༄༅། །འཇམ་མགོན་བླ་མ་ས་སྐྱ་པཎྜི་ཏའི་ལེགས་བཤད་ཆེན་པོ་གསུམ།
དེང་གི་དུས་འདིར་རང་རིགས་ན་གཞོན་མང་པོས་མི་ལོ་བརྒྱ་ཉིས་བརྒྱའི་གཡས་གཡོན་གྱི་ནུབ་ཕྱོགས་མཁས་པ་རྣམས་ཀྱི་གསུང་ཐོར་བུ་བ་རེ་ལུང་འདྲེན་དུ་བྱེད་ནས་གསུང་བསྡུས་འདི་རྣམས་དུས་སུ་བབས་པའི་གཏམ་ངོ་མཚར་ཅན་ཞིག་ཡིན་པའི་གསལ་འགྲེལ་དང་བསྔགས་བརྗོད་གནང་ཞོར་རང་རིགས་ཀྱི་མཁས་པ་གོང་མ་རྣམས་ལ་མི་འདོད་པའི་རྣམ་འགྱུར་མཛད་མཁན་མི་ཉུང་བ་ཞིག་ཡོད། མ་ཟད་དྲ་ལམ་དང་གཏམ་བཤད་སོགས་ཀྱི་གོང་དུ་ཉེ་རབས་ཀྱི་ནུབ་ཕྱོགས་མཁས་པའམ། རྒྱ་ནག་མཁས་པའི་གསུང་བསྡུས་རེ་བགྲང་ནས་གཟིགས་རྒྱ་ཆེ་སྣང་གི་སྤོབས་པ་མཛད་མཁན་ཡང་ཡོད་པ་ཡིན། འོན་ཀྱང་མི་ལོ་སྟོང་ཕྲག་གཡས་གཡོན་དུ་རང་རེའི་རྒྱལ་བློན་བྱང་སེམས་རྣམས་དང་། ལོ་པཎ་སྐུ་དྲིན་ཅན་རྣམས། རིས་མེད་མཁས་དབང་རིམ་བྱོན་གྱིས་གསུངས་པའི་ལེགས་བཤད་རེ་རེས་དེང་གི་མཁས་པའི་གསུང་ཐོར་གྱི་འགྲན་ཟླར་མི་འོས་པ་གང་ཞིག་ཡོད་མེད་ཐད་དགོངས་བཞེད་དང་བསམ་གཞིགས་བྱ་ཁོམ་མ་བྱུང་བའང་ཡིན་ཤས་ཆེ། རྒྱུ་མཚན་དེས་ད་རེས་འཇམ་མགོན་བླ་མ་ས་སྐྱ་པཎྜི་ཏའི་ལེགས་བཤད་ཆེན་པོ་གསུམ་ཞེས་པ་ངོ་སྤྲོད་ཞུས་ཏེ་ང་ཚོ་གཞོན་རབས་པ་ཚོས་རང་རེའི་ལེགས་བཤད་རྣམས་ལ་རྟོགས་ཞིབ་མཛད་ནས་མེས་དཔོན་གོང་མ་རྣམས་ཀྱིས་མི་རིགས་གཞན་གྱི་མདུན་དུ་ངོ་ནོངས་མི་དགོས་པའི་ལེགས་བཤད་མང་པོ་ཞིག་ཤུལ་དུ་བཞག་ཡོད་པ་ངོ་སྤྲོད་མཚམས་སྦྱོར་དང་འབྲེལ་རྗེས་སུ་དཔྱད་ཞིབ་ཅིག་གནང་བར་འོས་སོ་ཞེས་དྲན་བསྐུལ་མཚམས་སྦྱོར་ཞུ་རྒྱུ་ཡིན།
༡ ལེགས་བཤད་ཉི་མའི་སྙིང་པོ།
འདི་ནི་འཇམ་མགོན་བླ་མ་ས་སྐྱ་པཎྜི་ཏས་ཆོས་པ་རྣམས་ལ་ཆེད་དུ་གདམས་པའི་ལེགས་བཤད་ཅིག་ཡིན་ཏེ་འདིའི་བསྟན་བྱ་གཙོ་བོ་ནི་ཆོས་དང་ཆོས་མ་ཡིན་པ་རྣམ་པར་འབྱེད་དེ་ཆོས་རྣམ་པར་དག་པ་འདིའོ། །ཆོས་བྱ་དགོས་ན་འདི་དང་མཐུན་པར་གྱིས་ཤིག་ཅེས་བསྟན་པར་བྱེད་པའི་གཞུང་ལུགས་ཤིག་གོ ། རྒྱུ་མཚན་དེས་ལེགས་བཤད་འདིར་ཆོས་པ་ལ་གདམས་པའི་ལེགས་བཤད་ཉི་མའི་སྙིང་པོ་ཞེས་གྲགས་པའོ། །
༢ ལེགས་བཤད་འཕྲུལ་གྱི་དྲ་བ།
འདི་ཁྱིམ་པ་རྣམས་ལ་ཆེད་དུ་གདམས་པའི་ལེགས་བཤད་ཅིག་ཡིན་ཏེ་འདིའི་བསྟན་བྱ་གཙོ་བོ་ནི་འཇིག་རྟེན་གྱི་དགྲ་འདུལ་གཉེན་སྐྱོང་གི་ལས་ཇི་ལྟར་བྱ་བ་དང་། སོ་སོའི་བྱ་གཞག་ཇི་ལྟར་འགྲུབ་པ། དཀའ་ངལ་ལ་གདོང་ལེན་ཇི་ལྟར་བྱ་ཚུལ། དམག་དོན་སྲིད་ལུགས་ཇི་ལྟར་སྤྱོད་པ་སོགས་བསྟན་པའི་གཞུང་ལུགས་ཤིག་གོ །གཞུང་ལུགས་འདིར་འཇིག་རྟེན་པ་ལ་ཆེད་དུ་གདམས་པའི་ལེགས་བཤད་འཕྲུལ་གྱི་དྲ་བ་ཞེས་གྲགས་པ་ཡིན།
༣ ལེགས་བཤད་རིན་ཆེན་གཏེར།
འདི་ནི་ཆོས་དང་འཇིག་རྟེན་ཐུན་མོང་ལ་གདམས་པའི་ལེགས་བཤད་ཅིག་ཡིན་ཏེ་གཞུང་དེའི་ཐོག་མ་ཁོ་ནར། རིགས་པས་དཔྱད་ན་ཆོས་ལུགས་མི་འགལ་ཞིང་། །འཇིག་རྟེན་བྱ་བ་ཀུན་ནས་ལེགས་བསྒྲུབ་པ། །དམ་པ་རྣམས་ཀྱི་སྤྱོད་ཚུལ་ཅི་འདྲ་ཞིག །བཤད་པ་འདི་ནི་ལེགས་བཤད་རིན་ཆེན་གཏེར། །ཞེས་གསུངས་པ་ལྟར་ཆོས་པ་དང་ཁྱིམ་པ་བ་གཉིས་ཀའི་ལས་བྱ་གཞག་གི་གནས་ལུགས་ལེགས་པར་བསྟན་པ་ཞིག་གོ །གཞུང་ལུགས་འདིར་ཆོས་པ་དང་ཁྱིམ་པ་ཐུན་མོང་ལ་གདམས་པའི་ལེགས་པར་བཤད་པ་རིན་པོ་ཆེའི་གཏེར་ཞེས་གྲགས་པ་ཡིན་ལ་འདི་ང་ཚོས་རྟག་ཏུ་ཐོས་བཞིན་པའི་ས་སྐྱ་ལེགས་བཤད་དུ་གྲགས་པ་དེ་ཡིན། དེ་ལ་སོགས་པའི་དགེ་ལྡན་ལེགས་བཤད་དང་། ཆུ་ཤིང་བསྟན་བཅོས་ལ་སོགས་པ་རང་རེའི་མེས་པོ་གོང་མ་རྣམས་ཀྱི་ཐུགས་ལས་འཁྲུངས་པའི་ལེགས་བཤད་ཕུལ་དུ་བྱུང་བ་མང་དག་ཅིག་ཡོད་པ་རྣམས་ལ་གཟིགས་ཞིབ་མཛད་དགོས་པ་ནི་གལ་ཆེ་བར་སེམས། །
Leave a Reply