<<ཀུན་གྱི་གཞི་རྩ་མཐུན་སྒྲིལ།>>
གལ་ཆེ་ཤོས་ཞིག་ལ་དགེ་འདུན་པ་ཚང་མས་ཐུགས་མཐུན་ཁྲིམས་གཙང་བྱེད་རྒྱུ་དེ་རེད། གང ཡིན་ཞེ་ན། ང་ཚོ་ཚང་མ་དམིགས་ཡུལ་གཅིག་པ་རེད། དམིགས་ཡུལ་དེ་སངས་རྒྱས་ཀྱི་བསྟན་པ་རྒྱས་པ་དང་། འགྲོ་བ་ཐམས་ཅད་ལ་ཕན་བདེ་འབྱུང་བ་ཚང་མའི་ཞལ་ནས་སྨོན་ལམ་གསུང་གི་ཡོད་རེད། ཞལ་ནས་གསུང་པ་ནང་བཞིན་ཁོག་ནས་ཡིན་ནའང་དེ་བཞིན་དུ་དང་ལེན་བྱས་ཏེ་ལག་ལེན་དུ་བསྟར་དགོས་ཀྱི་ཡོད་རེད། རྒན་གཞོན་གྱི་བར་སོགས་གང་ཡིན་ནའང་བསམ་ཚུལ་ཅུང་མ་འདྲ་བ་ཡོང་རྒྱུ་རེད། ཡིན་ནའང་ང་ཚོ་ཚང་མའི་དམིགས་ཡུལ་གཅིག་པ་ཡིན་པས་དེ་ལ་དགོངས་པ་བཞེས་ཏེ། ཐུགས་མཐུན་ཁྲིམས་གཙང་བྱེད་དགོས་མ་གཏོགས་ཆོས་ཕྱོགས་ནས་འབད་བརྩོན་ག་ཚོད་བྱས་པ་ཡིན་ནའང་མཐུན་སྒྲིལ་དམ་ཚིག་གཙང་མ་མེད་ན། ཉམས་རྟོགས་སྐྱེ་རྒྱུ་དང་། ས་ལམ་གྱི་རིམ་པ་སོགས་གོང་ནས་གོང་དུ་འགྲོ་རྒྱུ་ཧ་ཅང་དཀོན་པོ་རེད། མཐུན་སྒྲིལ་དམ་ཚིག་གཙང་མ་ཡོད་པ་ཡིན་ན། དངོས་གནས་དྲང་གནས་ཉམས་རྟོགས་དང་། ས་ལམ་གྱི་རིམ་པ་བགྲོད་རྒྱུ་ལ་ཁྱད་པར་ཆེན་པོ་འགྲོ་གི་ཡོད་རེད། དགོན་པ་གཅིག་གི་ནང་ཡིན་ན་དགེ་འདུན་པ་རྒན་གཞོན་གཉིས་ཀྱི་བར་ཡིན་ནའང་འདྲ། བླ་མ་དང་དགེ་འདུན་པའི་བར་ཡིན་ནའང་འདྲ། དགེ་རྒན་དང་དགེ་ཕྲུག་གི་བར་ཡིན་ནའང་འདྲ། ཉེ་འཁོར་ཡོད་པའི་དགོན་པ་གཞན་ཚོ་ཡིན་ན་འདྲ། དགོན་པ་ཕན་ཚུན་གྱི་བར་ཡིན་ནའང་འདྲ་ཚང་མ་ཐུགས་མཐུན་དམ་གཙང་ཡོང་བར་བྱེད་རྒྱུ་ཤིན་ཏུ་གལ་ཆེའོ། །
Leave a Reply