ས་བསྟན་འགྲོ་བའི་ཉིན་བྱེད་དམར་པོ་མཁན་ཆེན་ངག་དབང་ཤེས་རབ་མཆོག་གི་མཛད་པ་ཉུང་བསྡུས་ཚིགས་སུ་བཅད་པ།
རྩོམ་པ་པོ། ས་དཀར།
ཆུང་ངུའི་དུས་ནས་འཇིག་རྟེན་ཁྱིམ་པའི་བྱ་གཞག་བསྐྱུར།།
སྐུ་ན་དར་ལ་བབས་དུས་གཞན་ཡུལ་འགྲིམ་འགོ་བརྩམས།།
ཁམ་བྱེ་རྫོང་གསར་སླེབས་ནས་བརྩོན་པའི་འོད་མདངས་རྒྱས།།
དཀའ་སྤྱད་དང་དུ་ལེན་མཛད་མཁན་ཆེན་མཆོག་ལ་འདུད།།
གོ་བའི་ཚུལ་བཞིན་སྤེལ་མཁས་བཅུ་གཉིས་བདག་པོ་མཆོག།
ཚོགས་གཉིས་དྲི་མེད་ལྷ་དར་དཀར་པོ་དགུང་ལ་འདྲེན།།
ཀུན་རྟོག་ཕྲ་མོའི་ཆོས་ཉིད་འོད་ཀྱི་དཀྱིལ་འཁོར་རྫོགས།།
རབ་དཀར་མུ་ཏིག་མདངས་ལས་གསལ་བར་གུས་པས་འདུད།།
གཤིས་འཇམ་ངང་རྒྱུད་རིང་བའི་འབོད་བརྡ་ཕྲ་མོ་ཞིག།
དུས་ངན་སྙིགས་མའི་ཀློང་ནས་བྲག་ཆ་གང་སར་འཁོར།།
ཡང་སྒོས་རང་ཡུལ་ཕྱོགས་ལ་གསུང་གི་བདུད་རྩི་སྦྱིན།།
དགེ་བའི་ལམ་སྣེ་འདྲེན་པས་མཁན་ཆེན་མཆོག་ལ་འདུད།།
ས་དཀར་བསྟན་པའི་པདྨོ་འཛུམ་པའི་མཛེས་རིས་ཤིག །
ས་གསུམ་མུན་པ་ཁད་ཀྱིས་འབར་བའི་རལ་པ་ཅན།།
ས་འཛིན་དཀར་པོའི་འདབས་ནས་འཁྲུངས་པའི་བླ་ཆེན་ཞིག །
ས་བསྟན་ཡང་དག་སྐྱོང་མཛད་མཁན་ཆེན་གང་ལ་འདུད།།
རང་ཡུལ་སྡིག་ལས་མུན་པ་ཁྱུར་མིད་གཏོང་ཐེངས་རེར།།
དགེ་ལས་སྣང་གསལ་སྒྲོན་མེས་མ་ཎིའི་དབྱངས་རྟ་གྱེར།།
རིམ་བཞིན་རང་ཡུལ་ཕྱོགས་ལ་བདེ་བའི་འབྲས་བཟང་སྨིན།།
ཕ་ཡུལ་འདྲེན་པའི་དམ་པ་སྙིང་གི་དབུས་ནས་འདུད།།
གཏིང་མཐའ་མི་མངོན་རིག་པའི་གཞུང་ལུགས་རྣམ་དཔྱོད་ཡངས།།
ཐབས་དང་ཟུང་འཇུག་སྒོ་ནས་ནམ་གྱི་མཁའ་མཐའ་ཡས།།
བྱམས་རྩེའི་འོད་ཀྱི་སྤྱན་ཟུང་རིགས་དྲུག་ཀུན་ལ་གཟིགས།།
འགྲོ་བའི་ཉིན་བྱེད་དམར་པོ་སྙིང་གི་རུམ་ནས་འདུད།།
ངེས་མེད་དུས་ངན་རླུང་བུས་རབ་ཏུ་སྒྲིབ་ན་ཡང་།།
ཉིན་བྱེད་དམར་པོའི་འཛུམ་མདངས་མ་ཡལ་ལྷག་པར་གསལ།།
སེམས་ཀྱི་མུན་པར་སྤྲིན་པའི་དར་དཀར་འཁྲིགས་བྱས་ཏེ།།
དཀར་པོའི་ལམ་བཟང་ཡང་དག་སྟོན་པར་དང་བས་འདུད།།
ངག་གི་སྒྲོན་མེས་གཞན་དོན་མ་ལུས་ལེགས་པར་བསྐྱངས་།།
དབང་བསྐུར་བྱིན་རླབས་ཟབ་མོས་སྡིག་སྒྲིབ་ཐམས་ཅད་བྱང་།།
ཤེས་བྱའི་རྣམ་པ་ཐམས་ཅད་མཁྱེན་སླད་ཐུགས་ཀྱིས་སྨོན།།
མཁན་ཆེན་ངག་དབང་ཤེས་རབ་མཆོག་ལ་དང་བས་འདུད།།
Leave a Reply