༧སྐྱབས་རྗེ་ངོར་ཁང་སར་ཞབས་དྲུང་རིན་པོ་ཆེས་ས་ངོར་ཆོས་ཚོགས་ཀྱི་འདུས་མང་ཡོངས་ལ་བསྩལ་བའི་བཀའ་སློབ་ཡིད་མུན་སེལ་བའི་ཟླ་ཟེར།།
༢༠༡༥/༦/༣/ཉིན།
༼ཚན་པ་དང་པོ།
འོ་ཡ་ས་ངོར་ཆོས་ཚོགས་ཀྱི་དགེ་འདུན་པ་ཡོངས་ལ་ཐོག་མར་འཚམས་འདྲི་ཞུ་བ་དང་སྦྲགས། དེ་རིང་འདིར་རྒན་ལགས་རྣམ་པ་གཉིས་ཀྱི་ལྷག་བསམ་གྱིས་དགོན་པ་འདི་ཡི་དགེ་འདུན་པ་རྣམས་ལ་ཕན་པའི་ཐུགས་རེ་བཅང་སྟེ། ང་ལ་བསླབ་བྱའི་སྐོར་ལ་སྐད་ཆ་ཞིག་བཤད་རོགས་གྱིས་གསུང་གི་འདུག དྲང་པོར་བཤད་པ་ཡིན་ན་ང་རང་ལ་ཡང་བསླབ་བྱ་རྒྱབ་ཐུབ་པའི་ཆ་རྐྱེན་ནམ་ཡོན་ཏན་གང་ཡང་ཡོད་པ་མ་རེད། ཡིན་ན་ཡང་ཁོང་རྣམ་པ་གཉིས་ཀྱི་ཀུན་སློང་བཟང་པོ་དང་སེམས་ཤུགས་དེ་ག་ནང་བཞིན་རེ་བ་དེ་ངས་ཆུད་ཟོས་སུ་གཏང་བཞག་པ་ཡིན་ན་ཡོང་གི་མེད་པ་དང་གཅིག གཉིས་ནས་ང་རང་ཡང་ཤཀྱཱའི་དགེ་སྦྱོང་ཞིག་ཀྱང་རེད་ལ་ལྷག་པར་དུ་སྤྱིར་དཔལ་ལྡན་ས་སྐྱ་པ་དེའི་ནང་ནས་ཀྱང་བྱེ་བྲག་ཏུ་ངོར་པའི་བླ་མ་ཞིག་གི་མིང་ཡོད་ཙང་རང་བཞིན་གྱིས་ངའི་ཕྲག་པའི་སྟེང་དུ་ཡང་འགན་ཞིག་བབས་བསྡད་ཡོད་རེད། དེ་འདྲ་སོང་ཙང་ངས་ང་རང་གི་བསམ་ཚུལ་མདོར་སྡུས་ཞིག་ཞུ་རྒྱུ་ཡིན། ད་སྤྱིར་བཏང་གཞུང་ལུགས་ཚང་མའི་ནང་དུ་རང་དོན་དུ་ཐོས་བསམ་སྒོམ་གསུམ། གཞན་དོན་དུ་འཆད་བཙོད་རྩོམ་གསུམ། གཉིས་དོན་དུ་མཁས་བཙུན་བཟང་གསུམ་ཞེས་གསུངས་ཡོད་རེད། དེ་འདྲ་སོང་ཙང་། གསུམ་པ་གཉིས་དོན་དུ་མཁས་བཙུན་བཟང་གསུམ་ཞེས་པ་དེ་ལ་ཆ་བཞག་ནས་བཤད་ན་སྤྱིར་བཏང་ང་ཚོ་སངས་རྒྱས་ཤ་ཀྱཱ་ཐུབ་པའི་རྗེས་འཇུག་ཡིན་པ་ཙམ་དུ་མ་ཚད་ང་ཚོས་གོས་དམར་པོ་འདི་གྱོན་ཕྱིན་ཆད་སངས་རྒྱས་ཤཀྱཱ་ཐུབ་པའི་བསྟན་པ་འཛིན་པའི་བསྟན་འཛིན་ཀྱི་སྐྱེ་བུ་ཞིག་ཡིན་ཞེས་ལབ་དགོས་ཀྱི་ཡོད་རེད་བ། དེ་ཡིན་དུས། སྤྱིར་བཏང་བོད་བརྒྱུད་ནང་བསྟན་འདི་ཐེག་པའི་དབང་དུ་བྱེད་ན་ཐེག་པ་ཆེན་པོའི་ཁོངས་སུ་གཏོགས་བསྡད་ཡོད་རེད་ཅེས་ལབ་ཆོག་གི་རེད། དེ་འདྲ་སོང་ཙང་ཐེག་པ་ཆེན་པོའི་རིགས་སམ་མི་ཞིག་ཡིན་ཕྱིན་ཆད་ལས་འགན་གཙོ་བོ་ག་རེ་རེད་དང་པོར་ཁས་ལེན་ག་རེ་བྱས་ཡོད་པ་རེད་ཅེས་ཟེར་ན་དངོས་ཤུགས་རྒྱུད་གསུམ་གང་རུང་གི་སྒོ་ནས་ལས་ཀ་ག་རེ་བྱེད་པ་ཡིན་ན་ཡང་གཙོ་བོ་དེ་གཞན་དོན་རང་ལ་བསམ་བློ་གཏང་སྟེ་ལས་ཀ་བྱེད་མཁན་ཞིག་ཡིན་པར་ཁས་བླངས་ཡོད་རེད་ལ་ཡིན་ཡང་དགོས་ཀྱི་རེད་བ། དེ་འདྲ་སོང་ཙང་ང་ཚོ་ཚང་མ་ནང་པ་ཡིན་ཞིང་དེའི་ནང་ནས་ཀྱང་ཐེག་པ་ཆེན་པོའི་གང་ཟག་གམ་མི་ཞིག་ཡིན་ཞེས་ལབ་པ་ནང་བཞིན་གཞན་ལ་དངོས་ཤུགས་རྒྱུད་གསུམ་གང་རུང་གི་སྒོ་ནས་ཕན་ཐོགས་དགོས་པ་དེ་གནད་འགག་ཆེན་པོ་ཞིག་ཡིན་པ་མ་ཚད་སོ་སོའི་ལས་འགན་ཡང་དེ་ཆགས་བསྡད་ཡོད་རེད།
གང་ལྟར་འགྲོ་བ་མིའི་རིགས་སུ་གཏོགས་པ་སུ་འདྲ་ཞིག་ཡིན་པ་ཡིན་ན་ཡང་མཇོན་ཐང་ཡོད་མིན་ལ་མ་ལྟོས་པར་སོ་སོ་ལ་ལས་འགན་རེ་རེ་ཡོད་རེད་བ། དཔེར་ན་མི་ཚང་གཅིག་གི་ནང་ལ་ཡོད་པའི་ཕ་ལྟ་བུ་ལ་ཆ་བཞག་ན་སོ་སོའི་ཕྲུ་གུ་དང་སོ་སོའི་སྐྱེ་དམན་སོགས་གང་ལྟར་ནང་མི་རྣམས་གསོ་བའི་ལས་འགན་དེ་ཁོ་རང་རང་ལ་ཡོད་བསྡད་རེད་བ། དེ་ནང་བཞིན་གོང་དུ་ཞུས་པ་ལྟར་མཇོན་ཐང་ཡོད་མིན་ལ་མ་ལྟོས་པར་ལས་འགན་རེ་ཡོད་པ་དེ་ཧ་དགོས་ཡ་གཅིག་དང་ཧ་གོ་བ་ནང་བཞིན་གང་ཐུབ་ཐུབ་བསྒྲུབ་དགོས་པ་དེ་མི་ཚེ་འདིའི་ནང་གི་བྱེད་དགོས་པའི་གནས་འགག་གཙོ་བོ་དེ་དེ་ཆགས་བསྡད་ཡོད་རེད། དེ་འདྲ་ཡིན་དུས་ང་ཚོའི་ལས་འགན་གཙོ་བོ་དེ་དངོས་ཤུགས་བརྒྱུད་གསུམ་གང་རུང་གི་སྒོ་ནས་སེམས་ཅན་གཞན་ལ་ཕན་ཐོགས་པ་བྱ་རྒྱུ་དེ་ཡིན་པ་སོང་ཙང་། སེམས་ཅན་གཞན་ལ་ཕན་འདོགས་པའི་ཆ་རྐྱེན་མེད་དུ་མི་རུང་བའི་གནས་འགག་ཆེ་ཤོས་དེ་གང་རེད་ཟེར་ན། མཁས་བཙུན་བཟང་གསུམ་ཟེར་ཡ་ཞིག་ཡོད་པ་འོ་དེ་ཆགས་བསྡད་ཡོད་རེད། དེའི་ནང་ནས་མཁས་པ་ཞུ་བ་དེར་ཡང་མཁས་སྟངས་མ་འདྲ་བའི་ཐོག་ནས་མང་པོ་བཤད་རྒྱུ་རེད། ཡིན་ན་ཡང་ང་ཚོས་མཁས་དགོས་ས་དེ་གང་རེད་ཟེར་ན་གྲྭ་པ་གཅིག་གམ་སྟོན་པའི་རྗེས་འཇུག་ཅིག་ཡིན་པའི་ཆ་ནས་སྟོན་པས་གང་གསུངས་པ་དང་གང་དགོངས་པར་ཡོད་པ་དེ་ཧ་གོ་བའི་ཆེད་དུ་གཞུང་ལུགས་ལ་སྦྱང་བཙོན་བྱེད་པའི་ཐོག་ནས། སོ་སོས་གང་ཤེས་པ་དེ་ཡང་གཞན་ལ་ཕར་བཤད་དགོས་ཡ་དེ་གལ་ཆེན་པོ་ཞིག་ཆགས་བསྡད་ཡོད་དུས་གང་ལྟར་འོ་ད་དེ་འདྲ་བྱེད་ཐུབ་མཁན་ཞིག་ལ་མཁས་པ་ཞེས་བཞག་ཆོག་གི་ཡོད་རེད། དེ་འདྲའི་མཁས་པ་ཞིག་ཡོང་མི་ཡོང་ཟེར་བ་དེ་ཡང་ཕྱོགས་གཅིག་ནས་་སྐྱེ་བ་སྔོན་མར་ཚོགས་རྒྱ་ཆེར་བསགས་མིན་ལ་རག་ལས་བསྡད་ཡོད་རེད་དེ་ཡིན་ན་ཡང་ཤེས་བྱའི་གནས་ལུགས་གང་འདྲ་ཞིག་ཡིན་ན་ཡང་ཚེ་འདིར་སྦྱང་པ་ཡིན་ན་རྩ་བ་ཉིད་ནས་མི་ཤེས་པ་ཟེར་བ་དེ་ཡོང་མི་སྲིད་པ་རེད་བ།
དེ་འདྲ་ཡིན་དུས་དུས་ཚོད་ནམ་ཡོད་ལ་སྦྱང་བརྩོན་བྱེད་དེ་མ་མཐའ་ཡང་དལ་འབྱོར་རྙེད་དཀའ་དང་། འཆི་བ་མི་རྟག་པ། ལས་རྒྱུ་འབྲས། འཁོར་བའི་ཉེ་དམིགས་སོགས་ལ་སོ་སོས་བསམ་བློ་བཏང་སྟེ་ཤེས་པར་བྱེད་དགོས་ཡ་དེ་ཧ་ཅང་གི་གལ་ཆེན་པོ་རེད་དྲན་གྱི་འདུག གང་ཡིན་ཟེར་ན་ང་ཚོའི་ལས་འགན་གལ་ཆེ་ཤོས་གཅིག་དེ་མི་སྐྱ་ཚོར་ཆོས་གོ་བརྡ་སྤྲད་ཐུབ་དགོས་ཡ་དེ་ཆགས་བསྡད་ཡོད་རེད་བ། དེ་འདྲ་སོང་ཙང་སོ་སོའི་ངོས་ནས་བློ་ལྡོག་རྣམ་བཞི་ཙམ་ཡང་མགོ་མ་ཚོས་པའམ་རྒྱུས་མེད་པ་ཡིན་ན་གཞན་ལ་སློབ་སྟོན་བྱས་ཏེ་ཡར་འདྲེན་ཟེར་བ་དེ་སྤྲོས་བྲལ་བཟོ་འདྲ་བོ་ཆགས་བསྡད་ཡོད་རེད། དེ་ཡིན་དུས་ང་ཚོས་མ་མཐའ་ཡང་བློ་ལྡོག་རྣམ་བཞི་ཙམ་རེ་ཤེས་པར་བྱེད་དགོས་རྒྱུ་དེ་དཔེ་གལ་ཆེན་པོ་རེད་བསྡད་ཡོད་རེད། ཡང་ངས་མ་མཐའ་ཞུ་བ་དེ་ཡང་བློ་ལྡོག་རྣམ་བཞི་ལྟ་བུ་དེ་ཚོ་ཆུང་ཆུང་འདྲ་ཡིན་པའི་རྒྱུ་མཚན་གྱིས་ཞུ་བཞིན་མེད། གང་ཡིན་ཟེར་ན་བློ་ལྡོག་རྣམ་བཞི་ལྟ་བུར་སོ་སོས་འབད་བརྩོན་བྱེད་པ་ཡིན་ན་ཤེས་པ་ལ་དཀའ་ལས་ཁག་པོ་དེ་ཙམ་རང་ཡོད་མ་རེད་བ། དེ་འདྲ་ཡིན་ཙང་། ང་རང་ཚོས་དོ་སྣང་བྱེད་པ་ཡིན་ན་སངས་རྒྱས་ཀྱི་ཆོས་ལ་སྡེ་སྣོད་གསུམ་ལ་སོགས་པ་མང་པོ་ཞེ་དྲགས་ཡོད་བསྡད་པ་རེད། འདི་ཕྱོགས་༼སྒང་ཏོག་༽ལ་ཆ་མཚོན་ན་བླ་ཆེན་འདྲ་མང་པོ་ཕེབས་ཀྱི་ཡོད་རེད་དེ་མི་མང་ཚོའི་ངོས་ནས་བཤད་ན་ཆོས་ཀྱི་གནས་འགག་གང་ཡང་ཧ་མ་གོ་བའི་དབང་གིས་དགེ་སྡིག་འཆོལ་ནས་དེའི་འབྲས་བུར་སྡུག་བསྔལ་མང་པོ་ཞིག་མྱོང་བསྡད་ཀྱི་ཡོད་རེད།། བྱས་ཙང་ད་ང་རང་ཚོའི་ལས་འགན་ངོ་མ་དེ་དད་པ་ཡོད་ཅིང་དགེ་སྡིག་བླང་དོར་གྱི་གནས་མི་ཤེས་མཁན་དེ་ཚོ་ལ་དགེ་སྡིག་བླང་དོར་ཚུལ་བཞིན་དུ་ད་ལྟ་སྟོན་ཐུབ་པ་ཡིན་ན་རབ་དང་། གལ་སྲིད་ད་ལྟ་སྟོན་མ་ཐུབ་ཀྱང་མ་འོངས་པར་བསྟན་ཐུབ་མཁན་ཞིག་ཡོང་བའི་ཆེད་དུ་ད་ལྟ་ནད་འབད་བརྩོན་བྱེད་དགོས་ཡ་དེ་གལ་ཆེན་པོ་ཞེ་དྲགས་རེད་དྲན་གྱི་འདུག །
Leave a Reply