ཆོས་རྗེ་ས་སྐྱ་པཎྜི་ཏ་རྗེས་སུ་དྲན་པ།
རྩོམ་པ་པོ་རིག་པའི་རྡོ་རྗེ།
གྱེར་འདོན་མ་གངས་རིའི་བདག་མོ།
ས་ཆེན་ལྗོངས་ན་གད་རྒྱངས་སྒྲོག་པས། །
ས་གསུམ་འགྲོ་བའི་སྙིང་རྩ་འདར། །
ས་སྟེང་ཀུན་ལ་སྙན་པར་གྲགས་པས། །
ས་སྐྱ་པཎ་ཆེན་ཞེས་སུ་གསོལ། །
གངས་ཅན་ལྗོངས་ན་གདུལ་བྱའི་དོན་དུ། །
འཇམ་དབྱངས་མི་ཡི་གཟུགས་སུ་བྱོན། །
ངོ་མཚར་མཚན་དཔེའི་ལང་ཚོའི་རྩལ་རྫོགས། །
མཁས་མང་བྱེ་བའི་དབུས་ན་མཛེས། །
སྔོན་ཆད་མ་བྱུང་གོ་ལའི་ཁྱོན་འདིར། །
བཅུ་ཕྲག་རིག་པ་སྲོལ་འབྱེད་པའི། །
རིགས་པ་སྨྲ་བའི་དཔའ་བོ་ཁྱེད་ཉིད། །
དཔལ་ལྡན་ས་སྐྱར་བྱོན་པ་ལེགས། །
དམ་པའི་མཛད་རྗེས་སྒང་ལ་བཞག་པས། །
སྲིད་གསུམ་ལྷ་མིས་གཙུག་ན་བཀུར། །
ལུང་རིགས་འབུམ་གྱིས་གཟི་བྱིན་འཕྲོས་པས། །
ལོ་པཎ་སྟོང་གིས་བསྔགས་ཚིག་གཏོར། །
རྣམ་དཔྱོད་རིགས་པའི་མཚོན་རྩེ་རྣོ་བས། །
མུ་སྟེགས་རྒོལ་ངན་ཕམ་པར་མཛད། །
གངས་ཅན་འགྲོ་བའི་དོན་དུ་གཟིགས་ཏེ། །
ཧོར་གྱི་དམག་དཔུང་བཟློགས་པར་མཛད། །
ཆོས་དང་ཆོས་མིན་རྣམ་པར་འབྱེད་དེ། །
ལོག་པར་སྨྲ་བ་སུན་ཕྱུང་ཞིང་། །
བཀའ་བསྡུ་བཞི་པ་ལྟ་བུར་མཛད་པའི། །
འཇམ་མགོན་ས་སྐྱ་པཎ་ཆེན་རྒྱལ། །
སྤྱི་ལོ་-༢༠༡༨-ལོའི་ཟླ་བ་-༡-ཚེས་༡-དང་བོད་ཟླ་-༡༡-ཚེས་-༡༤-ཉིན་ནས།
Leave a Reply