་དོ། །བཙུན་མོ་ནི་ལུས་ལ་ཙན་དན་དང༌། ཁ་ལ་ཨུཏྤལ་དྲི་འབྱུང་བ་དང༌། རེག་ན་ཉོན་མོངས་པ་མེད་པ་བཀྲེས་སྐོམ་དང་མྱ་ངན་སེལ་བ། གྲང་དུས་སུ་དྲོ་ཞིང་དྲོ་དུས་སུ་བསིལ་བར་བྱེད་པ། བུ་མང་པོ་བཙའ་བ་ཞིག་བློན་པོས་འབུལ་ཏེ། དེ་ནི་ཤི་ནས་ལྷར་སྐྱེའོ། །གདགས་པར་ནི་བུ་མོ་འབྱུང་ཞིང་རྒྱལ་པོའི་སྔོན་དུ་འཆི་བར་བཤད་དོ། །བློན་པོ་ནི་བྱ་བ་མ་བསླབས་ཀྱང་ཤེས་ཤིང་བྱེད་པ། མི་དགེ་བ་སྤངས་ཤིང་ཉོན་མོངས་མེད་པ། སེམས་ཅན་ཀུན་ལ་ཕ་མ་ལྟར་ཕན་པའོ། །གླང་པོ་ཆེ་ནི་ཅང་ཤེས་ཤིང་བཀའ་ཉན་པས་ཕ་རོལ་ལས་རྒྱལ་བར་བྱེད་པ་གླང་པོ་ཆེ་སྟོང་གི་སྟོབས་ཡོད་པ་ཆུ་དང་སྐམས་ས་དང་བར་སྣང་གསུམ་ལ་གཡུལ་འགྱེད་པ། ཉིན་གཅིག་ལ་འཛམ་བུ་གླིང་ལན་གསུམ་འཁོར་བ། ཤིན་ཏུ་དུལ་ཞིང་ཞོན་པ་ན་བསྐུལ་མི་དགོས་པ་དལ་བུས་འགྲོ་བ་ཞིག་དབང་པོས་སྟེར་རོ། །ས་འགྲེལ་དུ་གླང་པོ་རབ་བརྟན་གྱི་བུ་ཐ་ཆུང་ཞེས་བཤད་དོ། །རྟ་མཆོག་ནི་ཀུ་མུད་ཏ་དང་དུང་ལྟར་དཀར་བ། གླང་པོ་དང་ཡོན་ཏན་མཚུངས་པ་ཞིག་དབང་པོས་སྟེར་རོ། །ས་འགྲེལ་དུ་རྟའི་རྒྱལ་པོ་སྤྲིན་གྱི་ཤུགས་ཅན་གྱི་བུ་ཐ་ཆུང་ལུས་སྔོ་ལ་མགོ་ནག་པ་ཞེས་ཀྱང་ངོ༌། །གདགས་པར་ནུབ་ཕྱོགས་ཀྱི་གླིང་ཕྲན་ཁམ་བུ་ཅན་ན་རྟའི་རྒྱལ་པོ་སྟོང་གིས་བསྐོར་བ་ཡོད་པ་ལ། བརྒྱ་བྱིན་གྱིས་འཁོར་ལོས་བསྒྱུར་བ་འཇིག་རྟེན་དུ་འབྱུང་བར་ཤེས་པར་གྱིས་ལ་རྟ་ཐོངས་ཤིག་ཅེས་བསྒོ་བས། བུ་ཐུ་བོ་གཏོང་ཞིང་དེ་རྒྱལ་པོའི་སྔར་ཤི་ན་དེའི་འོག་མ་གཏོང་ལ་རྒྱལ་པོ་སྔར་ཤི་ན་རྟ་རང་གནས་སུ་ལྡོག་པར་བཤད་དོ། །ཁྱིམ་བདག་ནི་བང་མཛོད་གསེར་དངུལ་གྱིས་འགེངས་ཤིང་རྒྱལ་པོའི་བཀའ་ཉན་པ་སྐྱེ་བོ་ཀུན་ལ་མི་གནོད་པའོ། །ཞེས་སོ། །རྒྱལ་པོ་སྲས་སུ་ཁྱིམ་བདག་ནི་མཛོད་ཀྱི་སྤྱན་དང༌། བློན་པོ་ནི་དཔུང་གི་སྤྱན་ལྟ་བུའོ། །ཞེས་འཆད་དོ། །ཉེ་བའི་རིན་ཆེན་སྣ་བདུན་ཡང་མདོ་དེ་ཉིད་དུ། རལ་གྲི་ནི་རྒྱལ་པོ་དང་འགལ་བ་བྱེད་འདོད་པ་དེར་སོང་སྟེ། མ་བཏབ་ཀྱང་ཀུན་གྱིས་འདུད་པའོ། །པགས་པ་ནི་ཆུར་དཔག་ཚད་བཅུ་པ། ཞེང་དུ་དཔག་ཚད་ལྔ་པ། ཆར་གྱིས་མི་བརླན་ཅིང་རླུང་གིས་མི་བསྐྱོད་ལ་གྲང་ན་དྲོ་ཞིང༌། ཚ་ན་བསིལ་བར་བྱེད་པ། ཉི་ཟླའི་འོད་སྣང་བ། ཀླུའི་པགས་པ་རྒྱ་མཚོ་ནས་བྱུང་བ་གང་འགྲོ་སར་བློན་པོས་ཁྱེར་འོང་བ་ཞིག་ཚོང་པས་འབུལ་ལོ། །ཁང་པ་ནི་ཆུར་དཔག་ཚད་བཅུ་གཉིས་པ། ཞེང་དུ་བདུན་པ་རིན་པོ་ཆེ་དང་ཟླ་བ་དང་རྒྱུ་སྐར་བལྟ་བར་འདོད་ན་ཁང་བ་དེར་འོང་བ། རྨི་ལམ་དགེ་བ་མཐོང་བ་གྲང་ན་དྲོ་ཞིང་ཚ་ན་བསིལ་བའི་རླུང་ལྡང་བ་དེར་ལྷ་མོ་འོངས་ནས་རོལ་མོ་བྱེད་པའོ། །གོས་ནི། འཇམ་ལ་དྲི་མ་མེད་པ་གྱོན་ན་ཚ་གྲང་བཀྲེས་སྐོམ་ངལ་དུབ་ཀྱིས་མི་གནོད་པ་མེས་མི་ཚིག་ཅིང་མཚོན་གྱིས་མི་ཆོད་པའོ། །ཚལ་ནི། རྒྱལ་པོས་དེར་ཕྱིན་པ་ན། ཚལ་གྱིས་མཐུས་ལྷའི་བུ་མོ་དང་བྱ་ལ་སོགས་པ་འོངས་ཏེ་འདོད་ཡོན་ལ་སྤྱོད་པའོ། །མལ་ཆ་ནི། བསམ་གཏན་བྱེད་ན་རྣམ་པར་གྲོལ་ཞིང་བློ་གསལ་ལ། ཀུན་ནས་ཉོན་མོངས་པ་མི་སྐྱེ་བའོ། །ལྷྭམ་ནི་གྱོན་ན་ཆུ་ལ་མི་བྱིང་པ། ཡུད་ཙམ་གྱིས་དཔག་ཚད་བརྒྱར་འགྲོ་བ་ལ་ངལ་བ་མེད་པའོ། །རིན་ཆེན་བདུན་ནི། གསེར། དངུལ། བཻཌཱུརྻ། ཤེལ། སྤུག རྡོའི་སྙིང་པོ། མུ་ཏིག་དམར་པོའོ། །མི་སྟོང་རེ་ཐུབ་པའི་བུ་སྟོང་དང་དགྲ་ཟིལ་གྱིས་གནོན་པའི་མདའ་གཞུ་འབྱུང་ངོ༌། །འཁོར་ལོས་བསྒྱུར་རྒྱལ་དེ་ལ་རིགས་དུ་ཡོད་ཅེ་ན། གསེར་གྱི་འཁོར་ལོ་ཅན་གྱི་རྒྱལ་པོ་དང༌། དངུལ་དང༌། ཟངས་དང༌། ལྕགས་ཀྱི་འཁོར་ལོ་ཅན་ནོ། །དེ་རྣམས་ལས་རིམ་བཞིན་གླིང་གཅིག་དང་གཉིས་དང་གསུམ་དང་བཞི་ལ་དབང་བྱེད་དོ། །གླིང་གཅིག་ནི་འཛམ་བུ་གླིང༌། གཉིས་ནི་ཤར་ལྷོ་གཉིས། གསུམ་ནི་བྱང་གླིང་མ་གཏོགས་པ་གསུམ། བཞི་ནི་གླིང་བཞི་ཀའོ། །འཁོར་ལོས་བསྒྱུར་རྒྱལ་གཉིས་ལྷན་ཅིག་ཏུ་མི་འབྱུང་སྟེ། འགྲན་ཟླ་མེད་པའི་ལས་བསགས་པའི་ཕྱིར། དཔེར་ན་སངས་རྒྱས་བཞིན་ནོ། །བྱེ་བྲག་སྨྲ་བས་ཞིང་ཀུན་ཏུ་སངས་རྒྱས་རེ་རེ་ལས་མི་འབྱུང་བར་འདོད་དོ། །ཕལ་ཆེན་སྡེ་པ་ནི། ཞིང་གཅིག་ཏུ་གཉིས་མི་འབྱུང་བའི་དོན་དུ་འདོད། ཐེག་བསྡུས་སུ་གླིང་བཞི་པ་གཅིག་ཏུ་མི་འབྱུང་བར་བཤད། བརྒྱད་སྟོང་འགྲེལ་ཆེན་དུ། སངས་རྒྱས་གཉིས་སམ་མང་པོ་བྱོན་ནས་འདུལ་བའི་སེམས་ཅན་ཡོད་ན། དུ་མ་འབྱུང་བར་བཤད་དེ། ཕལ་པོ་ཆེ་ལས་ལ་ལར་སངས་རྒྱས་མང་པོ་ཞེས་ལྟར་རོ། །འཁོར་ལོས་བསྒྱུར་རྒྱལ་རྣམས་ཀྱིས་གླིང་བཞི་ལས་ཇི་ལྟར་རྒྱལ་བར་བྱེད་ཅེ་ན། གསེར་གྱི་འཁོར་ལོ་ཅན་ཁམས་ཀྱི་རྒྱལ་ཕྲན་རྣམས་ཀྱིས་བསུས་ནས་འདུད་ཅིང་བཀའ་ཉན་ནོ། །དངུལ་གྱི་འཁོར་ལོ་ཅན་ནི། དེ་རྣམས་ཀྱི་ཐད་དུ་རང་ཉིད་འགྲོ་བས་འདུད་པར་ནི་ཕོ་ཉ་བཏང་བས་འདུད་ཅེས་སོ། །ཟངས་ཀྱི་འཁོར་ལོ་ཅན་ནི་སོང་སྟེ་གཡུལ་བཤམས་པས་འདུད། ལྕགས་ཀྱི་འཁོར་ལོ་ཅན་ནི་སོང་སྟེ་མཚོན་བསྣུན་པར་བརྩམས་པས་རྒྱལ་བར་བྱེད་དོ། །འོན་ཀྱང་གནོད་པ་མེད་ཅིང༌། རྒྱལ་ནས་སེམས་ཅན་རྣམས་དགེ་བ་བཅུ་ལ་འགོད་པས་དེ་རྣམས་ངེས་པར་ལྷར་སྐྱེའོ། །གདགས་པ་ལས་གསེར་གྱི་འཁོར་བསྒྱུར་ནི་འཁོར་ལོའི་རྗེས་སུ་དཔུང་དང་བཅས་པ་བྱོན་ནས་བཞུགས་པ་ན། ཐོས་མ་ཐག་ཏུ་རྒྱལ་ཕྲན་རྣམས་འོང་ནས་འདུད་ལ། དངུལ་འཁོར་ཅན་ལ་ནི་ཐོས་མ་ཐག་ཏུ་མི་འདུད་པར་དཔུང་འདེགས་པའི་ཚེ་འོངས་ནས་འདུས་པར་བཤད། ས་སྡེ་ལས། གླིང་འདིའི་མཐར་འཁོར་ལོས་བསྒྱུར་བའི་རྒྱལ་པོའི་ལམ་གསེར་གྱི་རང་བཞིན་རྒྱལ་ཆེན་རིགས་བཞི་པའི་པུས་ནུབ་ཙམ་རྒྱ་མཚོར་ནུབ་པ་ཡོད་ཅིང༌། རྒྱལ་པོ་བྱུང་བ་ན་ཆུ་བསྐམས་ནས་ལམ་གསལ་པོ་བྱུང་བར་བཤད་དོ། །རྒྱལ་པོ་འདི་རྣམས་ནི་སྐྱེས་བུ་ཆེན་པོའི་མཚན་སོ་གཉིས་ཀྱང་རྒྱལ་པོ་གཞན་ལས་ཁྱད་ཞུགས་སོ། །འོ་ན་ཐུབ་པའི་མཚན་དང་ཁྱད་ཅི་ཡོད་ཅེ་ན། ཐུབ་པའི་མཚན་སོ་གཉིས་ནི། རང་ཡུལ་ལས་མ་ཡོ་བར་གནས་པ་དང༌། འོད་གསལ་ལ་ཆ་ཤས་རྫོགས་པས་ཁྱད་པར་འཕགས་པས་སོ། །འདིའི་རྒྱུ་ནི་བྱམས་པ་སྒོམ་པ་དང༌། མཆོད་རྟེན་ལ་ཕྱག་བྱ་བ་སོགས་སུ་གསུངས་སོ། །གཉིས་པ་ཡ་ཐོག་རིང་པོའི་འགྲིབ་ཚུལ་ལ་གསུམ་སྟེ། བསྐལ་པ་དང་པོའི་ཁྱད་པར། ཇི་ལྟར་འགྲིབ་པའི་ཚུལ། འགྲིབ་པའི་མཐར་གང་འབྱུང་བའོ། །དང་པོ་ནི། ཅི་བསྐལ་པ་དང་པོའི་མི་རྣམས་ཀྱང་རྒྱལ་པོ་དང་བཅས་སམ་ཞེ་ན་མ་ཡིན་ཏེ། སྔར་བསྐལ་པ་ཆགས་མ་ཐག་གི་སེམས་ཅན་མི་རྣམས་གཟུགས་ཅན་གྱི་ལྷ་བཞིན་ཏེ། ཡིད་ལས་བྱུང་བ་ཡན་ལག་དང་ཉིང་ལག་དང་དབང་པོ་ཚང་བ་རང་འོད་ཅན་ནམ་མཁའ་ལ་འགྲོ་བ། ཟས་སུ་དགའ་བ་ཟ་བ། ཚེ་ལོ་དཔག་མེད་ཐུབ་པའོ། །གཉིས་པ་ནི། དེ་ནས་རིམ་གྱིས་རོ་ལ་ཆགས་ཏེ་སའི་བཅུད་ཁ་དོག་མར་གསར་འདྲ་བ། རོ་སྦྲང་རྩི་མ་སྐོལ་བ་ལྟར་མངར་བ་སའི་སྟེང་དུ་ཆུས་ཁྱབ་པ་ལ་རླུང་གིས་སྤྲིས་མར་བྱས་པ་བྱུང་སྟེ། དེ་སེམས་ཅན་བརྐམ་ཆགས་ཅན་ཞིག་གིས་སོར་མོའི་རྩེས་བླངས་ཏེ་ཟོས་པས་མི་གཞན་རྣམས་ཀྱང་དེ་ལྟར་བྱེད་པ་ནི་ཁམ་ཟས་ཀྱི་དང་པོའོ། །དེས་ལུས་སྲ་ཞིང་ལྕི་ལ་འོད་ནུབ་ནས་མུན་པ་བྱུང་ངོ༌། །དེ་ནས་སེམས་ཅན་གྱི་བསོད་ནམས་ཀྱི་མཐུས་ཉི་ཟླ་བྱུང་ཞིང༌། ལྷའི་བུ་ཉི་ཟླ་གཉིས་ནི་རི་རབ་ཀྱི་ལྷོའམ་བྱང་གི་ངོས་གང་དུ་སོང་བ་མཐོང་བ་དེར་ཕྱིན་ཏེ་འཇིག་གོ །དེ་ནས་ས་ཞག་སེར་པོ་སྦྲང་རྩིའི་རོ་ཅན་བྱུང་བའང་མྱངས་པས་ནུབ་བོ། །དེ་ནས་ལྷུམ་གྱི་ཚུལ་ལྟར་སྣང་བའི་སྦྲང་རྩིའི་རོ་ཅན་ཡང་མྱངས་པས་ནུབ་བོ། །དེ་ནས་མ་རྨོས་མ་བཏབ་པའི་འབྲས་སཱ་ལུ་ཤུན་པ་དང༌། ཕུར་མ་མེད་པ་ཟོས་པས་རྒྱུ་མཐུན་འབྱུང་བའི་བཤང་གཅིའི་ལམ་ཡང་བྱུང༌། སྔོན་གོམས་པས་ཚུལ་མིན་ཡིད་ལ་བྱེད་ཅིང་འཁྲིག་པ་བྱེད་པ་ན། དེ་ལ་སྨད་པས་དེའི་ཆེད་དུ་ཁྱིམ་བྱེད་དེ། མི་དགེ་བ་དང་ཁྱིམ་གྱི་དང་པོའོ། །སཱ་ལུ་ནངས་ཟ་ན་ནངས་ལེན་པ་དང༌། ནུབ་ཟ་ན་ནུབ་ལེན་པ་ན་གཅིག་གིས་ལེ་ལོས་གསོག་འཇོག་བྱས་པ་ལྟར་ཀུན་གྱིས་བྱས་པས་བརྔས་པ་མི་སྐྱེའོ། །དེ་ནས་ཞིང་རྣམས་བགོས་ཏེ་རང་གི་ལ་བདག་གིར་འཛིན་པ་དང་བཅས་ནས་གཞན་གྱིས་དེ་ལ་རྐུའོ། །དེ་བསྲུང་བའི་ཆེད་དུ་འདུས་ནས་དེ་རྣམས་ཀྱི་མི་ཁྱད་པར་ཅན་ཞིག་ཞིང་དཔོན་དུ་བསྐོས་ནས་རང་རང་གི་སྟོན་ཐོག་གི་དྲུག་ཆ་བསྟབས་ཏེ། དེ་ནི་མང་པོས་བཀུར་བ་ཞེས་པ་རྒྱལ་རིགས་ཀྱི་དང་པོའོ། །དེ་ནས་ཕྱིས་རྒྱལ་པོ་གང་རུང་ཞིག་གིས་རྐུན་པོ་རྣམས་གསོད་ཅིང་དེར་བདག་གི་མ་རྐུ་ཞེས་རྫུན་སྨྲའོ། །དེ་ནས་མི་དགེ་བའི་ལས་ཀྱི་ལམ་ལྷག་སྟེ། འཕེལ་བས་ཚེ་ཁད་ཀྱིས་འགྲིབས་པས་མཐར་ཚེ་ལོ་བཅུ་པར་གྱུར་ཏོ། །དེ་ནི་ཚེ་རྒུད་པ་ཡིན་ལ། ལུས་རྒུད་པ་ལུས་མཐོ་གང་ཆང་པ་གང༌། ཡོ་བྱད་རྒུད་པ་ཟས་ཀྱི་མཆོག་ཁྲེ་རྒོད་དང༌། གོས་ཀྱི་མཆོག་སྐྲའི་ལྭ་བ་དང༌། རྒྱན་གྱི་མཆོག་མཚོན་ཆ་སྟེ། འོ་མ་དང་ཞོ་ཡོད་ཀྱང་མར་མི་འབྱུང༌། ཏིལ་ཡོད་ཀྱང་ཏིལ་མར་མི་འབྱུང༌། བུར་ཤིང་དང་དེའི་ཁུ་བ་ཡོད་ཀྱང་བུ་རམ་མི་འབྱུང༌། ལན་ཚྭ་ཡེ་མེད་དོ། །གསུམ་པ་འགྲིབ་པའི་མཐར་གང་འབྱུང་བ་ནི། བར་གྱི་བསྐལ་པ་ནི། མཚོན་དང་ནད་དང་མུ་གེའི་བསྐལ་པ་དག་གིས་མཐར་འབྱིན་ཏེ། ཚེ་ལོ་བཅུ་པ་ན། མི་རྣམས་ཕན་ཚུན་རྔོན་པས་རི་དྭགས་མཐོང་བ་བཞིན་གནོད་སེམས་མི་ཟད་པར་འགྱུར་ལ། གང་བླངས་པ་རྣམས་མཚོན་ཆ་རྣོན་པོར་གྱུར་ཏེ། གསོད་རེས་བྱེད་ལ་གསད་ཚད་དམྱལ་བར་སྐྱེའོ། །ནད་ནི་མི་མ་ཡིན་རྣམས་ཀྱིས་ཡམས་ནད་གསོར་མི་རུང་བ་གཏོང་སྟེ་ཕལ་ཆེར་འཆིའོ། །མུ་གེ་ནི་མི་དགེ་བའི་ཉེས་པས་ལྷས་ཆར་མི་འབེབས་པས་ཕན་ཚུན་འདུས་ཏེ་འཆི་བ་དང༌། མ་འོངས་པའི་སྐྱེ་བོའི་དོན་དུ་ས་བོན་གབ་རྩེའི་ནང་དུ་འཇོག་པས་གབ་རྩེ་པ་དང༌། རུས་གོང་དཀར་པོ་བསྡུས་ཏེ་བཀོལ་ནས་འཐུང་པས་རུས་གོང་དཀར་པོ་བ་དང༌། ཐུར་མར་རྩིགས་ཕུག་ནས་འབྲུ་བྲུས་པ་ཆུར་བསྐོལ་ཏེ་འཐུང་པས་ཐུར་མ་པ་སྟེ་གསུམ་མོ། །གང་ཉི་མ་འགའ་སྲོག་གཅོད་སྤངས་པ་དང༌། དགེ་འདུན་ལ་ཨ་རུ་དང༌། བསོད་སྙོམས་འགའ་ཕུལ་བ་དེ། མཚོན། ནད། མུ་གེ་ལ་མི་སྐྱེ་བར་བཤད་དོ། །དེ་གསུམ་དུས་ཇི་སྲིད་འབྱུང་ཞེ་ན། མཚོན་ཞག་བདུན་དང༌། ནད་ཞག་དང༌། ཟླ་བ་བདུན་བདུན་དང༌། མུ་གེ་དེ་གཉིས་དང་ལོ་བདུན་ཚན་རེ་དག་འབྱུང་སྟེ། གོ་རིམ་བཞིན་ནོ། །གསུམ་པ་འཇིག་པའི་བསྐལ་པའི་ཞར་བྱུང་ནི། འཇིག་པ་ནི་དུ་ཞེ་ན། ཉི་མ་བདུན་གྱི་མེ་དང་ཆར་པའི་ཆུ་དང་རླུང་རབ་ཏུ་འཁྲུགས་པ་རྣམས་ཀྱིས་འཇིག་པ་དག་ནི་གསུམ་ཡིན་ཏེ། བསམ་གཏན་གཉིས་པ་དང༌། སོགས་པས་གསུམ་པ་དང་བཞི་པ་ནི་འཇིག་པ་དེ་དག་གིས་རྩེ་མོ་སྟེ་ལྷག་མ་ཡིན་ཏེ་གོ་རིམ་བཞིན་ནོ། །ཅིའི་ཕྱིར་བསམ་གཏན་འོག་མ་གསུམ་འཇིག་པ་དེ་གསུམ་གྱིས་འཇིག་ཅེ་ན། སྣོད་དེ་དང་དེའི་སེམས་ཅན་གྱི་ནང་གི་སྐྱོན་དང་པོ་ན་རྟོག་དཔྱོད་མེ་ལྟ་བུ་དང༌། དགའ་བ་ཆུ་ལྟ་བུ་དང༌། དབུགས་འབྱུང་རྔུབ་ཀྱི་རླུང་ཡོད་པ་དང༌། ཆོས་མཐུན་པའི་ཕྱིར་རོ། །བསམ་གཏན་བཞི་པ་ན། འཇིག་པ་དེ་གསུམ་མེད་དེ་ནང་གི་སྐྱོན་དང་བྲལ་བས་མི་གཡོ་བའི་ཕྱིར་ཏེ། བྲལ་ཚུལ་འོག་ཏུ་འབྱུང་ངོ༌། །འོ་ན་བཞི་པའི་སྣོད་རྟག་གམ་ཞེ་ན་མི་རྟག་སྟེ། བཞི་པ་དེའི་གཞལ་མེད་ཁང་རྣམས་སྐར་མ་ལྟར་ཆད་ནས་མ་འབྲེལ་བས་ན་སེམས་ཅན་དང་བཅས་ཏེ་འབྱུང་ཞིང་འཇིག་པའི་ཕྱིར་རོ། །འཇིག་པ་དེ་གསུམ་གོ་རིམ་ཇི་ལྟར་ཞེ་ན། མེ་ཡིས་བར་མེད་པ་བདུན་ནོ། །དེའི་རྗེས་སུ་ཆུས་ལན་གཅིག་གོ །རིམ་པ་དེ་ལྟར་འབྱུང་བའི་ཆུ་བདུན་ཐལ་ནས་སླར་ཡང་མེ་ཡིས་བདུན་ནོ། །ས་སྡེར་ནི་མེས་གཅིག་ཏུ་བཤད་དོ། །དེ་ནས་ནི་མཇུག་ཏུ་རླུང་གིས་འཇིག་པ་ཡིན་ཏེ། དེ་ལྟར་མེས་འཇིག་པ་ལྔ་བཅུ་རྩ་དྲུག་དང༌། ཆུས་འཇིག་པ་བདུན་དང་རླུང་གིས་གཅིག་སྟེ། བསྐལ་ཆེན་རེ་བཞི་ནི་དགེ་རྒྱས་ཀྱི་ལྷའི་ཚེ་ཚད་དོ། །དེ་ཡང་རེ་གསུམ་དང་ང་རྒྱལ་ལ་དེར་ཉེ་བས་བཏགས་པ་སྟེ་སྣོད་ཆགས་འཇིག་གི་བར་བསྐལ་གཉིས་དང་སྟོང་པའི་ཉི་ཤུ་དེའི་ཚེ་ཚད་དུ་མི་རུང་བས་སོ། །འོད་གསལ་བའི་བསྐལ་ཆེན་བདུན་དང༌། བར་བསྐལ་ང་བརྒྱད་ལ་བརྒྱད་དུ་བཏགས་ཏེ་རྒྱུ་མཚན་སྔ་མ་ལྟར་རོ། །ཚངས་པ་ཆེན་པོའི་ཡང་སྣོད་ཆགས་འཇིག་གི་བར་བསྐལ་གཉིས་དེའི་ཚེའི་ཚད་དུ་མི་རུང་བས་བར་བསྐལ་ང་བརྒྱད་ལ་དྲུག་ཅུར་བཏགས་པའོ། །ཆོས་མངོན་པ་མཛོད་ཀྱི་འགྲེལ་པ་ཤེས་བྱ་རབ་གསལ་ལས་འཇིག་རྟེན་བསྟན་པ་ཞེས་བྱ་བ་སྟེ་གནས་གསུམ་པའི་དོན་བཤད་པའོ།། ༈ །བཞི་པ་ལས་བསྟན་པ་ལ་གསུམ་སྟེ། ཐམས་ཅད་ལས་ལས་བྱུང༌། ལས་ཉིད་གཏན་ལ་དབབ་པ། ཆོས་ཀྱི་རྣམ་གྲངས་བསྟན་པས་མཇུག་བསྡུ་བའོ། །དང་པོ་ནི། ཡང་སེམས་ཅན་དང་སྣོད་ཀྱི་འཇིག་རྟེན་རྣམ་པ་དུ་མ་དེ་སུས་བྱས་ཤེ་ན། བྱེད་པ་པོ་སོགས་སུ་ཡང་མེད་ཀྱི། སེམས་ཅན་གྱི་ལས་ལས་འཇིག་རྟེན་བཟང་ངན་འདྲེས་པ་སྣ་ཚོགས་སྐྱེས་སོ། །གཉིས་པ་ལ་གསུམ་སྟེ། ལས་ངོས་བཟུང༌། ལས་ཀྱི་རྣམ་བཞག ལས་མདོ་ལས་བྱུང་བའི་དོན་ནོ། །དང་པོ་ནི། ལས་དེ་ཅི་ཞེ་ན། ལས་དེ་ནི་མདོ་ལས། སེམས་པ་དང་དེས་བྱས་པའི་བསམ་པའི་ལས་གཉིས་སུ་གསུངས་སོ། །དེ་གཉིས་སྒོ་གསུམ་གྱི་ལས་ཡིན་པ་དེ་ལ་སེམས་པ་ནི་ཡིད་ཀྱི་ལས་ཡིན་ཏེ། སེམས་པ་དེ་བསྐྱེད་པའི་བསམ་པའི་ལས་ནི་ལུས་དང་ངག་གི་ལས་སོ། །འདི་ལ་བྱེ་བྲག་སྨྲ་བ་དེ་གསུམ་རིམ་བཞིན་ཀུན་སློང་དང་རྟེན་དང༌། དབང་པོས་ལས་སུ་འཇོག་སྟེ། ཡིད་ཀྱིས་ཀུན་ནས་བསླངས་པ་དང༌། ལུས་ལ་བརྟེན་པ་དག་གིས་ལས་དང༌། ངག་ཉིད་ལས་ཡིན་པས་སོ་ཞེའོ། །མདོ་སྡེ་པ་ནི་ལས་ནི་སེམས་པ་ཉིད་དེ། དེས་ཡིད་འཇིག་པར་བྱེད་པའམ་ཡིད་དང་མཚུངས་པར་ལྡན་པ་ནི་ཡིད་ཀྱི་ལས་དང༌། ལུས་ངག་འཇིག་པར་བྱེད་པ་ནི་སེམས་པའི་ལས་སུ་འཇོག་གོ །གཟུགས་ནི་ཇི་ལྟར་བརྟགས་ཀྱང་ལས་སུ་མི་འགྱུར་ཞིང་དགེ་བ་གཟུགས་ཅན་དུ་འདོད་པ་ཤཱཀྱའི་སྲས་མ་ཡིན་ཞེས་སོ། །ཀུན་ལས་བཏུས་སུ་སེམས་པ་དང་བསམ་པ་གཉིས་ཀ་ལ་སྒོ་གསུམ་གྱི་ལས་བཤད་པས། དེ་གཉིས་ཀྱི་ཁྱད་པར་རྒྱུའི་དང༌། དུས་ཀྱི་ཀུན་སློང་གི་སེམས་པ་ལ་བཞག་དགོས་ལ། གཉིས་པ་ལ་ལུས་ངག་ནི་དངོས་ཀྱི་ཀུན་སློང་དང༌། ཡིད་ཀྱི་ནི་ལྷན་ཅིག་པའི་སེམས་པར་འགྱུར་ཏེ། ལུས་ངག་གི་སྔ་ཕྱི་དང་ཡིད་ཀྱི་ལྷན་ཅིག་པར་བཤད་པས་སོ། །དེས་ན་སེམས་པའི་ལས་ནི་རྒྱུད་པའི་ཀུན་སློང་ཡིན་ནོ། །ལུས་དང་ངག་གི་ལས་དེ་དག་ལ་རྣམ་རིག་དང་རྣམ་རིག་མིན་པ་གཉིས་གཉིས་སོ། །གཉིས་པ་ལ་གསུམ་སྟེ། རིག་བྱེད་ཡིན་མིན་སོ་སོར་བཤད། ལས་གསུམ་སྤྱིའི་ཆོས་ཀྱི་ངོ་བོ། རིག་བྱེད་མ་ཡིན་པའི་རྣམ་བཞག་གི་རང་བཞིན་ནོ། །དང་པོ་ལ་གཉིས་ཏེ། རིག་བྱེད་དང་རིག་བྱེད་མིན་པའོ། །དང་པོ་ལ་གཉིས་ཏེ། ལུས་ཀྱི་རིག་བྱེད་དང་ངག་གི་རིག་བྱེད་བཤད་པའོ། །དང་པོ་ནི། ལུས་ཀྱི་རྣམ་པར་རིག་བྱེད་ནི། སེམས་ཀྱི་དབང་གི་ལུས་དེ་ལྟར་གནས་པའི་དབྱིབས་རྫས་སུ་གྲུབ་པ་ཞིག་བྱེ་བྲག་སྨྲ་བ་འདོད་དོ། །དེ་ཡང་རྣམ་སྨིན་སྐྱེས་དང་རྒྱས་བྱུང་མིན་གྱི་འཕྲལ་དུ་རྒྱུ་མཐུན་ལས་བྱུང་བའོ། །འོན་ཀྱང་རྣམ་སྨིན་སྐྱེས་ཀྱི་གསེབ་ཏུ་ཞུགས་པས་ལུས་ཆེར་མི་འགྲོ་ཞིང༌། ཕྲ་བས་ལུས་སྔར་བས་ལྕི་བ་དང༌། ཕྲ་བར་ཡང་མི་འགྱུར་རོ། །གནས་མ་བུས་བློ་དང་སྒྲ་དང་གློག་ལ་སོགས་པ་སྐད་ཅིག་མར་འདོད་ཀྱང་འདུས་བྱས་ཕལ་ཆེར་སྐད་ཅིག་མར་མི་འདོད་པས། འདིར་ལུས་ཀྱི་རིག་བྱེད་ཀྱང་ཡུལ་གང་དུ་སྐྱེས་པ་དེ་ཉིད་མ་ཞིག་པར་ཡུལ་གཞན་དུ་འཕོ་བའི་འགྲོ་བ་ཡིན་ཏེ། ལུས་གཡོ་བ་ཉིད་ལུས་ཀྱི་ལས་ཡིན་པས་སོ་ཞེས་ཟེར་རོ། །ལུས་ཀྱི་དབྱིབས་ཡུལ་གང་དུ་སྔར་སྐྱེས་པ་དེ་ཉིད་མ་ཞིག་པར་གཞན་དུ་འགྲོ་བ་མིན་པར་ཐལ། གང་དུ་སྐྱེས་པ་དེ་ཉིད་དུ་འཇིག་པའི་ཕྱིར། དེ་ཡང་གང་གི་ཕྱིར་ན་སྐད་ཅིག་ཡིན་པའི་ཕྱིར། འདུས་བྱས་ཡིན་པས་སོ། །གལ་ཏེ་འདུས་བྱས་ཐམས་ཅད་སྐད་ཅིག་མར་མི་འགྲུབ་བོ་ཞེ་ན། འགྲུབ་སྟེ། འཇིག་རྒྱུ་གཞན་ལ་ལྟོས་མེད་དུ་འཇིག་པའི་ཕྱིར། བློ་བཞིན་ནོ། །གལ་ཏེ་སྐྱེ་བ་རྒྱུ་ལ་ལྟོས་པ་བཞིན་འཇིག་པ་ཡང་རྒྱུ་དོན་གཞན་ལ་ལྟོས་སོ་ཞེ་ན། འོ་ན་འཇིག་རྒྱུ་ཕྱིས་འབྱུང་དོན་གཞན་མེད་པ་ལས་འདུས་བྱས་ཀྱི་ཆོས་འགའ་ཡང་འཇིག་པར་མི་འགྱུར་བར་ཐལ། འཇིག་པ་རྒྱུ་ཕྱིས་འབྱུང་དོན་གཞན་ལ་ལྟོས་པའི་ཕྱིར། སྐྱེ་བ་བཞིན་ནོ། །འདོད་ན་བློ་སྒྲ་སོགས་རྒྱུ་མེད་དུ་འཇིག་པར་འདོད་པ་དང་འགལ་ལོ། །གལ་ཏེ་ཤིང་ལ་སོགས་པ་འཇིག་པ་འཇིག་རྒྱུ་མེ་ལ་སོགས་པ་དང༌། འབྲེལ་པ་ལ་ལྟོས་པས་འཇིག་པ་རྒྱུ་དོན་གཞན་དང་ལྡན་ནོ་ཞེ་ན། མེས་བུད་ཤིང་འཇིག་ཅེས་པའི་དོན་ཅི་ལྟ་བུ་ཞིག་ལ་འདོད་ཅེས་དྲིས་པ་ན། སྔར་ལས་རྒྱུ་དོན་གཞན་དུ་མི་འདྲ་བར་བྱེད་པ་ཡིན་ནོ་ཞེ་ན། འོ་ན་བུམ་པ་སྐྱེད་བྱེད་ཀྱི་རྒྱུ་ཉིད། ཕྱིས་བུམ་པ་འཇིག་པ་པོར་གྱུར་པ་ཐལ། བུམ་པའི་སྔར་གྱི་ཁ་དོག་གི་རྒྱུ་གཞན་དང༌། གཞན་དུ་མི་འདྲ་བར་བྱེད་པའི་ཕྱིར། རྫ་སོ་བཏང་བའི་ཚེ་ན་མེའི་རྒྱུས་ཁ་དོག་གི་ཁྱད་པར་སྔ་མ་དང་བྲལ་ནས་ཕྱི་མ་གཞན་སྐྱེ་བར་མཐོང་བའི་ཕྱིར་འདིར་འཇིག་པ་རྒྱུ་མེད་ཅེས་པ་ནི་རྒྱུ་གཏན་མེད་མིན་གྱི་ཕྱིས་འབྱུང་དོན་གཞན་མེད་པ་སྟེ། དེས་ན་དངོས་པོ་རྣམས་སྐྱེ་བའི་རྒྱུ་ཉིད་ལས་འཇིག་པའི་ངང་ཚུལ་ཅན་དུ་སྐྱེ་བས། སྐད་ཅིག་མར་གྲུབ་པའི་ཕྱིར་སྔར་སྐྱེས་པ་དེ་ཉིད་མ་ཞིག་པར་ཕྱིས་གཞན་དུ་མེད་པས་ཡུལ་གཞན་དུ་འདབ་ཆགས་པར་གྱུར་པ་ལ་འགྲོ་བར་མངོན་པའི་ང་རྒྱལ་བྱེད་པར་ཟད་དོ། །མདོ་སྡེ་པ་ན་རེ། དབྱིབས་ཐོགས་བཅས་ཀྱི་གཟུགས་རྫས་སུ་གྲུབ་པ་མེད་དེ། ཁ་དོག་གི་གནས་སྐབས་ཚུལ་ལ་འདོགས་པས་སོ། །གལ་ཏེ་དབྱིབས་ཐོགས་བཅས་ཀྱི་གཟུགས་རྫས་སུ་གྲུབ་སྟེ། མིག་གི་ཡུལ་ཡིན་པའི་ཕྱིར། མིག་གིས་མཐོང་བ་ན་གྲུ་བཞི་སོགས་ཀྱི་བློ་སྐྱེ་བའི་ཕྱིར། ཞེ་ན། འོ་ན་ལུས་ཀྱི་དབང་པོའི་ཡུལ་དུའང་ཐལ་བར་འགྱུར་ཏེ། ལུས་ཀྱིས་རེག་པ་ན་ཡང་གྲུ་བཞི་སོགས་ཀྱི་བློ་སྐྱེ་བའི་ཕྱིར། འདོད་ན། དབང་པོ་རིགས་མི་མཐུན་པ་གཉིས་ཀྱི་གཟུང་བྱར་ཐལ་བར་འགྱུར་བ་ལས། མ་ཡིན་ཏེ། སྐྱེ་མཆེད་གཅིག་དབང་པོ་རིགས་མི་མཐུན་གཉིས་ཀྱིས་འཛིན་མི་སྲིད་པའི་ཕྱིར། ཡང་དབྱིབས་དེ་ནི་ཆོས་ཅན། ཐོགས་བཅས་ཀྱི་གཟུགས་རྫས་སུ་གྲུབ་པ་མ་ཡིན་ཏེ། རྡུལ་ཕྲ་རབ་ལ་མེད་པས་སོ། །འདི་ནི་རྡུལ་ཕྲ་རབ་ལ་དབྱིབས་མེད་པའི་དོན་ཡིན་ལ། འདིའི་ངོ་བོ་ནི་ལུས་ཀྱི་རྒྱུན་འགྲོ་བ་དང༌། ཕྱག་འཚལ་བ་ལ་སོགས་པ་ལུས་གཡོ་བའི་དབྱིབས་སོ། །ཅིའི་ཕྱིར་རྣམ་པར་རིག་བྱེད་ཅེས་བྱ་ཞེ་ན། སྐྱེས་བུ་འགྲོའོ་སྙམ་པའི་བློ་སྐྱེས་པ་ཡིན་ཏེ་འགྲོ་བཞིན་པ་ཡིན་པའི་ཕྱིར་ཞེས་སོགས་རང་གི་ཀུན་སློང་གཞན་ལ་རིག་པར་བྱེད་པས་རིག་བྱེད་དོ། །གཉིས་པ་ནི། ངག་གི་རྣམ་པར་རིག་བྱེད་ནི་ངག་གི་རང་བཞིན་གྱི་སྒྲ་སྟེ། རང་གི་ཀུན་སློང་རིག་པར་བྱེད་པའོ། །ནི་ཞེས་པ་ལུས་ཀྱི་རིག་བྱེད་ལས་དགར་བའོ། །གཉིས་པ་རིག་བྱེད་མ་ཡིན་པ་ལ་གཉིས་ཏེ། རྫས་སུ་ཡོད་པའི་སྒྲུབ་བྱེད། ཁྱད་པར་གྱི་ཆོས་རྣམ་པར་བཞག་པའོ། །དང་པོ་ནི། རིག་བྱེད་མིན་པའི་ངོ་བོ་ནི་བཤད་ཟིན་ལ། མདོ་སྡེ་པས་ནི་དེ་རྫས་སུ་མེད་དེ། སྡིག་པ་སྤོང་བར་ཁས་བླངས་ནས་དེ་མི་བྱེད་པ་ཙམ་གྱི་ཕྱིར་དང་འདས་པའི་འབྱུང་བ་རྫས་སུ་མེད་པ་ལ་བརྟེན་ནས་འདོགས་པའི་ཕྱིར་དང༌། གཟུགས་ཀྱི་མཚན་ཉིད་མེད་པའི་ཕྱིར་ཞེས་སོ། །བྱེ་བྲག་ཏུ་སྨྲ་བས་རྫས་སུ་འདོད་དེ། མདོ་ལས། བསྟན་ཡོད་ཐོགས་བཅས་དང༌། བསྟན་མེད་ཐོགས་བཅས་དང༌། བསྟན་མེད་ཐོགས་མེད་ཀྱི་གཟུགས་ཞེས་གསུམ་དུ་གསུངས་པའི་གསུམ་པ་ནི་འདི་མ་ཡིན་པ་མེད་པ་དང༌། དྲི་མེད་ཀྱི་གཟུགས་གསུངས་པ་ནི་ཟག་མེད་ཀྱི་སྡོམ་པ་ཁོ་ན་ཡིན་པ་དང༌། རྫས་ལས་བྱུང་བ་དང་རྫས་ལས་མ་བྱུང་བའི་བསོད་ནམས་ནི་ཡིད་གཞན་དང་ལྡན་ཡང་འཕེལ་བར་གསུངས་པའང་འདི་ཡིན་ཏེ། དེའི་ཚེ་རིག་བྱེད་དང་སེམས་པ་ནི་དགེ་བར་ཡོད་སྲིད་པས་སོ། །རང་གིས་མ་བྱས་པར་སྲོག་གཅོད་སོགས་ཀྱི་ལས་ལམ་འབྱུང་བར་གསུངས་པའི་ཕྱིར་དང༌། གཞན་ཡང་སོགས་པས་བསྡུས་པ་ཆོས་ཀྱི་སྐྱེ་མཆེད་གཟུགས་ཅན་མ་ཡིན་པ་ཁོ་ནར་མ་བསྟན་པར་སྐྱེ་མཆེད་བཅུ་གཟུགས་ཅན་དང་ཡིད་གཟུགས་ཅན་མ་ཡིན་པར་བསྟན་པས་ཆོས་ཀྱི་སྐྱེ་མཆེད་པའི་གཟུགས་འདི་ཡིན་པ་མེད་པའི་ཕྱིར་དང༌། མཉམ་བཞག་ཏུ་རིག་བྱེད་མི་འབྱུང་བས་ཡང་དག་པའི་ངག་ལ་སོགས་པ་མེད་པར་འགྱུར་བ་ལས་ལམ་གྱི་ཡན་ལག་བརྒྱད་དང་ལྡན་པར་བཤད་པ་དང༌། ཡང་རིག་བྱེད་མ་ཡིན་པ་མེད་ན་ཡིད་ཉོན་མོངས་པ་དང་ལྡན་པའི་ཚེ་དགེ་བ་མེད་པས་སོ་ཐར་གྱི་སྡོམ་པ་མེད་པར་འགྱུར་བ་དང༌། སྤོང་བ་ནི་འཆལ་ཚུལ་གྱི་གེགས་བྱེད་པས་ཆུའི་ཆུ་ལོན་ལྟར་གསུངས་ལ། རིག་བྱེད་མ་ཡིན་པའི་གཟུགས་མེད་ན་དེ་དག་ཀྱང་མི་འཐད་པས་ཞེས་འདོད་དོ། །དོན་བརྒྱད་པོ་དེ་རྣམས་ཀྱི་ལན་ལུང་གཞན་ལ་བརྟེན་ནས་སྟོན་ཏེ། དེ་ལ་ཐོགས་མེད་ཀྱིས་གཟུགས་ནི་ཏིང་ངེ་འཛིན་གྱི་ཡུལ་གྱི་གཟུགས་ཏེ། ཆོས་ཀྱི་སྐྱེ་མཆེད་པའི་གཟུགས་ཞེས་བསྟན་པ་དག་གོ །ཟག་མེད་ཀྱི་གཟུགས་ནི་ཟག་མེད་ཀྱི་ཏིང་ངེ་འཛིན་གྱི་ཡུལ་གྱི་གཟུགས་ཏེ། ས་སྡེར་དབང་འབྱོར་བའི་གཟུགས་ཞེས་བཤད་དོ། །རྫས་ལས་བྱུང་བའི་བསོད་ནམས་ཀྱང་གང་ཟག་དེའི་རྒྱུད་ལ་ཕྱིས་འབྲས་བུ་སྐྱེད་ནུས་ཀྱི་ས་བོན་འཕེལ་བའོ། །རང་གིས་མ་བྱས་པར་ལས་ལམ་འཕེལ་བར་གསུངས་པ་ཡང་ལུས་ངག་གི་སྦྱོར་བ་ལས་སྦྱོར་བ་པོ་ལ་ཕྱིས་སྐྱེད་ནུས་ཀྱི་རྒྱུར་གྱུར་པས་སྐྱེ་བ་དང་མཉམ་བཞག་ཏུ་ཡང་དག་པའི་ངག་ལ་སོགས་པ་གསུངས་པ་ནི་མཉམ་བཞག་ན་ངག་ལ་སོགས་པ་རྗེས་ཐོབ་ཏུ་འབྱུང་བའི་ནུས་པ་ཐོབ་པས། ཡན་ལག་བརྒྱད་ལྡན་དུ་འཇོག་པ་དང༌། ཡིད་ཉོན་མོངས་ཅན་གྱི་ཚེ་སོ་ཐར་གྱི་སྡོམ་པ་ཡོད་པ་ཡང་སྔོན་གོམས་པའི་དྲན་པའི་སྟོབས་ཀྱི་གཉེན་པོ་མངོན་དུ་གྱུར་པ་དང་ཆུའི་ཆུ་ལོན་ལྟར་གསུངས་པ་ཡང་ངོ་ཚ་ཤེས་པས་དམ་བཅས་པ་དྲན་ནས་འཆལ་ཚུལ་ལ་མི་འཇུག་པ་ལ་དགོངས་སོ། །གཞན་དུ་ན་བརྗོད་པའི་ཚེ་ཡང་ལྟུང་བ་མི་འབྱུང་བར་ཐལ་ཏེ། དེའི་གེགས་ཆུ་ལོན་ལྟ་བུའི་རིག་བྱེད་མ་ཡིན་པ་ཡོད་པས་སོ། །གཉིས་པ་ཁྱད་པར་གྱི་ཆོས་རྣམ་པར་བཞག་པ་ལ་བཞི་སྟེ། རྒྱུའི་ཁྱད་པར། སའི་ཁྱད་པར། ངོ་བོའི་ཁྱད་པར། རྒྱུའི་ཁྱད་པར་གཞན་བསྟན་པའོ། །དང་པོ་ནི། རིག་བྱེད་མ་ཡིན་པ་ནི། རིག་བྱེད་ལས་ཕྲ་བས་རིག་བྱེད་ཀྱི་རྒྱུ་ལས་གཞན་པའི་འབྱུང་བས་སྐྱེད་ལ། དེ་ཡང་འདོད་པར་གཏོགས་པའི་རྣམ་པར་རིག་བྱེད་མིན་པ་ནི། སྐད་ཅིག་མ་དང་པོ་སྡོམ་པ་རྣམས་ནོད་པའི་ཚེ། གཞིའི་འབྱུང་བ། ད་ལྟར་བ་ལས་སྐྱེ་ལ་དེ་ཕྱིན་ཆད་ནི་འཇུག་ཅིང་འཕེན་པའི་རྒྱུ་གཞིའི་འབྱུང་བ་འདས་པ་རེ་དང་རྗེས་སུ་འཇུག་ཅིང༌། རྟེན་པའི་རྒྱུ་ད་ལྟར་བའི་འབྱུང་བ་དང་གཉིས་ལས་སྐྱེས་ཏེ། དང་པོ་འཁོར་ལོ་འབུལ་བྱེད་ལག་པ་ལྟ་བུ། གཉིས་པ་རྟེན་པ་གཞི་ལྟ་བུའོ། །གཟུགས་ཅན་གཞན་ནི་གཞིའི་འབྱུང་བ་ད་ལྟར་བ་ལས་སྐྱེའོ། །གཉིས་པ་ནི། ཟག་བཅས་ཀྱི་ལུས་དང་ངག་གི་ལས་ནི་འདོད་པ་ནས་བསམ་གཏན་བཞི་པའི་བར་རང་རང་གི་ས་པའི་འབྱུང་བ་རྣམས་རྒྱུར་བྱས་ནས་སྐྱེ་ལ། ཟག་མེད་ཀྱི་སྡོམ་པ་ནི་རྟེན་ས་གང་དུ་སྐྱེས་པའི་ལུས་དེའི་འབྱུང་བ་ལས་སྐྱེ་སྟེ། ཁམས་སུ་མ་གཏོགས་པའི་འབྱུང་བ་མེད་པས་རང་སའི་འབྱུང་བ་མེད་ཅིང་འབྲས་གཟུགས་ཡིན་པས་འབྱུང་བའི་སྟོབས་ཀྱིས་སྐྱེ་བས་སོ། །གསུམ་པ་ནི། རྣམ་པར་རིག་བྱེད་མིན་པའི་གཟུགས་ཐོགས་བཅས་མ་ཡིན་པས་མ་ཟིན་པ་དང༌། དགེ་བ་དང་མི་དགེ་བ་གང་རུང་ངེས་ཤིང༌། རྡུལ་བསགས་པ་མ་ཡིན་པས་རྣམ་སྨིན་སྐྱེས་དང་རྒྱས་བྱུང་མ་ཡིན་གྱི་རྒྱུ་མཐུན་ལས་བྱུང་བ་དང་སེམས་ཅན་གྱི་རྒྱུད་དུ་གཏོགས་པས་སེམས་ཅན་དུ་སྟོན་པའོ། །ལུས་ཀྱི་རིག་བྱེད་ནི་ལུས་ཀྱི་འབྱུང་བ་དང་ཐ་མི་དད་པར་འཇུག་པས་ཟིན་པའོ། །ངག་ནི་དེ་ལྟར་མ་ཡིན་པས་མ་ཟིན་པའོ། །བཞི་པ་རྒྱུའི་ཁྱད་པར་གཞན་བསྟན་པ་ནི། འདོད་པའི་རིག་བྱེད་མིན་པ་ནི་རྒྱུ་མཐུན་ལས་བྱུང་བ་དང་ཟིན་པའི་འབྱུང་བ་ལས་སྐྱེས་པའི་རྒྱས་འབྱུང་དང་རྣམ་སྨིན་སྐྱེས་ཀྱི་འབྱུང་བས་སྐྱེས་པ་མ་ཡིན་ལ། སོ་ཐར་གྱི་སྤོང་བདུན་ནི་རེ་རེའང་འབྱུང་བ་བཞི་ཀ་ལས་སྐྱེའོ། །ཏིང་ངེ་འཛིན་ལས་སྐྱེས་པ་བསམ་གཏན་དང་ཟག་མེད་ཀྱི་སྡོམ་པ་དག་གི་རྒྱུའི་འབྱུང་བའང་སེམས་ཀྱི་རྗེས་འབྲང་ཡིན་པས་མ་ཟིན་པ་དང༌། རྒྱས་པའི་རྒྱུ་བཞིས་ཏིང་ངེ་འཛིན་ལས་བྱུང་བའོ། །དེ་གཉིས་ཀྱི་སྤོང་བདུན་ནི་འབྱུང་བ་བཞི་ཚན་ཐ་མི་དད་པ་གཅིག་ལས་སྐྱེའོ། །གཉིས་པ་ལས་གསུམ་སྤྱིའི་ཆོས་ཀྱི་ངོ་བོ་ལ་གཉིས་ཏེ། དངོས་ཀྱི་དོན་རྣམ་པར་བཞག་པ། ཀུན་སློང་བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ། དགེ་སོགས་ཀྱི་ཁྱད་པར། ཁམས་དང་སའི་ཁྱད་པར། ཆོས་གསུམ་སོ་སོའི་དབྱེ་བའོ། །དང་པོ་ནི། རྣམ་པར་རིག་བྱེད་མིན་པ་ནི་ལུང་དུ་བསྟན་པ་ཁོ་ནར་ངེས་ཀྱི་ལུང་བསྟན་མིན་པ་མེད་དེ། ལུང་མ་བསྟན་གྱི་སྟོབས་ཆུང་བས་རང་འགགས་པའི་མཇུག་ཐོགས་སུ་རྒྱུན་གྱིས་འབྱུང་བའི་ལས་སྟོབས་ལྡན་གསོག་མི་ནུས་པའི་ཕྱིར། དེ་ལས་གཞན་རྣམ་པར་རིག་བྱེད་དང་སེམས་པ་ལ་ནི་དགེ་མི་དགེ་ལུང་མ་བསྟན་གསུམ་ཀ་ཡོད་དོ། །གཉིས་པ་ནི། མི་དགེ་བའི་ལས་ནི་འདོད་པ་ཁོ་ན་ན་ཡོད་ཀྱི་གོང་མ་གཉིས་ན་མེད་དེ། མི་དགེ་བའི་རྩ་བ་ངོ་ཚ་མེད་པ་དང་ཁྲེལ་མེད་པ་གཉིས་སྤངས་པའི་ཕྱིར། ཀུན་ལས་བཏུས་སུ་ནི། འདི་གཉིས་ཉོན་མོངས་པ་ཀུན་དང་ལྷན་ཅིག་པར་བཤད་པས་གོང་མ་གཉིས་ལའང་ཡོད་པར་མངོན་ནོ། །ཡང་ན་འདོད་པའི་ཉོན་མོངས་པ་ཀུན་དང་ལྡན་པ་ཞེས་བཤད་དགོས་སོ། །གཟུགས་ཁམས་ན་དགེ་བའི་རྣམ་པར་རིག་བྱེད་མིན་པ་ཡོད་དེ། བསམ་གཏན་གྱི་སྡོམ་པ་ཡོད་པས་སོ། །འང་གི་སྒྲས་འདོད་པ་ན་དགེ་བའི་རིག་བྱེད་མིན་པ་ཡོད་པར་བསྟན་ཏོ། །གཟུགས་མེད་ན་གཟུགས་མེད་པས་ལུས་ངག་གི་སྡོམ་པའི་ངོ་བོ་མེད་ཅིང་ཐོབ་པ་ནི་ཡོད་དོ། །རྣམ་པར་རིག་བྱེད་ནི་དཔྱོད་པ་དང་བཅས་པས་འདོད་པ་དང་བསམ་གཏན་དང་པོ་ཁོ་ན་ན་ཡོད་ཀྱི། དེ་ཡན་ཆད་ན་མེད་དེ། ཀུན་སློང་རྟོག་དཔྱོད་མེད་པའི་ཕྱིར། བསམ་གཏན་གཉིས་པ་སོགས་ན་རིག་བྱེད་མེད་པར་མ་ཟད། འདོད་པ་ན་ཡང་སྒྲིབ་པའི་རིག་བྱེད་མེད་དེ། གང་གི་ཕྱིར་ན་ཀུན་སློང་མེད་པའི་ཕྱིར་ཏེ། བསམ་གཏན་གཉིས་པ་སོགས་ན་རྟོག་དཔྱོད་མེད་ལ། འདོད་པ་ན་སྒོམ་སྤང་གི་བསྒྲིབས་ལ་ལུང་མ་བསྟན་གྱི་སེམས་མེད་པའི་ཕྱིར། གལ་ཏེ་འདོད་པའི་མཐོང་སྤང་གི་སློང་བར་བྱེད་དོ་སྙམ་ན། འདོད་པ་ན་བསྒྲིབས་ལ་ལུང་མ་བསྟན་གྱི་མཐོང་སྤང་ནི་འཇིག་མཐར་གཉིས་ཁོ་ནར་ངེས་ལ་འདི་གཉིས་ཀ་ནང་ཁོ་ནར་བལྟ་བས་རིག་བྱེད་ཀྱི་ཀུན་སློང་དུ་མི་རུང་ངོ༌། །འདོད་པའི་ཁམས་འདིར་མཐོང་སྤང་གཞན་རྣམས་ནི་མི་དགེ་བ་ཁོ་ནའོ། །གཡོ་སྒྱུ་ཡང་འདོད་པའི་ཁམས་འདིར་མི་དགེ་བ་ཡིན་པས་དེས་ཀུན་ནས་བསླངས་པ་མི་དགེ་བ་ཉིད་དུ་འགྱུར་རོ། །དེས་ན་བསྒྲིབས་པའི་རིག་བྱེད་ནི། ཚངས་པའི་འཇིག་རྟེན་ཁོ་ན་ན་ཡོད་དེ། ཚངས་ཆེན་ན་གཡོས་ཀུན་ནས་བསླངས་པའི་ངག་གི་ལས་ཡོད་པས་སོ། །གསུམ་པ་ཆོས་གསུམ་སོ་སོར་དབྱེ་བ་ནི། ཅིའི་ཕྱིར་ཀུན་སློང་ཁོ་ན་ལས་དགེ་མི་དགེར་འགྱུར་རམ་ཞེ་ན། བཞི་བཞི་ཡོད་དེ། རེ་ཞིག་དགེ་བ་ལ་བཞི་ཡོད་པ་ལས། ཐར་པ་མྱང་འདས་པས་ནི། སྡུག་བསྔལ་ཐམས་ཅད་ཞི་བས་མཆོག་ཏུ་བདེ་བའི་ཕྱིར། དམ་པའི་དོན་དུ་དགེ་བ་སྟེ། ནད་མེད་པ་བཞིན་ནོ། །དགེ་བ་གསུམ་དང་ངོ་ཚ་ཁྲེལ་ཡོད་ནི་བདག་ཉིད་དམ་ངོ་བོ་ཉིད་ཀྱི་དགེ་བ་ཡིན་ཏེ། དགེ་བར་འགྱུར་བ་གཞན་ལ་ལྟོས་པ་མེད་པར་སྐྱེས་ཙམ་གྱི་དགེ་བར་ངེས་པའི་ཕྱིར། སྨན་བཞིན་ནོ། །ངོ་བོ་ཉིད་ཀྱི་དགེ་བ་དེ་དག་དང་མཚུངས་ལྡན་རྣམས་ནི་མཚུངས་ལྡན་གྱི་དགེ་བ་ཡིན་ཏེ། གྲོགས་ཀྱི་སྟོབས་ཀྱིས་དགེ་བར་འགྱུར་བའི་ཕྱིར། སྨན་དང་སྦྱར་བའི་བཏུང་བ་བཞིན་ནོ། །དེ་དག་གིས་ཀུན་ནས་བསླངས་པའི་ལུས་ངག་གི་བྱ་བ་དང་སོགས་པ་ཐོབ་པ་དང་སྙོམས་འཇུག་གཉིས་ནི་ཀུན་ནས་སློང་བའི་དགེ་བ་ཡིན་ཏེ། བསམ་པའི་དབང་གིས་དགེ་བར་འཇོག་པའི་ཕྱིར། སྨན་དང་སྦྱར་བའི་བཏུང་བ་ལས་བྱུང་བའི་འོ་མ་བཞིན་ནོ། །འགོག་པ་ནི་ཉེ་བར་ཞི་བའི་དགེ་བར་ཡང་ངོ༌། །མི་དགེ་བའི་དབྱེ་བ་ནི་དགེ་བ་རྣམ་པ་བཞི་བཟློག་པ་ལས་ཕྱེ་བ་སྟེ། འཁོར་བ་ནི་དོན་དམ་པར་མི་དགེ་བའོ། །དུག་གསུམ་དང་ངོ་ཚ་ཁྲེལ་མེད་ནི་ངོ་བོ་ཉིད་ཀྱི་མི་དགེ་བའོ། །དེ་དང་མཚུངས་ལྡན་ནི་མཚུངས་ལྡན་གྱི་སྒོ་ནས་སོ། །དེས་ཀུན་ནས་བསླངས་པའི་ལུས་ངག་གི་ལས་ནི་ཀུན་སློང་གི་མི་དགེ་བའོ། །ཐོབ་པ་ནི་རྗེས་སུ་འབྲེལ་བའི་དགེ་མི་ཡང་ངོ༌། །འཁོར་བ་ནི་ཟག་བཅས་ཐམས་ཅད་ཡིན་པས། མི་དགེ་བ་མཚན་ཉིད་པ་དང༌། བཏགས་པ་བ་ཅི་རིགས་པ་ཡོད་དོ། །དོན་དམ་པར་ལུང་དུ་མ་བསྟན་པ་ནི་བརྟན་པ་ནམ་མཁའ་དང་སོ་སོར་བརྟགས་མིན་གྱི་འགོག་པ་དག་གོ །ངོ་བོ་ཉིད་ཀྱི་ལུང་མ་བསྟན་ནི་འཇིག་ལྟ་དང་མཐར་འཛིན་གྱི་ལྟ་བ་ལྟ་བུའོ། །དེས་ཀུན་ནས་བསླངས་པ་ནི་ཀུན་སློང་གི་ལུང་མ་བསྟན་ཏོ། །གཉིས་པ་ཀུན་སློང་བྱེ་བྲག་ཏུ་བཤད་པ་ནི། གལ་ཏེ་མཐོང་སྤང་ནི་རིག་བྱེད་ཀུན་ནས་སློང་བྱེད་མིན་ན། འོ་ན་ཐུབ་པས་ལོག་པའི་ལྟ་བ་ལས་ལོག་པའི་ངག་དང་ལས་ཀྱི་མཐའ་འབྱུང་བར་གསུངས་པ་ཅི་ཞེ་ན། འདི་ལྟར་ཀུན་སློང་ནི་རྣམ་པ་གཉིས་ཏེ། རྒྱུའི་ཀུན་སློང་དང་བྱ་བ་དེའི་དུས་ཀྱི་ཀུན་སློང་ངོ༌། །འདིར་འདོད་པ་ན་སྒྲིབ་པའི་གཟུགས་ཀྱི་དུས་ཀྱི་ཀུན་སློང་མེད་པར་བཤད་ལ། མདོའི་དོན་ནི་རྒྱུའི་ཀུན་སློང་ཙམ་ལ་དགོངས་པས་མི་འགལ་ལོ། །ཀུན་སློང་གཉིས་པོ་དེ་ལས་དང་པོ་རྒྱུའི་ཀུན་སློང་ནི་འཕེན་བར་བྱེད་པས་རབ་ཏུ་འཇུག་བྱེད་ཡིན་ནོ། །ཀུན་སློང་གཉིས་པ་ནི་བྱ་བའི་དུས་སུ་བྱ་བ་དང་རྗེས་སུ་མཐུན་པར་འཇུག་པས་སོ། །ཀུན་སློང་གཉིས་པོ་ལ་མུ་བཞི་སྟེ། རབ་ཏུ་འཇུག་བྱེད་ཁོ་ན་དང༌། གཉིས་ཀ་ཡིན་པ་དང༌། རྗེས་སུ་འཇུག་བྱེད་ཁོ་ན་དང༌། གཉིས་ཀ་མ་ཡིན་པའོ། །དང་པོ་ནི་མཐོང་བས་སྤང་བར་བྱ་བའི་རྣམ་ཤེས་ནི་རྟོག་བཅས་སུ་ངེས་པས་རབ་ཏུ་འཇུག་བྱེད་ཡིན་ལ། ཁ་ནང་དུ་བལྟས་པས་རྗེས་སུ་འཇུག་བྱེད་ནི་མ་ཡིན་ནོ། །མུ་གཉིས་པ་ནི། ཡིད་ཀྱི་རྣམ་ཤེས་སྒོམ་སྤང་འཁོར་བཅས་ནི་རྟོག་བཅས་ཀྱང་ཡོད་ཁ་ཕྱིར་བལྟས་ཀྱང་ཡོད་པས་ཀུན་སློང་གཉིས་ཀ་ཡོད་པ་ཡིན་ནོ། །མུ་གསུམ་པ་ནི། སྒོ་ལྔའི་རྣམ་ཤེས་འཁོར་བཅས་ནི་རྟོག་མེད་ཁ་ཕྱིར་བལྟས་སུ་ངེས་པས་རྗེས་སུ་འཇུག་བྱེད་ཁོ་ནའོ། །དེ་ཡང་རབ་ཏུ་འཇུག་བྱེད་དགེ་སོགས་གསུམ་པོ་རེ་རེ་ལ་རྗེས་སུ་འཇུག་བྱེད་དགེ་སོགས་རྣམ་པ་གསུམ་གསུམ་དུ་འགྱུར་བས་དགུ་ཕྲུགས་སུ་འགྱུར་ཏེ། དཔེར་ན་སོ་ཐར་གྱི་སྡོམ་པ་རྒྱུའི་ཀུན་སློང་མི་དགེ་བ་ཡོད་ཀྱང་དུས་ཀྱི་ཀུན་སློང་དགེ་མི་དགེ་གཉིས་ཀ་ཡོད་པ་ལྟ་བུའོ། །འོ་ན་རྒྱུའི་ཀུན་སློང་གཙོ་ཆེའམ། དུས་ཀྱི་ཀུན་སློང་གཙོ་ཆེ། དང་པོ་ལྟར་ན་འདོད་པ་ན་སྒྲིབ་པའི་རིག་བྱེད་ཡོད་པར་འགྱུར་ཏེ། རྒྱུའི་ཀུན་སློང་སྒྲིབ་པ་ཡོད་པས་སོ། །གཉིས་པ་ལྟར་ན་སོ་ཐར་གྱི་སྡོམ་པ་མི་དགེ་བ་ཡོད་པར་འགྱུར་ཏེ། དུས་ཀྱི་ཀུན་སློང་ནི་དགེ་བ་ཡོད་པས་སོ་ཞེ་ན། ཀུན་སློང་གཉིས་ཀྱང་སྤང་བྱ་རིགས་ཐ་དད་ཀྱིས་མ་ཆོད་ན་རྒྱུའི་ཀུན་སློང་གཙོ་ཆེ་ལ། ཆོད་ན་དུས་ཀྱི་ཀུན་སློང་གཙོ་ཆེ་བས་གཉིས་ཀ་སྐྱོན་མེད་དོ། །ཐུབ་པའི་འཇུག་ཚུལ་ནི་འཇུག་བྱེད་གཉིས་ཀ་དགེ་བ་ལས་དགེ་བ་དང་ལུང་མ་བསྟན་དུ་འདྲ་བའམ་རབ་ཏུ་འཇུག་བྱེད་ལུང་མ་བསྟན་ལས་རྗེས་སུ་འཇུག་བྱེད་དགེ་བར་འགྱུར་གྱི། དགེ་བ་ལས་ལུང་མ་བསྟན་དུ་མི་འགྱུར་ཏེ། འདིའི་བསམ་པ་སྟོབས་དམན་པར་མི་འགྱུར་བས་སོ། །སྡེ་པ་གཞན་ནི་སངས་རྒྱས་ལ་ཐུགས་ལུང་མ་བསྟན་མེད་དེ། མདོར། གླང་ཆེན་གཤེགས་ནའང་མཉམ་པར་བཞག་ཅེས་གསུངས་པས་སོ། །ཟེར་ཏེ། ཐེག་ཆེན་དང་མཐུན་ནོ། །བྱེ་བྲག་སྨྲ་བ་ནི་དེ་དྲན་པས་མ་ཟིན་པ་མེད་པ་ལ་དགོངས་ཀྱི། རྣམ་སྨིན་སྐྱེས་དང་སྤྱོད་ལམ་པ་དང་སྤྲུལ་སེམས་ལུང་མ་བསྟན་མངའ་འོ། །ཞེས་འདོད་དོ། །མུ་བཞི་པ་ནི་རྣམ་པར་སྨིན་པ་ལས་སྐྱེས་པའི་སེམས་སྒོམ་སྤང་གི་ཆ་ནི་རབ་ཏུ་འཇུག་བྱེད་དང༌། རྗེས་སུ་འཇུག་བྱེད་གཉིས་ཀ་མིན་ཏེ་འབད་མེད་དུ་འཇུག་པས་སོ། །ཡེ་ཤེས་ཟག་མེད་ཀྱང་གཉིས་ཀ་མ་ཡིན་ཏེ། རྟོག་མེད་ཁ་ནང་བལྟས་སུ་ངེས་པས་སོ། །གསུམ་པ་རིག་བྱེད་མིན་པའི་རྣམ་བཞག་ལ་གཉིས་ཏེ། དབྱེ་བ་མདོར་བསྟན། རྣམ་བཞག་རྒྱས་པར་བཤད་པའོ། །དང་པོ་ནི། སྔར་བཤད་པའི་རྣམ་པ་རིག་བྱེད་མིན་པ་རྣམ་པ་གསུམ་དུ་ཤེས་པར་བྱ་སྟེ་འཆལ་ཚུལ་གྱི་རྒྱུན་སྡོམ་པའི་སྡོམ་པ་དང་དེའི་འགལ་ཟླ་ལུས་ངག་གི་ཉེས་སྤྱོད་ཆེན་པོ་སྡོམ་པ་མིན་པ་དང༌། དེ་གཉིས་ལས་གཞན་ཕན་གནོད་ཕྱོགས་རེ་བ་བར་མའོ། །དེ་ལ་སྡོམ་པ་ནི་བསྡུ་བ་ལས་སྤོང་བའི་སེམས་པ་སྤོང་བ་དེ་ལ་གང་དབང་བྱེད་པའི་དབང་པོ་ལྔ་དང་ལྡན་པ་གང་དེ་སྡོམ་པའོ། །ཞེས་སོ། །དེའང་བྱེ་བྲག་བཤད་མཛོད་དུ། སོ་ཐར་ནི་ཆོ་གས་བླངས་ཤིང་ལུས་ངག་གི་ལས་བཀག་པ་སྡོམ་པའི་སེམས་པ་སྟེ་ཕྱིས་རང་འདྲ་འབྱུང་བའི་ས་བོན་ཀུན་གཞི་ལ་བཞག་སྟེ། དེ་ནས་ངས་སྲོག་གཅོད་སོགས་སྤངས་པའོ་ཞེས་ཁས་བླངས་པ་དྲན་པས་འཛིན་ཞིང་བསླབ་པ་མི་འབྲལ་བའོ། །བསམ་གཏན་དང་ཟག་མེད་ཀྱི་སྡོམ་པ་ནི་རྗེས་ཐོབ་ཏུའང་མི་དགེ་བ་སྤོང་ཞིང་དགེ་བ་ལ་འཇུག་པའི་བསམ་པ་དང་གནས་པ་ཐོབ་པའི་སེམས་པའོ། །སྡོམ་མིན་ཡང་གནོད་པར་སྦྱོར་བའི་སེམས་པ་དང་ཁས་ལེན་པའི་སེམས་པ་སྟེ། དེ་མངོན་གྱུར་མེད་ཀྱང་སྡོམ་མིན་མི་གཏོང་སྟེ། གནོད་པ་བྱ་བའི་བསམ་པ་མ་ལོག་པས་སོ། །ཞེས་བཤད་དོ། །གཉིས་པ་ལ་གཉིས་ཏེ། སྡོམ་པ་ཁྱད་པར་དུ་བཤད། ཐམས་ཅད་ཐུན་མོང་དུ་བསྟན་པའོ། །དང་པོ་ལ་བསྟན་བཤད་གཉིས་ཀྱི་དང་པོ་ནི་སྡོམ་པ་གསུམ་སྟེ། ཆོས་འདི་པ་དག་གི་འདོད་པ་ན་སྤྱོད་པའི་ཚུལ་ཁྲིམས་སོ་སོར་ཐར་པ་དང༌། དེ་བཞིན་དུ་ཟག་མེད་ཀྱི་སྡོམ་པ་དང༌། གཟུགས་སྤྱོད་པའི་ཚུལ་ཁྲིམས་བསམ་གཏན་ལས་སྐྱེས་པའོ། །གཉིས་ལ་གསུམ་སྟེ། སོ་ཐར་དང༌། བསམ་གཏན་ཟག་མེད་དང༌། ཞར་ལ་བྱུང་བའི་དོན་ནོ། །དང་པོ་ནི། སོ་སོར་ཐར་པ་ཞེས་པ་རིགས་རྣམ་པ་བརྒྱད་དེ། དགེ་སློང་ཕ་མ། དགེ་སློབ་མ། དགེ་ཚུལ་ཕ་མ། དགེ་བསྙེན་ཕ་མ། བསྙེན་གནས་ཀྱི་སྡོམ་པའོ། །བརྒྱད་པོ་དེ་དག་ཀྱང་མིང་གི་སྒོ་ནས་ཐ་དད་དུ་ཕྱེ་ཡི་རྫས་སུ་རྣམ་པ་བཞིར་འདུས་པ་ཡིན་ཏེ། ཕའི་སྡོམ་པ་གསུམ་ལས་མའི་སྡོམ་པ་གསུམ་གཞན་མ་ཡིན་ཅིང༌། དགེ་སློབ་མའི་སྡོམ་པ་ཡང་དགེ་ཚུལ་མའི་སྡོམ་པའི་ཁོངས་སུ་འདུས་པས་སོ། །འོན་ཀྱང་རྩ་བའི་ཆོས་དྲུག་དང་རྗེས་མཐུན་གྱི་ཆོས་དྲུག་སྤོང་བའི་ཁྱད་པར་ཅུང་ཟད་ཡོད་དོ། །ཇི་ལྟར་དེ་དག་དེར་འདུས་པར་ཤེས་ཤེ་ན། ཕོ་མོའི་མཚན་ཕན་ཚུན་དུ་གྱུར་པ་ལས་མིང་ཙམ་འཕོ་ཡི། སྡོམ་པའི་ངོ་བོ་མི་འཕོ་བའི་ཕྱིར། གང་གིས་སྡོམ་པ་གསུམ་རིམ་གྱིས་བླངས་པ་ན་སོ་སོའི་སྤོང་བ་རྣམས་ཆ་ཐ་དད་པ་ཁོ་ནར་སྐྱེའམ་ཞེ་ན་སོ་སོའི་སྲོག་གཅོད་སྤོང་བ་སོགས་ཆ་ཐ་དད་པ་གསུམ་གསུམ་དུ་སྐྱེས་ཏེ། སྡོམ་པ་གསུམ་ཆར་གྱི་སྤོང་བ་རྣམས་མ་འདྲེས་པར་གནས་པར་འགྱུར་གྱི། ཕྱི་མ་བླངས་པས་སྔ་མ་མི་གཏོང་བར་བསྣན་པའི་ཚུལ་དུ་གནས་ཏེ། སྡོམ་པ་དེ་རྣམས་རྒྱུད་ལ་སོ་སོར་མ་འདྲེས་པར་གནས་པ་ལ་འགལ་བ་མེད་དོ། །འོ་ན་དགེ་བསྙེན་དང་དགེ་ཚུལ་དུ་ཡང་འགྱུར་རོ་ཞེ་ན། མི་འགྱུར་ཏེ། སྔ་མ་སྔ་མ་ལས་སྤོང་བ་ལྷག་པའི་ཕྱིར་རོ། །རང་རང་གི་སྡོམ་པ་ལ་གནས་པའི་ཆེད་དུ་ལུས་ངག་གི་སྤང་བྱ་སྲོག་གཅོད་སོགས་ལྔ་སྤོང་བ་ལ་དགེ་བསྙེན་དང༌། ཉིན་ཞག་གཅིག་ཏུ་བརྒྱད་སྤོང་བ་ལ་བསྙེན་གནས་དང༌། བཅུ་སྤོང་བ་ལ་དགེ་ཚུལ་དང༌། མི་མཐུན་ཕྱོགས་ཐམས་ཅད་སྤོང་བ་མནོས་པ་ལས་དགེ་སློང་ཉིད་དུ་འགྱུར་རོ། །དགེ་སློང་གི་བསླབ་པ་ཉིས་བརྒྱ་དང་ང་གསུམ་ནི། ཕམ་པ་བཞི། ལྷག་མ་བཅུ་གསུམ། སྤང་ལྟུང་སུམ་ཅུ། ལྟུང་བྱེད་འབའ་ཞིག་པ་དགུ་བཅུ། སོ་སོར་བཤགས་པ་བཞི། ཉེས་བྱས་བརྒྱ་དང་བཅུ་གཉིས་ཏེ། ལྟུང་བ་སྡེ་ལྔའི་གཉེན་པོ་ལས་ཕྱེ་བའོ། །འདི་དག་ལ་འཆལ་ཚུལ་གྱི་གདུང་བ་ལས་སྐྱོབ་ཅིང༌། བསིལ་བའི་གནས་ཡིན་པས་ཚུལ་ཁྲིམས་དང༌། མཁས་པས་བསྔགས་པས་ལེགས་སྤྱད་དང༌། བྱ་བའི་རང་བཞིན་ཡིན་པས་ལས། ལུས་ངག་སྡོམ་པས་སྡོམ་པ་ཞེས་བྱའོ། །སྡོམ་པ་ཐོབ་མ་ཐག་སྐད་ཅིག་དང་པོའི་རྣམ་པར་རིག་བྱེད་དང༌། རྣམ་པར་རིག་བྱེད་མིན་པ་དག་ནི་སྡིག་པ་ལས་དང་པོར་ཐར་པས་སོ་སོར་ཐར་པ་དང་བྱ་བ་སྟེ་ལས་ལམ་གྱི་དངོས་གཞི་ཡིན་ལ་དང་པོ་ཕྱིན་ཆད་ནི་སོ་སོ་ཐར་པའི་སྡོམ་པ་ཞེས་བརྗོད་དོ། །པྲ་ཏི་མོཀྵ་ཞེས་པ་ལ་པྲ་ཏི་ནི་སོ་སོ་ཡིན་ལ་མོ་ཀྵ་ནི་ཐར་པ་ལ་འཇུག་པའོ། །སོ་སོར་ཐར་པའི་སྡོམ་པ་དང་ལྡན་པའི་གང་ཟག་ནི་དགེ་བསྙེན་དང༌། བསྙེན་གནས་ནས་དགེ་སློང་གི་བར་བརྒྱད་དོ། །གཉིས་པ་བསམ་གཏན་དང་ཟག་མེད་བཤད་པ་ནི། བསམ་གཏན་ལས་སྐྱེས་པའི་སྡོམ་པ་ནི། ཉེར་བསྡོགས་དང་དངོས་གཞིས་བསྡུས་པའི་བསམ་གཏན་དེ་ལྡན་པའི་གང་ཟག་ལ་ངེས་པར་ལྡན་ནོ། །ཟག་མེད་ཀྱི་སྡོམ་པ་དང་ལྡན་པ་ནི་འཕགས་པའི་སེམས་ཅན་སློབ་མི་སློབ་རྣམས་སོ། །སྔར་སེམས་ཀྱི་རྗེས་འབྲང་དུ་བཤད་པའི་སྡོམ་པ་གཉིས་གང་ཞེ་ན། སྡོམ་པ་གསུམ་གྱི་གྲངས་ཀྱི་ཐ་མ་བསམ་གཏན་དང་ཟག་མེད་ཀྱི་སྡོམ་པ་གཉིས་ནི་སེམས་ཀྱི་རྗེས་འབྲང་སྟེ། ཏིང་ངེ་འཛིན་གྱི་རྗེས་སུ་འབྲང་བས་སོ། །སོ་ཐར་ནི་སེམས་མེད་ཀྱང་འཇུག་པས་སེམས་ཀྱི་རྗེས་འབྲང་མ་ཡིན་ནོ། །བར་ཆད་མེད་ལམ་དགུ་རྣམས་སུ་སྐྱེས་པའི་བསམ་གཏན་དང་ཟག་མེད་ཀྱི་སྡོམ་པ་དེ་གཉིས་ནི་ས་མི་ལྕོགས་མེད་ལ་བརྟེན་པ་ན་སྤོང་བའི་སྡོམ་པ་ཞེས་བྱ་སྟེ། འཆལ་ཚུལ་དང་དེའི་ཀུན་སློང་སེམས་ཀྱི་རྗེས་འབྲང་ཉོན་མོངས་པ་རྣམས་དངོས་སུ་སྤོང་བས་སོ། །ས་དང་ལམ་གཞན་ལ་བརྟེན་པ་ནི་རྒྱུ་མཚན་དེ་དག་མེད་པས་སྤོང་སྡོམ་ཞེས་མི་བྱའོ། །གསུམ་པ་ཞར་ལས་བྱུང་བའི་དོན་ནི་མདོ་ལས། ཡིད་ཀྱི་སྡོམ་པ་ལེགས་པ་སྟེ། །ཞེས་པ་དང༌། མིག་གི་དབང་པོ་སྡོམ་པ་ན་སྡོམ་སྟེ་གནས་ཞེས་གསུངས་པའི་སྡོམ་པ་དེ་གཉིས་གང་ཞེ་ན། བྱ་བ་དང་བྱ་བ་མིན་པ་ཤེས་བཞིན་དང༌། དེ་མི་བརྗེད་པའི་དྲན་པ་གཉིས་པོ་དག་གིས་མི་མཐུན་ཕྱོགས་ལས་སྡོམ་པར་བྱེད་པས་ཡིད་དང་དབང་པོའི་སྡོམ་པའོ། །གཉིས་པ་ཐུན་མོང་དུ་བཤད་པ་ལ་བཞི་སྟེ། དུས་ཇི་སྲིད་ལྡན་པ། ཚུལ་ཇི་ལྟར་ཐོབ་པ། རྒྱུ་གང་གིས་གཏོང་བ། བརྟེན་གང་དང་ལྡན་པའོ། །དང་པོ་ལ་བཞི་སྟེ། རིག་བྱེད་མིན་པའི་ལྡན་ཚུལ། རིག་བྱེད་ཀྱི་ལྡན་ཚུལ། སྡོམ་མིན་མིང་རྣམ་གྲངས། དེ་དག་གི་མུ་བཞི་བཤད་པའོ། །དང་པོ་ལ་སོ་ཐར་གྱི་སྡོམ་པ་ནི་སོ་སོ་ཐར་པ་ལ་གནས་པའི་གང་ཟག་དེས་སྡོམ་པ་མ་བཏང་བའི་བར་རྟག་ཏུ་ད་ལྟར་གྱི་རྣམ་པར་རིག་བྱེད་མིན་པ་དང་ལྡན་ཞིང༌། སྐད་ཅིག་དང་པོ་ཕྱིན་ཆད་མ་བཏང་གི་བར་དུ་འདས་པ་དང་ཡང་ལྡན་ནོ། །སྡོམ་མིན་ལ་གནས་པའི་གང་ཟག་ལའང་ལྡན་ཚུལ་དེ་དང་འདྲའོ། །བསམ་གཏན་གྱི་སྡོམ་པ་དང་ལྡན་པའི་སྐྱེ་འཕགས་གཉིས་ནི་མ་བཏང་བར་དུ་རྟག་ཏུ་འདས་མ་འོངས་གཉིས་དང་ལྡན་ཏེ། སྐད་ཅིག་དང་པོ་ལ་སྔོན་བཏང་བའི་འདས་པ་ཡང་ཐོབ་པས་སོ། །འཕགས་པས་ཟག་མེད་ཀྱི་སྡོམ་པ་ནི་སྐད་ཅིག་མ་དང་པོའི་ཚེ་སྔོན་ཟག་མེད་མ་སྐྱེས་པས་འདས་པ་དང་ལྡན་པ་མིན་ཞིང༌། དེ་ཕྱིན་ཆད་འདས་པ་དང་མ་འོངས་པ་དང་ཡང་ལྡན་ནོ། །འཇིག་རྟེན་པའི་མཉམ་བཞག་དང་འཕགས་ལམ་ལ་གནས་པའི་ཚེ་ནི་སྡོམ་པ་དེ་གཉིས་ད་ལྟར་བ་དང་ཡང་ལྡན་པས་དུས་གསུམ་ཆར་དང་ལྡན་ལ་མཉམ་བཞག་ལས་ལངས་པ་ནི་ད་ལྟར་གྱི་མི་ལྡན་ཏེ། སྡོམ་པ་དེ་གཉིས་སེམས་ཀྱི་རྗེས་འཇུག་ཡིན་པས་སོ། །སྡོམ་པ་དང་སྡོམ་མིན་གཉིས་ཀ་མིན་པའི་བར་མ་ལ་གནས་པའི་གང་ཟག་ལ་བར་མའི་རིག་བྱེད་མ་ཡིན་པ་གལ་ཏེ་ཡོད་ན་སྐད་ཅིག་དང་པོ་སྔ་ཕྱི་གཉིས་ཀྱི་བར་ད་ལྟར་གྱི་ཁོ་ན་དང་ལྡན་ཞིང༌། དེ་ཕྱིན་ཆད་འདས་པ་དང་ད་ལྟར་གྱི་དུས་གཉིས་དང་ལྡན་ནོ། །དེར་མ་ཟད་སྡོམ་མིན་ལ་གནས་པའང་བར་མ་དགེ་བའི་སེམས་ཀྱི་ཀུན་སློང་སྟོབས་ལྡན་གྱིས་མཆོད་རྟེན་ལ་ཕྱག་འཚལ་བ་སོགས་བྱེད་ན་དགེ་བའི་རིག་བྱེད་མིན་པ་དང་ལྡན་ལ་སྡོམ་པ་ལ་གནས་པ་ཡང༌། ཞེ་སྡང་དྲག་པོས་གཞན་ལ་བརྡེག་པ་སོགས་བྱེད་ན་བར་མ་མི་དགེ་བའི་རྣམ་པར་རིག་བྱེད་མིན་པ་དང་ལྡན་ཏེ། རིམ་བཞིན་ཇི་སྲིད་དུ་རབ་ཏུ་དང་བ་དང་ཉོན་མོངས་ཀྱི་ཤུགས་ལྡན་པ་དེ་སྲིད་ཀྱི་བར་དུ་རྟག་ཏུ་ད་ལྟར་བ་དང༌། དང་པོ་ཕྱིན་ཆད་འདས་པ་དང་ཡང་ལྡན་ནོ། །གཉིས་པ་རིག་བྱེད་ཀྱི་ལྡན་ཚུལ་ནི། རྣམ་པར་རིག་བྱེད་ནི་སྡོམ་པ་སྡོམ་མིན་བར་མ་ལ་གནས་པ་ཐམས་ཅད་ལ་ཇི་སྲིད་རིག་བྱེད་བྱེད་བཞིན་པ་དག་ལ་ད་ལྟར་བ་དང་ལྡན་ལ། འདི་ཡང་སྐད་ཅིག་དང་པོ་ཕྱིན་ཆད་ཇི་སྲིད་མ་བཏང་གི་བར་དུ་འདས་པ་དང་ཡང་ལྡན་ལ་མ་འོངས་པའི་རིག་བྱེད་དང་ལྡན་པ་མེད་དེ། ཀུན་སློང་གིས་མ་འོངས་པའི་རིག་བྱེད་ཀྱི་ཐོབ་པ་འདྲེན་མི་ནུས་པས་སོ། །དེ་ཡང་དགེ་མི་དགེའི་དབང་དུ་བྱས་ཀྱི་བསྒྲིབས་པ་དང་མ་བསྒྲིབས་པའི་རིག་བྱེད་ནི་འདས་པ་དང་ཡང་ལྡན་པ་མེད་དེ། ཆོས་ཉམ་ཆུང་བའི་ཐོབ་པའང་ཆོས་ཉམ་ཆུང་བས་སོ། །དེས་ན་ཐམས་ཅད་ད་ལྟར་བ་ཁོ་ན་དང་ལྡན་ནོ། །གསུམ་པ་སྡོམ་མིན་གྱི་རྣམ་གྲངས་ནི། སྡོམ་པ་མ་ཡིན་པའི་མིང་གི་རྣམ་གྲངས་ཏེ། ལུས་ངག་མི་སྡོམ་པས་སྡོམ་པ་མིན་པ་དང༌། དམ་པས་སྨད་ཅིང་འབྲས་བུ་ཡིད་དུ་མི་འོང་བས་ཉེས་སྤྱད་དང༌། ཚུལ་ཁྲིམས་ཀྱི་མི་མཐུན་ཕྱོགས་ཡིན་པས་འཆལ་བའི་ཚུལ་ཁྲིམས་དང༌། ལུས་ངག་གི་ལས་ཡིན་པས་ལས་དང༌། ལས་ཀྱི་དངོས་གཞིས་བསྡུས་པས་ལས་དེའི་ལམ་ཞེས་བྱའོ། །བཞི་པ་དེ་དག་གི་མུ་བཞི་དཔྱད་པ་ལ། རྣམ་པར་རིག་བྱེད་དང༌། རིག་བྱེད་མིན་པ་དང་ལྡན་པ་ལ་མུ་བཞི་སྟེ། སྡོམ་པ་དང་སྡོམ་མིན་གྱི་བར་མ་ལ་གནས་པས་ཀུན་སློང་གི་སེམས་ཞན་པས་དགེ་བའམ་མི་དགེ་བ་བྱེད་ན་རྣམ་པར་རིག་བྱེད་ཉིད་དང་ལྡན་གྱི་རིག་བྱེད་མིན་པ་དང་མི་ལྡན་པའོ། །ཚེ་འཕོས་ཏེ་སྔ་མའི་རིག་བྱེད་བཏང་བ་དང༌། ཚེ་འདིའི་རྣམ་རིག་མ་སྐྱེས་པའམ་ཉམས་པའི་འཕགས་པའི་གང་ཟག་ནི། ཟག་མེད་ཀྱི་རྣམ་པར་རིག་བྱེད་མིན་པ་དང་ལྡན་གྱི། རིག་བྱེད་དང་མི་ལྡན་པའོ། །རིག་བྱེད་དང་རིག་བྱེད་མིན་པ་གཉིས་ཀ་དང་ལྡན་པ་ནི་བར་མ་ལ་གནས་པས་སེམས་དྲང་པོས་དགེ་མི་དགེ་སོགས་བྱེད་པའོ། །གཉིས་ཀ་དང་མི་ལྡན་པ་ནི་གཟུགས་མེད་ཀྱི་སོ་སྐྱེ་སོགས་སོ། །གཉིས་པ་ཇི་ལྟར་འཐོབ་པའི་ཚུལ་ལ་གསུམ་སྟེ། སྡོམ་པའི་ཐོབ་ཚུལ་དང༌། སྡོམ་མིན་གྱི་ཐོབ་ཚུལ་དང༌། བར་མའི་ཐོབ་ཚུལ་ལོ། །དང་པོ་ལ། ཐོབ་ཚུལ་དངོས་དང༌། གང་ལས་ཐོབ་པ་གཉིས། དང་པོ་ལ་གཉིས་ཏེ། བསམ་གཏན་དང་ཟག་མེད་ཀྱི་ཐོབ་ཚུལ་དང༌། སོ་ཐར་ཐོབ་ཚུལ་ལོ། །དང་པོ་ནི། བསམ་གཏན་དང་ཟག་མེད་ཀྱི་སྡོམ་པ་དེ་དག་ཚུལ་ཇི་ལྟར་ཐོབ་ཅེ་ན། བསམ་གཏན་ལས་སྐྱེས་པའི་སྡོམ་པ་ནི་ཟག་བཅས་ཀྱི་བསམ་གཏན་གྱི་ཉེར་བསྡོགས་སམ་དངོས་གཞིའི་ས་ཐོབ་པ་ཉིད་ཀྱིས་འཐོབ་སྟེ། བསམ་གཏན་སས་བསྡུས་ཀྱི་སེམས་དང་ལྷན་ཅིག་ཏུ་འབྱུང་བའི་ཕྱིར་རོ། །ཟག་མེད་ཀྱི་སྡོམ་པ་ནི་འཕགས་པ་སྟེ། ཟག་མེད་ཀྱི་བསམ་གཏན་ས་དྲུག་གི་སེམས་ཐོབ་པ་དེས་འཐོབ་བོ། །གཉིས་པ་ལ་སྤྱིར་བསྟན་པ་ནི། སོ་སོ་ཐར་པའི་སྡོམ་པ་ཇི་ལྟར་ཐོབ་ཅེ་ན། སོ་སོ་ཐར་པ་ཅེས་པའི་སྡོམ་པ་ནི། སྡོམ་པ་སྦྱིན་པ་པོའི་གང་ཟག་གཞན་ནམ་དགེ་འདུན་གྱི་རྣམ་པར་རིག་བྱེད་ཀྱིས་འཐོབ་བོ། །སོགས་པའི་སྒྲས་ནི་བྱེ་བྲག་ཏུ་སྨྲ་བ་འདུལ་བ་པ་རྣམས་རྣམ་པ་བཅུས་བསྙེན་པར་རྫོགས་སོ། །ཞེས་བཤད་པ་བསྡུ་བ་སྟེ། ལུང་མ་མོ་ལས་འབྱུང་བ་ལྟར་འགྲེལ་པ་ལས་བཅུ་བསྟན་ཏོ། །གཉིས་པ་བྱེ་བྲག་ཏུ་བཤད་པ་ལ་གསུམ་སྟེ། ལེན་པའི་དུས་ཀྱི་ཁྱད་པར། བསྙེན་གནས་ཀྱི་ཁྱད་པར། དགེ་བསྙེན་གྱི་ཁྱད་པར་རོ། །དང་པོ་ནི། སོ་ཐར་གྱི་སྡོམ་པ་དུས་ཇི་སྲིད་དུ་བླང་ཞེ་ན། སོ་སོ་ཐར་པའི་སྡོམ་པ་རིགས་བདུན་ནི་ཇི་སྲད་འཚོ་བའི་བར་དུ་དང༌། ཉིན་ཞག་གཅིག་ཏུ་ཡང་དག་པར་བླང་བར་བྱ་སྟེ། དུས་ཀྱི་མཐའ་ནི་སྲོག་དང་ཉིན་ཞག་གི་མཐའ་གཉིས་ཡིན་པས་སོ། །སྡོམ་མིན་གྱི་དུས་ངེས་པ་གང་ཞེ་ན། ལུས་ངག་གི་བྱ་བ་ལོག་པར་ཞུགས་པའི་རྒྱུས་ཐོབ་པས་ཇི་སྲིད་འཚོ་བའི་རིགས་ཡིན་ལ། ཉིན་ཞག་གཅིག་པའི་སྡོམ་མིན་མེད་དེ། དེ་ནི་བསྙེན་གནས་དེ་ལྟར་དུ་ཉིན་ཞག་གཅིག་ཏུ་ནོད་པ་དོན་མེད་ཅེས་གྲག་གོ །གྲག་ཅེས་པ་ཟུར་ཟ་བ་སྟེ་དུས་རེ་ཞིག་པ་ཡང་ཡོད་པར་སྟོན་པའོ། །མདོ་སྡེ་པ་ནི་སྡོམ་མིན་གྱི་ངོ་བོ་སྡུག་པ་བྱ་བའི་སེམས་པ་ས་བོན་དང་བཅས་པ་སྟེ། ཤན་པ་སོགས་སེམས་དགེ་བ་ལ་གནས་པའི་ཚེ་ཡང་སྡིག་པ་བྱ་བའི་སེམས་པ་ས་བོན་དང་བཅས་པ་མ་སྤངས་པས་སྡོམ་མིན་དེ་དང་ལྡན་པར་འདོད་དེ། ཐེག་ཆེན་དང་མཐུན་ནོ། །གཉིས་པ་ནི། གལ་ཏེ་བསྙེན་གནས་ཉིན་ཞག་གཅིག་ཏུ་ནོད་ན་ཇི་ལྟར་ནོད་པར་བྱ་ཞེ་ན། ནད་པ་མ་ཡིན་པས། དམའ་བར་འདུག་ཅིང་ཐལ་མོ་སྦྱར་ཏེ་འབོགས་པ་པོས་སྨྲས་པའི་རྗེས་སུ་བཟླས་པ་ཡིས། ནོད་ཅིང་རྒྱན་ནར་མ་ལས་གཞན་པས་མི་བརྒྱན་པར་བསྲུང་དུས་ནི་སང་ནམ་ལངས་ཀྱི་བར་དུའོ། །དགྲ་བཅོམ་པ་དང་ཉེ་བར་གནས་པ་བསྙེན་གནས་ཏེ་ཡན་ལག་བརྒྱད་ཚང་བར་ནོད་པར་བྱའོ། །ལེན་དུས་ནི་ནངས་པར་སྔ་དྲོ་ཟས་མ་ཟོས་པའི་དུས་སུའོ། །ཡུལ་ནི་གཞན་ལས་སོ། །གང་གིས་ཚེས་བརྒྱད་ལ་རྟག་ཏུ་བསྙེན་གནས་བསྲུང་བའི་ངེས་པ་བྱ་བ་དེས་ནི་ཟས་ཟོས་ཀྱང་གཞན་ལས་ནོད་པར་བྱ་སྟེ། རྐྱེན་ཡོད་ཀྱང་མི་འདའ་བའི་དགོས་པ་ཡོད་པས་སོ། །གནས་འཇོག་གིས་ཞུས་པར། དགེ་སློང་ངམ་ཁྲིམས་ཤེས་པ་གཅིག་གི་གན་དུ་སོང་སྟེ། ཞེས་དང༌། འདུལ་བ་ལུང་དུ་ཁྱིམ་བདག་མགོན་མེད་ཟས་སྦྱིན་གྱིས་མགྲོན་པོ་ལ་བསྙེན་གནས་ཕོག་པར་བཤད་པས་དགེ་བསྙེན་ལས་ཀྱང་བླང་དུ་རུང་ལ། དགེ་བསྙེན་སྡོམ་བརྒྱད་དུ། དགེ་བསྙེན་ཡང་དགེ་བསྙེན་ལས་བླང་བར་བཤད་དོ། །བསྡུ་བ་ལས། ཁྱིམ་པའི་སྡོམ་པ་རང་གིས་ཀྱང་ལེན་པར་གསུངས་སོ། །ཡན་ལག་བརྒྱད་གང་ཞེ་ན། རྩ་བ་བཞི་དང༌། ཆང་དང༌། གར་སོགས་ཕྲེང་སོགས་དང༌། མལ་ཆེ་མཐོ་དང༌། ཕྱི་དྲོའི་ཁ་ཟས་ཏེ་ཡན་ལག་བཞི་སྤོང་བའོ། །ཅིའི་ཕྱིར་ཡན་ལག་བརྒྱད་ནོད་ཅེ་ན། རང་བཞིན་གྱི་ཁ་ན་མ་ཐོ་བ་སྤོང་བ་ཚུལ་ཁྲིམས་ཀྱི་ཡན་ལག་བཞི་དང༌། བག་ཡོད་པའི་ཡན་ལག་གཅིག་དང༌། བརྟུལ་ཞུགས་ཀྱི་ཡན་ལག་གསུམ་སྟེ་རིམ་པ་བཞིན་ནོ། །ཅིའི་ཕྱིར་བག་ཡོད་དང་བརྟུལ་ཞུགས་ཀྱི་ཡན་ལག་མ་ནོད་ན་ཉེས་པ་ཅི་ཡོད་ཅེ་ན། ཆང་འཐུང་བ་དེ་ཡིས་དྲན་པ་ཉམས་པ་དང༌། གར་སོགས་གསུམ་གྱིས་དྲེགས་པར་འགྱུར་ལ། དེ་ལྟ་ན་འཆལ་ཚུལ་ཐག་མི་རིང་བས་སོ། །གར་སོགས་ཕྲེང་སོགས་རབ་བྱུང་ལ་ཚུལ་དང་མི་མཐུན་པས། ཡན་ལག་གཉིས་སུ་ཕྱེ་ལ། ཁྱིམ་པ་ལ་དེ་ལྟ་མིན་པས་གཅིག་ཏུ་བསྡུས་སོ། །གསེར་དངུལ་ལེན་པ་མ་བཅས་པ་ནི་ཁྱིམ་པ་ལ་གསོག་འཇོག་ཚུལ་དང་མི་མཐུན་པ་མེད་པས་སོ། །བསྙེན་གནས་འདི་དགེ་བསྙེན་ལས་གཞན་ལ་ཡོད་དམ་མེད་ཅེ་ན། དགེ་བསྙེན་ལས་གཞན་པའི་ཁྱིམ་པ་ལ་ཡང་ཡོད་མོད་ཀྱི་དཀོན་མཆོག་གསུམ་ལ་སྐྱབས་སུ་མ་སོང་བ་ལ་མེད་དོ། །གསུམ་པ་དགེ་བསྙེན་གྱི་ཁྱད་པར་བཤད་པ་ལྔ་སྟེ། ལུང་གི་དོན་བཤད། མདོ་དང་འགལ་བ་སྤང༌། སྡོམ་པ་ཆེ་ཆུང་གི་ཁྱད་པར། སྐྱབས་གནས་བཤད་པ། ཡན་ལག་གི་ཁྱད་པར་རོ། །དང་པོ་ནི། མདོ་ལས། མིང་ཆེན། འདི་ལྟར་ཁྱིམ་པ་གོས་དཀར་པོ་བགོས་པ་ཕོའི་དབང་པོ་དང་ལྡན་པ་ཞིག་སངས་རྒྱས་ལ་སྐྱབས་སུ་འགྲོ། ཆོས་དང་དགེ་འདུན་ལ་སྐྱབས་སུ་འགྲོ་ཞིང༌། བདག་ལ་དགེ་བསྙེན་དུ་གཟུང་དུ་གསོལ། ཞེས་ཚིག་ཏུ་སྨྲ་ན། འདི་ཙམ་གྱིས་དགེ་བསྙེན་དུ་འགྱུར་རོ། །ཞེས་གསུངས་པ་དེ་ཅིའི་ཕྱིར་སྐྱབས་འགྲོ་ཁོ་ནས་དགེ་བསྙེན་དུ་འགྱུར་རམ་ཞེ་ན། ཉི་འོག་པས་འགྱུར་རོ་ཞེས་ཟེར་རོ། །ཁ་ཆེ་བས་མི་འགྱུར་ཏེ། ལུང་གི་དོན་ནི་དགེ་བསྙེན་ཉིད་དུ་གཟུང་དུ་གསོལ་ཞེས་དེ་ཕན་ཆད་ནམ་འཚོའི་བར་དུ་སྲོག་གཅོད་སྤོང་ངོ༌། །ཞེས་ཁས་བླངས་པ་ཁོ་ན་ལས་འདིའི་སྡོམ་པ་སྐྱེའོ། །འོན་ཀྱང་བསླབ་པའི་གཞི་བསྟན་པ་ནི་དེ་ཤེས་པའི་ཆེད་དུ་སྟེ། དཔེར་ན་དགེ་སློང་དང་དགེ་ཚུལ་གྱི་སྡོམ་པ་ཐོབ་ཟིན་ཀྱང་ཤེས་པའི་ཆེད་དུ་བསླབ་པའི་གཞི་བརྗོད་པ་བཞིན་ནོ། །ཞེའོ། །གཉིས་པ་ནི། གལ་ཏེ་དགེ་བསྙེན་ཐམས་ཅད་མི་མཐུན་ཕྱོགས་ཐམས་ཅད་ལས་ལུས་ངག་སྡོམ་པའི་ཡན་ལག་ལྔ་ཆར་ཚང་བ་ལ་གནས་པ་དགོས་པ་ཡིན་ན། སྟོན་པས་བསླབ་གཞི་གཅིག་བསྲུང་བ་རྣམས་སྣ་གཅིག་སྤྱོད་པ་དང༌། སོགས་པས་གཉིས་བསྲུང་བ་ཕྱོགས་གཅིག་བསྲུང་བ་དང༌། གསུམ་མམ་བཞི་བསྲུང་ན་ཕལ་ཆེར་སྤྱོད་པ་དང༌། ལྔ་ཆར་བསྲུང་ན་ཡོངས་སུ་རྫོགས་པའི་དགེ་བསྙེན་ཞེས་གསུངས་པ་ཇི་ལྟ་བུ་ཞེ་ན། དེ་ནི་དང་པོ་ཡོངས་རྫོགས་བླངས་པ་ཕྱིས་ཡན་ལག་ཁ་ཅིག་ཉམས་ཀྱང་ལྷག་མ་དེ་དང་དེ་བསྲུང་བ་ལས་དེ་སྤྱོད་པར་གསུངས་པའོ་ཞེའོ། །གྲག་ཅེས་པ་ནི། མདོ་ལས་འདས་པར་སྟོན་པ་སྟེ། སྲོག་གཅོད་སྤོང་ཞེས་པ་ནི་གང་དུ་ཡང་མི་འབྱུང་ཞིང༌། ཉམས་ན་སྣ་གཅིག་སྤྱོད་པ་སོགས་ཞི་བ་ཉིད་ཀྱང་མི་འཐད་ན། གཞན་ལྟ་ཅི་སྨོས། དེས་ན་དང་པོ་ཉིད་དུ་བསླབ་གཞི་དེ་དང་དེ་བླངས་ཏེ། བསྲུང་བ་རྣམས་སྣ་གཅིག་སྤྱོད་པ་སོགས་སོ་ཞེས་ཉི་འོག་པ་ལ་སོགས་འདོད་དོ། །སྤྱིར་གསུང་རབ་ཏུ་དགེ་བསྙེན་བདུན་འབྱུང་སྟེ། སྐྱབས་སུ་འཛིན་པ། སྣ་གཅིག་སྤྱོད་པ། ཕྱོགས་གཅིག་སྤྱོད་པ། ཕལ་ཆེར་སྤྱོད་པ། ཡོངས་རྫོགས། ཚངས་སྤྱོད། བསྙེན་གནས་ཡན་ལག་བརྒྱད་ཇི་སྲིད་འཚོ་བའི་བར་དུ་བླངས་ཏེ་བསྲུང་བ་གོ་མིའི་དགེ་བསྙེན་ནོ། །དེ་ལ་དང་པོ་ལྔ་མིང་ཆེན་གྱི་མདོ་དང༌། དྲུག་པ་ལུང་རྣམ་འབྱེད། བདུན་པ་ཀུན་ཏུ་རྒྱུ་སེན་རིངས་ཀྱིས་ཞུས་པར་དེས་དེ་འདྲ་བའི་སྡོམ་པ་སངས་རྒྱས་ལས་བླང་བར་གསུངས་པའི་ཕྱིར། ཁ་ཆེ་བ་ནི་ལྔ་པ་དང༌། དྲུག་པ་མ་གཏོགས་པ་གཞན་མི་འདོད་ལ་འདིར་ནི་ཡོངས་རྫོགས་ཀྱི་དབང་དུ་བྱས་པའོ། །གསུམ་པ་ནི། སྡོམ་པ་ཆུང་ངུ་དང་སོགས་པ་འབྲིང་དང་ཆེན་པོར་འགྱུར་བའི་རྒྱུའི་གཙོ་བོ་ནི། དད་སོགས་ཆེ་ཆུང་དང་ལྡན་པའི་ཡིད་ཇི་བཞིན་གྱི་དབང་གིས་ཏེ། དེས་ན་སོ་ཐར་གྱི་སྡོམ་པ་དགྲ་བཅོམ་ལ་ཆུང་ལ། སོ་སྐྱེ་ལ་ཆེ་བའང་ཡོད་དོ། །བཞི་པ་ནི། སྐྱབས་འགྲོ་ནི་སྡོམ་པ་བླང་བ་ཐམས་ཅད་ཀྱི་སྔོན་དུ་འགྲོ་བས་གང་ཞིག་དཀོན་མཆོག་གསུམ་ལ་སྐྱབས་སུ་འགྲོ་བའི་ཡུལ་སངས་རྒྱས་ནི་གང་བསྙེན་པས་སངས་རྒྱས་སུ་འཇོག་པར་བྱེད་པའི་ཆོས་མི་སློབ་པའི་ལམ་ཆོས་སྐུ་དང༌། དགེ་འདུན་ནི་གང་ཐོབ་པས་འཕགས་པའི་དགེ་འདུན་དུ་འཇོག་པར་བྱེད་པའི་ཆོས་སངས་རྒྱས་ལས་གཞན་པའི་སློབ་མི་སློབ་གཉིས་ཀའི་ལམ་བདེན་དང༌། ཆོས་ནི་མྱ་ངན་དང་སྡུག་བསྔལ་རྒྱུ་དང་བཅས་པ་ལས་འདས་པའི་སོ་སོར་བརྟགས་འགོག་གོ །སངས་རྒྱས་དང་དགེ་འདུན་གྱི་རྟེན་གཟུགས་སྐུ་ནི་ཟག་བཅས་ཡིན་པས་སྐྱབས་གནས་མིན་ཞེའོ། །སློབ་དཔོན་ནི་དེ་ལྟར་ན་འཇིག་རྟེན་པའི་སེམས་ལ་གནས་པ་ན་སངས་རྒྱས་དང་དགྲ་བཅོམ་མ་ཡིན་པར་འགྱུར་ཞིང༌། དགེ་སློང་དུ་བྱེད་པའི་ཚུལ་ཁྲིམས་ཁོ་ན་དགེ་སློང་དུ་འགྱུར་ཞེས་བརྗོད་དོ། །ཆོས་དཀོན་མཆོག་གི་འདོད་ཚུལ་འདྲ་ལ། སངས་རྒྱས་དང་དགེ་འདུན་ནི་རྟེན་གང་ཟག་ཀྱང་སངས་རྒྱས་དང་དགེ་འདུན་དུ་བཞེད་དོ། །སྐྱབས་འགྲོའི་ངོ་བོ་ནི་འཇིགས་པ་ལས་ཐར་པའི་དོན་དུ་ཡུལ་དམ་པ་ལ་བརྟེན་པར་ཁས་ལེན་ཅིང་བློ་གཏོད་པའོ། །འགྲེལ་པར་ངག་གི་རིག་བྱེད་དུ་བཤད་པ་ནི་སྐྱབས་འགྲོ་ནོད་པའི་དུས་ཀྱི་དབང་དུ་བྱས་པའོ། །སྐྱབས་ཀྱི་དོན་ནི་དེ་ལ་བརྟེན་ནས་འཇིགས་པ་ཀུན་ལས་ཐར་པར་འགྱུར་བའོ། །ལྔ་པ་ཡན་ལག་གི་ཁྱད་པར་ནི། སྡོམ་པ་གཞན་ལ་མི་ཚངས་སྤྱོད་སྤོང་བ་ཡན་ལག་ཏུ་བཞག་ལ། དགེ་བསྙེན་ལ་འདོད་ལོག་སྤོང་བ་ཡན་ལག་ཏུ་འཇོག་པའི་ཁྱད་པར་ཅི་ཞེ་ན། ལོག་གཡེམ་ནི་གཞན་གྱི་ཆུང་མ་སུན་འབྱིན་ཞིང་ངན་སོང་གི་རྒྱུ་ཡིན་པས་ཤིན་ཏུ་སྨད་པའི་ཕྱིར་དང༌། ཁྱིམ་པས་སྡོམ་སླ་བའི་ཕྱིར་དང༌། འཕགས་པས་ཚེ་རབས་གཞན་དུ་ཡང་མི་བྱེད་པའི་སྡོམ་པ་ཐོབ་ཅིང༌། མི་ཚངས་སྤྱོད་དེ་ལྟ་མིན་པས་སོ། །དགེ་བསྙེན་གྱིས་ཕྱིས་ཆུང་མ་ལེན་ན་སྡོམ་པ་མི་ཉམས་སམ་ཞེ་ན། མི་ཉམས་ཏེ། སྡོམ་པ་ནི་ཇི་ལྟར་བླངས་པ་བཞིན་ཐོབ་པས་འདོད་ལོག་སྤོང་བར་ཁས་ལེན་གྱི། རྒྱུད་འདི་ལ་མི་ཚངས་སྤྱོད་སྤོང་ངོ་ཞེས་ནི་མ་ཡིན་པས་སོ། །ངག་གི་ཉེས་པ་བཞི་ལས་རྫུན་སྤོང་བ་ཁོ་ན་ཡན་ལག་ཏུ་བཞག་པ་ཅི་ཞེ་ན། ཇི་སྐད་བཤད་པའི་སྨད་པ་སོགས་གསུམ་དང༌། ཡང་བསླབ་པ་ཐམས་ཅད་ལས་འདས་པར་གྱུར་ན་བསླབ་པ་ལས་འདས་སམ་མ་འདས་ཞེས་དྲིས་པ་ན་བདག་གིས་མ་བྱས་ཞེས་རྫུན་དུ་ཐལ་བར་འགྱུར་བའི་ཕྱིར་ཏེ། འདས་ན་བཤགས་པའི་དོན་ནོ། །བཅས་པའི་ཁ་ན་མ་ཐོ་བ་རྣམས་ལས་གཞན་བསླབ་པའི་ཡན་ལག་ཏུ་མ་བཞག་པར་མྱོས་འགྱུར་སྤོང་བ་ཁོ་ན་འཇོག་པ་ཅི་ཞེ་ན། བཅས་པའི་ཁ་ན་མ་ཐོ་བ་རྣམས་ལས་མྱོས་འགྱུར་སྤོང་བ་ཁོ་ན་ཡན་ལག་ཏུ་བཞག་པའི་དོན་ནི། དེ་ལས་ཡན་ལག་གཞན་ཡང་བསྲུང་བའི་ཆེད་དུའོ། །ཉན་ཐོས་འདུལ་བ་པ་འགའ་ཞིག་ནི་མྱོས་འགྱུར་འཐུང་བ་རང་བཞིན་གྱི་ཁ་ན་མ་ཐོ་བར་འདོད་ལ། མངོན་པ་བ་བཅས་པའི་ཁ་ན་མ་ཐོ་བར་འདོད་དེ། འདིའི་དགག་བྱའི་གཙོ་བོ་ནི་ཤེས་པ་མྱོས་པ་ཡིན་ལ། གཉེན་པོའི་བློས་ཀྱང་བཏུང་བར་ནུས་པའི་ཕྱིར་རོ། །འདི་གཉིས་ཀྱི་ཁྱད་པར་སློབ་དཔོན་ནི། སེམས་ཉོན་མོངས་ཅན་ཁོ་ནས་སྤྱོད་པ་རང་བཞིན་གྱི་ཁ་ན་མ་ཐོ་བ་ཡིན་ལ། འདི་ནི་ཉོན་མོངས་ཅན་མིན་པའི་བློས་ཀྱང་སྤྱོད་པར་ནུས་སོ། །འོན་ཀྱང་ཉེས་པ་གཞན་སྤང་བའི་དོན་དུ་བཀག་གོ །ཞེས་འདོད་དོ། །གཉིས་པ་གང་ལས་ཐོབ་པ་ནི། ཅི་སྡོམ་པ་གསུམ་གཞི་གང་ལས་གཅིག་ཐོབ་པ་དེ་ལས་ལྷག་མ་དག་ཐོབ་བམ་ཞེ་ན། མིན་ཏེ། འདོད་པར་གཏོགས་པའི་སོ་ཐར་ནི། སྤང་བྱའི་སྦྱོར་དངོས་མཇུག་གསུམ་ཐམས་ཅད་ལས་དང༌། སེམས་ཅན་དུ་སྟོན་མི་སྟོན་ནམ། བཅས་རང་གཉིས་ཀ་ལས་དང༌། ད་ལྟར་གྱི་ཕུང་པོ་ཁམས་སྐྱེ་མཆེད་རྣམས་ལས། སྤང་བྱ་དེ་དང་དེའི་གཉེན་པོར་སྡོམ་པ། དེ་དང་དེ་འཐོབ་པར་འགྱུར་གྱི་འདས་མ་འོངས་ལས་ནི་མིན་ཏེ། དེ་དག་སེམས་ཅན་དུ་མི་བགྲང་བས་སོ། །བསམ་གཏན་དང་ཟག་མེད་ཀྱི་སྡོམ་པ་དག་ནི་ཆོས་ཉིད་ཀྱིས་ཐོབ་པ་ཡིན་པས་ལས་ལམ་གྱི་དངོས་གཞི་ཁོ་ན་ལས་ཐོབ་པ་དང༌། སེམས་ཀྱི་རྗེས་འབྲང་ཡིན་པས་དུས་གསུམ་པོ་ཐམས་ཅད་ལས་ཐོབ་ཀྱི། སྦྱོར་མཇུག་དང་བཅས་པ་ལས་མིན་ནོ། །སློབ་དཔོན་གྱིས་སྤང་བྱ་འདས་པ་དང༌། ད་ལྟར་བ་ནི་སྐྱེས་ཟིན་པས། སྡོམ་མི་ནུས་པས་མ་འོངས་པ་སྡོམ་པར་བཤད་དོ། །སྤྱིར་སྡོམ་པ་དང་སྡོམ་མིན་དེ་དག་སེམས་ཅན་ཐམས་ཅད་དང་ཡན་ལག་ཐམས་ཅད་དང༌། རྒྱུ་ཐམས་ཅད་ལས་ཐོབ་པའམ། འོན་ཏེ་དབྱེ་བ་ཡོད་ཅེ་ན། སྡོམ་པ་ནི། གཞི་སེམས་ཅན་ཐམས་ཅད་ལས་ཐོབ་སྟེ། སེམས་ཅན་གཞན་ལ་གནོད་པ་གཞི་དང་བཅས་པ་ལས་བཟློག་དགོས་པས་སོ། །ཡན་ལག་ལས་ལམ་ལ་ནི་དབྱེ་བ་ཡོད་དེ། དགེ་སློང་གི་སྤོང་བདུན་དང༌། དགེ་ཚུལ་གྱི་སྤོང་བཞི་ཡིན་པས་སོ། །རྒྱུ་ལའང་དབྱེ་བ་ཡོད་དེ། དགེ་བའི་རྩ་བ་གསུམ་རྒྱུར་འདོད་ན་ཐམས་ཅད་ལས་ཀྱང་ཀུན་སློང་གི་སེམས་ཆེ་འབྲིང་ཆུང་གསུམ་རྒྱུར་འདོད་ན། གསུམ་པོ་དུས་ཅིག་ཅར་མི་འབྱུང་བས་རེ་རེ་ལས་ཐོབ་བོ། །གཉིས་པ་སྡོམ་མིན་ཐོབ་ཚུལ་ལ་གཉིས་ཏེ། གང་ལས་ཐོབ་པ། ཇི་ལྟར་ཐོབ་པའོ། །དང་པོ་ནི། སྡོམ་པ་མིན་པ་སེམས་ཅན་ཐམས་ཅད་དང་ཡན་ལག་ལས་ལམ་ཀུན་ལས་ཐོབ་སྟེ་སྒོ་ཐམས་ཅད་ནས་གནོད་པ་ལས་ཞུགས་པས་སོ། །རྒྱུ་ནི་ཐམས་ཅད་ལས་འཐོབ་པ་མིན་ཏེ། དུག་གསུམ་མམ་སེམས་ཆུང་ངུ་སོགས་གང་དུ་འདོད་ཀྱང་ཅིག་ཅར་མི་འབྱུང་བས་སོ། །ཞེའོ། །སློབ་དཔོན་ནི་དེ་ལྟར་ན་ཤན་པ་སོགས་ལའང་སྡོམ་མིན་མེད་པར་འགྱུར་ཏེ། རང་གི་ཕ་མ་སོགས་གསོད་འདོད་མེད་པས་སོ། །ཞེ་ན། འོ་ན་ར་ལུག་ལ་སོགས་ཀྱང་ཕ་མར་གྱུར་པ་ན་གསོད་འདོད་མེད་པས་དེ་ལས་སྡོམ་མིན་མི་ཐོབ་པར་འགྱུར་རོ། །ཤན་པ་མ་བྱིན་ལེན་སོགས་མི་བྱེད་པའང་ཡོད་པས་ཇི་ལྟར་ཡན་ལག་ཀུན་ལས་སྡོམ་མིན་ཐོབ་ཅེས་འགོག་གོ །བྱེ་བྲག་སྨྲ་བ་ནི་སྡོམ་པའང་ངེས་པ་ལྔ་དང་མ་བྲལ་ན་སྡིག་པའི་སེམས་དང་མ་བྲལ་བས་མི་སྐྱེ་ཞིང༌། སྡོམ་མིན་ལ་ཡང་མ་ཚང་བ་དང་ཉེ་ཚེ་བ་མེད་པས་ཤན་པས་བསླབ་པ་གཉིས་སམ་གསུམ་ཞིག་བླངས་ཀྱང་དེ་ལ་སྡོམ་པ་མེད་པར་སྨྲའོ། །མདོ་སྡེ་པ་ནི་ཇི་ལྟར་ཁས་བླངས་པ་ལྟར་སྡོམ་མིན་ཐོབ་ལ་རིགས་བརྒྱད་མ་གཏོགས་པའི་སྡོམ་པའང་མ་ཚང་བ་དང༌། ཉེ་ཚེ་བ་ཡང་ཡོད་དེ། ཚུལ་ཁྲིམས་དང་འཆལ་ཚུལ་དེ་ཙམ་གྱིས་གེགས་བྱེད་པའི་ཕྱིར། ཞེས་ཟེར་རོ། །བསྡུ་བར་ཡང་མི་དགེ་བ་བཅུ་ཕྱོགས་གཅིག་སྤོང་བ་བཅུ་དང་ཕལ་ཆེར་སྤོང་བ་བཅུ་དང་ཀུན་སྤོང་བ་བཅུ་དང༌། ཉིན་ཞག་ནས་ལོའི་བར་དུ་ཡུན་ཐུང་དུ་སྤོང་བ་བཅུ་དང༌། ལོ་ཕན་ཆད་ཡུན་རིང་དུ་སྤོང་བ་བཅུ་དང༌། ཇི་སྲིད་འཚོའི་བར་དུ་སྤོང་བ་བཅུ་དང༌། རང་ཉིད་སྤོང་བ་བཅུ་དང༌། གཞན་སྤོང་དུ་འཇུག་པ་བཅུ་དང༌། སྤོང་བའི་བསྔགས་པ་དུ་མ་བརྗོད་པ་བཅུ་དང༌། སྤོང་བ་མཐོང་ན་དགའ་ཞིང་ཡི་རང་བ་བཅུ་སྟེ། སྡོམ་པར་གཏོགས་པ་བརྒྱ་བཤད་དོ། །གཉིས་པ་ནི། སྡོམ་པ་མིན་པ་ནི། དེའི་རིགས་སུ་སྐྱེས་པ་རྣམས་གསོད་པ་སོགས་ཀྱི་བྱ་བའམ་གཞན་གྱི་རིགས་སུ་སྐྱེས་པ་རྣམས་འཚོ་བ་འདིས་འཚོ་བར་བྱའོ་ཞེས་ཁས་ལེན་པ་ལས་འཐོབ་པར་འགྱུར་རོ། །གསུམ་པ་བར་མའི་ཐོབ་ཚུལ་ནི། སྡོམ་པ་དང་སྡོམ་མིན་གྱི་ལྷག་མ་བར་མའི་རྣམ་རིག་མིན་པ་ནི་རྫས་ལས་བྱུང་བའི་བསོད་ནམས་བདུན་ལྟ་བུ་དང༌། སངས་རྒྱས་ལ་ཕྱག་འཚལ་ཏེ་བཟའ་བ་བྱ་མཉམ་པ་ལྟ་བུ་ཡི་དམ་ལེན་པ་ལས་དང༌། བྱ་བ་ལ་གུས་པར་བྱེད་པས་དགེ་མི་དགེའི་བྱ་བ་རྩོམ་པར་བྱེད་པ་ལས་ཐོབ་བོ། །གསུམ་པ་རྒྱུ་གང་གིས་གཏོང་བ་ལ་བཞི་སྟེ། སྡོམ་པའི་གཏོང་རྒྱུ། སྡོམ་མིན་གྱི་གཏོང་རྒྱུ། བར་མའི་གཏོང་རྒྱུ། ཆོས་གཞན་གྱི་གཏོང་རྒྱུའོ། །དང་པོ་ལ་སོ་སོ་ཐར་པའི་འདུལ་བ་ནི། བསླབ་པ་བསམ་པ་ཐག་པས་ཕུལ་བས་གཏོང་སྟེ། བླངས་པ་དང་འགལ་བའི་རིག་བྱེད་སྐྱེས་པའི་ཕྱིར། ཤི་འཕོས་པས་གཏོང་སྟེ། རྟེན་བོར་བའི་ཕྱིར། མཚན་གཉིས་ཅིག་ཆར་འབྱུང་བས་གཏོང་སྟེ། རྟེན་ཉམས་པའི་ཕྱིར། དགེ་བའི་རྩ་བ་ཆད་པ་ལས་ཀྱང་གཏོང་སྟེ། གཞི་ཆད་པའི་ཕྱིར། བསྙེན་གནས་ནི་མཚན་མོ་འདས་པས་ཀྱང་གཏོང་སྟེ། འཕེན་པའི་དུས་རྫོགས་པས་སོ། །བསྡུ་བ་ལས། རབ་བྱུང་ནི་རྩ་ལྟུང་བྱུང་བ་དང༌། དགེ་བསྙེན་དང་བསྙེན་གནས་ནི་སེམས་མི་མཐུན་པ་སྐྱེས་པས་ཀྱང་གཏོང་བར་བཤད་དོ། །ཁ་ཅིག་རྩ་བའི་ལྟུང་བར་འགྱུར་བ་བཞི་པོ་གང་རུང་བྱུང་བ་ལས་ཀྱང་གཏོང་བར་སྨྲ་སྟེ་རྒྱུད་ངོ་ཚ་ཁྲེལ་མེད་ཆེན་པོས་ཉམས་པའི་ཕྱིར། ལུང་གཞི་ལས། དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་ངོ༌། །ཞེས་གསུངས་པས་སོ། །ཞེས་པ་ཁུངས་སུ་བྱེད་དོ། །གཞན་དག་ནི་དམ་པའི་ཆོས་ནུབ་པ་ལས་ཀྱང་གཏོང་བར་འདོད་དེ། །བསླབ་པའི་མཚམས་རྣམས་བཞག་པ་མེད་པའི་ཕྱིར། ཞེས་སོ། །སློབ་དཔོན་ནི་སྔོན་མེད་གསར་དུ་མི་ཐོབ་ཀྱི་ཐོབ་ཟིན་མི་གཏོང་བར་འདོད་དོ། །ཁ་ཆེ་བ་རྣམས་ནི་རྩ་ལྟུང་བྱུང་བ་ལས་སྡོམ་པ་མི་གཏོང་སྟེ། བུ་ལོན་ཡང་ཆགས་ལ་ནོར་ཡང་ཡོད་པའི་མི་བཞིན་དུ། ཚུལ་ལྡན་དང་ཚུལ་འཆལ་གཉིས་སུ་འདོད་ལ་བུ་ལོན་འཇལ་བ་ན་ནོར་ཅན་ཡིན་གྱི་བུ་ལོན་ཅན་མིན་པ་བཞིན་དུ། རྩ་ལྟུང་དེ་བཤགས་ན་ཚུལ་ལྡན་ཡིན་གྱི་ཚུལ་འཆལ་མིན་ཞེས་བཞེད་དོ། །འདི་ནི་རྩ་ལྟུང་གང་བྱུང་བ་ལ་འཆབ་སེམས་མ་སྐྱེས་པའི་དབང་དུ་བྱས་ཀྱི་འཆབ་སེམས་སྐྱེས་ན་ལྟུང་བ་བཤགས་པ་ཙམ་གྱིས་ཚུལ་ལྡན་དུ་ཇི་ལྟར་འགྱུར། རིགས་པ་ནི། ཕྱོགས་གཅིག་ཉམས་པ་ལས་ཀུན་གཏོང་བར་མི་རིགས་ཏེ། གཅིག་བླངས་ལས་ཀུན་བླངས་པར་མི་འགྱུར་བ་བཞིན་ནོ། །ཞུ་པ་ལས། གཅིག་ལ་ཕམ་པ་བཞི་བྱུང་བར་བཤད་པས་ཀྱང་ཤེས་ཏེ། ཕམ་པ་སྔ་མས། སྡོམ་པ་གཏང་ན་ཕམ་པ་ཕྱི་མ་མི་འབྱུང་བས་སོ། །ཕྲན་ཚེགས་ལས་ཀྱང༌། ཟག་པ་ཟད་པའི་ཚེ་སྔོན་གྱི་གྲལ་དུ་འཇུག་པར་བྱའོ་ཞེས་པས་ཀྱང་བསྟན་ཏེ། བསླབ་སྦྱིན་ལ་སྡོམ་པ་མེད་ན་སྔོན་གྱི་བསླབ་གྲལ་མི་འབྱུང་བས་སོ་ཞེའོ། །འདི་ནི་རྩ་ལྟུང་གང་བྱུང་བ་ལ་འཆབ་སེམས་མ་སྐྱེས་པའི་དབང་དུ་བྱས་ཀྱི་འཆབ་སེམས་སྐྱེས་ན་བཤགས་པ་ཙམ་གྱིས་མི་འདག་པས་ཚུལ་ལྡན་དུ་ཇི་ལྟར་འགྱུར། མདོ་སྡེ་པ་ནི། ཕམ་པ་བྱུང་ན་གཅིག་གིས་ཀྱང་གཏོང་སྟེ། ལུང་གཞི་ལས་འབྱུང་བ་དེ་ཉིད་ལུང་ངོ༌། །རྩ་ལྟུང་བྱུང་ཡང་འཆབ་སེམས་མ་སྐྱེས་ན་ཕས་ཕམ་པ་མ་ཡིན་པས་དགེ་སློང་ཡིན་ཏེ། དགེ་སློང་དགའ་བ་ཅན་བཞིན་ནོ། །ཕྲན་ཚེགས་ལས། དགེ་སློང་དག་དགེ་སློང་དགའ་བ་ཅན་གྱིས་སྤྱད་བྱ་མིན་པ་སྤྱད་ཀྱང་སེམས་གཅིག་གིས་ཀྱང་མ་འཆབས་པས་འདི་ཕམ་པར་མ་གྱུར་གྱི་ཇི་སྲིད་འཚོའི་བར་དུ་བསླབ་པ་སྦྱིན་པར་བྱའོ། །ཞེས་འབྱུང་བས་སོ་ཞེའོ། །འདིས་ནི་ཕམ་པ་དང་རྩ་ལྟུང་གཉིས་ལ་ཁྱད་འབྱེད་པར་མངོན་ནོ། །འགའ་ཞིག་ནི་ཕམ་པ་དང་ཕས་ཕམ་ལ་ཁྱད་འབྱེད་ཟེར་རོ། །བསམ་གཏན་དུ་གཏོགས་པའི་དགེ་བ་གཟུགས་ཅན་ཡིན་མིན་ཀུན་ནི། ས་གོང་མ་ལས་འོག་མ་དག་ཏུ་འཕོས་པ་དང༌། གོང་མའི་སྙོམས་འཇུག་ལས་ཉམས་པ་སྟེ། རྒྱུ་གཉིས་དག་གིས་གཏོང་ལ། དེ་བཞིན་དུ་གཟུགས་མེད་གཏོགས་པའང་ས་འཕོས་པ་དང་ཉམས་པ་དག་གིས་གཏོང་ངོ༌། །འཕགས་པ་སྟེ་ཟག་མེད་ཀྱི་ལམ་ནི་འབྲས་བུ་ཐོབ་པས་ཞུགས་པའི་ལམ་དང༌། དབང་པོ་སྦྱངས་པས་བརྟུལ་པོའི་ལམ་དང༌། ཁམས་གོང་མ་ལས་ཉམས་པ་ལས་ཕྱིར་མི་འོང་གི་འབྲས་བུ་སོགས་གཏོང་ངོ༌། །གཉིས་པ་སྡོམ་མིན་གཏོང་བའི་རྒྱུ་ལ། སྡོམ་མིན་ནི་སོ་ཐར་དང་བསམ་གཏན་གྱི་སྡོམ་པ་གང་རུང་ཐོབ་པ་དང༌། ཤི་བ་དང་མཚན་གཉིས་ཅིག་ཆར་བྱུང་བ་ལས་གཏོང་ལ། སྡོམ་མིན་མི་བྱ་བར་བསམ་པ་ཐག་པས་དམ་བཅས་ཀྱང༌། སྡོམ་པ་མ་སྐྱེས་བར་སྡོམ་མིན་མི་གཏོང་ལ་གལ་ཏེ་དེ་བསྙེན་གནས་བསྲུངས་ཏེ། སང་ཉིན་བསྙེན་པར་རྫོགས་པ་ན་སྡོམ་མིན་སྐྱེ་བར་འགྱུར་རམ་མི་འགྱུར་ཞེ་ན། ཁ་ཅིག་སྡོམ་མིན་གཏན་དུ་གཏོང་བའི་སེམས་མེད་པས་སྡོམ་མིན་སླར་ཡང་སྐྱེ་བར་འགྱུར་ཏེ། ལྕགས་གོང་དམར་འབར་བ་ཡང་སྔོན་པོར་འགྱུར་བ་ལྟ་བུ་ཞེས་སྨྲའོ། །གཞན་དག་ནི་སྡོམ་མིན་གྱི་སྦྱོར་བ་མི་བྱེད་ན་མི་འགྱུར་བར་སྨྲའོ། །གསུམ་པ་བར་མའི་གཏོང་རྒྱུ་ནི། འཕེན་བྱེད་དད་པའམ། ཉོན་མོངས་པའི་ཤུགས་ཆད་པ་དང༌། བླངས་པ་ཆད་པ་དང༌། བླངས་པ་བཞིན་མ་བྱས་པའི་བྱ་བ་ཆད་པ་དང༌། གུས་པར་བྱ་བའི་ཡུལ་མཆོད་རྟེན་དང༌། རི་དྭགས་འཛིན་པའི་རྒྱ་ལ་སོགས་པའི་དོན། ཆད་པ་དང༌། ཚེ་ཆད་པས་གཏོང་ལ། དགེ་བའི་རྩ་བ་ཆད་པས་ཀྱང་ངོ༌། །བཞི་པ་ཆོས་གཞན་གྱི་གཏོང་རྒྱུ་ནི། འདོད་པར་གཏོགས་པའི་དགེ་བ་གཟུགས་ཅན་མིན་པ་ནི། དགེ་རྩ་ཆད་པ་དང་ཁམས་གོང་དུ་སྐྱེས་པ་ལས་གཏོང་ལ། ཡིད་མི་བདེ་དགེ་བའི་ཆ་ནི། བསམ་གཏན་དང་པོ་ཐོབ་པས་གཏོང་བ་ལྟ་བུ་འདོད་པ་ལ་འདོད་ཆགས་དང་བྲལ་བས་གཏོང་བའང་ཡོད། ཉོན་མོངས་པ་ཅན་གཟུགས་ཅན་མིན་པ་ཁམས་གསུམ་པ་ཐམས་ཅད་ནི། རང་གི་གཉེན་པོ་སྤོང་ལམ་སྐྱེས་པས་རྣམ་པར་ཉམས་ཤིང་གཏོང་བར་འགྱུར་རོ། །མདོ་སྡེ་པ་སོགས་ནི་ལས་ཐམས་ཅད་སེམས་པར་འདོད་པས། གཏོང་རྒྱུ་མི་འདྲ་བ་སྣ་ཚོགས་པ་འདི་འདྲ་མི་བཞེད་དོ། །བཞི་པ་གང་ཟག་གང་ལ་ལྡན་ཚུལ་ནི། སྡོམ་པ་དང་སྡོམ་མིན་སེམས་ཅན་གང་ལ་ཡོད་ཅེ་ན། དང་པོ་ནས་མཚན་གང་ཡང་མེད་པའི་ཟ་མ་དང༌། ཡོད་ཀྱང་དགའ་བའི་དོན་བྱེད་མི་ནུས་པ་མ་ནིང་དང༌། མཚན་གཉིས་པ་དང༌། རྗེས་མ། >>>
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།