དཔལ་ས་སྐྱའི་མཁན་ཆེན་འཇམ་དབྱངས་ཀུན་བཟང་རྒྱལ་མཚན་མཆོག་ནི་སྤྱི་ལོ་༡༩༧༠ལོར་དཔལ་ལྡན་ས་སྐྱ་ཞེས་ཡོངས་སུ་གྲགས་པའི་སའི་ཆར་ཁམས་གསུམ་འགྲོ་བའི་མགོན་པོ་འཕགས་པ་རིན་པོ་ཆེའི་ཆོས་ཁྲི་ཆེན་མོ་དང་ཉེ་བ་པུ་ཏྲའི་བླ་མཚོའི་འགྲམ་ནང་གསོའི་རྗེ་བཙུན་མ་པད་འབྱུང་མའི་གཟིམ་ཆུང་དུ་གྲགས་པའི་གནས་དེར་ཉི་མ་ཤར་བ་དང་སྐུ་འཁྲུངས། དགུང་གྲངས་བཅུ་བཞིར་དཔལ་གྱི་གདན་ས་ཆེན་མོར་ཕེབས་ཏེ་དགོན་པའི་འདོན་ཆོག་དང་གཞུང་ཆེན་ཁག་བློ་འཛིན་གྱི་རྩེ་མོར་གསོན། དགུང་གྲངས་བཅུ་བདུན་ཙམ་ནས་གདན་སའི་བཤད་གྲྭར་ཡང་དར་བསྟན་པའི་གསལ་བྱེད་ལྷ་ཁང་མཁན་ཆེན་ཐམས་བཅད་མཁྱེན་པ་༧བྱམས་པ་ཀླུ་སྒྲུབ་རྒྱ་མཚོའི་ཞབས་ལ་བཏུགས་ཏེ་གཞུང་ཆེན་བཅུ་གསུམ་སོགས་ལ་གསན་བསམ་མཐར་ཕྱིན་པར་མཛད་དེ་བཤད་གྲའི་སྐྱོར་དཔོན་ཡང་ལོ་མང་མཛད། དེ་བཞིན་རིགས་ཀྱི་ཅོད་པན་སྐྱབས་རྗེ་བློ་དགའ་རིན་པོ་ཆེ་ལས་གསུང་ངག་ལམ་འབྲས་དང་གསེར་ཆོས་བཅུ་གསུམ་གཙོས་གསང་སྔགས་གསར་སྙིང་མཐའ་དག་བུམ་པ་གང་བྱོའི་ཚུལ་དུ་གསན། གཞན་ཡང་སྙན་བརྒྱུད་བསྟན་པའི་མངའ་བདག་ངེ་པ་དོན་གྱི་པཎྚི་ཏ་མཁན་ཆེན་ཚུལ་ཁྲིམས་རྒྱལ་མཚན་མཆོག་གི་ཞབས་ལ་བཏུགས་ཏེ་རྗེ་བཙུན་ས་སྐྱ་པའི་སྙན་བརྒྱུད་རྒྱ་མཚོའི་གཏེར་ཆེན་པོར་གྱུར་བ་དང་ཐུན་མོང་རིག་གནས་ཁག་ལ་སློབ་གཉེར་མཐར་ཕྱིན་པར་མཛད་ ཁྱད་པར་དུ་ཡང་ཡོངས་རྫོགས་བསྟན་པའི་མངའ་བདག་སྐྱབས་མགོན་བདག་ཁྲི་རྡོ་རྗེ་འཆང་ཆེན་པོ་མཆོག་ལས་སྒྲུབ་ཐབས་ཀུན་འདུས་སོགས་ཟབ་ཆོས་བདུད་བདུད་རྩིས་ཚིམ་པར་རོལ། མདོར་ན་མཁས་གྲུབ་བླ་མ་དུ་མའི་ཞབས་ལ་བཏུགས་ཏེ་མདོ་སྔགས་རིག་གནས་དང་བཅས་པའི་གླེགས་བམ་ཆེན་པོ་གཅིག་དུ་གྱུར་་ སྤྱི་ལོ་༡༩༩༦ལོར་གདན་སར་བཤད་གྲྭ་ཆུང་བ་དང་སྤྱི་ལོ་༢༠༠༡ལོར་བཤད་གྲྭ་འབྲིང་བ་གསར་བཙུགས་མཛད་དེ་འདི་གཉིས་ཀྱི་དགེ་རྒན་ལོ་མང་མཛད་། སྤྱི་ལོ་༢༠༠༠ལོར་མཁན་ཆེན་མཆོག་གི་རྒྱལ་ཚབ་ཏུ་མངལ་གསོལ་མཛད་པ་བཞིན་དཔལ་ས་སྐྱའི་བཤད་གྲྭ་མཁན་པོ་ལོ་གཅིག་མཛད། སྤྱི་ལོ་༢༠༠༤ལོར་དགོན་པའི་ལས་ཐོགས་དབུ་བྱེད་པ་སོགས་དང་བཀའ་གྲོས་མཛད་དེ་གནས་མཆོག་ཁའུ་བྲག་རྫོང་དུ་སྒྲུབ་གྲྭ་གསར་བཙུགས་ཀྱི་མཁན་པོར་མངའ་གསོལ་ཞུས་པ་ནས་མི་ལོ་བདུན་བར་སྐུ་འཚམས་མཛད་དེ་གསུང་ངག་ལམ་འབྲས་གཙོས་རྒྱུད་སྡེ་རྒྱ་མཚོར་ཉམས་ལེན་མཐིལ་ཕྱིན་པར་མཛད་དེ་ལྷག་པའི་ལྷ་མཆོག་དུ་མའི་དུས་གྲངས་རྟགས་ཀྱི་བསྙེན་པ་མཐར་ཕྱིན་པར་མཛད། ཉམས་རྟོགས་རྒྱ་མཚོའི་ཕ་རོལ་དུ་གསོན་། ལམ་འབྲས་ལོ་བདུན་མའི་སྲོལ་རྒྱུན་བཟང་པོ་སླར་གསོ་མཛད་དེ་སྔ་ན་མེད་པའི་འཕེལ་རྒྱས་ཆེན་པོ་བྱུང་། ད་ལྟ་འི་བར་ལོ་བདུན་མ་ཚར་གསུམ་ཙམ་དང་གཞན་ཡང་མཁའ་སྤྱོད་། འཇིགས་བྱེད་་མགོན་པོ་་ཕུར་པ་་་ཀུན་རིག་་སོགས་རྒྱུད་སྡེ་རྒྱ་མཚོའི་དབང་ལུང་འཁྲིད་སོགས་ལན་མང་གནང་དང་མུས་དང། སྤྱི་ལོ་༢༠༠༨ལོར་པེ་ཅིང་བོད་རྒྱུད་ནང་བསྟན་སློབ་གླིང་གི་དགེ་རྒན་དུ་གདན་ཞུ་མཛད། སྤྱི་ལོ་༢༠༠༩ལོར་ལམ་འབྲས་ལྷ་ཁང་གསར་འཞེངས་དང་། སྤྱི་ལོ་༢༠༡༤ལོར་གནས་མཆོག་ཕྲུ་མར་ཨ་ནེའི་སྒྲུབ་གྲྭའི་ལྷ་ཁང་ཤག་དང་བཅས་པ་བསྐྱར་བཞེངས་མཛད་དེ་མཁའ་སྤྱོད་ལོ་གསུམ་མའི་སྲོལ་རྒྱུན་བཟང་པོ་གསར་བཙུགས་གནང་། སྤྱི་ལོ་༢༠༡༥ལོར་གདན་ས་ཆེན་མོའི་རྒྱ་མཚོ་དཔོན་སློབ་ཀྱི་མཚན་གྱི་ཅོད་པན་གསོལ། སྤྱི་ལོ་༢༠༡༦ལོར་གདན་ས་ཆེན་མོར་འཁོར་སློབ་བརྒྱ་ཕྲག་འགའ་ཤས་ལ་ལམ་འབྲས་སློབ་བཤད་ཆེན་མོ་ཟླ་གསུམ་གྱི་བར་དུ་གནང་། གཞན་ཡང་འགྲོ་མགོན་ཆོས་རྒྱལ་འཕགས་པ་དང་པན་ཆེན་བཅུ་པ་ཆེན་པོའི་རྗེས་དྲན་འཛམ་གླིང་བཀྲིས་སྒོ་མང་མཆོད་བརྟེན་ཆེན་མོར་རབ་གནས་མཛད་པ་སོགས་དགོན་སྡེ་ཁག་གི་གསོལ་འདེབས་ཞུས་པ་བཞིན་དབང་ལུང་རབ་གནས་བཀའ་སློབ་ལམ་སྟོན་སོགས་ཀྱི་བཀའ་དྲིན་བསྐྱངས་དང་བསྐྱོང་བཞིན་པའི་ཁར། དེང་གདན་སའི་སྒྲུབ་གྲྭར་གསུང་ངག་རིན་པོ་ཆེ་གཙོ་བོར་གྱུར་པའི་ཟབ་རྒྱས་ཆོས་ཀྱི་འཁོར་ལོའི་བཀའ་དྲིན་བསྐྱངས་དང་བསྐྱོང་བཞིན་པ་ལགས་སོ་།།
དཔྱད་གཏམ་སྤེལ་མཁན་ལ་གསལ་བརྡ།